طباخة الرئيس الجزء 11

من تأليف سناء الصنهاجي
2018

محتوى القصة

رواية طباخة الرئيس

شيماء:لا اخالتي مكاين لا عداب لا والو 
خالتي:ياكما بغيتي شيحاجة 
شيماء:لا اخالتي ربي يخليك خلاتني فالبيت وهبطات وسدات البيت بقيت كاندور فبيت عصام وكانشوف فتصاورو كيف كان وكيف ولا تصاورو مع باه وضحيكة لي على وجهو لي كتحمق خفت يجي ويحصلني هزيت البلاطو وهبطت عندهوم كان عصام كايفطر حس بالمشي فدروج طلع راسو كاتبان ليه شيماء نازلة شافها وحدر راسو عصام قرر انو يتصرف معاها بيبرودة بينما سالا هاد الاتفاق وطل واحد يمشي فطريق وحبو ليها يبقا مخبي نزلات شيماء
شيماء:صباح الخير عليكم
خالتي تورية:صباح نور بنتي كيصبحتي علاش هبطتي خليك حتى ترتاحي
شيماء:لا اماما صبحت الحمدلله وبغيت نفطر معاكم مكايعجبنيش نفطر بوحدي
خالتي:ياه ابنتي مرحبا بيك.حطيت الفطور لي كان فالبلاطو حدايا وكلست حدا خالتي وانا كانشوف فغصام لي كاياكل وعاقد حجبانو مالو هدا تاني كان فحال وصدق فحال بديت كانفطر ونضحك مع خالتي كانطلع عيني كانلقا عصام حاضيني بعينيه بشوفات فشكل كايشوفني كانشوف فيه وكايحدر راسو هاز حاجب ومهبط حاجب صراحة تصرف ديارو معايا لبارح كبرو فعيني وكتاشفت فيه جانب ديال المسؤولية والحنان كنت حاسة بيه لبارح انو معايا وحسيت بيه فاش سهر جنبي وماخلانيش وحاد الجانب انساني جميل فيه كون شي واحد فبلاصتو كون ستاغل الفرصة اني مريضة وحنى بجوج فبيت واحد ولكن عصام لا عصام راجل ونص بكل ما كتحمل كلمة الرجولة من معنى تصر ديالو معايا كبرو فعيني وزاد حوبي ليه ههه كيفاش شنو كنخربق انا كيفاش حبي ليه لا ميمكنش لا شوف اعقلي راه بديتي كاتخرف عقلي كايرد علي انا ماهضرتش شوفي داك القلب ديالك لي فيه الفزة وبغا واحد ماغاديش تكوني ليه نسيتي شنو كايفكر فيك شنو حاسبك واش نسيتي راسك انتي شنو بنسبة ليه نسيتي حاسبك وحدة طماعة باغية غير الفلوس وتوصلي الفوق وانك عندك تجارب فالحياة ويقدر يكون حاسبك ماشي بنت فيقي من الgلبة ماشي غير درتو هدنة وخرجتو وضحكتو ودوزتو وقت زوين ودار فيك هاد الخير ورد ليك البال وانتي مريضة راه كايعني شيحاجة اه اه بصح اعقلي هادشي لي كانحس بيه خاسني ندفنو ويبقا هنا وحتا مخلوق على وجه الارض يعرف بهادشي لي كانحس بيه لا عصام عمرو ايعرف بهادشي لي كانحس بيه نيهائيا.
خالتي:بنتي شيماء فين سهيتي ماكليتي والو
شيماء:لا ماما هانا كاناكول.شاف فيها عصام مسح قمو
عصام:انا انطلع نبدل حوايجي بينما ساليتي فطورك باش نوصلك
شيماء:واخا.كملت فطوري انا وخالتي تورية
خالتي:عندك شي خبار على بدر قربت حداها
شيماء:لي فهباﻻي وكاتلي مليكة انهم خداو الحوايج ونص فدهاز ودابا بنسبة للعقد مزال ماعرفت حتى نمشي لدار نسوني ليها نشوف
شيماء:ايوا الله يكمل ليهم بالخير
شيماء:امين.شكون هادو لي الله يكمل ليهم بالخير ضرنا بجوج كانشوفو فعصام انا ماعرفتش شنو نكول خالتي حتى هي
شيماء:كانهضر ليها غير على اشراق ونزار كتليها يقدر يكون شيحاجة بيناتهم
عصام:ممم الى ساليتي نمشيو
شيماء:اه ساليت نضت مسحت ايديا ونضت سلمت على خالتي من وجها وبست ليها راسها
خالتي تورية:تهلاي فراسك ابنتي وزورينا نكلسو تاني شي كلسة وسلمي على ماما
شيماء:مرحبا بسلامك اماما وتهلاي فراسك حتى انتي هزيتي ساكي وتبعت عصام من اللور دخل لطوموبيل حليت الباب ودرت الحزام وديمارا العجب ماسولني كيبقيت ما والو وعلاش انتعجب اصلا شيماء دار معاك مزيان مايمشيش تفكيرك بعيد غادي وهو ساكت ماهضرش معايا وانا كنشوف من زاج الوقت لي شيماء كاتشوف فزاج عصام كايشوف فيها من الداخل ديالو ماكرهش لوكان يشدها ويخبعها عندو ومايتفارقش معاها لحظة وحدة ولكن هادا هو القرار صح رجع لسوكان حتى وصلها لباب دار

شيماء:شكرا 
عصام:علاياش شكرا
شيماء:على كلشي لي درتي معايا
عصام:العفو اي واحد فبلاصتي ممكن يدير هكاك المهم انك دابا كاتحسي مزيان
شيماء:اه الحمدلله
عصام: وبلاما تجي اليوم للخدمة حتى لغدا ان شاءالله
شيماء:ولكن انا كانحس مزيان دابا 
عصام:شيماء راني هضرت بلاما تجي اليوم كلسي رتاحي 
شيماء:واخا لي بغيتي بقا كايشوف قدامو كايتسناني نهبط هبطت غير سديت الباب وديمارا خلا غير الغبرا وراه فتحت الباب ودخلت
ماما:على سلامتك ابنتي 
شيماء:الله يسلمك اماما 
ماما:مالكي لونك مخطوف
شيماء:واقيلة الماكلة ديال البارح ضراتني فمعدتي داكشي باش مغاديش نمشي اليوم
ماما:واخا ابنتي سيري طلعي رتاحي فبيتك انجيب ليك شوية طيال اللويزة تشربيها راها مزيانة.طلعت لبيتي بدلت دخلت اندوش من سخانة والعرق خرجت لبست حوايجي وصليت دخلات ماما جابت لي كاس ديال اللويزة حطات لي 
ماما:كيداز البارح
