الضحكة المهجورة الجزء الرابع

من تأليف Ghazal trust
2018

محتوى القصة

رواية الضحكة المهجورة

طلعات لدار فرحانة من جديد .. بالفرحة عيطات لاسية تعاود ليها . وهي كتهضر مع اسية عيط ليها ياسين .. قطعات على اسية وجاوبات 

هبة :الو 

ياسين : طلعتي للدار؟

هبة : اممم ... مشيتي؟ 

ياسين: فطريق ... هانية؟ مكاين لا صدع لا والو 

هبة : لا مكاين والو 

ياسين : مكيضربكش؟ 

هبة : مرا مرا 

ياسين : الى عاود حط يدو عليك قوليها ليا 

هبة : واخا 

ياسين : مرفعتيش عليه دعوة ديال الطلاق؟ 

هبة : ماقدرتش . . . راه كيخلعني 

ياسين : وماخفتيش شي نهار يدخل يسكران ويدوز عليك 

هبة : كنسد عليا الباب بالساروت .. حتى لباب بدلتو كان واحد عادي ودرت واحد صحيح بحال بيبان الدار 

ياسين : وا ردي لبال راسك 

هبة: عاادي ولفت بلا ماتخاف

ياسين: تنهد) وا المهم ... ردي لباب راسك يالاه بسلامة 

قطع معاها .. ورجع كل خمسة دقايق يعيط يسول ويقطع ، لعشية سمعات الدقان فلباب .. مشات حلات لقات لعكوزة هازة صاكها وجايا .. شافتها وهي تكحل بلعما استقبلاتها بزز 

هبة : مرحباا بيك دخلي 

العكوزة : الله يابنيتي عييت ... هاد الدروج كيسخفو 

هبة : علاش معيطتيش ليا نتعرض ليك حدا طاكسيات 

لعكوزة : وصافي غا صاك مافيه والو غا لحوايج (جلسات فالصالون ) الله ياربي .. جيبي ليا شي كاس ديال لماء راني شحفت .... جواد مكاينش؟

هبة : لا خارج .. ماتلاقيتيهش برا؟ 

لعكوزة : مابانش ليا 

هبة : يكون مع صحابو مجموعين فداك البرتوش ديال لويل بحال ديما 

لعكوزة : ايوا كاين شي عشا ؟ 

هبة : كاين ... يالاه درت كراتان فلفران 

لعكوزة : ايوا ومغتسنايهش حتى يجي ؟ ولا كتاكلي بوحدك 

هبة : نبقا نتسنا حتى لفجر وجوعي فكرشي؟ ... وانا ماعارفاش فوقاش غيدخل ويقدر مايدخلش كااع هوا 

لعكوزة : دورات عينيها فالدار وقالت ) راكي مهلية فراسك بعدا ... هاد لبيجامة عاد شريتيها ؟ 

هبة : امم جبتها من مراكش 

لعكوزة : ومشيييتي لمراكش؟!!!!!

هبة : امم... انا واسية مرت صاحبو

لعكوزة : وانتي اللي جات معاك ... طالعة واكلة نازلة واكلة

هبة : اااش واكلة الله يهديك . بيجامات ديال 80 درهم وشراوط السويقة ... عادية بحالي بحال كاع الناس اااش واكلة ... شفتي عندي شي دهب ولا شي طوموبيل ولا شي دار ... وااالو من غير الشراوط وجوج دريال فالسيمانة ديال لحمام والصالون . ودابا اصلا رجل كيتشكا مابقاش كاع كيطلقهم قالك شي واحد كيتسالو ماكيتسالو بيناتهم شي حساب .... وشتي نقولك واحد لحاجة ... راه بابا اللي كيصرف عليا ودوك لحوايج من فلوس بابا هوا اللي مسكين كل سيمانة فاش كنمشي كيدور معايا اما الى بقيت معولة على جواد ضربني لخلا 

صونا ليها تيليفون وهي كتهضر ... جاوبات ياسين وهي كدور فعينيها باش كتعيقش 

هبة : الو 

ياسين : المرى اللي سيفطت ليك راه وصلات تما حدا طاكسيات سيري تعرضي ليها 

هبة : اممم ... واخا باش غنعرفها؟

ياسين : راه وريتها تصوريتك هي غتجي عندك غير سيري ... هانية بعدا نتي؟

هبة : احم لحمد لله 

ياسين : حدا شي واحد ؟

هبة : عكوزتي اللي جات 

ياسين : يالاه سيري و اي حاجة وقعات عيطي ليا 

هبة : موبلاغ بسلامة 

قطعات وشافت فعكوزتها وقالت : كتسلم عليك اسية ... انا غنمشي غير لهنا دغياا ونجي . 

لبسات جلابة وخرجات

مشات للطاكسيات كتقلب ودور .. شوية شافت مرى كبيرة شوية طويلة وغليضة لابسة جلابة وفولار وهازة صاك ديال لحوايج فيديها جايا جيهتها ، ابتاسمات هبة ومشات عندها سلمات عليها 

المرى : كيدايرة ابنتي بلاباس عليك .. ماماك لاباس عليها 

هبة : الحمد لله ونتي؟

المرى : الحمد لله ابنتي ... انا فتيحة سيفطني ياسين قالها ليك ؟

هبة : اه قالها ليا .. مرحبا بيك 

داتها للدار دخلاتها لقان لعكوزة جالسة مسرحة رجليها .. دخلات لمرى سلمات عليها وجلسات ، بقات لعكوزة غير كتشوف .. شوية ناضت تبعات هبة للكةزينة وقفات عليها وقالت

