قناع الذكريات الجزء الثالث

من تأليف فاطمة اليوسفي
2018

محتوى القصة

رواية قناع الذكريات

صوت انفاسي ارتفع فالغرفة .. التوتر اكلني .. كنحس به كيغزز فيا شوية بشوية .. الاسبوع مر بسرعة البرق .. كلما كان كيقترب امر الزواج كنزيد نتخلع .. ماكان عندي حتى حل اخر من غير هذا .. انا ماشي مريضة وماشي حمقة .. انا ماماحتجاش المصحة النفسية .. 
وحتى هاد الزواج بمثابة جهنم سوداء كندخل لها بعيني مغمضين .. خفت من شنو غايطرا فالايام الجاية .. غانتفضح ببساطة .. لكن ماعندي حتى حل .. سيف ذوحدين كينخر فعظامي .. حتى اذا فلت اليوم و غدا ؟ ومن بعد شنو غادي ندير .. 
زفرت بضيق .. شفت فنرجس لي كانت معايا فغرفتي .. زيارتها كثرو طوال الاسبوع .. ملي خرجت من السبيطار وهي كتجي عندي ديما .. حتى واليديا ماداواوش معايا خصوصا بابا لي كان مقاطعني طول هاد الايام .. كيعاقبني على ذنب الانتحار لي ماكانش بقصدي .. بلال لي كان كيجي بدون مانشوفه .. فحال اذا اخر ليلة فالمستشفى كانت لقطة فاصلة بين الماضي والحاضر .. 
كانت ساهية .. كتشوف فيا ولكن مارداتش لي البال ملي حركت يدي كنفيقها من شرودها ..
انا:~ مالكي ..
ابتسمت وزفرات طويلا .. 
نرجس:~ فخبارك جيتي زوييينة .. هاد الكسوة لي لبستي قلتها لك فالاول تليق بالنهار فحال هذا .. 
انا:~ بصح .. 
نرجس:~ ااه البيج قريب للبيض وهو فال زوين ان شاذ الله .. 
مسحت على عنقي بتوتر .. لحد الآن تأنيب الضمير كيقتلني .. على الكلام لي قلت لها مسبقا .. على الاقل نعاود نعتاذر لها .. حيت غلطي لي كان كبير بزاف .. نتصالح معها عاد نقدر نتصالح مع ذاتي .. 
انا:~ سمحي ليا على داكشي لي قلت لك المرة الفايتة .. وداكشي لي درت لك ..
سكتات شوية وزادت حركات راسها باهتمام .. 
نرجس:~ الغلط كيوقع بين الصحابات .. وانا بصح مامقلقاش منك .. 
انا:~(تنهدت بعمق) شكرا .. حيت عاونتيني بزاف .. ووقفتي معايا ..
وقفات جنبي .. كتصاوب لي الشدة د الفولار .. هسيس انفاسها تسمع من عندي ...
نرجس:~ ماكاينش الشكر بيناتنا .. انا متأكدة لو وقع نفس الشيء معايا كنتي غاتوقفي معايا .. 
غير قالت كلامها ضرب فبالي موضوع مراد .. والجريمة لي كنت غانرتكبها فحق نفسي قببل مانرتكبها فحقه .. لحد الآن خايفة ينوض يبلغ بيا .. غصة مؤلمة تحركات فحلقي صعودا ونزولا .. لكن بدلتها ب تنهيدة طويلة افرجت عليها من اعماقي .. خرجات على شكل زفير حار .. 
نرجس:~( زادت تكلمات بنبرة هادئة) صافي غاتتزوجي .. شكون كان يقول دغيا دغيا .. 
انا:~ ان شاء الله 
ضحكات شوية .. اما انا بالمقابل .. كنت كنرجف فداخلي .. وانا كنستعد باش نمشي معهم على قبل العقد .. صافي بهاد السهولة غانتزوج .. جميع داك الوعود والمخططات والرفض لي رفضته تضرب عرض الحائط .. والحلوف لي حلفته كان مجرد كلام دار فالهوا ورجع على راسي .. 
حركت يدي على وجهي بشرود .. كنتذكر كلام بلال كله فداك الليلة .. اسبابه واخا هكاك ماكانتش مقنعة بالنسبة لي .. طول الاسبوع كنفكر فأجوبته وكلامه .. صوته الاجش كيحفر فداخلي بعمق .. عارفة هو فشكل وانا فشكل .. مستحيل نتفاهمو .. وعاد دابا كاين عائق اكبر من هادشي .. 
نرجس:~ ماكنتش كنظن البروف غايطلع ولد عمتك .. 
خاطبتني نرجس بنبرة هادئة .. تلاعبت بلساني داخل فمي .. كنبلل جوفي .. 
انا:~ حتى انا ماكنتش كنظنها .. 
طول الاسبوع ماتكلماتش عليا على بلال ولو من باب الصدفة .. كانت كتفادى اي موضوع متعلق بهادشي .. قلت يمكن مازال كتستوعب هادشي .. لي انا بنفسي ماقادراش نستوعبه .. 
نرجس:~ داكشي علاش كان ديما كيستغل الفرصة اذا بغيت يشرح لي شي حاجة ويسولني عليك ..( ابتسمت بشحوب) ماظنيتش كيهتم بك لهاد الدرجة .. يسحاب لي غير اهتمام عادي حيت كتقراي مزيان .. 
عضيت شفتاي بتوتر وانا كنسمع لكلامها كينساب بين طيات اذني .. كنحاول نرتبه فعقلي .. علاش هو مم الاول ترك لي شي فرصة فين نتنفس فيها ؟ 
حاولت نغيير نظرها على الموضوع ..
انا:~ اهتمام عادي ..(طلعت النفس فصدري وهبطتو) فحال اي عائلة .. 
ملامحها تغيرو .. الشحوب زاد غطى وجهها الابيض .. وملامحها ولا فحال شي ورقة شفافة بين عيوني .. حتى خلاوني هاد المرة نعاود نشك فمشاعرها اتجاهه .. لكن اطبقت على فمي مابغيتش نعاود نفس الغلط .. زفرات بشحرجة وجاوبتني ..
نرجس:~ صدقيني ماشي اهتمام عادي .. لو كان كيحسبك غير من عائلتك .. ماغايسولش فيك ديما .. ماغايتسوقش لك من اصله .. ماغايتدخلش فالمستشفى قدام باك ويمنعه .. وغايبغي يتزوج بك فهاد الظروف الصعيبة.. ماكانش غايجي بالليل لعندك للمستشفى من بعد ماهزوك مباشرة .. ماكانش غايبقى معك يوماين بأكمالها سهران .. واخا ماكيدخلش لعندك ..(رجعات وقفات ورايا) حتى واليديك ماداروش هادشي ..( عضات على شفتيها) واش هادشي فنظرك اهتمام عادي ؟؟ 
مع كل كلمة قلبي كيزيد يضرب بشكل عنيف .. حتى كيبغي يخرج لبرا .. الحرارة كتجتاحني من كل اتجاه وكتطبق على انفاسي .. مالقيت راسي غير داخل للحمام كنهدي انفاسي لي كيفضحو توتري .. دقيقة .. دقيقتين .. ربع ساعة عاد قدرت نرجع شوية مزيانة .. وخلايا عقلي كنحازل نخليهم يتوقفو عن التفكير .. 
خرجت وقابلت وجه نرجس لي كان بلا تعبير ولكن كتبزز ابتسامة على فمها .. عنقاتني .. 
نرجس:~ غايكونو كيستناوك .. باش تمشي .. حتى انا خصني نمشي فحالي .. مبرووك عليك مسبقاا .. 

ركبت مع ماما وبابا فسيارته .. كيدفعوني نحو القفص الذهبي زعما .. لي كان كيبان لي مجرد قفص مصدي .. مصيدة غانطيح فيها .. وغانتفضح على حقيقتي .. غير مسألة وقت لا غير .. 
حاولت نهدي نبضاتي .. نغمض عيني ونعاود نحلهم.. لعل وعسى التوتر يطير شوية .. زفرت وعاودت زفرت كنخلي الهوا يدخل لصدري .. والاوكسجين يملئ رئتاي .. الرعب كينتاشر فضلوعي والارتجاف كيزحف على عمودي الفقري .. فحال شي وحش كينهشني بدون رحمة .. حتى وقفنا قدام باب العدول .. عرفت ان بلال وباه سبقونا من قبل ..

الامر بهاد السهولة .. صافي امضاء الطرفين .. والشهود وتم كلشي تقريبا .. عجبا الزواج بهاد السهولة وانتقلت من ذمة ابي .. لذمة رجل اخر .. باقي انا نفسها .. غير مشاعري لي تخلطات .. ماعرفت داك الدموع لي طاحو من عيني واش نهاية فصل العذاب الاول باش ندخل لفصل العذاب الثاني بأحضان من جليد ؟
عيني دارو بينهم كلهم بالزربة .. حتى وقفو لعنده .. شاف فيا بطول كيف العادة كيفترسني بسواد مقلتيه .. حتى تم الامر عاد عرفت صعوبة ما انا مقبلة عليه .. والطمة الكبرى مافكرتش حتى نصارحه .. ماغانفلتش منها هاد المرة .. زنزانة مشاعري اغلقت عليا بإحكام ..
ماما لي خرجاتني من شرودي .. من بعد ماعنقاتني وباست على راسي .. 
ماما:~ مبروك عليكم .. الله يجعل كلشي مبارك .. 
بابا:~(قرب مني بفتور) مبروك .. 
نفس الشي داره بابا واخا كنت عارفاه فوق نيفه كيقول هادشي .. ياك كنت مجرد حمل ثقيل وها هو انزاح على كتفه بسهولة .. فحال اذا كتحيد الشوكة بلا دم .. 
التباريك والتهاني مجددا .. كنسمعهم فحال شي اصوات كيطلعو من شي حفرة غارقة .. اما هو ماكلفش راسه يكلمني .. كان كيستقبل كل كلامهم ببرود .. وعينيه مازال كيمشطوني بشراسة ..
وقفت قدام سيارة بابا فحال اذا ماشي انا لي تزوجت دابا عاد .. حتى جات ماما لي وقفات معايا ..
ماما:~( نطقات بارتجاف) غاتمشي مع بلال .. 
شفت فيها بعدم تصديق .. الامر مجرد عقد .. ماشي زواج بكامله حركت فكي بتوتر .. لكن هي سبقاتني وبررات .. 
ماما:~ هو قال هادشي ل باك فالاول .. غاتكون حفلة صغيرة من بعد شي ايامات .. ( هبطو دموعها فصمت) غاتبقاي مع دراهم شي ايام .. 
عرفت غير من نظراتها انها ماشي باغياني نمشي عليهم .. ولكن كانو كيشوفو دار بلال هي الحل الامثل يمكن باش نعيش داك الدفئ الاسري لي فتقدته معهم .. 
عضيت على فمي بارتجاف .. 
انا:~ واخا .. 
زادت عنقاتني كتبكي .. بينما انا كنت ماقادراش حتى نبادلها الكلمات والمشاعر الاخيرة .. عاجزة ناخذ وعاجزة نعطي اكثر .. رحلت بصمت حاملة معايا عاري وخيبتي .. 

كيف انتقلت من عصمة ابي ل عصمته .. الرجوع كان فسيارة بلال .. عرفت من هاد اللحظة بالضبط حياتي دخلات فطريق مجهول .. وسكينن التهور لي هزيته فالاول .. غايرجع يذبحني بدون رحمة .. 
بعد شي دقائق .. سمعت كلامه انساب على مسمعي .. 
بلال:~ علاش خايفة مني لهاد الدرجة ؟ واش كنبان لك شي وحش غادي ياكلك ؟ ولا شي نمر باغي يفترسك ؟ 
نطق جملته بهدوء .. عكس ملامح وجهه وداك المشاعر لي ماعرفتش نوصفها ولكن كنت قادرة نحس بها بسهولة كتخترقني .. حاولت نتصنع عدم الخوف ..
انا:~ ماخايفاش .. 
وقف سيارته فواحد البلاصة خاوية هادشي لي لاحظته .. اصلا وجهي كله كان مركز معه ومتيقظ لأي حركة من عنده .. 
بلال:~لا خايفة .. 
قرب اصابعه الطويلة .. حتى لامسو يدي ببرودتهم .. بغيت نبعدها ولكن شدها بهدوء .. 
بلال:~ جوري .. 
قالها بخفوت .. كيتأكد يمكن واش انا هنا .. واش صافي كلشي سالا قبل مايبدا .. زاد ضغط على يدي ..
بلال:~ يديك عرقانين .. كيترعدو .. ( زاد ابتسم فوجهي وكلمني بهدوء ) خايفة من هاد المشاعر لي كنمرسهم عليك .. 
وسعت عيني شوية .. كرد فعل على كلامه .. مابغيتهش كازال يمطرني بكلامه ويذبحني بعمق نظراته .. بغيت غير نصارحه .. يقتلني هنا بعدا ولا على الاقل نهرب من بعد ماورطته معايا فخطأي .. نطقت برعب حقيقي .. 
انا:~ انا بغيت نهدر معك .. 
بلال:~(زاد ضغط على يدي وتكلم بصوت اجش ) كنسمعك .. 
عضيت على ثغري .. كنزفر اكثر لكن هو لي كان مقابل معايا كيزفر كثر مني والهوا كيخرج من صدره كيوصل حتى لعندي وينتشر فأضلعي فحال السم .. غمضت عيني ..
انا:~ ماعرفتش شنو نقول .. ( تمتمت ) انا .. انا .. خايفة .. وهادشي لي غانقول لك غايخلييك تكرهني .. 
حط اصبعه على شفتي السفلية.. وقاطعني .. 
بلال:~ حتا حاجة فالدنيا ماتقدر تخليني نكرهك .. نتي ماعارفاش عمق مشاعري اتجاهك شحال كيعذبني .. 
زاد حرك يديه على خدي بشوية .. حتى حسيت براسي صافي غانسخف .. كيجلد ذاتي ويسلخها من المشاعر .. بينما انا لا حول لي ولا قوة .. 
يديه مرة كتضغط على خدي .. مرة كيعاود يرخفها .. صوته كيهمس بشوية .. 
بلال:~ عارف نويت فيك السوء فالاول .. اعتذرت وغانعاود نعتذر لك .. بغيت هاد النهار يكون صفحة جديدة .. نثبت لك شحال انا صادق فمشاعري ليك بوحدك ..(مسح على وجهه ورجع شوية اللور) حاولت نحتفظ عليك سنين طويلة للحلال .. 
بغيت نشرح ليه الوضع .. كلامه كيعذبني .. كيخليني نحس براسي وحدة ماكتسواش .. متلاعبة .. كنتلاعب بمشاعره كيف تلاعبت بشرفي بكل بساطة .. جمله كيصفعوني واعترفاته واحد تلوا الاخر كيخنقني .. 
انا:~ (حركت راسي بنفي) بغيت نقول لك .. 
حرك فكه لي تشنج .. وبضع حبيبات من العرق كيتصببو من جبينه .. عروق يديه كيزيدو يبرزو اكثر .. كنشوفهم فحال الاسلاك .. زاد حط صبعه على فمي .. 
بلال:~ هاد المرة نوبتي نهضر .. تكلمتي بزاف ف الايام لي فاتو .. تسنيت هاد النهار لسنوات .. النهار لي نقدر نكون خديت فيه بالحلال قدام كلشي .. النهار لي تولي فيه مراتي .. 
الصمت عم على ارجاء السيارة .. كيخليني نستوعب هاد الكم من المشاعر العنيفة .. الشراسة لي طلات من عيونه .. كتعكس كلشي .. تفاحة ادم تحركات فعنقه .. بعد واقترب مني بهدوء .. 
بلال:~ عيونك كيذبحوني كيزلزلوني يا عميقة العينين .. كلما تفكرتك .. طفلة ..مراهقة... ولا دابا .. كتقتليني شوية بشوية .. شحال نقدر نتحمل وكيفاش غانتحمل هادشي كله .. 
زاد سكت شحال كيتنفس بسرعة فحالي انا تماما .. عينيه تحولو رجعو عبارة عن لجتين سوداوتين .. عمق محيط اسود كيجرفني عنده .. نبرته كانت متملكة .. كيضغط عليا ويعقد صك ملكيته .. زاد تكلم بصوت اجش .. 
بلال:~ باغي تكملي حياتك معايا كلها .. ماغايكونش يوم واحد ولا شهر غايكونو سنوات طويلة .. ( ضغط على فكي شوية بيديه) غنعالج فيهم جروحك .. وتعالجي دائك لي فتك بيا بيديك .. ( اقترب مني حتى حسيت بانفاسه كيلفحوني مخلطين مع ريحته ) انا محتاجك كثر ما نتي محتاجاني .. 

كيقول كلامه وانا فالمقابل سكين مسنن كيتغرس فأحشائي .. اعترافاته .. اعتذاره .. وكلامه كله .. كان كيصعب عليا نبوح ليه .. ونفضي ليه بسري .. 
اطبقت على انفاسي بشدة ملي حيد يديه من على وجهي .. مصر يعذب كل خلية .. كل انش .. وكل ذرة من روحي .. 
بلال:~ ان شاء الله من هنا للقدام قاع امور حياتنا غاتصلح .. 
بغيت نزيد نبعد منه .. لعل وعسى يفك هادشي كله .. لي وحلت فيه راسي .. واخا كنت حاسة بمقدار كلماته وحجمها لي ثقيل على قلبي وماقادرش يتحمله .. لذلك تكلمت باعتذار .. 
انا:~ ماقادراش نحس بهادشي كله .. 
ظنيته غايتعصب ولكن عجبا بقا على نفس الهدوء .. انفاسه كيطلعو بهدوء اكبر تحت قميصه الرمادي .. فحال اذا كيوازن بين ردة فعله والكلام لي غاينطق به .. 
بلال:~ عارف ماتقدريش تحسي بهادشي دابا .. يمكن هاد الكلام جا بكري .. ماكانش وقته دابا.. يقدر يكون جاك مفاجئ .. ولكن كل حاجة فوقتها هي هاديك .. 
زاد قلبي بين ضلوعي كيضرب .. باغي يخرج من بلاصته .. هادشي بزاف عليا .. كيزيد يبين لي ان خطيئتي هي عبارة عن جبل .. ماقادراش نقول الحقيقة وننقص من تأنيب الضمير .. وماقادراش نحتفظ بالامر لي غايعذبني اكثر.. زدت غمضت عيني .. وزيرت على دموعي باش مايهبطوش .. ويفضحو توتري .. 
انا:~ سمح ليا .. 
حط كفه على كفي .. يمكن فهم اعتذاي على قبل مشاعره لي ماقادراش نتحملها كلها .. 
بلال:~ نتي ماخطأتيش من اساسه باش تعتاذري .. 
حركت راسي بصمت .. كل مرة كنزيد نغرق للاسف والهوة كتوساع ماقادراش نطلع منها .. حسيت بصوته مرة اخرى مجاور لطبلات اذني .. 
بلال:~ فين خاتمك ؟
ابتعلت ريقي بصمت من سؤاله المباشر .. ونبرته الجدية .. وسعت عيني برعب .. 
انا:~ماعرفتش فين درته .. 
ابتسم جانبيا .. 
بلال:~ عرفت هادشي .. 
هزيت فيه راسي بعدم الفهم .. كيبان ان الامر جاه عادي ... 
بلال:~ بما انك لبستيه مجبرة فالاول كان من المتوقع تحيديه ..
انا:~ غانقلب عليه .. 
بلال:~ بلاش .. (زاد تكلم بصوت اجش) خصنا واحد اخر .. 
جبد واحد اخر من جيبه .. تقريبا كيشبه للأول فشكله .. داره فأصبعي مرة اخرى.. كيثبت صك ملكيته .. بينما انا كنت ماقادراش نقاومه ..
بلال:~(ابتسم) هذا متأكد عمرك غاتيحيديه.. 
نار سائلة تدفقات فدمي .. ماعرفتش كيف كيقدر يخليني نحس بالكره اتجاه راسي .. تأنيب الضمير.. جميع داك المشاعر لي كنت كنحاول نخبيهم كيعاودو يتدفقو من جديد .. ببساطة كيخلني متلخبطة ..
انا:~ علاش كتثيق فيا لهاد الدرجة ؟
كل مرة كنحاول نكسر هاد الحاجر .. باش يعرف حقيقتي .. او نقولها ليه قبل مايكتشفها بنفسه .. لكنه كان مصر يتجاهل .. 
بلال:~ الزواج اساسه الثقة .. اذا ماكنتش كنثيق فيك ماكنتش غانختارك من الاول.. ( حرك فكه بامتعضاض) بصح ان الامر فالاول كان بيناتنا ماشي هو هاداك .. وكله سوء فهم .. (زاد خفض صوته حتى مابقى كيتسمع غي هسيس انفاسه) باقي متأكد انك نفس جوري .. داك الصغيرة.. لي هزيتها فيدي اول ماتولدات .. لي فداخلها مازال وردة نابضة بالحياة .. باقي بنفس البراءة .. غير الظروف لي خلاتك تكوني بعيدة مني ..و عاود قرباتك ليا من جديد .. وماغانخلي حتى حاجة تخليك بعيدة عليا دابا .. 
وسعت عيني بصدمة .. كنتعايش مع هاد الاحاسيس لي تفرجو فجأة .. وداك العاطفة لي كيصرخو بها عيونه النجلاوين.. 
اقترب بشفتيه لجبيني .. ضغط بهم على بشرة جبهتي .. بحرارة .. بقسوة .. بنوع من العنف لكن عجبا كان هادئ .. دقات قلبي تسارعو وعروق عنقي تشنجو .. 
مدة طويلة وهو كيمارس عليا طقوس مشاعره وشفتيه باقين مسمرين على جبيني .... بينما انا متوترة .. خايفة .. كيجرفني لعنده .. واخا نقاوم واخا نرفض .. تيار مشاعره كان اقوى مني .. وكيحتم عليا نتعايش معه بزز مني .. 
بلال:~ (همس بصوت اجش) مبروك علينا .. 

