أنا و الشقيقان الجزء السادس

من تأليف Chaimae de Fes
2018

محتوى القصة

رواية أنا و الشقيقان

بدينا نشويو بعدما قادينا كلشي..كنا مرة نضاربو انا وياه مرة يعنقني مرة يهرني ولا ياخد بوسة ومسكين منصف الله يسمح لينا منو هههه..حطينا شوى وبدينا ناكلو..كيوكلني ويضحك معايا..حاسة بيه عاجبو لحال وانا كثر منو..سالا لغدا جمعنا داكشي منصف عيى بزاف بغى يطلع يرتاح..وحنا ماسخيناش ببعضياتنا..جلسنا علا لفوطوي وانا متكية راسي علا صدرو..تفرجنا ففيلم زوين ماحسيت تا داتني عيني.. آدم شافها نعسات ماسخاش بيها..قادها وخدا ليزار موراه وغطاها باش ماتبردش وبقى كيشوف فيها وهي ناعسة علا صدرو بحال شي بنت صغيرة..باسلها راسها وزير عليها مزيان وبقوة لي عيان استسلم لنعاس..غمض عينيه ومشى هههه.. حسام جبد ضوسي تا طاحت صورة هزها لقاها ديال شيماء..بقى ساهي فيها شحال تا فيق راسو وخبعها"غتكون مرات خويا خصني نتعود علا هادشي"..تكره فراسو حيت مابقاش من حقو يشوف فيها داك الشوفات..رجع كمل خدمتو وهو ماراضيش علا تصرفو.. رحاب سالات خدمتها وطلال عرض يوصلها مابغاتش ورجعات لدار فطاكسي.. كانت كلما كتحس براسها مخنوقة كتهز فوطو دولدها وطلب الله يسرلها امورها ويعطيه الخلقة التامة.. منصف هبط ناشط حيت نعس مزيان تا كيتفاجئ بيهم ناعسين هكاك ضحك وقال:فينك ا يسرا هههه..هز تيلي وصورهم بلا تفكير جاتهم الصورة واعرة خلاها كذكرى زوينة يشكروه عليها من بعد وخلاهم مرتاحين.. فقت كنتكسل لقيت راسي معنقة آدم بسمت وبستو فخدو..بسم وهو مغمض عينيه.. انا:ههه فيقتك؟ آدم:احسن فيقة ههه.. حل عينيه:كملي ههه.. انا:شنو غنكمل ههه؟ آدم:فيقيني مزيان هههه.. انا:ههه ا نوض باركة من الطمع.. آدم:ههه مانايضش.. قرصتو فجنبو غوت:ااي.. انا:باش تعلم تنوض خخخخ.. دفعتو ودخلت لحمام غسلت وجهي وخرجت لقيت منصف جالس هو وياه.. انا:جاكم الجوع ندير لكوطي؟؟ منصف جمع شنايفو كيشوف عاجبو لحال:الصراحة ختاريتي مرا ديال الدار نيت ههه.. آدم:عارف عارف هههه.. انا:ههه ودبا سولتكم جاوبوني.. آدم:انا جعت شوية.. منصف:انا جعت بزاااف هههه.. انا:ههه اوك انا نوجد ليكم.. آدم:سايني احبيبة نجي نوريك كل حاجة فين كاينة.. انا بابتسامة عارفاه شنو باغي يدير:لااا بلاش ههه انا غنقاد كلشي بوحدي..خليك مع منصف.. منصف كيضحك عليك زعما عاقت بيك.. آدم شير عليه بخدية لوجهو..

دخلت كنقلب بالشوية عليا تا لقيت كلشي..وهما قبالتي حيت لكوزينة مقابلة مع الصالون..قاديت ليهم لكوطي..فالتالي شفت فالكونطوار كان داكشي متنوع وكيشهي..عيطت عليهم جاو ناشطين وعجبهم توجادي.. كلينا مزيان مع جو من الضحك والتفلية والضرب ههه.. جمعنا داكشي درتو فألة غسيل الاواني..وخرجنا جلسني آدم قبل منو معنقني وكنهضرو مع منصف..تا جا لآدم تلفون فتح لقاه حسام.. آدم:اهلا خويا صافا؟؟ حسام:اهلا لهراب فين غابر؟؟ آدم:غي فالدنيا ههه.. حسام:ياك؟ولا مين مشاو عندك حبيبتك وصاحبك نسيتي خوه هههه.. آدم عجبو لحال حس بلي خوه تقبل كلشي:لا حاشا اصلا بلاصتك بوحدها.. حسام:اوا هي الا درتي بكلامي وجيتي..راه توحشتك والدار خاوية بلا بيك.. انا كنسمع لمكالمة عاجبني لحال وكنتمنى آدم يرجع. آدم:و ولكن.. قاطعو حسام:ماكاين ولكن ههه..اجي والله راه انا دادة اشتاقينا لصوتك وريحتك فالدار..اجي راه مكلقاش شكون نربح فالبلاي هههه.. آدم:هههه ياك؟تا انا توحشتكم بزااف و الا كام هكا نرجع.. حسام بفرحة:بصاااح؟؟ آدم:نشاءلله..انا مانقدرش نخسر ليكم لخاطر..عطيوني غي شي يوماين نقاد اموري ونرجع.. حسام:ههه ايلا جات فيوماين اوك..لمهم ماتعطلش علينا.. آدم:صافي كون هاني.. حسام:ياله نخليكم دبا..تهلاو فراسكم وسلم عليهم.. آدم:مبلغ تا هما كيسلمو عليك اخويا.. حسام:تصبحو علا خير.. آدم:بونوي.. قطع آدم معاه وهو مرتاح حيت تأكد بلي خوه تقبل كلشي.. بقينا مجمعين تماك تا طلب آدم ديليفري كلينا ومنصف طلع ينعس وانا وياه بقينا كنتهاودو.. آدم متكي وحاط راسو علا رجلين شيماء وكيشوف فيها وهي كتلعب فشعرو:حبيبة!! شيماء:اممم.. آدم:فرحانة معايا؟؟ شيماء:كثر ماتصور.. آدم تنهد:كفاش كنت بعيد عليك مافهمتش! شيماء:شوووتت بلا مانهضرو علا داكشي.. آدم:امم عندك لحق..ههه عاقلة اول يوم تلاقينا. شيماء تزنكات:تفووو ماتفكرنيش هههه.. آدم:فالطواليط دالرجال هههه والله تا نفرشك مع ولادنا نقولهم ماماكم كانت كدخل لطواليط دالرجال هههه.. بسمت:حشومة عليك راه الظروف هي لي دارتها هههه.. آدم هز يديها باسها:كنواعدك عمر داك الايام ماغتعاود..وديما غتكوني لفوق حيت نتي تستاهلي غي هادشي.. شيماء:ماحدك معايا مابقى خصني والو.. آدم:يخليك ليلي..ياله نوضي ترتاحي شوية.. شيماء:اوك.. طلعنا بجوج لفوق وصلني حدا بيتي.. آدم:تصبحي علا خير.. شيماء:تصبح علا خير.. آدم كيحك راسو:ياك ماكتخافيش تنعسي بوحدك؟؟ شيماء:ههه لا.. آدم:اوك بونوي.. بسمت:وا صافي سير هههه.. مشى آدم كيضحك دخل لبيتو تكى وهو كيتسنى غي ايمتا تكون شيماء ليه ويقدر يعنقها ويبقى حداها بلا قيود ولا خوف.. دخلت بدلت عليا وتكيت ناشطة ياربي يكمل علينا بالخير..

وهكا دازت لاغدا..ماخلينا فين تسارينا وفليل تعشينا وفاش سالينا ناض منصف مشى لبيتو وآدم طلق موسيقى خغيفة شطحنا عليها انا وياه..كان لجو فوق رومانسي بقينا نتمايلو مع لموسيقى تالواحد اللحظة احاسيسما غلبات علينا وقرب باسني..حسيت براسي فعالم آخور بقيت مصدومة فراسي وانا مسايراه تا حبس كينهج وشاف فيا..تماك ضربني ضو ورجعت حمرا بالحشمة.. آدم:كنبغيك بزاااف.(حنيت راسي ماطلعتو)شيمااااء شوفي فيا.. علا ليا راسي شفت فيه بزز:نتي لحبيبة ديالي وعمرني نخليك.. جاوبتو بصوت كلو حشمة:تا نتا لحبيب ديالي باش انا وصلت معاك لهنا.. عنقني فرحان:مازال غنتزوجو ونعيشو شي حاجة مادايراش غي صبري هههه.. تقبلت لي وقع وعنقتو تا انا..دازت ليلة زوينة بعدها كنا غنساينوه يسافر لبلجيكا يقاد شغالو ويرجع باش نسافرو لمغرب.. الصبح فقت علا لمساتو فوجهي سلم عليا ومشى...قنطت بزااف بلا بيه مي كان ضروري..فليل مشينا انا ومنصف لاوطيل بتنا فيه حيت حشومة نعسو فدار وحدة بجوج.. والعشية د لاغدا رجع تسالمنا بحالا غاب 100عام خخخخ..جمعنا حوايجنا عوالين نسافرو..وتهاودنا بزاف تا دانا نعاس علا لفوطوي بتنا معانقين فالصبح غي فقت حشمت من المنظر ومنصف ضحك علينا تا شبع..وفالتالي غمزو آدم يسكت حيت شافني تزيرت..وجدنا راسنا ومشينا لمطار وفوقت الاقلاع طلعنا..جلس آدم حدايا ومنصف مورانا..جرني عندو درنا سيلفيات تا شفنا فيهم منصف كيخشي راسو فالوسط شبعنا ضحك..داني نعاس غمضت عيني تا وصلنا عاد فقت..هبطت كنستنشق لهوا نقي د بلادي..جات طوموبيل مورانا ولمفاجئة كان فيها حسام.. حسام بابتسامة:علا سلامتكم.. آدم عنقو:الله يسلمك.. تا انا ومنصف سلمنا عليه.. حسام:ياله نمشيو.. منصف:انا غنمشي فطاكسي طريقي مبدلة عليكم.. حسام:ياله معانا.. منصف:مرا خرا.. دخل حسام لقدام وحنا جلسنا لور.. حسام مرة مرة يشوف فالمرايا بلا مايحس..وآدم وشيماء فرحانين وعيونهم كتلمع.. وصلوني فلول..خرجت وسلمت علا حسام من الزاجة وآدم خرج عندي وصلي لفاليز تالباب..وماما علا غفلة شافتنا سلمات علينا.. ماما:توحشتكم..علا سلامتكم.. عنقتها شبعت فيها بوسان وآدم عنقها فرحان:الله يسلمك أ لواليدة.. ماما:فين غبرتي علينا؟؟ آدم بابتسامة وهو كيشوف فشيماء:ها انا دبا نشاءلله ديما معاكم.. ماما:مرحبا بيك تا حنا ماكنسخاوش بيك.. آدم:ربي يخليك..لمهم من هنا لغدا نشاءلله نجيو عندكم انا وخويا..كاين طلب عزيز بغيت نجي نطلبو منك ههه.. انا تصدمت مايسحابليش هاد الزربة كاملة مي فنفس لوقت فرحت.. ماما عجبها لحال:مرحبا بيكم فأي وقت..ولي طلبتوها نحاولو نوفروها ليكم ههه.. آدم:ههه شكرا..ياله خليتلكم الراحة.. ماما:بسلامة.. حسام فالطوموبيل حس بقلبو غيسكت واخة عيى صابر مي هادشي صعيب عليه بزااف.. دخل آدم لطوموبيل ناشط وهو كيشير لشيماء وحسام دار نظاظرو حيت ماقدرش يحبس راسو يشوف فيها ولا مايبانش عليه اهتمامو بيها..

