ثاني اوكسيد العشق الجزء الثاني

2018

محتوى القصة

رواية ثاني اوكسيد العشق

[وهذا كان جزاء لي كيفكر فنتيجة افعالو بلا مايفكر فعواقب النتيجة، فحياتنا الحب ماشي هو كل شئ لكن حنا فزمان الناس كيفكرو أن الحب هو كل شئ، وهذ الشئ غلط، قبل مانفكرو فلي كنبغيو خصنا نفكرو فراسنا وصحتنا وراحتنا حيت هما أهم حاجة، لكن للأسف فاش انت كادوز من تجربة فاشلة وتعلم منها، كتبغي تنصح غيرك ولكن فاش كتجي تنصح لي غادي فبحال الطريق لي دزتي منها وشابعها ماغنقولش لكم ماغيسمعش لكلامكم هو أكيد غيسمع لك ويتصنط، لكن ماعمرو غيدير بنصيحتك، ابدا ابدا لذلك لي ماكيتعلمش من غيرو الدنيا كاتعلمو وتقريه حروبها، ولكن هدشي بعدما كيفوت الفوت طبعا، وفحياتك كتصادف شلا ناس دازو من تجارب كلها مشبوهة، كتلقاهم كلهم فقذو الثقة، ولكن وخا هكاك قليل لي تعلم من هذ التجارب، حيت كاين لي فقذ الأمل وكاين لي مازال عندو أمل بحالي أنا مثلا، انا متأكدة بلي غايجي نهار ونخرج من هنا، حيت أكيد انا ماغندوزش باقي أيام حياتي كلها هنا، ولكن امتى الله واعلم، الحاجة الواحيدة لي عارفاها دبا ومتيقنة منها هي أنني باغة ننعس هدشي بزاف عليا، أووف عيييت، (هذو كانو اخير كلمات قلتهم هدى قبل ماتفقذ الوعي، مع الأسف هي عندها مشكيل فالتنفوس، تقدر تحمل البقاء فغرفة مغلوقة بدون شراجم ل 20 دقيقة فقط لا أكثر)
📍عند شادي📍
هو.(وكيشاهد الحاسوب ديالو)هذي مالها مابقاتش كتحرك؟ زعمة تكون نعسات ولك بهذ السرعة وبلا ماتبدل بلاصتها غرييب؟ (شوية سمع اتصال قطع تفكيره، هز تليفونه ولقى شريكته فالخطط كتعيط)
هو.نعم؟
منال.هكا كاترحب بالناس؟
هو.هضري شنو بغيتي راني مشغول دبا
هي.مشغول باش ان شاء الله؟ واش خرجتي ديك البليدة من الحبس، اووبس بغيت نقول مراتك المستقبلية
هو.اه خرجتها وبلا ماتصدعيني دبا انا مامساليش للتفاهات ديالك
هي.ايوة رد بالك معاها اكيد غتحاول تهرب لك ماتحيدش عينيك عليها
هو.ماتخافيش راني حابسها فبيت وقفلت عليها الباب
هي.والشرااااجم ناااري باينة غضرب لينا كولشي فالزيرو
هو.ماتخافيش احسابليك انا بحالك راه البيت مافيه تاشرجم ذبانة مكضورش
هي.باغي تقتلها راه عندها...(الصمت)
هو.شنو عندها؟...

هي.(وكضحك)لا والو المهم انت دبا خليها تماك ماتمشيش عندها حيت غتحاول ضربك باش تهرب ولا شي حاجة خليها تالليل فاش تكون غارقة فالنعاس
هو.دبا نيت راها ناعسة
هي.وانت فين شفتيها ياكما دخلتي؟
هو.لا الغبية انا داير ليها كاميرة فالبيت
هي.سمع هي راه مناعساش غير كتمتل عليك باش تمشي عندها هاديك انا لي عارفها نتا خليها تالليل عاد تدخل عندها وخا، انا نخليك دبا خصني نمشي نحتافل
هو.باش غتحتافلي؟ وحبيب قلبك مازال مطيحتيهش فالشبكة؟
هي.بصح مازال ماطيحتوش لكن الشبكة طاح فيها واحد اخر
هو.(بإستغراب)ايوة بصحتك .. (قطع عليها الخط.. وجلس فكرسي وهز كاس ديال العصير شرب منه جغمة وبقى كيشوف فهدى لي الله اعلم واش ناعسة ولا غايبة ولا ميتة، (شوية تفكر كلام منال، «منال.سمع هي راها مناعساش غير كتمتل عليك باش تمشي عندها هاديك انا لي عارفها نتا خليها تالليل عاد تدخل عندها»
هو.(وكيفكر)ولكن هي ماعارفانيش داير ليها كاميرة كيفاش غتمثل، عنداك تكون وقعات ليها شي حاجة، أكيد لا ولكن خصني نمشي نتأكد باش نرتاح، (طلع شادي للفوق كيجري، وصل للغرفة حل الباب بالزربة ودخل، مشا ديريكت عند هدى)
هو.هدى
📍التتمة غتكون بلسان الكاتبة بدل البطلة 😉📍
هي.(الصمت)
هو.(وكيحرك فيها)هدى فيقي
هي.(الصمت ولا حياة لمن تنادي)
هو.(بخوف، هز يديه وهي تزلق منه وطاحت ضربات الأرض، حط صبعو تحت رقبتها ولقا عرقها مابقاش كيضرب، وهنا فين غوت شادي بأعلى صوت، هددددددى لاااااااااا)...

[هزها بسرعة بين ايديه وخرجها من الغرفة، وهبطها للتحت، وهو كيجري باش يديها للمستشفى، وينقذ حياتها، ركبها فالطموبيل ديالو وديمارا بسرعة كبيرة وشد الطريق ديريكت للمستشفى، وهو كيتمتم «حبيبتي انتي ماغيوقع لك والو غير صبري، كيهضر مع راسو ودموعو كتسيل على خدو، حيت كيبغيها بزاف ومايقدرش يتصور حياته بلا بيها، وبعد مدة 10 دقائق تقريبا، وصل للمستشفى، هز هدى دخلها وهو كيغوت « عااااااونووووووني البنت غتمووووت مابقاتش كاتنفس»]
الممرضة.(وجرات لعندو)اجي معايا أسيدي .. (تبعها لواحد الغرفة دخلها وبعدها طلبات منه الممرضة يخرج)
شادي.(مع راسه، انا السبب انا السبب، ياربي تحفظها وتحميها، انا هدشي كامل درتو غير باش تكون معايا، مابغيتش دبا توقع ليها شي حاجة وتمشي وتخليني، جلس فكرسي وتعابر الندم على وجهو (وباش نافعة الندامة الا فات الفوت)، ولا بحال شي حمق مابقى قادر لا يفكر ولا يتصرف حاجة وحدة كتهمو هي أن هدى تفيق، هز تليفون شاف فالساعة وهو يتفكر منال، ورجع ذاكرته للوراء ؤوقف عند كلام منال، شك اناها عارفة شي حاجة، خصوصا فاش كانت غتقول شي هضرة وبعدها سكتات، بقى شادي كيفكر فكلامها وكايحاول يعرف شنو كتقصد بهضرتها «واحد اخر طاح فالشبكة» ،
هو.(هذي اكيد مخبية عليا شي حاجة) تاصل بيها وبقى الهاتف كيرن وغير لثواني معدودة فقط وجاوبات)
شادي.(يلاه بغا يهضر وهي تقاطعو)
منال.تاصلتي باش تعرض عليا للعزاء (وشادي غير سمع هذ الكلمة تأكد ان منال فعلا عارفة شي حاجة)
هو.(بعصبية)نتي شنو مخبية عليا
منال.شنو غنكون مخبية عليك؟
هو.سمعي بلا ماتلعبي معايا هذ اللعب الباسل، لي فيا يكفيني
هي.ههههه بقيتي فيا، حنا فعلا خطتنا وحدة ومشاركين مسار واحد ولكن القوانين كتفرض ان عدووي خاصو يموت باش نقدر نعيش مهنية مع حبيبي
شادي.(وعقلو غيخرج من بلاصته)اشكتخربقي اشهادشي كتقولي
هي.كيما سمعتي اسي شادي غير ودع حبيبتك هاهاها وللأبد، ونزيدك راك انت لي قتلتيها حابسها فبيت ماتقدرش تنفس فيه وهي اصلا مريضة بالدقة خسااااارة الحبيب قتل حبيبته ولأول مرة فالتاريخ كتوقع هذي
شادي.(بعدما سمع هدشي طلق التليفون من يدو، وبقى ساهي ومصدوم كيفكر كيفاش ماعرفش معلومة مهمة بحال هذي على حبيبته الواحيدة)
📍عند هدى📍
الممرضة.(وكتضحك)وايني راكي عفريتا عبرتي عليهم بزوج...

