نعيمة: اش غانقولك ا بنتي ولدي مجد يالاه كان عيد ميلادو هادي سيمانة دار 27 سنة الله يطول فعمرو هو ولد هادئ وضريف مع كاع الناس وكايبغي لخير وشحال من مرة جاب المرضى ديالو لهاد لبيت نيت اللي نتي فيه وكايتهلا فيهم حتى يبراو ويمشيو فرحانين عايش هنا مع ختو سكينة أما ماماه وباباه فسويسرا وخطيبتو شدى كاتجي عندو مرة مرة توانس معهم وحتى هي طبيبة معاه فنفس المستشفى
اححح ماعرفت علاش غرت من هاد شدى حيت قالتلي خطيبتو ولكن علاش غانغير هو كايشفق عليا بحالي بحال المرضى ديالو ولاش نغير من البنت؟ السيدة طبيبة بحالو أما أنا شنو ؟
نعيمة: امالك ابنيتي ساهية فاش كاتفكري؟
أنا: آآ لا لا والو اخالتي نعيمة أنا معاك
نعيمة: ايوة يابنيتي راه عاود ليا ولدي مجد قصتك والله ايلا بقيتي فيا وعزيتي عليا
أنا: (عينيا غرغرو) تانتي عزيتي عليا ا خالتي نعيمة
نعيمة: يالاه ابنتي نخليك ترتاحي ونهبط لشغالي
أنا: لا لا راني مرتاحة خليني نهبط نعاونك عفاك راني قنطت بالجلسة وبغيت نتحرك
نعيمة: واخا ابنتي أسما على خاطرك يالاه نوضي
مشينا أنا ونعيمة للكوزينة ولكن ماكاتخليني ندير والو غير لحتيت وعاطياني نقي ليها لخضرة حتى بانت ليا بنت تكون كبر مني بشي عامين داخلة كاتلعب بالسوارت وكاتغني
سكينة: (باستغراب وهي كاتشوف فيا) طاتي نعيمة صباح النور ، شكون هادي واش خدامة جديدة؟
نعيمة: لا ابنتي هادي صديقة ولدي مجد جابها لبارح تبقا معانا حيت عندها شي ظروف خايبة
سكينة: مممم مزيان ولكن علاش لابسة ليا بيجامتي؟
نعيمة: أنا اللي عطيتها ليها أبنتي حيت مكان عندها ماتلبس
سكينة: يا لهبيلة كاتعرفيني أنا وهادي هي الفرصة تحضري
جراتني من لفراش ولاحت عليا سروال ومونطو وصباط عالي وطلبات مني نلبس بالزربة.. نضت على وعدي وسعدي غسلت وجهي ولبست داكشي والصباط تمشيت بيه عادي بحالا مولفا نلبس طالون ههه خليت شعري على راحتو وأول مرة ندير لماكياج اللي كتافيت فيه بماسكارا وغلوس فلغوز بحال لون المونطو والسباط أما السروال فكان كحل وسامبل..نزلت فالدروج وأنا كانشوف فالفيلا اللي قررت نخويها غدا حيت ليوم بغيت ندوزو مع سكينة وغدا غانخوي هاد الدار حيت ماعندي حتى حق يخليني نزيد نبقا فيها مزال..ماعارفاش فين غانمشي وفين غانسكن ولكن اللي عارفة أنه بعد الموقف ديال البارح خصني ضروري نخللي هاد لبلاصة..نزلت لقيت سكينة كاتسناني للفطور ونعيمة كاتوجد لينا طبلة أما مجد فمكاينش ليه الأثر
أنا: صباح النور عليكم
نعيمة وسكينة: صباح الخير
سكينة: واسربي اجي نفطرو راه مزال تابعنا نهار طويل اشيغي
أنا: واخة..فطرنا وكملنا وتحركنا للطوموبيل داتني سوكا لواحد لمحال كايبيع كساوي ديال السهرات وطلبات أنها تختار ليا وليها وبقات جاراني وتشوف هنا وهنا حتى حطات عينيها على كسوة فلحمر قصيرة عندها كم وكم لا
سكينة: واااااو سمسومة شوفي هادي غاتجيك واعرة مع طايتك أنا متأكدة جبداتها وطلبات مني نقيسها..دخلت قيستها وحسيت براسي فشكل أول مرة نلبس هاد لعرى ولكن حمقني راسي بديت نتبوزا غا بوحدي حتا سمعت سكينة كاتعيط وخرجت عندها
أنا: ههه الله يخرج هاد الليلة على خير راني عمري عشت هادشي
