أنثى الأسد الجزء 16

من تأليف سناء الصنهاجي
2018

محتوى القصة

رواية أنثى الأسد لسناء الصنهاجي

إيثار:أنت معرفتش واشنهار تصاحبت معاك يا كنت سكرانة ياكنت مكيفة شي جوان واحد فجوج انت غير سمعيني وسكتي حنا اندخلو لوطيل واخا نديرو راسنا طيابة ولا ليكان اليوم أسية مخدماش انحاول ما امكن نسرق ليها لبطاقة ديالها نظخلو بيها ياك اندخلو حتى لكليكة معانا على اساس حنا فرقة موسيقية داخلين نغنيو فالحفلة وديك ساعات انا انتكلف ليك بديك لمونيكة ديال جوج دريال وانت بغيتك تكوني ليا يشوف كريم ريوكو يسيحو تحلوني عليه مع بيسات خفاف وناري وتكولي ليا لالا الى بغيتيه يرجع ليك ازبلة كوني لحلاحة شوية مرة شدي مرة طلقي ولااتخسريه مع تحلوني عليه اينسى فردوس وينسى حتى لي ولداتها تفاهمنا ولالا وكوني عودة كوني كوطة شوية عايقة وفايقة ومدارش بيك 
نوال:ناري اختي لهلا يخطيك عليا وخلاص
إيثار:دابا انتسناو لكليكة تجي ونتفاهمو على لخطة ونرجعو لدار نشوف هو واش ايرجع نيت وشنو ايكول وندرس كلشي مزيان ونطركك ديك ساعات نلقاك واجدة صافي؟
نوال:انا معاك اختي لي ليها ليها بغات تلعب ليا براجلي بابات وليداتي مستقبلا والله لا كانت ليها، شوية وصلات لكليمة ديالهم كلساتهم إيثار وعاودات ليهم كولشي بتدقيق وفهماتهوم لخطة
إيثار:متافقين حطو ايديكم، مدات ايدها وكلهو حطو ايديهم على ديالها علامة الاتحاد،من بعدها ناضو مشاو إيثار وصلات نوال وهي مشات نيشان لدار مع فتحات جات سعاد عمتها
سعاد:فين كنتي اكتسمعي باك غوت ضربيها بسلتة وتخلينا حنا واحلين
إيثار:وا عميتو انت عارفة بابا مزيان يلاه انوريه ليك اكيدير من لحبة قبة وصافي،نباها باها
لحاج:اياه سرقي 20دجاجة وكولي كندير من لحبة قبة نوكلهم ونكبرهم وجي انت جمعيهم
إيثار:والوليد الله يهديك دير لخير ونساه وصدقة كدفع لبلى ولباس مافيها باس الى صدقتي من داك دجاج 
الحاج:انا

انا انا صافي صافي تقاداو ليا معاك عرفتي شنو ابنتي خودي لي بغيتي داك لكوري كوليه دوك لبهايم صدقيهم حرقيهم انت كاع اما انا صافي ياربي ياربي يجي شي راجل يهنيني منك
إيثار:بلاما تعدب راسك مغادي يجي حتى واحد وراه جا ورفضتو
سعاد:كيفاش ايمتا جا وشكون هدا
إيثار:لي خدمتك معاه طلب مني زواج ومابغيتو
الحاج:سعاد منك ليها انمشي نشرب دوايا ونعس الى زدت دقيقة مع هاد لبنت اندير فيها شيحاجة،طلع الحاج لبيتو وهي دخلات لكوزينة هزات تفاحة ورجعات لصالون هبطات أسية خطفات ليها تفاحة من ايديها وكلسات
إيثار:وها تباسليت وكوزينة احداك كتشوفي الي فيدي انا بففف،ناضت رجعات هزات تفاحة ورجعات لبلاصتها
إيثار:مخداماش انت ليوم اتكلسي افدار ياك؟
أسية:اه علاش؟
إيثار:والو غير سولتك وصافي،شوية تفتح لباب ودخل كريم حط سوارتو وتجبد حداهم
إيثار:حبيب ختو فين كنتي؟
كريم:لخدمة وبعدها تغديت على برا
أسية:مزيان داكشي باش مشفتكش فالمديرية كالو ليا جات عندك شي وحدة وخرجتو بجوج
إيثار:هممم شي وحدة دغية دغية بدلتي نوال العفريت
كريم:نوال لي متلاتش بغاتني ماشي أنا وشحال من مرة طلبت منها سماحة وزايدون هاديك غير فردوس كنا كنقراو شحال هادي مع بعضياتنا يعني غير أصدقاء فسخات لخطوبة ديالها وكانت محتاجة لمن تعاود سيتو
إيثار:فخاطرها)اول مرة نعرف خويا دمدومة دبصح مسكينة بغات لمن تفرغ بغيت ليها بوبريص يعضها من شلاقمها ان شاء الله ليوم تاعتك متعاود معايا نخرج من سابق ولاحق ابلاتي ارجلين نعامة،مع نطقاتها تفكرات نهار كانت كتكوها لأسر دغية نفضاتو من راسها مابغاتش ترجع تفكر فيه حيت عمرها نساتو ولكن هو نساها عمرو هز تيليفون سقسا فيها
إيثار:رجال كلهم بحال بحال منك اخويا وجبد
كريم:اش كلتي؟
إيثار:فين هضرت انا بعدا لهلا يحط علينا باطل

مهم نخليكم انا دابا عندي ميدار
أسية:هاد عندي ميدلر وراها ان واخواتها مافيهاش
إيثار:لاواه فيها كانا وحتى بغيت انمشي ندير بيقولة بغيت نكول قيلولة شفتو راه مع منعستش وليت ندخل ونخرج فالهضرة انا مشيت،هزات ساكها وطلعات لبيتها قبل متوصل ليه فتحات بيت أسية ورداتو بشوية ومشات كتقلب فحوايجها بان ليها ساكها هزاتو لقات لبزطام فيه كارط ناسيونال وكارط دلبوليس هزاتهم دارتهم فساكها ورجعات كولشي كيف كان خرجات من بيت ختها بتسكيل ودخلات لبيتها سدات عليها دخلات لحمام هو لول دوشات عليها خرجات حلات ماريوها تختار شنو اتلبس ليلة جبدات لبسة مع اكسيسواراتها حطاتهم هزات صباغة صبغات ضفارها قداتهم كتسوط عليهم شوية سونا تيليفون ديالها هزاتهم رقم مجهول انكوني مجاوباتش رجع سونا تاني مجاوباتش حتى لتالت مرة وهي تجاوب فتحات لخط 
إيثار:وي ألو ألو ألو......

