رفقا بي يا جلادي الجزء 11

من تأليف Khadija El
2018

محتوى القصة

رواية رفقا بي يا جلادي

نزل من سيارتو ودخل لداخل الريسطو بهيبتو المعتادة والتخنزيرة لي ما بقاتش كاتفارقو وسعات عينيها وحلت فمها على الاخر 
زمرد...هو والله حتى هو ياربي مايكونش هاد شي لي فبالي ......"رفعاات راسها وشافت ناحية سارة وغمزاتها تجي لعندها جات توجهات لمطبخ ولحقات عليها سارة 
زمرد...اجي واش جلنار هو البوص 
سارة..."حلت فمها" فين كاتعرفيه؟! "رفعات حاجبها" 
زمرد...من ونقولك قولي لي دابا واش هو البوص
سارة...اييه هو ناري التوتر وحرق الاعصاب وضغط كلشي كايجي معاه "شافت فيها" شوفي ماتعرفيني ما نعرفك البوص ما كايبغيش كترت لكلام ديها فشغلك اه حاجة ثانية واياك يشوف ولدك يقدر ما يبغيش هانا علمتك
زمرد...."بخوف" خوفتيني " شافت ف محمد رضا " ماما وياك تخرج لبرا بلا خباري 
محمد رضا..."كايعطس" اتس اتس 
زمرد..."خدات المشوار" شفتي هانت ضربك البرد قلت ليك ماتحيدش القاميجة
محمد رضا..."عينيه دابلين" الصمت
ابتهال..محسن 
محسن...نعام...
ابتهال ...جاي شي ناس من طرف ميسيو جلنار وغايتغداو مجموعين هنا "عطاتو القائمة" ها شنو غاتوجد ...

كانو عينيه دابلين وكايعطس هزاتو وحطات يدها على راسو كان سخون عرفاتو مرض شافت ف ابتهال وتكلمت
زمرد.. ابتهال محمد رضا مريض واخا نمشي ليوم ونعوضو من بعد
ابتهال...ناري يازغبية مالقى فين يمرض غير هاد نهار راك عارفة جاين شي ناس مهمين من طرف البوص ونبه علينا ممنوع يغيب شي حد او يكون شي خطأ عرفتي شنو غانصيفط انس لصيدلية يجيب ليه دوا هادي غير نزلت بدر وديه لغرفة فين كانبدلو يرتاح وكل مرة طل عليه وحدة غير يمشي البوص تقدري تخرجي
زمرد ..."بعدم حيلة" واخا شكرا " خدات الفلوس من صاك ومداتهم ليها " .....خرجات ابتهال وكلفت انس يجيب دوا بداو خدمتهم ودبانة ما كاتزنزنش كايهضرو غير بالعينين زمرد كانت كاتحاول تفادة يشوفها جلس فطارلة معزولة على ناس وكاطل على البحر كانت كاتشوفو من بعيد وبدون ماينتايه كان ظاهر عليه مهموم يالا دور راسو وهي دخل بزربة كل مرة كانت كاتقيس حرارة محمد رضا وبالها مشوش عليه مالقات كي دير ليه خافت تخرج ويطردها حاولة تمشي وتتكلم معاه لكن تراجعات فأخر لحظة لما دكرات طردو ليها من دارو تنهدات تنهيدة حارة وجلسات جنب ولدها ...

لاحظو البناات ارتباكها لكن مابيناتش خرجات لبرا بزز باش تاخد طلب ديال شي كليان وكانت عاطياه بظهر باش مايشوفش وجها هو بدورو ما كتارتش وماهتمش شكون لي كاين فريسطو خدا سيجارة وبدا يدخن مزال ماقدر ينسى جنان فكل ما كايدكر خيانتها كايزيد يتأزم بعد ساعات قليلة وصلو الاشخاص لي كان كايتسنى قدومهم لكن شخص مهم بنسبة لجلنار مزال ماجا رحب بالناس لي جاو كانو ثلاثك الشباب زوج منهم موظفين عندو فالشركة والثالت شريكو الجديد كلهم سألو على الشخص الرابع ولي تأخر تاصل بيه جلنار وقال ليه بلي قريب ويوصل قطع الاتصال وبداو كايدردشو بين ما يوصل بعد 15 بضبط وصل بلاصة السيارة ودخل لداخل كايتعنكر البنات لي تما حلو فمهم كانو معجبين بجلنار ولكن هذا جاب ليهم تمام حيد نظزات شمسية وسلم على الاشخاص باليد اما جلنار ضمو كان عناق حار بينهم من بين احزانو تبسم وظهرات الفرحة على وجهو بشوفتو بعد العناق جلسو كايدردشو بعد ثواني رفع جلنار يدو وعيط لسارة......
سارة...حانية راسها" وي ميسيو
جلنار...بداو تنزلو لغدا 
سارة..."حنات راسها بحترام وعينها على شخص" امرك سيدي .....مشات سارة بخطوات متسارعة لمطبخ وقلبها كايرقص سامبا 
سارة..."كاتنشش على وجها" الله ياربي الله هاد شي بزاف
شيماء...مالك نتي فعار الله 
زمرد...هازة محمد رضا" مالك؟!
سارة...ياختي توت البري واحد مع ميسيو جلنار دوخني وقطع فيا النفس اشمنك ياطولة واشمنك ياعضلات واشمنك ياسمورية وشعر كحل مسرسب لا ولي جاب جمع ليا حب وتبن التخنزيرة اااااح يايما قلبي "حطات يدها على قلبها.....
ابتهال...نفس هي لي غايقطع فيه البوص اذا مانزلتيش طلبات طيري خلاص "وجهات كلامها لزمرد ولشيماء نتما لي غاتنزلو لغدا لبوص 
سارة...نقزات'" انا لي طلب مني 
ابتهال...هادو اوامر شاف عارفك فليلفة وغاتنوضي شي نعير تبتي شوية زائد طاولة رقم 10 طلبوك شخصيا تهتمي بطلباتهم
سارة...تفو من دوك لبراهش ما غانزبل ليهم غير يتسناو
ابتهال ..."تعصبات" سارة ماتصعرنيش البوص كاين وماقادين على معيور خلي هاد نهار يدوز بسلام"شافت فالبنات" زمرد شيماء طلقو راسكم...
كانت باغية تعترض لكن خافت يشكو فيها بلي خايفة تشوف جلنار غايبداو يسولو وهي مابغاتش تتكلم على حياتها الخاصة هذا علاش دارتها فيد الله وقررات تواجه الوضع كيف ما كان خلات ولدها مع محسن وهزات الاطباق شيماء قدامها وهي لور خرجو من المطبخ وتوجهو لطاولة فين جالس جلنار كانت حانية راسها قبل ما توصل هزاتو وحسات بالدنيا دارت بيها ورجليها كايرجفو ويدها كتر فقدات سيطرة وطاح البلاطو من يدها وكلشي كاع ناس تلفتو ليها ماعدا جود لي كان كايهضر ف تيلي شافها جلنار وعقد حجبانو سمحات فالبلاطو لي طايح وتجاهلات نظرات ناس ورجعات المطبخ كاتجري قبل ما يشوفها جود دخلت لمطبخ يدها كايرجفو وقلبها كايضرب لون وجها رخطف خرجات عينيها وكاتشوف فالفراغ قبل ماتلتقط انفاسها دخل جلنار لمطبخ كي لعجاجة وعاقد حجبانو اشار براسو باش يخرجو خوا المطبخ بقات غير هي وياه ومحمد رضا لي كان متكي راسو على طبلة بلعات ريقها وشافت فيه.....
جلنار..."بنبرة قاصية" شنو هاد شي لي درتي برا ؟! ثم شنو كاديري هنا ؟!
زمرد...س م سمح ليا ماشي بقصدي انا يالا مؤخرا خدمت هنا صدقني ما كنتش عارفة واش انت مول المطعم 
جلنار...علاش طيحتي البلاطو وخليتي مليوح فالارض اش كايحسب ليك راسك..."قبل مايسكت سمعات صوت جود وصوت خطواتو كايقربو للمطبخ خرجات عينيها ونزلت منهم دمعة وكلها كاترجف شافت فيه بترجي وتكلمت 
زمرد...الله يخليه خرج خرج ماتخليهش يدخل كانترجاك ...

