صورة مصغرة لـقصة طيحة غير متوقعة

قصة طيحة غير متوقعة

qisat 9isat ghir ti7a ghayr motawa9a3a
رواية طيحة غير متوقعة

كيما العادة ... جا الصيف و غاندوزو بين حيوط دارنا ... ما بين الزريعة و التلفازة حتا من الفايس لي كنا كنشدو بيه الستون كرهونا فيه صحاب البحر 😕 فينما كان شي مبحر الا و داير بيها الاشهار تقول مشا لجزر المالديف ... اصلا حنا غا فالموخريب ... اللهم الدار ولا تخرج تشوف هاذ الشعب
المهم بدون تقديمات ختكوم مجازة فلافاك و متقاعدة فالدار ... هاذ ربعة د الحيوط مشاركة معاهوم جميع فصول السنة هاذ العام حيت باقي ما سهل لينا الله ف خدمة و حتا من الدار ما بغاو يخليونا نخرجو نديرو اضراب بحال خوتنا .. قاليك حقا البنت يصلاح ليها الكوزينة الله يغبر لبوهوم الشقف شايفيني دايرة كمارتها 😒
-ذوك الماعن المنشورين فالسطاح باقي ما هداك الله تنوضي تحكيهوم ولا تخلي الشمس تدير خدمتها فيهم😒
-واخا ا مي ... واخا را قلت ليك فيقيني بكري ، دابا راه الفيلم بادي ، حتا يسالي و نمشي ليهوم
-وا ذيك الحلوفة يا والله و مانلقاهوم مغسولين ... مجفين .. ممسوحين و مستفين ... يا حتا الجيران يجيبو خبارك اليوم
-الله يا ودي ابردي الواليدة، ايسالي الفيلم انوض ليهم (الا نضت غا نوضي جدا من الكرسي و شطحو بجوج) 
- اوى لي عندي قلتو ، هاني خرجت انا وجداك ندورها شوية مسكينة يضربها الهوا 
-واخا ... واخا امي ا سيري كوني هانية را لي دق ماغانحلش حتى نطل من السرجم و مغانشعلش البوطة و مغنخرجش و نخلي الباب محلول 😌😌 راكي خليتي مرا و قادة 
-اوى راني كنوصي و نعاود ..حيت عارفة كرشي اش والدة ليا ، هانا مشيت
مع سمعت الباب تسد نضت كنسمع الطيور لي معششين فكرشي ، انا مكيجيني القص غا ملي تخوا الدنيا نضت للكوزينة لقيت ثلاجة كتصفر و تفكرت الغطا د الثلاجة و بالفعل لقيت واحد خمسة دراهم تما و انا نمشي نجمع الوقفة هزيت جلابتي و مشيت بست بقلاوة و قلت ليه تسنا حتا نرجع ليك طفيت التلفازة و قلبي بيوجعني لكن الجوع ولد الحرام اقوى من الحب ، هزيت الساروت و خرجت و يا ليتني ما خرجت 😑

مشيت للحانوت لقيتها سادة ذاك بوصلعة ايكون فبلادو دابا يخ على زهر ... مافيا لي يمشي لشي حانوت اخر و كون غا ما كانو بعاد ، يالاه درت بغيت نرجع و انا نسمع فكرشي كترغبني شفت فيها و كملت الطريق و مشيت كنقلب على حانوت حال ... و انا غادة ماحسيتش بلي دزت من طريق الخلا و لكن اصلا البلاصة ا حدا الدار و دغيا غانمشي نقضي الغرض و نرجع فحالي ، و انا غادة شفت واحد مولاتي الحديدة ما حسيت حتى سالو ريوفي و كان فيها واحد الراجل لا بلاتي جوج رجال هوما و يمكن كانت شي مرا بان لي بحال شي فولار فالسرجم د الطوموبيل و كانو مسطاصيونين حدا واحد الفيلا و بقيت غادا ماتسوقتش ، مشيت للحانوت و شريت بواطة د السردين و واحد ماجيماكس و مع تميت غادة راجعة لدارنا لاحظت بلي ذيك الطموبيل باقا تما و قلت يمكن هوما ماشي قدام دارهوم و قلت واقيلا ... واقيلا تجلاو ، قلت نمشي ندير الصواب و نسولهوم حيت بانت لي معاهوم المرا و مابغيتهاش تكرفص و انا نتفكر هادشي لي هازة و انا نقول بلاش ... هوما عندهوم طوموبيلتهوم و انا تابعني الفيلم و القص ، المهم كملت طريقي واحد الشوية كنسمع الكلاكصون درت لقيتها ذيك الطوموبيل نيت لي خليت واقفا وقفت و بقيت كنشوف فيها ، نزل واحد الدرري متيتز و جا عندي و هو كيبتسم و انا نخبي البواطة د السردين مورا ظهري و بتاسمت صافي قلت اليوم بتاسم ليا القدر خليونا نبتاسمو مجموعين 😊 وصل عندي و قالي سلام رديت عليه ب "وعليكم السلام"
هو: عافاك بغيت نسولك مكاينش شي سناك ولا ريسطو قريبة بغينا ناكلو و مع دخلنا لهنا مالقينا والو 
-انا : اه لا لا هنا ريسطويات واالو و لكن كاين واحد السناك قريب من لنا عندو الحوت يا سلام ماتشبعش منو 
يالاه درت نعت ليه فين جا و انا نحس بشي حاجة فنيفي ، بلا ارادتي طيحت داكشي لي شريت و ماعقلتش باقي اش واقع ليا