نزلنا فالدروج فاتجاه الجردة فين كاينة الطوموبيل ديال سكينة خرجنا وركبات سكينة فالطوموبيل ويالاه بغيت نحل لباب حتى سورتاتو عليا من لداخل وخلاتني برا .. تصدمت من هادشي وبقيت كانشوف فيها من الزاج وهي تهبطو
سكينة: سمسومتي أنا غادة للحفلة ولكن غابوحدي
أنا:وأنا؟؟؟
الشخص: نتي غاتمشي معايا..ضرت نشوف شكون هضر كانلقاه مجد ببدلة رسمية فلبلو مارين وقاميجة فلبيض وبابيون فالأزرق فاتح بحال لون عينيه كان موقف شعرو بطريقة مثيرة ورائحة العطر ديالو تغلغلات فأنفاسي أما الطولة والعضلات يا مامي بلاما نهضرو عليهم المهم بان كايهبل
أنا: مجد!.... شد ليا فيدي وبقا غادي بيا حتى ركبني فسيارتو ودار بيدو باي باي لسكينة اللي بادلاتو نفس الحركة ومشات وحتى هو ديمارا الطوموبيل وبقينا غاديين
أنا: ف..ف..فين غاديين؟ بتاسم ومشافش فيا بقا غادي مركز فالطريق وأنا قلبي كايضرب بالجهد وخايفة من هادشي اللي واقع واللي ممكن أنه يوقع..على بعد شي نصف ساعة ديال الطريق وقف مجد الطوموبيل وخرج منها وجا حل ليا الباب ومد يديه بكل جنتلمانية
مجد: تفضلي معايا ميس أسماء.. مديت يدي وحاولت نبين راسي مخايفاش والموقف ديال لبارح مزال كايضورلي فراسي وكانعاتب سكينة فنفسي حيت دارت ليا هاد القالب اللي ماعرفتش شنو الهدف منو.. طلق مني وسد الطوموبيل حتى كانلقا راسي قدام مطعم باين فيه راقي وديال الناس الهاي دار ليا بيدو زعمة دخلي.. دخلت معاه بخطوات كلها ثقة ومابغيتش نبان نية وغشيمة وماعارفة والو..كان المطعم خاوي وبانتلي طبلة لوسط مزينة بالشموع وموسيقى هادئة توجهنا لديك الطبلة..جر ليا لكرسي وجلست وهو مشا جلس مقابل معايا بقينا شوف فيا نشوف فيك ا طاجين الحوت ههههه شوية مجد قطع حبال الصمت
مجد: أسماء.. عارفك دبا مفاهمة والو وكاتسولي راسك علاش حنا هنا وعلاش سكينة دارت هاكا وكذبات عليك (سكت شوية) أسماء أولا أنا اللي طلبت سكينة تعاوني حيت من بعد التصرف اللي درت لبارح أكيد كنتي غاترفضي طلبي كون طلبتو منك ثانيا أنا جبتك هنا باش نعتاذر منك أنا ماشي هكاك وأنا مافياش داك التبرهيش أنا لبارح جيت نوريك فين كاين السكر حتى شفتك محنية بطريقة جدباتني و معرفتش كيفاش حتى قربت ليك هكاك و..و...
بقيت مبلوكية وتمنيت الأرض تحل ونتخشا وسطها اوييييلي السيد طلب مني الزواج وأنا جاوبتو بالفول مشرمل والبقولة اويلي على شوهتي...بقا مجد كايضحك بالدموع ويكحب وأنا غاكانشوف فيه فالصراحة بزاف عليا هاد الزين كلو..لاحظني كانشوف فيه وبدا كايسكت تدريجيا حتى سكت وكايمسح فالدموع اللي جنب عينيه
مجد: اووووف ا أسماء سطيتيني بالضحك والله ههه
أنا: بصحتك😊
مجد: عارف جوابك كان غير نتيجة للصدمة أنا عارف راسي زربت ولكن مانادمش أنا من نهار شفتك مشعكة ولابسة ديك الجلابة لكحلة عجبتيني بعينيك اللي كايهبلو وشوفاتك وبرائتك كلهم عجبوني وملي رجعت من داك لغرض ولقيتك مزال تما فرحت وقلت مستحيل نخليك أما مللي دخلتي لدارنا وكسبتي ختي وخالتي نعيمة زدتي كبرتي فعيني بغض النضر على الجمال ديالك اللي زاد بان مللي وليتي كاتلبسي وتقادي هه.. أما بالنسبة لهاد القرار المزروب فخديتوا حيت خفت نفيق ومانلقاكش حيت عرفت بللي التصرف ديالي زعجك بزاف ودبا أ أسماء بغيتك...
