بقيت الليلة كاملة وأنا فايقة واخا لعيا والعذاب لكن ماقدرتش نعس..كيفاش نعس وأنا عارفة راسي بقاو ليا ساعات قلال وغانفارق لحياة..من نهار حليت عيني فالدنيا ووعيت اكتاشفت أنني ماعندي لا أب لا أم لاعائلة دوزت حياتي كي لخدامة عند مي رقية ومللي كبرت بغات تزوجني لراجل شارف..هربت زعمة من المعاناة والعذاب ساعة طحت فمستنقع غاااارق..واش هادا هو نصيبي فالحياة الى الله مكتب عليا عيشة كحلة وموتة مشوهة مرحبا بحكم الله..بقيت مغمضة عيني وكانقرا فالقرآن ساعات حتى غفيت..
#بعد_ساعة:
تحل الباب بقوة وضربات الشمس فعيني كان واقف مجد وماكس و 3 دالرجال وكلهم لابسين لكحل..بداو الرجال كاينزلو فالجثت اللي معلقين ويلوحو فالأرض حدا الحيط حتى كملوهم
ماكس: ليو .. مزال غير هادي مللي تجيب كاطا داكشي اللي خاص ديرو خدمتكم وتبعوها لهادو وراه بعد 2 ساعات غاندفنوهم مابقيناش غانخليوهم تال الليل عدنا حاجات أهم بالليل..
مجد: وي شاف.. خرج ماكس وأنا حاولت نفهم شنو قال حدي فهمت 2 hours كانضن أنه قال ليه من هنا ل 2 ساعات غايتخلصو من لجثت اللي حيدو من السناسل
مجد: (كايشوف فيا) هههههه مابقا ليك والو ا بيبي
أنا: مجد ممكن اخر طلب عافاك (عيون دامعة)
مجد: هضري طلقينا
أنا : فيا الجوع ولعطش بزاف ممكن تعطيني ناكل
مجد: هههههههههههههه من نيتك؟ راه مابقا والو وتودعي لاش غاتاكلي؟
أنا: عافاك فيا لعطش بزاف اهئ اهئ
مجد: (تزير) اوكي اوكي تسناي..خرج هدر مع رجالو وبعد 5 دقائق دخل فيدو سندويش وقرعة دلما
مجد: ببببف تا أنا من نيتي جايب ليك لماكلة مافهمتش علاش وليت غبي بحالك لمهم هاكي كولي
أنا: ك..ك..كيفاش ناكل ويدي...
مجد: fuuuuuck راه مايمكنش نحلك يديك أنا هنا باش ننزع أعضائك ماشي باش نوكلك ونسهر على راحتك..
أنا: (بأعين فيها نوع من الترجي) عافاك
مجد: اوكي هانا غانحلك ومللي تسالي غاتكون سكينة جات..قرب ليا وحل لييا يدي ورجلي وطحت على الأرض بكثرة لعيا هزيت قرعة لما وتكيتها على فمي كاملة
مجد: اوووف هادي سكينة كاتصوني..الو..الووووو..مكاينش الريزو مزيان هنا
مجد: هيييه نتي انا غانرجع دابا كولي فالسكات ..ناض خرج وبانولي عدد كبير ديال الرجال برا..وسد موراه لباب
أنا: أسماء هاهو خرج خصني نحاول نهرب خصني نتشبت بالحياة ماخصنيش نستسلم..نضت بديت نقلب فالمكان حتى بانلي شرجم ديال لخشب لفوق متوسط كان عااالي مشيت جبت شي برامل وأنا كانقفقف وكانقول غايدخل دابا يتيري فيا ولكن نموت بعدا وأنا كانحاول..درت دوك لبرامل واحد على واحد وطلعت حليت الشرجم..كاتبانلي غابة فيها شجر كثيف ولتحت كاينين شي رجال واقفين..كان حيط يقدر يسهل عليا لهبوط ولكن أكيد غايشدوني رجال مجد بكل سهولة..فكرت لبضعة ثواني وجات لبالي فكرة ولكن صعيبة بزاف وترددت أنني نديرها..