دخلت لدار سلمت علا خوتي كنت فقمة السعادة لي خوفاتني بزااف..مايمكنش كلشي يتحقق بهاد السهولة انا ماتعودتش ناخد اي حاجة الا فاش كنضرب عليها تمارة دبصاح..مي ماما وختي كانو كيحيدو هاد الافكار من دماغي.. وجدنا شحال من حاجة..مارتاحيتش من السفر ههه ومن هادي لهادي تا داز النهار.. آدم كان عاجبو لحال وكيوجد راسو يتزوج..نهارو كامل وهو مريح بالو مرة يهضر معاها فلواتس مرة يصوني عليها مهم عمرات عليه وقتو وتفكيرو..كان كيشوف ابتسامة علا وجه خوه فاش كيهضر معاها مي فلحظة سالا ورجع حدا خوه لقاه شابك يديه وعينيه فيهم حزن عميق..شك بلي خوه مجروح بزاف مي حاول يبعد هاد الفكرة علا دماغو حيت لفكرة درجوعو كانت من عند حسام نيت.. عيط ل شيماء حدا خوه يتأكد وفتش بدا كيهضر عادي وماناضش هاد لمرة خوه لي ناض بزربة وداز من حدا مرايا بيناتو وتماك شاف آدم التأثير دعلاقتو مع شيماء علا خوه..قطع تالف بلا سابق اندار وطلع عند خوه بزربة.. مشى لبيتو لقى احوالو مبدلا و واقف قبالت السرجم.. آدم:خويا مالك؟؟ حسام بصوت مبحوح:ل لا والو(مازال مدور وجهو).. آدم مشى عندو ودولو وجهو لقى عينيه حومر و وجهو كئيب عمرو اصلا شافو فداك الحالة.. آدم بتقطع:ح حسام مال ك ؟؟ حسام بسم بزز:ل لا والو قلتلك.. آدم بحسرة:ماقادرش تصبر ياك؟؟ حسام:ههه علاياش كتهضر؟وكفاش نصبر.. آدم:ماضحكش عليا..نتا مازال متقبلتي فكرة اني مع شيماء.. حسام تصدم بقى ساكت.. آدم ضرب فراسو:تفوو انا لي مكلخ ثقت بيك..قدرتي تكذب عليا واما بعيد مي وانا حداك اكيد لا..واش سحابلك ماغاديش نحس بيك؟نتا راك خويا لحمي ودمي واكيد ماغاديش نتمنى نعيش فرحان ونتا معذب.. حسام:ل لا شنو كتقول..هادشي ماكاين منو والو..نتا خويا لعزيز واكيد غنبغيك تكون فرحان ديما.ونتا سعادتك معاها مع لبنت لي ختاراتك وختاريتيها من دون لبنات.. آدم بصوت مجروح:ولكن نتا كتبغيها.. حسام:لا ماشي تا لداك الدرجة..زايدون كلشي كيتنسى مع لوقت.. آدم:ماشي كلشي..(جلس كيشوف فالارض)انا حاس بيك حيت جربتها من قبل..ويمكن هدا قدرنا نبغيو نفس لبنت..مي الا تحطيت فاختيار بينك وبينها اكيد غنختارك نتا.. حسام:شنو كتقول..علاش غادي تختار؟؟ آدم:حيت خصني نختار..ها انا تا تزوجت بيها..ديما غنبقى حاضي شوفاتك فيها وماغنقدرش نتلاقاك ديما..وحنا واليدينا وصاونا نبقاو بجوج شنو ماكان..وتا انا مامستاعدش نفقدك اخويا..هادشي علاش صافي.. حسام:حشومة عليك شيماء كتبغيك والا كان عليا انا نساحب من حياتكم.. آدم:صعيب..صعيب نكمل معاها وخويا كيبغيها(عينيه تغرغرو بالدموع وناض خرج).. الفرحة كاملة لي كانت فعينين آدم تقلبات لدمار..يمكن من الافضل كون مارجعش..مي خوه كان محتاجو..كفاش غيدير وشنو غيقول..مستحيل يبني تعاستو علا ألم خوه لواضح فكل لحظة..كيبغي شيماء آه ولكن الظروف مابغاتهمش يكونو بجوج.. دخلات يسرا عند شيماء لقاتها كتفكر.. يسرا:ههه شكون واخد عقلك ا لالة لعروسة ههه..سيدي لعريس؟؟ شيماء:قطع بزربة ومازال ماصونا.. يسرا:يا ختي ماشبعتيش؟؟من قبايلا تهضرو عيكون غي تشغل بشس حاجة وصافي.. شيماء:يمكن.. ليل طوال عليهم كاملين..آدم جالس فالجردة بعدما عاود لعاليا كلشي واكداتليه بلي قرارو فمحلو وبلي لبنت لي مكنابة ليه مازاى مالقاها حيت عمرو يرتاح وهو شايف خوه قريب لمراتو لي تاهو كيبغيها..وهدا افضل حل ليهم كاملين.. حسام حس بالذنب مي مشاعرو لي فضحاتو عيى يحاول يصبر ماقدرش شوفت خوه مع حبيبتو قتلاتو ملداخل.. شيماء ساينات تا عيات يولي يصوني حيت جاها احساس قبيح بزااف وخايفة..استسلمات فالاخير لنعاس.. صباح جديد.. فقت كنتكسل معطلة شفت الساعة لقيتها ل 11 ناري تصدمت عمرني درتها..وفوقاش؟فهاد النهار لي محتاجة فيه كل دقيقة..خرجت مزروبة عندهم ومعصبة مافيقونيش..

غي خرجت لقيت جو ماشي مريح نهائيا..ماما جالسة حانية راسها وختي شافتني بحالا تصعقات.. شيماء:علاش مافيقتونيش؟تعطلت بزااف حشومة عليكم.. يسرا:ف فقتي اختي؟؟ شيماء:لا مازال كنساين..ناري علا أسئلة خخخ..(شفت فيهم)مالكم؟؟ماعجبتونيش.. ماما:بنتي جلسي.. شفت فيها بزربة:ماما مالك؟ياك لاباس.. ماما:جلسي بعدا.. مشيت كنجري جلست تحت ركابيها مخلوعة:لا امامت ماتقوليش عيانة الله يعطيك الستر..كضرك شي حاجة؟قوليلي ماتخلعينيش عليك ياله نكشيو لطبيب.. ماما:لا لا ابنتي مافيا والو تهناي.. شيماء:لا قوليلي عارفاك كتخبي عليا..اهئ اهئ قولي.. ماما:لا تهدني علاش كتبكي دبا..مافيا انا والو.. شيماء:حمدلله..وشكون؟؟ ماما:ب بنتي كلشي بالمكاتيب و.. قاطعتها:ماما قولي.. ماما:آدم.. شيماء بخوف:مالو آدم؟وقعلو شي حاجة؟؟ ماما:لا ولكن..(ترقب)مابقيتوش غتزوجو..(تصدمت)صافي عيط ولغى كلشي..قالك مابقاش غيتزوج والله يسهل عليك..(هبطو دموع سخونين من عيني)هادشي اقدار وربي يمكن مامكتبكمش.. نضت علا رجلي شفت فيهم مصدومة:ل لا مايمكنش اهئ اهئ آدم غيجي هو قالي بلي كيبغيني.. يسرا بدات تبكي ومشات تشد فختها:خ ختي تهدني..اهئ اهئ بناقص منو الا مابغاش هو لي خسرك ماشي نتي.. حيدتلها يديها عليا:لا هادشي مستحيل..نتوما ماعارفينش شنو دار علا حسابي؟وعلا قبل نبقى حداه ومعاه..هو قالي عمرو يخليني اهئ اهئ.. ماما:اهئ اهئ الله يبرد عليك ابنتي. شيماء بالغوات:لا ما يمكنش قلتلكم مايمكنش.. دخلت لبيتي كنجري لبست لي لقيتو قدامي ويسرا كتحبسني.. يسرا:فين غادية؟. شيماء:حيدي ا يسرا..خصني نمشي نفهم منو.. يسرا:راه هضر بلسانو مع ماما ومازال باغية تأكدي.. شيماء مسحات دموعها ونيفها:الا كان باغي نساليو كلشي خصو يقولها وجه لوجه.. يسرا حاولات توقف فطريقها مي ماماها قالتلها تخليها تمشي..منها تا يتفاهمو بجوج الا كان كاين شي سبب.. آدم فاق معصب عيط لمامات شيماء قالها كلشي وهو كيتحرق حيت مابغاش يتواجه مع حبيبتو..مشى لخدمة قلبو غيطرطق بدا يقاد شغالو وهو ماشي فهاد العالم لحرقة فقلبو تا حاجة ماغتبردها..جات فبالو واحد الحاجة وقرر يديرها.. مشيت باتجاه الشركة حيت عيطت لدار لقيتو ماكاينش..ركبت طاكسي والطريق طوالت عيني دايرة عليهم نظاظر حيت دموعي مابغاوش يحبسو.. غي وصلت لتماك طلعت نيشان لمكتب ديالو.شحال من واحد بغى يقولي السلام مي انا كنت فحالة ماعارفها غير الله.. دخلت لمكتب بعجاجتي تا تصدمت بلي شفتو..حيدت نظاظري كنتأكد..مي واخة هكاك حاولت ندارك لي شفتو.. آدم شافها دخلات وقف وكانت جالسة هبة فحجرو تا هي ناضت كتفشش.. شيماء:آدم بغيت نهضر معاك بوحدك.. آدم بجدية:فاش؟؟ شيماء:خرجي من فضلك بغيت نهضر مع آدم بوحدو.. هبة:شنو بيبي نخرج.. آدم:لا..لي بغيتي تقوليه قوليه هنا..(جلس وجر عندو هبة)ياله هانا كنسمعك.. شيماء هبطو دموعها:علاش كدير فيا هكا..انا عارفاك كتبغيني غي اعتارف شنو واقع.. آدم:كان كيجيبلي الله كنبغيك..مي تأكدت بلي هكا كنحس مع اي بنت كنتلاقاها وفاش كدوز مدة كنساهم ونتي تسالا وقتك.. مشيت قاصداه وحيدت هبة من حداه وهو يشدني معصب.. آدم كيهضر كارز سنانو:سيري لدارك وفوتينا عليك.من الافضل تخلي عندك شوية دالكرامة..انا مابقيتش باغيك وهادشي قلتو لماماك فالصبح..دونك بلا مانطولو فهادشي..الله يسهل عليك.. حسيت بالحكرة شنايفي بداو يغزلو ودموعي هابطين كيف لحمقة..نترت يدي منو.وخرجت بلا ماندور وجهي..

