فالمعهد ديال التكوين المهني خارج استاذ من القسم ديالو و طفى وراه الضو يالاه كان خارج تزدح مع شي جسم هز راسو شاف عينين كيبريو كبار و شفارهم كثاف قالت بصوت شبه منخفض سمح ليا ا استاذ نسيت دفتر تاعي و خرجات كتجري مشات و خلات صوتها الرقيق كيتعاود فوذن الاستاذ و عينيها لي خلاوه مرفوع لعالم اخر .. خرج ركب طوميبلتو و هو كيفكر شكون هاد مولات العيون لي هربات بلاماا يعرف وجها .. بقا غادي تا صونا تيليفون ديالو كان جلال صاحبو
جلال: فين ا اخي فين غبورك ؟
ياسر: غير الخدمة راك عارف بداية العام هادي خاصني نقاد بلاصتي و انت صاڤا ؟!
جلال : لاباس حمد لله ناقصني غير نشوفك راني توحشتك
ياسر : هي الاولى هاني جاي عندك ، انت فالدار ؟
جلال :لا انا فقهوة لي تنجلسو فيها ديما ..
ياسر:واخا هاني جاي عندك
بينما وصل البطل ديالنا اجي نتعرفو عليه ؛ ياسر شاب فعمرو 27 سنة استاذ فالتكوين المهني فشعبة الالكتروميكانيك شاب زوين بزااف طويل و انيق فلباسو هو عايش بوحدو فالمدينة لي خدام فيها ، مكيعجبوش يخلط بين حياتو العملية و الشخصية و ما عندوش مع العلاقات بزااف عندو صاحبو جلال هو الوحيد لي عشيرو فهاد المدينة.
وصل البطل ديالنا للقهوة و هو يشوف صاحبو جلال شاد طبلة فلاطيغاس مشا عندو تسالم معاه و جلسو كيهدرو و جلال مرة مرة كيشوف ياسر غير ساهي و تيفكر و هو يزعم يسولو ....
جلال: ياسر واش عندك شي مشكل شفتك ساهي
ياسر كان مزال ساهي اكيد عرفتو فاش كيفكر .. كيفكر فمولات العيون الكبار لي قلبات ليلو نهار و باين هاد الليلة محال ينعس .. حرك جلال يديه على وجه ياسر يالاه فاق من الگلبة و هو يعاود يسولو
جلال : مالك اصاحبي خلعتيني عليك ، اش واقع ملي جيتي و انت غير ساهي عاود ليا مالك ؟
ياسر: اش غادي نعاود ليك شي حاجة ما كايناش كاع ( بدا كيعاود ليه اش وقع ) اش بان ليك ؟!
جلال : 😂 دابا هادشي لي خلاك بلا عقل غير عينيها و شوف اش دارو فيك عساك كون شفتيها كاملة هادي جابت ليك التمام
ياسر : عاودت ليك باش تعاوني ماشي طنز عليا 😒😒
جلال : وا اش غادي نقوليك اصاحبي هادشي عندك فشكل و صعيب تعرفها من عينيها
جلال :الحب عماك ليك المخيخ اسي هادي غير بعينيها و رجعاتك مكلخ 😂😂
ياسر : انا انووض غدا مقري فالصباح
جلال :وا عليه باشما كان رد عليا الخبار اسي الاستاذ العاشق 😂😂
نخليو ياسر يمشي لدارو و اجي نشوفو البطلة ديالنا ..
ملي صتادمات مع الاستاذ خرجات بالخف تلاقات عشيرها زياد كيتسناها مشات عندو و وجها مخطووف فيه اللون شافها و هو يسولها
زياد : بسمة مالك ؟! مال لونك مخطوف بحال الى شفتي جن ؟!
