صورة مصغرة لـقصة طباخة الرئيس

قصة طباخة الرئيس

بقلم سناء الصنهاجي
رواية طباخة الرئيس

ناري يا ربي اش هاد الحصلة دري كايتسنا فيا وهاد بوخنونة بو شراوط شادني هنا ناري ومايحيد من قدامي ليوم ندير ليه خطوطو فوجهو 
ادريس مول المحلبة:شيماء الله يهديك واغير هضري معايا واش عرفتي شحال كنبغيك ولا لا كاتبانيلي فرايب فالحرشة فكلشي صطيتيني المشيشة
شيماء:المشة هي لي اتندبليك حناكك الى ما حيدتي لي من قدامي والله العظيم وماتعطيني تيساع راه انشرملك
ادريس :الله شويني قليني وشرمليني كلشي من ايدي...(ماخلاتو حتى يكمل هزات حجرة)
شيماء:واش اتفوتني عليك ولا لا دابا ختار دق الطريق وتغبر خنشوشك ولا نخيط لخويا وجهو
ادريس:هاهو غادي واشتي والله مانخليك لداك ولد بابا وماما لي انتي معاه 
شيماء:بصحتي وهاداك لي اندي يلاه غبر
ههههه دريس غبر مسكين خاف من جعواقة ديال شيماء تفوت فيه شي ضربة ايوا الحب ومايدير ماعلينا نقربو شوية من البطلة ديالنا المشرملة 
شيماء 25سنة 1:68 فالطول والوزن 78 ياعني عامرة ومرا وقادة قرات حتى الباك اداب وخرجت هي البنت وسط خوتها جوج بيضاء وعينيها خضرين وقهويين وماكبارش بزاف وكادير الحجاب والمضهر هو اخر همها حتى وجها ماكاديهاش فيه فيها ضحك وتقشاب والفعايل كاتجلس حتى تعيا وتزبلها غير هي قلبها بيض ونية داكشي لي محبب صحباتها فيها لي هوما 36 ديالها أكيد كانهضر على هدى واشراق واخا كلهم ماشي تاقادة ديالها ولكن هوما كل ماكتملك المهم انتعرفو بيهم من خلال القصة

تيليفون شيماء كايصوني 
شيماء:وي دغية توحشتيني ههههه سمحلي راه غير مكاينينش طاكسيات وصافي
بدر:اوكي حابوبتي انا كنتسناك غير ماتعطليش عندي بزاف مانقوليك وزيد عليها تواحشتك وبزااااف
شيماء :هههه بدينا عاوتاني راه مهم حبيبي انا نقطع باش نخلص طاكسي واخا 2 دقايق وانا عندك
نوصف ليكم بدر طويل 1:78 العضلات والفورمة وبيض وعينين قهويين وشعر رطب بتسريحة جديدة لي ولات واللحية بحال ديال حميد الحضري المهم خوخ ههه
وصلات شيماء عند بدر دخلات لكافي فين مالفين كايتلاقاو 
بدر:كون كانو رجال كايزغرتو كون انا اول واحد انزغرت ليك و أخيرا وصلتي 
شيماء :احيانا واتشوف داك بو خنونة (ويلي شيماء كنتي اتفرشي)هه بغيت نقول مول طاكسي عطلني 
بدر(بواحد ضحكة تهزات الكافي ولي فيها )هههه مم قولي ادريس مول المحلبة خطب عليك اشعارو ثاني وبلاما دفعي كبير علي احبيبة راني حافضك وخصوصلن عينيك حمرين هههه
شيماء:وصافي ناري على حماد الفرشة ضحكنى معاك هجرتيه لينا يا لاطيف مهم انت لاباس توحشتك 
بدر:حتى انا بزاف ايوا قوليلي لقيتي خدمة ولا مزال
شيماء:شفتي دابا كاتجرح لي لي سونتيمو ديالي وراك عارف هاد الموضوع بالضبط محسوسة منو ابدر خلينا هانييين 
بدر:ههه ناري واش انا مع شيماء ولا عبد المولى كطربيني بهضرتك كلها حكم وعبر هههه .شيماء انتي لي ماخليتينيش نتوسط ليك وانا كنعرف ناس بزاف وخصوصان فضومين لي بغيتي واتكوني مرتاحة
شيماء: لا والف لا راك عارفني كانبغي نعتامد على راسي ماشي يبقاو يقولو فنيانا فلان لي دخلها لا غير خليني ربي كبير أعويناتي
بدر: كادوبيني وكاتسحريني وتنسيني شنو بغيت نكول
شيماء: اجي انت بعدا اراس طارو شفتك من البارح مصدعني بغيتك اجي بغيت نعاود ليك على وديتك خليت هدى كاتسناني

خليت هدى كاتسناني جنب البحر باش نديرو شوايا وجيت عندك وانا قاتلني جوع عارف حبيبتك انا والاكل قصة حب لا تنتهي يو هاهاهاها
بدر:راه كتليك عبدالمولى مارضيتيش كاتفضلي الماكلة على حبيبك المهم انا نقوليك الالة انا حاير بزاف اشيماء ماعارف ماندير راه واخا كاتشوفيني كانضحك ربي لي عالم بيا والله 
شيماء:حسا بيك شيحاجة حيتاش منين كاتقلبها ل سيبيسي دراما كانعرف بيك شيحاجة وطلقنا خلاص راه درتي لي الارارة 
بدر:(بتفكير كبير وطويل)شيماء نفس المشكل معا الواليدة بغا لي ديك صفريطة دبنت ختها لي اصلا انا مكانحملهاش وانتي عارفاني شكون كانبغي والمشكيل الكبير الكلمة الاخيرة هي ديال ولد عمي راكي عارفا هو الكل فالكل وهو لي شاد كلشي وبحكم اناهو كبر مني فالسن والخبرة حتى واحد مايقدرش يعارضو شنو ندير اشيماء حرت وتلفت
شيماء:لي تلف يشد الارض نصحك ابدر انت كبير ماشي صغير خاصك دافع على حياتك وحبك وانا ليكانعرف هو مليكة كتبغيك بزاف وبنت قارية وبنت ناس وعمرها فكرت فالفلوسك
بدر:ولمن تقوليها كلشي كايكوليك باغا فلوسك اصلا مستقبلي انديرو راسي براسي ماكنستنى منهم والو ومليكة هي لي اناخود واخا نعرف نخرج من دار
شيماء:لي خاصك تعرف هو انا عمري نتخلى عليك وديما فجنبك ماتنساش الهبيل راه حنى خوت وصحاب من يامات الابتدائي واخا ماشي نافس المستوى ولكن انت راه توأم ديالي الله يخليك لي اخويا العزيز عمري نخليك 
بدر:انتي عارفني كيفاش داير وعندي كلشي بحال بحال وانتي راه ختي لي ولداتها لي دنيا الله يخليك لي المشرملة ديالي
شيماء:واش دابا معيور معيور راه انخبط خويا دابا 
بدر:ههههه راه كتليك عبد المولى
بجوجهم دقة وحدة(هاهاهاهاهاهاهاهاها) فهاد الاثناء كانت طوموبيل كحلة مقابلاهم من بعيد وبنضرات ديال الحقد والغضب

