أوتاكو الجزء السادس والأخير

وصلناها لديك لجامعة خليناها دخلات بغيت ندخل معاها قالت ليا لا مكين لاش بقى غير فطوموبيل هنا عييت معاها مخلاتنيش بقيت غير فطوموبيل مع شيفور لقيتو حتى هو نفس لبلان ديالي حتى خدم معاهم بقينا شادين ستون حتى خرجات وصلناها لدارهم وتنبقاو باركين قدام لفيلا حتى تبغي تخرج كل نهار دوزنا واحد شهر غير هكدا شهر كانو كل نهار تيصيفطولي لحسابي مبلغ متنقدرش حتى نقراه ناس تيخافو على ولادهم ديال بصح دبا إلا وقعات ليها شي حاجة كينا إمكانية يقتلوني واليديها وليت تنخاف عليها كتر من راسي و عاشرة داك شيفور ديال بصح حتى ولا تيمشي معايا نتغداو فدار كل نهار و ختنى هناء لي مقابلينها برهوشة فعقليتها وتتبقى تحتاقرنا متتبغيناش نمشيو معاهت مي هانية أصلا تنقول مع راسي غنجمع شويا د لعاقة و نخرج واحد نهار فلييل يلاه بغينا نمشيو لديورنا وهيا تخرج قالت لينا بلي شي عشيرها داير شي حفلة وخاصها تمشي قلت لشيفور صافي نصبرو معاها واحد ساعة ونرجعوها قاليا صافي ديناها لتما مخلاتنيش تاني ندخل معاها بقيت بارك مع شيفور فطوموبيل تندويو واحد نص ساعة حتى خرجات تتبكي طلعات وقالت لينا وصلوني لدار تمينا غادين وانا نسولها مالك قالت ليا ماشي شغلك قلت لشيفور وقف وقف وقف وانا نشوف فيها ملي قلتي هكدا سمحي ليا شغلي هدا باك مأمني عليك قالت ليا والو غير داك زبل ضربني قدام بنادم شفت فوجهها بانت ليا يدو مزال بلاصتها باينة فوجهها وانا نشوف فشيفور قلت ليه رجع أخونا قالت ليا من نيتك راه دارو هاديك عندو شي 10 دناس حاضينو فين تبان ليهم نتا قلت ليها ماشي غير جاو وحطوني هنا قلت ليه رجع رجعنا وقفنا قدام لباب قلت ليها ملي نشيرليك من شرجم دخلي قالت ليا صافي نزلت داخلت لتما تيباليا كلشي تيشطح ضورت راسي تتباليا لقرعة ديال لعافية حمرة كبيرة شديتها فيدي طليت من شرجم قلت ليها تدخل جات حدايا وراتني خونا قلت ليها تسنايني هنا وقفت على خونا بقا تيشوف معارفنيش حطيت ليه واحد ل 5 فوجهو وهو يطيح لأرض شفت فختنى لقيتها هازا تيليفون وتتصور فهادشي وفهاد لحضة تيبانولي دوك زوج رجال ديالو جاين لجيهتي هزيت لميدة شيرت عليهم بيها تتبالك ديك طبلة تتلعب فسما ضرباتهم طاح واحد لأخر نزل تيجري يعيط على لأخرين وأنا نضرب داك خونا بقيت تندخل ليه وشديت من ختنى خرجنا بزربا طلعنا لطوموبيل طيارة لا يكونو تابعينا حتى وقفنا قدام لباب ديال دارهم بدات تتضحك قالت ليا نتا بزاااف هاد لفديو خاصني نوريه لخواتاتي و كلشي ههه قلت ليها خدمتنا هادي نزلات قالت ليا شوف دخل دخل تعشى قلت ليها لا تلقاي مرتي دوزاتني فمختفون قالت ليا إوا عيط ليها وقوليها نص ساعة وغتجي مالك خواف قلت ليها لا أشمن خواف أنا جاي دبا وهو يخرج باها ولابس حوايجو شافيا قاليا محمد أش هاد لوقت أشمن خدمة هادي صبني وهيا تقوليه لا أنا لي بززت عليهم هوما دارو غير خدمتهم وجبدات تيليفونها وراتو داك لفديو وهو يقوليا تستاهل ديك لفلوس لي تتاخد فكرني نقولهم يزيدوك قلت ليه هانية خدمتي هادي ، قالت ليه هناء بنتو بابا قوليه يدخل يتعشى قاليا أه دخل دخل باغي نعطيك شي حاجة و باغيك فشي خدمة فشكل غدا أولدي وضفاك شنو باغيني وشنو غيعطيني دخلت وانا غير تنضور فعينيا