- شكون هادي؟ 

هبة : خدامة جات تعاوني فالدار 

دارت لعكوزة يدها على جنبها وقالت : مالك موضافة ؟ غتخلصيها نتي؟

زفرات هبة وقالت : بابا اللي غيخلصها .. عييت ما بقيتش قادرة نهز ولدك بوحدي ... وبابا اللي غيخلصها غير تهناي

لعكوزة : وباك هوا اللي كيعمر التلاجة ؟ 

كشات هبة نيشان حلات تلاجة ليها وقالت

- هاباش عامرة تلاجة ... صافي؟

تلاجة فيها غير الشراب محطوط .. شافتو لعكوزة وسكتات .. ولاكن مادازت عليها الراحة وبدات دور وتنكر وتحشي لهضرة لديك لمرى .. لاكن فتيحة دارت راسها مكتسمعش وغير كضحك ساكتة . جاتها عندها هبة دخلاتها لواحد لبيت وقالت

- حطي حوايجك هنا وماديش عليها هاكاك دايرة 

فتيحة : عكوزتك هادي 

هبة : اه 

فتيحة : اممم... يالاه وريني فاش نعاونك

صونا ليها تيليفون وقالت وقالت ليهت هبة

- ياسين هادا؟ 

فتيحة : اه فين كاينة الطواليط ؟

هبة : اجي نوريها ليك 

مشات وراتها الطواليط فين جات وخلاتها كتهضر تما
دخل جواد للدار لقا فتيحة فلكوزينة جابدة لماعن كتغسلهم ، شاف فيها خلعها وخرج من لكوزينة مشا لبيت النعاس ، تبعاتو مو كتجري .. شافتها هبة تبعاتو ومشات كتسنط 

جواد : شكون ديك ختنا اللي فاكوزينة 

لعكوزة : قالت لك خدامة جابها لها باها ... نتا عندك هاد الدار بحال لكوري اللي جا يدخل علاش مالك مقالتش ليك عاتجيبها ؟!

جواد: كيفاااش؟ 

لعكوزة : ودارك محلولة ومترعة ودايرة فيك مابغات مالك ماشي راجل تهضر ! ومالها فاش جاتها تجيب خدامة 

خيخات هبة ومشات لكوزينة مع الدخلة سولاتها فتيحة وقالت بشوية

- هادا هوا راجلك ؟

هبة : مراجليش مامحسوبش عليا يخخ

فتيحة : هييه! ياربي السلامة باااز ليك ابنتي 

سمعاتو كيعيط بالجهد من بيت النعاس ومشات كتجري لقان مو خرجات .. بدا كيهضر بالجهد ويخصر فلهضرة 

- شكون هاديك اللي جات ؟

هبة : سيفطها بابا تعاوني وهوا اللي غيخلصها غير برد 

جواد : غتمشي داااااابا تق***** من داري سمعتي ... واسيري خرجيها ولا نوري ديلمك باك يخلصها 

هبة : عيييت انا عييييت اش فيها مالها الى عاوناتني ؟

جواد : وا تمشي ت***** ماباغي نشوف تا وااااحد كيدور حدايا .... يديها باك تعاون مك ... واسيري قبل منخصر لمك كمارتك نتي وياها تلاحي 

هبة : الى مشات غنمشي معاها ... اصلا مرى كبيرة بعقلها 

قرب ليها خلعها وقال : شناهوا !!! عاودي شنو كلتي ... 

خرج من البيت مشا عند فتيحة خلعها وخرج فيها عينيه 

- شوف اختي ... مابغيناش اللي تغسل لينا بغينا الدار ينوض فيها الدود غا جمعي حوايجك رجعي منين جيتي .

دخلات عليه هبة كتجري وتغوت ... ها هوا الصداع ناض وزاد صعر فاش قالت ليه 

- واباااااااا غيخلصهاااااا ... ماشكينااااش عليييك ومغتمشي 

هز يدو عطاها للوجه تا سال الدم من نيفها ... ناضت لعكوزة كتفك ولمرى بقات مخلوعة غير كتشوف .... بقات هبة لاسقة حدا التلاجة شادة وجهها كتبكي وجراتو مو لباب كدفعو 

لعكوزة : صااافي ... صافي سير خرج هنيونا من هاد اصدع .. صافي سير 

خرجاتو ورجعات عند هبة كتدي وتجيب فيديها 

- حتى نتي مكتسمعيش ... جالسة تغوتي عليه قدام اللي يسوا واللي ميسواش ويالاه شدي 

مشات خرجات وشداتها فتيحة جلساتها على الكرسي كتمسح ليها وجهها ودموهها 

هبة : شفتي .. شفتي كلمة جوج كيعطي لوجهي اهىء اهىء 

فتيحة : لا حولة ولا قوة الا بالله .... شي نهار يقتل هادا ... اش داااك ابنتي تزوجيه نهاااار الاول .

هبة : واش غتمشي؟

فتيحة : مغنمشيش ... راه سمع ياسين كوووولشي 

ضربات حناكها وقالت : اويييييلي !!! وعلااااش خليتيه يسمع غانديرو ليه المشاكيل 

فتيحة : هوا قالي الى ناض الصدع صوني لي وخليه دايز ... وبغيتي تبقاي هاكا حتى يخصر ليك وجهك ؟ بعدا راجل لراجل راه خاصك تفكي منو 

هبة : شوو سكتي غتسمعك مو 

فتيحة : يعطيها موصيبة ضربها هي و ولدها . . . هضري معاه غييير بلاتي هي احسن وكدبي عليه من هنا ومن هنا بلا متجاحدي معاه ... غير بسياسة هادو كيبغيو السياسة وغادي يقوليك خليها تبقا 

