فاق من سهوتو على صوتها.. نفض راسو لقاها قدامو كتحرك يديها قبالة عينيه.. عقد حجبانو وشاف فراسو مزال جالس فبلاصتو ما تحركش.. بقى غير كيرمش عرف راسو غير كان كيحلم حلم زويييييين.. شاف فيها ورجع قلب وجهو للجنب مزير على عينيه..
براء :اعوذ بالله.. الرجوع لله ابراء
تالاسين :شعندك؟
براء :(هز راسو بانكار) والو.. (هز دالعصير كيجغم منو) شغيكون عندي.. ما عندي والو.. كتشوفي عندي شي حاجة
تالاسين :وشعندك كنت كتحنزز فيا
براء:انااا.. بلعمى.. غير سهيت وصافي.. ما كانش بالي معاك.. كنت كنخمم فشي حاجة وصافي
شاف فيها مصغر عينيه.. وهما على فمها لي كتعوج فيها وشفايفها لي كيتحركو وهي كتهضر.. وبدا عقلو يدي ويجيب.. وكيتشاور مع شيطانو.. وواحد لعقل كيقولو نوووض خلي لخيال حقيقة..
نفض راسو وشاف فيها كيرمش.. ومسح وجهو كينعل الشيطان لي ما بغاش يتفارق معاه هاد النهار وحااالف يخرجها منو..
براء :ديري ********
تالاسين:(بصوت مفشش بلا ما تقصد) هاء.. غير بشتيتو شعندك.. زربتي علياااااا.. عاودو
براء :(وعينيه مزالين على فمها)
تالاسين :بفففففففف سهااااا عاود.. وااااا براء
براء:هاااااا.. اووووووف.. اري داك تيلي لهنا وغير سكتي ما تهضريش.. ما تحركيش فمك
تالاسين:(قوصات حجبانها) وعلاش؟؟
براء:ما تهضرييش ما تهضرييش.. (خدا تيلي من عندها) هاااا الكود.. غير سكتي..
كتبلها الكود وعطالها تيلي وخلاها فاتحة فمها فيه باستغراب.. هزات كتافها بعدم مبالاة ودخلات بارطاجات الفوطو وفلبلاصة بداو لي جيم ولي كومونط حيث شحال وهي غابرة.. شافتو نايض وحطات تيلي..
تالاسين :تسنى
براء :(بقى واقف كيتسناها تهضر) شنو
تالاسين :جلس نهضر معاك
براء :(عقد حجبانو وجلس) هاني
تالاسين :شني عملتي فداكشي ديالي؟
براء:هادشي علاش باغة تهضري
تالاسين :وفاش انهضر معاك مثلا
براء :(وقف غادي وكيهضر) مزال ما كاين والو.. نهار تكون شي حاجة انقولهالك..
ما عطاهاش فرصة فين عاد تزيد تبحث فيه كان دخل هو للبيت وخلاها كدور فعينيها ما حملاتش المنظر لي دارلها..
تالاسين :(شافت فمينوشة لي كدور حداها) راه كنقولك دحش كتقوليلي لا...
دخل هو لبيتو وتلاح فبلاصتو غمض عينيه وحط يدو على جبهتو ويد على صدرو.. وتفكر هاد الصباح فاش خرج ومشى للكوميسارية..
دخل عاقدهم من بعد ما عيطلو صاحبو بشرو بالخبر السعيييد وبلي شدو دوك الرباعة.. هاز مناخرو للسماء وكيعض فشفايفو كيتحلف فيهم.. فتح البيرو ودخل مدرم وهما يطيحو عينيه على السمسار جالس مينط وحاني الراس.. عقلو مزياااااان ما يتنسالوش.. غير شافو ركبوه الجنون وتلاح شااانق عليه وهزو كيعطيه فالطروش والركل وهو ما كيشوف قدامو غير صورتها وهي كتبكي وتشهق فاش جات عندو ومزااالين دموعها ما بغاو يتنساولو.. وما كيهضر ما كيتكلم غير كيعطيه وعينيه خااارجين فيه بالاعصاب وصاحبو كيفك ويجر فيه وهو يبس عليه يبسة ما طلقو حتا نساه حليب لبزيزيلة دميمتو.. جرو صاحبو وبوليسي اخر وبعدوه عليه وهو عينيه مزالين خارجين..