جود....واش انا جيت نشوفك وانت تخشيتي فالمطبخ
جلنار..."بالو مع زمرد" هااااه
جود...هووووه "رفع حاجبو" شنو قاضيتك اصاحبي "ضحك وبانو نياب لي زادوه وسامة "ياكما شي وحدة تما "غمزو "
جلنار..."بحرقة" كانت وحدة هنا " اشار لقلبو" بعد ما مشات ماتو كاع نسا ف عيني احم خلينا فموضوعنا شنو رائيك فشي لي قترحت عليك؟!
جود...وي فكرت وفاتحت أمير فهاد الموضوع لكن "دكر زمرد" كاين واحد المشكل عالي وهو لي مخلينا بلا عقل احم "شاف فيه وتبسم" طبعا موافق على بركة الله لكن أمير ما غايكونش معانا فهاد الفترة دماغو ما معاهش
جلنار..."بهتمام" خير ؟!
جود...هذا موضوع طويل غايجي النهار لي نحكي ليك "صافحو " مبروك شراكة
صافحو بعضهم مع ابتسامة عريضة والاشخاص لي كانو معاهم صفقو وباركو ليهم بعد الغدا تافقو غدا يوقعو عقد الشركة بينهم بثلاثة جلنار وجود وأمير 
جود...اش بان ليك تشرفنا اليلة لعشا فالقصر ومنها نتكلمو فالشراكة الجديدة؟!
جلنار...بعد تفكير" اوك 
جود...كيف بقات خالتي ؟!(قصد الينا) 
جلنار..."بحزن "مزال كيف خلتيها اخر مرة ...

بقات غادية جاية والبناات لاحظو توترها ورتباكها لكن ما عطاتهمش راس الخيط بعد ساعة خرج جلنار وجود والاشخاص لي كانو معاهم حتى خرجو عاد رجعات فيها روح مع دلك ما مرتاحاش للوضع الجديد بعد ساعتين بضيط رجع جلنار طلع لمكتب ديالو وطلب شوفتها ستغربو لبناات من طلبو عمرو طلب يتكلم مع شي وحدة من سربايات طلعت لعندو كاتقدم خطوة وتوخر لأخرى وصلت لباب خدات نفس عميق وطرقاتو بعد ما سمعت الادن دخلت اشار ليها تجلس جلسات وكاتفرك فيدها من توتر.......
جلنار...فين كاتعرفي جود ؟! وعلاش من شفتيه رتابكتي وطلبتي مني نبعدو على المطبخ؟! 
زمرد...سمح لي هذا موضوع خاص 
جلنار...اهاااا قولتي موضوع خاص اوك ادا نسألو هو "يالا هز تيلي وهي تخرج عينيها"
زمرد.. "طارت من بلاصتها وحيدات ليه تيلي من يدو " الله يخليك ماتاصلش بيه
جلنار..."عقد حجبانو" اكيد وراك شي حاجة من نهار شفتك عرفت غاتكون وراك شي كارتة ياإما غاتحكي ليا ولا غانتاصل بيه مدام هاربة منو اذا ادتيه وجود صديق عمري مستحيل نخليك تفلتي ...

زمرد...انت غالط انا مادايرة والو كل ما فالامر عندي واحد المشكل مع راجلي وجود من عائلتو ومابغتوش يشوفني انا ماباغية والو بغيت غير نكبر ولدي والولد لي جاي فجو بعيد من المشاكل 
جلنار..."بستغراب "الولد لي جاي "عاد حفطن اه فهمت يعني حاملة "خنزر فيها " اكيد المشكل وراه الخيانة كلكم بحال بحال سلعة وحدة 
زمرد ..."وقفات" مانسمحش ليك تهيني "حاولت تتمالك نفسها انا عيت مابقاتش عندي الطاقة ثلت سنين من المعانات كانظن جا الوقت لي نرتاح فيه ديك العائلة ما جاني منهم غير القهر والعذاب "نزلو دموعها" ثلت سنين وانا ولدي مجرجرين من قنت لقنت ثلت سنين ديال ظلم "كلها كاترعد " باشمن حق تاهمني بالخيانة انا عمري خنتو هما كدبو عليا "كاتشهق ودموعها نازلين" حتى قلت الدنيا ضحكت ليا وسامحتو ونسيت كاع لي دار فيا قلبي بغاه صدقني بغيتو ومزال كانبغيه هئ...هئ....حاولت نكرهو ماقدرتش انا هربت اه لكن هربت حيت مابقيتش قادرة نصبر لظلم عفطت على قلبي ولحت كلشي ورايا " مسحات دموعها " غايجي لوقت لي يعرف الحقيقة ويندم لكن عمري نرجع لداك لقصر لعين "شافت فيه سبق ودرتي فيا خير وقلت ليك ادا لقاتنا ظروف غانردو ليك تلاقينا من جديد ورجعتي ساعدتيني وانا فأمس الحاجة واخا ماكنتيش عارف انا غانخلي الريسطو وكانواعدك ما غاتبقاش تشوفني مزال

زمرد.."حطت يد على وشافت فيه بترجي" .....🙏 كانترجاك ماتقولش ليه كنت هنا "تحجرو دموع ف عينها" كانواعدك ماغاتبقاش تشوف وجهي مرة اخرى ...مسحات دموعها وعطاتو بظهر يالا جات تخرج وهو يوقفها بصوتو ........
كانت غادية جاية ودمها كايغلي شكات فيه لكن قالت مع راسها مايقدرش أكيد ماشي هو بين ما هي كاتفكر تفتح باب شقتها دارت بالعرض البطيئ ووسعاات عينها 
سوسن.."بعصبية" اييييه فين مدرم ثم من جاك مفتاح داري اويلي هادي دار ولا كوري "اشارت لباب " خرج عليا ولا نتاصل بالبوليس
جود..."جلس فوق الكانابي ودار رجل فوق رجل" كالما "مع ابتسامة ساخرة" 
سوسن..عند بالك سايبا والبلاد ما فيها قانون خرج عليا "اشاوت للباب و بصوت عالي " خرررررررررج......
جود..."بنبرة قاصية" انا هو القانون "كايطلع فيها وينزل 
سوسن...مدردرين عليا الكوك جمع عينيك وخرج عليا 
جود..مدردرين عليك تقحبين 
سوسن...تقحبين دردروه على مك قبل مني عليها جابت زامل كيف .."قبل ماتكمل كلامها طاحت الارض من صفعة لي عطاها هزها من شعرها وقربها لوجهو حتى تخلطو انفاسهم ...

زير على شعرها بيدو وتكلم من تحت سنانو
جود...تجبدي مي على لسانك نقطعو ليك من جدر الق** ة قولتي زا** تبغي نوريه ليك 
سوسن..قطعو وعطيه لكلاب ياكلوه ادومة وراه عندو مي كايبقى زا** من فاصيلتك
...لاحها على الكنابي وجا فوقها وشد يدها باش ماتحركش عضها فشفاها حتى غوتات وداز دم رفع راسو وشاف فيها وعينيه حمرين
جود...عارف بلي متشوقة ذوقيه مي ماغانعطيكش هاد شرف "ناض فوقها" فين هي زمرد....
سوسن..."حطات يدها على شفاها وكاتألم " خرج عليا "بعصبية" خررررررررررج
جود..."دار يدو غجيابو" سمعت بلي وكر دعارة اوبس باغدو قصدت ايكول درقص "تبسم بسخرية لي فاتحة سدوها ليك
سوسن..."كاضرب فيه فصدرو " الله ياخد فيك الحق انت ورا اقفالها الله يلقيها ليك شنو درت ليك عطيني بتساع 
جود..."شد يدها ولواها" قولي فين هي زمرد ومن غدا تفتح
سوسن..."بتحدي " شتي الله يجعلك ماتسدش غير الايكول الله يجعل تخرجني من دار نعس فشارع ولحس ثراب ومتحلمش نقول ليك واخا تقطعني طراف ماتحلمش نقول ليك مكانها يالا تهنات منكم القوم ظالم...

