رفقا بي يا جلادي الجزء العاشر

من تأليف Khadija El
2018

محتوى القصة

رواية رفقا بي يا جلادي

حفيظة ...."كادخن "شفتيو لكرايا الجديدة؟!
مينة...ايه شفتها هاد صباح عندها ماتقول "شافت فيهم" بلا شك كاتفكرو فاش كانفكر
حفيظة...هادي دجاجة بكمونها جاب لينا الله وجيبة حتى لبين يدنا 
مينة..."جبدات تيلي من صدرها" غانتاصل بالمعلمة لازم تجي وتشوف سلعة بعينها
#المساااااء••••••••••🌇
أمير...."بعصبية" بلا غوات خلينا نتكلمو بالعقل
عبله.."بصوت عالي" انت خليتي فيها شي عقل "بستهزاء" هه قالك طلاق "خنزرات فيه" هو لي عمرك تحلم بيه امكن نسيتي انا للولة وهي دخيلة "بحقد "وبما ان ستي الحسن طلعات ختي القيطة فزواجكم فهاد لحالة باااااااطل لان فالاسلام ازوجي العزيز لا يجوز الجمع بين اختين "بحدة" اوكي ؟!.....
أمير...ماتحلميش نسمح فيها حمدي الله مادرتش فيك يدي وراسي شي لي ذرتو جريمة واذا سكت ماشي معجب بإنجازكم "بحرقة" يااااخسارة طلعتو رخاص "اشار بصبعو" زواجنا مابقى ليه معنى من شحاال هادي صدقيني ماشي بيدي قلبي بغاه ومستحيل نسمح فيها عندي يقين غانلقاه وغاتسمح ليا 
عبله...عشم ابليس فالجنة كاتسمع كانقسم ليك ورب الكعبة ما غانخليكم تفرحو والطلاق نساه
أمير..."بتحدي " حانا غانشوفو ......خرج من الغرفة وردخ الباب جات عينو على شموخ لي غير شافتو نزلت راسها هربان من نظراتو كمل طريقو بدون ما يكلمها حسات بغلطها وثمنات الارض تنشق وتبلعها خدات نفس عميق ونزلت لطابق السفلي متجاهلة وجود عبله ...

بعد ما لبس حوايجو خرج من الدار داير كاسكيط فالنواغ ونظرات شمسية والكيت فودنو وهاز خنافرو لسما بنات الحومة حالين فمهم فيه وكايتمناو غير نظرة منو تجاهل وجودهم ونظراتهم وكمل طريقو وقف فراس شارع ووقف طاكسي صغير بعد مالبسات ولدها حوايجو وفطراتو خرجات هي وياه من الدار ومشات كاتقلب على خدمة كيف ما كانت متجاهلة تماما المستشفيات قالت اذا خدمت فشي مشفى غايلقاها بسهولة عند امير خرج من القصر ودمو كايغلي وبالو كلو مع زمرد لي الارض نشقات وبلعاتها طلع فلوطو ديالو وكسيرا خلا العجاج وراه طلعت شموخ فسيارتها من نوع "رونج روفر " فالاسود وديمارات بعدها بدقائق خرجات عبله وهي فقمة غضبها اتصال سليم زعجها وخوفها فنفس الوقت طلعت فسيارتها وكسيرات فتجاه الفيلا ديالو .......
#المستشفى••••••🏥
منتصر..."تنهد برتياح" الحمد لله على سلامتك تجاوزتي مرحلة الخطر
اصيل...بغيت نشوف داك الكلب دسمير 
منتصر...هذا ماشي وقتو لازم ترتاح ماتنساش عاد خرجتي من عملية دالقلب وكنا غانخسروك رتاح بعدا 
اصيل.."نزلو دموعو" انا حقير كيفاش قدرت نأدي بنتي عاد عرفت الرخصة طب من من تسحبات انا بنفسي سحبتها من بنتي كانت محتاجاني وماكنتش جنبها بالعكس كنت ضدها وضد حفيدي الوحيد 
منتصر...ان شاء الله غاترجع وغاتعوضها لازم ترتاح بعد 
اصيل...كيفاش غانرتاح وولادي ضاعو مني عبله من جيه وجود من جيه وزمرد من جيه جود عمرو يسامحني ياقوت ماتت بسبابي وزمرد اكيد هي بدورها يستحال تسامحني اما عبله موضوع ااااخر كلو كوم وعبله كوم ثاني "بحسرة" ااااااااااااخ من زمان ومادار فيا

ماخلات فين قلبات بدون جدوى لكن مافقداتش الامل حسات بولدها عيا توجهات لاحد الحدائق العامة وجلست فالكرسي وحطات ولدها فوق رجليها وكاتلتقط انفاسها بعد ما رتاحت خرجو من الحديقة وكملت بحتها وقفات قدام ريسطو كبير كايطل على البحر وراقي بعد تفكير دخلت ليه توجهات لعند النادل لي كان كايسجل طلبات الكليان تسنات حتى سالا وتكلمت معاه.....
زمرد...السلام عليكم
النادل...وعليكم السلام
زمرد..عفاك اخويا واش محتاجين شي وحدة 
النادل..."طلعها وهبطها" غاتمشي لعند الشاف راه فين جالس" اشار ليها " 
زمرد....واخا شكرا ....شداات ولدها من يدو وتوجهات ليه .....احم سلام عليكم
الشخص..وعليكم السلام
زمرد...الله يخليك محتاجة الخدمة وبغيت نخدم واش محتاجين شي وحدة؟!
الشخص..طلعها ونزلها" ايه محتاجين لكن محتاجين سرباية تكون عندها للغة الفرنسية والانجليزية بحكم الكليان لي كايجي لهنا غير شكون وشكون +الاجانب 
زمرد..اه عندي ماتخممش عندي الفرنسية والانجليزية +الالمانية 
الشخص..."بإعجاب " تبارك الله عليك لكن كاين مشكل واحد 
زمرد.."فهماتو" قصدك الحجاب 
الشخص...تماما
زمرد...وشنو لي دايرة الحجاب تموت بجوع ؟!
الشخص...صدقيني ماشي بيدي حتى انا غير خدام اختي وهادو ضمن الشروط هنا السالير طالع غاتاخدي 3000 درهم لشهر زائد الكليان كايكونو سخين وكايعطيو بروفوار صحيح غير زعمي وحيديها
زمرد..."بإصرار" مستيحيييل..

