عصام:كنهنأك برافو برافو هادا شابو ليك شاف فبها شوفة طويلة وفعينيها لي كولهوم تحدي خلاها وخرج ركب فطوموبيلتو وديمارا وزاد بسرعة جنونية عند شيماء من بعد ماخرج ساحو عينيها بدموع كانت بغات تكمل وتكوليه انو الانتقام ديالها نساتو فالايام الاخيرة وانا كرها ليه ولا حب ولكن لسانها تعقد ماقداتش تهضر ناضت هزات بزطامها وخرجات كاتواجه قطرات المطر لي تخلطو مع دموعها وهي كاتمشى فشارع بوحدها وكاتبكي كاتبكي وأغنية مايا نصري خدامة (روح ازا بيتريد لا بقى تزيد همي تركني بحالي ضلي بعيد حاجة تعيد وتالي بعدك على بالي.. خدموها وتخايلو المشهد) كاتمشى وسيناريو هاد الاشهر كايدوزو قدام عينيها من أول مرة شافتو للمشحنات ديالها معاه لحظات رومنسية لحضات الغضب وتصرفتها شيطانية معاه نهار علنو الهدنة وخرجو ونهار هتم بيها فاش فان مرضات هادشي كولشي كايدوز قدامها وكاتبكي وشتا لي كاتصب عليها حتى القدر لعب معاها لعبة هي هاديك رجليها غادين بيها للجهة مجهولة ماعرفاش بضبط لفين غادية بلا عقل حتى فيقاتها طوموبيل كانت اضربها من سرحان ديالها بدات كاتبكي على دهدها وغوتات غوتة وحدة عند عصام لي كان سايك بسرعة جنونية ماعارفش فين غادي بضبط حتى لقا راسو قدام واحد البار نزل وخبط طوموبيل ودخل عطى سوارت لحارس ودخل شير لسرباي عطاه طلب ديالو جاب ليه قرعة على قدها وكلس كايكب ويشرب ودموعو نازلين هادشي كولو كان لعب هادشي كولو كان تمتيل ماقادرش نتيق لي طرا ادا حبي ليها حتى هو مكاينش والمشاعر لي شفت فعينيها كانو كولهوم كدوب باش توصل لغاية معينة انا حمار وكامبو مكلخ كايتفكر كاع لي طرا وهي كاتضحك من وراه والكلام لي كاتكولو(دابا نشوفو شكون ايضحك فالاخر) هيء هي لي ضحكات فالخر وهي لي ربحات مامتيقش هادشي انا انا تستغفليني وتبتزيني وأكتر حاجة
قلبي قلبي لي كايضرني كايضرني صعيب تجيك طعنة من عند أقرب ناس ليك انسان لي عطيتيه قلبك ولو نكون درت الغلط اه درت الغلط ولكن هادشي وهاد الالم اكتر من لي درت انا اخ اخ اااااااخ وهو يضرب الكاس مع الارض كايشوفو فيه الناس
عصام:شنو كاتشوفو شنو كاتشوفو ضور انت كدامك دور ركب هز الفيستا ديالو وخرج شد سوارت وركب فطوموبيلتو وزاد بسرعة حتى وصل لدار دخل من الباب لوراني لدار نيشان لبيتو دخل وتلاح فوق ناموسيتو بحوايجو ونعس.عند شيماء من بعد ما خدات طاكسي وصلها لدار دخلات ماما من بيتها:شيماء جيتي ناباتها شيماء
شيماء:اه اما جيت انا نطلع نلبس حوايجي
ماما:هبطي تعشاي
شيماء:لا اماما مافي لي ياكول بغيت غير نعس طلعت لبيتي نيشان قبل ماتشوفني ماما بديك الحالة وجهي عمر كحلة وحالتي فازكة دخلت هيدت دوك الحوايج ودخلت الحمام طلقت الما سخون وتخشيت تحت منو ودموعي نازلين كي شتا خرجت من دوش توضيت لبسة حوايجي وصليت خديت القران قريت شوية باش ترتاح نفسيتي شوية وتخشيت تحت المانطة وطفيت الضو بغيت نعس باش مانفكر فحتا حاجة نعست ودموعي نازلين من عيني عيت خسرت الحب ديالي وهاد المرة للابد.
أصبحنا وأصبح الملك لله. عصام عصام نوض اولدي ماشي عوايدك تنعس بحوايجك نوض حلات خالتي تورية شراجم عليه بدا كايحل عينيه بشوية عماه شعا ديال الشمس بدا كاينوض بشوية وكايحس براسو ايتهرس عليه
عصام:صباح الخير الوليدة
خالتي:صباح النور اولدي كاتبان لي ماشي حتة لهيه ومامالفاش ليك تنعس بحوايجك وهي مع راسها عارفاه جا شارب ولكن مابغاتش تجبد ليه الموضوع وتحشمو خصوصا عمرو شرب مرة وحدة من نهار مات باه
عصام:غير كونت خدام وجيت عيان لدار وماعقلتش على راسي غير هبطي وانا انلحق عليك خرجات مو من البيت وبدا ساهي وكايتفكر أحدات لبارح نهار لي كان باغيه يدوز مايتنساش ويعتارف لشيماء هو نهار لي داز بحال الجحيم بنسبة ليه ناض وقف دخل الحمام دوش بلا عقل بغا غير يبعد على هنا بزربة خرج لبس كيطمة ديالو هز بورطابلو وسوارت طوموبيل وهبط لعند خالتي
خالتي:كلس تفطر اولدي
عصام:لا لواليدة اكولي بصحة انا انمشي لفيرمة وعفاك لي سول علي كولي ليه ماعرفتيش فين كاين واخا
خالتي واخا اولدي لي بغيتي يلاه ايخرج ورجع عندها
عصام:بغيت نسولك شافت فيه كنتي عارفة انو بدر ايخطب وتزوج وخبيتي علي شافت فيه ورتابكات وحدرات راسها حيت خبات عليه
عصام:صافي من سكاتك عرفت الجواب ورجع خرج ديمارا طوموبيل ديالو وزاد .عند شيماء:لي مقداتش تنوض من نعاس راسها ليكان كايضرها ونيوفها كايسيلو برواح ناضت بشوية غسلات وجها وتخلعات من منظر ديالها فالمرايا تحت عينيها كولو كحل هزات تيليفون لقات 10مكالمات من بدر وحتى مليكة شدات تيليفونها وطفاتو وحطاتو مابغاتش تواجه حتى واحد ولا تهضر مع شي واحد بغات تبقى بوحدها جمعات بيتها وعقدات راسها هبطات التحت لقات مها خرجات لاحت لفمها دغنة ديال الخبز وخدات شي ساشيات جمعات دار بلا عقل دارت الغدا وسالات جات مها دخلات
ماما: الله ابنتي مالك تحت عينيك كحل تكولي واش كاتشمي ياك لاباس
شيماء:والو باس اماما غير تروحت ومانعستش مزيان انا شربت شي دوا انطلع لبيتي ونعس نرتاح واخا ولي سول فيا كولو ناعسة ومابغات تهضر مع حد خليت ماما غير كاتشوف فيا مسكينة مكاتبغيش تحكر علي وتسولني طلعت لبيتي وتغطيت ونعست بغيت نسا كولشي ومانفكر فحتى حاجة ونعاس هو البلاصة لوحيدة لي ممكن نهرب ليها.
