صورة مصغرة لـعروس الملك السابعة الجزء 44

عروس الملك السابعة الجزء 44

القصة متوقفة مؤقتا !

رواية عروس الملك السابعة , زوجة الملك السابعة

دارو العديان بالملك دورة الخاتم . من كل جوايه طلو عليه وداروه الوسط كيدور فبلاصتو ويشوف فيهم واحد واحد ... ضحك الامير سيف الدين وقال

- تساويتي دابا مابقا لك ملك مابقا لك حكام ... ماعندك منين تهرب ولا تزهق .. 

تلفت عندو الملك محمد اصيل بشوية واقف بحال الجبل مكيحركوش الريح .. شاف فيه شوفة كتشق الحجر وقال 

- وعلاش خايف ؟ كنشوفك كترجف بوحدك .. شكون اللي دايرين بيه الشمايت انا ولا نتا 

كرز الامير سيف الدين على سنانو وقال 

- الخوف فيك نتا ةكتخبيه ودعي بالقوة ... ونسيتي اللي كيدعي بالقوة كيموت بالضعف .. واليوم غتمةت ضعيف .. فين هي قوتك وريها لنا دابا 

هز الملك راسو وقال : اللي كيدعي القوة دابا هوا نتا ... انا عمرني دعيت بالقوة ... انا ملك وغنبقا ملك وغنموت ملك .... ماشي شماتة وعيفة الرجال اللي عاش مسموم طول عمرو قدامو هدف واحد هوا يوصل ليا ويغدر بيا ... القوة ماشي هادي اللي نتا كتهضر عليها ... القوة هي تقدم نفسك نتا الاول فسبيل بلادك وترخص روح فسبيل يعيش شعبك ... ماشي تخبا مور الضهر وتقول انا قوي .. واللي كيتخباو مور الضهر غير الشمايت بحالك اللب كيبانو رجال فاش كضرب الشمس .. وفالرعد والبرق كيتخباو ويخليو كلابهم تحضي الغيبة وترد الهيبة ... ونتا وهاد الكلاب اللي جمعتي ماتوصلو حتى لنعال ديال واحد من الفرسان ديالي . 

وهوا كيهضر هز يدو بالزربة فالسما حتى رجع سيف الدين باللور مدعور وتحرك الجيش الغدار من بلاصتو وحل عينيه .. هنا ضحك الملك محمد اصيل وقال 

- شفتي معنى القوة هههه... معنى الهبة ... هي فاش كتهو صبعك تكنل كلامك ويرتاجف العدو ويتزعزع من بلاصتو ... ياك انا بوحدي هنا .. وسط منكم كاملين وخرجتو ليا دقة وحدة ... واش تخلعت .. واش تحركت هه... لا ... منخافش من الشمايت (تلفت شار بصبعو مخرج عينيه فواحد من الفرسان ) نتااااا... قتلني هانا قدامك .

تلف الفارس وشاف فجنابو واش معاه كيهضر ولا مع غيرو حتى كرر الملك كلامو وقال 

- معاااك نتا كنهضر .. يالاااه اش كتسنى 

صفار وجه الفارس وهبط النبال مقدرش وهبط حتى عينيه .. تلفت الملك لواحد اخر وغوت بأعلى صوت بحال الرعد نعت واحد فيهم وقال 

- نتااااا ... يالااااه ضرب .... (تلفت جهة اخرى ) يالااااه ضرب نتاااا ... ونتاااا. ونتاااا شكون يهز يدو يضرب . .. ضربووووو اش كتسنااااو 

حتى واحد مقدر مقدر يزعم ويبدا هوا الاول ... وماشي اي واحد يقدر يزعم وهز الراس قدام الملك ديالو وهوا حياتو كاملة دوزها حاني الراس .. حتى الهبة اللي عطاه اللله جابتهم حتى لقدامو وفشلاتهم .

فاش مقدر حتى واحد يزعم تلفت النلك هاز راسو عند الامير سيف الدين وقال 

- هادا اللي ليوم وقفتو فصفوو.. غدا ترجعو عبيد عند رجليه ... ونهار تكونو فالحرب موحال كاع بمشي معاكم .. تما غتلقاو راسكم بوحدكم .. كما تخبى مور الضهر وطعن غيتخبا نور ضهركم ويطعن والراجل فيكم غيموت بنبلة وحدة طايرة فالسماء بلغلط ... شفتو موتكم شحال ساهلة . 