ضرباتني الفيقة و سربيت حليت عينيا ، حسيت بعظامي مدكوكين و لكن هاد النموسية واخا هكاك مزيانة حسن من السداري لي كنعس فيه ..بلاتي .. بلاتي نموسية😱😱😱 واهيا ميمتي فين انا ، ماجا فبالي يا بنات الناس غا داكشي لي جا فبالكم دابا و انا نضربها بتنقيزة وحدة و لقيت راسي باقا فحوايجي و حتا حاجة ما طرات هنا حمدت الله ها واحد الهم حيدتو و الهم تاني هو لي انا فيه دابا 
هاذ خوتنا لاش خطفوني؟ و مدام ماغتاصبوني ف اشنو بغاو عندي؟ ما بقاش عندي الوقت للتسوال و لكن مليون فالمية ملي لقيت راسي هنا هادشي مكيبشرش بالخير ، نضت بغيت نحل الباب و لقيتو مسدود عييت معاه و تقول واش بغا يتحل ... السراجم كاملين مسدودين بكرياج د الحديد ، و لقيت راسي طايحة طيحة ديال الكلاب 😢😢
بقيت ساعة و انا كنفكر و ملي عييت من التفكير نضت كنقز فوق الناموسية ، ما عرت باش بلاني الله و لكن بانت لي غا فاللعب ، باش حتا يلا كونت انموت اليوم نكون شبعت ا تحنقيز 😌 شوية سمعت الحس و انا نضربها بصقلة و رجعت تكيت و درت راسي ناعسة و فنفس الوقت كنشوف بنص عين 
دخل ذاك ولد الحرام لي سولني على الريسطو 😒 ذاك وجه النحس كون ما كنت فهاذ الوضع كون طحت عليه بشي قجة ... حتى قلت لقيت فارس الاحلام و لكن صدق كلب😒😒 المهم كان معاه واحد اخر صحيح عليه ... لا هنا بالضبط صحيح عليه و حسيت بقلبي كيعوم فالما لي فكرشي و انا بديت كنعرق بشكل لا إرادي ، باش نقربكوم من الوصف ... عقلتو على فيلم "شاناي اكسبرس " هذاك لي كيبغي البطلة ... هذاك لي كيبان شاروخان قدامو بحال سراق زيت اه .. اه البنات هو هذاك فوطوكوبي ديالو ، غي هذا عندو البلازمة خاسرة ... وجهو ماتشوفيش فيه لله 😦😦😦 صافي ... صافي ... انا اليوم غانمشي فيها كفتة مافيهاش ... الله يا ربي الله .. عييت ما نحاول نتفكر الدعاء لي كانو يلوحو البنات فالكروبات و والو ، الشهادة هي لي بقات كتبان ليا هاذ الساعة ... تبثت صبعي لي كامل كيترعد و بديت كنشهد فخاطري

-واش هادي باقا ما فاقت 
-ها نتا كتشوف 
-دبا كيفاش هاذ البلان؟؟ واش كثرتي من لعبار
-لا لا راه غا شوية لي درت و ملي شماتو طاحت كاو 
-هي هاذي كتمثل علينا ... و لكن انا انفيقها بطريقتي 
غا سمعت "طريقتي" و انا نضربها بفيقة عالمية . انا :" بربي و يحط عليا شي حد فيكوم يديه حتا نهرسها ليه ... نتوما اش بغيتو عندي؟ ماحشمتوش ! خاطفين ولية ما فيدها حيلة 😒 رجال نتوما واش ما عندكومش خواتاتكوم ... لا لا باينة عليكم حيوانات كابرين ف غابة و ماعندكوم طاسيلة .. بزاف عليكم تكونو بنادم 😒 باش من حق تخطاطفو انسان مدار ليكم والو ... صحاب ليكم كاينة السيبة (و انا نتفكر بلي حنا فالموغريب و بلي طحت طيحة ديال النعاج صافي قلبت الديسك القانوني و الانساني و بديت فديسك اخر) عفاكوم ها نتوما كتشوفو راني غا بنت ، جلدة على العظم ، مغتصورو مني والو 😢 انا غا خطية ... ا طلقو هاذ الخطية تسرح و ماتديو ذنوبها 😢😢
-صافي هضرتي 
-لا باقي خصني نقول شحال من حاجة باش تشفقو عليا و لكن القلب بصير و اللسان قصير😢
-اوى ملي قصير سديه ولا نزيدو نقصروه ليك ، نسمع باقي حسك غان... احمد تكلف ... كتف هاذي و جيبها لطوموبيل 
انا فخاطري : احمد ... النبغ 😒وانا كنت نفكر هاذ التيتيز اش تكون سميتو .. كنت طايحة فيه دابا ما بقيت كنحملو .. كرهني فالتيتيز و خلا لي عقدة منهوم 
-احمم سميتك حمد ياه سميتك زوينة شوف خاي حميدة وقفت معاك وقفة ديال العيالات ملي كنتي محتاج للتنعات و نعت ليك بكل روح رياضية ... حرام عليك هاكا ترد ليا خيري
هو: -ضوماج ا الزين ما كنتش باغي نتلاقاو هكا مي راك ساوية الثمن 😉 
انا: واش كطنز عليا😢 را واخا تشوفني كنهضر هاكا ، راه الصحة عالم بيها غا مولانا ... فيا بومزوي و السينتا و فقر الدم و شاكة حتى السرطان ايكون فيا غير ما زعمتش ندوز حيت خفت لانتصدم بالواقع و مانلقا باش نشري الدوا و التحاليل ... راني كل نهار كنطيح و راني غا خاشية راسي فالدار حيت مكنقد على الخروج ... الصحة عيانة 😥😥😥
-هو: دابا عقلك كيصور ليك واش انا بوكيمون .. يريد الخير للناس ، و بلي غاتقدري تقنعيني بهاذ جوج كلمات و نعنقك و نقوليك هيا بنا و نهربك من لهنا ياك 
-انا : (بكل نظرة بريئة) عافااك 😢
هو : 😂😂😂😂😂😂😂😂😂😂😂😂😂 يالاه زيدي تحركي قدامي ... انا نضيع مليون على قبل كاسيطة مصدية 😂😂😂 لا زوينة هاذي

و كان لهم ما ارادو 😢😢 .. كتفوني و حطوني فواحد الطونوبيل و الموصيية الكبرى هي سدو ليا فمي و عينيا بجوج .. دابا وليت فحال الا مدفونة فقبر 😕😕 ما عرفت شحال طالت الطريق حيت كنت ناعسة ( اوى دخلنا عليكم بوجه الله اش بغيتوني ندير ملي ما نقدر لا نشوف لا نهضر .. اللهم غا نحلم فشي نعسة) ملي فيقوني حسيت بعظامي كاملين متشنجين حتى قلت ياكما دكو ليا شي برة و رجع فيا الشلل ، و لكن بمجرد ما جاتني واحد الدفعة من ذاك خونا الدحش عاد وليت صافا و رجعو الاطراف كيتحركو بلهلا يطريه ليهم 😑😑 ، بقينا كنتمشاو شحال و عينيا مسدودين و رجليا مطلوقين معرفت فين غادة ، حتى وقفو و هوما يحيدو ليا ذيك الشرويطة لي كانو عامييني بيها و لكن حلفو ما يحررو فمي ، اوى المهم كيفما كان الحال الحمد لله على نعمة البصر ، وصلنا لواحد الكوخ صغير و دخلوني لتما و سدو عليا تاني بعدما فكوني و مشاو فحالهم ، بقيت كنفكر اش هادشي كامل لي طحت فيه و كنفكر ف ماما مسكينة كيفاش غتكون ملي ترجع و ماتلقانيش فالدار و اهم حاجة هو المصير ديالي واش غانتقتل و نترما فشي بلاصة ولا غايديوني يعذبوني (و تفكرت صحاب deep web ) و هنا تخلعت ديال بصاح 😨😨 
و لكن مستحيل نبقا فحال هكا ضروري نتحرك و ندير شي حاجة ، المهم نحاول نخرج راسي من هاذ الورطة