جود..."دفعها" هاحنا غانشوفو شحال قدك تخبي عليا......"خرج من شقتها ودمو كايغلي كان متوقع تقول ليه لكن طلع راسها قاصح طلع فلوطو وكسيرا وخلا العجاج وراه
#المسااااااااااااااء•••••••🌇
رجعات لدار فين كاريا كانت شمس كاطنطن ماحيلتها لحر شمس ولا الحر لي فقلبها الخدمة لي كانت كاتعدي بيها اليوم خلاتها وبسبب أمير كاتحاول تكرهو لكن قلبها كايرفض اول حاجة دارتها سخنات لما شوية غير دفاتو ودخلت بانيو لبيت فين ساكنة وسدات الباب ودوشات لمحمد رضا باش تنزل حرارتو من بعد البساتو شورط وتيشورط ووجدات ليه لكوطي وعطاتو دواه بعد ما خدا دواه غفى من التعب جلسات جنبو وكاتمرر يدها على خصلات شعرو باست جبينو وتنهدات....
زمرد...سمح ليا اولدي كرفستك معايا كانواعدك غانعوضك على كاع لي فات "باست يدو ووقفات يالا غاتوضى وهو يوصلها تصال من سوسن من رقم الجديد جاوباتها بسرعة....
زمرد..سوسن اش خبارك
سوسن..."بنرفزة" كيف زفت 
زمرد.."بخوف " شوشتيني اش واقع
سوسن..لي واقع داك زامل دجود سد ليا الايكول بغى يلوي دراعي باش نقوله فينك
زمرد..."بصدمة" كيفااااااااااش!! "حطات يدها على فمها " الله ياربي باشمن حق يسدها شرحي لي 
سوسن...جاو عندي شي قناقم ومعاهم الامر بتشميع الإيكول من مشيت نسول...

قالك الالة كان خصني نأخذ ترخيص من قبل مانوي نفتح المؤسسة الخصوصية ديالي وهذا الترخيص تيصدر بموجب قرار يصدره وزير التربية الوطنية والتعليم العالي اي كل شخصية ذاتية أو معنوية ترغب في فتح مؤسسة يجب أن توجه طلب الإذن في فتحها إلى الوزير في ظرف مضمون الوصول بواسطة المسؤول الإقليمي عن الوزارة. وفي الدائرة المنوي أحداث المؤسسة فيها ويحرز الطلب في ورقة متنبرة ويجب أن يصحب بملف تحدد محتوياته بموجب قرار يصدره وزير التربية والتعليم العالي 
زمرد..."حلت فمها" علاه نت ما كنتيش واخدة رخصة ؟!
سوسن..لااااا 
زمرد..."اويلي واش كاين شي ايكول بلا رخصة انت كاتعتبري مقاولة واي مقاول بغى يفتح بروجي لازمو رخصة من الجهة المعنية الله ياربي شنو بغى مني هذا حتى هو "خدات نفس عميق " هذا ساهل حلو غاتمشي لوزارة تعليم وغاتقدمي طلب والوزير هو لي غايعطي الادن بعد مادفعي طلب غايخصك تسناي غالبا ثلت شهور على مايوافقو فجميع الحالات لازمك رخصة باش تكوني اليز لكن ياخوفي تكون يدو واصلة ويرفضو يعطيوك الرخصة
سوسن..بغيت ليه القطيع مدام قدر يسدها الى و يدو واصلة
زمرد..."بحزن " انا سبب من نهار شفتيني وانت فالمشاكل 
سوسن...ماتقوليش هاد لكلام ما كاتعرفيش شي حد يدخل ليا متلا "كاتحك راسها " 
زمرد...نتي عارفة بلي ماعندي حد فهاد دنيا و"قبل ماتكمل كلامها شافت قدامها جلنار ...

زمرد..."كاتشوف فيه " سوسن شوية ونتاصل بيك ...."قطعاات الاتصال وشافت فيه بستغراب "..كيفاش عرفتي مكاني احم "توترات " مرحبا بيك 
جلنار..."كايتفحص الغرفة بعينيه" عرفت بطريقتي "كايشوف ف محمد رضا" جمعي حوايجك انا كانتسناك برا..عطاها بظهر يالا غايرمي الخطوة وهي توقفو بصوتها"
زمرد..عفوا مافهمتش قصدك؟!
جلنار...ماشي مهم تفهمي "كايشوف الساعة لي فيدو " ماعنديش الوقت بزاف "باش يطمأنها" ماما كاتسناك وهي محتاجاك . ........
كانت دايزة وسمعات صوت عبله لي خارج من الغرفة وظاهر عليها معصبة ماهتماتش يالا غاتكمل طريقها وهي تسمع كلمة لي خلاتها ترجع بزوج خطوات لور وتحط ودنها على لباب لي كان محلول شوية......
عبله..."بعصبية" هاد الملف فالشركة وفمكتبو الخاص كيفاش غانجيبو ليك سليم بليز عفيني
....سكتات ثواني من بعد زفرات بعصبية"الله يلعن ساعة لي سلمتك فيها نفسي ....... "بخوف " لااا لاااا الله يخليك الى التسجيل "كاتمسكن " هذا هو جزائي حيت تقت فيك وسلمتك نفسي خنت راجلي بسببك فالاخر تلوي دراعي......"تسمرات فمكانها وسعات عينيها وحلت فمها على الاخر حطات يدها على فمها ورجعات بزوج خطواات لور وهي مزال تحت تأتير صدمة بعد ثواني من صدمة توجهات لغرفتها بخطوات متسارعة وكلها كاترعد مامصدقاش شنو سمعات بقات غادية جاية فالغرفة وكاتخمم بعد تفكير ليس بالهين لبسات حوايجها وخرجات من القصر طلعت فسيارتها وتوجهات لشركة...

بعد تفكير واعداتو غدا تمشي لفيلا وتشوف الينا لكن ما واعداتوش تجيب حوايجها خرج من عندها وخلاها فحيرة من امرها شنو تحت راسو وعلاش لحق عليها فاش خرجات من المطعم وشنو باغي منها اسئلة كتيرة كانت تردد فيهم فداخلها ومالقاتش ليهم جواب خدات نفس عميق وزفرات توجهات لولدها قاست حرارتو كانت نزلت فيقاتو وكاتلعب معاه بعد دقائق خدات تيلي وتكلمت مع سوسن وواعداتها تلقى ليها حل شحال وهما كايتكلمو من بعد قطعات الاتصال وجلست كاتفكر ف ماضيها وكاتخمم فحاضرها وشنو مزال جايها نفضات افكارها ولبست حوايجها وقررت تخرج مع ولدها باش يغير الجو بدلت ليه حوايجو وهزات صاكها صغير فيها تيلي ديالها وشي فلوس وقرعة الما صغيرة وواحد البيسكوي خرجو من الغرفة وسدات الباب بالمفتاح شداات لمحمد رضا يدو وخرجو من دار تحت انظار حفيظة لي كاتشوف فيها شوفات كلهم شر تجاهلات نظراتها وكملت طريقها بين ماهي خارجة من زنقة لاحظات نظرات نساء لي مجاورين معاها كانو كايميقو فيها نقزات وحدة منهم وتكلمت...
الجارة1 ...يييخ زنقة عمرات بالخنز وريحة عطات
الجارة 2..ماقدونا بزناسة زادونا لق**ب لا ومعاهم لحرمين من الفوق ...

