من اللحضة اللي حطات فيها راسها وعقلها وبالها مع واءل .. يمكن حيت كازا كتفكرها بيه .. يمكن حيت ماخلات هي وياه حتى قنت ومنين ما دازت كتفكر ايامتها معاه .
صبح الحال وناضت بكري .. لبسات سروال توب طالع من الكرش وواسع من لتحت وبودي قصير من الفوق بالخيوط من لكتاف واسع على الكرش جاتها اللبسة زوينة وانيقة فالازرق . صندالة دالصبع وصاكها وريحتها وخرجات طالقة شعرها وجامعة لافخونش منفوخة لقدام . ايلاينر فوق العين وجبدات شفترها ومشات تلاقات بمها وختها كيتسناوها .. شدو طاكسي ضاحكين فرحانين جيهت البحر يتغداو الحوت .. جلسو فالطبلة ضربو الحوت مع راسهم وبقاو تما حتى ادن العصر عاد ناضت مها كنوصيها ترد بالها وترجع بحالها لاوتيل بكري . تفارقو ومشا فاتي لمعاريف كتسرى ودور حتى عيط ليها كمال فالتيلي
كمال: الو فاتي .. فينك راه وصلت الصباح فين نتي؟
فاتي : انا فالمعاريف كندور .. توحشت كازة
كمال : وصافي فين نتي نديرو شي قهيوة ؟
فاتي: انا حدا ماكدو خديت شي حويجات وغادية كندور
كمال : تسنايني تما حدى ماكدو انا جاي دابا .. راه قريب ليك
قطعات معاه ودخلات خدات ماك فلوري وموني ديو و طلعات لفوق تجلس .. يالاه جات تجلس وهي طيح عينها على واءل جالس تما مع ولد وبنت كبار كيتجمعو قدامهم الماكلة كيضحكو ، باقي هوا هوا .. نفس البلية دالكاسكيط على راسو وسبورتيف .. دجين وتيشورط كحلة والفورمة .. ماتبدلش .. دورات وجهها كترعد قبل ميشوفها وبدات ترجف و ورجليها خواو بيها ماعرفات تنوض ولاتجلس .. خواو بيها الركابي ودارت بيها الدنيا وناضت وقفات بغات تمشي حتى كيوقف عليها كمال كيفرنس سلم عليها بالوجه وقال
كمال : مال وجهك صفر ؟ مالكي
فاتي : والو .. غير.. يالاه تمشيو
شد ليها فيديها لقاهم باردين وهي تالفة فبلاصتها وجلسها كترعد .. مابقات عرفات مادير
فاتي : يالاه نبدلو البلاصة..
بغات تنوض وهوا يشدها فيديها وقال
كمال : جلسي مالكي كترعدي
مع الشدة فاليد وهي صفرا عاطية لواءل بضهرها كيوقفو عليهم جوج عيالات بجلالبهم مخرجين عينيهم ..
- حصلتيييي يااااا ولد الحراااااااام ... ياااا الكاااافر ياااا الغداااااار
مع غوات مرت كمال اللي وقفات عليهم هي وحدة اخرى معاها كلشي تلفت ووقفات فاطمة الزهراء كترجف ماعرفات والو وتلفت واءل جيهت الصدع وهوا يتصدم ومن الصدمة وقف حال فمو
وقف واءل كيشوف مصدوم فكمال وهوا شانقة عليه مرتو .. اما فاطمة الزهراء فكانت مدرقة بحيط خشبي مشبك وعاطياه بالضهر مشافهاش وركز مع كمال والفضيحة ديالو .. تصدمات فاطمة الزهراء ووقفات كترعد ماعرفات مادير .. داخت و هزات صاكها بغات غير تخوي البلاصة .. جراتها المرى اللي مع مرت كمال بغات تنتفها لاكن تدخل سيكوريتي والناس دماكدو واكتافات تخوي عليها مشروب كوكا كولا وكلاص ماك فلوري طلاتها كاملة ووسخات ليها حوايجها .. حرات فاتي وبقات ساكة حاطة يدها على فمها .. كلشي ناض وقف كيتفرج .. جروهم السوكيرتي لبرا كيدفعو فيهم وتسلات فاتي مهبطة راسها بالزربة دخلات