صورة مصغرة لـبنت الحومة الجزء الثامن والأخير

بنت الحومة الجزء الثامن والأخير

bent tamn l2akhir bent l7oma
رواية بنت الحومة لغزال تراست

ماتهنات حتى سمعات صوتهم داخلين مع الباب عاد جلسات كترجع النفس وتردد
فاتي : الله ياربي حمدتك وشكرتك .. حمدتك وشكرتك ياربي ... كان غيسكت ليا القلب .
تفرع عليها الباب بالجهد ومع هي جالسة حداها دفعها جات ليها وطلات معا فرحانة
عيشة : نوووضي عند الناس سلمي عليهم ... نوضي ههه مخشية هنا زعما حشمانة
فاتي : بشوية ماتعرفوش تحللو البيبان غا بشوية! اصلا مرعودة غا بوحدي ماعرفت مالي بحال الى اول مرة غنتزوج .
عيشة : واا نوضي عند الناس سلمي عليهم حشومة .
ناضت بالزربة كتفتف .. رشات الريحة ووقفات حدا المراية كتقاد القفطان والمكياج والشعر... جمعات النفس وطلقاتها وخرجات مع امها حانية الراس .. دخلات حشمانة ماقدراش تهز فيهم العين .. سلمات على امو باست يديها وباست راس جدو وجداتو وهما فرحانين و دازت سلمات على خواتاتو سلمو عليها حتى هما مبسمين عاجبهم الحال ووصلات ليه مدات يدها وهي تهز فيه عينها معبسة ماكرهاتش تقجو .. ضحك وقال بصوت خافت
واءل : باينة عليك الحشمة
خطفات يديها وجلسات حداه حشمانة . تكلم الحاج وقال
الحاج : ايوا سيادنا جينا طالبين نرجعو بنتنا لعندنا ...نلمو الشمل ونديرو الزريعة ... راضية ابنتي افاطمة الزهراء؟
هبطات عينيها حشمانة و واءل حداها كيشوف فيها بنص عين .
الاب : مرحبا بيكم والف مرحبا .. والى خرجات منا شي كلمة دالعيب غير سمحو لينا ... اللسان مافيه عضم وفساعة الغضب ميحضر الشيطان ... سمحي لينا الحاجة
ام واءل : المسامحة السي عبد الله ... الحمد لله اللي تجمع الشمل ... حنى منلقاوش حسن من فاطنة الزهراء بنتنا وراه هي وحدة منا كاشي غريبة علينا ... الله شاهد معزتها فقلبي بحال بناتي... الله هي دريويشة وراسها صغير كتحتارم بعدا اللي كبير منها ولا يجيب شي موصيبة تمرر لينا حياتنا
عيشة : هي مرضية ولاقاها ربي بيكم حتى نتوما الله يعمرها دار ... ولاكن الحاجة راه شرطات علينا شروط نقولوهم الى بغا بصح يردها ... خاصو يدير ليها قسمة ويغسل ليها وجهها اللي تمرمد فالتراب ... مايخفاكش المطلقة اش كيتقال عليها ... وفاطمة الزهراء طعنو فضهرها حتى شبعو واخا مدايرة لابيديها لا برجليها وخلصات بصحتها شي حاجة اللي مادارتهاش هي.
الجد: اييه حنا هادشي عارفينو ... وعارفين لسان الناس ماضي .
الاب: ايوا هادشي علاش يدير ليها العرس ويعطيها صداقها ... بحال الى غيتزوج بيها من الاول. تمشي بالشان والمرشان بحال كاع العرايسات
واءل : ماقلتي عيب ... قابل على هاد الشروط كاملة ...غير هوا مانطولوش فالعقد
الاب: من غدا ترجع راه حالو سااهل
واءل : على هاد الحساب غدا نتلاقاو عند العدول ... واللي طلباتها حلال عليها
الاب : ماتعاود غير الصلاة على النبي
زغرتات الام وتحطات الحلوى وتفرق اتاي... دارت فاطمة الزهراء الخطبة على حقها وطريقها ... شربات الحليب وكلات التمر وهي معبسة فوجه واءل مكتبغيش كاع تشوف فيه .. اما هوا فرحااان كيضحك ويتجمع ويضحك معاها عادي . تعشاو الناس و قطعات الحلوى وسلات الحفلة .
خرجو مشاو ودخلات لبيتها فرحاانة مقاداها فرحة .. يالاه حطات راسها تنعس وهوا يصوني ليها .
فاتي : شنو؟
واءل : مالك تاني؟
فاطمة الزهراء : ماماليش ... شوف نتا مالك
واءل : تا انا ماماليش ... نتي اللي بنتي ليا معاجبكش الحال .. قبيلة مابغاش ضحكي مالكي؟
فاتي: راسي كيضرني .. مافيا اللي يهضر ويالاع شربت دوليبران باغا نتسنط لعضامي خليني نعس تا لغدا ونهضرو
واءل : هههه واخا الاللة تصبحي على خير
قطعات ونعسات نعسة وحدة .. فعلا راسها كيضرها والخلعة سخسخاتها بالمعقول .
صبحات ناشطة ماشطة راشقة ليها كتوجد تمشي مع باها عند العدول .. لبسات الجلابة اللي جاب ليها والصندالة ديالها وطلقات شعرها و وقفات حدا للمرايا .. صونا ليها تيلي وهي تجاوب بابتسامة
واءل : الو حبيبة .. كي صبحتي؟
فاتي : الحمد لله
واءل : وا نزلي راه كنتسناوك لتحت انا وباك
فاتي: جيتي؟!
