صورة مصغرة لـقصة حب وسط الدماء

قصة حب وسط الدماء

بقلم أسومة

رواية حب وسط الدماء

الليل و الظلام وحتى القمر ماطالعش هاد الليلة.. عييت مانجري تقريبا شي ساعتين ماحبستش من الجرى ماشي حيت ماعييتش ولكن هذا مابسمى بغريزة الحياة وحب البقاء خايفة لايشدوني الذياب ويغرسو فيا نيابهم وأنا بوحدي فهاد الغابة، لخالا والقيفار ولكن ماخايفاش من الحيوانات لا أنا كانهدر على الذئاب البشرية اللي عرفت فحياتي حياتي اللي تقلبات ولحد الآن باقة ماعارفاش شنو هو المصير ديالي وشنو غاتكون نهايتي. نعرفكم براسي بعدا سميتي أسماء العلوي ههههه ماتغركمش سميتي وتسحابوني غانقول بنت أشهر رجال الأعمال لا لا أنا أسماء اللي عمري شفت النهار لبيض فحياتي ونهار شفتو كان هو سبابي فأكبر عذاب عشتو ومزال غانعيشو.. لمهم قريت حد التاسعة وخرجت واخا نجحت فيها أما بالنسبة لشكلي فأنا طويلة ورقيقة و لكن عامرة من لبلايص اللي خاصني نكون عامرة منهم هه بشرتي بيضاء كانمتاز بعينين رماديين ومشفرين وحجبان مقادين من عند الله وفيم بحالا نافخاه وسنينات بيضين ومستفين وشعري بني بارد قوي و رطب وطويل المهم عتابروني تويتيزة وصافي هه أودي دبا كلكم غاتكونو ضاركم راسكم على البداية اللي بديت بيها قصتي ولكن غاتفهمو كلشي فهاد لفلاش باك..
#الماضي:
رقية: ياااا بنت لحرام يا لملقطة واش ماناوياش تنوضي تحكي هاد لماعن ديال الجيكس؟
أنا: وامي رقية راه يالاه هادي 3 أيام باش حكيتهم لاش غانعاود نحكهم راه مللي فقت مع 6 دصباح وأنا فتمارة ودبا مللي شفتيني جلست حسدتيني علي هاد لجلسة شوفي كاع حالتي كي ولات
رقية: ياك ابنت لحرام وليتي تجاوبي معايا كلمة بختها تقادو لكتاف يا بنت الزناقي
أنا: واش ضروري كل النهار تجبدي نفس لهدرة اه انا ملقطة وبنت لحرام ونتي درتي فيا خير كبير وربيتيني حتى ولاو كتافي قد البقرة الله يجازيك بخير ويكتر من مثالك
رقية: هاد لهدرة زيديها فيك ونوضي لدوك لماعن ولا خرجي عليا ماعندي ماندير بيك 
أنا: أمري لله

