مرة وحدة اخرى غايكون كيسالني بزاف .. رجعت حدقت فيه وفطيفه بعيني مدمعين .. ماعرفتش مقدار الغلط لي داره حتى حطني الله فطريقه .. باش يتحمل سيئات حياتي .. مابغتيش هادشي كله .. عضو صغير منه ديما غايكون محمول فجسدي .. بسببه باش كنعيش ..
الصوت خرج مذبذب من حلقي .. باقي ماممصدقاش مقدار تضحيته ..
انا:~ علاش درررتي هادشي ؟
الانين دياله لي كان كيتسمع من عندي .. كتمو بصعوبة .. دار يديه على لافابو .. كيتنفس بعنف ..
بلال:~ سيري من هنا .. رجعي لبيتك ..(شاف فيااا بغضب) ماااااادرت والو ..
واش مابغانيش نشاهد ضعفه ؟ ولا الامر كان اكبر من ذلك ؟ عيني تسمرو على جنبه الخط هابط تقريبا من الظهر وغادي نيشان فحال ديالي تماما ..
انا:~ تبرعتي ليا بالكلوة ؟
سندت راسي على الباب .. هادشي هو الوحيد لي جا لبالي .. رجلي حسيتهم شوية ويطيحو بيا ..
ماسمعت لا جوابه ولا والو .. حتى فاتت مدة طويلة .. عاد خرج كلامه متسارع مع ذبذبات الهوا ..
بلال:~ سيري من هنااااا .. مااعطيتك والو بلا ماتوهمي ..
اصابعه حفرو فكتفي .. راسي لي كنت حاسة به كيضرني دابا مابقيتش كنشعر بوالو تقريبا .. فحال اذا كلشي كيختفي من الوجود على غفلة .. همست بتساؤول ..
انا:~ مااباغييينش نعرررف ؟ ماباغي حتى حد يعرف .؟
رخف شوية وعاود زير .. عينيه ثبتهم فعيوني .. كينهج .. غير بسؤال واحد قدر نقرا الجواب فسواد بحره قبل مايقوله ..
بلال:~ ماابغيتكش تعرفي .. مابغيتكش تحسي كنسالك شي حاجة .. مابغيتكش تعرفي هادشي كله ( عض على فمه) حسبي مااااعطيتك والو .. فحال هادشي ماكاينش ..
قلبت وجهي للجهة الاخرى .. كنأن بصمت .. كالعادة عند اول موقف كان هو اول الحاضرين .. بلا مايبخل عليا .. كيسدد كلشي بالزايد .. يمكن كنتفرج ف مسرحية حياتي .. وماعليا سوى التصفيق فنهاية الامر !!
رفعت فيه مقلتاي بتساؤول مرة اخرى
انا:~ كنتي تقدر تعطيها لأي واحد ؟ شكون ما كان ؟
بلال:~ (حرك فكه بامتعضاض ) اي واحد ..
الكذب هاد المرة لي ظهر واضح فعيونه .. مايقدرش يسخى بشي حاجة من عنده .. انا بنفسي لو تحط فنفنس الامر .. كنت غانبقى وقت طويل كنفكر واش نقدر نعطيها ليه .. واخا غير هاد رابطة الدم لي بيناتنا .. ماتقدرش تخليني نعطيه اي شيء من عندي .. ولكن هو بهاد البساطة .. اقتطع هاد الجزء منه .. ومده لي بلا مانعرف ..
انا:~(جاوبته بنفاذ صبر) نتااااا كتكذب ماااشي اي واحد كنتي تقدررر تعطييها ليه .. ماااشي اي واحد ..
بلال:~اي واااحد ..
انا:~ تقدر تندم واحد الوقت حيت قدمتي ليا هادشي كله ..
ابستم باستهزاء .. باقي واثق من نفسه .. فحال اذا كيقول لي واش من نتيك ؟ ..
بلال:~ نندم ؟؟ (ضغط على فكي بشوية) نتي بالضبط( تنفس بطول) .. تطلبي قلبي نحيديو من بلاصته .. غانحيدو ونعطيه ليك .. بلا مانتردد وعمري نندم عليه ..
بعد شوية عليا .. مخليني نرد انفاسي .. وصدى كلماته العنيفة باقي كيضربو فأعماقي بقوة ..
كل مرة كان كيقترب مني كنت انا كنبعد .. لكن هاد المرة انا لي مصرة نبري جرحه .. واخا ماعرفت كيفاش ولا وقتاش . ..
بدا كيقطع فداك اللصقات .. واخا التعب كان واضح عليه .. كيدير الفعل ويرجع يوقف شوية يرتاح .. بلا مانتردد واخا غير بيد وحدة .. حيدت داكشي من يديه .. حيت اليد الاخرى عندي مضمضة ..
عقد حاجبيه وشبه ابتسامة تقريبا دازت على وجهه .. بلا مايعارض .. صاوبت الامر واخا ماكنتش عارفة فهادشي .. كان كيرشدني كيف نبدلها.. حتى ساليت كلشي .. عاد لبس قميصه ..
انا:~ خصك تشوف الطبيب .. كتعرق بزاف ..
حرك راسه بنفي ..
بلال:~ غانولي مزيان ..
كبجاهد على نفسه .. ماباغيش يبين ضعفه هادشي لي فهمته من كلامه .. حتى قسوة وجهه باقي نفسها ..
انا:~ غاتكون غير حيت هزيتيني .. (مسحت على عنقي بتعب) فاتح وكتجاهد على راسك ..
بلال:~(تجاهل كلامي) نتي لي خاصك ترتاحي ..
ماحسيت به غير جارني برفق .. تنفسه بدا كينتظم .. حتى وصلني لغرفتي ..
تمديت ف الفراش .. عاود غطاني فحال قبيلة عاد خرج .. لكن هاد المرة ترك فيا كتلة من الاحاسيس لي عاد اكتشفت وجودها .. لأول مرة فحياتي .. مزيج بين الحيرة والاضطراب .. فحال شي سيف ذوحدين .. كيمزقني من الداخل ..
فتحت عيني فالسقف .. بدا يظلام الحال .. الغرفة كيغلب عليها لون السواد .. ماعرفت فين غايكون مشا .. من بعد ماخرج قبيلة من الغرفة مباشرة غطيت فالنوم من التعب .. ومن داك الوقت عاد ضرباتني الفيقة ..
نضت بزز مني .. كنفورصي على راسي .. باش نقدر نوصل للحمام .. ذاتي كلها فاشلة .. ماوصلت حتى غفر لي الله الذنوب ..
غير ساليت وخرجت لقيته عاد فالباب داخل للغرفة .. شاف فيا وحرك فكه بامتعضاض ..
بلال:~ ماكتعرفيش تعيطيي مثلا ؟؟ عارفة راسك ماقادراش تنوضي ..
بادلت نظراته بتعب .. اما هو كان كيبان عادي تقول ماشي هو لي كان كيحس بداك الآلم كله قبيلة ..
انا:~ بغيت نعتامد على راسي ..
حرك حاجبيه باهتمام .. عاد جاوبني ..
بلال:~باقي الايام وارا ماتعتامدي على راسك ..
قرب مني حتى وصل جنبي .. حسيت بقربه الشديد فحال شي نار كتلفحني .. خلات وذني يصفرو بوحدهوم .. بغا يهزني عاوتاني لكن عارضته فالمقابل ..
انا:~ لاا .. مااابغيتيش يتزااد عليك الحال بسببي فحال قبيلة ..
يديه تموضعات على خصري برفق .. فحال اذا هازني من على الأرض شوية وصافي .. حتى وصلني ورجع حط على حجري صنية الاكل وفيها الدوا ..
بلال:~ مابغيتش نفيقك قبيلة ..
انا:~( هزيت الملعقة) ونتا ماغاديش تاكل ..
حط يديه على راسي بشوية .. واقترب اكثر ..
بلال:~ شبعان .. غير كولي نتي .. باش تصحي دغيا ..
رجع تكى قدامي على الفراش .. كيفصلونا غير بضع سنتميترات .. قلبي تسارعو دقاته بشكل عنيف .. هاد القرب كان مهلك لذاتي بشكل غريب .. فحال اذا راني فشي قارب كيغرق بيا فمحيط بارد .. قاسي .. مظلم .. وانا ماقادراش نطلب النجدة وننفذ براسي حية ..
شفت فيه مغمض عينيه .. قربت يدي بشوية .. حتى وصلتها لعند وجهه .. بلا مانقيس فيه .. واحد الشعور فشكل كيزلزلني من الداخل .. تأملت ذبذبات الهوا لي كيخرجو من صدره على برا .. وحفيف قميصه كيتهز مع كل نفس كيطلع .. ضخامة جسده لي احتلت تقريبا الفراش بأكمله ..
شفت حتى عيت .. وفالاخير بغيت نحيد كفي ولكن كان اسرع مني وقبض عليه بين كفه بخشونة .. همس تحت انفاسه بصوت اجش :
انا:~(رديت عليه بتساؤل) علاش كل مرة خصك تبان باش تنقذني ؟
بلال:~(جاوبني بنفس النبرة) حيت القدر كيحطني ويحطك فطريقي كل مرة ..
طلعت النفس بصعوبة .. شعرت بكفه زيرات على يدي حتى وصلها لوجهه مرة اخرى وحطها على فمه .. غير حطها بلا مايدير حتى ردة فعل ..
انا:~ كنت نقدر نعيش بالكلوة الاخرى لي عندي ..
عقد بين حاجبه فحال اذا فكرته .. ولا مانعرف شنو .. وهمس تحت بشرة يدي ..
بلال:~ مصرة تفكري فهادشي ..
حركت راسي بإيجاب ..
انا:~ ااه .. بغيت نعرف ..
بلال:~(طلع نفس حار من صدره) الاخرى كانت عندك مريضة من شحال هادي .. متضررة شوية .. والثانية تضررات لك بالحادثة بزاااف .. غاتبقاي حياتك كلها وهي كضرك لو بقيتي هكاك ..
بللت شفتاي .. ورجعت شفت فيه ..
انا:~ واش ست ايام بقيت مغيبة كلها ..
فتح عينيه ويدي باقي شادها لعنده بكل حرية ..
بلال:~ فقتي وغبتي شحال من مرة .. الضربة كانت قاصحة .. (بقا ساكت شحال ضغط على بشرتي) مابغيتكش ضيعي من يدي .. مابغيتش غير نفكر فهادشي .. اعتبري هاد الحادثة مجرد قناع للذكرى وتلاشى فالاخير ..
انا:~(قلبت وجهي شوية) حتى انا تمنيت مانموتش ..(اختنق صوتي اكثر) بغيت نكفر على ذنبي قبل ..
لون وجهه امتقع.. السواد ضهر على صفحة وجهه وازدادت قساوة .. ملامحه زادو تشنجو .. ضغط على صدره باش يطلع النفس.. وتكلم بنفاذ صبر ..
عضيت على فمي من زلة لساني .. تأكدت انه عمره غاينسى هادشي واخا يوقع لي وقع .. غير كيسايس وصافي .. كيحاول يتناسى .. لو انه تجاوز فهاد الاسابيع لي فاتو .. كانو تصرفاته غايرجعو عادية .. لكن رجعنا للرسمية ..
مديت له الملعقة عامرة بالحساء .. ووصلتها حتى لفمه .. همست بصعوبة ..
انا:~ كول حتى نتا ..
فتح عينيه حمرين فحال الجمر.. الوجع كيقطر منهم .. حتى قلت غايرجع يقدم لي وحدة من إهاناته مرة اخرى .. كنعرف حالاته كلها .. اطبقت على فمي والهوا لي طالع من صدري .. بغيت نرجعها ولكن هو بدون مايعارض فتح فمه واكلها ..
