صورة مصغرة لـالضحكة المهجورة الجزء 15

الضحكة المهجورة الجزء 15

alde7ka almahjora
رواية الضحكة المهجورة

بغات ضحك وماقدراتش ... براكة عليها الوجع ديال الفتيح اللي دازت منو الليلة دلبارح مابقا ليها عقل تفكر فالسميات . 

خرجات هبة من المستشفى بعد ايام قليلة.. كتمشى بشوية وياسين هاز الوليدات بجوج واحد فهاد اليد واحد فاليد الاخرى .. طلعات فالطموبيل بزز وعطاهم ليها شداتهم عندها .. صغيورني وجههم حمر وعينيهم مجبدة ناعسين .. خرجات ليها البنت كتشبه ليها .. كتبان قرعة حيت الشعر شهب بزااف فراسها وبيضاء خدودها حومر .. والاولد راسو كحل كيشبه لباه حتى فالدورة دالوجه . مشات هبة لدارها ترتاح فيها .. وصعابت عليها التربية ديال جوج وليدات واخا ياسين معاونها وداير جهدو معاهم .. ولاكن اصعب حاجة هي فاش كتحط راسها تنعس كيفيق واحد كيغوت .. وماتجي فين تسكتو وترتاح تا كينوض التاني وشي مرات كيبداو يفيقو بعضياتهم بالغوات .. تمرات عليهم الدار ورجعو كيسهرو الليل بجوج .. هبة كتقطع بالنعاس كتبغي تغمض غير خمسة دقايق مكاقدرش. رجع عندها البيت مقلوب بحوايج الاطفال .. مابقاتش كتلقا الوقت فين تجمعهم لا هيا لا ياسين .. صف ديال ليكوش فواحد القنت .. والرضاضع بالغرام محطوطين عند راسها وكل مرة يدخل عندها ياسين برضاعة جديدة عيا من لغسيل والمشكل العويص اللي طاحو فيه . هوا ان البنت كتشد البزولة والولد لا .. عياو معاه مابغاش يشدها وضطرو يحلبو حليب البزولة فالرضاعة ويعطيوها ليها . هبة كتعيا جالسة شادة الرضاعة على صدرها وكتمص .. وفين ما تعيا كيشدها ياسين ويجلس حداها كيعمر ويمسح ليها باش تكا شوية وتنعس بعدا فديك اللحضة اللي كيجر فيها الحليب .. بعد المواقف كيتعصبو فيها بحال فاش كيبداو يغوتو الاطفال دقة وحدة ومكيبغيوش يسكتو .. وبعد المواقف كيبداو يضحكو فيها حتى كيسخفو واخا سخفانين ومقابلين غير الدراري الصغار نهار وليل .. عمر هبة مكان يحساب ليها تربية الدراري صعيبة ... حتى رجعات كتعاني معاهم لا هيا لا ياسين .. هي كتشد البنت ترضعها وياسين كيربع حداها ويشد الولد يرضعو .

فوق الناموسية وسط الفراش لمرون ولاتروس لمشتتة ديال لكريمات والزيوت والبوماضات ديال الطياب وريحت الدراري الصغار ماليا لمكان . الطالك مرمي فجهة وليكوشة فجهة والرضاعة فالارض فوق الزربية وفراشة ديال كل واحد فيهم فين مكمشة .. جالسة هبة بسورال بيجامة وتيشورط كيوت مربعة رجليها ومعرية الولد قدامها كتمسح ليه وياسين جالس بالشورط قصير شاد الرضاعة فيدو وكيتفوه عياان وعينيه صغارو بالنعاس كيتسناها تسالي باش يرضعو وتبالي هي بالبنت 

هبة: خاص ماما تجي ضاروري 

تكى على ضهرو حداها حدا ليكوشة خانزة مطوية وقال كيتفوه 

- سيمانة جايا غنمشي نجيبها 

هبة : علاش ؟ هي تجي راسها فالطيارة 

ياسين : انا غنمشي وغنجيبها 

هبة : تخليني هنا بوحدي؟ بغيت نحماق

ياسين : غتصبري غير شوية .. 3 ايام وغنرجع 

هبة : اويييلي انا غير ليلة مكنقدرش نصبر فيها غترجع تلقاني طجيت ...واش على قبل ديك الطموبيل غتهبط ؟

ياسين : كيتفوه ) وايييه... 