واءل : من لبارح وانا هنا طلقي راسك
فاتي : انا جايا
نزلات كطير لقاتو فالباب .. طلعات اللور بلا متسلم حشمانة من باها لايقول بطا عليها امتى امشي موحشة فالحلوى!
مشاو عند العدول وداز كلشي خوا هاداك .. رجعات فاتي على دمة واءل من جديد بصداق كيحمر الوجه .. فرحات ووجها حمار اما هوا ماعليه كلام .. خرجو ركبو فالطموبيل راجعين للدار وهوا يقول باها
الاب : حطني غير حدا هاد الميكانيك راه حاط عندو الطنوبيل تخسرات ليا وسيرو نتوما
حطو واءل وتلفت عند فاتي
واءل : اجي رجعني هنا
فاتي: غير خليني هنا
واءل : وانوضي رجعي مال راسك قاصح.. واش نسوق ولا نبقا داير عندك!
نزلات منفخة رجعات لقدام ودارت على رجل وهوا كل شوية يشوف فيها .. شد ليها فيديها باسها وقال
واءل : توحشتك
سكتات قالبة وجهها للزاج مقادراش تشوف فيه باش مضحكش .. سهات تا لقات راسها وقفة حدى البحر بالطموبيل وهي دور عندو
.فاتي : علاش جينا هنا؟
واءل : نجلسو شوية ... جمعي حوايجك ليوم تمشي معايا صافي
فاتي: لا .. حتى لمور العرس غير تهنى
طلع حاجبو وقال : شناهواا! وعلاش ؟
فاتي: هاكاك
جاتو الضحكة كيشوف فيها اش كتخربق عليه وهوا يجرها من عنقها وقال
واءل : اجي نشوفو واش موحشاني بصح ولا كتكدبي
غفلها وجرها وطار ليها على فمها شدا راسخا بجوج يدين ملهوف كيبوس ويعاود لقاها تاهيا عطشان يا برق السما ... اموت من طول الغياب . دغيا تحلات وجهلاتو تا بغا يطرطق كيلهت ويجر فيها رجع لثها وجهها حمر
بعدات كتقاد حالتها وقالت بدلع وهوا حال فمو فيها
فاتي : نطلب طليبة
واءل : يالاه نمشيو للدار
فاتي: وابلاتي نطلبك بعدا
واءل : شنو؟ يالاه نمشيو للدار وطلبي اللي عجبك
فاتي: لا هنا
واءل؛: واخا يالاه شنو بغيتي؟
فاتي: بدلع) ياك دابا نتا كتبيع وتشري فالطموبيلات ياك .
واءل : امم
فاتي: كل مرة تجيب وحدة جديدة ياك
واءل : من بعد
فاتي: وكتبغيني ياك
واءل : واطلقينا
فاتي: بغيت رونج روفر بيضاء
حل عينيه وقال : شنو هي !!! هههههه حلفي هههههه
فاتي: شنو دابا منستاهلهاش؟؟؟ شحال من مرة جبتيها وبعتيها
واءل :هز راسو كيضحك) انا اللي شحال وانا نبيع ونشري فيهم عمري جبتها راسي !!! كنمشي ونجي فهاديك اللي عندي وعمرني فكرت نبدلها .. جيتي من اللخر وبغيتي روووونج روفر !!
فاتي: وشنو زعما شي حاجة صعيبة ؟ كت مكانش عندك اه ... نتا كتجيبهم كتجيبهم جيب ليا وحيدة وكمدها
واءل : هههههه نكمد 80 مليون كاملة ههههخخه
بدا يضحك مقدرش يسكت وهي كتشوف فيه معبسة بقا فيها الحال .. تكمشات بلاصتها وقالت
فاتي: ديني لدارنا عييت
تلفت عندها وقال : راه 80 مليون الشريفة كدير هاديك اللي بغيتي نتي ... واش عارفة الى ماااااثلا مثلا جبتها ليك وخشيتيها فشي حيط اش غيوقع فيا هههه
فاتي : صافي بلاااش كاع .. ردني غير لدارنا ... مللي عزيتيها فيا وعندك باش تجيبها صافي
واءل : بلاتي نديرو قضية ... باغا غا رونج روفر... نجيبها وركبيها ماعليش ... مي ناخدها انا ونعطيك هادي طويوطا تا عيا واعرة شكون بحالك
دارت يدها على جنبها معجبة وقالت : اييييه !!! تجيييبها راسك وتعطيني انا لقديمة ماحشمتيش
واءل : خهههههههههههه والله تا خايف دخلي مها فشي حيط وتخرجي عليا ف 80 مليون ... انا نجيبها و فين ما عجبك نديك نديك
فاتي : يا اما تجيبها ليا انا ديالي انا نسوقها يا اما بلاش كاع
واءل : بلاش حسن ... علاش ماطلبيش شي وحدة على قدك بااااركا عليك ... رونج دقة وحدة !
فاتي : وعلاش دابا قلتي اجيبيها ليك وتعطيني لقديمة ... هي عندك لفلوس
واءل : ههههههههن ضحكتيني والله ... مهم نمشيو للدار ومن بعد نشوفو قضية الطموبيل
فاتي: مغنمشيش... نتا باغي غير حاجتك وانا فاش طلبتك على رونج عزيتيها فيا ... هادي هي غترجع تيقتي فيك
واءل : اش جاب دابا الرونج للتيقة !!! (حط راسو على لفولون كيضحك ) سخفتيني ... (هز راسو) باغا رونج؟
فاتي : اه
واءل : بشرط
فاتي: شنو هوا؟
واءل : ماتبقايش تهزيها حتى تشاوري معايا .. غنصلح ليك ديك الطموبيل اللي شريتي مني والرونج تهزيها مرااااا مرا
فاتي: فكرتيني .. ارا 6 ونص اللي عطيتك ديالي ... ياكما هي اللي رديتي ليا فالصداق!!!