بدر:مكاتجاوبش طافيا تيليفونها هاد البنت بغات تحمقني شنو ياكما يكون عصام دار ليها شيحاجة
مليكة:لا مايمكن كنتي كاتعاودلي على عصام انو واخا عصبي ولكن قلبو بيض ومايمكنش يتجرا يقيسها
بدر:عندك نمرت صحاباتها
مليكة:اه انا انسوني لاشراق وهدى ونشوف الى عندهوم شي خبار من بعد ماسونات مليكة لكل وحدة فيهم قطعات وشافت فبدر
مليكة:حتى وحدة فيهم ماعندها خبار عليها هدى مسافرة مع راجلها ومن شحال ماهضرو واشراق كاتلي اتمشي لعندهوم لدار وتكولينا لي كاين غير تهدن كولشي ايكون بيخير ان شاء
بدر:ان شاءالله كنتمنى الى دار ليها عصام شيحاجة انكون انا سبب.عصام من بعد ما وصل للفيرمة دخل طوموبيل حطها وسوارت وبورطابل خرج مشا نيشان لبلاصت الخيل خدا العود ديالو وركب عليه ومشا كايجري لواحد البلاصة عزيزة عليه البلاصة فين لقا شيماء كتغني المرة لي فاتت حط العود دبالو وعقدو مع شجرة وتقابل مع البحيرة وهو ساهي فتفكيرو وخربق فأحسيسو ودايرة بيه دنية ماعرفش شنو يدير معندو حتى واحد لمن يعاود باه لي كان بحال صاحبو ماعندوش بقا ساهي حس بواحد الايد مساتو فكتفو هز عينيه بشوية تخلع وتصدم بقا غير كايشوف
عصام:بابا انت هنا لا انا كانحلم وهو يوقف وصورة باه قدامو كايشوف فيه ومبسم ونور طالع من وجهو.واش بصح هدا انت مكانتخيلش
بابات عصام:جيت اولدي نكوليك ماتحيرش ومدوخش دير ليطول عمرك كادير
كون قوي وتغلب على المخاويف ديالك عصام طول عمرو الحاجة لي كايبغي كايوصل ليها خدم عقلك ودكاءك وحتى قلبك ماتخرجش مهزوم كون ديما كيف كنعرفك وكيف ربيتك وماتشوفش وراك شوف قدامك وماتشوفش لسلبيات شوف للاجابيات اولدي وضرب ليه على كتفو عصام مانطق بحتى كلمة من صدمة غمض عينيه وحلهم باش تيقن ولكن مالقا والو بقا شحال ساهي وكايفكر فكلام باه لي حل ليه شحال من حاجة كان محتاج ليها فعلا الامور عندها بعض الاجابيات ديالها ولكن سلبياتها كتر من اجابياتها سلبياتها الكدوب والاستغلال ونفاق والخداع صعيب انك تعطي قلبك وتبغي انسان وهو عمرو مابغاك ولا حس بيك كان باغي غير وقت باش يوصل واحد الغاية معينة ولكن ماشي عصام الوالي لي دار بيه الالة شيماء ماشي انا لي دار بيا وغادي نشوفو هاد المرا شكون ايضحك واش انا ولا انتي.