للحمام اللي قدامها من جيهة اخرى وفلتات من عينين واءل اللي كان على شوية يشوفها .. دخلات سدات عليها وبدات تبكي وتشهق قدام المرايا مامتيقاش شنو شافت عينيها ومن الصدمة تبلوكات مقادراش تيق .. بدات تخوي على وجهها الماء وتحط يدها على صدرها كتشهق ، حوايجها توسخو وحالتها حالة .. كفاش غتخرج من تما قدام الناس .. كفاش غادي تشوف واءل اللي عند بالها شافها .. هزات الصاك اللي شرات فيه الحوايج ودخلات للطواليط بدلاتتهم بكسوة قصيرة حتى الركبة وخشاتهم فصاكها وخرجات كتنخصص للمراية غسلات وجهها ومسكات الكحل اللي ساح وجمعات شعرها سفنجة مخربقة لفوق . هزات صاكها وحوايجها ومشات جيهت الباب ..يالاه حلات الباب وهي تساطح مع واءل داخل للطواليط . دخلات فيه دخلة وحدة تا ضرها نيفها وهي تهز راسها فيه . .تصدم فاش شافها وبقا واقف بلاصتو مصمر .. اما هي هبطات راسها بغات دوز وهوا يشدها من يدها
في حين الحيحة نايضة قدام ماكدو ومرت كمال واللي معاها واقفين كيسناو فاتي تخرج .. المقاتلة نايضة بين بين كمال ومرتو . كيجرها وكترجع للباب باغا دخل ورجال الامن مانعيها وماعرفوش حتى شكون هادي اللي كيتسناو لداخل حيت طلعو فاللحضة اللي تدخلو فيها الناس وهربات فاتي للطواليط.
فاتي : ماعرفتش كنت جالسة فماكدو وجا هادا جلس حدايا باغي يتعارف ووقفات عليه هادي !!! والله ماحيت معاك ومكنعرفوش اصلا
كمال : رتاحيتي دابا .. راه مكنعرفهاااااش مابيني وبينها وااالو درتي الشوهة على والو
مرت كمال : سكت با الشلاهبي وانا قريت مساجاتك معاها كااامليين يا الكلب ... حييدووو ليوم نقتلها
وقف ليها واءل مخرج فيها عينيه وقال
واءل : واسيري سيري .. سيري بدلي الساعة بأخرى راجلك راه كيهضر مع النص بنات المغرب .. سيري الله يعفو عليك نتي وياه
شدات فيه فاطمة الزهراء من اللور كتستحمى بيه وكتشوف جوج عيالات باغيين ياكلوها وواءل واقف ليهم
فاطمة الزهراء : واااسيري الله ياخد فيك الحق نتي وداك راجلك خرجي ليا بوحدك وتشوفي شندير ليك يا البقرة ونتوما كتحاماو هااا
شدها واءل من يدها وقال : يالاه فحالك ... خليها تهلل بوحدها
شدات فيه خايفة وكتشوف فالناس كيتفرجو فيها .. يالاه بغات تمشي وهي تجرها وحدة من شعرها من اللور طيحاتها .. مع الدور جمع معاها واءل بتسرفيقة للوجه تا رعفات .. ناضت فاتي بالفقصة والغدايد طارت ليها على وجهها هبطاتو ليها بدافراها كامل وهي طيح غيبات ليهم فالارض .
تخلع واءل وتحنى عندها .. دارو بيها كيرشو عليها فالماء هوا وصاحبو والبنت اللي معاهم .. تخلع كمال والعيالات وبغاو يخويو البلاصة مللي شافو اقضية حماضت .. لاكن يالاه بغاو يمشيو وهوا ينوض ليه واءل شنق عليه وعطاه كلاك للحنك تل دار فبلاصتو وجر المرى اللي نتفاتها بيدو كان غيزطم فيها لو ما تدخلو الناس بعدوه كينهج ورجع عند فاتي بعد عليها الناس وهزها داها للطموبيل حطها اللور .. جلس حداه صاحبو وجلسات اللور شادة لفاتي راسها على رجليها البنت اللي معاهم وكسيرا كيطير بيها .