كلست كنبلاني مع راسي و قلت دابا الا حاولت نهرب من لهنا غانكون كنغامر من جوج جوايه ، اولا انا معارفاش هاذ الغابة ف يمكن هاذ الخوت دغيا يلقاوني و ديما الواحد الا بغا يهرب خصو يكون حافظ الطريق و هاذ النقطة بالضبط ماشي للصالح ديالي .. ثانيا غالبا مغتكون الحراسة مشددة على الكوخ و الا حاولت نخرج اكيد ما غانتفضح و الا حصلوني غادي يوليو يشددو عليا كثر و كثر .. . هنا بالضبط طاحت فبالي واحد الخطة مدروسة لي نقدر نتحرر من هاذو الا صدقات .
دازت ساعتين و يمكن حنا ف 02:00 ديال الليل او اكثر و انا من الصباح ما طاحت ففمي النعمة و جاب الله تفكروني هاذ خوتنا الله يغرقهم كيف غرق فرعون و جابو ليا طبسيل د العدس Shit اودي  😤
بنادم غايصور من موراك الملاين و مايخسر عليك حتا ماكلة مقادة نعم يا سادة انهم ولاد بلادكوم ، المهم تقويت و هذاك القرد لي جاب الماكلة نسا هنا واحد البيل تاع الضو و انا نهزو و خبيتو... اودي ما تعرفو الوقت اش تجيب ، المهم كليت و تقويت و انا نضربها بواحد النعسة ، الغد ليه فقت على اصوات الضوضاء 
شي حد : وا را كان خصكوم تنقلوها البارح باقي ... اش هاذ الخدمة ديال ...
شي حد اخر : وا راه خفنا لا نغامرو و يلقاونا البوليس داكشي علاش بيتناها البارح هنا باش اليوم نتحركو و ما يعيق بينا حد 
شي حد (هذاك الأول لي هضر) : شوف ما تضيعوش الوقت كثر خاص الامانة ضروري توصل اليوم راه اليوم كاينة العملية و الا مات السيد قبل راه ضعنا كاملين 
شي حد (الثاني لي جاوبو) : واخا كون هاني .. اليوم تكون تما 😊
انا (اختكم في الله ) كنهضر مع راسي : دابا عاد فهمت مليون فالمية بغاو يديو ليا الكلوة ولا القلب ولا بحال والو الطيحال ... لا صافي واقيلا هاذو غايديو ليا الدماغ ما فيهاش! مستحيل نسمح فشبر واحد من جسدي ... و لي جبدني ايلقاني😒 الواحد هو لي يموت على راسو و ولادو موستقبلا 
هزوني كتفولي يديا و سدو فمي و سدو عليا فالكوفر ، طيلة الطريق و انا كنحاول نفك يدي ، بديت كنحرك فيديا و كنوسع ما بيناتهوم و نرجع نلاقيهوم بحال الا كنصفق و مخدمة حتى سناني باش نوصل لطرف د الحبل بقيت غادا هكاك حتى قدرت نفك راسي شوية حسيت بالطوموبيل وقفات و هنا فين غاتبدا الخدمة

جبدت البيل لي كنت حاطاه فالبلاصة المعلومة لي كيخبيو فيها البنات الفلوس ، من بعدما شعلتو بقيت كنقلب على واحد الحاجة و الحمد لله ملي لقيتها ، المهم سحبت ذاك مزلاج الطوارئ و تحل الصندوق فالاول خرجت راسي و ملي شفت بلي الدنيا خاوية و هوما دخلو لشي قهوة نقزت و خرجت من الطوموبيل و رجعت سديتها و طلقت رجلي للريح ... و كانت هاذي الخطة لي كنت كندرسها ذيك الليلة لاحقاش كنت عارفة بلي غايتحركو بيا لشي بلاصة و بحال والو غايحطوني فالكوفر حيت غايخافو لا نجبد ليهم شي صداع و بالفعل توقعاتي كانت صحيحة و نفعوني حتا ذوك الافلام د الاكشن لي كنت كنشد بيهم الستون ... اييه ا ليام شكون كان يقول غانطيح فهاذ الورطة ، المهم بقيت كنجري لمدة لا تقل على ساعة او اكثر حتى وصلت لواحد الطريق خاوية ، تخبيت مورا شي شجاري و كنحاول ندير اوتو سطوب واحد شوية وقفات واحد الطوموبيل و هنا حمدت الله قلت جاب الله لي يوصلني ، كان فيها واحد التيتيز و لكن عقدة التيتيز باقا شادة فيا و مارتاحيتش ليه و مجرد ما حل الباب قالي اشنو كتديري هنا بوحدك ، فالاول كنت باغا نعاود ليه و لكن خفت لا يكون معاهم ( الوقت كتعلمك تخاف من كولشي) هنا بديت كنبكي و هو نزل بغا يصبرني و كيقوليا مالكي ، قلت ليه راه انا و صاحبتي كنا كنديرو السبور هنا و شوية هي تسخف و هاهياك طايحة لهيه نعت ليه و انا واخا هكاك ما درتش لجهة التنعات ( لي عضو الحنش يخاف من الحبل ) و هاذ خونا لي دار .. ملي دار ما حسيت حتا هزيت واحد الحجرة و عطيتها ليه للراس و هو يطيح كاو فالاول تخلعت يحسابلي قتلتو و لكن مزيان ملي باقي كيتنفس هزيت الطوموبيل و ضيمارت و خليتو مليوح تما ، يالاه زدت شوية و جا ضميري الملعون باش يتحاسب معايا (واش ماشي حرام عليك ؟ السيد مسكين هبط باش يعاونك و نتي ضربتيه و خليتيه تما يموت؟ دابا راك بحالك بحال هاذوك لي خاطفينك !! ضاعت سنوات الدراسة و العلم و الدفاع عن الانسانية انا اخجل من كوني ضميرا لفتاة مثلك)
اوك صافي ا ولد الحرام غلبتيني فهاذي 😡