بسمة: غا سكت نيت واقيلا جن 😶 ماشي مشيت نجيب دفتر و تزادحت مع شي حد فالضلام 😢 طاح مني النص تا سمحت فالدفتر و جيت تنجري
زياد : اودي يا ودي على رجوولة صافي تحدو ليك
بسمة : اشمن 😡 زيد زيد طوبيس راه مشا علينا
مشاو زياد و بسمة للطوبيس خلصو و ركبو و زياد بقا حاضي بسمة لي لونها باقي مخطووف ..شاف فيها و قال : بسمة واش باقا مخلوعة ؟!
بسمة 😒: وا بالسيف ما نتخلع علاه ماشي داك المعهد مبني فوق مقبرة قديمة
زياد : بشااخ باقي كتيقي بحال هاد الخرافات
بسمة : اه و تحرك هبط راه غادي يفوت بلاكتك و تبقى تنگر تاني😑
هبط زياد من بعد ما سلم على بسمة و تحرك طوبيس ما هي الا دقائق حتى هبطات بسمة ،هي و زياد عشران من الليسي مكبتفارقوش و جمعاتهم الاقدار تاني فالمعهد هاد العام زياد معروف عليه الضحك و التقشاب و راجل وقت الشدة و هو لي يقدر يخلي بسمة تضحك (دابا نشوفو واش غادي يبقى غير هو ولا غادي يتزاد شي حد اخر ) زياد شاب طويل عندو فورما واعرة حيت تيلعب الحديد😂 و غزاال كاع البنات كيموتو عليه و كيغيرو من بسمة لي كضل هي وياه ...بسمة يا بسمة يا مولات العيون يالي خليتي الاستاذ بيك مفتون هههه بسمة بنت عادية جدا لابسها عادي و زينها تا هو عادي كدير الفولار و شعبية و معروفة عند كلشي و كلشي كيبغيها ...😍
وصلات البطلة ديالنا للدار سلمات على واليديها و دخلات لبيتها و بدلات و مشات توضات و صلات و كلات شوية و هزات تيليفون كيتبقشش فيه و هي تلقا الگروب ديال القسم راميين الاشاعات ديال الجنون على المعهد و هي تقفز و تفكرات الموقف لي طرا ليها و هي تقول مع راسها : دابا انا دخلت فشي حد زعما انس ولا جن ؟؟ بلاتي وراني قلت ليه استاذ 😱 زعما يكون استاذ هداك ولا جن استاذ 🤔 وااااع 😵
بقات تتخربق بوحدها و حطات تيلبفون و مشات تراجع و كل مرة تسمع شي تقرقيب فالدار تقفز و تبدى تغوت 😂 سالات و صلات العشا و مشات تنعس حيت غدا قاريا فااصباح بكري
عند ياسر 😍
من بعد ما تفرق مع جلال مشا لدارو بدل و قاد قهوة و جبد طابليت و دار بي ان سبور و بقى كيتفرج فماتش و مرة مرة يطيحو عيون بسمة فبالو 😍 كمل الماتش هبط شرا سندوبش كلاه غسل سنانو و نعس و هو كيفكر
طلع الصباح لي كلو حماس و تشويق 😍 فاق الاستاذ الانيق غسل و فطر و لبس تريكو صوفة فالكحل و سروال كحل و سبرديلة نايك كحلة و هز وراقو و خرج
خرج ياسر من الدار و هو كلو امل يعرف مولات العيون الكبار لي خلات ليلو نهار و طيرات عليه النعاس 😍 مع كان داخل للمعهد زگل ما يدخل فواحد البنت لي بالخلعة فقدات التوازن و كانت غادي طيح كون ما يد صديقها تمدات ليها و هزاتها ..