بنادم كيداير الى مابغيتو تهضرو لاش كتسونيو،قطعات الاتصال وحطات تيليفونها متلاش رجع عاود سونا تكات باش تريح راسها وتفكر مزيان شنو ادير شحال وهي كتفكر شوية طاحت عليها واحد لفكرة من الوزن تقيل تكعدات وخدات تيليفون ودورات نمرة ديك لخدامة فالاستقبال حيت خلات بيها تيليفون
إيثار:كتعوج فسيفتها)ألو زين لاباس انا لي كنت صباح سولت على ديك خيتي عرفتي شنو بغيت نسولك وهانتي راه بحلاوتك اياااه الالة كوني هانية بغيت خدمة بسيطة بغيتك ازين تكولي ليا سميت لكليامات لي كانت معاهم ديك خيتي اياه الله يرضي عليك بلاتي صبري نجيب ستيلو،تماطات لساكها جبدات ستيلو واجوندا ديالها وقيدات سميات رجال لي كانت كتجي معاه فردوس
إيثار:صافي احبيبة ويلي على نساك بحلاوتك كوني هانية يلاه بيبي شكراً،ناري شحال فيها ديال نميمة الله يحفظ غير على سبة ودابا انبداو لعب،جبدات بيسي ديالها وطبات اول سمية كتعطيها معلومات عليه ونمرتو قيدات نوامرهم كاملين 
إيثار:ولايني مساهلاش كتمشي امع ريوس لكبار حتى مالين لبيران مخليتيهم ولكن مزيان نيت يفدوشو والديك ودابا انوريك ضحكي ليا على خويا بشحال كيطلع نجيبو داك تيليفون لهنا أياه هاهو وندوزو اول نمرة ونكولو ألو،بدات واحد بواحد 
إيثار:شوف اسيدي والله انا وكونما بقيتو فيا وبقا فيا وحدة بحال هاديك ضحك عليكم راه ماشي غير انت لي دات ليك رزقك شحال من واحد دات ليه رزقو وضحكات عليه ودابا اسيدي دارت ليا براجلي(كتغبن)بغات تخرج ليا على داري وتيتم ليا وليداتي ولكن انا بغيت نحطها بوجها داكشي باش تاصلت بيك لالا انا انعطيك فين كاينة وانعطيك نمرة شوبر ديالها واشمن وقيتة اتكون غير كون هاني قيد عندك....،
إيثار:كضحك بشر)ودابا خنزك ميجمعوه اشراوط ارا برع ستك ستك عادا عادا،تجمدات على نموسيتها

حتى بدا الحال كيضلام فاقت هزات حوايجها فساك وكاع لي اتحتاج مكياج ديالها كولشي هزاتو فتحات سرجم ديالها دورات راسها طوموبيلت خوها مزال كاينة نقزات ركبات فطوموبيلتها ديمارات ومشات لعند نوال دغية وصلات عندها سونات ليها هبطات لعندها دخلاتها طلعو لبيت نيشان
إيثار:لبسي دغية دغية باش نسبقو كريم
نوال:معرفت واش نلبس هادي ولا هادي؟
إيثار:لبسي هادي،جبدات ليها كسوة من عندها
نوال:اويلي هادي معيقة بزاااف 
إيثار:واش بغيتي تحمقي خويا وتجليه لبسي هادي ديري عليها شي مونطو حتى نوصلو لهيه وديك ساعات حيديه يلاه دابا بلا هضرة زايدة راه خاصني نصايب ليك باش تجي توتة كلسي الأرض،جراتها فوق لكرسي صيبات ليها شعرها وجمعاتو بمشيطة صغيرة خلات ليها خصلات على جنب وجها ومشات ليها لوجها قداتو ليها وبينات ليها عينيها
نوال:ياه ياختي والله حتى تسافيرة لي سافرتي نفعاتك وليتي نعرفي ديري لمكياج ومشيطات لشعر
إيثار:يلاه نوضي لبسي لكسوة لي جبت ليك،هزات لكسوة لي جابت ليها إيثار كانت فالحمر قصيرة بزاف وعريانة من صدر لبسات معاها صندالة علية فلكحل ودهبي وبزيطيم سواري فالكحل
نوال:كدور)كيجيتك؟
إيثار:ودابا وليتي خوخة يلاه انا نلبس باش نمشيو دغية، فدات إيثار وجها حتى هيا لبسات اونسوبل سروال فالكحل كلاص مع شوميزة ديالو فالخضر ولكحل كتبري وايكسيسوارات مع صباط عالي وساك ديالها فالكحل
نوال:بففف تاتباني لوزة
إيثار:خاصنا اشي مولينيكس ونوليو زعزع يلاه خلاص:لبسات نوال مونطو وهبطو كيتسكلو بشوية فتحو لباب وخرجو ركبو فطوموبيل إيثار وشدو طريق
نوال:دابا كولي ليا شنو انديرو شنو لمعمول؟
إيثار:سمعي الالة وحلي معايا ودنيك مزياااان.....، انت لي بغيت منك هو تباني ليه ضروري مغادي يجي لعندك يسولك شنو كديري هنا أشنو جابك شنو اتكولي

ليه علاش تافقنا؟
نوال:انكوليه امو لكليكة عرضات عليا نمشي معتهم لهاد لحفلة هادي باش نفوج ونبدل الجو 
إيثار:هكاك برافو فنفس الوقت تخلي كرامتك مرفوعة وفنفس الوقت هو من سابع المستحيلات يشوفك بداك لباس وميتحرك فيه والو ويخليكتم كالسة بوحدك حتى فرضنا مثلا حسيتي بيه مقادش يكلس معاك كوليه الى معندك والو كلس معايا حدا الما كنتي زربان وديك ساعات منين يكلس خدمي معاه تحلوين لسان ولميوعة دوخيه تفاهمنا المهم هو متخرجوش من داك لوطيل إلا وايديك فيديه صافي؟
نوال:صافي وانت فين اتكوني؟
إيثار:ههههه اندير غير واحد لخيرة ونكون سبب فتوبة ديال واحد الإنسانة حشومة نخليوها غادية فواحد طريق خاسرة يلاه سوني لكليكة شوفيهم واش واجدين وفين كاينين، داكشي لي دارت نوال سونات ليهم كالو ليها راه كيتسناوها عند لكلوب، وصلات عندهم عطاتهم لخطة كيف هيا رجعات لطوموبيلتها وهوما ركبو فطوموبيلت عصام وصلو لوطيل دنيا عامرة
إيثار:واجدة اول حاجة تخباي فشي بلاصة باش الى دخل كريم ميشوفكش حتى تشوفي جوقة ولحيحة عاد ديك ساعات باني اوك
نوال:واخا، هبطات إيثار ونوال وقفات طوموبيلت دراري نزلو حتى هوما لابسين وانيقين هازين الالات ديالهم شافها لكارد لي كان يلاه هزات لكارط ديالها وراتها ليه تحرك ليها من لبلاصة وخلاهم يدخلو
إيثار:داك بوكريشة هو ومراتو باين هو المدير انا انمشي نبارك ليه ونرجع عندكم، مشات بخطوات واثقة عندو بنخوة وقفات عليه هو ومراتو وشي ناس اخرين
إيثار:موسيو بن دريس والله الى نهار كبير هدا انا فرحانة ليكم وكل عيد زواج وانتوما بيخير وعلى خير
بن دريس:شكراً سمحيلي ولكن معرفتكش شكون انت؟
إيثار:انا إيثار بونجوم
بن دريس:اوووه بنت الحاج عمر مرحبا والف مرحبا زارتنا البركة
إيثار:والله الى لواليد كيعاودعليك كل خير