الشخص..."بأسف "ايوا ماعندي ماندير ليك 
زمرد.."بحزن " ماعليش انت ماعليك والو عموما شكرا اخويا.....عطاتو بظهر وتمشات بضع خطوات وجارة وراها اديال الخيبة بين ماهي ماشية وقفها صوتو تلفتات لعندو 
الشخص....ختي تسناي
زمرد..."رجعت لعندو وكلها امل" نعام
الشخص...خلي ليا رقم وانا غانشوف ليك مع البوص على الله يوافقك
زمرد..."بمتنان" شكرا بزاف سجل عندك 06 61 ......
الشخص...اوك انا سميتي عادل 
زمرد..."تبسمات" وانا سميتي زمرد
عادل ..."كايشوف فمحمد رضا"بلا شك هاد البكوص ولدك؟!
زمرد.. "تبسمات" تماما احم يالا نخليك تشوف شغلك وشكرا بزاف مرة اخرى
عادل...العفو اختي الله .....خرجات زمرد من الريسطو وتوجهات لدار فين كاريا وكلها امل ف عادل يرجع يتاصل بيها مسافة طريق كانت قدام باب الدار لي كان مفتوح كيف العادة دخلت يالا غاتفتح باب غرفتها وهي توقفها حفيظة بصوتها....
حفيظة...الغزالة واحد دقيقة
زمرد.."تلفتات لعندها" نعام اختي
حفيظة....اجي لعندي لبيتي باش نهضرو فراحتنا "كاطرطق فالمسكة" 
زمرد.."مارتاحتش ليها" واخا .......سبقاتها حفيظة كاتمختر ......"حفيظة مرا فالاربعين من عمرها لكن لي شافها يقول بنت العشرين مهلية فراسها ولاطاي ديالها نايضة كيف كانقولو المؤخرة بارزة والصدر مشدود والكرش بلا طويلة وسمرا وصابغة شعرها فالاكاجو ودايرة طاطو صغير على شكل صقر فعنقها وطاطو اخر فصدرها دفعات الباب برجليها ودخلت كاتعوج جلسات فوق الكانابي وطلبت من زمرد تجلس جلسات زمرد وجلست ولدها جنبها وكاتسنى حفيظة تكلم شعلت سيجارة ونترت نترة منها وشافت فيها...

جود...غادي جاي " اووووف فين غاتكون مشات اوووو الارض نشقت وبلعتها "خنزر فشخص" كانقسم ليك اذا ما لقتهاش غاندمك
الشخص..."بخوف" سيدي داير مافجهدي كانواعدك غانلقاها ان شاء الله 
جود..."بعصبية" وعودك ضربهم فكر* ديك الق** ديال صحبتها نبغيك تراقب تحركاتها 
الشخص...مارقبينها اسيدي وحتى رجال سي امير مراقبينها
جود...نبغيك تراقبو رقمها 24/24 كاتسمع
الشخص...امرك سيدي
جود...يالا غبر عليا......."خرج الشخص كايجري وخلا جود غادي جاي ودمو كايغلي وصلو اتصال من عمو منتصر خدا نفس عميق ورد عليه ......." وي عمي 
منتصر...يا هاد الولد امتى غايهديك الله
جود...خير عمي 
منتصر...ماشفت بو خير باك كان بين الحياة والموت ودار عملية خطيرة نجا منها بأعجوبة وماكلفتيش نفسك تجي تشوفو وطمن عليه ؟! عيب عليك والله الى عيب
جود..."كاتم اعصابو" عمي بليز ما بغيتش نهضر عليه 
منتصر....فيق باركة حتى لين غاتبقى شاد فقلبك من جيهتو اصيل باك كاتسمع باك كلنا كانغلطو ادا كان الله غفور رحيم ف شكونك انت حتى ما تغفرش باك مريض بزاف تجمعو عليه من كل جوايه انت وخوتاتك حن فيه بارك حن فيه يحن فيك لي خلقك...."قطع عليه بعد ماقطع منتصر الاتصال ضرب جود تيلي مع الحيط بعصبية وصدرو كايطلع وينزل

زمرد..." وقفات" سمحي لي راك غالطة فالعنوان
حفيظة..."بدورها وقفات" كلنا فالاول قلنا نفس لكلام لكن الحياة قالت كلام اخر مدام جيتي لدار مباركة وكريتي داك لبنيقة" اشارت لبيت" الى واراك محتاجة ودنيا عطاتك بقزيبتها وكوزات ليك 
زمرد....راضية ولله الحمد ولقمتي نجيبها حلال 
حفيظة..."ضحكات وشافت فمحمد" بارك من شعارات الخاوية وهاد صبي غايرضا بهاد العيشة؟! ماتكونيش انانية فكري فيه حتى هو حنا خدمتنا نقية ما كانوقفوش فراس شارع ونتسناو الكليان الكليان كايجي لعندنا حتى لهنا وريوكو طايحين وماشي اي كليان غير شكون وشكون واذا كنتي خايفة من كلام ناس ماتخميش ما غايعرف حتى حد غانعطيك عنوان الفيلا فين كانخدمو وتبقاي تمشي بنفسك كل ليلة عندنا سهرة خاصة وكليان خاص نتي وشطارتك "كاتشوف فيها " مع هاد لاطاي والعينين غاتجيبي احسن كليان "غمزاتها 
زمرد....اذا كملتي كلامك غانمشي وكانتمنى تكون هادي اول مرة واخر مرة تفاتحيني فهاد الموضوع.....يالا غاتخرج وهي توقفها بصوتها
حفيظة...دايرة راسك حسن من الناس كانواعدك ما غاتكونش اخر مرة وغاتجي بنفسك طلبيني نخدمك كوني اكيدة وعقلي على هاد لوجه مزيان......."خرجات زمرد وتوجهات لغرفتها وكاتلعن شيطان فخاطرها وخلات حفيظة كاتغلي من الداخل ...