هدى.هذا جزاء لي كيمد يدو على ممتلكات غيرو، دبا خليه نادم طول حياتو حيت تسبب فموتي والحمدلله بعدا مرضي السابق خلا ليا تجربة تعلمت منها كيفاش نبقى بدون حركة ونحبس انفاسي لمدة طويلة
الممرضة.ماعندي مانسالك والله ولكن انا دبا شنو غنقول ليه
هدى.قولي ليه البركة فراسك
هي.مستحيل يتيقني
هدى.راه ماغتقوليش ليه عندي غير مشكيل فالتنفوس وتسبب فموتي، انتي غتقولي ليه انني شربت كينا وقضات على حياتي
هي.دبا ماشي غير غيتيقني غيفوتها للهيه گاع
هدى.معلوم حيت غيقول انني نتاحرت وبسببه ايضا والحمدلله كون ماكانش واحد الشخص نقذ ليا حياتي كنت بصح نيت غنتخنق ونموت
هي.سي صفوان ياك
هدى.اه هو نفس الشخص لي وقف معايا هذي عام ومد ليا يد المساعدة وبالظبط في هذ المستشفى نيت
هي.انا مازالة عاقلة على داك النهار مزيان مسكين جا كيقلب عليك فنص الليل وماتخلاش عليك
هدى.(الصمت ومهبطة راسها وكتفكر فيه)
هي.شنو غاديري دبا اختي؟
هدى(ومسحات دمعة هبطات من عينيها)انا غنكمل هدشي لي بديت غانخرج من هنا ونقلب على صفوان وخا عارفة انه خارج البلاد، ولكن غانقلب على الأم ديالو وهي غتعطيني معلومات عليه واكيد غنقوليه انني خرجت من السجن وكنقلب عليه وديك الساعة غيرجع للمغرب، وانا متاكدة انه غيجي على قبلي حيت كيبغيني
هي.كنتمتى لك حظ موفق اختي
هدى.شكرا أختي نجمة، ودبا سيري عند ديك الحثالة وقضي عليه ومتنسايش تقولي ليه ان البوليس غيحققو فالقضية باش يعرفو البنت علاش ماتت
هي.وخا انتي تسناي هنا .. (خرجات، وهدى بقات كتستمتع بالنصر ديالها واخيراااا هيوغتهنى حيت ضربات 3 عصافر بحجر واحد، شدات حريتها وقضات على منال وشادي فدقة وحدة، حيت عرفاتو غيمشي يقول لمنال السبب الاول فموت هدى وهي غتقول ليه انها كانت عارفة بمرضها وهنا شادي اكيد ماغيتهنا تاينتاقم لموتها، ومع الأسف الأنسة منال غتسبق هدى للقبر، وبعدها شادي غيهروب ولكن البوليس غيقلبو عليه شبر شبر وهدشي بعدما مامات منال غاتعلن الحرب على السيد لي كان نهار وماطال داخل خارج مع بنتو وفالأخير قتلها ، وهدى فداك الوقت غتكون بين احظان محبوبها صفوان، وبعد كل هذ المعانات نهايتها غتكون سعيدة👌 
نجمة.(ودخلات)لا اله الا الله
هدى.شنو وقع؟..

هي.(ومستغربة)السيد غير سمع حس البوليس وهو يهرب مابقا تلفت ليا وماسول تاعلى جثتك
هدى.معلوم حيت عرف انه غيتشد اصلا عندو سوابق والبوليس الا مشاو تاحلو ملفه غيلقاو التخلويض لي كان كيدير فشركة صفوان
هي.كانظت دبا تهنيتي منه للأبد
هدى.بطبيعة الحال، ودبا خصني نخرج من هنا
هي.بلاتي نمشي معاك
هدى.لا نتي بقاي هنا حيت غتعطيني الطبلية ديالك
هي.علاش
هدى.شادي يقدر يكون مازال هنا انا نتوقع منه اي حاجة والاحتياط واجب، (حيدات هدى الشال ديالها وطلقات شعرها ولبسات الطبلية ديال نجمة وهزات واحد الكاسكيطة كانت فوق الكوافوزة لبساتها وبعدها ودعات نجمة وخرجات من الغرفة وهي مهبطة راسها، تاجهات ديريكت للمخراج ديال المستشفى وخرجات بسرعة تاسمعت)
الشخص.وقفي
هدى.(الصمت وقلبها كيضرب 180)
هو.فين غادة؟
هدى.(وكترعد، صافي مشيت فيها، دورت لعندو)
هو.بنتي دخلتوها لقاعة العمليات ولحد الآن ماكاينة خبار عليها
هدى.(وكتلقط انفاسها)سير للإدارة ديال المستشفى اسيدي انا نتهى الدوام ديالي، (قالت ليه هذ الجملة وكملات طريقها بالجرا وماوقفات تابعدات مسافة كبيرة على المستشفى،)
هي.اوووف كان قلبي غيخرج من بلاصته، شكرا ياسيدي ياربي حيت حميتيني من هذ الناس دبا تهنيت منهم وفمرة وحدة، والآن خصني نمشي ديريكت للڤيلا ديال أم صفوان وخا مصارني كيتقطعو بالجوع ولكن نصبر اللهم الجوع ولا القبر،) وقفات طاكسي وركبات فيه وبعدها نعتات للشيفور البلاصة لي غادية ليها وديمارا فالبلاصة وخا ماعندها تاسنتيم فجيبها، بقاو غاديين تاقربو يوصلو، وهنا فين توترات هدى حيت ماوجداتش شنو تقول للسيدة رجاء بعدما كرهاتها فيها منال وضربات عليها بصفة نهائية بسبب داكشي لي دارت لولدها)
الشيفور.هذا العنوان لي قلتي ليا اختي
هدى.اه شكرا اخويا (حيدات هدى واحد السنسلة كانت دايراها فعنقها ومداتها ليه)
هدىماعنديش الفلوس باش نخلصك خود هذي وبيعها راها غالية
هو.(شدها وكيشوف فيها، سبحان الله ربي استجب لدعائي
هدى.علاش؟
هو.اليوم عيد ميلاد مراتي وماكانش عندي باش نشري ليها كادو
هدى.باينة عليك مرضي والله حطك فطريقي باش تقدر تفرح مرتك بصحتك اخويا والله يدوم المحبة بيناتكم
هو.ولكن هي غالية بزاف ماعنديش باش نخلصك
هدى.ربي غيخلصني اخويا انت غير دعي معايا ربي يسر ليا اموري وانت ولا عليك، .. (نزلات هدى من الطاكسي وتاجهات للڤيلا)...