كل خير لا انت لا الاوطيل ديالك سقت لخبار لحفلة لي درتي وجيت براسي نهنئك وجبت معايا كادو بسيط أصدقاء ديالي موسيقين جبتهم يغنيو خصوصا فالحفلة ديالك
بن دريس:هدا شرف ليا مرحبا بيكم عتابري الاوطيل ديالكم مرحبا
إيثار:ربي يخليك وبون سواغي، خلاتهم وهيا حاسة براسها نتاصرات
إيثار:دابا لقاعة ليكم غنيو حنقزو ديرو مابغيتو نوال وياك تنساي علاش تافقنا انا مشيت
نوال:ويلي فين غادية؟
إيثار:اش بغيتيني أنا انا نسايني دابا ديري الي كلت ليك يلاه الله يعاون، خلاتهم وطلعات فلاسانسور مشات نيشان لشومبرو لي كيبدلو فيه ديال لخدامات دخلات بدلات حوايجها بحوايج لخدامات وخرجات هازة شطابة مشات نيشان لبيت لي حاجزة فيها فردوس دقات شوية تفتح لباب علات رجليها فرجلين لعريانين 
فردوس:كاين شيحاجة؟
إيثار:فخاطرها)اجي طلي يا نوال لي كالت ليك لا منلبسش كسوة قصيرة هادي راه لابسة ليها غير شوميز سيك، احم لالة جيت غير نصايب شيحاجة فالبالكون عندك ونمشي
فردوس:واخا دخلي انا اندخل لحمام دغية وخرجي نخرج منلقاكش هنا
إيثار:واخا لالة،دخلات فردوس لحمام دخلات إيثار كتلقا نموسية فيها لورد وطابلة فيها أحسن ماكولات شراب محطوط كلشي هو هداك
إيثار:هاي هاي على بنت لحرام موجدة كولشي واخا واخا،هزات إيثار واحد لكارط دارتو فساقتا ديال لباب كدخلو وتخرجو دخلو وتخرجو حتى تعطل لباب ولا ايتفتح ويتسد بحالو بحال اي باب عادي غير سلات وخرجات دخلات لبيت ديال لخدامات بدلات حوايجها لبسات سروال وتجاكيطة ودارتلقب دورات تيليفون ديالها لاول واحد هضرات معاه سولاتو فين وصل قاليها فباب الاوطيل عيطات لتاني حتى هو نفس شي 
إيثار:وادابا ايبدا لعب ديال بصح، حلات لباب كطل براسها كيبان ليها باب لاسانسول تحل وداخلين منو جوج رجال كل واحد قدو قد الحيط،شوية

شوية سونا تيليفونها كانت نوال
إيثار:الو مالك؟
نوال:خوك هنا راه وصل وراه طلع فلاسانسور
إيثار:أححح طرح ايسخن دابا سيري فحالك، قطعات معاها ورجعات راسها كطل بدات كتسمع لغوات ولمزاوكة ديال فردوس تحل لاسانسور وتم داخل خوها لي سمع لغوات بان تعجب على وجهو مشا بخطوات جيهت بيت فردوس كيبان ليه محلول وهو يدخل رجع تفتح لاسانسور وخرجو منو ربعة ديال رجال أخرين إيثار فرحانة كتنقز كتسمع غير فالغوات ولهضرة كثيرة شوية خرج خوها مغوبش ولعياط ديال فردوس بسميتو، رجعات إيثار راسها
إيثار:كتسوس فيديها) ودابا انتهت المهمة بنجاح ندوزو لدوزيام ستاج،هبطات مع دروج ودات لكوزينة طباخة كيشوفو فيها دايزة وكدير ليهم باي باي بيديها خرجات من لباب لوراني ركبات فطوموبيلتها وتقابلات مع باب الاوطيل كتسنى دازت نص ساعة كيبانو ليها لي كارد شادين فردوس من ايديها وهازين ليها ساك ديالها ولاحوها برات الاوطيل
إيثار:اوو مسيكينة بقيتي فيا،بقات مقابلاها واقفة كتبكي ودايرة اوطوستوب لطوموبيلات حتى واحد مابغا يوقف ليها قدات إيثار قبها وديمارات بطوموبيل وقفاتها قدام رجلين فردوس لي ماشي من لعاكزين طلعات فرحانة عند بالها اتصيد شي واحد من بعد تبهديلة لي كلات وصدمة لي تعرضات ليها فاش حصلات وتفضحات عند كريم ولمدير لي سمع لبلبالة زساق لخبار وامر لكارد يلوحوها هيا وحوايجها برات الاوطيل ديمارات إيثار طوموبيلتها بلا هضرة بلا جوج...
نوال:لي بان ليها كريم خرج من لاسانسول مخنزر ناضت بلعاني جيهتو خرجات فيه 
نوال:سمحليا ما.... كريم هدا انت؟
كريم:على عينو فيها مبهوض كيطلع فيها ويهبط)نوال انت هادي اش كديري هنا ووو شنو هاد لباس لي لابسة؟ 
نوال:عصام ودراري جاتهم انفيت يغنيو هنا وعرضوعليا نمشي معاهم عرضو على إيثار ولكن كاتليهم مافيها

مافيها لي يمشي وجيت انا معاهم نبدل الجو شوية، دور كريم راسو كيبان ليه شبان لي تم كلهم عينيهم على نوال
كريم:واتبقاي كالسة بوحد حتى يسالي عصام ودراري؟
نوال:الى بغيتي تكلس معايا مرحبا الى كنت مسالي بطبيعة الحال الما مساليش ما...،مجات فين تكمل هضرتها جرها من ايدها مخرجها
نوال:كريم ويلي فين غادي بيا؟
كريم:نخرجو من هنا نهضرو ونكلسو براحتنا هنا كولشي كيشوفيك عاجبك الحال مقزبة بحال حكا وزايدون البرد ايضربك لبرد
نوال:راه جبت لمونطو ديالي بلاتي غير نلبسو،رجعات لطابلة فين كانت كالسة فرحانة هزات مونطوها مع دارت لقاتو وراها لبسو ليها وشد ليها فيديها دارت شافت فلكليكة غمزات عصام وخرجات مع كريم فتح باب طوموبيلتو دخلها ومشا هو لبلاصتو ديمارا وزاد.
فردوس:خويا فين غادي بيا جايبني لجيهت لبحر فين غادين؟،وقفات إيثار طوموبيلتها جنب لبحر نزلات ومشات لباب فردوس حلاتو وجراتها منشعرها نزلاتها دنيا خاوية وهي كتغوت على حر جهدها مشات بيها جراها جيهت رملة ورماتها حيدات لقب كتشوف فيها
فردوس:بنت انت بنت شكون انت شنو بغيتي يكما تكوني وحدة من عيالات دوك لي ضحكت عليهم؟
إيثار:لاواه زفت انا لي انخرج من جديد ولبالي ونخليك تشالي ودوري فزناقي تنسيك على سميتك وماساهلاش ضحكي على رجال تدي ليهم رزقهم وتسلتي
فردوس:وقفات كضحك)وشنو اندير ليهم الى كانو دمادم اجي انت معرفت فين شتك انت لي دخلتي عليا لشومبر انت لي..
إيثار:قاطعاتها)رضى انا لي دخلت عليك وانا لي فضحتك وانا لي درت ليك كولشي ومعرفتيش معامن كتلعبي ابنيتي بقا ليك اكريم خويا هو لي بقا ليك
فردوس:انت هيا لعافية لكحلة خت كريم فاش كان كيقرا معايا شحال عاود لينا عليك
إيثار:أهاه اياه انا هي لعافية لكحلة لي اتشعل فطاسيلتك كلها عرفتي ايديا كياكلوني بزاف"كتقرب