دخلت معاهم لدار قاليا سير مع هناء كوليك شي حاجة من لكوزينة ونزل عندي لاكاب قلت ليه صافي مشيت مع لبنت لكوزينة دخلنا قالت لخدامة تطيبلي شي حاجة و بقينا باركين تنتسناو شويا حتى حطات ليا واحد طبسيل فيه شي لحم وشي تخربيق عمري شفتو بديت تناكل وبدات تتسولني ديك هناء قالت ليا واش بصح مزوج قلت ليها أه شهر ونص هدا وعاودت ليها قصتي مع شيماء من لول حتى تزوجنا بقات تتضحك قالت ليا تصلاح فيلم هادي سعداتها بيك وأنا نوض قلت ليها نشوف باك شنو باغي قالت ليا عطيني نمرتك عطيتها ليها نزلت عندو لاكاب لقيتو شاد سيف فيدو داك سيف كطانا ديجا عارف أنا داك نوع من لإنمي وعارفو كين فلواقع يقدر يقطعني بلاما نحس من دوك سيوف لأسطورين قاليا عرفتي بشحال هدا قلت ليه لا قاليا 65 الف دولار يلاه بغا يبدا يقوليا سيف كيف داير و أنا نعطيه لعصير قلت ليه كطانا 120 سنتيم ... ، بقى تيشوف وقاليا إوا هدا كادو من عندي ليك وعطاه ليا وضفاك معمري حلمت بيها كاع قلت ليه لله يحفظك قاليا ودبا ندويو فلخدمة قلت ليه أه قاليا أنا عارف قصتك وعجباتني وبغيتك تخدم معايا قلت ليه انا خدام معاكم دبا قاليا لا تخدم معايا انا د بصح قلت ليه وهناء شكون يقابلها قاليا دبا نشوفو شي واحد أخر قلت ليه صافي قاليا إوا سير دبا وغدا أتبدا لخدمة هزيت داك سيف وخرجت طلعت فطوموبيل خبيت سيف تحت لكرسي بزز سيف مجباااد ومشيت لدار مع حليت لباب تتباليا شيماء باركة فوق كرسي وناعسة كانت تتسنى فيا وغلبها نعاس ههههه حتى أنا داخل مع 2 بغيت نهزها نحطها فلفراش وهيا تفيق بدات تتنقيل ودنيا فليييييل بقيت تنشرح ليها شنو وقع حتى سكتات قالت ليا ياك قلتي غادي تحبس لخدمة كاع مني تجمع شويا د لفلوس صافي متزيدش تدخل راسك فهادشي حبس محدك تقدر مديتهاش فيها وهادشي لي غندم عليه من بعد قلت ليها صافي ها أنا خدام دبا غادي توقعلي شي حاجة غادي نحبس قالت ليا نتسناو حتى توقع ليك شي حاجة واش نتا حمق لمهم بقينا داوين سكتها ، نعسنا لغد ليه فقت فطرت مشيت لخدمة دخلت وهيا توقف عليا هناء قالت ليا يلاه بغيت نمشي لجامعة قلت ليها سمحيلي دبا أنا وليت خدام مع باك غيجيبليك شي واخد أخر يمكن قالت ليا شنو لا مبغيتش واحد أخر بغيتك نتا وهيا تدخل تبعتها مشينا لعندو بقات تتطلب فيه حتى قاليا عرفتي شنو ب4ى توصلها لتما وخلي معاها لحارس جديد ورجع نتا قلت ليه صافي هانية وصلناها خليت خونا تيتسنى فيها عند لباب ورجعت لدارهم قاليا باها سمحلي على هاد صداع قلت ليه خدمتنا