بلال:~(ابتسم بزز ) ارتاحيتي دابا ..
بلعت ريقي .. من بعد ماحبسته فجوفي ..
انا:~ غانعطيك وحدة اخرة ..
حرك راسه ..
بلال:~ وحدة لي وحدة ليك ..
انا:~ وااخا ..
وهادشي لي كان .. حتى سالينا الاكل وشربت الدوا .. بقيت جالسة على نار .. كنستناه ينوض للبيت الاخر باش نتمد انا .. ضهري ضرني وراسي كثر ..
بلال:~(شاف فيا باستغراب) غاتبقاي هكاك ..
انا:~ لا .. انا مرتاحة ..
غصة طلعات ونزلات فحلقه .. فهمني غير بإشارة وحدة .. تكلم ببرود ..
بلال:~ غير نعسي .. باش اذا احتاجيتي شي حاجة بالليل غاتلقايني هنا .. (رفع حاجبه) عارف راسك قاصح ..
بلا مايتردد ولا يستناني نجاوبه .. رجع سحبني لعنده .. حتى تكيت .. وصلت تقريبا قدامه .. دار يديه تحت راسي .. رجعت على كتفه تقريبا .. غمض عينيه ونصف ابتسامة دازت على ثغره .. اما انا عاد ضرب قلبي بقسوة بين اضلعي.. كثر من الف مرة فالدقيقة يمكن .. حرارة انفاسه اجتحتني من كل جانب .. فحال اذا واقع شي انفجار عظيم داخل قفصي الصدري ..
الليل كله والنعاس تقريبا مادازش فعيوني .. آلم حارق فصدري .. عاد رجع معايا كل مادرته .. فين كان عقلي .. حتى ربطت حياتي بمراد .. حتى فكرت شي نهار نتعرف عليه وندخله لحياتي يرونها من بعد ماكانت مرونة من اساسه ..
وعاد بلال لي كان بجنبي ليلة اكملها زاد الطين بلة .. حتى طلع الصباح عاد بديت نغفى شوية .. ملي فقت لقيته ماكاينش بجنبي ..
هزيت راسي فالمراية كنتحسس ملامح وجهي لي ولات كلها طوابع .. من بعد ماتحيدو الكدمات تقريبا كلهم .. فحال اذا كان خص غير هاد الحادثة باش تترسم خريطة فوجهي ..
غير لحظة وحدة حتى لقيته وقف قدامي .. كيتأمل وجهي بصمت ..
انا:~(شفت فيه) صباح الخير ..
سكت شحال وطلع نفس اجش من صدره .. عاد رد عليا ..
بلال:~صباح النور ..
حط يديه جنب عيني ..
بلال:~ باقي كتوعتك ..
هزيت راسي بنفي .. وجلست على الكرسي بتعب ..
انا:~ شوية وصافي .. غير مابغيتيش يبقى الطابع ديالهم ..
تحنى بحجمه بأكمله .. حتى اكتسح المكان من حولي بقربه .. رائحته كتدخل بين جلدي ومسامي .. زفيره الحار كيخرج من عنده وينتشر فالهوا لي قدامي .. هز داك البومادة بدا يديرها بشوية .. حسيت ببروديتها على بشرتي فحال الثلج .. وحرارة كفه وانفاسه كانو العكس ..
بلال:~ دابا يتحيدو .. يالاه تفطري ..
بقيت غير كنحدق فطيفه بسهو .. حتى حط يديه على كتفي كيزعزعني عاد قدرت نجاوبه .. خرجت الحروف من حلقي بصعوبة ..
انا:~ غانمشط ونجي ..
رجع وقف ورائي .. يديه تحطو على شعري من الفوق .. كيشوف فطيفي فالمراية .. وهمس بصوت اجش ...
بلال:~ اجي نمشط ليك ..
فتحت عيني ووسعتهم بشوية .. لا شي حاجة غلط .. كنحاول نستوعب كلامه.. توترت من قربه .. من هاد الاهتمام كله لي كيطبقه عليه بدون رحمة .. فحال اذا باغي يزيد يخليني نحس بالندم وبمقدار ذنبي .. يديه تغلغلو فالمشبك لي فشعري حتى حيدو وتطلق على كتفي ..
انا:~ بلاش غانمشطو لراسي ..
بلا مايهتم لشنو قلت بدا كيدوز المشطة على شعري بشوية .. ماباغيش يعقرني فراسي .. كيدوزها من الاعلى حتى الاسفل ويعاود مرة ثانية وثلاثة .. شاف ف عيوني من المراية ..
بلال:~ ياكما كنوعتك ..
حدقت فانعكاس طيفه الماثل امامي بلا مانقدر نجاوب .. هاد الاحاسيس المهلكة هي لي كتوعتني وتضرني .. كتخليني تالفة ماعارفة واش كنحس بالبرودة ولا السخانة .. واش شي حاجة كضرني ولا غير كنتوهم .. حتى لقيت راسي كنسوله ..
انا:~ كتشفق عليا ..
غمضت عيني ملي شفت فبؤبؤ عيونه .. غير من المراية .. سوادهم كيحدق ف كل جزء فوجهي .. واخا غمضتهم نظراته كيمشطوني .. كيلتهموني بعنف وقسوة ..
بلال:~ واش اذا اهتميت بك كنتسمى كنشفق عليك ؟ كاااين فرق كبير بين الاهتمام والشفقة ..
وقف يديه على شعري ورجع تنفس بعمق .. عقد بين حاجبيه بغلاضة ..
بلال:~ بلا ماتبقاي تتوهمي .. نتي دابا مااقادراش ديري هادشي .. يديك كتوعتك .. وانا من واجبي كا راجلك ندير هادشي .. ماشي حيت كنشفق عليك ..( طلع النفس وسكت ) حيت انا بصح كنهتم بك وبتفاصليك وبكلشي فيك .. غير نتي لي كتتعماي على الموضوع ..
مرة اخرى عا هو متعمد يرد لي الضربة بمشاعر ماقادراش نفسرها ولا نلقا لها الجواب .. ااه بصح راجلي .. عاد بديت نستوعب حجم هاد الكلمة ومدى تأثيرها على احاسيسي.. يدي بداو يكترعدو ويبردو .. حلقي نشف ..
رجع مرة ثانية كيحرك المشطة على شعري بهدوء .. وتكلم باش يكسر كلامه لي قاله ..
بلال:~ملي كانت عندك عام مشطت لك اول مرة ..
انا:~ وثاني مرة ؟
بلال:~ ثاني مرة فاش كانت عندك تلت سنين .. مانضنش واش تكون عاقلة من اصله ..
انا:~ وثالث مرة ؟
بلال:~هي هادي ..
عينيه غامو بعاطفة .. عصفات عليهم .. شفتهم من عندي كيف برقو .. محيط اسود مغلف ببريق لمعاني.. لجتين من السواد .. فحال اذا كيتفكر شنو فات ..
جزء من ذاكرتي كان كيحاول يتجاهله طوال سنين طفولتي .. ماكنتفكر على بلال غير داك الشخصية المتغطرسة لي عرفته ملي كانت عندي شي خمسطاش العام .. ماكانش كيقرب لجيهتي بتاتا .. ماعرفتش ان القدر غايعاود يتقلب ويحطه فطريقي باش يشاهد جميع مراحل ضعفي .. ويكون اول الحاضرين على مسرحية حياتي ..
انا:~(رديت عليه بتوتر) و عمرك مشطتي لشي وحدة اخرى ؟
سكت وحرك راسه بنفي ..
بلال:~ لا .. وعمرها ماغاتكون اذا ماكنتيش نتي ..
ابتسامة بزز مني ترسمات على فمي ملي سمعت كلامه .. خبيتها بصوبة .. علن لي بصريح العبارة انه واخا هادشي كله غانبقى مركز اهتمامه.. واخا جرحته بعمق داواني فالمقابل .. واخا ماقدمت له والو .. اهداني جزء من اعضائه فالمقابل بلا مايتشكى .. حركت حلقي بحشرجة ..
انا:~ لو تفكرت هادشي كانت غاتكون عندي شي ذكرى زوينة عليك قبل مانعرفك ..
بلال :~ بعدت حيت كنت عارفك غاتعذبيني حياتي كلها .. وكنت صادق .. من طفولتك .. (زفر بحرارة) حتى لدابا .. كتعذبي كل خلية فيا .. كل جزء مني ..
مالقيت باش نرد عليه من غير نجاوبه بصوت كله اعتذار ..
انا :~ سمح ليا ..
نظرة عيونه تحولات من داك العاطفة بأكمالها لقسوة بحجم الدنيا .. كيجلدني بسياطها .. كل ماداره هو رجع امام وجهي وقبل جبيني بحرارة .. جسدي نتفض لملمس شفتيه على بشرة جبهتي فحال اذا عمره دار هادشي ..
بلال:~ لحقي عليا باش تفطري ..
غير قال هاد الجملة .. خرج فحاله بعد ذلك .. بلا مايخليني نشوف تعابير وجهه ..
داز اليوم الاول والثاني .. اليوم الثالث .. اصر بلال اننا نخرجو بالليل .. كانت بدات حالتي كتحسن شوية .. الحريق بدا ينقص .. حتى الجو كان بيناتنا زوين .. تعامله عادي نوعا ما .. ماكاينش المشاكل .. لكن هو فغرفته وانا فغرفتي .. غير افكاري لي كانت مضطربة وبزاااف ..
تمشينا شوية فواحد البلاصة خاوية .. فحال جبل عالي كتبان منه المدينة بأكمالها .. كلها مضوية .. غطى الليل على السماء بعبائته السوداء .. الحال كان خاوي تقريبا ..
تمشينا جنب بعض بصمت .. حتى مليت من هاد الجو .. همست بتردد ..
رجعت اطبقت على فمي .. كنزفر هواء ساخن خارج من اعماق صدري .. انا بنفسي ماعرفتش علاش بغيت نسوله .. كان خصني غير نوقفه ونكتسح شروده ..
انا:~ اا .. والو .. غير الجو هنا زوين بالليل ..
رفع حاجبه وهبط الاخر .. بابتسامة خلاتني نزيد نحقق فيه انا هاد المرة .. من بعد ماكان هو لي كيلتاهمني بعيونه ..
بلال:~ ماشي هادشي لي كنتي باغيا تقولي ؟
اصابعه الطويلة .. دارهم على كفي .. تلقائيا حطيت اصابعي تحت اصابعه .. بلا مانفكر مازال .. رجفة عميقة طلعات مع مصارني .. يدي بداو كيعرقو بين يديه كثر نا هو مزير عليهم .. كثر ماقلبي كيخرج من بلاصته ..
بلال:~ فيك البرد ؟
انا:~ لا لا ..
حسيت به وقف مرة اخرى .. رجع ورائي ويديه دارو على خصري حتى قربني لعنده .. معنقني بحرارة .. كيطلع يديه على ظهربي حتى كيوصل لكتفي ويزيد يعنقني .. همس بين انفاسه ..
بلال:~ هكا ماغايبقاش فيك البرد .. غاتدفاي ..
رجعت تخشيت فيه .. كنحتمي من نفسي عنده هو .. دقات صدري زادو فعنفهم .. كل ما كنتفكر ان هاد الكيان الضخم هو زوجي .. هو الخط الرفيع لي فصل بين ذنبي وتوبتي .. هو المحيط لي اغرق سفينة مشاعري ..
انا:~ خلينا نرجعو للدار د الجبل ..
سمعت انفاسه فوق راسي .. مباشرة على قماش حجابي .. كيحرقو كل خلية فيا ..