تصدم ووقف الطموبيل كيشوف فيها .. ماقدرش يقول حتى كلمة .. حدر راسو مجروح في حين حلات الباب نزلات وقالت بابتسامة
فاتي : شكرا وسمح ليا عدبتك معايا
قال وهوا كيشتت النضر قدامو مشافاش فيها : الله اودي هادا واجب... الله يسخر ليك
ديمارا الطوموبيل وهي غادية جثت باب الاوتيل مخطوات تقال كتسنى يتبعها ولا ولا يوقفها يستفسر معاها ، لاكن خاب ضنها فاش سمعات الطموبيل مشات وتلفتات بأسى متبعة ليه العين .. للحضة ندمات على الكلمة اللي قالت .. مكانتش متوقعة منو يسكت ... وحتى الى يهضر اش عندو ميقول ؟ يوقف فطريق ختارتها هي؟ شكون قال ليه راه فرحانة وكتوجد ونسات اللي فات .. علاش يخشي راسو فشي حاجة مكتخصوش ؟ كل واحد كيقلب على اللي تسلكو واللي تريح بالو وينكن فاطمة الزهراء لقات راحتها مع شخص جديد وناوية تبدى معاه .. علاش غيعتارض طريقها ؟ بصفته شكون ؟ صافي رجع من الماضي و اي انسان راه عندو نفس .. وهوا ماعطاتوش نفسو يدل راسو بشي سؤال ولا يسمع شي جواب ماشي هوا هاداك . صفحة وتطوات وداز عليها وقت .. العقول تبدلات .. مشا وقت وجا وقت جديد ومعاه ناس جديدة . هادي نضرة فواءل والزاوية اللي شاف منها على حسب الموقف اللي تحط فيه معاها .
طلعات فاتي للاوتيل وسدات عليها .. جلسات على جنب السداري وقلبها كيضرب بقوة باغي يسكت ... حتى قالت نساتو ويمكن جا اللي ينسيها فيه... لاكن شنو اللي طر علاش يوقع ليها هاكا... علاش حاسة براسها ضعيفة .. فشلات وقلبها غيخرج من بلاصتو ... علاش دارت بيها الدنيا فاش شافتو فماكدو .. علاش هاد الاحساس .. فكرها فأيماتهم الاولى اللي يالاه تعارفو فيها .. فاش كانت كتبغي تلاقاه .. قلبها كيبغي يسكت .. وبالاخص فاش كتكون خارجة مع صحاباتها حتى كيخرج فيها ولا تلاقاه فالزنقة ... ركابيها كيشفلو وقلبها كيطيح فالارض ، نفس الشعور والاحساس كيراودها من جديد .
مشات ليها الشهية ماقدراتش تاكل .. ومشا من بالها موضوع كمال والجريمة اللي ارتاكب فحقها ... ماعطاتش اهمية للموضوع كتر ماعطاتو لشوفتها فواءل وهوا جالس فماكدو بعد عمين من الفراق .. مدة طويلة بزاف ... قالت انها بردات والقلب هنا .. ولاكن وقع العكس ... القلب اللي قالت عليه رتاح .. كان ناعس وصافي وفجأة فاق .
ماداهاش النعاس .. الليلة كاملة وهي كتخمم ساهيا ومرة مرة تنهد حتى صبح الحال عاد نعسات .
فاقت معطلة ومع حلة دعينيها اول مطاح فبالها هوا واءل .. ومن ديك الساعة وهي كتفكر .. تفطر وتفكر فيه .. تغدا وتفكر فيه .. خارجة الزنقة تقدا وتفكر فيه .. كتخيلو داز ولا جا عندها .. ولا جالسة هي وياه فشي بلاصة .. كل مرة يبان ليها حتى لقات راسها واقفة عند واحد مول الخواتم ديال النقرى كتشوف فيهم .. شادة خاتم رقيق فيديها في نجمة كضوي وعقلها كيفكر بعيد ..
دارتو فيدها قيساتو وخلصاتو وخرجات .. شدات طاكسي وماوقفات غير فالحي اللي كانت ساكنة فيه ووقفات بعيد .. شافت الجرات مجمعين فالباب بحال العادة... الصابو والجلالب والفولار عوج كيتناقشو ويهضرو بالجهد .. ضحكات بسخرية وتفكرات ياماتها فاش كانت توقف معاهم ، شافت بالنضرة اللي كانو كيشوفو بيها الناس فيهم .. اما هي فديك الوقت كانت كيجيها داكشي عادي حيت ولفات بيه . ماتيقاتش راسها ان حتى كانت بحالهم وتوقف معاهم .. غواتهم كيتسمع منين ومنين وسوقهم خاوي .. شاغلين راسهم بالنميمة وتالخربيق حيت معندهم لا شغل لا مشغلة ولا حتى حاجة فاش يتهلاو .