هادي قاليا شوف بغيتك تولي مسؤل على هاد لقصر قلت ليه كيفاش قاليا خاص خدامة نتا تجيبهم و تعرف كاع لأعمال ديالنا وتعاوني فتسير قلت ليه صافي نخدم بركنا فلبيرو ديالو وبدا تيوريني داكشي لي عندهم وانا تنكتب ف تيلي باش ميتنساوش ليا وهيا ناري عندهم فهاد لبلاد من أكبر حاجة لأصغر حاجة قاليا عقل على هادشي مزياان خاصك تولي تدور عليهم كل صباح باش تشوف كيف غادا لخدمة قلت ليه صافي وهو يقوليا يلاه دبا خاصك تمشي قلت ليه أوكي وخرجت بديت تندخل بشركة بشركة حانوة بحانوت شي 7 سوايع وانا تنضور حتال لعشيا غادي راجع لقصر نقوليه بلي كلشي مزيان وعيطت على شيماء قلت ليها باش نخرجو ليلة قالت ليا صافي دبا تلقاني واجدة كيف قطعات هيا عيطات عليا هناء بنت خونا ؟؟

عيطات عليا هناء جاوبتها سلام مالك قالت ليا عتقني وضفاك مالك قالت ليا راه وقفو علينا شي وحدين و قتلو شيفور و داك لحارس قلت ليها فين نتي قالت ليا راه داوني لواحد دار قديييمة معرفتش فين دبا و سادا لباب عليا غادي يدخلو دبا قلت ليها طلي من شي شرجم وقولي ليا كاع داكشي لي تيباليك يقدر يعاونا قالت ليا صبر قالت ليا على شي بلاكة ديال تصالات لمغرب كبيرة يلاه تيركبو فيها و حداها غير لغابة وهيا تغوت وتقطع لخط مشيت بزربا لدارهم لقيت باها تيتسنى عند لباب قلت ليه فخبارك ... قاليا أه عيطو عليا دبا شي وحدين قالك عندنا هناء و زوج مليار قلت ليه شوف متخافش عليها راه بعقلها وغادي تعرف كيفاش غادي تخرج راسها قاليا محمد نعطيك ديك زوج مليار ديها ليهم راه والو قدام حياة بنتي قلت ليه واش حمق راه غادي يولفوها فك كل نهار يخطفو واحد من ولادك قاليا شنو لمعمول قلت ليه يلاه نمشيو لإدارة ديال شركة تصالات قاليا علاش قلت ليه ويلاه وغادي تفهم مشينا دخلنا عند خونا لمدير قالينا شنو محتاجين جبدت تيلي وقلت ليه شوفلي أخر نمرة عيطاتلي فين قالي سمحلي ميمكنش غادي تسد شركة قانون دولي تيمنع هادشي عييينا معاه مبغاش وانا نتفكر ديك لبلاكة لي قالت ليا شافتهم تيركبوها قلت ليه بلاتي واش تتركبو بلاكات ف كازا حدا شي غابة قاليا ليوم تيقادو وحدا ف طماريس و لغابة د بوسكورة قلت ليه إوا عطينا لبلاصة بضبط نعتها لينا باها مشى لدار يجمع رجال ديالو و انا مشيت نشوف لبلاصة واش لغابة لولا ولا تانية ونعيط نقوليه إنا وحدا وقفت تما حدا لي فبوسكورة تيبانو ليا زوج رجال واقفين تيلعبو كارطة قدام لباب خشيت يدي تحت لكرسي لقيت ل كاطانا مجبد ميترو و 20 سنتيم صافي قررت ندخل نزلت تميت غادي عندهم خوتنا شافوني قاليا شنو تدير هنا مكملش كلامو حيث شاف سيف يلاه غيجبد سيف بغيت نخلعو نجرحو فيدو ولا شي لعبة نضربو كيف دوزت سيف تتباليا يدو محطوطة فالأرض وهو واقف ناري قطعتها باليا دم وهو تيغوت سخفت فلبلاصة ههههه طحت حدا ديك ليد معقلتش على راسي حتى لقيت راسي مربوط فكرسي حدا هناء ...

