البارون الأعظم الجزء 87 صباح الخير يا وطن

من تأليف ابتسام قراري
2018

محتوى القصة

البارون الأعظم الجزء 87 صباح الخير يا وطن

في اليوم التالي / الساعة الخامسة صباحاً / المغرب

أخيرا إقترب المركب من مرسئ المغرب ، الشمس مزال ماشرقات فقط النور ديال الفجر لي كان مضوي بضوء أزرق رمادي مريح .... نورسين وروعة كانو ناعسين فغرفة الصيادة لي خصصها ليهم مرزوق بينما تجنب يحتك معاهم ولا يقلقهم خوفا على روحو .. ماهي مرت البارون دابا لي غير سميتو كاتخليه يرجع بذاكرتو سنة ونصف للخلف كايتفكر الكابوس لي عاشو فاش اكتشف ان البارون هو نفسو جبل ، كان غادي يفقد حياتو فاش وصلو لإيبيزا ، ماعمرو ينسا لقتلة دلعصا لي كلاها من عند رجال جبل بسبب المشاكل لي دار ليهم مرزوق فيخت الجوهرة .

كان كالس فغرفة القيادة وداير رجل على رجل فوق الأجهزة ديال التحكم بإهمال لابس سوفيطما ديال سماطي بيضاء وفوقها سوميج أزرق مرسومين فيه أشجار نخيل الكوكو بينما كرشو سابقاه وكايمدغ مسكة وبين أصابعو سيجارة ديال الحشيش وكايدخنها بإنتشاااء وكايغني بصوتو النشاز وهو مغمض عينيه على تجاعيد الزمان :

- شوفو بنت القبطان دارتلي بلان وهامااااا .. راني حالف هاد الليلة لا فراااااات ... عاشرتها بالنية ودرتلها شان يامااااا لقيتها كاتعشق غير الحبااااااات .

كان حداه كالس شاب وهو لي متكلف بمهمة القيادة وكايحاول يتحكم فأعصابو بسبب صوت مرزوق لي كايركب فبنادم الأعصاب حتى قاطعو صوت تلفونو كايصوني ففتح عينيه بكسل لكن غير شاف رقم المتصل بقوة الخلعة طاح من فوق الكرسي ورجع ناض بسرعة وهو كايترعد كولو وخايف يفتح الخط :
- يااربي اش داني نهزهم معاياا... اشنو غادي نقول ليه دابا؟ .

رد عليه الشاب لي كايسوق :
- شكون هو اسيدي؟ .

فغوت مرزوق بغضب :
- ديها فسوق راسك .. قربنا نوصلو شوف فطريق حداااك

قلب الشاب عينيه بغيظ بينما فتح مرزوق الخط وقال بصوت غااية في الرقة والنعومة :
- ألو .. سيدي عاش من سمع صوتك ...
فتحت روعة عينيها على صوت طائر النورس كان واقف وكاينقب بمنقارو الأصفر زجاج النافدة المدورة .. وكأنه كان مصر يفيقها باش تشوف جمال داك المنظر قبل مايفوتها .. زولت روعة الغطاء من فوقها ..ناضت و برجليها الحفيانين تمشات معتمدة على عكازها حتى لعند النورس لي غير شافها طار وعلى فالسماء مخليها مندهشة من داك المنظر لي قدام عينيها ...

بنايات كايبانو بويض و صغارين وجبال شامخة خضراء محيطة بالمرسئ من بعيد بينما طيور النورس تحلق وكأنها تستعد لملئ بطونها الصغيرة بداكشي لي جابوه الصيادة معاهم من سمك صغير و قشريات .

إبتسمت روعة بلاما تشعر و همست بصوت ضعيف:
- صباح الخير ياوطن .