شيماء:داز زوين من بعد مع مشا الحال شداتني هدى نبات عندها 
ماما:ايوا رتاحي عنداك تشدي داك المشقوف تاني
شيماء:واخا اماما هههه خرجات وخلاتني شربت ديك اللويزة وتكيت فبلاصتي حتى صونا لي تيليفون كانت اشراق
شيماء:صباح النور حابوبتي اشراق مستغربة ادا شيماء مافراسها والو صراحة ندمات نن لي دارت هي غير كاتبغيها وبغاتها تكون فرحانة
اشراق:حبيبة كي بقيتي شوية
شيماء:الحمد لله بيخير كيداظ لبارح شنو درتو منين مشيت
اشراق:والو خليت هدى وعمران او وصلني نزار
شيماء:ممم صراحة ا اشراق وماتقلقيش مني الله جابليك انسان ضريف حتى ليديك وانتي معفرا عليه شوية البنت بدات كاتبكي
شيماء:اويلي مالكي ياك لباس 
اشراق:داكشي لاش عيط عليك البارح من بعد ما وصلني لدار صارحني باش كايحس وكالي انو باغيني بصح وبلا تفلية وانو بقا ليه 4 ايام ويرجع واني نجاوبو بياه ولا لا 
شيماء: ايوا وشنو جاوبتيه انتي
اشراق:غوت عليه وعايرتو وكتليه ينساني وعمرو يفكر فيا ولا يحوم جيهتي وهو واعدني عمرو يفرب جيهتي ولا يصوني لي ولا نشوف وجهو
شيماء:اويلي اويلي انتي ديما هكا وكانصحك ولكن هدا راه ضريف ومعقول وباغيك من نهار الاول كون شيواحد تاني كون تفلا عليك وخيط بيك زناقي ومشا بحالو ضيعتيه بين ايديك ودابا لاش كاتبكي ياك داكشي لي بغيتيه دارو شنو كاين
إشراق:وصافي عفاك ماتزيديش علي انا ماحسيتش بليد ت كان مالف يسوني كول دقيقة دابا لا والو لا تيليفون لا ميساج وانا حسيت بشيحاجة فقلبي داراني ومخنوقة والفت تبرزيط ديالو دابا شي حاجة كاضرني فقلبي ومن صباح عاطياها غير البكا
شيماء:هههه صافي طحتي طيحة خايبة احبيبتي حتى فات الفوت دابا
اشراق:واش انا معيطا ليك تنصحيني ولا تزيدي على ما بيا
شيماء:ايوا سوني ليه انتي ولا سيري عندو
اشراق:انتي عارفاني كيدايرة 
شيماء:ولاش معيطا لي ومصدعة لي راسي هادشي لي ايخرج عليك
اشراق:خفتو لا يدور فيا
شيماء:مايدور فيك والو غير توكلي الى كايبغيك مغاديش يدور فيك
اشراق:متاكدة
شيماء:اه متاكدة وايلاه خليني نرتاح وباش ماكان كولي لي
اشراق:واخا حوبي يخليك ليلي تهلاي فراسك وقطعات حمقة هاد البنت خديت تيليفوني وركبت نمرت بدر بقا شحال كايسوني عادا جاوبني
بدر:اهلا تهلا زارتنا البراكة من نهار دفنوه مازاروه
شيماء:وانت ماعندكومش السلام فقبيلتكم
بدر:ههه باز والهضور جميلك كيدايرة انتي امورك مزيانة كيغادية مع عصام
شيماء:الحمدلله امور غادية مزيان هاد ساعة وانت فين وصلتي
بدر:قريب هادشي يسالي كوني هانية كونماشي انتي مانوصلش لهادشي انا دفعت على حساب شي وراق ان شاء كانتساناهوم يصيفطولي واحد الورقة اندفعها مع لوراق باش ندير العقد ان شاء الله
شيماء:ان شاء الله والله الى فرحت ليك واخيرا قريب توصل وتحقق لي بغيتي
بدر:هادشي ماشي غير انا وبيدي كونما شي انتي مايكون هادشي اناس كايكولو الصداقة مابقاتش ولكن انتي خير متال ودليل انا صداقة الحمد لله مزال كاينة لهلا يخطيك علي اختي
شيماء:صافي الهبيل اتبكيني مابيناتناش كلمة الشكر انت تهلا لي غير فمليكة وفراسك وتكون فرحان هداك هو الربح عندي
بدر:لهلا يخطيك انا كانزرب فالوراق عندي جوج اهداف اني نكون مع الانسانة ليكانبغي وانتي باش نحررك من العقد لي مضيتي ونحررك من عصام ولد عمي شيماء منين كال هاد الهضرة بحال الى تغرز موس فقلبها
بدر:هيهو كاتسمعيني
شيماء:اه اه كنسمعك ان شاء الله يكون خير يلاه خليني نرتاح وسير صدع خطيبتك ههه
بدر:كتجري علي بالفن واخا الالة هاهو غتدي تهلاي فراسك احبيبت خوها وهو يقطع شديت تيليفون وحطيتو حدايا وانا ساهية اش داني نقبل شي اتفاق ولكن هادي كولو درتو على قبل خويا وصديقي ماشي مشكيل ولكن كان بامكاني نبعد على عصام علاش قتارحت ديك الهدنة انا في الفزة كانطير كون سكت وبقينا مدابزين حسن من هاد الهدنة لي قرباتني ليه وعرفاتني بيه عن قريب يا ربي كنطلبك دير لي تاويل ديال الخير وتكون مخبي لي الخير عييت بتفكير خاصني نسا ونبدل اه خاصني نبين ليه انو ماتبدل والو وانو مزال حنا اصدقاء كيف كنا وعادي اه اه هادشي لي خاص يكون.عند عصام من بعد ما وصل شيماء ورجع الخدمة دخل ماسلم على حتا واحد مشا نيشان لبيرو عيط على سوكريتير باش تكول لشاف رشيدة انو شيماء مريضة وماجايا بقا كالس فالبيرو ناض لجيهت شرجم وكايفكر فلي دار شنو درت انا شنو درت علاش تصرفت هكاك معصب وجهو حمر مالقا قدامو غير واحد الفاز ضرب بيه حتا تشتت وتسمع دخلات سوكريتير مخلوعة كاتسول فيه (سي عصام شنو واقع)