(هادي هي لي متلفاك ومخرجة ليك العقل وتحديتينا عليها دابا غانشوفو شكون اينجح انا ولا انت) با حميد ديني لشركة
نعرفكم بي بدر وعلاقتو بشيماء من الابتدائي قراو مع بعضياتهم وكانو ديما مدابزين والمعلم مجري عليهم مرة مقطع لشيماء شعرها قبل ماتحجب مرة خاون ليها البيكار ديما مدابزين وشيماء سالخاه وناتفاه حيت كان شعرو طويل وحيت هو من اسرة لباس عليهم ولكن بدر غير قراو حتى الكوليج والعداوة رجعت محبة وصداقة واخا كانت شيماء كبر من بدر بعام ولكن مفاهمين بزاف وكثر من الخوت وهكا بقاو شيماء شدات الباك ودارت تكوين فمجال الطبخ لي كاتبدع فيه وبدر دار الفندقة بحكم عئلتو خدمتها كلها فهاد المجال(نرجعو لقصتنا)
شيماء تفرقت مع بدر ومشات عند مستشفى المجانين دصحاباتها لبحر 
هدى:والله حتى انتفك بالله
اشراق:اضسرتي اديك المعوقة ولا توحشتي سبان
شيماء:اديك البرميل والله وماتسكتي نوض نشوي ختي راه عرفتوني معامن راه كنت مع بدر اجيو فينهيا مليكة 
هدى:راه كاتليك مايمكنش ليها تاكل سردين وماتحليش ومشات تاخد شيحاجة راه اتجي بينما زندنا الفاخر وقادينا اتاي ايوا عاودي لينا بدر اش كايعاود شنو دار 
شيماء:مسكين بقا فيا واليديه رافضين ليه مليكة وهو حالف مايدي من غيرها وانا حالفة حتى نوقف جنبو راه بحال خويا ودابا مبغيتش نفتح لموضوع قدامها لبنات الله يخليكم غير تجي سكتو
اشراق:وشنو فجهدك انتي ماديري راكي عارفة طاسيلتو فين واصلين 
شيماء:المهم لي فجهدي انديرو مايمكن جوج دناس كايبغيو بعضياتهم بحال هكا يتفرقو ودوك عائلتو عصبوني همهم غير الفلوس ناري ونشوف ديك العائلة انكدو ليهم ونحطو ليهم حطان ونبرد غدايدي 
اشراق وهدى فدقة وحدة (هاهاها عارفينك احنينتي الله ينجيهم منك وخلاص)
شيماء واش اتقابلو لي تكركير واش نبقى بجوع انا يلاه باليو

هدى:هي لولة الالة نوصف ليكم الابطال ديالنا 
هدى (العينين كبار كحلين وشعر طويل وبيضاء البشرة ماطويلاش بزاف السن 20سنة وهي الوزة دالمجموعة)(اشراق :العينين كبار وحتى هوما كحلين شعرها ماطويلش وقصيرة ودبيبيزة وكادير نضيضرات السن 21سنة وعايشة في فرنسا ودابا جات المغرب هي مشاغبة الكروب ) هههه وشيماء كاتجيبلها تمام ولكن بميت راجل كيف كايقولو )(مليكة حبيبة بدر عامرة السن 18 سنة كاتقرا فلفاك من اسرة متوسطة كادير الحجاب وعويناتها كبار وقهويين وغزالة شافها بدر فخطوبة صاحبو لي خدا صاحبتها تم اعجب بيها وبقاو على تواصل حتى تحول الاعجاب لحب صافي ونقي)هادو هوما ابطالنا لحاد دابا الباقي نكتاشفوه فقصتنا لي نرجعو ليها 
من بعد البنات ماشعلو الفاخر جات مليكة والبنات مافتحوش موضوع بدر نيهائيا حيت مليكة حساسة ودرويشة شواو سردين عركوها مزيان لعبو وشطحو وغناو بحال العابات وشيخات هههه وكل وحدة مشات لدارها لتدكير انا اشراق وهدى خدامات مليكة لفاك معادا شيماء مسكينة لي كاتقلب او والو 
دخلت شيماء لدار 
الام:وفين اعزري ضوار من صباح وانتي خارجة ماسولتي ماقلتي نحتاجك فشيحاجة
شيماء:وا زين ديالي وامو عوينات هانتي اتكعينا عاوتاني الواليدة (شيماء ماحسات بالصندالة تلاتية الابعاد جاتها نيشان لراس)وا الله حتى حرام عليك اماما
الام:راه مليون مرة كانقوليك ديك كلمت الواليدة ماكانحملها واش انا والدة بنت ولا دري مشمكر
شيماء:ناري اماما راه غير كانبغي نضحك معاك وصافي المهم كاين مايدار قبل مانطلع البيتي
الام:غير دوك الماعن لي فلابابو صافي مابغيتيش غداك؟؟