مررت يديها على خصلات شعرها الأحمر الطويل ثم مسحت وجهها بيديها باش تتوكد وتحيد عليها ديك لغمامة لكحلة لي عاشت فيها طول الليل من بكاء وألم فكل جسمها .. تنهدت فاش جاء على بالها جبل مع باتريسيا ولعنت عقلها لي فكل جزء من الثانية يستحظر صورته ويعصبها ...حاولت تطردو من بالها ثم ‏ضارت عند نورسين باش تفيقها ولكن لقاتها فايقا وكاتشوف فيها فإبتسمت روعة بهدوء وقالت :

- صباح الخير ؟؟

إبتسمت نورسين وزولت لغطاء من فوقها ثم ناضت وهي كاتقول:
- صباح النور .. غير من ديك الإبتسامة لي على وجهك باينا وصلنا .

وقفت نورسين حدا روعة وزينت عيونها بشوفت داك المنظر من سرجم وقالت من بعد .
-ماتوحشتيش لبلاد ؟.

غمضت روعة عينيها وهمست بهيام :
- توحشت بلادي وارضي وأرض جدادي وحبابي وأرض أهلي وصحابي .. ماتصوريش شحال متشوقة نلمس ترابها بيدي .

غسلو وجوههم ورتبو لبلايص لي نعسو فيهم ثم طلعو لبنات بجوج لأعلى المركب وغير تخطاو الباب ضربت فيهم لفحة باااردة من نسيم الصباح . كان القبطان مرزوق داخل غرفة القيادة وغير شافهم خرج لعندهم وهو راسم على ملامحه العجوزة إبتسامة صغيرة وقال:
- صباح الخير .. نعستو مزيان ؟؟

إلتفتت لعندو نورسين وبادلاتو نفس الإبتسامة ثم قالت : 
- اكيد اسي مرزوق .. شكرا بزاف .

قلبت روعة عينيها بغيظ ومابغاتش ضور لعندو وقالت:
- مكاين لاش تشكريه .. ماهزناش فابور .

ايه ماشي عطاتو خاتم كايسوى لملاين .. لولاه لكان قلبهم فعرض البحر ، مرزوق كايعشق لفلوس ومستحيل يهز شي حد في سبيل الله . ماعمرها تنسا شنو دوز عليهم فيخت الجوهرة لولا جبل ورافاييل وياسين لي كانو واقفين ليه فالحلق .. لكن نورسين ماعاشتش ديك لفترة معاهم باش تعرف ..

ضحكت نورسين بتصنع وقالت:
- هه ماتديش عليها مازال مدوخة بنعاس .

رفع مرزوق أكتافو بغير إهتمام وقال بصوته الرخم:
- ماعليش يمكن روعة مازالة شادة فقلبها مني ...

شافت نورسين فروعة باش تشرح ليها لكن الأخرى دارت ليها إشارة بعينيها كاتعني من بعد فكمل مرزوق وقال وهو كايشوف فساعة يديه :
- 5 دقايق وغادي نكونو فالمرسئ وجدو راسكوم باش تهبطو .

اش عندهم مايوجدو من غير لحوايج لي لابسين ماعندهم حتى حاجة .. وكيما قال مرزوق ماهي إلى دقائق ووصل المركب الكبير الأبيض للمرسئ وهبطو منو الصيادة هوما الأولين وأمنو الطريق للبنات هبطو بلاما يشوفوهم شرطة البحرية الملكية للصيد البحري لي مكلفين بمراقبة مراكب الصيد واش هازين معاهم شي أسماك غير مسموح بإصطيادها يعني ففترت إستراحتها البيلوجية ..او مخالفات فقانون المملكة للصيد .

كانت أول خطوة للبنات فبلادهم روعة كانو دموع فعينيها بقوة الفرحة .. مجرد نسيم وهواء وطنها حسسها بلي وصلت لدارها وعنقت واليديها و خوتها ماتنكرش أنها شمت ريحتهم وكأنهم حداها .. لكن فرحتها مكاتكملش فاش كاتفكر أنه مابقالها عائلة عندمن تمشي ، يمكن الى شافوها يسبوها ولا يضربوها ويجريو عليها وغير هاد الفكرة كانت كاتحز فقلبها وكاتجيب ليها البكية وكاتحس بالضلم والإقصاء .. ضارت عند نورسين وقالت بصوت ضعيف :

- فين غادين نمشيو ؟

شافت فيها نورسين وقالت بهدوء :
- ماشي هادي كانت فكرتك ؟ .. إذن فرحي راه عام ونص ماجيتي للبلاد .