نزلت من الطوموبيل و حليت الكوفر عل و عسى نلقى فيه شي حبل ، و بالفعل لقيت واحد الحبيل قصير حدا الرويضة د الاحتياط و بالنسبة ليا يقدر يقضي الغرض ، رجعت للطوموبيل و تميت راجعة لذاك السيد لي كنت خليتو مليوح ، لقيتو باقي سخفان و قلت هاذي هي الفرصة كتفت ليه يديه و رجليه و جريتو للطوموبيل (وااا شحال كان ثقيل) ، حليت الباب و جلستو فالكراسى اللورانيين و سديت عليه و رجعت لبلاصتي و بقيت صايكة ، تقريبا مدة ساعة و انا كنصوك مكنتش عارفة راسي لا فين انا ولا فين غادا كنت كنقلب غير على شي كوميسرية و تقول!!😡 حتى حس بنادم ما تشوفو ف هاذ السيكتور 😑😑 واحد الشوية و انا نسمع الحس درت لقيت خونا بدا كيفيق ، و اول كلمة قالها هي "الله ينعل .... (تيييييييت)🔉🔉🔉🔉 طلقت الكلاكصون باش ما يكمل ذاك الكلام البذيء😌 
أنا: صباح الخير 
هو : صباح الزفت ، شكون نتي و اش باغا عندي؟
انا : سمح لي راه انا ماشي هاذيك لي تقدر تطيح ليك على بالك ، و لكن كان خاصني ندير هكا 
هو: اش خصك تديري؟ تضربي بنادم للراس و تطيحيه ؟ تخوني الطوموبيلات د عباد الله ؟ راكي باقا مكتعرفيني حسابي معاك هو اللخر
انا : اجي اشنو سميت هاذ البلاصة لي حنا فيها دابا ؟
هو : من نيتك مثلا😕
انا : اه و الله الا من نيتي 
هو : شوفي نتي لي صايكة دابا فين مخرجانا ، اخر مرة حبست كنا فمنطقة خالية و كنت شاد طريق للجنوب ، كان تيحساب لي بلي نتي بصاح محتاجة للي يعاونك ساعة كنت غالط ، و كون عرفت راسي غانتورط مع شفارة ما كنتش غا نوقف ولا ننزل من الفوق 😒😒 و لكن الا ما ندمتك منتسماش
يالاه بغيت نجاوبو هي توقف هاذ متعوسة الطوموبيلات😡 اش كاين ! اش واقع !😱😱 الطوموبيل خسرات 😕😕😕 و ها طيحة وحدة اخرى تاني 
هو : فكيني نشوف مال الطموبيل 
انا : اه نفكك باش تقتلني و ترميني فهاذ الخلا و تهز حديدتك و تمشي .. لا بلاش ا خلينا هكا مزيانين 
هو : اصلا بحالك هادشي لي يليق ليهم .. و دابا فكيني حيت لا انا لا نتي من مصلاحتنا نبقاو فهاذ الخلا و القفار لي ماعارفين حتا فين 😤
بقيت شي 10 دقائق و انا كنفكر واش نفك ولا ما نفكش و فالاخير حن قلبي و حن حتى عقلي و نضت باش نفكو و لكن قبل ..
انا : شوف حلف ليا بالله القسم الصادق بلي ما غاتآذينيش 
هو :😒😒😒 
انا : الا ما حلفتيش مغانفكش😛

هو : واخا صافي و الله القسم ماغانآذيك ... يالاه طلقينا 
انا : و الا مكنتيش مسلم ؟؟ 
هو :😡😡😡😡😡😡😡
انا : صافي... صافي تيقتك بلا ما تحتاج تحلف ف هاذي حتا هي 
المهم فكيتو و أول ما حرر يديه حسيت بواحد "سمرلااااق" فوجهي (كنت غانغيب ) 
انا : و هاذي لاش ؟ ياك حلفتي ؟ كنت عارفاك كافر مقطر كون غا قتلتك و نكون جاهدت فسبيل الله 
هو : هاذيك باش تعلمي مرة اخرى تعطي للناس بالحجر للراس 
ملي نزل بقا مدابز مع الطوموبيل شحااال و انا كنت كالسة على واحد الحجرة كنتسنا توقع شي معجزة ، و من بعد قلت ارى نمشي نطل عليه اش كيدير ، و راه المرة الا بغات تولد مغاتاخذش هاذ الوقت كامل 
انا : امضرا؟ كي بقات السيدة نقولو مبروك ولا عظم الله اجر الصابرين؟؟
هو : ما تقولي والو عطيني غا شبر تيساع .. ااخ على نهار كي داير 
انا : واش لا امل؟
هو : طوموبيلة خاصاها بياسة و كاع البياس د الطوموبيل را من بررا .. ما عرت فين كان عقلك و اش كان كيقوليك راسك ملي كنتي صايكة بيها فذوك الطرقان محفرين
انا : اوى صافي حتا هاذيك حديدة ... بففف درنا بيها ساعة و هي تسكت 
هو : سكتي ولا... (ملي شفت عينو حمارو وليت نخاف على راسي) هادشي كامل بسبابك ... هادشي كامل من النحس لي لاقاني بيك 
انا : هذاك سميتو المكتاب و بيا ولا بلا بيا الطوموبيل كانت غاتخسر ليك و كنتي غاتلقا راسك فهاذ البلاصة حيت هادشي مكتاب عليك ، و دابا مانكرش بلي كنت سبب و لكن في نهاية المطاف على الاقل حنا راه جوج د الناس و الورطة كتكون خايبة الا طاح فيها واحد.