خليت الشرجم محلول ولبرامل فبلاصتهم وهبطت قربت لعند دوك الجثت وأنا كانبكي فصمت قربت حدا واحد الجثة كانت بنت وباقي دمها جديد شوية مسحت الدم اللي فصدرها وأنا فيا التقيا وباغا نطرطق شديت دمها ومسحت بيه وجهي وعنقي وبعدت شي جثت وغمضت عيني وتخشيت وسط منهم وعاود رجعتهم فوقي بصعوبة كان منظر مقزز هبطت شعري على وجهي وأنا كانرد غير لكشكوشة من كثرة ديك الريحة ودوك الأجسام اللي أنا وسطهم حتى سمعت الباب تحل وأنا نقطع الزاي
سكينة: مجد!!!!!! فين هاد لحشرة اللي كانت هنا
مجد: (كايضور عينيه فالمكان حتى شاف لبرامل واحد فوق واحد واللي كايوصلو للشرجم المفتوح) شد فراسو... لا لا لا مايمكنش ..
سكينة: (شافت لماكلة وسنسلة محلولة) مجد كيفاش تجرأتي .. بدات ضربو بعنف وتقمش فيه وهو ماكايردش عليها ودخل فحالة ذعر ولا كي لحمق
سكينة: (بلغوات) جيمس..كريس..مارك
دخلو الرجال ب 3: وي شاف
سكينة: البنت اللي كانت هنا هربات بسباب هاد لحمار راها عيانة غاتكون مزال غير هنا سيرو نتوما والرجال اللي برا بداو تقلبو عليها ويلا رجعتو بلا بيها غايحيد لينا ماكس ريوسنا كاملين..اه وسيفط شي 3 من الرجال يديو يدفنو عليا هاد الزبل
الرجال: علم شاف.. بقات سكينة كاتسب وتشتم فمجد وهي مستغربة من تصرفو حيت هوما تعلموا أنهم مايرحموش بنادم و يقصحو قلبهم وخا يطرا اللي يطرا ولكن مجد خالف هادشي..
مللي سمعت كيفاش سكينة ضربات وعايرات مجد بلاما يجاوبها عرفت أن سكينة وخا صغر من خوها الا أنها هي اللي كاتحكم وقاسحة بزاف وقلبها مات عكس مجد اللي حسيتو بعد تصرفو معايا أنه قلبو مزال كايتأثر ولكن وخا هاكاك كايبقاو بحال بحال مجرمين وقتالين ووحوش بشرية..كايقتلو ويشوهو ناس أبرياء باش يرضيو نفسهم لمريضة وأنا متأكدة أن لمنظمة كاتستاغلهم كونهم مراض نفسيين والهدف ديالهم يقتلو الناس و فالمقابل المنظمة هدفها الربح المادي..
خرجات سكينة ومجد ورجالهم وبداو فالتفتيش عليا..
أنا: فالداخل ديالي حسيت بنوع من الارتياح حيت الفكرة اللي درت فبالي بدات كاتنجح..واللي هي أنني نتخشى وسط الجثت ويهزوني معاهم تال لبلاصة فين غايدفنوهم وديك ساعة نشوف شي طريقة نسلت ونهرب..بقيت تحت دوك الجثت اللي ريحتهم كافية أنها تقتلني قبل مانهرب كل دقيقة كانرد من فمي غير لكشكوشة..وداك الدم اللي لسقت فوجهي كرهني فحياتي بقيت كانتسنى اللحظة الحاسمة اللي غايجيو يهزوني فيها دوك الرجال ولكن خفت ينتابهو لجسمي أنه مامحلولش بحال الجثت لخرين..بقيت ندعي ونطلب الله حتى سمعت الباب تحل بقوة غمضت عيني وحاولت أنني نتهذن
ماكس: fuck fuck يا لمكلخين واش أنا مكلفكم تقتلوها نضتو نتوما خليتوها تهرب الكلاب وحتى دوك لعجولا اللي مخدم عندي تاواحد مقدر يلقاها دبا شنو غانقولو للرئساء ديالنا راه لهروب ديال هاد البنت خطر كبير على المنظمة
سكينة: (بارتباك) شاف راه هاد لحمار هو اللي حل ليها يديها وعطاها تاكل وباش كملها وجملها خلاها بوحدها وخرج
مجد: sorry مايسحابليش غاتجرأ ودير هاد الخطوة عمر شي واحد قدر يخرج من هنا مافهمتش كيفاش هربات بلاما يشوفوها الحرس اللي برا
ماكس: سدو عليا فامكم طيحتونا فمصيبة كبيرة وهاد الحقيرة واخا تكون كاطير ماتختافاش بهاد السرعة.. المهم خصنا نخويو هاد البلاصة حيت الى مالقيناهاش غاتولي خطر علينا (عيط للرجال اللي برا) هيييه نتوما خرجو عليا هاد لعفن دفنوه ونظفو المكان وسدوه..