هبة : كنعيفو .. كنهكر نضحك معاه 

فتيحة : لاكنت حاجتك فلكلب قوليه سيدي ... فاش يجي تعرضي ليه قبل مو و غادي تشوفي

عم الصمت فالدار .. لعكوزة غادية جايا كتشوف هاد المرى اللي واخا جرا عليها مول الدار باقا مابغات تحشم ومزالة فلكوزينة وكطيب لعشا من لفوق وحداها هبة جالسة كتشوف غير بعينيها ، بالليل دخل جواد فيه ريحة لحشيش كدوخ .. مشات تعرضات ليه هبة هي اللولة جراتو لبيت النعاس وجلسات حداه كتسايس معاه 

هبة : حشومة عليك داكشي اللي درتي لينا الصباح ... انا جبت لمرى باش تعاوني فالدار وانا اللي قلت لبابا يجيبها وهوا يخلصها ... كنقنط بوحدي و عيييت .. غير حوايجك قتلوني 

خزر فيها وقال : وا مابااغيش الزااايد معانا بلا متفرعي ليا ك**** 

هبة : مالها بعيييدة عليك ونتا مكتجي حتاااا لليل ... علاش مك كتجي تجلس عندنا شحال ما بغات 

جواد : مي ماشي هي هاديك 

هبة : ديك لمرى مسكينة هجالة .. بقات فيا ... قلت ندير فيها خير تنفعني ونفعها ... شنو فيها من عيب؟

بقات عليه بالهضرة واخا مابغاش فالاول لاكن قنعاتو فاللخر .. ضحك وقال

- واري شي بوسة 

هربات وجهها وقالت : سير غسل غير فمك شو كيداير يعلم الله شحال كن وحدة بستي ... بلا منجبدو نهار سافرت ودخلتيهم للدار ... هزو ليا حوايجي من لبيت ودارو فيا ما بغاو 

جواد : شكون هاد بنت لق**** اللي هزات ليك حوايجك 

هبة : مانعرف نتا اللي جبتيهم ... وجالس عليا مابغيت تا واحد يدخل لداري باااز 

جواد : نوضي تكعدي من حدايا قبل منغلط فك ... جيبي ليا علاش نكرض هادشي 

هبة : وا خرج برااا وكرض غتبقا الريحة هنا عاطية فين غنعس انا 

جواد : وانوووضي جيبي لكراضة 

ناضت طالع ليها لخيخ مشات جابتها ليه وخلاتو جالس فالارض كيكرض ويغربل بوحدو وريحت لحشيش كطعن .. تاسلا وناض للكوزينة سرحو فواحد الطاوة حدى فتيحة ودارو يتحمر فالفران وقال 

جواد : هباااا ... شوية طفي على لفران انا هابط لتحت ونجي 

هبة : مانطفي عليه مايطفي عليا 

هبط لاحانوت ورجع لقا لحشيش تشوط وريحتو عطات .. حل عليه لقا غير لغبار شاعلة فيه لعافية .. زدح داك باب لفران تا تهرسات ليه الزاجة ومشا ساخط 

جواد : ينعل طاااااا****** يا ل****** 

جرات مو وجرات فتيحة .. سمعاتو هبة كيسب وهي تفكر لحشيش .. نقزات للطواليط وسدات عليها كترعد ... ضرب باب الطواليط بالجهد تا كان غيهرسو 

جواد : اليييييييييلة نح****** خرجي ولا نفرع ديلمو

لعكوزة : اويييييلي اش كااااين ... ماااالكم 

هبة : واااش انا قبت ليك عنطفي عليييه ؟ 

جواد : نطفي عليييييه ! خرجي يابنت لق****** 2000 درهم كااااملة تشوااااات ... خرجي

جلسات هبة فالطواليط مابغاتش تحل خلاتو يغوت ويخصر فالهضرة من السمطة لتحت قدام مو .. شبع غوات وتفقص فاللخر مشا هز الالطة جمع داكشي فميكة وخرج كيسب ويلعن والعمارة كاملة كطل .. موالفين بصداعو ديما وميقدر تا واحد يتشكى ولا يهضر وكل واحد خايف على راسو ، خرجات مخلوعة كطل هنا وهنا.. بدات مو تهضر وتنكر مابغاتش تسكت .. تعشاو وسط الهضرة السامة ديال مو هي وفتيحة حتى سالاو ومشات لبيتها سدات عليها نعسات .. فنصاص الليل دخل سكران محيح مشا ليها لبيت النعاس نيشان بغا يدخل ... قفزها من نعاسها كيزدح فالباب وفيق معاه حتى مو وفتيحة ناضو كيجروه ... ناض الصدع تاني فنصاص الليل وطلقات عليهم العدوزة سمها 

- مااالها ما تخل ليه يدخل ينعس ... شادو لبيت بوحدها مالو كاري ليها ...
ايوا هااالبسااالة مزيااان تبااارك الله هي تنعس فبيت نعاس وهوا يبقا مرمي برا ... حلي لباب يدخل ينعس فبلاصتو 

حلات هبة لباب خرجات وقالت 

- هانا ... دخل 

دخل هوا وخرجات هي مشات للبيت حدا فتيحة فوق واحد السداري ونعسات حداها ... شوية وهي توقف عليها لعكوزة 

- واش مغاتمشيش تنعسي حدا راجلك؟ 

هبة : واش مكتحشميش؟

لعكوزة : ومالك لاش مزوجة ؟! مالك ما تمشي تنعسي حداه مالو ماشي راجل

هبة : سيري نعسي حداه نتي ! داكشي شغلي انا اويييلي!!!