شيماء:اشراق الله يرحم ليك الوالدين لما خليني عليك راني مريضة وماعندي كانة ومعصبة عفاك الما خرجي وسدي الباب وخليني
اشراق:والله مانخليك حتى تعاودي لي لي كاين شوفي فيا الهنا ونوضي من التبهليل ديالك عيقتي والله وبزاف اش ايكون كاع واقع ليك نوضي شوفي اديك الكانيشة وانا كانهضر معاك
شيماء:اوف اشراق سمحيلي والله ماقصدت نغوت عليك راه مريضة ومعصبة والله
اشراق:مامالفاش ليك تخبي علي وانا شادا والفادة كانعاودها ليك ولكن انتي لا هادي هي صحبة عندك ياك حنا تعاهدنا نكونو على الحلوة والمرة
شيماء:اخخ اش انعاودليك حتى نعاود ليك الهدرة كتيرة وكاضر وبزاف كاضر كتر من القياس
اشراق:غير كولي لي وخوي قلبك احبيبتي انا معاك وفجنبك عاودي باش ترتاحي شفت فاشراق وطولت فيها شوفا ودموعي نزلو بلاما نحس عاودت ليها كولشي الحمقة حتى هي بكات وغنقاتني
اشراق:هادشي كولو هزاه فقلبك وماكاتكولي والو ولكن احبيبتي انتي مادرتي والو هو ليدار هو لي خاص يطلب منك سماحة على الافعال ليكان كايدير انتي لي خاصك تقلقي ماشي هو وماهضرش معاك من البارح
شيماء:لا والو خلاني ومشا شديت غير طاكسي وجيت لدار جابلاه ماما ماشفتنيش المشكل الكبير كون غير كان شعوري تيجاهو بحال الاول مايهمنيش ولكن دابا الا الا فات الحال ا اشراق صافي قلبي ماشي ديالي كنبغيه بزاف كنتفكر تصرفاتو معايا نهار مرضت وهتم بيا الخرجات ديالنا ضحك ديالنا بزاف دبال اللحظات كاينين فبالي مغاديش يتمسحو بسهولة
اشراق:فهمتك وعادراك ولكن من هدشي كولشي شنو ناوية ديري بضبط
شيماء:نكدب عليك الى كتليك عارفة ولكن حاجة وحدة متاكدة منها هي الخدمة عندو ماغاديش نرجع ليها
اشراق:كيفاش
شيماء:سي احمد لي خدمني عند عصام عجباتو خدمتي وكال الشاف انو بلاصتي مضمونة عندو نهار تنين اخر نهار لي فستاج عندو انهز كاع دفاتر والكتوبة ديالي من عندو ونخدم مع سي أحمد ونبعد على طريقو هادشي لي كانفكر فيه واي بلاصة ممكن يكون فيها هو ماغاديش نوصل ليها نيهائيا وغادي نساه انحاول نساه واخا ماشي ساهل علي ولكن هدا هو الحل المزيان لكل واحد الهدف ديالي وصلت ليه ومهمتي درتها وعاونت بدر
اشراق:وكنتي سبب حتى فاش نتعرف على شريك حياتي رسيتينا لبر الامان كلنا ولكن انتي الوحيدة لي كاتعدبي وبدات تبكي
شيماء:ششت الهبيلة هاداكشي غير قدر ومكتاب انا كنت غير سبب ماتكوليش هكاك واش جايا تفوجي علي ولا تبكي صافي نساي وانا انسا اني عرفت ولا دخل حياتي شي تنسان سميتو عصام الوالي. (ولكن اشيماء ماشي انتي لي كاتقري القدر مخبي ليك بزاف حوايج ماكنتي ضاناهوم).
من بعد ما رتاحت شيماء لهضرت اشراق تافقو الغد ليه الاحد يخرجو شوية يدوزو الوقت ويفوجو شوية.وصل صباح حتى أخبار مكاينة على عصام بدر من بعد ما طمن على شيماء وعرف انها عاودات كولشي لعصام وانها باغية تبعد شوية وتبقى على راحتها حتارم قرارها وخلاها على رحتها
شيماء:دابا فين غتدية بيا من على صباح وملبساني ومأنتكاني بحال هكا كون لحت علي غير جلابتي (شيماء كانت لابسة تجاكيط دجين صايا طويلة بزرق والاخضر وزيف زرق)
اشراق:ايوا هكا نبغيك اجي حكا ماسولتك شنو اديري مع دار منين يعرفو انك اتفسخي الخطوبة
شيماء:اودي غير خليها على الله شنو انكوليهم انكول اننا ماتفهمناش وماتلاش عاجبني الحال وحتى واحد مايبزز علي شي حاجة انا مابغياهاش واخا ماما ممكن تصدم حيت كانت فرحانة بزاف ولكن شنو ندير
اشراق:كون غير عاودتي ليهم الحقيقة شافت فيها شيماء مخرجة عينيها
شيماء:انتي حماقيتي لا والله حتى يجريو علي خصوصا بابا ماعندوش مع الضحك والبسالة والله حتى يحيدوني من الحالة المدنية ولا يطرا ليهم شيحاجة لا اختي مانقدش انكوليهوم ماتفهمناش وصافي
اشراق:ايوا انتي تعرفي يالاه نفطرو بعدا ويحن الله من بعد مشينا فطرنا بجوج واشراق كادير ما فجهدها صحكني وتنسيني من بعد الفطور عطيناها لدوران وسيحان مشيت معاها لواحد المول خدات شي سبابط وسنادل حملاتني بالميكات
اشراق:انتي غير زيدي وسكتي دخلاتني لواحد صالون دخلنا جاو شي بنات عندنا هضرات معاهم اشراق داونا بجوج لواحد البيت وانا غير كانشوف فاشراق وفعايلها نعسونا فشي كراسة كلسو علينا بشي زيوت لكمامرنا صراحة حسيت براحة وبالاسترخاء ومشيت حتى بغيت نبدا نشخور مسحو لينا وجهنا وداونا لكراسة مقابلين مع المرايات جبدت اشراق من ايدها
شيماء:هادو اش بغاو يديرو انا مابغيا نصايب لا شعر لا والو بغيتي تصايبي صايبي راسك