(وصلات ولقات الباب مقفول والحارس واقف حدا الباب)
هو.نعم الالة على من كتقلبي؟
هدى.بغيت السيدة رجاء ممكن تكلمها ليا
هو.السيدة رجاء مابقاتش ساكنة هنا هي غدرات الڤيلا مباشرة بعدما حجزو عليها يمكن تعرضو للنصب مهم ماعرفتش ابنتي 
هدى.(بخيبة آمل)وخا اسيدي شكرا، رجعات فحالها وهي متدمرة، ((شنو زعمة صافي مابقات طريق تودي لصفوان، مستحييييل شنو غندير دبا، باعدما ضحيت براسي وانا الآن صرت شبه ميتة ، مايمكنش نوقف بعد هدشي كله، ولكن فين غنمشي وكيفاش غنلقى لي كنقلب عليه؟)) شوية تفكرات رقم صفوان لي كان عندها،
هي.ااااه ياربي كيفاش قدرت ننسى اهم حاجة تقدر تساعدني، انا خصني نتاصل بيه، خاصو يعرف انني خرجت من السجن بسبب نفس الشخص لي نصب ليا الفخ لي دمر حياتي، هو خاصو يعرف ان داك الشخص لي ديما كايتاصل بيه باش يسمع صوته هو انا حبيبته هدى، (كملات طريقها وهي غطير بالفرحة بعدما كنت فاقذة الأمل،)
هي.الحمدلله ياربي، ماكيتسد باب تاكيتحلو بيبان خرين، حنا ديما عندنا اختيارات تقدر تبدل مجرى حياتنا خصنا غير نفكرو مزيان باش نقدرو نلقاوهم، بقاتت غادة كتقلب على التليبوتيك وتفكيرها كله كان على صفوان نعم ومن غيره الشخص لي هي مدينة ليه بحياتها، هو اليوم نقذها من الموت، حيت كون ماشي هو لي داها باش تعالج المرض لي كان عندها، كون دبا كياكلو عليها كسكسو، ولكن هذ المرة ربي حد الباس، .. بقات كتقلب على التليبوتيك تالقاتها ولكن كيفاش غتاصل وهي زيرو درهم، بقات واقفة حداها تاداز واحد الدري وقالت مع رايها طلب منه الفلوس على الله يكون عندو حس الانسانية ويعطيهم ليها)
هدى.خويا بلاتي
هو.معايا اختي؟
هدى.اه ممكن تعاوني
هو.مرحبا ولكن فاش
هدى.محتاجة ندير واحد المكالمة ضروري وماعنديش الفلوس باش نتاصل
هو.اه انا نعاونك عندي فورفي ديال 200 درهم وغير كايديو السوايع تقدري تاصلي
هدى.بصح الله يجزيك بالخير
هو.مرحبا هاكي . (شدات من عندو التليفون وهي كترعد كتبات رقم صفوان وتاصلات .. وبقا كيصوني شحاااااال عاد هزو وجاوب)
هدى.(بلهفة كبيرة)صفواااان
الشخص.نعم شكون معايا؟
هدى.(بعدما سمعات صوت مرا)شكون نتي؟
هي.انتي لي تاصلتي انا لي خاصني نسولك شكون نتي الالة؟...

هدى.واش لالة رجاء هذي
هي،(الصمت، شوية سمعات هدى شي تخرشيش وبعدها سمعات "حياتي شكون كيعيط" وبعدها تقطع الاتصال.... (عاودات تاصلات وهي مصدوومة ومخرجة عينيها بقى كيصوني وبدون رد، شنو زعمة تكون غالطة فالرقم!! اه ممكن (رجعات تأكدات من الأرقام، ولقات الرقم هو هذاك صحيح، 
هدى..ولكن أنا سمعت "حياتي شكون كيعيط" والصوت كان بحال ديال صفوان!! 
الشخص.صافي اختي ساليتي؟
هدى.(الصمت)
هو.وااااختي راه عندي مايدار
هدى..اه سمح ليا سهيت، شكرا اخويا .. (عطات ليه تليفونو، ومشا فحالو وهي بقات جامدة بلاصتها، وكضحك بلا ماترد البال لراسها، ((تزوج اه تزوج ههههه نساني صافي دبا ولا قاد بالمسؤولية وفاش كان معايا لا علاش دار فيا هدشي، واش بهاد السهولة قدر ينساني ولا اصلا ماكانش حاطني فبالو وماكانش كيبغيني كان كيكذب عليا داكشي علاش أجل العرس تا دوز 3شهور كان باغي يتفك مني وماشي بعيد يكون مشارك مع شادي تاهو ااااه ياربي علاش مافكرتش فهدشي هو من بعد داكشي لي وقع ماكلف راسو تا يجي يسولني علاش نصبت عليه ولا علاش خنتو كيما قال يعني تاهو لعب عليا، مستحيييل) .. شدات فالحيط ديال الشارع بعدما كانت شوية وطيح،، بقات غير مخرجة عينيها ودموعها كيهبطو منها شلال ماتيقاتش شنو وقع ولفين وصلات،، بقات على حالتها اكثر من 5 دقائق وبغات تأكد من شكوكها،)
هي.(وكتمسح دموعها لي مبغاوش يتحبسو)أنا خصني نعرف الحقيقة، والشخص الواحيد لي يقدر يوريني هذ الحقيقة هي رغد، هي لي كانت كاتوصل ليا الخبار ديال صفوان وتا شادي ومنال، وهي لي عطاتني رقم صفوان يعني غتكون عارفة انه مزوج دبا، اوووف هدشي بزاااف، كون غير بقيت محبوسة خير ليا من هد المصايب لي طاحت على راسي .. دبا كولشي تبدل .. وكولشي تقلب بعد هذ الحقيقة المرة لي سمعتها .. أنا ماغنبقاش صابرة خصني نمشي دبا عند رغد))،.. ونيت داكشي لي دارت، شدات الطريق لعندها على رجليها وبقات كنتمشى اكثر من 45دقيقة بلا ماتعيا حيت لي كيهمها هي تعرف واش داكشي فعلا صحيح اواش رغد خبات عليها .. بقات غادة تاوصلات لدارها، دقات الباب مرة وجوج وتلاثة عاد سمعات "شكون" وغير من الشرجم طلات عليها رغد، وغير شافت شكون وهي تخرج عينيها وهبطات عندها كتجري وحلات الباب وبقات كتعنق وتبوس فيها)
هي.على سلامتك اختي واش خرجوووك
هدى.اه
هي.دخلي مرحبا
هدى.بلاش انا جيت نطرح عليك غير واحد السؤال وغنمشي فحالي
هي.(وكدفع فيها باش تدخل)واتي دخلي عاد جيتي وبغيتي تمشي
هدى.صافي أ رغد ماشي وقت هدشي دبا لي فيا يكفيتي
هي.ياك لباس شنو واقع؟
هدى.صفوان...

هي..شوفي اختي انا ماعارفة والو .. لا على صفوان ولا غيرو بلا ماتجبدي هذ السيرة
هدى..علاه انا قلت لك نتي عارفة شي حاجة؟
هي..(ومتوترة)وشنو كاتقصدي
عدى.تزوج
هي..شنو
هدى..صفوان تزوج
هي..(وكضحك)واش نتي بعقلك السيد راه خارج المغرب وماكاين لا زواج لا والو
هدى..اه عرفتو خارج المغرب انا تاصلت بيه ومراتو جاوباتني وسمعتو بودني قال ليها حياتي
هي..ولكن مايمكنش هدشي مستحييييل
هدى..(بالغوااااات)ماتكدبييييييش راه قلت لك سمعت كووووولشي بودنيي
هي..(بصوت هادئ)هدى تهدني ماتغوتيش
هدى..(وشاداها بقوة فيدها)كانترجاك قولي ليا الحقيقة قولي ليا شنو كاين شهور وانا كنتعذب وفاش خرجت قلت الحمدلله صافي واخيرا غنتجمع مع حبيبي ولكن ماوقعش لي فكرت فيه غير خرجت لقيت مصايب اخرى كتسناني كثر من لي كنت فيها
هي..انا متفهماك ولكن هدشي لي كتقولي ماكاينش صفوان راه مامزوجش الله يهديك
هدى..(بصوت عالي)ررررررغد قولي الحقيقة شنو مخبية عليا ماكايبغينيش ياك غير قوليهاااا راه ماصعيباش اصلا صافي كولشي مشا وضاااع مابقى مايرجع ولا مايتصلح هنيني ورحميني قولي الصح راه حاسة براسي غنحماااااق واش كتسمعي غنحماااااق أهئ أهئ (طاحت فالأرض كتبكي وشادة راسها من كثرة الصدمة) ..حني عليااااا
هي.(بالغوات)صاااااافي سكتيييي
هدى.(وكلامها مخلط مع البكاء)لاااااا أهئ أهئ رحميني وخليني نرتاااح الله يخليك راني عييت عييييت
هي.بااااغة تعرفييييي الحقيقة وخاااااا انا غنقولها لك ودباااا نيييت 
هدى.(الصمت وناضت كتمسح دموعها)
رغد.(وشداتها فكتافها بقوة)وااااااش باغة تعررررفي فييييين صفوان؟ أااا؟ ايوة سمعي ألالة صفوان راه غير هنا مااااامشا فييييين، هو فالمغرب وغيييير هني بالك رااااه مامزوجش ولااااا يقدر يتزووووج أصلااا السيد من نهار دخلتي للحبس وهو مريض بالأعصاب وعاطيها غير للشرااااب والحشيش والگاروووو مابقاش كيتحكم فراسووووو هو تدمر وتشتت ويلا شفتي حالتووووو غتكرهي الدنيا بلي فيييييها حاااابس راسووو فالداااار بحال شي حمق ونيت حمق وتسطا حيت مابقاش واعي لداكشي لي كايديرو وجهو كله مخطط وضرابي من كثرة المشاكل لي كايديرهم فالملاهي على ود الكوكايين..)...