هو ما كانتش عندو حتا حاجة يزيدها حيت فعلا حاسة بيه انسان لي كان غادي ما عليه ما بيه حتا طاح فهادشي كامل بسبابي ، و لكن من جهة اخرى حتا انا كنت غير ضحية و كنت بغيت غير نعاون راسي و ما نآذي حتا واحد 
بقينا شي نصف ساعة و حتا واحد مكيدوي ، كل واحد جالس فوق حجرة و كيشوف فالطريق ، و لكن بجوج كنا كنفكرو فواحد الحاجة هي "كيفاش نطلعو من هاذ الطيحة الغير المتوقعة؟؟" 
بدا الظلام كيطيح و ملي شفت بلي الجو باقي صاقل ، زعمت و تسلمت الكلمة الاولى 
انا : منقدروش نبقاو هاكا ! يعني نبقاو كالسين هنا حتا يطيح الليل و حنا ما عارفينش الوقت اش تجيب و لا فين حنا 
هو : اوى اشنو الحل فنظرك 
انا : الحل هو نتحركو بجوج و نقلبو نقدرو نلقاو شي حد يعاونا .. ما تعرف 
هو : اه فهاذ الارض الجرذاء نيت 
انا : سمح لي بزاف ما كنتش قاصدة هادشي كامل يوقع 
هو : و سماحك فاش غاينفعني و انا لي فوت عليا رحلة عمل مهمة 
التزمت الصمت و حنيت راسي كنشوف فالارض 
هو : يالاه نتحركو 
انا : فين؟
هو: اهم حاجة ما نبقاوش بلاصتنا 
مشا جاب واحد الصاكادو من الطوموبيل و مانساش تيليفونو (واخا مكانتش التغطية) و لكن ما نعرفو اش غايجي من بعد 
شددنا الرحال ... و عزمنا الترحال ههه المهم بقينا غاديين كنتمشاو و حنا كل مرة كيحساب لينا رجعنا من الطريق لي بدينا منها ، وصل المغرب و حنا باقي شادين الطريق و ماعارفين فين غادين ، و من بعد ثلاثة د السوايع د المشي و فالظلام ، لمحنا واحد النور قريب ، كانت واحد الدار ولا بوينتة فوق واحد الجبل ، هنا فرحنا قلنا على الاقل يمكن يكون شي بني آدم لي يعاونا ، بقينا طالعين مع ذاك الجبل حتا وصلنا للدار و لكن مورا ذيك الدار كانو ديور اخرين و جامع ، كانت قرية صغيرة مورا الجبل و لكن مع ذلك ما كان حتى واحد كيدور تما ، زعمنا و دقينا على اول باب و خرجات لينا امراة كبيرة فالعمر شوية سولاتنا اش بغينا بالامازيغية فالاول طلبت شريبة الماء و من بعد ما روينا عطشنا ، سربيت و هضرت قبل ما يسبقني صديقي العزيز و يخسر لينا كولشي 
انا : هاتي نكين د اركاز اينو ، نومز اغاراس ايميل تخسراح طوموبيل وكان نرا غار ما يحيتعاوان (قلت ليها انا و راجلي كنا شادين الطريق و خسرات لينا الطموبيل و كنقلبو على لي يعاوننا) 
بيني و بينكوم ملي شفت خونا ما قفل والو من هضرتي و بدا غا كيشوف فيا حسيت بالراحة اووف ، مكاين لاش نبقا نزيد عليه

مكاين لاش نبقا نزيد عليه ، انا حطيتو فهاذ الورطة و انا غانحاول نخرجو منها 
المرأة : ياه مرحبا هاتي إوي ايكان المقدم ن غيد راكن ايعاون (قالت ولدها مقدم و غايعاونا)
رحبات بينا و دخلنا و تلاقينا معاهم مع وقيتة العشا قد قد ، شفت الرجال لي تما طلبو من هاذ المسخوط يجلس يتعشا معاهم و انا طلبات مني ذيك المرأة نمشي معاها لبيت العيالات ، اوى انا خفت لا كولشي يخسر و استأذنتهم اني نهضر مع راجلي شي شوية و وراتنا المرأة فين نقدرو ناخذو راحتنا و انا نجرو للسطاح 
انا : شوف خاصني نعلمك بواحد الحاجة 
هو : لا لا صافي دماغي ما بقا قاد على بلانات هاذ النهار
انا : شوف اسميتك راه ... اه اشنو سميتك بعدا؟ 
هو : لا صافي التعارف لي بقا ليا ... انا أمين 
انا : متشرفين انا سميتي مريم .. المهم خصك تعرف بلي هاذ الناس لي طحنا معاهم راه امازغيين ، بمعنى ان التقاليد هوما كولشي و هاذ الناس كيكونو محافظين و اكيد الا عرفونا انا وياك ما بيناتنا والو ماغاديش يدخلونا لدارهم ، لذلك ظطريت انني نكذب عليهم و نقول ليهم بلي حنا مزوجين و بلي كنا مسافرين و خسرات لينا الطوموبيل فالطريق و تقطعو بينا الحبال هنا 
هو : كيفاااش!! مزوجين !!!!!!!!! 
انا : كذبة ... كذبة و كون ما درت هاكا ما نلقاو لي يعاونا ، بمجرد ما نتفكو من هاذ الوحلة عمرك ما تشوف كمارتي ولا يحصل ليك الشرف تسمع صوتي مرة اخرى ... اوى تبث معانا الله يرضي عليك 😒
هو : الله يصبرني .. هادشي لي نقدر نقول 
المهم وصيت حتا عييت و طلقتو يمشي يعمر كرشو و انا نتفكر «الكرش الا شبعات كتقول للراس غني» و انا خفت لا يمشي هاذ الويل يعاود كولشي و لكن كمدتها فنفسي و كلست تعشينا و تحادثنا شوية انا و العيالات و هي تنوض مولات الدار و وراتنا البيت فين غانعسو ، صاوبنا بلايصنا و كل واحد شد قنت و نعس فيه (انا جيت حدا الباب منها نبعد منها الا سمعت الحس على برا نضرب الوقفة) و لكن مع ذاك العيا لي فيا طحت كااو حتى للصباح

اصبحنا و اصبح الملك لله و ما زلنا في ايامنا الملعونة في القرية ، فقت شربت الحريرة و فطرت فطور امازيغي تقليدي رائع 😍😍 و مشيت مع العيالات للواد و كانو كيصبنو و كيغنيو مجموعين و شبعنا ضحك و رجعنا درنا الغدا و عاونت مولات الدار فالكوزينة و حسيت بواحد الارتياح غريب ، حسيت بلي بصاح كننتمي لهاذ البلاصة و بلي فحال الا فايت عشت هاذ الاحساس قبل ... كان كولشي زوين حتا شفت واحد التخنزيرة جاتني من بعيد و لقيتو هو 😒😒 لا ضروري ما ينكد عليا هاذ السيد 
امين: شفتك ولفتي 
انا : هو فالصراحة الجو يا سلام و الناس الله يعمر ليهم الدار اش بغا الواحد كثر من هاكا 
امين : الواحد بغا يرجع فحالو لخدمتو و شركتو و عائلتو 
انا : اه زعما ما نكلسوش واخا غا سيمانة😩 عتابرها عطلة و جاتك فابور 😍
امين :😒😤😤
انا : صافي ... صافي اليوم ا نتحركو 😒
امين : راه هضرت مع المقدم هو مستاعد يهبط معانا حتى للبلاصة فين نقدرو نلقاو شي طرونسبور يدينا 
انا : واخا صافي😢😢
انا فالصراحة ما كنتش باغا نمشي و لكن هو عندو الحق كاينة حياة اخرى كتسنانا و بلاصتنا ماشي هنا 
من بعدما تغذينا ركبنا فالبيكوب ديال المقدم لي كانت غادا بينا للطريق الرئيسية ، بقينا شحال و حنا راكبين و كيضربنا الهواء النقي و كنشوفو المناظر الرائعة حتا وقفات بينا البيكوب (الا باقي كالو ليا بلي خسرات غانقج راسي و نموت هنا)
امين : الشريف ياك لاباس؟
المقدم : هو اولدي راه قربتكوم للطريق و انا مانقدرش نكمل حيت نخاف يشوفوني الجونضارم و هاذ البيكوب ماعندهاش لاصورانس 
امين : و دابا حنا اش نديرو 
المقدم : انا غانعت ليكم و نتوما كملو على رجليكم و الا تبعتو التنعات راه غا توصلو دغيا
امين : واخا ... مريم نزلي يالاه فحالنا !
المهم بقينا غاديين تاني .. يمكن انا و هذا مكتوبة لينا تمارة د الطرقان فجبهتنا ، و فجأة قلت ارا نهضرو و نحيدو الملل ديال الطريق 
انا : ياه الجو زوين اليوم 
هو :😒😤😤 
انا : بداية غير موفقة 😩 فصراحة اه يمكن عندك الحق انا منحوسة و هادشي علاش كيوقع ليا هادشي كامل 😢
هو : مكيناش شي حاجة سميتها النحس ، نتي شفارة و ما صدقاتش ليك العملية و بسباب هادشي طحتي هنا 
انا : انا ماشي شفارة😒
هو : اه و اشنو كديري هنا بالسلامة ؟؟ و اش كنتي باغا عندي ملي وقفتيني و عطيتيني بحجرة للراس؟ و اش كنتي باغا من الطوموبيل لي سرقتي ؟؟