شيماء:لا راه تغديت مع البنات فالبحر
الام:المهم سالي دوك الماعن وطوي ماريوك راه داير كيف سليكة فوق عليكة
شيماء:هههه واخا اماما كوني هانية
طلعات شيماء لبيتها كاتجمع حوايجها وهي كتفكر فكلام بدر وعائلتو لي واقفين ضدو حتى سونا ليها تيليفون
شيماء:الو مليكة كيديرة حبيبتي لاباس عليك
مليكة:حمد لله اختيانا عارفاك شفتي بدر عاود ليك كلشي ياك اختي معنديش زهر انا والله حرت وماعرفتش شنو ندير واصلا رضات والديه هي لولة كنت مشيت حتى بغيت نقوليه كل واحد فطريق ولكن مقديتش وحتى هو ماقدش شنو ندير اختي
شيماء: وياك تخلاي عليه غير هوما عندهم يسحابو ناس كاع طماع شوفي ماتخافي والو الله معاكم وحتى انا اندير كتر من جهدي كوني هانية اختي حنى خواتات لا متكوليش هكاك مابيناتناش
مليكة: ربي يخليك اختي عدبناك معانا خليت ليك الراحة اختي بسلامة
شيماء :يكون خير بالسلامة.
لي ماعارفينوش ان مليكة بنت جيرانهم دشيماء وكيف الخواتات
سلات شيماء شغالها توضات وصلات ودعات مع اصدقاءها ونعسات فهاد الوقت فدار بدر 
غيثة الام دبدر: واش شفتيه بصح معاها واخا داكشي لي درنا معاه وقطعنا عليه كلشي وصفها لي كيدايرة كيف كانو 
الشخص:اه شفتهوم وكانو فجو ياسلام رومانسي وكيف اتكون فنظارك وحدة باينة جايا من حي شعبي حتى من لباسها بلدي ماشي من مستواه وباينة باغية غير فلوسو 
الام: وهضرتها
الشخص :ماسمعتهاش ولكن كايبان لي متقفة ولكن فاش كايهمنا هادشي المهم نبعدوها عليه بأي طريقة كانت
الام: وشنو الحل
الشخص:هادشي خليه لي انا راني تحريت عليها منين وسن والاسم وشنو كدير وكلشي متخافيش حسابها معايا
الام:وفين ساكنة
الشخص:هادشي خليه لي عارفك غادي ديري شيحاجة خارجة لعقل لدالك هادشي خليه لي ماتنسايش علاش قاد .
صباح جديد وحدات جديدة ناضت شيماء

ناضت شيماء على سونيت ديال تيليفونها
الو سلامو عليكم
شيماء :عليكم سلام شكون معايا
البنت: شيماء الجندي هادي
شيماء:اه هي هادي 
البنت : معك وكالة الخدمات انتي دفعتي لينا سيفي ديالك وكلتي انك ممكن تخدمي وتكلفي بالخدمات ليكايجيونا من عند الفنادق وشركات وكل مكايتعلق بالطبخ وتنظيم الحفالات عقلتي الى كنتي مزال مهتمة راه قبلناك
شيماء ماقداتش تيق:ياه اختي مزال مهتمة انا شوية ونكون عندكوم شكرا ليكم بزاف اختي مع سلامة
شيماء ناضت كاتنقز هبطات عند ماماها الام: مالك يا هاد البنت ياكما شدك بوغطات
شيماء اوياي اماما ابشري بنتك اتخدم اخيرا اخيرا انخدم فداكشي لي بغيت الطبخ ونولي شاف قاد دنيا ونجح ونتشهر
الام:واتي سيري كلسي لارض كون خدمتي مع مرة مسعود فالعرسات طيبي حسن ليك
شيماء : اويلي اماما ندب حناكي انا نتي مالكي مالكي كاتحطميني كانكوليك شاف كاتكوليلي طيابة مهم مانخليك طيريلي الفرحة انا نمشي نلبس حوايجي ونمشي لا نتعطل 
الام :ايوا ابنتي الله يسهل عليك ويسر ليك امورك ويحميك من شر الخلق
شيماء باست ماماها طلعات لبيتها غسلات توضات صلات لبسات سروال فضفاض قميجة كحلة وشال فسومو حبطات خدات تاكسي نيشان الخدمة دخلات سلامات على البنت لي عيطات عليها كاتليها تسنا يجي المدير كلسات كاتسنا حتى جا المدير سي أحمد رجل خمسيني دخل تبعاتو طلبها تجلس جلسات
سي احمد:انسة شيماء طالعنا على سيفي ديالك وقبلنا انك تبداي تخدمي معانا ولكن اتبداي كامساعدة
شيماء: لي شرف سي أحمد كنتمنى نكون عند حسن الظن
سي أحمد :المهم اول حاجة ادوزي معانا ستاج مدة 4اشهر الى خدمتي مزيان وتابرتي اترسمي معانا
شيماء: كون هاني اسي احمد
هنا جا اتصال لسي احمد :الو اهلا اهلا اهاه اهاه الله اودي سيادتكم امر طلبك عندي اسي الوالي ان شاء الله مع سلامة

سي احمد ضار عند شيماء 
عندك الزهر ابنتي شيماء هضر معايا دابا واحد من أهم مالكي الفنادق فالبلاد وعندو حتى فبرات البلاد وصاحب اكبر شركة ديال الديكورات فالسبانيا وعندو الفرع ديالها هنى فالمغرب وهاد المدة خاصة لي تنظم ليه الحفلات من اكلات مغربية وعصرية وحتى لي تنظم ليه الحفلات وتكوني مساعدة شيف رشيدة حيت يلاه بديتي وماعندك خبرة ولكن كابان عقلك خفيف بنتي لي طلب منك هاد سيد ديريه الى رفضتي ليه عتابري راسك مرفوضة من هنا هدا راه سي عصام الوالي الكبير وصغير كايحتارمو جدي وصارم فخدمتو وهاد مدة ستاج ديالك اتخدمي معاه الى متشكا من حتى حاجة وسمعتي تاعليمات شيف رشيدة اتخدي خدمتك بعينيك مغمضين تفاهمنا
شيماء :اه تفاهمنا كون هاني سي احمد انحمر ليك وجهك (شيماء مع راسها هاد الكنية ماعرفتش فين سمعتها وشكون هاد سي زعطوط لي مصدعنا وداير لينا للارارة اوووووف كوراه باين شي واحد خانز مال ويتأمر على ناس لي بحالنا حنا وجاي عندي انا الله يدير لي فيه الخير وصافي ) كلتي شي حاجة ابنتي
شيماء ااا لا لا غير كتليك ممكن نمشي 
سي احمد :اه سيري ابنتي وطركي معاك سيكريتيرة طعتيك العنوان الله يوفقك ويكون معاك
شيماء:امييين (واش انا غادية نحارب يا ربي دير شي تا ويل دلخير) خرجات شيماء مشات عند سيكريتيرة عطاتها العنوان خداتو ودارتو فصاكها ومشات خدات طاكسي لدار دخلات عاودات لماماها كلشي تغدات وطلعات ترتاح وهي كاتفكر فلي جاي حتى داها نعاس