بلال:~ عجبك الحال تما ..
حكيت انفي فصدره .. وزدت ابتسمت ..
انا:~ااه ..
بلال:~غير يفوتو الامتحانات ان شاء الله نرجعو ..
بغيت نعترف ليه بشنو كيتحرك داخل صدري .. بانتفاضة قلبي كل ما شاف فيا .. بصدى دقات فؤادي كلما لمست بشرة يديه بشرتي ولو عن طريق الغلط .. بغيت نبوح هادشي لي عندي وماقادراش نقولو ولا نحتفظ به .. تنفست بعمق عاد حيدت من صدره قبل مايشوفنا شي حد ..
انا:~ خلينا نرجعو فحالنا ..
بلال:~عيتي ..
حركت راسي بنفي .. واطبقت على مشاعري قبل مايفضحوني ..
بلال:~اذا بلاتي شوية ..
زاد دفعني لحضنه .. كيتنفس بسرعة .. فحال اذا كيستنشق ريحة انفاسي .. يديه كيتحركو على ظهري .. حتى كنحس بارتعاشة كتسري بين عروقي ..
بلال:~شنو سر رائحة الياسمين لي فيك كلك ..
عضيت على فمي بإحراج .. ها هو مجددا كيعاود يحرك دقات قلبي .. حتى كنقول رتاحيت وكيزداد عنفهم اكثر من الاول .. فحال اذا انا فشي سباق .. هادشي لي عمره وقع لي .. وهو بقسوته كيتعمد هادشي ..
انا:~ماكتعرفش اسطورة الياسمين ..
بلال:~(زاد عنقني ) عاوديها لي .. حتى نسمعها منك ..
انا:~يمكن هادشي غير تفاهة .. ولكن سبق لي قريتها ..(غمضت عيني) هي على زوج عاشقين دابزو فواحد الكوكب .. وغادرت البنت كل ماكانت كتفكره كتبكي .. وداك الدموع كينبتو فالارض على شكل وردات فاللون الابيض ..
سكت شوية .. من تفاهة هادشي لي كنقوله .. فحال اذا هو مسالي باش يسمع هادشي .. وبقا ليه غير هاد الخرفات
بلال:~ كملي .. علاش سكتي ..
انا:~ (اخذت نفس عميق) من بعد رجع هو كيقلب عليها فكواكب اخرى وعرف هادوك الوردات غايكونو ديالها من دموعهت .. وكلما تحنى على شي وحدة وقاسها كتلون بوحدها .. حتى وصل لوحدة وبقات فاللون الابيض .. داكشي علاش سماها "ياسمين "
خشونة ضحكته تسمعات حتى لعندي .. هو ببساطة كيهتم بكل التفاصيل .. تفاصيلي كيف ماكانت .. همس بصوته لي نساب بين اذني بسرعة ..
بلال:~ يا أُسطُورَة الياسْمِين
لا تَنظُري لي حَسرةً
ما عادَ عِندي ما يُقالْ
جُرحي أنا طولَ المُحيطِ وعَرضَهُ
والعُمقُ في بُعدِ المُحالْ
إيَّاكِ أنْ تتخيَّلي ..
رَدْمَ المُحيطِ
بِمِلءِ أعيُنِنِا أسىً
أو مِلءِ كَفَّينا رِمالْ
زدت تشبتت به .. فحال شي غريق لقا طوق النجاة .. كلامه كان كيبين لي مدى عمق جرحه .. ماقدرتش من غير انني نرد عليه ونبرر له بكلام منبثق من كلامه ..
انا :~ أنا عِشتُ أشعُرُ ..
بالضَّياعْ
وأُحسُّ أنِّي دائمًا
أحتاجُ في هذا الزمانِ لِضمَّةٍ
مِن أيِّ صّدرٍ أو ذِراعْ
وأُحِسُّ أنِّي قد أتيتُ إلى الحياةِ
لِكي أذوقَ مَرارةً مِن غيرِ داعْ
وأُحسُّ أنِّي ضائعٌ حتى النُّخاعْ
وأُحسُّ أنَّ نِهايتي
ليلٌ رَهيبٌ فيهِ يَنطَفئُ الشعاعْ
وأُحِسُّ أنَّ سَفينَتي مَثقوبةٌ
وبأنَّ ريحًا سوفَ تَقتلِعُ الشراعْ
قبل قمة راسي طويلا وخلا فمه على قماش شالي .. كيزفر مطولا .. يديه تحركو حتى استقىو عند خصري هاد المرة ..
بلال:~ إني أُحِبُّكِ قاصدًا مُتعمّدًا ..
سلّمتُ قلبًا هام في عينيكِ ..
عمري فداكِ خُذيهِ لا تتردّدي ..
أنتِ الحياةُ وحلوها بيديكِ ..
إن شئتِ ظُلمًا فاظلميني إنني ..
لكِ مِنكِ فيكِ فلا ملامَ عليكِ ..
أو شئت عدلًا فاعدلي يا مُنيتي ..
إن الهوى في الحالتينِ إليك ..
غمضت عيني بدموع لمسمع كلامه .. صوته الاجش مزقني .. والطريقة باش قاله زلزلت كياني من اعماقه .. زدت تأكدت انه دوما هذا كان قدري ورجلي الوحيد .. لي انتظرته سنين العذاب باش ينتاشلني فالاخير من بحر الوحدة .. يخرج شخصيتي مني .. ويشكلني واحدة اخرى .. جوري الحقيقة .. ماشي مجرد طيف مزيف ..
خرج الصوت من جوفه بعد مدة طويلة وحنا ملتزمين الصمت غير معنقني بنفس الطريقة الشغوفة ..
احاسيسه كانت غالبة احاسيسي .. خلاتني بلا عقل مبتسمة .. الانتفاضة كتطلع من أحشائي .. ولساني تطلق ..
هزيت راسي فيه وتكلمت بشوية ..
انا:~ علاش بينتي ليه كرهك اول مرة وعدم اهتمامك ؟
لو افصح لي اول مرة كان ممكن كلشي يكون متغير دابا .. ولكن البكا ورا الميت خسارة ..
بعدني عليه شوية .. ملامحه اسود لونهم .. وعيونه نطقو قبل مايتحرك لسانه بين ثغره ..
بلال:~ كبحت راسي لسنوات طويلة باش مانتقربش منك .. باش ماتبانيش فطريقي .. الا عن طريق الزواج .. الطريقة الوحيدة لي كانت قادرة تجمعك بيا .. ماعارفاش شحال د القوة تطلباتها مني نفسي باش نبين لك عدم اهتمامي اول مرة .. وانني مامسوقش لك .. مامهتامش لهاد الزواج .. ولكن قلبي كان شيء اخر .. كايتحرق بنار رفضك كل لحظة ...
بلال:~ و فأول مرة غاتقبليني بالرفض .. شنوو فنظرك غايكون جوابي عليك فهاديك اللحظة ونتي ماحملاش وجودي بقربك .. ماحملاش حتى نتشاركو نفس الهوا .. كيف غايكون ردي عليك .. ضروري انه غايكون قاسي .. فحال قساوتك قلبك .. يا قاسية القلب ..
ضغطت على قلبي بيدي كنحاول نتعايش مع كلماته .. باقي كنتذكر نبرة صوته اللاذعة د اول مرة عكس كل هاد المرات لي كتخلي قلبي يذوب باللهفة .. الشوق والانتظار ..
انا:~ نتا اختريتي تتزوجني ففترة صعيبة .. وبابا بزز علياا .. مانقدرش نرفض كنتي نتا بوحدك لي قادر ترفض .. وكنت كنضن كتتزوجني على قبل عائلتك ..
بلال:~ (طلع نفس عميق من صدره) ولكن انا تزوجتك على قبلك نتي .. فكل مرة كنت باغي نبين لك شحال انا مهتم بك .. شحال باغي تقبلي بهاد الزواج .. بلا مايكون حتى ضغط عليك ..
حركت راسي بشوية .. دمع محترق .. متكلل داخل قلبي .. كأنني فقدت قطعة من قلبي ..
انا:~ نتا رفضتي وعاود رجعتي تبزز عليا ..
بعد شوية .. مابقيت كنسمع غير هسيس انفاسه مخلط مع صوت الليل .. بوحدنا فهاد المكان .. من غير نجوم السماء لي مضوية علينا ..
بلال:~ بغيت نتزوجك حيت مابغيتش ضيعي مني .. شحال وانا كنستناك .. فالاخير نلقى رافضك كجواب اول وثاني وثالث .. مابقيتش قادر نبعد عليك ..(تمشى شوية ورجع لعندي) رفضت حيت كنتي باغي نحقق لك كل مابغيتي .. ملي شفت مدى رفضك للموضوع لدرجة كتقطعي يديك على هادشي ..
انا:~(تمشيت شوية وقابلت وجهي مع وجهه) ماكتشوفش انك كان خضك تخليني تما .. نتعالج .. ربما انا بصح مريضة ..
بلال:~ (جاوبني بتساؤول)بغيتي ترجعي ؟
مالقيت باش نجاوبه من غير حركت كتفي بماعرفتش .. قرب مني اكثر .. حتى دار انفسه على انفي ..
بلال:~ لو تعاود الامر .. كنت غانعاود نبزز عليك ونخيرك بين المصحة والزواج .. اذا اختريتي الزواج كنت غانتزوج بك ..
انا:~واذا اختريت المصحة ؟
الدفئ ترسم ف عيونه .. بين جفنيه ..
بلال:~ حتى داك الساعة كنت غانتزوجك بزز منك ..
شفته كيغمض عيونه.. وانا ايضا درت نفس الشيء .. كيقرب وجهه بشوية بشوية .. كيخليني نغرق فأنفاسه .. نستنشق داك العطر الرجولي .. تغلغل فجلدي .. ودخل مع ذاتي حتى النخاع .. نضيع فبحر غارق لا مفر لي منه .. والغرق محتم عليا ..
حطيت يدي على لحيته .. كنتسسحها بيدي بتردد .. فهاد اللحظة كنت باغيا ننسى كلشي ذنبي وكل مادرته .. عارفة الامور ماتصلحاتش ولكن كنحاولو نتنساوها .. على الاقل هاد الليلة المهلكة ..
انا:~ حتى انا كنت غاننوافق نتزوج بك .. بلا ماتبزز عليا هاد المرة ..
قاطع كلامي كله بثغره .. قبلته الشغوفة خلاتني نحس برجلي فحال العجين .. ملمس يديه بقا ثابت على خصري .. كلما بغيت نبعد ناخذ غير نفس واحد كيرجعني لعنده بكل تملك .. مامهتام لا بالمكان لي حنا فيه ولا بمشاعري العنيفة لي كيفضحوني امامه ..
انا:~(قاطعته على فعلته بأنفاس عنيفة) بلال ..
بادلني نظراته .. بسواد عيونه فحال الرماد المحترق .. حط يدي على قلبه .. كينبض بسرعة هائلة اكثر من ديالي يمكن ..
بلال:~ مدِّي يدك بداخلي ..
و تحسسي قلبي ..
لعلي اطمئن ..
ليس الضياع حبيبتي
طفلا تشرد في طفولته ..
و لا زمنا يضن
ان الضياع حبيبتي
قلب يذوب من الحنين ..
من اجل قلب لا يحن ..
مرة اخرى صوته اخترق شغف قلبي .. ولمس روحي من الداخل .. كان مصر يحسسني بدفئ كلماته .. حروفه مثل السهام اخترقت لب فؤادي .. واستقرو فيه بدون رحمة ..
انا:~(ابتسمت بسعادة) بغيت نبقاو هنا ..