#بعد #يومين••••••••
فاقت مبكرة بحال كل صباح توجهات لطوليت هاد المرة لقاتها خاوية قدات حاجتها وتوضات ورجعات لبيت صلت الصبح وطلبت ربي يوقف معاها فمحنتها فاق محمد رضا كايتكسل وجدات الفطور وفطرو بزوج جمعاات شي جوايج صبناتهم فالمرح وحمد رضا كايلعب حداها بعد ما شلاتهم طلعت لسطح تنشرهم وخلات باب غرفتها مفتوح نشرات الحوايج ونزلت مع ولدها توجهات لغرفتها تار انتباها الغرفة مخربقة مع انا كانت جامعاها قبل ما تصبن توجهات لصاكها بسرعة وقلبها كايضرب لقاتو مفتوح قلباتو لقات لاكارط ناسيونال ما كايناش والفلوس لي كانت مخبية ماكاينيش وحتى تيلي ديالها تهز ضرباا حناكها وجلست تبكي شاف محمد رضا دموعها وضمها وجلس يبكي بدورو واخا ما عارفش علاش كاتبكي هدناتو ومسحات دموعها وخرجات لمرح شافت حفيظة حاطة الكرسي وكاتكل فالزريعة وكاضحك كان عندها احساس بلي هي مولات الفعلة توجهات ليها وكاتحاول تتمالك اعصابها 
زمرد...رجعي ليا فلوسي وبطاقتي وتيلي ديالي بلا بصداع "مدات يدها " 
حفيظة..."ضحكات بصوت عالي" واش نتي لاباس ؟! غاتقلبي دورة ولا نقلب زا** بوك هنا صباح هذا وراك مزال ما كاتعرفيش شكون هي حفيظة "بستهزاء " هااااء قالت ليك نرجع ليها 
مينة..."دايرة يدها على نصها" ايوا لهلا يطيح علينا شي باطل 
حفيظة...هانتي تشوفي الباطل بعينيه 
مينة..."ضحكات بمياعة" سيري ابنتي شوفي ليك فيمن تشدي حسن ليك "دفعاتها " 
زمرد.."لوات ليها يدها" ظاهر لي نتما لي ما عارفينش راسكم معامن ورب الكعبة وماترجعولي خرايا حتى نطليه ليكم فهاد صباح ......"دارو بيها يالا غايترماو عليها وهو يجي بدر بينهم وبينها دفع حفيظة حتى تنشرات وخنزر فزمرد......
بدر..."بصوت مدعدع بنعاس" واش كل صباح غانفيق على صداعك 
زمرد..."دموع تحجرو ف عينيها" انا ما كانجبد حد "اشار ليها" هي لي جبداتني وسرقاتني وانا كاندافع على حقي " نزلو دموعها
مينة..."جبدات زيزوار من بين سنانها" غاتقلبي دورة ابنت الق** ولا نشورط لمك وجهك
بدر..."لوا ليها يدها" انا لي غانشروط لمك وجهك اذا ماتكمشتيش وقطعتي حسك "دفعها حتى لصقات على الحيط....
سهام..."خرجات من بيتها كاعية" صباحاتو لله مابقى حد ينعس فهاد لخربة اديك صفريطة باين ليا غانولح ليك شراوطك فزنقة هاد شي بزاف
زمرد...هما لي سرقوني 
حفيظة..."بغات ترمى عليها" شوف ليك لباطل اجي لمك هنا
سهام...."بصوت عالي " اييييييه حدك تم فرقو عليا هاد سوق واش ازركة (قصدت حفيظة) ما ناوياش تهدي وديري عقلك رجعي لزمر خراه وفرقو عليا سوق...

حفيظة..."بعصبية" دابا صدقتيها هي وكدبتيني انا ؟!
سهام...."كادور فراسها" اممممم عليا انا يالا فرقو عليا سوق "بصوت عالي " والله ونسمع حس شي وحدة فيكم حتى نشتف على مها....."دخلت لبيتها وزدحات الباب شاف بدر ف حفيظة شوفة كن كانت قرطاس كن ماتت تكلم بصوت خشن وبنبرة قاصية فنفس الوقت
بدر...ايه انتي رجعي ليها شي لي خديتي منها 
حفيظة..."علات صوتها" انا ماخديت شاي هادي وحدة كدابة
بدر..."زير على الفك ديالها" حتى نكون ما كانعرفش طينتك "دفعها " ياغاترجعي ليها شنو خديتي ولا ندير شرع يدي "رفع حاجبو
حفيظة..."وجها ولا حمر" عقلي اش درتي والله ما ندوزو ليك بساهل ...."دخلت لبيتها وجابت شنو سرقات منها وعطاتو ليها بنفخة
بدر....يالا فرقو عليا سوق " خنزر ف زمرد" ونت من تبغي تخرجي سدي بيتك ماشي كل صباح نفيق على صداعك ..."دخل لبيتو ودخلت لبيتها وسدات عليا وكلها كاترجف خايفة من حفيظة وصاحبتها بعد دقائق وصلها تصال من عند عادل ...
زمرد....الوو 
عادل...الو سلام عليكم زمرد هادي ؟!
زمرد...وعليكم سلام وي هي انا 
عادل ...انا عادل بلا شك نسيتيني المهم الريسطو لي جيتي ليها قبل يومين اجي دابا 
زمرد...وي وي معلوم مانسيتش واخا خويا ثواني ونكون عندك ...