يالاه بغيت نهضر حتى سمعنا حس الطموبيل ، هو فرح بزااف و مشا باش يوقفو ، و انا ملي شفت الطموبيل قلت اليوم كحالت عليا صافي حان موعد الموت 
يالاه بغا يشير و انا نحبسو و جريتو بزربة مورا الشجاري لي كانو تما ، هو بقا مستغرب و معصب بلا قياس ، يالاه بغا يهضر و انا نسكتو ، بقيت كنتسنى حتى مشات الطموبيل و انا قلبي كيضرب بلا قياس و ملي ما بقيت كنشوفها ولا نسمع حسها عاد رتاحيت و بردت ، و ملي درت لقيت نظرات الغضب مواجهيني و معاهوم نظرات الاستفسار بمعنى "يالاه دابا عاودي ليا هاذ البلان"
انا : اوك المهم انا ماشي شفارة و ماقصدت نضرب حد ، انا تعرضت للاختطاف و حاربت باش نهرب و ملي قدرت نهرب لقيت راسي فالطريق لي دزتي منها ، خوفي منعني اني نقول ليك لي واقع و كانت ردة فعل ديالي هي اني نهز حجرة و نضربك ، لاحقاش كنت كنقلب غير على وسيلة باش نفك راسي و نوصل للبوليس ، و هاذ الطموبيل لي دازت دابا كانت ديال الخاطفين و بحال والو هوما باقين كيقلبو عليا دابا 
هو : و علاش ما عاودتيش ليا هادشي من الاول 
انا : الخلعة و قلة العقل 😅
هو : دابا جيتي تحيدي راسك من ورطة وورطيني انا فورطة اخرى ... يا سلام على عقل عندك 😒 كون عاودتي ليا من الاول مكناش غانوصلو لهاذ الحالة 
انا : لي عطى الله عطاه دابا 😌

بقينا غاديين و فنفس الوقت واخذين الحذر حتى وصلنا لواحد الطريق كيدوز منها الحديد ، وقفنا واحد الكاميو بعد مشقة و طلبنا منو يوصلنا للطريق الرئيسية و وافق من بعدما طمعو أمين بلي غايعطيه شحال ما بغا د الفلوس ملي يوصل ، و عاد عرفت القيمة ديالو ، كون ما كان دابا هو معايا موحال نلقا لي يهزني ولا حتا الا هزني شي حد ما نعرف اش غايكون كيتسناني حيت انا بنت ، و لأول مرة كنفرح بزاف للصدفة لي جمعاتني بيه 😍
انا : شكرا بزاف ... على كولشي
هو : انا بعدا مكنشكركش على صداع الراس لي درتي ليا 
انا (الصمت)
هو : العفو 😊 واخا باقي ما درنا والو دابا... اهم حاجة كل واحد يوصل لدارو بيخير 
انا : و رحلة العمل ديالك ؟
هو : يوماين ولا ثلاثة و حنا مجليين ، اش من رحلة باقي كنفكر فيها 😂 بغيت غير ندخل لداري ندوش و نرتاح 
و اخيرا وصلنا للطريق الرئيسية و كان الليل ، مشا هو لواحد الكيشي و انا بقيت كنتسناه حدا شيفور د الكاميو ، و ملي رجع عطا للسيد رزقو و طلب مني ننزل ، بقينا كنتمشاو و اخيرا فرحت بزاف ملي لقيت حس بنادم 😍😍 ، سولني واش غايديني للكوموسيريا و انا جاوبت بالايجاب ، المهم دخل معايا حتى ديكلاريت بهاذوك الجوج لي شفت و عاودت ليهم كولشي ، طلبو مني لاكارط و قلت ليهم را كنت خارجة غا نتسخر حتا صدقت فهاذ البلان الملعون ، و الحمد لله ملي تكلف أمين و هضر معاهم ...المهم قالو ليا حنا غانتكلفو ، خرجت و ضميري مرتاح حيت واخا كنت خايفة و لكن مابغيتش شي واحد اخر يتحط فالموقف ديالي ، و كنطلب الله يتشدو بشي عشرين عام باش يعرفو بحق العدس لي كانو بيه كيعشيوني 😒 
انا : اوى ها حنا تهنينا .. و دابا كل واحد يشد طريقو شكرا على كولشي و الله يعاونك
هو : كيفاش واش نتي عارفة كيفاش تسلكي راسك فهاذ المدينة؟ و عندك فلوس باش ترجعي لداركوم؟
انا : اودي الا سلكت راسي وسط الخلا و القيفار غانسلك راسي هنا ، غانشوف شكون يعطيني فلوس الكار ... عندي مع الاقناع و نقدر نستاثمرو فالسعاية ما تخافش 💪
هو : زيدي قدامي .. سلكتي راسك فالاختطاف الاول و دابا الا طحتي فشي اختطاف جديد و تجمعني بيك الطريق شي نهار و توحليني تاني 😒😒 اجي ما تكونيش من هاذوك لي كيجبدو بيهم الكنز😂😂؟
انا : شوف ف عيني ، ياكما بنت ليك كاورية مزورة و حتا من الخط ما عنديش اصلا كاع الخطوطا لي فيدي مشبكين دلالة على زهري العوج😕😕
هو : فيك جوع؟
انا : الموووووت