هز راسو وطرطق بالضحك عليها وقال : وناااري جلدة مع راسك ... دابا من اللخر رونج ولا 6؟
فاتي : رونج
واءل : وا نساي الستة مكتسالينش ... براكة 80 اللي غنحط فيها
فاتي: باااز ليك ياك كتبيعها ب 80 ماشي غتشؤيها ب 80 راك غتشريها بشي 60 ولا 50 ورابح فيها 30 مليون ولا 20 شكون بحالك ! وجاي كتقولب عليا
واءل : 50 ولا 60 سهلتيها ؟ مكيجمعها غير الفم . كتجيك ساهلة تنطقي بيها
فاتي : ونتا كيجيوك ساهلين تحسبهم ... راك كتربح فيهم زبالة دالفلوس ماسوقيش غادي تشريها ليا
واءل : ويالاه للدار دابا
فاتي: وغتشريها ليا؟
واءل : ماشي دابا حتى يفوت العرس وروينتو راه طاح عليا بغسيل الفندق ... ماعرفتش منين كينزلو عليك هاد البلانات
فاتي: من فعايلك اللي كدير معايا ... مهم دابا امتى تشريها ليا .. راه شفتها عند فلاجونص محطوطة كتبري فننننة هههه
واءل : وماحشوماش عليك تخرجيها للشمس تكحال
فاتي: عااافاك ديني لاجونص غير نشوووف عفاااك
واءل : عيقتي افاطمة الزهراء قولي ليا ماباغاش تمشي للدار وصافي
فاتي: من تما نمشي معاك
واءل يالاه زيد لهاد لاجونص ... وماتلسقيش ليا عليها اصلا مبيووعة هاديك بفلوسها غندير ليك الهرس اللي بغيتي
فاتي : لااا منلسقش غير نشووف

ديمارا الطموبيل نيشان وقفها حدا لاجونص ونزل هو اوياها دخلو .. دار يديه فالجياب واقف واحل معاها وهي مشات كدور بالرونج فرحانة .. كطلع فيها تقيس الركبة وترجع تنزل دور بيها وواءل واقف كيسوط من مناخرو حدا الشاب اللي جالس فالبيرو
الشاب : واش غتخرجها؟
واءل : لا خليها الى سولاتك قول ليها مبيوعة
فاتي: واااءل .. اجي اجي تشوووف
واءل : ويالاااه دابا خلي حتى نجيها ليك
فاتي : و اااجي تشوووف
تنهد ومشا عندها حط يدو على الطموبيل وقال : هانا شنو؟
فاتي : نخرجوها دابا؟
واءل : قلت ليك مبيوعة وغنجيبها ليك كلمة وحدة ويالاه دابا ديري عقلك
شد ليها فيدها جرها من تما بزز وخرجها كتطلب وحلون عليه يخجرها ليها ديك الساعة ساعة تا هوا كتر منها كيديها على قد عقلها . طلعها وشد الطريق للدار يالاه تحرك وهو يصوني باها
فاتي: الو .. واخا تسناني تما
واءل سمع تسناني تنا وهوا يسخط .. شاف فيها وقال
واءل : شكون اللي غيتسناك
فاتي: بابا حدا قهوة الشينوي بغاني ضاروري
واءل : ياك قلنا غنجلسة شوية وتشوفي الدار !
فاتي: حتى للعشية مور العصر .. غنمشي دابا راه واقف كيتسنى
غمض عينيه وقلب وجهو عاض فالصبر ... قلب الدورة لقهوة الشينوي وقال
واءل: جمعي حوايجك .. الليلة غتباتي معايا صافي احبيبة
فاتي: ان شاء الله
عنقها بقوة وباسها وقال : رونج غنجيبها ليك صافي وصبري عليا يفوت العرس
فاتي: واخا ههه
باستو ونزلات عند باها ومشا واءل
فاتي: شنو؟
الاب: يالاه تشوفي واحد القاعة عاد وراها ليا واحد السيد دابا كبيرة وزويييينة ديال الفريع
فاتي: فين؟
الاب: غير هنا .
جرات معاه رجليها لقاعة كبيرة عصرية ودخلات كتشوف .. مزينة بالورد والضواو واللون البفسجي بارد والابيض فالارض بالرخام .. قاعة راءعة .. قنعاتها وعجباتها وفاش وصلات للتمن وهي تصدم ..
