دخلو شادية كتفركل للقصر .. واول مرة دخل ليه ولا طوف ناحيته .. غير دخلوها وهي تسكت من لغوات وبدات دور فعينيها وتشوف يمين وشمال ... واش هادشي كامل كاين داخل للقصر! عالم اخر ماعمرها كانت تحلم بيه ختى فلمنام ... جنة ... غابات خضراء وورود فالالوان .. سقايات ديال الماء فكل جهة ... البط والوز كيتسارا .. والطاوس طالق جناحو مشبح وسط الخضورية ... الخدم والحشم غاديين جايين كل واحد اشنو كيدير . الشي اللي عمرها كانت تحلم تشوفو شافتو مع الدخلة ديال باب القصر لكبير وهي غادية فلعربة مدخلينها كينقزو بيها وطالعين بيها للقصر فطريق مزينة بالحجر ومستف بجنابها النخل.
تبسمات شادية كتقاد حوايجها وتنفضهم وقلت : الله يسلمك اخالتي ... علاش جبتوني ياكما درت شي حاجة ؟ انا والله ماشاداهم بزز هما اللي شادين عليا الصف
عبدية : الملكة سمعات بيك ... وهي اللي جابتك هنا ... وياوييييل ويييلك
تهزي الخط لشي مخلوق هنا من غيرها ... (طلعاتها وعبطاتها) جيتيني بنت الناس وباينة على وجهك دريويشة ماشي ديال تكرفيص .. اما نوريك جهنم الحمراء باش متنسايش كلامي هادا
تخلعات شادية وقالت : وتقوولي .. وتقولي اخالتي واش نهزو .. ويلى هزيتو بغيت ربي يهزني من هنا
سهات فيها عبدية وقالت مبسمة
- ودابا غاتمشي معايا ... يدورو بيك شوية باش نطلعك عند الملكة تشوفك
شادية : و ..وولاكن عندي واحد الشرط
عبدية : اما هوا؟
شادية : ختي .. ختي عيشة ... تجي حتى هيا حيت ما عندها فين تبقا ... مي مسافرة وخلاتنا غير بجوجات وماعندنا حد من غير بعضياتنا
عبدية : يكون خير... نقولها للملكة وديك الساعة هي تشوف شنو دير مع ختك .. يالاه زيدي
داتها عبدية عند لخدم .. غسلوها ونشفوها وزينوها وعطروها ولبسوها لحمر كما هي باغية . دفرو بيها شعرها فالنص نازل من جنابها وخرجوها كتشوف فجنابها فرحانة عاجبها لحال ومقاداها فرحة .. شكون قال تلبس داك اللباس فيوم من الايام ... بانو ملامح وجهها وضهر زينها اللي كان مخبي وسط دربالة .. صفا جلدها وتنقاو يديها ورجليها وطلعات غزالة بحال شي عروسة . دخلوها لجناح الملكة وهي كدور فعينيها وتشوف فالسقف وفاللي دايرين بيها . تبسمات الملكة وهي جالسة حدا سرجمها مسرحة رجليها وكطلع وتهبط فيها وقالت
- خرجو ... ودخلي نتي . . . زيدي لهنا
خرجو لخدم وبقات غير شادية واقفة حانية راسها حشمانة
شادية : انا الاللة؟
الملكة : اييه نتي
تقدمات شادية وقربات منها واقفة وعينيها كيدورو .. طلعاتها الملكة بتبسمة من راسها لرجليها وقالت
- اشنو سماك الله؟
- شادية نعام الاللة
الملكة : وعارفة علاش عيطت عليك ؟
شادية : الا الاللة
الملكة : سمعت باللي كتهزي لخط ... وبغيت نشوف واش كلامك صحيح
شادية : قالو صحيح ... والله واعلم
الملكة : وعرفتي على طلع كلامك صحيح ... غنغرقك ذهب .. وكاع اللي كيحلمو بيه لبنات يحضر قدامك ... بشرط
هزات شادية راسها وقالت : وشنو هوا هاد الشرط ؟
الملكة : كلامنا يبقا هنا .. والى عرفتي شي حاجة تستريها ... اما الى فضحتي سراري غادي نقطع ليك الراس .. نتي .. وختك عيشة وختك يامنة ومك مسعودة
تبسمات الملكة وقالت : ايوا نبداو ... ومن هنا غادي نعرف... واش كلمك صحيح ولا غير كدوب ... الى كنتي كتكدبي وضحكي على الناس .. غادي تلقاي انواع لعداب كيتسناوك . اما الى كنتي على حق ... غادي اللي حليتي عليها فمك تحضر قدامك
شادية : و. وو وحتا انا عندي واحد الشرط صغير
الملكة : قولي
شادية : ختي عيشة تلحق عليا باش مانبقاش مهولة عليها و تهول عليا . وفين ما كنت تكون حتى هيا
تنهدات الملكة وقالت : بداي . وديك الساعة نشوفو .. راه قلت ليك ... الى طلع كلامك صحيح .. اللي بغتيها جاتك .