أكيد كاتسائلوا شكون هاد مي رقية وعلاش أنا عايشة معاها هاكة.. أنا من نهار عقلت على راسي وأنا كانعرفها غير هي وبنتها فاطمة اللي حملات من الزنقة ومن نهار ساقت رقية لخبار ماعاودنا سمعنا عليها حتى شي خبار رقية ماشي مي وماكاتجينيش من لعائلة ههه لعائلة؟ أنا ماكانعرف حتى شنو هي العائلة وكانهضر المهم على حساب ماكاتقول مي رقية بللي أنا بنت لحرام وماما لحقيقية ولداتني من الزنقة وعطاتني ليها حيت خافت من الشوهة ايييه خلات كبدتها ومشات لحاجة الوحيدة اللي كانعرف عليها هي سميتها زكية مشات وخلاتني مع هاد لمرا اللي عمرها حنات فيا ولا حسات بيا واخا عمري خسرت ليها لخاطر حيت فنهاية الأمر كاتبقا هي اللي دارت فيا خير كبير وبالنسبة لسميتي فماما اللي مسمياني أسماء أما لكنية فماعرفتش مي رقية كيدارت ليها ولكن المهم مقادة ليا وريقاتي باش قريت (التاسعة ههه) وباش دايرة لاكارط. 
كنا ساكنين فحي شعبي بزاف فمدينة الدار البيضاء وفظروف جد مزرية كانت رقية كاتمشي تخدم عند لعيالات تصبن ليهم وأنا كانبقا نشقا فالدار وكانصايب لعقادي ديال الجلالب للخياطة ديال الدرب كانو عندي جوج جلالب وحدة كحلة و وحدة خضرة هوما اللي كانلبس من ديما كنت مللي كانكون غادة عند الخياط ندي ليه لعقادي كانشوف لبنات خارجين من الليسي لابسين ومقادين وكايضحكو مع بعضياتهم وأنا لا لبس لا قراية لا صحابات دبا عندي 19 سنة تيقوا ولا ماتيقوش عمري كانت عندي شي صاحبتي وعمري عرفت ولا حتى سلمت على شي دري ختكم خبيزة مغمضة.. المهم هاكا كانو أيامي ماعارفاش شكون انا وبنت من .. ماعارفاش مستقبالي كيفاش غايكون اللي عارفة أنني صابرة حتى يفرجها ربي.
ليوم السبت اووف لويكاند ختكم غاتخرج مع لبنات لكافي ههههههههه اودي هادشي كانشوفو غافديك لخرشاشة ديال مي رقية اللي ديما مخبية عليا تيليكوموند باش مانتفرجش بزاف ونضيع ضو .. فقت على النبابر بحال ديما خملت وصبنت وسيقت ورديت لمرقة طيب ودرت واحد البرمة فالطواليط ودخلت نغسل جنابي ملي ساليت خرجت لبست عليا بيجامة بالية كون تجفو بيها ماتجمعش لما وكلست حتى دخلات عليا مي رقية كي الرعدة..
رقية :هاي هاي هااااااي على الكلبة😨 (فخاطر ندى ههه)
أنا: امالكي داخلة مصدومة شواقع؟
رقية: ايوا راه دواو فيك شي ناس نوضي على سلامتك
أنا: كيفاش؟ اينا ناس؟
رقية: مول صايكوك اللي مقابل مع حمد الخياط.. دبا أنا جاية من السويقة حتى وقفني
أنا: لاش؟
رقية: ايوة يابنت لحرام راه قالي كاتعجبيه وديما حاضيك ملي كاتمشي تبيعي لعقاد وجيتيه معقولة وداخلة سوق راسك وبغاك على سنة الله ورسوله
أنا: اويييييييييييلي امي رقية الله يا رقية الله وحشومة عليك كاتهضري على با منصور مول صيكوك اللي لحيتو نعمرو بيها جوج مخاد والسيد مزوج وبنتو قدي
رقية: نوضي الله يقل حياك اللقيطة تانتي وليتي تهضري وتعيبي فالناس ونتي شكون عيب عليك السيد باغي غا الحلال ومالو الى مزوج السيد دارو فيها 2 طبقات وحدة ليك و وحدة لولادو ويفششك ولا نتي مولفة بالقهرة ياوجه الشرع.. المهم انا ماجيتش نتشاور معاك جيت غانعلمك راه درت معاه الخطبة غدا ان شاء الله ومللي يجي نتفاهموا على امتا العقد وسيري لدارك وهنيني من همك مك لاحتك وأنا وحلت فيك
هضرتها نزلات عليا بحال الصاعقة ماعرفت باش تبليت واش حياتي بدات عذاب ونكملها عذاب واش حياتي بدات مع شارفة وتسالي مع شارف يااااااربي تفرجها عليا واش مكتوب عليا أنا هاد لهم مللي تزاديت وراسي صكع ولكن مستحيييييل نتزوج بمول صيكوك مستحيل وخا نعرف نقتل راسي.
دوزنا ديك لعشية رقية ماقاداها فرحة صايبات غريبة ولفقاص وعلاش ماتفرحش وهي غاتهنا مني أما أنا فدوزتها فلبكا ولخناين على زهري لمكوز ماكليتش النهار كامل بقيت هاكاك حتى داتني عيني ونعست.