أنا: سمعت هضرتهم وفرحت حيت مزال لحد الآن الخطة ديال أنني وهمتهم بهروبي من الشرجم ناجحة.. ومزال الخطوة الثانية هي كيفاش غانتهز مع الجثت ... من بعد الحوار اللي ضار بين دوك 3 دالمجرمين خرجوا لكن صوتهم بقا على برا وباين مزال كايقلبو عليا..شوية سمعت خطوات ضخمة تاتقرب مني عرفتهم غايكونو الرجال اللي غايهزونا.. قلبي بدا يضرب بسرعة كبيرة لدرجة خفت أنهم يسمعوه..سمعت بحال صوت شي ناقلة عندها روايد كايصدرو أصوات مزعجة حتى وقفات حدانا..
بديت كانحس بالجثت اللي حدايا كايتحركو عرفتهم كايهزوهم..بداو يهزو ويرميو بعشوائية فديك الناقلة بحال الى كايهزوا حيوانات ماشي بنادم ..حتى حسيت بيد سحباتني من كويرتي هزني من ظهري وانا ترخيت ووجهي مخبي وسط شعري الطويل وكانقول الى قلبني وشافني من لقدام هي لخرا ليا..ساعة هزني مقلوبة ولاحني على كرشي..ومع ختكم زهرها زييييين ما تحط وجهي غا على وجه الجثة اللي تحت مني نيشان للحظة كنت غانغوت لكن كاتبقى غريزة البقاء أقوى من أي ظرف .. سديت عيني وكانحاول نقطع النفس حتى لاح فوقي جثة خرا الشيء اللي خلاني نضور وجهي بسرعة البرق ونحيدو من على الجثة اللي تحت مني..كملو الرفع دالجثت وحسيت بديك الناقلة بدات كاتمشي وأنا كانترعد مع كل خطوة كانزيدوها للأمام
خرجنا من داك لمستودع وباقين دوك الرجال دافعينا حتى وقفهم صوت سكينة
سكينة: بلاتي بلاتي وقفوووو!
سكينة: بلاتي بلاتي وقفووووا
أنا: قلبي وقف قلب مايوقفو الناقلة وبديت كانشهد صافي باينة عاقت بيا
واحد من الرجال: وي شاف
بدات خطوات سكينة كاتقرب حتى وقفات حدانا
سكينة: ممممم واش هنا كاين الجثت كاملين؟
الرجل: أكيد هزيناهم كاملين..
سكينة: اوكي ديوهم للبلاصة لمعلومة ودفنوهم.. ورجعو بالزربة باش تنظفو المستودع راه يمكن غانبدلو المكان بسباب ديك لحشرة اللي مزال مالقيناهاش دبا غادير لينا مشاكل كبيرة مع الرئساء بففف غايخصنا نغبروا الى مالقيناهاش ليوم
أنا: (فنفسي) الحمد لله الحمد لله كنت غانموت بالخلعة
رجعوا الرجال يدفعوا فديك الناقلة وسط الغابة وأنا لحد الآن ماعرفتش كيفاش غاندير نهرب من بين يديهم.. بقاو غاديين مسافة بعييييدة على لمكان اللي كنت محبوسة فيه وأنا مزال صابرة على هاد الوضع لمقزز اللي أنا فيه حتى حسيت بديك الناقلة وقفات..
بديت كانسمع دوك الرجال كايهضرو كلام مافهمتوش شوية حسيت بيهم كايهزو الجثت من فوقي حتى وصلو ليا وهزوني ثاني من ضهري بلاما يقلبوني ولاحوني فالأرض على وجهي حتى كليت الرملة.. سمعت واحد جر ديك الناقلة ورجع وبقاو جوج هوما اللي غايتكلفو بالدفن يمكن..
