الحسناء وحارسها الشخصي الجزء التاسع (الفصل الثاني)

من تأليف رجاء موري
2018

محتوى القصة

رواية الحسناء وحارسها الشخصي الفصل الثاني

🍂🍂 الأغلبية توقع ان نجم الدين الي غادي اتخلا على قمر من بعدما اعرف الحقيقة ... لكن وقع العكس و قمر الي غادرات و خلات كلشي من وراها ... فرأيكم شنو غادي اكون رد فعل نجم الدين بعدما اكتاشف تركها ليه ... و كيف غادي اكون موقفو منين اعرف هي وراء الحادث الي ماتت فيه ناهد واخة مكانش ذنبها ؟؟!
هادشي كولو غادي نكتاشفوه فبداية الفصل الثاني ...... 🍂🍂
#موري 🌸

أعدكم بفصل أحسن من الأول غادي اخلي قلوبكم تفرفر 😂😂 الحببببب و العشقققققق و الغييييييرة و الرووووماااالنسية و القليل من السفااااااالة البرييييئة ...

زائد أحداث صادمة و غير متوقعة ... و ظهور شخصيات جديدة و حتا ضيوف كتعرفوهم و تحبوهم 😉 ...

🍃🍃 بعد مرور ستة أشهر 🍃🍃

واقفة فالبالكون لابسة مايو فالأسود...شعرها مموج و بشرتها سمراء...لون عيونها أزرق و ملامحها أنثوية زائد قوامها الممشوق...فتاة جميلة بمعنى الكلمة...سندات يديها على الحديدة و عنيها على لاپسين لتحت...كتشوف فيه كيعوم بطريقة متمرسة...سارحة فجسمو المفتول و ظهرو العريض و كيف كيدرع فالما...
تنهدات و عنيها هايمين فيه...رجل مختلف على كل الرجال بهبتو و شهامتو و أخلاقو...نهار رجعات للمغرب و مشات تزور خالتها تحت طلب الأم ديالها...تماك شافتو بعد سنين طويلة...عمرها توقعات ان ولد خالتها اكون بديك الوسامة...زائد صار مدير شركة و أصبح ثري فوقت وجيز...
و الي حمقها أكثر هو شخصيتو تواضعو و حتا الغموض الي فيه...واخة لاحظات قليل فاش كيضحك...مي خلاها بلا عقل و سيطر على تفكيرها من داك النهار...ولات ترجع تشوف خالتها تقريبا كل أسبوع غير باش تشوفو...حتا انها تقربات من أختو باش تعرف عليه معلومات أكثر...

آيات : متقوليش ليا غادي تعومي هكاك ؟
.......... : " ضارت عندها " و مالو هاكة...عادي مايو ديال العومان
آيات : إبتسام من الأحسن تلبسي شي حاجة مستورة و لا غيضور فيك نجم الدين
إبتسام : " بابتسامة حالمة " مصاب...غير اضور فيا و اغوت عليا
آيات : واش شوية لباس...على الأقل لبسي شورط...و نتي طرمتك كلها خارجة...راه غادي اجري عليا انا وياك...و حنا غا هاجمين عليه فدارو
ابتسام : نتي خليك فراسك...مني ليه " لاحت عليها كاش مايو " يالاه نهبطو...بغيت نعوم
آيات : زيدي اوجه المصايب...عشتي فأوروبا واحد 4 سنين و نتي تضسري

نزلات آيات و ابتسام لتحت و خرجو لجهة لابسين...كل وحدة تسرحات فوق الرولاكس كيدهنو جسمهم بواقي الشمس...ابتسام محيداتش عنيها على نجم الدين الي كان كيعوم...شافتو خرج راسو من الما و رد شعرو اللور بيدو...
شكلو خلا قلبها كيدق بسرعة...من بشرتو الي ولات سمراء و لحيتو الكثيفة و شعرو المبلل...بقات مراقباه و هو خارج من الما...قرب عندهم و خدا فوطة كيمسح وجهو...بدون ميشوف فجهتهم...معجبهاش الحال و هي توقف حيدات الكاش لاحتو...تقدمات جهة لاپسين بخطوات بطيئة و جسمها كولو كيتحرك...
نجم الدين شاف جهتها و هو اعقد حجبانو و تلفت للجهة لاخرى...تلاحت ابتسام فالما كتعوم...وصلات للجهة لاخرى خرجات راسها من الما كتقلب عليه...لقاتو طار ضربات بيدها فالما و طلعات مغددة...جلسات جنب آيات و ضارت عندها...

ابتسام : شنو قصة خوك ؟؟
آيات : مالو خويا...غزال تبارك الله
ابتسام : باركة من التسرهيط و قولي ليا شنو واقع معاه...ديما مخنزر و قليل فين كيهضر
آيات : خويا داكشي الي داز عليه ماشي قليل...اللهم خليني ساكتة
ابتسام : بليز عاودي ليا...ياك انا ختك حبيبتك...بلييييز
آيات : تخرج هاد الهضرة منعقلش عليك
ابتسام : متخرجش...وعد
آيات : نجم الدين ماتت ليه خطيبتو اللولة عامين هادي
ابتسام : اللولة !!!
آيات : اه و قلنا عمرو باقي افكر فالزواج...لكن وقع العكس و بغا وحدة أخرى...خطبها و مدازش بزاف ديال الوقت حتا مشات وخلاتو
ابتسام : فسخات الخطوبة ؟
آيات : و طارت مسمات...خلات ليه الخاتم و ورقة كاتبة فيها بلي مشات...مكانش عندي معها و حاولت نتقبلها على قبل خويا...مي من بعد هادشي كرهتها من قلب...كنتمنا مترجعش
ابتسام : و شنو دار منين عرفها مشات ؟
آيات : ماخلا فين قلب عليها...مكاينش ليها لأثار...حتا عائلتها معرفوها فين زادت
ابتسام : الله اعطيها الدل.. بحال هادا اهربو منو الناس...باينة دارت شي مصيبة و هربات قبل ما اعرف
آيات : معرفتش...هي بيزنيس وومن و خدمتها مهمة عندها و خلاتها حتا هي...دابة ختها و واحد ولد الحرام ديال خوها هما الي مقابلين الشركة
ابتسام : هي لباس عليها ؟
آيات : اه و بزاف...راه معروفين...شركة العابيري
ابتسام : " خرجات عنيها " شركة العابيري !! بغيتي تقولي قمر العابيري
آيات : اه هاديك...كتعرفيها ؟
ابتسام : شايفاها غير فالمجلات...سو كانت خطيبة نجم الدين...أحسن حاجة مشات...وحدة معفرة بحالها متستاهلوش
آيات : جمعي علينا هاد الموضوع...و هاوذني منك تجبديه قدام خويا...ندبحك
ابتسام : لا متخافيش " بصوت شبه مسموع " علاش غادي نجبد ليه سيرتها...و انا باغة انسا طاسيلت مها
آيات : يالاه نعومو
ابتسام : سيري نتي...مبقاتش عندي الگانة للعومان

فالغرفة خرج نجم الدين من الدوش لاوي عليه فوطة...دخل للدريسينغ و لبس سروال كحل مع تيشورت بيض...وقف قدام المرايا مشط شعرو و رش ريحتو...شد فالسنسلة الي فعنقو كيشوف فيها...و هما ارجعو ليه ذكريات داك النهار...الي كان عندو أحسن يوم و أحسن عيد ميلاد قبل ميتحول لأسوأ ذكرى...

''''''' قمر : " واقفة اونفاص معاه " سد عنيك
نجم الدين : علاش...هي شي بوسة حلوة كيف ديال قبيلة
قمر : " ضرباتو على صدرو " لااا...متولفهاش...سد عنيك و صافي
نجم الدين : " غمض عنيه " هاهما
قمر : " حلات البواطة الي فيدها و جبدات سنسلة ديال الفضة " عنداك تحلهم
نجم الدين : لا سادهم...نشوف شنو باغة تصنعي
حلات السنسلة و تعلات على قرون صباعها...دورات يديها على عنقو كتسد فيها...نجم الدين حس بيها قريبة منو استنشق ريحتها و حل نص عين...بانت ليه كتخسر ملامح وجها و بحال الى مدابزة مع شي حاجة...تبسم و حط يديه على خصرها...
نجم الدين : غير عنقيني و لا بعدي...راه شعلتي فيا العافية
قمر : ساليت...غير حلهم
حل نجم الدين عنيه و نزلهم لفين كتشوف...هز يدو كيقلب فالسنسلة الي فعنقو و رجع شاف فيها...
قمر : هادا الكادو ديالك...كنت شفتها شحال هادا و عجباتني...الى معجباتكش حيدها
نجم الدين : مموالفش نلبس بحال هادشي...مي هادي جات من عندك...ميمكنش نحيدها
قمر : " حطات يدها كتحسسها فوق عنقو " جات معاك
نجم الدين : " بنضرات حب " خاصني نشكرك على الكادو
قمر : " عرفات فاش كيفكر " لا بلاش
انقض على شفتيها و باسها قبلة حاااارة...متفكات معاه غير بالكشيفة...دخلو لداخل فين كانت الطبلة فيها عشاء مجهز...دومندات عليه قمر من الريسطو...تعشاو مع بعض و طلعو لفوق لبيتو...
چلسو فالبالكون مجمعين حتا لاش من وقيتة...سولها نجم الدين واش بغات تمشي اوصلها حتا قالت ليه باغة تبات معاه...فرح و جرها عندو معنقها من اللور و مستمتعين بمنضر النجوم...بقات كتهضر حتا نعسات فحضنو...هزها و دخلو حطها فوق الناموسية و تخشا حداها...غفا و هي بين يديه...حتا كيفيق الصباح على أكبر صدمة....''''''''''

خشا السنسلة تحت التيشورت و خرج...هبط لتحت و فطريقو تلاقا بآيات و ابتسام داخلين...
آيات : أردا...فين غادي ؟
نجم الدين : خارج...طلعو لبسو حوايجكم...متبقاوش ضورو هاكة
ابتسام : ممكن توصلني معاك للدار...عيطات ليا ماما قالت ليا جي
آيات : امتا عيطات عليك ؟
ابتسام : " خنزرات فيها " قبيلة فاش كنتي كتعومي " شافت فنجم الدين " الى مكنتيش زربان
نجم الدين : هاني كنتسناك فاللوطو
ابتسام : " بفرحة " اوكي هاني جاية...مغاديش نتعطل عليك

طلعات فالدروج كتجري...دخلات للبيت الي عاطي نجم الدين لآيات...حيدات لمايو و لبسات دوپياس و فوقهم كسوة...خلات شعرها مطلوق بوكلي دارت لپستيك لشفايفها...هزات صاكها و خرجات بسرعة كتجري...
تلاقات آيات طالعة مع الدروج و كتاكل هازة طاسة ديال الگلاص...
ابتسام : باز من الصباح و نتي تلغجي...غادي اخرج ليك الكرش
آيات : ديها فراسك...كرشي لاصقة على ديالك
ابتسام : و طرمتي خارجة على ديالك
آيات : شتي واخة تكون عندك ديال كيم كارداشيان...مغاديش اديها فيك...خويا ذوقو صعيب و فشي شكل
ابتسام : هاحنا غنشوفو

نزلات كيف خرجات من الڤيلا...بان ليها نجم الدين فاللوطو كيكمي...عضات على شفتها و قربات حلات الباب و طلعات...
ابتسام : ياكما تعطلت عليك ؟
نجم الدين : لا
اكتفى بكلمة وحدة و ديمارا اللوطو...خرجو من الڤيلا نجم الدين سايق بيد و يد حاطها على النافذة و مركز فالسياقة...اما ابتسام فبقات كتبربص فبلاصتها بغات تجبدو فالهضرة باش اجمع معها...و تخليه اتطلق معها فالهضرة مي مقدراتش...بقات كتردد حتا وصلها نجم الدين لدارهم الي كانت ڤيلا صغيرة...كبر من الدار الي كبر فيها هو...بانت ليه مزال منزلات و هو اضور شاف فيها...
نجم الدين : مغاديش تنزلي
ابتسام : دخل تشوف ماما...عمرك جيتي لعندنا
نجم الدين : مرة أخرى دابة ممساليش
ابتسام : و عنداك متجيش...انا غادي نقولها لماما...و شي نهار جيو عندنا كاملين نتا و خالتي و آيات
نجم الدين : انشاء الله
ابتسام : باي

حلات الباب و هبطات...نجم الدين رجع باللور و كسيرا مخلي العجاجة من وراه...بقات واقفة متبعاه حتا غبرات اللوطو عاد حلات الباب و دخلات كتعيط على مها...
ابتسام : ماماااا...ماماااا
خديجة : مالنا شنو كاين ؟
ابتسام : ضروري تعرضي على خالتي عائشة و نجم الدين
خديجة : " هزات حاجبها " شنو تماك...بنتي ليها غير غادة جاية عندهم...و دابة باغة نعرضو عليهم...فالأول گاع مكنتي باغة تمشي
ابتسام : كننننت...كنت فاش مكنتش عارفة بلي ولد خالتي ولا راجل و سيد الرجال...و من فوقها دار لفلوس...واش بنتك متستاهلش راجل بحالو !
خديجة : " بفرحة " تستاهلي الله ياودي...خيرنا مايديه غيرنا

وصل للمكان الي كيجي ليه تقريبا يوميا...هبط و تكا على المقدمة ديال اللوطو مقابل مع لبحر...جبد سيجارة شعلها و حطها فمو...نطر نطرة و خرج كمية كبيرة ديال الدخان...
نجم الدين : فينما كنتي غادي نلقاك...وعد...و ديك الساع لينا هضرة أخرى

🍂🍂 في مكان آخر 🍂🍂

راكبة فوق الخيل و الريح كيطير شعرها القصير...غادة مابين الشجر بسرعة كبيرة...محاساش بالخوف نهائيا...بل ركوب الخيل صار من أحب النشاطات عندها من نهار جات للمزرعة...وقتما حسات بالخنقة او ضرها خاطرها كتلجأ لركوب الخيل...
دخلات مع باب المزرعة و هي تلمحو چالس بعيد...لابس جينز مع تيشور كحل...رجل فالثلاثينيات ضخم البنية وسيم و ملامحو رجولية...شافها ابتاسم و هو اوقف...صفر للخيل و هو اتم جاي عندو...بسهولة طلع ركب من وراها...
قمر : علاش كيسمع ليك كتر مني ؟
.......... : حينت انا الي مربيه...واخة اولفك مغاديش انسى شكون مولاه
قمر : ياك عطتيه ليا...سو انا المالكة ديالو
........... : نتي المالكة ديالو و حتا حد مقال العكس...ياك أ "سپيدو"
قمر : زعما بحال الى غادي افهمك

دخلو للإسطبل و هو اهبط و مد ليها يديه...
........... : الأحصنة كيفهمو و احسو...كيفما كان المود ديالك كيحسو بيك
قمر : " ترمات عندو " گاع هادشي كتعرفو عليهم
.............. : من صغري و انا وسطهم...و هادا ولدناه انا و الواليدة " قرصها فخدها " كن ما كنتي عزيزة...مغاديش نعطيه ليك
قمر : منين شفتو عجبني...خاصة اللون ديالو
........... : البنات كيعجبوهم البيضين...و نتي عجبك هادا الي كحل...باينة فيك معكسة هههه

.......... : موسيو بدر الحاجة بغاتك نتا و الآنسة قمر
بدر : هاحنا جايين " شاف فقمر " من الصباح و هي كتسول عليك...فينها حبيبتي قمر...فين مشات...ديتي ليها العقل و نساتني انا الي ولدها
قمر : محساد...نمشي نشوف حبيبتي شنو بغات
بدر : هههه تحابو غا بيناتكم و انا نتلاح لتوش

خرجات قمر و من وراها بدر...توجهو للدار الي جات وسط الفيرمة الكبيرة...دخلو ديريكت للصالون فين چالسة امرأة عجوز...عنيها خضرين و ملامحها باقي زوينين رغم كبر سنها...مشات عندها قمر چلسات جنبها و عنقاتها...
قمر : لميمة عيطي عليا
فاطمة : خرجتي من الصباح و مكليتي والو...شوفي كيف ضعافيتي...واش باغة تخرجي على صحتك
قمر : لميمة انا دايرة دايت
فاطمة : شنو هاد دايت ابنتي ؟
بدر : هههه...كتعني الرجيم...هي دايرة رجيم داكشي علاش مكتاكلش بزاف
فاطمة : و علاش ابنتي...مالك على حالتك ؟
قمر : ولفت الميمة...و معنديش مع لغلض...الى خرجات ليا الكرش غير شوية كنتعقد
فاطمة : الله استر...حارمة راسك من الماكلة...كتعذبي راسك براسك
قمر : راه منين جيت هنا وليت كناكل كثر...ماشفتيش من قبل
فاطمة : " حطات يدها على خد قمر " كلما كنتفكر كيف كنتي عايشة كيضرني قلبي عليك...مكرهتش حتا ختك تجي و نتجمعو كاملين...باغة نشبع من بنات بنتي قبل ما نموت
قمر : الله اطول لينا فعمرك...مي منظنش وهب تبغي تجي...غادي نتاصل بيها و نقولها ليها
بدر : فراسك نهار شفتك تصدمت...بحال الى ضحى الي واقفة قدامي
قمر : عرفتكم فين عايشين غير بالصدفة...من بعد موت بابا لقيت عندو شي وراق فالمكتب...فيهم ممتلكات باسم ماما و كانت من بينهم هاد المزرعة الي عمرني شفتها...سيفط واحد اطل عليها حتا صدمني و قالي ساكنين فيها شي ناس...منين بحت عرفت بلي الناس الي عايشين فيها هما نفسهم جداتي و خالي الي عمرني تلاقيتهم
بدر : " بعصبية " باك كان مانع ضحى من انها تشوفنا او تجي لعندنا...باقي عاقل كانت عندي 14 ديك الساع...كنا كنجيو عندكم مرة مرة...نتي و وهب كنتو صغار...واحد المرة الواليدة مرضات...ضحى ساقت لخبار و باغت تجي تشوفها...لكن باك منعها و منين مبغاش جات بلا خبارو...غير ساق لخبار جا جرها من هنا...انا كنت صغير مقدرت ندير والو...و من ديك الساع منع عليها تشوفنا و منعنا باقي نعتبو عندكم
قمر : كنت كنشوف بابا صعيب و بارد...لكن مكنتش عارفة بلي دوز على ماما هادشي كولو...الله اسمح ليه
بدر : كان كيسيفط لينا الفلوس و اي حاجة خصاتنا...غير نبقاو بعاد عليكم...الصراحة بفلوسو قدرت نقرا...و منين خديت الباك مبقيتش كناخد فلوسو رجعتهم ليه...انا كنت خديت منحة نكمل قرايتي فألمانيا...مشيت قريت و تخرجت...تعرض عليا عمل فأحسن المستشفيات تماك...رجعت ندي الواليدة مي حلفات لا تفاوتات على هاد الفيرمة...اظطريت نرفض العرض و جيت خدمت هنا...نهار عرفت عثمان مات...شحال من مرة جيت حتا للڤيلا عندكم و رجعت فحالي...قلت ممكن معاقلينش حتا واش عندكم خال و جدة...حتال نهار الي كنت خارج و لقيتك قدامي فلباب بشانطتك
قمر : كنت معولة نخوي البلاد...مي قلت عندي عائلة علاش منمشيش عندهم...واخة معرفتش واش غادي تقبلوني اولا
فاطمة : " دوزات يدها على شعرها " أحسن حاجة درتي...كنت محروقة من جهتكم...بنتي مشات بلاما نشوفها...و زادت حفيداتي بعاد عليا...كنت كنتسنا غير لموت
قمر : الله اخليك لينا الحبيبة ديالي...انا عاد لقيتك و باغة تمشي
بدر : " كيشوف فيهم بحب " ماشي خديتي غير ملامح ضحى...حتا حنيتها و قلبها الأبيض
قمر : كن تلاقيتي بيا عام قبل ادكتور بدر...مغاديش تقول نفس الهضرة
بدر : شنو زعما...كنتي متكبرة !
قمر : كنت أسوأ نسخة فيا...الكل كان كيكرهني...و حتا انا كنت كنكره راسي
بدر : و شنو الي غيرك ؟