تقدمت روعة بعكازها لي لقات صعوبة انها تتحرك غير بواحد لكن حاولت تتأقلم بيه ... وصلات لحدا كرسي وسط المرسى وكلسات وكلسات حداها نورسين مقابلين مع ابصيادة والعمال لي كانو كايخرجو الأسماك من القوارب فكوربات كبار وكايصليو على النبي الى كان الزاد كثير ..

تنهدت روعة وقالت بهدوء :
- كانضن هاكدا كانت حالتك فاش رجعتي للمغرب بعد 8 سنوات من الغربة والحبس .

عضت نورسين على شفتها السفلية وحاولت ماتبكيش غير رجعت ليها دوك الذكريات فقالت وهي كاتشوف فالمدى البعيد :
- كان جسمي محبوس ولكن روحي كانت حرة .. الجسم فبلد والروح فبلد .. و ياوحشة الروح بل ياغربة الجسد

شافت نورسين فروعة وكملت :
-الوطن هازينو فقلوبنا دائماً فينما مشينا ... هو زادنا ونورنا الداخلي لي كايضوي لينا الطريق فالغربة. ودابا كايبقا السؤال المطروح من بعد مارجعنا للبلاد .. فين غادي نصدو الراس .. فين غادي نمشيو .. أنا ماعندي عائلة عندي فقط الأصدقاء وكلهم كايعرفو أسد ولا عندهم صلة قرابة معاه

ضحكت روعة وقالت بسخرية :
- وجيوبنا خاويا .. اش بان ليك نضورو على لقهاوي نسعاو ..
رفعت يديها وكمشت ضهرها بحال شي عحوز وكملت بسخرية :
- ‏ لله يامحسنييين لله .. عاونو هاد المسكينات لي هربو من الڤيلات والبدخ لله ولفلوس وسيارات ... لله عاونو هاد لمكلخات لي ماعرفوش يهزو تاحوايجهم وأوراقهم قبل مايهربو بهاد الطريقة الغبية لله .

ضحكت نورسين وكملت عليها وهي كادير بحالها :
- هههه لله يامحسنيين .. عاونو هاد العميلة الإستخباراتية لي خلات بطاقتها الوطنية وخرجااات وماهزات معاها تارياااال لله ... 
توقفت وقالت بعدما تفكرت حاجة مهمة : ‏
- ‏ولكن بلاتي لقيتها عندي واحد الحل !! .

إعتدلت فجلستها وزولت حلقات كانو فودنيها ديال الذهب وسلسلة رقيقة حتى هي ذهب من عنقها وخاتم رقيق كان فيديها حتى هو ذهب وكورميط رقيق فمعصمها وقالت بحماس :
- هادو غادي يعاونونا واخا القيمة ديالهم غادي تنقص فالبيع ولكن على الأقل غير نكريو شي دار علاما نرجع لخدمتي ونجدد أوراقي ونخرج لفلوس لي عندي فالبنك .

تنهدت وكملت : ‏
- ‏تابعيني شلا مصاريف ..
ورجعت إبتسمت وقالت وهي كاتلمس بطنها :
- ‏ولحبيب ديالي غادي يحتاج لحويجاات ولرضاعاات و لي كووش .

إبتسمت روعة لا شعوريا وردت عليها:
- إنشالله يفكك ربي على خير ويفرحك بشوفتو .

