السارقة الجزء الخامس

  مرت 5 أشهر ونصف على ناديا داخل جدران السجن اللي كان مزيج مابين الملل والضجر والحزن والإحساس بالقهر والظلم و بين الحيرة  أيضا والامل في يوم الغد اللي مباينلو ساس من راس 

وكان كل اسبوعين كتجي مريم تزورها واحيانا كتجيب السي عيسى وعزيزة يشوفوها

وهي فالسجن تعرفت على كاع البنات اللي تما ولاو كاع كيبغيوها لحسن تعاملها 

وكلامها وحكاياتها اللي كانت كترويهالهم كل ليلة وطبعا اللي كانت كتقرا فرواياتها 

ومكان باقيلها غير 15 ليوم وتخرج مكانتش الارض سايعاها وكانت فرحانة بزاف اخيرا غادي تحس بالحرية وترجع وسط اهلها وناسها وتعوض مريم على كل اللي عاناتو باش توفر لقمة العيش والدوا لجدها السي عيسى ..

وجا واحد النهار ودخلت سجينة اسمها جميلة غير دخلت الكل طارو عليها يبوسو فيها ويعنقو ويسلمو وناديا استغربت هاد الاستقبال الحافل الغريب بالنسبة ليها لهاد السيدة اللي كانت تقريبا بعمر الاربعينات شوية مبعد مكملو السلامات جات عند ناديا وحدة منهم 

قالت لناديا اللي كانت تقرا فكتاب ومداياهاش كاع اجي سلمي على لالة جميلة وعطيها الاحترام ديالك

ناديا طلعت حاجب ونزلت حاجب ومناضتش غير من بلاصتها كاتلها فرصة سعيدة 

الكل استغرب تصرف ناديا ومبغاوش وبقاو يشوفو فردة فعل جميلة اللي صحابلهم غادي تعطي اوامر لشي وحدة باش طير عليها بشي تشنشيفة على هاد التكبر والغرور اللي فناديا لكن بالعكس ابتسمت

ووحدة مبغاتش على جميلة ودارت فناديا اللي اصلا كان جنها فيها ماللي دخلت 

سعيدة:- اي نتي شنو حاسبة على راسك اجي سلمي على لالة جميلة ؟؟

ناديا(نزلت الكتاب وبلامبالاة):- وراني سلمت

سعيدة:- ماشي هاكدة السلام راه نتي مكتعرفيش شكون هي لالة جميلة راه هه..

جميلة:- شتتت سكتي اسعيدة وكل وحدة تمشي لمحلها

سعيدة:- ولكن راه..

جميلة(بنظرة تخوف فسعيدة):- قلت كل وحدة تمشي لمحلها  

سعيدة(بغضب):- انمشي نوجدلك بلاصتك فيساع

جميلة(بلاما تحيد عينيها على ناديا):- تتت غانبدل البلاصة 

سعيدة:- وفين غاتكوني؟؟

جميلة:- قدام هاد البنت 

الكل تخلع فهاد الموقف وناديا بقات مبهوضة تشوف فهاد جميلة اللي ابتسامتها مفارقاتش وجهها وخلات الشك يدخل لقلب ناديا اللي رجعت تقرا فكتابها بلا مبالاة وخا جميلة خدات السرير اللي جنب ناديا وختارت ديك البلاصة مابين الكل 

مرت ايام وجميلة غير كتراقب تصرفات ناديا اللي صافي نظرات جميلة وسرحانها فيها خلاو الفار يلعب فعبها وقررت تكلم جميلة فاي فرصة تجي قدامها خرجو للفسحة اللي كيخرجوهم يكلسو فيها شوية جميلة كانت محاوطة بمجموعة ديال البنات اللي باغيين يكسبو رضاها 

اما ناديا كانت فجهة بعيدة عليهم وكتشوف فجميلة وتفكر واش تمشي لعندها ولالا وكيفاش غادي تكولها راه تصرفاتك غريبة؟؟

وهيا فظل هاد التساؤلات بانتلها جميلة ناضت من بين ديك المجموعة وجاية قاصداها فين كالسة وقالت فخاطرها اففف هي راها جاياني وحصلة هادي

جميلة:- يمكنلي نكلس معاك 

ناديا:- تفضلي المكان مكانك 

جميلة(كتشوف فالسجينات):-شتي هاد البنات اللي كتشوفي هنا كلهم مظلومات

كاين اللي ظلمتها الدنيا كاين اللي ظلموها والديها كاين اللي ظلموهم الناس رجالتهم.. عائلاتهم 

بزاف الحالات تشوفيهم هنا وتلقايهم كلشي كيسعاو لحاجة وحدة 

ناديا(باهتمام):- اللي هيا ؟؟

جميلة(شافت فناديا):- أنهم فقط يعيشو 

ناديا:- فعلا بصح احيانا بنادم هو كيظلم راسو وكيدخل حالو فمتاهات تقدر تجيبو هنا 

جميلة(رجعت تشوف فاسجينات):- مع ذلك كاين دافع واحد هو أنهم يعيشو وسط هاد المجتمع اللي مكيرحمش 