قمر : " الصمت "
بدر : " بمزاح " ياكما الحب هههه
قمر : " جات صورة نجم الدين فبالها " انا ماشي ديال الحب
فاطمة : و ديالاش مثلا...غادي اجي الي ابغيك و تبغيه...و غادي تزوجي و تولدي ليا شي فنيكيش نلعب معاه...نعوض غير داكشي الي تحرمت منو فطفولتكم
قمر : " بابتسامة حزينة " شوفي مع هاد الباير اولد ليك شي حفيد...اما انا مابغة زواج مكاين ماحسن من الحرية
بدر : مغادي نتزوج...حتا نزوجك نتي اللولة
قمر : " عقدات حجبانها " شكيت عليك
بدر : ههههه...ناري على تخنزيرة
قمر : " وقفات " هاني مشيت نرتاح شوية...بلاما تعيطو ليا على لعشا
فاطمة : هالي قلنا...طلعي و منين اوجد لعشا عادي نسيفطو ليك...و حربوش متاكليه
قمر : ههههه واخة الميمة

طلعات قمر لغرفتها الي كانت متوسطة الحجم...فراشها بسيط لكن دافئ ألوان فاتحة و مبهجة...مابين الأبيض و البيج و الرمادي مفتوح...سدات الباب و توجهات لسريرها چلسات فالطرف و جبدات الفون...
فتحاتو و دخلات لگاليري جبدات آخر صورة خداتها ليه...
"""""كان ناعس بهدوء تسلات من بين يديه...هزات الورقة و كتبات ليه فيها و دموعها على خدودها...حيدات الخاتم و حطاتو فوق الورقة...مكانت عندها حتا صورة ليه...جبدات الفون و صوراتو و شادة على فمها باش متخرجش شهقتها...
كان أصعب قرار اتاخدو...امكن كانت جبانة حينت مقدراتش تواجهو بالحقيقة و تقول ليه شنو وقع...لكن مقدراتش تشوف ردة فعلو...متقدرش تستحمل خيبة الأمل فوجهو او عتاب و لا حتا كره...لان من حقو اكرها حينت هي السبب فموت الإنسانة الي كان كيبغي...
و الي مزالو متذكرها و قالها ليها بفمو انو عمرو انساها...كيف غادي تقدر تستحمل لو انو اختار اتركها...فقط فكرة انو امشي و اخليها متقدرش تحملها...لذلك فضلات الرحيل"""""
دوزات صباعها على وجهو و الدموع تلاقاو ليها عند ذقنها...ممكن هادا هو عقابها على الظلم الي ظلماتو و الجريمة الي ارتاكبات فحق بنت بريئة...بعدها عليه كيحرقها كل يوم...اشتاقت لصوتو شوفاتو لمساتو اهتمامو و حضنو...ستة أشهر عمرو فارق بالها و خيالو مرافقها فينما مشات...

سمعات الدقان فالباب ناضت بسرعة...دخلات للطواليت غسلات وجها و خرجات فتحات الباب...كانت الخدامة مدات ليها البلاطو الي فيه العشا...شكراتها قمر سدات الباب و حطات الأكل فوق الطبلة...معندهاش الشهية منين ادوز...
مبقات متبعة لا حمية لا والو...فقط نفسيتها الي خلاتها متاكلش كيف العادة...تحجات بالحمية فقط باش ميحسوش بلي شي حاجة واقعة معاها...من نهار جات عمرها جبدات سيرة نجم الدين ليهم...خلات كلشي فقلبها و سدات عليه...
تسطحات فوق ناموسيتها معنقة رجليها حتا غفات...ناعسة و الدمعة نازلة من طرف عنيها...هادا هو حالها تقريبا كل ليلة من نهار جات...

☀☀☀ أصبحنا و أصبح الملك لله ☀☀☀
فاقت قمر على أشعة الشمس و العليل الي داخل من البالكون...ناضت للطواليت وقفات قدام المرايا...كتشوف فعنيها الي منفوخين...ديما كيصبحو على نفس الحالة كل مرة بكات...دوزات صباعها على شعرها القصير و هي تحيدهم...غسلات وجها و حكات سنانها...
خرجات بدلات البيجامة الي لابسة...لبسات جينز مع هودي عريضة سپور...لبسات سبرديلة فرجليها و خرجات...هبطات لتحت لقات جداتها كتفطر سلمات عليها و فطرات معها...
قمر : " وقفات " لميمة بغيت نمشي نقضي واحد الغراض...مغادي نرجع حتال لعشية
فاطمة : واخة ابنتي...سوقي بشوية و ردي لبال لراسك...و منين تكوني جاية جي مع خالك راه الطريق كتكون خاوية
قمر : اوكي...هاني مشيت

خرجات قمر و ركبات فسيارتها الي كانت رونج روڤر كحلا...شدات الطريق للمدينة حينت الفيرمة جات بعيدة...بعد ثلاث ساعات ديال الطريق وصلات لوسط المدينة...توجهات للشركة ديالهم وقفات فالجهة لاخرة قدام الشركة...دوزات نمرة ديال ختها و بعد مدة جاوبات...
قمر : انا لتحت نزلي لعندي
وهب : فين كنتي غابرة ؟
قمر : هبطي و غادي تعرفي " قطعات "
بعد دقائق خرجات وهب من الشركة...لمحات قمر فاللوطو و قطعات عندها...حلات الباب و طلعات...
وهب : عاش من شافك...فين زدتي و خليتني الروينة من وراك
قمر : متهضريش ليا على الشركة حينت مبقا عندي فيها سوق...ياك نتي و أمير واقفين على كلشي...و دايرين الواجب...انا جيت على غرض آخر
وهب : شنو هو ؟
قمر : جدة و خالي لقيتهم و انا دابة چالسة معاهم فالفيرما ديال ماما...جيت نقولها ليك الى بغيتي تشوفيهم...لميمة ديما كتسول عليك
وهب : عاد طفات عليهم الشمعة...فين كانو سنين هادي...ولا شافو القضية فيها الورث...ياكما بغاو حق ماما
قمر : " شافت فيها بحدة " نزلي فحالك قبل متسمعي خل وذنيك...استفسري فالأول و عرفي شنو كاين عاد حلي فمك
وهب : " حلات الباب " متغبريش هههه

كسيرات قمر و الأعصاب كيلعبو عليها...معرفاش كيفاش تعامل مع ختها الي حاسبة الكل ضدها...كيفما دارت معها كتلقا بيبان مسدودين...بقات سايقة حتا لقات راسها فالحي فين ساكن نجم الدين...تصدمات فراسها كيفاش حتا وصلات لهنا...جات راجعة باللور حتا لمحات سيارتو جاية...
ولات كلها كترجف و قلبها بغا اوقف...كتشوف فيه نازل و عنيها عامرين دموع...توحشاتو بلا قياس مكرهاتش تجري عندو تعنقو و تخبا فصدرو...لكن فور ما شافت بنت أخرى نازلة من السيارة توقف بها الزمان...تبعاتهم بعنيها حتا دخلو للدار و هي تكسيري غادة بلا عقل...ندمات أشد الندم علاش جات...

سايقة بسرعة شادة الفولون بيد...و كتمسح دموعها باليد لاخرى بعصبية...عنيها و نيفها رجعو حمرين...بعد مدة وصلات للمكان الي كيعني ليها بزاف...للشاطئ الي جات ليه معاه...آخر مرة كانو هنا كانت حاسة بلي الدنيا بين يديها...
حلات الباب و نزلات شافت فلرض آثار ديال عجلات شي سيارة...هنا قليل الي كيوصل ليه حينت جا بعيد على لمدينة...بقات كتشوف فدوك لآثار و كتفكر معقول اكون نجم الدين كان هنا...منين رجعات ليها صورتو هو البنت الي معاه...ضربات رجلها مع الرويضة و طلقات صرخة من القلب...
قمر : علااااااش كنبكي...ياك انا الي خليتووووو...علااااش كنبكي داباااا...أكييييد مغادييييش اچلس كيتسنا فيااااا...ااااه
حطات يديها بجوج على صدرها و دموعها غادين بوحدهم...رجعات شعرها اللور و كتمسح فوجها...نزلات مع الدريجات كتمشا فالرملة و غادة لجهة البحر...وقفات للحظة كتشوف فالأمواج و هي تلوح رجلها...غادة داخلة للما و الأمواج كيضربو فيها...

حطات الطائرة و بعد لحظات خرج من بوابة المطار...مد شانطتو للشخص الي كيتسناه و خدا من عندو الكونطاكت...طلع فاللوطو و كسيرا موقف حتال قدام الشركة...تم داخل مخنزر منضرو ازرع الرعب فأي واحد...لابس كلشي أسود و درعانو العريانين كلهم وشام...
طلع فالسانسور للطابق الأخير...خرج غادي فالكولوار حتا تلاقى بوهب جاية...
وهب : نورات الشركة
ساجد : فيناهيا قمر ؟
وهب : " قلبات عنيها " ههه أكيد جاي تسول على قمر...مي منقدرش نعاونك...معندي حتا فكرة فين مشات
ساجد : " شدها من دراعها " كيفاش ختك غابرة شهورة هادي...و نتي معرفاش فين مشات...كتحماقي عليا
وهب : " بابتسامة " و العنف لاش...دروك اشوفونا الموضفين...اسحاب ليهم كنديرو شي حاجة
ساجد : معنديش الوقت لهاد الحزاق ديالك...فيييين قمر ؟
وهب : " كتألم " يدي عوجتيها ليا...طلق مني بعدا
ساجد : " طلقها " يالاه طلقينا
وهب : " بغيظ " غير الصباح شفتها...جات لهنا للشركة...شفتها شي 5 دقايق و هي تمشي
ساجد : و فين مشات...فين چالسة ؟
وهب : معرفتش...قالت ليا مشات عند جداها و لا منعرف
ساجد : كيفاش جداها...آش كتخربقي نتيا ؟؟
وهب : داكشي الي عرفت قولتو ليك...قالت بلي چالسة مع أم ماما الي عاد بانت
ساجد : " بقا كيشوف فيها "
وهب : عجبك داكشي الي كتشوف
ساجد : " قرب عندها و بابتسامة مستفزة نطق " لعكر لاصق ليك فسنانك

فاتها و مشا لمكتب قمر...خلاها مفقوصة دخلات للمصعد و تقابلات مع لمرايا كتمسح سنانها...يالاه بغا ساجد احل باب المكتب و هو اشوفو أمير...
أمير : ساجد !
ساجد : " ضار عندو " نتا هنا " تسالمو مع بعض "
أمير : فين هاد لغبور ؟
ساجد : خليك مني دابة...معارفش فين هيا قمر ؟
أمير : ماخليت فين قلبت عليها او والو...حتا شروق معندها حتا فكرة فين مشات
ساجد : علاش مقالها ليا حتا واحد...عرفت غير بالصدفة من عند واحد من الشركاء فاش كنا فإجتماع فأمريكا...كان كيهضر مع الي فجنبو قاليه المديرة زادت خلات كلشي مقربل من وراها
أمير : شي ست شهور و قمر مختافية...معلمات حتا واحد...و سمعت بلي فسخات حتا خطوبتها
ساجد : " بصدمة " شنوووو !!!
أمير : هادشي الي سمعت
ساجد : مشكيلة هادي...فين تكون مشات " تفكر شي حاجة " مكتبها باقي هو هو...و لا ولى فيه شي حد آخر ؟
أمير : لا باقي كيف خلاتو
ساجد : " ضرب على كتفو " واخة شكرا

حل ساجد باب المكتب و دخل...مشا للمجورا ديريكت و بدا كيقلب فالأوراق...ملقا حتا حاجة الي ممكن تساعدو القاها...مشا للخزنة الي فالمكتب بقا كيفكر شنو ممكن اكون الكود...جرب عيد ميلادها ماشي هو...حك على جبهتو كيفكر...كتب الإسم ديال مها و هو اتحل...
بدا كيجبد فالوراق و اقلب...بعد مدة هز ورقة كيشوف فيها و ترسمات ابتسامة على وجهو...

خرجات من الما و سروالها كولو فازگ...رجعات ركبات فاللوطو راجعة للفيرمة...طلعات لبيتها بدلات حوايجها قبل مايشوفها شي حد...مشات لبيت جداها علماتها بلي رجعات...چلسات معها شوية مجمعة معها و هي تنوض...
فاطمة : فين غادة ابنتي ؟
قمر : غادي نخرج نجيب دورة ب " سپيدو "
فاطمة : متعطليش...و ردي لبال لا طيحي
قمر : " باست ليها على راسها " اوكي لميمة
هبطات قمر مع الدروج و خرجات من الباب...يالاه باغة ضور لجهة الإسطبل و هي تلمحو من بعيد...واقف من ورا السياج كيشوف فيها...ابتاسمات و عنيها تغرغرو بالدموع...مشات كتجري لعندو و هو بدورو فتح ليها دراعو و ترمات فحضنو...
ساجد : " عنقها بقوة " عند بالك تخبيتي...شتي واخة تمشي لآخر الدنيا غادي نتبعك

قمر : خليتي بلاصتك
ساجد : ماشتي نتي...كنت عايش و ناقصاني أهم حاجة
قمر : شنو هي هاد الحاجة ؟
ساجد : نگيرك
قمر : ههههه...اناااا ؟
ساجد : اه نتي " كيشوف فالفيرمة " هادي آخر بلاصة ممكن نتوقع نلقاك فيها
قمر : أحسن حاجة درت هي جيت لهنا
ساجد : " طول فيها الشوفة " مرتاحة ؟
قمر : " بعدات عنيها " آه...كنت غادة نركب الخيل...تمشي ؟
ساجد : هاي هاي على الناس...من امتا وليتي تركبي الخيل
قمر : علمني واحد الشخص مميز
ساجد : " طلع حاجبو " شكون هادا ؟؟
قمر : حتا يجي و نعرفك عليه...يالاه زيد...نشوفوك علاش قاد
ساجد : الى سبقتك شنو تعطيتي
قمر : العصا !
ساجد : حتا لعصا مزيانة هههه

مشاو للإسطبل قمر خرجات سبيدو و الدري الي مقابل الأحصنة خرج لساجد حصان آخر...من بعدما قادو ليهم الأسرجة ركبات قمر فديالها و ساجد ركب حتا هو...خرجو من الفيرمة غادين بشوية...
قمر : " تلفتات عند ساجد " نتلقاو لهيه
حطات يدها على الخيل و ضرباتو بشوية برجلها...و هو اجري بسرعة دار ساجد نفس الشيء و تبعها...غادي كيشوف فيها من الخلف شعرها كيلعب بيه الريح...و مرة مرة ضور عندو كتشوف فيه مبتاسمة...واخة هكاك حاس بلي شي حاجة بيها غير من النضرة الي فعنيها...و كتحاول تخفي الي بداخلها ورا ديك الإبتسامة...
دارو جولة بالخيل و رجعو للفيرمة...كانت الشمس كتغرب.. داخلين كيتمشاو و جارين الأحصنة حتا تصادفو مع سيارة بدر داخلة...هبط من اللوطو و شاف فقمر و ساجد الي معها...قرب لعندهم و هو اجرها بيد وحدة عندو و باسها فخدها...ساجد بقا كيشوف مفهم والو فقط مخنزر فبدر...
بدر : شكون هادا الي معاك
قمر : " شافت فساجد الي قرب اتفرگع " هادا صديقي ساجد...كنا خدامين مع بعض...ساجد هادا خالي بدر
ساجد : " شاف فيها مستغرب " خاااالك !
قمر : اه خالي...هو و جدة عايشين هنا...و هما معامن كنت چالسة
ساجد : " عاد تطلق وجهو " اه متشرفين " مد يدو لبدر "
بدر : " صافحو " مرحبا بيك
قمر : هو الي علمني ركوب الخيل
ساجد : آه عليها
بدر : دخلو للدار انا غا نعيط على الي ارجع الأحصنة
ساجد : لا انا غادي
قمر : چلس تعشا معنا...و نيت تعرف على لميمة
بدر : صافي قمر قالت ليك چلس هي چلس
ساجد : " كيحك فراسو " هههه اوكي