حط يديه على خدي كيحرك اصابعه بوله .. حتى كيحرقوني .. عيونه شاعلين ببريق ناري .. بلعت ريقي بصمت نوعا ما فهمت ماقصده .. لكن كنت خايفة من هادشي كله وهاد النار الجارفة لي غاتحرقني ..
كنت متوقعاه غيرفض .. فين غانباتو فالزناقي .. لكنه ماقدرش يخسر لي خاطري فالاخير ..
بلال:~ ندخلو للطموبيل هنا البرد عليك ..
داكشي لي درناه .. غطاني بواحد البطانية كانت عنده .. مقربني لعنده بدفئ ..
ماعمري كنت كنضن غانعيش يمكن شي يوم فحال هذا .. السما .. النجوم .. البرد .. وبلال بجنبي ..
الليل كله وحنا كنتأملو البريق المتلألأ فالسما .. بصمت وشغف .. تحت اقاع موسيقى هادئة ..
حيطت رجلي فالجامعة بعد انقطاع دام لشهر والزيادة .. هاد الأيام الاخيرة تحسنات نفسيتي بزاف .. كل مرة بلال كيبين لي حسن تصرفاته .. من اليوم فاش بقينا الليل كله تحت النجوم .. وشعوري نحوه كيكبر بطريقة غريبة ويعذبني .. كان متعمد يخفي كل شعور بعد ذلك .. من غير تصرفاته الحنينة لي كنت كنلمسها فكل موقف تقريبا ..
حط يديه على يدي .. وزير عليها .. حتى قاطعني من شرودي ..
بلال:~ من الاحسن كون دفعت لك الشهادة الطبية وتدوزي فالراطرباج ..
ابتسمت باختناق .. شيء بداخلي كان مصر يرجع لهاد المكان لعل وعسى نحرق كل ذكريات الماضي فمجلد النسيان ..
انا:~لا بغيت ندوز .. ونتا جاي جاي ل هنا .. ماخسرت والو ..
بلال:~(دار يديه على كتفي) غاتلقايني فالمكتب ملي تخرجي ..
انا:~واخا..
بلال:~ غايدوز كلشي مزيان ..
اصلا ماحافظة والو .. غير دافعة الجبهة .. باش نحرر الصفر وناخذ الراطرباج ..
دخلت للمدرج .. دوزت بشرود .. كل ذكرى كانت كتخنقني .. هنا بالضبط ضيعت حياتي تقريبا .. ومشيت لجهنم لرجلي ..
ساليت مع نص نهار .. مشيت نيشان لمكتب بلال بلا مانستأذن دخلت .. حتى شفت نرجس معه فالمكتب .. وجهي تغير لونه .. ونار سوداء شعلات بداخلي .. وحرقات كل خلية فيا بلا سبب ..
انا:~(شفت فيها باستغراب) نرجس ..
كان بلال منهمك كيشرح لها شي امور .. حتى شافوني بزوج رفعو عينيهم ..
نرجس:~(شافت ف بلال وابتسمت) شكرا صافي ..
عينيه هو ماكانوش مركزين معها ملي دخلت.. من غير حرك لها راسه .. بادلني نظرتي لي كانت مكفهرة بابتسامة .. طول ما انا واقفة مع الباب وهو كيمشطني بعيونه .. وجه لي كلامه بدفئ ..
بلال:~ كيف دوزتي ؟ مزيان ..
انا:~(بشحوب) الحمد الله ..
حركت وجهي ببرود .. كنحدق غير ف طيف نرجس .. لي واصل امامي ... هي ماغايكون فنيتها والو .. حيت باينة كان بصح كيشرح بها ولكن داك الشعور مزقني انش بإنش ..
الجو كان متوتر بيناتنا فهمته على انها حشمات من بلال كأي .. طالبة واستاذها .. لكن داخلي .. ماقدرتش نستوعب هادشي ..
نرجس:~ غانتلقاو غدا ونهضرو ..
عاد قدرت نرسم على وجهي الضحكة .. غير باش ماتحس بوالو ..
اتا:~ ان شاء الله ..
تجاوزتني ومشات .. ولكن نفس الحرقة بقات كتطلع وتنزل فصدري .. فحال شي حد كيضربني بلكمات عنيفة داخل روحي ..
انا:~ شنو كانت كادير هنا ؟
بلال:~(جاوبني بدون تعبير) كنشرح لها كأي طالبة اخرى ..
غمضت عيني بارتجاف .. كنتفكر شحال من طالبات يقدرو يكونو دخلو عنده .. زونين .. انقيين .. وربما تكون شي وحدة .. كتحس بنفس المشاعر لي كنحسهم انا اتجاهه .. حاولت نهدي راسي ..
انا:~ ااه اوا مزيان ..
بلال:~ (هز سوارت طموبيلته) غايكون جاك الجوع من بعد هادشي كله ..
شفت فيه كيف مبرد السوق فحال اذا ماواقع والو.. نطقت بلا مانفكر
انا:~ حتى انا غانمشي عند واحد البروف يشرح ليا شي حاجة فالوحدة د غدا ..
الشياطين لعبو فعينيه يمكن حسيتهم نقزو لبرا .. كل ماشفته هو خطواته السريعة .. فحال شي اسد كيحفر فوسط الارض.. ماحسيت به حتى كان قبض على فكي بقسوة .. كيزفر بعنف .. الهوا طالع هابط من صدره .. وتكلم بغضب..
بلال~سيري باااش نهرس لك راااسك نيت ..
ماكانتش فنيتي نستفزه بغيته غير يجرب داكشي باش كنحس .. فهاد اللحظة ومالقيت غير داك الجملة .. لعنت لساني لي خلاني نقولها ..
انا:~ااا .. كضرني ..
طلق من وجهي بقليل من العنف .. ومازال نفس النظرة الصارمة بين مقلتيه بقسوتها ..
زاد تنفس بعنف .. يمكن تفكر شنو درت علاش لا .. اطبقت على جفناي بوجع .. عمره غادي ينسى اي موقف غايفكره فهادشي .. واخا كيتعمد يتجاهل كلشي .. حتى انه عمره سولني معامن غلطت .. وعلاش .. وبزاف د الاشياء الاخرى ..
بلال:~(دفع واحد المجلد بعنف) ماكنحملش شكووون يستفزني .. وخصوصاا اذا كان الامر كيتعلق بك نتي .. مااتختبررريش صبررري
دفعته فصدره بشوية .. لا الغيرة ماشي شعور كيحرق الذات زصافي .. هو واحد الشيء كيخليك تتهز من الداخل .. خلاني ننسى شي نهار ان نرجس صاحبتي ..
انا:~ اوااااا فهمها .. حتى انا ماكنحملش شي وحدة تقرب منك شكووون ماااكانت .. كيفك نتااا ولا لا ..
ارتجفو حدقتيه مصدوم من هاد الكلام لي كنقوله .. بحره الاسود غلفه داك القناع الحار .. كيقطر بالمشاعر العنيفة ..
بلال:~ علااش بالضبط ؟
انا:~مااابغيتش كيفما نتااا مابغيتيش .. كاااين الحدود بين المدرج وبين البيرو ديالك .. وحتى انااا كنقدررر نحس اذا شي وحدة حاولت تتقرب منك .. ماشي جامدة بلا مشاعر ..
عرفت ان تصرفاتي حمقة ولكن شي حاجة فداخلي كانت كتنبأني ان هذا هو الكلام لي خصني ننطق به .. تجمعو الدموع فعيني .. ومع ذلك حاولت نكبحهم .. تنفست بضيق ..
انا:~ صاافي غانخرج برا ..
بلال:~ كتزيدي تعذبيني كثرر ..
قبل مانزيد زوج خطوات فقط .. حسيت بيده على ذراعي كيجبدني لعنده .. معنقني بقوة .. كنتنخصص فصدره العريض .. ماعرفتش واش من كثرة ماتجمعو عليا الذكريات الخايبين ولا بصح كنت حاسة بهاد الاحاسيس كيفتكو بيا جزء بجزء ..
بلال:~ جوووري ششششت .. يااا قاسية القلب ..
انا:~ كيفاش قدرتي تعيش مع هاد المشاعر كلها هاد السنين كلهم ..
كنت كنقصد داكشي باش كنحس حتى انا وهو لي متحملهم من سنوات كيف كيقول .. انا غبى ايام وصافي عييت فحال شي حمل ثقيل على قلبي .. كيعذبوني فكل لحظة ..
بلال:~(همس فآذني) كرهت هادشي كله فواحد الوقت .. ولكن لو تعاود الوقت.. كنت غانبغي نعاود نجرب هادشي بنفس هاد العنف.. نتي بوحدك لي كتخليني نرتشف من كؤوس العذااب وانا مبتسم .. وعاجبني الحال ..
انا:~(زدت عنقته اكثر ) انا عيييت ..
اليوم التالي .. كيفما قالت لي نرجس تلاقيتها من بعد الامتحانات .. خرجت بشي نصف ساعة قبل .. ابتسمت برقة ووجهات لي كلامها ..
نرجس:~لبااس عليك ؟ كيف دوزتي ؟
حققت ف عيونها الفحمية عاد جاوبتها بدون نفس ..
انا:~ والو .. مادوزتش مزيان .. ونتي ؟
دارت يديها على وجهها .. وقلبت فمها بامتعضاض ..
نرجس:~ حتى انا شوية وصافي (حاولت تغير من الجو) الرطرباج يجمعنا ..
انا:~ ان شاء الله ..
نرجس:~ هادشي لي عطا الله .. لبااس عليك بعدا ؟ كيف بقيتي ؟
انا:~(ابتسمت باطمئنان) الحمد الله .. شوية دابا ..
نسيت تصرفها د البارح وماحاولتش نعمر به راسي .. وتعمدها تجي لمكتب بلال كل مرة .. من بعد كلامه د البارح تأكدت انه هو كيعتبرها مجرد طالبة عنده .. واخا يوقع لي وقع مايمكنش تكون شي حاجة اكثر من ذلك ..
صوتها خرج متحشرج فحال اذا حشمانة من راسها ..
نرجس:~ كنعاود نعتذر لك حيت ماجيتش عندك .. يسحاب لي غير شي حادثة صغيرة ..
درت يدي على يديها وتكلمت بدون اهتمام ..
انا:~ عارفة لي كاين .. ماديريش ف بالك .. ماشي شي حاجة اصلا ..
نرجس:~ نتي ديما كتقولي هكا ..
حركت كتفي بشرود .. واطلقت سؤالي بغفلة مني ..
انا:~ واش مارجعش مراد يقرا ؟
شافت فيا باستنكار فحال اذا مازال شاكة على شنو ممكن يجمعني بمراد وكنسول عليه مازال ..
نرجس:~لا ماجاش يدوز الامتحانات اصلا .. علاش ؟
عارفة كندفع براسي للهاوية .. واخا هكاك .. كنت مصرة نعرف مصيره .. اكيد ماغايعادوش يقرب مني مرة اخرى من بعد ما خدا لي بغا .. وانا نساحبت من حياته وتحملت مسؤولية خطأنا بزوج ..
رسمت ابتسامة عريضة على ثغري .. حتى وصل بريقها لعيني يمكن .. عاد جاوبتها باش ماتحس بوالو ..
انا:~ والو غير سولتك .. مجرد فضول ..
نرجس:~ نتي مزوجة دابا ..
رفعت حاجبي باستنكار .. فحال اذا بغات توصل لي رسالة خفيفة ضريفة .. غير تفكرت بلال .. ااه انا مزوجة به .. قلبي ولا كيضرب ستين مرة فالثانية .. معدتي تلوات .. الحرارة طلعات مع شرايني .. عروقي كيجيري فيهم الدم بسرعة كبيرة ..