عند بسوومة 😍😍 (نخليوها تهدر شوبة )
فقت فالصباح و انا محطمة حيت البارح منعست مزيان بسبب دوك الكوابيس لي تنشووف فقت غسلت وجهي لي داير بحال شي مقلة 😑 كولو ولا كحل بقلة النعاس ما علينا توضيت و صليت و لبست حوايجي لبست كابيشو كحل طويل شوية مع سليم كحل و سبرديلة بيضا و فولار كحل و درت فوندوتان و ماسكارا و هزيت طابلية العدوة اللدودة ديالي 😓 و خرجت بلاما نفطر مشيت ركبت فالطوبيس و شوية طلع زياد و بقينا غاديين و حنا نهبطو ضربت على الساعة كان مشا الحال بديت كنجري بلا عقل تا كانت واحد طوموبيل داخلة للمعهد اتضربني 😱 كنت غادي نطيح كون ما زياد لي هزني دغيا ، درت نشوف شكون راكب فاللوطو تا خرج واحد التيتيز اااح 😍😍 كان لابس بحالي كلشي كحل 😑 صباح كحل هادا جا قاصدني هزبت عيني نشوف فيه شاف ليا مباشرة فعيني و حلف ولا رمش قلت نشد معاه الضد و منرمش تا انا 😓 جاب ليا الله بحال الى لاعبين جمد 😳 بقيت حالة عيني تا جاتني البكية هبطت عيني و جريت زياد لي بقا تا هو حال فمو و عينو و كلشي 😂😂 شكيت يكما يكون تزعط
من بعد ما دخلات بسمة و زياد ، ياسر تا هو رجع للوطو ديالو و دخل دغيا و بطا عليه ايمتا يوصل للقسم ، دخل للقسم لقا بسمة كتجبد دفاترها و باقي ما لبساتش الطابلية .. شاف فيها و هدر بصوت لي كلو حدة و خشونة : انت امادموزيل جبتي ديك طابلية تلبسها شكارة و لا شنو !!
شافت فيه بسمة بعدم موبالاة و هزات الطابلية و لبساتها و حنات راسها و قالت: سمح ليا ااستاذ
ياسر مع قالت سمح ليا ا استاذ تفكر ليلة البارح فاش تزادحات معاه و قالتها بنفس الطريقة و نفس الحنية ... بقا كيشوف فيها مدة و تدارك راسو و بدا الدرس و بسمة وقتما تبغي تشارك تيقمعها و مكيديهاش فيها تخنقات و بطا عليها غير ايمتا تخرج .. سالات الحصة و بسمة جمعات ادواتها دغيا تا كانت اتخرج و سمعات صوت وراها
ياسر : لي فات الباب قبل ما ندير غابيل ايتقيد غائب 😏
رجعات بسمة مهزاتش الراس و جلسات و زياد شد ليها يديها حيت فهمها ، ياسر شاف داك الديكور جنون لعبو ليه فوق راسو تمالك نفسو و بدا كيعيط بالاسماء بلعاني بدا بالبنات كاع البنات قالو حاضر و سمح ليهم بالخروج بقات غير بسمة عيط على دراري و خرجهم و بقات بسمة و زياد لي واخا سمع سميتو مبغاش يخرج جا نايض هو و بسمة و هو يوقفو استاذ !!
باقي ما كملهاش قاطعو ياسر : مقلتش ليك عاود ليا قصة حياتكم خرج حسن ليك لنصدق مقيدك انت و هي فالغياب و فكوها
زياد تزاد معاه الزايد 😂😂 و هو يغوت 😡 :منقدرش نخليها بوحدها حيت هي كتخاف فهاد القسم واش سمعتي !