بقات واقفة كتسنى واءل يهبط . ولا يدوز من تما واخا غير تشوفو وترجع بحالها .. عيات تسنى مابانش ليها .. والوقت كامل اللي بقات واقفة فيه كانو العيالات مزال معياو من الهضرة .. اللي داز يدوز وسطهم واللي جاي يشوف ويقول " لا حولة ولا قوة الا بالله العلي العضيم " حشمو الرجال يبقاو غاديين جايين دايزين قدامهم وهما معمرين باب العمارة بحال بالهضرة والحسابات الفارغة .
عيات تسنى ورجعات مشات بحالها للاوتيل فطاكسي . طلعات لبيتها وجلسات مكمشة كتفكر وتبلاني .. عقلها كامل مع واءل . انا النمرة ديال الاتيليفون اللي كانت عندها هرساتها وشرات وحدة اخرى سيفطاتها لخالتها وامها والخدمة ديالها ومحسات الميساجات اللي كانت جامعة بينها وبين كمال ماخلاتهمش لا عندها لا عندو .. دارت مسحة جماعية لكلشي وطاحت نعسات
الصباح ناضت لبسات سورفيت رمادي سروال كولون وفيست ديالو خفيفة من لفوق بالقب وسبرديلة بيضاء .. طلقات شعرها ودارت مكياج وريحة خفيفة وخرجات شدات طاكسي هازة صاكها طويل صغير جنب فالكحل . حطها حدى عمارة شوكة على االشارع لكبير تحتها كراجات كبار شوكة 3 على الشارع اللي وقفاف فيه هيا و3 على الشارع لاخر فالدروة بالزاج فيهم 6 ديال الموبيلات جداد لداخل كيبريو كل وحدة كتشوف جيهت الزاج اللي قدامها . تنهدات ودخلات لداخل .. البروودة حيت لاكليم شاعلة .. وتما مكتب بجنب الطموبيلات جالس فيه واحد استقبلها بابتسامة .
- بنونجور مادموزيل ... مرحبا ... تفضلي .
جلسات كدور فراسها بارتباك وابتاسمات قاءلة
فاتي : شفت .. شفت البانو على برى فيه عندكم طوموبيلات جداد وحتى لقدام ... وكتكريو حتى الكرى اولا؟
- اييه الاللة مرحبا اش حب الخاطر .. كلشي موجود واللي مكايناش نجيبوها ... عندنا طموبيلات كندخلهم من برى معشرين وباقيين نقيين شوفي نتي اللي عجباتك؟
الصباك ثاني مع العشرة ناضت لبسات نفس حوايجها وقادات الحالة زيزات .. مالها غاظية تشوفو هوا !!! اصلا غادية غير باش تشري طوموبيل . الى بغا يقول شي حاجة خليه يقولها مهم هي على الطموبيل غادية .
شدات طاكسي وريحة العنبر منها كتعطعط من بعيد ومشات لاجونص .. دخلات كتنهد لقات نفس الشاب استقبلها مرة اخرى وسلم عليها
- جلسي تفضلي
فاتي: السي واءل حفيض مزال ماجا ؟
- شوية ويجي .. جلسي .. تشربي شي حاجة ؟
فاتي: مو ميغسي
جلسات كدور فعينيها وتسنا .. قلبها كيزدح وكل شوية دوز شي كاط كاط من برا وتقول هوا .. عيات تسنا .. دازت ساعة وهي تلفت عند الولد اللي كيشوف بيسي وقال
فاتي: واش مزال معطل بزاف؟
- لالا غيكون عندو شي حاجة وصافي .. قالك غيجي غيجي
فاتي : في حيرة ) شفتو تعطل بزااف
- غير صبري دابا وهوا هنا
زادت تكمشات كتسنى وساكتة حتى ضربات 12 وعاودات سولات الشاب قالها ليها نفس الهضرة .. عيات بالجلاس وناضت خرجات طلات من الشارع ورجعات جلسات .. ضربات الوحدة وهوا يصوني الفيكس
- الو ... وي ؟؟ ... امم .. اووك مسيو .. اوك (قطع ) مادموزيل سمحي لينا ... السي حفيض قالك الى كان ممكن حتى للربعة وديك الساعة رجعي تلقايه هنا
فاتي : وااااش من لباااارح وانا نتسنا ودابا كتقول ليا حتى الربعة !!!! واش انا مسالية ؟!!! واش هاكا مولفين تعاملو مع الكليان؟!!!! اش قلة الادب فييه ياكما ناوي يعطيني طوموبيل فابور ولا !!! راه جايا برزقي ماشي جايااا نسعاااه
- تهدني عافاك ..وسمحي لينا بزااف راع غيكون امر طارء حيت عمرو ما وقع ليه بحال هاكا ؟ اول مرة .. اللع يخليك جلسي رتاحي
فاتي: ماااتشدش فياااا .. مااااشي من لبااااااارح وهوا كل شوية جاي لا بلاتي تسناي لا بلاتي حتى الربعة! من اللول مايقولش ليا انا جاااي نمشي نقلب بلاصة اخرى اش هاااد التعامل ديال الزفت هاااادااا .. ماتقصنيش ماتقولش ليا لا بردي لا زمري الله يرحم باك ماشي تعامل هادا ..