كتقرب ليها حتات ليها على شعرها لواتو على ايديها لاحتها على رملة كتنتف وتعض تنتف وتعض وطرش نزلات ليها على حنكها عضاتو ليها حتى خلات فيها الامارة مناضت من فوق منها حتى خلاتها كلها مشرشمة سخفانة
إيثار:والله ومزال دوري بخويا ولا دوري مزال بشي راجل مزوج وضحكي عليه وتبغي تفرتكي ليه شمل الما فصلت ليك راسك على كنازتك ونخلي لي يشوف فيك يتخلع منتسماش راه واخا طيري وتنزلي نجيبك نجيبك تفكري لي داز عليك يوم وديريه فبالك وخليه درس ليك يلاه تهلاي، هزات 50درهم من جيبها ولاحتها عليها
إيثار:منين تفيقي هاكي باش تشدي طاكسي تفو على عيالات خطافت رجال خاص باباهم نحير، مشات جيهت طوموبيلتها هزات ساك فردوس لاحتو ليها لاوخرا مزال طايحة سخفانة خلاتها وركبات فطوموبيلتها وزادت، فطريق هزات تيليفونها سونات على نوال مكتجاوبش
إيثار:عندك اتكون زبلاتها، دورات لعصام جاوبها
إيثار:ألو عصام واش نوال حداك كنسوني ليها والو
عصام:نوال خرجات مع كريم لخطة مشات كيما بغيتي
إيثار:لعز وانتوما اش درتو
عصام:تعشينا ونشطنا وضبرنا على لعاقة
إيثار:واشتي باش متكولش إيثار بلاناتها خاويين يلاه تهلى حتى نتشاوفو، قطعات معاه خدمات موسيقى غادية وتغني وضرب فالفولون ختارت طريق خاوية يلاه كيتبناو فيها لعمارات دايزة وتقرا فالبلاكات ودور فعينيها شوية فرانات بقات واقفة تمات راجعة بلور بلور وقفات طوموبيلتها فواحد لبيست خاوية سكتات طوموبيلتها حلات لباب وهي تنزل علات عينيها مع أكبر بنية فديك طريق وكتقرا شنو مكتوب حركات راسها ليمن وليسر وصدمة على وجها
إيثار:لالا ميمكنش هادشي يكون بصح غير تشابه ميمكنش، كتقرا وكتعاود تأكد من لكتابة لي مكتوبة بخط ذهبي عريض مع نفس شعار ونفس الإسم
" #مصنع_تايغر_للمفروشات_الجلدية "

إيثار:لا يمكن انا غير كنتهيئ خاص نسول على هاد القضية هادي،رجعات باللور وركبات فطوموبيلتها كملات طريق لدار وبالها مشغول وصلات لدار وقفات طوموبيل نزلات فتحات دار وطلعات لبيتها نيشان بدلات حوايجها وتخشات فراشها نعسات.
صبح صباح تيليفونها كيسوني على شحال عاد تماطات ليه هزاتو بلاما تشوف نمرة
إيثار:صوتها تقيل)ألو 
نوال:فرحانة) تصالحنا تصالحنا اح انا فرحانة دوزت أحسن ليلة فحياتي
إيثار:وعلى سلامتك هاد لمرة ديري عقلك ودابا خليني نعس
نوال:اويلي انت مزال فالفراش كلت نخرجو شوية
إيثار:توكضات)لالا راه بغيتك نيت نص ساعة نلقاك واجدة انفطرو على برة صافي انلبس ونجيك، قطعات عليها ناضت بالخف غسلات حالها لبسات تيشورت فالبيض مع تجاكيت كويرة مع سروال بيض سرحات شعرها قداتو وهبطات كتجري مع دروج رجعات ايد خوها
كريم:فين غادية زربانة مفطرتي ماوالو ماشي عادتك
إيثار:ناس كيكولو صباح لخير هو لول اجي شفتك ناشط ماشط صديقتك جديدة لي تغديتي معاها دارت خدمتها معاك
كريم:لالا انا ونوال رجعنا مع بعضياتنا اما هاديك قصتها قصة دابا بلاما تهربي فين غادية
إيثار:دايرة انا ونوال انفطرو ومابغيتش نتعطل عليها صافي انا مشيت
كريم:واجي غير نكوليك آخر لخبار إيثار إيثار لاحول ولا قوة الا بالله معامن كنهضر،بزربة ديمارات وشدات طريق عند نوال غير وصلات بدات كتكلاكسوني عليه ديك ساعات هبطات عندها نوال غير طلعات وهيا ديماري
نوال:مالك اختي ياك لباس عجاجة نايضة ابشوية اتقتلينا
إيثار:انت غير سكتي وشوفي كدامك
نوال:إيثار جيني نيشان اش واقع ؟
إيثار:دابا اتعرفي كولشي،وصلو لبيست فين شافت إيثار سمية بلاصات طوموبيلتها وهبطات نوال كتشوف فيها مفاهمة والو هبطات حتى هي وراها ناس داخلين خارجين دنيا عامرة بالعمال
نوال:ماتكوليش ليا باغية

باغية تخدمي هنا؟
إيثار:لاواه جايا نزرع الفول قراي ديك لافيتة لي لفوق،علات نوال عينيها كتقرا وهي تخرجهم وكترمش بجهد
نوال:متكوليش ليا نمر لمقنع تبعك شفتي اختي كيبغيك زيغ غير ضلمتيه
إيثار:انت غير ديري خمسة على فمك وسكتي هاحنا انعرفو دابا،قطعات شانطي ونوال تابعاها مشات لعند لعساس نيشان
إيثار:سلام اعمي لاباس عفاك بفيت نسولك
لعساس:ياه ابنتي مرحبا
إيثار:عمي هاد لمصنع ايمتا تبنا وشكون مولاه؟
لعساس:وابنتي هاد لمصنع تبنا من شحال هدا وكان ديال واحد سيد ولكن علمى كالو شي حد شراه وستتمر فيه ويلاه ناس كيخدمو فيه شوية بشوية علاش ابنتي واش بغيتي تخدمي؟
إيثار:أه اعمي ماشي انا صاحبتي لي بغات تخدم فيه وشكون مولاه؟
لعساس:وابنتي حتى لهنا ومعرفت انت غدا جي بكري وشوفي اش كيطلبو ويلى بغيتي دخلي دابا
إيثار:لالا أعمي حتى لغدا ونجيو شكراً،رجعات بلور ومرة مرة دور وتشوف فالمصنع ركبو فطوموبيل ديمارات وشدات طريق لمدينة
نوال:مافهمت والو والله زعمة يكون اتشابه الاسماء يبغي شي واحد يدير نفس سميتو
إيثار:شوفي انمشيو نفطرو دابا ياك فيا جوع من بعد نحطك فالمول نخليك تم انا انمشي لكوميساريا بغيت نشوف عمي رشدي ونجي عندك واخا
نوال:اش بغيتيه؟
إيثار:انسولو هو لي ايكون عندو لخبار، مشاو هو لول فطرو بجوج حطات إيثار نوال فالمول ومشات لعند رشدي دخلات سولات عليه كالو ليها راه مكاينش خرج ولكن تسناه ايرجع دخلوها لبيرو عندو حيت عرفوها خت أسية وكريم بقات كتسنا كتسنا شوية سونا ليها تيليفون لقاتها نوال
إيثار:بلاتي شوية وانجي دوري وشوفي لجديد اصاحبتي
نوال:سكتي خليني نهضر دخلي لواتساب دابا سربي عندي ليك شيحاجة،قطعات عليها نوال دخلات إيثار لواتساب كتسنى شنو كاين كاتبان ليها جوج تصاور مسيفطاهم ليها شحال وهوما كيتشارجاو