هدى.(الصمت بقات غير ساكتة ومصدومة وتا الدموع جمدو ليها فعينيها)
هي.واااش نكمل لك ولا نسكت خير ليااااا .. انا راه كذبت عليك حيت مابغيتكش تعذبي كثر من العذب لي نتي فيه فداك الحبس الكحل. خبيت عليك هدشي غير على قبل صحتك مابغيتش يوقع لك كيما وقع لصفوان لي كان ضحية شادي ويامااااا هضرت وشرحت ودافعت عليك ولكن ماتيقنيييش حيت السيد شاف كولشي بعينييييه كل يوم كنمشي نشوفو باش نطمأن على حالته لي كاتزيد تدمر يوم بعد يوم ولكن ماكايخلينيش نقرب جيهتو غير كيشوفني كيتعصب وكيبقى يضرب بلي لقاها قدامو حيت كنفكرو فيك وخلي عليك الا شافك نتي اشغيدير وسمحي ليا حيت درت هدشي وعطيتك رقم خويا لي فبرا وقلت لك راه ديال صفوان
هدى.(الصمت)
هي.علاش سكتي؟
هدى.(الصمت)
هي.(وكتحرك فيا)هدى هضري ماتسكتييييش
هدى.(الصمت)
هي.هضرررري قولي شي حاجة سبيني ولا ضربيني المهم هضري عرفت راسي ماعنديش الحق نخبي عليك ولكن مضطرة سمحي ليا
هدى.بغيت نشوفو
هي.عفاك ماطلبيش مني نديك عندو
هدى.(الصمت هزات راسها وشافت فيها بعينيها لي قربو يبكي الدم ماشي الدموع)
هي.(وعينيها مدمعة)ماغتحمليش أ هدى
هدى.ايلا ماشفتوش غنموت ديني لعندو ولا غاندير شي حاجة فراسي
هي.(الصمت)
هدى.كنحلف ليك الا ماديتينيش...
هي.(وقاطعاتها)وخا صافي انا غانديك عندو ولكن ماغنخليكش تدخلي عندو بوحدك انا غانكون معاك وخا
هدى.(الصمت ودرت حركة براسها زعمة اه وخا)...

رغد. تسنايني هنا ندخل نلبس جلابتي وانا معاك .. (دخلات رغد وهدى بقات واقفة كاتسنى وعلى اعصابها، وقلبها شاعلة فيه النار، ماعرفات واش تفرح حيت واخيرا بعد هذ الفراق كله غتلاقى بصفوان، ولا تبكي بعد هذ الحقيقة المرة لي سمعاتها، وبعد دقائق قليلة خرجات رغد تبعاتها هدى بخطوات متسرعة للطموبيل، ركبو وديماراو، والطريق كله وهما ساكتين، تاوحدة فيهم ماهضرات مع الآخرى، هدى الصدمة شتتاتها ورغد كتصوگ ويدها كيترعدو حيت خايفة من لي جاي، صفوان اكيد ماغيرحبش بهدى بصدر رحب، بقات كتدعي ربي يسر الامور وماتوقعش شي مصيبة،)) تاوصلو لواحد العمارة ؤوقفات رغد قدامها)
رغد.(بخوف)وصلنا
هدى.(بكلمات متقاطعة)وا ا ش هو و ك كاين ه هن ا
رغد.(ودورات كتشوف فيها)اه صفوان كيعيش هنا ياكما يحسابليك غاتجي وتلقايه فڤيلا طويلة عريضة
هدى.(الصمت، وتفكرات انها السبب فگاع داكشي لي وقع، حيت كون ماكانتش غبية وهبيلة گاعما توقع الوراق بديك الزربة ولكن اش تدير عقلها كان مع عائلتها) .. (هبطات رغد وتبعاتها هدى وقلبها قرب يوقف .. دخلو للعمارة ومشاو ديريكت للشقة ديال صفوان)
رغد.صافي وقفي هذا هو الباب
هدى.(الصمت ومن كثرة خوفها وشوقها بقات غير كترعد)
رغد.جاهزة تشوفي الشخص لي دمرتيه بفعايلك
هدى.(الصمت شافت فيها بنظرة حادة زعمة وقفي بركة ماتلوميني نتي اكثر وحدة عارفة شنو واقع) . (صونات رغد وبقات كتسنى ولكن تاواحد ماحل الباب، صونات تاني ووالوو كنسيس ماكيتحركش)
رغد.صافي يلاه نمشيو من هنا السيد ماكاينش
هدى.(الصمت وكتصوني بلا توقف)
رغد.(وشادتها فيدها)حبسي خلاااص قلت لك ماكاينش يلاه نمشيو من هنا راه الضلام قرب يطيح
هدى.باغة تمشي أختي سيري انا ماغنتحركش من هنا ربي لي عالم شحال ديال تمارة ضربت تاقدرت نوصل لهنا
رغد.بلا ماتحلمي تشوفيه ايكون دبا فشي ملهى كيتحشش وانتي هنا كاتسناي بحال شي هبيلة
هدى.هدشي ماشي شغلك هداك راجلي نتسناه ولا مانتسناهش شغلي هذاك
رغد.(وكضحك)هههه كان غيكون راجلك ولكن هو ماشي من نصيبك واش غتديه بزز؟
هدى.واش نتي صديقتي ولا عدووتي؟ اه ولا لي قادر يضحك على الناس ويكذب عليهم ويوهمهوم بشي حاجة ماكايناش اكيد غيكون عدووك مهم بسلامة عليك ابنت الناس لي بغيتو راني لقيتو..