خرج الامير سيف الدين عينيه كيتزعزع فبلاصتو وغوت 

- قتلووووووه 

ضحك الملك وضحكتو شككات الامير فنفسو .. كلشي وجه النبال جهت الملك ولاكن شكون يطلقها الاول ويفتح لباب لخرين يطلقوها .. حتى واحد .. وقبل حتى مايعاود الانير سيف الدين كلمتو ضهر جيش الملك محمد اصيل مور الجيش الصغير اللي داير بيه مكاملين حتى ربعين ... دارو بيهم من اللور مخلاوهمش يتحركو وماحسو براسهم حتى لقاو السيوف محطوطة على رقبتهم . تدهش الامير سيف الدين وبدا يدور فبلاصتو .. كيشوف فالجيش ديالو المعدود يابس فبلاصتو وكل واحد فيهم واقفين عليه جوج بالسيف وموراهم فرك بالنبال .. طلع نفسك تزهق روحك . تلون وجه الامير سيف الدين ولقا راسو قدام الملك محمد اصيل الراس فالراس لا من يكالي عليه ولامن يجي موراه يحضيه . تبسم الملك تبسمية دخلات سخانة الخوف مع الامير وقال 

- القوة فالعقل يابن عمي ... جنيتي على روحك وليوم نعلق راسك فباب القصر عبرة لكل واحد غرو الشيطان نوا الغدااااار (غوت بالجهد وجمع غضب الدنيا والدين فسيفو وهزو فالسماء وهجم على الامير سيف الدين



جوج ضربات من سيف الملك قسمات سيف الامير على جوج ولاحتو للجنب .. بقا الامير بوحدو طايح فالارض كيهرب من قنت لقنت من ضربات السيف اللي مرة يجي فالهوى مرة فالارض وهادشي بارادة الملك اللي بغا يسخفو ويدوقو حلاوة الحياة اللي
مابقا ليه غير شوية ويدعي بالسلامة .

تغرس سيف الملك فقلب الامير .. وقبل ماطلع روحو هزو فالسماء وقطع ليه الراس تكور جا لوسط .. وقف الملك شاد السيف كيقطر بالدم وغرسو فالارض وهز عينيه مخنزر ومحمر ومجمر وقال بصوت كيتعاود ويتعاود فالصداء

- سمعوو مزيااااان....ااااانااااا الملك ... وغنبقى ملك ... بقدرة الله سبحاانه حتى واااحد ميجي فبلاصتي ....اللي فكر يغدر... ولا فكر يخوووون ... مصيرو غيكون بحال هاد الكلب .... الخونة ماليهم مكان فمملكتي واللي خان راه حكم على راسو بيديه . كلااامي حفضوووه وعقلو عليييه ... اااانا الملك كتسمعوووو ... اناااااا ومكااينش من غيييري هنا ملك . 

بدا يلهت معصب ودار عطاهم بالضهر وقال 

- هزو راسو باش كلشي يشوفو . ويجيبو ليا الخونة اليوم هازين رحالنا .

مشا ومشا موراه الجيش ديالو مكتفين الخوانة وكيدفعو فيهم رجعو للخيام فين مجايبين الفرسان لخرين خبار . وكانو كيتسناو شكون عندهم يبان .. حدهم شافو الملك محمد اصيل من لعجاج جاي وصوت عودو كيتسمع وسيفتو مابايناش.. كانو كيتسناو يبان .. غير بان ليهم وهما يوقفو وتبسمو فرحانين وبداو يشوفو فبعضهم ويتعانقو . وقف عندهم بوجه معصب ونزل من العود ووقف قدام الامير قاسم ولاح ليه الراس قدامو وقال هاز خنافرو 

- جزاء كل خاااين وغدااار 

تصدم الامير قاسم وخرجو عينيه وهوا كيشوف راس الامير سيف الدين اللي رجع حالتو حالة مابقات ليه قيمة . وكان هادا اول امير يوثع ليه ما وقع وطيح قيمتو بحال كاع عديان الملك . سكت اللامير قاسم ماقدرش يهضر ومايقدرش يعضر وهوا كيشوف وجه الملك كحل بالغضب وعينيه جمر كيخلعو .