براء :طلق نتا وياااه طلق.. الشماااتة لي حطك.. (كيتنتر ويضربو بالركل وهما كيجرو) دموعها انحلبهم من الكلب لي حطك.. لقيتوها غشيمة دورتوووها بيناااتكم.. واااا طلق اصاااحبي طلق
دازت فيها وطلعات ديريكت للبيت.. ودخلات مدرمة لقاتها جالسة متكية حاطة ماسك على وجهها والخيار فوق عينيها.. غير سمعات الباب لي تحل مجهد ناضت مطفووجة حتا طاحو لخيارات وخرجو عينيها..
وقفات بيسان عند راسها مخرجة عينيها وكتبكي ودموعها سايلين وزينب بغات غير تهضر لقات لماسك شاادلها وجهها ما خلاهاش حتا تحرك فمها وبزز باش نطقات..
زينب:بيسان.. مالك
بيسان:ماااالي.. كتسقسيني مااالي؟؟ يانا انحماق انحماااق اههئ انهنههئ خرجت على راسي وعلى خوتي وعلى عائلتي بيدي اهئ اههئ اههئ.. ندددددمت.. نددددمت حيث تبعتك.. خرجنا على كلشي بهاد الفعلة اههئ اههئ حتااااا حد ما فرحان.. علاااااش اعزيزة علااااش اههئ اههئ ياك قلتيلي كوولشي ايكون مزياااان.. حتا حاجة ما مزيانة.. حتا حااااجة اههئ يانا ضيعت كوولشي بيدي.. عمري نسمح نرااااسي اههئ اههئ
زينب:(بغات تشدلها يديها وهي كتحرك فمها بزز) كاالم.. كااالم
بيسان :(تنترات منها بعصبية) ما تشبرشيييي فيااا..مزال عندك الگانة لي تعمل الماااسكاات.. هادشي لي بقاالك.. كولشي ترون ونتينا هنا مكيفة وما هامك واااالو.. حنا راه خسرناااا كلشي ومزااالين انخسرو نهار يعرفو شني عملنا اههئ اههئ.. (كتمشي وتجي وتدوز يديها على شعرها) نهار يعرفو ما ايسمحولنااااشي.. لا تالا لا براء لا سعد.. حتا واااحد.. وبابا.. بابا ايسخط عليااااا اههئ انهنههئ بابا غادي يتبرااا مني على هاد الفعلة.. كلشي الا بابا.. شني عملت يانا شني عملت شنيييييي عملت اههئ انهههئ
شافت فيها محمرة عينيها وكلها كترجف.. وخلاتها هي واقفة مخرجة عينيها ودموعها بداو ينزلو وتمات خارجة بحالها.. يله غادي دور مع الدورة وهي تخرج عينيها.. شهقات ووقفات فبلاصتها.. وزيرات على فمها ودموعها كيسيلو وكتحرك راسهاَ بلا..
خرجو عينيها فمها لي واقفة قدامها وعينيها مغرغرين.. قبل ما تهضر ولا تكلم هزات يديها حتاااااا لفوق ونزلات عليها بتصرفيقة للحنك حتا دار وجهها وشدات فالحيط قبل ما طيح.. خرجو عينيها من بلاصتهم حيث عمممرهم ضربوها..وقبل ما تفطن بالدقة شداتها رؤيا من شعرها وهزاتلها راسها حتا تقابلات معاها وعطاتها للحنك لاخور وخلاتها واقفة شادة فيه وبدات كتشهق فبلاصتها وهي حانية الراس...
ما متيقاااش لي سمعات.. شافتها فاش كانت داخلة كتبكي وتبعاتها مخلوعة تشوف مالها.. وتصدمات من لي سمعات.. وتفكرات براء وتالا لي قالولها بلي شي حد لعب معاهم هاد اللعبة وفهمات لبلان كاااامل بلحق علاش مزالة ما عارفة.. شافت فيها باستحقار ودموعها هابطين..