رغد..شنو زعمة؟؟
هدى.(وقلبها محروق حيت رغد خبات عليها حالة صفوان).. دبا الله يعاوني ويعاونك
رغد.(وكتخنزر فيها)اصلا هذا بحرك نتي بوحد عوميه .. انا لي مسطية ودايرة فيك راسي ومن الفوق عاونتك وجبتك لهنا .. (يلاه بغات هدى تجاوبها بخو كلامها وهي طير من قدامها وحسبات الدروج ومابقات ورات ليها كمارتها، وهدى جلسات فالأرض ومربعة يديها وكتسنى صفوان امتى تطفا عليه الشمة باش يجي لدارو. بقات كاتسنى ساعة وساعتين تاطاح الضلام وكرشها كاتغرغر بالجوع وعلاش لا وهي نهار كامل كادور بجوعها، ولكن وخا هكاك صبرات ومافقذاتش الأمل بقات كاتسنى على نار تاوصلات 01:00 ديال الليل، والنعاس بدا يخطفها من كثرة العياء، ولكن صوت خطوات لي كتقرقب فالدروج وگضووها وفيقوها، وغير سمعاتهم وهي تنوض بطولها ؤوقفات، كتسنى)
البنت.(وكضحك بصوت بائعات هواء)ليا الشرف نجي معاك لدارك هههه
الشخص.(بكلام ثقيل)سيري من هناااا علاش تبعاااني
البنت.(ولصقات فالشخص)اممم لااا عفاك خليني معااااك همم
الشخص.(تقرب منها حيت ماكانش في وعيه وهدشي كامل وقع تحت انظار هدى لي واقفة فوق الدروج وكتشوف فيهم مسندين مع الحيط . وغير شافتو وهي تحيد الكاسكيطة ديالها وجرات لعندو بلا عقل، وصلات وشافت فيه شوفة وحدة، .. وبعدها رجعات خطوات للوراء))
البنت..عصام شكون هذي؟؟
هو.ماعرفتش .. (وجرها معاه للفوق وتاجهو للشقة ديال صفوان)
هدى..(بإستغراب)واش هذي دارك؟
عصام.(ودور كيشوف فيها)ياكما باغة تشاركي معانا الحفلة
البنت..(وجراتو من يدو)زيد قبل مايوقع بحال البارح فاش نسيتي السوارت لداخل .. (حل الباب ودخلو وبعدها سدو الباب وبقات ريحة الشراب وهدى على برا)
هي.(وكتحاول ترتب أفكارها وتستوعب شنو واقع) .. رغد قالت هذي دار صفوان؟ ولكن دبا هذو ... ياربي شنو مخبية عليا هذ السيدة وفين صفوااان وعلاش جابتني لهنا؟؟ وانا فين غنمشي دبا فهذ الليل ... بقات مستمرة فتفكيرها لي ماعندوش نهاية وهبطات من الدروج وخرجات فحالها ولقات ذبانة مكتحركش فبرا وعلاش لا وهي خارجة فوسط الليل والظلام، .. بقات واقفة وكتفكر شنو دير تاقررات ترجع عند رغد باش تفهم منها كولشي وهذ المرة ماغتفاكش معاها تاتقول ليها داكشي لي مخبياه .. تنهدات وسترجعات انفاسها ويلاه بغات تشد الطريق عند رغد وهي يوقفها شي واحد بلمسة يد من الخلف)
الشخص.هدى...

هدى.(ودورات)رجعتيي
رغد.جيت نديك للدار
هدى.(ودفعاتها)انتيي شنو قصتك معايا!!
رغد.سمحي ليا على داكشي ديال قبيلة
هدى.كنتي عارفة بلي هديك ماشي شقة صفوان!! ومع ذلك جبتيني
رغد.(بتوتر)لا صفوان كان ساكن هنا ولكن بدل العنوان مهم انتي دبا اجي معايا للدار وغدا غنقلبو عليه بجوج
هدى.هاااه احسابلك غنتيقك دوي من اللخر فين صفوان
رغد.تيقي بيا صفوان غير بدل العنوان غدا غنقلبو عليه واصلا قرب اصبح الحال يلاه نمشيو للدار دبا ترتاحي وبعدها انا معاك
هدى.(بعد تفكير قصير)وخا هاحنا غنشوفو هدشي ديالك في غيوصلنا
رغد.(تبسمات ليها، وبعدها شداتها من يدها وداتها للطموبيل ركبو وديماراو .. وكل شوية كدور تشوف فهدى شوفات غريبة .. وبقاو هكاك تاوصلو)
رغد.يلاه زيدي .. (هبطو من الطموبيل ودخلو للدار)
رغد.غيكون فيك الجوع انا غنمشي نوجد لك شي حاجة تاكليها وانتي دخلي دوشي باش موراها تاكلي وتنعسي
هدى.لا بلاش غير خليني هكا حسن
رغد.واش هكا غتلاقاي بصفوان غدا!!
هدى.صافي وخا
رغد.(وتبسمات ليها)الفوطة لداخل .. (دخلات هدى وسدات الباب ورغد مشات دخلات للكوزينة باش توجد العشا كيما قالت)
هدى.(ندخل ندوش وخا غير بلاتي عليا انا غنوري ليك الدوش لي ماعمرك شفتيه .. رجعات حلات الباب بشوية وخرجات بخطوات مهيلة .. ويلاه بغات تدخل للكوزينة وهي تسمع صوت رغد جاي من مكان ثاني .. تبعات الصوت تاوصلات لغرفة رغد لي كان بابها محلول شوية)
رغد.(وكتهضر بشوية)انا مابقيتش عارفة ما ندير راه الا وصل غدا وماشافتش صفوان غتشك بلي انا مخبية عليها شي حاجة
الشخص.*********
رغد..ياك انتي لي كنتي معاه انتي لي غتعرفيه فين كاين انا من الصباح وانا كنعييط ليه ولكن تليفونو طافيه وهادو ماشي عوايد شادي
الشخص.*****
رغد..اه داكشي لي قلت هو عرف هدى هربات كان على الأقل يعلمنا باش نعاونوه يلقاها وخا هي عندي أصلا راه شادي الا ماتزوجش بيها دبا غتوقع مصيبة وخلاص خلي عليك هدى الا عرفات ان صفوان بخير وماوقع ليه والو وخدام وكان ديما كيمشي عندها للسجن باش يزورها وحنا رشينا مديرة السجن باش تمنع زياراتو وتقوليه ان هدى رافضة تشوفو
الشخص..****** ******
رغد.هاهاهاها اه راه هي مسكينة إحساب ليها تخلا عليها وماكانش احساب ليها السيد ميت فحبها وعلى الأرض لي كتمشى عليه .. وقلت ليها راه ولا يشرب الشراب والكوكايين وبقى عاطيها غير للملاهي ليل ونهار
الشخص..*********
رغد.اه هكاك غندير خاص بعدا شادي غير يبان باش يجي يديها قبل مايوصل الصباح وتصدع ليا راسي تاني...

رغد.مهم أمنال نخليك دبا غنمشي نصوب ليها شي حاجة تاكلها قبل ماتخرج من الدووش
الشخص.*****
رغد.لا لا ماتخافيش هذ الغبية ماحدها كتييق أي حاجة كنقولها مايمكنش تديرها بيا .. (ضحكات وبعدها غلقات الخط ولاحت التليفون فوق الناموسية وبعدها دورات تاجهات للباب ومع الدورة كتصدم بهدى واقفة فالباب ومربعة يديها وكتشوفيها)
هدى.اييه زيدي
رغد.(وكترعد)شنو
هدى.يلاه زيدي كملي
رغد.(يلاه بغات تهضر وهي تخرج هدى موس من وراها)
هدى.واش لالة رغد كتلعب مع هدى ولا كذبت؟؟
رغد.(بخوف)بلاتي غير نشرح لك
هدى.(بصوت حاد)اشنو لي غتشرحيه ليااا أدوووي؟؟؟ ماحشمتيييش تافقتو بيناتكم تافرقتوني مع الراجل لي كان غيكون راجلي وبعدها دخلتوني للحبس باش الساحة تكون خاوية ليكم بوووحدكم؟؟ وتافقتو مع مديرة السجن باش تمنع زيارات صفوان .. هاااه دبا عاد فهمت عليها كانت ماكتحملنيش وبقات كتراقبني ليل ونهار وتشوف شنو كندير ومنعات الاقلام يدخلو للغرفة ديالي غير باش مانكتبش رسالة لصفوان ونصيفطها مع شي زائر الا طا يزور شي سجينة ياااك .. (كتصفق) براااڤووو ماعندي مانسااالكم طول هذ المدة عيشتوني فالعذاب وتامن صفوان مارحمتوهش زدتوه فالحساب .. ودبااحسابليه بلي انا مابقيتش كنبغيه وداك اللعبة ديال مانع الزيارات لي درتو عاد زدتو أكدتو ليه بلي انا فعلا نصااابة وخائنة ومابقاش عندي الوجه لي نتلاقى معاه بيه .. ولكن صافي جاات تالهنااا وحبسااات ودبا غتقولي ليا فييين هو ولا هذ المووس غنخشيه فقلبك باش يفييق ضميرك لي ناعس
رغد.(الصمت)
هدى.(وكتقرب منها شوية بشوية ومخرجة فيها عينيها)كننصحك تهضضري قبل ماتشوفي وجهي الثاااني .. (حطات الموس تحت رقبتها)
رغد.(وكتبلع ريقها)صافي صافي انا غنقولك فين كاين غير حييدي هذ المووس الله يخليك
هدى.(وحطات عينها فعينيها)يلاااه تنطقي
رغد.صفوان كاين ف ***** شارع **** قدام الڤيلا ديالو كاينة ***** يلاه خليني دبا
هدى.(وضحكات)هززي داك التليفوون
رغد.علاش؟
هدى.(بالغوات)إحسابليك بعد هدشي كله غنتيق فيييك هززييييه يلااااه...