رفعت نورسين عينيها فروعة وقالت:
- أمين يارب ويرزقك حتى نتي فالقريب العاجل 

قلبت روعة عينيها بسخرية وقالت :
- ‏هه ماضحكينيش الله يخليك .. على كل وحتى أنا غادي نعاون فالمصاريف علاما تبرالي رجلي ونحيد هاد الجبيرة ونوض نقلب على شي خديمة زوينة باس نكمل العلاج لماما .. 

لمست العقد لي هداه ليها جبل بيديها بحنين ثم زولاتو من عنقها وقالت وهي كاتحطو فيد نورسين مع ذهبها:
- عندي هاد العقد لي شراه ليا جبل بمناسبة زواجنا .

بسرعة رداتولها نورسين ليديها وقالت بإعتراض :
- لا .. روعة ضيعتي الخاتم ديال زواجك وخلصتي بيه الرحلة... ماضيعيش حتى هاد العقد .. باينا عزيز عليك بزاف وعندو قيمة عندك

إبتسمت روعة بوهن وقالت وهي كاتلمس العقد بأصابعها الرقيقة :
- أحب من شئت فأنت مفارقه .. 
ثم علات عينيها فنورسين وكملات : ‏
- ‏كل شئ كانت عندو قيمة فحياتي طار وختفى ماجاتش غير على هاد العقد .

قاطعهم من الخلف صوت هتاف مرزوق وهو كايقول :
- ااه سيدات الجميلات مزيان ملي لقيتكم مازالين هنا ..

قرب لعندهم وكمل :
- أنا عارض عليكم للفطور هاد صباح 

حركت روعة راسها بالنفي وقالت :
- لا مكاين لاش .

لكن مرزوق قال بإصرار:
- والله ماتردوها ليا فوجهي .

أصر مرزوق حتى داهم معاه بسيف لأول قهوة فالمرسئ ديال الشوايات الحوت وطلب ليهم ماا ألذ وطاب من أنواع السمك ومعاه براد ديال أتاي بالنعناع مشحر .. دخلو وخرجو فداك لحوت كاملين حتى شبعو وحمدو الله على نعمته .. 
مسح مرزوق فمو بيديه وقال :
- باش تفطر فصبح بالحوت مشوي خصك تكون مغريبي . 

قلبت روعة عينيها بملل وردت عليه:
- بغيتي تقول تونسي !.

ضحك مرزوق برحابة صدر وقال بهتاف :
- هه تونسي مغريبي يالالة .. صافي ساليتو .. ايوا بصحة وراحة .

شكروه البنات على الفطور ثم ودعوه وناضو باش يمشيو لكن إستوقفهم مرزوق ومشا كايجري لعندهم :
- بلاتي قبل مانسا ..

إلتفتو البنات لعندو بفضول فجبد مرزوق الخاتم من جيبو ومدو لروعة وهو كايقول:
- تفضلي هذا الخاتم ديالك .

شداتو من عندو روعة وقالت بدهشة :
- ولكن اسي مرزوق !!.

قاطعها مرزوق وقال بسرعة :
- ديريه فيديك وماعمرك تزوليه .. ماشي فال زوين أنك تحيدي خاتم زواجك ونتي مازالة عروسة جديدة 

عقدت روعة حواجبها بشك وقالت:
- ولكن راه ماعنديش باش نخلصك 

فرد عليها مرزوق بلا مبالات
- ماعليش راه غادي يحلصني هو .

توسعو عيون روعة بدهشة وقالت بسرعة :
- شكون هو ؟.

إنتبه اخيرا مرزوق للكلام لي قال فرد عليها بتوتر :
- عفوا .

حمرت فيه روعة وقالت بشك:
- قلتي عاد دابا غادي يخلصك هو .

مسح مرزوق لحيتو البيضاء بيديه وقال بلا مبالات وهو كايضحك:
- ااه ههه .. الله .. الله هو لي غادي يخلصني على هاد الأجر .

تبخرت شكوك روعة وتنهدت اخيرا بإرتياح ثم قالت :
- ااه الله يقبل .. ودابا بسلامة اسي مرزوق .