فاتي: 3 دالمليون! وفليلة؟
الاب : ياك هوا اللي غيخلصها
فاتي: لالا واخا هوا .. راه رزقي حتى انا هاداك وزايد فيا ... اويلي على 3 .. نشوف وحدة اخرى حسن كاع .. ليلة مادات ما جابت مالهم غياكلو ليا القاعة فالعشاء؟؟
- ايوا الى بغيتي نقص ليك شي حاجة
فاتي: انا جهدي 2 براكة .. وديك جوج راه بزاف عليا
- بزااف مامسلكاش
فاتي: حتى 3 نامسلكاش يالاه نمشيو بحالنا .. جات خارجة وهوا يعيط ليا كينيكوصي معاها فالتمن .. بقات لاسقة ف جوج حتى هبطها ليها لجوج وهي تخرج من تما فرحانة تاصلات بواءل وقالت
فاتي: الو . عاد شفت القاعة واااعرة وزوينة ب 3 دالمليون
واءل : بزاااف غلا عليك
فاتي: مابغاش يهبط عليها عييت معاه ... ولاكن غتعجبك واااعرة
واءل : وا تعجبك غير نتي اما انا ماكرتهش نتعشا ونمشي بحالي واخا نجلس غير فالسطح ... مهم فاش نجي غنتفاهم معاه على التمن .. داك التمن اللي عطاك بزااف .. 3 فليلة ! مالنا غتديوها معانا ولا شنو
فاتي: وصافي راه تافقنا على 3 .. خاصك دوز ليا لفلوس باش نشدها
واءل : تانجي ونشوف معاه وانا اللي غنخلصو.. نتي شوفي داكشي اللي باغا وقوليها ليا انا اللي غنتفاهم على التمن .. زدتينا بهاد العرس وهمو تا قلنا سالينل ورجعنا من الاول... كن دوك الفلوس اللي غتمشي فالعرس درنا بيهم شي تسافيرة لشي دولة وتقام رخيصة على هاد العرس
فاتي: واصلا غادي نسافرو ندوزو شهر العسل علاش مالك ماغتسفرنيش!!!
واءل : علاش ماجيبيش ماكينة وريشيني دقة وحدة بلل ماتبقاي نتف نتف نتف نتف شوبة بشوية ... بقا ليا السفر تا هوا فالحساب
فاتي: اللي كيبيع بالرخيص كيشري بالغالي

رجعات بحالها للدار مع باها .. الهضرة كاملة على العرس والتوجاد والحالة .
رجع تاصل بيها واءل بالليل لقاها شادة ورقة وستيلو وكتقيد الناس اللي معروضين . ناضت دخلات للبيت جاوبات
فاتي: الو واءل
واءل : جمعتي حوايجك؟ انا دايز عليك
فاتي: راني مشغولة خلي حتى لغدا
واءل : تافقنا تجمعي حوايجك وتجي عندي للدار!
فاتي: ولاكن راني مشغولة والله ماجاتش نوض كنجمع دابا ونقول ليهم انا غادية اويييلي !
واءل : واخا صافي على خاطرك .
قطع مقلق منها .. رجعات عند باها كيكملو تقياد الناس وشنو خاص شنو ماخاصش . الصباح لبسات سورفيت ودارت دفيرة وتاصلات بواءل
فاتي: الو واءل واش مغتجيش نمشي نعربنو القاعة ؟
واءل : تسنايني واحد ساعة راه عندي شي خدمة
فاتي: وجيب ديك الرونج عفااك جيبها
واءل : هضرنا افاطمة الزهراء ... مور العرس هي مور العرس .. باغا يعطيوك شي عين صحيحة نتي ولا شنو؟
فاتي: والعين فيا فيا غير جيبها
واءل: مور العرس قلت ليك .. يالاه سيري تا نجي انا مشغول
قطع معاه خلاها كتسنى ساعة ونص عاد عيط
واءل : نزلي انا لتحت
فاتي: واخا
هبطات كتجري طلعات معاه فرحانة وهوا معبس . باستو فحنكو وقال
واءل: فين جات هاد القاعة ؟
فاتي: سير نيشان
داها للقاعة ونزلات كتوريه وتجرو وهوا مافيه اللي يشوف
واءل : عجباتك ؟
فاتي: اه
واءل : وصافي يالاه وريني هادا اللي غيتخلص فيها راه عندي مايدار
فاتي: واخا
داتو لمكتب تما نيت وجلسو ...
- تافقنا على جوج ... فالاول قلت ليها 3 قالت ليا جوج وقفناها عند جوج
واءل : جوج وراه بزاف ... غنعطيك فيها 10000 درهم .. راه ليلة وحدة مادات ماجابت والصيف خرج داخلين فالشتاء ... درتي لينا تمن الصيف !

لالا مليون بزااف ... انا راه كنكريها ب 3
واءل : ايوا خليها كريها باش ما عجبك ... حنا اصلا مكناش ناوين على هاد العرس ... وغنقضيو باللي كان ... يالاه نوضي تمشي بحالك
خرجات عينيها يالاه بغات تهضر هوا ينطق مول القاعة
- غندير معاك تمن اللخر... مليون ونص والله يكمل بالخير
واءل : مليون والله يكمل بالخير... كن كان الصيف والعراسات مزاحمين نقولو مي دابا مكاين عراسات ... اصلا راه 10000 درهم وبزاف ماشي وقت العراسات هادا
- مزاالين العراسات الله اودي راه الحال مزال سخون
واءل : ايوا حتى دابا مابززناش عليك شي حاجة ... خود نمرتي والى ماتكرلتش عيط ليا نكريها ب 10000 درهم ... والى تكرات الله يسخر .. هادشي الى مالقيتش وحدة اخرى ناقصة تمن .. اما فوق 10000 درهم مانزيدش .
شاف مو القاعة تاعيا وقال : قااصح بالزاف السي اش سماك الله ...