عصام:واش عيط عليك خرجي برا مابغيتش نشوف حتى واحد ومادخلي عندي حتى واحد مفهوم مازادتش كلمة مسكينة خرجات بزربة وسدات الباب مشا ورا البيرو ديالو كلس وكايفكر تصرف تصرف خايب مكانش خاصو يتصر مع حبيبتو هكا كان عليه يتقرب منها ويدوز معاها احسن الاوقات راه ما بقاش غير سيمانة ليه معاها وماغاديش يشوفها مزال كايكول هاد الكلام والماس فقلبو عصام قاسح من برا اه ولكن من الداخل ديالو قلب كبير بيض وحنين هادشي لي دار خاصو يصلحو اه اقل حاجة هاد الايام القليلة خاصو يبقى حدا شيماء باسم صداقة فقط حبو ليها ايبقى مخبي ولكن صداقتو ليها هي لي اتخليه جنبها اه هادشي لي خاصو يكون بقا كايفكر وهز تيليفونو.عند شيماء بقوة تفكير غلبها نعاس حتى صونا ليها تيليفون اوووف واش مغاديش نتهنى انا هزات تشوف شكون لقات نمرت عصام ممم يالاه تفش ومسوني بقات شحال مجاوبات حتى قطع باش تحرق ليه اعصابو عاود سونا وبقات معطلة عاد جاوبات
شيماء:الو 
عصام:وي شيماء لباس عليك كيكاتحسي مزيان
شيماء:الحمدلله بيخير
عصام:دازك الحال
شيماء:اه الحمدلله شوية
عصام:كنت كلت الى ممكن
شيماء:وي هضر كانسمعك
عصام:كونت كلت نخرجو انا وياك نتغداو على برا
شيماء:اه يلاه تفشيتي وكبيلا لي كنتي منفخ ومعفر للسما يلاه بردتي
عصام:عارف راسي داير لافوت وغلط معاك ومعاملتكش مزيان سمحيلي ماشي بغرضي كنت مضغوط بشي خدمة ومبرزطاني 
شيماء:ومالقيتيني غير انا تبرد في جنونك
عصام:وا صافي جات فيك انتي صبري ياك انتي رفيقتي وصديقتي مافيها باس تصبري علي
شيماء:ممم صبغني صبغني
عصام:واصافي دابا شنو كلتي 
شيماء:مانقدش مزال عيانة 
عصام:ياك كلتي يلاه دابا انك وليتي بيخير
شيماء:يالاه حسيت براسي عيانة سبحان الله ضرني راسي وبغيت نرتاح
عصام:كاتجري علي ياك الالة واخا مهم اندوز عليك مع 7:30 انتعشاو وماتكوليش لي لا وتبوحطي عليانا علمت وقطع خلاني كي لبلاكة هاد سيد بغا يحمقني اوف اوف.عند عصام يالاه رتاح منين سمع صوتها وفرحان حيت ايشوفها عاد تقاد ليه المجاج نخليو عشاقنا ونمشيو نشوفو العشاق ديالنا تانيين.
نزار:الو رفيق انا حجزت فأول طيارة جايا نبغيك تلقا لي فالمطار 
رفيق:واخا كيدازت الخدمة مزيان صوتك ماشي هو هداك
نزار:لا غير الخدمة والعيا الحمدلله داز كلشي مزيان ماسول فيا حتى واحد 
رفيق:راك عارف شكون سولات فيك ولكن كون هاني ماعطيتهاش فين كاين 
نزار:برافو عليك انا غادي نجي ان شاء الله ونوضع ليها حد مابغيتش تربطني بيها اي علاقة او صداقة هو كايهضر وكايسمع دقان فالباب
نزار:رفيق بقا معايا على الخط تشوف شكون كايدق هاز تيليفون وغادي جيهت الباب حل تفاجئ باشراق قدام عينيه بضفرة ديالها وعويناتها الكبار ونضيضرات وجها البريئ لي سلب ليه عقلو وقلبو بقا ساهي شوية هز تيليفون
نزار:رفيق انا نهضر معاك من بعد باش نكوليك موعد الطيارة 
رفيق:اوكي سينيور قطع معاه وشير لاشراق تدخل وخلى الباب محلول باش ماتفهمش غلط دخلات اشراق وهيا حشمانة وحادرة راسها خصوصا الالم لي كاتحس بيه فقلبها فاش سمعاتو شنو كال انو غادي 
نزار:شنو سر هاد زيارة هادي 
اشراق:الصمت
نزار كايشوف فيها ونطق:اتبقاي ساكتة اولى جايا تكملي لي بديتيه يكما نسيتي شيحاجة ماكلتيهاش وماخرجتيهاش من قلبك غير كولي والفت مانسمع عندك غير المعيور شنو كاتسناي هضري كانسمع وسالي عفاك دغية ماعنديش الوقت لي نضيع تابعاني بزاف خدمة قبل مانمشي هزات فيه اشراق عينيها ليكانو عامرين بدموع مكرهش يعنقها ولكن ضغط على راسو بزز باش يعلمها درس ماتنساهش 
اشراق:انا جيت باش نطلب منك سماحة الى قديتي تسمح لي
نزار:ههه لالة اشراق قدرها كتنازل على عرشها العالي وطلب سماحة العجب صدمتيني.اشراق حسات بشيحاجة فقلبها خصوصا هي عمرها كبرات شان لشي واحد وديما هي لي كاتمرمد الطرف تاني ومكاتحاشيهاش اليوم بدات كواريها طاحو حيت عرفات الحب ديال بصح ولكن فات الفوت اهم حاجة هي تعتارف ليه ويكون لي ايكون
اشراق:انا عارفا راسي غلطت بزاف وماسمعتش ليك وتنفخت عليك وهنتك فكرامتك وجرحتك وهادشي صعيب عليك انك تسامح لي ولكن خاصك تفهمني انا ماعنديش مع العلاقات وبنسبة لي كولشي كايتفلى وكايضحك خصوصا انت فواحد المرتبة يعني البنات عطاهم الله فحياتك داكشي باش ماعطيتشاهمية للموضوع وكلتانك غير كاتضحك هادشي لي خلاني اني نتعامل معاك هكاك ونرفض شنو كايكولي قلبي ونتبع عقلي
نزار:ممم مزيان وشنو لي خلاك تجي اليوم وتكولي لي هادشي
اشراق:حيت حسيت بان حبك صادق لي ومن قلبك راجعت نفسي وعرفت هادشي لي درت غالط وتبعت قلبي وخليت عقلي الكره لي كنت كانهرك كان حب ولكن كنت كانكابر ونعاند ونرفض شنو كايكولي قلبي هادشي عارفاه دابا فات الفوت عليه ومكاين باش ينفع ولكن بغيت قبل ماتمسي انك تعرف بشنو كانحس من جيهتك باش نرتاح ونحيد هاد الحمل علي ونطلب منك سماحة تاني مرة سمحلي بقا كايشوف فيها وفعينيها وهي كاتسنا جوابو 