بيسان:(كتبكي) ماما.. خليني نشرحلك
رؤيا:(خرجات فيها عينيها حومر بالدموع) شششش.. قطع حسك.. سككككت
شافت فيها كتغلي وجراتها من يديها غادة بيها لبيتها وبيسان غير كتدمع موراها.. وجهها ايطرطق بلحمورية بقوة ما بكات..دخلاتها ودفعاتها حتا كانت اطيح وسدات الباب ودار عندها كتغلي..
رؤيا :(شداتها من دراعها حتا غرزات ضفارها فيها) كيفاش ماااشي لخااااطرك.. عزيزاك ماشي غريبة عليها.. ولكن نتينا.. نتينا ابيساااان.. هاديك راها ختتتتك لي عملتي فيها هادشييي.. هاديك ختك وخاك لي شوهتيييي صورتوم قدامنا وقدام باااااك.. شوفتي فاااين وصلتونا كاااملين بينا
بيسان:(طاحت على صدرها مرخية) والله مااا لخاااطري اماما اههئ انهنههئ حسوووو بيا حتا يانا راه كنموووت.. ماشي لخاااطري.. نددددمت ولكن راه مااااشي لخاااطري..
بيسان:(حطات قبضتها على صدرها كضرب بيها جيهة قلبها وهي اطيح فبلاصتها وكتبكي) هاااااااادا اماما هااااادا لي بزز عليااااااا اههئ اهههئ اععععع انهئ.. هااادا اماما اهههئ اههئ هاادا لي ما كرهتشي نقلعوووو من مووطعو ونتهنااااا اههئ انهنههئ هاااادا سبااااابي فكلشييييي
حطات راسها على صدر رؤيا وهي هاااابطة كتبكي ودراعها مزالة فيد ماماها حتا طاحت فالارض عند رجليها وراسها عند كرشها..
بيسان:كنبغيييييه امااامااا.. اههئ اهههئ كنبغيييه وهو ما حاسشيييي بيااااا انهنههئ اههئ كنبغيييه وقلبي كيتقططططع اههئ اههئ
هزات راسها فمها وهي مزالة طايحة وشداتها من رجليها ودموعها كيتلاقاو فذقنها.. ورؤيا ججااامدة فبلاصتها كتشوف فيها مصدوووومة..
بيسان :علااااش اماما غير قولي علاااااش اههئ انهنههئ اهههنععهئ.. علاااش ما بغاانيشي.. علاااش بغاااها هي.. هاديك راها ختيييي ختييي اعباد الله.. بغاااااا ختي اماما ويانا ما بغااانيشي اههئ اهههئ شني لي فياااا ماشي هو هداااك.. واش خااايبة.. ما مزياناشييي.. والله حتااا كنبغييييه اماما اههئ اهههئ كنبغييييه وحتا واااحد ما حاااس بيااااا..
ترخات رؤيا وطاحت حتا هي جالسة حداها وكتشوف فيها كتسرط فريقها وعينيها خاارجين فيها.. عنقااتها بيسان وزيرااااات حاطة راسها على صدرها كتشكي وتبرد كيتها.. وجهها ما بقى وجه بقوة الدموع.. وهي كترجف وتشهق وكلامها كيتقطع مع الشهقة..
رؤيا:(مبهوضة) كتبغي سعد؟
بيسان:(زيرات عليها وخشااات راسها فصدرها كثر) بزاااااف اماما بزااااف اههئ اههئ كنبغيه كثر ما كتصور انهنههئ من نهااار عقلت على راسي ويانا كنتسنى نهار لي يبغيني فيه حتااااا هو اههئ اههئ ولكن هو بغااااها وما بغااانيشي.. بغااا ختي وما بغااانيشي.. علاش اماما علاااش اههئ اههئ غير قولي علاااش ماشي يانا اههئ اههئ اععهنهعع
رؤيا تخلطو عليها لعراااارم.. شهااد الحالة ولادها طايحين فيها.. كل واحد وقلبو فين معلق.. شدااااتها الدوخة وسط هاد المعماعة.. شكون تلوووم ومعامن تجي.. للحظة نسات كلشي وبقات كتبانلها غير بنتها لي طااايحة قدامها ومعنقاها وكتبكي وتشهق وحالتها حااالة.. نسات كلشي وبقات كتبانلها غير كبدتها لي كتشوى قدامها.. ودمعو عينيها كثر ونزلو كيتكركبو حتا كيطيحو على راس بيسان.. وبلا ما تفكر زوج مرات جراتها عندها وخشااتها فصدرها كثر وهي كتبكي معاهاَ..