بداو عملية الحفر وأنا فلحظة حليت عيني باش نستكشف لمكان.. لقيت راسي فجنب الجثت يعني ماشي وسطهم وبانولي دوك الرجال مجمعين وكايحفرو ..كانت حدايا واحد الشجرة اللي قررت أنني ندير شي خطوة ونوض نتخبا موراها......... بديت كانطلب الله يعاوني وكانحاول نزحف بلاما ينتابهو ليا بقيت كانكحز بشوية حتى قربت للشجرة بزاف.. رجعت شفت فيهم ودرست حركاتهم كانو مكايشوفوش فالجهة اللي فيها أنا كانو مشغولين بلحفير..حسبت حد 3 وأنا نتخشا بخفة مور الشجرة وجلست وغمضت عيني كانتسنا نشوف واش سمعوني.. ساعة ماحسو بوالو.. جمعت شعري وخشيتو فالتيشورط اللي كنت لابسة باش مايبرزطنيش ولحسن حظي كنت لابسة سبرديلة يعني غاتسهل عليا الى بديت نجري.. بقيت لاسقة فديك الشجرة بلا حركة حتى حبسوا لحفير وبداو يهزو فالجثت ويلوحو فيهم حتى سالاوهم
الرجل1: واش هادو هوما لجثت كاملين؟
الرجل 2: هههههه هذا سؤال هذا أكيد كاملين
الرجل1:( كايضور عينيه فالمكان) ماعرفت حسيت بحال الى العدد ناقص
من بعد ماتأكدت أن الرجال مشاو وخطواتهم مابقاتش كاتسمع حطيت راسي على الشجرة وبديت نبكي ودموع كايطيحوا بحال لحجر
أنا: الله ياربي واش هاد لوحلة هانا دبا هربت... أكيد وسط هاد الغابة غاياكلوني غير الحيوانات😢 فين غانهرب فين غانمشي؟ وهاد لخلا مزال منتاشرين فيه رجال مجد وسكينة.. ولكن هوما قالو الى مالقاونيش ليوم غايغبرو يعني غايبقاو يقلبو حتال الليل عاد يفقدو الأمل أنهم يلقاوني..اه اه غانبقا مخبية هنا تال الليل..الليل؟ ناااااري فهاد لغابة وفين؟ فأمريكا؟ الليل غاتكون القضية صعيبة دبا النهار وكاتخلع عاد الظلام..
بقيت كانتخبط فأفكاري حتى وصلت لقرار أخير اللي هو أنني نبقا مخبيا فبلاصتي حتال الليل ودوك لمجرمين يخويو هاد لبلاصة
الجوع..العطش..الخوف..الإشمئزاز من الدم اللي كرم على وجهي..العيا..هادوا هوما الأحاسيس اللي كنت كانحس بيهم ديك لعشية كاملة حتى بدا كايضلام الحال
#أمام_المستودع:
ماكس: البنت تمحا ليها الأثر من الصباح والرجال كايقلبو او والو مافهمتش كيدارت ليها ولكن نتوما السبب طيحتونا فمشكل كبير
ماكس: اوكي سيرو لداركم وماديرو حتى شي حاجة .. غبرو وانتاظروا مني التعليمات
مجد وسكينة: اوكي شاف
#عند_أسماء:
اوف ياربي عييت مانجري وكانحس براسي مزال فنفس لبلاصة..بقيت كانجري تقريبا شي ساعتين وغريزة الحياة هي اللي مخليا رجليا باقين كايتحركو..خايفة لانموت غير بالجوع وسط هاد لخلا ومايسيق ليا حد لخبار
انا: ااااااااااااااااااااااه........حسيت باللي شي حاجة طلعات مع رجلي كانلقا واحد لحديدة طلعات مع السبرديلة من لتحت وخرجات من فوقها مللي شفت داك المنظر طحت وبقيت كانغوت على حر جهدي كان واحد الألم فضيع عمري حسيت بيه فحياتي حديدة ختارقات رجلي من لحت حتى خرجات من لفوق.. بقيت كانغوت وقررت أنني نجبدها..قطعت شوية من التيشورط ديالي وعضيت فداك التوب وشديت فيدك لحديدة وغمضت عيني وجريتها بالجهد حتى حسيت برجلي تفرعات والدم كايشرشر بديت نغغغغوت بحرقة ونتركل فالأرض حيت فعلا كانت صعيبة بزاف .. بقيت متكية فديك الأرض مدة طولة شوية نضت حيدت التيشورط كامل وحزمت بيه رجلي.. بقيت غير بالسوتيامات ولبست فوقهم لكويرة.. فرعني لبرد ديال بصح ولكن ألم رجلي كان كبير موحال واش غانقدر نكمل يمكن نهايتي غاتكون هنا غانبقا مرمية هنا حتى نموت وياكلني شي حيوان..
بقيت مدة وأنا فديك الحالة والدم ماحبسش من رجلي حسيت براسي بديت نعيا بزاف وسخفت بزاف بقاو قدامي جوج اختيارات يا اما نستسلم للألم ونبقا هنا حتى نموت ولا نوض نكمل اللي بديت..داز قدامي كاع داكشي اللي دوزت باش نهرب من لموت والجثت اللي كنت وسطهم وكيفاش خاطرت وتسلت من دوك الرجال..الى بقيت منشورة هنا غايمشي كاع جهدي فابور وكيما سبق ليا وقلت نموت وانا كانحاول..