انا:~ انا مزوووجة .. وكنبغي راااجلي .. كنبغييييييه بزاااااف .. مراد غير سولت عليه .. كان صديقي وصافي .. ( نبرة صوتي تخللها الآسف) وندمانة على داكشي لي درت له .. ماكانش بقصدي ..
شحب وجهها على فجأة.. مسحات على عنقها .. بغات تهضر ولكن عاوتاني اطبقت على فمها ..
نرجس:~(تلعثمت) واش بصح البروف عطاك الكلوة .. بسبب الكسيدة لي وقعات ليك سمعت شي وحدين كيقولوها ..
وسعت عيني شوية .. ظل عيونها كينعكس على ظل مقلتاي الفحمية .. اطبقت على جفوني ..وجاوبتها بدون تردد ..
انا:~ ااه .. هو لي عطاها ليا ..
مصرة تعرف مقدار تضحيته .. كيفما هي مصرة تذكره كل لحظة .. وتبين اهتمامها به .. واخا كتحاول تخبيه كلشي واضح .. وهي اصبحت مثل صفحة امامي .. اوراقها واضحين .. كنقراهم بسهولة .. سولتها بلا مانفكر
انا:~ نرجس واش عندك شي مشاعر اتجاه بلال ؟
توترو نظراتها.. وفمها شحب .. لعنت راسي لي عاوتاني لي حاولت نجبد معها موضوع فحالها .. ماشي هي بوحدها لي كانت كترعد حيت كشفتها .. انا بنفسي .. حرقة طلعات ونزلات فصدري .. فحال الجمر ملتهب .. ناره شاعلة فكل ذاتي ورماده كيحرقني بلهيبه ..
رداتلي كلامي.. لي صفعها بقسوة.. بجواب مخبى تحت قناع الظلم .. ولكن داخلي بغيت نبين لها ان هادشي خاطئ .. وهاد المشاعر غايخرجو عليها وعليااا .. اذا ماحاولت غير نفكر كيعجبها .. نار كتشعل فداخلي .. وتخليني فحال شي حمقة ..
انا:~ ماقصدتش ..
تكلمات بنفاذ صبر .. وتوترها كان كيفضح كلشي بالمقابل ..
نرجس:~نتي قصدتي .. كل مرة كتظلميني .. وانا ساااكتة ..
شديت فمعصمها قبل ماتمشي .. وحاولت نهدأ من روعي .. اطبقت على مقلتاي بصبر ..
انا:~هاد المرة فاهمة كلشي .. ( غمضت عيني ورجعت فتحتهم فيها بابتسامة اطمئنان) مابغيتش راجل يفرقنا .. وهادشي لي كتحسي به خاطئ انرجس وبلا ماتحاولي تخبي عليا ..
ارتجفو حدقتيها .. ووجها طغى عليه اللون الاحمر .. تنفسات بضيق ..
انا:~ (زدت بوجع ) هادشي غايخرج عليا وعليك .. ماغانقدروش نتهناو بزوج .. نتي لي كتفكري فيه ولا انا لي غانفكر انك كتفكري فيه ..
اخذت شهيق وزفير عميقين .. وانا كنحقق فملامحها الشاحبين .. لأول مرة كنحس براسي تصرفت ب اتزان و عقلانية ..
نرجس:~(جاوبتني باعتذار) سمحي ليااا ماااشي بيدي ..
شكوكي كانت فمحلها .. وهي كتوجه لي اعتذارها.. شفت عينيها لي غرغرو .. فنفس الوقت ضربة قاضية ضربات قلبي فصميمه .. يدي ولاو كيرجفو .. وذاتي تنملات عليا .. مشيت بلا مانعاود نتكلم معها ..
خرجت ل برا نشم الهوا .. عاد نرجع لعند بلال لمكتبه .. فحال اذا ناقصيني مشاكل خصني غير صاحبتي المقربة تكون كتحس بشي مشاعر اتجاه بلال .. غير ننوض من مشكلة نطيح فمشكلة اخرى .. والمشكلة الكبرى هاد المرة ملي شفت مراد قريب لفين واقفة عسل مقلتيه .. كيحدق فيا بثبات .. جاي قاصدني نيشان ..
حاولت غير نتحرك ولكن ماقدرتش .. فتحت عيني وعاود شديتهم على امل يكون تلاشى طيفه .. ولكن هيهات كان مازال ملاحقني بعسل عيونه .. وسامته لي كانت كتريحني من قبل .. فهاد اللحظة ذبحاتني بسكين الخوف .. بلعت ريقي.. غير زدت زوج خطوات كان لحق عليا .. وتكلم بغضب ..
مراد:~ تسنااااي ..
اطبقت على شهقة بين فمي باش متفلتش .. وتفضح رعبي .. فحال اذا جسده دابا عاد كيتلوا قدامي بداك السم .. زدت كنترعد ماقادراش نوقف.. ملي داز فعقلي طيف الذكرى .. نطقت والحروف كيتقطعو فحلقي ..
مراد:~ انا لي خصني نخاف منك على هاد الحسااب ماشي نتي ..
بغيت نغوت ولكن حلقي تجرح وزير على شنو بغيت نقول .. شهقة اخرى طلعات من اعماقي .. درت يدي على راسي ..
انا:~ مااااكنعرفكش .. انااا ماااكنعرفكش ..
غير زدت باش نمشي فحالي .. سمعت صوته عاوتاني لي خلاني نووقف من جديد ..
مراد:~ العجب نسيتي كلشي اجوري ؟
كلامه استفزني الشيء لي خلاني نكبح دموعي ونجمع قوتي كاملة .. حاولت نخفظ صوتي بعدا باش مايسمعنا حد .. وانفجرت فوجهه دقة وحدة ..
انا:~ ماااانسيت والو .. باقي مانسيت حقااارتك واستغلالك وكلشي .. باااقي مانسيت انك ماحاولتيش تتحمل غير جزء من غلطك .. وخليتي كلشي علياا ..
اعصابي بداو كينفذو مني ذرة ب ذرة .. كل ما كان كيثير فيا من اعجاب فهاد اللحظة تحول لنفور .. نفور قاتل .. ماحملاش حتى نشوف فوجهه ولا نسمع صوته .. اضفت بقوة ..
انا:~ودااباااا خرج من حياااتي ..
مع كل كلمة قلتها ملامحه كيتحولو والغيظ كيترسم على صفحة وجهه ..
السم مجددا كيقطر من حروفه فحال شي سهام كيصيبوني بين جنبات قلبي .. ويحطموه انش ب انش .. فحال الشوك لصق فعيوني كان غير داك الدمع الحار وهو كيعايرني من بعد ماخدا شنو مابغا .. غمضت عيني ببرود .. والحرارة لي مشات بين انفاسي خرجات على شكل زفرة طويلة ..
انا:~ وانا كان خصني نعرف انك ماشي راجل من الاول .. ضعيف حتى ماقدرتيش تجذبني عندك .. غير بكذووبك .. وحلووفك .. ووعودك الخاويين ..
هاد المرة رديت ليه الضربة بأضعاف .. عسل عيونه ارتجف .. وفحال اذا لكمته وسط انفه .. حاول يقرب مني ولكن تراجعت للوراء ..
مراد:~ نتي غير وحدة رخيصة حتى لو ماكنتش انا كان غايكون واحد اخر ..
رخيصة مرة اخرى كنسمعها من فم مراد .. هاد المرة ماهزات فيا والو .. من غير الدم لي فار فعروقي .. والتنفس لي تقطع فجوفي .. حققت فظل عيونه بصعوبة ..
وهزيت راسي ببرود .. حاولت نكبح جماح نفسي باش ماننهارش فأي لحظة .. وركت على الحروف لي خرجو من جوفي .. واضفت عليهم بزااف د الاستهزاء ..
انا:~ مانضنش يكون شي حد شماتة فحالك .. انا يمكن رخيصة ونتا كلمة شماااتة وبزااف عليك .. يمكن انا انجرفت ورا مشاعري .. ولكن نتا لي استغليتي هادشي ..
تلذذت بداك النظرة لي فعيونه .. يشوف انه لاشيء فخياتي .. فات الوقت لي اعتبرته هو كلشي .. واخا انا لي كنت خاسرة فهاد المعركة بأكمالها .. الشماتة ترسمات فمقلتاي .. كنتفكر كل ماداره .. واخا خدا مني اعز ماكنملك وخرب لي حياتي .. لكن الغلط كان ديالي من الاول ..
تنفست بعمق ..
انا:~ كنضن دابا مابقا عندك ماتقولي .. (شديت فصاكي وزفرت طويلا ) انا تحملت المسؤولية كلها .. واذا كنتي كتخاف نفضحك .. غير تهنى .. وكمل على نابقا من خيرك وماتعاودش تظهر فحياتي .. والا غاتكون شماتة زوج مرات ..
تلعثم فكلامه مالقا مايقول .. من غير عيونه لي اصبحو بلون الدم ..وداك العسل فحال الجمر .. مامصدقش انني نفس الوردة المذلولة .. لي كانت غير كتبكي فوجهه وتشكي ليه ..
ذرات الهوا دخلو لمسامي براحة .. حطيت داك الثقل كله فكفة واحدة ..
قلبت وجهي وتمشيت باش نرجع عاد هبطو الدموع من عيني حاررين .. ها نتيجة الثقة العمياء لي عطياها ليه فالاخير حصدتها على شكل كلام جارح .. حطم ماتبقى لي من كرامة وكبرياء .. سحقهم برجليه فحال والو ..
شفت امامي كان بلال خارج مع باب الجامعة ..وقف قلبي بالرعب .. رجعت شفت ورائي بذعر .. لكن طيف مراد كان تلاشى .. لدرجة توهمت انني هدرت معه .. او انه كان فهاد البلاصة من اساسه ..
توجهت عنده .. غير وصلت تكلم براحة .. عرفت انه ماشاف والو ..
اقتربت منه .. شديت فيديه بكل ماعندي من قوة .. بغيت وجوده يبعث فداخلي السلام .. وان وجود مراد كان غير كابوس لا اكثر .. ولكن الكابوس الحقيقي كان مازال حاضر .. ملي سمعت كلامه من ورائنا كينفذ لمسمعي فحال شي سيف حامي ..
مراد:~(ببرود) مزوجة ؟؟ ( زاد باستهزاء) ولا شي ضحية جديدة عاوتاني ؟؟
هو بنفسه كان مازال مصدوم انفاسه العنيفة كيطلعو بسرعة.. شد على يدي بقوة حتى حسيت بمفاصيلي غايطرطقو بين كفه .. همس بعدم تصديق ..
بلال:~ كيفاش .. هذاا ؟
مراد انبثق من العدم .. كيوجه لي كلامه .. لي بمثابة لكمات عنيفة كيضربو روحي بدون تردد .. زاد كيضغط على الجرح
مراد:~ ولا حتى هو غاتعطيه السم ؟ نسيت هو لي دافع عليك اخر مرة ؟
رجعت حولت نظري لمراد .. لي كيقطرو بالتشفي .. رعشة ضربات عضامي بقوة .. حقيقتي البشعة لي خبيتها بانت فلحظة وحدة .. فحال شي مسخ مشوه
سقط قناعه المزيف بكل بساطة .. بلال غايعرف حتى بقضية السم لي عطيته .. غمضت عيني بذعر ..
حتى سمعت بلال جانبي زئر بغضب ..
بلال:~ نتااااااااااا يااااااولد ...