چالسة على أعصابها كتشوف فمها مجمعة مع خالتها...و باها حتا هو مجمع مع راجل خالتها و آيات شادة الفون كتلعب فيه...جاها الملل و مكرهاتش طلع عندو لفوق...منين تغداو طلع مابقا نزل...بقات حاضية الدروج حتا بان ليها هابط...تقادات فالچلسة و نزلات الديباردو على صدرها...
عائشة شافت نجم الدين خارج و هي تعيط عليه...
عائشة : نجم الدين فين غادي اولدي ؟
نجم الدين : غادي للدار
عائشة : چلس حتا تعشا
نجم الدين : لا غير بالصحة " حل الباب و خرج "
قربات ابتسام حدا خالتها و رسمات ابتسامة صفرة على وجها...
ابتسام : خالتي...علاش نجم الدين معايش معاكم ؟
عائشة : آش غا نقول ليك ابنتي...نجم الدين عزيز عليه الهدوء و راك عارفة الحي كيف داير...منين رجع شرا ديك الڤيلا و كان بغانا نتحولو كاملين...مي انا و باه ولفنا هاد الدار...منقدروش نعيشو فبلاصة أخرى...اما ديك شنيولة راه كتنقل مابين هنا و لهيه
ابتسام : اممم مزيان " شافت فمها و غمزاتها "
خديجة : اوى اختي عيشة...مزال مناوياش تزوجي ولدك
عائشة : " بحسرة " معرفت مالو مسكين...فينما نوا اتزوج كتوقع شي حاجة...اللولة ماتت و الثانية فسخات الخطوبة
خديجة : و نتي الي خاصك تشوفي ليه شي بنت الناس...تكون مربية و أصلها معروف...هانتي شفتي ديك الي ختار هو كيف صدقات
عائشة : ولدي نجم الدين ماشي من النوع الي تقولي ليه تزوج بهادي و اقول ليك واخة
خديجة : و علاه نتي غادي تجيبي ليه اي وحدة...أكيد منين اشوف بلي ختاريتي ليه بنت الناس...و مافيها مايتعيب مغاديش ارفض
عائشة : و فين غادي نلقا هاد البنت المناسبة !
خديجة : بعد المرات الحاجة كتكون قدامك و مكيشوفهاش الواحد
عائشة شافت فبنت ختها الي چالسة جنبهم و كتبقشش فالفون ديالها...دايرة راسها مامنتبهاش و هي طالقة وذنيها كتسمع لحديثهم...عائشة شافت فيها مطولا و رجعات ضارت عند ختها...
عائشة : عندك الحق...البنت الي كبرات قدام عنينا خير لينا من وحدة غريبة...و انا باغة نفرح بولدي خلاص...مغاديش نبقا نتسناه حتا انسا وحدة گاع متستاهلو
خديجة : " باستغباء " شنو كتعني بهضرتك ؟
عائشة : خليني حتا نهضر مع عبد الرحمان و نقول ليك
خديجة : هههه...لله فاش كتفكري ؟
عائشة : من بعد و تعرفي

ابتاسمات خديجة برضا...داكشي الي بغات وصلات ليه بسهولة...شافت فبنتها الي كانت فرحانة قربات تنقز من الفرحة...شادة راسها غير بزز و دايرة بحال الى مجايبة خبار...تعشاو معاهم عاد مشاو فحالهم...و البنت و مها ماقداهم فرحة...

حط نجم الدين اللوطو و هبط...طلع لبيتو حيد حوايجو لبس شورط و هبط لتحت...دخل للكوزينة خدا كانيط ديال "Energy drink" و خرج للجردة...مشا للفوطوي الي جنب لابسين و تشبح فيه...جبد سيجارة شعلها كيكمي حتا شاف الفون كيصوني...
ساجد : كاين فالدار ؟
نجم الدين : اممم...امتا جيتي ؟
ساجد : هاد الصباح...شوية و انا عندك
مدازش بزاف ديال الوقت حتا دخلات سيارة ساجد...خرج و هو ابان ليه نجم الدين چالس فالجردة...قرب عندو...شافو نجم الدين و ناض تسالم معاه تعانقو عناق رجولي...
نجم الدين : عجباتك أمريكا...مقلتش غادي طول هاد المدة كلها
ساجد : الواليد بدا كيعيا...و كان خاص نشد عليه الخدمة...اش خبارك ؟
نجم الدين : مكفسة
ساجد : سمعت...زعما معارفش فين تكون مشات ؟
نجم الدين : " هز فيه راسو " و نتا عارف
ساجد : شنو غادي نعرف...و انا عاد جيت
نجم الدين : " بشك " عمرها هضرات معاك ؟
ساجد : فالأول كنا على اتصال...و من بعد كلا تشغل و مبقينا هضرنا مدة طويلة
نجم الدين : " مد ليه كانيط " حاس بلي قريب نلقاها
ساجد : و شنو غادي دير منين تلقاها...ميمكنش ترجعها الى هي مبغاتش
نجم الدين : " تكا على الفوطوي " هادشي بيني و بينها
ساجد : كان بينك و بينها فاش كنتو باقي مخطوبين
نجم الدين : شكون قال ليك سالينا !
ساجد : انا مباغيش نتدخل...حينت القرار كيبقا ديالها...و لكن منين خرجات من حياتك خاصك تحتارم قرارها
نجم الدين : باغة تمشي مغاديش نحبسها...لكن قبل خاصها تشرح شي حوايج و ديك الساع الله اعاونها

بقاو چالسين و كل واحد فاش كيفكر...ربما فنفس الشخص لكن الأفكار مختالفة...ساجد مشاعرو مخربقة من جهة فرح بلي علاقتهم انتهت...و من جهة أخرى حاس بصاحبو و شنو كيمر بيه حاليا...غير من الحالة الي كيشوفو فيها...اما نجم الدين فكانت حاجة وحدة كضور ليه فراسو و باغي اتأكد منها...
وصل منتصف الليل و هو انوض ساجد...ودع نجم الدين و خرج فحالو...نجم الدين حتا هو طلع لبيتو انعس...

في اليوم الموالي ساجد ناض متحمس...ركب فسيارتو و توجه للفيرمة...دخل من بعدما حلو ليه الباب...نزل و شافهم چالسين فچليسة بلي فوطوي تحت ظل شجرة كبيرة...مشا سلم على الجدة باس ليها يدها...
فاطمة : الله ارضي عليك اولدي
ساجد : " خربق لقمر شعرها " صباح لخير لمشعكة
قمر : معندك شغل جاي عندنا مع هاد الصباح
فاطمة : " قرصاتها " كوني تحشمي...هاكة الناس كيعاملو ضيافهم
ساجد : غير خليها ولفت على القميع ديالها
فاطمة : " كتشوف فيه بابتسامة " من امتا كتعرفو بعضياتكم ؟
قمر : شي عام
ساجد : قربنا نكملو عامين
قمر : واو گاع هادشي داز
فاطمة : " قربات عند قمر " فكرني فجدك...كيشبه ليه بزاف حتا هو كان زوين...و گاع البنات تابعينو و لكن اختارني انا...غير جدك مكانش داير داك الزواق
قمر : " حابسة الضحكة " هادوك تاتوز الميمة
فاطمة : واخة هكاك غزال تبارك الله

ساجد سمعها و جاه الضحك حبسها غير بزز...شافت فيه قمر و هي دير ليها بالإشارات ها واحد المعجبة...حك راسو و ضار كيشوف فجهة لاخرى كيضحك...چلسو مع فاطمة مجمعين حتا ناضت قمر و ساجد خرجو كيتمشاو فالطبيعة...
ساجد : ممكن نعرف علاش خليتي كلشي و مشيتي ؟
قمر : كان أصعب قرار خديت...الي ممكن ندم عليه حياتي كاملة
ساجد : واش نجم الدين هو السبب ؟
قمر : انا السبب...اي مصيبة وقعات كنكون انا السبب من وراها...آديتو بمافيه الكفاية...اللهم انساحب من حياتو قبل منزيد نآذيه
ساجد : " وقف و شد فيها قابلها معاه " هاد الهضرة الي كتقولي غير منطقية...كيفاش نتي الي كتسببي المصائب...متحمليش راسك حوايج معندك علاقة بيهم...انا عارف بلي نجم الدين دخل لحبس على قضية عمك...و نتي شهدتي ضدو حينت باك حطك أمام الأمر الواقع
قمر : شهدت ضدو حينت كنت جبانة...هو عاوني ما مرة ما جوج...و انا باش جازيتو خليتهم دخلوه للحبس و شهدت ضدو " بانفعال " و كن غير جات على هاكة " الدموع نزلو من عنيها " انا صدقت قتااااالة...عرفتي شنو درت...انا قتلت خطيبتووووو...انا قتلت نااااهد البنت الي كان كيبغي...الحادث فاش ماتت انا كنت سبابوووووو

حطات قمر يديها على وجها و انهارت بالبكا...ساجد بقا واقف مصدووووم من الهضرة الي سمع...قرب عندها و عنقها كيطبطب على ظهرها...
ساجد : نتي مقتلتي حد...كان حادث...ماشي نتي خرجتي فيها عن قصد...و حتا نتي كنتي على فراش الموت...هي كتاب ليها تموت فداك الحادث حينت تقادة أجلها...علاش كتحملي راسك ذنب مدرتيهش
قمر : " هزات راسها فساجد " نجم الدين الى عرف غادي اكرهني هئ هئ...منقدرش نستحمل كرهو ليا...غا نزيد نكره راسي أكثر...نهار عرفت كنت غادي نحماق...مقدرتش نقولها ليه...داكشي باش مشيت و خليتو...حينت الى تخلا عليا هو...غا نموت فيها
ساجد : " كيمسح ليها دموعها " شووو
ساجد حاط يديه على خدودها كيمسح ليها الدموع...بقا سارح فعنيها الي كيبريو و شفارها الفازگين...نزل عنيه لشفايفها الي ولاو حمرين...و بلاما اشعر هبط وجهو و حط شفايفو على فمها...و فجأة تجرات من بين يديه و جاتو لكمة على وجهو...على إثرها طاح فلرض...حط يدو على فمو و ضور وجهو و هو ابان ليه نجم الدين واقف كيغلي...و شاد فيد قمر الي كلها كترجف...

...و بلاما اشعر هبط وجهو و حط شفايفو على فمها...و فجأة تجرات من بين يديه و جاتو لكمة على وجهو...على إثرها طاح فلرض...حط يدو على فمو و ضور وجهو و هو ابان ليه نجم الدين واقف كيغلي...و شاد فيد قمر الي كلها كترجف...
وقف ساجد كيمسح جنب فمو من الدم...و كيشوف فنجم الدين الي وجهو حمرررر و جسمو متشد باغي اهجم...عرف راسو هاد المرة تمادى و مكانش عليه اقرب ليها بهاد الطريقة...
قمر حاسة بيدها على وشك تقطع...بكترت ما مزير نجم الدين قبظتو عليها...لكن الخوف الي ركبها كان غالب و معرفاش شنو كيضور فراسو أكيد فهم غلط...حاولات تجر يدها لكن كيف حس بيها نجم الدين...و هو اضور خنزر فيها بطريقة غريبة خلعاتها...
ساجد : طلقها
نجم الدين : " ضار عندو " نتا آخر واحد اهضر
ساجد : عارف راسي غلطت...مي معندكش الحق ت
نجم الدين : " بصوت أعلى " ساااااااجد...غبر من هنااااا...قبل ما نغلط فييييييك
ساجد : مامحركش من هنا...الي خاصو امشي هو نتا...ماشي كلشي بيناتكم سالا
طلق نجم الدين من يد قمر و قرب عندو...شنق عليه من الكول بيد و نزل عليه باليد لاخرى لوجه...
نجم الدين : مزال كتهضر...دايراها قد راسك و كتهضررررر " نزل عليه بلكمة أخرى " آش داك تقرب ليهااااا...شكووووون نتااااا حتا تبوسهااااا...هاديييييك ديالييييييي اناااااا...معندك الحق تقيسهااااا
ساجد : ماشي تفارقتوووو...مزال ماباغي تفهم بلي مشات و خلااااتك

رجع نجم الدين كيضرب فيه...ساجد حتا هو مكانش من العاگزين...رد الدقة لنجم الدين و هما اتشابكو دقة فيا دقة فيك...قمر بقات كتشوف فيهم مصدومة...غير بان ليها الدم فوجاهم بجوج و هي تقرب باغة تفرقهم...
حطات يدها على دراع نجم الدين بغات تجرو...تنطر منها و بديك القوة تلاحت لرض...حسات بشي يدين شادين فيها عونوها وقفات...ضارت و هو ابان ليها بدر...شدات فيه و عنيها عليهم...
قمر : " بترجي " خالي بليز فارقهم...غادي اقتلو بعضياتهم...عافاااك دير شي حاجة
تلفت بدر كيشوف فجوج وحوشا كيضربو فبعضياتهم...حتا واحد فيهم مباغي اتراجع...قرب عندهم و هو ادخل بيناتهم...فرقهم و جر ساجد بصعوبة لبعيد و كيحاول اتحكم فيه...
بدر : مالنا...شنو واقع هنا ؟
نجم الدين كان غادي عندهم و هي توقف ليه قمر فطريقو...
قمر : صافي باركة...شوف وجهك كيف ولى
شاف فيها نجم الدين مطولا و هو عاقدهم...بانت فيه معصب بالمعقول بعدها بيديه و تم غادي...رجعات وقفات ليه قدامو و عنقاتو من كرشو...وقف جامد و مصدوم من حركتها...حس براسو فشل و هو حاس بيديها معنقينو...استنشق ريحتها الي كان موحش هاد الشهورا كلها...كان غادي احماق بالتقلاب عليها...و الي زادو انو معارفش علاش مشات و خلاتو فجأة...
قمر كيف حساتو هدا و هي تبعد حادرة راسها...جات غادية و هو اجرها حتا ضارت كلها...
نجم الدين : فين غادية...مزال متفهمناش

جرها من وراه غادي بخطوات كبار...بالكاد قادرة تواكبو فالمشية ضارت شافت خالها طلق من ساجد و تابعها...دارت ليه بيدها غير خليك...خرج نجم الدين من الفيرمة حل اللوطو و شاف فيها...
نجم الدين : طلعي
دارت كيف قال ليها و ركبات...ضار ركب حتا هو و زاد مكسيري...بقاو غاديين فصمت حتا واحد مهضر...كانت حاسة بيه فحالة ممكن اتفرگع عليها فاي لحظة...التازمات بالصمت لأنها مقادراش تبرر فعلتها...وقف نجم الدين اللوطو كانو وصلو لمكانهم المعتاد جنب الشاطئ...
بقات قمر كتشوف قدامها شحال...عاد تشجعات و ضارت عندو...بان ليها الدم نازل من فوق حاجبو...هزات يدها بغات تقيس بلاصة الجرحة...و هو اشد يدها و ضار عندها...زير على معصمها و شاف فيها بنضرة قاصحة...
نجم الدين : عجباتك البوووسة ؟
قمر : " حركات راسها بلا " م متفهمش غلط... أ انا ك كنت
نجم الدين : " بين سنانو " علاااااش خلتييه ابوووسك...علاااااااش...شنو بيناااااتكم ؟؟؟
قمر : " كتكمش عنيها بألم " مابيني و بينو والو...و مكنتش عارفة غايدير تصرف بحال هاداااك
نجم الدين : " طلق من يدها " حسابي معاه مزال مسالى
قمر : علاش كضاربو...هو راه صااااحبك...مخاصكومش تخسرو علاقتكم بسبب وحدة بحالي
نجم الدين : " خنزر فيها " اه هو صاحبي...لكن نخسر معاه ألف مرة...لا قرب ليييك مرة أخرى
قمر : " نزلات دمعة من عنيها " انا منستاهلش هادشي الي كدير على قبلي...انا منستاحقش داك الحب الي كتحس بيه من جهتي...متخلنيش نتعذب كثر من هاكة...متصعبش عليا الأمور و خليني نساااااك

حلات باب اللوطو و نزلات كتجري بكل ما فجهدها...حتا تجرات من دراعها و ضورها عندو...شد فيديها بجوج بقوة و عنيه فعنيها...
نجم الدين : غلطتي فاش مشيتي و خلتيني...غلطتي فاش بعدتي عليا...غلطتي فاش مسارحتنيش بالحقيقة...علاش تلومي راسك على شي حاجة مكانتش بيدك...نتي ماشي قتالة " كيحرك فيها " سمعتي...نتي ماشي قتالة...و الي وقع ماشي ذنبك
شافت فيه بدهشة كيفاش حتا عرف...أكيد سمع حديثها هي و ساجد...نزلات عنيها مقدراتش تشوف فيه مزال...شافت فعنقو و هي تبان ليها السنسلة الي هداتو فعيد ميلادو...قلبها رجع كيضرب بسرعة كيفاش حتا باقي لابسها لحد الآن...