رغد.(دارت يدها لي كترعد فوق الناموسية وهزاتو)
هدى.عييطي لمنال
رغد.منال!!
هدى.غتقولي ليها تعطيك العنوان ديال صفوان أووياااك تبيني ليها شي حاجة
رغد.صافي وخا .. (تاصلا وبقا التليفون كيصوني لمدة 7 ثواني وبعدها جاوبات)
منال.وي حبيبة نعم ياكما شادي تاصل
رغد.لا لا انا تاصلت حيت بغيتك تقولي ليا عنوان صفوان
منال.(بإستغراب)ياك نتي عارفاه علاش كتسولي
رغد.شكيت بلي بدلو مهم نتي غير قولي ليا باش نمشي نتأكد بنفسي حيت شاكة ياكما شادي تما
منال.لا محال يمشي لعندو مهم كاين ف (********)
هدى.(دارت ليها إشارة زعمة قطعي)
رغد.(وقطعات)صافي تأكدتي
هدى.(عطاتها طرشة فوجهها تاخلاتها تحسب الأيام لي بقاو ليها فعمرها)
هدى.سمحي ليا تليفونك وطموبيلتك غيمشيو معايا وانتي خليك هنا تسناي شي ذبانة ولا نملة تجي تحل عليك .. (خنزرات فيها ومشات خرجات بالزربة وسورتات الباب من برا)
رغد.(بالغوات)لااااااا عفاااااك ماتحبسينيش هناااا .. (هزات هدى السوارت ديال الطموبيل وشعلات التلفازة وزادت ليها فالصوت باش تاواحد مايقدر يسمع صوت رغد .. وبعدها خرجات ومشات ركبات طموبيلتها بالزربة وتاجهات عند صفوان وكلها شوق وأمل وعلاش لا وهي دبا عرفات ان صفوان ماتخلاش عليها إنما هديك كانت غير خطة ديال شادي ومنال وتا رغد لي طلعات غدارة بحالهم .. (كملات الطريق وهي كتبسم .. تاقربات توصل وهي يبداو دموعها يطيحو بوحدهم .. ماتيقاتش ان بعد هذ العذاب كله وهد المدة كلها لي دوزاتها بعيدة على صفوان غاترجع تلاقى بيه من جديد) .. وصلات وبعدها وقفات الطموبيلا وهبطات منها بالزربة، وضربات بالباب ومشات كاتجري تاجهات للڤيلا .. وقفات قدام الباب وبقات كتسرسر بقوة .. تاسمعات صوت)
الشخص.شكون
هدى.واش الڤيلا ديال سي صفوان هذي؟؟
الشخص.(وحل الباب) شكون لي كيقلب عليه فهذ الوقت؟
هدى.أنا عفاك اسيدي ممكن تعيط ليه الأمر ضروري
هو.وخا أبنتي اجي دخلي تسنايه لداخل .. (دخلات وسد الباب ومشا دخل لداخل الڤيلا وهدى بقات فالجردة وكدور في عينيها وكتسنى صفوان امتى يخرج وماكانتش الا ثواني قليلة وهو يخرج وغير شافتو قلبها ولا يضرب بالجهد وتاهو غير شافها تصدم وبقى مكوانسي فبلاصته بلا أي حركة...

[عينيها ستسلمو للدموع من حر الفراق ورجليها داوها لعند صفوان ديريكت وغير وصلات حداه وهي تلاح فصدرو الدفئ وحظناتو بكل جوارحها، .. (دازت دقيقة ودقائق وهدى باقى فوضعيتها معنقا صفوان بكل شوق وكتشهق بالبكاء فحظنه، فالوقت لي صفوان مادار تاشي ردة فعل تامن العناق ماتبادلوش معاها بقى طالق يدو عادي بحالا ماكاين والوو،)
هدى.(وكتمسح دموعها فحظنو وكتحاول تشكل جملة باش تخرجها بلسانها لي تلقط ومابقة قادر يتهجا أي حرف)
هي.تتت ووو توااااا تتت وو حشششش تك تتتوحشتتتتت ك أهئ أهئ (قالتها ونفاجرات بالبكاء للمرة الثانية، فشلات عليها ذاتها ودارت يدها مورا عنق صفوان شدات فيه حيت مابقاتش قادرة توقف على رجليها، هزات راسها كتشوف فوجه صفوان والملامح لي لطالما تواحشاتها، وبمجرد عينيها جات فعينو حسات بيدها تشللات من قوة قبضة صفوان لي شدها، اورك عليها بلا رحمة ولا شفقة تاولات حمراء ولمحات يدو كلها ولات مخطوطة بعروقو لي تنفخو وخرجو من بلاصتهم، ولكن هدى ماهتماتش ولا تألمات بالقدر لي شوفة وحدة من صفوان خلاتها تنسى الدنيا بلي فيها، تا ايقظها صوته لي زلزل عروق عروووق مخها،)
هو.(بصوت عالي)نتييييي شنووووو جااااابك عندي
هدى.(يلاه بغات تهضر وهو يقاطعها)
هو.(وكيخرج الهضرة بين سنانه)كماااارتك مانشوووووفهااااش
هــدى.( وشدات فيدو)عفااااك لاااا
صفـوان.(بصوت حــاد)راااااني علمتك
هدى.عفاااك غير عطيني فرصة باش نسرح لك
هو.(ماسمعش لكلامها تاجه بالزربة للڤيلا وحل الباب ..، وتبعاتو هادو بالجرا، ولقاتو يلاه غايسد الباب وهي تحط رجليها باش مايتسدش ومع الأسف حطاتها فالوقت لي تسد وحسات بضوو خطط ضلوعها حيت كانت لابسة غير موكاصان، غوتات غوتة وحدة وطاحت فالأرض كتقطع بالألام، ( وصفوان دخل وضرب بالباب وبقى موراه .. وجروحو القديمة رجعات تفتحات من جديد .. دور وجهو للجيهة الثانية وجات عينو فالمراية لي حدا الباب .. بقا كيشوف فراسو وعينو محمرة وحاس بالنار شاعلة فيه لداخل، بقى كيحاول يستوعب الأمور لكن كل أفكاره تشتتات وشوفته لهدى فقذاتو أعصابو ؤولا بحال شي بحر هايج ماكيعرفش الحدود، بقى كيقول كلمة وحدة)
هو.علااااااش علاااااااش، (جمع قبضة يدو وضرب المراية بكل قوته الشئ لي خلاها تهرس وتفرتت كلها فالأرض .. وهدى باقة برا ملازمة الأرض وكتمتم)
هي.ماضلمنيش الله يخليك ماضلمنيش (بقات كتعيد نفس الكلمات والدموع جمادو فعينيها تاسمعات الباب تحل اوقفات وهي فرحانة)..