نزار:كانضن ساليتي هضرتك ياك فهمات راسها وغرغرو عينيها بدموع وقفات هي غادي بخطوات تقيلة وكاتحس بقلبها اينفاجر هي لي دارتها بيديها وبلسانها وفقدات حب حياتها بقات غادية حتى بغات تخرج مع الباب
نزار:واش انا كتليك سيري وقفات وضارت كاتشوف فيه
اشراق:مافهمتش
نزار:مزال عندي ليك واحد سؤال.شيرت ليه براسها زعما تفضل
نزار:من هضرتك لي كانضن انك وافقتي انك تكوني لي وديالي ونصفي تاني ولا غلطت .اشراق مامتيقاش راسها حسات براسها تهزات من بلاصتها وقلبها كايضرب تبسمات واشرقت ابتسامة مضوية وسط دموعها
فتح نزار ايديه ليها بلاما تشعر تلاحت بين ايديه معنفاه وفراحانة
نزار:واخيرا حتى حمقتيني وشيبتيني ماشي حشومة عليك
اشراق:ماشي بيدي سمحلي والله ماقصدت سمحلي وبزاف ماتليتش نعاود
نزار:لا غير عاودي نيت وتشوفي شنو ندير بقاو كايضحكو بجوج
نزار:نهضروشوية بالمعقول انتي عارفاني بعد غدا انمشي وخاصني ضروري نرجع داكشي باش خاصني نجي لداركوم قبل مانمشي 
اشراق:بهاد زربة هادي 
نزار:انا مانمشيش بلاما ندير والو خاصني ضروري نخطبك باش ناخود وراقك معايا ونصايبهم تما ونقادهوم باش منين نرجع نديرو العقد والعرس ان شاء الله ونديك معايا
اشراق:وا زربة خايبة هادي هههه مالك زربان
نزار:وانا مكرهتش نديك من اليوم صراحة ههه
اشراق:باز ههه المهم انا خاصني نمشي ولي درتيها يكون خير ان شاء باش نفاتح ماما فالموضوع 
نزار:هاد المرة انجي بوحدي حيت ضيق الوقت المرا جايا انجيب زالدي وختي ان شاء الله الله يكمل علينا احبيبة ديالي واميرتي
اشراق:حشمات وحدرات راسها وناضت ناض حتى هو عنقها وهو كايشوف فعينيها وباسها فجبهتها
نزار:يالاه انا انوصلك داكشي لي كان خرجو بجوج وركبو فطوموبيل وزادو .نرجعو عند شيماء لي نعسات حتى جات ماماها تفيق فيها
ماما:ابنتي نتي نوضي راك حماضيتي بالنعاس نوضي يضربك البرد شوية خرجي وانتي غطستي فديك ناموسية
شيماء:وا ناري اماما واناري واخليني اغير نرتاح حشومة عليك
ماما:تنوضي ولى نكب على حسك سطل ديال الما نوضي ناضت شيماء شعكاكتها طالعة وفردة دسروال هابطةوحدة طالعة وعينيها مسدودين وكاتشوف فماماها
ماما:ايوا شوفي في نوضي تهزي ناضت شيماء على سعدها غسلات وجها وتوضات وصلات صلاتها عاد هبطات التحت دير كاسكروط يالاه تحطات سمعات دقان فالباب مشات ماماها تحل الباب حتى هاهي داخلة اشراق كي العجاجة شفت فيها وشديت راسي
شيماء:مسينا على الله يا ربي سلامة جايا كي تسونامي ياك لباس واش كاتحلمي بي وماتخليوش الواحد يخشي فوجهو 
اشراق:خالتي شوفي بنتك اخالتي شفتيها انا لي هبيلة جايا عندك
شيماء:ابلاما ديري لي فيها مضلومة راني عارفاك كولي شنو بغيتي وسيري لخربتكم اشكاين عاراك مايجي منك المصايب وهي تبدا دبل فعينيها
اشراق:كاضلميني والله ناضت ماما للكوزيينة وخلاتنا انا وياه انا كانخشي فوجهي وكاناكول
شيماء:مغاديش تهضري خلاص
اشراق:واخا انتي ماتسوايش انكوليك تصالحت انا ونزار
شيماء:اواه على سلامتي وكيدرتي ليهها
اشراق:درت ليكلتيلي وهضرت معاه المهم ماشي هادشي لي مهم هو سيد زربان وغدا بغا يجي لدارنا يخطبني قبل مايمشي شيماء خرجو عينيها شوية وتوحل ليها
شيماء:واش انتي اشراق نيت ولا كانتخيل انتي وافقتي على زواج منو انتي العجب
اشراق:مال حسك مانستاهلش ولا شنو وشنو بغيتي نكوليه لا.بقات كاتشوف فيها شيماء بواحد العين وهي تهبط راسها
شيماء:هاي هاي على شنيولة طحتي طيحة خايبة شكون كال انتي ديري هكا
اشراق:براكة سري انا جايا عندك نعاود ليك وهي توقف جبدتها من ايدها لسداري
شيماء:كلسي راه غير كانضحكو مالكي وشنو المعمول دابا
اشراق:بغيتك تعاونيني غدا عفاك فتوجاد الحلوة اناخدها من باتيسري حيت ايجي هو بوحديتو ايكون كولشي خفيف ضريف بغيتك ديري لي مكياج خفيف
شيماء:شحال تعطيني بقات كاتشوف فيا بنضرات شريرة
شيماء:اكانضحك مع حوبي شحال عندي منك الما وقفت جنبك شكون ايوقف ونا نوض عنقتها وكانبوس فيها وانا نضربها بواحد تزغريتة حتى خرجات ماما 
ماما:شكون تزوج
شيماء:اشراق اماما عندها الخطبة غدا ان شاء الله
ماما:مبروك ابنتي الله يكمل ليك بالخير يا ربي وعنقات اشراق
اشراق:امين اخالتي لهلا يخطيك .المهم انا مشيت غدا اجي عندي واخا 
شيماء:ان شاء الله

انحاول نخرج بكري ونجي عندك كوني هانية احبيبتي الحمدلله انتهنا منك ومن تبرويطك
اشراق:ياك الكانيشة واخا انا كاع ماتهناي مني ابلاتي
شيماء:هه راني عارفة لاسقة معايا كي جدر يالاه سيري لخيمتكوم مشات اشراق صراحة فرحت ليها بزاف الحمدلله ساليت كاسكروط جمعت دوك الماعن وغسلتهم
شيماء:ماما انا انخرج نتعشى على برا ايجي عصام يديني
ماما:ايوا ماتعطليش ابنتي راكي عارفة انتوما يلاه مخطوبين