كانحس بشي حاجة كادفع فيا حليت عيني كانلقى مي رقية كاضربني برجليها باش نفيق
رقية: هاي هاي على لالة لعروسة راه 7 هادي بديتي لفشوش من دبا وانوضي ضربيها لدار بواحد الجمعة وصايبي شي مسيمنات وشي كيكة راه راجل جاي ليوم زعمة وكيما كبر بيك خصك تكبري بيه
أنا: وا مي رقية راني ماباغاش نتزوج بيه واش باغا تحمقيني 
رقية: ياختي ياختي على الزين! ماباغاهش ؟ ياكما باغا شي طبيب ولا مهندس ويسكنك ف فيلا بلابيسين وتهضرو فالدار بلفرانساوية والله يا مك ومانضتي جمعتي لوقفة حتى نجمعك بشي طرشة راه بانلي بحالا بردو ليك جنابك من لعصا هاد ليام
بقيت غير كانشوف فيها ووكلت أمري لله هي من واحد الناحية عندها لحق ماغايقبلش عليا طبيب ولا مهندس.. بنت ملقطة وماقارياش بحالي شكون غاتزوج بيها مثلا ولكن ماشي لدرجة نتزوج با منصور مول صيكوك حتى أنا باغا راجلي يكون شاب وزوين ونعيشو فالحب واخا غاعلى قد الحال، اودي نوض نعجن على قلبي بقا ليا غا لحلم
نضت درت داكشي اللي قالت ليا رقية ندير وجلست حتى جات لاحت عليا واحد لقميص بااالي وفيه ريحة لغمولية
رقية: واديك المتعوسة نوضي لبسي عليك هاد لقميص ومشطي داك الشعر راه 2 دابا والراجل غايجي ورا لعصر وديري عقلك ولا نتف ليك دوك جوج زغبات اللي فراس مالك
بقيت كانشوف فداك لقميص ونبكي وندب ورقية خرجات ماعرفتها فين مشات وصلات وقيتة العصر نضت توضيت وصليت وطلبت الله يعاوني ساليت ونضت لبست داك لقميص جاني قصير وعريض جيت حالتي ومشطت شعري وجمعتو ديل حصان وجلست كانتسنى فارس أحلامي يجي يديني للقصر ههههه 
جات مي رقية وجابت معاها الخياط زعما هو الراجل من جيهتنا بقينا جالسين شوية حتى بدا الدقان فالباب ومعاه بداو دقات قلبي اللي تسارعو بزاف وبداو يديا كايعرقو حيت فيما كانتوتر كايبداو يعرقو رقية ناضت تحل لباب طاااايرة أنا كنت فلكوزينة كانوجد أتاي
رقية: أهلا أهلا مرحبا بسي منصور دخل دخل الدار دارك وعلاش معذب راسك
با منصور: الله ياودي ألالة رقية علاه نتوما رخاص علينا
أنا غير سمعت صوتو بديت نولول سيد شاااارف كانعقل عليه مللي كنت فالسادس كنت كانشري من عندو درهم صيكوك دبا ولا هو اللي غايولي راجلي... لمهم دخل للبيت فين كاين لخياط وجات عندي رقية للكوزينة فيديها الشكلاط ولورد هاء بغيت نقول السكر ومشموم دالنعناع.