حط نجم الدين يدو تحت ذقنها و هز ليها راسها...نص غضبو تلاشى فاش شاف الدموع فعنيها...اه تصدم فاش سمع بلي كانت طرف فالحادث...و لزمو لحظات باش استوعب داكشي الي سمع...لكن نبرة الألم الي كانت فصوتها و هي كتعاود لساجد...و خوفها من انو اهجرها نهار اعرف...
خلاه احس بشنو مرات فهاد الفترة...كل واحد فيهم كان كيتعذب فجهة...لكن مزالو كيلومها على هروبها بدون متقول ليه آلسبب...كان حاير معارف كيف اتعامل معها فهاد اللحظة...و الي زاد الطين بلة هو تصرف ساجد...لحد الساعة باقي كيغلي من الداخل فاش كيتذكر المنضر...أكيد مغاديش ادوزها ليه بالساهل...
قمر : أردا انا
نجم الدين : هاد الإسم...فقط المقربين الي من حقهم اعيطو ليا بيه
قمر : " بلعات الغصة " سمحليا...ممكن طلقي بغيت نمشي فحالي
نجم الدين : بغيت نطلقك...لكن مقادرش...خايف تمشي و منرجعش نلقاك مرة أخرى...عرفتي شنو داز عليا و انا كنقلب عليك...و معارف حتا السبب الي خلاك تمشي...علاش مصارحتنيش اقمر...علاش ؟!
قمر : مقدرتش...من داكشي الي سمعت...عرفت بلي كنتي كتبغي خطيبتك لدرجة كبيرة...و انا الي تسببت فالحادث فاش ماتت...كيفاش باغيني نجي نصارحك
نجم الدين : نتي كنتي عارفة بلي هي فداك الطاكسي ؟
قمر : " حركات راسها بلا "
نجم الدين : خرجتي فالطاكسي عن قصد ؟
قمر : " عنيها مغرغرين " هئ لااا
نجم الدين : " جرها عندو " سو علاش غادي نلومك و لا نكرهك !
قمر : " انفاجرات بالبكا " من نهار عرفت و انا عايشة فالعذاب...معرفتش شنو ندير...و وقتما شفتك كنحس براسي غا نموت...حقدت على راسي و كرهت داك النهار...تمنيت كن حتا انا مت
نجم الدين : " جرها عنقها " شوووو...منعاودش نسمع هاد الكلمة من فمك

بقا مدة معنقها عاد حس بالراحة...دور يدو على خصرها و اليد لاخرى كيدوزها على شعرها...و حاط نيفو على راسها...
نجم الدين : " بصوت هادئ " علاش قطعتي شعرك ؟
قمر : " كتحرك شفايفها فوق صدرو " نهار خليتك...كيف رجعت للدار...وقفت قدام المرايا...كرهت راسي و اي حاجة فيا...بان ليا المقص و انا ندوز عليه
نجم الدين : و رجعي ليا شعر حبيبتي
قمر : " طعات معها السخونية و قلبها بغا اسكت "
نجم الدين : " بعدها و قابلها معاه " حتا هاكة جيتي زوينة " بجدية " لكن آخر مرة تقطعيه...سمعتي !
قمر : " حركات راسها باه و حطات يدها على حنكو " لحيتك كبرات
نجم الدين : شحال هادا منقصتها...عقلي مكانش معيا بسبابك...آخر مرة تخبي عليا شي حاجة...آخر مرة تمشي و تخليني...حينت ساعتها مغاديش نغفر ليك تصرفاتك...واخة نعرف نحيد هاد القلب من بلاصتو
قمر : " كتشوف فيه بعنيها حشمانة من تصرفاتها " عمرني نبعد عليك مزال
نجم الدين : و ساجد...كن ما العشرة الي بيناتنا...كان تصرفي معاه غايكون أسوأ...من الأحسن تبعدي عليه
قمر : اوكي...واش تصالحنا ؟
نجم الدين : مزال

دار يدو فجيبو و جبد خاتم الخطوبة ديالها...شد يدها بعصبية و دارو ليها فصبعها...
نجم الدين : هادا تعاودي تحيديه...نطير ليك الصبع من جدرو...مفهوووم
هزات يدها كتشوف فالخاتم...قلباتها و هي تشوف اسم نجم الدين محفورة فيه...تبسمات و عنيها فازگين بالدموع...
قمر : " تعلات و باستو فحنكو " سمحلياا
نجم الدين : " زير عليها من خصرها " الى مسمحتش ليك...غير انا الي غادي نتعذب
قمر : " بدلع " ممكن نعيط عليك أردا ؟
نجم الدين : " تحنا و عضها من شفتها " من نهار سمعتها من عندك...مبقيت حملت نسمعها من عند شي حد آخر من غيرك
قمر : " حطات يدها على شفتها " همجي
نجم الدين : راه غادي نمرمدك فهاد الرملة
قمر : ممكن طلب !
نجم الدين : شنو هوا ؟
قمر : بليز ماتخاصمش نتا و ساجد
نجم الدين : نتي خرجي هاد السوق
قمر : و لكن
نجم الدين : صافي هضرنا
قمر : أوكي " حطات يدها على وجهو " خاصك تداوي هاد الجروح...عندك علبة الإسعافات فاللوطو ؟
نجم الدين : اممم
قمر : " جراتو " اجي نداويهم ليك

دخلو للوطو و جبد نجم الدين العلبة مدها ليها...حلاتها و هزات قطن كتنضف ليه الجروح...دارت بومادا فصبعها و دارتها ليه فوقهم...جبدات سپارادرا و دارتها ليه فوق عنيه...قربات و باستو فوقها...
نجم الدين : " بابتسامة " كترجعي الدين ! 
قمر : اممم هههه
نجم الدين : و فيناهيا الفائدة ؟
قمر : " صغرات عنيها " الربا حرام
شدها نجم الدين من فكها...و زير على خدودها حتا خرجو شفايفها...و هو اقبلها بقوة...
نجم الدين : و هادشي الي كديري نتي ماشي حرام...ست شهور و انا محروم من هاد العنين و من هاد الفم...لكن غير بلاتي...غادي نخلف فيك هادشي كولو
قمر : سمحليا...انا منستاهلكش
نجم الدين : " دوز يدو على شعرها " قلبي سامحك فور ما شفتك...و عمرك باقي تقولي هاد الهضرة...انا عاد رجعات فيا الروح منين شفتك

قمر : خاصنا نرجعو
نجم الدين : تماك فين كنتي هاد الوقت كولو ؟
قمر : آه
نجم الدين : " ديمارا اللوطو " كنتي قريبة...و انا قربت نخرج نقلب عليك خارج البلاد
قمر : باش عرفتي فين كاينة ؟
نجم الدين : تبعت داك القرد...سولتو واش عارف فين كاينة...و كذب ليا فوجهي
قمر : راه حتا هو لقاني غير لبارح
نجم الدين : و شنو دابة غادي تبقاي عايشة تماك
قمر : اه مرتاحة بزاف...ديك البلاصة كانت ديال عائلة جدي بابات ماما...تماك تزادت و كبرات...و منين مات جدي جراو عليهم عمامها...باعو الفيرمة و فرقو الورث بيناتهم و لاحو لجداتي شوية ديال الفلوس...قدرات تكري بيت بيهم و خدمات حتا كبرات ولادها...منين ماما تلاقات ب بابا و عرف قصتها...شرا الفيرما من عند دوك الي خداوها و كتبها فسميتها...و سكن فيها عائلة ماما
نجم الدين : " وقف اللوطو قدام الفيرما " و الشركة غادي ترجعي ليها ؟
قمر : حاليا لا
نجم الدين : على خاطرك " كيقرب لوجها " دابة انا وقتما بغيت نشوفك...خاصني نضرب 3 سوايع ديال الطريق كل نهار
قمر : علاش غادي تجي كل نهار ؟
نجم الدين : " عقد حجبانو " و شنو " دوز صبعو على خدها " عرفتي شحال توحشتك

بقا كيقرب لشفايفها...قمر ضورات عنيها و هي تلمح بدر...واقف فباب الفيرما و كيشوف فيهم...دفعات نجم الدين حلات الباب و خرجات كتجري عندو...نجم الدين حل عنيه لقا غير الفراغ...شافها واقفة مع نفس الراجل الي فرقهم هو و ساجد...غا بان ليه حط يدو على وجها و هو اخرج...
قرب عندهم مخنزر فبدر الي حتا هو مبادلو نفس النضرات...
بدر : واش نتي بخير...شكون هادا الي مشيتي معاه
قمر : هادا
نجم الدين : خاطيبها...و نتا شكون ؟؟
بدر : " شاف باستفهام فقمر " بالصح ؟
قمر : " حركات راسها بآه "
بدر : انا خالها
قمر : " شافت فنجم الدين مصغر عنيه فيها " و الله الى خالي...خو ماما الصغير
بدر : " شنق عليها " نتي خفتي منو...و مخفتيش مني انا
نجم الدين : " حيد ليه يدو من على عنق قمر و صافحها " متشرفين
بدر : ههههه متشرفين...دخل تعرف على الواليدة
نجم الدين : مرة أخرى...منين نجي انا و العائلة
بدر : انشاء الله...نخليكم...قمر متعطليش

دخل بدر و هي تقرب قمر عند نجم الدين...شدها من خصرها و ضربها براسو ضربة خفيفة...
نجم الدين : عقلي...هربتي و خلتيني منشور
قمر : و راه خالي كان كيشوف فينا
نجم الدين : جاب الله صدق خالك...كنت جاي ناوي على خزيت
قمر : مالك وليتي شاعل على والو
نجم الدين : على والو ! خليني ساكت حسن
قمر : خاصني ندخل " عنقاتو "
نجم الدين : " عنقها و خشا وجهو فعنقها " مسخيتش " باسها فعنقها " سيري دخلي

دارت ليه باي و دخلات...ركب نجم الدين فسيارتو و زاد...كانت غادة داخلة للدار حتا بان ليها ساجد چالس فالجردة...شافها و هو اوقف و قرب لعندها...كيف وصل تلقى صفعة من عند قمر...
قمر : آخر مرة تعاود بحال ديك الفعلة " شافت وجهو " تبعني
دخلات و ساجد تابعها من اللور...قالت ليه اتسنا فالصالة...طلعات جابت الدوا و فاصمة...رجعات عندو هازة داكشي بقا غير كيشوف...داوات ليه و هي مخنزرة...كيف كملات و هي تنوض غادة طالعة حتا عيط عليها...
ساجد : قمر !
قمر : " تلفتات "
ساجد : كنعتاذر...عارف الفعلة الي درت لا تغتفر
قمر : من بعد أ ساجد...هاد الساعة مقدراش حتا نسمع ليك و لا نقبل اعتذارك
طلعات مع الدروج و ساجد حتا هو خرج زاعف...ركب فاللوطو و شد الطريق لدارو...

مرو أيام و نجم الدين و قمر كيتشاوفو يوميا...كيجي ياخدها من الفيرمة كيقضيو وقت مع بعضهم كل مرة فبلاصة...خبرها بلي غايعلم عائلتو بلي رجعو مع بعض و اجيبهم اتعرفو على جداتها و خالها...فرحات قمر بهاد الخبر واخة كانت خايفة لا ميحملوهاش من بعد داكشي الي دارت...
لكن الي كيهمها هو نجم الدين و تشبتو بيها...برهن ليها مدى قوة حبو ليها...شكات فيه انو غادي اتخلا عليها فأول مشكل لكن برهن ليها العكس...الحاجة الوحيدة الي كتمنا هو تجمع بحب حياتها فأقرب وقت...و عائلتو اتقبلوها مرة أخرى...و تمنات ان ساجد اقدر انساها بسرعة و ترجع علاقتو بنجم الدين كيف كانت...
رجعها نجم الدين للفيرمة توادعو و مشا لدار والديه...دخل لقاهم مجموعين على طبلة العشا...
نجم الدين : السلام عليكم
الكل : عليكم السلام
عائشة : زيد اولدي تعشا
نجم الدين : غير بالصحة...تعشيت
آيات : مالك هاد الأيام كلها كتعشا فالزنقة...ياك معندكش مع ماكلة ديال الزنقة
نجم الدين : ديها فراسك اشنيولة...الواليد...الواليدة...منين تساليو بغيتكم فواحد الموضوع
عائشة : حتا حنا بغينا نهضرو معاك فواحد الموضوع و ناخدو رأيك
نجم الدين : أوكي نطلع نبدل و نرجع

كملو عشاهم و جمعات آيات الطبلة...تم نازل نجم الدين لابس سروال سورڤيت و تيشورت...جلس مقابل مع باه و مو...
نجم الدين : شنو هو الموضوع...فاش بغيتوني ؟

عائشة : شنو رأيك فابتسام بنت خالتك ؟
نجم الدين : " باستغراب " علاش هاد السؤال!! 
عائشة : و غير قول شنو رأيك فيها
نجم الدين : خاصني نعرف فاش...حينت انا مفهمتش سؤالك
آيات : " حنقزات " بغاو اعرفو واش كتعجبك...واش كتشوف فيها مراتك المستقبلية...هادشي علاش كتسول
عائشة : اللقوة العافية...سدي داك الفم
آيات : " حطات يدها على فمها " هاهو
عائشة :شنو قلتي اولدي...البنت مربية و حادگة تبارك الله...غزالة و مخصاها حتا حاجة
نجم الدين : آه متافق معاك فهادشي الواليدة...لكن انا كنحسبها بحال ختي
عائشة : لكن هي ماشي ختك...و مغاديش نلقاو حسن منها...و انا جاتني هي انسب وحدة ليك
نجم الدين : راكم عارفين انا خاطب قمر
عائشة : ياك تفارقتو و هي فسخات الخطوبة
نجم الدين : وقعو بيناتنا مشاكل و دابة تحلو
عائشة : من بعد گاع داكشي الي دارت فيك...رجعتيها...علاش بالسلامة على قلة البنات...دابة فينما اوقع شي مشكل تهز راسها و تغبر...و نتا تچلس تشوا عليها...من الأحسن بعد عليها لأنها متصلاحش ليك...بنت خالتك تبارك الله صبارة و مأدبة و
نجم الدين : " قاطعها " تكون كيفما بغات تكون...انا مغاديش نتزوج شي وحدة من غير ديك الي اختاريت
عائشة : عبد الرحمان واش سمعتي الولد آش كيقول...مشافش حالتو كيف كانت هاد الشهورا...زادت و خلاتو بلا كلمة بلا جوج...و دابة جاي تقول باقي باغيها
عبد الرحمان : هو عارف مصلاحتو فين كاينة...مبغاش بنت خالتو مغاديش نفرضوها عليه
آيات : انا مابغيت ليه لا هاديك لا هادي...حتا وحدة متفرح
عبد الرحمان : آيات سكتينا...ماشي وقت مزاحك هاد الساعة
آيات : " حدرات راسها " واخة ابابا
عائشة : " وقفات " الى باقي باغيها الله اعاونك بيها...مخلي بنت ألف واحد اتمناها و كلشي كيشهد بأخلاقها...و نتا لاصق ليا فوحدة مجا منها غير المشاكل...ناهد بعدا كانت تبغيك كتر من راسها و عمرها سمحات فيك...ماشي بحال هادي...علم الله آش من عجب غايخرج منها مزال
نجم الدين : " زير على يديه و وقف " آخر مرة نسمع بحال هاد الهضرة و لا تقارني بيناتهم

خرج ركب فسيارتو و مشا لدارو...تعصب من هضرة ديال مو...و الي زاد كتعاود ليه على بنت ختها و رداتها ملاك...و هو الي جايب خبارها شنو كانت دير ففرنسا...و حتا فاش جات شحال من مرة حاولات تقرب منو بلا حشمة...غير مبغاش اخصر صورتها قدام العائلة و دار عين ميكة...

طلعات آيات لبيتها تكات فبلاصتها مكونكطيا...حتا طلع ليها ميساج من عند إبتسام عرفاتها شنو بغات...نخلات الميساج ديالها و مدازش بزاف ديال الوقت حتا عيطات ليها...
آيات : " جاوبات " شنو ؟
إبتسام : مالكي عاقدة شوكتك...بغيت غا نسول فيك...صاڤا ؟
آيات : بخير
ابتسام : كيف دايرة خالتي ؟
آيات : زي الفل
ابتسام : و راجل خالتي و نجم الدين ؟
آيات : كلشي كان بخير...حتا تجبدات سيرتك
ابتسام : كيفاش...شنو وقع ؟
آيات : ماما قالت لنجم الدين شنو رأيك فابتسام 
ابتسام : " بفرحة " اهاه
آيات : قال ليها بحال ختي هههه
ابتسام : ميمكنش
آيات : و مالي غانكذب عليك...المهم بلاما تبقاي تحلمي بزاف...علاما فهمت راه رجع لخطيبتو
ابتسام : شنوووووو...لا ميمكنش
آيات : قالها بفمو
ابتسام : و شنو كان در فعل خالتي و باباك...ياك قلتي خلاتو و كلشي كرها
آيات : ماما قالت ليه لا...مبغاتوش ارجع ليها...بابا محايد ما مع حتا جهة
ابتسام : " ولات كلها كترعد " ميمكنش ارجع ليهااا...مااااايمكنش

قطعات و ناضت كتجري دخلات على مها لبيتها...
ابتسام : ماما نجم الدين...رجع خطيبتو هئ هئ...صافي مشا كلشي
خديجة : بشوية عليك...و عاودي ليا شنو واقع
ابتسام : " عاودات ليها شنو قالت ليها آيات "
خديجة : و منين ختي مموافقاش معندك علاش تخافي...نجم الدين عمرو خسر الخاطر لوالديه...و الى شاف مو مصرة منظنش ابقا مع ديك خيتي...معندك لاش تخافي...نتي ديري عقلك و خليك متبثة قدامهم...و انا غادي نتصرف
ابتسام : " عنقات مها " الى تزوج بشي وحدة من غيري غادي نحماق...فالأول كان غير كيعجبني...مي دابة بغيتو ليا بوحدي...واخة نضور حتا نعيا مغاديش نلقا شي راجل بحالو
خديجة : نجم الدين مغادي يدي حتا وحدة من غيرك...غنستعمل جميع الطرق و نبيع الي ورايا و الي قدامي باش نحقق ليك أمنيتك
إبتسام : شنو ندير باش ابغيني...حاولت شحال من مرة نتقرب منو...حتا كنحس بيه غايضور فيا...علاش حتا سمح ليها من بعد ماخلاتو...شنو الي مميز فيها
خديجة : بحال هادوك كيلويو على الرجال بيديهم و رجليهم...و تلقا مخلات حتا شوافة مدازت عليها...لكن طير حتا تعيا نجم الدين مغاديش اكون ليها و لا لغيرها...