اشراق:والله وتحركي ولا تململي حتى مايعجبك حال راكي عارفاني ايوا تبتي وكلسي بحالك بحال ناس شفت فيها وانا كنطلب صبر من عندك ياربي جات عندي واحد البنت حيدات لي زيف حلات لي شعري مشات لواحد لمجر جبدات شي بومادات كاتخلط فيهوم وانا كانكول لاشراق بعيني اش باغية دير هادي واشراق كاتشير لي بصبعها نسكت جات عندي ديك البنت وبدات دير لي ديك بومادة لشعري ودير فبابي اليمينيوم غطات لي شعري وبقيت كانتسنى وكنقرا فواحد المجلة اما اشراق جات واحد البنت كاتقاد ليها ضفرانها دازت شي 20دقيقة رجعات عندي نفس البنت داتني لداك لافابو وبدات تغسل لي شعري بشمبوان رشي برودويات ماكرهتش نعس ههه لي داربيني ضاربني على نعاس وابسيف جابت لي نعاس وهي كاتماصي فشعري سالات ونشفات لي شعري ورجعاتني لكرسي انا سلمت ليها راسي وسكت هزات المقص وبدات قطع ياما قطع حتا سالات وبدات فشيشوار غير لدات فيه وهو يبدا كايتوضح لي لون شعري زيغ هاديك كانت صباغة لون دسعري لي ولا اكاجو داكن مايل لون دنجال وتقطيعة لي بدات كاتبان من اللور قصيرة وجناب طويلة حسيت براسي بحال تجددت وفهمت علاش اشراق جابتني هنا زعمة باش نبدا صفحة جديدة شفت فيها وتبسمت ليها وصيفط ليها بوسة فالهواء سالات الكوافورة ضرت عندها
اشراق:مالي شنو درت مادرت والو وباراكة تبقاي تشكريني يالاه نتغداو انموت بجوع مشينا واحد سناك خدينا بيتزا بيتزا لوحدة كلينا وعمرنا الكريشة وكملنا المسارية ديالنا مادخلت لدار حتى 8 ديال العشية قبل ماندخل لدار بانت لي طوموبيل غريبة فراس زنقة زاجها فيمي ماديت ماجبت كاتشبه لواحد طوموبيل كانت حدا صالون لي خرجنا منو انا واشراق ماعطيتش للامر اهمية ودخلت لدار طلعت لبيتي وبدلت حوايجي وطليت من شرجم كاتبان لي ديك طوموبيل غبر ليها الاتر رجعت لبيتي وسديت شرجم وانا شيحاجة فقلبي كاتنغزني كانتساءل مع راسي شنو يكون كايدير عصام شنو دار وفين هو وعلاش ماهضرش يهضر ههه كيفاش ايهضر من بعد لي طرا وانا لاش كانفكر فيه اصلا خاصني نساه تنهدت وهبطت عند ماما نجلس معاها وقررت غدا منين نرجع من الخدمة نكوليها شنو كاين ونعاود ليها هبطت عندها تعشينا مجموعين كلست نتفرج شوية ومن بعد نطلع لبيتي نوجد شنو انلبس ونعس شوية بكري خايفة من شنو ايكون غدا وخايفة نواجه عصام خوف متملكني من راسي لرجلي.فدار خالتي تورية لي كانت كاتسنا فولدها امتا يجي وحالتو معاجباهاش كانت بغات تنوض تنعس حتى سمعات سوارت فالباب حتى دخل عصام
خالتي:على سلامة اولدي تعطلتي اليوم ماشي عوايدك
عصام:ماسخيتش بالفيرمة وبطبيعة مونماشي الخدمة لي تابعاني كنت انكلس شي يامات
خالتي:ياكما كاين باس اولدي ياكما تخاصمتي مع شيماء طلع راسو شاف فيها
عصام:علاش كاينة شيحاجة نتخاصمو عليها
خالتي:هي اولدي مادارت والو كانت غير بغات تعاون جوج دريوس فالحلال وانت عارف مرت عمك كانت بغات بدر لبنت ختها على حساب طمع اولدي بالعكس خاصك تفرح لي ربي جاب ليك بنت ناس بقلبها واخلاقها شاف فيها عصام
عصام:الوليدة غدا خدام بكري بغيت ندوش ونعس تصبحي على خير باس ليها راسها وطلع
خالتي:الله يهديك اولدي ويدير ليك تاويل دالخير.طلع عصام لبيتو حيد حوايجو رماهوم ودخل الحمام حل الرشاشة وخلى الما يتكب عليه وكايحاول يمحي صورة شيماء لي كان كايسحاب اتكون حتى هي كاتعدب بحالو ولكن كان غالطت ماصدقات تهنا منو ودور فالمحالات وفصالونات ومادخلة لدار حتى ل8 وهي فرحانة ضرب ايديه مع المرايا حتى تهرسات وتجرحات ايديه لي دمها ولا مخلط مع الما وهو كايتجنن ويتغدد :وكايحلف ويتحلف:الى كنتي كاتسحابي بهاد سهولة اتهناي مني اشيماء فراكي غالطة وغالطة بزاف مكاينش لي يقدر يستغلني وهانتي غادي تشوفي خرج عصام من دوش دار واحد الفاصمة على ايديه ولبس حوايجو ونعس فبلاصتو والقرار لي تاخد غادي وكايكبر فراسو.اصبحنا وأصبح الملك لله. فاقت شيماء بكري توضات وصلا باش ربي يعاونا لبشات سروال دجين صباط باج قميجة سومو مهطة وزيفها هزات ساكها وهبطلت فطرات مع داهوم وخرجات خدات طاكسي وهي خايفة من لقاء ديالها مع عصام ولكن فالداخل ديالها مقتانعة بالقرار ديالها حطها طاكسي وكانت خايفة تلاقا بيه عند الباب ولكن الحمدلله لي فبالها ماطراش دخلات كيف العادة سلمات على الموضفين لي كاتعرف او وقفات مجمعة مع منعم شوية كايبان ليها عصام داخل بحال اول مرة تعرفات عليه مغوبش وكولشي لي كان كايضحك ومجمع رجع لخدمتو وسكت ضار شاف فيها طلعها من رجليها لراسها ومشا ركب فلسانسور ومشا لخدمتو
منعم:ماعرفتش مالو هكا على صباح شحال هادي ماشنا هاد الوجه ديالو
شيماء:سير رجع لخدمتك لايغرز نيابو فيك تاني
منعم:والله ماكدبتي هي صافي تاخدتي القرار اتمشي من هنا والله حتى ولفناك واخا عارف انك غير ستاج مي والفناك معانا
شيماء:ومالي انرحل وقتما حتاجيتيني سوني لي وعنداك تنسى ماتعرضش علي لعرس
منعم:ههه لا كوتي هانية خليت منعم ومشيت لبيرو ديال .