نضت جلست بديت نضور عيني على شي عصا نعكز عليها باش نقد نتمشا.. بانتلي وحدة بديت كانحبو على ركابيا حتى وصلت ليها كانت مزيانة وبديت نغووت حتى وقفت وبديت غادة كانعرج كان ألم خطيييير..غادة فداك الظلام وحتى ضو ديال القمر مكاينش غادة وسط داك الشجر ونغوت برجلي ونبكي ونقرا لقرآن فنفسي ونطلب الله يحميني ويخرجني من هاد جهنم.. بقيت غادة مسافة حتى قشعت شي ضوء بحال ديال لبوطو للي كايكون فالشانطي .. جاتني واحد الطاقة بديت نعرج بالزربة ونضحك ونبكي حتى قربت وكان فعلا شانطي لكن خااااوي بقيت مكملة فطريقي حتى وصلت ليه ووقفت فجنبو
أنا: الحمد لله ياربي غا مللي شفت الضو الحمد لله
بقيت ساعات وأنا تما ووالو مكاينش حس البشر فديك لبلاصة رجلي ولات تحتها ضاية ديال الدم وأنا مابقيتش قادة نوقف حاسة بداتي كلها طالعة معاها صهدة وكانعرق بزاف بقيت هكاك حتى فقدت الوعي وطحت جنب الشانطي..
بعد_ثلاتة_أيام:
سهام: مسكينة مزال لحالة هي الحالة 3 أيام وهي فغيبوبة
فاطمة: واييه ماعرف اشنو داز على هاد البنت غا حالتها نهار جابها سيدي تعطيك لخبار..عمري نسا ديك الحالة
سهام: كانتمنى أنها تفيق..الطبيب قالينا أن سباب هاد الغيبوبة نفسي كثر ماهو جسدي
فاطمة: اه ا لالة والعجيب أنه مكاين لا اغتصاب لاوالو..
سهام: (كدوز يديها على شعر أسماء) اهئ اهئ ياربي بنتي ماتكونش كاتعاني بحال هاد البنت..
فاطمة: (كاتواسيها) صافي ا لالة دبا ترجع ليك ان شاء الله
من بعد ماخرجات ديك لخدامة كليت مزيان وبردت قلبي وقررت أنني ندخل ندوش..نضت وأنا كانعرج دخلت للحمام اللي كان فنفس لون البيت.. أول حاجة شفت فيها هي لمراية.. كان تحت عيني زرق ولباقي فأنا هي أنا.. يالاه بغيت نحيد حوايجي وأنا نشوف رجلي اللي فيها لفاصمة.. درت بناقص غسلت غا وجهي وخرجت كانمسح فيه حتى ضرباتني شي حاجة لراس
أنا: اااااي (شادة فراسي)
الصوت: ههههههههههه واااا ههههههههههههه سمحيلي
هزيت راسي لقيت بنت قدامي شعرها قصير وصابغاه صفر ولابسة كسوة بيضة مفرفرة ولكن هاد لبنت كانت قزمة.. وهادشي باين فملاميحها والقصورية لمفرطة ديالها
أنا: شكون نتي ولاش ضربتيني بهاد اللعبة؟
لبنت: ومالك ياختي كاتقلبي عليا فعينيك بفف... أنا كرزة
كرزة: واللللللله مادرت ليها شي حاجة غير بغيت نتعرف عليها مللي سمعتها فاقت
سهام: سمحيلي ا بنتي الى صدعاتك راها ماكاتسكتش من لهدرة
أنا: لا لا ماشي مشكل ا لالة
سهام: عيطيلي غير سهام ولا خالتي بلا هاد لالة.. راه قالتلي فاطمة سميتك ندى.. تبارك الله سميتك زوينة
أنا: الله يزين يامك
سهام: يالاه ا ندى بدلي حوايجك باش نهبطو لتحت
أنا: (بارتباك) لا غاخليني هنا
سهام: لا ابنتي راه خصك تجلسي معانا ماتبقايش بوحدك .. بالحق مانبزز عليك والو
أنا: واخا أنا نلبس ونهبط
سهام: وخا هاهي كرزة معاك تهبطك (شافت فكرزة) ونتي ديري عقلك ونقصي من الطيران
كرزة: وصافي صافي غاسيري
خرجات سهام وبقيت ساهية حتى فيقاتني كرزة
كرزة: راه اللبس فالماريو