واءل : واءل
- قصحتي ... ولاكن اش غنقول ليك الله يسخر
واءل : ها كارط فيزيت .. تا نتا الى خصاتك جموبيل قديمة ولا جديدة اجي مرحبا غتلقا عندي اللي يعجبك
- متشرفين اسيدي .. الله يجعل كلشي مبارك مسعود
شد ليها فيدها خرجات فرحانة تا للزنقة وهوا ينزل عليها للراس كيضحك
واءل : 3 دالمليون يا طميميعة ماحشمتيش ... راجلك انا وباغا ضمسيني وجهك قاصح
فاتي : ههههه وراه مصاريف راه غنقضي بيها شحال من حاجة
واءل : وا قولي ليا شنو خاصك علاش كديري هاد الفعايل ... باغا نعلق مك من ودنيك ولا شنو
تعلقات فكتفو معنقاه كضحك وقالت : حشمت نبقا كل شوية نقول ليك عطيني
جمعة الضحكة وقال : حشمتي !!! حلفي! باااينة عليك الحشمة سبحان الله ..
فاتي: وصااافي هههه
واءل : راه بدلت بيت النعاس تمشي تشوفيه ؟
فاتي: مافيا اللي يمشي .. يالاه معايا ندفع باط داموند هي اللولة قبل مانساها
واءل : باط داموند مغتهربش... يالاه تشوفي الفراش راه ماعرفت كي جا داكشي .. تقدري تبغي تبدلي فيه شي حاجة
فاتي: ويالاه بعدا نشوفو الحلوى
واءل: وهي اللي باغيك تشوفي(غمزها) مال راسك قاصح!
فاتي: هههه الله يمسخك ... دااابا نطلع ليك فراسك ...
قاطعها: وتبدلني وتقلب على غيري الى اخ... حفضتو

فاتي: ههههه وصااافي يالاه ندفعو الحلوى عافاك
تنهد ودار ليها خاطرها داها قضات الغرض ديالها وجلس تغدا معاها طانز عليها وقفها ليها فحلقها
واءل : دابا من نيتك تااا شرفتي عاد باغا تعرسي ... كن بلاصت هاد العرس كوراك دايرة سبوع
فاتي: امممم ايوا قولها راسك ... خليني ساكتة
واءل: دابا نجيو نيشان ياك انا مخنتكش ... ياك كنت منهضر معاك نتي ...طلعتي زرمومية مع راسك ماساهلاااش
فاتي: بحال كي كنت انا بحال كي كانت وحدة اخرى الاعمال بالنيات
واءل: اجي غاديري العمارية وداكشي؟
فاتي: وشنو ... وغطلع حتى نتا هههه
واءل : ههه حساب ليك باقي خفيف كي كنت النهار الاول.. موحال يقدرو يهزوني دابا راه تازدت فيها 40 كليو .. تبااارك الله
فاتي: وفين هي هاد ربعين ؟ مابايناش عليك لا كرش لا فخاد!
واءل : لفخاد! ياباه معايا للدار تشوفيهم هههه ... مقارنة مع النهار الاول فاش عرفتك راه تزاديت وحتى عضمي تقال
فاتي : ويييلي والله ماباينة عليك
واءل : دابا تبان فاش تهزي التقل هههههه
فاتي: بااااز مابقيتيش كتحشم ... ماتبدل فيك والو
واءل : الله يخلينا فصباغتنا ... نتي اللي وليتي شيطانة ... ماتكونيش مشيتي للسعودية وخبيتي عليا زعما ؟
فاتي: وعلاش نخبي عليك اصلا من مشيت نقولها راه كي اكادير كي السعودية ... كنت ديال راسي ديك الساعة ندير اللي عجبني
واءل : بصراااحة حلفي ماتكدبي
فاتي: شنو ؟ عااارفاك شنو باغي تقول (جاتها الضحكة )
واءل : عارفاني ياك بعدا ... واجاوبي بصراحة
فاتي: لا والله عمرني درت شي حاجة
واءل: حلفي ... زعما طلقتي وساكنة بوحدك
فاتي: واخا هاكاك ... كرهتيني فالعبارات كاملين مابقيتش كنحمل فجنسكم الشعرة ماكرهتش كن بديت نقتل فيكم واحد واحد ديك الساعة .. بقا ليا غير نتصاحب ولا ..
واءل : وشنو جا كيدير عندك كمال فماكدو ؟ مكيعرفكش وجا تلاح عليك ؟
فاتي: خفت نعاود ليك وماتيقش
واءل: نتيق غير ماتكدبيش ... داك ولد الكلبة عاارفو اش كيسوا
فاتي: غير فواحد الكروب كنت حطيت واحد التعليق على .....
بدات تعاود وهوا مربع يديه كيسمع ليها ويسولها تا حكات ليه كلشي من الاول للخر
فاتي: والله ماعرفتو
واءل : اهااه ونتي كتهضري مع واحد مكتعرفيهش؟ مايمكنش
فاتي: زعما ماعقلتش عليه ... راه اي واحد بين الضرافة ديالو كنت تشكي عليه ... كنت محتاجة علامن نشكي ومعامن نهضر ويسمع ليا ... كنت محتاجة بزاف والله . كتشوف الدنيا تقلبات عليك ... كنتي بدار بواليدين بكلشي عاطيك واحد القيمة فاللخر ضاع منك كلشي ورجعتي بين الرجلين ... كن ما ربي حط خالتي فطريقي عاوناتني كن يعلم الله اشنو وقع ليا ... اللومة كاملة رجعات ليا انا حتى واحد ما لامك نتا ... العاءلة كلها دارت فيا ... وقعو ليا بزاف دالمصايب وربي نجاني منهم ... حتى وليت كنقول واش انا اللي خنتو باش كلشي دار فيا ولا شنو؟ دارو ليا بحال الى انا اللي خنت ماشي نتا ... ماعرفتش علاش؟ مي وخالتي بوحدهم اللي جاو من جيهتي ... وعمرني كنت نفكر فالزواج فحياتي .. كنت باغا نبني مستقبالي وندير بحال الى مقطوعة من شجرة ... نتا ماسامعش الهضرة اللي كنت كنسمع .. والسم اللي كانو يرميو ليا ... بغيت غييير نعرف علااش؟ اشمن دنب درت ... كرهت كلشي ... وزاد كمال كرهني فاللي بقا... فاش تلاقيتو كما قلت ليك ولا كيجيني باسل ... وليت كنهرب منو حتى تلاقيتك نتا . . . الى كان كيحساب ليك كنت عايشة الدنيا بطولها وعرضها فديك العماين راك غااالط ... انا كنت مضاربة غير مع الهضرة دالناس .. ماحاملاش ندخل فشي علاقة اخرى ... كمال كان عزيز فاش كان يسمع ليا مي فاش ولا كيبان ليا باسل كرهتو ..وزدت كرهتو وتصدمت فاش طلع مزوج .