يوم جديد فاقت قمر متحمسة و فرحانة...بعد الحديث الي دار بينها و بين نجم الدين ليلة أمس...ناضت لبسات تيشورت بيض مع چيپ حمرا و لبسات معاهم سبرديلة...قادات شعرها مموج و دارت مايكاپ خفيف...نزلات لتحت و خرجات للجردة...لقات جداتها چالسة هي و بدر كيفطرو...
قمر : " باست جداتها " صباح النور لميمة
فاطمة : صباح النور انوارة الدار
قمر : " چلسات جنبها " نتي هي النوارة ديالنا
بدر : " رشف من قهوتو " بديتو ثاني...الحب عندكم غا كيتشايع...ديرو غا بحساب الي محروم
فاطمة : و شكون حبسك...بغيت غير نعرف امتا ناوي تزوج...راك غملتي حدايا
قمر : ههههه عندها الصح...امتا ناوي
بدر : علاه انا كرهت...كون لقيتها مغاديش تلقاوني چالس حداكم
قمر : شنو المواصفات الي باغي فشريكة الحياة ؟
بدر : ماعنديش مواصفات محددين...المهم تكون بعقلها و امرأة مستقلة...عندها هدف فحياتها...ماشي كل همها هو تاكل و دير شوپينغ
قمر : " تبسمات " هههه فاش كتهضر...جات وحدة فبالي...غير هو فيها واحد العيب عنيها زايغين...فينما شافت التيتيز كتحوال
بدر : لا باين العربون...بحال هاد الماركة غا خليها عندك
قمر : شحال فيك...راك غتموت وحيد
بدر : منين تزوجي و نتهنا عليك...ديك الساع نشوف راسي
فاطمة : هي لقيتي ليها شي ولد الناس ؟
بدر : هههه لقاتو لراسها الواليدة...ممحتجاش
فاطمة : " ضارت عند قمر " و مخبيا عليا...شكون هادا...ياكما داك الراجل الزوين الي جا عندك
قمر : لا ماشي هو اجدة...قبل ما نجي عندكم كنت مخطوبة...وقعو شي مشاكل و بعدنا...و دابة رجعت انا وياه...ونيت لبارح هضرت معاه و قالي غايجي اليوم اشوفك
فاطمة : اييه مرحبا بيه...الى نتي باغاه و موافقة عليه...منزيدوك غا لخير
قمر : " باست ليها راسها " شكرا الميمة...الله اخليك لينا

حط الأثقال و ناض هز الفوطة مسح بيها وجهو...العرق نازل ليه مع ظهرو و شعرو فازگ...هز قرعة ديال الما شرب منها و لاحها هي و الفوطة...خرج من لاصال و طلع لبيتو...دخل للحمام نقص من لحيتو خدا دوش و خرج لاوي عليه فوطة كحلا...
دخل للدريسينغ لبس سروال چينز كحل و تيشورت بيض...لبس جوردن فرجليه بيضة مشط شعرو و رش ريحتو...هز نضاضرو ديال الشمس لبسهم و نزل لتحت...داز لكوزينة قاد ليه قهوة من الماشين شربها و خرج...
ركب فاللوطو و توجه للفيرما...كيف وصل حلو ليه الباب و دخل...حط اللوطو و خرج بانت ليه قمر جاية و ابتسامة مشرقة مرسومة على شفايفها...كيف شافها تطلقو ملامح وجهو الي كانو معقودين...قربات ليه باستو من خدو...
قمر : لميمة كتسناك
نجم الدين : ياكما جداك صعيبة بحالك
قمر : كتاااار مني هههه " كتشوف فاللوطو " ماجى معاك حتا حد ؟
نجم الدين : " حك عنقو " غير مقلتهاش ليهم...المرة الجاية نجيو كاملين
قمر : اوكي...يالاه نمشيو...خليتها چالسة بوحدها فالجردة

سبقاتو و هو اتبعها نجم الدين و شد فيدها...تلفتات عندو لقاتو غادي و كيشوف قدامو...
قمر : " جراتها " جدة !
نجم الدين : و مالي شنو درت...شديت ليك غير فيدك
قمر : واخة
نجم الدين : " خشا يديه فجيابو " اوكي على خاطرك
قمر : " جراتو من التيشورت " تقلقتي ؟
نجم الدين : " ببرود " لا
وصلو للبلاصة فين چالسة فاطمة...الي لمحات نجم الدين من بعيد و برگاتو من راسو لرجليه...
قمر : لميمة هادا نجم الدين خطيبي
نجم الدين : " حيد النضارات و تحنا باس ليها راسها " تشرفت بلقاءك
فاطمة : الله ارضي عليك اولدي " كتحقق فيه " تبارك الله
قمر : " حابسة الضحكة "
فاطمة : چلس اولدي مرحبا بيك
چلس نجم الدين جنب قمر و مقابل مع الجدة...الي كتشوف فيه و تعاود بركات عليه بالأسئلة...فين تعرف على قمر و شنو كيدير و فين ساكن...كان شاد معاها الخاطر و جاوب على كل أسئلتها...قمر كانت فرحانة لأنها حسات بحب الجدة و اهتمامها و خوفها على حفيدتها...
أول مرة تحس بهاد الشعور...و حتا من طرف نجم الدين الي كان كيهضر و اتلفت اشوف فيها بنضراتو الي كيخليو قلبها اخفق بسرعة...تغدا معاهم على طلب الجدة...من بعدما سالاو ناضت وقفات...

فاطمة : نمشي نرتاح...مرحبا بيك أولدي نجم الدين...نتا دابة من العائلة الي نوصيك عليه هو تهلا ليا فحفيدتي الغالية...راها أمانة فرقبتك...والديها الله ارحمهم ميتين بحوج...و انا معرفت أجلي امتا...باغة نتهنا عليها و ديك الساع لا جات الموت مرحبا بيها
قمر : " ناضت عنقاتها " متقوليش هاد الهضرة الميمة...الله اطول فعمرك
فاطمة : الصراحة ارتاحيت منين تعرفت على الشخص الي اختاريتي...باينة فيه ولد الناس " قربات عندها " و غزاااال تبارك الله...كيشبه لجدك سبحان الله
قمر : " ضحكات " حتا هو كيشبه ليه ؟
فاطمة : هادا بزاف...زينو عربي...تقول غير المرحوم
قمر : ههههه...باينة كنتي كتبغي جدي
فاطمة : اييه فاش فكرتيني...خليني نمشي...من بعد و نعاود ليك على قصتنا
قمر : " باستها " واخة احبيبتي
وقفات قمر كتشوف فجداها غادة و كتعگز...كيف بانت ليها دخلات للدار و هي تحس بيدو جراتها...

نجم الدين : " چلسها فوق رجليه " شنو كنتو كتوشوشو ؟؟
قمر : " بغات تنوض " بلاتي نچلس فبلاصتي
نجم الدين : " زيرها " لا خليك چالسة هنا
قمر : اه و الى جا شي حد ؟
نجم الدين : علاه شكون عايش معاكم ؟
قمر : كاينة غير انا و جدة...خالي و الخدامة و الناس الي مقابلين الفيرما
نجم الدين : هي كاينين الرجال ؟
قمر : اممم...الفلاحة و واحد الدري مقابل الإسطبل
نجم الدين : اممم
قمر : علاش ؟
نجم الدين : بغيت نعرف و صافي
قمر : " دورات يديها على عنقو " عجبتي جدة ههه...قالت ليا كتشبه لجدي...و على حساب ماعودات ليا عليه...جدي كان بوگوص هههه
نجم الدين : " ابتاسم " ماشتي حفيدتو كيف طلعات...إسم على مسمى...خرجات ليا لعقل
قمر : " نعتات لراسها بصبعها " انا !!!
نجم الدين : " كيمرر يدو على ظهرها " و شكون من غيرك...امتا احن عليا الله و نديك معيا...مابقيتش بغيت نرجع للدار بلا بيك
قمر : وليتي زربان
نجم الدين : من شحال هادا...راه ست شهور ضاعت منا و حنا مفارقين
قمر : خاص نتتلاقى بعائلتك...و نعتاذر منهم هو الاول...و ديك الساع الي بغتيها ديرها
نجم الدين : ماشي ضروري تعتاذري ليهم...هادشي كيخصنا انا وياك...الي معجبو حال مشغلناش فيه
قمر : " بتردد " واش مبغاوش...منين جيتي بوحدك حسيت...انا مستاعدة نمشي نعتاذر ليهم
نجم الدين : " بصرامة " انا قلت ليك ممحتاجة تعتاذري لحد...صافي سدينا
قمر : " بنبرة حزن " يعني مبغاوش...انا الي درتها لراسي
نجم الدين : شتي الى بكيتي غادي نوض نمشي...ياك انا الي كنهمك ها انا معاك...آش بغيتيهم هما 
قمر : مابغيتش علاقاتك كلها تخرب بسببي
نجم الدين : نوضي نوضي...و نتي باغة تقلبي لينا الجو حزن...قلتي ليا كتعرفي تركبي الخيل...يالاه وريني نشوف

مشاو قمر و نجم الدين للإسطبل...جرات حصانها الأسود و نعتات لنجم الدين على حصان آخر...
قمر : ركب فهادا ديال خالي " بغات طلع "
نجم الدين قرب و شد فيها من خصرها...ساعدها حتا ركبات و بسهولة ركب من وراها...
نجم الدين : " هضر و فمو حدا وذنها " انا باغي نركب فهادا
قمر : " تبورشات " أا..اه اوكي
دوز نجم يديه جنب خصرها بحال الى معنقها...شد فالصمطة الي حاكمة الحصان و ضربو برجلو حتا تحرك...خرجو من الفيرمة و الحصان بدا كيجري بسرعة تابع اوامر نجم الدين...جابو جولة و رجعو للفيرما دخلو للإسطبل و هو انزل نجم الدين...
مد يديه لقمر تلاحت عندو شدها من خصرها...حطها ببطئ فلرض كانت قريبة ليه بزاف...هزات عنيها فيه و هي تغرق فشوفاتو...بقاو مدة كيشوفو فبعض حتا تسمع صوت تحنحين و هي ضور قمر...شافت خالها و هي طلع معها الحمورية...بعدات عليه...
قمر : قلتي ليا غادي ياك...بالسلامة

مشات كتجري خرجات من الإسطبل...قاست خدودها كانو غادي اطرطقو بالسخونية...طلعات لبيتها و سدات عليها...
قمر : ناري على خالي كيجي غير فالأوقات الحرجة...كن غير تعطل شوية " لمسات شفايفها بصباعها " توحشت قبولاتو و شفايفو... " عاقت براسها " اويلي انا مالي وليت مكبوتة...كلشي منك انجم الدين...اااخخخ
سمعات صوت الفون و هي تهزو...خرجات لبالكون و جاوبات...
نجم الدين : خالك شي نهار نخرج فيه بشي راس
قمر : حشومة عليك...شنو دار ليك
نجم الدين : حرم عليا رزقي
قمر : احم...اصلا البوسان ممنوع...حتا لمورا الزواج
نجم الدين : هيا لا تزوجنا غدا...انا مابقيتش قادر نصبر
قمر : بغيت تحل الأمور مع والديك هو الأول
نجم الدين : غادي تحل...ناوي نهضر معاهم آخر مرة...غدا غندوز نشوفهم
قمر : ممكن نجي معاك ؟
نجم الدين : " بعد صمت " اوكي غدا ندوز عليك
قمر : اوكي...تصبح على خير
نجم الدين : كنبغييييك
قمر : " بفرحة " حتا اناااا " قطعات "

في مكان آخر و بالظبط فأحد الملاهي...چالس ساجد فطبلة مقنتة و هاز كاس ديال المشروب...رشفو دقة وحدة و حطو بالجهد فوق الطبلة...تكا بظهرو على الفوطوي كيشوف فحلبة الرقص...الناس محيحين و عاطينها للشطيح و الموسيقى على الجهد...
لفتات انتباهو بنت شعرها قصير كتشطح...سد عنيه و رجع حلهم ناض من بلاصتو غادي قاصدها...حط يدو على كتفها و و دورها بقوة...
ساجد : قمر !
........... : " بصوت عالي " شنو ؟
ساجد : " بقا كيشوف فيها حتا توضحو ليه ملامح وجها " سمحيليا
ضار رجع لبلاصتو و طلب مزيد من المشروب...شرب حتا جاب الكاو...جبد الفون ديالو و دوز نمرتها...
قمر : " كتحك عنيها " الووو...ساجد !
ساجد : " بتلعثم " قمر سمحي ليااا...انا راني كنتعذب
قمر : " تگعدات " ساجد...واش شارب...فين كاين ؟؟
ساجد : انا فبار ****** غير شوية هادا باش شفتك...شوية و نتي تغبري
قمر : بقا فبلاصتك مكتحركش...انا جاية عندك

ناضت قمر لبسات جينز و لاحت عليها كاپ...هزات الكونطاكت و هبطات بشوية كانت ديك الوحدة ديال الليل...ركبات و كسيرات بعدة تلاثة ديال السوايع عاد دخلات لمدينة...توجهات للبار الي فيه ساجد حطات اللوطو و دخلات...
كان الزحام بقات كتقلب عليه بعنيها...حتا لمحاتو چالس فالطبلة الي قدامها...مشات وقفات قبالتو...هز ساجد عنيه و هو اشوفها واقفة مخنزرة...ابتاسم و دار ليها بيدو تچلس حداه...
قمر : نووض نوصلك للدار...شو على حالة...رجعتي لعادتك القديمة...نوووض
ساجد : " وقف ساجد بصعوبة " جيتي...و الله حتا جيتي " حط يدو على كتفها " ماشي كنتخيل هههه
قمر : " بعصبية " زيد قدامي...جاية من الجايحة فنصاص الليل بسببك...تحرك

شدات فيه مسنداه عليها و جراتو للخارج...فنفس المكان كانت نادين...چالسة فالطبلة المقابلة مع طبلة ساجد...كيف شافت قمر داخلة و هي تهز الفون ديالها خدات ليهم صور...خاصة فاش كانو مقاربين و بانو بحال الى معنقها...
عارفة بلي نجم الدين رجع لقمر...كل خبارو كتوصلها من عند جلال خوها...هاد الأيام جات للمغرب خصيصا على قبل نجم الدين...لأنها مزال ما استسلمات و باقة حطاه فراسها...
خرجات قمر ساجد بصعوبة...حلات اللوطو و عاوناتو ركب عاد ضارت ركبات...ديمارات اللوطو متاجهة لدارو...كيف وصلو عيطات على العساس اعاونها...دخلوه و طلعوه لبيتو حيدات ليه صباطو...غطاتو و جات خارجة حتا شدها من يدها...
ساجد : سمحيليا
قمر : " ضارت عندو " انا سامحتك...لكن الى رجعتي لهادشي...الشرب و السهران عمرك باقي تشوف وجهي
ساجد : عمرني نرجع ليه وعد " تبسم و سد عنيه نعس "
خرجات قمر و ركبات فسيارتها...رجعات للفيرما دخلات لبيتها عاد تنفسات...بدلات حوايجها و تخشات فبلاصتها...

✴ أصبحنا وأصبح الملك لله ✴

ناضت قمر كتفوه و حاسة بالتعب...مقدراتش تنعس بعدما شافت وضع ساجد...الي كتلوم راسها عليه...معارفاش شنو دير باش تخليه انساها...هو صديقها الي معزتو كبيرة عندها...الى بغاتو ابقا جنبها كصديق و هي عارفة بشنو كيحس من جهتها...فغادي تكون أنانية و من جهة أخرى نجم الدين الي وصاها تبقا بعيدة عليه...الليل كولو و هي كتفكر فشنو المعمول...
دخلات للحمام دوشات و حاولات تبعد تفكيرها من هاد المشكل...لأنو عندها مشكل آخر و الي كيتعلق بعائلة نجم الدين...مصرة على انها تقابلهم و مستاعدة لأي رد فعل منهم...حينت من حقهم احقدو عليها من بعد داكشي الي دارت...
جهزات راسها و تسنات نجم الدين حتا اتاصل بيها...قال ليها تهبط هزات صاكها و خرجات عندو...حلات الباب و طلعات سلمات عليه و هو اديماري اللوطو...شافتو غير ساكت و هي تكلم...
قمر : خايفة بزاف
نجم الدين : معندك لاش تخافي

دورات وجها لجهة النافدة...بقاو غاديين فصمت حتا وصلو للدرب فين دارهم...وقف اللوطو و حل الباب خرج...خرجات قمر و متخوفة من شنو ممكن اوقع...حل نجم الدين الباب و دخلو...سمع صوت الهضرة كثيرة فالدار...كيف وصل لصالون لمح خالتو هي و بنتها و هو اعقد حجبانو...
شافتو خديجة و هي تنوض كتفرنس...
خديجة : اهلا ولدي نجم الدين...عاد سولت ختي عليك...شحال هادي مشفناك
غير بانت ليها قمر من وراه و هي تمحى الإبتسامة من وجها...خنزرات فقمر و هي كطلع فيها من راسها لرجليها...قمر حسات بالجو مكهرب جات بغات تخطو خطوة اللور...حس بيها نجم الدين و هو اشد فيدها و دخل...
نجم الدين : " موجه الهضرة لآيات " فيناهوا الواليد
آيات : خرج اصلي
نجم الدين : هاحنا لفوق بما جا
إبتسام : " بابتسامة مصطنعة " معرفتيناش على اللآنسة الي معاك
نجم الدين : هادي خطيبتي
إبتسام : " كتغلي من لداخل " علاه خطبتي...گاع مكانت فخباري " قربات عندهم " انا ابتسام بنت خالة نجم الدين " مدات ليها يدها و عنيها على نجم الدين "
قمر : " تجاهلات يدها " و انا خطيبتو كيف سمعتي
ابتسام : " جمعات يدها باحراج "
نجم الدين : الواليدة منين ارجع الواليد...بغيت نهضر معاكم على انفراد