شدو لعكس شوية بداو كيوضاحو حلاتو إيثار وكبرات صورة كيبان ليها محال كبيير بزاف بحال شي اتوليي مزلج بالكحل ولفوق مكتوب فيه بدهبي #مجوهرات_تايغر ونفس شعار إيثار لي كانت كالسة وقفات مافاهمة والو كتكبر صورة وتحقق مزيان نفس شعار 
إيثار:لا بزاف هادشي بزااف،تفتح لباب ودخل رشدي
رشدي:إيثار كالو ليا راكي هنا مرحبا بيك ياك لباس
إيثار:عمي رشدي بغيت منك اواحد لمعلومة صغيورة
رشدي:أياه كولي
إيثار:آسر بغيت نكول تايغر واش جا لمغرب ولا مزال فالبرازيل
رشدي:علاش ماشفتيش جورنال ديال ليوم؟
إيثار:لا مالفة كنقراه ليوم مقريتوش
رشدي:تايغر الالة فتح فروع هنا فالمغرب وخدا لمصنع لكبير لي تبنا مؤخران فطريق نواصر وغايخدم فيها شحال من واحد زيد عليها ايفتح محالات تجارية ديال ليكسيسوارات وتعاقد مع شحال من واحد او جورنال ديال ليوم كالو كاين فالمغرب واقيلة جا مع خطيبتو ولا معرفت شكون هاديك
إيثار:ككك كيفاش خطيبتو هو مخاطب موالو
رشدي:معرفتس المهم شي وحدة مصورة معاه وصافي(على عينو فيها)شفتك وقفتي فين غادية؟ 
إيثار:عندي مايدار انا مشيت،خلاتو بلاكة حلات لباب زخبطاتو وخرجات كتجري ركبات فطوموبيلتها ومشات لواحد لكيوسك نزلات خدات جورنال خلصات وطلعات لطوموبيلتها حلات جورنال كتقلب حتى كيبان ليها تصويرتو قدها قداش وسط جوج بنات كيضحك شوية لتحت صورتو فصحرا مع بنت وحدا خرا ميتين بضحك شادة فيه كدور إيثار جورنال بجهد شوية وتقطعو تعصبات بالمزيان كاتبين عليه بزاف وانو شخص ناجح وأعمالو غادية وكتكبر وكتوسع وعلى مشاريعو جايا وانو كاين فالمغرب فمراكش كل واحد كاتب عليه شيحاجة
إيثار:هاه تبارك الله على الفريدو فرحان ليا وضاحك حتى كتبان ليه ضرست لعقل،خبطات جورنال وكسيرات لمول عند نوال بلاصات طوموبيلتها لقات نوال كتسنا فيها

فيها غير شافتها جات عندها كتجري
نوال:بلهفة)شفتي ياختي شفتي كتليك سيد باغيك وجاي على قبلك
إيثار:نوال امخبطك واحد لخبطة راه جنون لي فيا مافهد ولقردة طالعة لسطح بغيتي تشوفي شنو واقع انا انوريك شدي قراي(مدات ليها جورنال) شداتو نوال كدور فيه عينيها مخرجاهم
نوال:ناري على سلكوط ياختي هاد رجال دغية يضركوك خاصك غير تحيدي من قدامهم ناري كرهتو والله 
إيثار:سيد كيدور مع رساتو كاعما عارفني واش كاينة على وجه الأرض ولكن حتى انا والله لا بقيت فكرت فيه صافي سالينا يشري لمغرب كامل كاع نهز حوايجي ونمشي لمالي ولا لكوديفوار صافي،بدا تيليفون كايسوني كاتبان ليها نمرة غريبة حلات لخط وجاوبات:
إيثار:ألو
هناء:الو زين انا هناء توحشتك ياختي
إيثار:هناااء حتى انا توحشتك فين غبورك
هناء:منين جيت تلهيت غير مع توجاد شوفي سيمانة جايا راكي معروضة لعندنا تافقنا نديرو احفيلة صغيرة بين العائلة صافي فدار نعول عليك
إيثار:صافي سيفطيليا غير لعنوان ونجيك واخا نجيب معايا صاحبتي؟
هناء:جيبي معاك لي بغيتي مرحبا بيهم
إيثار:رلي يخليك ومبروك عليك سلمي ليا على جليدان
هناء:كضحك)يوصل، قطعات معاها هناء
نوال:واش ديك هناء ياك اتمشي وبحال والو يعيطو على نمر المقنع
إيثار:يعيطو حتى على باتمان مكايهمنيش انا المهم نمشي ندردك وناكول توحشت ماكل لعراسات وراه كاتليا نجيب معايا لي بغيت
نوال:نكولو لكليكة تمشي معانا ياك هوما متفتحين؟
إيثار:والله الى فكرة انكولها ليهم يلاه بغيت ناكول شي طرف دالحلوة بشكلاط بغيت ليوم نردح ونزدح وهدا(شدات جورنال) ها باباك ها باباك (قطعاتو طراف طراف ولاحتو).
دازو الايام بحال بعضها نفس روتين جا نهار فرح هناء دات ليها إيثار كادو هيا ونوال اما لكليكة مابغاوش يمشيو داز نهار زوين بزاف ضحك ونشاط شطيح ورديح

حس آسر مابانش فطريق رجعة كالت نوال لإيثار:
نوال:لعجب لي مجاش نمر المقنع
إيثار:يجي ولا كاعلا يجيبو فخبارك كريم كالينا ماتلاش بغا يجي يخطبك
نوال:برد لما ليها فركابي)اويلي علاش اختي؟
إيثار:هههه بغا يعقد نيشان وديرو لعرس سيد حما مابقاش قاد يصبر صافي
نوال:يس يس(كتجدب) وأخيراً اووف خلعتيني القردة
إيثار:أح عليك ماشي اهو لي حامي انت راه كثر منو دودتي هههه اه انا غدا راه مغاديش نكون حاضرة انمشي لطنجة لاعبين واحد لماتش تماك انغبر واحد 15يوم عاد انجي ايكون اخير ماتش ليا معاهم صافي مابقيت حاملة شي ماتشات بغيت ندير محمية ديالي اختي
نوال:من نيتك محمية ديالك عمي عمر مايبغيش ليك
إيثار:نهار بغاني نقبل نمشي بلاصة أسية كاليا غير قبلي ولي بايتيها اتكون ايحسابني نسيت انا مزال مفكرة والله منتفاك واه بغيت ندير شي حاجة كنبغيها انا مهم نزلي لخيمتكم حتى نرجع ونتفاهمو
نوال:تهلاي فراسك وترجعي وجي عندي، شيرات ليها إيثار بيديها ومشات لدار طلعات لبيتها جمعات حوايجها قداتهم وعمرات ساعة ونعسات فاقت مع 6دصباح لبسات حوايجها وخرجات لكار كان كيتسناها ديال نادي لي كتلعب فيه شدو طريق نيشان لطنجة.
الحاجة:لحاج واش من نيتك كتهضر وراك عارف بنتك كيدايرة الى رجعات وعرفات والله ميعجبها حال 
لحاج:صافي الحاجة مالها أش ادير ومافيها باس وزايدون بنتك انت عارفاها مكتكلس فبلصة وحدة ومغادي تكول والو والى كالت انا نهضر معاها ارتاحي انت
سعاد:لحاج والله حتى كتقلب على صداع وهاد لمرة راه ماشي هي لي جبداتك انت لي جبدتيها ومنين دير ليك شي مصيبة متجيش تشكى علينا تحمل لعواقب راسك شغلك هداك، ناضت وخلاتو
مليكة:ختك عندها صح انت باغي تجبد لينا صداع كنكونو هانيين حتى كتكول اش نسيتي الله يهديك الحاج الله يهديك....