يسرا كانت مخلوعة بزااف علا ختها عيطات ل منصف وقالتلو كلشي تصدم ومشى يلحق عليها لشركة ويفهم شنو وقع.. آدم غي خرجات تزدح فوق لكرسي متمني يموت اكيد بعد الشوفة لي شافت فيه وانها واخة جرحها تا عيى ماقالت تا كلمة..هبة عنقاتو وهو يحيدها.. آدم:*ودي... هبة تصدمات وهو يغوت:*وديييي ومانعاودش نشوف كمارتك هنا.. هبة اول مرة تشوفو هكاك تصدمات وخرجات كتبكي ومطعونة.. آدم تخيل فاش وصى سيكيريتي فاش تجي شيماء يدخلوها بزربة ويعلموه وهو كان جايب هبة عندو يستغلها فهاد اللحظة..وغي جاه لخبار جلس هبة عندو ودار داك التمثيلية.. الدخان خارج من ودنيه ولي لقاها قدامو كيهرسها..هز سوارت الطوموبيل وخرج فمرة.. منصف مشى لشركة سول علا آدم قالولو ياله خرج..تعصب ورجع يقلب عليه مازال ما مثيق شنو وقع.. آدم بقى سايق عينيه حومر وعروقو خارجين بسرعة قياسية..قلبو غيخرج من بلاصتو علاش خصو يسمح فيها علاش..هي لي عرف معاها الحب والحياة..كفاش قدر يتخلا عليها بهاد السهولة ويجرحها تالهاد الدرجة.. يسرا عيطات لمنصف كتسول علا ختها و والو ماكاين عنها خبر وتا تيلي خلاتو فالدار.. ماماها تخلعات عليها بقات تبكي وتندب حظها..اما يسرا كتفكر فين تقدر تكون ختها.. آدم غادي كيضارب مع لفولون تا وصل فوق حافة خرج وغوت بأعلا جهدو.. آدم:علااااااااااش....آهههههه.. طاح لارض وكيضرب فيها والغبرة كطلع و واخة هكاك مازال مابرداتش نارووو... منصف كيصوني ويقلب والو مالقى تا واحد فيهم.. خرجت من الشركة مصدومة حسيت براسي كنت مكلخة بزااف فاش ثقت بيه..غطيت عيني وهبطت بزز..خرجت غادية علا رجلي بقوة الصدمة.غي غادية بلا مانحس كنفكر ونعاود نفكر.كنت كنتخيل ولا لي وقع ف فرنسا هو لي كان خيال..قلبي بغى يسكت.مابقاش عندي الجهد لشي حاجة بحال هكا..داز وقت طويل تا لقيت راسي حدا لبحر..بعدت علا كاع الناس..جلست وجمعت رجلي عندي كنبكي ونتنخصص علا حالتي..ليوم كانت غتكون خطابتي..ومن الراجل الوحيد لي بغيت مي ها انا هنا بعدما صدمني وباعني بارخص ثمن.. ماعقلتش شحال بقيت هنا لمهم فاش نتابهت لحالتي لقيت الشمس كتغرب..

تفكرت دارنا لي خليتهم غيكونو مشوشين عليا..نضت بالشوية مسحت الرملة وشديت طاكسي.. ف دار شيماء كان كلشي خايف منهم تا منصف لي فقد الامل ف آدم وبدا يخمم غي لشيماء حيت هي لي لحقها الدمار لكبير من حيث لا تحتسب..كثر من 6سوايع وهي غايبة ماعارفين فين مشات.. تا تسمع صوت السوارت فلباب..كلشي ناضو قافزين..شافوها باين عليها صدمة كبيرة صعيب تجاوزها..شافت فيهم ودخلات لبيتها.. تا حد ماتجرأ يهضر معاها ومنصف نصحهم يخليوها بوحدها دبا..مشى بعدما طمن انها فدارها وطلب من يسرا تعلمو بالجديد.. بدا يصوني علا آدم و والو تيلي طافي..عيط ل حسام يتأكد منو و تا هو ماشافوش.. حسام حس بذنب كبير فهادشي لي وقع..شتت ليهم الشمل بحركة وحدة..تعصب حيت ماقدرش يسيطر علا راسو كون راهم فرحانين بحال فاش جاو من السفر..بقى يديها ويجيبها فدماغو لقى بلي داك الساع ماكانش مرتاح وتا دبا مامرتاحش دونك ياريتهم بقاو بجوج.. آدم بقى يدور بالطوموبيل تا عيى وفالتالي رجع لدار معطل.. حسام كان كيساينو خايف عليه:خويا هلا سلامتك فين غبرتي؟؟ آدم:الصمت.. حسام جرو من يديه فاش شافو طالع ينعس:علاش درتي هكاك ا آدم..حرام عليك لبنت والله.. آدم:مابقيناش مازال غنهضرو فهاد الموضوع..نساه كيفما نسيتو انا.. حسام:لا ماغنساهش.. آدم:هادا شغالك..انا بعدا آخر مرة تهضرلي فيه.. حسام:اوك اوك..سير دبا نعس ترتاح..غدا يكون خير.. طلع آدم وهو طافي ماقادر يحرك تاحاجة فيه نيشان مشى لفراشو ونعس مغطي راسو بالمخدة.. شيماء دخلات عندها ماماها لقاتها متكية علا لخدية دموعها هابطين فصمت.. ماماها:بنتي خصك تاكلي شي حاجة..نهار كامل ماكليتي.. شيماء ساكتة بحالا هازة ثقل الدنيا كامل علا كتافها.. ماماها بقات تحاول تنوضها وكتمسحلها بيديها علا شعرهت تا قاست جبهتها غطرطق بالحرارة.تخلعات.. ماماها:ب بنتي راسك سخون بزااف.. شيماء بدات كتسيخ مرة تسمع مرة تغمض عينيها:ما ماتخافيش دبا يبرد ا ماما.. ماماها:يسرا يسرا . يسرا جات كتجري:شنو ا ماما؟. ماماها:ختك فيها السخانة جيبيلي كمادات دبا.. يسرا قاست ختها لقاتها فري سخونة مشات كتجري جابت ليها كمادات ودوا شرباتو شيماء بزز.. وغي بدات دير الكمادات بدات تهلوس"ا آد م...ك كن بغيك...آددم..كذااا ب..اج ي.." ماماها كتصوب ليها الكمادات وتبكي:الله ا بنتي الله اهئ اهئ تا قلنا ربي غيعوضك ساعا هاهي جاتك دقة صعيبة الله ينجيك منها اهئ اهئ.. يسرا شادة لختها فيديها وكتبكي حيت بقات فيها بحالا هزيتي بنت وحطيتي بنت..احوالها تبدلات لي شافها يقول دوزات هي وآدم سنين..