جر قمر و طلعو لفوق...خلاو ابتسام و مها بغاو ياكلو راسهم...هزات خديجة صاكها و دارت فيها مقلقة...
خديجة : نوضي نمشيو فحالنا...منين ماشي مرحب بينا هنا...معدنا لاش نبقاو چالسين
عائشة : مادريش فبالك...نجم الدين أكيد مقصد فيها والو
خديجة : لا اختي...نجم الدين الي كنعرف ماشي هو هادا...عمرو تعامل معايا بحال هاكة...دربي الفگد فولدك قبل ما اكروه فيك حتا نتي...زيدي نتي تبعيني
خرجات خديجة و بنتها شدو طاكسي...كيف طلعو و هي تبدا تنتف ابتسام فشعرها...
ابتسام : صافي مشا...شفتي كيف كان شاد فيها و جابها للدار بزز عليهم...صافي مشا من بين يدياااا
خديجة : تبتي المجعورة...مغاديش نچلسو نربعو يدينا و هي تربح بيه...انا غادي نتكلف و نخليه الوحها و مباقيش اشوف جهتها...جبتي داكشي علاش وصيتك ؟
ابتسام : " جبدات بلاستيكة من صاكها " فاش طلعت لبيتو...قلبت حتا عييت...لقيت غير المشطة ديالو و هزيتها
خديجة : مزيان هاكة نبغيك

سد نجم الدين الباب بعصبية و طلق من يد قمر...مشا چلس فوق الفوطوي كيسوط...بقات متبعاه بعنيها و مفاهمة والو...
قمر : ديك المرا خالتك هي و بنتها !
نجم الدين : اممم
قمر : شنو قصتهم ؟
نجم الدين : الوالدة بغاتني نتزوج بيها
قمر : " تقبط عليها قلبها " أا...ت تزوج بيها !!
نجم الدين : آه
قمر : و شنو قلتي ليها ؟
نجم الدين : " هز فيها راسو " و شنو فنضرك !
قمر : علاش كتهضر معيا بهاد البرود...من الصباح و نتا هاكة...ياكما ندمتي لاش رجعنا...انا
وقف نجم الدين و قرب عندها...
نجم الدين : كيفاش ندمت...كن ندمت مغاديش نجيبك معيا...و مغاديش نوقف ضدهم على قبلك...انا باغيك نتي...باغي نملك قلبك و نكون ملجأك...باغي الثقة تكون أساس علاقتنا...حينت نهار اتسلل الشك كلشي غادي اتهدم...و مغاديش ابقا مستقبل لهاد العلاقة
قمر : مفهمتش علاش كتهضر! 
نجم الدين : من بعدما تفارقنا لبارح فين كنتي ؟
قمر : " جمدات فبلاصتها "
نجم الدين : هضري
قمر : كنت ناعسة...حتا عيط عليا ساجد...كان سكران و مقدرتش نخليه...داكشي باش مشيت عندو و وصلتو للدار
نجم الدين : خرجتي فداك الوقت و غادة فديك الطريق " شدها من مرفقها " ماخفتيش على راسك...كن تعرض ليك شي حد...و لا وقعات ليك شي حاجة هااا !
قمر : معرفتش شنو ندير...و مقدرتش نقولها ليك
نجم الدين : علاش ماقلتيهاش لياااا...كن مشيت انا جبتو...لا نتي مشيتي خرجتي راسك و سقتي فديك الطريق فنصاص الليل...و غادة لبواط مزال
قمر : ش شكون قالها ليك
نجم الدين : دابة فنضرك مهم شكون قالها ليا...راها وصلاتني...و زدتي درتي بحال الى موقع والو و سكتي
قمر : غلطت حينت مقلتهاش ليك...مي و الله الى كنت خايفة من رد فعلك...عمري باقي نخبي عليك شي حاجة " قربات شدات ليه فيدو " ام سوري...آخر مرة
نجم الدين : منين قلت ليك بعدي على ساجد...و خلي بيناتكم مسافة راه عنيتها...هاكة حسن باش نتجنبو المشاكل
قمر : " عنقاتو " سمح ليا حبيبي
نجم الدين : " ضمها " عمرك تعاوديها اقمر...ها وذني منك

سمعو الدقان فالباب...
آيات : نجم الدين...راه بابا جا و كيسول عليك
نجم الدين : خليك هنا...شوية و نرجع
حل نجم الدين الباب و خرج...هبط و دخل للصالون لقا باه و مو چالسين...سلم عليهم و دخل فصلب الموضوع...
نجم الدين : من غير قمر مغاديش نتزوج بشي بنت أخرى...نتوما معارفينش شنو واقع بيناتنا و الحكاية كلها...انا من ديما كنحتارم قراراتكم كيفما كتحتارمو اي قرار خديت...حتا هاد المرة خليو ثقتكم فيا و خليوني نتزوج بالبنت الي اختار قلبي...إما هي و لا والو...و الى تعرفتو عليها أكثر غادي تبغيوها و تفهموها...من البعد كتبان فشكل ممكن تجيكم متعجرفة مدللة و غير مسؤولة...لكن هي العكس...انا تجاوزت بزاف ديال المصاعب بسببها...كنا أعداء و صرنا كنبغيو بعض و حتا واحد مغادي اوقف بيناتنا...و كنتمنا ديرو بحساب هاد الهضرة الي قلت...و تقبلو بيها وسطكم

چالسة قمر فطرف الناموسية و كتحرك رجلها بتوثر...خايفة لا ابقاو مصرين على قرارهم...عارفة نجم الدين مغاديش اقبل اتزوج ببنت خالتو...هاد الحقيقة متأكدة منها...خوفها غير من ان العلاقة بوالديه تسوء بسببها...
واخة اتزوجو مغاديش تكون فرحانة مئة فالمئة...و هي عارفة بلي خداها بعدم رضا والديه...وقفات فاش شافت الباب كيتحل...كانت متوقعة نجم الدين حتا كتبان ليها الأم ديالو...دخلات عائشة قاصدة قمر وقفات قدامها كتشوف فيها...
الصدمة سرات معها فاش عنقاتها عائشة و كطبطب على ظهرها...
عائشة : مرحبا بيك فعائلتنا
بادلاتها قمر العناق و انفاجرات بالبكا...عائشة دوزات يدها على شعر قمر بحنية...
عائشة : متبكيش...غيسمعك داك الصگع اسحاب ليه كنسلخ فيك ههههه
بعداتها و جراتها چلسو فوق الناموسية...
عائشة : أكثر حاجة كتهمني هي سعادة ولدي...فاش شفت كيف كانت حالتو هاد الشهورا...الصراحة حقدت عليك...واخة مكانش كيبين لكن قلب الأم كيحس...طلبت و دعيت انو انساك...و فاش جا قال لينا رجعتو مابغيتش و رفضت...خفت اتعاود نفس السيناريو مرة أخرى...و ارجع اتألم من جديد...مدازش عليه قليل و عانا بما فيه الكفاية...بغيتو اعيش هاني و اتزوج و اولد ولادو...قبيلة فاش كان كيهضر معنا عليك...شفت اللمعة فعنيه و كيفاش كيهضر عليك...عاد عرفت مدى حبو ليك...لهادا انا سامحتك من قلبي و قابلة بيك تكوني مرت ولدي...بغيتك فقط تسعديه و تحافضي عليه لأنو فعلا كيبغيك
قمر : نجم الدين هو حياتي و منقدرش نعيش بلا بيه...غلطت مرة و مشيت و خليتو...كنت عايشة فالعذاب و انا بعيدة عليه...هو الي عندي فهاد الدنيا
عائشة : دابة حنا ولينا عائلتك...مغاديش تكوني مرت ولدي فقط...نتي دابة فمتابة بنتي آيات...عارفة الأم ديالك ماتت و نتي صغيرة...و تحرمتي من كلمة ماما...الى مكان عندك مانع حسبيني فمقام امك...و كوني أكيدة فينما حتاجيتي حضن غادي تلقايني فجنبك...البنت الي كيبغي ولدي غالية بزاف
قمر : " عنقاتها "
قمر من كترة صدمتها مقدات تقول والو...متفاجآتش من طيبة ام نجم الدين و قلبها البيض...بقات عاجزة عن الكلام و عبرات على فرحتها بالدموع...
واقف نجم الدين فالباب كيشوف فيهم...عاد ارتاح منين تصلحات الأمور بين حبيبتو و عائلتو...

بعدات عائشة على قمر مسحات ليها دموعها و ناضت...تمات خارجة شافت ولدها واقف مبتاسم...ارتاحت فاش شافت الفرحة فعنيه هادشي الي بغات...هو سعادة ولدها و اكون مرتاح...كيف وصلات عندو تحنا باس ليها على راسها بامتنان...
عائشة : الله اسعدكم
نزلات مع الدروج و نجم الدين دخل و سد من وراه الباب...تلفتات قمر شافتو و هي تنوض كتجري ترمات فحضنو...عنقها بالجهد حتا حسات بضلوعها تخشاو فصدرو...خشا وجهو فعنقها و طبع قبلة حارة...
نجم الدين : بكاااية
قمر : هادو غير دموع الفرحة
نجم الدين : واخة هكاك...متبكيش...دموعك كيفشلوني
قمر : " مسحات وجها " صافي من اليوم مغاديش نبكي مزال
نجم الدين : " باسها فخدها " و هكاك الله ارضي عليك...منبقاش نشوف الدموع فهاد العنين
قمر : " حركات راسها باه "
نجم الدين : اه نسيت ماقلت ليك...راه علمتهم السيمانة الجاية غادي نتزوجو
قمر : " خرجات عنيها " السيمانة الجاية...و لكن
نجم الدين : مكاين حتا سبب نأجلوه مزال...و مكرهتش نديرو حفل صغير...غير العائلة و الناس المقربين...شنو بان ليك
قمر : ما عنديش مشكيل...الناس الي كيهموني راه محسوبين...و هما الي بغيت نشارك معاهم فرحتي
نجم الدين : انا مكرهتش نكون غير انا وياك...نمشيو نديرو لاكط و نديرو من هنا دازو هههه
قمر : ههههه...الى درناها كلشي غادي ادعي فينا...أكيد ماماك غادي تبغي تحضر عائلتها و حتا انا جدة مغاديش تعاتق معيا
نجم الدين : صافي الآلة نديرو هاد الحفل
قمر : خاصني نبدا التجهيزات من اليوم...سيمانة راه قليلة بزاف
نجم الدين : فينما حتاجيتي المساعدة جي لعندي...غانديروه فالدار عندي...سو انا غا نتكلف بالمكان...سبقت هضرت مع منظمة حفلات الزفاف و كلفتها...داكشي الي بقا عليك
قمر : امتا درتي هادشي ؟
نجم الدين : نهار لقيتك...اتاصلت بيها
قمر : " ابتاسمات " مابغيش ضيع الوقت ههه
نجم الدين : لا...هاد المرة مامفاكش...خاص نربطك بيا قبل ما تنزل علينا شي مصيبة أخرى
قمر : انا هي سبب دوك المصائب
نجم الدين : " قرصها فخدها " نتي هي موصيبتي الي مخرجة ليا العقل...و كنموووت فيك... " تنهد " يالاه نزلو لتحت كيتسناو فينا

هبطو بجوج و چلسو مع عائشة و عبد الرحمان...جبد ليهم نجم الدين سيرة العرس و أصر على قرارو اكون الأسبوع الجاي...رغم اعتارض مو لكنو كاه مصر...هبطات آيات سلمات على قمر و چلسات جنبها...تغدات معاهم عاد وصلها نجم الدين للفيرمة و مشا لخدمتو...
دخلات قمر و مشات ديريكت عند جداتها...خبراتها بكلشي و هي طايرة من الفرحة...باركات ليها فاطمة و فرحات لفرحها...كانت راضية على اختيار قمر واخة شافت نجم الدين غير مرة وحدة...لكن خبرتها فالحياة خلاتها تشوف الصدق فكلامو و حبو لقمر...خرجات من عندها قمر و دخلات لبيتها...
هزات الفون بغات تخبر أعز الناس عليها...دوزات نمرة شروق الي جاوبات فالحين...
شروق : هادي نتي الحمارة...عاد تفكرتيني...اوى آش غادي نقول ليك...سيري الله اعطيك الباسر...الله اعطيك غبارة كتر من هادي...مخلياني كنسول و نقلب عليك كيف الهبيلة
قمر : ممكن نجي عندك ؟
شروق : الله ياختي...اجي و الله حتا تجي...باش نضربها لختي بشي نتفة فاعلة تاركة
قمر : نتلقاو فالريسطو الي قريب للشركة ديالك !
شروق : باغية الشهود...مي ماشي مشكيل و الله حتا نعطيك علاش تقلبي

قطعات قمر و هي ميتة بالضحك...مشات بدلات حوايجها و هبطات...خدات سيارتها و اتاجهات للمطعم فين دارت مع شروق...دخلات و شدات طبلة بعد لحظات بانت ليها شروق داخلة...كيف وصلات عندها و هي توقف قمر...
شروق : لاش معيطة عليا ؟
قمر : " قربات و عنقاتها " توحشتك
شروق : " دفعاتها " عند بالك غادي نسامح ليك...و نسا شنو درتي بهاد السهولة...راك غالطة
قمر : عارفة راسي غلطت فحقك...و كان عليا نبقا على اتصال بيك...لكن كنت خايفة نجم الدين القاني...داكشي باش طفيت الفون و قطعت الإتصال مع اي واحد كنعرفو...ماشي غير نتي
شروق : دابة انا وليت اي واحد...اممم هكاك
قمر : چلسي بعدا و غادي نشرح ليك كلشي
شروق : " جلسات " ممكن تستعجلي...ماعنديش وقت و خاص نرجع للشركة
قمر : " هزات حاجبها " نتي مالك من الصباح و انا كنهضر معاك مقاد...و نتي غا مزايدة كتنفخي...سمعيني مزيان و ديك الساع سيري الى باغة تمشي
شروق : آه نسيت راسي معامن...يالاه قولي شنو عندك...قنعيني

بدت قمر كتعاود ليها كلشي.. من معرفتها بالي هي سبب الحادث فاش مات خطيبتو السابقة...لحديثها مع ملاك و شنو قالت ليها...شروق بانو ملامح الصدمة على وجها و هي كتسمع لقمر...حسات بداكشي الي دازت منو فهاد الفترة و بقات فيها...ناضت شروق عند قمر عنقاتها كطبطب عليها...
شروق : گاع هادشي داز عليك...و انا چالسة نتشكا حينت متاصلتيش بيا...خاص مي العصا...سمحي ليا راه غير تخلعت عليك
قمر : معندك لاش تعتاذري...انا كنت باغة نتواصل معاك شحال من مرة و كنت خايفة...لكن دابة كلشي تحل و غادي نتزوج الأسبوع الجاي
شروق : شنوووو...هي بغيتي نجم الدين ادفنك حية !!

قمر : " ميقات فيها " علاه انا غادي نتزوج شي واحد من غير نجم الدين...حماقيتي
شروق : هي تصالحتووو !
قمر : آاه تصالحنا و كلشي توضح...و أخيرا غا نعيشو هانيين بدون مشاكل
شروق : فرحت ليك اصحيبتي...لقيتي جداك و خالك...و غادة تزوجي بالراجل الي كتبغي...لما ضربينا غا بجلايلك اوصلنا شوية السعد الي عندك...انا راه الشوفان مبقاش قادي ليا...حتا انا بغيت نتزوج و ندير البسالات
قمر : ههههه...بغيتي نشوف ليك مع خالي ؟
شروق : ماشي حشومة عليك تلبقيني لواحد شارف...هادي هي الصحبة
قمر : شكون قال ليك شارف
شروق : واخة كيبقا خالك و فمقام خالي حتا انا مجاتش
قمر : هههه اوكي على خاطرك...بغيتك تعاونيني فالتجهيزات...نجم الدين زرب عليا و قال ليك والو الأسبوع الجاي العرس
شروق : " صغرات عنيها " و راه باينة زربان باغي ادوق الحلوى
قمر : باز عقلك غا ف
شروق : فاش ؟؟ انا قلت غا الي كاين...راه صبر معاك...هاربة عليه ست شهور تلقاه مسكين قرب اتشير
قمر : ههههه الله استر
شروق : و الله الى سعداتك...شوفي ليا الى عندو شي ولد عمو و لا صاحبو اكون بحالو
قمر : كاين غا نجم الدين واااحد...و مكاينش بحالو
شروق : تصوري عليا...عطاتك ليام
قمر : نوضي رجعي لشغلك...و انا وقتما حتاجيتك غادي نعيط عليك
شروق : كتعرفوني غا فتمارة...باااز ليكم

🍂🍂🍂 وققات الطاكسي تحل الباب و نزلو جوج عيالات دايرين النقاب...تمو داخلين مع حي شعبي أغلب الديور فيه ديال الصفيح...غاديين جنب الحيط و كيبجگو فالناس بحال الى ماعمرهم شافو بحال هاد الأجواء...
شي كيلعب الكورة شي مقنت مع الحيط كيتكيف...كيف الصغير كيف الكبير و العيالات چالسين فباب ديورهم شادين النميمة و عاطينها لتبرگيگ...وصلو لباب واحد الدار الي مكانش عندها الباب أصلا و دايرين ليها غير الخامية...
قربات وحدة من لاخرى و هضرات بشوية...
إبتسام : ماما...واش متأكدة هادي هي الدار ؟
خديجة : اه هيا...راه فايت جيت عندها مع جارتنا
ابتسام : ناري هادشي كيخلع...شوف كيف دايرة غير من برا...علم الله كيف غتكون من لداخل
خديجة : زيدي زيدي...مجايينش نحوصو...جايين نقضيو الغرض

تقدمات خديجة و دخلات و هي كتعيط و ابتسام من وراها...خرجات عندهم امرأة فالأربعينيات و داتهم لواحد البيت...سلتو صبابطهم و دخلو كيضورو عنيهم فداك البيت...الي مفرش فيه واحد بوشروات قديم و فوسطو طبلة حادرة...دايرين بيها مخاد محيين...لاحت خديجة النقاب فوق راسها و چلسات...ابتسام بقات واقفة كتشوف فجنابها و عايفة...
........... : تسناو هنا...نمشي نعيط على لا عبوش
خديجة : واخة هاحنا كنتسناو حتا تجي على خاطرها
مشات المرأة و هي تجر خديجة بنتها من جلايلها...
خديجة : نتي چلسي
ابتسام : " حيدات النقاب من على وجها " فين غانچلس فوق هاد الزبالة !
............ : " بصوت مدعدع " و سمحي لينا ماشي قد المقام

تلفتات ابتسام و هي تبان ليها امرأة عجوز...لكن باقة شادة فراسها...شكلها زرع الخوف فابتسام...من غير صوتها الي حرش بحال شي راجل...وجها كولو مكمش ضاربة الكحل البلدي و مدوراه على عنيها حتا دارت شكل دائرة و سايح...
عندها وشام خضر بين عنيها و لاخر فدقنها...من غير دوك الي فيديها...لاوية شال كولو ألوان على راسها و عاقداه اللور...مخليا عنقها معري الي عامر عقيق...نزلات ابتسام عنيها و هي تشوف فرجليها الحفيانين و كلهم مشققين...
جلسات المرا فبلاصتها جنب الحيط و الطبلة قدامها...مخفاوش عليها نضرات ابتسام و ملامح وجها الي باين عليهم الإشمئزاز...قاطعات سهوتها و نطقات ببحة...
لاعبوش : غا تچلسي و لا تبقاي واقفة
خديجة : " جرات بنتها " هاهي غتچلس
چلسات ابتسام جنب مها مقابلين مع لاعبوش...شوية دخلات المرا ديال قبيلة هازة مجمر فيدها زاند...حطاتو فوق ديك الطبيلة و خرجات...جرات لا عبوش واحد الرزمة جنبها و جبدات منها كموسة...حلاتها و هزات منها كمشة فيدها و لاحتها فالمجمر حتا طلع الدخان...
لاعبوش : " كتشوف فابتسام " جاية على قبل شي واحد ياك! 
خديجة : اه اه الاعبوش...باغيين تفسخي لولد ختي السحر الي دايرة ليه واحد بنت الحرام...و
لاعبوش : و شنو ؟
خديجة : و خليه ابغي بنتي للزواج...و بحلاوتك
لاعبوش : جبتي شي حاجة كتخصو ؟
ابتسام : " جبدات المشطة من صاكها و مداتها ليها " هادي ديالو
لاعبوش : كن جبتي المسائل ديالو...كان اتقضى ليك الغرض دغيا
خديجة : المسائل...كيفاش !!!
لاعبوش : الما ديالو...كان عليك تاخديه منين نعستي معاه
ابتسام : و لكن انا عمرني نعست معاه
خديجة : اه الا عبوش بنتي باقة عزبة
لاعبوش شافت فابتسام و ضحكات بطرف فمها...ابتسام بقات غير ساكتة و كضور فعنيها...