شيماء:صباح نور
شاف:صباح الخير مشيت لبيرو ديالي شوية سونا تيليفون ديال بيرو دشاف رشيدة جاوبات من بعدها سدات
شاف:شيماءالمدير بغاك
غير سمعت المدير بغاك بدا قلبي كايضرب 90وشداتني البرودة من رجلي والخلعة بقيت كانشوف فشاف خرجت مشيت لاسانسوروانا خطوة تديني وخطوة تجيبني ويدي باردين بحال تلاجة ورعدة وقفت ورا الباب ديال البيرو وتنفست وتنهدت قريت القران بحال الى انجاهد دقيت ودخلت عند فاتي
فاتي:دخلي راه كايتساك تبسمت ليها مشيت جيهت الباب دقيت سمعتو كال تفضل حليت الباب لقي سي أحمد كاين عندو غير شافني وقف سلم علي
سي أحمد:ينتي شيماء تبارك الله عليك وصلني تقرير بخدمتك المتقونة وجيت براسي لعند سي عصام وعندك باش نخبرك انك تقبلتي معانا ونرحب بيك معانا فشركة
شيماء:وانا فأتم الاستعداد خرج سي أحمد كنت انخرج حتى هضر عصام او وقفت
عصام:تبارك الله عليك خطة ديالك نجحات بدر تزوج ستاج ديالك سالا وضمنتي خدمتك وتاتهناي مني بكل سهولة من بعد ماستغليتيني ماعندي مانسالك
شيماء ضرت لعندو:ولكن انا ماستغليت حد
عصام:شششت هضرتي مافيه الكفاية وجا دوري باش نهضر حتى انا كنتي غالطة انك تستغليني ولعبتي لعبة انتي ماشي قدها ويلا كان كايسحابليك بهاد بهاد البساطة اتنهي كولشي فراكي غالطة ويلا كان كايساحبليك كولشي اتنهيه وتهناي مني راك مشيتي بعيد ومعارفانيش شكون انا وعلاش قاد شيماء كاتشوف فيه وهي كاترعد
شيماء:لي فجهدك ديرو تنا مخايفاش منك دير لي عجبك انا ماغاديش نزيد دقيقة هنا رجعا لي اترجع جرها من ايدها حتى ضربات ليه مع صدرو حجزها بين ايديه وضرها فيديها
شيماء: بشوية راك ضريتيني فيدي (عصام هادشي ماشي كافي باش تحسي ولو شوية بالعداب والالم لي حسيت بيه فقلبي مع راسو)
عصام:ممم كل حاجة وعندك لي حال ولكن فكرتي الى جا شي واحد واعاود ليهم الحقيقة انو بنتهم متلات عليهم ولعبات بمشاعيرهم وضحكات عليهم وعلي وشدات لفلوس من عندي شنو ايكون الوقف ديالهم وباش غادي يحسو هادشي مافكرتيش فيه كانضن
شيماء تبدل اللون فوجها:ماتقدرش دير هكاك مايمكنش ليك هاديك كاتسما ندالة وحقارة واستغلال
عصام:دابا كنضن غادي نتفاهمو كلسي كلسات شيماء وهي كاتشوف فيه ومصدومة من تصرفاتو ماشي هدا هو الانسان لي كاتبغي ولكن لي معارفاش انو لي كايبغي وتعرض للالم والخيانة من حبيبو والاستغلال ايدير اي حاجة
شيماء:انا كنسمع شنو بغيتي بضبط
عصام:حاجة ساهلة ماهلة وانتي كتعرفي ليها
شيماء:شنو هي وبلا الغاز
عصام:زواج
شيماء:كيفاش مافهمتش
عصام:انا انغهمك التمتيل ديالك اتكملي فيه ولكن اتكملي فخطة ديال زواجنا كيف كاتسمعي غادي نتزوجو
شيماء:وقفات انت واقيلة حماقيتي مايمكنش لي نتزوج بيك مستحيل
عصام:بالعكس حاجة ساهلة اتمتلي انك كاتبغيني فهاد الفترة وحتى انا كدلك وغادي توافقي تزوجي بي يا هكا يا كلشي الحقيقة وتمتيل ديالك ايكون فخبار ولديك
شيماء:انت اندل واحقر بسرعة البرق وصل عندها وشاد ليها وجها بيديه
عصام:مانصحكش تعاير بقات كاتشوف ليه فعينيه بتحدي وغضب وفمها كايترعد بلما يحس حط فمو على فمها وباسها شحال وهو كايتسنا هاد اللحظة باسها بوسا كلها غضب وألم بوسة لي كولها شوق وعتاب بوسة لي كاتحكي الاف الحكايات بوسة لي كاتكول كولشي وكاتعاود على كولشي لحضة لي كايلتحمو فيها بجوج بدون قيود اللحظة لي كاينساو فيها الغضب ديالهم شيماء لي تجاوبات معاه بكول سهولة وتخشات فالحضن ديالو لي كانت محتاجة ليه وتوحشاتو كانت محتاجة يضمها بقوة ويمحيو اي حاجة طرات على غفلة تحل زيف شيماء وبان نص فشعرها بعد عليها عصام وهو مزال معنقها حل ليها الزيف وهبطو وهو كايتمعن فخصلات شعرها الملونين قربها منو وهو كايشم ريحت شعرها وهمس فودنيها
عصام:علاش قطعتي شعرك كان طويل زوين هي ماهضراتش ومجاوباتش كانت كانترعد وهي فالحضن ديالو وهوما فهاد اللحظات زوينة والحلوة ماحسو بالباب حنى تفتح على غفلة ضارو بجوج كان بدر لي واقف قدام الباب مبلوكي وكايشوف فيهم ومامتيقش عينيه عصام لقا الفرصة وقرب شيماء منو معنقها ومبسم
عصام:ناس منين كايبغيو يدخلو كايدقو شيماء بغات تبعد عليه ولكن متشبت بيها بحال الى كايكوليها مانصحكش تبعدي
بدر:بغيت نهضر معاك ولكن ممكن تشرحز لي شنو كاين هنا
عصام:مامحتاجينش نشرحو ليك شيحاجة راجل ومراتو شنو اتحتاج هادي من شرح دخل بدر وهو مصدوم ضحك وطلع حاجبو