ليل كامل وشيماء كتهلوس وحرارتها طالعة فالسما بسباب جلاسها حدا لبحر فداك الشمس..اما يسرا وماماها حايرين معاها.. اخيرا جا الصبح..يسرا داتها عينيها علا فراشها قبالت شيماء..و ماماها معنقا بنتها كتساينها تفيق..كانت مغمضة عينيها تا بدات تحرك.. حلات عينيها بزز حاسة براسها ثقيل بزااف..دورات وجهها جيهة ماماها.. ماماها:بنتي علا سلامتك..دبا شوية؟؟ شيماء:ش شنو وقع.. ماماها:غي طلعات ليك السخانة.. شيماء:بفف عذبتكم معايا ياك(شوية وعي تفكر كلشي)د دبا انا كنت غي كنحلم ياك(عينين مدمعين)قوليلي اماما..غي السخانة لي خلاتني نحلم داكشي؟!! ماماها بألم:بنتي الله يهديك قوي راسك عمرني ماشفتك فهاد الحالة.. شيماء حنات راسها:اذن داكشي وقع بصاح.. ماماها:ربي غيعوضك حسن منو..خلي ايمانك قوي نتي ماكنتيش هكا وعمرك غتكوني ضغيفة.. شيماء:حيت ماكنتش حاسة بالفرق بين حياتي قبل وحياتي من بعد.. ماماها:عارفة ابنتي..دبا لمهم صحتك ولا حنا ماعندناش معزة عندك تعيشي علا قبلنا؟ شيماء:اهئ نتوما من دبا لفوق كلشي فحياتي اهئ اهئ.. عنقاتها ماماها كيبكيو بجوج ويسرا سمعات هضرتهم بقات فبلاصتها كتسمح دموعها..فين كان مخبي ليهم هادشي..وعلاش فرط فيها هاد آدم.أسئلة بزااف كاينة مي صعيب يجاوب عليها من غيرو.. عاوناتها ماماها تنوض..كانت حالتها حالة بداك العرق دالسخانة والصهد..دخلاتها لدوش جلساتها بحال شي بنت صغيرة وطلقات عليها لما.. كنت تحت داك الما كنحس براسي ميتة واخة ماما كتغسل ليا باش نقدر نفيق مزيان..ماحسيت لا لما بارد ولا سخون.بحالا فقدت الاحساس ومسيطر علا بالي غي كفاش غنقدر نكمل حياتي بلا آدم..آه آدم لي عيشني يوماين فالجنة وجابني هنا يلوحني فالنار..شنو درتلو باش يعاملني هكاك ويقهرني كثر من أي واحد؟يمكن حيت قليلة حيلة وتجربة قدر يقنغني بحبو لكداب..الصراحة ماهماتنيش هبة ولا جلاسها فحجرو حيت عارفاها هي لي كتموت عليه وهو مامعبرهاش..ولكن حيت فضلها حدايا هاد لمرة وجرحني بكلامو وهي كتسمع عمرني نسمح ليه..لا حيت سمح فيا ولا حيت قالها وهو كيشوف فعيني"سالا وقتك"..هاد لكلمة لي ولات مرتبطة بسمية آدم..كلما جا علا بالي كنسمعها كتعاود"سالا وقتك...سالا وقتك.."عمرني نسالو هادشي.. خرجاتني ماما معنقاني ومكمسة فالفوطة..شعري مغطياه بفوطة خرا خوفا عليا..هي كتلبسني كلشي من لول لتالي..ماحسيت بالحشمة كيفما موالفة..كنعقل مين كنت صغيرة ماشافتني ماما عريانة هكا بالعكس انا فمرضها لي كنت كنغسل ليها ونقادها وها الدنيا دوارة بلا مانتحكم فنفسي ونسيطر علا عقلي وجسمي خليتها تكلف بكلشي غي سالات حطيت راسي وغمضت عيني تقدر تكون قالتلي شي حاجة مي ماسمعتهاش..حواسي تلغاو وليت جثة هامدة كتساين فوقاش تدفن..(كنشرحلكم بهاد الكلمات باش تحسو شوية فين وصلات حالتها وكفاش عانات ايامها لولا).. ماماها شافت فيها كفاش تكمشات تنعس عاوتاني تزيرات حيت هضرات معاها وقالتها بزاف دالكلمات المبعثرة تحاول تاخد انتباهها"بنتي..غتكوني جعتي ياك؟؟..ههه رجعتيني لصغرك..كنت كندوشلك ولبسك..شحال توحشت داك الايام..بنتي..بنتييي" استسلمات وخرجات توجد ليها لفطور كماعالله تاكل شي حاجة واخة بزز منها كاع.. يسرا:امدرا ماما كيبقات؟؟ ماماها بصوت مخنوق:والو ابنتي بحالا راها ماشي هنا..ماعرفتش شنو وقع ليها اهئ اهئ اول مرة نشوف بنتي هكا..مدمرة ومحطمة..الله ياخ...(كانت غدعي فيه وسكتات)تفووو الله يسمح ليا..انا والله مافهمت لولد كان باين محمس وكيبغيها بزاااف شنو وقعلو؟ يسرا:اوا الا كان ظلمها الله ياخد فيه لحق..انا نكملها الا نتي درتي بحساب عاونك.. مشات يسرا معصبة منو كون لقات تقفو بجيفة وترتاح علا هاد الموصيبة لي وقع فيها ختها..

 وجدات بزربة ماماها(ثورية)لفطور ودخلاتو ليها..والو مابغاتش تاكل.. شيماء:خليوني غي نعس باش نولي بيخير..مابغيت ناكل والو.. هدا كان هو جوابها كلما دخلو ليها لماكلة.. دازت يوماين تقريبا..منصف حاير مع صاحبو لي تالدبا ماقدرش يتلاقاه وآدم اصلا متقصد هاد القضية باش مايغلطش بلسانو ويقول لي مان حيت منصف ماكيصبرش علا لحق ويقدر يهز كلشي يوصلها لشيماء ويصدقو بداو من جديد.. حسام كيعيى يحاول يجبد لموضوع مع آدم ماكيعطيهش فرصة نهار كامل غابر ميرجع تاليل ينعس.. آدم تا القصارة مابقاش يبغي يمشيلها..كيبقى يدور بطوموبيلتو فالاماكن الخاوية يبقى يسترجع ذكرياتو مع شيماء وهو واقف كيشوف بعيد وعينيه حومر..مي شوفتها فيه آخر مرة مابغاتش تحيد من بالو..ماكانش يتمنى يتفارقو و تا الا تفارقو مايتفارقوش هكا بحال الاعداء ومايقدرش تا يسول عليها ولا يشوفها..توحشها بزااف كفاش غتكون حالتها دبا؟واش راها كتحاول تنساه ولا ماقادراش بحالو؟؟.. هاد لمرة فكر يدوز حدا دارها بغى يحس براسو قريب ليها..حط طوموبيلتو بعيد ودار كاسكيط ونظاظر واخة ليل ومشى قبالت سرجم ديالها بقى كيشوف الضو طافي..زعما تكون جالسة مع عائلتها ولا تكون خرجات تبدل جو.. وفهاد اللحظة شيماء متكية حسات بقلبها تخطف دخلات عندها ختها شعلات ضو وهنا آدم تخبع مور شجرة وبقى واقف.. يسرا:شيماء ختي نوضي.. شيماء:طفي الضو.. يسرا:لا ماغنطفيهش..نوضي راه هادي 3ايام ونتي علا هاد الحالة.. شيماء:يسرا طفي الضو وخرجي.. يسرا:اوووف.. خرجات يسرا وطفات الضو كدير علامة لماماها بلي مابغاتش.. آدم شاف ضو رجع طفى تنهد ومشى لدارو.. صباح جديد.. منصف داز تقضى لفطور وداز عندهم..دق عليهم حلات ليه ثورية سلم عليها فرحان ودخل كيسول علا لبنات.. ثورية:يسرا خرجات تسخر وشيماء مازالة فبلاصتها كيف لعادة.. منصف:خالتي فيقيها بغيت نهضر معاها.. ثورية:ماغتبغيش اولدي.. منصف:دونك دخلي قاديها انا ندخل نهضر معاها.. ثورية:واخة ولدي.. دخلات عندها علات الريدو:شيماء منصف بغى يشوفك.. شيماء:بغيت نعس.. ثورية نوضاتها:غتلبسي شي حاجة دبا وخصك تسمعيه.. شيماء بغات ترجع تنعس وهي تلبسها تيشورط بزربة:دبا نعسي الا بغيتي.. عيطات لمنصف دخل.. منصف شافها هكاك عينيها زورق بالتعب وماقاداش تجلس..وقف قبالتها مخنزر.. منصف:شنو يخليك ديري فراسك هكا؟قوليلي..كاين شي حد فهاد الدنيا يستاهل تبغيه كثر من نفسك..شوفي لمشكلة ا شيماء انا عارفك بنت مؤمنة وغتقدي دوزي هادشي بصبرك وايمانك ورضاك بقدرك..كلشي مقدر ومكتوب والا كنتي باغية تحداي القدر بهاد الفعايل الله يعاونك..انا كنت جاي فرحان باغي نبشرك بلي جاونا جوج عروض فمدينة بعيدة شوية 10ايام..منها تقدري تخرجي تامن هاد الحالة..حيت شوفي نتي محتاجة خدمة وهدا وقتك لي خصك فيه ديري علاياش تولي..الا كنتي باغية ترجعي لعيشتك لولا اوك مي ايلا كنتي باغية تزيدي لقدام ديما غنكون جنبك..نتي ختي فاهمة شنو هي ختي..وعمرني غنخليك تزيدي تآذاي..حاولي تبداي من جديد ولا بزز منك غنديك وغتخدمي معايا علا أساس اني مدير اعمالك لي غيفرض عليك اي حاجة باش توصلي.. شيماء كترمش متكية راسها علا لحيط وهايمة فتفكيرها.. منصف جلس حداها صرفقها تا دار وجهها وتجمعو الدموع فعينيها..وبقى يهزها من كتافها تا شافت فيه.. منصف:فيقي من هادشي فيقي..خوتك وماماك محتاجين ليك.ولا نسيتي بلي تاهما عندهم حق عليك.. شيماء بقات تبكي بالجهد وتشهق وهو واخة كلشي عنقها كيهدنها..كلشي دخلو كايشوفو داك المنظر ويبكيو خصوصا وهي راخية يديها لارض ومنصف مزير عليها وكيدوز يديه علا شعرها.. حيدها وشاف فيها:غتولي لاباس نشاءلله..(شاف ف تورية ويسرا)وجدولها حوايجها غدا غنسافرو نشاءلله.. ثورية هزات راسها ويسرا ابتاسمات ليه حيت حرك ختها من داك الهدوء القاتل.. مشى منصف وهما خرجو يوصلوه فاش رجعو عندها يحاولو ينوضوها لقاوها ماكايناش بداو يقلبو تخلعو..شوية وهي تخرج من لحمام لي كان ضو ديالو طافي كتشهد استعدادا لصلاة.. فرحو بيها بزااف وعنقوها وخرجو.. حسيت براسي بعدت بزااغ علا الله هاد الايام..صليت وكلي امل ربي يهز عليا همي..بقيت فكل ركعة كندعي ونبكي تا حسيت بقلبي دخلات عليه راحة نسبية خلاتني نتقبل هادشي ونحاول نقلب الصفحة..