هزات تيلي ديالها وشدات ولدها فيدها وخرجات من الغرفة سدات بابها بساروت وتوجهات لراس شارع وقفاات طاكسي وعطاتو العنوان مسافة طريق كان قدام ريسطو نزلت وتوجهت لداخل وكاتقلب على عادل بعينيها شافتو وتوجهات ليه
زمرد...سلام عليكم
عادل ..."تبسم "وعليكم السلام اهلا مدام زمرد تكلمت مع البوص وقدرت نقنعو يقبلك 
زمرد...والحجاب؟!
عادل....قنعتو واخا كان صيعب اقناعو مهمتك كيف قلت ليك لازمها للغة 
زمرد ....وشنو هو البوسط ديالي؟!
عادل...سرباية طبعا علاش انا ركزت ليك على للغة 
زمرد...نووو بليز شوفي اي حاجة من غير اني نسربي الله يخليك نغسل لماعن نسيق طواليطات كاع كاعنديش مشكل 
عادل...حنا ما محتاجينش فام دو ميناج عندنا الغرق منهم محتاجين سرباية وراك شفتي الاعلان لي برا ثم مال سرباية كاتفسد ؟! كاتسرق ؟! الاااا خدامة بعرق كتافها وهذا ريسطو راقي وفيه ناس راقية ما كاينش لي غايتطاول عليك اذا كنتي دايرة حدود سينو غاتكوني نتي عطتيهم اشارة "تنهد " انا ما عندي غرض تقدري ترجعي من جيتي وراه جاو بزاف دالبناات باش يخدمو ورفضت حيت بقيتي فيا " شاف محمد رضا" وبقى فيا ولدك اكتر واخا ما عارفش ظروفك احم المهم القرار كايرجع ليك طبعا.. 
زمرد..."بعد تفكير" وبخصوص الزي!؟! "كاتشوف السربايات معرين سيقان 
عادل.."شاف فين كاتشوف" ماتخافيش اول ما قبل البوص وصيتهم يجهزو ليكم زي خاص بالحجاب عبارة عن صايا طويلة فالبوردو مع شوميز فالبيض فولاو بوردو الون بحال صحباتك"تبسم" 
زمرد..."بمتنان " شكراااا بزااف اخويا عمري نسى خيرك
عادل ...هانية اختي مرحبا ...

زمرد...وامتى غانبدا ؟!
عادل ...من اليوم 
زمرد...بس قبل ما نبدا ولدي ماعندي لمن نخليه ويالا كريت فواحد الحي ومزال ما كانعرفش شي روض نخليه فيه عطيني مهلة حتى نلقى فين نحطو قبل ما نلقى غانبقى نجيبو معايا 
عادل...صعيب كيفاش غاتخدمي وولدك معاك هادي ريسطو وغاتكوني طول الوقت مشغولة مع الكليان 
زمرد...الله يستر عليك غير شوف كي دير والله ماعندي لمن نخليه 
عادل..."بعد تفكير " اوك غايبقى فالمطبخ بين مانتي كاتسربي لكن غير مؤقت يستحسن تشوفي فين تخليه فأقرب وقت 
زمرد...ان شاء الله شكرا 
عادل...العفو ...على بركة الله .....توجه لمطبخ وتبعاتو من لور كان مطبخ كبييير فيهم طباخ والمساعد ديالو وثلاثة البنات مكلفين لميناج وزوج كايساعدو شاف عرفها عليهم رحبو بيها وبمحمد رضا لي دغية كايدير بلاصتو ...
عادل....شيماء وري لمدام الغرفة لي مخصصة بتغير الملابس وعطيها الزي لي وجدو ليها
شيماء ..."تبسمات" تفضلي معايا اختي ...توجهو لغرفة وشيماء كاتهضر....كيف شفتي حنا 7الاشخاص فالمطبخ ومزال غانعرفك على لي كايسربيو هنا البنات ضريفات وكل وحدة فحالها حتى دراري الله يعمرها دار خصوصا شاف عادل غير هو البوص اهوووه شحال صعيب اوووف من كايجي كانوقفو على رجل وكايولي ضغط علينا فالحقيقة كنا مرتاحين من كان فأمريكا كنا كانشوفوه غير مرة فالعام لكن مؤخرا ولا كايجي بزاف 
زمرد...اوووه خوفتيني لهاد درجة صعيب
شيماء...وي "ضحكات" مي اذا هتميتي بشغلك ما غايوصلكش وما كايبغيش كترت بلا بلا بختصار كاريزما ههههه....

زمرد...الله يبعدو علينا هههه 
شيماء ..."رفعات يدها لسما مع ابتسامة" اميين هادي هي الغرفة كانبدلو فيها حوايجنا "مدات ليها" وهذا هو الزي ديالك "مدات يدها" احم مرحبا بيك معانا 
زمرد..."صافحاتها" شكراااا ههه ......" لبساات الزي لي عطاوها وقادات الفولار وتوجهات المطبخ طلبات من محمد رضا يجلس فالكرسي وما ينوضش من بلاصتو تبسمات شيماء وطمناتها...
شيماء...غير رتاحي الالة محمد ف عينية
سارة..."تلفتات لعندهم" فعينا كاملين ههه.
زمرد...."بفرح "شكرا ليكم بزاف 
ابتهال.."سرباية"بلا شك انتي السرباية الجديدة؟!
زمرد..هي انا 
ابتهال.."بجدية" اولا مرحبا بيك معانا "مدات ليها القائمة" هاد القائمة فيها طلبات الطاولة رقم سبعة 
زمرد..."بخوف " باش غانعرف رقم؟!
ابتهال..."طمناتها " ماتخافيش فهاد المدة غانساعدك حتى تعرفي "وجهات كلامها لطباخ ...محسن معاك بلا دالحوت مشكل مع سلطة الكول سولو......"خلات ابتهال كاتكمل كلامها مع محسن وهي جلسات جلسة القرفصاء وتكلمات مع محمد رضا...
زمرد...ولدي ماغايديرش لبتيز 
محمد رضا...لا اماماتي
زمرد...."باستو فخدو "يخلي لي المطيع 