مشات لعكوزة كتنكر : زوييينة هادي!! بسيييف مايفسد عليها وسرها نيييت 

نضات هبة سدات لباب وقالت

- شتي فين عايشة انا ... شتي على تريكة 

فتيحة : داابا ربي يفكك غير صبري

نعسات فوق السداري يالاه جا يديها النعاس سمعات تيليفونها كيفيبري . شكون من غيرو هوا اللي كل دقيقة كيعيط . فتحات الخط وجاوبات بصوت خافت 

هبة : الو 

ياسين : نعستي؟

هبة : يالاه كنت غنعس 

ياسين : بوحدك ؟ 

هبة : بووحدي حدا فتيحة 

ياسين : كتنعسي بوحدك ولا غير ليوم؟

هبة : بوحدي ديما 

ياسين: مكيقربش ليك ؟

هبة : لا مكنبغيش 

ياسين : غدا عنجي نشوفك 

هبة : غتبقا غادي جاي كل نهار من سلا لكازا ؟!

ياسين: دابا ماعندي حتى شغل من غير نتي ... غدا الصباح غتمشي لأي كاتبة عامة تكتبي طلب ديال الطلاق .. غادي تعاودي فيها كاع داكشي للي وقع ليك وهي غتسيفطو 

هبة : هيييه! منقدرش الى ساق لخبار غادي يدبحني 

ياسين : داكشي علاش قلت ليك غاتمشي عند لكاتبة . وترجعي بحالك للدار .. انا شفت واحد المحامي هوا غيتكلف حتى نوصلو استدعى من المحكمة باللي رافعة عليه دعوة ديال الطلاق .. ونهار غتمشي الاستدعى غتخوي نتي الدار وسلا كاملة غتخليه منو للمحامي 

هبة : وفييين غنمشي ؟!! ودارنا؟

ياسين : خرجي نتي بعدا ونشوفو داركم .. مال هادا هرقل جالس كيخلع فيكم .. مكتين لاقانون لا والو 

هبة : وراه لقانون ماعندو مااااايدير ليا راه مشييت ليه مداها فيا حتى واحد 

ياسين : راه بلا فلوس عمرك مغديري شي حاجة ... انا غنتكلف نتي ديري اللي قلت ليك سيري عند لكاتبة تغرق ليه الضوسي مزياان تسيفطو بلا صدع وانا خنا كنعرف الناس غيسبقو بيك نتي اللولة ونهار تمشي ليه لورقة غادي تخرجي نتي 

هبة : نااااري منقدرش كنخاااف 

ياسين : مكتيقيش فيا ؟

هبة : اهء .. ففف وكنتيييق فيك ولاكن راه خايفة 

ياسين : واديري اللي قلت ليك بعدا ........ ضربك؟

هبة : لا ماضربنيش

ياسين : علاش كتكدبي اهبة ... عزيز عليك تاكلي لعصى؟

هبة : واضربني غير ضربة خفيفة وصافي 

ياسين : بلاتي على ديلمو ... غا بلاتي .. سيري تنعسي دابا حتى للصباح ونهضرو 

هبة : تصبح على خير

ياسين : تصبحي على خير وردي بالك نعسي حدا فتيحة 

هبة : واخا 

قطعات وطاحت نعسات ... الصباح دارت اللي قال ليها عليه كامل ورجعات مع 12 للدار . دخلات حيدات الجلابة وهي تلاقا مع نكير لعكوزة 

- هادشي علاش جبتي لخدامة ؟ باش تبقاي دالعة فزناقي فوق ما قالها ليك راسك 

هبة : مشيت عند ماما ... واش غتبقاي حاطة عليا؟ !!! افففف 

دخلات للبيت علقات الجلابة .. واحد الشوية سمعات لعكوزة كتغوت وصوت الدراري فقلب الدار ، خرجات كتجري لقات 3 ديال الدراري مدخلين جواد هازينو مقادرش يوقف .. وجهه مابقاش كيبان بالدميات وكامل مدكدك مقادرش يوقف على رجلو .. شبعان غبرة كيطلع النفس بزز ... خرجو عينيها ووقفات مع الحيط دايرة يدها على فمها ولعكوزة كضرب فخادها 

- واااااهيا نااااري ... وااااهيا لعاااالي اش وقع ليه ... واهيا ربي واش رموك داز فيه ترزييييت في ولدي 

هضر واحد من دوك الشمكارية وقال

- تعرضو ليه 4 ضربوه ما داز فيه تاواحد 

لعكوزة : وااااهيا ربي اش بعاو عندوووو شكووون هادو شكوون 

هضر واحد اخر وقال : كنت جالس مع الدراري فراس الدرب تا جاو واحد جوج ماعرفت منييين جايين كيسولو عليه .. ماعرفناهم بوليس ولا شكون كااع .. تبعناهم كاملين انا ودراري .. مشاو كيسولو لقاوه مجمع فداك لقنت حدا ديبو ديال لياجور ... شوية وكفت واحد الطموبيل كحلة ونزلو منها جوج خرين بالسواطر والسيوفة شدوه عطاوه قتلة 

طاحت لعكوزة فالارض وقالت : وخليتوه ياكل لعصااااا هااااا ... خلييتوووه !!

هضر واحد اخر وقال : واكن شفتيهم يسكت ليك لقلب ... جايين من كازا ولا ماعرفت منين قاليه واحد بغيتي تعرف شكون حنا طلع لكازا . تي راه كازا هاديك الميمة ولاد زيرو كاط ولحي محمدي برنوسي ومولاي رشيد .. مكاين غا لقتيلة ... تبعناه بجناوا خرجو لينا دوك الربعة بسواطر كل سيف قد ماضربتي فالدنيا .