هي.(وهزات راسها كتشوف فيه)عرفتك باقي كتبغيني وغاتحن فيا .(ومازال گاع ماكملاتهاش وهي تلمح يدو كاتنزف بشكل رهيب)
هي.(بخوف)ششسشنوووو درتيييي
هو.(شدها من شعرها بقوة ودخلها معاه، لاحها فالصالون)
هو.شنوووو جااابك لعندي بعد ديك الصدمة لي صدمتيني؟ واش جابوووك الفلوووس؟ ولا جيتي تشفاي فيا وتشفقي على حالتي
هدى.(وناضت كاتحاول تقرب منه)لاااا اناااا ماشي هكاااا عفاااك غير تسنط ليااااا وعطينييي فرصة نشرح لك
هو.(لصق وجهو مع وجهها)باااشمن كذبة جايايني هد المرة؟؟ وااااش مااااكفاااكش انك دمرتيني وشتتيني
هي.(وكاتمتم ماتحملاتش تكون قريبة ليه وماتلمسوش)عطيني فرصة وحدة نعاود لك الحقيقة وبعدها قرر واش تجري عليا ولا تقتلني
هو.(الصمت)
هي.انا مادرت والوووو، شادي لي دار كولشي
هو.(وبعد عليها وكيضحك)غرييييب أمرك كاديريها بيديك وكتلصقيهااا فغيرك، كوووني صرييييحة ولو غير مرة فحياتك عتارفي بغلطك وكذوبك انا فكلتى الحالتين كرهتك غير قولي الصح
هدى.(وحابسة دموعها)وحياااااتك انا بريئة شادي وقعني ففخو باش يخليني نتزوج بيه وهو لي تافق مع مديرة السحن باش يرفضو زياراتك ليا ماشي انا لي كنقوليهم مابغيتش نشوفك وظبا خرجني باش نتزوج به
هو.(الصمت وكيشوف فيها)
هي.كنحلف لك بالله وانا عندي دليل
هو.اشمن دليل؟
هدى.الدليل هو انني اليوم خرجت
هو.(الصمت)
هدى.شادي جاعندي للسجن وقال ليا غنخرجك ولكن بشرط واحد وهو تزوجي بيا ويلا رفضتي غتبقاي حياتك كاملة هنا وانا باش ناخد حريتي وباش نشوفك وافقت ولكن خططت نهرب منه ونيت داكشي لي درت هربت منه بعدما خرجني وجيت كنقلب عليك وها انا لقيتك
هو.(الصمت)وبدا يصفق (وبعدها نفاجر بالضحك)
هدى.(بإستغراب)علاش كضحك
صفوان.راه قلت لك بركة من الكذوووب واش ماكتعيايش
هدى.(وشدات فيدو)ثق بياااا هدشي لي قلت لك هو لي كاين وها انا قدامك دبا وكتشوفني شادي دخلني وهو لي خرجني
صفوان.(وبعدها عليه)نتي خرجتي بعفو ملاكي واش احسابليك انا ماعارفش
هدى.(بصدمة)شششنووووو
صفوان.كيما سمعتي الملك عطى العفو ل 356 شخص بشرط ميكونوش دخلو بتهمة القتل ونتي دبا جاية تقولي حگا ما حگا شادي خرجني حيت هو لي دخلني واش نتي شوية لباس فعقلك
هدى.(الصمت وهبطات راسها وحاسة بالدنيا دارت بيها)
هو.ودبا الا سليتي الكذبة لي جيتي على ودها خرجي من داري وعطيني بالتساع و ويااااك تعاودي تحطي رجليك هنا ولا توريكي كمارتك حيت ديك الساعة كانحلف لك موتك غيكون على يدي .. (قال هد الهضرة لي تصبات عليها بحال الجمر وبعدها شدها فكتافها ورماها برا بحال شي وحدة مكتسواش ودخل وسد الباب موراه)...

هدى.(هزات راسها كتشوف فالباب لي تسد ودموعها على خدها)نستاااهل .. نستاااهل .. ذنبي اني مقطوعة من شجرة .. ومشتاق نعرف أهلي .. ومن كثرة شوقي ولهفتي ليهم تدارت بيا .. وبيدي وقعت على وراق دماري .. دبا شنو ندير مابقى تاباب باش نطرقو .. كولشي تحل وتسد فمرة .. ودبا بقيت فالشارع .. وأغلى إنساس على قلبي مارحمنيش!! لكن من حقه .. هو وقف معايا وعاوني والأكثر من هذا كيبغيني لكن بغبائي خسرتو ويمكن للأبد .. (حطات يدها على صدرها) .. معليش ياقلبي، معليش دبا تبرا وتولف)
[صفوان ومسند على الباب .. ياريت لو فيا نبدل كولشي .. ياريت لو نقدر نتيق كلامها ونصدق كل حرف تنطقو.. ياريت لو نقدر نحل هذ الباب ونجري عندها ونعنقها ونقول ليها لأ درجة تواحشتها .. لكن هدشي مستحيل .. فالوقت لي كان عليا نضرب عليها وننساها انا تبعتها للسجن ويوم ورا يوم كانت كترفض شوفتي، ومع ذلك ستمريت كنت متمني غير نشوفها شوفة وحدة، لكن حرماتني منها .. وربما انا حبيت الشخص الغلط اااه الشخص الغير مناسب لقلبي .. ولكن شنو ندير بالرغم من كولشي هي الواحيدة لي دات قلبي وتفكيري .. ودبا ماعرفتش واش نتبع قلبي ونحل ليها هذ الباب ولا نتبع قلبي ونكمل بوحدي باش مانتصدمش مرة أخرى)
[[ هدى .. كون غير بقات شي حاجة نديرها باش نتبت ليه انني فعلا بريئة وحبي ليه كان صادق .. شهور وانا كنتعذب واللحظة لي تمنيتها باش نجي نعاود كولشي لصفوان ونحاول نرجع المياه لمجرها وصلت ليها لكن بيدي حرقتها !! (دورات كتشوف فالباب)
هي.ياريت لو هذ الباب يقدر يتحل ياريــت .. (ناضت من بلاصتها) .. لكن هدشي فالأحلام .. أنا غير مرحب بيا هنا وماشي غير هذ اليوم انما للأبد .. ربما قلبي خصني ندفنو هنا باش ميبقاش يتعلق بالجمرة لي تحرقو .. (تبسمات فعز حزنها وتاجهات للباب وماعرفاتش فين تمشي فنص الظلام وخا قرب يصبح الحال لكن فكلتى الحالتين غتبقى متشردة فالشارع .. دارت يدها تحل الباب لكن وقفها صوت)
صفوان.فين غادة فهذ الوقت
هدى.(ودورات لعندو)نعم!!
هو.تقدري تبقاي هنا تا تلقاي فين تمشي .. (ومشا دخل .. (هزات يدها ومسحات دموعها .. وفاللحظة لي كانت فاقذة الأمل تغيير كولشي .. وهذ الباب لي تحل كيعني ليها بزاااف .. تاجهات للڤيلا بخطوات ثقيلة .. ودخلات ولقات صفوان فالصالون
هو.طلعي للفوق وسيري للبيت لي على اليمين
هي.(حذرات راسها ماكتشوفش فيه)وخا شكرا!! .. (طلعات للفوف ومشات للبيت لي قال ليها دخلات وسدات الباب وبعدها نفجرات فدقة ودخلات فنوبة بكاء قاتلة حطات يدها على فمها باش صوت بكأها مايتسمعش)
[[صفوان طلع فالدروج وشبه متدمر .. وحاس بقلبو كيتقطع من جيهة هدى وماقادر يدير والو .. مع الأسف الظروف كتفرض راسها صفوان وهدى خصهم يكونو بعاد وخا هما قراب .. بقا واقف قدام باب الغرفة لي دخلات ليها وبقى كيتخيلها قدامه .. مشتهي يعنقها ويبوسها ويشم ريحتها .. مشتهي تكون معاه باش النار لي شاعلة فيه تطفى مشتهي يقول ليها قداش هو كيبغيها ومتعلق بيها لكن هدشي فالأحلام احساب ليه قلب هدى حجر .وماحاطش فبالو أنها كتألم بحالو وكثر منه..