ياسر مافهموش اش بغا يقصد و يالاه كان ايهدر نطقات بسمة : صافي ازياد خرج تسناني هاني جاية شافت فيه بحال الى كطلبو يخرح. . مشا زياد و هو كافر و خلى ياسر اينفاجر و ضار عند بسمة و قال ليها : وااش انت جاية تقراي و لا معشقي هاا ؟! بدا كيهدر و كيتحرك حتى وصل اللور ديال القسم و خلى بسمة حدا السبورة بغات طلقها فحوايجها من الخلعة هي واخا النهار كتخاف 😢 ضار شاف جيهتها و لقاها باقا فبلاصتها كتشوف جنابها و باينة مخلووعة مشا عندها و هز ليها راسها لقاها كتبكي و كلها حمرة و كترعد و شد فيديها و هي تقفز و بدات تتهدر
بدات تتهدر بلا فرانات : عافاك ااستاذ الله ارحم والديك ( هزات يديه باستها بلاما تشعر ) خليني نمشي راه مكنحملش هاد البلاصة عافاك 😢😢 عزات عبنبها فيه و حرك راسو ب اه زعما سيري و خرجات تتجري و نسات تيليفونها فوق طابلة اما ياسر بقا مصدووم كيفاش خلا العيون لي سحراتو تبكي من النهار الاول تنهد و عاتب راسو : كبفاش غوت عليها ؟ علاش غوت عليها اش نكون تا نغوت عليها اعععع 😡 ( ضرب واحد الكرسي ) تفو عليك اياسر مكتسوااش
جا يخرح و هو يشوف تيلبفون هزو شعلو بانت ليه صورتها معنقة واحد قطيطة 😍 بانت كيووت و كانت فوطو بلا فولار 😁 هز تيليفون و خرج كيجري يتبعها ساعة ما بان ليها اثر رجع ركب طوموبيلتو و زاد .
عند بسمة لي غي خرجات من المعهد و هي تقطع شانطي بلا عقل خلات الطريق مرونة وراها و كلشي تيعايرها ( تفو ولاد الحرام ) 😑 قطعات شانطي تا بان ليها زباد لي غي شافها و هو يجي عندها دغيا عنقها و بقا كيدوز يدو على راسها 😢 قال ليها بنبرة حنينة : بسمة مالك واش دار ليك شي حاجة ؟! شوفي فيا و جاوبيني عافاك !!
هزات راسها على كتفو و قالت بنبرة مخنوقة بالدموع : لا ولكن تخنقت تخنقت بزاف 😢
شد ليها زياد يديها و شد طاكسي باش توصل دغيا ترتاح طلعو و حطات راسها على كتفو و بقا غاديين مكيهدروش تا وصلات لدارهم هبطو خلص زياد و وصلها تال لدارهم حلات ليهم مها الباب لي غي شافت بنتها طاح فيها النص .
لالة مليكة : اويلي بسمة مالك اش وقع ليها اولدي زياد !!
زياد بقا كيدور فعينيه و قال ليها : والو اخالتي غير جاتها السخفة حيت ما كتاكلش مزيان 😁
دخلات بسمة للبيتها من بعد ما خلات ماماها كتقنع زياد يتغدى معاهم ساعة هو ما بغاش و قاليها مرة اوخرى ستأذن و مشا و دخلات مليكة على بنتها لقتها تالفة معرفت علاش كتقلب ؟؟
نمشيو عند ياسر ( نخليوه يهدر ) ...
من بعد ما خرجت من المعهد كنقلب عليها ما لقيتهاش رجعت ركبت فاللوطو ديالي طريق كاملة و انا كنشووف فالتليفون فديك التصويرة لي كتبان فيها بحال الملاك 😍 وصلت للدار دخلت نيشان للدوش بقيت تحت الرشاشة كنحاول نستوعب داك الموقف لي كانت فيه ديك البنت 😓 بسمة اه سميتها بسمة سميتها زوينة بحالها 😍 كملت الدوش ديالي خرجت لبست كيطما خفيفة للدار و هبطت شريت بوكاديوس باش نتغدى حيت قليل فين كنطيب فالدار ساليت الماكلة و انا كنتسنى التيليفون ديال بسمة يصوني ... يالاه غادي نوض تا صونا رجعت بالخف هزيتو لقيت ماماها لي كتصوني ( مسخوطة دايرا صورة و مبدل وجها ب وجه غاضب 😡 ) هه ضحكت و جاوبت حاولت نبدل صوتي قلت : الو و هي تجاوبني بصوتها الرقيق لي كبدخل للقلب نيشان ( اتبارك الله على الطريق السيار ) 😂 قالت : سلام عليكم خويا
ياسر : عليكم السلام اخالتي 😂😂
بسمة : سمح ليا انا ماشي ماما انا مولات تيليفون
ياسر : اه انت بنت خالتي احساب ليا خالتي 😂
بسمة في نفسها ( يخليك بالخلا ): اه اخويا عافاك قوليا فين لقيتي تيليفوني و فينك نجي نجيبو
ياسر : شكون قاليك انا بغيت نرجعو ليك ؟!