ستغفرات الله فسرها وكملت طريقها ومتجاهلة كلامهم لي كيف السم وصلت لراس شارع وطلعت ف طوبيس..........
مسافة طريق كانت قدام باب شركة بلاصات السيارة وتوجهات لجناح امير كان جالس فالمكتب بوجه عابس حاني راسو متقل بالهموم دخلات بلا ماطرق لباب مارفعش راسو كان مرهق لدرجة ما قدرش يرفع راسو ويشوف شكون دخل توجهات ليه بوجه حزين حطات يدها على كتفو بدون مايشوفها عرفها من ريحتها لي دخلت لانفو كرز على يدو وشاف فيها بغضب .....
أمير...اش جاب هنا ؟!
شموخ...أمير عندي ليك شي كلام
أمير..."وقف وخنزر فيها وتكلم بنبرة قاصية" من نهار مشات زمرد وخلاتني بسببك مابقى بينا حتى كلام "اشار للباب" خرجي ولاغانسى بلي كنتي ختي وغانتصرف تصرف ماغايعجبكش
شموخ.."بحرقة" يااااااااه كنت يعني "حسات بغصة فحلقها ودموع تجمعو فعينها" يعني مابقيتش ختك"نزلت دمعة على خدها " شنو ندير باش تسمح ليا "شدات يدو هئ....هئ...أمير كانترجاك سمح ليا لحظة طيش 
أمير..."كرز على يدو" خرجي قبل مانفقد اعصابي
شموخ..."مسحات دموعها وشافت فيه "ماغانخرج حتى تسمعني.....صرخ بصوت عالي لكن سكتاتو بكلمة خلاتو يخرج عينو....
شموخ....عبله كاتخونك
أمير..."شاف فيها" شنووو؟! هادي شي خطة جديدة منك؟!
شموخ..."جلسات" صدقني انا سمعتها بصدفة كانت كاتكلم فتيلي مع شخص و....."حكات ليه بتفصيل شنو سمعت ماتفاجأش من غدر عبله ولا متوقع منها اي حاجة منهار وقع لي وقع شاف فيها ورفع حاجبو....
أمير..."رفع حاجبو" شكون هذا ؟!
شموخ..ماكانعرفوش لكن دكرت سميتو" حطات يدها على راسها وكاتحاول تتدكر" ااااااه قالت سليم 
أمير..."ضرب يدو مع المكتب بقوة" الكلااااب
شموخ..."دكرات" ااااه دكرت حاجة اخرى كانو كايتكلمو على شي ملف طلب منها تسرقو منك هاد شي لي قدرت نسمع
أمير.."عرقو رقبتو ويدو برزو" هاحنا غانشوفو اسي سليم ..."هز الفيست ديالو وشاف فيها" شي لي دار بينا دابا حتى حد مايعرفو حتى حد كاتسمعي 
شموخ.."تبسمات"اااه اااه معلوم....يالا غاتزيد تكلم خرج وخلاها معاملتو جديدة ألماتها لكن قطعات وعد مع نفسها غاترجع خوها ليها وغاتصلح لي فاات هزات صاكها وخرجات من المكتب ...

#المسااااااااااااااء•••••••••••••••••🌇
علم جود الخدم لي فالقصر يوجدو لعشا يكون مميز وعلم عمو وأمير بلي جلنار غايتعشا معاهم رحب منتصر بالفكرة لكن أمير ماقال حتى كلمة بالو كلو مع زمرد والخطة لي غايدير لعبله باش يطلقها بسهولة بعد ساعات قليلة جا جلنار لقصر كان ف ستقبالو منتصر وجود توجهو لغرفة الجلوس كايدردشو بعد دقائق نزل أمير وتوجه ليهم .......
بعد ما غيرو الجو خدات طاكسي صغير ورجعات الحي توجهات لبيت فين ساكنة يالا غاتفتح لباب وهو يوقفها شخص بصوتو...
كان رجل فالخمسين من عمرو طويل وعامر وعندو الكرش وشعرو خليط بين الاسود والابيض تكلم بصوت غليض ونظراتو كلهم اعجاب ......
الشخص...الأنسة زمرد ؟!
زمرد..."بستغراب" هي هادي مي مدام 
الشخص..."مرر يدو على دقنو" اوووه با كغاف كي مدام كي مادموزيل "قهقه " هاهاههه "كايتفحص جسدها بعينيه بشهوة" فجميع الحالات راك عجبتبني ولي امرتي بيه يحضر 
زمرد..."فهمت قصدو" سيدي كانظن غالط وادا سمحتي تقدر ترجع من جيتي ...عطاتو بالظهر يالا غاتفتح الباب وهو يشدها من دراعها وزين عليها.....
الشخص....كايبان لي مزال ما عارفاش راسك معامن كاتكلمي وشكون انا "تبسم بمكر" يكفي اني جيت بنفسي لهاد الحي رديئ على قبلك
زمرد..نترات يدها" اييييه بعددددد اش هاد قلة دوق حترم نفسك انا مرا مزوجة وبولدي 
الشخص..."جبد الشيك وستيلو وشاف فيها" شحال كاطلبي 
زمرد..."زادت تعصبات" شوف ياإما غادرق خليقتك ولا غاتشوف تصرف ماغايعبكش...

واخا رفضت لكن بقى مصر وزاد فعنادو لدرجة تقرب منها اكتر من لزوم وحاول يجدبها لعندو ستجمعات قواها ودفعااتو وشرارت الغضب كاطير من عينيها لي علا صوتهم وبداو جيران يطالو كانت حفيظة واقفة وكاطرطق فالمسكة وابتسامة عريضة على شفاها شافت فيها زمرد بغضب عرفاتها هي مولات الفعلة الشارف بو كرش بقى مصر على طلبو جيران بداو يلعنو فيها ويطعنو فعرضها بين ما هي كاتواجه مع الشخص لي كان مصر ياخدها معاه دخل بدر وشاف الجوقة تقدم بخطوات تابتة وكايتسأل مع نفسو شنو واقع هنا شوية بشوية توظحات ليه رؤية وشاف زمرد وسط الناس كاتغوت وولدها شاد ليها فجلايلها وكايبكي خايف سرع فالمشي وجدب الشخص من رقبتو ودفعو بقوة حتى لصق مع الحيط
بدر..."بصوت خشن" واش مزال ما باغي تاقي الله وتحشم على عرضك 
الشخص..."بصوت غليض" بيدرو خليك بعيد 
بدر.."وجه كلامو لزمرد" اش واقع هنا 
زمرد..."تحجرو دموع ف عينها" انا بنفسي مزال ما ستوعبت شنو وقع يالا غاندخل لبيتي وهو يجي هاد شخص كايقل حياه عليا 
الجارة...ماكاينش قليلة الحيا قدك هنا ايوا صافي هاد شي لي بقى ناقصنا 
الجارة 2...مباركة من امتى وليتي كاتجيبي لخنز لهنا كيف مادخلتيها غاتخرجيها
الجارة 3...اااه ااااه معلوم لازم تخرج من الحي والى غاتفسد بناتنا 
بدر..."بصوت عالي " اييييييه لي عندها شي حفرة تردم فيها فرقو عليا هاد السوق "شاف ف الشخص" وانت امسعود قلب 6/9 ولا غاندير فيك يدي "جرو من الفيست ودفعو " يالا غيرها 
مسعود..."وجهو ولاحمر بالاعصاب" عقل اش درتي ادا بقات فيك راني ماشي مسعود....
خرج مسعود من الدار فقمة غضبو والجيران بقاو واقفين كايسمعو الكلام لزمرد ...

مباركة ...لي عندها شي شغل تمشي تقديه وحتى وحدة ماشغلها دااااري هادي وانا حرة فيها 
بدر..."بحدة" سمعتوها اش قالت يالا فرقو عليا المجمع ....
كل وحدة تسلت ودخلت لدارها بقات غير مباركة وبدو وزمرد لي كانت كاتسكت ولدها 
مباركة..."بأسف" لاحول ولا وقوة الا بالله ..."دخلت لبيتها وخلاتهم بزوج رفعات عينها فيه وتكلمت بمتنان....
زمرد..شكرا لثالت مرة كاتحميني سمح ليا بزاف مابقتيش كاتهنا بسبب "كاتفحص المكان بعينيها" مكاني ماشي هنا من الاحسن نبعد اذا بقيت هنا ياعالم اش غايوقع من بعد
بدر.."بصوت خشن"ماعندك فين تمشي ومن هاد لحظة حتى حد ما غايبقى يتطاول عليك حيت غايلقاوني فوجهم
زمرد...لااا لااا مابغيتش نكون سبب ف مشاكلك شكرا بزاف لحد هنا وسطوب 
بدر.."بستفسار" وفين غاتمشي؟!........
بعد مادردشو توجهو لغرفة الاكل يتعشاو لتحقت بيهم شموخ وتعشاو مجموعين فجو هادئ لاحظ جلنار الحزن لي ف عينين أمير وكيفاش كان مرفوع وما مركزش مع كلامهم 
جلنار...احم فين هي مدامتك ماشفتهاش؟!
عبله..."جاية كاتمختر" كانتأسف ميسيو جلنار على تأخير "تبسمات ابتسامة صفرا مرحبا بيك
جلنار...ماعليش "حرك راسو " شكرا 
شموخ..."كاتشوف فعينيها"عبله مابقيناش كانشوفوك شنو لي شاطنك علينا؟!
عبله..اوووه ديزولي شوشو تشغلت هاد الايام شوية 
منتصر...احم ميسيو جلنار شرف كبير هذا وكانتمنى هاد شراكة تكون شراكة خير ان شاء الله
جلنار...ان شاء الله ...