خدات لاعبوش المشطة و لاحتها فالمجمر و زادت فوقها شي غبرة...بدات كتردد شي كلمات غير مفهومين...دفلات على صبعها و خشاتو وسط الرماد...ابتسام و مها غير متبعين شنو كدير بدهشة...شافوها رسمات نجمة سداسية فوق الطبلة و هي كتمتم و سادة عنيها...
فجأة فتحاتهم و شافت فابتسام و نعتات ليها تقرب...خشات لاعبوش صبعها ففمها و مصات منو گاع داك الرماد...دوراتو فمها مزيان و هي تدفل بيه على ابتسام فوجها...ابتسام بعدات ممصدقاش بلي بزقات ليها فوجها...حبسات الرضة غير بزز و مها كدير ليها بعنيها غير صبري...
لاعبوش هزات داك الرماد خواتو فكيس و مداتو لخديجة...
لاعبوش : هادا تخلطو مع الما و تشلل بيه " مدات ليها قرعة فيها سائل بحال الما " و هادا ترش بيه حوايج داك الي بغات اتزوج بيها
خديجة : " خداتهم من عندها " واخة لاعبوش...لهلا اخطيك علينا
خشات خديجة يدها فصدرها و جبدات جوا صفر...مداتو لاعبوش و وقفات دارت عند بنتها لقاتها باقة فبلاصتها و هي تنغزها...
خديجة : نتي نوضي يا هاد البنت...نوضي تحركي " جرات ابتسام " الله اعاونك الاعبوش

نزلو على وجاهم النقاب باش حد ما يعرفهم و خرجو...شدو طاكسي راجعين للدار...
خديجة : مالك نتي...شنو وقع ليك وليتي بحال الى ضربك جن...غا صاقلة
ابتسام : " بدات كتحك فوجها " بنت الق*** دفلات عليا...الشارفة المكمشة...كنت غانوض نتف مها من دوك جوج زغبات الشايبين
خديجة : واش حماقيتي...راه دارت غير خدمتها...خاصك تصبري على ود غرضك
ابتسام : هاني صابرة...كلشي على قبل نجم الدين...الى مصدقش هادشي غا نرجع لمها نوريها الدفال...المعفونة لاخرى...تلقا محكات سنانها من عهد الحسن الثاني
خديجة : هاحنا غنمشيو للدار...و تدوشي و نيت شللي بهادشي الي عطاتك...غادي ابقا لينا غير كيفاش نرشو ليه حوايجو بهاد الما
ابتسام : هادي ساهلة خليها عليا...اجي بعدا شحال عطتيها ؟
خديجة : 5000 درهم
ابتسام : " خرجات فيها عنيها " علاش عطياها ثمن قد هاكة!؟؟
خديجة : و كاين الي كيعطي كثر...الفلوس ماشي مهمين خاص غير اصدق داكشي و كلشي اتعوض...الى تزوجتي بنجم الدين فين ابانو الفلوس الي عطيت
ابتسام : " بتدمر " عاطياها 5000د باش دفل عليا...هي الي جات معاها...

🍁🍁🍁 مرو ثلاث أيام كانت فيهم قمر مشغولة بالتجهيزات...مابقات شافت نجم الدين من داك النهار...هو كان مشغول بالخدمة باغي احيد عليه اي حاجة قبل العرس...حينت من ورا العرس غاديين لشهر العسل الي خلاه مفاجأة لقمر...
اليوم الجمعة عيطات عائشة على نجم الدين و قالت ليه اجيب معاه قمر...كيف وصل وقت الغدا خرج من الشركة و توجه للفيرما...صونا على قمر و بعد لحظات خرجات...
شافها شنو لابسة داكشي سامپل...عكس كيف كتلبس فاش كتكون غادة للشركة و لا فشي مناسبة...لابسة كاجوال جينز مع تيشورت و سبرديلة...كتعجبو بأي ستيل خاصة هاكة...و شعرها القصير وتاها و برز عنقها الطويل...حافظ كل تفصيل فيها و متيم بروحها و جسدها...امكن أول مرة اجرب حب من هاد النوع...لدرجة بعد المرات مكيقدرش اتحكم فراسو و هو معها...
حلات الباب و طلعات طبعات قبلة على خدو...شاف فيها بعشق و خشا يدو فشعرها و جرها عندو...قبل شفتيها بحب و بعد كيفرنس...
نجم الدين : تلث أيام ماشفتك...هادي غير تصبير
قمر : ياك قلت ليك ممنوع
نجم الدين : صافي حينت قلتيها...مغاديش نديرها...مكتعرفنيش! 
قمر : كنعرفك مزيان...المنحرف لاخر
نجم الدين : " ديمارا اللوطو " مزال مشفتي الإنحراف ديال المعقول
قمر : باغي تخلعني هههه...انا مكنتخلعش
نجم الدين : مزيان...حينت نهار نشدك راك عارفة
قمر : " بضحكة متوثرة " عارفاك غير كضحك
نجم الدين : و الله مكنضحك

سقلات قمر مرجعاتش هضرات...هي ماشي من النوع الي اخاف من ليلة الدخلة...لكن فاش حسات بنجم الدين هضر بجدية شوية ديال الخوف تسلل ليها...حس بيها بلي الهضرة الي قال مشات و جات معها...منضرها جاب ليه الضحك الي اشوفها دابة...
ميقولش هادي قمر الي كتزرع الرعب فالموضفين ديالها...و لا قمر القاسية الي الكل كيدير بحسابها...قمر مع نجم الدين غير...كتحيد جميع الحواجز و كتصرف على طبيعتها أكثر...و هادا راجع لتأثيرو عليها...
اي أنثى فحضورو كتحس برجولتو الطاغية...و الكاريزما زائد شخصيتو الهادئة الي كتجذب الفتيات...قمر أعجبت بشخصيتو و عطفو و اهتمامو بيها قبل ما تعجب بشكلو...شافت فيه الرجل الشهم و السند الي لقات فأصعب فترة فحياتها...و حتا إخلاصو و كلمتو الي مكيتنازلش عليها و ثقتو بنفسو...
كل هاد الصفات تجمعات فرجل واحد...رجل كانت محظوظة تملك قلبو و اكون نصفها الآخر...عجيب من قبل كانت مكتآمنش بشي حاجة اسمها الحب...و دابة غارقة فغرام الشخص الي چالس جنبها لحد كبير و تقدر تضحي بحياتها على قبلو...كيف دار هو قبل و نقذها بدون تردد...

وقف نجم الدين السيارة قدام الدار...شاف قمر ساهية و هو اقرب عندها...حيد ليها الحزام و حك بلحيتو على خدها...
نجم الدين : فين سرحتي
قمر : لا والو...وصلنا ؟
نجم الدين : امم...يالاه ندخلو...راه شميت ريحة كسكسو ديال الواليدة من هنا
قمر : الله توحشتو...شحال هادا مكليتو
نجم الدين : " بمكر " شناهوا ؟؟!
قمر : " ضرباتو على كتفو " الله استر
حلات الباب و خرجات...نجم الدين حتا هو هبط كيضحك عليها...وقف جنبها كيشوف فيها مخنزرة فيه...سيفط ليها قبلة فالهواء و دار الساروت فالباب بغا احلو...حتا سمع صوت رقيق كينادي باسمو...

إبتسام : نجم الدين !
تلفت هو و قمر لقاوها من وراهم...لابسة غوب مزيرة و لاصقة عليها و دايرة مايكاپ ديال السهرات...و شعرها بوكلي كولشي أوڤر...قربات عندهم و هي تسلم على نجم الدين بالوجه...سحب وجهو دغيا مكانش متوقعها بهاد الوقاحة...
ضارت عند قمر و مدات ليها يدها...صافحاتها قمر و كتشوف فيها كيف كتلوى غا بوحدها...شد نجم الدين فيد قمر و دخل...خلى لاخرى كتغزل شدات فالباب سداتو و تبعاتهم...دخلو للصالون لقاو عبد الرحمان چالس سلمو عليه...سمعات عائشة صوت ولدها و هي تخرج من الكوزينة...سلمات عليه هو و قمر و إبتسام...
عائشة : " شافت فابتسام " اجي ابنتي بغيتك

ناضت ابتسام تبعات عائشة لكوزينة...كيف دخلو شدات عائشة فيد ابتسام و هضرات بحزن...
عائشة : سمحي ليا ابنتي...كنت باغاك مرت ولدي...لكن هادشي غير أرزاق...نجم الدين كيبغي خطيبتو...و حتا هي باين عليها كتبغيه و غادي تسعدو...كنتمنا تلقاي شي ولد الناس حسن من نجم الدين...الي ابغيك و اسعدك انشاء الله...ندمت الي تسرعت و هضرت مع مك قبل ما نفاتحو هو فالموضوع
ابتسام : إذن وافقتي عليها
عائشة : سعادة ولدي هي أهم حاجة عندي...و سعادتو معها هي
ابتسام : " زيرات على يديها " ماشي مشكيل أخالتي...الله اكمل عليهم بالخير
عائشة : " عنقاتها " الله ارضي عليك...و ارزقك ماتمنيتي
ابتسام : " بعدات " إنشاء الله

چالسة فوق الناموسية و حاطة الپيسي فوق حجرها...كتقلب قالتصاور و تعاود كتزومي على كل وحدة و تسب و تعاير...
آيات : بغيت ليك غبارة...بولبنات الله الگيها ليك...غير مالقيتي داكشي الي بغيتي عندي و نتا تقلب عليا...الله ارزيك فداك الي مزيغك...انا بغيت ليك العجز الجنسي...المكبوت ولد المكبوتة
بدات كدوز فتصاور أمير بعصبية...و بلاما ترد البال دارت لوحدة فيهم جيم...غير شافتها و هي تخبط البيسي سداتو و ناضت كتولول...
آيات : " كضرب فوجها " هاكي الحمارة...ها الي ادخل لتصاورو الكلبة...المدلووولة...دابة غادي طلع ليه و اعرف كنت نحنزز ليه فتصاورو...و تزاد فيه ضلعة...أا بلاتي الى حيدتها مغاديش طلع ياك...اه اه
رجعات لبلاصتها و حلات الپيسي بغات تحيد جيم...و هو اطلع ليها ميساج من عند أمير...
💬 أمير : مزال مابغا اهديك الله و تجاوبي على اتصالاتي
كيف شافت الميساج و هي طلع معها الحرارة...واخة تكذب على راسها حتا تعيا و تقول بلي كتكرهو...لكن قلبها كيدق ليه و من نهار تفارقو و هو الوحيد الي فبالها...كتقول خاصني غير الوقت و نقدر نساه...كتذكر راسها بندالتو و نواياه اتجاهها باش تقوي راسها...لكن بدون جدوى كل يوم شوقها ليه كيزيد...
نزلو دموعها و هي كتحدق فالميساج الي سيفط ليها...معارفة كيف تصرف واش تعطيه فرصة و تسمع ليه...و لا تبقا مصرة على قرارها و تبعد عليه...

چالسين فالصالون كل من نجم الدين و قمر و عبد الرحمان...ناض نجم الدين و شار لقمر تبعو...خرجو من الصالة و هو اجرها طالع لفوق...
قمر : فين غادي ؟
نجم الدين : طالعين لبيتي
قمر : غير سير...انا نتسناك لتحت...حشومة كل مرة نجي نطلع معاك لبيت
نجم الدين : ممطلعش صاحبتي...نتي خطيبتي و غدا غاتولي مراتي
قمر : واخة...غير سير انا غانمشي عند خالتي لكوزينة...بغيت نچلس معها شوية
نجم الدين : على خاطرك...انا غنطلع نتوضا باش نمشي مع الواليد لصلاة الجمعة...و منين نتغداو نخرجو
قمر : اوكي

طلق منها نجم الدين و طلع لبيتو...دخلات قمر لكوزينة لقات ابتسام جالسة فوق الكرسي و دايرة رجل على رجل...قربات عند عائشة كتشوف فيها كتفتل كسكسو...
قمر : خالتي نعاونك فشي حاجة ؟
عائشة : كتعرفي ليه ؟
قمر : ههههه الصراحة لا
عائشة : هههه ماعليش...الى بغيتي نعلمك مرحبا... " قربات لعند قمر " حينت نجم الدين عزيز عليه كسكسو...و كتعرفي أقرب الطرق الى الرجل هي معدتو
قمر : ههههه...صافي خاص نجي ندير عندك السوايع
عائشة : مرحبا

ابتسام كانت مراقباهم و كتشوف فقمر بحقد كبير...الي مصبرها هو إيمانها بلي هادشي الي غادي دير لنجم الدين غادي اصدق...شافتهم ماحايرينش فيها و هي تجمع الوقفة...خرجات للصالة بان ليها راجل خالتها جالس بوحدو...عرفات بلي نجم الدين غادي اكون لفوق فبيتو...
طلعات مع الدروج و حلات الباب...طلات مبانش ليها و هي دخل و سدات الباب...مشات لبلاكار ديال نجم الدين...حلاتو و جبدات قرعة صغيرة ديال الزاج من صاكها...حلاتها و بدات كترش نقيطات على قوامجو و التيشورتات ديالو...سمعات باب الدوش تحل و هي تخشي بالزربة القرعة فالصاك...
تلفتات و هو ابان ليها نجم الدين...خارج لاوي فوطة على خصرو...شافها و هو اهز حاجبو و قرب...وقف مقابل معها كيطلع و اهبط فيها...تنهدات و هي كتشوف فيه واقف قدامها بداك الشكل...شافتو مغوتش و مجراش عليها...و هي تعض على شفتها و زادت خطوة لعندو...

كتقرب خطوة بخطوة و عنيها على صدرو العاري...عضات على شفتها و زادت قربات حتا وقفات قريبة ليه...بقا متبع حركاتها و هو هاز حاجبو...هزات يدها و حطاتها على السنسلة كتحسسها فوق صدرو...هزات فيه عنيها و يدها مزال على السنسلة...شافت النضارات القاسية الي موجه ليها...
غير مزادت تحلات و حطات يدها لاخرى على دراعو كتقيس فعروقو الي بارزين...لكن متوقعاتش يهز يدو و احطها على كتفها...لمستو جابت ليها التبوريشة و حاجة وحدة الي ضارت ليها فراسها...هي ان السحر عطا المفعول ديالو...

غسلات عائشة يدها و دارت عند قمر...
عائشة : انا غانمشي ابنتي نتوضا...سيري چلسي فالصالة هنا غتبقاي معذبة
قمر : " وقفات " واخة اخالتي
خرجات قمر من الكوزينة كانت غادة للصالة...شافت فالدروج و هي طلع معاهم...عارفة نجم الدين مزال مخرج...أكيد غادي اكون باقي فبيتو...