شيماء:اه اماما عارفة غير هو عرفني مريضة وكال يخرجني 
ماما:واخا ابنتي الله يسهل عليك ويكمليكم بالخير طلعت لبيتي نشوف شنو انلبس حليت ماريويا وانا كانفصل ونخيط بوحدي حتى طاحت عيني على لبسة قررت اليوم نكون بسيطة وناعمة جبدت صايا طويلة ازرق سموي وزيف فنفس اللون شوميز بيضة وفوقة فيست شبكة فلغوز بارد وساك بيض حطيتهم بدلت حوايجي قاديت وجهي خط كحل خفيف الوصط قلم بلو سييل وكلوس غوز بارد وريحة لريحة الياسمين ماجيت فين نكمل حتى سونا حتى كانسمع ماما كاتهضر مع شي واحد جيت نسمع ميزت صوت عصام هبطت لقيتو شاد الجماعة مع ماما غير شافني وقف وكايشوف فيا مبسم جا عندي
عصام:شيماء كيبقيتي شوية 
شيماء:لا الحمدلله شوية 
عصام:نمشيو 
شيماء:اه واخا يالاه.ماما حاحنا مشينا خرجات ماما من كوزينة
ماما:واخا ابنتي تهلاو فبعضياتكوم (الله يهديك اماما واش غادين نحاربو) عصام:كوني هانية اخالتي شيماء فعيني وشاف فيا خرجت سبقتو وتبعني دايرة فيها مزال منفخة جاي يحلي الباب وانا نسبقو حليتها ودخلت لقا واقف كايشوف فيا ومشا جيهت الباب حلو ودخل ديمارا وحنى غادين وخدم الموسيقى (يالي عزيتي فينا تاخود بيديك ورقة وقلام واداك الغافل) انا عرفتو مخدمها كايمعني علي وحابسة ضحكة كامدور كانلقاه كايدير لي حركات بهلاونية بحجبانو ماقديتش نصبر تكرشخت بضحك
عصام: الحمدلله منين ضحكتي مالنا على هاد تغوبيشة ازين
شيماء:ههه باز صبغني صبغني اغير حشمت ومنا
عصام:ومنا شنو هاضري بدا يطوال ليك لسان منين اتبداي تعايري عرفتك بريتي صافي
شيماء:بسملاه علي كيما شفتيني تخليني
عصام:واناري وكاتقادايش الله يحفظ
شيماء:ماعليناش فين اتدينا وشنو اتعشينا راه في جوع شاف فيها بعين وحدة
عصام:واش مكاتعيايش من الماكلة شي نهار تاكليني
شيماء:لا كايعجبني لحم يكون حلو ومعسل انت لحمك باسل وقاسح خاصني 10سوايع باش يطيب كترت العطور وشوف وشوف واش يطيب عصام بقا حابسة وهو ينفاجر بضحك حتى ساحو عينيه 
عصام:وانا واشتي انتي والله حتى عالم جديد يناديكم ماعرفتش منين كاتجيبي هاد الهضرة هادي 
شيماء شيرات ليها لراسها:من هنا وادابا باراكة من الهضرة وكولي فين اتدينا 
عصام:مالكي زربانة على رزقك دابا تشوفي كولشي غير سكتي سايك وكايشوف فيها ومبسم وكايدوز ايدو فشعرو وساهي فطريق وحبيبتو لي حداه وفجنبو لي طالعة كي الاميرات ومايقدش يلمسها ولا حتى يبوسها باسم صداقة ولا غادي يخسر كولشي الى مشا حتى ضمها يقدر مايتحكمش براسو ركز فالطريق حتى وصلو لواحد ريستو جات فوسط طبيعة صغير وزوين بزاف هبط هو الاول مشا بزربة حليها الباب وشاد ليخا ايديها وهوما داخلين مع دخلة كاينا طريق مبنية بالحجر وحداها شميعات واحد الجو رائع بزاف المطعم سميتو مطعم السعادة دخلو الداخل كانو كالسين لي كوبل لي مزوجين والمخطوبين جو عائلي محبب ودافئ بزاف حتى جا واحد الراجل كبير فالعمر عندهم
الراجل:مرحبا مرحبا بولدي عصام توحشناك غيبة طويلة هادي جا فاتح ايديه وعنقو عصام
عصام:حتى انا توحشتكم بزاف اعمي نجيب كبرتي وشبتي هههه
نجيب:ضروري اولدي فرحت بزاف منين عيطي وكلتي انك جاي شاف فشيماء شكون هاد الاميرة زوينة ماحس بواحد القرصة حتى جاتو ليدو دارت شيماء كاتلقى مرا تكون عندها ديك 50سنة رقيقة دايرا نضاضر ديال شوف وزيف وحالتها زوينة والبشاشة على وجها واحد البريق فعينيها 
المرا:ماحشمتيش كاتغازل فيها قدامي بلا حشمة بلا عاراض بدا نديب كايضحك وعنقها بيديه وجبدها ناحيت سدرو
نجيب:المغيارة ديالي انتي كولشي وانتي لي مضوية حياتي وانا بلا بيك والو من المستحيل تكوني ونشوف فاي وحدة تانية شافت فيه وعينيها كايبريو ومبسمة بالضحك شافت جيهت عصام وهي تجبد ليه ودنيه
المرا:وانت المشاغب شحال هدا ماشفناك ولا صافي نسيتيني عنقها عصام
عصام:من المستحيل انسى حبيبت قلبي خالتي خديجة
نجيب:احم احم انا بديت نغير وبداو كايضحكو انا وليت زي الاطرش في زفة مافهمت والو 
خديجة:شكون هاد البنت زوينة لي معاك
عصام:هادي انسة شيماء خدامة معايا وفنفس الوقت صديقة ديالي ودار عند شيماء.هادا عمي نجيب ومراتو خالتي خديجة كنا كانعرفوهوم من بكري وكنت عزيز عندهوم 
شيماء:مشرفين وهي مبسة
خديجة:مرحبا بيك ابنتي فمطعم ديالنا المتواضع كلسو شوية ويجي عندكوم سرباي يشوفكوم شنو بغيتو دارت عند عصام .وانت حسابي معاك هو الاخر ابو راس جرات راجلها هوما غادين معانقين ويضحكو كلسنا انا وعصام
خديجة:زعما يكونو بصح اصدقاء
نجيب:هادشي لي بان لي
خديجة:انت شرفتي ونسيتي نضرات العشاق كيدايرة ميا فالميا عصام طايبغيها شوف غير منين كان كايعرفها علينا عينيه كايبريو بحالك نهار عتارفتي لي بحبك لي ههه ولا نسيتي