هو: يالاه نتحركو من لهنا 
المهم ا لبنات ما بغيتش نعيق عليكم و لا نشهيكم .. و لكن را مشينا كلينا لحم الراس مفور 😍😍😍😍 (ياكما حساب ليكم دخلنا لريسطو 5 نجوم) 
اوى من بعد ما تعشينا ضربنا دويرة فالمدينة كنقلبو على شي اوطيل ولا دار الضيافة فين نباتو 😌 «الليل فالمغرب عندو حكاية خاصة ، بالليل فاش كولشي كايطفي الضو و كيحط راسو على المخدة و كيبدى فالافكار الليلية او الاحلام .. و فنفس الوقت المتشردين و مجانين الطرقات لي مالقاو دار لي تحضنهم اولا جمعية لي ترفق بيهم كيفرشو جوج كراطن و كينعسو حدا شي كاراج ، هوما معندهومش الوقت باش يفكرو بحالنا ... حيت صافي التفكير المطول خلاهم يعيشو حالة الاحساس بالعدم ، لذلك اول ما كيطيح الظلام كيلبيو الغريزة الحيوانية د النوم باش يفيقو بكري تاني قبل ما يجي مول المحل يشبعهوم عصا و سبان و معيور ، دلالات كثيرة كيحملها الشارع ليهم ... لان الدار لي كتعتابروها ملجأ للأمن و العزلة و الخصوصية و الهروب من وحشية الشارع ، هوما الشارع هو الملجأ الكلي ليهم .. و معندهومش شي خصوصية من غير مجموعة الافكار لي كيرمي بيها عقلهم و لي مكيقدروش المارة يقراوها »
لقينا اوطيل صغير فوسط المدينة و هاذ المرة كل واحد شد بيتو بوحدو ، لانه قدما توثقات علاقتنا مورا هادشي لي وقع ، كيبقى كل واحد و حياتو و خصوصيتو لي خص الاخر يحتارمها و يعطيها شبر ديال التيساع .
اصبحنا و اصبح الملك لله ، و صبحنا على الدقان ديال البوليس لي داير لينا هاذ السيد فالباب😒😒
انا : مالنا ا لباشار ياك لاباس ؟ ما نعسوش حنا؟
هو: ناعسة فداركوم .. وا نوضي تكعدي را خلصنا ليلة وحدة ماشي تقردي ليا نهار و نص 
انا : سباحاتولاه التقرزيز و السم و الصداع ملي كيتجمعو و يكونو بنادم .. هو سعادتكم المحترمة 
هو : اوك شغلك هذاك كلسي حتا يدخل عليك شي حد .. هانا مشيت مالي كاع على هادشي 😌
انا : بلاتي تسنا غا نغسل وجهي و نجي😒😒
المهم هبطنا من الاوطيل من بعد ما فطرنا طبعا😋 و صافي وصلنا لمفترق الطرق .. ووصلنا لطريق النهاية فين غايخص كل واحد يشد طريقو ✋
انا : صافي هانتا غاتهنا مني 
هو : و اخيرا 
انا : حصل ليك الشرف فاش عرفتيني😌
هو : لا حصل لي يأس مكتسب من معرفتي بيك 
انا : اييخ على بنادم ... ارا باش نقطع ورقة و خلي ليا نمرتك حتى ندير و نرجعهوم ليك 

هو : ههه ماشي مشكل بلا ما ترديهم را قطعت ليك الورقة .. هاكي 
انا : اجي امتى هادشي ؟ باغي تصيفتني للعصا بحال والو هاذي مزورة😒
هو : فالوقيتة فاش كانت سعادتكوم كتشخر حتى ل 11 د النهار الناس قضاو شغالهوم ... المهم نتي تسناي هنا واحد ساعة را غا يوصل الكار ديالك و ركبي فيه اوك ... انا خصني ضروري نمشي دابا 
انا : شفت الناس هنا قلال و البلاصة خاوية 👀👀 ياكما تكون كطنز عليا و باغي تفك مني 
هو : هو اه بغيت نتفك منك و لكن ماشي بهاذ الطريقة غا تهناي 
انا : المهم شكرا بزاف و سمح لي (ما كملتش كلامي حتى خلاني و مشا 😒 اصلا من حقو ، واخا وقف معايا مسكين و لكن فالنهاية كل واحد يعاود لمخو)
🌸🌸🌸🌸🌸🌸🌸🌸🌸
نمشيو عند أمين لي أول مرة غايستالم الكلمة و يهضر فهاذ القصة
" انا مشيت و خليتها .. فصراحة من بعد هاذ الايام لي جمعونا بديت كنتعلق بيها و انا هادشي ماشي فصالحي حيت معنديش الوقت للحب و اصلا لي عليا درتو و دابا غاتوصل لدارهوم بخير 😌 تاصلت بصاحبي و سولتو على امور العمل و طلبت منو يصيفت لي شي طموبيل باش نرجع فحالي ، ملي قطعت معاه الاتصال شفت بلي نص ساعة هاذي لي دازت و قلت نرجع نطمأن عليها واش ركبات ، ما عرفت علاش اصلا غانرجع ؟!و لكن حسيت بلي من الواجب ديالي نوقف معاها حتى نشوفها ركبات ، ملي وصلت مالقيتهاش و لقيت نفس الطموبيل لي كانت قالت ليا عليها عاد دازت من حدا المحطة ، فصراحة حرت و ما عرفت اش غاندير ، اول حاجة حفظت الرقم د السيارة و من بعد رجعت كنلوم راسي .. مكنش خصني نخليها بوحدها هنا و هادشي كامل بسبابي 😞😞