فاقت شيماء بكري توضات وصلات صلاتها ودعات الله مايحشمهاش حيتاش هادا اول نهار ليها فالستاج هبطات لقات ماماها مسكينة وجدات الفطور
شيماء:صباح الخير ماما كيف صبحتي مزيان
الأم:الحمد لله ابنتي فطري وهاكي فلوس طاكسي اليوم بلاما تمشي فطوبيس باش ماتعطليش على خدمتك واخا كون ياعفتيني وكلستي 
شيماء:ماما الله يهديك عارفاني بغيت نخدم ونحقق داتي وداكشي باش كانحلم نحقق فيه غير شوية
الام:ابنتي ويلا جاب ليك الله ولد ناس ماشي حسن من الخدمة وتكرفيص والمشي والمجي وانتي تبارك الله درتي 25
شيماء:مدام الله مزال ماجاب لاش نكلس ونضيع راسي نخدم بعدا ونعول على راسي وماعرفنا الخير فين كاين غير انتي دعي معايا المهم انمشي دابا انتعطل ويلا قابلتك اماما ليوم مانساليوش يلاه هانا مشيت في أماني الله
ألام: بسلامة ابنتي(ياربي تيسر ليها ماصعاب وتعاونها وتحميها من شر الخلق يا ربي)
شدات شيماء طاكسي نيشان للعنوان لي عطاتها سكريتيرات سي أحمد كانت شيماء لابسة سروال فضفاض كحل قميجة بيضاء بلاصو كحل وفولار كحل وصبات وساكها يعني لابسها عادي هادي هي طريقتها فلبس بسيط وعملي وقفها طاكسي حدا واحد الفندق كبير واخا تعلي راسك ماتحديهش بلعلو نزلات خلصات الطاكسي وطلعات فروج
سلام لالة شنو حاب الخاطر
شيماء:انا شيماء الجندي مساعدة ديال شيف رشيدة
مرحبا سيدة رشيدة فطابق تاني كاتسناك شيماء غادية وكاتشوف حداها الناس كيدايرين وشنو لابسين ها الاجانب هالمغاربة ها شرقيين كةلشي مخلط هالي مستور هالي معري ناس فين عايشين ودارويش كالس ياكول شحط فبلاصة ما يتعاونو مع ناس البسطاء والاو غير شوي وهوما كالسين على زهو ونشاط فيقي يا شيماء انتي جايا تخدمي هنا وتبتي داتك وراسك وتبين حنت ايديك ماحسات براسها حتى دخلت فواحد الشخص 
شيماء:سمحلي كونت ساهية شوية

الشخص :ﻻ مكاين باس سمحيلي ولكن عمري شفتك عندنا هنا فالفندق
شيماء:اه لا انا انخدم هنا مساعدة شيف رشيدة 
الشخص :مممم مزيان انا منعم مدير الخدم هنا كنتمنى دوزي معانا وقت زوين ومرحبا بيك تاني مرة
شيماء:انا شيماء ربي خليك خويا منعم شكرا نخليك خاصني نلتاحق بالشيف 
منعم كان شخص لطيف وباينا فيه ضريف متوسط القامة ومابيهش مقبول
طلعات شيماء لطابق تاني دقلت الباب لي وراوها دخلات لغرفة كبيرة نكولو مكتب كبير مفرش فراش عصري بفراش صومو وكحل وبيض عندو شرجم كبير كايطل على الشارع وكومبيوتر وجوج بيروات واحد كبير وصغير الكبير كانت كالسة عليه واحد سيدها فعقدها رابع ديك 44 سنة 46سنة ولكن انيقة طالقة شعرها طويلة وعامرة خمريات اللون عينيها كبار وكحلين وكانت كاتبان بحال الى واعرة
شيماء سلام سمحيلي على تعطيلة انا شيماء المساعدة ديالك شيف رشيدة 
طلعات راسها شافت فيها مزيان :كنتمنى تكون هادي اخر مرة تعطلي شيماء حيتاش عندنا بزاف مايدار ومخصناش نضيعو الوقت ونكونو يد وحدة وتعلمي مني ونعطيك خبرة وحسبيني بحال ختك الكبيرة ويلى غوت عليك غير المصلاحتك ومتقلقيش تافقنا
شيماء:وي شاف متافقين كنتمنى مانخيبش ضنك(هاد شاف طلاعات عكس توقعت كنتمنى كلشي يدوز مزيان)
شاف:دابا عندي جدول يال أعمال ديال الفندق غادي نخدمو عليه انا طالعت على الملف ديالك وعجبني وعارفة اناعندك افكار وراسك خفيف دابا على باركتي الله انبداو
فعلا بدينا العمل على الجدول كل وجبة وشنو انحضرو فيها اما الحفالات فغادي نتكلفو بيهم من ديكور واكلات حيتاش مدير الفندق كايجيو عندو ناس مهمين كايعقد معهم صفقات ونفس الوقت كايدير ليهم العشا وحفلات صغار تافقنا تقريبا على كلشي وقرارنا الغد انانا نبداو الخدمة ديال بصح اليوم وضعنا المخطاطات والافكار