بعد ما كملو عشاهم توجهو لغرفة الجلوس كايتبادلو اطراف الحديت مع بعضهم كان جلنار كان كايفكر كيفاش يعرف قصة زمرد منهم بدون مايلفت لانتباه بين ماهما كايدردشو نساحب أمير بحجة عندو شي شغل ولحقت عليه عبله كاتمختر أمير خرج وهي طلعت لغرفتها بقى غير جلنار وجود وشموخ ومنتصر شاف فيه وتكلم.....
جلنار...صغيور مابانش لي 
منتصر..."تزير وفتح ليه لجروح" احم مسافر "تبسم بزز" 
جلنار اهاااه "تبسم بدورو "مزيان يبدل الجو 
"وقف " احم ليلة سعيدة وشكرا على حسن ضيافة
منتصر..وقف وصافحو" مرحبا بيك دارك هادي
جلنار...شكرا"صافح شموخ" امسية سعيدة انسة 
شموخ..."تبسمات" شكرا 
جود..."لبس جاكيط " يالا تصبحو على خير
منتصر...فين غادي ليل هذا؟!
جود...مزال سهران مع جلنار بااااي.....خرج جلنار وجود من القصر كل واحد طلع ف سياروتو ...

بدر...اوووه هاد شي كامل وقع ليك انت انسانة قوية وحدة غيرك كانت تضعف قدام هاد الكم الهائل من المشاكل
زمرد..."تنهدات" الحمد لله على كل حال
بدر..وهاد الشخص شنو لي خلاك تيقي فيه وتقرري تمشي لدار شكون قال يجري عليك مرة اخرى ؟!
زمرد ...كلشي ممكن مابقيتش كانتصدم ماعندي حتى خيار اخر من غير اني نقبل شفتي كلشي على عينك كل نهار صداع وجيران كايلوحو ليا لهضرة كانظن باركة ولدي غاتولي عندو عقدة من كترت المشاكل هو كايحس كرفصتو معايا من نهار خلاق مارتاح 
بدر...صبري عليا غانكمل شي شغل عندي واغانلقى ليك دار احسن من هادي وحتى شي حد ما غايقدر يمسك او يقلقك عندي واحد سفر نت سيري لعند هاد خينة وعدي معاه هاد الايام وغير نرج غانلقاو الحل بإدن الله واخا ماكانتيقش ف لي لباس عليهم مي ماعندناش حل اخر
زمرد.. شكرا بزاف عمري ننسى خيرك
بدر...مابيناتناش قبل لازم ناخد رقمك وعنوان هاد خينة باش من نرجع نوصل ليك بسهولة
زمرد...ااه معلوم سجل عندك...

جلسو فوق الصخر جلنار كان متردد يسألو بعد تفكير قرر يسألو ويعرف منو .....
جلنار....جود
جود...شاف فيه" وي 
جلنار...سمعت بلي أمير تزوج للمرة الثانية ولي تزوجها خانتو وحاليا هاربة ؟!
جود..."بستغراب " كيفاش عرفتي !!
جلنار..."بشمئزاز" يعني صح خانتو
جود...لاااا 
جلنار..."وسع عينيه" وظح حكي لي شنو واقع
جود....تراكمو عليا المشاكل من كل جيه كرهي للوليد كنت رافض ندخل للمغرب لكن عمي كان مصر ندخل دخلت غير باش ندير ليه خاطرو اول مادخلت لمغرب مشيت ديريكت لقصر وشفت زمرد قبل مانشوفها عبله وشموخ كرهوني فيها لكن لما جات عيني ف عينها نتابني احساس غريب ماقدرتش نفسرو مع ذلك قصيت عليها وواعدتها نعيشها ف جحيم بعد مدة كانتكتشف بلي الانسانة لي كنت كانهينها طلعت ختي من با من المفترض كان لازم نكرها حيت بسبب مها مي ماتت لكن ماقدرتش نكرها قلبي حن خصوصا من عرفت بلي هي مظلومة ولي وقع ليها كانت مؤامرة وخطة محبوكة من شموخ وعبله ومراد ولد عمي لي كايبغيها لما عرفنا لحقيقة كانت هربات وخلات لقصر بلي فيه من داك نهار وأمير منهار ومن داك نهار وانا منهار كتر منو ماخلينا فين قلبنا ومزال ما بان ليها لاتر لكن عندي يقين بلي غانلقاها "حرك راسو" اكيد غانلقاها....

#اليوم #المواااااااااااالي••••••••••
فاقت مبكرة توضات وصلت وجهزت الفطور فيقات ولدها وطرفاات ليه حالتو وفطراتو جمعات البيت وجهزات نفسها لرحيل اصلا ما كان عندها ماتهز هزات غير صاكها صغير لي جات بيه وشدات ولدها فيدها وخرجات من الغرفة سداتها بالمفتاح وتوجهات لغرفة بدر خبراتو بلي غاتمشي صافحها وواعدها بلي غايرجع واغايكون جنبها كانت مرتاحة ليه ودعاتو ببتسامة عريضة على شفاها تحنى وباس محمد رضا فخدو وخربق ليه شعرو توجهات لغرفة مباركة طرقت الباب وفتحت ليها حالة عين وعين مسدودة سلمت ليها المفتاح وودعاتها حاولت معاها تبقى لكن زمرد كانت مصرة تسالمو وخرجات من الدار ومن الحي وداخلها احساس غريب وقفات فراس شارع ووقفات طاكسي عطاتو العنوان مسافة طريق كان قدام باب الفيلا نزلت من طاكسي خدات نفس عميق وحطات يدها على صونيط ثواني والباب تفتح كانت شابة فالثلاتين من عمرها قوام ممشوق وبشرة بيضة كانت لابسة زي الخدم سألتها شكون انت يالا غاتكلم زمرد وهو يوقف جلنار بهيبتو المعتادة اشار للخادمة تنساحب وطلب من زمرد تتفضل دخلت لداخل وهي مخربقة والاحساس لغريب سيطر عليها ماقدراتش تفسرو شافت ليه فعينيه وتكلمات ...
زمرد...صباح الخير
جلنار.."بصوت رجولي" صباح النور
زمرد...اكيد مدام الينا فايقة ؟!
جلنار ...تماما .."اشار ليها " تقدري طلعي عندها هي كاتسناك
زمرد..احم شكرا ....شدات محمد رضا فيدو وطلعت لطابق الثاني وعينين جلنار ملاحقينها بعد ما ختفت على الانظار خدا تيلي ديالو وتاصل بيه ...

مسافة طريق كان جود قدام باب الفيلا بلاصة لوطو ونزل منها توجه لباب بخطوات تابتة فتحات ليه الخدامة ودخل لداخل كان جلنار فالصالة كايتسنى فيه اول ما شافو تبسم توجه ليه وضمو بعضهم ....
جود...خير علاش مفيقني على صباح بايت تحلم بيا 
جلنار...احم عندي ليك مفاجأة
جود...مفاجأتك كترو هاد الايام "بهتمام" كانسمع
جلنار...اشار ليه " تفضل معايا ......طلع جلنار لطابق الثاني وجود وراه ومستغرب فتح باب الغرفة ردخل كانت جالسة فالكرسي اول ما تفتح لباب تلفتات والابتسامة على شفاها لكن سرعان ما جمعاتها ووسعت عينيها وكلها كاترجف...