رجعات إيثار وبحال كل مرة رابحة هازة ميدالية فعنقها وفرحانة بيها ولكن كان هداك هو آخر ماتش ليها رجعات لحياتها كان كولشي كالس على طابلة ديال لعشا
كريم:لوراق خرجو ليا ديال لبوليس على قبل زواج
إيثار:ياك انت انسبيكتور زعمة متحتاجش
الحاج:فقضية زواج مكاينش فرق بين هدا وهدا قانون كيمشي على كلشي
إيثار:امم وانا كان كيسحابلي واش وقفتيهم فاش تفارقتي مع نوال اح عليك
كريم:موقفتهمش خليتهم مكانش عندي الوقت الحمد لله معطلونيش 4شهور راه دارو معايا المزيان راه مدفوعين منين مشيتي
إيثار:فخباري نوال صاحبتي قبل ماتولي مراتك احنيني(شافت عند باها) لواليد غدا انا انخلص لخدامة بلاما تمشي انت انا انمشي نشوف لخدمة كيغادية 
الحاج:الله يرضي عليك ابنتي، من بعد لعشا بقاو مجمعين سهرانين مع تلفازة كل مرة دوز صوت طوموبيل كل مرة كل مرة طوموبيل
إيثار:اهياوين مالحضتوش ليوم كتر لحديد من صباح طوموبيل غادية وحدة جايا
أسية:واش ناس ميخرجوش كوراه جيران جاو عندهم حبابهم انا انمشي نعس عندي خدمة غدا تصبحو على خير
إيثار:ديني معاك حتى انا عندي ميدار غدا،تبعاتها إيثار دخلات لبيتها سمعات حس طوموبيل طلات بعينيها كتبان ليها لاندروفير فالكحل كبيرة دايزة عوجات فمها وتكات على نموسيتها دغية ستسلمات لعناس ونعسات.
"صباح فسوق"
إيثار:وابراكة من لقوالب عقنا بيك شوف اتهامي طلعهم فيا انهبط دروك نمخضك وانا علمتك ماحشمتيش وجهك هداك ولا مسلفو حنى تشد من عندنا لبن زين كلو زبادي وبلا حشمة بلا حيا تكشي تخلطو بالما وتبيعو لناس وتكوليهم لحاج كيبيع لبن مزطي والله وكون ماجيتيني بلحيتك حتى نوريك ودابا رولي معندناش لبن سير عند لمعطي يبيعو ليك هو نيت لي تابر عليكم يبيه ليكم لبن خانز وحامض، دازت مينة لي فالحمام
مينة:والله يعاونك أ ايثار

الله يسكم سعدك ابنيتي عتقتيني بدوك دجايجات ابنيتي
إيثار:هانية امي مينة هاكي هاد 5ايطرو دلبن ديه لوليدات ليومة جمعة راه كسكسو،شداتو عندها وهي كترضي عليها جاو عندها لخدامة خلصات كل واحد بوحدو بخلصتو وقفات واحد طوموبيل ونزل منها واحد بجلابة وسلهام علات إيثار فيه عينيها غوبشات وكملات شغالها
لمعطي:بجهد)ايوا اش بقا اش بقا لي ولاو لعيالات يديرو خدمة رجال 
إيثار:بهمس)استغفر الله العظيم ياربي تصبرني منرتاكبش شي جريمة فخلقك ياربي،تجمعو واحد جو رجال من لبركاكة تما على لمعطي لي كان داخل فالانتخابات ديال تما
"وياه اسي لمعطي لبنات لي ممحكومات هكا كيكونو" نقز تاني
"مالقاتش رجال ياحسرة خوها فالبوليس لحاج عمر خرجو بناتو زيرو البنات اخرتهم فكوزينة مع لماعن حتى يجي شي راجل يسترهم
لمعطي:هانتوما شاهدين ولكن معامن تهضرو بحال هادو مخاصهم يبقاو هنا،إيثار بدات ضبابة كتابن ليها قدام عينيها باقي لفلوس دارتهم فجيبها وطلعات فوق بيكم 
إيثار:بحال الى كانسمع داك دبان لخانز كايكجكج ومصدعنا ادوي أ لحية لمعزة تحليك لفم ولا نجبد ليك بلانتك ولا نسكت حسن دوي دوسيك خانز عندي
لمعطي:ولي ترادي معانا ابنت لحاج
إيثار:هانتا كلتيها بنت لحاج وشلل بيها فمك ولي جبدني نجبد ليه لبلابز دعينيه لا انت لا دوك لبركاكة بجوج لي معاكم ضواسكم لخانزة راها عندي ادوي عقلتي على ديك خيتي لي حصلتك معاها ورا طحونة عرفتي وتسيق ليك لخبار مراتك بابابا نكول لي مخبي ولا باش، نقز هداك لي عطاتو لهضرة
"احم دوزو بخير سمحيلينا ابنت لحاج وانت اسي لمعطي الله يعطيك ستر عطي لبنت بتيساع ابنتي لغلط كيوقع الله يعاونك ابنتي"خلاهم ومشا
إيثار:تررر على رجلة وانت امصنن طبكان اخانز لفم تشوفك جيفة تعيف ادوي نجبد دوسيك؟
"الالة انا بالله وبشرع معاكم