بدر:مراتو ههه نكتة جديدة هادي واقيلة مابغيتيش تقبل انو هادشي كان تمتيل وسالى
عصام:انت لي غالط وحتى حاجة نسالات بالعكس يالاه اتبدى ويلى ماتيقتينيش بيمكانك تسول شيماء بدر كايشوف فشيماء
بدر:شيماء ممكن تشرحي لي شنو كايطرا هنا واش هادي شي خطة جديدة كولي لي واش بزز عليك شيحاجة هضري تكلمي وجاوبيني ماتبقايش ساكتى الى دار ليك شيحاجة كانحلف حتى وجاي لجيهت عصام
شيماء:لا بدر لا عفاك عصام كدار لي والو ومبزز علي والو لي معرفوش ابدر اني وليت كنبغي عصام بدر خرج عينيه
بدر:شنو كيفاش ههه اكيد كاضحكي اكيد شي لعبة ولا بزز عليك
أكيد ضغط عليك هادشي مكايدخلش لراس اشيماء شنو درتي ليها شنو كلتي ليها باش خليتيها اكول هكا
شيماء:بدر عفاك انا حتى واحد ماضغط علي انا فعلا كانبغي عصام وعمري بغيت شي واحد قد مابغيتو
بدر:ولكن ولكن كيفاش هادشي من بعد كاع لي دار ليك بغيتيه
شيماء:انت معارف والو ولي كانعرف انو عصام ماشي خايب حتى لهاد درجة ولا فنضرك مانستحقش نتحب
بدر:بالعكس انتي عارفة معزتك عندي وكانبغي ليك كل خير ولكن انا هادشي مافهمتوش
شيماء:ممكن تخلي لي شوية ديال الوقت ونشرح ليك ممكن تمشي دابا وانا انتاصل بيك ونهضرو واخا
بدر:ولكن
شيماء:عفاك وغلاوتي عندك سير دابا ومن بعد وغادي نهضرو واخا بقا بدر كايشوف فيها وفعصام
بدر:واخا لي بغيتي انا انتسنى تصالك قبل مايخرج هز حجاب شيماء وغطا ليها راسها وبتسها فجبهتها وخرج خلى عصام كايخنزر فيه مشا جيهت البيرو وكلس وشيماء مزال عاطياه بضهر
عصام:عمرني شفت شي صداقة بحال هكا دارت عندو شيماء
شيماء:لوكان عرفتي كيفاش تبغي شي انسان وتقربو منك وتخوي دماغك من الوسواس وانو كولشي طامع فيك كنتي اتعرف معنى صداقة الحقيقية
عصام:ولكن ماعندي مانسالك كاتعرفي تمتلي برافو عليك
شيماء:هادشي مادرتوش على قبلك درتو على قبلي وعلى قبل بدر مافي لي يتحمل مزال كترت صداع براكة
عصام:ولكن ماعندي مانسالك منين عقلك رجع ليك او وافقتي على العرض ديالي دابا بيمكانا نحددو وقت زواجنا امراتي الحبيبة وشاف فيها وهو مبسم وهي وجها مكايتفسرش ومكايتقراش
شيماء:ساليتي هضرتك
عصام:اه ساليتها عندك شي حاجة تكوليها تفضلي حيت مزال خاصني نوجد شي وراق على قبل زواجنا
شيماء:كتليه كانبغيك ماشي انتزوج بيك كتليه هكاك باش يبعد ومايتاداش بنار ديالك واش من نيتك متيق اني انوافق لا اسي عصام الوالي راك غالط وبزاف نهار قبلت بالخطة ديالك على وجه بدر وصداقة ديالي انا وياه باش يوصل للمراد ديالو ويتجمع مع شريكة حياتو لي انت ومو وقفتو ضدو واش من نيتك بغيتي نسلم راسي لانسان بحالك اناني ومكايبغي غير راسو وهامو غير راسو وشنو بغا هو ماهاموش ناس لوخرين ولا سعادة ديالهم المهم عندو يدور العالم على ايديه عصام بعد عليها بعدو الكره لي فعينيها وهي من الداخل ديالها عالم بيه الله مادناتش يهددها بواليديها مايمكنش يكون بهاد دناءة هادي
عصام:او والديك ماهمينكش
شيماء:ماشي بوحدك لي كاتعرف تهدد نسيتي ماشي غير والدي لي ممكن يمشيو فيها نسيتي خالتي تورية لي معلقة امال عليك وكان فنظرها اناك ملاك واناك ماكاينش منك جوج الى صاقت الخبار انا ولدها برم معايا صفقة باش يبعد ولد عمو علي شنو اتكول وشنو اتكون نضرة ديالها ليك وبالاحرى شنو ايطرا ليها ولا انت هادشي مافكرتيش فيه فكرتي غير فولدي حيت عصام الوالي كايعرف غير يهدد وكولشي يكون تحت ايديه الا والف لا هاد المرة ماغاديش يكون لي فبالك فهمتي ولا لا الحمد لله لي ربي هناني منك ومن تسلط ديالك كنت غادي نتيق بالوجه لي بينتي لي وجه الضريف المزيان المهتم لي بينتي لي ولكن المراد لي كان ورا داك تصرف ماوصلتيش ليه وعمرك ماغادي توصل ليه عصام غير كايشوف فيها ومتحكم فأعصابو
شيماء:عرفتي شنو مابغيتش نشوفك مزال فحياتي نهائيا مابغيتش نسمع سميتك طول حياتي بغيت نعس ونفيق ونلقا داكرتي تمسحات وتمسحتي منها مابغيتكش تعرض فطريقي نسا شي وحدة خدمات عندك بسميتي عمرني ماشفت شي انسان بحالك ولا كرهت شي واحد بحالك وأخيرا انبدا صفحة جديدة صفحة مافيهاش سميتك لدالك عفاك الى مزال فقلبك درة ديال طيبة بعد من ساحتي وعطيني تيساع