لكن قبل مايتحركو قال مرزوق بسرعة:
- بلاتي .. واش عندكم فين تمشيو؟ .

ردت عليه روعة بفضاضة وهي كاتحشي الخاتم فيديها بسرعة قبل ماتلحق نورسين تقول شي كلمة :
- اه عندنا .

ثم ضارت باش تمشي لكن مرزوق قال بإصرار :
- كانعرف واحد صاحبي عندو دار غير سادها وهو ساكن فالبرتغال وعاطيني سوارتها ، الى كنتو باغين تتهناو من الكراء انا نعطيكم سوارت .

قلبت روعة عينيها بغيظ وردت عليه بفضاضة:
- لا مكاين لاش شكرا .

لكن نورسين كان عندها رأي أخر جات الفرصة تالبين يديها غاتكون غبية لافلتاتها :
- ااه علاش لا والله مانرضوها فوجهك اسي مرزوق منها نعمرو لسيد الدار علاما يرجع ليها بالسلامة .

توسعو عيون روعة بدهشة حيت عارضتها لكن نورسين تجاهلتها حيت هي كاتأمن بديك المثل لي كايقول " لاكانت عندك شي حاجة عند الكلب قولو ياسيدي " .. إبتسم مرزوق ورد عليها بحماس :

- هوهوووو هو عاد رجع من الكونجي وكايجي للمغرب غير من أربع سنين لأربع سنين .. سكنو فيها على راحتكم وشحالما بغيتو .

جرت روعة نورسين من يديها وقالت ليها فودنيها :
- هاد بنادم مافيهش الثقة انورسين 

فتنهدت نورسين وردت على روعة فودينها :
- راه لفابور اروعة لفابووور هذا منها تحتافضي بالعقد ديالك وخاتمك وماضيعيهمش .. 

فتحت فمها باش ترد على مرزوق لكن روعة رجعت جرتها وقالت بإصرار :
- القضية فيها شي مؤامرة 

فكت نورسين يديها من روعة وقالت بملل :
- اووه خلاااص اروعة .

شافت فمرزوق وكملت :
- سي مرزوق! .. فين جات هاد دار ؟

- بلاتي
قالها مرزوق وبدا كايقلب فجيابو مخلي قبالتو نورسين وروعة كايتقاتلو غير بعينيهم حتى قلى الورقة ومدها لنورسين وقال:

- غادي تمشيو لهاد لعنوااان وغادي تلقاو الكونسيرج قولو ليه مرزوق كايسلم عليك وبغا سوارت ديال الدار وهو غادي يعطيهم ليك .

تمسكت نورسين بالورقة بحماس وقالت وهي كاتبتاسم ليه:
- واخا شكرا مسبقا .. ماعمرنا نساولك هاد الخير اسي مرزوق .. الله يجازيك بيخير 

مشا مرزوق بعدما طبخ ليهم راسهم بالهضرة والمواعض السخيفة والتوصيات حتى بقاو بوحدهم أخيرا وقالت نورسين بحماس :
- اول حاجة غانديروها غانمشيو عند شي مول ذهب .. نبيعو هادشي باش نلقاو مانصرفو هاد نهار .

ماعطاتش الفرصة لروعة فين تهضر وشدتها من دراعها جرتها معاها حتى خرجو من المرسئ وشدو أول سيارة طاكسي لقاوها لعند دهايبي معروف فالمدينة .. كان السيد كبير فالسن شعرو ابيض رمادي وكان يالاه فتح المحل ديالو وكايشطب الغبرة من حدا الحانوت وغير شاف لكلايانات عند بابو رحب بيهم ودخل بينما جبدت نورسين الذهب ديالها عطاتولو وتفاهمت معاه على الثمن وماترددش ياخدهم من عندها بمقابل مادي متواضع لكن غادي يسدو حاجياتهم الأساسية علاما يتحل مشكل أوراق نورسين البنكية .