جود..."حل فمو على الاخر" ز زمررررد ......
زمرد..."وقفاات ورجعات بزوج خطوات لور" ش شن " ستجمعات قواها " شنو كادير هنا ؟! " شافت ف جلنار بستفسار " 
جلنار...زمرد سمعي منو جود عندو ليك شي كلام 
زمرد ..."بنبرة قاصية" مابيني وبينو حتى كلام ويستحال يكون "بعتاب" ياخساااارة بصح ياخسارة كنت متوقعة اي حاجة الى هاد شي ..."جات تخرج وشداتها يد جود".....
فاق مبكر وهو كلو اصرار يوقع عبله فالفخ خدا درش خفيف ولبس حوايجو سروال جينز مع تيشورت بيضة لبس سبرديلة دار ساعة اليدوية من نوع الفاخر ورش بارفان ديالو وهز تيلي وخرج من الغرفة بخطوات تابته نحو غرفتها فتح الباب ببطئ دخل راسو كانت غارقة ف سابع نومة دخل لداخل الغرفة بخطواات شبه مسموعة توجه ديركت لحقيبتها اليدوية (صاك) جبد من جيبو كاميرا صغيرة على شكل حبة صغيرة كاتسجل صوت وصورة لصقها بإحكام فالصاك وتلفت لعندها تقلبت على الجنب الثاني وفتحات عين وعين مسدودة ......
عبله..."بصوت ناعس" أمير
أمير..."مع ابتسامة جانبية" صباح الخير

بعد اصرار من جلنار خرجات من الغرفة وخلات محمد رضا مع الخدامة وتوجهات لغرفة الجلوس كانت كبيرة مفرشة بأتات عصري طاغي عليها الون الابيض وكاطل على البيسين نساحب جلنار بعد ما وجهم لغرفة وخلاهم بزوج زمرد كان ظاهر عليها الكتير من الغضب مع الكتير من التوتر عكس جود لي كانو ملامحو جامدة وما كاتفسرش شاف فيها شوفة مطولة ماكانش متوقع غايشوفها بهاد سهولة بعد ما كان كايبدل مجهود كبير باش يلقاها طول فيها شوفة بدون مايتكلم بعد صمت لي دام لثواني قررت تكسر جدار الصمت وتتكلم معاه وتعرف منو شنو باغي منها......
زمرد...علاش كنتي كاتقلب عليا ؟! شنو باغي مني ؟!! ياك داك القصر العين خليتو ليكم وسمحت فكلشي علاش مزال مصرين تهدمو حياتي وتنغصوها عليا ...."قاطعها بصوت رجولي مع نظرة حنينة" ....
جود...علاش هربتي !! ماكنتش متوقع طلعي جبانة ..."كايقرب منها" 
زمرد..."كاترجع الور" حدك تما شنو باغي مني " بحدة " علااااااش تابعني شنو درت ليك فاش اديتك ؟!
جود..."الغصة فحلقو " هما لي دارو ليا وليك "بحرقة" هو لي ادا ماما واداني واداك حتى نتي هو المسؤول ماشي انا ماتلومينش لما حقدت عليك من قبل ماشي بيدي لو عشتي لي عشت غاتعذريني "قرب منها اكتر" ...احم خلينا ننساو الماضي ونبداو صفحة بيضة " صفحة بدون مناوشات او احقاد صفحة نقية كانقاء قلبك وطاهرة كاطهارت روحك يالا غايشد يدها وهيا دفعو " 
زمرد...اييييه حدك تم ماغانسمحش ليكم تأديوني من جديد زمرد لقديمة ماتت ثم اش كاتخرف وظح كلامك؟! 
جود...انا اخرر شخص يفكر يأديك فين عمرك شفتي شي حد كايأدي روحو ...

زمرد..."وسعت عينيها على الاخر" اش اش كاتقصد " اش كاتخرف !!
جود...بلا شك باغية تعرفي شكون هو باباك؟!
زمرد.."بلهفة" شكون ؟!!.....
جود...باباك هو بابا 
زمرد ..."بتلعتم " ش ش شنو !!
جود..."كرز على يدو " اصيل لي هو بابا كان كايخون ماما الله يرحمها وبسببو ماتت ولي خانها معاها كانت نعمة "شاف فيها "مك " ونتي كنتي تمرة خيانتهم "بحرقة " لما عرفت ماما لله يرحمها بداو المشاكل خصوصا لما عرفت بحمل نعمة كان كايمد يدو عليها ويقمعها وكايهددها بقات على داك الحال حتى المشكل كبر ولما دخلت ودافعت على ماما طردني من دار رجعت الامريكا وياريتني ما رجعت بعد مدة قليلة ماتت ماما "نرلت دمعة على خدو" من داك النهار وانا حاقد عليه وعلى ماماك وعليك حتى نتي واخا ماكنتش عارف جنس المولود فداك الوقت شاءت الاقدار وشفتك اول ماعرفت وتأكدت ماقدرتش نكرهك اول ما شفتك وقبل مانعرف نتابني احساس غريب ماقدرتش نفسرو "شاف فعينها وشد يدها" اول ماعرفت جيت كانجري باش نشوفك ونخبرك لكن كنتي مشيتي ماخلينا فين قلبنا زمرد امير كايعاني ومدمر عرف الحقيقة شموخ ومراد وعبله خططو باش يفرقوكم فنفس اليلة فاش تأكدت بلي حنا خوت جا مراد وعترف بذنبو بعد مافقد الامل تكوني معاه بابا لما عرف جاتو نوبة قلبية ودار عملية احم مزال ماشفتو وما كايهمنيش نشوفو زمرد انا بين نارين انت من جيه وعبله من جيه مابغيت حتى وحدة فيكم تعاني مرة اخرى عبله غالطة وبزاف لكن كاتبقى ختي كيف مانتي ختي "شد يدها وباسها" تيقي فيا 
ونساي لي فات وخلينا نبداو من اليوم 

جدبها لعندو وضمها لصدرو وزير عليها كانت مزال تحت تأتير صدمة لسانها تعقد نزلت دمعة حارة شقاات طريقها على خدها بعدها على حضنو ومسح دمعتها بطرف صبعو وطبع قبلة ف جبينها رفعات عينيها فيه وطلقت لعنان لدموعها وشهقاتها رجعها لحضنو وزير عليها من جديد .....
زمرد...هئ....هئ...م م ا مايمكنش هئ....هئهءهءهءهء "بحرقة" اااااااااااااااااه علاش اربي علااااش هئ...هئءهءهء........
جود..."نزلت دمعة على خدو" ششششت كالما 
زمرد..."بعدات على حضنو" كي كيفاش عرفتي وشن وشنو لي أكد ليك....
جود..."تنهد" نهار لي دخلت فيه لغرفتك وكنتي شبه عارية جات عيني على الشامة لي فكتفك و ..."حكى ليها" ...." كانت كاتسمع ليه ودموعها نازلين بعد ما حكى ليها شد يدها وطلب منها تمشى معاه لتاقطاات انفاسها وشاف فيه بعيون دامعة...
زمرد...لازم نتأكد من صحة كلامك
جود..."فهم قصدها" نقدرو نديرو تحليل من دابا اذا بغيتي 
زمرد...معلوم بغيت "مسحاات دموعها" واليوم قبل غدا ...

بعد ما لصق الكاميرا فحقيبتها خرج من الغرفة
وتوجه لشركة ناضت من سرير وهي مستغربة من وجود أمير فغرفتها نفضات افكارها وتوجهات لحمام خدات دوش خفيف ولبست بينوار الحمام وتوجهت لطاولة تزين كاتمشط شعرها وكاتقاد الميك اب بعد ما قادات وجها حيدات البينوار لاحتو فالارض وتوجهات لدرسينغ لبست فستان قصير فالاسود وصندالة بالكعب فالاسود من بعد هزات حقيبتها اليدوية ودارت نظراتها شمسية وخرجات من الغرفة ومن القصر طلعت فلوطو ديالها وتوجهات لفيلا دسليم .........
خلت محمد رضا مع الخدامة ومشات مع جود لمستشفى فين نازل أصيل كانو يالا كايجهزوه باش يخرج بين ماهما كايجهزوه دخل الدكتور ووراه جود عاقد غوباشتو اول ماشافو اصيل تبسم ظن بلي جاي يشوفو لكن هيهات .....
أصيل...بوجه شاحب" ولدي 
جود..."بصوت رجولي "دكتور ياريت تاخد عينة من دمو 
أصيل..."بستفسار " اشمن عينة وعلاش؟!
جود...لقيت زمرد وقالت لازم تتأكد ودابا خلي دكتور يشوف شغلو حيت ماعنديش الوقت 
أصيل..."الغصة فحلقو " وا واخا اولدي لكن بغيت نشوفها "دمعو عينيه.......
مسافة طريق كانت قدام باب الفيلا بلاصات السيارة وتوجهات لباب كاتمختر فتحات ليها الخدامة ودخلت لداخل هازة راسها لسما .....
كان جالس فالكانابي والسيجارة فيدو نتر نترة ورسم ابتسامة على شفاهو حطات صاكها فوق الطبلة لي قدام لكانابي وجلسات فوق هجرو وكاتمرر يدها على صدرو بطريقة سكسية....
عبله....بون جوغ حياتي
سليم..."طبع قبلة فمها" معدبتي هه
عبله..."شافت فيه بنظرات سكسية" توحشتك "غمزاتو" ....
سليم..."عضها فعنقها حتى غوتات" وانا توحشت الملف ......"شاف فيها بنظراات خبيته وجدبها لعندو بحركة سريعة جابها فوق الكانابي وجا فوقها خشى راسو فعنقها وبعثر قبولاتو ...