بقات معاها شحااال وهي غير معنقاها وكطبطب عليها وتبكي معاها.. خلاتها تخوي قلبها فلبكى حتااا عيات وتهداات وترخات بين يديها.. وهزاتلها راسها كتمسحلها وجهها وهي براسها خاصها لي يسمحولها.. تبسماتلها وباست جبهتها..
حركاتلها راسها باه.. شداتها رؤيا وقفاتها وجلساتها فوق الناموسية كتمسح على راسها وبدات كتسمعلها وهي كتعودلها وتبكي..
🎗️🎗️🎗️🎗️
كان متكي كيحاول ينعس.. ويله بدات تديه عينو وهو يفتحهم وناض طافج فاش تفكر القضية لي قالو عليها الكونسييرج.. بلي شي حد جا عندها.. تلفااتو فاش دخل وكملاتلو فلغذاء وما بقاااش عاقل ومشات من بالو.. وهو ينوض بالجرا تم خارج عندها عاااااقدهم.. مع خرج مع كيلقاها جاية من الكوزينة كانت كتجمع فالطبلة.. زفر وقرب عندها وهي وقفات فبلاصتها كتشوف فيه باستغراب.. الطريقة لي كان جاي بيها قاصدها وعينو فعينها معصب جاتها غريبة..
تالاسين :شعندك
براء :(وقف قريب ليها) شكون جا عندك
تالاسين :هااا... شكون جا؟
براء:(بصوت هادئ ولكن نبرة قاصحة) شكون ججا عندك قباايلة.. سعد ياك؟
تالاسين :علاش كتسقسي
براء :شنو قالك؟
تالاسين : ماشي شغلك..
وتمات غادية وهو يشدها من دراعها حتا تقصحات وهو يبعد يديه كيشوف مالها.. بانتلو يديها فيها شراطي رقااق زورق.. باينين دصباع شي حد.. شد دراعها بين يدو وهزها لعندو كيشوغ فيها ويحقق.. وما حدو كيشوف ما حدو كيتأكد ويزير على فمو.. سرطات ريقها متوترة من قربها ليه بديك الطريقة خاصة وانه ما لابسش عليه من الفوق وجرات يديها من يدو ورجعات لور.. وهز راسو فيها كيهضر تحت سنانو..
براء :هو لي دارلك هادشي
تالاسين :شكون؟
براء :(بحدة) سعععععد..
سرطات ريقها.. بقات كتقول كيفاش عرف بلي جا عندها.. وهي ما كانتش باغاه يعرف باش ما يزيدش ينضو الصداع.. ساعة لي خافت منو طاحت فيه..
زرب على السروال زولو دغيا وهي مزالة عاطياه بالظهر ورماه فالارض حدا رجليها.. حسات بداكشي قاسها وحدرات عينيها تشوف.. بانلها سروالو.. وهي تخرج عينيها.. وبلاااا ما تفكر زوج مرات ضرباتها بجرية بلااا ما تشوف فيه وتمات خارجة غطططرطق بلحمورية.. بلحشمة والاعصاب.. ما حملااااتش يزول وهي حداه.. ولكن هو عارفها معكسة كون نا دارشش هاكاك كاااع ما تخرجلو.. بدل عليه بالخف وهو حاط بين عينيه سعد وهو شادها من دراعها وكيزير..
لبس عليه دغيا.. هز سوارتو وتم خارج وهي تعرضلو فالباب..
تالاسين :ماشي عندو؟
براء :بعدي من قدامي
تالاسين :لا.. ما انخليكشي تمشي..براء بركة من المشاكيل عافاك.. يكفي لي حنا فيه
براء :تااالااا.. بععععدي
بغى يفوتها وهي تخلف بالزربة ووكات بظهرها على الباب وشادة لبواني بيديها ما مخليالوش منين يفتحها..
تالاسين :لا.. ما انبعدشي..
براء :(زفر بعصبية) بعدي اتالا..