رقية هزات ديك الحلوة ولملاوي وقاتلي نتبعا بالصينية دأتاي ومشات عندهم أنا بديت نقفقف وعينيا غرغرو مسحتهم وهزيت أتاي غمضت عينيا شوية وعاودت حليتهم ومشيت دخلت عندهم حانية راسي وكانترعد حطيت الصينية على الطابلة وجلست حدا رقية وراسي ماهزيتوش
رقية: ايوة ا سي منصور أسما (كاتقولي أسما وأنا كانكره اللي يقولي أسما) راها ماشي بنتي ولكن راني ربيتها ملي كانت رويبعة ديال اللحم وقريتها وخدمت عليها وعلمتها لحداكة ونبغيك ديرها فعينيك راها مزال صغيرة وغانية مسيكينة
بامنصور: عارف اللي كاين ا لالة رقية وحتى أنا ماغانتكرفصش عليها .. المهم أنا ليوم جيت طالب راغب فيد لالة أسماء الى قبلات عليا
رقية: هيهيهيهي ويييييلي ياسي منصور وعلى مالها اللي ماتقبل راه ماتلقاش ماحسن منك راني هضرت معاها لبارح وراها موااااافقة
أنا هزيت راسي وضرت كانشوف فيها وهي طلعها معايا بقرصة تزيرت ودموع تحجرو فعيني ماشي من لقرصة وإنما على مكتوبي لكحل..المهم شربو أتاي وتافقو على لعقد يكون السيمانة الجاية بلا عرس بلا والو طبعا أنا ماسولوني ماتشاورو معايا كايهضرو غابيناتهم وأنا كانسمع ودارو فالصداق 30 ألف ريال المهم الناس ناضو ومشاو بحالهم ورقية فرعات ليا ودني بزغاريد باز لوجهها
رقية: ايوا مبروك المتعوسة لاتقولي مي رقية ماكاتفكرش ليا هانا ضبرت ليك فراجل كامل مكمول
بقيت حانية راسي بلاما نجاوب نضت جمعت الدنيا ولبست بيجامتي ونعست بلاما نحط النعمة ففمي..
#بعد_مرور_5أيام:
ليوم الجمعة ونهار الأحد عندي العقد دازو عندي هاد ل 5 أيام كحلين كي زهري رقية تمشي تخدم وتجي وأنا نبقا فالشقا ولبكا والتخمام ولكن قررت واحد القرار اللي غاتعرفوه نهار الأحد
رقية: شوفي هاد 2 بيجامات وهاد 2 دوبياسات راه شريتهم ليك مللي كنت جاية من القصارية وخديت حتى هاد لمسخ (شوميز دو نوي) وهاد الريحة وهاد لكحل ولعكر باش ضوري ليا بلحالة وتهلاي فسي منصور هههههه كيجاكم دهازي البنات وهادشي راه با منصور عطاها 40 ألف من غير الصداق باش تشريلي اللي خاصني وهي مشات خسرات عليا 300 درهم وللي بقا ضرباتو تحتها

ليوم السبت لاحت ليا مي رقية 50 درهم قاتلي نمشي للحمام ونمشي نصايب شعري باش فلعشية تحني ليا..جمعت رزمتي ومشيت للحمام اللي ماكانمشي ليه من لعيد حتى للعيد فركت راسي مزيان وبردت غدايدي ودزت عند لكوافورة اللي عمري عتبت عندها فحياتي باش نصايب شعري وخا هو مصايب من عند الله المهم صايبتو وهزيت سطولاتي وجيت للدار جلساتني مي رقية وبدات طلي ليا فالحنة وأنا دموعي شلال وهي كاعما مسوقة ليا كاع خليتها حتى كرمات شوية ونضت غسلتها ماحملتهاش كاع تعشينا ومشيت نعست وكانفكر فاللي جاي غدا.
صبح الصباح ورقية فاقت فرحانة وناشطة وبدات هي اللي كاتجمع فالدار وتوجد الحلوة فالطباسل حيت مولاي صيكوك ولعدول غايجيو فالصباح .. مللي سالات التوجاد مشات تفيق أسماء اللي ليوم زعمة بغات تخليها على خاطرها بدات تعيط أسما أسما والو السيدة ساقلة مشات جرات عليها لغطا والصدمة😨 كاتلقا غير لمخاد مشات تجري تقلب لقات جلابتها لكحلة مكايناش وصندالتها تاهية ماكايناش صافي عرفاتها دارتها وهربات..
رقية: (بلغوات وهي كاضرب ففخادها) أويلي على بنت لحرام دارتها أويلي ماكنتش متوقعا هاد لمسخوطة ديرها أويلي على شوهتي غا بنت كرشي حملات وهربات وهاد لملقطة هربات نهار زواجها أويلي وشنو نقول للراجل أويلي على شوهتي أويلي أويلي
نخليو رقية تندب وتفك حريرتها مع ميسيو صايكوك وأجيو نشوفو راس لمحاين دأسماء فين عطات الراس
أنا: اوووف الله ياربي من ل5 دالصباح وأنا كانشحط فالطرقان وماعندي حتى درهم فجيبي ياااربي واش هادشي اللي درت صحيح ولا خرجت على راسي ياربي فين غانعطي الراس؟ فين غانسكن وشنو غاناكل وشنو غاندير وانا كي الراس لمقطوع ماعندي حد وماكانعرف حد فكازا
بقات أسماء غادة وماعارفاش فين هي ووجها عامر دموع ومعدتها كاتغوت بالجوع بقات هكاك النهار كامل حتى طابو رجليها ومشات كلسات فواحد الجردة عامرة بالناس والدراري صغار كايلعبو بقات كاتشوف فيهم ومكمشة وصابرة للجوع والبرد حيت كان شهر 2