عصام:كولتي لي كنت انكول بضبط مابغيتش نشوف وجهك مزال هنا ولا فحياتي كلها تهنيت من حمل تقيل كان على كتافي واخيرا انشوف لحياتي بلا انسانة بحالك تحملتك كتر من القياس وجا الوقت لي كل واحد فينا يمشي فطريق ودابا ماتلى عندك ماديري هنا بغيتك تجمعي حوايجك وماتزيدي دقيقة هنا كلام عصام كان بحال سم بحال شي خنجر تغرز فقلب شيماء شافت فيه مطولا وحتى هو بادلها نفس شوفات وهي تمشي لجيهت الباب بخطةات تقيلة حلات الباب وشافت فيه لقاتو كايشوف جيهت شرجم خرجات وسدات الباب كان هاديك اخر خرجة أخر خرجة من المكان لي خدمات فيه ومن حيات عصام خرجات من حياتو وخلات قلبها معاه لي عمرها فحياتها ماغادي تبغي قدو ولا تسلم قلبها لغيرو خرجات وهي كلها عداب مشات لبيرو جمعات كل مكايتعلق بيها من دكريات هزات كرطونة فيها كاع الحوايج ديالها عنقات شاف رشيدة او ودعاتها مشات جيهت الباب وكاتشوف فالبيرو لي ضحكات فيه وبكات فيه خرجات وسدات الباب وراها لقات منعم واقف كايتسناها سلم عليها وعينيها عامرين دموع كاتفكر اول مرة دخلات هنا اول لقاء مع منعم اول لقاء مع عصام نهار جات بشطل بهلاواني كاتفكر نهار خدمات بوحدها افراحها أحزانها المطعم ديال الخدمة لي ضحكات فيه وبكات فيه اتمشي وتخلي دكريات فهاد البلاصة هز ليها منعم الكرطونة وخرج على برا ياخود ليها طاكسي واقفة وحي محطة للاقصى درجة طلشي امالها وأحلامها مشاو ولكن كاع لي كانكونو باغينو كايجي القدر فوقو وصل طاكسي وركبها منعم وسلم عليها اودعها زاد طاكسي وخلى غير الخوا وراه
وعصام لي واقف الفوق ومقابلها وهو من الداخل ديالو كايموت الف مرة صافي كولشي سالا وكولشي مشا البنت لي بغاها من كل قلبو مشات من ايديه وضاعت بسبب تصرف ديالو الغبي خلاها تكرهو الكره لي كان كايشوفو فعينيها ماقدرش يتحملو ماقدرش البنت لي كايبغي كاتكن ليه كل كره بقا شحال وهو كيفكر وقرر يبعد من طريقها للابد كانواعدك اشيماء عمر وجهي مغادي تشوفيه وعمر شي انسانة مغاديش تجي فبلاصتك قلبي ديتيه ولكن انا لضيعتك من ايدي انا حمار انا مانسواش انا اندل انسان على وجه الارض من الاحسن انها مشات شيماء ماتستحقش انسان بحالي تستحق واحد حسن مني لي مايخليهاش تبكي انسان يعرف كيفاش يبغيها ويحافظ عليها اما انا مانستهلهاش شيماء بنسبة لي صفحة وتطوات ومشات كانبغيك اشيماء لكلمة لي ماقديتش نكولها ليك اني كنبغيك وعمري بغيت شي بنت قد مابغيتك وانبقى طول عمري كنبغيك وحبك ايبقى فقلبي الوداع يا أجمل وأروع حاجة طرات لي فحياتي الوداع.
"من بعد مرور 15يوم"
اشراق:وصافي اصاحبتي مالكي معبسة زعمة اليوم نهار الكبير ونهار فرحي
شيماء:ههه الحمقة علاه انا معبسة علامن غير عليك اليوم اتمشي لحيات جديدة وكاع ماغادي نبقى نشوفك
اشراق:هاد الحمقة هادي ومالي غادية لدولة تانية انا معاك فنفس المدينة احبيبة ومغاديش تهناي مني ومن صداعي هههه
شيماء:احسن حاجة دار نزار هي نقل خدمتو لهنا والله الحمد لله فرحتيني
اشراق:ماشفتيش انا شحال فرحانة منين كالها لي طارت بي دنيا وشفتي باه ياختي سبحان الله تكول غير شي مغريبي ومو لي شافها يكول واش هي لي كاورية
شيماء:الحمدلله جاب ليك الله ناس الله يعمرها دار
اشراق:شيماء بغيت نسولك وماتقلقيش مني
شيماء:عارفاك شنو باعية تكولي وجوابي هو الا من داك نهار عمري شفتو وأخبارو تقطعات الحمدلله لي ماما وبابا
ماحكروش على الموضوع واخا ماما بقا فيها الحال من جيهتي ولكن فهمتها زواجي بعصام غلط كبير واننا عمرنا مغاديش نتفاهمو بابا كالي (انتي تعرفي ابنتي انتي لي خدام معاك مادام عارفة مغاديش تفاهمو حنا بغينا غير مصلاحتك ولي درتيها حنى معاك فيها) اما خالتي تورية مسكينة جات عندنا كاتبكي بقا فيها الحال بزاف ماقدراتش تقبل ومزال لحد دابا كاتسوني علي وعندها امال انو نرجعو لبعضياتنا اما بدر عاق اني كانبغيه بصح ولكن تفهمني ومبغاش يحكر علي جات عندي اشراق وعنقاتني
اشراق:قدرتي تنسايه ا شيماء انا كانعرفك مزيان
شيماء:نكدب عليك الى كتليك نسيتو كانحاول ههه ولكن ماقديتش داكشي باش قبلت بالخدمة لي فإفران خاصني نبعد من هنا ونبعد على كلشي باش نقدر نسى اما الى بقيت هنا مستحيل نسى ونقدر نتلقاه طوال زمان ولا قصار
اشراق:او والديك شنو كالو
شيماء:انتي عارفاهم كيدايرين فالول مابغاوش والو خافو علي ولكن من بعد ما كاليهم سي أحمد اني انكلس مع ختو او وبنياتها عاد رتاحو شوية