- شوف اشمن حساب عندو معاهم راه نيفو تهرس خاصو يمشي سبيطار .. راه خصنا فاش نديو.... ماعرفنا داك السخط ديلمو منين جاي

تجبد جواد 10 ايام فالدار مريض مكاينوضش وصحابو كل شوية يدخل عندو واحد ... نيفو مهرس وداير ليه فاصمة .. هبة كدوز من حداه حانية الراس وتمشي حانية الراس مكدورش بساحتو ، بعدات للكوزينة وجلسات كتسمع فيه كيهضر مع صحابو ويقول

- ماعندي تاحساااب مع شي ولد فكازا بلا دوخوني

- وعلاااش كالك سول عليه فكازا ... شداك نتا لكازا اصاحبي؟

- واش شي وحدة كريسيتيها؟ 

جواد : ماااانعرف .

- داك مول تيشورط كحلة هوا اللي جابهم بااينة 

جواد : وداك مول تيشورط عمرني شفتو از***** 

- ديكلاري اصاحبي دابا يتعرضو ليك عاوتاني

- اااااش غايديكلاري وهوا روشيرشي ا نم ... 

جواد : نمشي عندهم برجلي نكولهم هانا شدوووني!!! سكت ولا خرج تق**** نتا بعادا ولد لق**** نتا اللي وريتيهم فين انا 

- وناااااااري !!! انا جيت لقيت لمطايفة مشيت جمعت دراري ... 

جواد : دراري يا ولاد لق***** صدقتو ق***** واخا على ز**** بوكم واحد واحد .... نعرف غييير شكوووون هادا وفين كيعرفني نطلع لمو تا لكازا 

- سكت اصاحبي سكت ... اش غطلع .. طلع باش يسيفطوك فميكة ! مريييض نتا واش بنادم نازل بسيوفة اللي قرب كيشيرو عليه .... داك مول لكحل اللي ضربك لخرين كانو غير كيهيبو بسيوفة على بنادم 

- شوووووف اشمن حساب عندك معاه ... ماهضر تا لهضرة نعرفو علاش نزل عليك بكلاشات ... شفت داك الراس دخل فنيفك اصاحبي دخت بلاصتك 

جواد : نوض تق**** نوض ولا نطفي لمك هاد جوان فعينك .... بلاااتي نجيبو نجيبو الى مندخل على مو للحبس راني ولد *****

تخلعات هبة وتزاد معاها الزايد .. سكتات وصفار وجهها ورجعات كتفادا تلاقا بياسين فمرة .. فين ما يبغي يجي مكتبغيش تخرج عندو ... دازت عشرين يوم ورجعات لمياه لمجاريها ... خرج جواد دار خبلة فولتد حومتو ولفاصمة مزالة على نيفو ... حيح بواحد الجنوية ماقدر تا واحد يقرب ليه ... خبار هبة كتوصل كاملة لياسين وفتيحة مكتزكل تا حاجة واخا كتعيا فيها هبة باش متوصلش ليه لاكن كدير ليها لخاطر فاللخر كنلقا لخبار عندو . 

وصلات استدعى وعيط ياسين لهبة علمها .. خرجات فلبلاصة من الدار هازة صاك ديال الحوايج مرعودة ونزلات كتسلت والقفقافة شاداها .. لقاتو حدا طوطال كيتسناها .. ركبات وهوا يديماري بيها نيشان لكازا . فالطريق سولاتو خايفة وقالت

- فين غنمشي دابا؟ ناري الى لقاني يقتلني

ياسين : انا اللي غنقتل اصل مو الى مشا حتى فات سلا 

هبة : وفين غنمشي دابا؟

ياسين : غتمشي معايا للدار 

ضربات حناكها وقالت : اااويييلي !!! فيها لحبس 

ياسين : نتي رافعة دعوة ديال الطلاق يعني هربي فين ما بغيتي وهوا اصلا كيتسالوه واحد الشهراين فلحبس خاصو يخلصها الى مشا حتى وصل عند لبوليس

هبة : وباش عرفتيها؟

ياسين : مشيت درت بيه ديكلاراسيون تما عند لبوليس تما فسلا قلت ليهم وقف طير ليا تيليفون وانا واقف فالسطوب .. قالي واحد راه جمعو ليه وكيقلبو عليه يبان ليهم يجمعوه 

هبة : ودابا غنمشي معاك ؟ وشنو غانقول لدارنا غيسخطو عليا 

ياسين : عيطي لماماك دابا قولي ليها هز عليك جنوية وهربتي عند شي صاحبتك خفتي منو .

هبة : وفتيحة فتبقا تما 

ياسين : خليها باش نعرف اش كيدير

وصلو لكازا وبالضبط فأنفا ، وقف الطموبيل حدا عمارة مقابلة مع السكة ديال الطرام وقهوى كبيرة بالجردة .. نزلات كدور عينيها وتشوف الجو والشارع النقي والناس نقيين .. شحال ماخرجات من الحبس .. الحبس اللي دار ليها فالدار وخلاها كدور فشارع واحد من عند مها للصالون للحمام . حسات هبة بالحرية وللحضة نسات الهم وتهديد جواد مللي بعدات عليه . تلفت ياسين عندها بابتسامة شافها تالفة كتشوف هنا ولهيه وحشمانة غير بوحدها وقال

- هبة؟ مالكي؟

هبة : والو .. سكان هنا ؟

ياسين : امم .. يالاه طلعي 

دخلات معاه للعمارة .. كاملة مرايات جالس فالطرف عساس ..لاح ليه ياسين السلام ومشا دخل فالاسانسو وحداه هبة .. طلع بيهم السانسور وهما ساكتين .. ياسين مكروازي رجليه ومتكي على كف يدو مع المراية كيشوف فالارض عقلو مامعاهش وهبة متشوقة للقتدم وعندها امل كبير وتقة كبير فياسين ، تحل الاسانسو وخرجو بجوج مشا فتح باب كحل بالساروت دفعو وقال 