بقيت كالسة فديك الجردة حتى ضلام الحال والدنيا بانتلي بدات كاتخوى بدات كاتشدني لخلعة وبديت كانترعد ونضور فعينيا ونقرا فالقرآن ونطلب الله يعاوني حتى خوات الدنيا تماما تكون ديك 00:00 صافي قلبي بغا يسكت حتى شوية كانحس بشي يد كاتلعب فشعري قفزت وضرت نشوف شكون بانلي جوج رجال كشاكشهم خارجين وعينيهم فيهم نضرات شر ليا نقزت من بلاصتي وسولتهم شكون نتوما قالولي حنا عمامك أحبيبة جينا نديوك للدار حيت لبرد عليك بديت كانترعد وحيدت صندالتي هزيتها فيدي وبديت نجري نجري وماكانشوفش مورايا ودموع والبرد كايضرب ففمي وصدري ويالاه جيت نقطع واحد الشانطي حتى كانشوف ضو مجهد جاي جيهتي وسمعت كغييييييييييسط
لحظة صمت كانسمع غا السقيل وانا مزال واقفة بلاصتي شوية كانسمع شي باب تحل وخطوات كاتقرب مني حيدت يدي اللي كنت دايرة على عيني بالخلعة وكانشوف قدامي دري طويل وعريض وشعرو زعر وعينيه زرقين واقف كايشوف فيا 
الولد: ختي ياكمة وقعات ليك شي حاجة سمحيلي ولكن راه الغلط منك نتي اللي خرجتي قدامي على غفلة الليل هادا الحمد لله شديت لفران فآخر لحظة
أنا: (بقيت غاكانشوف فيه والدموع نازلين تزيزنت) س..س..س..سمح..حلي بزاف 
الولد: (بابتسامة) لا لا ماشي مشكل عندي أنا لمهم نتي تكوني بخير والحمد لله على السلامة
عطاني بالضهر وبدا غادي راجع لطوموبيلتو شوية وقف وضار عندي
الولد: ولكن شنو كاديري هنا فهاد الوقت؟
أنا: والو غير كنت دايزة وصافي 
الولد: متأكدة؟
أنا : اه اه متأكدة
الولد: أوكي نخليك تصبحي على خير.. ركب فطوموبيلتو وكسيرا وأنا بقيت واقفة حالة فمي كي الضبعة 
أنا: اه اه متأكدة والجبوه أنا اللولة فيهم.. ولكن حتى كون قلت ليه الصراحة غير غايبغي يستاغل الفرصة ويتعدى عليا 😕 ولكن واو عمري شفت بحال هاد الزين مباشرة تبارك الله😍 ياويلي أنا شكانقول واش من نيتي هادا وقت الزين دبا 
بقيت نضور فعينييا لقيت راسي فبلاصة خاوية غا الشجر والشانطي مشيت جلست جنب الطريق وتكمشت وقلبي غايخرج بالخلعة.