أش دخلني لهاد سواق دوزو بخير،بقا غير لمعطي تكرعات عليه تكريعة وحدة بداو يتجمعو عليها لخدامة وناس
إيثار:وانت لي كرشك سابقاك تكول حامل ابتوام ياكما تسحاب راسك اتخلعني ولا خايفة منك غير ناس دايرهم فكرشك وكضحك عليهم انولي نترعد منك انا راه نصوت فقبيلة وتجيني قليلة والله حتى نتعرا عليك هنا ونجبد ليك لقديم وجديد ونحسبهم ليك قدامك،تمت جايا مراتو لغالية
لغالية:هاديك هاه خلي عليك راجل متحشمي مترمشي راجل قدباك وتهضري معاه هوك اديك سليعفانة الما رباوك وليديك انربيك انا
لمعطي:منديرش فيك ايدي نخلي لمرا تفاهم معاك
إيثار:كدور فراسها)مرا فين هيا هاد لمرة لمعطي انا كيحسابلي وليتي من خوتنا وخديتي راجل بحالك بحالو وانت الغالية معندك حتى فصالة لعيالات ضلي نهار ومطال تعلفي فدردك معرفنا راجلك جايبو يوكلو لبهايمكم باش يتنفخو ولا يوكلو ليك واكواك اعباد الله شهدو راني مكنجبدهاش الالة راجلك لي فرحانة بيه راه طايح ليك مع هنية شيخة الى فخبارك ونزيدك راه باغي يطلقك ويتزوج بيها ودابا أجي لهنا،تلاحت عليها من فوق لبيكوب جمعاتها هي وراجلها تضرب هنا وتقرص هنا وتعض هنا لعجاجة ناضت لغوات وناس يفكو مالقاو مايفكو صوتها بح ليها وشعرها طلع لسما مكاتحس براسها غير تهزات من وسط جناعة ومع دالك كضرب برجليها وبيديها كتسحاب راسها راه مزال وسط لمعماعة هبطات عينيها لرجليها بان ليها راسها مهزوز ها مزادت جعرات عرفات كريم مول لفعلة مالف كيفكها ديما
إيثار:كتركل) كريم طلق طلق خليني نحيد ليها داك ناب ديال ذهب بي عاجبها واهبطني راه انعض والديك هبطني، تنطرات منو هبطها بجهد وقفها تخطاتو وتمات راجعة ايدو رجعاتها بجهد لعندو 
إيثار:و بعد مني هاد زمر راه(علات عينها فيه تجمد دم فعروقها ايدها بقات معلقة فالهوى
ايثار:بصدمة)هذا أنت تاني؟..

آسر:فينما كتكوني ضروري يكون صداع مكتبدليش
إيثار:مكنتبدلش ومعمري مغادي نتبدل ودابا حيد من كدامي،جات تخطاه رجعها
آسر:واخا نهضرو شوية؟
إيثار:معندنا فاش نهضرو ومكين لاش نهضرو ودابا انا ممسلياش ليك وآخر مرة تحط ايديك عليا ولا جنون لي فيا مبردتهم فديك لغولة نبردهم فيك أنت وزايدون باش لاش جاي لهنا لاش ولاش جاي تابعني سير عند مسبسي دخطيبتك وانت كالس دور على لعيالات بنادم كيداير،مخلاتش ليه لفرصة لي يهضر ضربات فيه وكملات طريقها غادية وتبغم وتسول فراسها
إيثار:هدا اش جابو لهنا أصلا هو سوبيص مافيه أمان كيضرب هنا ولهيه مافهمت والو انا فهاد رجال هادو ولد لحرام دغية نساني وبدلني بغيت ليه غبارة تغبرو تغبرو كتعني يموت استغفر الله العظيم لالا ياربي متقبلش دعوتي واخا هو مايسواش ولكن منبغيش ليه لموت واخا هكاك ولد لهم مزال فقلبي تفو هاد لقلب تاعت الي يحيدو ويشويه،طلعات فطوموبيلتها ديمارات ومشات لدار نزلات فتحات دار ودخلات تم جاي باها
الحاج:بصح داكشي لي وقع فسوق؟
إيثار:أه بصح وداك لمعطي لخانز الما عطانا بتيساع انوريه يبقا يجبدك على فمو ولا يجبدنا
الحاج:واخليه ينبح بحال لكلب انت اش بغيتيه لاش دابزي معاه
إيثار:وأنت يرضيك يبقى يحل فمو فينا ومراتو تكوليك انا قليلت ترابي ترضاها ابابا ترضاها الى كنت ترضاها دابا نطلب سماحة منهم داكشي لي علمتيني هو لي مشينا عليه،نقزات لالة مليكة
مليكة:برافو عليك ابنتي هكاك نبغيك لي جبد عيب يلقاك
الحاج:صافي ابنتي دوزي وهاد لمرة انا لي انتفاهم معاه مزال مكيعرفنيش
إيثار:كنفكر ندهل الانتخابات راسي براسو
الحاج:ولا دابا راك هبلتي يمكن سيري طلعي لبيتك راه مرة مرة لفرخ كيهرب ليك،طلعات لبيتها دخلات لدوش دوشات عليها خرجت لبسات حوايجها هبطات كلات شوية وطلعات تنعس

هزات مخدة دارتها على راسها بحال الى كتحبس تفكير تفكير ديال أنو آسر كاين فلمغرب ويمكن قريب من هنا فكرة تديها وفكرة تجيبها حتى نعسات فاقت على وجه ألكس خاشي راسو فيها كيلعب فوجها باش تفيق
إيثار:انولي نربطك خليني عليك،والو مابغاش يخليها شافت حتى عيات وهيا تنوض غسلات وجها دارت مرطب لوجها وجمعات شعرها على شكل كعكة لبسات شوميز بيج مشبك وجيلي دجين وصايا طويلة واسعة بالالوان مع كلاكيطة فرجلها مشات جيهت سرجم كطل كتبان ليها لي قريبة ليهم لي من صغر باها كان كاليها ديك دار انكتبها بسميتك فاش تكبري وعزيزة عليها مشعول فيها ضو وقدامها نفس طوموبيل لي شافت عقدات غوباشتها مافهمات والو مدات مجابت هزات تيليفون ديالها سونات لنوال
إيثار:وي لقردة ديالي شوفي اجي تعشاي معانا ومن بعد نخرجو جنب لواد شحال هادي مامشينا لتم
نوال:عرفتي لقيتينا أصلا جايا هاني هاني كنبان ليك، دارت جيهت سرجم بانت ليها نوال كتشير ليها قطعات عليها وهبطات كولشي كان مجموع لتحت باها خوها خواتاتها وعمتها ومها مشات نيشان لباب فتحاتو دخلات معنقها نوال بحال شي صاحبها
نوال:سلامو عليكم
الحاج:اهلا بنتي مزيان نيت جيتي نتعشاو مجموعين،كريم شافها غمزها
إيثار:كون تحشم شوية راه حنا هنا زعمة
كريم:شي نهار اتاكليها من عندي فير بلاتي،شوية إيثار تفكرات دار
إيثار:بابا اجي نكوليك واش خليتي لشي واحد دار لي كنتي كلتي اتكتبها بسميتي شت ضو شاعل فيها،نقزات ريم
ريم:هاء واتباعت ديك دارها باعها بابا ياك ابابا؟
سعاد:لقوة ابنيتي لقوة تكول اموكلينك قزيبة دجاجة الله يحفظ
إيثار:كيفاش تباعت بابا واش من نيتك اويلي ياك ديك دار طول عمرك كتكوليا اتخليها ليا انا وتكتبها بسميتي وانا كلت واش كتبتيها والله حتى حشومة عليك ابابا كضحك عليا؟
الحاج:حتى انت على