كان جالس فالمكتب ومقابل مع البيسي وكايشوفهم كايمارسو خيانتهم كرز على يدو وزير على سنانو عروق رقبتو ويدو برزو ووجهو ولا حمر سد البيسي ووقف والغضب متمكن منو بقى غادي جاي وشرارت الغضب كاطير من عينو بعد ما كمل منها دفعها ناضت من الكانابي وجسدها عاري لبست فستانها ررتبت شعرها وشافت فيه....
عبله...وعد اليوم الملف غايكون عندك 
سليم..."جدبها لعندو" ياريت توفي بوعدك حيت صبري تقادة "عضها فشفاها......
بعد ماخداو عينة من دمو خداوها منها حتى هي كان أصيل متلهف لشوفتها لكن رفضات تشوفو حتى تتأكد واعدهم الطبيب بعد 24 ساعة غايسلمهم النتيجة رجعات لفيلا دجلنار وجود توجه لقصر ورسل رجالو لفيلا دجلنار يراقبوها باش ماتهربش من جديد خدا دوش وغير حوايجو بعد ما رتاح خدا تيلي وتاصل ب أمير لكن كان خطو مشغول لاح تيلي فوق السرير وتسطح كايتفحص السقف ف عينيه ودماغو خدام وكايفكر فلي جاي....
حفظ تسجيل ورسلو لتيلي ديالو بعد ماكمل شغلو خرج من شركة وتوجه لقصر ودمو كايغلي مسافة طريق كان داخل القصر جلس فالصالة لي قدام الباب وكايتسنى قدومها بعد دقائق وصلت دخلت لداخل وكاتمختر اول ما جات عينو عليها توجه ليها بخطوات متسارعة وصفعها حتى نقز دم من فمها رفعات راسها وشافت فيه بغضب...

عبله .."حطات يدها على خدها ووسعات عينها" أمييييييييير...."قبل ماتسكت عطاها صفعة اخرى قوى من الاولى طاحت الارض وتحجرو دموع ف عينها وقفات وشافت فيه بعضب وتكلمت بصوت عالي .....
عبله...حماقيتي لااااااااا 
أمير...حقيرة رخيصة الله ياخد فيك الحق والله يلعن الساعة لي بغاك قلبي فيها كانكرهك وكانشمائز من شوفة فوجهك 
جود..."نازل من دورج " أميييييييييييييير " قالها بعصبية" اش هاد لكلام 
أمير...كل كلمة قلتها قليلة فحقها "قبل ما يكمل كلامو خدا لكمة من جود لي كان فقمة غضبو " 
جود...ماكفاكش اش درتي زمرد باغي تكمل بعبله ابتداءا من هاد لحظة غاتلقاني فوجهك وماغانسمحش ليك تأدي خوتاتي من جديد
عبله..."بعصبية" مستحيل هاد شي لي كانسمع "بصوت عالي " انت عندك اخت وحدة كاتسمع اخت وحدة وهي اناااااااااا "بصوت اعلى " انااااااااااا بوحدي وديك الكلبة لقيطة عمرها تحلم تكون وحدة منا 
أمير..."بنبرة قاصية" ماكاينش الكلبة قدك زمرد بزااااف عليك وشرف منك وطهر منك انكرة كانحمد الله حيت ربي لقاني بيها وكانحمد الله اكتر حيت ولادي من رحمها وكايحملو دمها 
جود..."بعصبية" أميييييييير سطووووب
عبله..."نزلو دموعها والغصة فحلقها" كاتعايرني بالعقم هئ....هئ....لهاد درجة بنت زناقي نساتك فيا فين هو الحب الكبير لي كنتي كاتكنو ليا هئ....هئ....الله ياخد فيها الحق كانكرهااااااااااااااااااا ...

جود....عبله كالما 
أمير...مزال زايدة فيه وااااش عند بالك انا دمدومة عند بالك خيانتك ماغاتكشفش ارخيصة
جود..."شنق عليه "أمير ماتستفزنيش ولا غانسى واش انت ولد عمي 
أمير..."دفعو" لازم تعرف ختك المصون اش كاتسوى "خدا تيلي من جيبو وفتح الفيديو ومدو ليه يالا شاف لقطة لي جلسات فحجرو وكاتبوس فيه وهو يحبس خرج عينه فيها لي كانو حمرين كيف جمر ....
جود..."خرج عينيه" عبببببببببله.....
أمير..."كايخنزر فيها" كمل الفيديو للاخر باش تشوف مدام بن يزين اش طلع منها لا وكاتاهم لالاها بلي فيها ......حط جود التيلي فوق الطبلة وعروق يدو برزو مارضاش يشوف ختو فداك الوضع شاف فيها بغضب وجرها من دراعها بقوة ونزل عليها لوجه ....
جود....كلببببببببة.....
عبله..."مافاهمة والو" جود هئ هئ كيفاش تمد يدك عليا جود انا ختك الوحيدة هئ...هئ.....
أمير..."هز تيلي ومدو ليها" شوفي حقارتك.
كانت كاتشوف الفيديو ويدها كايرجفو لدرجة فقدت سيطرة وطاح تيلي من يدها ودنيا مشات وجات بيها ولات كلها كاترجف ولون وجها تخطف مرة كاتشوف فجود لي كايشوف فيها بشمئزاز ومرة كاتشوف ف أمير لي كانو نظراتو كلهم كره وحتقار بلعت ريقها وحست الغصة فحلقها ودموع نزلو بغزارة على خدها حطات يدها على فمها كاتحاول تكتم شهقاتها
أمير..."بصوت عالي " علاااااااش اعبله علاااااااش مهمة كان ماكانش طعنيني فظهري ومع الذ اعدائي 
عبله.."مسحات دموعها وشافت فيها بغضب " انت سبب انت 
أمير...انااااااا؟!!!.....

عبله...اييه انت شكون لي خان الاول اممم شكون لي سمح فلاخر "اشارت بسبابتها فوجهو " انت "وفالاخر جاي تلومني بكل وقاحة
أمير...رخيصة قليلة الشرف ماكفاكش شي لي درتي ف زمرد وصلت بيك الحقارة والوساخة ل سليم وتنعسي ففراشو "نزل عليها لوجه .......انت طالق...طالق...طااااااالق واذا حاولتي تعرقلي اجراءات طلاق غانقدم هاد الفيديو المحكمة وديك ساعة غاتعفني فالسجن بتهمة الخيانة "بصوت عالي "ودابا خرجي عليا خرررررررررررجي......
جود..."جلس فالكانابي وشد راسو" الله ياربي شنو هاد شي 
عبله...عند بالك اذا طلقنا غاتقدر ترجع الخدامة لقطية لاااا ابب فيق بما انا لقيطة طلعات ختي فهي محرمة عليك "بصوت عالي " كاتسمع محررررررررمة مدام انا كانتنفس كون اكيد غانغص عليكم عيشتكم...."طلعت لطابق الثاني كاتجري ودموعها على خدها
أمير..."خشى صباعو فخصلات شعرو "فينك ازمرد فينك 
جود...بهدوء "زمرد لقيتها"
أمير..."كأن الزمن توقف عندو ومابقى كايسمع والو تلفت لعندو بالعرض البطيئ ووسع عينيه بقى حال فمو بضع ثواني عاد تكلم...
أمير...ك ك كيفاش....؟!!!
جود...كيف سمعتي
أمير..."بلهفة"فين ؟! وامتى؟! وكيف كانت وولدي اكيد شفتيه ان...."قاطعو" 
جود..."بصوت خشن" كالمااااا حتى انا تفاجأت وماكنتش متوقع نشوفها حتى تاصل بيا جلنار ومشيت لعندو وتما شفتها..
أمير...كيفااااااااش جلناار...فين كاتعرفو وكيفاش ماخبرنيش ...