شوية وهي تخرج من لحمام لي كان ضو ديالو طافي كتشهد استعدادا لصلاة.. فرحو بيها بزااف وعنقوها وخرجو.. حسيت براسي بعدت بزااغ علا الله هاد الايام..صليت وكلي امل ربي يهز عليا همي..بقيت فكل ركعة كندعي ونبكي تا حسيت بقلبي دخلات عليه راحة نسبية خلاتني نتقبل هادشي ونحاول نقلب الصفحة.. خرجت فطرت معاهم بزز مني مي حمدلله علا كل حال فاش كنشوفهم قدامي خايفين عليا وكيعطيوني ماناكل..حسيت بالذنب اتجاههم عذبتهم معايا بزااف وانا اصلا لي خصني نبقى واقفة علا رجلي ونهز الدار باش يبقاو ديما علا خير.. سافرت مع منصف لمدينة بعيدة شوية..كنت باغية نولي لاباس والارادة ديالي هي لي وقفاتني علا رجلي أكيد وبمساعدة خويا وصديقي منصف لي فضلني علا صاحبو ووقف فصفي.. منصف كان كيحاول يتواصل مع آدم لي أخيرا بدا يخدم وتبدل طوطالمو مابقاش كيطول فالهضرة وقاصح لخدمة هي لخدمة.. دوزت العروض ديالي ومرة مرة كنت كنهضر مع ماما وخوتي..خديت فلوسي ورجعنا..بعد 10ايام حسيت بحالا سافرت سنين حيت كانت بحالا فترة علاج ليا من مرض سميتو حب.. انا من دبا لفوق ماشي دالحب انا عايشة علا ود عائلتي وراحتهم وتا باقي ماعندوش قيمة فحياتي.. وصلني منصف عييت فيه يدخل مابغاش..مشى يرتاح وانا هزيت لفاليز ديالي وطلعت لدارنا..دق دق.. يسرا حلات لباب:هههه ختييييي(طارت عليها بتعنيقة) توحشتككك مواح موااح مواااح.. ثورية جات لباب مزروبة فرحات:بنتي الزوينة..(تسالمو) شيماء:توحشتكم بزااف والله..كيبقيتو؟؟ ثورية:كلشي لاباس حمدلله.. شيماء:فين عماد؟؟ ثورية:خرج يلعب ماتش مع صحابو.. شيماء:اممم مزيان.. بقاو جالسين تعاود ليهم علا السفر ويسرا كتشوف فختها لي مقادة راسها مزيان كسيوة صفرا حد الركبة مع صندالة باج وصاكاضو فلونو..وشعرها طالقاه مخرس وميك اب خفيف.. يسرا:زيانيتي هههه.. شيماء:ههه هادوك عويناتك الحبيبة ديالي(باستها)اجيو نوريكم شنو جبت ليكم.. يسرا:هههه ياسلام.. جبدت عباية فلبلوغوا لماما باحجار فالبيض.. ثورية:كتحمق ابنتي الله يخليك ليا.. شيماء:بصحتك ا ماما.. وجبدت غوب كحلا بالفورور ديالها ل يسرا.. يسرا:و واااااو كتسطي مي غتكون غالية بزااف.. شيماء:تا حاجة ماتغلا عليكم.. وهادو جبتهم ل عماد(صبادري غالية فالابيض مع ساعة زوينة) ثورية:فنين..ولكن نتي شنو خديتي لراسك.. شيماء بابتسامة:انا عندي بزاااف ديال الحوايج حمدلله..يكفيني غي تكونو معايا بيخير وعلا خير.. ثورية:الله يعطيك علا قد نيتك.. بسمت ودخلت نبدل حوايجي ونستف لفاليز فالبلاكار.. يسرا ساينات تا تشدات باب بيت ختها وهضرات:بانت ليا ولات بيخير.. ثورية:غي كيجيبلك الله..عينيها فقدو داك اللمعان الزوين لي كان فيهم(عينيها دمعو)ربي يفاجيها عليها وصافي.. يسرا:ختي غتولي بيخير..انا غندخل نعاونها.. دخلات عندي يسرا ستفات معايا وطلبتها تقيس لاغوب نشوفوها..وغي قيساتها حمقاتني عطيتها صباط من عندي كحل وخرجنا حدا ماما عجباتها بزااف وتا ماما لبسات عبايتها جاتها قباس تباركلله عليا ههه..كانت فرحتهم بحوايجهم مريحاني خلاتني نغطي علا اي هم وغم ونفكر غي كفاش نزيد نسعدهم ونعوضهم علا الحرمان لي عاشوه...

ولا كلشي روتيني..كل نهار كيدوز كيكون بحال خوه لي قبل منو..مي ليوم اخيرا قدر منصف يوصل لآدم..غي شافو خنزر فيه.. منصف:كتهرب مني..عارف راسك شنو داير.. آدم ببرود:لا حيت عارفك غتصدعلي دماغي.. منصف ماداهاش فهضرتو:مسكين مظلووووم..مافهمتش شنو نتا والله.. آدم:انا انسان خخخخ.. منصف تعصب:واش من نيتك كتهضر؟؟ آدم:هههه مالنا شكاين؟. منصف:لا انا متأكد كتفلا بلعاني باش تغطي علا شنو درتي.. آدم:علاش شنو درت؟. منصف:درتيييي بزاااف..خصوصا مع داك لبنت لي بغاتك من قلبها وثاقت فيك.. آدم كيضغط علا راسو وراسم ابتسامة قوة:واش نتزوجها بزز؟؟ منصف:لا ماشي بزز..مي ماتجرحهاش هكاك.. آدم:بحرا تقلب عليا فمرة..مي بيني وبينك والله حتى كنت كنشبع عليك ضحك ونتا مثيق كذوبي عليها خخخخ.. منصف مستغرب فيه:آدم راه حضرت علا كلشي ملول لتالي..واش باغي ضحك عليا بهاد جوج كلمات..مالك ماراضيش تحاول تبين علا الاقل داكشي لي كتعانيه وهي بعيدة عليك ولا علا الاقل شرحلي هاد السبب المهم لي خلاك تسمح فيها ليلة لخطابة.. آدم هضر بجدية وختصر كلشي فكلمة:ملييييت.. منصف:منها؟؟ آدم هز راسو وراسم ضحكة جنب:شوف بالضبط معاها كتاشفت بلي القنط ديالي مع لبنات مستمر ونقدر فحياتي كلها عمرني نرتبط..شيماء كانت حالة خاصة الصراحة وكنعتارف مي ماشي حيت بغيتها..حيت عذباتني باش وصلت ليها.وانا متعود عليهم ساهلات كيجيو بين يدي..صافي فاش جات عندي ودوزنا داك نهار طلعاتلي فراسي وحسيت بلي ماكنبغيهاش قلت بلا مانصدمها فالغربة(ضحك)جبتها لدارهم حدا عائلتها باش تا فاش تصدم تلقى لي يواسيها.. منصف تغلغل:نتا ماشي راجل.. آدم رتاح فاش حس بيه تاق:هههه ا مالك ا صاحبي.. منصف:انا غنوض نمشي حيت الا بقيت هنا غنرتكب فيك جريمة.. ناض يمشي وهو آدم يشدو:واش غدخل لبراني بيناتنا؟فين عمرك تدخلتي فعلاقاتي وكنتي حقاني تالهاد الدرجة؟؟ منصف:حيت انا كنت بيناتكم بجوج وحضرت علا كلشي..مين هكا كما حرمتيش خوك بعدا وعطيتيها تا هي تيقار كون عاشت بعدا لاباس معاه..نتا ماصالحش ماصالحش لمعاشرة اللهم خوك بعدا.. آدم تطعن وبقى مبرد:هههه واش انا قلتلها تلحق عليا؟. منصف:عندك لحق..خصك دير كثر من هكا..مي هي ربي دبا يعوضها بماحسن منك..ونتا عمر ذنبها مايفارقك كون هاني.. آدم بعصبية:بحالا هي لي كانت صاحبتك هادي سنين..راه انا لي صاحبك فهمها.. منصف عاقد حجبانو:شكون نتا؟(آدم تصدم وسكت)مابقيتش كنعرفك..تبدلتي بزااف ا آدم وظلمتي..مي ماغاديش تحس دبا..اكيد غتحس تا يفوتك التران.. خرج منصف معصب كون لقى كون قتل آدم علا خصايلو ركب طوموبيلتو ومشى لدارو.. آدم بقى مشوكي غي خرج منصف عينيه حمارو وعروقو بانو بالاعصاب هز فاز قدامو شير بيه..وبدا يغوت ماقاداه دنيا..حس براسو اكبر حيوان علا وجه الارض..اكيد شيماء تعذبات بزااف باش هو منصف كيدافع عليها هكاك..مي كفاش غيدير..يتزوج بنت كيبغيها خوه؟؟فين عمرها كانت؟أكيد خصو يعزي قلبو ويبرد كيتو حيت مستحيل يقطع علاقتو بخوه لوحيد..وفنفس لوقت ماخصوش يظلمو..

لخدامين شافوه داير بحال الثور يدور يدور ويدفع برجليه ويهرس تا بدا ينهج وخرج تلاح فلابيسين.كماعالله اعصابو تبرد وتوترو ينقص..
خدامة:مسكين بقى فيا عمرو كان هكا..
لعاليا كتشوف فيه مألمة من جيهتو:طلعي جيبيلو لفوطة ابنتي..
خدامة:واخة ا دادة..
طلعات هبطات ليها بينوارو ولعاليا خرجات عندو وقفات قبالتو وهو مرخي فوق لما بحوايجو..شافها حنى رجليه وطلع حادر راسو لارض..
خداه لبسو وهي تعلي ليه راسو..
لعاليا:ماشي عيب تعصب..تهدن اولدي.مابغيتكش تبقى فهاد الحالة.(جراتو عندها وهو عنقها بحالا كان خصو فوقاش وبلا مايحس دموعو هبطو بحال شي ولد صغير وهي مخلياه يخرج لي فقلبو)الله يبرد عليك اولدي اهئ اهئ اهئ ..
خلاتو شحال فاش حسات بيه تهدن خرجاتلو راسو ومسحاتلو عينيه..
لعاليا:شوية دبا!!
هز آدم راسو وطلعاتو لبيت حطاتلو حوايج و وجداتلو حمام سخون باش مايمرضش..
دخل آدم يدوش مكالي يديه مع لحيط خاشي راسو لتحت ولما هابط كيتقطر ماعارفش فين غيوصل بهادشي..
خرج بسمات ليه لعاليا وعطاتو كاس ما شربو وتكى بلفوطة ديالو مافيه لي يدير والو..
حسام كان معروض لعشا مع صحابو فاش جا لقى لخدامين كيجمعو روينة لي دار آدم..
حسام بخوف:شنو وقع هنا؟؟
لعاليا كانت هابطة من عند آدم جراتو وعاودات ليه كلشي وبلي غي مشى منصف وقع هادشي..حسام توقع ان شيماء هي السبب..
حسام:غنمشي نهضر معاه..
لعاليا:لا اولدي خلي لصبح راه بزز باش تهدن..حالتو كانت حالة..الله يبرد قلبو وصافي..
حسام تنهد:انا السبب..
لعاليا حطات يديها علا كتفو:كلشي مقدر ومكتوب اولدي..لمهم تبقاو مع بعضياتكم..
حسام:امم آميييين..ياله تصبحي علا خير...
بسمات ليه وطلع ماكرهش يدوز يعنق خوه ولكن لا حيت هو طرف فالمشكل..ياريتهم ماطاحو فهاد الموقف..