#المسااااااااااااء••••••••🌇
داز النهار بسرعة عند زمرد دغية تأقلمات وفهمات نضام الخدمة راسها خفيف محمد رضا كان جالس فالمطبخ والكل مهتم بيه ودغية دخل ليهم للخاطر وونسهم فكل مرة كانت كاطل عليه كاتلقاه مجمع مع محسن الطباخ رتاحت من جيهتو نوعا ما واخا حسات بشوية تعب ودوخا بما انها حاملة لكن ما بيناتش ليهم خافت اذا قالتها يطردوها....
طيييييييييط.........قلبات تجاه السيارة بعد ما ضرباتو قلبها كان غايسكت من كترت الخوف ناض من الأرض وشد دراعو لي تجرج وكلو غضب خدات نفس عميق ونزلت لعندو....
شموخ..."بخوف "واش صافا؟!
بدر ..."عينيه حمرين كيف جمر" اش بان ليك همممم؟! "بصوت عالي " من ماكاتعرفيش تسوقي ما تسوقيش غير مدرمة كي البقرة
شموخ..."بنبرة قاصية" ايييه حدك تما ثم انت لي خرجتي لي فطريقي كي الحلوف"عطاتو بظهر بغات ترجع لسيارة وهو يجرها من دراعها بقوة ....
بدر...ضارباني وزايداها بحلان الفم عتادري يالا
شموخ..."كاتحاول تتفك من يدو" راك ما عارفش راسك معامن بعد مني بعددددد
بدر.."زير على دراعها" قلت عتاذري 
شموخ...تألمت منعات دموعها ينزلو" اذا ما طلقتيش مني غاندمك "كاذفع فيه....
طييييييط......طيييييييييطططط....طريق عمرات وناس كايكلاكسونيو عليها وكايغوتو لكن بدر ما طلقش منها وبقى مصر على كلامو ولسوء حظها البلاصة فين كانو ما كان فيها حتى شي،شرطي لمرور زيز عليها وحسات بالألم حاولات تفك منو لكن كان حاكمها بعد ما زاد ألمها قررت تعتذر باش يطلقها......
شموخ ...سمح ليا يالا طلق مني 
بدر.."دفعها" بالاضافة لأنك غبية متكبرة لحسن حظك تابعني شي شغل انا ندمك ....شد دراعو لي كاينزف وكمل طريقو طلعاات فسيارة وكسيرات فتجاه القصر وهي فقمة غضبها مسافة طريق كانت فالقصر طلعاات لغرفتها وعرات دراعها كاتشوف لقات اتر صباعو لعناتو فداخلها وجلسات تعيبو قدام المرايا ......
شموخ..."كاتعوجو" عتذري عتذري نننن نننن غبي حقير الحلوف الله ينتقم منو...

وصلت 12 اليل عاد حبسو دخلت المطبخ وكلها تعب .....
زمرد....اوووف واخييييرا
شيماء...دابا تولفي ههه
زمرد .."شافت ساعة " اوعدي هذا نص اليل كيف كاديرو مع طرونسبور؟!
شيماء...ماتخميش البوص واخا صعيب معانا لكن حنين فينا هههه كاين سائق مكلف يوصلنا حتى لديورنا كل ليلة 
زمرد ..."برتياح" الله الله يكتر خيرو "عاد فطنات" ويلي فين هو ولدي
سارة...نعس وديتو لغرفة لي كانبدلو فيها 
زمرد...شكرا بزاف ... "توجهو كلهم للغرفة بدلو حوايجهم هزات ولدها بين دراعها وهو ناعس وخرجات من المطعم برفقة البنات كان السائق فنتظارهم وصل نص بنص مسافة طريق كانت فالحي نزلت من سيارة وتوجهات لدار يالا غاتفتح الباب وهي تصادف مع بدر شاد دراعو ومخنزر دخلو بزوج من الباب شافت دراعو كاينزف ووسعات عينيها...
زمرد...الله اربي دراعك كاينزف 
بدر...الصمت
زمرد...شكون ضربك؟!
بدر..."بصوت خشن" ماشي شغلك ....دخل لغرفتو وخلاها وراه توجهات للغرفة حطات محمد رضا ففراشو وغطاتو وخرجات من الغرفة توجهات لغرفة بدر كان الباب مفتوح مع دلك طرقات هز الخامية وطل عليها ...

بدر...اش خاصك
زمرد.."كاتشوف فدراعو" خاص نعالج دراعك ونوقف النزيف 
بدر...ماعليش انا قاد براسي رجعي من جيتي
زمرد..."بإصرار" ماشي غير انت لي راسك ناشف حتى انا ودابا حيد من طريقي لازم نوقف النزيف
بدر.."رفع حاجبو " وانت اش فهمك فهاد شي
زمرد..." درمات فيه ودخلت لغرفة"لي قدامك دكتورة نعام اسيدي ودابا جلس فالسرير وخليني نشوف شغلي "حطات يدها على راسها " الله ياربي لازمني علبة الاسعافات 
بدر..."خدا العلبة من البلاكار" ها هي بس قبل شنو قاضية دكتورة
زمرد .."شدات دراعو" اووووه الجرح عميق لازم يتخيط 
بدر...اااااه بعدي يدك بعدي قالت ليك دكتورة 
زمرد ..."بصرامة" اغيط خليني نشوف شغلي 
بدات كاتشوف الجرح كان غارق شوية بين ما هي كاتفحصو كانت كاتسألو فنفس الوقت......شكون لي ضربك؟!
بدر...واحد سيارة
زمرد..."رفعات حاجبها" اهاااا "صغرات عينيها" هادي ماشي دقة سيارة
بدر.."بدون شعور" دابزت مع شي وحدين وغفلوني من كنت راجع لهنا خرجات فيا واحد البقرة وكملت عليا "خنزر" ثم علاش،كاتسألي ديها فشغلك...بعد يدها "...