لكن فاش جاو خارجين روعة جاها لفضول وبغات تعرف ثمن العقد ولخاتم .. حيداتهم وعطاتهوم ليه وهي كاتقول:
- الى سمحتي اسيدي .. اام شوف ليا هاد الخاتم وهاد الكوليه شحال يسواو ؟

هزهوم الرجل وقال بإبتسامة صغيرة :
- ايه مرحبا .

ماقدرتش نورسين تصدق وقالت بعتاب:
- روعة شنو كاديري علاياش هضرنا ؟

- مجرد فضول انورسين !

قاطعهم الرجل وهو كايقول بدهشة :
- وااو .. كان يحسابلي نقرا .. سعا هذا راه البلاتين الالة وصنعة ديال الخاريج منين ضبرتي عليه ؟

ردت عليه روعة بفضاضة لأنها ماعندها كانة تناقش معاه:
- سولتك على القيمة ديالو اسيدي ؟

وضع الرجل النظارات على أنفو وقال وهو كايجبد واحد الألة رقمية :
- بلاتي نشوف القيمة ديال لحجر بعدا باش نحدد الثمن.

بمجرد مالمست الألة الحجز دوة صافرة وضوء أخضر ورتفع درجة على درجة محدد الجودة ديال الحجر فصفر الرجل بدهشة و بسرعة هز العقد وبدا كايفحص الأحجار وفكل مرة كان الضوء الأخضر كايشعل ويبقا يسني .. حيد النظارات من فوق انفو وقال بدهشة :
- الله ياربي حبيبي واخا نبيع لمحل وسلعة لي فيه ونبيع داري ونبيع ولادي وسيارتي ولحومة كاملة لي ساكن فيها وجيراني ماانقدررشي نخلص ليك الثمن ديالو .

تبادلو روعة ونورسين نظرات الإستغراب فقال روعة بفضول :
- شحال كااع ؟؟

- غير هاد الخاتم الحجرة ديالو كبيرة وبوحدها كاتساوي واحد ل 10 دلمليون دسانتيم بالإضافة للحجيرات صغار لي عندو فجناب والى جينا نحسبو شحال من حجرة فهاد الــكولـي وكل وحدا وحجمها وقيمتها فكانضن تقدر توصل ليك حتى ل 300 مليون دسانتيم بلاما نحسبو القيمة ديال الزمردة الخضراء لي فلوسط ولي غير من الحجم ديالها باينا غاتسوا واحد ل 20 مليون سانتيم .. نتي راكي هازا معاكي الكنز ابنتي .

ماقدراتش روعة ولا حتى نورسين يصدقو كلام ذهايبي فشكروه وخرجو من المحل وهوما مصدومين لكن الرجل كان مصر وعجبو العقد فقال بهتاف باش يسمعوه من بعيد:
- الى كنتي عوالا تبيعيه انا كانعرف واحد الرجل أعمال كبير يقدر يأمن ليك هاد المبلغ كولو .

تجاهلت روعة كلامو وماجاوباتوش فكمل الرجل بصوت عالي :
- فكري مزيان ومرحبا بيكم لمحل ديما مفتوح ليكم

وقفت نورسين سيارة طاكسي وعطاتو العنوان لي عطاها مرزوق وروعة مازالة مصدومة وغير تحركت السيارة قالت بدهشة :
- ماقادراش نصدق الثمن لي سمعت !!!

ضحكت نورسين وردت عليها :
- باش تعرفي راسك مارخيصاش عند حبيب القلب

قلبت روعة عينيها فاش تفكرت حبل وقالت بسرعة :
- صافي سكتي .

وصلو أخيرا للعنوان المطلوب وكان جاي فحي راقي من المدينة فقالت نورسين بدهشة :
- وااااو .. اش هاد العمارة كاملة .