نجيب:عمرني نسا هداك النهار ولكن عصام كانعرفو مزيان عنيد وراسو قاسح يقدر كايبغيها ومابغاش يكولها ليها 
خديجة:كنتمناو يكون مطعم ديالنا لي تخلق فيه حبنا فال زوين عليهم بجوج 
نجيب:امين.عند عصام وشيماء
عصام:كيجاك المطعم؟ 
شيماء:زوين بزاف عجبني وحتى ماليه ضريفين وباينين كايبغيوك بزاف
عصام:اه حتى انا كانبغيهوم بزاف هاد المطعم هو بداية حبهم وطريقهم منين كانو صغار بغاو بعضياتهم ولكن وليديهم مكانوش بايغين دارو ايد بيد وهربو شحال عناو حدمات هي وخدم هو فاشما كان حتى جمعو شوية بشوية وخدمو فهاد المطعم عند واحد شيباني وكانو كايجمعو قرر راجل يبيع المطعم ويهاجر وشراوه من عندو وهنا بدات طريقهم ومشوارهوم ورزقهوم الله بجوج وليدات مزوجين دابا او والدين
شيماء:واو قصة ديال حب رائعة شكون لي تلقا بحال هكا ويضحي على قبلك مكاينش دابا كولشي مزيف نفاق وكدوب
عصام:علاش كاتكولي هكاك ممكن يكون مزال كاين بحال هاد الحب هدا ويكون حدانا وحتى مشايفينوش ومحاسينش بيه
شيماء:بحالاش متلا جا يهضر قاطعهم سرباي :مرحبا بيكم شنو باغين تاخدو
شيماء:باغيا سوسيط مع شلاضة بلا غوايال فيها كولشي
عصام:حتى انا بحالها مشا سرباي
شيماء:داكشي باش مسمين المطعم السعادة
عصام:اه حيت هنا فين بدات سعادة ديالهوم وكايكولو الالة اي واحد دخل لهاد المطعم كاتكون بداية الحب ديالو من هنا
شيماء:ممم ههه هي دابا انا ممكن نلقى بفارس احلامي هنا وحتى انت ممكن تلقى فارست احلامك هنا ههه
عصام:ههه ممكن كولشي ممكن
شيماء:ايوا نتسناو مرابانا فرسان احلامنا يدخلو من هاد الباب عصام طلع راسو وشاف فيها وفخاطرو كايكول (علاش انشوف فالباب وانا البنت لي كانبغي قدام عيني) ههه ممكن.بقات شيماء كاتشوف فيه وهي مبسمة حتى جاب ليهوم سرباي لي بلا ديالهوم ومشا
عصام:بصحة وراحة
شيماء:الله يعطيك الصحة بداو بالماكلة كانت بنينة بزاف واحد اللدة عمرهوم داقو حيت ماكلة مطيبة ومصاوبة بكل حب كاطلع عينها شيماء فعصام كاتلقاه كايشوف فطبسيلو حيت حس بيها اطلع عبنها وهبط راسو وكاترجع تشةف فطبسيلها وهو كدالك نفس شيء كاتشوف شيماء جنابها كولشي لي كوبل منساجمبن ويوكلو بعضياتهم بكل حب وحنان ودلال حتى فيقها عصام من سهو ديالها
عصام:شنو مالك فين سهيتي ماعجباتكش الماكلة
شيماء:لا بالعكس الماكلة بنينة بزاف غير كانشوف هاد الجو زوين هاد المطعم كولو حب
عصام:شنو غرتي الى بغيتي ممكن انا نوكلك ياك حنى صحاب
شيماء:ههه لا ماغرتش بالعكس وانا بيمكاني اسيدي ناكول بوحدي ماداهاش فيها مد ليها لقمة لفمها باش يوكلها جات تهضر تكوليه لا وخشا ليها لقمة فمها كلاتها وهي كاضحك حتى هي عمرات فرشيطة ديالها ومداتها ليه لفمو هو كلاها بلا عكز بقاو بدور مرة هو ومرة هي وهوما بجوج فواحد الجو زوين وشاعري من بعيد كانو نجيب وخديجة معانقين ومقابلينهم ومبسمين شافت فيه مرتو وتبسمات وحطات راسها عليه.عند نزار واشراق سونا ليها فتيليفون 
اشراق:الو
نزار:توحشتك
اشراق:ههه وانا بزاف
نزار:هي نجي عندك
اشراق:شنو حماقيتي
نزار:انتي سبابي طلي علي 
اشراق:علاه انت فينك 
نزار:غير طلي علي واتعرفي مشات بزربة للبالكون كايبان ليها فالقنت متكي على طوموبيلتو وكايشير ليها
اشراق:والله حتى انت مسطي سير ايشوفك شي واحد
نزار:مكايهمنيش امضرى هضرتي مع والديك
اشراق:اه هضرت معاهم وكايتسناوك غدا ان شاء
نزار:واخيرا قربتي تكوني لي كنبغيك بزاف اشوشو ديالي
اشراق:حتى انا
نزار:حتى انتي شنو امم
اشراق:واصافي سير ايشوفك شي واحد الله يصبحك على خير
نزار:لا حتى تكوليها ونمشي ولا والله حتى نبقا هنا
اشراق بقات ساكتة شوية :حتى انا كنبغيك بزاف وقطعات بالحشمة وكابان ليها دار ديك الحركة ديال ييس سيفط ليها بوسة فالهوى وركب فطوموبيلتو ومشا هي شدات تيليفونها عنقاتو وتنهدات وتلاحت فناموسيتها وغمضات عينيها.عند شيماء وعصام لي سالاو عشاهم 
شيماء:شكرا بزاف على هاد العشا زوين بزاف عجبني هنا بزاف
عصام:الحمدلله منين عجبك فرحتيني وتبسم ليها شوية جا سرباي جاب ليهوم حلو بالجوز ولوز وشوكولا وكيسان بالحليب وشكلاط مافهمو والو
شيماء:حنى ماطلبناش هادشي.حتى جاوباتها لالة خديجة
خديجة:هاد الحلوة سميتها حلوة العشاق كانصايبها ديما للنجيب بكل حب او قررنا انا وياه نوليو نديروها هدية لاي واحد كايجي هنا كنتمنى تعجبكم
شيماء:شكرا بزاف مشات لالة خديجة وهي تبدى شيماء دوق كانت كاتعجبها الحلوة بالشكلاط 
شيماء:مممممم واو مممم واعرة دوق دوق تشوف.عصام كايضحك عليها داقها 
عصام:فعلا بنينة بزاف شيماء مابقاتش شافت جيهتو تحطات على حلوتها ماهزات راسها حتى كملاتها 
عصام:شفتك نسيتيني ههه
شيماء:ههه سمحلي ولكن عمري مادقت بحال هاد الحلوة شافت طبسيلو كاتبان ليها حلوتومزال ماكلها يلاه فيها جوج دغمات