شفت فيها قالت ليا جيتي على قبلي قلت ليها أه قالت ليا وكيفاش شدوك مجاتش نقوليها راه سخفت قلت ليها تحاماو عليا شي 4 ولى 40 قالت ليا و دبا كيفاش غادي نخرجو من هنا وهو يدخل واحد خونا هاز تيليفون قاليا مبغيتش نقتلك دبا صبر حتى يرجعو لخويا صغير يدو وغادي يقتلك بيديه جبد تيلي و عيط على باها حدانا قاليه جيب ديك زوج مليار غدا ولا بنتك وداك ميخي لي صيفطتي غادي يوصلوك صوصيط ناري شداني لهادشي قالت ليا شيماء غير لبارح ريح غادي تولي مدخل راسك فشي صداع جديد ومسمعتش كلامها قطع ليه وخرج بقينا بزوج انا وهناء قالت ليا محمد شوف را هو داك سيف لي عطاك بابا إلى قديتي توصل ليه تميت غادي تنزحف بالكرسي و أنا نضربها بواحد مولاتي طيحة على وجهي وبقيت تنحبو وفهاد لحضات ديال تكرفيص وتبهديل تنسمع لبرهوشة تتضحك وانا نضور وجهي عندها بزز "من نيتك تتضحكي أبنت ناس" بقيت تندابز حتى وصلت ليه غير حطيت فوقو لقنبة وهيا تقطع هاد زبل ماااضي حليت راسي حليت لبنت بغيت نحل لباب لقيتهم مسورتينو تيباليا غير شرجم طليت لقيتو عالي شويا انا هانية نقز ولكين لبنت لا ضورتها فدماغي مزيااان قلت ليها شوفي وسمعي مزياااان هادشي ديريه بالحرف غادي نهرس ليك لباب نتي غتكوني مخبية فلماريو وغادي نخرج من شرجم ملي تسمعيهم خرجو وتابعيني هربي نتي دخلي لغابة وبقاي غادا قريبة لطريق باش متوضريش توصلي لشي بلاصة تلقاي لي يعاونك عيطي لباك يجي قالت ليا صافي ونتا أنا قلت ليها لمهم دبا لمهم نتي و إلا وقعات ليا شي حاجة قولي لشيماء تنبغيها وتسمح ليا قالت ليا صافي وسمح ليا قلت ليها ماشي دنبك هدا يلاه تخباي تخبات حليت شرجم ومشيت تنضرب فلباب بسيف حتى تهرس سمعتهم جاين طالعين خليتهم حتى وصلو وتلاحيت من شرجم تيحسابلهم واش هارب انا ولبنت شي تلاح من ورايا شي نزل تيجري تابعني دخلت لغابة غي تنجري معارفش فين غادي تنضور تيبانو ليا قراب لمشكل نخاف غير نوقف نضرب شي واحد نولي فارشها تاني داكشي تيبان ساهل فالأفلام بقيت تنجري حتى وصلت لبحر قدامي ناري شنو غندير غنجري رملة ناشفة غادي تعيني فلبلاصة عندي تاريخ أسود مع تكفاث خخخخ وانا ندخل لما دخلت شويا حتى بقى غير راسي خارج ومع ضلام متيبان والو خوتنا مرضو مفهمو والو معرفونيش فين مشيت ...

بانو ليا راجعين وانا نخرج من لما مع زربا وسيف تقيل ومتيباليا والو ضربت رجلي حسيت بيها خرجت وأنا نلحق عليهم دخلت لغابة تابعهم حتى وصلو لدار سمعتهم تيغوتو وصداع عرفتها هربات تيجعو داكشي ديالهم باش يخرجو يقلبو عليها خفتهم غي يلقاوها و يتضرب هادشي لي درت كامل فزيرو بان ليا غير لكابل لي مدوز ضو لديك دار مشيت ليه نزلتو ب واحد لعود حيث كنت سارد تقطع ضو مشيت تنجري عند لباب لي تيخرج تنضربو سيف حلاوتو متيديرش صوت ضربة وحدا لول تاني ثالت صافي بزربا طلعت ضو دخلت لدار صافي سالينا صداع دخلت عيطت على بات لبنت قلت ليه انا محمد قاليا فينك هناء راه رجعات قلت ليه أه انا لي خرجتها أجي لدار لي فلطماريس راني مضروب فرجلي بزز واقف تنتسنى فيك قاليا نص ساعة تلقانا عندك بقيت بارك فوق واحد لكرسي وتنفكر ماشي حياتي هادي هادشي كامل ماشي ديالي بغيت نبرك حدا مي وبا ومرتي ونعيش باشما جاب لله وهو يدخل داك خونا لي قطعت ليه يدو هو وزوج أخرين و واحد لبنت مع شافو خوتهم مضروبين فلباب بداو تيغوتو هوما عشران يمكن كاملين دخلو لقاوني بارك فوق لكرسي قاليهم خونا لي ضربني صافي وليت قلت فبالي هادي هيا لأخيرة ليا داك تشيطين كامل ديالي غادي يخرجوه مني