مشيت عند البوليس و عطيتهوم الرقم د الطموبيل لي بدورهم تاصلو بدوريات الامن لي فالطرقات باش يوقفو السيارة فحالة شافوها ، و انا من بعد ماوصلاتني طموبيل لي وصيت عليها بقيت كندور المدينة كاملة كنقلب على اي راس الخيط واخا يكون بسيط لي يقدر يوصلني ليها ، من بعد 12 ساعة ، كنت متكي فالطموبيل من الاعياء و الاحساس بالندم ، تاصل بيا واحد مفتش شرطة و قال بلي عرفو البلاصة فين كاينة الطموبيل و راه غادي يصيفتو الدراري ل تما ، انا ملي خذيت العنوان كسيريت و ما عقلتش حتى لقيت راسي قدام الدار لي كانت وسط الغابة ، كانو اربعة د الرجال حدا الباب ، و جوج ديال لوطو قدامها ، كنت بغيت غير نعرف حال مريم و ماقدرتش نتسنا توصل الشرطة و مشيت مورا الدار حاولت ما امكن نتسلق و نوصل للبالكون و ملي دخلت مكنش حتى حس ديال بنادم فالدار بقيت كنقلب فالبيوت و فنفس الوقت حاضي لا يحصلني شي حد ، حتى لقيت البيت لي فيها مريم و كانت فحال شي غرفة د العمليات ، كانت مغيبة و معلقين ليها السيروم ، تخلعت و عقلي فكر فبزاف د الحوايج ، دخلت لعندها و حاولت ما أمكن نفيقها و لكن مكانتش كتستاجب ، هنا بالضبط فين شافني واحد و كان جابد السلاح بقينا انا وياه مشانقين و ملي تأكدت بلي طاح ، حاولت نهز مريم و نخرجها من لهنا ، ملي كنت غادي بيها جهة الغرفة فين دخلت بديت كنسمعها كتفيق ، و انا نحطها و حاولات تجلس ، سولتها واش هي بخير؟ ياكما أذاوها؟ و لكن هي كانت غير كتخرف ما فهمت حتى لعبة من داكشي لي كتقول 
هي : امين ههههه واش انا ميتة ياك ... الله يرحمني
انا : لا راك باقا حية ... شوفي حضري معايا عقلك دابا و سمعي اش غانقوليك 
هي : الو عقلي .. صافا كولشي مزيان اجي عافاك حضر معانا راه كيقلبو عليك .. اه واش ما فخباركش مريم ماتت 😂😂😂😂😂
انا : مريم .. مريم شكون انا ؟
هي : أمين ... المنحوس😂
انا : شحال هاذو ✋ 
هي : واحد .. جوج ... خمسة 
انا : اوى راه هاذ الخمسة لي غانجمع معاك الا ما سمعتيش اش غانقول دابا 😒
هي : ايي ذيك سمرالاق تاني 😢😢😢 صافي اوك شاف كنسمعك 
انا : غادي تشدي هاذ الحبل و غاتهبطي مع ذاك البالكون ... متخافيش راه ساهلة غا زعمي 😉 و من بعد زيدي شوية حدا واحد الشجرة اتلقاي طوموبيل كحلة و متوسطة ، راها محلولة دخلي و تكاي فالكراسى اللورانيين و تسنايني تما غانسالي شي حساب و غانجي ... فهتي ؟؟

هي : اه 😌 انمشي نطيح فذاك البالكون و بالحبل و نتسناك فالطموبيل الكحلة 😂😂😂
انا : مزيان ،شوفي تماسكي ... و حضري عقلك مزيان باش تخرجي راسك من هاذ الورطة 
هي : اوك الشاف 😂😂 و ماغاتخلينيش تما ياك ؟؟ ماغاتخليهومش يشدوني تاني؟؟ ولاد الحرام 😢😢😢 دكو لي البرة 😞😞
انا : عمري ماغانخليك ... دابا سيري كوني مرة 💪💪 كيف كانعرفك 
من بعد ما هبطتها مع الحبل و تأكدت بلي هبطات بيخير رجعت باش نشوف هاذو اش كانو باغيين منها ، وصلت للبيت فين كانو حاطينها و لقيت شي وراق ديال عملية القلب و كان توقعي فمحلو ، من بعد بداو كيجيو افراد العصابة حاولت ما أمكن نواجههوم و لكن ما قدرتش بوحدي و واحد الشوية جات دورية الشرطة و مع فاش كنت غاندور جاتني الرصاصة فرجلي اليسرى ، كنت كنحاول نوقف و لكن كانت رجلي كتضرني بزاف و حسيت بلي قربت نفقد الوعي و تمالكت نفسي باش نعلم واحد من البوليس ببلاصة مريم و يمشيو يعاونوها و ملي علمتو طحت و ماعقلتش على راسي باقي

عند مريم 
فصراحة دوزت ليلة عالمية و لكن غفلوني فيها واش ا عباد الله كنت حاضرة ففيلم و انا مافخباريش ياه و لكن الزوين فهاذ الفيلم هو و اخيرا لقيت البطل ديالي 😍 واخا ولا عرج 
ملي فقت مورا ذيك الليلة ما كنتش عاقلة اش واقع و البوليس هوما لي عاودو ليا كولشي ، مشيت شفت امين فالسبيطار و لقيتو عاد غايخرج و كانو دايرين ليه البانضة فرجليه و كيعرج 
هو : هانتي ما تهنيتي حتا خليتينا كنعرجو 
انا : (ما ستاحملتش و بقيت عاطياها غير للبكا) 
هو : دابا دموعك اش غايزيدوني يالاه تحركي نمشيو من لهنا 
انا : فين؟؟
هو : نديك لداركوم برجلي حتا نعرف بلي راك وصلتي بيخير 
انا : و لكن راك وليتي بورجيلة وحدة 🙊
هو : اييه عايري .. و لكن راه يدي باقي صحيحة 👊 تسكتي لا 
انا : صافي لعاار هاني ضاربة الطم 
مشينا بطموبيلتو و لي كان صايكها الشيفور ، ووصلنا للدار و الدرب كامل كيشوف فالطموبيل المجهول صاحبها (التبركيك حاجة معلومة) ، و ملي هبطنا كولشي استغرب و ملي هبط معايا التيتيز كولشي وصل لمرحلة الدهشة و بقاو حالين فمهوم .. و بنات الدرب عاقدين حجبانهم و انا كلي ابتسامة اصلا هو غايمشي غايمشي ... خليه غا نقليو بيه السم لعباد الله 
دخلت و سلمت على ماما و جدا لي عاودت ليهم كولشي و ماما طاحت علي بالبكا و العناق و بدات كتشكر فأمين و لكن الاهم من هادشي اني شبعت قريص و نتيف في حضور التيتيز (بحجة انها ديما كتوصيني ما نخرج ملي ما تكونش و ديما كندير لي فراسي ... و كليتها حتا على ود الماعن لي ماغسلتش) 
و الى الان باقين انا و التشيتيز على تواصل ، هو ما بغا يعتارف و انا مابغيت نعتارف ، و كنشدو الجماعة على أهمية محاربة الاختطاف و سرقة الاعضاء البشرية ، حتى يجيب الله شي معجزة باش ندخلو فشي قصة حب 😂😂

النهاية 🌸

أحدث القصص
قصة اللؤلؤة السوداء من تأليف شرقاوي حسناء
قصة اللؤلؤة السوداء شرقاوي حسناء
قصة تيريزا من تأليف سكينة سليماني
قصة تيريزا سكينة سليماني
قصة ضحية ذئاب من تأليف Sanae El Marzouki
قصة ضحية ذئاب Sanae El Marzouki