شيماء:واش ماعجباتكش
عصام:لا زوينة ولكن ماكانقدش على الحاجة لي فيها شكلاط
شيماء:اوكي بقا عصام كايهضر معاها وهي عقلها مكاينش كاتشوف ليه فطبسيلو حتة كايشير ليها قدام وجها
عصام:فين سرحتي 
شيماء:لا والو انا معاك حس بيها عصام وبلعاني بغا ياكول من الحلوة هز المعلقة لفمو وهي متبعاه بالعين شاف فيها وتبسم وغير مسار ايديها وداها ليها جيهت فمها وكلها ليها وهي كاتضحك
عصام:عارفك مجنونة بالشكلاط بقا كايوكلها بيديه حتى سالات الحلوة
شيماء:شكرا بزاف 
عصام:باراكا ماتشكريني واقيلة نمشيو
شيماء:اه يالاه وخا ماسخيتش بهاد الجو
عصام:كوني هانية غادي نعاودوها ان شاء الله غير وقفنا وجاو عندنا مالين المطعم سلمو علينا 
خديجة:عاودوها وتهلا فشيماء 
عصام:وانا شكون يتهلى في
نجيب:من صغرك كاتبغي تكون محور الاهتمام وبقاو كايضحكو
شيماء:شكرا بزاف العشا كان زوين وبنين حتى الحلوة زوينة بزاف ان شاء الله خاصني نطلبك المقادير
خديجة:لمقادير ساهلة غير خاص ضيفي ليها شوية من حبك للانسان لي اتقدمها ليه
شيماء:شكرا مرا خرى خرجنا انا وعصام ركبنا فطوموبيل وديمارا وزاد 
شيماء:عصام بغيت نكوليك شيحاجة
عصام:مم كولي الله يسمعنا خير
شيماء:ممكن غدا نخرج بكري شوية شاف فيها 
عصام:وعلاش بسلامة
شيماء:اشراق غدا عندها الخطبة وطلباتني نكون معاها الى كان ممكن
عصام:وليتي ضريفة زيدي طلبيني شوية مزال باش نقبل
شيماء:كاع لا تقبل زدتي فيه هضرنا بصواب بعرتي 
عصام:ياربي تصبرني مع هاد الخليقة
شيماء:مالها كيجاتك هاد الخليقة زين وتباتة وضرافات شكون بحالك وحصليك شاراف نخرج معاك ماشي بحالك انت لباس الى لقيتي وحدة بحالي قبلات تخرج معاك
عصام:ههه مالي كيجيتك ناقصني رجل ولا ايد الف وحدة تمناني
شيماء:هههه واتق من راسك بزاف مايغركش هادشي لي انت فيه
عصام:ممم واخا الالة ياك حنا صحاب
شيماء:اه صحاب شنو فاش كاتفكر تاني عينيك ماعاجبينيش
عصام:ممم ههه دابا ماشي وقتها خاصني نوصلك لدار وغدا انتي مشغولة بالخطوبة ادا موعدنا بعد غدا كوني واجدة عندي ليك مفاجئة يا رفيقتي الحلوة
شيماء:كيفاش مافهمتش شنو تاني عارفا دوك شوفات ديالك شريرة
عصام:حتى لداك انهار وتعرفي ياك انا خايب وماتقبل بيا حتى شي وحدة دابا نشوفو وهو يغمزها خرجات ليه لسانها ودارت عند جاج هو كايشوف فيها او الخطة لي بغا يدير ليها كاضور فدماغو دابا نشوفو شامشومتي واش اتصبري وشنو ايكون ردة الفعل ديالك من داكشي لي كايتسناك وصلها قدام دار هبط هو الاول حل ليها الباب
شيماء:شكرا على العشا وسهرة كانت زوينة
عصام:هادا واجب يا رفيقتي بقات كاتخنزر فيه خلاها ورجع الباب طوموبيل حلو وخرج راسو وغمزها :أحلام سعيدة حلمي بي
شيماء:على زينك نحلم بيك مغرور لاخور خلاها وهو ميت بضحك وهي كاضرب لارض برجليها بغا يفقسني كايقليلي سم واخا واخا حلات الباب ودخلات طلعات نيشان لبيتها كلسات كاتفكر فهادشي لي موجد ليها عصام ناري كانجيبها لراسي بفمي ديما كايديرها لي اش فجهدو كاع مايدير ايوا صافي ناضت بدلات حوايجها وغسلات وجها توضات وصلات صلاتها وجبدات ماريوها طويه وتشوف شنو اتلبس غدا فخطوبت اشراق.عند عصام من بعد ما وصل شيماء راجع لدار دخل طوموبيل الكراج صونا ليه تيليفون كان هادا نزار
عصام:وي نزار خويا لباس عليك
نزار:الحمدلله وانت
عصام:الحمدلله ياك لباس كاينا شي حاجة
نزار:عصام انت عارف معزتك عندي وانت لي كانعرف هنا بغيتك فواجد الغراض
عصام:وي صاحبي كول انا موجود خاصك شيحاجة
نزار:بغيت غدا تكون معايا غدا مهم فحياتي غدا انمشي نخطب الانسانة لي كانبغي 
عصام:هاي هاي من ورايا اسيدي مبروك فرحت ليك والله وشكون هادي كانعرفها 
نزار:خليها مفاجئة نعول عليك
عصام:اه بطبيعت الحال تعول علي كون هاني امولاي سلطان
نزار:اه نسيت لي بغيت نوصيك عفك ماتدكرش على فمك قدام اي وحد اني انستقرهنا خليها مفاجئة ممكن
عصام:واخا ماعرفتش علاش ولكن كون هاني من ديك ناحية نزار شكر عصام وقطع لخط ميعدهم غدا ان شاءالله دخل عصام لدار وهو فرحان وعارف انا لعروسة هي اشراق وانو غدا ايشوف حبيبت قلبو ويفاجئها وخهي خبات عليه طلع نيشان لبيتو بدل عليه وحل البالكون وكلس فيه كايفكر كيفاش ايتير غيرت شيماء وزيد يقربها منو واخا هو ماغاديش يبوح ليها بحبو ليها ولكن باغي يحس واخا غير شوية بداك الاحساس زوين قبل مايفوتو هاد الايام .عند شيماء لي كانت حتى هي فنفس الوضع حالا شرجم وكاتفكر كيفاش كان عصام اليوم تيلقائي ومحبوب وتصرفاتو وقرات تخليه قريب منها باسم صداقة المهم تاخد من هاد تجربة دكرى زوينة تفكرو بيها الى تفارقو تنهدات وسدات شرجم تخشات فبلاصتها وتغطات ونعسات.