رجعنا للمنزل .. غير وصلني لعند عمتي .. رجع فحاله .. ماعرفت حتى لفين مشا .. حتى انا ماكلفتش راسي نسوله .. بقات غير ذكرى قبلته على جبيني كتنخرني من الداخل .. 
ترحيب عمتي كان حافل .. فرحانة كثر من القياس .. كل مافكرت فيه هو كيفاش غاتكسر فرحتهم ملي يعرفو خداعي .. والبراءة المزيفة لي كانت مخبعة تحت قناع الغدر ..
جلسنا على مائدة الفطور .. كناكل لقمة ونوخر الاخرى .. الماكلة بطعم العلقم كتطيح فحلقي .. 
شافت فيا عمتي وابتسمت ببشاشة كعادتها .. 
عمتي:~ ياكما قنطتي .. 
تأملت ملامحها الهادئة .. والحجاب الابيض لي على وجهها .. لو كانت هادي هي ماما بلاصة ماما الحقيقة اكيد حياتي غاتكون مختلفة بزاااف .. لكن الخطأ كله كيبقى خطأي انا .. 
انا:~(همست بشوية) لا .. 
عمتي:~ ماتحشميش منا .. دارك هادي .. ونتي من جميلة وهند .. 
انا:~(ابتسمت فوجهها) لهلا يخطيك .. 
عمتي:~ان شاء الله دابا تولفي .. كلنا ملي تزوجنا كنا هكا .. 
انا:~ ان شاء الله .. 
ناضت من قدامنا بينما هند وجميلة بقاو كيفطرو معايا .. حتى سمعت هند كتوشوش فآذن جميلة ولكن بالجهد وتضحك .. بشكل او بآخر عرفت الموضوع كيخضني .. 
هند:~ خصك تخلصيني اجميلة .. 
شافت فيها جميلة بتحذير .. حتى هي عندها نفس عيون بلال السوداوين ونفس الشعر الاسود .. كتشبه ليه بزاف .. بينما هند خدات من شبه امها اكثر .. 
جميلة:~ هننند .. حشوومة .. (شافت فيا) ماتديش على هاد الحمقة .. 
انا:~ (هزيت راسي بإيجاب واخا مافاهمة والو ) ماشي مشكل ..
هند:~(قاطعتنا) لا غانقول لها ..
انا:~شنو .. 
هند:~ حيت اخير مرة قالت ليا موحال واش هاد الزواج يكمل .. وانا قلت العكس ..(ابتسمت) وربحتها .. 
عضيت على فمي بارتجاف .. اصلا من الاول كان معروف الحال .. ماغاديش يكمل الا اذا وقعات شي معجزة .. لكن بلاصة داكشي وقعات خطيئة لي مستحيل نغفر لنفسي عليها قبل مايغفر لي هو .. 
انا:~ علاش زعما .. 
جميلة:~ماتديش عليها اختي جوري .. (كملات بصراحة) غير فداك الايام كل ماتكلمنا معك كنتي كتباني ساهية فحال اذا ماباغياش هاد الزواج .. داكشي علاش .. كانت غير نظرة خاطئة .. 
هند:~ الصراحة انا ماتفجأتش ملي قررتو تتزوجو بالزربة .. (ضحكات بمرح) انا عارفة بلال ونحلف عليها حتى كيبغيك من الصغير غير ماباغيش يبين لنا .. 
الدم تدفق لوجهي .. فحال اذا عروقي فارو بالدم .. 
أحشائي حسيتهم كيتمزقو من الداخل .. شي حاجة فداخلي تكسرات وتشهمات بسهولة .. عمري ماواجهت نفسي .. انا لي ظنيته من ديما كيكرهني .. غير من تصرفاته الاوليين معايا .. لكن دابا كلامه د المرات لي فاتو كلام عمتي .. جمل هند خلاوني نعيد حساباتي .. بلال عمره فحياته ماكرهني .. غير انا لي كنت متوهمة هادشي .. فحال لي توهمت اهتمام مراد المزيف .. مرة اخرى كنشعر براسي اكبر مخادعة .. انا ماكنبغيهش وباقي نفس مشاعر الكره كيستوطنوني من الداخل .. ولكن ماقادراش نكون بلا ضمير لهاد الدرجة .. مابغيتش نكسر صورتي ك طفلة.. لي مرسومة فعينيه من سنوات .. كابغيتش نكسر داك الصورة د الوردة لي خدا عليا من زمان .. 
بغيت نغير الموضوع بعيدا على هاد المشاعر لي ماقادراش نتعايش معها .. خايفة شي نهار نغرق فيها ونخرج خاسرة من معركة مشاعر انا المذنبة فيها من اساسه .. غانطيح فمشكلة كبيرة .. سميتها بلال .. 
انا:~ واش بلال ماعايش معكم .. 
شافو فيا باستغرب .. حنحنت بشوية .. وزدت همست..
انا:~ زعما واش ماساكنش هنا .. حيت مارجعش البارح .. 
هند :~ هاي هاي خايفة عليه .. 
مجددا .. كنقرا العبث فكلام هند .. فحال اذا بصح كنمزت على بلال .. ومانقدرش نعيش بلا به .. فقط كان عندي فضول اتجهاهه ..
انا:~ ماتفهمينيش غلط .. 
لكزتها جميلة فكتفها بخفة ..وهزات راسها بنفي 
جميلة:~لا دابا ربع سنين تقريبا ملي عايش بوحده .. ملي وصل ل ستة وعشرين سنة صافي بقا كيعتامد على راسه .. 
هند:~ ( تكلمات وراها ) ونتي عارفة حنا عاد انتقلنا ل هنا .. (شافت فالساعة) المهم غانمشي نقرا دابا تعلطت بزاااف انا نخليكم .. 
ودعاتنا .. بقيت كنخمم بشرود .. حتى سمعت جميلة عاودت تكلمات .. 
جميلة:~نتي ماغاترجعيش تقراي ..
غير قالتها حسيت بطعم المرورة تصاعد لحلقي .. فمي جف من الريق .. تذكرت الايام لي عشتهم فداك الجامعة .. فحال شي عمياء طحت ففخ مراد بعيني مغمضين والاسوء من هادشي انا لي فتحت له الباب .. ضحكة استهزاء ترسمات على شفتاي .. غايكون رجع يقلب على شي ضحية جديدة من غيري .. ويوقعها ففخه ببساطة.. لكن مانضنش كاينة شي وحدة بسذاجتي .. 
انا:~ (هزيت راسي ) ااه غانرجع .. غانمشي غير ندوز الامتحانات ان شاء الله .. 
جميلة:~ااه داكشي علاش بلال قرر يقرب شوية الحفلة لي غادي ديرو على قبل العرس .. اكيد باش يبقى لك الوقت ورا داكشي باش تراجعي .. 
غير سمعت كلمة " الحفلة" هاد بدات كتطلع معايا حقيقة هاد الزواج .. يمكن نوقفو دابا مايقربش مني .. حتى مايكتشفش حقيقيتي .. بحجة خايفة .. لكن من بعد غايطالب بحقه وانا غانتكشف بكل سهولة .. والذنب العظيم لي ارتكبته غايكون عليا فحال شي واجب خصني ندفع ثمنه ..
انا:~ اه يمكن .. 
تأملت الخاتم لي فيدي بشرود .. والرعب كيتصاعد كل مرة اكثر .. ويزحف على سلسلول ظهري .. عرفت ان باخرة الذنب لي راكبة فيها .. محيطها ماغاديش يهدا .. ولا سبيل للهروب منها ابدا .. مصيري غايكون الغرق للابد هاد المرة ...

وقفت قدام البوطاجي .. اربع ايام وانا مع عمتي .. حتى بديت كنتأقلم مع الوضع شوية .. وكنعيش من جديد داك الدفئ الاسري لي فتقدته من زمان .. 
حسيت بدوخة فشكل .. راسي كيحرقني .. ومعدتي مروعة .. كنت عارفة انها اثر الدورة الشهرية .. فموضع اخى كنت نقدر نشكك انه وقع حمل .. يزيد على مابيا .. لكن انا ومراد موصلناش لداك الدرجة .. هي لحظة جموح وشهوة وفالاخير خسرت فيها كلشي .. 
السعادة المؤقتة لي حسيتها فداك الايام تسربات من بين يدي فحال معدن الزئبق .. كل ما جيت نشدها كنلقها مجرد وهم .. 
" جوري " 
جفلت بالزربة .. حتى طاح الكاس لي كنت شداه بين يدي .. كان نفسه بلال الواقف امامي .. بهيئته الطاغية .. جبروته .. قوة جسده وقسوة ملامح وجهه .. بملابسه المتأنقة .. على بعد سنتيمترات .. ماحسيت به غير اقترب مني .. 
بلال:~شنوو وقع لك .. ردي البال .. 
زاد اقترب مني حتى حسيت بعطر انفاسه .. ريحة العود المميزة .. وواحد الريحة رجولية .. ماعرفتش ولكن تخربقت بامتياز .. خصوصا فاش غطا عليا بقامته الطويلة تقريبا .. فحال اذا تعمد يسحب ذرات الهواء من حولي .. 
انا:~( همست بتوتر) والو .. غير مارديتش البال .. 
بعد قطع الزجاج من امامي .. واخذ يدي بين كفه .. كيقلبها بشوية .. 
بلال:~ ياكما تآذيتي .. 
انا:~(هزيت راسي بنفي) لا .. لا .. 
فحال اذا حس بقربه وترني .. زاد العرق كيتصبب مع ظهري بغزارة فحال الما .. بعد شوية .. ونظرة الدفئ اطلت من عمق عينيه .. 
بلال:~ ردي البال لراسك .. 
شفت فيه وهمست بخفوت .. 
انا:~واخا .. 
نفس النظرات كيفترسوني .. فحال اذا داكشي لي ماقادرش يقوله بفمه .. ولا يخرجه من جوفه .. كيعوضه بداك النظرات لي كيرمقني بها .. ترحكت توتر حتى مالقيت مانقول .. 
انا:~ واش خصك شي حاجة ؟
بقا ساكت شحال ..داك العاطفة الفجة .. مرسومة فعينيه بوضوح .. زاد كينقص المليميترات من حولنا .. وكيتعمد يقرب بشوية .. ويهلك صبري .. 
بلال:~ بغيتك نتي .. 
شهقت بشوية .. بينما هو كان مستمتع ابتسامة لعوب ترسمات على شفتيه .. 
بلال:~ بغيتك نتي.. وباغيك نتي اجوري .. متشوق باش نحصل عليك كلك .. 
اقترب مني اكثر حتى اصبحو انفاسه كيصفعوني على قماش قميصي .. بغيت نبعد لكن زاد حاصرني بجسده ..
بلال:~ بغيت نملك مشاعرك .. نملك عقلك .. كل ذرة فيك .. كل جزء فيك ..
انا:~ (همست بصعوبة) عمتي غاتدخل .. 
بلال:~ ماكاين حد من غيرنا .. (زاد اقترب مني وتكلم جانب اذني) اربع ايام والشوق كيفتك بيا باش نرجع نشوفك .. وماقادرش .. خايف عليك مني .. نتي علاش كتعذبيني هكا .. 
دفنت وجهي جنب كتفه .. ماباغاهش يشوف داك تأنيب الضمير لي ترسم على وجهي فكل كلمة كيقولها .. وهمست بترجي .. 
انا:~ عفاك ماتقولش هادشي كله .. 
بلال:~(زاد همس جنب اذني) توووحشتك يا عميقة العينين .. 
انا:~ ( غمضت عيني بآلم) بلال .. 
بينما هو همس اسمي بين ثغره بحرارة .. كل حرف كيخرج من عنده كيتنهد عاد كيقولو .. 
بلال:~جوررري .. شنو درتي لياا ؟ ماقادرش نثيق انك نفس الطفلة .. كل مرة كتيزيد تعذبيني كثر .. شمن سحر كتطبقيه عليا ..
شفتيه سقطو جانب وجهي .. كينتقل بهم لخدي .. على بشرتي .. كيعاود يطلع لجنب عيوني مدة طويلة .. كيتعمد يتعطل .. انفاسه .. شفتيه القاسيتين .. كلهم كيقتلوني .. همست باسمه بصمت وترجي باش يبعد ووالو .. حتى حسيت بحجابي تحيد وزلق من بلاصته .. 
بلال:~ خليني نشوف شعرك .. 
انا:~ لا لا .. 
زاد حط يديه على المشبك لي فشعري حتى طاح وراء ظهري وجانب كثفي فحال شي شلال اسود عميق .. من ديما ماكنبغيش نقطعه .. 
انا:~صافي عفاااك .. 
تجاهل كلامي .. وعينيه كيمشطوني .. اخفيت وجهي بين يديا .. بينما نظراته حسيتهم فحال السم .. كيجريو فدمي بحرارة .. بقسوة .. بعنف .. حضوره طاغي وقاسي .. ماقادراش نتحمله .. ماقادارش نتحنل جبروت مشاعره .. وطغيان وجوده .. 
بلال:~(همس) ماشاء الله .. 
متأكدة شافه قبل من هاد اللحظة .. فالايام لي شافني فيهم بلا حجاب .. زادو عيني عمرو بالدموع .. وكل ماتذكرت شنو درت كيزيد الآلم يوخزني فحال الابرة .. 
زاد اقترب كيشم فشعري .. ويحرك انفه صعودا ونزولا .. 
بلال:~ ريحة الياسمين .. (جمع شعري بين يديه ورده للوراء بينما صفحة وجهي بقات مقابلة لصفحة وجهه) حورية .. نتي فحال شي حورية هاربة من القصص التاريخية بعدك عليا قاسي .. وقربك اشد قسوة .. 
زادو شفتيه سقطو على فكي .. كيمارس عليا مشاعره .. مابقيتش قادرة نتحرك .. لا انا قادرة نوقفه ونهرب ولا قادرة نستمر .. ونخليه يكمل على جنونه .. سحابة كتحملني .. اطبقت على فمي باش مايزيدش يقرب مني .. وخا عاطفته كانت اكبر من انني نقاومها .. ولكن حاولت ما امكن .. 
انا:~(ابتعدت عنه ) ماديريش فيااا هكااا .. 
بلال:~ (زاد قرب) نتي لي ماديريش فياا هكا .. 
انا:~ لا نتا لي مادريش لي هكااا.. متآذينيش .. 
بلال:~شنو كاندير لك بالضبط .. باش نعرف باش كنآذيك .؟
يديه غاصو فأغلال شعري .. كيقرب وجهي لعنده .. وعينينه مسمرين على شفتاي .. 
بلال:~ شوقي ليك كيعذبني يا عميقة العينين .. ( زاد ضغط على فكي بأصابعه والكلام كيطلع متسابق مع انفاسه الهائجة ) .. بقدر شوقي ليك .. بقدر ما ماباغيش نآذيك بعنف مشاعري.. غانخليك حتى تكوني قادرة تباديليني هادشي باش كنحس به اتجاهك .. هاد الطوفان لي عمره غادي يهدا ولا ينضب .. ماغانجبرك على والو .. حتى تكوني نتي مستعدة لكلشي .. 
حسيت بواقع كل كلمة كتنزل عليا باردة .. متناقضة مع حرارة جسده لي كتلفحني .. مسح جنب عيني بيديه .. 
بلال:~ علاش الدمووع ..(ابتسم بهدوء) نتي مظطرة تعيشي مع مشاعري ليك .. وتتأقلمي معهم .. حتى تكوني نتي كتحسي بنفس هادشي .. 
حجر عينيه الاسود ابتعد على وجهي .. من غير شفتيه لي عاودو سقطو على فكي .. بحرارة متملكة .. بقسوة مهلكة .. بعد شوية ورد انفاسه .. 
بلال:~ تخرجي .. 
هسيس انفاسي لي بقا كيتسمع فالكوزينة .. اللحظات الحارة .. المليئة بالمشاعر لي عشتهم دابا .. خلاوني نطلب انفاس جديدة .. وعرلت ان بلال مشكلة كبيرة .. مصر يقحمني معه بيننا انا واخا نقام حتى نعيا .. فالاخير غاندخل بعيني مغمضين .. 
انا:~( همست بصعوبة غير باش يخرج من هنا ) ااه .. 
مسح على وجهه .. وبضع حبيبات من العرق كانو على جبينه .. عرق نافر بجبهته كان واضح .. العروق عاوتاني لي فيديه بارزين .. هاد المرة تأكدت انهم شيء طبيعيي .. ديما عنده هكاك .. فحال الاسلاك .. ثبت عينيه على عيني وهمس بصوت اجش .. 
بلال:~ غانستناك .. 