شفت فيها بالامبالاة ومشيت فتحت لماريو اللي كان عامر حوايج جبدت تريكو فالغوز وسروال فضفاض فلبيض حيت لمزير ماغايبغيش يطلعلي مع رجلي اللي مضروبة وبانطوفة فالغوز على شكل نونوس
أنا: بغيت نبدل
كرزة: وبدلي شكون حبسك
انا: واش غاتبقاي تفرجي فيا
كرزة: هههههههه على زينك راه اللي عندي عندك ولا ياكما عندك المسائل مصنوعين من الذهب
أنا: (بصدمة وحشمة وتلعثم) واش نتي ماكاتحشميش أنا غانعيط على ديك لمرا هي اللي بانتلي كاتعرف ليك
سهام: أكيييييد وبلاما تشاوري معايا المهم أنا غانقولك شكون ساكن هنا كاينة أنا وولدي اللي قليل فاش كايجي .كاين مرت لوسي وولدها سفيان وبنتها لينا..وكرزة والخدم
أنا: اكتفيت بابتسامة ونضت وقفت
سهام: بلاتي نعيط على كرزة تخرج معاك
أنا: لا لا بغيت نبقا بوحدي..خرجت من داك الباب اللي فالصالون ولقيت قدامي جنة ماشي جردة كانت كبيرة وزوينة بزاف وكايتوسطها مسبح كبير..بقيت غادة كانتمشى وساهية فالمنظر الزوين اللي قدامي حتى بانتلي واحد الأرجوحة فرحت مللي شفتها حيت مللي كنت صغيرة مكانتش كاتخليني مي رقية نلعب.. مشيت جيهتها وركبت فيها وبديت نلعب من نيتي وماهماتنيش رجلي بقيت كانزيد فالسرعة حتى زلقت منها وتلاحيت ساعة لقيت راسي ماطحتش على الأرض كنت ناعسة فوق شي حاجة فشكل مللي فتحت عيني ... لقيت عينين كايشوفو فيا كانو زرقين .. تفكرت عينين مجد وانا نبدا نغوت على حر جهدي ونتركل ونضت باغا نهرب حتى شداتني يد وكرمت فبلاصي بالخلعة
الشخص: (بالإنجليزية) واش نتي حمقة ولا مالك اش هاد التبرهيش لخاوي!
جاني الصوت ماشي صوت مجد عرفت راسي قفرتها بديت كانضور بالعرض البطيء حتى شفت فيه..
اححححح كان طويل وعضلاتو بارزين لابس لباس أسود.. شعر أسود رطب مرجعو لور ولحية خفيفة مطراسية عينين زرقين وحجبان كثيفين ومقادين ومغوبشين .. فم مطراسي😯 خلاصة الحديث أبكص بوكوص شفت فحياتي
الشخص: واش حمقة وزيزونة؟
أنا: لا.. انا..يسحابلي..مج... لا.. دبا
الشخص: (بالدارجة لكن معكلة) ومغربية مكلخة من لفوق
أنا: سمحلي ماقصدتش نطيح عليك كنت غير كانلعب و..
الشخص: (طلق يدي وضربني بكتفو وزاد 😠خلاني بلاكة)
انا: ا ربي السلامة الى كان الزين وقلة الأداب بلاش منو كاع... ولكن تا انا مادرت فيها مايتشاف طايحة عليه وكالسة نبرح من لفوق بفففف😕
#فالصالون:
سهام: أسد..ولدي جيتي (ناضت عنقانو)
أسد: ماما (بادلها العناق) لباس عليك؟
سهام: لباااس اولدي كيدرتي مع لخدمة؟ اه راه البنت اللي جبتي فاقت
أسد: اه مزيان وكيبقات
سهام: شوية باين عليها متضررة نفسيا راه خليتها تخرج للجردة
شكون هادا ياكما ولد المدام حيت هي قالتلي باللي عندها ولد واحد اذن غايكون هو اللي لقاني.. المهم نمشي نرجع لبيتي نتكمش.. ولكن تال امتا؟ واش أنا غانبقا لاسقة فالناس خصني نشوف شي حل لراسي.. ولكن انا حتى الانجليزية مكانفهمهاش كيغاندير نعيش هنا .. اهئ اهئ بغيت نرجع لبلادي ماعندي ماندير فهاد لبلاد اللي مكانعرف فيها حد..
حب وسط الدماء الجزء الرابع
محتوى القصة
التنقل بين الأجزاء