أنا: (بمقاطعة) اه موافقة..معرفتش كيفاش حتى خرجات هاد الكلمة من فمي ولكن كانضن أنني درت الصح حيت الى رفضت غانكون حمارة واش كاينة شي وحدة تقدر ترفض انسان بحال مجد خصوصا الى كانت بحالي لا مستوى فلقراية لا عائلة لا والو (لا لا الزين كاين تبارك الله هههه) وخا بقا راسي ضارني كيفاش دغيا خدا هاد القرار وخا هو يالاه يومين باش عرفني ...من بعد الجواب ديالي ناض مجد اتجاهي ووقفني وباس ليا راسي بوسة طوييلة ورجع شاف فيا بعنين ضاحكين كايلمعو
مجد: أسماء شكرا بزاف على جوابك وكانواعك غانعيشك اللي عمرك عشتيه وغانتهلا فيك (هه ومزيان) غير تيقي بيا..كتافيت بابتسامة حيت مالقيت مانقول ورجعنا لبلايصنا وطلب مجد لعشا وحطوه لينا..بدينا ناكلو فصمت خلينا غير العينين هوما اللي كايهضرو..
مجد: (بتلعثم) آ؟ اه اه لا راه يالاه نتاقلو لأمريكا شهر دبا وخالتي نعيمة مزال مافخبارهاش (هاد لخدامة لمكلخة شحال لسانها طويل)
أنا: اااااه و3 أيام ماشي غانزربو بزاف خصنا نديررو مرحلة خطوبة ونتعارفو كثر
مجد: هههه لا لا ماعنديش مع دوك لوجهيات لخاوية ياك أنا بغيتك وحتى نتي بغيتيني فلاش هاد التعقيدات نتزوجو ومن بعد نتعارفو هههه .....الصراحة ريحني كلامو ماهموش أنني بنت لحرام وأنني مكانكساب والو هو بغاني كيفما أنا فعلاش غانزيد فيه نخلي ليه مسؤولية هاد الزواج كاملة بين يديه
سكينة: واو جاتكم فنة...وجات عندي عنقاتني وقالتلي مبروك وانا بادلتها نفس العناق وعينيا غرغرو بالفرحة وعنقات حتى مجد ودخلنا كاملين للدار وتمنينا لبعضياتنا ليلة سعيدة بعدما خبر مجد ختو بالقرار ديال أنه لعقد بعد 3 أيام والعرس اللي غايكون فأمريكا...توجه كل واحد للغرفة ديالو نرتاحو ونتسناو شمس الغد تشرق وأحدات جديدة توقع.
دازو يومين وغدا موعد العقد..هاد اليومين دازو عاديين بقيت غير فالدار أصلا مكاين لا توجاد لاوالو حيت مكاين لاحفل لاضياف ..كانبقا موانسة مع خالتي نعيمة اللي حسيت بيها بحالا تبدلات معايا أما مجد وسكينة فكايضلو غابرين وكايجيو حتى لليل..مجد فخدمتو كاطبيب وعندو لمرضى ديالو أما سكينة فقالت أنها كاتقرى فمدرسة خاصة ديال التمريض..علاقتي بمجد كانت محدودة كانفيق كانلقاه مشا أما بالليل حتى كانبغي نعس عاد كايجي يسلم عليا ويمشي لبيتو..حسيت بالملل وكأن الإهتمام اللي كان فالأول قل وماعرفتش السبب..
نعيمة: أسمااا أسماااا
أنا: هانا ا خالتي ياك لباس؟
نعيمة: راه قالي ولدي مجد نوصيك تجمعي حوايجك راه غدا مورا لعقد غاتسافرو لأمريكا
أنا: غدا؟ كيدار ليها وأنا مزال ماعندي لاوراق لوالو حدو كان طلب مني لاكارط ديالي!
حب وسط الدماء الجزء الثاني
محتوى القصة
التنقل بين الأجزاء