زمرد....الجرح عميق لازم تخيطو 
ناض من مكانو وتوجه لبلاكار خدا علبة اخرى فيها الخيط باش كايخرزو والبرا المخصصة ليه مدهم ليها وعاقد خوباشتو شافتهم ووسعت عينها ......
زمرد....من جاوك؟!
بدر.."وقف " ظاهر ليا بغيتي تجمعي 
زمرد..اوك اوك جلس بس خاص البنج
بدر...من ديما كانخرز بلا بنج ......شداتو دراعو وبدات كاتخرز ليه فكل مرة كان كايعصر عينيه من الالم بدون ما يصدر اي صوت بعد ما كملت نظفات ليه دارت ليه دوا الحمر والفاصمة 
زمرد....سمح لي اذا قصحتك لاباس عليك "وقفات" 
بدر..."بصوت خشن " شكرا 
زمرد...تبسمات" العفو ......خرجاات من عندو ورجعاات لغرفتها بعد ما خرجات. سد الباب وتلاح فوق السرير وغفى من تعب...شرقاات شمس جديدة وتسللت اشعتها لغرفة زمرد ناضت مبكرة بحال كل صباح توضات وصلت وفيقات ولدها طرفات ليه حالتو وفطرو بزوج بين ما هما كايتكلمو وصلها اتصال من رقم مجهول ترددات ترد لكن بعد اصرار من المتصل فتحات الخط بدون ما تكلم...

سوسن...فين اراضيك ابنتي 
زمرد..."بفرح" سوسن .....
سوسن...ايه سوسن فين عطيتي الراس ياك قلت ليك اجي عندي وحتى حد ما يقدر ياخدك بزز منك 
زمرد ...نتي مزال ما كاتعرفي داك القوم اوووف توحشتك براف والله بس ماقادراش نجي خفت يلقاني "نزلت دمعة على خدها"
سوسن....اه حقا جا واحد خينا كايسول عليك عرفت بلي اسمو جود ومن عائلة راجلك
زمرد..."بنرفزة" اش بغى حتى هو فاش يوصلتو ياك داك القصر لعين خليتو ليهم 
سوسن...بغى خلا عشتو قدرت نعرف بلي مراقب رقم ديالي لي كنتي كاتهضري معايا فيه من قبل ابتداءا من هاد لحظة هذا هو رقم لي غانبقاو نهضرو فيه 
زمرد..."حطاات يدها على فمها" الله ياربي لهاد درجة مصر يلقاني لكن شنو درت ليه ؟!
سوسن...مانعرف لمو 
زمرد...بغيت نشوفك
سوسن....وياااااااك...

زمرد...علاش ؟!
سوسن....ولات عليا حراسة مشددة "ضحكات بغنج" وليت مهمة بسبابك تصوري راجلك حاط رجالو مراقبيني وحتى سيه جود حاط واحد المنفوخ مراقبني عند بالهم واكلة تبن ما غانعيقش
زمرد...."بصدمة" لهاد درجة ؟!ثم باش عرفتي
سوسن...سوسن هادي واجرك على الله عطيني عنوانك وانا غانجي لعندك
زمرد...ياك قلتي مراقبة كيف غاديري ؟!
سوسن...ياودي غير عطيني ونعسي على جنب الراحة واش ثلت سنين لي عشناها معرافتكش شكون انا ؟! 
زمرد...الله اودي "ضحكات " سجلي عندك........... ****
سوسن...اوكي انا غانمشي الايكول دابا عندي شي شغل مهم وغير غانسالي وغاندوز لعندك بوسي ليا بوراس ههه
زمرد...الله يعاونك هه ...

اول ما قطعات الاتصال مع سوسن حسات بالغصة فقلبها نزلت دمعة حارة على خدها وتبعاتها دمعة اخرى حسات بالخنقة حيدات شال لاحتو فالارض ووقفت توجهات لنافدة كاتلتقط انفاسها ..... #فلاش #بااااك
زمرد....أميييير 
أمير..."طبع قبلة ف شفاها" يسلملي الخجول "شد خصلة من شعرها وستنشقها" كانواعدك غانعوضك على كل ما فات انتي حاضري ومستقبلي ...."طبع قبلة فعنقها" كانبغيك وغانبقى نبغيك لاخر نفس........
#الحاضر............. نزلو دموعها دمعة ورا دمعة بدون توقف وبغزارة تبعاتهم شهقة لي عيات تكتم فيها حطات يدها على فمها وجلست فالارض حطات يدها اسفل بطنها وكاتمررها ببطئ....علاش اربي علاش هئ....هئ....ااااااااااااااه كيفاش غانقدر ننساه قلبي كايضرني بغيت ننساه بغيت نرجع نكرهو هئ....هئ...."
محمد رضا..."دمعو عينيه" مامااااا
زمرد..."مسحات دموعها" اجي اولدي " ضماتو " ....
محمد رضا...."شاف فيها" ماما فين مسا بابا علاس مابقيناس مع بابا ؟!
زمرد..."بصوت مبحوح" ولدي بابا مسافر عندو شي شغل "شافت فالساعة " اويلي مشى لحال اوووف نسيت ما قلت ل سوسن بلي خدمت ....خدات تيلي وتاصلت بيها وقالت ليها بلي خدمات وعطاتها عنوان ريسطو قطعات الاتصال وخرجات من دار توجهات لراس شارع ووقفات طاكسي مسافة طريق كانت قدام ريسطو توجهات لداخل وباشرات عملها بعد ما سلماات على زملائها كانت كاتخدم وبالها كلو مع امير...