واحد .. زوج .. ثلاثة .. ثلاث ارقام خرجو من ثغري .. قبل ما نزفر بعمق ونخرج لعنده .. باقي حرارة الموقف لي طرا قبل عشرين دقيقة .. كتجري فشرايني .. ماقادراش نوقف .. ولا نوازن الامور مزيان .. 
شفته واقف قدام سيارته .. بقميص اسود وسروال رمادي .. حتى هو بدل ثيابه .. شعره كيتحرك مع عظلات صدره لي كيبانو بارزين من التريكو لي لابس .. واقف بطغيانه .. بجبروته .. انف حاد كالسيف .. ملامحه كتبين مقدار قسوته .. درت عيني فالارض حتى وصلت لعنده .. 
ركبت جانبه بصمت .. كنحاول غير مانشوفش فيه .. ونقرا العبث فسوداوتيه .. 
همس بابتسامة .. 
بلال:~ فين تبغي نمشيو .. 
بما انه مهدن وهادئ فكلامه .. حتى انا خصني نتهدن .. ماشي من المعقول يبانو عليا مشاعر اللحظة لي عشناها فالكوزينة .. واخا هكاك همست بتوتر .. 
انا:~ فين مابغيتي نتا .. 
تنهد بعمق حتى سمعت من عندي زفيره الحار .. شد على يدي جتى زيرها لعنده .. وتكلم بعبث .. 
بلال:~ متأكدة فين بغييت انا .. حيت غاناخذك وماغاديش نردك من بعد .. حتى يفوت واحد الشهر .. 
اطلق ضحكة خشنة .. الصمت اطبق عليا .. حتى دورتهت فراسي عاد فهمت كلامه الفاحش لي كيقصده وراء جملته .. جاوبته بتوتر .. 
انا:~ غادي ننزل .. مابقيتش بغيت نخرج .. 
بلال:~ ماشي دابا .. 
زير على كفي بأصبعه الطويلة .. ملمسهم البارد .. كيعكس حرارة يدي .. 
بلال:~ ماشي دابا .. والا غادي ندخلو بزوج ونكملو على مابديناه فالكوزينة .. 
داعب اصابعي بشوية .. بداوئر وهمية .. بينما انا كنت مأخوذة .. ماقادراش نقاوم .. غير كنسمع .. والحركات لي كنديرهم بنفسي كيوصلوني ثقال .. السيالة العصبية كتوصل ثقيلة لدماغي .. 
بلال:~(زاد همس بحرارة) وكنظن هاد المرة ماتقدريش تقاومي .. 
وسعت عيني بشوية .. غير مجرد التخيل مرة اخرى على نوع الاحاسيس لي ممكن يخليني نحس بها برفقته .. خلاني نجمد فكرسي السيارة .. وكأخر ردة فعل عضيت على فمي بارتجاف .. لكن حتى فهاد الحالة كان عنده جوابه .. 
بلال:~ ماشي كل مرة غانكون صبور فيها على لي قبل .. ماديريش شي حاجة ماتقدريش تتحملي عواقبها حتى للنهاية ..
حط اصابعه على شفتاي .. كيفرقهم بشوية .. وكيتعمد يركز عيونه فعيوني .. بركتين فاللون الاسود فحال الجمر المحترق .. 
انا:~ صافي ماديرش لي هكا .. 
بلال:~ حتى انا قلت لك مادريش لي هكا ..
انا:~( غمضت عيوني ) حيت غانكرهك .. 
بلال:~(غمض عيونه حتى هو) وانا يا ريتني نقدر نكرهك .. 
ضحك بخشونة فحال ديما .. اما انا تصاوبت فجلستي .. وغمضت عيني بنفاذ صبر .. صافي غادي نحماق اذا زدنا غير شي اسبوع هكا .. غانحماق بصح .. وبلال غايكون السبب ..
انا:~ فين غادي نمشيو ؟ 
رفع حاجبيه باهتمام .. 
بلال:~ ماعندك حتى بلاصة مفضلة ؟ كيعجبك تمشي لها .. 
انا:~ (هزيت راسي بصمت) لا .. 
بلال:~ فكري تقدر تكون كتعجبك شي حاجة ؟
انا:~(درت يدي على عنقي) ماكنخرجش بزاف .. 
بلال:~(مسح على وجهي بهدوء) اذا خلينا نمشيو لشي بلاصة ننعازلو فيها على العالم .. واخا غير مؤقتا .. 
ديمارا السيارة .. طول الخمس دقائق لي كان الصمت فيها حاليفنا .. حاولت ما أمكن نهدأ انفاسي .. وهاد الجنون لي وليت عايشاه .. حياتي بين شهر واخر تبدلات .. وتقلبات سفاها على علاها .. شفت فيه والحروف خرجو من حلقي بترردد ..
انا:~ بلال .. 
بلال:~ شنو ؟ ..
شاف فيا باهتمام كيستناني نقول شنو بغيت .. ورجع شاف فالطريق .. 
انا:~ علاش ماخليتينيش فالمصجة نتعاالج .. كان غايكون الامر احسن ولا لا .. 
يديه زيرو على مقود السيارة .. دقيقة كاملة وانا كنستنى جوابه .. 
بلال:~ ياك كتقولي نتي ماشي مريضة ؟ علاش اذا غانخليك فالمصحة ..
انا:~(قاطعته) ولكن ماشي هادشي لي قلتيه اخر مرة .. 
بلال:~ نتي مامريضاش بصح .. غير حالة اكتئاب غاتعالجيها بسهولة اذا بغيتي .. 
تكلم بهدوء .. نبرة صوته نشرات طمأنينة عجيبة فداخلي .. لقيت راسي مازال كنسوله كل مرة باهتمام .. 
انا:~ وكيفاش غانعالجها ؟؟ 
لاحظت ابتسامة هادئة ترسمات على قساوة وجهه .. ويديه لي كانت على المقود رجع حطها على يدي .. وبقا كيسوق بالاخرى .. 
بلال:~ ماتبقايش تصعبيها على راسك .. عندك شي حد كتعاودي ليه كلشي ؟ 
انا:~ (حركت راسي ب لا ) لا .. 
بلال:~ شفتي كون بلاصة ماكنتي كتقطعي لحمك وتشرطيه .. كنتي تعاودي لشي حد .. صاحبتك مثلا ؟؟ ورقة .. دفتر .. اي حاجة .. ماماك واخا ماباغياش .. كنتي تعاودي لها اي حاجة .. كان الامر غايكون اسهل .. 
نار سائلة تحركات ف بلعمي على شكل غصة .. داك الهوا لي كان كيدخل مع القصبة الهوائية ماكانش اوكسجين .. شي حاجة فيه كتطبق على انفاسي .. 
انا:~ نتا ماعارفش ماما .. شوف غثر كيف لاحوني ماسولوش فيا من بعد ؟
بلال:~(سكت شوية وعاود زفر) عارف واليديك ماشي من النوع الساهل .. ولكن واش جربتي نتي لي تمشي عند مك تعاودي لها .. وتحاولي نتي تتقربي منها فبلاصتها هي .. ( مسح على لحيته والابتسامة هاد المرة زالت من وجهه ) بعض الامور .. خصكي نتي تكوني فيها الطرف السابق .. واخا يكون فات الفوت .. كاتكون الخسائر قليلة .. وشنو مادارو الواليدين فالاخير كيبقاو واليدينا .. 
تنفست بعمق .. كنحاول نحلل كلامه وندخله مع عقلي .. وبصح كان كيدخل مع ذاتي بسهولة .. هادشي عمري فكرت فيه .. يمكن ماما ديما كانت بعيدة .. ولكن حتى انا كنت بعيدة عليها بنفس المقدار .. واخا هكاك ماقادراش نستحمل هاد الغصة لي فقلبي .. 
هزيت فيه راسي وتكلمت باشمئزاز من راسي ومن الضعف والخنوع لي طبقته على راسي من الصغر واعتبرته قدري .. 
انا:~ ونتا قابل على هاد الجروح كلها ؟ 
بلال:~(جاوبني بهدوء) جروح الجسد ولا جروح الروح .. 
انا:~ ( ضغت على المكان لي كنت كنقطع فيه لحمي) الجسد .. 
بلال:~ صدقيني جمال الجسد عمره همني او غايهمني .. وجروحه كتبقى مجرد شيء شكلي .. والصورة لي راسمك بها عندي .. ماغايهزها لا مشرط حطيته على يديط ولا ندبة تعمدتي ترسمي بها جسدك (سكت طويلا .. حتى مابقا كيتسمع عندي غير انفاسه) اما على جروح الروح .. واخا تخلي آثارها غاتتشافي مع الوقت .. وغاتشوفي شحال ضيعتي عليك شحال من حاجة كان خصك تعيشيها

بعدما قال كلامه حسيته ضربني فالصميم.. كل ماطلبته من الله تخرج الامور على خير هاد المرة .. مالقيت مانقول من غير تصنعت النوم والدوخة..
حتى خرج على انحاء المدينة .. حتى وصلنا لواحد المنطقية جبلية عاد وقف .. ريحة الشجر .. والهوا النقي .. كلشي زوين فيها .. غمضت عيني واستنشقت ريحة الورد .. مخلطة مع ريحة الهوا .. كتنعشني من الداخل .. 
حسيت به دار يديه على كتفي بشوية .. بتصرف عفوي .. ولكن باقي كنحس به فشكل .. ماقادراش نتأقلم مع هادشي .. 
بلال:~(همس فآذني ) باقي دايخة .. 
حركت راسي .. انفاسه كيضربوني فعنقي بشدة .. فوق قماش الشال لي لابسة .. ولكن حسيتهم فحال شي سكين كايدوز على بشرة رقبتي .. 
بلال:~( بعد شوية) ندخلو .. 
اطلقت زفرة عميقة .. عاد شفت فيه وهمست .. 
انا:~واش جايين عند شي حد ؟ .. 
رجع واقف جنبي نيشان .. دار يديه فجيوبه .. 
بلال:~ لا .. ( ابتسم بهدوء) بغيت نبقاو على راحتنا .. غير بزوج وصافي .. من حقنا هادشي ..
شكون يقدر يضمن لي انني نهرب منه هاد الوقت .. ربما جابني ل هنا باش يستفرد بيا عن عمد .. وقفت بين المطرقة والسندان .. 
انا:~ خلينا نمشيو من هنا .. 
قلتها بترجي خفي .. خصوصا ان المنطقة لي حنا فيها خاوية .. وهو واثف قدام واحد المنزل خشبي .. خلا اوصالي يرتاجفو والرعب ينتاشر ف ضلوعي .. 
جاوبني بهدوء .. 
بلال:~ عارف شنو فبالك .. غير حيدي عليك هاد الافكار الخاوية .. 
انا:~ ما فبالي والو .. غير نتا كتوهم .. 
دار يديه فخصري بتملك .. حتى جبدني لعنده بشراسة.. صلابة صدره تضربات مت طراوة صدري .. انفاسه العنيفة دخلو مباشرة من انفه لثغري بقسوة .. صوته الاجش انساب مع اذني .. 
بلال:~ بلا ماتخافي .. ماشي وحش باش نفتارسك .. بدون إرادتك ..واخا هادشي كيعذبني .. نتي مراتي وحلالي حتى تكون نتي قادرة .. غانعاودها لك يمكن للمرة الالف ماغانفرضش عليك شي حاجة نتي ماقادراش عليها فالوقت الحالي .. بغيت غير نزيد بعلاقتنا للقدام .. تعرفيني ونعرفك اكثر .. حتى تولفي عليا .. 
انا:~ ااه .. ا ..
هزيت راسي بصمت وخوف .. نار الضمير تضمرات فكل انحاء جسدي .. ماعرفت كيفاش ولا وقتاش نقدر نقول له هاد الخداع لي مغطية به وجهي الحقيقي .. ونكشف اوراق الماضي بلا رعب .. زاد زيرني لعنده حتى حسيت بضلوعي غايتقسمو بين ساعدين القويين .. 
انا:~( حاولت نبعد )بلال غايشوفنا شي حد .. 
اقترب ب شفتيه حتى وصل لجانب خدي وهمس بشوية .. قبلني ببطئ تما.. 
بلال:~ ماساكن هنا حد تقريبا .. 
دفنت وجهي فتجويف كتفه .. حتى حسيت بانتظام انفاسي وانفاسه عاد حيدت راسي .. بينما هو رفع وجهي لعنده .. حتى رجع مقابل لصفحة وجهه .. 
بلال:~ خلي عينيك يمارسو عليا سحرهم ويذبحوني حتى هما فحال ديما ..
شديت فقميصه باش مانطيحش اثر كلامه لي كيزلزل كياني .. وابتسمت بشوية باش نكسر هاد التوتر لي حاسة به .. 
انا:~ بغيت ندخل .. نشوف هاد الدار .. 
بلال:~ اجي .. 
شد فيدي ودخلنا للداخل .. اثاث منمق .. بيت خشبي مرتب .. حتى هو فيه ريحة الازهار .. وداك الهوا كيدخل لداخل .. جلست فالصالون .. فيه غير الفوتويات تقريبا .. وبعض الكراسة .. وواحد التلفازة صغيرة .. 
انا:~( وسعت عيني بإعجاب) واش دارك هادي .. 
بلال:~ لا .. د الوليد .. كنا كنجيو لها مجموعين قبل شي عشر سنين .. 
جلست على واحد الكرسي .. داير فحال الارجوحة كيمشي ويجي .. غمضت فيه عيني .. وجاوبته بانبهار ..
انا:~ سعداتكم .. زوينة بزاف .. ماكرهتش حتى انا كون كانو يجيبوني لشي بلاصة فحال هنا ملي كنت صغيرة .. 
تماسك الاسرة عنده دوى كبير .. انا عمري عقلت على راسي سافرنا مجموعين ولا عشنا فشي منزل فحال هذا مثلا .. 
اقترب مني خطوتين حتى وقف عليا بجسده الضخم .. وعيونه كيمشطوني من الرأس حتى للاسفل .. 
بلال:~ فوقت الشتا كتكون زوينة كثر .. كتساليني نجيبك لها ملي كيكون الثلج .. 
ابتسمت بمرارة.. طعم الصدأ تصاعد لحلقي .. مصيري من دابا لفصل الشتاء كان باين .. ربما نكون فشي بلاصة هنا بعيدة .. ربما نكون ميتة من خجلي وعاري .. اذا ماقتلنيش هو بنفسه هاد المرة .. وجيمع داك العاطفة لي فيعينه غاتولي مجرد رماد .. فحال اذا عمرها كانت .. 
انا:~ ان شاء الله .. 
جلس مقابل لي .. على واحد الاريكة .. بقيت فنفس الوضعية .. مغمضة عيني .. كنتهزهز بشوية .. فحال اذا بغا يغلبني النعاس تما .. حتى حسيته وقف عليا .. ووجهي لي كلامه ..
بلال :~ كنظن خصنا نمشيو لشي بلاصة قريبة من هنا نتغداو .. 
انا:~ (لصقت فداك الكرسي كنزيد نتحرك بطيش ) مابغيتش نمشي دابا .. 
بلال:~ غانرجعو ل هنا فالعشية .. حتى تملي .. حيت ماكاين مايتكال هنا .. وماباغيش نقتلك بالجوع .. (عض على شفتيه بمكر) باقي محتاجك بزاااف .. 

جلست مرة اخرى على داك الكرسي لي كيتهز بشوية .. هادشي من بعد ماتغدينا وتسارينا شوية عاد رجعنا للدار ورا العصر .. كنت كنتعمد نطبق الصمت من طرفي .. باش مايزيدش من كلامه لي كيوترني .. والكم الهائل من المشاعر لي كيتتعمد يمطرني بها .. 
دازت ساعة .. وساعتين واكثر .. وهو مازال كيقرا فواحد الكتاب .. مركز فيه .. حتى مليت .. 
انا:~ واش ماغاديش نرجعو نخرجو ؟
اغلق داك الكتاب بهدوء .. وطول فيا الشوفة .. 
بلال:~ ملي سولتك قبيلة قلتي مابغيتيش .. 
دورت عيني لجيهته .. وزدت كنتحرك فوق داك الكرسي .. 
انا:~ زعما قصدت واش ماغانرجعوش فحالنا .. 
وقف .. ودار يديه فجيبه وبنبرته الهادئة جاوبني ..
بلال:~ غانرجعو ولكن ماشي دابا .. 
هادئ لدرجة مستفزة .. ماعرفتش داك كمية المشاعر والاضطربات لي فيه كيفاش كيخليني نحس بهم فلحظة وحدة .. فحال الماء والزيت .. واخا تصرفاته فشكل .. محيطه الاسود كان فشكل اخر .. وعاصفة من نوع اخر .. 
انا:~ فوقاش ؟ هو الليل بدا يطيح .. 
شفت من السرجم .. الشمس بدات كتغرب .. والسكات فداك المنطقة حتى مابقا كيتسمع والو .. غير داك الهوا لي كيدخل من النافذة الزجاجية .. 
بلال:~ ماغانرجعوش اليوم .. بغيت نبقاو شوية على راحتنا .. 
قرار اخر .. ماكانش فبالي .. غمضت عيني بنفاذ صبر .. ورجعت فتحتهم كنحقق فوجهه لعل وعسى نقلاه غير كيضحك .. زفرت بضيق .. 
انا:~ ما يمكنش .. 
بلال:~(بهدوء) علاش مايمكنش .. فيها شي حاجة .. 
صافي غانبقاو هنا غير بزوج .. وهو تعمد يديريها .. قلبي بدا كيضرب فكرشي واقيلة .. العرق تصبب على ظهري .. ملي شفت فيه ولقيته حتى هو مركز معايا .. فحال اذا ماكيسمع والو من غير شهيق انفاسي .. شفت فيه بفضب ..
انا:~نتا تعمدتي تجيبني ل هنا .. 
بلال:~ااه .. تعمدت نجيو هنا ..وغانبقاو هنا دابا .. 
عضيت على فمي من الداخل .. كان خصني لابد شي عذر .. مانقدرش نبقى معه .. واخا داك الأمان لي كيحيطني به .. عارفة انه يقدر يحميني من اي حاجة .. ولكن من نفسه موحال .. 
انا:~ بغيت نرررجع ..(زدت بتوتر) عمتي غاتكون خايفة علينا .. انا ماقلتش لها اصلا خارجة .. 
اقترب مني .. حتى وقف مقابل لي .. كل مارجعت خطوة اللور هو كيزيد خطوتين .. حتى مابقا كيفصلنا والو تقريبا .. 
بلال:~ الواليدة فخبارها راك معايا .. (حط يديه على خدي) غير نتي تهناي .. 
رجع ابتسم عاوتاني .. نصف ابتسامة فقط .. وبعد للجهة الاخرى .. حيد يديه بهدوء فحال اذا مادار والو .. وتكلم.. 
بلال:~ غايعجبك الحال هنا .. خصوصا نتي عندك مع السكات .. 
انا:~ ولكن .. 
فكه تزير .. وشراسة غلفات سوداوتيه .. دار يديه على راسه ونطق بنفاذ صبر ..
بلال:~ جوري راك ماشي درية صغيرة .. 
انا:~(رفعت فيه راسي) صافي ها انا ساكتة .. 
درت يدي على فمي .. وغرقت فصمتي .. 
طبقت السكات مرة اخرى .. حتى هو ماكلمنيش ظنيت انه كيخليني حتى نهدى انا ..
.. تعشينا بشي مؤكولات كان جابهم معه .. رجعت انا عاوتاني خديت من عنده واحد الكتاب كنقراه فداك الكرسي .. وهو رجع تلاح على داك الفوتوي يديه تحت راسه .. فكرت وفكرت .. كنت كنشوف فيه بتركيز .. ضربت اخماس فأسداس .. والشيء لي قاله لي عقلي هو نقول له الحقيقة .. عارفاه ماغايتفهمنيش ولكن .. هنا احسن .. وهادي هي الفرصة لي نبوح فيها بكلشي .. حتى اذا خرجني من منزله وطردني من حياته بمرة غايكون فمكان بعيد .. حتى حد مايشوف عاري .. 
انا:~ (همست بشوية) بلال ..
دار لي اشارة براسه دليلا على انه سمعني .. 
انا:~ان ..ا .. انا .. انا بغيت نقول لك شي حاجة ..
بلال:~شي حاجة مهمة .. 
انا:~(حركت راسي بإيجاب ) ااه .. انا .. انا ماشي كيف كتظن .. 
الرعدة شداتني .. غير كنرتب الحروف فحلقي .. كنلقاهم طارو وزلقو .. ماقادراش نقولهم .. الحروف لصقو فجوفي .. والدموع لي سبقوني .. مالقيت كيف نخرجها .. 
بلال:~(بخوف) جوري ؟؟
شاف فيا كنبكي .. ونزيد نشهق .. درت يد بين وجهي وقلبته للجهة الاخرى .. ذنبي عظيم .. غير باش نعترف به .. ماعرفتش كيفاش طاوعتني نفسي حتى ارتكبته وفرطت فراسي بهاد السهولة .. 
بلال:~ششت شنو وااقع لك ؟ 
حسيت بأنفاسه عند وجهي .. دورني لعنده .. وعلامات الاستفهام فوجهه .. تمينيته يفهم بلا مانقول ليه .. يفهم مقدار غلطي وشحال انا ندمانة عليه وماقادراش نقوله ولا نعترف به امامه .. كيفاش غانطلب الصفح وانا بنفسي مامسامحاش راسي .. 
بلال:~ (دار يديه على راسي ) جووري .. واش مريضة ؟ 
حركت راسي بنفي .. وتكلمت بحشرجة .. كلما زاد قرب مني كنحس بارتجافة فذاتي بأكمالها .. 
انا:~لا .. والو .. واش غاتسمع لشنو بغيت كلشي .. 
الحيرة على بانت وجهه .. كيحاول يحلل شنو كنقول ليه .. شد فكتفي .. 
بلال:~ شنو واقع لك ؟ نتي ماشي هي هاديك .. 
قساوة وجهه خلاتني نتراجع على شنو بايت نقول .. بلعت الجملة لي كنت مقررة نقولها وهمست بامتعضاض .. 
انا:~ انا .. انا ماشي كيف كتظن .. 
بقيت شحال ساكتة كنحقق فملامحه .. واش لهاد الدرجة ماقادرش يفهمني وماعندي حتى حل .. غمضت عيني بخوف .. وهرمون الادرنالين تدفق فذاتي.. شنو يضمن لي انه مايقتلنيش هنا .. غايظن تعمدت نخدعو ونتلاعب به .. ولا كذبت عليه .. 
انا:~مابغيتش نبقاا هنا .. بغيت نرجع .. 
التعقيدة لي كانت بين حجبانو تطلقات زفر بعمق ورجع ضحك واخا كان معصب .. 
بلال:~يسحاب لي مانعرف شنو بك .. غانبقاو هنا يوماين ومن بعد نمشيو .. (حرك راسي بيديه) اتفقنا .. 
ماعندي حتى حل كيف غانقنعه .. لقيت راسي ساكتة .. بينما يديه كانو مازال على كتفي .. قبل مانفكر نبعد كان قطع المسافة لي بقات وعنقني لعنده بدفئ .. 
بلال:~ ماتعقديش الامور .. علاش كتخافي من كلشي .. واش كتخافي مني لهاد الدرجة ؟
بقا هكاك حتى وصلنا لداك الكانابي لي كان جالس عليه .. وجلسني جنبه .. 
كنت باغيا نختفي من هنا .. كل ماكتجي الفرصة امامي باش نعتارف بكلشي كنضيعها .. خايفة لا عاطفتي تغلبني مرة اخرى .. كيف كيخوني ماء عيني بسهولة .. همست بحشرجة .. 
انا:~ بغيت ننعس .. 
بلال:~ اجي ا هنا ..
حيد لي حجابي ببطئ.. مدة طويلة وانا كنبادله نظراته المتفحصة .. بقيت غير كنشوف فيديه كيف كيتحركو .. ماعرفتش واش تعمد يحيدو ببطئ ولا غير جاب لي الله .. يديه هبطو حتى ستقرو اسفل فكي .. نوعا ما عرفته نواياه خصوصا ملي شفت عينيه النجلاوين كيحققو ف ثغري بتصميم .. وكيرجعو ينتاقلو لعيني .. 
انا:~(قاطعته من ردة فعله المنتظرة) ام .. انا غاننعس هنا ..
رجعت حطيت راسي على ركبته بسرعة وبدون شعور .. سمعت زفيره الحار حتى عندي .. يديه رجعو حيدو لي المشبك لي فشعري .. وغاصو فأغلاله ببطئ .. كيحركهم بشوية .. 
بلال:~ ارتاحي يا رائحة الياسمين ..