تالاسين :لا ولا ولا ولا.. مشي تجلس ما عندك فاين تمشي
براء :(زير على فكو) تااالا.. ما تجهلينيش
تالاسين :وادابا علاش اتمشي عندو علااااش..
براء :(شدها من دراعها) عجبك هادشي لي دار فييييك..
تالاسين :(زولات يديها من يدو وهضرات بصوت خافت كترجاه) وا دابا صافي عافاك.. ما وقع والو.. غير اتكبر الموضوع على والو.. راه ما ناقصنا صداع.. واصلا هو لي فيه يكفيه
براء :هداك ما ايتهنى حتا نهرسو من رجليه باش ما يعاودش يزطم هنا ويقرب جيهتك
تقدم بغى يحط يدو على الباب وهو تجي قبالتو حتا جا راسها فصدرو.. وحنات راسها حشمانة وكدور فعينيها وهو يرجع لور..
براء :(خنزر فيها) حيدي من قدامي حسن ليك
تالاسين :(عقدات حجبانها ويبسات فبلاصتها مزيرة على الباب)
براء :نتي ماشي دالهضرة
شدها من دراعها وبجرة وحدة بعدها و جابها موراه وفتح الباب وهي تشدو من تيشورط..
تالاسين :ما تمشيشي.. عافاك..
براء :(شاف فيديها لي شاداه بيها وطلع حاجبو) خايفة عليه
تالاسين :يانا ما باغة صداااع..
براء :صداع هو لي جبدو
بقات كتشوف فيه.. عرفاتو مقصح راسو وما ايديهاش فيها..وهزات عينيها فيه بحزم وهي مزالة شادة. فيه..
براء:(شدها من دراعها بلا ما يقصح الشدة وجرها عندو كيسوط) الا سميتك مراااا ديريها.. واخة تكوني تحت سابع ارض انجيبك.. وهاد الدار هي لي ما اتخرجيش منها
رخا منها وتم خارج وهي تزير يديها على تيشورط حتا بغا يتقطع.. دار وشاف فيها وتنتر منها..
براء :طلقي بركة من المرض..
خرجو عينيها وهي كتشوفو غادي.. وبلا ما تفكر سدات الباب وتبعاتو كتجر فلكلاكيط لي فرجليها.. وهي مزالة بسروالها القندريسي وتيشورطها والشعر مجموع بمقبط.. يله وقف كيتسنى السانسور يفتح ووقفات هي على جنبو ما جات فين تهضر.. حتا كيسمعو صوت محلون من موراهم..
وصال:ميسيو براء.. ياك لباس
كانت واقفة فباب دارها.. باينة عاد خارجة.. ضاربالك الحطة ديال بصح..كسوة فلحمر فايتة الركبة بشوية وججاياها على لاطاي.. ويديها طايحين على لكتاف.. ومسرحة شعرها وعطرها واصل حتا لعندهم وصباط ديال الطالون كحل..ومع هي عامرة شوية جات من داكشي.. طلعاتها تالا وهبطاتها..ودار هو شاف فيها مخنزر وهي كتشوف فيه وترجع تشوف فتالا وكتبسم.. قبل ما تزيد تهضر تفتح باب السانسور ودخل وتبعاتو هي قبل ما يتسد.. ودار شاف فيها مخنزر..
براء :فين تابعاني
تالاسين :رجلي على رجلك.. ما بغيتيشي تجلس حتا يانا انمشي
براء :(مسح على وجهو) اتعصبيني وما ايعجبكش الحال
شافت فيه بنص عين وربعات يديها مكمشة فمها وكضرب برجل وحدة فالارض وهو طلعها وهبطها وطلع حاجبو.. جات كضحك وهي بسروالها القندريسي ولكلاكيط.. ومع ضعيفة جات فحال شي بوكيمون.. تفتح السانسور وقلب وجهو وتم خارج وهي تابعاه كتحاول تلحق عليه..
تالاسين :براء بلاش عافاك.. براء كون تسمع.. راك غير غادي تجبد الصداع.. صافي ما وقع والو.. براء
هي تابعاه وهو ما كيجاوبهاش اصلا والكونسييرج حال فمو فيهم ومتبعهم بعينو حتا طلع براء فالاوطو وطلعات هي من الجيهة لوخرا..