بقيت جالسة تما شي ساعة شوية شفت طوموبيل جاية و وقفات جيهتي بديت نقفقف ونضت تاني هزيت صندالتي باش نهرب حتى كانسمع.. هادي نتي؟!! هزيت راسي لقيتو هو نفس الدري ديال قبيلة واقف كايشوف فيا شوية تم جاي لعندي بقيت مسمرة فبلاصتي
الولد: نتي مزال هنا؟ أنا مشيت نجيب شي سخرة ودبا راجع ونتي مزال فنفس لبلاصة!! سولتك قبيلة وقلتيلي أنا مزيان فعلاش راك مزال جالسة هنا
أنا: بقيت غا حانية راسي وكانبكي فصمت
الولد: شوفي فيا! مد ليا يديه أنا مجد ونتي؟
أنا: تبلوكيت ومامديتش يدي شوية جاوبتو أأأسماء
مجد: سميتك زوينة..ايوة ا لالة أسماء اش وصلك لهاد الحالة ديريني صديق وعاوديلي
بقيت ساكتة حيت عمر كانو عندي أصدقاء ونهار يوليو عندي يكون هاد الزين كامل
أنا: ماحسيتش براسي حتى بديت نعاود ونبكي عاودت ليه على كلشي وانا حانية راسي وهو مربع يديه وكايسمعلي حتى ساليت
مجد: طلعي!
أنا: فين غانطلع؟
مجد: للطوموبيل غاتمشي معايا
أنا: لهلا يحييك أنا كانعاود ليك ونتا رديتيني بنت الزنقة ولكن نستاهل نيت اللي جالسة نعاود ليك 
تميت غادة حتى شدني من يدي
مجد: هههه واش نتي هبيلة ولا مالك أنا راه بغيت نديك لدارنا وراه حنا عائلة كبيرة وحيت سمعت قصتك عزيتي عليا ومابغيتش نخلي فهاد الخلا أما إلى مابغيتيش صافي سمحيلي هانا مشيت
أنا: (ويلي ويلي على حمارة أنا السيد بغا يعاوني وأنا كالسة كانطير غابوحدي هاهو غايمشي ويخليني نتجمد هنا) بلاتي!
ضار عندي وكايحل فلباب دالطوموبيل
مجد: نعام؟
أنا: صافي نطلع
مجد: (بابتسامة ساحرة) ههه أصلا ماكنتش غانخليك غا جربتك
حل ليا لباب وطلعت معاه فالطوموبيل اللي كانت فلكحل و واعرة ولكن ختكم مكلخة ماعرفتش شمن ماركة..ديمارا وبقينا غاديين فصمت مدة حتى وصلنا قدام فيلا متوسطة كلاكصونا وخرج لعساس حل لينا الباب ودخلنا للجردة ووقف طوموبيل..نزل مجد ونزلت حتى أنا ودارلي بيديه تفضلي.. وحل الباب بالساروت ودخلنا.

أنا: (بشاااااااااااااااااااخ ناري ناري على داااار هادشي كانشوفو غا فالتلفزة) صالون فالباج والقهوي تقليدي وحداه صالون عصري بلفوطويات فلكري ولكحل والضواو مجهدين بقيت غاكانشوف حتى فيقني مجد بصوتو
مجد: أسماء أجي معايا مشيت معاه ودخلنا للكوزينة كانت فيها مرا تكون عندها ديك 40 سنة كاتغسل لماعن حتى نتابهات لوجودنا
نعيمة: أهلا بولدي (وكاتشوف فيا باستغراب)
مجد: خالتي نعيمة هادي أسماء صديقتي وعندها شي مشاكل مع دارهم وجبتها للدار تبقا معانا بينما حلاتهم
نعيمة: مرحبا ببنتي 
مجد: عافاك عطيها تعشا وديها لشي بيت وعطيها شي حوايج من دياول سكينة تلبسهم
نعيمة: وخا وليدي هي لولة
مجد: أسماء نخليك مع خالتي نعيمة راه غاتهلا فيك ليلة سعيدة وعتابري الدار دارك
أنا: شكرا بزاف عمري نسا خيرك 
مجد: ههههه صافي ألالة حتى ترديه ليا
مشا مجد وخلاني مع نعيمة اللي علاما فهمت أنها خدامة عندهم ومجد معتابرها بحال شي وحدة من العائلة عطاتني كليت بيتزا طحت فيها عمية كليتها كاملة وشربت عصير دالليمون وساليت
نعيمة: بنتي أسما تبعيني
أنا: (أسما تاني😒) واخا .. طلعت أنا وياها للطابق الثاني اللي كان كلو بيوتا ودخلاتني لواحد لبيت اللي كان متوسط لكن بالنسبة ليا أنا كبييييير كان كلو باللون الأبيض..
نعيمة: بنتي دخلي دوشي وراه مللي غاتخرجي غاتلقايني حاطة ليك كاع اللي خاصك هنا
أنا: وخا ا خالتي الله يكتر خيرك 
خرجات نعيمة وأنا دخلت للحمام اللي كان فالغرفة كان حتى هو باللون الأبيض فيه بانيو كبير وعامر بجميع مستعدات الدوش عمرتو بالما دااافي وباندوش وحيدت جلابتي وحوايجي وطلقت شعري وتخشيت فيه وبقيت مغمضة عينيا وكانقول واش أنا غير كانحلم؟ واش بصح درت هاد الخطوة وهربت؟ شكون مجد؟ وشنو مزال كايتسناني؟ بقيت كانتخبط فأفكاري وشوية نضت غسلت شعري ودرت الصابون وتشللت..لقيت فوطة لويتها عليا وخرجت لقيت فوق الناموسية بيجامة سخونة وملابس داخلية جداد كانو فالأسود والبيجامة كانت عبارة على سروال أسود ولفوقي دايالها غوز مغلوق وفيها قطيطة كحلة لوسط..لبستهم وعجبني راسي أول مرة نلبس شي حاجة زوينة وجديدة ومتناسقة.. لقيتها حاطة ليا سوشوار باش نشف شعري نشفتو وتخشيت فالناموسية اللي كانت رطبة ومريحة تغطيت واستسلمت للنوم.