تفحصت روعة العمارة بعينيها وقالت بشك:
- قولتلك القضية فيها إن وماكاتيقينيش زيدي نرجعو بحالنا 

تمسكت بيها نورسين وقالت بغيظ:
- صبري على رزقك مالك كاطيري 

جرتها موراها وكملت :
- اجي نكتاشفو شنو لداخل

وبالفعل غير دخلو لقاو الكونسيرج كالس فواحد لقنيتة وشاد جريدة فيديه وغير شافهم دخلو حيد الجريدة بسرعة ووقف فقالت نورسين بتردد:
- سلام اسيدي سيفطنا عندك سـ

قبل ماتكمل كلامها قاطعها الرجل وقال:
- مرحبا وألف مرحبا بلالة مولاتي مولات الدار والرأي وشوار ..

تبادلو روعة ونورسين نظرات الإستهجان قاطعها الكونسيارج وهو كايقول : ‏
- ‏ اجيو معايا نوريكم الدار 

جرات نورسين روعة بسيف عليها حتى دخلو للمصعد وقال الرجل وهو كايضغط على زر الصعود:
- هاد الموبل كولو خاوي ونتوما الوحيدين لي غادي تسكنو فيه بينما رجع مولاه من إسبانيا 

ردت عليه روعة بفضاضة:
- بغيتي تقول البرتغال ؟.

ضحك الرجل بتوتر وقال :
- ايه ههه الله يتبتنا على شهادة .. اه نسيت انا سميتي عبد سلام

بقا كايهضر ويهضر ويهضر وكلامو مكايتقاضاش حتى وصلهم للطابق الثالث وخرجو أمام برطما الباب ديالها كبيرة فاللون الخشبي البني الغامق .. مشا عبد سلام بسرعة فتح الباب بسوارت وقال وهو كايشوف فروعة:

- تفضلي الالة مولات دار 

شافت فيه روعة بشك ودخلات بينما تبعتها نورسين بحماس وهي كاتفحص الجدران والأثاث بعينيها .. داكشي كان فاخر .. الأرضية من الخشب فاللون الرمادي الغامق والجدران فاللون الأبيض والأثاث ممزوج باللونين الأبيض والرمادي وديكورات وطابلوهات شي حاجة فخمة .. 

- تبغيو شي حاجة مني الالياتي قبل مانمشي .. 

ضارت روعة شافت فيه وتفكرات الميثادون لي كايخفف عليها لحريق بالإضافة للدوايات 

كسر رجليها وحقنة الأنسولين لي ماتقدرش تعيش بلا بيها . ضارت شافت فنورسين وقالت بإحراج :

- اه .. اام نورسين سمحيلي وماديريهاش مني قلة صواب ولكن ماجبتش معايا دوا ديالي 

ردت عليها نورسين برحابة صدر وهي كاتكلس على الأريكة المريحة:
- اه أكيد احبيبة غادي نجيبو دواء وكل شي غادي نحتاجوه انا وياك 

شكرات روعة الكونسيرج عبد السلام حتى مشا بحالو وبقاو بوحديتهم فتفحصت روعة بدورها المكان غير بعينيها وكلسات باش تريح رجليها بينما ناضت نورسين كاتقلب فالدار وفلغرف والمطبخ بحمااس وعجبتها دار بزااف .. هاد الدار واخا كانت تبيع دهبها كامل وراتبها الشهري ماتقدش على ثمن كرائها... خرجات من المطبخ بحماس ومشات عند روعة لي كانت كاتحاول تطرد بعض الشكوك من عقلها وقالت نورسين:

- دابا عرفتي شغانديرو غانرتاحو شويا وغانمشيو لشي محل كراء سيارات نكريو شي وحدا باش نتنقلو وغانخلي عابد يضمني فوراقها ومن بعد ندوزو نشريو لحوايج مانلبسو وندوزو نتقداو مانطيبو فلكوزينة ومنها نشوفو شي فرماسيان ناخدو ليك الدواء ديالك تافقنا الالة المليونيرة .

إبتسمت روعة على اللقب الجديد وقالت بسخرية :
- هه تافقنا .

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.