براء :نزلي بحالك
تالاسين :راه ما انخليكشي تمشي..
براء :(بحدة) تالاسين.. هبطي بحاااالك
تالاسين :(خنزرات فيه) وا كنقولك ما تغوتشي.. عاجبينك حلاقمك
شاف فيها هو مطولا مخنزر وكيطلع فيها ويهبط وهي كتشوف قدامها وتعوج فمها وفلخر زفر وقلب وجهو. . وكسيرا..
خلاتها ناعسة.. وغطاتها مزيان وحنات باستلها راسها.. وخرجات كتسوط وعوالة على خزيت.. ومشات نييشان قاصدة بيت زينب.. دفعات الباب ودخلات مدرمة وسداتو موراها.. وناضت زينب قافزة من بعد ما كانت جالسة حاطة راسها بين يديها كتخمم فهادشي لي وقع..
خرجات فيها عينيها فحال الا كبيتي عليها سطل ديال الماء بااارد.. هرب الدم من وجهها.. ويبسات فبلاصتها كتسرط فريقها..
رؤيا :ماشي حشومة عليك.. شني استافدتي دابا.. شني ربحتو بزووج.. هي صغيرة وما كتعرفشي ونتينا شني؟؟ نتينا راك كبرتي ومزااالة ما بغيت تعمل عقلك.. ما فكرتيشي فهادشي قبل ما تعملوو.. ما فكرتيشي فاين يقدر يوصل..
زينب:انا درت هادشي لمصلحتهم.. وولادك لي كتهضري عليهم راهم حفاادي.. بغيتيني نشوفهم كيتعذبو ونسكت
رؤيا :ودابا شفتيهم مهنيين.. ما كيتعذبوووشي.. علاامن كضحك.. شفتي بيسان؟شفتي حالتها؟؟ وتالا وبراء لي تبرا منهم فراس هادوك هانيين؟؟ وسعد.. سعد ما بقاشي فيك.. شفتي حالتو.. وحنا شفتبنا هااانيين.. نتينا راك رونتي كلشي بهاد الفعلة
زينب:كلشي غادي يتقاد.. خاص غير شوية دالوقت.. وسعد اينسى وايرجع يبغي بيسان.. وحتا تالا وبراء غادي يتفاهمو.. وفراس راه طال الزمان ولا قصار غادي يسمحلهم.. وكلشي ايرجع كما كان
رؤيا :من نيتك.. كتهضر فحال الا ما عاملة واااالو.. ولا ما تقادشي كلشي؟؟ انلعبو لقمار بحياتهم ولا كيفاش؟
زينب:ايتقاااد..ايتقاااد انا مأكدة
رؤيا:سمعني نقولك.. ولاادي خطيهم عليك.. وخاااصة بيسان.. هاديك صغيييرة وما كتعرفشي.. وغشيمة وقلبها كيحركها.. ما كتعرفشي تفكر بعقلها.. كلشي الا ولادي.. راه ما نعقل على حتا واحد على قبلهم.. ما تخالينيشي نوصل معاك لشي حاجة لي ما اتعجبني لا انا لا نتينا.. هادشي لي وقع وقع.. وما اتنفع لا هضرة لا غوااات.. بلحق من هنا لفوووق فرق ولادي عليك.. سمعتيني فرقوم عليك.. وبلاناتك خليهم عندك..
حمرات فيها وخرجات وزدحات الباب موراها.. وخلاتها واقفة فبلاصتها..حتا طاحت على وقفتها جات جالسة وعينيها مغرغرين كتشوف قدامها.. هي تقدر تكون ما فكراتش فالعواقب.. ولكن لي دارتو ما دارتوش بسوء نية.. دارتو حيث شافت فيه مصلحة حفايدها.. ودابا الا عرف فراس شنو دارت شنو ايقدر يدير.. خافت يمشي يتبرا منها عاود وهاد البرا محااالش يسمحلها..
🎗️🎗️🎗️🎗️
غادي فالطريق مكسيري وححاط مرفقو على السرجم ويدو كيحك بيها ذقنو واليد لوخرا كيسوق بيها.. وهي جالسة قدامو كتفيفري برجليها وقلبها ايخرج وهي كتشوفو علاين يوصل لدار سعد.. حيث عرفات الطريق.. وهو غير ساكت ومحمر وكيشوف قدامو.. سرطات ريقها ومالت عندو بالجنب كتهضر بشوية وكترجاه..