اشراق:ويمتا اتمشي
شيماء:غدا ان شاء الله فالعشية ودابا بلا كترت الهضرة نوضي راه الكوافورة كاتسنانا. اشراق من بعد ما دازت سيمانة جا نزار او والديه عقدو ودابا اليوم العرس انا فرحانة ليها بزاف هي بعدا اتنسيني فهمي شوية اما هدى هي ولوحم وجاها على عمران مسكين مشيباه اما انا حالي هو حالي بديت الخدمة مع سي أحمد ومغطسى راسي فالخدمة باش منفكرش ونحاول انسى والحمدلله لي هاد الخدمة جاتني باش نخوي من هنا ونسى ونبدل حياة جديدة ورحلة جديدة.نضنا انا وأشراق مشينا لعند الكوافورة من بعدما اشراق ريزيرفات على القاعة وسربايا اما انا تكلفت بالحلوى من عندي صايبت ليها كولشي وهاد للايام كانبات عندهوم وكنحرم عليها وعلى نزار لي مسكين كايتسنى هاد النهار بفارغ الصبر مشينا انا واشراق للصالون دارو لاشراق سوان دو فيزاج قادو ليها دفار والماكياج ومشيطة جات غزالة مع هي غليوضة جات كاتحمق انا سبغو لي دفاري بالون الكحل ودارو لي مكاياج بالكحل ودهبي على حساب تكشيطة لي غادي نلبس اما الفولار انا لي انقادو جا بدر بطوموبيلتو يديني تلقاو لينا بالصلاة وسلام هدى ومليكة لابسين فراشات وناقشين ليدين ورجلين اما انا درت انقيشة خفيفة مع العروسة وغير بزز دخلنا وشعبي خدام طلعنا اشراق لبيتها لقينة نكافة كاتسنا كانسمعو طوموبيلات طليت كايباتو لينا أهل عريس جاين وصحابو حتى كاتبان لي طوموبيلت عصام حتى هي معاهم تقبط علي قلبي وبدا كايضرب بجهد مكنتش حاسبا حسابو ولكن مكايهمنيش هاصني نتصرف عادي ومانبينش ليه انو كيأثر علي حسيت بشي ايد على كتافي ضرت لقيت مليكة
مليكة:فين كاتشوفي للبركاكة من قبيلة وحنى نعيطو عليك
شيماء:ههه كانشوف واش نزار جايب معاه شي بوكوص
مليكة:الله يسمح ليك دوزي دوزي تلبسي راه ناس وصلو والكروب بدا يدير امارش وانا بداو يشدوني الهوايش
شيماء:انا لي خاص نشطح اما انتي راكي مرات راجل والله حتى يقزبك بدر
مليكة:ههه اشمن اختي نشطح قبل عرسي ونبرد هوايشي زيدي زيدي براكة من الهضرة حيدت من شرجم لبست تكشيطي لي كانت فالبيج بحال لون الحليب والكاكاو ومطروزة بالدهبي والحمر وفولارا فالحمر وساك وسباط فالحمر وعكر فالحمر ودرت واحد الريحة كانخليها للمناسبات من شوفات هدى ومليكة لي جيت خوخة ههه اما مليكة لبسات تكشيطة فالسومو وصفر اما هدى لبسات تكشيطة فالخزي جاو بجوجات غزالين ماشاء الله سالينا من لباس مشينا عند النكافة ليكانت كاتلبس لاشراق لبسة الولة البيضة شفتها تاترت حسيت بدموعي ايهبطو جات كاتحمق وكاتسطي قداتها نكافة وهبطات تعيط على العريس وخلاتنا معها
شيماء:ماشاء الله شنيويلة
جيتي لوزة تفيفيحة اليوم دوخي لينا نزار ويهرب بيك قبل مايسالي العرس
اشراق:هدى هضري مع هادي بغاتني مانكملش العرس بالخلعة سكتينا
هدى:ههه دابا نتفرجو فيها حتى هي ويعجبك الحال دور جايك ابنتي غير صبري
شيماء:لا لا أختي انا مزال علي الحال حتى نلقى فتى احلامي وبشروطي وديك ساعة نسني معاه الكونطرا وبشروطي
هدى:ههه غير كاتكولي هكاك غير بلاتي دابا يطوال ويعجبك ابنتي شوية دخلات نكافة ونزار على برا كايتسنى جات نكافة دارت شبيكة على وجه اشراق وخرجاتها وحنى كانصليو على نبي ونزغرتو وكانسمعو الجوق خدام مهبطين اشراق وهي شادة فنزار لي كان بحال توت الاوروبي كايحمق بالكوستيم ديالو الكحل وصلنا قدام الباب ودخلة ديال القاعة دخلات اشراق هي الولى كاع الانضار تاجهو ليها هي ونزار ليكانو موالمين لبعضياتهم انا كنت كانشوف غير لجيهتهم مابغيتش ندور لا تجي عيني فعين عصام نكافة وصلات العرسان لبلاصتهم انا رجعة لي بغيت نرجع نكلس حدا ماما جراتني مليكة لوسط باش انشطحو
شيماء:حتى انا عندي كانا واحد المرا سافرنا لكلميم وخديتها تماك وعمرني لبستها بقينا كانضحكو وفرحانين هادا هو الراجل ولا فالا الحاجة لي فرحاتها جابها ليها أهم حاجة تكون فرحان تفكرت راسي وتنهدت وسهيت
مليكة:مالك اصاحبتي واش ليوم خاصك تفرحي ولا تحزني شطحي شطحي وفقسي لي شي ناس
شيماء:هلامن ماتهضري انتي
مليكة:عصام من قبيلة وهو حاضيك ماحيدش عينيه عليك وبلاما دةري راه مقابل معانا انا غير سمعت هكاك وانا نزير صمطة وانا نكلس مكاين غير لوي لوي وستك ستك شوية ماحسينا بالهبيل ديال بدر...
طباخة الرئيس الجزء 14
محتوى القصة
التنقل بين الأجزاء