 ناديا:- صح مجتمع مكيرحمش الناس مكترحمش القدر مكيرحمش ... هه كلشي تخلط

جميلة:- بصح كاينة فرص إلى عرف الواحد يستغلها مزيان يقدر يعيش ويكون قادر يدافع على راسو 

ناديا:- فرصة ...؟؟ تتت انقرضت

جميلة:- عرفتي الانسان كتجيه فرصة وحدة فالعمر ديالو الى مستغلهاش عمرها تعاود تجيلو مرة اخرى 

ناديا:- كاينة لكن يبقى هادشي فيد القدر بوحدو 

جميلة:- ماشي فيد القدر فقط لكن فيد الانسان خصو يكون ذكي باش يعرف الفرصة اللي غاتقلب حياتو كلها واش هيا هاديك ولا لاء

ناديا(شافت فجميلة):-اممم طيب شنو هيا الفرصة اللي غادي تقدميلي انا دونا عن بقية البنات 

لانه واضح انني الوحيدة اللي دخلت لراسك من نهار جيتي

جميلة(شافت باعجاب باهر فناديا وضحكت):- الله شفتي علاش ختاريتك دونا عنهم

محيت فهمتيها وهيا طايرة 

ناديا:- كان واضح مي حتى الآن عاد تأكدت ... مي مخبرتينيش شنو هي الفرصة اللي غاتقدمي لوحدة بحالي؟؟

جميلة :-  نتي زوينة بزاف وجمالك مظلوم فهاد الدنيا و..

ناديا(ناضت منفعلة):- الى كنتي تفكري انني نستغل جمالي فحاجة خارجة الطريق فراكي كتحلمي 

جميلة(بحدة فعينيها):- كلسي بلاصتك انا مكملتش كلامي عاد

ناديا(كلست برغم كبريائها):- هانا

جميلة:- بغيتك تخدمي معايا 

ناديا:- فاش؟؟

جميلة:- انا ختاريتك من بين كل الموجودات هنا محيت تاوحدة فيهم متحمل المواصفات اللي كتحملي انتي ذكاء رشاقة جمال وما الى آخره

ناديا:- والمطلوب ؟؟

جميلة :- تخرجي من مدرستي 

ناديا:- أي مدرسة تقصدي ؟؟

جميلة:- السرقة 

ناديا(انفجرت بالضحك):- اهههههههههههههه هههه هههه مدرسة السرقة الله الله

تا السرقة ولات ليها مدرسة والعجب 

جميلة:- الاحسن تنقصي صوتك باش منبقاوش هنا وتضاعف المدة 

ناديا:- نتي حماقيتي وقيلة اشمن شفيررة واشمن سرقة انا نسرق معمرني درتها ولا نديرها 

جميلة:- عارفة معمرك درتيها وسبب دخولك لهنا غير ظلم لكن غاديريها 

ناديا:- تتت غلطتي فالعنوان 

جميلة :- اممم كيما عجبك مي خليني نفكرك بنهار اللي غاتجيني فيه 

انا خارجة غدا اصلا دخلت على قبلك فقط 

ناديا:- يعني كنتي مراقباني ياك؟

جميلة:- حبيبتي هاد الحبس كلو باشارة وحدة يدخلوني ويخرجوني ونتي كنت اكثر الاختيارات اللي انا لقيت فيهم الامل

ناديا :- وانا مباغياش 

جميلة:- خصك تبغي من اجل جدك وصاحبتك ومها وباش تعيشي

ناديا:- كولومبو ههههه عارفة عليا كلشي ماشاء الله 

جميلة:- طبعا خدمتنا ماشي ساهلة مغاديش نجيب وحدة من طرف خصني نكون عارفة اصلها وفصلها 

ناديا(جات ماشية):- مع ذلك تعبتي راسك اسيدة جميلة انا مغاديش نخدم معاك

ونسرق الناس فلوسهم

جميلة:-ههههه شكون قالك غادي تسرقي الفلوس ؟؟

ناديا:- وليه شنو غادي نسرق

جميلة:- الى قررتي تخدمي معايا تما انخبرك

ناديا(بكبرياء وتعالي):- همم ألاّء انا مموافقاش الله يعاونك         

  جميلة:- اممم اللي عجبك نهار تخرجي غادي تلقاي رقم تيليفوني ضمن اغراضك الشخصية اتمنى تتاصلي بيا لاحقاش غادي نستناك 

ناديا(وهي ماشية):- ان الرقم الذي تطلبونه خارج التغطية يرجى المحاولة لاحقا

جميلة(بقات كتضحك وناديا بعدت عليها):- هههه واخيرا لقيتك أناديا..