[[بقى حدا الباب لمدة 5 دقائق .. تاعقلو غلب قلبو ..وبعدها مشا دخل لبيتو وكمل نعاسه بدون أي أفكار ثانية .. وهدى بقات على نفس حالتها .. تامبقى عندها جهد للبكاء ومشات للناموسية وحطات راسها على المخدة وغمضات عينيها وخا النعاس ماقادرش يجيها .. (وبعد ساعتين صبح الحال اوصل الصباح .. 06:00 .. الجوو كان هادئ وهدى ماعقلاتش امتى ستسلمات للنوم ونعاس .. لكن الأصوات لي كانو خارج غرفتها فيقوها .. ناضت من بلاصتها وهي مستغربة شنو هذ الصوت .. حلات باب الغرفة وخرجات]]
صفوان.تاللإجتماع ديال اليوم ونشوفو
((زادت بعض خطوات للقدام اوقفات فوق الدروج .. لمحات صفوان واقف مع شي واحد وكيهضرو بيناتهم وفيديهم عرام ديال الوراق))
الشخص.انا ما الي دخل بهاي الصفقة الأحسن هاي المرة ما اتدخل لحتى مايصير شي وبعدين تجي تقولي شوف خططتك ياسيد رامي لوين وصلونا
صفوان.اودي عولنا عليك بكري
رامي.(ونتبه لوجود هدى)صفوان لك من هاي البنت؟!!
صفوان.اشمن بنت؟؟
رامي.لك هاي اطلاع ع الدرج .. (وكيشيير ليه)
صفوان.(وكيشوف فهدى فنظرة حادة)والو ماشي شي حاجة مهمة ماتشغلش بالك مهم يلاه قبل مانتعطلو على الإجتماع
رامي.اي ماشي .. (ومشاو خرجو وهدى بقات واقفة بلاصتها)
هي.فعلا عندك الحق ماشي شي حاجة مهمة .. (يلاه بغات ترجع لغرفتها وهي تلمح باب غرفة صفوان مفتوح .. وبلا ماتحس داوها رجليها للبيت .. دخلات وبقات كدور عينيها من قنت لقنت .. شافت صورة معلقة فالحيط .. ومشات حداها .. كانت صورة صفوان مع رامي .. وفهمات أنهم صحاب والكلام لي دار بينهم كيدل على انه خدام معاه فالشركة)) .. (مشات جلسات فوق نموسيتو وبقات كدوز يدها على المخدة ديالو)
هدى.انا شنو ندير باش تييقني أ ؟؟ .. (هزات المخدة وعنقاتها وبقات كتشم فريحت صفوان ومازال گاع ماشبعات منها وهي تسمع) 
الشخص.انسة هدى الفطور واجد
هدى.(وهزات راسها بالزربة)نعم؟؟
البنت.كنعتذر الا خوفتك جيت نقولك ان الفطور واحد
هدى.(بإستغراب)ليا انا؟
هي.نعم سي صفوان قبل مايمشي علمني نوجد لك الفطور حيت هو وسي رامي ماكيفطروش فالدار كايمشيو تاللخدمة
هدى.(وكتبسم)صفوان قالك وجدي ليا الفطور؟...

هي.نعم قبل مايمشي
هدى.وخا هانا جاية .. (تبسمات ليها الخدامة لي كانت بنت صغيرة تقريبا 24 سنة وشكلها كان أنيق وخا هي غير خدامة . (حطات هدى المخدة وبعدها مشات هبطات للتحت .. ولقات الطبلة عامرة اي حاجة تجيك على البال كاينة)
الخدامة.أنسة هدى الحمام من هنا
هدى.(ومستغربة من الطريقة لي كتعاملها بيها الخدامة)وخا شكرا .. (دخلات غسلات وجهها ويديها ومشطات شعرها لي كان مخربق وبعدها خرجات وجلسات فالطبلة)
الخدامة.عصير ولا قهوة؟
هدى.قهوة وشكرا .. ممكن نعرف شنو اسمك؟
البنت.نعم أنا ندى
هدى.سمحي ليا الا سولتك وخا تقولي ليا صفوان امتى جا سكن هنا؟
ندى.تقريبا 6 شهور
هدى.يعني من ديك الساعة وانتي خدامة هنا
ندى.اه
هدى.وخا دبا اجي جلسي خلي عليك داكشي
ندى.(الصمت وجلسات)
هدى.الراجل لي مع صفوان شكون؟
ندى..رامي صاحبو السوري جا سكن فالمغرب ودار شركة هو وصفوان وخدامين فيها بجوج بيهم
هدى.يعني تاهو ساكن هنا
ندى.اه
هدى.والأم ديال صفوان فين هي؟
ندى.السيدة رجاء مسافرة خارج المغرب
هدى.وماعرفتيش علاش؟
ندى.لا الصراحة ماعارفة عليها والو غير سمعت سي صفوان وسي رامي هضرو عليها واحد المرة وقالو مسافرة
هدى.واش ماكيجيش عندهم تاشي واحد زعمة شي راجل ولا شي مرا؟
ندى.لا تاواحد اصلا علم العساس باش مايدخل تاشي واحد
هدى.وماعرفتيش علاش
ندى.لا
هدى.وهذ المدة لي كنتي هنا كيفاش كيبان لك صفوان؟
ندى.من اي ناحية؟
هدى.زعمة التصرفات ديالو كيفاش كيبانو لك
ندى.كنظن كان داز من واحد المرحلة صعيبة بزااف وكان ماكيخرجش من بيتو وسي رامي هو لي وقف معاه
هدى.اه وخا صافي شكرا بإمكانك تمشي دبا
ندى.انا فالكوزينة الا حتاجيتي شي حاجة .. (مشات ندى وهدى بقات غارقة فتفكيرها)...

هدى.تاهو كان كيتعذب .. الله ياربي الله كي ندير نبيين لهذ السيد انني بريئة وبصح كنبغيه!! .. (انا مغنقدرش نتحمل نبقى بعيدة عليه خصني ندير شي حاجة ونتحرك ماحدي هنا .. ((شربات قهوتها وكلات طرف ديال الكيكة وبعدها مشات طلعات لغرفتها وكتفكر شنو غادير قبل مايجري عليها صفوان من الڤيلا .. حيت أكيد ماغيتحملش يبقى هو وياها تحت سقف واحد .. حطات راسها على المخدة وبمجرد ماوصلات ليها داها النعاس من كثرة الجرا والعيا ونسات التفكير ديالها)))
[بعد #مرور 10 ساعات]
صفوان.(ودخل للڤيلا)هههه شي نهار غتورطنا معاه
رامي.لا ياسيدي انا بعرف حالي شو عم ساوي
هدى.(لي كانت فاقت وجلسات فالصالون شافتهم دخلو وناضت بالزربة من بلاصتها وكتشوف فصوان لي ماخسر عليها تا شوفة .. ومشا طلع للفوق أما رامي جا يسلم عليها)
هو.(وكيتبسم ليها)اهلا وسهلا فيكي
هدى.(وسلمات عليه باليد)سلام .. (وبقات كتشوف فعويناته لي كيسحرو ..)
رامي.(وغمز ليها)صفوان خبرني عنك كثيير
هدى.(بإستغراب)انا !!!!
صفوان.(بنبرة صوت حادة)رااامي
هو.(وهز راسو كيشوف جيهة الدروج)نعم
صفوان.الملف لي عندك جيبو ليا
رامي.اي طيب ماشي لكني جاي .. يلا بعتذر منك بعدين بنحكي .. (ومشا طلع وخلا هدى كتسأل شنو زعمة غيكون قال ليه صفوان، عليها؟؟) .. رجعات جلسات بلاصتها وحاسة انها غير زايدة تاواحد مامهتام لأمرها ولكن شنو دير هذا مصيرها اللهم هكا ولا تمشي لشي بلاصة ويشدها شادي مرة أخرى) .. شوية لمحات ندى خارجة من الكوزينة وفيدها بلاطو فيه جوج كيسان ديال القهوة)
هدى.واش هدي ليهم؟
ندى.اه فهذ الوقت فاش كيجيو من الخدمة كايبغيو يشربو قهوة
هدى.اه صافي انتي غير رتاحي انا غنديها ليهم
هي.(ورجعات خطوات للوراء بعدما كانت غطلع فالدروج)وخا 😊 .. (تبسمات ليها هدى وبعدها مشات شدات من عندها الپلاطو وطلعات تاجهات لغرفة صفوان .. ويلاه بغات تدخل وهي تسمع)
رامي.بس حراااام فكر اذا كانت البنت مظلومة وقتا شو بدك تساوي؟
صفوان.هذ الموضوع حدو هنا مابغيتش نهضر فيه مرة اخرى...

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.