قادينا أمورنا سلمت علا شيف رشيدة وخرجت فحالي شديت طاكسي طلعت لدار لقيت ماما مسكينة كاتسناني
الأم:أمضرى ابنتي كيدوزتي اول نهار
شيماء:الحمدلله داز كلشي بخير ناس مزيانين وعاملوني بخير غير هو اماما مرة مرة ممكن نتعطل حيت جدول ديال الخدمة ايكون عامر بزاف
الأم:مهم هو ردي بالك لراسك ابنتي والله يسر ليك نوضي عارفاك ماكليتيش او وجدة ليك الاكلة لي كاتعجبك
شيماء:ناري دارتي لوبلوبة الله يخليك لي يا أحسن ام فدنيا
الأم:احيانا فيك امو كرش هههه
(مالكوم معجبين اه اه لوبيا هي عشقي الابدي خصوصا مع الهريسة مانعاودش ليكم يلاه سكتوني خليوني نخشي فوجهي)ساليت غدايا غسلت دوك تباصل طلعت توضيت وصليت صلاتي لي تجمعات علي وكلست كانتكونيكتا مع البنات فالجروب ديالنا
شيماء:البنات راه ليوم لقيت خدمة وبديت اول نهار لي فالستاج
اشراق وهدى :بصح احبيبة الف مبروك فرحنا ليك واكوني مرا وكادة وعنداك ديري شي مصيبة كولي لينا كيداير المدير 
شيماء:ماشفتوش مابانش راكي عارف الناس الكبار ماكايهبطوش لبلاصت الموضفين كايبقاو غير الفوق انا مساعدة شاف رشيدة وضريفة وكنتمنى يكون خير خصوصا كايكولو المدير صعيب
البنات:المهم انتي ديها فخدمتك ودخلي سوق راسك راه عارفينك ههه
شيماء:واصافي سكتونا شحال فيكم يلاه نخليكم راني عيانة..
يلاه بغيت نعس صونا بدر
شيماء:واناري واش ماتخليش لي ينعس بدر:ممم ناس لقاو خدمة او ولاو معافرين
شيماء:ههه ضحكتيني الله يعطينا وجهك راك عارف مافياش هادشي
بدر:غير كانضحك بغيت غير نسول فيك الى خاصك شي حاجة انا موجود
شيماء:لهلا يخيطك انا عارفة شنو كاين يلاه خليني نعس راه عييت
بدر:ممم واخا اللالة تصبحي على خير ا عبد المولى
شيماء:هههه اتمشي لا
بدر:صافي صافي ها هو مشى
الغد ليه فاقت شيماء توضات وصلات

لبست صايا طويلة فزرق وفيسته زرقة وفولارة هبطات فطرات شدات طاكسي وخرجات الخدمتها دخلات الفندق لقات شاف رشيدة سبقاتها
شيماء:صباح الخير كنتمنى اليوم نكون جيت فالوقت
شاف:ههه بضبط مهم نبداو 
شيماء:على بركة الله
كنتمنى مانكونش قاطعتكم
شاف:لا سي منعم تفضل شنو حاب الخاطر
منعم:رسلني المدير نشوف واش خاصكم شي حاجة ونقوليكم اليوم عندو عشاء عمل على غفلة وبغاكم تكونو فالمستوى واخا هو الشاف رشيدة منين سمع انا المساعدة ديالك بنت ويالاه بدات ماعجبوش الحال شوية حيت بغا خدمتو تكون تحت ايدي ناس عندهم الخبرة سمحيلي شيماء عارفة هاد الهضرة اتقلقك ولكن انا بلغتكم بشنو كال وكانعتادر مرة أخرى
هنا شيماء بحال الى صرفقتيها مارضاتش (شنو كايحساب راسو عاجبو راسو المغرور لاخور يحشي لي فالهضرة غير عندو شوية دلفلوس يطلع لي فوق راسي شنو بسبابو انخسر خدمتي لي كانحلم بيها لا مايمكنش نضيعها بين ايدي خاصني نصبر ونبين لهاد راس طارو علاش قادة)
شاف رشيدة:منعم كول الباطرون ديالك لا فرق ما بين بنت او ولد وحنى ختارينا شيماء لكفاءة ديالها وهو مايعرف غير خدمتو تمشي مزيان كنتمنى تبلغ ليه رسالة ديالي وشكرا وكنتمنى منك تخلينا نبداو خدمتنا
منعم :واخا شاف وسمحولي
شاف رشيدة:شيماء كملي خدمتك وامتديهاش فهضرتو الى هو مدير الفندق فانا مسؤولة عليك انتي
داكشي لي درت كملت خدمتي وحيدت من بالي اي حاجة باش ماتعكرش لي صفاء دهن ديالي قادين معضم الاعمال من قاعة ديال ضيوف لحلويات ومأكولات بصطيلة بالحوت شلايض لحم دجاج تقريبا البوفي كان عامر اشكال وألوان واخا انا عييت وبزاف ولكن كنت فرحانة للانجازات لي درت مع شيف رشيدة
شاف:برافو شيماء ماعندي مانقول راسك خفيف وعاونتيني بزاف وكانضن فيك جوع سيري خودي ليك شيحاجة تاكليها قبل مايوصلو ضيوف

شيماء:اوكي شاف ههه
خرجت مشيت نيشان لمطعم الفندق خديت بانيني بالدجاج وشلاضة كليت حتى شبعت صراحة كان في جوع وكنت كانتخايل غير ديك لوبيا ديال البارح ههه
ساليت خرجت من المطعم تلاقيت مع منعم
منعم:سلام شيماء كيدايرة كيدازت الخدمة هاد الصباح
شيماء:الحمدلله الخدمة غادية مزيان ربي يخليك
منعم:داكشي لي بغينا غير تكوني مرتاحة وكانعتادر على كبيلة ماتديش على المدير راه واخا قاصح ولكن قلبو بيض وجدي فخدمتو
شيماء:مكاين لاش تعتادر انت ماعليك والو (العيب فداك راس طارو) مع ضحكة صفرا
منعم:إنا طارو
شيماء:واش كلت شي طارو ااااه هههه بغيت نكول واش ماشتيش الراجل لي طاح البارح فطارو دباب الفندق هههه بقينا كانضحكو انا ومنعم صراحة ضريف بزاف
منعم:شيماء شنو ضهر ليك نديرو انا وياك شي قهيوة وماديريهاش مني قلت صواب عتابرتك صديقة وسمحيلية
شيماء:لا هانية الله اودي مارحبا
ممم تبارك الله مافخباريش تفتحات جردة العشاق هنا ضحك ومواعيد كادار ممم (منعم مسكين ولا حمر وكايشوف ورا شيماء اما شيماء حسات بالبرودة طالعة معاها وايديها عرقو حتى من رجليها فشلو عليها وبحال الى تزرعو فالارض ماقداتش ضور وتشوف صوت من لي زلزل الارض وخلق سكون ورهبة ورعب كان خاص غير صوت الرعد والبرق وتكمل شيماء بدات كاتصفار وتخضار هاد الصوت الجبار لي زعزعها وخوفها وخلاها تابتا ماكاتحركش حتى من لسانها مات عليها هي لي كان جوابها على طرف لسانها 
منعم: سي
الشخص:بلا سي ولا ماشي سي كنت كانضن انك جاي هنا تخدم وتقابل خدمتك ماشي بلاصت تفلية والمواعيد تافها أحسن ليك تمشي لخدمتك ومانعاودش نشوف بحال هادشي مرة أخرى هنا 
هنا شيماء صافي عيات ماتسكت شكون هاد البعكاك ولي حاسب راسو شاريهوم بالفلوسو حتى هوما بشر من دم واللحم وهادي راه فترة الاستراحة ديالهم ضارت شيماء