"بلال انا ماشي بنت " 
"انا غلطت مع مراد "
فالصباح وقفت امام المراية ورددت هاد الجملتين .. خمس مرات على الاقل.. كيخرجو هاد الحروف من جوفي ويرجعو يختفيو مع الهوا .. انا ماشي غير ماقادراش نعتارف ليه .. ماقادراش نشوف وجهي فالمراية من كثرة خجلي من نفسي .. 
غلطت مع مراد لكن ماقادراش نعتارف بها ل حتى واحد.. تأكدت انني مابغيتيش نكسر بلال على الاقل هاد الوقت .. مابغيتيش نكسر داك شوية د الكبرياء لي بقا لي .. طال الزمان ولا قصار غايكتاشف الامر .. اذا افضل لي نخليه يكتشف الامر بنفسه .. اما باش نعتارف ليه مانقدرش .. انا ماشي بهاد الجرأة كلها .. 
خرجت من الغرفة لي نعست فيها البارح . . 
وجهت له كلامي ..
انا:~صباح الخير .. 
كان جالس .. على نفس الاريكة د البارح لي نعست عليها ولكن باينة انه هو بنفسه لي دخلني للبيت .. قدامه واحد الطاس د القهوة .. 
بلال:~صباح النور النعاسة .. ماكنتش عارفك كتعطلي فالنعاس فحال هاكا .. 
ابتسمت بشوية .. وعيني كيمشيو نيشان لعندك داك القطرات د الما لي لاصقين فلحيته .. 
انا:~ حتى انا مامولفاش كننعس بزاف .. 
هز راسه بصمت عاد هدر .. 
بلال:~ نفطرو هنا ولا برا .. 
انا:~ فين مابغيتي .. 
بلال:~ اذا هنا احسن .. 
فالوقت لي شفت فيه عينيه كيمشطوني .. كيفترسني غير بسوادهم .. عضيت على فمي بارتجاف .. 
بلال:~ قلت لك ماتبقايش ديري شي حاجة ماتقدريش تكمليها حتى للاخير .. 
غضمت عيني بنفاذ صبر .. شكيت انه اذا بقينا فقط غير شي ايام .. يقدر غير بكلامه وتصرفاته يخليني نستسلم لسحره ببساطة.. 
انا:~خلينا نرجعو لداركم احسن عفاك ..
بلال:~(قاطعني بهدوء) عطيني شي تبرير مقنع لي مخليك مابغاياش تبقاي هنا ؟ 
شنو غانقول له .. انه صافي مابقيتش قادرة نتحمل .. بغيت نعتارف وماقادراش .. ومابغيتيش يعرف .. درت يدي على راسي لي حسيته شاعلة غيه العافية .. 
انا:~ انا عييييت .. عيييت .. 
رديت راسي على داك الاريكة اللور .. وتكلمت بترجي .. 
انا:~ سمح ليااا .. انا ماقادراش .. 
بلال:~ جوري .. 
انا:~ عييت من كلشي .. سمح لياااا .. (صوتي طغات عليه نبرة الاعتذار) سمح ليا على كلشي ..
وقف بنفاذ صبر هو هاد المرة .. عرفته حتة هو نفس الشيء .. ربما يكون بدا كيكرهني على هاد التصرفات لي كنديرهم وهاد خرجان العقل لي كنتصرف به .. 
بلال:~ جوووري عيييت بااغي نفهمك .. وماقادرش .. 
دار يديه على كتفي حتى هزني كلي تقريبا ووقفني امامه .. رجلي حسيتهم كيتلواو تحتي ماقادراش نوقف .. غير كنترعد فبلاصتي ..
بلال:~ عييت نحاول ومافهمتكش .. قووولي لي شنووو عندك .. انا كنسمعك .. 
ثبت عينيه فعيني .. حجرهم الاسود .. قاسي غاضب .. بحر هائج .. امواجه كتجرفني عندها .. نعتارف ولا نبعد .. وهدر بنفاذ صبر .. 
بلال:~ قولي شنو عندك؟ غانسمع كلشي ..
ترعبت من نبرته .. وقساوة وجهه .. 
انا:~ماعندي والو .. 
بلال:~ قولي كلشي .. شنو كاااين ..
انا:~عييييت ..(غمضت عيني) طلقني .. طلقني .. (شدت على قلبي ) طلقني .. انااا مااقادراش نعيييش معك .. 
دفعني بعنف .. حتى اختل توازني تقريبا .. حسيت بلحمي ضرني .. انفاسه لي كانو غير قبل ثانيتين هادئين .. تغيرو تماما .. دابا ولا عبارة على بركان هائج .. بركان من النو الانفجاري .. تفاحة آدم تحركت بقسوة فحنجرته .. الشيء لي خلا الصوت يخرج غاضب بين تنفسه .. 
بلال:~ صااااااابر على هبااالك واش كيسحاب لك الزواج لعب ؟؟ نهار اه ونهار لا ؟ 
انا:~ انااا مابقيتش قادرة .. انا .. 
بلال:~ الزواج ماشي لعب والطلاق عمره غايكون اجوري عمره .. واخا تحلمي به .. عمري نفرط فيك من بعد ماوليتي مراتي .. 
انا:~(بترجي) عفاااك .. 
هز راسه فيا بعيون فحال الجمر .. فحال شي اسد لقا فريسته .. 
بلال:~ واخا تموتي الطلاق عمره غايكون .. وزواجنا خصه يكمل بأي طريقة .. 
قبل مانلتاقط انفاسي .. كان شدني عنده مرة اخرى بتملك .. وشفتيه هاد المرة كتمو انفاسي وسقطو على ثغري حتى استحوذ على ذرات الهواء لي كنستنشقهم بأكملهم ..
تملك .. جنون.. شغف .. قسوة هادشي كله كان مجموع فقبلته فقط .. كل ماحاولت نبعد كيعاود يردني لعنده .. كيزلزلني بتيار مشاعره .. لي جرا فدمي فحال النار .. كنبغي نبعد لكن كيرجعني لعنده .. مرة واثنان وثلاثة وباقي كيرجع يمتلك فمي بشفتيه القاسييتين .. 
انا:~بلال .. 
افلتني بشوية لكن يديه كانو مازالين على خصري .. همس قريب لثغري ..
بلال:~ رائحة الياسمين .. جوري .. غانملكك هاد المرة .. باش عمرك تطلبي الطلاق مازال .. ولا حتى تفكري فيه 
رجع مرة اخرى اسقط فمه على فكي بهدوء .. دفئ انفاسه لفحني .. ووجهي بأكمله .. يديه كيغوصو فشعري .. مامخلي لي فين نتفافا ولا نفكر نقول شي حاجة..
كل مادرته همست بترجي ..
انا:~بلال .. بعد مني .. ماشي هنا .. 
حط جبهته على جبهتي .. زفيره الحار كيدخل رآتاي فحال السم .. 
بلال:~عييت صااابر .. رحمي عذاااابي وخليني نطفي شوية من شوقي ليك .. سنوات د العذاب بغيت نتهنى .. 
رجع مرة اخرى كيمارس عليا طقوس تعذيبه .. حتى سقطت على الكانابي.. غطا عليا حتى هو .. وجسده كيحجب عليا نشوف الضو .. ولكن ميزت صفحة ملامحه مزيان وتقلص عظلات وجهه .. عروق جبهته والعرق لي طاح على جبينه .. 
شفتيه كيتبعو ثغري .. فين ما هربتو منه .. حتى قدرت نهمس بصعوبة 
انا:~ ماتغلطش معايا .. غانندمو من بعد .. 
هز راسه فيا .. عيونه حمرين فحال النار السوداء .. وداك العاطفة الفجة فنظراته صدماتني .. وخلاتني نبلع لساني .. تكلم وهو كينهج ..
بلال:~ خلينا نغلطو دابا .. ومن بعد نندمو مزياان .. 
هسيس انفاسه .. عاود تسمعو قدام على عنقي .. كيقبله بشغف وجنون .. يديه وحدة على وجهي والاخرى شاد بها يدي .. انفه كيمرره ف تجويف عنقي.. 
عنقني لعنده .. 
بلال:~شنو درتي ليااا .. ياعميقة العينين ؟ حمقتيني .. مابقيت عرفت كيف نتصرف معك .. كتعذبيني ونتي فرحانة .. 
قبلني ففكي .. زاد كيقرب انفاسه لكتفي .. كيحاول يحيد لي التريكو لي لابسة .. غير من يدي ..
صافي عرفت انه لا مفر .. كذبة وحدة لي بقات مسلكاني .. درت يدي على ظهره لي عرقان .. 
انا:~ مانقدرش دابا ..(همست بصعوبة) بلال .. (سكت شوية) انا .. انا فيا الدورة .. 

غير قلت جملتي .. حسيت بقبلاته توقفو .. بقاو غير انفاسه كيضربو فعنقي بعنف .. نطق اسمي كينهج .. 
بلال:~ جوررري .. 
حرارة جسده زادت لفحاتني فيا ملي زيرني لعنده .. معنقني بتملك .. يديه كيزيرو على ضلوعي .. حتى انصرهت روحي من الداخل .. 
بلال:~( همس جنب اذني)بلاش من الأعذار الخاوية .. 
داك الحرارة كلها لي كانت فوق عمودي الفقري .. رجعات ب البرودة .. اكيد عرفني كانكذب .. باينا للعمى انني باغيا نوقفه .. زدت زيرت على ظهره بيدي .. باش مايشوفش تعابير وجهي . ولا يكمل داكشي لي بداه .. تكلمت بتردد .. 
انا:~انا .. اا .. 
بلال:~ شششت .. كنظن غانسرعو الحفلة لي غانديروها باش مايبقى عندك حتى عذر من بعد ..( باسني ف جبيني بعمق) وتقدري تكوني على راحتك ..
حط ابهامه على وجهي كيمرره برفق .. وكيزيد يززع قبلاته فوق وجهي .. خصوصا على فكي .. 
بلال:~ رائحة الياسمين .. 
انفاسه بداو كيهداو .. شوية بشوية .. يمكن خمس دقائق.. حتى انزاح عليا ثقله .. رجعت كنغطي عنقي ونشد ازرار القميص لي كنت لابساه ونطلع يديه .. غير طلعت عيني لقيته كيحقق معايا .. الحروف انطقلو من حلقي بتوتر .. 
انا:~ نتا قلتي غاتخليني على راحتي .. 
تجاهل كلامي .. زفر بعمق .. وعيونه باقي نظرات نارية كيخرجو منهم .. فحال العافية .. بمثابة جمر حامي .. قاسي .. صلب .. شاف فيا بطول عاد خرجو الحروف من جوفه هادئين .. 
بلال:~ نوضي تفطري.. باش نوصلك للدار .. (ابتسم بمكر.. ومسح على وجهه) حيت اذا بقينا غير بزوج مانضمنش لك .. 
انا:~(حركت راسي بإيجاب) واخا ..
حاولت نهدأ انفاسي ما أمكن .. فلحظة وحدة كنت غانتفضح .. اذا هاد المرة قدر يكبح جماح نفسه .. كيفاش غانفلت منها المرة الجاية .. مسحت على وجههي بتوتر والتفكير كينال مني .. 

بعد مدة قصيرة .. كان اخذ حمامه وانا فطرت .. هو اكتفى فقط بالقهوة .. جلست جانبه فالسيارة .. وقبل مايديماري جبد واحد البرية صفرة ومدها لي .. 
انا:~(شفت فيه باستفهام)شنو هذا .. 
بلال:~(ديمارا وهو كيجاوبني) اذا بغيتي تشري شي حاجة .. 
فهمت من مقصده انه مبلغ مالي .. شديته عندي بتردد .. حسيت بواحد الاحساس فشكل .. الخجل .. مابغيتش علاش يعطيه لي .. رجعت مديتو ليه .. 
انا:~ مابغيتوش .. ما ماحتاجة والو .. 
مادار حتى ردة فعل بوجهه .. من غير يديه لي رجعو لي البرية .. ودارها فكفي .. تكلم بصوت اجش ..
بلال:~ نتي مسؤولة مني دابا .. ماعرفتش شنو غاتكوني محتاجة بالضبط .. ولكن راه هذا من حقك ..
كل مرة كيزيد يقنعني بكلامه .. الدم تدفق فعروقي .. وطلع لوجهي على شكل حرارة حمراء .. 
انا:~شكراا .. 
بلال:~ مايحتاجش الشكر .. 
رجعت خديتو بصمت .. درته فصاكي بتردد .. عاد سمعت زفرة عميقة طلعات من عنده .. 
الصمت .. هو كل ماكان كيحيط بنا حتى تكلم وكسر هاد الصمت ..
بلال:~ السيمانة الجاية غايكون مناسب باش نمشيو لدارنا ان شاء الله .. 
نبرته خرجات هادئة .. فحال اذا انا عندي شي اختار اخر .. نهاى غايعرف الحقيقة كلها .. متأكدة غايندم على النهار لي قرر يربط حياته بحياتي .. حركت راسي بإيجاب .. 
انا:~كيف مابغييتي..(مسحت على وجهي) ولكن غايكون عندك الخدمة .. 
بلال:~ مابقا غير زوج حصص ويتسالا كلشي .. غايبقا غير التصحيح حتى لمن بعد .. متخافيش كاين الوقت فين نبقاو غير بزوج .. 
تراجعت اللور فالكرسي .. ملي سمعت قهقهته .. وصوته .. بنبرته الجدية كيحفر فأعماقي .. قلبي مابقيتش عرفت شحال من مرة كيضرب فالدقيقة .. واش ستين ولا مية ولا كثر.. 
بلال:~ علاش ماكنتيش كتجي تقراي .. 
قالها بحسم .. فحال اذا عرفني فأيامي الاخيرة كنت مقابلة غير الدوران .. 
انا:~(دورت عيني وجاوبته باحتجاج) غير فالحصة ديالك وصافي .. 
بلال:~ (مسح على لحيته) علاش ..
انا:~(جاوبته بلا تفكير)حيت كنت ماكنحملكش .. 
عاوتاني ضحك .. يمكن جملتي جاته تافهة .. المرات لي فاتو كان وجهه كل مرة كيتغير ويتعصب فاش كنصرح على كرهي ليه ولكن هاد المرة مختلفة .. عضيت على فمي بارتجاف .. ورجعت غمضت عيني .. كنستنى شي جواب من اجوبته لي يخليني نزيد نغرق فسكوتي ..
بلال:~ ودابا مازال كتكرهيني ؟
فحال اذا القط اكل لساني ... لقيت راسي غير كنتمتم .. والحرارة لفحاتني .. كنفكر حقيقة مشاعري اتجاهه .. هي ماشي كره وماشي شي حاجة اخرى .. انا ماعارفاش شنو هادشي بالضبط .. ولكن كنت باغياع يبعد عليا وفنفس الوقت يحميني .. كنت باغيا فالاول نكسره بحقيقتي .. ولكن مابغيتيش نجرحه واخا نكون كنكرهه .. 
بلال:~ ماشي مشكل حتى لمن بعد وجاوبيني .. 
قاطعني من افكاري بكلامه .. اطبقت على انفاسي بشدة عاد جاوبته بجاوب مخالف.. 
انا:~تقدر توصلني عند نرجس .. نبقى معها شوية .. 
كنت متوقعاه غايرفض فالاول .. لكن كلامه كان عكس توقعاتي .. 
بلال:~ عطيني العنوان .. 
قلت له العنوان .. كنت باغيا نمشي لعندها .. رغبة دفينة فيا كانت باغيا تعرف مراد شنو وقع ليه ماشي خوفا عليه وانما خوفا على نفسي .. حيت كنت متأكدة انه صمته ماكيبشرش بشي حاجة هي هاديك .. واذا مافضحنيش على السم لي حاولت ننهي حياته به اكيد غايكون مصمم باش يصدمني من بعد .. 
بلال:~ شحال غاتبقاي معها باش نرجع وراك .. شي ساعة ؟ ..
انا:~ غانرجع ف طاكسي ..
حرك فكه بتشنج .. وجاوبني برفض .. 
بلال:~ لا .. غانرجع وراك .. (شاف فساعته ) شي ساعة ونص نكون عندك ..