واءل : تنهد ) هوا اصلا جاتو من الجنة والناس فاش طاح عليك فداك الكروب ... وعاق بيك ماعقلتيش عليه داكشي علاش مقال ليك والو وسكت وكمل معاك ... هاداك الكلب انا اللي عارفو وكنتسنى فيه يجي يهضر معايا ولا يجبدك ليا ... نطيح لمو سنانو راني كنقلب ليه غير على السبة

واءل : ها الغدا تغدينا .. ها الحلوى دفعناها.... مغاتمشيش معايا تشوفي الدار
فاتي: خليها حتى لغدا .. خاصني حمام و خاصني بزاف ديال التخربيق
واءل : افففففف.. واخا ها حنا غنشوفو هاد غدا .. نوضي يالاه
ناضت شدات فيه وردها لدارهم . داتها الايام كتجري وتجارا من قنت لقنت وكل يوم تسل من واءل لطريقة فشكل وتدي فيه وتجيبو ليوم غدا ليوم ليوم غدا ليوم وحتى هوا كل مرة يقلب ليها على السبة حتى وصل النهار دالحنة و العاءلة كتوصل وحدة مور وحدة .. عمرات الدار بالزغارت وكلشي كيبارك ... مشاو الوجوه اللي كانو يهضرو فيها ومايخليو مايقولو فضهرها ... رجعو يضحكو وبباركو بحال الى عمرهم نعتو فيها .. مانواوش غدير عرس جديد ولحسن كاع من اللول . الدار عمرات والصالة كتقاد باش تحني فيها العروسة , انا لاللة لعروسة راه فالصالون كتوجد راسها فرحانة وهلدا هوا النهار لكبير ... عروسة على حقها وطريقها . خرجوخا من الصالون بالزغارت واولهم خالتها اللي جات من السعودية ... طلعاتها فالطموبيل ومشاو للدار . كاع بنات عاءلتها مصدومين . وييلي هادي غير مزوجة وشوف شنو دارت !!! العزبة اللي اول مرة تزوج ومادارتش هادشي! ايوا الله يعطنا بحال زهرها واخا غير مرة وحدة ... باينة راجلها لاباس عليه .. عندو لفلوس مالعا اللي ما تمرغ فيهم ويعاود ليها عرس سعداااتها وياربي تعطينا غير بزقة من زهرها .
الهضرة مكتقاداش . دخلوها للصالة جلسوها بالتاج والشعر مطلوق والتكشيطة والبلغة ، نشرات رجليها كتحني وحناو معاه البنات .. اللي دواو فيها واللي مادواوش . طلع ليها النهار من داكشي الرفيع . بالليل تخشات فبيتها الصغير وسدات عليها مابغات تحاشيها لحتى وحدة من بنات عاءلتها .. واخا عياو يدورو بيها ماعطاتهمش وقت ومكتشوفش جيهتهم بالمرة . بغاو يدخلو يقرقبو معاها الناب ويبحتو فيها شوية لاكن سدات الباب فوجههم وتكمشات ... دخلات عليها خالتها هازة طبسيل ديال الكبدة مشوية والطيحان والكوطليط وسدات موراها الباب وجلسات كتهز فالعباية البيضاء ديال الحضور وتعري فخادها .. يديها مزروسن بالذهب وعنقها مشاء الله .. وزادت غلاضت . اييه السعودية ومادير ... ريحت العود منها كتعطعط وبالين عليه الخير والفلوس
سميرة : اااالله ياربي رجلي طابو عيييت ... قتلووني غا بالعين ... بغاو يصفيوها ليا ياختشي .. يااااختشي بغاو يسيفطوني للمقابر قبل طحنون
فاتي: هههه ... اش هادشي
سميرة : لقيت باك شاعل المجمر فالسطح كيشوط عليه الراس دالحولي اللي ذبح وانا نطلع ليه شوية دالكبدة والطيحان والكوطليط ... كولي كولي باش ماتسخفيش

فاتي: تصالحتو؟
سميرة : كيهضر عادي ماعرفتو زعفان ولا راشقة ليه ... المهم فرحااان يعطيني انا غا شبر تيساع
فاتي: راه الكبدة بغات طيبها ماما مع التقلية وييييلي غتقلب عليها ماتقاهاش!!!