بعد مرور اسبوع...
شيماء:ياله اماما سربيو..
ثورية:جايين جايين..
يسرا:صافي بقالي غي الصندالة..
شيماء:فيكم غي عماد من قبايلا واجد هههه..
عماد:ماتخافيش علا خوك غي تقولي نتعشاو لبرا نسبقك لزنقة هههه..
ثورية جات كتقاد الشال ديالها فوق راسها:ابنتي شنو لزومو هاد خسير لفلوس..
خوتها ماعجباتهمش هضرتها..
شيماء:انا خسير اماما..خلينا نحسو شوية بطعم الحياة..حمدلله ماحدنا بصحتنا لفلوس كتجي تمشي وانا بغيت نعيشو احسن عيشة..
ثورية:واخة ابنتي..يالهي راه شفتهم دلاو شنايفهم فاش هضرت ههه..
كلشي:هههه..
خرجنا والمفاجئة كانت ان منصف غيوصلنا ههه..
ركبت حداه وماما وخوتي لور مافاهمين والو..مشينا بمطعم زوين بزااف منصف ويسرا كانو كيشوفو فبعضياتهم بزااف وانا حادرة راسي بزز باش مانضحكش..
جلسنا فطبلة زوينة طلبت ليهم لعشا لي يعجبهم..وبدينا ناكلو..
بعدما سالينا..
ثورية:علاش مازالين جالسين؟؟
شيماء:ههه بلاتي علينا..ماجيناش غير ناكلو..نبقاو شوية تا تعياو ونرجعو..
ثورية:واخة..
منصف:ونتا اصاحبي عجبك لمطعم؟؟
عماد:ههه بزااف..نشاءلله فاش نولي كوايري دبصاح ديما نجي ونجيبكم ليه..
منصف باستغراب:كوايري؟؟
شيماء:آه غنسجلو نشاءلله فنادي كرة القدم حيت هاداك هو الميول ديالو ههه..
منصف:هي نعطيك من دبا تسني ليا هههه..
عماد:ههه لا مايحتاش نتا غتكون ديما معانا دونك منا وفينا..
منصف فرح وعجبو لحال شاف ف يسرا لقاها فرحانة..
منصف:سمحولي شوية ونجي..
ناض منصف يمكن لطواليط وانا جالسة ومريحة معاهم راسي..
شوية وكنسمعو موسيقى طلقات وشفت قبالتي ضحكت وقلتلهم يدورو..منصف كان هاز طارط دانيفيغسيغ لختي يسرا لي دارت تلفات..
انا بفرحة:جوايوزاني فيغسيغ يسرا..
يسرا دارت يديها علا فمها انا ضحكت عليها وماما وخويا كيصفقو عاجبهم لحال..
تا الناس لي فالمطعم صفقو وعجبهم لحال بزااف..
منصف حط لاطارط ويسرا كانت كتسلم علينا واحد واحد..بقى يساين نوبتو وسلم عليها..
منصف:عيد ميلاد سعيد..عقبال 100عام ونشوفك شارفة بالعكاز قدامي ههه..
يسرا ضحكات:ويكونو سنانك طاحو تا نتا خخخ..
بقينا نضحكو مجموعين..تمنات امنية وطفات الشمع..صفقنا ونضت عطيتها سنسلة دالذهب فيها فراشة..
يسرا:هادشي بزااف عليا اختي والله..
شيماء:شوووت شدي وسكتي..نتي راك بنتي ماشي غي ختي فهميها ههه..
ماما وعماد كانو فرحانين عطيت لعماد ساعة زوينة وغمزتو يعطيهالها..
عماد نفخ كتافو وضحك:وهادي مني المشعكة ههه..
عنقاتو يسرا:ههه شكرا(باستو)الله يخليك ليا..
وعاود جلست حدا ماما عطيتها تحت الطبلة حلقات فيهم فراشة نيت..
عينيها دمعو وهضرات بالحس:بزااف هادشي عليك ابنتي!!
بسمت وبينتلها تعطيهم ليها..
ثورية:وهادو مني..
يسرا:لا لااا هادشي بزااف والله..
تباوسو وحسيت براسي فكامل راحتي النفسية..
منصف:ودبا جات نوبتي..(شاف فثورية)لموضوع يتوقف عليك اخالتي..فيها تاخد يسرا كادو فيها لا هههه

كلشي استغرب هضرتو الا انا ضحكت..
ثورية:كفاش اولدي؟؟
منصف:الصراحة درت تا عييت وماخليت ماشفت مي ماشفتش بحال ترابي بناتك واخلاقهم وترابطهم..هادشي علاش من نهار تعرفت عليكم تمنيت نكون منكم..وتحسبوني ولدكم..ماغتيقيش مي بدلتوني بزااف والسبب الاكبر هو يسرا..
يسرا قلبها كيضرب وتصدمات بهضرتو..
منصف شاف فيها ورجع كمل:ماكرهتش تقبلي طلبي لي ساينت بزااف باش نطلبو منك علا ود سنها الصغير...خالتي تقبلي تزوجيني بنتك يسرا علا سنة الله ورسوله..وكنواعدك عمرك تندمي..
ثورية حلات عينيها وشافت ف كلشي..فيسرا لي فرحانة وحادرة راسها وفعماد لي عاجبو لحال وكيبينلها توافق وف شيماء لي بحالا متوقعة كلشي وعينيها فرحانين..
ثورية:مالقاش حسن منم اولدي ولكن بشرط تخليها تا تكمل قرايتها وتزوجو..
منصف ضحك:هههه اكيد..
منصف:تقبلي تزوجي بيا ا يسرا؟.
يسرا بسمات وانا جاوبت فبلاصتها:السكوت علامة الرضى هههه الله يكمل عليكم بالخير..(وقفت وسلمت عليهم بجوج)ها نتا دخلتي لعائلتنا المتواضعة هههه..
منصف:ليا الشرف..
جبد منصف خاتم من جيبو وشاف فيسرا:هادا هو لكادو لي بغيتك ديريه حياتك كاملة..
يسرا عجبها ومدات يديها..ركبولها وصفقنا عليهم كانت من اجمل اللحظات العائلية فحياتي الصراحة..فرحت لختي حيت بغيتها تعيش مرتاخة مع الراجل لي كتبغي لي اكيد ماغاديش يبخل عليها بشي حاجة..
رجعنا لدار بعدما اكد علينا انو غيجيب عائلتو عما قريب ويخطبها..
يسرا كانت متبتة حدا ماما غي دخلنا لبيت بدات تنقز وتشطح وانا فشلت عليها بالضحك وطلعات كتنقز فوق الفراش وهبطات عنقاتني..
يسرا:ههه شكرا اختي شكرا علا كلشي..
شيماء:انا مادرت والو..تستاهلو كثر من هادشي..اختي..لمهم نوصيك تهلاي فيه وديري عقلك منصف راه كبر منك وعارف شنو كيدير..نتي ياله 16عام عقلك مازال ماركز دونك تبتي معاه وعانداك ضيعيه من يديك والله ماتلقاي بحالو..
يسرا:واخة اختي انا ديما غنشاورك فأي حاجة ماعرفتش نتعامل معاها ونتي تفيديني حيت عارفاك بعقلك وكتعرفي تصرفي فكل حاجة..
شيماء:انا ديما بجنبك وعمرني غنخليكم..
بدلنا حوايجنا وتكينا..كان كلما كيجيوني افكار لدماغي كنحاول نخرجهم ليوم ديال الضحك والنشاط والفرحة ماشي ديالي حفر الماضي الاليم..

منصف وصلهم وساق فاتجاه دارو ناشط..غي وصل حدا الدار خرج من طوموبيلتو وهو يشوفو قبالتو..
آدم كان واقف برجولتو واخة لابس كاجوال مي جاي تيتيز..متكي علا طوموبيلتو وكيلعب فتيلي كيساينو قبالت الدار..
منصف قرب حداه وآدم كيشوف فيه وخبع تيلي فجيبو..
منصف:علاش ماصونيتيش عليا؟
آدم:ماشي مشكل عاد شوية باش جيت..
منصف:ياله ندخلو..
آدم حك راسو وتبعو..
حل منصف لباب ودخلو مشاو نيشان لصالون جلسو شي كيشوف فشي..
آدم بتوتر:درتي فيك النفس آ..لي شافك كدير هكا يقول غلطت معاك فشي حاجة..
منصف كيتصنت وساكت..
آدم:مهم ماعليناش كتبقى صاحبي لمقرب وماغاديش نخليك غضبان واخة مادرتلك والو..
منصف:اصلا احسن حاجة فيك قلبك لبيض..
آدم بسم وحك لحيتو:هادشي لي عطى الله..
منصف:ههه غي لقيتيني ناشط وصافي اما كون فرشخت مك فهاد ليل..
آدم:هههه اييه اوا شنو منشطك نعام ا سي ههه..
منصف شاف فيه بفرحة:حمدلله لي جيتي عندي تا انا كان خصني معامن نتقاسم فرحتي..(آدم مركز فيه ومبتسم)ليوم خطبت يسرا..
آدم تبدلو ملامحو و رجع رسم ابتسامة علا وجهو:يااااك مبرووك عليك ا صاحبي(ناض عنقو)نشاءلله حياتكم تكون كلها خير وسعادة..
منصف خرج راسو:آمييين..عقبالك..
آدم تزير وولا علا حاجبو:أنا هههه..موحالش..مي نقدر نصبر تا تولد شي بنيتة ونتناسبو خخخخ..
منصف:هي لي ماتكونش ليك هههه انا نزوج بنتي لكازانوفا بحالك هههه..
آدم:نكون درت عقلي ههه..
منصف:مابانش ليا فيك(جلسو)كان ممكن نتناسبو بطريقة خرا و...
قاطعو آدم:منصف خلينا مزيانين ونسا هاد الموضوع..قلتلك انا ماشي ديال الزواج..
منصف:صافي صافي..كنواعدك عمرني نجبد عليك هاد الموضوع من دبا لفوق..
آدم بعصبية:يكون حسن..
منصف:شنو تشرب شي حاجة؟؟
آدم:ههه انا مازال ماتعشيت..
منصف:تالدبا؟؟نطلبلك شي حاجة؟؟
آدم:نتا تعشيتي؟
منصف:آه تعشينا مجموعين.(آدم فهم بلي كان معاهم)اصلا ليوم كان عيد ميلاد يسرا واحتافلنا بيها فواحد لمطعم..
آدم:اممم عيد ميلاد سعيد..انا جيت عندك عارفك كتعشى معطل..
منصف:ونتعشى معاك كاع هههه مانخليكش تاكل بوحدك..
آدم:شتي هادا هو صاحبي لي كنعرف..
ناض منصف طلب بيتزا وحط كوكاكولا غي جات حطوها كياكلو ويهضرو علا شنو وقع فهاد الفترة لي ماهضروش فيها..تا عياو وبغى آدم يمشي ساعا منصف حصرو يبات ودخل كل واحد ينعس فبيت تالصبح..