هبة : صبر حتى تجي ماما ... علاش باغي تهبطها للمغرب ؟ واش ديالك

ياسين : غنمشي نبيعها ونرجع بحالي ماعندي ماندير تما 

هبة : واش ديالك هاديك؟

ياسين : وديالمن؟

هبة : خليها زوينة بيع لمرسيديس ... واش كاين شي واحد كيبيع بورش!!!!

تلفت جهتها متكي على يدو وقال مصغر واحد العين 

- شغاندير بيها ؟ 

هبة : وعلاش شريتيها؟ 

ياسين: كديري راسك زعما معارفاش!

هبة : والله مافهمت شي حاجة .

ياسين : باينة اهبة غنهبطها للمغرب تباع 

هبة : واش نتا كتبعي وتشري فالطموبيلات ؟

ياسين : وعاد عرفتيها ... الفا روميو اللي كانت عندي راه ديال هنا ودخلتها عشرتها تما ... صافي طلعات ليا فراسي بعتها وشريت ميرسيديس اللي عندنا دابا .. لحديد هنا واااعر ورخيص مغاليش ومطلوب فالمغرب 

هبة : شحاا خديتيها 

ياسين : شي 36 مليون بحال هاكاك 

هبة : هييييه !!!! هاديك!!!! 

ياسين : كيضحك ) هااااديك .. عرفتي شحال دايرة جديدة؟.... 80 مليون جديدة تما فالمغرب 

هبة :بدهشة) وشحال غتبعيها تما !!! 

ياسين : كدا وستين مهم مانزلاش على ستين 

هبة : بابتسامة ) ولاهيلا وااعرة ... ولاكن غتعطل تما 

ياسين : كاين مولاها كيتسناها واش حساب ليك غنمشي نبقا ندور بيها ... غندخلها ونرجع فالطيارة 

هبة : ماحسابش ليا هادشي فيه لفلوس!!!

ناض جلس مهبط راسو قدام رجليه كيدوزو يدو على رقبتو بتعب وقال

- وشنو يحساب ليك ... وباش تبيع وتشري فالطموبيلات ودخلهم للمغرب راه خاصك تكون مطور ... راه لحديد هادا ماشي اللعب قد ما فيه الربح فيه الخسارة ... والى كنتي هبيل راه بيعوك وحدة مسروقة ويشدوك فالديوانة دوزها حبس ... وخاصك تكون كتعرف الناس بزااف .. وعندك معارف فالديوانة وزيد وزيد ... راه اغلبية ديال المغاربة اللي كيبانو ليك مرفحين طالعين بالحشيش والطموبيلات 

هبة : تخلعات) ناااري عنداك يصيدوك شي نهار حتا نتا... اش داك لهادشي 

قلب وجهه كيضحك فالجهة الاخرى وقال

- اش غيصيدوني راه سناني طاحو فهادشي .. شفتيني داخل خارج للمغرب غير هاكاك ... وانا اصلا كيعجبوني الطموبيلات وهادشي يالاه زيري راسك شوية ماتبقايش مرخية باش نجيب لحبيبة ديالي شي وحدة زوينة بحالها 

هبة : عيييت والله غلبوني ... ماشي ترخيت راه عييت 

تلفت كيحل عينيه بزز وقال

- شوفي "فينا " راه طاح ليها لغطا حدا وجهها ..... فاقت واقيلا 

طلات عليها هبة لقات فايقة قالبة وجهها كتخرج لسانها ودخلو وقالت بابتسامة 

- قاااطعة لحس ... 