فقت مفزوعة كانقلب على الساعة باش نشوف واش 6 باش نوض نخمل الدار لرقية حتى بديت نضور عيني ونستوعب أنني فدار مجد الدري اللي حماني لبارح من البرد والجوع والتشرد فقت فرحانة وخرجت للبالكون االلي كان كايطل على الجريدة بقيت كانتمنضر ومامتيقاش أنني هنا وا شوف الناس فين عايشين وأنا أيامي كلها دوزتها مع مي رقية فديك لحفرة وفالتالي قاتلك بغات تزوجني ب با منصور مول صايكوك ولااااااااهيلة
مجد: ههههههههههههههه وايلي على صايكوك
تصدمت بقيت قارمة فبلاصتي وكانطلب الله نكون غاكانحلم اويلي على شوهتي أنا لبارح قلت ليه راجل كبير وصافي ماشي مول صايكوك .. ضرت نشوف فيه لقيتو كايضحك وأنا نخنزر حتى جمعها
مجد: احم سمحيلي راه جيت نطل عليك قبل مانمشي للخدمة ونشوف واش ناقصاك شي حاجة
أنا: 😒 اه ماشي مشكل أنا لاباس وماناقصني والو.. فاش خدام؟
مجد: أنا طبيب
أنا: (مي رقية هانا ففيلا ومع طبيب😍) اااه مزيان الله يعاونك المهم أنا غانلبس حوايجي ونمشي شكرا بزاف على لبارح
مجد: (مستحيييل نخليك تخرجي من هنا) لا لا مايمكنش نخليك تمشي نتي غاتبقاي هنا حتى نقلب ليك على خدمة وعلى فين تسكني
أنا: لا ولكن...
مجد: مكاين ما ولكن هدرتي هاني قلتها (قرب ليا حدا ودني وأنا جامدة فبلاصتي) وراه ماغاتمشي حتى تردي ليا لمعروف ديالي (غمزة) وخرج وسد لباب
أنا: اويلي اش عندي مانرد ليه هذا شكايقول ياكما..😨 لا لا لا مبايناش عليه من داك النوع وهاد الزين كامل غاتكون لمخيرة ديالو عاد يتورط معايا أنا فقضية اغتصاب هههه
نضت دخلت للدوش غسلت وجهي ورجعت جلست فوق الناموسية جاني لملل حيت ختكم وجه القهرة تواحشت التسياق ولعجينة بقيت جالسة حتى جاء الفرج ههه زعما خالتي نعيمة
نعيمة: صباح النور بنتي..حطات حدايا بلاطو فيه البيض والفرماج ولشكلاط وعصير ولكريب وخبز بحال هاداك اللي فالأفلام
أنا: الله يخلف عليك ا خالتي
نعيمة: الله يخلف على وليدي مجد أما أنا غاكنتسخر


أنا: خالتي عاوديلي على مجد...

يتبع

أجزاء القصة
قصص جديدة
قصة كرهتك حد العشق من تأليف نونة الحنونة
قصة كرهتك حد العشق نونة الحنونة
قصة سيد القلعة من تأليف حياة جمالي
قصة سيد القلعة حياة جمالي
كايتنشرو القصص والأجزاء كل يوم مع التاسعة ليلا بتوقيت المغرب
9isas maghribiya bdarija قصص مغربية بالدارجة قصص و روايات بالدارجة المغربية