هي كتحيح مكشكشة وصوتها وسط لاجونص كيتسمع بالجهد .. فديك اللحضة دخل مع الباب السوارت فيدو وكاسكيطة كحلة على راسو ... لابس دجين وتيشورط كحلة سامبل لقاها محيحة .. شافتو وهي تسكت ودورات وجها كتنهج وترد شعرها اللور معصبة
واءل : السلام عليكم ؟
قالت بصرامة مدورة وجهها : وعاليكم السلام ... ماشي تعامل هادا اللي درتي معايا ! قولي ماجايش نمشي بلاصة اخرى ماشي من الصباح وانا كنتسنى راه حتى ان عندي شغلي ماشي مسالية نبقا كتسنى
سكت معاودش هضر .. دخل بيها لساحة كبيرة ديار بيها الصور عالي وفيها بيت واحد كبير .. مستفين فالساحة اشكال وانواع الطموبيلات الكبيرة والصغيرة ، سبق ليها جات لهاد البلاصة اول مرة وهي فاش تعرفات عليه وتزوجات بيه ، نزلات ووقفات كتسناه ينزل .. جلس كيهضر فالتيليفون لداخل وهي واقفة كتسنى فاللخر مشات عندو للزاج وقالت بغضب
فاتي: واش غنبات هنا كنتسنى!
بعد تيلي وقال : شوفي اللي بغيتي ها الطموبيلات قدامك ! ديال 6 دالملوين ها هما راه مكتوب عليهم الثمن وجميع المعطيات .. شحال ضاربة وشحال فيها من خيل وكاع داكشي اللي باغا تعرفي.
جمعات النفس وطلقاتها ومشات كدور بين الطموبيلات وتشوف وكل شوية دور تشوف فهي مزال كيهضر قالب وجهو للجهة اللخرى وهاز شي وراق فيدو مشغول .. سالا الهضرة ونزل عندها قال
واءل : ماعجباتكش تا وحدة ؟
فاتي: عجباتني هادي ... مي غالية شوية 7 بزاف
واءل : مهم عجباتك هادي ؟
فاتي: وي هادي
واءل : رجعي لاجونص تما يتفاهم معاك السيد على الثمن .. هوا اللي مكلف وعارف بشحال دخلات كل وحدة فيهم .. انا معاقلش ومنقدرش نعطيك شي ثمن .
دورات وجها كتسوط وقال : امم. واخا شكرا
واءل : غتخرجي مع هاد الباب ودوري على ليمن كاينين الطاكسيات تما ... انا مزال معطل هنا
فاطمة الزهراء سخنات .. الصهدة طلعات معاها ..مالقات ماتقول ، ماكرهاتش تقجو لاكن علاااااش؟ علاااش تقجو ؟ ماشي هي اللي بغات تجي من الاول بوحدها ! اذا كانت ترجع بوحدها . الواجب دارو معاها كأي كليانة وكثر مع العلم ان اللي بغا يشوف شي سيارة كيجي ليها فطاكسي . سكتات كتفكر لقات الحق معاه . تبسمات بزز وقالت
فاتي : شكرا اسيدي
واءل : بابتسامة ) هادا واجب
حنا راسو ومشا دخل خلاها واقفة كدور بلاصتها .. تمشي ولا تبقا! تمشي اش غتبقا وفين تبقا ! خرجات من الباب غادية مع الشارع حتى للطاكسيات وركبات رجعات لاجونص هازة خنافرها .
فاتي: السلام ...
- وعليكم السلام مرحبا شفتي اللي عجبك ؟
فاتي: داكشي علاش جيت .
- مهم اجي وريها ليا هنا والى بغيتي تديها لشي تكنيسيان ولا تجيبيه ليها يقلبها ليك
قلبات عينيها كتنفخ وتمتم بوحدها
فاتي : تقلبها ليا مالي عنتزوج بيها! (دارت عندو) غير طلقني راه مسافرة وخاصني نديها معايا .
