صبح الحال وباتت الملكة فالشرفة ليلة كاملة .. الصباح مع لفجر وقفات فبيت لخزين هي وعبدية كتوريها عشوب منوعة وتخلط ليها
الملكة : هاد العشوب اللي خلطتي ليك ... غادي تجيبو منهم بالقنطار وتخلطهم مزياان ... وغادي تمشيو للواد اللي كيفصل بيني وبين الاصيل وتخويوهم تما ... منعو اهل البلاد يقربو من الواد .. ومانبغي حتى واحد يوصلو ولا يقرب ليه .. وديرو ليه حد على طولو باش ميوصلو لا كبير لاصغير
عبدية : هي اللولة
الملكة : يالاه بداو .. من دابا كترو لعشوب وخويهم فالواد
عبدية : صافي كوني هانية
الملكة : انا غنرجع لبيتي قبل مايمشي ليه يور . كل صباح كيصبح عليا وبغيتو يلقاني فيه
خرجات الملكة طلعات لبيتها جلسات .. صلات الفجر وحجة ليها لفطور كتفطر ... دخل عليها الانير يور مبسم . باس يديها وجلس جنبها كيتكلم
الامير : صبحتي منورة تما شي سر
الملكة : لاااللة ... غير الجو هنا عاجبني... ولاكن بلادي اللولة شاغلة بالي ... خاصك ترجع وحل محلي .. ماتخليش لبلاد بوحدها
تنهدات وسهات مبسمة وهوا جالس امعا كيشوف فعينيها مبسم وهي كتهضر بلا متشعر وتلوي فطراف شعرها وتنغم
- باك ... باك كان صعييب بزااف كتر مايتخيل ليك ... ولاكن كان يجي حتى لعندي .. ويتقضاو ليه ويرجع زبدة بين يدي ... كان كيعجبو صوتي ... وكان مينعس حتى نغني ليه ولا نحكي ليه حكاية ... كان الى تعصب كيعيط ليا نجلس معاه .. وغير بكليمة كنت كنرجعو على خاطرو (تنهدات) ليام بداااالة اولدي ... والله يجيب ليك حتى نتا اللي تريحك
تبسم جنب وقال : هه... مزااااال
الملكة : وعلاش مزال ... ها لبنات قدامك غير هما ... المخيرة ديالك علاش ماريحاتك حتى وحدة !
تبسم وقال : كاملين بحال بحال ... مكايناش شي وحدة اللي يبغيها لقلب
الملكة : ايوا رخي قلبك الى بغيتيه يبغي
تبسم وقال : وفيين هي هادي اللي غتخليني نبغيها
الملكة : هأ! وهادو مساكن اللي دايرين كل ما فجهدهم باش يخليوك تبغيهم ! فاش كتفكر غير قول ليا ... الى كاينة شي وحدة فبالك قولها
حرك راسو : واالو مكاينة حتى وحدة ... بغيت شي وحدة حرة . . . اللي بغيت انا موحااال لقاها
عيشة : وا نطرطقو غير لخرقومات مرارتهم .. هانا بحالك مالك
شادية : هاد الكسوة محلولة من جناب بزااف الى طيرها لبرد كلشي اللي فيا يبان ... شوفي درعاني كي عريانين ... وصدري نصو كيبان
عيشة : وهاد لقلادة تجيك فيه كتحممممق
علقات ليها عيشة فعنقها قلادة صغيرة وقالت
- ناااااري جيتي غزاااالة
شادية : واطلقي ليا بعدا غير شعري راه هادشي معري... ضهري باين
عيشة : جاتك السبولة كتحمممق الى حيدتيها تخصري كلشي
حارت شادية وقالت : والله اختي ماعرفت
عيشة : انا اللي عااارفة اش عند جدك ماتفهمي ... زيدي والله لاحيدتيهم
شادية : فيين غانزيد!
عيشة : نخرجو ندورو شوية فجنانات القصر وجراديه نبقاو محبوسين هنا ... زيدي
جراتها من يدها وخرجاتها بديك الكسوة البيضاء كاملة كتجرجر موراها ومفتوحة من جناب ومشدودة من لكتاف بشوكة فيها وردة كتبري.. الدرعان عريانين والصدر ابيض كيبان وداتها معاها فرحانة
عروس الملك السابعة الجزء 60
محتوى القصة
التنقل بين الأجزاء