فاق منصف كلو حيوية ونشاط دوش وداز لبيت آدم لقاه فاق يدوش خرج يوجد ليه لفطور..
آدم لوى عليه فوطة وخرج..لبس عليه حوايجو..
داز لكوزينة لي قبالت الصالون..
آدم:صباح النور..
منصف:صباح لخير..ليوم تفطر من يدي ههه..غندير لبيض لي كيعجبك..
آدم:ههه ميغسي..
بقى منصف مقابل داكشي كيطيب تا صونا تيلي ديالو..بالصدفة كان حدا آدم.شاف سمية لقاها شيماء تصدم..
منصف:شكون؟؟
آدم بزربة باش مايبانش عليه:شيماء..
منصف بلعاني قالو:حل لخط وفتح سبيكر..
آدم حاول يتعامل عادي واخة توتر وهو عارف غيسمع صوتها..فتح لخط وحط تيلي كيشوف فيه..
شيماء:بووونجوووغ نسيبي لعزيز هههه..
آدم تنهد فصمت وحادر راسو..
منصف:هههه بونجوغ سليفتي الزوينة ههه..كيصبحتو؟؟
شيماء:مزيان حمدلله..مال صوتك بعيد؟؟
منصف:راه كنوجد لفطور وداير اوباغلوغ ههه..
شيماء:ههه لا حادك تباركلله..مهم عيطتلك باش نسولك معاياش غدوز عندي نمشيو لفوطو شووت؟؟
منصف:مع 10:30 وجدي راسك..مي عرفتي حاولي تعطلي باش لقى سبة نشوف لخطيبة ديالي ههه..
شيماء:هههه حمق غي هني راسك راه ماما عارضة عليك تغدى معانا ليوم كسكس حماتك ينادي ههه..
آدم تطعن كيحاول يصبر راسو حيت خصو يبان قوي حدا منصف لي باغي يلعبليه هلا الوثر الحساس كماعلله يخس بقيمة شيماء..
منصف:هههه لعززز..دونك نتشاوفو بلاتي..
شيماء:اوك سي يووو..تييط تييط تيط..
منصف:ها لفطور وجد(كيراقب عيون آدم لي بان عليهم الحزن والتوتر)..
آدم:اممم شكرا..
منصف جلس قبالتو:ياله بدا بحرا ماتعطلش علا لخدمة..
آدم كياكل حاني راسو:ضروري نتعطل عاد غنبدل حوايجي ونمشي..
منصف:خود شي حاحة من بلاكار الا بغيتي؟؟
آدم:لا بلاش شكرا..
فطر آدم بزربة وناض:نتشاوفو من بعد خصني نمشي..
منصف:اوك بسلامة..
تسالمو وخرج آدم كيتمشى معصب ركب وساق بسرعة كتخلع..الطريق كلها وصوتها فوذنو كيحاول يحيدو والو..وزاد تعصب فاش شافها كضحك وناشطة ومتفاهمة مع منصف لدرجة غار بزااف..زعما دغيا نساتو..لا مايمكنش مي يمكن هكا حسن ماتبقاش معذبة بسبابو وهو يتمناها ديما تكون علا خير ..

مشى بدل عليه منيرفي..فاق عليه كاع الشوق مابقاش قادر يصبر علا بعدها..تقريبا شهر ماتشاوفو..حاس بلي عام ماشافها..لبس كلشي حكل شوميز وفيست وسروال وصباط..هز لفيست فيديه وهبط ساق وبقات كتلعب فدماغو يمشي يشوف شيماء قلب الدورة بلا مايفكر..لمجرد فكرة انو غيشوفها بسم بوحدو..
عند شيماء..
فطرت ولبست عليا كسيوة كحلا بالسميطات حد الركبة فوقها كاب صيفي شفاف نفس اللون كتفو عريان مع صندالة عالية وصاك باج..شعري طلقتو وزيدتو جنب وقاديت نظازر عراض فعيني وعكار باج حيت تا نمشي ويعاودوه ليا..
آدم وصل تخبع مور طوموبيل بقى يشوف فالساعة ويساين تا شاف منصف جا رتاح وعرفها غتهبط..
منصف غي وصل صونا عليها تهبط..
سلمت عليهم ويسرا طارت لبالكون ضحكت عليها ههه..خليتهم وهبطت..
آدم غي تحلات لباب لكبيرة دالعمارة نفسو تقطع وغي شافها خارجة تشوكا بقى كيطلعها من رجلها لراسها وهي كضحك مع منصف وتشد لباب..زادت حداه وشيرات ليه لبالكون باش يشوف خطيبتو ومنصف خرج راسو من الطوموبيل صافط ليها بوسة فالهوا..دخلات حدا منصف وهي كتموت بالضحك عليهم..آدم ولا حمر وهما ماشيين قبالتو بغى يطرطق وقلبو ضرو علا هي قادة تكمل حياتها وهو لا..توحشها توحش كل تفصيلة فيها ماكرهش هو يحل ليها لباب ويتهلا فيها ويصافطلها بوسات ويضحك معاها حس براسو تحرم منها بكل للكلمة من معنى..تبعهم بلا مايخدم دماغو غي قلبو لي ممشيه وخصو يعرف واش فري نساتو ولا لا..
ركبت مع منصف كنضحك عليهم..
شيماء:صافي مابقيتوش تحشمو مني كتمعشقو قدامي ههه باااز..
منصف زلو لسانو:كيفما كنتي كديري نتي و...(تصدم وسكت وشاف شيماء جمعات ضحكها وقلبات وجهها لطريق)ش شيماء سمحيلي ماقصدتش..
شيماء:لا عادي..
عم الصمت المكان ومنصف كيتأفف بينو وبين نفسو حيت شافها سرحات بتفكيرها..
مشى دماغي مع داك الايام الزوينة لي عشتها ف باريس..عمرها غتعاود مي واخة جرحها عمرني غنساها..
منصف حاول يحيدها من الماضي:اوا واجدة لفوطو شووت..
شيماء ماسمعاتش زاد تأكد..
منصف:شوشووو شيماء ههه فينك..
شيماء:ا شنو ماسمعتكش..
منصف:واجدة لفوطو شووت..
شيماء:ههه وي هو زوين علا العروض كنشبع تصاور ونرجع بحالاتي ههه..
منصف:اوا مزيان ا لالة..
شعل موسيقى راديو طاح ف اغنية وائل كفوري"قلبي وشو بدي قلو..تعبان وشو بعملو..ماعندي دوا"شيماء جاتها مع الدقة حمدلله لي دايرة نظاظر حيت عينيها دمعو بسهولة"انتي لي كنتي فيه..بعدك كيف بداويه..صوتو مجروح بيندهلك رديلو الروح"..
الضحك كلو تسالا منصف شافها ندامجات مع الاغنية لدرجة فقدات السيطرة علا راسها بدات تبكي..داقت بيها وهو يتصدم..
منصف:لا لا شيماء..
شيماء:اهئ اهئ اهئ..
حبس منصف مع جنب الطريق وهي خرجات بلا تفكير كانت الطريق خاوية ومشات وقفات كتبكي وتشيش بيديها علا عينيها..
آدم استغرب شاف الطوموبيل واقفة شوية شافها علا برا كتبكي ومنصف خرج عندها..تصدم مافهم والو وقف تا هو كيشوف..
منصف:هاكي مسحي..
شيماء خدات منديل كتمسح عينيها..
منصف:الا ماقاداش نأجلو جلسة التصوير..
شيماء:لا شوية نولي بيخير..
منصف:اوك خودي راحتك..
وقف حداها كيساينها تكالما..
آدم قلبو تقطع وعينيه حمارو ماكرهش يخرج يعنقها ويحيدها من داك الحالة لي باينة هو السبب فيها..بقى كيشوف فيهم من بعيد..تا شافهم دخلو الطوموبيل..تبعهم وفاش وصلو موقع التصوير كمل طريقو حيت من الافضل مايخليهاش تشوفو..كفاش ظن بلي نساتو وعايشة مزيان بلا بيه..ها هي كتعاني كثر منو..ياريتها كانت بيخير كان غيتفقص مي غيفرح ليها..دبا الضربة عندو علا جوج جوايه..

دخلنا لموقع التصوير انا ومنصف ودخلوني يقادولي كلشي عاد نتصور..كانو قفاطن زوينين غتعرضهم مجلة فالعدد الجديد والوانهم غامقة..
لبست وتقاديت كنتصور واخة كنحاول نكون عادية مي لحزن مسيطر عليا فكل ثانية اسم آدم كيجي علا بالي..لحظة من لحظاتنا كدوز قبالت عيني..منصف كان كيحاول يشجعني ويحفزني..وانا غايبة علا داك العالم..والغريب ان المصور عجبو لحال وجايينو تصاور زوينين..
منصف:شنو رأيك فالتصاور..
لمصور:مانيفيك..هاد لبنت فوطو جينيك وعندها مستقبل كبير..
منصف باستغراب:بصااح؟؟
لمصور هادشي مافيهش الضحك..المجموعة غامقة وعندها طابع متمرد ولعارضة هي لي فهمات ليه..
منصف:تا الالون فيهم التمرد؟؟
لمصور:اكيد..كل حاجة فهاد الدنيا عندها معنى والحزن العميق لي فعينين لعارضة كيعكس هاد التمرد مع الالوان..
منصف:ههه سبحان الله..
سالا التصوير جا عندي منصف..
شيماء:شوف بلا ماتغوت عليا والله حتى حاولت نكون مز...
منصف:مانيفيك..
شيماء بصدمة:كفاش؟؟
منصف:هاكا قال المصور ههه..
شيماء:عجبوه تصاوري؟؟
منصف:اكيد ههه..
شيماء:اووف مالك كتهضر هكا ههه..
منصف:ياله تسمعي بودنك ههه.
خرجت معاه لقينا لمصور كيقلب نيت علينا..
لمصور:سي منصف كنت كنقلب عليك..احي نوريك شنو قلبتلك قبايلا..
منصف:نيت كنا جايين عندك.دخلنا وهو يورينا تصاور..الصراحة انا براسي تصدمت..جيت هكا واخة كنت فحال يرثى لها..
هضرت بلا مانشعر:الصراحة نتا مصور بارع..
لمصور:ونتي عارضة فوق بارعة ههه..شحال هادي مالقيت عارضة بهاد البساطة ووجها تبغيه كاميرتي بحالك..
شيماء:شكرا هادا من ذوقك..
منصف شافو بدا كيشعر جرها:شكرا اسي كمال حنا دبا خصنا نمشيو..
كمال:مي قبل تفضلو هادي انفيتاسيو لعدد المجلة الجديد..
منصف:علاش كديرو حفلة فكل عدد ولا كفاش؟.
كمال:لا هاد العدد عندو مناسبة خاصة..الادارة غترشح بنت المدير لرئاسة التحرير وحنا غنحتافلو بيها..
منصف:اممم.
كمال:تفضلو(كيشوف جيهة شيماء)ومانكرهوش نشوفوكم..
بسمت ومنصف دارلو ضحكة صفرا وخرجنا..
شفت منصف مغوبش من داك لمصور شفت فيه وقلتلو:ممم مانيفيك هههه..
منصف:هههه بنادم مريض..
شيماء:لا الصراحة خرجني من داك الحالة الله يكثر خيرو ههه..
منصف:اوا مزيان مين هكا ههه..ياله نرجعو لكسكس غيبرد ههه..
ضحكنا ورحعنا لدار..عاودنا ليهم كلشي وتغدينا ناشطين..غي مشى منصف دخلت ريحت شوية حيت عييت..