سميرة : مك طيباااات الكبدة والتقلية ... بسلااامتك راه قلبت عليها مالقيتش ومشيا على سعداتي تا لعند الكزار جبتها هي والطيحان ... كولي ... عرفتي راهم برا كل شوية يسولو فين فاتي .. واش ناعسة فاتي.. واش خرجات فاتي ... باغيين يدخلو يجمعو خبييرات بنات الحراام .... قلت ليهم فاتي نعسااات خليوها ترتاح الله يعطيهم غبارة . التبلحيس
فاتي: يخخ ... واءل غضبااان هههه .... مابغيتش نمشي معاه للدار وهوا يغضب
سميرة : خليه يغضب دابا يتفش... هادا اللي ماعطاه قيمة ومشا يقلب على غيرو هاهوا شتقاو مالقاه ... تا لغدا ارا مايخبط .. غدا وبعظو والشهر الجاي واللي موراه تل يفرع مو ويجلس للرض
فاتي: هههههه ... ناااري ياختي باز لطحنون معاك نتي ... كيبان ليا غادي ويضعاف ونتي غادا وتغلاضي
سميرة : خليت ليه الهم يهزو هوا ... انا اختي ضاربة الدنيا بركلة حمد لله .. كولي راه هادشي غيبرد ... شافوني مدخلة الطبسيل تبعوني بعينيهم تا كتغنجي على وجهي .. تسحابوني غا خليتهم بلاتقلية .... جداك مت باك شافاني مدخلاه وهي تقول ليا اااجي جيبي هاداك الطبسيل لهنا حنى ماعليناش الله ... قلت ليها راه الكزار سيرو جيبوه ... جالسة هي وعماماتك مربعين يديهم مايهزو مايحطو ... غا مك وخوالاتك اللي مقاتلين فكوزينة وجد هادي حط هادي... اما عماتك جالسين مربعين يديهم ضياف الله يخليها قعيدة كيتسناو غا شنو يدوز قدامهم ولا يتحط ليهم . خختفووو
ضربو طبسيل ديال الشوى وتكاو وحدا حدا وحدة . سميرة كتكربل فوق الناموسية بقا لها شوية تلوح حوايجها
سميرة : واااهيااا ناري الصهوووداااات ياختشي الزززززمت ولفنا لكليمة غانموووت
فاتي: حلي الشرجم هههه... كي كيدير طحنون فاش كيجي للمغرب فالصهد
سميرة : كيدووب مسكين ... تي عارفة الحوالا ميقدوش على الصهد عايشين بكليمة .. مكيخرج من الدار غا من الليل الليل .
فاتي: فخبارك واءل غيجيب ليا رونج ليا بيضاء
سميرة : ايييوا هاااانتي شكون بحالك .... وتاهوا راه عندو الفلوس اختي مالو اللي مايدير .. اش غيدير بيهم يصرفو على لق**** اللهم فيك نتي
فاتي: واخا هاكاك كيبقا فيا ههه
سميرة : يبقا فيك كن كان مزلوط ماعندوش ... تي واش عااارفة ابنتي باللي بياع شراي فالطموبيلات شحال كيدخل ولا ماعرفاش ... راه كيهضر بالملاين ويبيع ويشري بالملاين والربح عندو غير الملاين .... تسحابيه مول حانوتة كيدخل بزقة ولاشنو؟
فاتي: وعااارفة
سميرة : تي والله اللي دار مشرع فهاد البلاد تا يدخلهم صحااح ... بنادم عندو الفلوس اختشي ماتشوفيش غا فجنابك راه كاين بنااااادم اللي شبعااان فلوس مالقا فين يديرهم ... انا نقول ليك ابنتي الناس راه جالسة تشتت فيهم ماعرفو تا فين يحطوهم كل مرة طموبيل جديدة مايتشطروش كاع فيها ... تي راك غاااالطة ابنتي بزاااف .. عايشة فهاد القوقعة ماجايبة للدنيا خبار ... وراجلك راه كيعامل مع هاد الناس اللي كيهضرو بالملاين ماشي مع دوك الجيران اللي كتي مصاحبة معاهم لهيه حاضيين ليا الجلالب

وصل النهار دالعرس ... كلشي مشا للقاعة لابس ومقاد كيتسابقو على البلايص والطبالي اللولين ... انا فاتي وخالتها بارزين فالصالون كيصايبو ويقادو ... لبسوها لبسة دالاميرة بالتاج والمضمة والفوال .. المكياج والمشطة طلعات كتهبل بحال الى اول مرة تعرس .. الزغارت عليها قلبو الصالون سفاه على علاه ... خرجوها النكافات لبرا بالليل وهي تلقا الرونج البيضاء مزوقة بالورد كتبري .. كانت غتسخف بالفرحة ماحسابش ليها كاع غيجي عنظها فالرونج ... نزل بالكوستيم كحل وبابيون مبووقص كيفرنس .. جاب الله ماعمها تا محسادة من العاءلة بقات غير هي وخالتها الراس فالراس .. باس ليها يديها وهي كتشوف فيه من تحت الشبكة وطلعها اللور فالطموبيل وركب حداها .. رجع خوه لقدام يسوق وركبات خالتها حداه .. مشات الطموبيل كتشعل وطفا اييت تييت تيت تيييت .... وواءل كل شوية يبغي يعري ليها على وجها وهي كدفعو وضحك ... خالتها لقدام كتغرت تا بحااات وخوه بقا يكلاكصوتي بصبوعو تا شدو كلاكاج . . . الضحك والنشاط منوضينها فالطموبيل قبل مايوصلو القاعة .. غير وصلو لقاوالعمارية