شيماء: شوف أ
شيماء تزنزلات ماعرفات ماتكول هو فعلا ماشي وسيم ولكن نوصفو فكلمة وحدة كامل الرجولة جداب بكل معنى رجولتو وحضورو طاغي كاين فرق مابين واحد زوين وغزال والبيوضة واللحية مطراسية ومابين هادا لي قدامها (نوصف ليكم طويل القامة بشكل ملفت عاريض الكتفين أسمر اللون نيفو منكاد وعندو ديك الحفرة فالكادومة ديالو العينين قهويين مشفرين ولكن شوفات حادين كيف صقر اللحية خفيفة والموسطاج وأشعر رطب كيف الحرير فلون بني وديك ضحكة ديال الاستهزاء على وجهو كاتحس بحال الى المكان كلو ساكت كايتسنى اشارة منو شيماء جمعي راسك راجل بغيتي تاكليه بعينيك اصلا ماشي نوع لي كاتبغي)
شيماء:احم شوف اسي كيفما بغيتي تكون ماشي من حقك تأمر علينا وتنهي بحال الى حنا العبيد ديالك فهمتي ولا لا خدمتنا حنا كانديروها وعلى اكمل وجه وهادي راها فترة الراحة ديالنا نديرو فيها لي بغينا مامنحق حتى شي واحد يجي يحاسبنا وزايدون انت شكون فالملك الله باش دير لينا هاد الحالة يكما تكون البركاك ديال المدير وجاي دير علينا المدير هنا داكشي فاش حادكين ديرو وماديروش ياخ تريكة ناقصة 
شيماء خرجات كاع لي فقلبها وخلاتو مصدوم وشوفاتو كتر وأشد من طلقة ديال الرصاص 
دخلات على شاف كاتغلي بغات تنفاجر ونضراتو مزال فدهن ديالها 
شاف:شيماء ياك لباس مالك
شيماء عاودات ليها كلشي شنو طرا من لول للاخير
شاف:شيماء ياكما يكون المدير وكحلتيها معاه
شيماء:لا مانضنش ايكون غير المساعد ديالو ولا ايدو ليمنة ويسحابليه راسو حنا سطولة وبغا يدير علينا شاف وزايدون سمعت شي موظفين كالو انا المدير مكايهبطش من العرش ديالو ولي بغاه كايستادعيه المكتب ديالو وحتى فاش كايخرج كايخرج من الباب اللوراني لباب شركة
شاف:صافي نساي وخلينا نكملو خدمتنا ضياف مابقا ليهم والو ويجيو

قادينا كلشي فصالة وختاريت اني ندير بخور العود باش نعطي لمسة مغربية للاجانب صافي سالينا شغالنا طلعنا لبيرو نرتاحو شوية بينما جاو ضيوف ونستاقبلوهوم صراحة عييت بزاف وبانت على وجهي خصوصا اني تعصبت من الموقف الي وقع كبيل ولكن ماشي وقت التفكير دابا وقت الخدمة
شاف:شيماء كانضن ضيوفنا وصلو يا ربي دوز هاد الليلة على خير وكنتمنى يدوز كلشي مزيان انتي تكلفي بضيوف وكوني فالاستقبالهم انا انكون حدا البيفي ونلبي طلاباتهم اواخا يستافزك شي واحد ديري عين ميكة وديري راسك ماسمعتي والو تافقنا
شيماء:وي ختي رشيدة تافقنا
هبطنا القاعو كانت كبيرة بزاف بأتاث رائع وتريات وزادت ريحت العود لي طلقت ضافت لمسة رائعة خديت بلاصتي والشاف خدات بلاصتها بداو الضيوف كايدخلو ستاقبلتهوم بالبتسامة ديال الترحيب كانو اغلبية رجال أعمال كانو شي 4 الاشخاص لي فتلاثينيات وشي بنات قلال دخلو ستاقبلناهم بالعصير والحلوة وانا لي كنت كانقدم ليهم وصلت عند واحد من دوك 4 الاشخاص صراحة كان غزال ولكن كان باين بو البنات 
شيماء:مرحبا بسيادتكم تفضل
الشخص:مم اول مرة نشوفك هنا انتي جديدة 
شيماء:اه جديدة تفضل (ناري شحال لصقة وحاس براسو اوف طلقنا خلاص)
الشخص: انا وديع شمسي وانتي انسة
شيماء:شيماء الجندي فخدمة سعادتكم
وديع:ممم شيناء سميتك زوينة (مع غمزة وضحكة فجنب)
سي..
الشخص:سي وديع كنتمنى يكون عجبك الاستضافة ديالنا
انا حسيت بالبرودة هاد الصوت ماغريبش علي ضارت كانتفاجئ بداك المخنزر ديال كبيلة ولي زاد صدمني وزعزعني ديال بصح وحسيت براسي اني خسرت خدمتي منين كاليه...
وديع:كلشي مرتب وزوين تبارك الله عليك سي عصام كيفما كانت متوقع
(صافي مشيت فيها هادي الاخيرة لي ولكن راه هو انا مامني والو وزايدون لي فجهدو يديرو رزق بيد الله)