حسام سالا خدمتو فالشركة..داز عند آدم لمكتب..
حسام:ممكن ندخل؟ههه..
آدم:زيد عاد كتسول..
حسام:مازال ماساليتي؟؟
آدم:شوية وصافي مع حيت معطل ليوم شوية..
حسام:هدا حال لي يبات بررا ههه..مهم بغيت نهضر معاك فواحد الموضوع..
آدم حمع يديه فوق لمكتب:شنو؟؟
حسام:كاينة شركة المانية بغات تعقد معانا صفقة علا طول عام..
آدم ضحك:اووه هادا خبر زوين..
حسام:مي ضروري خصهم كاتالوك ديال الاثواب..
آدم:نديرو ليهم كاتالوك..
حسام:تكون فيه عارضة(نقص فصوتو)وحنا ديجا عندنا عارضة وسنينا معاها عقد..
آدم بقى يفكر وهو يقول بصدمة:ش شيماء؟؟
حسام هز راسو .
آدم:لا مستحيل..اكيد ماغاديش تبغي..
حسام:علاش راها غتخلص عليه مزيان وزايدون راها عارفة بنوذ العقد..والصراحة مانبغيش نغامر ونضيع لوقت نقلب علا عارضة جديدة وماعرفت تا واش تكون بكفائت شيماء ولا لا؟؟!
آدم:واش عارف راسك شنو كتقول؟
حسام:لخدمة خدمة اخويا..
آدم:باغي دير السبة باش تشوفها..
حسام تعصب:اقسم بالله مافكرت تا فهادشي..
آدم تراجع وحاول يبرد:اوك اوك..تا دبا قولها لمنصف يوصلها لعرض واخة انا متأكد غترفض..
حسام:الا رفضات داك الساع نتحركو واخة؟؟
آدم بقى كيشوف فيه..
حسام:وغادي نكلفك نتا تهضر مع صابر يديرلنا شي تصاميم يبرز فيهم الثوب فقط..باش نعمرو لكاتالوك مرة بالاثواب ومرة بالتصنيع ديال دوك الاثواب ومنها نشرو الزي المغربي عالميا..
آدم:اوك دبا نهضر معاه كون هاني..
حسام:ياله انا غنجمع لكاغطابل ديالي ونتا دوز عندي فاش تسالي نمشيو..
آدم:اوك..مي نوصيك حاجة وحدة..(حسام ركز معاه)غتهضر مع منصف وعانداك تجبد سيجي لقديم ولا تبيلو اي حاجة..اوك..
حسام:علا نتا ماعاودتيلو والو؟.
آدم:لا..
حسام:اوك لي بغيتي..
خرج حسام كيدورها فدماغو وآدم كمل خدمتو ولحق عليه باش يمشيو لدار..
دخل آدم لمكتب خوه لقاه كيهضر فتيلي.
حسام:شوف راه العرض زوين بزااف ليها وماتنساش بلي كاين بيناتنا عقد..
منصف:ماعرفت انا غنسولها حيت فهاد الموضوع مانقدر نفرض عليها والو..
حسام:لا نشاءلله تقبل حيت لخدمة خدمة..
منصف:انشاءلله بسلامة..
قطع حسام معاه وشاف ف آدم:هانا قلتلهم العرض وغدا كاع يجينا الرد..
آدم:اوك مزيان..مشينا؟
حسام ناض:اوك..
منصف بقى يفكر وخاف اصلا يجبد الموضوع..مي خصو يطبق خدمتو كيفما كان لحال..عول يفاتحها فالصبح فاش يمشي يهضر معاها فاص ا فاص..

اصبحنا واصبح الملك لله..
فقت قلت ندير فوتينغ لبست سيرفيط خفيفة بعدما صليت وخرجت بالحس ضربت دويرة زوينة وخفيفة كنتمشى ونجري تا عييت وقلت نرجع لدار..خديت باكيط وبتيبان ومشيت لدر..
لقيت ماما فاقت وجدت انا وياها لفطور كنتهاودو تا فاقت المسخوطة دختي هههه وعماد لي قرب يبدا ليوم تدريبات مع النادي..
فطرنا وسالينا جمعنا دار..تا سمعت صوني حلات ختي لباب التحتانية وجات كتجري..
يسرا:ناري منصف منصف..
شيماء:ونتي مالك كديري هكا؟
يسرا:خصني لبس شي حاجة حسن..
شيماء:اوا سيري ههه..
دخلات كتجري وانا مشيت حليت لباب لمنصف..
شيماء:مرحبا دخل..
منصف:الله يبارك فيك..
جلسنا فالصالون جات ماما سلمات عليه وهو عينيه مبدلين..
شيماء:جبتي شي عرض ياك؟؟
منصف:آه..
انا وماما فرحنا حمدلله ربي ميسرهالنا..
منصف حنى راسو:الصراحة العرض لي جا دبا مختلف..والا مابغيتيش اكيد ماغاديش نبزز عليك..
شيماء:هضر شنو خلعتيني..
منصف:العرض من شركة العمراني..
تصدمت ماعرفت مانقول بقيت ساكتة..
منصف:العرض هو ديري كاتالوك لاثوابهم ولقفاطن غيتصممو خصيصا باش تلبسيهم..مدة اسبوع تقريبا ونبداو والصالير غيكون 10مليون..(الصمت)شيماء انا غي قلتلك وصافي الا ماباغياش نقدرو نرفضو..
دورتها فدماغي وهو كيشرح ليا وجاوبتو:موافقة..
منصف:ش شنو؟؟
شيماء:موافقة علا العرض..
ثورية:بنتي ماتفرضيش علا راسك شي حاجة..والارزاق بيد الله ماشي غي من جيهتهم..
شيماء:لا غادي نخدم حيت لخدمة فشكل والمشاكل الشخصية شكل..ماغاديش نضيع بحال هاد الفرصة..
منصف بسم:هاكا تعجبيني برافو عليك..العرض واعر واي وحدة تمناه..دونك نقولهم بلي قابلة؟
شيماء:آه اكيد..
منصف:اوك انا غنعيط لحسام ونقولهالو..
شيماء:حسام صاحب لفكرة؟؟
منصف:آه..
يسرا خرجات ملبيت لقات منصف كيهضر فتيلي تلفات ماعرفات مادير مشات لكوزينة ودارت قهوة وهي كتفتف بوحدها ههه..
حسام كان فمكتبو تا جاه اتصال من منصف هضرو عادي..
منصف:حسام بغيت نبشرك..شيماء وافقات..
حسام فرح:بصاااح اوا مبروك عليناا..
منصف:الله يبارك فيك..ياله فاش تكونو مستعدين علمونا..
حسام:كون هاني لمهم وجدو راسكم هاد الايام نشاءلله..
منصف:اوك بسلامة..
غي قطع حسام مع منصف مشى لمكتب آدم ناشط..
حسام:وافقات..
آدم حيد نظاظر من عينيه حيت كان خدام فلبيسي:شنو كفاش؟؟
حسام:شيماء وافقات..
آدم جاوب بجدية:اوك مزيان..هادشي لي بغينا..
حسام:حمدلله لي ماتبعتش كلامك كون خسرنا هاد اللحظة..
آدم:اممم غلطت فالتوقع ديالي مي مزياان..كتعرف تفرق بين حياتها وخدمتها..
حسام:وي برافو عليها..ياله نخليك نمشي نكمل خدمتي..
مشى حسام كيفكر فالطريق"علاش كنحس براسي عادي تالهاد الدرجة؟؟"
آدم حط نظاظرو وبرك بصبعانو علا عظم نيفو بين عينيه كيحاول يستوعب تفكير هاد لبنت لي مازال ماتفهماتش ليه وكلما كدير تصرف بحال هكا كثيرو لأبعد حدود..
رجع منصف حدانا وهي تجي يسرا هازة لقهوة وكتقرقب بحالا فيها بوهزهاز..كنت حايرة ف همي تا شفتها هكاك وضحكت انا وماما..
يسرا:هاك تفضل..
منصف شافها تلف:شكرا ليك..
يسرا بسمات وحطات لبلاطو..
شيماء:ماما نوضي نكملو لغدا..غتغدا معانا ا منصف ياك؟؟
منصف:لا شوية ونمشي..
يسرا غوبشات فيه جاوبها بالحس:عندي شي خدمة والله..
ثورية:اوك ولدي الدار دارك..
دخلنا انا وماما لكوزينة وخليناهم علا راحتهم شوية..
منصف:توحشتك..
يسرا حمارت وخضارت وصفارت هههه..
منصف:شنو غتبقاي ساكتة..علا الاقل قوليلي تا انا..
يسرا بحشمة:حتى انا..
منصف:حتى نتي شنو؟؟
يسرا الزيت نزل عليها مي مابغاتش تعيق:تا انا توحشتك..
منصف غوت بلا مايشعر:الله الله..(يسرا كتسكتو وهو عاد عاق براسو خخخ).عرفتي راه هضرت مع العائلة نشاءلله سيمانة هكاك نجي نخطبك باش تولي محسوبة عليا ونخرجو بجوج بلا حشمة..
يسرا:انشاءلله..
بقاو الحيبان جالسين يتهاودو شوية تا ناض سلم علينا ومشى ومن داك الساع مشى دماغ يسرا معاه ههه مسكينة ماشي فهاد العالم هههه

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.