فالباب والعاءلة برا كتسنى غيعواجو يشوفو العريس التاني ، نزل هوا اللول ... كلشي حل فمو وطاحو ريوكهم ... بانت على كمامرهم الصدمة ... كاينة اللي طلعات كطير توصل لخبار لمها وكاين اللي بقات مبلوكية فبلاصتها .. نزلو فاطمة الزهراء وسط ذهول الجميع ... هز ليها الشبكة وباس جبهتها ... طلعوها فالعمارية ودخلوها بعيساوا والرايات فالاخضر والاحمر والمباخر كبار تحت زغاريد النكافات للقاعة .. كلشي وقف حال حال فمو ... جاتهم الساكتة المسكوتة وتقال ليهم اللسان بقاو غير كيشوفو بعينهم ف فاطمة الزهراء كدةر وتشير بيديها فرحانة وواءل جالس بارز مامسوقش للعالم جلسوها حداه وهوا بلوح يدو مور ضهرها وهي تنخزو
فاتي : دير عقلك راك عريس اويييلي
واءل : و عااام وحنا مكاين الله يعطيتك صحيحتك ونجي دابا ندير فيها حشمان كي درتي ليها ... باغا العرس وها العرس خليني نجلس فخاطري
فاتي : ههه ناري مكتحشمش
واءل : دابا فوقاش غيسالي هادشي نمشيو بحالنا
فاتي: اوييلي علد دخلنا مزال ماسخنا بلاصتنا
واءل : انا سخون من شحال هادي ... اححح شحال جامع ليك وجدي راسك هاد الليلة نتهلا فيك
فاتي: هههه الله يستر
واءل : العرس.. الرونج .. الله يستر ... غا بلاتي نساليو من هادشي ... كولي مزيان باش ماتقوليش عييت
دورات وجهها كضحك و كلش شوية يلوح ليها كلمة . بدات كل شوية تبدل و واءل كيحسب ليها فالسوايع وكل شوية يسولها واش مزال حتى وصلات للبسة البيضاء عاد تنفس ورتاح . قطعو الحلوى وفرقوها وسالا العرس وهز واءل مرتو قدام كلشي وهي كضحك وتشير ليهم كدير باي باي وداها خرجها والناس موراهم تابعينهم .. دخلها فالطموبيل ورمات ليهم الورد من الزاج مالحقات حتى تلوحو لداخل بحال العرايسات .. دغيا زرب عليها هزها و هرب بيها .
شد الطريق مكسيري كيطير نيشان . دوزها على ماكدو بالطموبيل فيها الورد وهي لابسة الابيض خدا الماكلة من تما ومشا موقف الروايد حتى لقدام الباب . نزل فتح الباب و رجع كيفسخ فالبابيون حل ليها الباب وهزها ... سدها برجلو وطلعها للدار كدور فعينيها وتشوف الدار الجديدة ... فتح الباب التاني ودخلها .. كانت دار كبيرة حسن من الاولى وعصرية بفراش حديث . ماخلاهاش تكمل الشوفة ودخلها لبيت النعاس نيشان كتغوت
فاتي: اويييلي حتى ندوشو بعدا من العيا وريحت العرق
واءل : شششش (لاحها فوق الناموسية ) انا باغيك بعرقك ...
هبط عليها كينصل فحوايجو زربان وهي كضحك .
بعد مرور 6 اشهر ..
واقف قدامها كيبوس فكريشة اللي بدات تبان وقال
واءل : تهلاي ليا فولادي عنداك تبداي تنقزي بيهم
فاتي : هههه الله يستر مسطي
واءل : انا غادي للخدمة نجيب معايا شي حاجة ؟
فاتي: لا .. انا غنهبط لاصال راه تقيدو وحدين جداد
واءل : مهم راكي تما ... ماتهبطيش لتحت عند الرجال خليك حدك حد لاصال
فاتي: لا كون هاني اويييلي مكنهبطش لتحت .
واءل : وماتمشي شي بلاصا حتى تعلميني
فاتي: اوكييي
نزل ومشات هي لبسات كولون غوز وسبرديلة وتيشورط ودارت دفيرة ونزلات للطبقة اللي تحت منها فين كيترينيو النساء .. وقفات فالاستقبال ونشرات يديها كتستقبل اللي دخلات وتقيد وتشوف وتحضي مقابلة جناح العيالات ومرة مرة دخل لداخل تريكي معاهم ويديرو ليها حركات الحاملات .
جبدات روجيستر كتراجع فيه اللي خلص واللي ماخلص حتى كتوقف عليها مرا بسورفيت من هضرتها وضحكها باينة بغات ضسر على فاتي
- الزين ... كي دايرة لاباااس راه دايرين قرعة دخلي معانا فيها ؟
فاتي: لالا احبيبة خاطيني داكشي ديال القرع
- بلعكس زوييينة كتخليك تجمعي الفلوس .... اش فيها ... وكل مرة نتجمعو عند وحدة فينا ونبدلو الجو
فاتي: بابتسامة ) لاااا لا خاطيني داك التجمعات ماعنديش معاهم شكرا ... اصلا مكنقنطش الحمد لله ... ملهية مع الدار والخدمة هنا ودخل عندي ندخل عندك مكيعجبنيش . بغيتي لاصال مرحبا شي حاجة اخرى نو سمحي ليا .

النهااااااااية ...😘😘😘😘

قصص جديدة
قصة منقذي الأسمر من تأليف ندى العمر
قصة منقذي الأسمر ندى العمر
قصة إرحموني من تأليف أسماء زياد
قصة إرحموني أسماء زياد
قصة الآغا السادي من تأليف ليان علوي
قصة الآغا السادي ليان علوي