- دخلي .. مرحبا بيك 

دخلات بشوية كتسرح عينيها فالدار الصالون مغريبي مقابل معاها طويل فالباج مفرش ومتول وقدامو صالون صغير عصري بالفوطوي والطبلة واللبلازما كبيرة فالحيط محلولين على بعضياتهم فارق بينهم خشب واقف منقوش متقب . على ليمن وسعة خاوية فيها طبلة بلكراسة ونيشان ممر فيه بيبان . كوزينة مقابلة مع حمام وفالطرف بيت مقابل مع بيت مبيناتهم مرايا كبيرة من السقف لاارض فالحيط وزربسة طويلة رقيقة . رتاحت وتبهجات فديد الدار ... الضوء داخل ليها من كل جهة وسراجمهها كبار مهوية .سد لباب وقال 

- الدار دارك ... دخلي فين ما عجبك وخرجي منين ما عجبك حتى واحد مغيصدعك 

تلفتات بادب وقالت : شكرا .. شكرا بزاف على هادشي اللي كدير معايا 

ياسين : تنهد كيشوف فالسما) هاااحنا بدينا عاوتاني ... جلسي رتاحي ... نجيب ليك شي حاجة تاكليها 

هبة : مسدودة ليا الشهية 

ياسين : انا غنهبط غير لهاد لقهوى اللي هنا عندهم ماكلة نجيب ليك شي حاجة خفيفة 

حل لباب مشا خلاها واقفة كدور فبلاصتها .. مشا كدور فالدار ودخلات لكوزينة لقاتها مشطبة حتى كاس مامحطوط فوق لبوطاجي ولا شي سربيتة مرمية ..كدالك لحمام ... دخلات ليه طلات ضرباتها رسحة زوينة للوجه .. نقي وحوايجو اللي كيحتاج مستفين فبلاكار بلا بيبان فالثنت هما ولفوطات وشيتات دالسنان الى اخ . .. تنهدات وخرجات مشات طلات على بيت النعاس .. كدلك لقاتو ملمط ومجبد فراشو كري مغلوق ومفوتوح قدامو تلفازة فاحيط وطبلة طويلة صغير ومرايا وباللكون بالريدو وبلاكار .. شافت لبيت لاخر لقات فيه سدادر حادرين بطلامط فالازرق فيهم وريدات فالموطارد وتلفازة وطبلة .. بانطوفة محطوطة فالجنب وكاس دلقهوى وطفاية فيها لكراو .. عرفاتو كيجلس تما .. شافت لفرق الشاسع بين دارها ودارو ... واخا حتى دارها مفرشة وزوينة ولاكن عمرها مكتجمع ... وجواد منين ماداز مخلي وراه الروينة وحتى حاجة مكتبقا كما هي .. حتى الطلامط تكلو بالصابون وكشف لونهم . رجعات بلاصتها فالصالون لعصري وجلسات ساهية كتخمم حتى دخل ياسين ، حط الماكلة فوق الطبلة وجلس حداها فتح ليها الموناضة وجاب ايها كاس وطبسيل حط فيه كلشي وقال

- يالاه كولي .

هبة : عير عدبتي راسك والله مسدودة ليا الشهية 

ياسين : هضرتي مع ماماك قلتي ليها اللي كاين 

هبة : وراه هي اللي شاطناني .. خايفة عليهم هما .. كن ماهما كن راني هربت شحال هادي 

ياسين : مقيقدرش يدير ليهم شي حاجة ... غير كيخلعك 

هبة : هيييه! راه يدير لعجب مزال مكتعرفوش كي داير

ياسين : واكولي بعدا من بعد نشوفو الحل 

بدات تاكل بزز ..شوية صونا ليه تيليفون وفتح لخط قدامها جاوب

ياسين : وي فتيحة ... اممم .. اهاه .... اهممم... غير خليك تما مخك نني مارفاسك والو وماعافرة والو ... خليه يحيح ويهرس .... اي حاجة طرات عيطي ليا ... الله يعاون 

قالت هبة بلهفة : شنو وقع؟؟

حط تيلي وقال : شاف استدعى اللي وصلاتو من المحكمة وهوا يطير ليه لفرخ .... .... رجع للدار مالقات ومشا لداركم قلب عليك مالقاكش وخرج كيحيح بوحدو ويقلب عليك .... خليه يقلب . . . طفيتي تيليفون كما قلت ليك ؟

هبة : اه طفيتو .. عرفتي خايفة غنموت بالخلعة اياسين 

ياسين : انا معاك اهبة ... مابقيتيش بوحدك .. واخا نعرف ندخل على مو تا للدار نكرضو طراف 

هبة : انا خايفة غير على دارنا 

ياسين : راه ميقدرش ... عارف راسو الى دارها ودخل للحبس نتي غطيري من بين يديه ... دابا غيقلب على كفاش يرجعك .. وحنا عنعطيوه امل انك غترجعي باش ينسا داركم ونلهيوه على بيدمن نشوفو الحل مع داركم .... خاص باباك يتفاهم معانا وصافي 

هبة : اويييلي بابا الى عرفني كنعرفك غيدبحني 

تما على ضهرو وقال : هادا هوا المشكل ... كن كنت كنعرفو كن درت معاه شي حل .. نتي مغيسمعش منك وانا ماعندي كي ندير نهضر معاه اففف (تلفت شاف فيها وقال) عرفتي شنو ... مقادرش نتخيلك مع واحد اخر فدار وحدة ... مقاردش مستوعبها .