سي عصام:انسة كاتسناي شي حاجة كانضن الخدمة تابعاك ولا كاتسناي تسمعي شي حاجة اخرى
شيماء:لا سيادتكم .ومشيت حسيت براسي وليت كيف مطيشة ومعجبنيش الحال شنو كايحساب ليه راسو يهضر معايا هاكا بوراس لاخور المهم مشيت كملت خدمتي مرة مرة كاتجي عيني فعينين المخنزر اه هاد سمية جات معاه اما عصام بزاف عليه بشوفات باردين مون كان رصاص فعينيه كون قتلني ماعرفتش شنو سباب ولكن هادو هوما لي من طبقة الغنية كايشوفو فينا حنا شوفا ناقصة كلت مع راسي نكمل خدمتي ونسى علي هادشي ولي دارها الله هي لي اتكون شاف رشيدة تكلفات بالعشا وبكلشي كلاو ضيوف وكلشي كايشكر فالماكلة ديالنا انا وشاف رشيدة سالينا كلشي كانت كاتبان لي غير سداري والمانطة والنعاس عييت بزاف بالوقيف وجهي تجبد بكثرت الابتسام شوية كانسمع المدير خدا الميكرو
مساء الخير سيداتي سداتي بغيت نكول جوج كلمات ماغاديش نطول عليكم سعدني حضوركم وتشريفكم لي ومشاركتي الفرحة ديالي بابرام الصفقة ديالي اليوم لي هي نوع من تطور للفندق ديالي وديالنا كاملين كانشكر الموضفين ديالي لي قايمين بخدمتهم وكنقدم الشكر ديالي ليوم لشاف رشيدة لي شرفاتنا اليوم وجميع الاطباق كانو من ايديها شكرا بزاف
شيماء (وانا انا مامحسوباش انا لي خدمت نص دوك الاطباق حتى كلمة صغيرة شكر لي مكايناش ) شيماء حسات بالحكرة والبكية خانقاها ولكن مابغاتش تبين وصرطاتها وسكتات 
سلام شيماء انتي لباس
شيماء:سلام منعم انا الحمد لله ربي يخليك
منعم:مالك بنتي لي ماشي حتى الهيه ياك لباس
شيماء:لا والو غير العي كيف ديما
منعم:مابقا والو وتمشي ترتاحي فكرتي فلي كلت ليك
شيماء:وي ان شاء الله
منعم ساليتي خدمتك 
منعم:متفاجئ وي سي عصام ساليتها
سي عصام:واخا بامكانك تمشي واللحظات الغرامية ديالك مانبغيهاش عندي هنا مفهوم

منعم:وي سي عصام سمحوليا
مشا منعم مسكين حادر راسو مكرهتش كون شديت هاد عصام وردخت بيه الارض اشنو كايسحاب راسو
عصام:الالة شنو كتسناي انتي من نهار جيتي لهاد الفندق ونتي ملاهية على شغالاتك باغي نكوليك جوج كلمات هادي راها بلاصت الخدمة ماشي بلاصة التجمعات والمواعيد داكشي لاش طلبت يكون طاقم المطبخ متكون من شاف او الراجل 
شيماء:راه زدتي فيه وبلا قياس من الصباح وانت تأمر وتنهي وماكلت والو حلفت نميك ونسكت ومانجاوبش ولكن باش تقيسني فكرامتي راك فاتي حدودك خدمتي ودرتها على أكمل وجه وكون ماشي انا وشاف رشيدة ماتشوفش هادشي لي قدامك حنا ماشي عبيد عندك تأمر وتنهي علينا كيفما بغيتي 
( هنا عصام عروق راسو بانو بالاعصاب عمر شي واحد ماتجرأ وهضر معاه عكا كلشي كايحتارمو ولي كالها ماكايتزايد معاه حتى واحد فالهضرة تجي هادي ضور فيه)
عصام:كيفاش كاتجرئي وتهضري معايا هكا واش معرفتيش انا شكون واش عارفة بامكاني اني نجري عليك ومنخلي حتى وكالة توضفك
شيماء:كلنا ولاد 9 شهور مكاينش فرق بيناتنا وبأمكاني نوصل لي وصلتي ليه بقرايتي واجتهادي
عصام: وبامكاني انا نحطم ليك هداك الحلم لي كاتحلمي بيه الى بغيت
شيماء:الرزق ماشي بيدك ولا بيد غيرك بيد الله سبحانه
( عصام حار فشيماء واخا هي من الداخل خايفة ضيع خدمتها ولكن كاتبين ليه العكس وكتبين ليه التحدي والقوة ديالها)
عصام:هاد الهضرة طولات وبزاف وانا وقتي غالي الى بغيتي تكملي هنا كنتمنى مانشوفكش مخالطة مع الموظفين والخدمة هي الولة اما تفليات حتى يسالي وقت خدمتك وديري لي بغيتي وبعيد على الفندق ديالي مفهوم 
مخلاهاش تكمل ضرب فيها وداز خلى شيماء كلها كاترعد بالفقايص والاعصاب
شاف رشيدة:شيماء ياك لباس
شيماء:والو باس حتى الغد ونعاود ليك دابا ماقاداش واش ممكن نمشي

الشاف:وي سيري ردي البال لراسك حتى الغدا ان شاء الله
خرجت كنجري ومكرهتش شي حاد نبرد فيه غدايدي مع الخرجة خرجت تمشيت شوية كنسمع كلاكسون وشي حاد كيكول (فين ازين مانوصلوكش وراك خوخة وشداتني دوخة ) يلاه كونت اندمو على نهار فاش تزاد وانا نيت غير على سبة
شيماء:هدا انت العجل ماحشمتيش حيدتيها مني خلعت كنت انشفي فيك العادي والبادي ساعة طلعتي غير انت اراس دلو
بدر:طلعي طلعي بعدا نوصلك ونتي وجهك صفر
طلعت وسديت الباب ورايا
بدر:ياك لباس مالك وجهك ماعجبنيش كنتي فالخدمة ياكما شي مشكيل
شيماء:غير سكوت متفكرنيش راني باغية غير معامن وعلى سبة نيت
بدر:غير تكالماي وعاودي لي
شيماء عاودات لبدر كلشي لي طرا ليها وخوات قلبها وحتى ماحساتش امتا دموعها سالو
بدر:صافي غير سكتي مانبغيكش تبكي والايني كامبو هادا شنو كايسحاب راسو فملك الله وريه لي الما فرشختو ليك مانتسماش بدر غير وريه لي وترجعي اللور وتفرجي لي فيه 
بدر:هههه نعرفك ديرها وتفوتها لهيه ولكن لا غير خلينه ماقادا على صداع ولكن الى عاود جبدنيه ايشوف العيشورية دبال بصح
بدر:شنو كايكولو لهاد المدير ديالكوم يقدر نعرفو
شيماء:اسمو عصا....
بام بام بارم بام بم بام بام بارام بام بام
شيماء:ألو ماما انا فطريق راه الخدمة لي عطلاتني اليوم واخا ماما هاني قربت بسلامة
شيماء:بدر هادي ماما عافاك سربي راه بغات تخرجلي من تيليفون حيتاش تعطلت بزاف
بدر وصل شيماء
بدر:يلاه تهلاي فراسك حتى من بعد ونكملو وماديري فبالك والو تصبحي على خير
شيماء:شكرا بزاف تلقى الخير
دخلت لدار لقيت ماما قلبها ايسكت بالخلعة حيت تعطلت فهمتها شنو سباب تعشيت ودخلت توضيت وصليت الصلاة لي فاتني وتخشيت فبلاصتي كانراجع احدات اليوم وكانتحلف حتى نرجع ليك الصرف اسي عصام غير صبر وتسنى ماعقلتش حتى داتني عيني ونعست