على قلت ديور وانت مالك طول عمرك اتبقاي هنا ايجي شي نهار تزوجي ابنتي ولا تستقلي بوحدك فلمدينة هانية حتى انت
إيثار:بابا لمن بعتيها انا بغيت هاديك دار ماشغليش
الحاج:دار تباعت ابنتي ولي عطى الله عطاه
إيثار:ولمن تباعت ابابا بلما تبقى تبرقق فعينيك ماما لمن تباعت دار جاوبيني انت؟
مليكة:بينك مع باك هو يكوليك
إيثار:معرفتش علاش حاسة انو مخبيين شيحاجة ولا كتلعبو مع ورا ظهري واشكون شرا دار ولا والله حتى نمشي ندق عليه ونعرف شكون(كتشوف فيهم)
"بلاما تحتاجي تمشي دقي عليه انا جيت حتى لعندك"دارت بشوية تأكد من صوت لي سمعات واش ديالو هو ولا أكتخايل لا فعلا هو واقف قدامها بطولو وقامتو مبسم وبلا حشمة بلا حيا جايب معاه لبنت لي شافت فجورنال طل براسو ورا راسها
آسر:مبسم) سلامو عليكم الحاج ياكما تعطلت
الحاج:لا اولدي مرحبا بيك زيد زيد تفضل،تخطى آسر إيثار لي مزال واقفة ممستوعباش أش كتشوف قدامها مد لحاجة مليكة واحد كرطونة بالقهوي على شكل قلب ديال شكلاط
لحاجة:علاش كلفتي على راسك مرحبا بيك اولدي،إيثار هنا نار شعلات فقلبها حسات بشمتة باها عارف انو آسر كان طلبها لزواج ورفضاتو ومع دلك جايبو حتى لقلب دارهم ولي كمل عليها امو بايعو دار لي كانت كتخطط شنو دير ليها مقداتش تصبر ولا تحمل ضربات فيهم وطلعات كتجري لبيتها تبعها آسر بعينيه حتى طلعات دخلات لبيتها كتسوط هزات تيليفونها سونات لعصام
إيثار:ألو عصام كاين مع لكليكة فين صافي واخا انا جايا عندكم واخا صافي، قطعات معاه مشات هزات بلغينة ديالها لبساتها وهزات سوارت طوموبيل حلات بيتها وهبطات مع دروج زربانة كولشي كاين فصالون تمت غادية وقفها صوت لحاج:
لحاج:إيثار فين غادية ابنتي؟ 
إيثار:خارجة نشم لهوى بضربني لبرد لجو لي هنا كيخنقني دايرة مع عصام ابابا

الحاج:لا ابنتي ماشي ليوم ليوم عندنا ضياف حشومة بغينا نتعشاو مجموعين
إيثار:بابا هادوك ضيوفك انت ماشي ضيوفي انا وماملزومش عليا نكلس مع شيواحد انا وياه مكنتحاملوش
الحاج:إيثار زدتي فيه لا؟
إيثار:أنت ربيتينا على صراحة وانا صريحة وبلاما تبززني على شيحاجة انا مبغياهاش بصحتكم لعشا،ضربات فيهم ومشات تبعها كريم شدها عند لباب
كريم:حشومة هادشي لي درتي واش بغيتي سيد يكول قليلت لحيا وممربياش واش بغيتي تسكتي لوليد لقلب 
إيثار:واش عاجبك انت هادشي لي كيوقع بلا حشمة بلا حيا بوجهو حمر جاي شاري داري داري هاديك وبابا ممسوقش عندو زايد ناقص وبغيتيني نكلس نتعشا واخا نمشي نتعشا مع سيبو لحمار فالكوري ومنتعشاش مع داك رجلين نعامة فطبلة وحدة
كريم:أنا عادرك اختي ولكن ديري غير على وجهنا عرفتي كي ولا وجه لوليد صفر منين تحديتيه وخرجتي
إيثار:كريم انا ماشي منافقة وانت عارفني مزيان داك سيد منقدش نكلس معاه فوق طبلة وحدة
كريم:على وجهي اختي عفاك على وجهي انا ويلى شفت شيحاجة ماشي حتى لهيه انا انوقف ليك زعمة راكي زعيمة وحتى حاجة مكتهزك
إيثار:أه ولكن شمتة مكنحملهاش
كريم:يلاه على وجهي الى عزيز عليك
إيثار:على وجهك انرجع ولكن متعولش ندير ضحكة صفرة ونمتل اني مرحبا بيهم هادي غير حيدها من بالك،ضربات فيه ورجعات لدار
كريم:ياربي دوز هاد ليلة على خير، دخل حتى هو لقى إيثار كالسة على كرسي حدا نوال شادة تيليفون كتلعب بيه سيفطات ميساج لعصام كاتليه ماتلاتش جايا مكتهضر مكتكلم جات لخدامة خبراتهم لعشا موجود ناضو كولشي تلات إيثار هيا الاخيرة كلسات بلا مبالاة على لكرسي علات عينيها كتجي غير فعينين آسر لي شوفاتو كانو ممفهومينش خنزرات فيه ودورات وجها تحط لعشا لي كانت اطباق مغريبة كتشهي 
الحاج:يلاه نكولو بسم الله،بداو كياكلو

كياكلو إيثار كتاكول وتنفخ
آسر:شحال هادي عاهدي بهاد لماكلة الله يعطي صحة لي صايبها
إيثار:تحش ليك فركابي وتجيك صريصة ان شاء الله
آسر:كلتي شيحاجة يمكن
سعاد:هههه كاتليك اولدي بصحتك،شافت فيها إيثار
إيثار:عمتي لي كيصلي مخاصوش يكدب مالكي كتكدبي على سيد(دارت شافت فيه)كتليك تحش ليك فركابي وتجيك صريصرة سمعتيها دابا نقوات خيتي لي حداه:
"علاش انتوما بحال لمش مع لفار"
آسر:فاتي خاصك تسولي الآنسة إيثار مالها اما انا ممالي والو غير هيا كيعجبها ضحك ياك ا إيثار
إيثار:كنضحك مع كراني اما شارفين فات عليهم لكار ديال لعب
فاتي:لاواه آسر فتلاتين من عمرو مزال ماشرف
إيثار:أوووه سيبافغي بصح ديزولي ولكن لي يشوفو يكول داخل فستين من عمرو
الحاج:كيحنحن)ماكلتيش ليا اولدي شحال ناوي تكلس هنا؟
آسر:صراحة عجبني الجو هنا بزااف مضنيتش غادي نوالف بحال والو نستاقر هنا شكون عارف الحمد لله خدمتي غادية مزيان وهيا هاديك
إيثار:هازة لموس كتلعب بيه)سبحان مبدل الأحوال عرفتو كنعرف واحد لمنافق كان كيخاف من لمغرب وكاليك ميمكنش نغامر بامبرطورية على قدها ونحولها لمغرب اندير فاييت ومواخران تلاقيت معاه كاليك حكا ماحكا جا لمغرب وخدمتو غادية مزيان سبحان الله بحالك انت 
الحاج:وراه بصح لواحد خاص يعرف فين يحط راسو وفين يدير فلوسو
آسر:بنادم مكايمشيش معاك بالمهل ويعطيك فرصة مكاتحس بيه حتى هز حوايجو وزاد
إيثار:وبنادم كتجيه من لجناتي وناس اكضرك كيجيب لبديل تكول مربي لفلالس باش يلاه تصدق ليه وحدة. طبلة ولات كضور غير بالالغاز لعافية ساعلة ولهضرة كضرب امن تحت لتحت فاتي مرة مرة تهضر فودن آسر ويضحكو ولا تحط عليه راسها
إيثار:أستغفر الله العظيم وأتوب إليه اللهم ان هذا لامنكر وشعب حتارمو لي كالسين وانت اختي حتى تكونو بجوج وتميعي عليه

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.