سكتات ماقالت والو وماعارفاش اش واقع فسلا ... كل شوية تعيط لمها من نمرة 0
مخفية وجلسات كتهضر معاها في حين جالس ياسين حداها منكي على رجليه حاط يدو تحت فكو وكيخمم 

- هبة : الو ماما ... واش كلشي مزيان ؟

الام : رجعي بحااالك اش كديري ... هربي لدرا باك ماشي تخرجي طجي وتخلينا مخلوعين عليك 

هبة : باحباط ) راه قلت ليك انا مع صاحبتي ... قلت ليك مزيانة ورفعت دعوى ديال الطلاق اماما بغيت نطلق 

الام : واش باغا ديري فراسك الضحك ؟ اشمن طلاااق اش كنخبؤقي وليتي ديري لي فراسك 

هبة : بالبكا) خمس سنيييييين من حياااتي اللي ضاااعت ... كناكل فيها لعصى وكنبات مخلوووعة اما نتوما ولفتو بيا وكيجيكم النعاس قلتو ولفات صااافي اهىء اهىء ... مرتاااحين مافيكم اللي ينوض شي صدع .. نموت بلا غوات حسن ماينوض الصدع .. قلتو صافي جلسات هاحنا تهنينا ... ماشي نتي اللي تغتاصبتي ومزوجة شمكار .. راجلك كينعس حداك نقي ماشي بحالي عايشة فالعافية والخنز والزبل كنحشم نمشي معاه فالزنقة ... عرفتي شنو ديري... انا غنهنيكم مني فمرة ... عمركم تعاودو تشوفو وجهي رتااااحي دابا .. حياتي ضيعتها خايفة عليكم ونتوما كااااااع مامسوقين ليا ... ودابا تستاهلو الى وقعات فيكم شي حاجة 

قطعات وبدات كتبكي بحرقة ... هز راسو كيتنهد جرجها من يدو عندو .. طتحت على فخدو كتبكي وتشهق وهوا كيرجع ليها شعرها للور مهبط وجهه عندها وكيمسح ليها 

ياسين : صافي ... قصحتي معاها بزااف كن غير ماعيطتيش ليها حسن 

هبة : حتى واحد محاس بيا اجواد ... كلشي باغي لخنا وراحت لبال راسو اهىء اهىء اهىء حتى واحد مكيفكر ليا وعمرهم قالو لي طلقي منو . المهم عندهم راني مزوجو .. شنو كيدوز عليا وشنو واقع كاع مكيفكرو فيه ... خافو عليها الشهراين اللولة ودابا صافي حسبوني من المزوجين تهناو كاع مللي مرجعتش ليهم 

ياسين : هانا هاز معاك الهم ... وحاس بيك .. ومن نهار رعقت اللي كاين مكنعسش والله مكيدوز عليا .. كنكول مع راسي .. واش راه حداها .. واش شادها بزز ... واش قرب ليها .. واش ناعسة حداه .. واش ضربها ... بديت نتسطى مااعرفت مالي . شووو صافي دابا من لبكى ... غادي تفكي ان شاء الله وغتبداي من جديد .. غادي تنساي كولشي هادشي اللي وقع ورجع من الباسي . 

بقان على نفس الوضعية كتبكي .. بدات كترعد وهي تهز راسها شافت فيه وقالت بخجل 

- و ..واش عندك ... هنا ... 

تنهد حاط يديه على وجهه فهمها اش بغات .. حرك راسو بالايجاب وقال

- انا غنخرج نجيبو ليك رتاحي نتي وحيدي عليك الجلابة باش تنفسي 

ناض خلاها جالسة .. نصلات الجلابة وجلسات ببيجامة شورط حد الركبة وتيشورط ديالو فلغوز بارد نص كم .. شمعات شعرها فالسماء بقراصة وبقات جالسة كتسناه حتى دخل هاز صاك فيديو وسد لباب ... وقف جبد ليها قرعة من ديال الشراب بيضاء حطها فوق الطبلة ومشا جاب جوج كيسان وطفاية وجلس حداها .. ماكرهش يمنعها ولاكن خاف يقول ليها شي كلمة وعارغ البلية كي دايرة والى صدعها فراسها غاترجع فين كتشربها بلا مايقول ليها شي واحد شي كلمة ... خوا ليها فالكاس وخوا حتى ليه هوا وعطاها لكاس شداتو وتكات على ضهرها ساهية ... بقا كيشوف فيها كيفاش كدير تشرب ... بحال الى كتشرب العصير .. ماملهوفاش وغير بوشية عليها حتى بدات تهضر وهي ساهية بوحدها وكتبكي 

- خرج علياااا اياسين ... خرج علييااااا ... جبد لي الصدع مع واليدياااا .. وليت كنحس براسي بووحدي فهاد الدنيااااا.... بغيت نرجع كي كنت .. بغيت نرجع ليستيا ... بغيت مايوقع ليا والو ... بغيت نساااا كولشي 

حيد ليها الكاس وقال : اري هاداك براكة عليك ... لعب عليك الشارب . 

هبة : لااا غير خليني ... خليني بغييست نمووووت .. بغيت نموووون اياسين .. كنحس براسي غنموت 

ياسين : فوتي كتر من القياس ... غاتموتي بصح الى زدتي شي كاس 

حيدو ليها وخلاها متكية على ضهرها كتشوف قدامها وتهضر .. وهوا كيسمع ليها ويشوف فحالتها اللي عمرو كان تخيلها فيها .. 