كتشوف فعنيه و شفارو الناعسين و يدها مزال كتلعب بالسنسلة...حسات بيدو كتحرك فوق كتفها و شوية حيد ليها الساك بهدوء...و هو اهز يدو لاخرى حتا لفوق و نزل عليها بظهر يدو حتا ضارت كلها...رجعات ضارت شادة فخدها و كتشوف فنجم الدين بصدمة...بان ليها حل الصاك و قلبو خواه كولو فلرض...طاحت القرعة و تشتت الزاج فلرض...هز نجم الدين عنيه مخنزر فيها...
نجم الدين : تكذبي نجيف مك هنا...شنو كنتي كديري فالبلاكار
ابتسام : أا...و والو...و والله ما
ضرب جوج خطوات و وصل عندها...شنق عليها من رقبتها و خرج فيها عنيه...
نجم الدين : " بين سنانو " متحلفيييش...شنوووو كان فديك القرعةةة ؟؟
ابتسام : " كلها كترجف " م م مكان ف فيها و والووو... ك كنت غ
نجم الدين : " زير على عنقها " آخر مرة نسولك...شنووووو كان فالقرعةةةة...و آااااش كنتييي كديرييي عند حواااايجيييي ؟؟؟
ابتسام : ما مدرت والو...عفاك خنقتيني

زير نجم الدين على فكو...هزها حتا ولاو رجليها كيلعبو فالهواء و هو الوحها لرض على الجهد...
نجم الدين : جمعي زبلك و خرجي...قبل ما نقبرك هنا اوجه التخلف " نعت ليها فالنقاطي الي مقطرين جنب البلاكار الي نصو محلول " اتاقيت فيك الله...اما كنت غا نزيدك تلحسي زبلك الي جايبة مخنزة بيه القنت...الله انعل الي رباك...شبعتي تزنديق ففرنسا و جاية تمثلي عليا البرائة و السذاجة...شتي داكشي الي فراسك عمرك غادي توصلي ليه...خرجي تق**** خلااااص

زحفات على يديها و رجليها...حينت القوة باش توقف مشات و ركابيها كيغزلو...عمرها شافت هاد الجانب فنجم الدين و لا عمرها سمعاتو كيسب و مد يدو على شي أنثى...بدات كتجمع فقشها و تحط فالصاك...وقفات بصعوبة و مشات كتجري للباب...كيف حلاتو خرجات و هي تصادف مع قمر...
قمر بقات كتشوف غحنكها و عنقها الي حمرين...ابتسام لاحظات فين كتشوف مرضاتش و بغات تقلب الأمر لصالحها...
ابتسام : " بابتسامة مستفزة " موحال واش كيدير معاك هاكة
قمر : " بقات ساكتة و كتشوف فيها "
ابتسام : كان خاص نودعو بعض قبل ما اتزوج بيك...مبروك عليك ههههه
تمات غادة و هي تحس بقمر شدات فيها و دوراتها لعندها...
قمر : تسناي ندير معاك الصواب " بزقات ليها فوجها " الله ابارك فيك اختي " قربات عندها " و دابة تكركبي مع الدروج...قالت ليك جاية تودعيه...كوني تحلمي على قدك " ضربات بصبعها على جبهة ابتسام " و بعدي على راجلي...حينت تموتي و مايشوفش فيك

ضربات فيها حلات الباب و دخلات...دوزات ابتسام يدها على وجها كتمسح فيه و كتسب فخاطرها و تحلف على قمر...هبطات مع الدروج خارجة قبل ماتشوفها خالتها فديك الحالة...شدات طاكسي و غادة كتهرنن و تلعن فلاعبوش...دخلات للدار و وقفات على مها فالكوزينة...
ابتسام : داكشي مصدقش...الشارفة الهارفة ضحكات علينا
خديجة : " ضارت عند بنتها " اويلي...مالك على هاد الحالة...شنو وقع...درتي ليه داكشي ؟
إبتسام : و عاااق بيا نجم الدين و بهدلني هئ هئ...عمرو باقي غيحملني...و هادشي بسبابك نتي و ديك المكمشة اااععع
خديحة : "ضربات ففخاضها " اويلي على حصلك...فين غادي نردو وجاهنا...مال مك منونخة...حاجة بسيطة بحال هادي ماقدرتي ديريها !
ابتسام : منقصاكش...باركة غير هادشي الي فيا...ضربني حتا حسيت بالضو فوجهي...و زادتها العوجة ديال خطيبتو دفلات عليا
خديجة : و راه وجهك غا ديال الدفال الكارثة...شوهتينا و ماقضيتي حتا زفتة
ابتسام : شتي نجم الدين هو الي غادي ندي غير بلاتي...غير خليها تفرح بيه دابة...لا مكرهتو فيها انا مانتسماش ابتسام

دخلات قمر لبيت و هو ابان ليها نجم الدين لابس غير فوطة...كيجبد الحوايج من البلاكار و كيلوح فلرض...
قمر : نمشي حتا تلبس و نرجع " دارت خارجة "
نجم الدين : غير خليك
قمر : " قربات " علاش كتحيد هاد الحوايج ؟
نجم الدين : " جرها عنقها من اللور " تلاقيتي مع هاديك فاش كنتي داخلة ؟
قمر : آه شفتها
نجم الدين : لقيتها كترش شي حاجة فحوايجي...و انا نزل عليها...كنت غا نسلخها غير تحكمت فراسي...على وجه الواليدة
قمر : كيفاش كترش فحوايجك ؟؟
نجم الدين : زعما السحور
قمر : " ضارت عندو مخرجة عنيها " شنوووو ؟!!!

نجم الدين : جابت معها شي قرعة و خواتها علي حوايجي
قمر : " حيدات ليه يديه " بنت الكلبة...انا غا نوريها
نجم الدين : " جرها " آجي فين غادية...غير خليها انا غنتفاهم معها
قمر : شنو قال ليها راسها هادي...باغاك بزز...عصباتني
نجم الدين : " باسها فخدها " ما عندك علاش تعصبي...واخة تسحر و لا تزمر حتا تعيا...ماغتصور مني والووووو " خشا وجهو فعنقها " وحدة الي دات ليا عقلي و سحرات ليا شحال هادا...و مكانشوفش حتا وحدة من غيرها
قمر : لا غير شوف...باش ديك الساع تشوف شنو غايوقع فيك
نجم الدين : " كيدوز صباعو على عنقها " شنو غاديري هاا ؟
قمر : " نزلات عنيها شافتو شنو لابس و هي تبعد " احم...غادي نخرج حتا تلبس... أا...شنو غادير لهادشي
نجم الدين : غا نلوحهم
قمر : أوكي...هاني نزلت لتحت

خرجات قمر و مشا نجم الدين حل باب لبلاكار لاخر...جبد داكشي الي غا يلبس...لبس بوكسر و شورط مع تيشورت عاد لبس فوقهم فوقية...مشط شعرو و رش ريحتو..هز بلاستيكة جمع فيها دوك الحوايج...و هبط لتحت خرج حطهم فالكوفر...
دخل عيط على باه و خرجو للجامع...صلاو صلاة الجمعة و رجعو...كيف دخلو سگات عائشة الگصرية ديال كسكسو...دخل عندها نجم الدين هزها و داها للصالون...چلس جنب قمر نزلات آيات و تجمعو على الأكل...
دوزات معاهم قمر النهار كاملو...كيتناقشو للغد ليه الي غادي اكون يوم الحنة...و غادي ديرو فالفيرمة على حساب طلب جداتها...طلع نجم الدين بدل حوايجو و هبط...عيط على قمر ناضت ودعاتهم و خرجات هي وياه...طلعو فسيارتو و ديمارا...
نجم الدين : سمعت الحنة مكيكونوش فيها الرجال...يعني غدا مغاديش نشوفك !
قمر : آه...غدا ممنوع الشوفان...حتال نهار العرس
نجم الدين : كيفاش حتال نهار العرس...ياك غاتحنيو و كلا امشي فحالو...و ديك الساع نجي عندك انا نشوفك
قمر : نوووو...غندوزو تقريبا نص النهار فبيوتي سانتر...و غنرجعو نحنيو و البنات غيباتو معيا
نجم الدين : اهاه...زعما غير فهم راسك
قمر : و راه هاكة التقاليد
نجم الدين : آش من تقاليد هادو...قولي باغة غير تهناي مني و صافي
قمر : " عنقات دراعو و حطات راسها على كتفو " حشومة عليك تقول هاكة...انا مكنسخاش نتفارق معاك...تنكره آخر النهار حينت كنعرف بلي خاصنا نتفارقو
نجم الدين : " وقف فالسطوب و نزل عنيه كيشوف فيها " ما بقا والو و نتجمعو...و ديك الساع مكاين فراق...خاصة بالليل " غمزها "
قمر : " بعدات كتحك فرقبتها بإحراج " باسل
نجم الدين : من هنا لقدام مكاين غير لبسالة هههه

ضحك على خجلها الي كتحاول تخبيه...وقتما تغزل فيها ولا قال شي حاجة حميمية الي كتخليها تزنگ...و هادشي الي عجبو فيها...واخة كبرات وسط عائلة متحررة و كان ممكن دير الي بغات...الا انها كانت بعيدة على ملذات الحياة...
عارف بلي عمرها شربات...و بلي عمرها دازت من شي علاقة...حتا البيران مكانتش كتردد ليهم...و مبعدة على داك الجو و ناسو...هادشي كولو عرفو عليها فاش كان حارسها الشخصي...واخة مكانتش كتعحبو شخصيتها ديك الساع الا انو كان كيحتارمها على هادشي...
شعل الضو لخضر و هو اتحرك...شافها صقلات و كتشوف فالنافدة...عرفها تحرجات ضحك فنفسو و رجع مركز فالسياقة...رد نجم الدين لسيارة تابعاهم من بلاكة ديال السطوب...
بدل الطريق و السيارة بقات تابعاه...مقدرش اشوف شكون راكبها لأن زاجها فيمي...زاد فالسرعة و حاول ابان عادي باش قمر متلاحظ والو...وصل لفيرمة وقف و لاحظ السيارة حتا هي وقفات بعيد...دار عند قمر و حبسها قبل ما تخرج...
نجم الدين : سمعيني...غادي دخلي للدار...و متخرجيش نهائيا...غدا انا غادي نجي نوصلك فينما بغيتي...سمعتي...ماتمشي لحتا بلاصة بلا بيا...مفهوم
قمر : علاش...شنو كاين ؟
نجم الدين : والو...غير ديري هادشي الي قلت ليك
قمر : اوكي
نجم الدين : " خدا يدها و قبلها " متخرجيش تحت أي ضرف...تافقنا
حركات قمر راسها بآه و نزلات مفاهمة والو...علاش فجأة كيوصيها متخرجش و متمشي فين بلا بيه...بقا نجم الدين واقف حتا تأكد بلي دخلات...عاد شغل اللوطو و تحرك...
المرسديس الي كانت تابعة نجم الدين...تحركات فاش شافت سيارة نجم الدين مشات...قربات لباب ديال الفيرمة تحل الباب و خرج شخص...لابس كلشي كحل...بقا غادي جاي كيشوف فالفيرمة و اتفحص المكان...
حتا فجأة حس بشي يد شنقات عليه من اللور...دور وجهو و هو القا نجم الدين واقف من وراه كيف قباض الأرواح...شدو من دراعو لواها ليه ورا ظهرو و شنق عليه من عنقو...
نجم الدين : علاش كنتي تابعني...و شنو كدير هنا...شنو موضر لحمار الي ولدك
............ : " كيحاول افك راسو " مكنتش تابعك...غير توضرت
نجم الدين : " زاد زير عليه " مق**** ماشي موضر...غا تنطق لاش كنتي تابعني و شكون مسيفطك...و لا نخليك تنطق بطريقة أخرى
............ : انا مكنتش تابعك
نجم الدين : اوكي

طلقو نجم الدين...مجا لاخر فين اتفحص يديو الي مبقاش كيحس بيها حتا جاتو بونية لوجه...جمع قبظة يديه باغي اضرب حتا هو...و معندو حتا فكرة معامن مواجه...نجم الدين طاكا اللكمة الي وجه ليه و فالبلاصة نزل عليه...عطاه للعين حتا شاف الضبابة...حكمو نجم الدين من الكول و جرو عندو...

نجم الدين : شكوووون مسيفطك.. حينت باين نتا غير مسيق...هضااااار
........... : " حاس بالدوخة من الدقة الي جات ليه فعينو " عافاك طلقني انا مدرت والو...ا انا خدام فواحد الشركة... و نائب المدير سيفطني نراقبك...و نتبعك فينما مشيتي...الى بغيت نحافظ على خدمتي
نجم الدين : " كينخض فيه " علااااش باغيك تبعني ؟
............ : معرفتش و الله...عطاني صورة ديال البنت الي معاك...قال ليا الى كانت معاك نتبعك حتا نعرف فين ساكنة
نجم الدين : " طلق منو " شنو سميت الشركة فين خدام ؟
............ : " الصمت "
نجم الدين : و هضررر
.............. : شركة " Fancy "
نجم الدين : " غزز على سنيه و دفعو " طير من هنا...نلقاك مرة أخرى كتحوم هنا ترحم على راسك

مشا الراجل كيجري طلع فسيارتو و كسيرا...بقا نجم الدين واقف و داتو كتفور...فور ما سمع اسم الشركة عرف شكون مسيفط هادا الي تبعهم...رجع للوطو ديالو الي خلا بعيد شوية على الفيرما...ركب و خدا الفون دوز اتصال...
قطع و هو كيغلي داكشي الي فاش فكر طلع صحيح...و ناصيف خرج من الحبس و مزال حاط قمر فراسو...بقا كيفكر كيفاش اتصرف مبغاش اتصرع...خاصو اتصرف بالعقل و اضرب الضربة الي مطيحش على بال ناصيف...و هاد المرة تغبرو فمرة...و النفوذ ديالو ميقدرو انفعوه مزال...

جا فبالو شخص واحد هو الي اقدر اعاونو...و اتخلص من ناصيف الي سجلو عامر لكن حتا حاجة مامتبوتة عليه...قلب نجم الدين الضورة و زاد فالسرعة...بعد مدة وقف أمام مركز الشرطة...نزل و تم داخل غادي فالكولوار حتا لمحو واقف كيهضر مع رجالو...وقف نجم الدين كيتسناه حتا اكمل معاهم...
........... : " مع رجالو " مراد نتا تكلف ليا بداك خينا...تزگلو عرف راسك قوادت عليك...عمر دوز عند صاحبنا سيهم العميد و عطيه الملف الي فيه داك القلاوي...باش اسد عليا طرمتو و اخلينا نخدمو فراحتنا...مفهوم
مراد و عمر : وي شاف
.......... : يالاه تحركو
عمر : غادي للدار ؟
............. : اه غادي عند مرتي الي ما شفت النهار كامل...علاش كتسول...ياكما باغي تمشي معيا
عمر : هههه لا...غير سولت
............. : متسولش...دخل سوق كرك
مراد : " جر عمر " زيد زيد...مكتهنا حتا كيعطيك هههه

عمر و مراد دارو التحية لرئيسهم و دخلو للمكتب...ضار الشخص متاجه للخارج و الي داز من حداه كيلقي التحية...غادي مخنزر كيف ديما ملامح وجهو جدية كتخلي الكل احتارمو...عنيه المجبدين كيف الصقر عندهم نضرة حادة...كتزرع الرعب فأي واحد حتا أكبر المجرمين...
طول قامتو و جسدو الرياضي عاطينو هبة خاصة...لابس سروال و قميجة فالأسود و فوقهم مونطو طويل فالرمادي...كتبان من تحتو الصمطة المشدودة على صدرو الخاصة بالسلاح...
لمح نجم الدين واقف بعيد...تبسم ابتسامة خفيفة و مشا عندو...
............ : نجم الدين السملالي
نجم الدين : " دار ليه التحية " سعادة الظابط ضخر بن يازيد
قربو لبعض و تعانقو عناق رجولي...
صخر : شي حاجة واقعة...حينت نتا كتعرفني غير فالمصائب
نجم الدين : هاد المرة لا...جيت حينت توحشتك
صخر : " ضرب على كتفو " عرفت ديك توحشتك آش تابعها...زيد تبعني...الي ليها ليها...اليوم تبيتني غدير فالزنقة
نجم الدين : قالو ليا تزوجتي و هما اتقداو ليك
صخر : مزال متزوجتي...اوى سكت
نجم الدين : عاد ناوي...شنو زعما ندير بناقص
صخر : الى لقيتي الي تقبل عليك...غير شد فيها بسنانك
نجم الدين : برد على راسك...مزال مبغات تصرط ليك ديال لاصال
صخر : " حل باب المكتب " دخل دخل

دخل نجم الدين و صخر چلسو فلي فوطوي...مقابلين مع بعض و بيناتهم الطبلة...
صخر : تشرب شي حاجة ؟
نجم الدين : بغيت بحال داك الي شربتي...كاس عاصير كبير هههه
صخر : " جبد الفردي حطو فوق الطبلة " حضي فمك...راه تبقا دق عليا...الجثة ديالك مايلقوهاش...من غير سائل حاتل فالواد الحار
نجم الدين : باش نصفيو المسألة...البنت الي كانت كتعجبك فيامات لاصال...راه هي الي كانت معجبة بيا...ماشي انا الي طيرتها ليك...و باش تعرف درت بوجه الصحبة و صدرتها
صخر : مكانتش كتعجبني...كنت حاط عليها حينت شكيت فيها...و هي أصلا مكانتش بنت
نجم الدين : كيفاش مكانتش بنت ؟!!
صخر : متحول جنسي
نجم الدين : " بصدمة " لا متقولهاش
صخر : تخورتي...كنت كتعجب دري آخر...نزيدك و لا باركة
نجم الدين : نووو غير طالقها
صخر : راها ضيفة عندنا...كانت كتعاطى و كتاجر فالمخدرات...يالاه جمع عليا الموضوع...كنت ساكت مباغيش نصدمك...و نتا كتجبدني
نجم الدين : " حك جبهتو " صدمتيني و الله
صخر : اوى على سلامتك
نجم الدين : هههه الله اسلمك...خلينا من هادشي...بغيتك على واحد الموضووووع مهم مبرزطني
صخر : هالي قلنا...اهاه اما هو ؟
نجم الدين : ناصيف العابيري كتعرفو ؟
صخر : " تبسم بجنب " داخل لاليست لكحلة...مي مزال موصلات نوبتو
نجم الدين : مكرهتش تكلف بيه...مابغيتوش اشوف الضو مزال
صخر : هي اللولة...عندي واحد أوطيل خمس نجوم...كنحط فيه غير الناس لعزاز
نجم الدين : الى درتي فيا هاد الخير...عمرني نساه ليك
صخر : مابيناتناش...من غدا نبالي بيه

يتبع

مفااااااجأة ... صخري جا عند نجمي 💞💞 اححح عليهم
الي معرفش شكون هو صخر بن يازيد 😍 ... هو بطل قصتي « قاتلة بروح بريئة » ...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.