ياسين :بصوت منخفض) خليها ميكي عليها ... بلا متحركيها غتصدعنا بغوات .. بغيت غا نعس واحد لقسم 

هبة : صافي سالا هادا .. عطيه يرضع باش ينعس ندخل ندوش بالزربة 

ناضت كتجري للدوش يالاه سدات الباب سمعات بنتها " فينا" كتغوت وياسين كيعيط ويضحك 

ياسين : رجعي رجعي ههه

وقف ياسين واحد للسفر .. شهر ونص مور لولادة داز بالزربة ماعرفو كيفاش داز ، البرد تحرك وبلجيكا باردة .. لابس سورفيت كحلة وسبرديلة وجالس حداها فوق الناموسية كيراضيها وهي مربعة يديها طالع ليها الدم

ياسين : مغنتعطلش احبيبة دغيا غنرجع ونجيب معايا ماماك 

هبة : نتا عارفني منقدر نخرج ولا ندخل وبوحدي مع جوج ولاد مزال حتى مكنعرف مي ندير ليهم وغادي تبيع وتشري كاع ممسوق ليا 

باسها فخدها بلطف وقال : والى مابعت ما شريت باش غيكبرو هاد الوليدات؟ 

هبة : كنتي على الاق تسنى حتى تجي ماما ياك الطموبيل مبيوعة مبيوعة لفلوس حسني منا عندك ياك 

ياسين : بتراضي ) شوفي على هضرة كتكَولي دابا بغيتي تسيفطيني مقلق ... لخدمة هي هادي مافيهاش تسنا ومغنتعطلش (باسها) ونرجع لحبيبتي بالزربة صافي؟

دورات وجهها مجاوباتوش .. شد يدها كيبوس فيها ويتبوحط عليها كما كدير ليه 

ياسين: وصافي احبيبة خليني نمشي باقي شاد الطريق .. والله مغنجلس فشي اوطيل نيشاان للمغرب منوقفش ... خليني نمشي ناشط ماباغيش نمشي ونخليك هاكا ... غنرجع نساريك بلجيكا كاملة 

قالت : بتمرد) بلاش من هاد البيع والشرا بقايا معايا منقدرش نبقا هنا بووحدي كنخااف

ياسين : ونضيع ف 30 مليون ؟ تبغيني نضيع ف 30 مليون كاين شي حمار يضيع 30 مليون كاملة .. نبقا ناعس حداك تصرفي عليا نتي ؟ 

بدات تعرنن ليه وقالت : ياك كنخلصنا الدولة وكنتخلصو على لوليدات و الدواء فابور ليكوش فابور عايشين بيليك بحال ولاد هاد البلاد علاش باغي تمشي ؟

ياسين : ديك جوج دريال هي اللي غادي تعيشك كما بغيتي وحلمتي؟ باغا تبقاي فهاد النيفو وتزيدي لماحسن ولا تهبطي .. وتزيري وتبداي تسلفي؟ 

هبة : واكلين شاربين ناعسين بيخير .. خلينا حنا هنا غير نتشوماجاو مانخدمو ما نردمو ونتخلصو .. منبقاوش كاع نخدمو 

بداي يضحك وقال: تعيشي شوماج وضربي كروفيت روايال هههه الشوماج غيوكلك الروز ماشي بحال دابا كتحلي تلاجة تلقاي فيها لكلامار ولكروفيت هه ... الشوماج كَالت لك ... عرفتي ناس دبلجيكا الاصليين راه ماشي كاااااملين عايشين بحالك . . . درعها بيدو ) خليني لكبيدة ديالي نمشي نخدم على ولادي راه مزال تابعني مستقبل وراه بديت كنتزير ...قبل الزواج كنت عادي كنصرف على راسي دابا لا بدا كيبان ليا المستقبل.. والدراري ونتي وماتعرفي يجي التالت ... الصراحة عمرني حسيت بالمسؤولية تا لدابا ... ولاو يبانو بزاااف ديال لبلانات 

هبة : لا رد 

عطاها حنكو : يلاه بوسيني خليني نمشي فخاطري 

هبة : لا حركة

ياسين : وابوسيني باش نمشي ... ماسخيتش احبيبة مي راكي عارفة المزيرية اللي بدات تشدني