كمل كلامه كيشتم ببذائة .. انفاسه كيطلعو بعنف بين قفصه الصدري .. شد فقميص مراد بغضب ..
بلال:~ اليييوووم غاااانقتل ديييلمك .. وغانووووريييك هاد الثقة فالنفس الزاااايدة .. وهااااد قذف المحصنااات لي راااك تخرجووو من فمك ..
بعد هادشي .. مالقيت غير جسد مراد مندفع للارض بعنف .. وفالمقابل كيلكمه بلال بقسوة .. وكلام غير مفهوم كيخرج من فمه .. مرة شتائم .. مرة يرجع يقول كلام بذيئ .. فحال اذا عاد ربط الاحداث واستنتج معامن غلطت ..
الامور تسارعو بعد ذلك بشكل غير منطقي فعيوني .. مرة ينوض مراد .. مرة يرجع يطيح ..والدم كيقطر بين سنانه .. واخا مراد.. قامته طويلة وبنيته الجسدية لا بأس بها .. ولكن بلال كان غاضب.. متوحش وكيشفي غضبه .. اكثر ضخامة منه بأضعاف
نظرة الاستهزاء لي فعيون مراد طفات .. وانقلب السحر على الساحر ..
جميع اللحظات لي حاولت نصلحهم من قبل دابا تهرسو .. وتهشمو فحال شي اناء زجاجي مابقا فيه مايتصلح ..
ماعرفتش كيفاش حتى دفعني .. حسيت غير بيديه جات فصدري .. والارض كتقبلني برحابة صدر .. مابقيت حاسة لا بالوجع لا بوالو .. غير سكاكين الكلام لي بينهم كيتغرز بين وذني ..
الطلبة تجمعو .. كيفرقو فيهم .. كل واحد كيأول كيف بغا وبالطريقة لي بغا ..
سمعت غير صوت بلال كيضرب فآذني .. كيتسابق مع ذبذبات الهوا من حولي .. كيحاول يرجع لعنده باش يكمل على مابداه .. لكن كيشدوه ..
مراد كان ماقادارش حتى يوقف .. غير الدم لي كيبان فوجهه .. وجسده كينهار على الارض ..
بلال:~هااااد المرة هرررست لك فمك ..(رفع ييديه بتحذير) والمرة الجااااية تهدر على مراااتي غاانزيد نهرس لديلمك عظااااامك ..
الدموع تدفقو بين عيني بغزارة .. المرارة مخلطة مع الوجع .. صافي كلشي سالا .. فحال شي سراب وتسرب من يدي فدقائق قليلة .. مدة طويلة حتى سحبو مراد بين ييديه عاد طل عليا بجسده وانفاسه الغاضبة كيفضحو ردة فعله ..
كنحاول نبرر ليه بأي طريقة وداك الغضب المستعير فجسده بأكمله .. لي كيتهز بوحده كيحرقني ..
دار لعندي .. وتكلم باستهزاء حارق.. كيلومني على كلشي مرة اخرى ..
بلال:~ ماااازال غانتفااهمو على هااادشي كاامل عندنا الوقت كلوو ولا لا ؟؟
غير من وجهه عرفت شنو كيستناني .. انا ماقادراش نتحمل هادشي .. مرة اخرى بريق عينيه طفا .. من بعد ماقلت امتلكت جزء من غفرانه .. فالحقيقة ماكان والو غير انا لي توهمت .. حاولت نلصق رجلي فالارض ..
انا:~ صااافي ردني لداااارنا ..
فتح باب السيارة .. عض على فمه بغضب .. ويديه تحطو فحال شي ملقط على كتفي كيهزني بلا رحمة ..
الطريق كلها وهو كينفث الهوا بين فمه .. بزفير حار كيحرقني .. الدموع مابغاوش يوقفو فعيني .. كيهبطو بوحدهم .. كل ما حاولت نوقفهم كيزيدو ينهامرو فحال الشوك .. كيقطع كل بلاصة من خدودي ..
غير فتح باب الشقة دفعني بالجهد .. فحال اذا نهار عرسي كيتعاود قدامي .. غير هاد المرة اكثر قسوة .. ماتوقعتش هادشي كله غايوقع ..
ماقدرتش نشوف قتامة وجهه .. كتحرقني .. مرة اخرى تعبير الالم بين اروقة عيونه كيمزقني ..
تراجعت خطوات اكثر بلا مايحاول هاد المرة يتبعني .. كان كيتعايش مازال مع الصدمة ..
شديت عليا الباب بالساروت .. غاننفذ من ردة فعله غير هاد اللحظة على الاقل ... حطيت راسي على الباب .. كنسمع صوت التشخشيخ .. ماعرفت شنو كيهرس .. غير الزاج لي كيتسمع صوته..
كلشي نهار من حولي .. فحال اذا حطيتي شي بساط من السعادة تحت رجلي وفالاخير تحيد ولقيت راسي كنواجه صلابة الارض من تحتي ..
اليوم كله وانا فالارض ناعسة قدام الباب .. مامهتماش بداك الحمى لي صابتني .. والضربة لي كتعطيني الحريق .. كنت خايفة فأي لحظة يهرسها عليا .. فإحدى نوبات غضبه .. وقت طويل حتى هدا كلشي .. واخا هكاك ماخرجتش من الغرفة ..
جنونه مع مراد كنت متأكدة غايرجع عليا بأكمله .. دوما غانتحمل نتيجة غلطي للسابق .. بلال عمره غادي ينسى هادشي .. واخا يفوتو سنوات ..
حتى جا ليل اليوم الثاني بسرعة .. فقت على باب الغرفة لي تصفق بعنف .. بحال اذا كينذرني بوجوده .. وبكل سهولة اقتحم عليا المكان .. ندمت لي ماشديتوش حتى هاد الليلة لكن شحال قدني مانهرب
حرك فكه بامتعضاض .. ملي لقاني فايقة .. وبريق شيطاني فعيونه السوداوتين .. كيكمل عليا ويكسر على شنو بقا لي .. حقق فيا مزيان .. ومسح على لحيته ببرود ..
بلال:~ توقعتك كتسنايني ..
جفلت من لهجته .. والعنفف لي فصوته .. اما هو زاد ضغط على شفتيه بسنانه .. كيمشطني بسواد مقلتيه ..
بلال:~ قلت غانلقاك ذبحتي راسك هاد المرة ؟ولا مشيتي من هنا ؟
زادو الدموع كيتدفقو من عيوني بذعر .. جميع مابنيته تهدم .. رجع لداك البرود القاتل .. سكين ثلجي كيدوز على صدري ويمزقه.. والعاطفة كلها لي فعيونه ذابت فحال الثلج فليلة صيفية ..
تنفست بعنف .. قبل مايخرج الصوت من جوفي .. مكتسي عليه العتاب ..
انا:~ علاش شديتي عليااا الباااب .. باش مانمشيش ندووووز الامتحااانات .. (ضغطت على قلبي ) شنوو مازال بقا ليك دير لياا ؟
حدقتيه ارتجفو بقسوة .. يديه لي معرقين كيبانو لي كيلمعو .. بالعرق .. طوا كمام الشوميز لي لابس وطلع النفس من صدره بزز ..
شهقت بذعر .. قلت يمكن ماردش البال ملي قالها مراد البارح فالصباح .. ماجيت نجاوبه حتى كان وصل لعندي كيهزني بعنف وصوته كيوصل لمسمعي فحال الرعد
بلال:~ شنووووووو قضية السم ؟؟
اعصابي بدات كتفلت مني ذرة ب ذرة .. كل ماكان كيهزني .. الصوت كيفلت من داخلي على شكل شهقات .. وفالاخير تحولو لهستيرية .. كنخرج كلشب .. بلا مانهتم ..
انا~ ااااااه انااااا عطييييتو السم .. واذاااااا رجع الوقت كنت غاانعاودها مرة اخرى .. حيت هووو تفلى عليااا وكذب علياااا .. حيت هوو لي جرني لعندووو .. كنت غااانعاااود نقتلو وعمرررري نندم ..
تفكرت كلشي .. كذوبه .. كنت فحال شي غريق كيتعلق بقشة .. وهاد النهار زاد خرب حياتي كلها ..
النفس طلع متلاحق من صدره .. كيشوف فيا بصدمة .. هزيت راسي بارتعاش .. كنمسح داك الما لي كيهبط من عيني وكيفضح تشجنجي ..
انا:~ انااا غيررر وحدة مررريضة.. (درت يدي على راسي بترجي) عطيني طلاقي .. نمشي فحالي .. اناا غير وحدة مريضة ماااعندك مادير بياااا ..
نمر متحفز .. هكا كان فداك اللحظة .. قرب حتى قبض عليا .. اذا كنت انا مريضة هو فداك اللحظة كان اكثر مني .. غير اصابعه لي انغزرو جنب عنقي .. كيزير عليا حتى كنشهق ويعااود يحييدهم ..
طلق من عنقي خلاني كنرد انفاسي .. باقي كنحس بأصابع كيحفرو فبشرتي .. ولكن يديه هبطو لشعري حتى ردو اللور بقسوة .. وهو كيتلذذ بداك الآلم لي على وجهي بكل قذارة ..
بلال:~ شحاال من مرة ؟؟(زاد ضغط على شعري) شحاااال من مرة ؟
مافهمتش قصده فالاول .. وليت فحال الاطرش .. ماعارفة شنو كيقول .. كنشوف غير فمه لي كيتحرك بعنف.. زاد رعبني بصوته ..
بلال:~ شحااااال من مررررررة قاااسك ؟
غمضت عيني ولصقت ف الحيط .. ماكان عندي حتى حل من غير الصدق ..
انا:~ مرة وحدة ..
قرب شفتيه لجانب وذني وجاوبني بصوت مخيف ..
بلال:~اذا هااد المرة غاتكون الثانية ..
قبل مانفهم كلامه .. زاد جذب شعري بعنف .. حتى تأوهت بآلم .. وصوته كيدخل لأعماقي فحال السيف ..
بلال:~ غاانااخذ حقي بزز منك .. لي عطييييته لدااك الشماتة .. وانا لي رااااجلك مااقادرش نوصل لك ..
بعد ذلك ماحسيت غير بتنفسه كيكتم تنفسي بغضب .. شفتيه فحال شي اعصار مدمر .. يديه كيقطعو قميصي بفظاظة .. كان متملك .. قاسي .. سافل ومتوحش .. كينهش فيا بدون رحمة ..
هرسني فأخير لحظة .. حتى قلت هو كلشي فحياتي ..هو لي ظنيته غايحميني من كلشي .. ماقادرش يحميني حتى من نفسه ..
كلما كنغوت كيزيد يكتم شهقاتي بأنفاسه العنيفة .. حتى ماقدرتش مازال نتنفس .. ذرات الاوكسجين بداو كينفذو من صدري .. بعد شوية وجهه .. وهمس على صفحة ملامحي بلهيب حار مخلط مع الغضب ..
بلال:~كنظن دابا غانتعادلو مزياان ..
اخر ايامي ؟ اخر أيامي غانتعرض للاغتصاب من طرف الشخص لي ظنيته غايحميني .. وغايكون هو كلشي ..حركت راسي بعدم تصديق ..
انا:~ ثايقة فيك ماغاتقتلنيش فحال هكا .. بلال ..
لكن بيين لي فالاخير انني مجرد جسد .. ماكيصلح لوالو .. غايفرغ فيه غضبه فنهاية المطاف .. ويخليني محطمة .. مكسرة من الداخل ..
لو كان تصرفه فأول ليلة كان غايكون مقبول من عقلي نوعا ما.. لكن حتى عطاني امل انه قادر ينسى كلشي .. رجع شيطان الغضب تلبسو بشكل وحشي .. وشفتيه كيطبقو على وجهي بتملك باش يثبت صك ملكيتيه الحصري ..