دقيت فالباب .. اول وحدة فتحات كانت نرجس .. وسعات عيونها السوداوتاين فحال كل مرة تشوفني .. 
نرجس:~جوووري .. نتي .. 
ابتسمت لها .. وحركت راسي .. 
انا:~ااه .. انا .. جيت نشووفك .. 
عنقاتني بسعادة .. وابتسمت حتى هي ..
نرجس:~ مرحبا بك .. تووحشتك .. 
عضيت على شفتاي .. مجددا تأنيب الضمير .. ماعرفتش كيفاش شي نهار فكرت نجرحها بكلامي .. 
انا:~حتى انا ..
دخلت معها لداخل وبالضبط لبيتها .. كان مركز اسراري .. شحال دزت معها لدارهم قبل هاد النهار كنت كنغير فهاد الغرفة بالضبط ثيابي المفضوحين ونتستر زعما .. مااقترفته فالماضي كله رجع معايا فحال النار كتحرق فذاتي .. انش ب انش .. ذرة ب ذرة .. ندمت اشد ندم .. حتى مابقيتش قادرة نتحمله .. 
نرجس:~ كيف بقيتي شوية ..
شحال خصني نوضح من مرة انني مامريضاش .. ماشي حمقة .. ومامحتجاش هاد النظرة د الشفقة لي بانت فهاد اللحظة فعيون نرجس .. لكن قلبت كلامي ورسمت ابتسامة د بزز على وجهي .. 
انا:~ الحمد الله .. كنظن كلشي بدا كيتصلح دابا .. 
مسحت على عنقي بتوتر .. وعضيت على فمي مجدادا .. كنحك فصبعاني ماعارفاش كيفاش غانسولها على مراد ولا غانبدا .. لكنها غير من ردة فعلي فهمات الامر ..
نرجس:~ غاتسوليني عليه ياك .. 
هزيت ليها عيني مغرغرين عاوتاني .. ماقدرتش نكبح دموعي .. ماشي كنت باغيا نسول على احواله .. كنت خايفة غير من نتيجة افعالي .. 
انا:~(جاوبتها بصوت مبحبح) ااه .. واش ماوقع ليه والو بصح .. 
حطات يديها على يدي .. وطمأنتني بعينيها .. 
نرجس:~ ماتخافيش .. كلشي مزيان عنده .. رجع يقرا فحال ما وقع والو .. ورجع مع الكليكة دياله فحال الاول .. 
تنفست بعمق .. وشفت فيه كنحاول نتأكد من كلامها واش صحيح .. من بعد مافسد حياتي رجع هو لحياته .. من بعد ما اجرفني حتى ارتكبت ذنب عظيم .. تاب فحال اذا ماوقع والو .. 
انا:~ اصلا ماكان واقع والو .. 
نرجس:~ مابغيتش نفكرك ولكن علاش غير حاولتي ..(ارتجف صوتها) تقتليه .. 
الصفورة غطات على وجهي حتى وليت شاحبة اللون .. حسيت بريقي نشف .. وغصة استحكمت حلقي .. طالعة نازلة .. 
انا:~ ماكان واقع والو .. غير .. غ .. غير غلطت .. 
نرجس:~(قاطعاتني) عمره السم مايكتعطى لبنادم غلط ؟ .. 
مسحت شوية على وجهي ويدي لي كيترعدو .. كنت منتظرة سؤالها اكيد هي غاتكشفني كيف مادرت .. هي عارفة جزء من الحقيقة .. شافت تعلقي بمراد.. وتخاصمت معها على قبله وعاد السم لي عطيته .. 
نرجس:~ غير قوليلي اقسم بالله ماغادي يعرف شي حد .. (حطات ديها على يدي) واش تعدى عليك ولا سلميته راسك .. 
وسعت عيني بصدمة من جرأتها .. فاهمة الامر .. اذا ماغايكونش مراد لي أكد لها ولا قال لها .. كيفاش غانشوف فوجهها .. هي ومابغيتش تعرف عاد بلال .. لي كان كل مرة كيذبحني بكلامه .. اذا عرف غايذبحني بصح ماشي غير بالكلام .. حاولت نثبت يدي باش مايترعدوش .. تنفست بعمق .. وجاوبتها باستنكار .. 
انا:~ كون كانت واقعة لي شي حاجة فحال هكا .. كنتي كتظنني غانوافق نتزوج ؟ صدقيني ما وقع والو .. 
عند هاد الجملة بالضبط .. حسيت براسي كذابة ماهرة .. والشيطان وقف كيصفق لي .. خصوصا فاش شفت وجهها تغيير .. ماعرفتش باش حسات .. ولكن ماكنتش قاصدة نجرحها .. غير كنت باغيا تعرف انه انا ومراد ماوقع بيناتنا والو .. والا سيرتي كانت غاتكون على كل لسان .. 
نرجس:~(تكلمات باعتذار) بصح عندك الحق .. سمحي لي مافكرتش فهادشي .. انا لي عقلي كل مرة فين كياخذني .. 
عينيها مشاو نيشان لجانب شفتي لي كانت متورمة اثر جنون بلال وقبلاته .. كتأكد بصح واش وقعات بيناتنا شي حاجة .. دورت وجهي شوية .. 
نرجس:~ واش بلال مريض ؟ زعما قصدت لك البروف .. 
حسيت بقلبي غايخرج من بلاصته .. ملي قالت انه مريض .. 
انا:~ لا .. علاش .. واش شي حاجة .. 
حركات راسها بنفي بالزربة .. ورجعات ضربات على جبينها .. 
نرجس:~ ماتديش عليا .. حيت غير ماجاش هاد اليوماين ل لافاك وصافي .. 
تنفست بعمق .. اكثر شيء كنت خايفة منه هو نرجي تكون بصح عندها شي مشاعر اتجاه بلال .. غانجرحها بزواجي منه .. مع انني ماكنستحقوش .. لكن جزء فداخلي .. كان كاره اي وحدة تقدر تقرب منه ولا تحاول تشاركني فيه .. 
انا:~ لا .. (همست باعتذار وصوتي مخنوق) سمحي ليا .. 
عنقاتني .. وحطات راسها على كتفي .. 
نرجس:~ ماعندك علاش تعتاذري ..(ابتسمت بشحوب) مادرتي ليا والو .. 
بقيت معها ساعة تقريبا حتى رجع بلال .. ورجعت معه للبيت بصمت .. كل تفكيري مرة مع نرجس مرة مع هاد الاسبوع لي بقا باش نمشي مع بلال لداره .. من دابا حسيته جبل فوق كتافي .. ماباغيش يحيد .. غرفت ف بئر الاوجاع وهاد المرة موحال واش واش نوصل لبر السعادة .. 

ايام الاسبوع طارو واحد تلو الاخر .. بلال من نهار وصلني لدارهم ماعاود رجع لعندنا .. بقيت على نفس الروتين حتى تقضاو ايام الاسبوع ووصل اليوم لي كنت من شحال هادي خايفة منه .. 

زفرة طويلة .. اتبعتها بشهقة .. صافي الاسبوع طار .. وها كلشي واجد .. انا بفستان الزفاف الابيض .. كفن تغطيت به .. كنرسم تعابير مزيفة على وجهي .. داخلة لحبل المشنقة برجلي .. مستسلمة .. خاضعة .. ماعنديش الحق باش نتراجع .. 
سمعت صوت جميلة من ورائي .. كيتردد فوذني فحال اذا جاي من شي بلاصة عميقة .. 
جميلة:~ بلال بغا يدخل لعندك يشوفك .. 
هزيت راسي باش نمنعها ولكن الحروف لصقو فجوفي .. وزعت ابتسامة اخرى مزيفة .. كيفما وزعتها فطول الحفل لي كان بسيط غير من بعض الأقارب لي حضرو .. لأنه تقام فدار عمتي .. نرجس عرضتها ماجاتش .. وها هو انتهى بي المطاف .. واقفة كنستنى لحظات إعدامي .. بعيني مفتوحين ..

خطواته .. رائحته .. هسيس انفاسه كله وصلني من بعيد .. عرفته واقف ف باب الغرفة وعيونه غايكونو كيلتاهموني بشراستهم .. حتى سمعت لقبي انساب بين ثغره ودغدغ حواسي بوحشية .. 
بلال:~ عميقة العينين .. 
قبل مانتنفس كان دورني لعنده بكفيه القاسيتين .. ساعديه القويين زيرو عليا من ظهري حتى اصبحت ملاصقة له .. 
بلال:~ واخيرا يا رائحة الياسمين .. 
انا:~(شفت فيه وعيني مغرغين) مابغيتش نمشي .. بغيت نولي لدارنا .. 
بادلني الشوفة بدفئ .. حرك سنانه بضحكة هادئة حتى ابرز على صفهم الابيض .. قرب وجهه لوجهي حتى دغدغتني لحيته جانب خدي .. 
بلال:~اول مرة كنشوف شي عروسة ندمانة .. وماكرهاتش تتراجع فأخير لحظة .. 
انا:~(انفاسي تسارعت بقربه .. وشي حاجة جديدة كتعاود تنقبض بين كرشي ) انا ماشي ندمانة ..
دار يديه على خصري كيحركهم .. كيدفعني لعنده حتى كيزير عليا ويعاود يبعدني .. باش يحقق فملامحي اكثر .. 
بلال:~ اسبوع والشوق كيقتلني ليك .. باش مانجيش ناخذك بزز منك .. نجي ونلقاك ماباغياش عاوتاني .. امتي غاتصرفي بعقلك يا قاسية القلب (حط يديه على وجنتي ) نتي خايفة ؟ 
حركت راسي بايجاب .. ماشي غير خايفة شي حاجة كثر .. ماقادراش نتخايل عواقب هاد الليلة .. واغلاط هاد الزواج ..
احنى شفتيه لعند فكي .. قبلني بهدوء تما كان باغي يقترب اكثر لكن وقف فأخير لحظة .. 
بلال:~ الله يصبرني .. غانستناك برا .. حتى تكملي .. 
انحسب بهدوء .. من بعد مازلزل مشاعري .. بدخوله كان خروجه من الغرفة اعنف على مشاعري .. ببدلته الانيقة فلون السواد .. قميص ابيض من لتحت .. وربطة عنق حتى هي فنفس اللون الاسود .. ناسبت قامته الطويلة ..عرض كتفيه .. وضخامة جسده .. قساوة وجهه .. قتامة عيونه .. انفسه الحاد فحال السيف .. تفاحة ادم هبطات ونزلات .. ملي بعد .. اخذ طرف مني معه .. 
تلاشى طيفه من امامي .. وبقا غير طيف الدموع كيتراكمو فوق عيوني .. 

الوداع هو اللحظة لي كنكرهها .. كنهرب من جحيم.. الواليدين لجحيم اكبر .. ودعاتني ماما ب البكا .. وبابا بنفسه دار واجبه واخا غير قدام الناس .. 
سندت راسي على زجاج السيارة .. كتنفس بعنف .. حاولت ما امكن مانبكيش .. ومعظم كلامنا كان عادي .. اصلا مادويناش تقريبا من غير جمل بسيطة ..

خوف رهيب تملكني .. فاش فتح باب شقته من بعد ما وصلنا .. حسيت ب الباب د برا تسد .. لدرجة تفزعت من بلاصتي .. 
بلال:~ (حط يديه على كتفي ) مالكي مفزوعة ؟ 
شفت فيه بتردد كنقلب وجهي فأنحاء الشقة .. والو ماقدرت نركز ف والو من غير بياض الجدران .. 
انا:~ اا .. ه.. انا .. والو .. 
حيد ربطة عنقه ببطئ ويديه على خصري .. تعمد يقرب لآذني ويهدر .. 
بلال:~ ماغاديش نفتارسك.. كنت باغي نوريك كل قنت هنا ..( تنفس ببطئ) ولكن دابا عندنا ما هو اهم .. 
حاولت نطلع النفس من صدري .. شكيت واش غانموت قبل مايكتشف حقيقتي .. حتى قرب الحال وتزيرت عاد ندمت علاش ماقلتهاش ليه من قبل .. 
انا:~(شفت فيه بترجي) عفاك خليها ماشي دابا ..
عنقني لعنده .. بدفئ .. الدقائق كيمرو ساعات قدام عيوني .. 
بلال:~ غايكون كلشي مزيان .. متافقين .. 
انا:~ واخا ...
حط جبهته على جبهتي وتنفسه كيوصل حتى لعندي 
بلال:~(بهمس) اليوم غاناكلك .. وقاع داك السنين لي عذبتيني غانفديهم فيك لحظة ب لحظة .. (عض على شفتيه) ماكاين حتى عذر اليوم .. تسنيتك بزاف .. 
صافي مابقا عندي حتى حل .. والو .. عيت مانتهرب و ها انا طحت بيدي مرفوعين فوق راسي .. 
انا:~(همست باعتذار) خليني شوية بوحدي .. 
بلال:~ غانلحق عليك .. 
اشار لي للبيت .. حتى دخلت .. الدموع لي كبحتهم زادو كيطيحو من عيني فحال الشوك .. 
جلست على الناموسية .. واش نبكي ولا نقتل راسي .. ولا ننتاحر من البالكون .. ماكاين حتى حل .. يارييتني يمكن درت غير شي بكرة اصطناعية .. وصلت لنقطة النهاية .. الرعب زحف على عمودي الفقري .. الادرينالين تدفق بكثرة .. نار صلبة داخل قبصتي الهوائية حتى ماقدرتش نطلع النفس مازال .. 
ربع ساعة .. جلسة غير كنبني ونزير على قلبي .. شفته دخل بخطواته لي زلزلوني هاد المرة كثر من اي مرة اخرى .. وهاد الليلة قررت قرار لا رجعة فيه .. غانعتارف ليه ولو يكلفني الامر حياتي كلها .. خصه يعرف كلشي .. 

ماعرفتش امتا لحق يدوش .. ولا يغير ثيابه .. يمكن انا لي الوقت داز عندي طاير .. دفع الباب .. بجلابة د الصلاة .. صافي قلبي وقف .. حطيت يدي على قلبي كنحاول نخلي انفاسي ماتوقفش بالخوف.. 
بلال:~ساليتي .. 
شاف فيا .. مازال بنفس فستان الزفاف الابيض .. لي دنسته بخداعي.. غير شفته زدت فوثيرة البكا .. كنعض على فمي بالجهد وروحي غاتزهق من بلاصتها ..
حط يديه على خصري ووقفني كيمسح دموعي .. 
بلال:~ ماغاديش ناكلك .. واش خايفة مني لهاد الدرجة ؟ 
نظرة الدفئ لي فعينيه كتقتلني بشوية بشوية .. هزيت راسي بنفي .. واخا نموت ماغانفلتش هاد الفرصة باش نعتارف ليه .. زفرت طويلا وحاولت نوقف شهقاتي ..
انا:~ ماخايفاش منك .. متأكدة ماتقدرش تآذيني شنو مادرت ..
حاولت ثم حاولت نلعب على عاطفته .. ماشي خداعا مني .. ولكن الامر لا يحتمل .. نهار ضيعت راسي ماكنتش كنفكر لهاد اللحظة .. ودابا ها انا واقفة حيث لا ينفع الندم .. 
بلال:~ (حط شفتيه على كتفي والما مازال كيتقطر من شعره) عارفاني ماغانآذيكش .. اذا علاش الدموع .. (عنقني من ظهري وثغره كيفترس بشرة كتفي المرمري) اذا كنتي خايفة لهاد الدرجة غانوقف .. واخا غانتعذب بشوقي ليك .. غانخليك ترتاحي .. 
كيسمح دموعي بيديه الخشنتين .. كلما سقطات دمعة كيتلقفها بيديه.. خرج الصوت من حلقي متشجنج .. 
انا:~ بغيت كلشي يسالي .. (درت يدي على وجهي) بغيتك تعرف باش كلشي يسالي .. 
شاف فيا باستفهام فحال اذا مازال مامستوعبش شنو كنقوله .. عرفته انه فهم يمكن ليلة الدخلة لي شغلاني .. وانني خايفة من آلم هاد النهار .. لكن كنت خايفة نكسره ونكسر راسي معه ببساطة .. 
بلال:~(حرك راسه) لبسي باش نصليو .. 

امتثلت لأموامر .. صليت ورائه .. لعل وعسى هاد اللحظات لي دوزناهم من قبل يشفعوني عنده .. هاديك العاطفة كلها لي كيحملها فقلبه تقدر تغفر لي خطيئتي .. 
صلينا ودار يديه على راسي كيقرا الدعاء .. بينما انا فقط كنت كنحققه فعيونه .. كنرتب الجمل فحلقي باش ننطق حقيقتي .. شنو غانسبق وشنو غانوخر .. غايقتلني مافيهاش الشك .. 
من بعد ماوقفت حيدلي الحجاب من على شعري .. ويديه غاصو لداخل .. 
بلال:~ ماشاء الله .. (قبل جبيني ) نتي فتنة .. 
انا:~ (وقفته) بغيت .. انا بغ .. 
بلال:~ شنو بغيتي ؟(تلكم بدفئ واخا فوق خاطره) نوقف هادشي .. باغيا تقتليني هاد الليلة
حركت راسي بنفي .. عنقني عنده بشوية .. ويديه كيغوصو فشعري من الراس حتى للاسفل .. من بعد هبط يديه على كتفي حتى جاتني القشعريرة .. مرر انفه فشعري .. تكلم جنب اذني .. 
بلال:~ من ديما كنتي بعيدة .. بعيدة عليااا بزااف .. عرفتي مقدار مشاعري ليك .. ماقادرش يتحمله قلبي .. كتعذبنيي ونتي بعيدة .. كتقتليني ونتي قريبة .. هزيتك فاش تولدتي .. مشطت لك شعرك فاش كان عندك عام .. (سكت وطلق نفس طويل) ريحة الياسمين لصقات فنيفي من داك الوقت.. هزيتك فوق كتافي فاش كانت عندك ثلث سنين .. كرهت مشاعري ليك فاش وليتي مراهقة .. كرهتك حيت غاتعذبنيي حياتي كلها .. بقدر ما كنت باغي نبعدك عليا .. بقدر ما حلمت بك مراتي وحلالي .. 
زدت فوصيرة البكا بلا صوت .. وراسي على صدره .. كيصعب عليا الامر لدرجة الموت .. حركت راسي كنمرغه فصدره .. كنبكي .. ونزيد نتعذب بتأنيب الضمير .. كيفاش غاننطقها .. الموت هزاتني من رجلي .. 
انا:~ماتقولش هكا .. خليني انا لي نهدر ..
قاطعني ماخلانيش نتنفس ولا نفكر نقول ليه .. رجع دار يديه فشعري .. وجذب وجهي لعنده .. 
بلال:~ سواد عيونك .. ملمس بشرتك .. ريحة شعرك .. مذاقك شفاهك ..(تنفس طويلا) بغيت هاد الليلة كلشي يولي ديالي .. كيف كنتي من صغرك ديالي .. حتى دابا غاتعيشي وتموتي ديالي .. 
انفاسي تسارعو .. طلعت النفس وهدرت بزز .. 
انا:~ سمح ليا .. 
بلال:~ شنو هو مقدار الشيء لي يخليك تعتاذري بزااف ..
انا:~(اسقطت دمعة حارة) بلال .. 
جبهته دارها على جبهتي .. وتكلم بهدوء .. 
بلال:~ مانقدرش نآذيك يا قاسية القلب .. مهما آذيتيني قبل بجفائك .. برفضك لهاد الزواج .. ما نقدرش نآذيك ونآذي راسي معك .. 
زاد جذبني لعنده حتى ولاو عينيه فعيني .. جمرهم الملتهب كيحرقني .. ويزلزل كياني .. شفتيه قراب لثغري .. وهمس ببطئ .. 
بلال:~ حُبُكِ يا عميقةَ العينين..
تطرفٌ، تصوفٌ، عبادة..
حُبُكِ مثلُ الموتِ والولادة ..
صعبٌ بأن يُعادَ مرتين ..
زاد اقترب مني اسقط ثغره على ثغري.. بحرارة .. بتملك .. بجنون .. كنرتاشف من كأس جنونه .. فالاول ماتحركتش .. هو لي كان مكلف بكلشي ..
دفعني على اقرب حيط .. يديه كيتملكوني .. 
بلال:~ قاسية القلب يا عميقة العينين .. 
انا:~(غضمت عيني من اقلتني شوية) خ .. خ ..خليني نهدر .. 
ولكن كان مصر يعذبني .. كيحيد حمالات الفستان .. من بعد مابقا هو بنفسه غير بتيشرط وشورط .. قدرت نرد البال بصعوبة فدوامة هاد الوقف الصعب .. شفتيه فحال النار فالهشيم فين ماتحطو كيحرقني.. نار سائلة جرات فدمي .. 
هزني حتحيطت على الفراش .. وعيونه كيفترسوني .. بقيت متشبتة بقميصه حتى حيدو .. 
بلال:~ (مرر انفاسه الحارة على عنقي وخلا شفتيه مدة طويلة) شنو ..(قدر يرد عليا بصعوبة) ياكما ندمانة ..(يديه حطها على وجنتي) ماغانقدرش نوقف دابا يا رائحة الياسمين .. نساي كلشي .. 
شنو غاننسى .. اذا ندمت من قبل داكشي لي حسيت به فهاد الموقف .. اطنان الندم .. تراكمو ولاو جبال من الوجع الصامت .. 
لأخير مرة .. اخر دمعة طاحت من عيني حارة .. غصة مرة طلعات ونزلات فصدري .. حرارة جسده حسيتها فخال شي خنجر تذبحت به بدون رحمة .. وجسدي ولا بارد .. كننتفض بعنف .. 
تجرأت وجبدته لعندي .. حتى بادلته قبلته .. الجموحة .. بجنون اكبر .. يدي كتشبتو بعنقه فحال شي غريق لقا طوق النجاة .. يمكن عمري مازال غانعيش مع مشاعره .. ونظرة عيونه غاتطفى بانكسار .. وانا لي غانطفيها بيدي .. 
رتبت الحروف فجوفي.. حرف تلوا الاخر .. وجمعت شجاعتي الكافية باش نقول له كلشي .. وهمست باعتذار .. 
انا:~ سمح ليااا بزاااااف .. انا ... ماشي بنت ..