عقدات حواجبها وقالت : كتقول هاكا بلعاني .. راهم عندك فلكونط وديك النهار فلتات ليك قلتي شي واحد باغي شي رانج كحلة وكتقلب باش تشريها تديها ليه .. وقلت ليك خليه يشريها راسو وسكتي ... علاش باش كنتي غتشري رانج وتديها مالها رخيصة 

ياسين : شحااال كدير كااع مالها غالية ! 18 لمليون كدير وغتباع ب 30 ولا الى طارت 40 ... اش غدير ليك ديك 18 اللي مزاحماني عليها 

هبة : لهمم عندك لفلوس ومابغيتيش تقول ليا باش مانبقاش نكر على سير واجي للمغرب

ضحك وقال : واخا .. هاهما عندي ... مانحركوهمش باش يولدو نبقاو نسرطو فيهم تا نحزق انا ونتي ونرجعو للمغرب يصرف عليا لاصال! ولا لواليد حسن ما هوا كيموت علينا غايهزنا على ضهرو ... اااودي يا هبة بغيتي تجلسيني هنا وصافي .

هبة : جلس

ياسين: نجلس!؟

هبة : لا رد

تجبد على ضهرو حداها ويدو مور ضهرها وقال : هانا جالس ... فاش تبغي ماماك تجي شوفي شكون يخلص ليها الطيارة

تكا واحد القسم ورجع ناض 

ياسين : وصافي اهبة علاش كديري ليا بحال هاكا ... بوسيني خليني نمشي

هبة: زعما الى مابسكتش غتبقا

ياسين : مغنمشيش ونتي ماراضياش 

جلس يحزر فيها ويدور من هنا ومن هنا كيبوس حنكها ويداعب خدها على الله ترطاب حتى نيت رطابت وقالت بدلع 

هبة : ياك معتعطلش

ياسين : نمشي بلخف ونجي 

هبة : ولفتي سير واجي رجع عندك ساهل 

ياسين : الطيارة دغيا فالمشية اللي شوية

هبة : و... و. وماتنسانييييش 

ياسين : نسا سميتي ومنساش حبيبة ديالي راه نموت معاك ونموت عليك .. ونتي اللي كاينة 

فاقت لبنت حداهم كتركل وبدات تدي وتجيب فيديها .. تلفت عندها ياسين كيضحك وقال فوجهها 

- صدعتينا ... وا صدعتي لينا راسنا ... واش غير لماكلة لماكلة ولخرا مكتعيايش ... هاا؟ واش مكتعيايش .. هضري ههههه خراااايا نتي ... خرااايا وبواااالة وخاااايبة ... القرعاااا . وا لقرعاااا هههههه

هبة : بعد منها قالك قرعة لقرع هوا نتا 

ياسين: مالها ماشي قرعة ! (دوز يدو على راسها بحنان) والز الشعر هادي باينة غنلسقو ليها بيروك 

هبة : بزاااف عليك عاااندها الشعر غير زعرة بحالي مالي انا قرعة 

تلفت كيفرنس وبدا يبوس : نتي لفنون .. نتي حياتي .. ولاكن بنتك واااالو ... انا براامة عليا ولدي كيشبه ليا ونشبه ليه 

هبة : واسييير هههه ونتا غير كتسمعها دارت وااع كطير من بلاصتك باااز .. بديتي دير لفرزيات من دابا

هز حاجبو ونزل عليها بيدو لعنق هبط ليها راسها وقال

- كنضحك واش تيقتي .. نرجع نلقاهم مشابعينش ناكلك 

هبة : ههه نوض نوض مشا عليك عليك لحال 

ياسين : اري بوسة 

باستو فحنكو وطار عليها عضها وناض وقف كيوصي ويعاود 

ياسين : كلشي عندك هنا واجد ماتحتاجي تشري حتى حاجة والى وقعات شي حاجة عيطي ليا 

هبة : ان شاء الله 

باس ولادو بجوج وبدا كيضحك معاهم وعنقها بقوة وخرج كيوصي وغادي كيوصي . 

يتبع