قدرت نتمتم بصعوبة .. والدموع كيغشيو عليا الرؤية ..
انا:~بلال .. ب.. ب.. (زادو شهقاتي) عفاااااك ..
زدت غمضت عيني وزيرت على جسدي اكثر .. كندفع فيه بيدي لعله يفيق قبل فوات الآوان .. لكن هو مصمم يدمر ما تبقى لي من احترم لذاتي ..
بلال:~ عااارفة شحال شوقي ليك كيقطعني من الداخل ونتي كل مرة معايا وماقادرش نتحكم فراسي بسااابك ..
تهربت عن قصد من عينيه المضلمتين .. بمشاعره العنيفة .. كتلين من اللهيب الاسود .. يديه زيرات على فكي حتى شهقت بصعوبة .. كيرد وجهي لجيهته .. دفعته بتشنج لكن ثقله كان مثل شي جبل كيطيح عليا ..
انا:~ مااديرش هادشي .. مااديرش هاادشي ..
بلال:~ نتي مرااااااااااتي .. مراااااتي .. (زاد قرب وجهه من وجهي .. غااناخذ حقي بزز منك .. غاديري عقلك فراسك ولا نتي لي غاتضرري ..
انا:~ ماتخلينيش نكرهك كثر من هكا ..
بلال:~(تكلم بفظاظة ) قلت لك هاد المرة غانعطيك سبب حقيقي باش تكرهيني وتكرهي رااسك ..
يديه هاد المرة زادت خشونته .. وهو كيحيد قميصي من على كتفي من بعد ماقطعه .. بينما الرجفة كانت شاداني حتى تعقد لساني ..
نشيج مكتوم خرج من ثغري .. مصحوب بشهقات عنيفة .. عاد تكلمت ..
انا:~ كنكرهك وغانبقى نكرهك حياتي كلها على هادشي ...
جسدي تصلب بقسوة .. يديه لي على جسدي .. بمثابة السكاكين كيدوزو على لحمي ويقطعوه بدون رحمة .. همست بوجع والدموع ماقادراش نوقفهم ..
انا:~ غاتندم فالاخيررر ..
قرب فمه لجانب اذني .. وهمس بصوته المتحشرج.. مثقل بالرغبة .. كيطلع الحروف من جوفه بزز ..
بلال:~ غاندير علاش نندم بعداا من بعد ..
الامر كان اسوء من انه اغتصاب جسدي .. كان اغتصاب نفسي بالدرجة الاولى .. اغتصب مشاعري بكل قسوة.. اغتصب الثقة لي درتها فيه .. ماكان حتى فرق بينه وبين مراد .. وانا كنشوفه كيحطمني فحال شي وعاء .. كيرده لأشلاء .. كيديه كيزيدو يغوصو فشعري بقسوة ..
حتى طلقت من نفسي .. على الاقل ياخذ هادشي مني مجرد جثة هامدة .. مجرد جسد غاتهزق الروح بين انفاسه وهو غايكون المسؤول على كلشي ..
تجرأ اكثر على جسدي .. اما انا زيرت على عيني .. ولكن عجبا غير لحظتين حتى لقيت راسي خفيفة .. ثقله لي كان جاثم فوق صدري تحيد عليا .. حسيت بيده توضعات على وجهي .. فحال اذا مامصدقش ..
بلال:~ جوووري .. يالله ..
بعد بتردد ورجع كيحط يديه على وجهي
بلال:~يالله .. شنو درت فيك ..
تراجعت بذعر .. وحتى هو تذعر من من حالتي .. يمكن داك البرود والروح لي شعرت بها فعلا كتغادر قفصي الصدري .. خلاوه يفيق من سبات رغبته المظلمة .. همست بصعوبة ..
انا:~ صاااافي بعد مني .. خررررج فحااااالك .. (تنفست بعنف .. ونشيج مكتوم كيطلع من صدري ) ولا خوووذ لي بغييييتي وبعد مني .. هااااااا نتااا كرهتيني فراااااسي ..
زدت كنتهز بتشنج .. جسدي كنحس به كيتقطع بالوجع .. اما هو جسده انتفض بعنف .. وعينيه مامركزينش على كلامي .. بقدر ماكان مركزين على يديه لي مطبوعين على وجهي وعلى عنقي .. واثار وحشيته .. لي ماكملش عليها .. حط يديه على وجهه كيمسح على لحيته بكل قسوة ..
بلال:~ ماقصدتش .. (تنفس بعنف) جوري ..
بغا مازال يبرر .. مازال يهضر .. ولكن فداخلي كانو الاف الكلمات .. ماقدرش يفهمهم .. خرجو غير على شكل دموع حاريين ..
بلال:~ غاتنساي كلشي .. غير لحظة غضب ..
رجع اقترب مني بحذر .. متوقع موتي يمكن فأي لحظة .. زاد جسدي تصلب حتى ماقدرتش نتنفس .. سمع صوته نفذ لوذني كيبررر به شنو كان غايوصل ليه .. واخا ماكملش لكن البداية كانت كافية باش نلمس مشاعر الخذلان من جديد ..
بلال:~ غانصلحو كلشي ..
غطيت جسدي بداك ليزار .. بأنفاس متقطعة .. هزيت راسي بذعر .. كنبعد من انفاسه لي بعيدة عليا قدر الامكان ..
انا:~ ما .. ما .. ماكاين مايتصلح .. بعد عليااا .. ماااغاننسى والو .. مااغننسااش نتا لي قتلتيني بييديك ..
حدقتيه ارتجفو مرة اخرى .. لأول مرة كنشوف عينيه مدمعين .. ببريق دموي .. ضغط على صدره .. كيأن بصمت .. فحال اذا كيتقطع من الداخل .. لكن آلمي كان بأضعاف .. وتقطاع الروح من عشرين سنة وانا كنحس به وحتى حد ما حس بيا ولا حاول يفهمني .. لكن هاد المرة كانت غير كل المرات .. الضربة لي اسقطتني من احلامي .. لأرض الواقع ..
خرج لمدة ربع ساعة او اكثر .. عاد رجع مرة اخرى .. وانا مازال فبلاصتي .. جامدة .. ماكنتحرك ماوالو .. كنشوف غير جدران الغرفة كيطبقو عليا .. ولكن ماقادراش نوقف .. الريح كيدخل مع قصبتي الهوائية ويزير عليا .. واخا مازال لابسة حوايجي من غير التريكو لي مقطع عليا .. البرودة كتطلع مع عظامي ..
بضع خطوات .. كيزيد يقترب .. حتى كرهت ريحة انفاسه .. كرهت كلشي فيه .. خط رقيق بين الكراهية والمشاعر لي كنت كنحسها من جيهته .. هو قطع داك الخيط .. وانا كنت واقفة فالوسط .. تمزقت معه ..
زدت زيرت على ديك اللحاف لي كيحميني من محيطه الهادر ..
انا:~ماكملتيش ؟
قلتها بعدم تصديق .. يمكن مازال فنيته كان يقضي عليا .. نبرة صوتي حاولت نخليها باردة ..
انا:~ هادشي لي درتيه ..
غطيت على وجهي ماباغيهاش يشوف داك التعبير .. وداك العبارات لي كيسقطو من خلف جفني ..
انا:~ مازال كيبان لك والو .. (حطيت يدي على عنقي وبعدته باشمئزاز) اثار يديك باقي هناا .. ومادرتي والو .. ولا هذا فنظرك ماشي اغتصاب .. واش الاغتصاب فنظرك هو كنت توصل حتى للأخير ؟ شنو داروه يديك وفمك ماشي اغتصاب ؟؟
تراجعو رجليه بخطوات للواراء .. عاد وقف مع الحيط ..راسه كيرده اللور .. كيزير على عيونه ويعاود يفتحهم .. لجتين من السواد .. قاسين لا فغضبهم ولا فهدوئهم ..
بلال:~ كتكذبي .. مشاعرك اكبر من انهم يتحولو فلحظة وحدة ..
دفنت وجهي جانب الوسادة والحروف كيخرجو من حلقي ثقال .. حسيت به رفع وجع .. وجسدي بأكمله كيثبت عيونه فعيوني بقسوة ..
بلال:~ اذااا نتي كنتي قادرة تكرهيني على هاد التصرف كنت غانكرههك قبل .. ولكن مااقادرش كيف نتي ماقادرااش ..(زاد كيحركني لعنده فحال اذا باغي يدخل كلامه لراسي ) قدرنا بزوج هذاا .. جرحتك وغانداوي جراحك .. ماااقصدتش ..
حط جبهته على جبهتي .. فحال اذا كيترجى داك القرب لي بيناتنا .. ذاتي كانت على وشك انها .. تستسلم له .. مشاعري الخائنة غاتتصرف ضد إرادتي .. غاننهار مرة اخرى بين يديه ..
لكن بادلته نظرة عيونه الملتهبة ببرود .. كان متلهف كيبحث على الجواب فأروقة عقلي .. حاولت نبعد عليه باشمئزاز منه ومن نفسي .. من لماسته لي لوثو روحي .. بلا تردد شفت فيه وجمدت صوتي ..
انا:~ كنكرررهك .. غانعاودها الف مرة .. كنكرهك ..
رخف يديه من على كتفي .. فحال اذا مازال مامصدقش .. شنو قراه فعيوني .. داك الانكسار وداك المشاعر لي كانو بمثابة شمعة كتشعل مرة بعد مرة لكن دابا طفاها بيديه .. عطاني بظهره ..
انا:~ اانااا غلطت .. ولكن على الاقل مابغيتش نتزوج بك من الاول .. (اشارت ليه بيدي والمرارة طالعة مع حلقي ) ولكن نتا ؟ .. نتاا تناسيتي كلشي وفالاخير خذلتيني بكل قسوة ..
الغرفة اصبحت باردة .. نشيجي كيتسمع حتى لعنده .. وانفاسه الخشنة انتشرو فالهوا فحال السم .. وصلو من عنده حتى لمسام جلدي ..
بلال:~ ماتلومينيش على اغلاطنا بزوج .. عمري غاننسا هادشي ..
رعشة خفيفة جرات بين دمي .. السم نبض فعروقي ..
انا:~ ملي ماغاتنساش هادشي .. وانا ماغاننساش .. كنظن وصلنا لنقطة النهاية .. وحتى حاجة ماتقدر تتصلح ..
سكت شحال بلا مايهتم لكلامي .. وهمس بصوت متحشرج ..
بلال:~ غانهدرو من بعد .. (طلعات غصة فحلقه ونزلات) غانوضحو الامور كلها ..
واخا ماكملش اغتصابه .. وقف قبل مايبداه .. ولكن الانكسار لي فذاتي صعيب يجبره بكلمة وحدة .. خرج من الغرفة بصمت .. بغيت نوض نمشي فحالي فهاد اللحظة .. نهرب من هنا للأبد .. ولكن شنو غانقول لهم .. الشيء لي دار فبالي غانخلي حتى للصباح ونغبر بدون رجعة .. غانمشي لأي مكان .. نداوي فيه جرح روحي بنفسي ..
بس :راه ماشي اغتصبها وقف قبل مايكمل .. حيت البعض غيسحاب ليهم راه تعدى عليها 💜💜لا راه ماكملش
جامدة العقل والروح .. نضت من بلاصتي بزز .. باقي ف نفس المكان فين نعست .. لا طير يطير ولا بشر يسير ..كنت ولازلت منهكة نفسيا وجسديا .. !
الليل كله وانا كنفكر فعواقب هادشي كله ..