فالاول ظنيته ماسمعنيش ملي قلت جملتي .. شكيت واش الحروف ماخرجوش من جوفي اصلا .. يمكن غير تهيأ لي انني اعترفت له .. 
تصلب جسده على جسدي كان الجواب .. درت يدي على الناموسية مزيرة على اللحاف لي تحت مني .. مغمضة عيني بقوة باش مانزيدش نتراجع اكثر وننفي شنو قلته .. داك شوية د الكرامة الجريحة لي بقات عندي .. خلاتني نعتارف فأخير لحظة .. ماشي حتى يكتاشف الامر بنفسه .. 
انا:~(عاودت تكلمت باعتذار) س.. سمح .. ليا .. 
غير فتحت عيني لقيته تهز عليا بثقله كيترعد .. عينيه رماد محترق .. جمر ملتهب .. حمرين بلون الدم .. كيقطر منهم الوجع .. جسده كينتفض بوحده فحال اذا شرب السم .. حط يديه على فكري وزير حتى تأوهت بآلم .. تمتم بعدم تصديق .. 
بلال:~ شهاااااد الزززززبل كتقوووولي .. 
قالها بعنف .. ويديه اصابعه على وشك يديخلو ففكي من كثرة مامزير عليه..
هادشي غير مازال مأكدت كلامي .. النيران شاعلة .. متيقضة فبحره الاسود .. زدت تنفست بشجاعة .. وردييت عليه بوجع .. 
انا:~ما .. ما.. ماكنكذبش عليك .. 
واش بان لي مصدوم ؟ لي شي حاجة كثر من هكاك .. فحال اذا حطيتي العافية وحرقتيه بها .. قرب مني اكثر .. انفاسه المتشبعة بغضبه اصبحو فوق وجهي .. وصابعه تغرزات فشعري بعنف .. 
بلال:~ جوووووري .. غااااااااانقتلك .. عاااارف هادشي لي كتقوليه غيرررررر كذوووب ( همس بآلم) بااش مايكملش هادشي .. غيررر كتلفقي ف التهم لراسك .. مااااباااغيش تسمع هااااد الزبل كله من فمك ..(حرك راشي بالجهد) مااااباااغيش .. 
الدموع هما الوسلية الوحيدة لي لقيت باش نجاوبه .. فين ماجيت نهدر كنلقا انفاسي سبقوني .. وعبرو على مأساتي .. 
جبد يد فستان الزفاف بعنف حتى تقطع شوية .. تنفسه باقي ثائرة فووق صفحة وجهي .. 
بلال:~ كتكذبيييي .. غاانكشششف كذوبك بييييدي .. نتي باااااقي نفس الوردة النقية .. 
باقي عدم الصدق مرسوم فعينيه .. كيجلدني بداك الثقة كلها .. عضيت على شفتاي بآلم ملي بغا ينتهكني من جديد .. بغضب وقسوة .. لكن غوووت بالجهد وانفاسي متلاحقين .. فاش بغا يزيد يحيد الفستان .. 
انا:~ماااااكنكذبش .. اناااا ماكنكذبش .. انا ماشي بنت .. انااا ماشي كيف كتخيل .. 
الصفعة لي جات ورا هاد الجملة غيباتني .. صفعني بقسوة .. حتى حسي بخدي تحفر من قوة الضربة ..
بلال:~ شكوون هوو .. كيفااااش وقع هادشي .. (زاد كيشوف فيا بعدم تصديق) دااباا عاااد .. 
جذبني بعنف حتى وقفت واخا كنت كنحس برجلي كيطيحو بيا فالارض .. غير يديه لي غاصت فشعري وزير على خصلاته .. جبد راسي .. وقسوة كلامه كتصفعني .. تكلم بغضب .. 
بلال:~واش اغتصبك شي حد ؟؟
ماقدرتش نجاوبه من غير انين صامت خرج بين ثغري .. 
بلال:~ هدرررررري ... هدررري .. (هزني بعنف من شعري ) جاوووبي .. ولا بررربي حتى نقتلك بيدي ..
لأخير مرة كان كيبحث بين اروقة عيني على الجواب .. عينيه كيقلبو بلهفة .. اذا كان اغتصاب ربما يقدر يتحمله من بعد .. ولكن شي حاجة منعاتني نكذب .. غمضت عيني على دمعة حارة ..ساخنة هبطات كتحفر طريقها من مقلتاي.. طفيت داك اللهفة كلها لي فيعينه .. بحركة وحدة ..
حركت راسي بنفي .. 
انا:~ لا .. 
خيبة .. انكسار .. عدم التصديق .. هادشي كله قريته ف سوداوتيه .. تراجع بعنف للواء .. باقي مامصدقش .. 
بلال:~ (حط يديه على كتفي كيهزني بعنف ) ثبتي ليااا لأخير مرة انك كتكذبي .. وغانصدق كلامك .. 
درت يدي على قلبي لي غايخرج من بلاصته .. ضهري هبطات معه عرق باردة .. صافي كلشي انتهى .. 
انا:~ سمح ليا .. 

صفعة وراء صفعة .. ردة فعله كانت عنيفة .. وعنيفة بزاف .. مابقيتش حاسة ف اشمن بلاصة بالضبط كيضربني .. وفين كنتألم واش وجهي ولا عيني ولا راسي .. ولا جسدي .. حتى شعري مسلمسش من جنونه .. كنت فقط حاسة بالآلم طالع من قلبي .. اذني كيسمعو شتائمه .. كيشتم ببذائة .. اي نوع من الكلام الطايح خرجه من جوفه .. داك الاحترام كله ذاب فلحظة وحدة .. 
انكسرت انكسار عظيم حتى مابقا لي فين نزيد .. 
بلال:~(زاد زير على شعري )غااااانقتلك .. غاااانقتلللللك .. رخيييييصة .. طلعتي رخييصة .. ماتستهليش .. 
جلس جنبي فالارض .. يديه على راسه .. باقي مامصدقش .. كنت كنلفض انفاسي الاخيرة .. جسمي كله كدمات .. مابقيتش كنشوف وجهه من كثرة الدموع والآلم لي كينبض فعروقي ويزحف على جسدي ..
بلال:~( قرب مني ووجهه فوق وجهي ماقادرش حتى يهدر ) علاااش بعتي رااااسك رخيييصة علااااش ؟؟ علااش طلعتي رخيصة ابنت الخال .. 
انا:~ ا .. ا .. 
بغيت غير نهدر ولكن حسيت بيده كتمو فمي ..كيزير علييه .. وعلى انفي .. حتى خرجو عيوني من بلاصتهم .. ماقادراش نتنفس .. 
بلال:~ ماااتستاهليش نضيع عليك عمري .. ماااباغيييش نسمع حس صوووتك .. مااباغي نعرف علييك والو .. غاتهزززززي تمشي فحاااالك .. (حيد يديه من على وجهي وحطهم على راسي .. شعري كلما زير عليه كنحس به غايقلعو من جذوره) والا غااانقتلك هاد المرررررررة .. 
زحفت على يدي ورجلي .. مابغيتش نتوسله مازال .. لكن رجلي فنهاية المطاف خذلوني .. 
يديه فقط لي تحطات على جسدي لي كينتفض .. كل ماداره هو ساعدني لأخير مرة .. هزني بقسوة ودفعني لبرا .. حتى سمعته شد باب الشقة .. طردني من داخلها بعنف .. كيفما طردني من حياته هاد المرة ... 

وقفت قدام الباب لدقائق طويلة كنحدق ف الفراغ .. حاملة ذنبي وخيبتي .. كنتمشى ونتعثر .. الدروج عالين .. وداك الفستان الابيض كيعكلني وعاد الدموع لي كيغشيو على الرؤية .. 
هبطو وتسرسبو سخان .. فحال الجمر .. كيحرقو خدي .. ها فين وصلاتني لحظة الطيش لي عشتها .. لحظة ثقة كانت كفيلة باش تزعزع سنوات من عمري ..
جلست على اخر درجة .. ماقادراش حتى نتمشى .. معدتي كتلوا بالآلم .. عندمن غانعطي راسي .. لا صحابات لا واليدين حتى واحد .. هو الوحيد لي كان كيوقف معايا ها هو عطاني بظهره ملي طعنته .. حطيت راسي مسنداه على الحيط وماء عيني كيزيد يتدفق كلما حاولت نمنعه .. ولكن ماقدرتش .. مااااقدرتش .. الغصة لي فحلقي اكبر من انني نوقفها ولا نحاول نمنع مقلتاي يسكبو محتوايتهم .. 
وقت طويل .. وانا على نفس الحال .. قريب الفجر وماعندي فين نمشي وعاد بهاد الحالة .. فحال شي جنية هاربة من شي عرس.. بقيت جالسة بدون حراك وجسدي كيتهز مع الهوا لي داخل من برا .. بدا العيا كينال مني .. وراشي كيتحط على الحيط .. عيني كيتغمضو بآلم .. كل جزء من جسمي كيضرني ..

صوت بارد .. حروفه جافة .. ذبذبات الغضب اخترقو جسمي .. فحال شي سيف نصله حاد .. سمعت صوته من ورائي هبط فالدروج .. جسده من ورائي .. شاعل .. بركان انفجاري .. لدرجة قلت كنخيل يمكن .. 
بلال:~ باقا هنا ؟؟ 
قالها باستهزاء .. فحال اذا كان متوقع ماغانلقى عندمن نعطي راسي ..
وقفت مجفلة .. كان وقف امامي بسرعة .. عينيه مثبتين على وجهي كيشوف فيا ببرود .. قاع داك الغضب د قبيلة فحال اذا تلاشى فمرة وحدة .. عرفته غير كيحاول يخبيه تحت قناع البرود المزيف .. غطيت يدي وجاوبته برعب .. 
انا:~ اا .. ا .. انا .. غادية فحالي .. 
غير تحركت بصعوبة .. ماقادراش حتى نحرك راجلي .. يديه سبقوني وزيرو على معصمي بشدة .. القسوة باقي كتنبض بين عروقه .. حسيت بوجهي شحب لونه .. وشفايفي ولا جافين .. ماقدرتش مازال نشوف فيه .. ندمت لي ماهربتش من هنا للابد .. الرعب انتشار بين ضلوعي ملي سمعت نبرة صوته الغاضبة 
بلال:~ باقي ماسليناش كلشي ..(كمل بفحيح) بهاد السهولة بغيتي تمشي فحالك ؟ بلا ماتعاقبي على كذووبك وخداعك .. 
هزيت فيه عيني مغرغرين .. ماعندي باش نبرر .. عض على فمه بقسوة .. قلبت وجهي شوية وجاوبته باختناق ..
انا:~ انا غانمشي .. سمح ليا .. 
بلال:~(زاد زير على يدي) شنوو زعما كتمثلي علياا الكرامة والكبرياء ؟ زعما غانتخدع بهاد السهولة .. 
كنت كنعتذر للمرة الالف .. كنعتاذر لنبرة الوجع فصوته .. كنعتاذر لتعبير الالم فعيونه .. كنعتاذر لراسي على تحملها ما لاطاقة لها به .. 

يديه القاسية مرة اخرى تحطات على وجنتي بقسوة .. الشيء لي خلاني نتراجع للوراء بعنف .. يمكن هادي الصفعة العاشرة د هاد النهار .. 
تعثرت خطواتي لكن لقيت ييديه سابقاني .. شدني من شعري حتى ردني لعنده .. ماقدرت لا نغوت ولا والو عاد حنا لتحت فالعمارة كلشي غايسيق اخباري .. 
انا:~(شهقت بآلم) بعدد مني ..
بلال:~ بااااقي حسااب طويل بيناتنا .. باقي ماغانبعد منك واخا تمشي حتى لأخيررر الدنيا .. غاتخصلي ذنبك كله .. 
دار يديه على كرشي .. حتى زيرني لعنده .. رفعني من الارض ورجع طالع بيا لشقته .. 
انا:~ (همست بصعوبة)طلق مني .. 
انفاسه فحال السم ضربات فعنقي .. سيف من نار داز على رقبتي بدون رحمة .. باقي متعجبة .. وعيني كيتوسعو على مصرعهم .. كل جزء من جسدي كيحرقني .. دفعني لداخل وشد باب الشقة من جديد .. 
انا:~(همست بترجي ماقادراش حتى نهدر) صافي خليني نمشي فحالي .. خليني نمشي ..
بلال:~(همس باستهزاء ) نخلييك تمشي فحالك ؟ (زاد ضحك بقسوة) كتحلمي بزاااف ..
مرة اخرى ذاب داك الجمود لي على وجهه .. حتى رجعات نفس النظرة النارية .. بحره الاسود ملون بلون الدم .. جمرة مشتعلة .. ونار مستعيرة وسط بؤبؤه .. 
حط يديه على عنقي .. حتى طلعو بشوية .. لفكي .. والغضب اكتسى على نبرته .. 
بلال:~ باااقي مااعارفش علاش ماقادرش نغسل عاااارك بيدي .. 
زاد دفعني بالجهد حتى طحت على واحد الكانابي .. ويديه زيرو على فكي.. بلاصة واحد الكدمة .. زدت شهقت بالجهد .. ووجهي كله مضروب ..
انا:~(تأوهت بألم)كضررررنيي ..
بلال:~(زاد كيزير اكثر) ضررريتك يااااك .. ضرررريتك .. ضربيه فآلااااااف المرات وقارنيه مع داكشي لي درتيه .. وشووفي نتي واااااش ضريتيني ولا لااااا .. 
انا:~صاافي عييييت .. عيييت .. 
شدني من كتفي كيمخضني فحال شي حد حمق .. وصل لنقطة النهاية .. ولكن باقي نفس الآلم مرسوم فعينيه .. باقي نفس اللوم كيقتلني به ببطئ .. واخا كيغطيه بقسوته .. تنفست باختناق .. ملي سمعت صوته انساب داخل جسدي فحال الرعد .. وزلزلني من مكااني .. 
بلال:~ رخيييصة ابببنت الخااال .. وغاانربييييك بيدي .. غانعااااود ليك التربية من جديد .. حتى تعاااودي ديييير عقلك(غوت فوجهي ويديه باقي كيهزوني)غانسحب دمك قطرة قطرة .. ودييييك الساااعة سيري فحااااااالك .. 
مسح على وجهه بعنف .. وكتلتي عينيه الناريتين كيتلونو ببرود .. 
بلال:~ و دابا غاتبقاي هناا حتى تموتي شوية ب شوية .. 
مافقت غير على الباب لي تشد بعنف وخروج طيفه من الشقة بأكمالها .. 

ملي ردخ الباب وخرج ماعرفتش شحال فاتت من ساعة ولا شحال من يوم .. الضو كيدخل مع السرجم ويعاود يختفي .. كل مافتحت عيني هادشي لي كنشوفه .. مرة الجدران فاللون الابيض مرة كيتحولو للسواد .. يمكن غير عييني لي عليهم الضبابة .. الالم الجسدي كنت قادرة نتحمله .. اما الالم النفسي زاد قضى على اخير رمق بقى ليا .. كنت كنضن هاد الضربة غاتقويني ولكن زادت قتلاتني وذبحاتني بدون رحمة ..