- واش انا كاااع نستاهل هادشي كامل .... واش انا درت شي دنب .... علاش كيوقع ليا هادشي ... علاش الناس كاملين فرحانين غير انا اللي عايشة التعاسة ... علاش هادشي علاااش

سكتات شوية كتمايل براسها .. اما هوا ساكت مكيهضرش .. شرب معاها وماكترتش بقا شاد فراسو وحال عينيه ... قرب حداها مسح ليها وجهها وقال كيشوف فعينيها 

- كلشي غيكون مزياان ... كلشي حتى حاجة مغتبقاي تفكريها 

بدات كتشوف فيه بشهوة ... دارت ابنسامة غريبة وقالت

- بوسني ... بغيت نبوسك 

قربات تبوسو وبعد وجهه وقال

- سكرتي اهبة ... غادي تندمي على هادشي وتبداي تبكي عليه من بعد 

جراتو وقالت كتشوف فيه بعيون معسلة 

- كتبغيني اياسين 

ابتاسم بعينين تقاال وقال : كنموت عليك ... ونموت معاك ... وعمرني ما غنطلق منك 

هبة : حلف 

ياسين: بلا منحتاج لحلوف ... دابا الايام توريك (بعد وجهه) نوضي تنعسي 

جراتو وقالت : حتى اما كنكوت عليك ... خليني نبوسك 

خري وجهه وقاال : ماشي دابا ... ودابا تشبعي بوسان يالاه نوضي

شداتو من لكول ديال القميجة كتجر فيه وقالت

- وا ستاااغل الفرصة 
.. استاغل لفرصة هانا قدامك 

ضحك وقال : ماكرهتش ... ولاكن ماشي دابا صبري وكغايكون عير خاطرك 

هبة : عمرني شفت شي واحد كتحرو شي بنت وماباغيش يستاغل لفرصة 

ياسين : نوضي تنعسي اللي هادا ... شتي شراب اش كيدير 

ناض بعا يهزها وهي وتوقفو حاطة يدها على معدتها وقالت 

- بلاتي بلاتي ... غنرض جيب شي حاجة دغيا 

مشا كيطير جاب السطل ورجع حطو فالارض جلسات حالة رجليها حاطة السطل لوسط مايل عندها متكية عليه وراسها هابط وبدات ترد وياسين شاد ليها شعرها اللور بيدو وجالس القرفصاء قدامها كيشوف فيها وهي مقلوبة وعسنيها مقلوبين دار فيها الشراب حالة ، هزات وجهها بغا يمسح ليها وهي تقول بصوت تقيل كتشد راسها بزز وتهضر بالسخفة 

- خليني.... انا كندر من منيفي وفمي بجوج ... 

ياسين : واغير بشوية عليك يالاه ... خوي حسن باش ترتاحي 

هزات راسها كتمايل : راسي .... اااا راسي ... كنموت اياسين ... كنموووت ومغيحضر ليا لا بابا لا ماما 

ياسين : تشربي قهوة؟ نصايب ليك قهوى قاصحة نشربيها 

هبة : اااااا ه اربي ... اربي شوف من حالي ... عندي لمشاكيييييل اياسي ااااااااااععععععىء بااعهععىء

تقلبات على سطل كترد وتشكي .. مرة تهز راسها تشوف فيه بزز وتبدا تبكي .. مرة تبدا ترد حتى بغا يتفركع ليها راسها ... هزات وجهها حمر سخفانة وقالت

- كنموت اياسين ... غنموت حاسة براسي كنموت 

هز ليها وجهها بشوية كيسمع ساكت مخليها تهضر وتقول لي بغات .. مسح ليها وجهها وحيد السطل حجو فالجنب وهزها فوق السداري نعسها على ضهرها ... شوية وهي تجبد ليه ورجعات ليها لحالة من جديد .. بدات تقرقب فسنانها بحال الصعر ومزير على يديها وعينيها مقلوبين ... بدا كيهضر ليها فودنها واشد ليها فيديها 

ياسين : هبة .... هبة ... هبة واش كتحسي براسك ماشي هي هاديك ... هبة كتسمعيني؟ 

حط يدو على وجهها قلبها وقال : هبة واش نديك لاطبيب؟ 

شاف حتى عيا وناض فنص الليل هزها لكلينيك ... دخلها خل معاها كيسول مالها .. قالو ليه الاعصاب وفاش تجيها لحالة مايزيرش عليها ولا يحاول يفتح ليها يديها بزز .. بقا جالس حداها حتى ولات لاباس وفاتها لحالة

هبة : سمح ليا اياسين ... عمرني نسا هادشي اللي كدير معايا ... سمح ليا سهرت 

ياسين : سهران وعاجبني السهير معاك ... يالاه سكتي براكة من لهضرة لخاوية 

ناضت على رجليها بغات تمشي ساعة لقات راسها حفيانة .. هزها كيضحك معاها على لهضرة اللي كانت كتقول قبيلة .. سحات شوية وتفكرات اش قالت و هي تكمش بدا غير كيضحك عليها بلا ميحتاج يفكرها . خلص لكلينيك ورجعها للدار .. دخلها لبيت النعاس حطها وطلع عليها مانطة خفيفة وجلس حداها شاد فيدها حدى فمو كيلعب فيها .. باس يدها وقال

- نفسي نقول ليك شحال كن حاجة ولاكن مقادرش ... حتى طلقي عاد نقدر نرتاح معاك 

هبة : شنو هاد لحاجة ؟

ياسين : حوايج هما ماكرهتش نقولهم ليك ... باغي نعبر ليك بالعربية مي ماقادرش . . . شربتيي لقهوى ة طيرات ليك النعاس وباغا تخليني فايق معاك وانا غدا عندي مايدار مع 8

يتبع 😴

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.