#المساااااااااااااااااااء••••••••••••••🌇
بعد ما كملت شغلها خرجت من الإيكول طلعت فسيارتها من نوع داسيا فالاسود وديمارات فطريقها لاحظات زوج سيارات لاحقينها وحدة من نوع كاتكات والثانية لوطو كملت طريقها عادي وما بيناتش بلي عاقت بيهم بعد عدة دقائق قدرات تهرب من الكاتكات لكن لوطو كان محترف وما قدراتش تلفو بقات غادية وكاتفكر كيفاش تخلص منو بعد تفكير دخلت لمول وتمشات بخطوات متسارعة شك بلي غادير شي لعبة هبط ولحق عليها وعينيه عليها متربص حركاتها بعد ثواني تلفات ليه بين ناس تعصب وعروق يدو برزو خرج لبرا ورجع لسيارة كاتسناه تخرج بعد عدة دقائق من الانتظار خرجات من المول لابسة عباءة فالاسود مع نقاب ما كان كايبان منها والو دازت من قدامو وغمزاتو ستغرب كيفاش وحدة منقبة يسدر منها هاد تصرف وقفات طاكسي ولابتسامة على شفاها عطاتو العنوان مسافة طريق كانت فالمطعم توجهت لداخل وجلست فالكرسي وكاع الاعين عليها كايطلعو فيها وينزلو بستغراب شنو كادير منقبة فمكان فيه الاختلاط شيراات على،النادل وطلبت منو يبعت ليها زمرد تاخد طلب بنفسها ستغرب لكن ماعارضش توجه لزمرد واشار ليها لطاولة

توجهات زمرد لطاولة وتكلمت مع الابتسامة
زمرد...نعام لالة اش حب الخاطر؟!
سوسن..."زولت نقاب" واخيييييرا 
زمرد..."ترمات عليها كاتعنق" سوسن اوووووه شحال توحشتك 
سوسن..."ضماتها بدورها" كن تشوفي انا فين هو بوراس
زمرد..."جراتها من يدها" اجي نديك عندو 
نتاظر......ونتاظر وطال الإنتظار بدا يشك فلحظة جات فبالو المنقبة لي دازت من قدامو وغمزاتو ضرب يدو مع الفولو بعصبية
جود....شيييييييت دارتها بيا الق**ة.......كسيرا فتجاه القصر ودمو كايغلي .....طاح الظلام واليل ليل توادعات مع زمرد وخدات منها عنوان الدار فين كاريا خرجات من المطعم ورجعات المول شرات شي حوايج ولاحت داك نقاب وتوجهات لسيارة مسافة طريق كانت قدام باب شقتها فتحات الباب ودخلت وكانت المفاجأة........
بعد ما كملت شغلها جا السائق لي مكلف يوصل لبنات بحال كل ليلة مسافة طريق كانت قدام باب الدار دخلت الغرفة وولدها بين دراعها ناعس كانت حفيظة ورباعتها يالا خارجين سمموها بالكلام المعاني لكن ما تسوقااتش دخلت لبيتها وطاحت دودة بعد يوم شاق ..

سوسن...وسعات عينيها " اشنو كادير هنا وكيفاش حتى دخلتي لداري.......كايقرب منها وهي كاترجع بالور فكل ما كان كايقرب كان قلبها كايضرب بقوة ورجليها كايرجفو من الخوف لكن سرعان ما تغلبت عليه او دعات انها تغلبت عليه خدات نفس عميق ورفعات راسها بكبرياء وعينها ف عينيه ماتكلمش،عينيه لي حمرين كيف الجمر وعروق يدو ورقبتو لي بارزين قالو كلشي بدون مالسان يبدل مجهود عرفات بلي عاق بيها خوراتو بديك الغمزة بلعت ريقها ولصقت على الحيط ......
جود...."زير على الفك ديالها" انا ديرها بيا ق**ة بحالك"لوا معاها بطرشة" فين هي زمرد "بعصبية" دوي......
سوسن..."شدات حنكها والدموع تحجرو فعينها" ماعرفتش 
جود..."هزها من شعر" ختاري ياغاتقولي فين هي ولا غانتصرف بطريقتي
سوسن..."صوتها" كايرجف" ب ب ا ش غانعرف ثم كيفاش دخلتي لداري 
جود..."زير على شعرها" نطقي خلاص..
سوسن..."حطات يدها فوق يدو باش يخف الالم" حقااااار طلق مني طلق هادي ماشي رجلة لقتيني بنت ماغانقدرش نضربك "كاتمسكن" بعددد ليا 
جود...."لصقها مع صدور" وشنو لي يأكد لي بلي وحدة بحالك مزال بنت امممم
سوسن...واحق القسام حتى بنت " نسات المها" ثم شكون انت حتى نحلف ليك 
جود....ماكاين لاش تحلفي الغزالة غايجي نهار لي نتأكد بما انك للجميع " دفعها " خلينا فموضوعنا فين هي زمرد..
كلمة بما انك للجميع جرحاتها واخا تعودات تسمعها من بزاف دالرجال بحكم انها كانت راقصة فالملهى لكن عمرها هتمات ليهم من سمعاتها من جود كرهاتو وحتاقرات نفسها ماعرفاتش علاش هتمت ليه من الاساس كان واقف ونظاراتو كيف الصقر كايطلع فيها وينزل وكايتسناها تكلم...