قطرات د الما هبطو باردين على وجهي .. شهقت بالخلعة .. مع انه الشهقة ماطلعاتش من جوفي .. غير ردة فعل جافة .. كل ماشميته هو ريحته باقي لاصقة فالبيت لي انا فيه .. يمكن كنتخيل وجود طيفه .. رجع باش يكمل على مابقا.. انا بنفسي مابقاش عندي علاش غانقام ولا علاش غانمنعه 

همست بصعوبة بين انفاسي لي كيطلعو ثقال ..
انا:~ بغيت الماا .. 
يديه عاوتاتي تمدات .. حتى شعرت بالما هبط مع حلقي .. هاد المرة كيردو ريقي لي نشف .. طلعات تنهيدة حارة من اعماقي ملي سمعت صوته المستهزئ كيتعمد يذبحني به بدون رحمة ..
بلال:~ شنو زعما باغيا تموووتي .. ولا شي محاولة من انتحاراتك الفاشلين ..
رفعت عيني بصعوبة .. وانا باقي ممددة على الارض .. بغيت غير شوية د القوة لي ماعنديش باش نقدر نوض .. وجهه لوحة جليدية مافيها حتى تعبير .. زاد زير على وجهي لي مابقيتش كنحس به واش كيضرني ولا لا ..
بلال:~(تكلم من تحت سنانه) زعما كتمثلي مع راسك .. ندمانة .. 
انا:~(جاوبته بصعوبة) ا.. ا .. انا .. (زدت طلعت النفس) ندمانة .. 
بلال:~(شد فشعري وعاود طلقو ببرود) عييت من كذوبك .. داك الثقة كلها لي عطيتك هرستيها بيديك .. ماتكذبيش حيت حصلتي .. 
انا:~ .ا . ما .. انا ماكنكذبش .. 
حسيت بجسدي تهز من الارض .. ماكانت عندي لا القدرة باش نبرر له .. ولا القوة باش نجابه ضخامة جسده .. ترخيت .. حتى لقيت راسي فالحمام .. كيكب الما على وجهي .. 
يديه كيحاولو يفكو شعري ولا ماعرفت شنو .. كنشوف غير الما كيهبط مخلط بالدم من وجهي وراسي .. حتى الالم ماكايينش .. 
حاولت نتهز باش يبعد عليا ومايحيدش لي الفستان لي لابسة .. واخا يديه ماقربوش لتحت عنقي بمرة ..
بلال:~( عاود ثبتني) ماشي مسوق باش نقيس فيك ..(سكت وكمل مغزف) بقدر شوقي ليك شحال هادي بقدر ما دابا كنشمئز منك كاملة .. وماباغيش حتى نشوف فيك .. 
كلامه بمثابة ضربة اخرى تلقيتها داخلي خلات معدتي كتلوا بالآلم .. تكلمت بترجي ..
انا:~ خ .. خليني نمشي فحالي .. 
غير قلت هاد الكلمة .. يديه لي كانت كتحاول تفك شعري زادت زيرات عليه .. 
بلال:~ فيين غاتمشي ؟؟فييين ؟(غمض عينيه وعاود فتجخم بشراسة) باش تبيعي رااسك مرة اخرى بالرخيص .. وتزيدي تكملي على شنو بقا ..
لقيت لساني بدون اذني نطق بهمس مع انفاسي .. وصوتي مخنوق ..
انا:~ انا ماشي رخيصة .. 
صفحة وجهه رجعات فاللون الاسود القاتم.. قسوة عينيه كتجلدني بسياط الندم .. جزء مني كان كارهه وكاره هاد الضعف لي خضعت له فالاخير .. داك شوية د الكبرياء واالكرامة لي بقاو لي كيدهسهم بيديه ويردهم فتات .. بلا مانحاولل نوقفه .. 
بلال:~ هادشي كله وماكتسميش راسك رخيصة ابنت الخال .. نتي كفس من هادشي كله .. ( شد على قلبه كيتكلم بوجع) شحال خديتي باش تفرطي فراسك لهاد الدرجة ؟ باش ماتحافضيش على راسك لواحد يصونك .. 
كلامه استفزني .. بقدر ما انا محطمة كيكمل عليا بسيف كلامه .. زرعت الثقة وحصدت الوجع فالاخير .. برودية الما لي كيدوز علة وجهي وشعري .. مع برود وجهه جمدوليا الدم فالعروق .. تكلمت بلا تعبيررر
انا:~ انااااا ندمااانة .. نتا مااعارفش العافية باش حاسة كلها .. اناا غلطت .. ونتااا ماعندكش الحق تحاااسبني .. انااااا كنكرهك وكنكره راسي وكنكره هاد الدنيا لي حطاتني فطرييقك .. 
كيحاول يخليني نرتشف من كأس قسوته .. هزني بعصبية .. 
بلال:~ شنووو كيسحاب لك غانقبلك هكا فحال اذا مادرتي والو .. ماغانحاسبكش ؟(زاد باستهزاء) .. فحال اذا ماشي شي حد حط عليك يديه .. ( يديه عاودو تحطو على فكي كيتعمد يضغط ف بلاصة الضربات) نهار قلت عليك رخيصة صدقت فيها حيت نتي بصح رخيصة وبزااااف .. إما تكوني ديالي كلك إما حتى حاجة .. ماكنقبلش بأنصاف الحلول وأنصاف الاشياء .. 
حطيت يدي على قلبي كنتنفس بصعوبة .. من بعد ماطلق مني بعنف .. 
انا:~( وقفته قبل مايتحرك) انا ندمانة .. (زاد ارتجف صوتي واختنق ) انا ندمااانة .. مااااكنتش بغيييت نديررر هكا .. 
بلال:~(ضرب فباب الحمام برجليه) صااااافي سكتييييي .. ماااااابغيييتش نسمع صووووتك وبا تنفسسسك ..
حتى قلت شفق لحالتي .. ولكن ملامحه رجعو ممحين .. رجع جلس .. كيمسح فوجهي بواحد الفوطة .. مرة بقسوة نرة كيعاود يلين يديه.. ويدير فالبرومادة والفاصمة .. فين جرح وجهي غير بيديه .. بكن واحد النوع د الجروح كانو فروحي صعيب يتشافاو وصعيب بزاف .. عجبا هادشب كله وحتى قطرة من الدموع ماهبطات من عيني .. 
تأوهت بآلم .. ملي ضغط على راسي بقسوة .. شاف فيا بطول وغمض عينيه .. كيزفر بضيق ..
بلال:~ بعض الحاجات واخا غاتندمي عليهم .. عمرهم مايمكن يتصلحو .. 
بعدت يديه على وجهي .. صافي مابقاتش عندي القدرة لي نتحمل بها هادشي كله .. لوم نظراته .. عتاب عيونه القاسي .. وكلماته الجارحة .. كتبقى انسان من لحم ودم .. منبوذة فجميع مراحل حياتي .. 
انا:~ علاش كادير هادشي كله .. 
فكه تشنج .. دار يديه فشعره فحال اذا كيحاول يقلعه من جذوره .. تكلم بنبرة متهكمة 
بلال:~ كنحيد هاد الضرابي .. باش المرة الجاية يلقاو الاخرين فين غايجيو .. 
هسيس انفاسه تسمع حتى لعندي .. وجهه جامد .. صوته جاف .. اذا قارنت بلال لي عرفته قبل ايام بداك العاطفة لي فعيونه .. و بلال هذا لي دابا واقف قدامي بهاد الغضب العارم فبحره الاسود .. لا مجال للمقارنة .. حتى حد ماكيشبه للاخر .. 
بلال:~ بلا ما تحاولي تقولي غانخرج من هنا ..(ضغط على حروف صوته) فين ما مشيتي غانلقااااك .. واخا تهربي حتى لأخير الدنيا..

وقفت قدام المراية .. كندوز المشطة فشعري ببطئ .. باقي راسي كيضرني .. فات اسبوع وانا غير فالدار .. الماكلة بزز باش كتدوز مع حلقي غير باش مانطيحش .. اما بلال من داك اليوم .. كيجي يدير لي الدوا بزز مني .. كيرمم الاشياء لي ادماها بيديه ويعاود يخرج بكل برود من بعد مايلوح شي كلمة يسممني بها.. حتى الدار مابات فيها غير مرتين هو فغرفته وانا فغرفة اخرى .. 
مضطرة نبقى معه .. كنتشاركو نفس الهوا والوجع نفسه .. 
تأملت وجهي بشحوب .. الضرابي كلهم اختفاو .. بقات غير شوية د الزروقة جنب عيني .. وفجبهتي .. 
الباب د البيت تفتح بلا مايتسد .. سمعت انفاسه من عندي .. بقا ساكت مطولا هاز تليفونه فيديه وتكلم ..
بلال:~ ماماك بغات تهضر معك ..
قلبت وجهي وشفت فيه .. "بدون تعبير" هذا هو التعبير لي فوجهه .. ماعرفته واش مازال مصمم يعذبني .. ولا عقله تراجع على هاد القرار .. 
انا:~ مابغيتش نهضر معها .. 
قرب مني فحال شي نمر متحفز .. غير اصابع يديه لي شفتهم تغرزو فكتفي بعنف .. 
بلال:~ بلا ماتبقاااي تسطاي عليااا .. ملي غانقووول الكلام يعني غاتسمعيه .. 
عضيت على فمي بارتجاف من صوته .. خلا الرعب ينتاشر فضلوعي وانا كنشوفه نفس الجلاد .. كيجلدني بكلماته .. 
انا:~ ماااتفرضش عليا شي حااااجة مابغيتهاش .. ماااشي دابا عاد غايبينو ليا اهتمامهم ولا كنعني لهم شي حاجة .. ( زدت تنترت من يديه) دابا عاد بغات دير فيها الام لي مزيانة .. 
بلال:~ قصووحية راسك وتهوورك لي دارها ليك .. 
انا:~ ( طلعت النفس بصعوبة) ماتزيدش تكرهني كثر من هكا .. 
بقا ساكت شحال كيحقق فملامح وجهي الباهتين .. دار يديه فجيبه ببرود .. 
بلال:~ عرفتي شنوو لي كفس من هادشي .. حتى الكره ماقادرش نكرهك .. ماقادرش نشفق عليك.. (قرب وزير على يدي) حيت ماكنحس بوالو من جيهتك .. غير الفراغ .. 
تأوهت بآلم .. باقي صابرة .. لعله وعسى يطلقني بمرة .. يدي ولاو كيترعدو .. وعرق بارد تصبب مع ظهري .. جاوبته بشحوب .. 
انا:~ خرج من حياتي .. ولا فضحني قدام كلشي وتهنى ملي انا مجرد حمل ثقيل عليك .. 
بلال:~ قادرة تحملي المسؤولية د كلشي .. وتحلي الامور بسهولة .. 
انا:~( قربت هاد المرة انا اكثر) حيت عارفة با غايقتلني ويهنيني من هادشي كله ..
شاف فيا بذهول .. مامصدقش شنو كيخرج من فمي .. ولكن وصلت لنقطة لا رجوع فيها ايام وانا كنخبي فقبلي حتى وقفت على باب الموت .. بقيت كنصارع انفاسي بالجهد .. مارديت البال غير لوجهه لي تغيرو تعبيراته .. 
بلال:~ شنو زعما بغيتيني نشفق عليك .. ونخرج من حياتك هكا ؟ بلا ماتتعاقبي .. 
انا:~ ( لحت داك المشط من يدي ) انا مااامحتاجاش شفقتك .. مامحتاجة حتى حد فيكم .. عشت تقريبا عشرين سنة بلا بك .. وقادرة نعيش ربعين سنة اخرى بلا بك .. عشرين عام وانا كنتآلم بوحدي ااابلاال بلا ماتكون نتا .. باش ترمم شنو هرسوه فيا .. دابا عاد كتحاسبني .. على خطأ ماقصدتوش .. داباا بلاش ماتزيد تكمل عليااا .. (هزيت يدي باستسلام) عرفتي شنووو انا ندماااانة وندمانة بزاااف حيت غلطت فحق راااسي هو الاول .. شنو بغيتي تقتلني ها اناااا قدامك ديري مابغيتي .. ضربني ولا قتلني قاااع .. خود هاد شوية د النفس لي بقا وحتى الموت ماقبلاتش علياا .. غيرررر ماتزديش علياا بكلامك.. ماتزيدش تجرحني كثر من هكا .. (انفجرت ب البكا) كنترجااك ماتزيدش عليا كثر من هكا .. انااا عييييت .. انااااااا عيييت .. ومامحتاجة حتى حد فييكم .. 
داك الدموع لي قلت نشفو هاد الايام ولاو كيطيحو بلا إرادة مني وجميع داك القوة لي تصنعتها قدام كلامه فالأيام السابقة تسربت مني فحال الزئبق .. 
صفحة وجهه رجعات فشكل .. فحال اذا حس بمقدار شنو قال لي .. ومع ذلك مابغاش يبين غير عينيه لي توسعو بصدمة .. ومحيطه الغامض غمضه بقسوة باش مايلينش امامي .. 
انا:~( جلست فالارض مسندة راسي على داك الكوافوز وعريت على يدي ) ها الضرابي لي قلتي قطعت لحمي (ضغت عليهم اكثر) .. انا ماااشي شمكارة .. شنو ذنبي اذا عمرهم حسو بيا .. (اطبقت على فمي باش مانزيدش نبكي) حتى نتاا فحالهم كتعاقبني على شي حاجة كانو هما السبب فيها .. نتا لي فرضتي عليا راسك من الاول .. (غمضت عيني) ماتزيدش عليا كنرغبك .. بعد مني ولا ماتهضرش معايا .. ماتزيدش تقتلني كثر من هكا .. ملي ماكتحس بوالو من جهتي .. ولا كارهني .. ماتقتلينيش .. ماتهرسش داك شوية د الروح لي بقات لي .. 
حسيت بجسده جلس قدامي بتصلب .. فحال اذا ماتوقعش كلامي .. حاط راسه بين يديه .. كيضغط عليه .. جاوبني بوجع..
بلال:~ ونتي علاش قتلتيني هكا ؟ (شاف فيا بعينين حمرين ) علاش درتي هادشب كله ؟ ومافكرتيش من الاول .. 
عاودت طلعت النفس بزز .. كنختبر مدى الآلم فصوته .. انا مجرد انسانة منبوذة .. ماشي مضنوعة من الحديد باش نتحمل هادشي كله .. خرجو الحروف من جوفي على شكل اعتذار .. 
انا:~ انا ماقصدتش نوصل لهادشي . .. 
ماعاودش تكلم معايا .. ناض كليلملم كبريائه المجروح .. غير داك الحشرجة لي فضوته تسمعات على شكل زفير حار خرج من عنده .. 
انا:~(مسحت على وجهي) وصلني لدارنا .. 
كان خارج بلا مايجاوبني .. عرفته ماغايرضخش مرة اخرى .. باقي عنده داك الرغبة الوحشية فأنه يسحب روحي مني جزء بجزء .. 
انا:~ بغيت نجيب البوليكوبات ديالي من تما .. 
غانرجع هنا .. لنفس الغرفة ونفس البرود عاوتاني .. فحال اذا كنشوف مصير ماما كيتعاود معايا من جديد .. لكن انا مازال مصرة نرجع ندوز الامتحانات واخا ماحافظة والو .. على الاقل نتلهى فهمهم هاد الايام ..شاف فيا .. قلت دابا يرد عليا باستهزاء .. باينة وقفوه داك الدموع لي باقي شاقين طريقهم من عيني .. 
بلال:~(همس بدون نفس) كنستناك ..

بعد مدة طويلة .. تقريبا وصلنا لدارنا .. واخا داكشي لي قلت كله على ماما ولكن جزء مني توحشهم مهما دارو ليا وعشت معهم .. كيبقاو واليديا .. تمشيت بشرود باش نقطع الشارع من بعد مانزلت من السيارة.. مافقت غير على شي زمجرة .. وكلشي كيغوت .. كينبهوني بالسيارة لي جات بسرعة .. غمضت عيني بذعر ملي لقيتها .. وصلات باش تدهسني بكل قوة .. 

فتحت فمي بذعر باش نغوت .. لكن الصوت ماوصلش لحلقي .. حسيت غير بارتطام عنيف .. بين السيارة وجسدي .. فحال اذا تهزيت للسما وعاودت هطبت للارض .. وصلت للأعلى وعاودت الجاذبية جذبات جسدي للتراب بكل سهولة .. مجرد بقايا وفتات .. 
لقطات متقطعين .. النفس كتطلع مقطعة من صدري .. حتى الاوكسجين مابقاش كيدخل لقصبتي الهوائية .. 
غمضت عيني وعاودت فتحتهم بعنف.. باش نقدر نشوف اكثر .. غير الضبابة .. كنفرز اشياء قليلة 
.. لون الرماد .. اللون الابيض مرة اللون الاسود .. اوجه متداخلين مع بعضهم .. كيحدقو فيا برعب .. فحال اذا عمرهم شافو بنادم .. 
سائل سخون عرفته الدم .. ولكن ماميزتش من اينا بلاصة من جسدي كيتقطر .. غير كنحس بداتي كتخوا من لداخل من الروح قبل الدم ..
يديه .. يديه فقط لي عرفتهم .. ملي تحطو على جسدي كيهزو .. برعب .. دابا عاد داك اللوم كامل ظهر فعيونه .. فحال اذا ندمان على شنو قال ليا فالايام لي فاتو .. ولكن كان فات الفوت وفاات بزااف .. انا مابقا لي غير بضع دقائق .. ثواني وينتهي كلشي .. 
بلال:~(حط يديه على راسي برعب) جوووري .. وااااش مزيااانة ؟
بغيت نهضر مرة اخرى نجاوبه ولكن والو !!فحال الايام لي فاتو باقي الصوت حاصل فحلقي .. بين جوفي .. ماباغيش يخرج .. 
انا:~ ر..راسي .. 
هاد الشق من جسدي الوحيد لي كنت حاسة به كيضرني .. فحال المطارق كيضربو فيه .. كلما ضرب الضو فعيني كنحس براسي كيتشق لنصفين .. باقي الجروح لي فذاتي ما براو ودابا بهاد الارتطاف لي وقع فحال اذا شعلي فيهم العافية .. 
يديه مرة اخرى حسيتهم كيترعدو على كتفي.. والصوت كيوصل مذبذب لعقلي بزز باش كنستوعبه .. 
بلال:~غانخليك تمشي فحااالك .. غاااانخليييك .. 
عرفته ماباغيش يخليني نغيب ... كيقول فكلام متقطع .. كيدخل ويخرج فالهدرة .. جسدي رجع كيتصبب بالعرق البارد .. والآلم كيزحف على سلسول ظهري .. انا بنفسي كنت كنحاول نطلع النفس ولو بمشقة .. الانفس .. 
انا:~ اا .. اا .. 
بلال:~ مااااااااتغبييش.. الاسعاااف غاتجي دابا .. 
زير على يدي بيديه .. سخان حرقو ململس بشرتي الباردة .. شكيت انا الموت شداتني حيت هي لي كتبرد جسد بنادم .. 
انا:~ اا .. انا .. م ..
والو نفس الشيء بغيت غير نقول انا مازال مابغيتش نموت .. ماشي دابا .. باقي ماكفرت على ذنبي .. كنت كنتمنى ننتهي من هاد الوجود ولكن فهاد اللحظة عرفت مازال بغيت نعييييش .. 
بلال:~علاااااش كل مرة خصكك تقتلي راااااسك .. جووووووري .. (حط يديه على جبيني بشوية وجسده كيتهز بوحده ) جوووووري (بقا كيعاودها برعب وصوته كيزلزل اذني ).. مااباقيش نآذيييييك .. جوووووووري .. ( كيحاول يحل عيني لي حسيتهم كيستدو) ماااااااشي دابا .. جووووري .. شنوووو ضارك ؟ 
جملته الاولى لي بقات لاصقة فعقلي .. يمكن باقي كيسحاب له نتاحرت ولا تعمدت نقتل راسي .. بغيت نبرر له ولو لأخير مرة.. انا ماسخاياش براسي باش نعاود نذنب مرة اخرى ذنب عظيم فحال هذا .. ولكن يديا ثقالو .. وجفوني ولاو بمثابة جبال على عيوني .. والنوم غلبني فنهاية المطاف .. 

وقت طويل .. يمكن ايام.. يمكن شهور .. غير كنفتح عيني ونرجع نغمضهم .. بلا مانقدر نتحرك .. شوية د الضو كيضرب فعيني غير من الحيوط .. فرحانة وانا هكا .. لا طير يطير ولا شيء يسير .. غير الهدوء.. ماكنضطر نسمع تأنيبات .. ولا كلام لي يجرحني .. ويكمل عليا .. راحة عجيبة كتجري بين عروقي .. وتخليني ننعس براحة مانفكر فوالو .. حتى جسمي ماقادراش نحس به ..