حكى ليه شي لي قال ليه جلنار وكيفاش تعارفو قبل مايكمل جود كلامو خرج من القصر كايجري طلع ف سيارتو وكسيرا فتجاه فيلا دجلنار مسافة طريق كان قدام باب الفيلا نزل من سيارة بسرعة وتوجه الباب كايجري طرق لبااب زوج طرقات فتحات ليه الخدامة قبل ماتسولو شكون هو درم فيها ودخل وخلاها تابعاه كاتجري وتغوت.....
الخادمة..."بصوت عالي " ايييييه شكون انت حدك تم فين غادي ...."شداتو من دراعو ودفعها "
أمير..."كايقلب عليها بعينيه وكاينادي عليها بصوت عالي...زمررررد...زمررررررد......
سمعات صوتو وبدا قلبها كايضرب بقوة وقفات وحطات يدها على قلبها كأنها كاتقول ليه هدئ من روعك خدات نفس عميق وستجمعات قواها من بعد ما عدات لحد ثلاتة فتحات الباب ونزلت لطابق السفلي جات عينها ف عينيه ورجع قلبها ضرب من جديد تحجرو دموع ف عينها كانت باغية تصفعو وتسبو وتلومو لكن اول ما تلاقاو الاعين نسات كلشي تمنات فديك الحظة تجري وترمى فحضنو الحضن لي حسات فيه بالامان ولو كانت المدة قصيرة بعد مقاومة منها نزلت دمعة على خدها وقربات منو بضع خطواات وقفات قدامو رفعات يدها بتتاقل وحطاتها على خدو وكاتمرر على لحيتو لي زادت كتافتها شافت تحت عينو لي ولا كحل من كترت السهر ووجهو لي ولا شاحب سرحات ف تقاسيم وجهو بعد ثواني خرجات تنهيدة حارة من اعماق قلبها وعات شنو كادير جمعات يدها بسرعة ورجعات بزوج خطوات الور وبدلت نظراتها بعد ما كانو كلهم حب وشوق ولاو غضب وعتاب ...

أمير..."قرب منها وشد يدها"زمرد حياتي واخي ....."قاطعاتو" 
زمرد...نترات يدها وشافت فيه ببرود" اش جابك لعند وحدة خاينة "بحرقة" ااااااه ولا جاي تلوي ليا يدي بمحمد رضا كيف ديما 
أمير ..."نزلت دمعة على خدو " س سمحي ليا ماتصوريش غيابك شنو دار فيا وشحال تعدبت وانتي بعيدة عليا "بصوت مبحوح" زمرد كانترجاك سمحي ليا "شد يدها وباسها" 
زمرد..."تهجرو دموع ف عينيها" سمحت ليك فالمرة الاولى نسيت كلشي غتصابك وحرماني من ولدي وكلام عائلتك لي كان كيف سم مع ذلك سمحت ليك ورميت كلشي ورا ظهري وفتحت ليك قلبي وبغيتك بصح "مسحت دموعها" لكن انت شنو درتي رجعتي الوحش لي كان فيك وغتاصبتيني مرة اخرى وهنتيني وطعنتي فشرفي حلفت ليك وترجيتك تصدقني لكن صدقتيهم هما هئ...هئ...."كاتشهق" الله يخليك رجع من جيتي مستحيل نسمح ليك "شافت فيه ودموع ف عينها" مستحيل ....
حس بالغصة ف حلقو وحتقر نفسو تمنى لو زمن يرجع لور ويصحح الغلط لي دار لكن صعيب شاف فيها ودموع فعينيه ركع على وجليه وشد يدها وشاف فيها بترجي
أمير...كانترجاك سمحي ليا وكانواعدك غانعيشك احلى عيشة وغانسيك فلي فات 
زمرد..."نترات يدها منو " فات الوقت "مسحات دمعة نزلت على خدها وشافت فيه بجدية" ياريت ترجع من جيتي وتخليني في سلام حيت بصح مابقاتش عندي الطاقة جهدي تقادة بغيت نرتاح 
أمير...زمرد سم....."قاطعو جلنار لي كان نازل من دروج" اهلا أمير".....
اول ما شافو صعر ناض بسرعة وتوجه ليه رفع يدو ونزل عليه بلكمة الوجه ......
أمير....كيفاش قدرتي تخدعني انت كنتي عارف كلشي ومع ذلك سكتي
زمرد..."بغضب" أميييييييييييير......
جلنار..."حط يدو على نيفو لي نزف" زمرد خلينا على نفراد ...

زمرد..."بإصرار" كانعتذر ميسيو جلنار ماغانساحبش حيت لي خاصو ينساحب هو "اشارت لأمير " ميسيو أمير 
أمير..."بحرقة" زمررد
جلنار..."شاف فيها " كانتمنى تحترمي رغبتي "اشار ليها براسو باش طمأن
زمرد..."بعد تفكير " احم واخا......."شافت ف أمير شوفة مطولة ومن بعد نساحبات وقلبها تزادو ضرباتو وكلها كاترجف واخا تقنات دور القوة قدامو اول ما وصلت لغرفة ترمات فالسرير وكاتبكي لحسن الحظ محمد رضا كان ناعس ما شافش دموعها .......
جلنار..."اشار ليه" تفضل معايا 
تقدم بخطواات تابتة ناحية صالة ولحق عليه أمير لي كان كايرمقو بنظراات كلهم غضب 
جلس جلنار فوق الكانابي ودار رجل فوق رجل عكس أمير لي بقى واقف ورفض يجلس 
أمير ..."كايشوف فيه بغضب" كيفاش قدرتي تخبي عليا ؟!
جلنار..."بصوت خشن" شكون انت ؟!
أمير.."شنق عليه" انا غانوريك شكون انا "دخل فيه براس" عرفتي دابا شكون انا ؟!........
جلنار ..."شد نيفو ورجع ليه دقة" عندك بالك كلشي كايتحل بالعنف والغوات ؟! انت سبب هاد شي كلو شكون قالك تصدقهم وتكدبها كان لازم تتأكد قبل ما تقترف هاد الغلط 
أمير..."بغضب" انا فاهم وعارف نوياك شناهما أكيد باغي تستغل الفرصة وتاخدها مني
جلنار.."بجدية" زمرد ماشي سلعة

أمير...ماغاتقدرش تخدعني بكلامك 
جلنار..."قرب منو وداير يدو على جيابو" انت عارف شنو وقع لزمر بعد لي وقع ؟! عارف فين كانت عايشة ؟! وفين كانت خدامة؟! اممم طبعا ماعارف والو الحاجة الوحيدة لي كاتعرف ليها هي تسب وتغوت وتضرب ...... زمرد كانت خدامة فالمطعم عندي كاتلبي طلبات الناس عارف فين كانت ساكنة؟! طبعا ما عارفش كانت ساكنة فحي رديئ وسط القتالة والعاهرات وسط بيت صغير كايفتقر لابسط الوسائل هاد شي كامل انت جاهلو عارف غير تتاهم وتمد يدك وتعلي صوت " بنبرة قاصية" فيق اسيدي من سباتك عند بالك ساهل تسمح ليك بعد لي عاشت ؟! "اذا باغي تسامحك فلازم تبدل مجهود ماشي تغوت وتخرب وشي لي فبالك ماكاينش "بحرقة" حيت قلبي تسد من نهار ...حس بالغصة فحلقو وتوقف على الكلام" احم القرار الاول الاخير كايرجع لزمرد اذا بغات تبقى هنا فاكن اكيد ما غاتقدرش تاخدها واذا العكس فديك ساعة ماتسمع مني حتى كلمة دالعيب ودابا تقدر ترجع من جيتي وخليها ترتاح شوية...

أمير..."بحرقة" انت ماعارف والو دلائل كلهم كانو ضدها انا شفت الصور بعيني وكلشي شهد فيها كيفاش كنت غانتيق والصور فيدي "مرر يدو على شعرو بعصبية" يارت مادخلش بينا وخليك بعيد وماتنساش زمرد مراتي كاتفهم مرااااتي .......
جلنار...بخصوص الدلائل كاملين كانو ضدها ممكن لكن مراتك "بجدية" نووو شرعا زواجكم تبطل وعلاقتكم ولات محرمة ماتنساش لايجوز الجمع بين اختين وبما انك تزوجتي عبله هي الاولى ف زواجك من الثانية بااااااطل وفهاد الحالة مستحيل ترجعو ......
أمير..."كرز على يدو " ماغاتورنيش دين ولاخر مرة غانقول ليك خليك بعيد منا انا دابا غانمشي غير على ودها لكن كن اكيد غانرجع وغاناخدها معايا ....."لاح ليه هاد لكلام وخرج من الفيلا وهو فقمة غضبو...

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.