تعمدت نجرحه اكثر باش يخليني نمشي فحالي .. نصرح بكرهي له .. باش يحس شحال هاد العلاقة حمل ثقيل علينا بزوج .. كيفما تصرفي فالاول كسر اي نوع من الثقة غايكون بيناتنا .. تصرفه مزق داك الخيط د الصبر ..
جمعت غير شوية من حوايجي بوجع مكتوم داخل صدري .. كيفما ماغانساش اسوء الايام لي عشتها هنا .. ضربه .. اجحافه .. واغتصابه النفسي .. ماغانقدرش ننسى اهتمامه ملي كنت مريضة .. دين الكلوة لي عطاني وكيف غانردها له .. غانرجع لدارنا لفين غانضمد جراحي وحيدة ونلعق كل تسمم لصق فذاتي ..
سمعت الدقان فالباب .. فالاول امتنعت انني نحل حتى سمعته مرة اخرى ..
غير فتحت الباب .. قابلني وجه عمتي وهند ببشاتهم .. سلمات عليا ونطقات بمزاح ..
عمتي:~ ياكما ماكنتيش ناوية تحلي ..
شافت فيا حتى هند والمرح كيطل من عيونها .. وهمسات بمكر ..
هند:~ ولا ماناوياش تدخلينا ..
كنت باقي مذهولة من وجودهم فهاد الساعة هنا .. الوقت المحتمل لرحيلي .. لكن ببراعة رديت ثباتي .. واغتصبت ابتسامة على فمي ..
انا:~ سمحو لي .. ماسمعتوش وصافي ..
هند:~ ماشي مشكل .. عارفييين لي كاين ..
اكتمت صرخة وجع بداخلي .. كل مرة كانو كيسولوني .. كنجاوب على قد الحال باش منفضحش تشنجي ..
تفكير عميق ترسم فعيونها السوداوين.. والذعر غطى على وجهها الابيض..
عمتي:~ ياكما بلال مخسر لك خاطرك ؟
اجفلت من كلامها .. خبيت كل تعبير ممكن يبان على صفحة وجهي .. بالرغم من الاستنزاف العاطفي لي عشته .. لقيت ابتسامة لا ضوابط لها بانت على ثغري .. هادشي بيني وبينه واخير حاجة بغيتها هي نفضح اسراري بهاد الطريقة ..
انا:~ لا بالعكس ..
بانت لي باقي مامصدقاش .. زدت غمضت عيني وفتحتهم .. طردت كل الضعف لي كيجري فدمي .. وتكلمت بصوت مغلف بنبرة هادئة ..
انا:~انا فرحانة معه .. وهو ماكيخسرش لي خاطري بمرة ..
زفرات بارتياح .. كنت عارفة نخبي كل تعبير ممكن يفضحني .. ارتخى جسمي بتعب ملي عاودت سمعت كلامها ..
عمتي:~ كنت باغيا تدوزو هاد رمضان معانا مجموعين .. (ابتسمت وزفرات براحة) ولكن انا وعمك غاديين للعمرة ان شاء الله ..
دارت يديها على يدي .. وكملات ..
عمتي:~ بغيتكم تجيو نتي وبلال تبقاو مع جميلة فالدار .. هند غاتسافر عند جدها .. ومانقدرش نخليها بوحدها ..
انقبضو اصابعي بشدة .. رعشة خفيفة جرات بين عروقي .. كل مرة كنهرب من هاد القدر كنلقاه تابعني .. مرة اخرى خصني نبين الامر عادي .. مايمكنش حتى للآن ونعرض رفضي وانني انا وبلال مامتفهمينش ..
انا:~ ربي يوصلكم على خير
بغيت نمشي فحالي .. ولكن .. مايمكنش نكسر فرحة عمتي وهي كتشوفنا كأزواج مثاليين .. السعادة كتقطر من علاقتهم ..
عمتي:~ ولكن بلال قال تبقى معكم هنا احسن .. تونسك اكثر ..
مالقيت راسي غير هازة راسي بالإيجاب .. والكلمات خرجو من جوفي واحدة تلوا الاخرى بابتسامة ..
انا:~ ااه .. مرحبا بها .. حتى انا كنبقى بوحدي النهار كله.. غاتونسني ..(شفت اتجاه هند) بقاي معانا حتى نتي اهند ..
انتفضو اعضائي بعنف .. على اثر دعوتها .. من بعد هادشي كله اي حاجة بيناتنا انا وهو تكسرات بمرة .. فين عمرهم هاد الاخطاء ممكن يتصلحو .. بلعت ريقي بصمت عاد جاوبتها.. باش تزيد تطمأن من جيهتنا ..
انا:~ امييين ..
وصل الليل .. وبلال مارجعش بتاتا .. جلست قدام التلفاز فالصالون.. كنسمع للصوت المنبعث منه بملل .. اكثر حاجة كنت كارهها .. انه غايرجع وغايشوفني مازال هنا ..
فتح مقدمة قميصه .. وجلس امامي بكل عنفوان .. بكل قوته .. رائحته طغات على حاسة الشم عندي .. جبروته لي كنضن عمره غايتنازل عليه .. كيزفر بضيق .. فحال اذا ماحملش هاد ذرات الهواء لي كنتشاركوهم من جديد .. حدقت فيه بلا مانجاوبه .. حتى شفت حلقه تحرك .. طالع ، نازال فحال صدره ..
بلال:~ شنووو عندك ؟
ابتلعت ريقي بصمت .. عاد حركت حلقي بجفاء ..
انا:~نتا لي قلتي غانهضرو من بعد ..
دار راسه بين يديه .. تفاحة ادم كتنزل وتطلع بين حنجرته واضحة .. فحال داك العرق لي نافر جنب عنقه .. عاد تكلم بغضب ..
بلال:~عييت من هاد التبرهيش ديالك وهاد قلة العقل .. وهااد المشاكل لي بدينا بهم هاد الزواج ..(زير على قبضة يديه) قلت ممكن كلشي غاتغيير مع الوقت .. يمكن داكشي لي ماكتحسيش به غايجي مع الوقت .. ولكن كيبان لي غيير كنا كنكبو الما فالرملة ..
غصة استحكمت جوفي .. مثل شي عظم مسنن وقف ومابغاش ينزل .. بعد صمت طويل .. ماهضرش هو .. وانا ايضا نفس الشيء التزمت الصمت ..حتى استجمع شتات نفسي وجاوبته بدون تعبير ..
زير على يديه .. لاحظت غير عروق يديه لي تنفخو .. وكيضربو بقسوة فساعديه .. لونهم واضح على بشرة يديه ..
بلال:~ عارف هادشي .. وهادشي لي غانهضرو عليه ..
رجع راسه اللور ورجع كيدقق معايا بعيونه النجلاوين.. سوادهم غامض .. محير .. فحال شي لجة عميقة .. ماكنقدر نفهم فيه والو .. ارتعدت من داخلي من مقلتيه لي كيضربو ذاتي ويلمسو شغف روحي من الداخل .. حتى زمجر فيا بغضب .. مثل شي نمر مفترس غلى وشك ينقض علياا .. وملامحه تغييرو ميتين درجة ...
بلال:~ كمية الاذى لي قدميته نتي كان اضعاف من داكشي لي درت لك .. وعاتبتك عليه مرات معدودين.. (افرج على ضحكة مريرة مخلطة بالاستهزاء) كضخمي الاموور حتى لواحد الدرجة ماكتصورش .. فحال اذا بصح اغتصبتك ولا تعديت عليك ..
رعشة خفيفة نبضات بين عروقي .. صرخة وجع مكتومة بقات فداخلي .. مابغيتش نجاوبه حتى يكمل كلامه كله ..
شاف فيا بقسوة .. لكن نوعا ما كان رجع لهدوئه ..
بلال:~ديمااااا كتبغي تباني فدور الضحية .. الكون كله كيدور مثلا من حولك ؟؟ اعتذذذرت منك فكل كلام قلته لك قبل .. اعتذرت ف كل تصرف داز بيناتنا وكان خاطئ .. نتي كتشووفي الحاجة فارغة من الكاس ..
رجعت انكمشت فمكاني .. وتكلمت بهدوء ..
انا:~ عارفة نقذتي حياتي .. وعطيتيني شي حاجة لي عمري نقدر نرد دينها ..
قاطعني بغضب .. باغيني ننسى كلشي من عنده ..
بلال:~ امر المرض .. خليه بوحده .. والجزء لي تعطاك .. كنت غانعطيه لأي حد كان فبلاصتك .. ماعندو حتى دخل فهادشي ..
عيونه رجعو محيطين باحمرار دموي مخيف .. كانعرف حالته .. وهاد الحالة بالضبط كانت غيررر كل ما شاهدته من عنده .. كل ساعة كيتقلب .. مرة هادئ حد السكون.. مرة مخيف حد الموت .. !
زادو حروفه قساو .. وكلامه اكثر قسوة من ذي قبل ..
بلال:~ عمررك فكرتي فغييرك .. ديما الانانية مسيطرة عليك .. كتشوفي انك نتي هي لي مجروحة .. نتي هي المكسورة بين هادشي كله .. كتلقااي الاعذار لكل افعالك .. كل حاجة درتيها كيبان لك مبررها .. وساهلة تتصلح .. ( تحرك حلقه بعنف) ماشي كلشي كيدور حولك .. كيفما كاينة الحياة بك ... كاينة بلا بك ..
عيوني تحركو من بلاصتهم .. دمع مرير لصق بين جفوني .. وهو كيقدم لي كلامه على طبق من فضة .. الصوت مابغاش يخرج من حلقي .. غير حروف مقطعين .. كيخرجو مع انفاسي اللاهثة ..
انا:~ واش تقدر تتجاوز هادشي شي نهار .. واش تقدر تنسى كلشي ؟
سكت .. وتنهيدة عميقة طلعات من اعماقه .. بين صمته كان الجواب .. لملمت شوية من كبريائي وهمست بقوة ..
انا:~ حتى انا مامامسحماش نفسي وكنظن ماتقدرش تسامحني شي نهار على هاد الغلط كله .. ولا تتجاوزه شي نهار ..
عقد بين حاجبيه .. والهواء خرج بين انفاسه ساخن .. حتى لفح بشرة وجهي من عنده .. بلا مايجاوبني على ظنوني قلب كلامه ..
بلال:~ دابا غاتحييدي عليااا هاد التبرهيش كله .. وغاتصرفي فحال اي مرأة فدار راجلها .. مابغيتش مازال المشاكل ..(رفع سبابته فوجهي) ماابغيييت حتى تصررف يكووون ناااقص .. واليديا وخواتاتي خط احمررررر ..
حدقت فيه مبهورة .. ناض وقف بضخامة جسده .. لي حجب الضوء والهواء من حولي ببراعة .. انفاسه مقطعين بين صدره .. عظلات ظهره تحركو بنوع من القسوة ..
بلال:~غيرر يفوت هاد الشهر .. غانبداو إجراءات الطلاق .. هذا غايكون ثمن حريتك .. وهادشي لي يصلاح باش ننهيو هاد المعمعة كلها ..
ماقدرتش نجاوبه مازال .. جسدي التصق فالمقعد .. لاحول لي ولا قوة .. سمعته صفق باب غرفته بعنف .. حرارة مرة اجتاحتني .. وجع كبير ضرب بين ضلوعي .. لونه قاتم .. وطعمه مثل الصدأ .. حسيت ان جزء كبير.. وكبير بزاف .. كيتقطع من روحي .. وخطيئتي هي السبب ..
قناع الذكريات الجزء الرابع
محتوى القصة
التنقل بين الأجزاء