لكن هاد المرة شي حاجة كانت مختلفة .. عاد بديت كنحس بالدم كيمشي فعروقي .. كنسمع ذبذبات الهوا من حولي .. الريق لي نشف فحلقي بدا كيطلع شوية بشوية .. واقيلة انا فالمستشفى هادشي لي قدرت نميزه بمشقة الانفس .. 
فتحت عيني مرة بعد مرة .. واخيرا بانت لي الممرضة كتضرب الابرة فالمصل المغذي .. زفرت بالجهد ولكن والو .. حتى عاودت مرة وزوج عاد ردات لي البال .. 
الممرضة:~(ابتسمت فوجهي) على سلامتك .. 
قدر صوتها يوصلني بصعوبة .. فحال اذا راني فشي بئر غارق .. جيت نجاوبها لكن سبقاتني .. 
الممرضة:~ ماتخافيش .. كلشي مزيان ..( قربات مني) ماتحركيش راسك باش مايضركش .. حتى يحيد اثار البنج .. 
شفت فطيفها برعب .. ومعدتي كتلوا من لداخل .. بغيت نتحرك ولكن فحال شي صعقة ضرباتني فأطرافي .. 
انا:~(تأوهت بآلم وتكلمت بصعوبة) بغييت نتقياا .. 
قربات لي واحد الطاس طبي .. حاولت تثبت راسي .. تقريبا كنرد غير الما لي فكرشي ..
الممرضة:~ حاولي ماتحركيش يديك راك مقصحة .. حتى راسك .. 
هزيت عيني بإيماءة بسيطة .. 
انا:~(طلعت النفس بصعوبة عاد قدرت نهضر ) واش ماكاين حد هنا .. 
الممرضة:~ (جمعات الادوات الطبية ديالها) عاد كان هنا راجلك .. (دارت يديها على راسي) واش كضرك شي حاجة .. 
حركت راسي بايجاب غير بإيماءة صغيرة ... كنت كنحس بذاتي كلها ماقادراش نحركها .. يمكن غير من تأثير البنج .. راسي هو الوحيد لي كنت حاسة به كيضرني بزاف .. تكلمت بحشرجة .. 
انا:~ عيطي ليا على شي حد .. 
حركات راسها .. وخرجات .. تنفست ببطئ .. كنحاول نحلل مع راسي شنو وقع اخير الامور لي عقلت عليهم معدودين على رأس الاصابع .. 
جسدي باقي كنحس به بارد .. مجمد .. واطرافي منملين .. اليد اليسرى كلها مضمدة تقريبا .. هزيت كفي الاخرى بصعوبة .. فحال شي جبل مثقل عليها .. كنتحسس بها جسدي .. والمخلفات لي بقاو فيه.. فاصمة فوق عيني .. على راسي .. ومن جنبي د اليمين .. وحدة كبيرة .. غير حطيت يدي عليها حسيت بالحريق فحال السم كينخر فضلوعي .. 
شي حد فتح الباب ودخل منها .. رفعت عيني بترقب .. ولكن ؟
كانت ماما هي لي جات .. سمعت صوتها خرجني من شنو فيه .. 
ماما:~ (باست على راسي كتبكي) خلعيتناا عليييك .. على سلاااامتك .. كيف بقيتي ؟ شنو كيضرك .. واش كلشي مزيان .. 
كانت كتكلم بهسترية .. غمضت عيني بآلم .. انا براسي ماعارفاش واش كنتوجع ولا لا .. دابا باقي ماغايبان عليا والو .. 
انا:~ انا مزيانة ..(ردت النفس لي تقطعات فيا) غير مقصحة .. 
زادو الدموع كيهبطو من عينيها .. واش لهاد الدرجة كان صعيب عليها تبين لي هاد العاطفة قبل من دابا ..ماشي حتى يطيح الفاس على الراس .. 
ماما:~ عاارفااك كتخبي فقلبك ( باست راسي وزاد صوت نشيجها كيقطعني من الداخل ) رااك عاد خارجة عاد العملية .. ست ايام وحنا مشطونين .. علاش ماكترديش البال لراسك .. 
حاولت مانبكيش .. كنستوعب غير هاد الكلام كله لي كيخرج من فمها .. ياريت هاد ست ايام لو تحولت لشي ست شهور ..
تنفست بعمق .. ودرت يدي على يديها واخا حركتها غير بزز ..
انا:~ انا مزيانة .. كلشي مزيان .. كانت مقدرة عليا ..
دارت يديها على راسي مرة اخرى .. كتمسح فدموعها .. 
ماما:~ على سلامتك .. 
انا:~(تكلمت بمرارة) فين بابا ؟ 
ماما:~ رجع للدار باش يجيب لك الحوايج .. حيت كانو مترقبين غاتفيقي اليوم ولا غدا ..

حركت راسي بآلم .. شوية بشوية كنحس ب الوجع كيرجع معايا .. كنستنى بفارغ الصبر تتكلم عليه هو ... ياك الممرضة عاد قالت بصريح العبارة " راجلك عاد كان هنا " ودابا رجع مجرد سراب .. باقي كنتفكر نظراته الاخيرة .. يمكن يكون مشا من هنا للأبد .. كان موقفه معايا غير الواجب .. قال صافي غانخليك تمشي وهاهو كيوفي بوعده.. كينسحب من حياتي فحال اذا عمره دخل لها من اساسه .. خليت صوتي يبان عادي عاد تكلمت ..
انا:~فين بلال .. 
ماما:~ عاد كان هنا .. مشا يمكن عند الطبيب .. 
غمضت عيني .. بترقب .. واخا هكاك باقي واحد الجزء داخلي متلهف يبرر له انني ماحاولتش ننتاحر .. ماشب كيف كيظن هو .. ماعرفتش شنو نوع المشاعر لي كيخليو هاد بلال يتسرب لحياتي فحال الزئبق .. لا انا قادرة نخليه يدخل لخياتي ويقتحم حصوني .. ولا قادرة نهرب منه ومن سياط كلامه .. لكن الكلام لي عاودت قالت خلاني نعيد حساباتي الف مرة .. 
ماما:~ طلع ولد الناس ..(مسحات شوية د الدموع لي كانو باقين عدفعينيها) ماكنتش بغيت تتزوجي به حتى انا .. (زادت تنفسات بعمق) ماكنتش عارفاه غايوقف معك هكا .. وعاد ستر الامر .. مابغا حتى حد يعرف .. حتى نتي مابغاكش تعرفي ..
واش سمعت غلط ولا فهمت غلط .. انفاسي طلعو بين صدري بعنف .. حاجة وحدة لي ضربات فبالي انهم عرفو كلشي .. خصوصا ملي شفت نظرة الامتنان فعيونها .. 
ماما:~(زيرات على يدي) كنتي غاتموتي .. كون مادارش هادشي .. 
شي حاجة باردة كتصبب مع ظهري .. صافي فضحني بهاد السهولة .. لهاد الدرجة انا رخيصة عنده .. هزيت فيها عيني برعب .. كنحاول غير نفهم شنو كاين .. حسيت بنشيج صوتي بفا يطلع .. لكن فلحظة وحدة كان اقتحم الغرفة بأكمالها ..

ماحملتش راسي ملي شفته دخل .. فحال اذا مادار والو .. حاولت نقطع شهقاتي لي كيطلعو .. ووجهي رسمت عليه البرود .. يالاه جات تدوي ماما .. يمكن بغات تعاتبني على خطيئتي .. وتزيد ترعبني ... لكن قاطعتها .. 
انا:~ بغيت ننعس شوية .. راسي كيضرني ..
واخا هكاك ماغمضتش عيني شفت فوجهه بإصرار .. لي كيف العادة ماقدرت نقرا عليه والو .. ابتسم فوجهها .. وشاف فيا مطولا .. فحال اذا كيحاول يحفظ وجهي لأخير مرة .. 
سمعت الباب تحل وعاود تشد .. عرفته غايكون خرج .. ولكن باقي انفاسه فالغرفة كيطبقو عليا .. ويخنقوني من كل اتجاه .. كيدخلو بين جلدي ..وينفذو لداخل .. حتى سمعت صوته من جديد .. كيجري فذاتي فحال السم .. 
بلال:~ عارفك ماشي ناعسة .. 
جلس قريب مني .. استشعرت وجوده .. عنفوانه .. 
مغزفة ومطرطقة .. زدت قطعت فيا النفس .. ماغانهضرش معه .. يوقع لي وقع .. هو لي ما اهتم بوالو .. انا على مشارف الموت وهو باقي كيفكر يفضحني .. مجروحة منه وباقي كيزيد يكمل عليا فحال اذا انا ماشي انسان .. غير مجرد دمية .. كيزيد يعرس فيا لي بقا .. سكت شحاااال .. دقائق طويلة عاد تكلم .. 
بلال:~(بهدوء) جورري .. واش كتضرك شي حاجة ؟ 
زادو اصابعه تحطو على وجهي .. كيقيس شفراني بهدوء .. ويدوز على خدي .. حتى حيديهم .. فتحت عيني فيه فجأة وجاوبته بحشرجة .. 
انا:~ ضارني قلبي .. وضارني كلشي .. صافي قلتيها لهم .. قلتي ليهم كلشي .. هذا كان هو غرضك من الاول .. 
زفير حار خرج من فمه ..غصة هبطات فحلقه .. شاف فيا بداك الشكل لي ماكنحملوش .. داك النظرة لي كنكرهها .. كتمشطني من كل جنب .. 
انا:~ صافي دابا غاتكون رتاحيتي .. 
أصابعه توضعو على فمي .. حتى شدو .. بكل بساطة ماخلانيش نهضر ولا نخرج شي حرف من حلقي .. ضغط عليه بشوية .. 
بلال:~ كتهضري بزاف .. ونتي مريضة .. وانا مافاهمكش شنو كتخربقي .. (زاد بصوت اجش) ماكتعرفيش تسكتي وترتاحي شوية .. 
تحرك بآلم .. عاود ساط شوية د الهوا من نيفه .. مالقيت مانقول من غير داك شوية د الدموع لي تكونو فعيني .. 
انا:~ نتا لي ديما كتفهمني غلط .. علاش ؟ 
ملامحه لي كانو ممحين .. بدا يغلب عليهم لون السواد .. وبحر عيونه بقا ثابت .. هزني بشوية ..
بلال:~ وااا الانسة .. عااارفة رااااسك مريضة وكتزيدي تكملي علييييه .. 
عضيت على فمي بوجع .. كل ثانية كتمر البنج كيطير .. وكيبقى غير الآلم ينخر فضلوعي .. وخا هكاك كنت حاسة به كيطلع من داخلي .. 
انا:~ (قلبت وجهي) سير من هنا صافي دابا تهنيتي مني ..
هز راسه بنفاذ صبر .. وقرب وجهه من وجهي .. حتى لفحوني انفاسه الخشنة .. وملامحه القاسية.. تلكم من تحت سنانه ..
بلال:~ ساااعة .. ماكملاش ساعة باش فقتي .. وكضغطي على راسك .. انا عااارفك مانتحرتيش ..
زاد صوته كيهدا .. دوز كفه على وجنتي .. حتى وصل جنب فكي واستقرو .. 
بلال:~ ماعرفتش شنو كنت كنخرج من فمي .. ( قرب جبهته حتى تحطات على جبهتي) رتاحي .. وبلا ماتقتلي راسك وتقتليني معك .. ماعارفاش هاد ست ايام كيف دازت .. ماتجيش فأخير لحظة وتهدمي كلشي .. 
عيني واقيلة غايدخلو فمحجرهم من كثرة مازيرت عليهم .. باش مانشوفش داك التعبير فوجهه 
انا:~ولكن نتا .. 
شهقت بخفوت .. ملي قاطعني بكلامه .. 
بلال:~انا ماشي شماتة باش نقول شي حاجة على مراااتي وعرضي.. (غمض عينيه وتنفس بصعوبة) غاتكوني فهمتي شي زمر غلط .. ماتصعبيش الامور .. وخليها تمشي كيفما هي .. 
لقيت راسي كنبلع فريقي .. لي تكون فحلقي .. بغيت نبعده عليا بصعوبة .. واخا كنتألم فصمت .. لكنه بقا ثابت .. جبهته على جبهتي كيطلع النفس بزز .. كنشوف غير داك الهوا لي كيخرج من فمه وينتاشر مع الجو ..
انا:~ ولكن ماما قالت قلتي لهم كلشي .. 
بلال:~ خوي راسك من هادشي .. غير اثر النعاس والعيا كيأثر عليك .. وكيخليك تسمعي بالمقلوب .. 
حطيت يدي على جنبي .. ماعرفتش كنحس به ضارني بزااف .. فحال المواس كيتخشاو فيا .. تكلمت بزز .. 
انا:~ راك مثقل عليا براسك .. 
غير قلت كلامي بعد عليا .. فحال اذا عاد فاق ..
بلال:~ واش ضارك عنقك ؟ ( بدا كيقيس فوجهي) .. ضارك جنبك .. غانعيط على الطببية دير ليك شي ابرة تهدن لك الحريق ..
صافي دابا داك شوية د النفس لي بقا كنطلعو بمشقة الانفس .. 
انا:~جنبي ضااارني شوية ..(حاولت ما أمكن نعرف شنو كاين) واش شي حاجة خطيرة وقعات لي باش دارو العملية .. 
حرك راسه بنفي .. وزاد حط يديه على وجهي .. 
بلال:~ غير شوية د الزاج دخل تما .. البلاصة لي طحتي فيها كان فيها الزاج.. ودابا حيديوه .. 

فاتت ست ايام اخرى عاد خرجوني من السبيطار .. واخا ماكنقدرش نتحرك مزيان .. آلم فضيع فجميع انحاء جسمي .. من راسي حتى لرجلي .. الحادثة ماكانتش ساهلة .. ولكن كنت مخنوقة بجو السبيطار وغير النعاس .. 
جات عمتي حتى هي شحال من مرة وراجلها وهند وجميلة يزوروني تما .. بغاو شي حد فيهم يقابلني .. لكن مابغيتش .. حيت عارفة غانرجع لنفس الدار... غانرجعو انا وبلال لنفس البرود .. غاترجع نفس المعاملة القاسية من طرفه.. مابغيتهمش يشهدو على هادشي .. على الاقل تبقى صورتي ما مشوهاش فوجههم .. 

غير وقفنا بسيارته .. امام نفس الشقة .. الذكريات بداو كيطيحو مع بالي وحدة بوحدة .. باقي مانسيتش داك الليلة القاسية وأثرها لا على جسمي ولا على نفسيتي .. 
فقط بضع خطوات خلاو الوجع يتزاد عليا .. رجلي ماقادراش حتى نحركهم مزيان .. كلهم مضروبين ...
بلال:~ مزيانة .. 
انا:~(شفت فيه وحركت راسي ) ااه .. 
كان ولابد نعاود نواجه نفس الذكريات مرة اخرى .. 
حسيت بيديه توضعات تحت عنقي والاخرى تحت ركبتي .. وبكل بساطة رفعني بجسده .. 
انا:~ (شفت فيه برعب) شنوو كادير .. 
بلال:~ غانهزك شنو كاندير مثلا ؟
الشارع كان خاوي من غيرنا حنا بزوج .. تقاسيم وجهه كانو قراب مني خلاو قلبي يبغي يخرج من بلاصته .. كيضرب بين قفصي الصدري بعنف .. 
انا:~ بلاش انا قادرة نتمشى .. 
بلا مايزيد معايا حتى كلمة .. عاود نزلني فحال شي مونيكة .. حتى تأوهت بآلم ..
بلال:~ شفتي ماقادراش حتى توقفي مزيان عاد تتمشاي.. (مسح على وجهه) بلا ماتبقاي تقصحي راسك .. 
من جديد رفعني .. تشبت بقميصه .. واخا ماكنتش باغيا نرجع معه ولكن ماعندي حتى مفر .. حاصلة فبراثينه .. مهما هربت من شباكه كنبقى عالقة فالاخير .. 

حطني على الفراش برفق .. بلا مايتكلم.. غير داك النظرة الصامتة فمحيطه الاسود .. مدة طويلة وهو كيعاود يحقق فيا .. حتى دخلني الشك فراسي ..
بلال:~ ارتاحي .. غانرجع دابا نبدل لك الفاصمة .. 
مابغيتش مازال ندين ليه بشي حاجة .. مابغيتش يكون عنده فضل فحياتي .. هو غايبقى طول عمره ماكيحس بوالو من جهتي مجرد فراغ .. داك العاطفة الجياشة لي كانت فعيونه طفيتيها وكسرتها بيدي .. زيريت على مفي بأصابعي .. 
انا:~ غانبدلها لراسي .. 
شاف فيا بنظرة نارية.. خلاتني نبلع ريقي بصمت .. كل مادار هو خرج لبرا .. عاود جاب داك الميكة د الدوا ..
بلال:~ طلعي تريكو .. 
حركت حدقتي برعب .. باقي كنتفكر ملي قال انه كيشمئز مني .. ودابا باغي يلعب دور الطبيب .. مابغيتش الشفقة دياله .. كتخلي قلبي شاعلة فيه العافية من كثرة الوجع .. 
بلال:~(زفر بضيق)ملي مابغاياش غانطلعو لراسي .. راسك قصح منك .. 
حطيت يدي على المكان لي مجروح مرة اخرى بيدي .. قبل مايحيد ليه الفاصمة.. فحال اذا فهم شنو قصدت له .. باقي اثر كلماته ماباغيش يبرا خص كل موقف يفكرني فيها .. 
بلال:~(شد فيدي وحيديها) جووووري ماغااانكلكش ..(تكلم بامتعضاض) نسااااي دابا نساااي كل حاجة قلتها ليك .. حتى تبراااي وداك الوقت فكريني ونفكرك فهاد الآلم كله ..(عاود زفر تحت سنانه) داك الساعة عاد غانعاود نحاسبك من جديد دابااا نساي كلشي .. 
انا:~ عمري نقدر ننسى .. 
بقا ساكت .. من بعد تكلم ووجهه بلا تعبير ..
بلال: حتى انا عمري نقدر ننسى .. 
طلعت النفس بزز فصدري .. باقي عنده نفس الرغبة المتوحشة انه يقضي عليا .. تأكدت ان هاد الحادث ماغيير فيه والو يمكن.. غير انا لي توهمت نسيانه للموضوع .. 
انا:~ واش فاتو الامتحانات .. 
فحال اذا بصح كنت مهتمة بهم .. ولكن بغيت غير شي حاجة تطير عليا هاد الثقل لي جاثم على صدري .. 
بلال:~غاتقدري تدوزي الامتحانات ونتي بهاد الحالة .. 
انا:~(هزيت راسي فيه ) ااه غانقدر .. 
رفع يديه باستسلام .. مسح على لحيته .. شفته وقف ورجع كيتحرك بآلم مافهمت والو .. فحال اذا هو لي مضروب ماشي انا .. تأوه بآلم .. والعرق بداك كيتنقط ف جبينه .. كيمسحه بيديه لي كيترعدو ويرجع يشوف فيا ..
بلال:~ ارتاحي .. حتى يكون وقت الدوا ونجيبه ليك .. 
شفته مازال كيتلوا .. كيمسح على وجهه مجددا .. فحال اذا ماقادرش يركز .. 
انا:~ واش مريض .. 
رجع ثبت نظره فيا .. وغطاني .. جمع داكشي .. عاد جاوبني .. 
بلال:~ لا .. غير نعسي .. وارتاحي ..

غمضت عيني ولكن حالته بقات بين مقلتاي .. تحركت بثقل بزز مني .. كنمشي غير جنب الحيط واخا ماقادراش نتحرك .. كنحاول ما أمكن .. سمعت صوته فالغرفة الاخرى .. فحال شي نشيج .. يمكن كيتألم ولا ماعرفت شنو .. الرعب انتشر فشرايني .. 
فتحت الباب والو ماكاينش .. تبعت خطواتي للحمام بصعوبة .. 
حتى وقفت ووقف قلبي بالمقابل .. عيني تثبتو فجنبه بذهول .. 
نفس الشق لي شفته ملي غيير لي الفاصمة .. حتى هو عنده فحاله تقريبا وفنفس البلاصة .. كيدير له الداو .. ويتألم فنفس الوقت .. انينه كيخرج صامت .. 
انا:~(تكلمت بصعوبة) نتا .. نتاا .. 
فحال اذا ماتوقعش وجودي .. رجليه تثبتو فالارض .. مسح على وجهه القاسي .. كيحاول يتأكد من كاينة ولا غير عينيه كذبو .. عض على فمه مغزف وغمض عينيه بآلم ..
بلال:~ علاش جيتي ؟؟ 
درت يدي على فمي ماقادراش نتحمل اكثر .. كنتهز بقسوة .. جسدي كينتفض بعنف .. عاد فهمت .. عاد بدا كيطلع معايا كلشي .. وفهمت مقصد ماما هاد الايام كلها .. فهمت التعب لي كان كيبان على وجهه .. جسمه لي كيعرق بزاف .. وماكيبغيش يبين .. ودابا كيتألم فصمت .. حتى حد ماحاس به ولا ب شنو قدم .. 
كله كان بسبب واحد .. عرفت انه انترع شيء من أعضائه بكل سخاء وعطاه لي .. بلا مايهتم بنفسه ولا بصحته .. 

يتبع 💜

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.