هادو دبا دموع محطوطين على رموش لحgرة لحgرة حتى تيبالي بات لبنت و رجالو وصلو خوتنا شافوهم دخلو لغابة وبقاو تابعينهم رجالو وهو دخل قاليا على سلامتك نوض نمشيو بزربا ركبنا فطوموبيل مشينا لصبيطار وقفنا تما دخلني قلت ليه عيط على لواليد و لواليدة و شيماء دبا قاليا صافي غفلوني عطاوني واحد لبرى معقلت على والو تيباليا غي ضلام حتى فيقاتني شيماء نوض حليت عينيا ومتنحسش بيديا ورجليا قالت ليا محمد متخافش هادشي كان مكتاب بحال زوج رجلين بحال رجل وحدا وحنا معاك وضفاك رجل قطعولي رجلي ؟ بديت تنغوت وتنحيد فداك صيروم وتنشير بداكشي لي حدايا وهيا تدخل لواليدة مالك م مالك علاش قطعتو ليا رجلي بلاما تسولوني قالت ليا بسم لله عليك أوليدي ها رجليك بزوج غي ديك ضربة وخيطوها وصافي دبا لبنج مغتحس بوالو دبا وأنا نشوف هناء و شيماء واقفين وتيتقطرو بضحك أنا لي منسواش واخد حمقة شفت فلواليدة قلت ليها خلينا بوحدنا واحد 5 دقايق وهيا تخرج وخرجات كلشي بقينا بزوج قلت ليها هاداك أخر نهار فلخدمة قالت ليا مزيان تعاوني قلت ليها ف دار لا متحلميش قالت ليا لا فتربية ولدنا وضفاك حاملة قالت ليا أه كنت باغا نقولها ليك لبارح ومجيتيش قلت ليها صافي مبقيتش غادي نخدم معاهم قالت ليا صافي راه هناء وباها قدام لباب إلا بغيتي تقولها ليه قلت ليها قوليلو يدخل خرجات هيا دخل هو وبنتو جاب كرسي وبرك حدايا ...

بركو حدايا قاليا شويا قلت ليه لحمد لله بغيت نقولك شي حاجة قاليا دوي قلت ليه صراحة مبقيتش غادي نخدم هادشي ماشي ديالي و عندي مرى و قريب نولي أب غادي تقلبو على واحد من غيري غيا ميطلب فيا قلت ليه غير سمح ليا منقدرش قاليا صافي على خاطرك لمهم عمري نساليك خيرك بنتي معايا ليوم بسبابك وهو يجبد شيك فيه مليار وضفاك علاش قاليا كنت غادي نعطيهم 2 مليار نتا تستاهل نصها ربحو بزوج حتى أنا غادي نولي بطالي غادي نحتاج ديك لفلوس خديتها وقف و قاليا نمرتي راه عندك تحتاجني فأي حاجة عيط عليا قلت يه لله يحفظك تما غادي خارج بنتو هناء بقات واقفة قالت ليه صبر شويا و غنجي بقينا بزوج قالت ليا شكرا قلت ليها عادي خدمتي هادي قالت ليا إوا متنسانيش مبقيتيش خدام معانا ولكين وليتي عزيز علينا متغبرش قلت ليها صافي خرجات صافي كلشي سالا بحاد لقطة لأخيرة سالينا كلشي دخلات شيماء بقينا باركين حتى جا طبيب قاليا بلي نقدر نخرج لبسوني حوايجي مشينا لدار رجعنا لحيات ديالنا لعادية واحد لمدة ممسينا والو من ديك لفلوس لي عندنا حتى فكرنا مزيااااان خلينا لأغلبية ديالها لمستقبل حيث متعرف شنو يقدر يوقع خدينا شويا د لفلوس درنا واحد ريصطورا صغيرة بقينا مقابلينها بزوج شويا مبقيناش قادين نسيروها بوحدنا ودخلنا معانا شي ناس يعاونونا لمهم راحة حيات بعيدة على المشاكل وصداع هادشي علاش كنت تنقلب ديما تنمشي عند هناء وباها لدارهم ولاو بحال عائلتنا تانية دازت ديك 9 شهر طيااارة تزادت عندي بنت باقي عندي سيف ههههه فينما تنشوفو تنتفكر داك خونا لي قطعت ليه يدو تنطلع فوق دار وتنبقى نتريني بيه بس غير باش نتصور على تيتيز لي عند جيران ولكين ملي عاقت بيا شيماء باعتو لواحد مول لافيراي كنا غادي نوصلو فيها لطلاق درت غير على وجه بنتنا وصافي خخخخ باعت سيف تيدير 60 مليون غيكون مجابش ليها حتى 3 دراهم صحيحة ، لمهم إلا كانت مكتابة ليك شي حاجة ولى شي إنسان راه مكتابة ليك متسناش ديك لحاجة تجي لعندك خدم نتا ودير مجهودك باش توصل ليها (إدا أردت شيئا فقاتل لأجله) أحححح نصلاح دكتور نفسي ههههه

النهاية