وقف الملك فوق حجر كبيرة حال رجليه نافخ صدرو ولاح عبايتو البيضاء موراه وقال بصوت مجهد سمعها للجيش اللي وقف تستف قدامو كامل ماليهش حد 

- ليوم تقطع راااس الامير سيف الدين ... الامير الخاين ... موراه غتقطع كاع الريوس اللي تبعاتو ... لكل واااحد كيفكر يغدر .. ولا يخووون .. خيانة كما بغات تكون نوعها ... (جمع كف يدو ويزير عليه وهزو قدامهم ) ميطلع عليه النهار حتى يكون راسو معلق قدام عيني ... (غوت) شكوووون الملك ؟

كلشي غوت بصوت عالي قوي .. صوت رجال شداد تجمع صوتهم فصوت واحد كيهز الجبال بسمية ( اصيل) هاد السمية اللي واخا تسمعها الودن ماتفهش معناها حيت بقوة الصوت والجهد كيخرجو الحروف ممحية وكيتسمع غير ميزان السمية ( هييل) كيهزو يديهم للسماء ويهتفو بيه وهوا هاز راسو قدامهم مربع يديه وعبايتو البيضاء كطير موراه فالهواء .. دخل المعنى بكلامو لكل واحد نوا يخونو وكدب عليه راسو ووقف مع شي حد اخر باش يرجع ملك بلاصتو . اكد ليهم باللي واخا يتحالفو حتى يعياو من مكانو ميتزعزع حتى تديه الموت ، يعني اللي قال غادي يرجع واحد اخر راه غير كيخوي الماء فالرملة وبنيتو هادي غادي يلقا هلاكو على واااالو . 

* حلات عينيها لقات راسها كتشوف فالارض .. هزات راسها وهي تبان ليها السجادة والنهار طلع . بكترت الدعاء اللي بايتة ليلة كاملة كدعي نعسات فوق السجادة حتى تقوس ضهرها . ناضت مقلوبة كتمشي وتجي وتشد فالطبالي حاللة عينيها بزز حتى وصلات لسريرو وتلاحت فوقو نعسات . 

دخلات لاللة ياقوت لجناحو كتمشى ودور ووقفات على راس روح الندى وهي ناعسة كطلع فيها وتهبط وكتسمع روح الندى كتمضغ فنعاسها وتقول

روح الندى : لكبال ... لكبال ... مشوي .. مصلوق

جلسات جنبها لاللة ياقوت وبدات دوز يدها على راسها وشعرها مبسمة وعلى خدودها كتقول

- يا بنتي مزاااالة صغيرة على الولاد ونتي براسك خاص للي يرعاك ... مالكي على هاد الزربة هادي كاملة يالله عاد بلغتي ونضتي حملتي ... مكتسمعيش لكلامي وكديري اللي فراسك ... جربي الوحم يحساب ليك ساهل . . . تمنيت نشوف ولاد ولدي وخليفتو وحلمي هوا نشوف حفادي .. ولاكن ابنتي متبغيت عداب متبغيت قهرة ومافيا اللي يتقهر عليك ... فرحت بحفيدي اللي جتي فالطريف ولاكن خوفي عليك نقص من فرحتي 

دورات روح الندى وجهها كتمضغ فالنعاس وقالت

- مصلوق .. هاديك ... ها.. اه كبالة 

ضحكات لاللة ياقوت وناضت من حداها غطاتها شوية ومشات خرجات عند وصيفاتها وقالت هازة راسها

- ديرو لينا شواية على برا شويو لينا شوية ديال الذرة ... نبدلو الجو ونديرو شغلة نشغلو بيها راسنا ... خبروهم يديروها لينا على برا فالهواء 

حنات وحدة من الوصيفات راسها ومشات كطير عندهم للكشينة خبراتهم و فلحين بداو الروايح فالجردة ديال الدرة وبداو الاميرات كينزلو ضاحكين ويشوفو بعينيهم و الطباخ كيشوي ويغلف ويمد ليهم ليديهم . 

حلات رو الندى عينيها
مكهومة نعاس وراسها مشقوق .. ناضت بزز غسلات وجهها وخرجات كدور فعينيها هاكا وهاكا خايفة يقشعها شي حد ... متشافت حد وهي تسلت مع جنب الحيط راجعة لبيتها
.دازت حدا واحد السرجم طويل فالحيط كيطل على الجردة وخي ترجع عندو كطير بحال ال بانت ليها شي حاجة ، طالات لقات الاميرات كيتمشاو جنب الشواية والجاريات حتى هما خلاوهم يخرجو .. شافت الدرة وتحلو عينيها وتحل فمها 

روح الندى : الكباال!!!!!! يااااحلليلي 

مشات كتجري هبطات وخرجات الجردة فاتخة شعرها مطلوق ومشات نيشان للشواية مداتها فحد وهزات واحد الكبالة فيديها وبدات تاكل بالزربة وكلشي كيشوف فيها ، تكلمات لاللة شامة وقالن

- واخا تكوني موحمة مديريهاش!!! عمرك شفتي النعمة ولا مالك؟ هااه؟

يتبع

كايتنشرو القصص والأجزاء كل يوم مع التاسعة ليلا بتوقيت المغرب