بسمة : عافاك اخويا رجعو ليا راه ربيت عليه الكبدة منقدرش على فراقوو 😢
ياسر ( جابت ليه الضحكة ): لا ما غاديش تاخديه يا صاحبة القطط 😂
بسمة ( طلع ليها الدم ) : واخا و قطعات عليه 😳 خلاتو مصدوووم ما عرف باش تبلى بقا حاضي تيلفيون على الله تعاود تعيط و مع كانت دايرة الكوود مقدرش يدخل للتيلبفون 😑 فقد الامل و عاق براسو بلي زاد فيه و مشا لبس جاكيط ديالو و خرج يتقدى ...
عند بسمة لي غير قطعات معاه و مشات لبسات مونطو فوق بيجامة و فولار و هزات سوارت و الفلوس و خرجات شدات طاكسي قالت لبه العنوان و وصلها
وصلات البطلة ديالنا للعنوان لي بغات و هبطات كدور و هازا طابليت فيديها و تابعة الخريطة تا وقفات قدام واحد الباب و بقات تدق تا حد ما جاوبها بقات واقفة تماك شوية بقات تتعلق باش طل من ديك الشقة لي كيدخلو منها الرسائل تا حسات بيد تحطات على كتفها ضارت دغيا و خرجات عبنيها على جهدهم 😱
🌸عند ياسر 🌸 من بعد ما تقديت و كنت راجع للدار تا كنشووف واحد المرى واقفة قدام بابي و تتنقز بغات تطل مشيت قاصدها حطيت يدي على كتفها و هي دور عندي 😍 بسمة !!!!!!! شفتها تصدمت بقيت تنشوف فيها لي هي مصدومة كثر مني 😳 قلنا فدقة وحدة !! بسمة : انت ؟! ياسر : انتي !!! 😱
بسمة : اش كدير انت هنا ؟!
ياسر ( بغباء مصطنع ) : كنفرق القزبر 😑 انتي اش كديري هنا راه داري هادي !
بسمة ( بدهشة ) : دارك ؟؟! 😳 يعني انت لي سرقتي ليا تيليفوني يااك
ياسر ( تعجب كيفاش عرفات و لكن نكر ) : اش سرقت ؟! عاودي ما سمعتش ؟!
بسمة : وا داك القزبر لي تتفرق نقي بيه وذنيك 😡 انت سرقتي ليا تيليفوني و غادي تعطيه ليا دابا و بلاما تحاول تنكر ..
ياسر : حتارمي راسك راك تتهدري مع استاذك 😑
بسمة : بالبعابع استاذ لهيه فالمعهد اما هنا راك شفار .. انا تبعت GPS و جابني لهنا 😑 و دابا ارا ليا تيلبفوني
شاف فيها ياسر و بقا ساهي فهاد البنت لي قبيلة كانت ضعيفة و دابا تتخرج فعينيها و قال ليها: واخا تسناي هنا 😏
مشا دخل و هي واقفة كتڤيبري حدا الباب شاداها بيبي 😂😂 خرج عطاها تيليفون و شافها بقات واقفة وقالت ليه ببراءة : عافاك قول لماماك تسمح ليا الى صدعتها قبيلة بالدقان راه تا كانت جاية تحل الباب و رجعات واقيلا سمعاتك جيتي !!
شاف فيها ياسر بتعحب 😳😳😳 و لكن حاول ميخلعهاش حيت شافها قبيلة كانت مخلوعة و قال :كوني هانية ...
قصة معاناتي مع شبحة
محتوى القصة
التنقل بين الأجزاء