بعد ما خوا القرعة من المشروب ضربها مع الحيط حتى تشتات شد راسو ووجهو حمر والدموع على طرف شفارو صرخ بصوت مبحوح والم فراقها كايمزق قلبو...........
أمير....."بألم" اااااااااااااااااه فين غاتكوني فين انا سباب انا واحد ما كانسواش ...."بدا يهرس ويدقدق اي حاجة جات قدامو منظرو قطع ليها قلبها ماضناتش غاتوصل لأمور لهنا دفعت الباب ودخلت لعندو ودموع ف عينيها اول ما شافها زاد جعر توجه ليها ورفع يدو ونزل عليها لوجه حتى عواج حطات يدها على خدها وشافت فيه بعيون دامعة..... 
شموخ...نستاهل اي حاجة درتيها ليا هئ...هئ...."شدات يدو" أمير سمح ليا هئ...هئ.....مابقيتش قادرة على قصوتكم انت من جيه وبابا من جيه وعمي من جيه حتى من جود تغير وولا قاصي ....
أمير..."دفعها حتى طاحت" علاش غانسمح ليك علاش على فراق مراتي والهوا لي كانتنفس ولا على فراق ولادي ولدي لي تزا وماشفتوش ونهار شفتو حرمتوني منو بخداعكم ولا على الولد الثاني لي غايتزاد وغانتحرم منو من جديد..."بصوت مبحوح" خرجي عليااااااا "اشار بصبعو فوجها" مانبقاش نشوف وجهك قدامي خرجي "بصوت عالي " خررررررررجي...

جود... "بعصبية " كانواعدك غاندمك عقلي على هاد الوجه من اليوم انا جحيمك
سوسن..."دفعاتو" لاوااه لخرا قالك جحيمك "اشارت بصبعها فوجهو" انا لي غانولي جحيمك اذا ما بعدتيش من ساحتي ...."شد صبعها بقوة ولواه حتى كان غايهرسو غوتات بصوت عالي وعصرات عينيها من الآلم بقى شادو وكايلوي فيه لون تخطف من وجها ودموعها نزلو.....
جود...هاد صبع غانهرسو اذا رفعتيه مرة اخرى فوجهي " دفعها حتى طاحت " مزال ما كاتعرفيش شكون هو جود بن يزين "غمزها" من اليوم انا معاك وغانشوف شحال قدك تنكري ...."خرج وخلاها شادة صبعها وكاتألم ناضت وزدحات الباب والغضب متمكن منها 
سوسن...الحمار بو ودنين عند بالو غايخلعني "تعوج فيه" ننننننن ننننن تفوووووو............
#اصبحنا #واصبح #الملك #لله.....
شرقات شمس جديدة معلنة عن يوم جديد تسللت اشعتها لغرفة زمرد ناضت كاتكسل وقفات ببطئ جمعات شعرها بشكل عشوائي ولاحت شال عليه وخرجات من الغرفة كاتجر فرجليها بتتاقل دخلت لطوليت قدات حاجتها وتوضاات يالا خرجات وهي دخل حفيظة عينيها ناعسين شافت فيها وبدات تكمكم...
حفيظة...صبحاتو لله حيدي من خليقتي 
زمرد ..تجاهلات كلامها وكملت طريقها
حفيظة...عند بالك راك حسن منا طلعتي ق**ة وبلكراد من الفوق 
زمرد..اش كاتقصدي ؟!
حفيظة..من نتي ق**ة لاش كاتنكري جربي خدمتنا وما غاتندميش 
زمرد ..سبق لي وقلت ليك غالطة فالعنوان
حفيظة..."ضرباتها على كتفها" ماشي عليا احبيبة كل ليلة داخلة حتى لنص اليل لا وجايبة معاك حرامي 
زمرد..."بصوت عالي " حدك تماااا مانسمحش ليك طعني فشرفي وتجبدي ولدي على لسانك 
حفيظة..." بصوت عالي " الله الله شايلاها يامولات الشرف ....
مباركة...نهاك الله ياهاد لمخلوقة بعدي من لمرا ونعلي شيطان واش كل صباح يفيقو ناس على صداعنا 
حفيظة...مدام مسكنة معاك لق**ب غاتسمعي صداع كل صباح...

زمرد....اذا جاوبت راني بحالك....
حفيظة...علاه عند بالك حسن مني الخدمة لي كانخدم انا حتى انتي كاتخدميها وكرف مني كاع على الاقل انا ماجايباش حرامي...."قبل ماتسكت لوات معاها بطرشة .......
زمرد ...انا شرف منك ومن المخير ف قبيلتك من الاحسن ليك تبعدي على طريقي ما نليقش ليك
حفيظة..."حاطة يدها على خدها" ضرباتني والله الى ضرباتني ...."يالا غاتلاح عليها وحتي تسبقها زمرد ولوات ليها يدها ودفعاتها.....حفيظة وجها ولاحمر وعينيها كتر مارضاتش قدام مباركة كيفاش وحدة بحال زمزد لي فنظرها برهوشة غلبتها خرجات عينها واشارت بصبعها .....
حفيظة...فتحتي على نفسك ابواب جهنم والله ما نفوتها ليك عقلي على هاد لوجه .....دخلت لبتها وصوتها عاد ما كايعلا رجعات زمرد لغرفتها وكاتستغفر الله فخاطرها فيقات ولدها وطرفات ليه حالتو وخرجات من دار مسافة طريق كانت فالمطعم فطرو مجموعين عاد باشرو عملهم بعد دقائق جا عادل كانت كاتخدم وبالها مع امير لي توحشاتو ومع ولدها لي مكرفص معاها فكرت تاخدو لشي روض لكن شكون غايشدو ليها فاليل فكرت وفكرت راسها ضرها بقوة تفكير تنهدات تنهيدة طويلة ووكلت امرها لخالقها ...

توجهات لايكول بحال كل صباح لكن هاد صباح غير صباحاات لي فاتو بعد ما بداو الطالبات كايدخلو دخلو معاهم زوج اشخاص توجهو ليها نيشان .....
الشخص...سلام عليكم
سوسن...وعليكم السلام
الشخص...معانا امر بإقفال الإيكول 
سوسن ..."بعصبية ..اش كاتخرف ثم شكون نتما؟!
بين ماهي كانت كاتسجل طلبات الكليان لاحظات رتباك البناات ولولاد لي خدامين معاها كلشي نضابط وقاطع نفس ستغرباب من رتباكهم رفعاات راسها وشافت فين كاتشوف سارة وكانت الصدمة ...

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.