فقت صباح عيانة ومافيا مايتشاف وتحت عيني كحل رجلي طابو بصباط والوقيف ديال البارح غسلت وجهي ودرت شوية الماؤ والملح نكمد فيهوم رجلي توضيت وصليت صبح لبست صايا فالموطارد وفيست كحلة وزيف منمر ههه ناوية على خزيت اصلا ماعنديش كانة لحتا واحد مرة مرة كاتجيني هاد الحالة فاش كاتقرب تجيني ديك الويلة مادرت والو لوجهي من غير ليكرون دشمس اصلا ماعندي مع صباغة هبطت لقيت ماما وجدات مسكينة الفطور هاد يوماين ماعونتها فوالو
شيماء:صباح الخير ماما
الام:صباح نور لبارح شخيرك كايتسمع من عند جيران
شيماء:غير العيا مامالفاش لي فين بابا وطاها
الأم:فين ايكونو فناظرك باك راه ناعس حيت جا مسخسخ من الخدمة وخوك ناعس حيت ضل سهران مع داك المشقوف
شيماء:ههه خير خفت نوضو صداع ومنا نمشي ليه نوضو
الأم :لا لا سيري لخدمتك ماقادين على صداع ينوض باك يجمعكم بجوج 
شيماء:ههه هاني مشيت اماما الله يعونك احبيبتي
الأم:الله يسر ليك امرك ابنتي وينقي طريقك من شوك ويلا كنتي اتعطلي سوني لي ماتخلينيش مشوشة
شيماء:صافي اماما كوني هانية
خرجت خديت تاكسي سونات لي اشراق
اشراق:افين العوجة غبرتي ماتليتي تسولي ماوالو ياك لباس ناس من نهار خدمو ميكو
شيماء:هه اش انكوليك لي انكوليك راه فيك نيت واراه نهار الاول وانا واقفة جيت طحت نعست غيبت شحال فيك ديال الهضرة وتبرزيط مكاتخليش بنادم يدير عقلو
اشراق:ههه غير كانضحك معاك مهم بغيت نكوليك الالة راه هدى تخطبات
شيماء:هاي هاي على جنية ومكالتهاش لينا
اشراق:حنا لقيناك بعدا باش نكولوها ليك نهار كاومل وحنا نسونيو ليك ونتي فعالم تاني
شيماء:ويلي كنت دايرا سيلونس فالخدمة ومسمعتوش هاي هاي وشكون ايدي ديك شنيولة
اشراق:مهندس معماري فمراكش احبيبتي وغير شافها فالخدمة ودابا ضريب صداق جمعة والعرس السبت وضاروري تكوني

وضروري تكوني راه صاحبتنا زاعمة
شيماء:اويلي ضروري ومؤكد واش انا تصطيت مانحضرش المهم انا مشيت حتى المنبعد ونكملو ونتافقو باش نخرجو ناخدو ليها الكادو ونتافقو على كلشي يالاه تلاحي ههه بالسلامة.
صراحة كنت مقلقة ولكن منين سمعت هاد الخبيرة فرحت بزاف هدى صاحبتي بزاف وتستاهل كل خير كلت حتى نسالي خدمتي ونهضر معاها دخلت الفندق تلاقيت بمنعم كالي سلام ومشى مامالفاش ليه هكا كان مالف يوقف معايا ويهضر العجب كلت حتى نشوفو ونسولو
دخلت المكتب ديالنا ولى خاصني نكول دارنا القيت شاف رشيدة شادة فتافيت وكاتفرج فبرنامج مدرسة مارتا ستيوارت 
شيماء:صباح نور شاف ديالنا ههه كيف صبحتي
شاف:الحمد لله وانتي كيف صبحتي
شيماء:الحمدلله سمحيلي لبارح خليتك ومشيت
شاف:لا هانية اصلا حتى انا مشيت ديك ساع امضرى بغيتي تعاوديلي لي طرى البارح ولى اتخبي علي ياك حنى خواتات
شيماء:اه خواتات واكيد انعاود ليك (عاودت لرشيدة كلشي لي طرى لبارح كولما كانزيد نكمليها وهي كاتعصب حتى ساليت هضرتي)
شاف:هدا خاص لي وقفو عند حدو بزاف هادشي حنى ماشي عبيد عندو اشنو كال ليه راسو انا خاصني نمشي نهضر معاه
شيماء:لا عفاك مابغيتك تكولي والو ايكول انا خوافة وكنتخبا ورا ضهرك وماقاداش نهضر راكي مزال ماعرفتيني حتى انا كانعطيه علاش كايقلب غير كوني هانية ونهار انحتاج المساعدة انكولها ليك كوني هانية
شاف:واخا الالة انتي تعرفي مهم الى كنتي محتاجة شي حاجة انا هنا 
شيماء:اوكي شاف هههه ودابا كولي لي شنو البروكرام ديال اليوم حيت محتاجة نخرج شوية بكري عرس صاحبتي خاصني نحضر
شاف:مبروك ليها اليوم عندك الزهر ايكون غير غدا رسمي ايحضرو ليه الناس ديال البارح ايكون حاجة خفيفة وعصرية
فعلا داكشي لي درنا بدينا الخدمة على طبق المقبلة سليناه وطبق الرئيسي وطارط ليمون باش يحليو

يتبع

أجزاء القصة
قصص جديدة
قصة كرهتك حد العشق من تأليف نونة الحنونة
قصة كرهتك حد العشق نونة الحنونة
قصة سيد القلعة من تأليف حياة جمالي
قصة سيد القلعة حياة جمالي
كايتنشرو القصص والأجزاء كل يوم مع التاسعة ليلا بتوقيت المغرب
9isas maghribiya bdarija قصص مغربية بالدارجة قصص و روايات بالدارجة المغربية