شادية : واخا الاللة
تقادات الملكة فالجلسة وجلسات قدامها شادية مربعة رجليها .. شدات يدها بين يديها وبدات تقرى
شادية : مزال قلبك معلق بيه ... يحساب ليك نساك .. ولا حتى نتي نسيتيه ... ولاكن هنا كيبان ليا مزاال ببناتكم ميعاد ... واخا بينك وبينو بحر وبلاد ... مزال كيشوف صورتك بين عينيه كل ليلة قبل ماينعس ... قلبو من جيهتك عامر حقد .. كما عامر عشق وغرام .. والدة معاه ؟
هزات شادية عينها فيها لقاتها ساهية .. رجعات سولاتها عاد فاقت من القلبة وقالت
- شنو؟ شنو ببناتنا؟
شادية : والدة معاه ياك ؟
حركات الملكة راسها وقالت : لا
شادية : وعلاش هنا طالع لي دم مشروك بينك وبينكو ... بلاتي بعدا .. هادا اللي كنهضر عليه حجرتو تقيييلة نييت ... الري ريو والشوار شوارو ولا كلمة فوق كلمتو ولا حكام بحال حكامو !! طوييل .. شعرو كحل بحال ضلام اللي .. لحيتو كحلة وفيها جوج خطوط تحت فمو من الشيب ... عينيه كوحل ولونو سمر شوية
الملكة : شارف ؟!!
شادية : لااااللة الاللة ... مشارف والو .. هاهوا واقف بحال الجبل على مزيناتو .. عليه شلا عيون ودايرين بيه شلا نسا
الملكة : و..وعندو شي ولاد ؟
Trust🧚🏻♀: طالعة عبدية كتجري لجناح الملكة فيديها مرسول ملوي . وصلات لجناح الملكة ودقات بالجهد ودخلات عليهم كتلهت
هبطات شادية راسها وقالت كتمتم : و .وووفين داكشي اللي قلتي لي
الملكة : وشنو قلت ليك ؟ !
شادية : الذهب والنقرى و.. وداكشي الزوين
كمشات الملكة سيفتها وقالت
- ولايني جلدة مع راسك ... جاااتك . يالاه سيري قضي حاجة راسك .. وسيفطي ليا عبدية لهنا
شادية : عب عب عبدية اللي جابتني هنا ياك
دورات الملكة راسها شادة جبتها كتسوط وراسها تقيل .. شافت شادية راسها غتزبلها وهي تخرج فيساع كتجري وتقلب على عبدية حتى لقاتها وهي توقف عليها من للور قفزاتها
تلفتات عبدية مخرجة عينيها وقالت : ياااربي السلااامة ... منين جرتي ليا حتى نتي ... اش كااااين ؟ سيري راه ختك جابوها ليك وكتسناك ... راه لاللة هي اللي وصاتنا عليها وجبناها قبل المغرب
شادية : ربي ربي ... انا غادية داااابا
مشات شادية كتجري هازة جلايلها حتى للوسعة لكبيرة فين كيجلسو الضياف مع الدخلة دباب القصر .. شافتها واقفة شبعاتة غبرة وشعرها مشتنف لابسة بلغة حالتها وحوايج بالية مسخة ومعنقة مع واحد الخامية نازلة من السقف مدلية وكتقيسها عليها ودورها من هنا ودورها من لهيه حتى قفزاتها شادية وغوتات
- الله على ريحة شحال زوينة .. عمري شميت بحالها فحياتي .. الله
حلات عينيها فلكموسة وهي تلقا توب مطوي احمر وسبنية حمراء وبلغة جديدة مطروزة بكاع الالوان وغالب عليهم الاحمر .. بدات تقيس فيهم بيديها وجبداتهم بشوية ومن كترت فرحتها خايفة عليهم . حطات بجنبها البلغة الامازيغية وحلات بيديها التوب الاحمر لقاتو حايك من حرير الدودة وفطرافو لهداب حمراء مدلية ماعمر بنت من بنات لقبيلة لبساتو ولا جا على ضهر شي وحدة ، وتحتو صندوقة صغيرة نحاسية .. حلاتها لقات فيها حوالق وطوق ونبالة ذهبية .. فيه خلخال من النقرة و قلادة مذهبة مزياناها حجرة . فرحات روح الندى كملات تخمال الكموسة .. لقات لتحت كاع قفطان جوهرة ابيض كيشعل .. دوزات يديها عليه وخلاتو بلاصتو فوق منو قريعات صغار ديال العطر. السواك البلدي والكحل الحر .. رجعات كلشي بلاصتو كيف كان مستف وناوية بيهم تسافر مع الملكة فالصباح مع الفجر.. جمعات كموستها عندها عنقاتها وتركنات فركينتعا حتى دخلات عليها عيشة ختها .. حلات شادية عينسها على كبرهم وطلعاتها من رجليها حتى لراسها مامصقدقاش عينيها
شادية : عيشة !!!
عيشة : ااااايه ... ااانا ... ايوا كيف جيتك ههههه شتي يا لهبيلة عيشة لحقيقية وشادية لحقيقية هما هاادو .. ماشي اللي كانو فديك لخربة عايشين ... يالاه خرجنا للضو وشفنا راسنا كي دايرين وعرفنا حد زيننا فين واصل... ههه نحنتو بنات لقبيلة كاملات فالزين ههه
شادية : والله ياختي ماكدبتي... ندوزو حدى مسعودة متعرفناش
عيشة : وراااه نتي كن ما هضرتي معايا قبيلة مكنتش نعرفك يا لهبيلة .. عرفتي دابا .. مع هاد التحميمة وهاد لقفيطين ولبليغة والشدة ديال الراس اللي دارو ليا .. خاصنا غير طاجين ولا قصرية دكسكسو .. نعمرو كرشنا ونطيحو نعسو ... نشبعو غير نعاس بعدا اللي عمرنا شبعناه فحياتنا
شادية : راه غدا غتنوضي مع لفجر الحاجة .. تابعنا السفر مع الملكة لبلاد بعييييدة
عروس الملك السابعة الجزء 56
محتوى القصة
التنقل بين الأجزاء