أصبحناوأصبح الملك لله اليوم نهار جديد وأحدات جديدة فاقت شيماء بكري غسلات ولبسات حوايجها وخرجات مت دار بلا فطور باش تخرج من الخدمة بكري خدات طاكسب و سونات لاشراق لقاتها خامرة
شيماء:اودي يا ودي لي خطبتها ليوم انتي نوضي تكعدي جمعي راسك
اشراق:اووف هاهي نايضة امتا اتجي عندي راه حتى دوك البعكاكات دبال بنات خالتي جايات اوف ماما مكاتسكتش مشات تكولها ليهوم كاليك جاين يشوفو واش انحتاج شيحاجة وهوما جاين ايبركو فالعريس ياخ
شيماء:ياخ مسينا على الله كونما جيتيني صاحبتي والله لا جيت ودوك جوج مسمومات كاينات تاما مي مايعمش حتى انتي ديري عين ميكة مهم سيري دابا وجدي والحلة وتقدية خليها علي انا اوكي
اشراق:واخا الله يخليك لي ماتعطليش علي عرفتيني الى بقيت معا دوك جنيات اندير فيهوم شيحاجة 
شيماء:ههه صافي كون هانية يالاه بسلامة راني وصلت للخدمة قطعت معاها وداخلة كانجري حتى تصاطحت معا عصام شوية مانطيح كونما شدني كون جيت على زنافري
عصام:انتي مالك ديما مرعودة وزربانة كانكول ليك الف مرة ردي البال راسك ماشي ديما انكون معاك بقات كاتشوف فيه وديك الكلمة دراتها وفكراتها فعلا ماشي ديما ايكون معاها تبسمات بضحك
شيماء:ولكن دابا راك كاين هنا او لا وغمزاتو وخلاتو كيدار ليها عصام بقا حاضيها حتى غبرات وخرج حيت كان داير مع نزار يتلاقاو ويعاونو فشي حوايج يتقداهوم دخلات شيماء على شاف رشيدة للقاعة
شيماء:صباح نور
شاف:صباح الخير شتك منبرة اليوم كي بقيتي
شيماء:اه حيت بغيت نخرج بكري انا اليوم الحمدلله يسول فيك الخير
شاف:علاش كاينا شيحاجة اليوم
شيماء:اه صاحبتي اشراق عرفتيها اليوم جاياها الخطبة وخاصني نكون معاها 
شاف:اه مبروك ليها كون كلتيها لي كون كتليك ماتجيش اليوم مكاين حتى حاجة كيف ديما الماكلة ديال نزلاء الفندق راه مكالفين بيها لي شاف لوخرين الى بغيتي تمشي غير سيري
شيماء:بصح لهلا يخطيك شاف رشيدة شكرا بزاف انا مشيت
شاف:سلمي عليها وباركي ليها علي.خرجات شيماء وقفات كاتسنا فطاكسي وقفات واحد بمشقت الانفس كاتليه يديها وسط المدينة للقيسارية وصلها خلصاتو وهبطات مشات نيشان لواحد المحال زوين تما دخلات كان فيه انواع ديال الحلوة خدات من كل شكل حتى عمر ليها الكارطونة اغلبية حلوة ديال شكلاط وكاوكاو وجنجلان وتمر ولي صابلي حلوة ديال اللوز مكاتعجبهاش خلاصاتو وخرجات مشات عند واحد العطار تما كايبعيع بخور زوين ديال المناسبات تقدات لي خاصها وزادت مشات المخبازة خدات كرواصة وشنيك وكاع لي اتحتاجو خرجات بقات كاتفكر شنو ايخصها مزال اه نسيت تمر هو المهم نسيتو والفاكية خداتهم وفاش كانت راجعة خدات الحليب والعصير حتى تقلات بتقدية وقفات طاكسي عطاتو العنوان حتى وقفها عند دار اشراق دقات فتحات ليها اشراق لاوية واحد زيفعلى راسها وطابلية 
اشراق:دخلي دخلي جابك الله
شيماء:راني عارفا وجهي وجه تامارة
اشراق:دابا سكتي وخلينا نشوفو شغالنا نخليو هاد جوجات ونمشيو عند عصام من بعد ناخرج من شركة مشا لدار نيشان بدل حوايج الرسميو لبس سبور وهبط عندمو
عصام :سلام وليدة كيصبحتي
خالتي:الحمدلله علاش رجعتي ياك لباس
عصام:داكشي علاش بغيت نهضر معاك عرفتي نزار نزار صاحبي لي كان فسبانيا
خالتي:اه عرفتو مالو
عصام:ايخطب وطلبني نكون حاضر معاه وماكرهتش تمشي معانا راكي عارفة عائلتو كلها لهيه وهادشي جاه على غفلة وكايناش شي مرا معانا غيرك انتي يا الوريدة ديال دار
خالتي:احيانة عليك يا العفريت حتى كاتبغي حاجتك وعلاش
عصام:شيماء هي صاحبت لعروسة راها مشغولة معاها دابا كولي غير مابغيتيش تمشي معانا
خالتي:تسناني هنا نوجد راسي ونجي معاك باس ليها راسها يخليك لي يانور عيني خلاتو ومشات توجد راسها تسناها حتى هبطات...

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.