- اوك اجي وريني اينا وحدة
وقفات حداه كتشوف حتى بانت ليها وقال
فاتي : هادي .. شحال دايرة؟
- هادي 70000 درهم
فاتي: بزاااف... شحال تبقى؟
بقات تجار معاه وتجابد حتى خلاها ليها بسبعة ونص بزز وعمرهوا وياها الوراق وخرج معاها فالطموبيل للمقاطعة كاليزا معاه الاوراق ورجعها حتى للساحة ديال الطموبيلات دخلات لقات طموبيل دواءل مكيناش يعني هوا مكاينش . عطات الشيك فيه الفلوس وركبات فطموبيلتها فرحانة بيها وخرجات كدور وتسارا عاجبها الحال حتى عيات ورجعات للاوتيل تركنات . تاصلات بالريسطو يويدوها شي اسبوع اخر على قبل وراقها اللي قالت ليهم ودخلات ليهم الشكلي فالعكلي ولقات مول الريسطو اصلا مبهلل مكيقول والو جاتها من الجنة والناس .
نعسات والصباح تلاقات مع امها وختها . شبعو دوران النهار كامل حتى عيات ورجعات لاوتيل نعسات . اليوم الموالي ناضت بقات دور دور تاعيات .. اش دير مادير .. وقفات الطموبيل الحمرى قريبة من لاجونص وهي تخور فراديو كاسيط ديال الطموبيل حتى خسراتها وديمارات الطموبيل رجعات لاجونص . دخلات معبسة كتشير بيديها
فاتي :عيط ليا على مول الشي يجي يتفاهم معايا ... كضحكو عليا ولاشنو! عيط ليا عليه يجي دااااابا انا ممحركاش من هنا تا يجي نتفاهمو على هاد الخدمة اللي دار ليا
جلسات ليه فوق الكرسي شاعلة .. عيا يهضر ويسول وهي تقمعو
هز عينو فيها مطلع حاجبو وهي دور شافت فيه عاد استوعبات
فاتي: الشفااار اللي جرو ومكرهتش نشدو ونجمع عليه الناس .. شنو ندير دابا ؟
واءل : خاصو يتبدل
فاتي: واخا بدلو لي
واءل :غادي تدي الطموبيل وتشريه ليها من جديد من محلات البياس ديال الطموبيلات حنا مكنبيعوش البياس .. والة بغيتي يتقام عليك شوية رخيص شوفي لافيراي
فاتي: كفاش!!! وعلاش ماشي نتوما اللي غتبدلوه؟
خرج من طموبيلتها وقال : حنا بعناها ليك صحيحة فصيحة وبفمك قلتي الشفار . مايمكنش اللي خصرتيها تجي عندنا حنا نصلحوها ليك اشمن ربح فيها على هاد الحساب
فاتي: واخا .. واخاااا سيدي الله يرحم الواليدين
طلعات زعفانة لطموببلتها وكسيرات ساخطة .. جاتها البكية وعرفات راسها خسراتو ومعندها كي دير ترجعو .. رجع كيتعامل معاها عادي جدا بحال الى عمرو عرفها .. تستاهل هي اللي دارتها راسها .. اش داها تقول ليه كنوجد لعرسي! ومن بعد الله يسخر علاش غيحرق دمو مع وحدة كتبني فمتسقبلها مالو ما عندو نفس !
مشات بحال صلحاتو راسها .. تقال عليها الهم ومقادراش ترتاح بالمرة .. عقلها مع واءل وراسها غيفركع .
دازت 4 ايام وهي على نفس الحال .. مشا واءل .. باشمن سبة تاني غادي تلاقا بيه .. والى ماقلبلتش عليه هي ماعمرو غيفكر يقلب عليها هوا .. ركبات طموبيلتها ومشات كدور .. الايام كتجري مابقا ليها والو ترجع لأكادير .. اش دير مادير مشات تاني لاجونص وهاد المرة وقفات بعيد كتشوف فطموبيلتو واقفة حدا الباب .. بقا عاسة عليه حتى خرج هوا ونفس البنت ركب زاد وزادت حتى فاطمة الزهراء موراه .. خلات حتى بعد وفات لاجونص وقربات من طموبيلتو من اللور . يالاه وقف فالسطوب وهي دخل فيه من اللور قاصت ليه الطموبيل
بنت الحومة الجزء السادس
محتوى القصة
التنقل بين الأجزاء