تالاسين :عافاك ابراء.. كون كتسمع وخلينا نرجعو.. عافاك..
دار شاف فيها مطلع حاجبو.. زعما كتلعبلو بالوتر الحساس.. وقلب وجهو كيشوف قدامو ويسوط وكيخمم فيها فراسو.. هي شافتو ما وقفش ورجعات شافت فيه..
تالاسين:ياك عمري ما طلبتك على شي حاجة.. عملي خاطري عافاك ورجعنا فحالنا.. عافاك والله ما قادة على الصداع
غمض عينيه وتنهد وهو مزال كيشوف قدامو وقلب وجهو للسرجم كيتنفس لهواء دربي ورجع شاف قدامو.. وقلب الطريق خذا طريق وحدة اخرى.. وهي غير شافتو قلبها وتنهدات بارتياح.. عرفات راسها اثرات عليه بكلامها وما قدرش يردهالها فوجهها.. وخاصة انها كانت كطلبها بطريقة تخلي لحجر يرطاب.. عسااااا هو لي غير بشوفة وحدة منو كتقتلو وتحييه..
شافتو وقف فوق راس الجبل.. ولبحر قدامهم.. عرفات راسها فأشقار.. وقف الاوطو وتنهد مرجع راسو لور ونزل من الطوموبيل ووقف موكي عليها ويديه فجيابو.. وصوت لبحر كيتسمع قوييي.. خاصة ان المنطقة عااالية.. شافت فحالتها.. وهزات كتافها وخرججات تبعاتو.. ووقفات حداه مربعة يديها وكتشوف فلبحر قدامها.. وبزوجهمَ ساكتين..
شافت فيه.. ملامحو طلقو فحال الا تقول ما كانش معصب عاد دابا.. كيشوف قدامو وساهي وما رادلهاش لبال هي لي كتشوف فيه بنص عين.. تبسمات فاش عرفاتو دارلها لخاطر.. وقلبات وجهها كتشوف حتا هي قدامها وتنهدات براحة.. تنفساااات هواء البحر لي كيرد الروح فالواحد.. وبقات ساكتة شحااال.. حتا رجع بيها بالها لذكريات قدييييمة.. تنهدات وبصوت هادئ نطقات..
تالاسين :عرفتي فوقاش اول مرة شفت لبحر؟
فيقاتو من سهوتو بصوتها.. ودار شاف فيها ساكت.. شافت فيه حتا هي ورجعات قلبات وجهها كتشوف فلبحر..
تالاسين :قبل ما نتلاقاك بليلة وحدة..
براء :(عقد حجبانو كيسمعلها باهتمام)
تالاسين :كنت يله وصلت لطنجة.. ما كنت عارفة لا شمن مدينة يانا.. ولا فاين انمشي.. وحتا لهضرة ما كنتشي كنفهما.. وديك ليلة تلاقيت بزينب.. مزااالة عاقلة عليها عمرني نساها.. حتا هي من ناس لقلال لي دارو فيا خير عمري نساه.. كنت يانا وياها كنتمشاو على الكورنيش جيهة المرصى..وتما كانت اول مرة نشوفو.. ديك التبوريشة لي حسيت بيها والماء ديالو كيقيس رجلي مزالة لحد ساعة كنحس بيها كلما شفتو..
براء :(شاف قدامو) لبحر كيخليك تحس بالراااحة.. تقدر بلا ما تهضر ولا تكلم تخوي كااع لي فقلبك واتحس بيه سمعك ومشاركك همك
تالاسين :الصمت بعض المرات كيوصل شي حوايج واخة تعيا تهضر ما يوصلوشي..
سكت شحال وحتا هي سكتات.. وعينيهم على البحر والشمس لي بدات كتعلن الوداع.. تنهد تنهييدة طويلة ونطق..
براء :عارف قصتك كاملة
تالاسين :(شافت فيه عاقدة حجبانها باستغراب) شمن قصة
براء :قاسيتي بزاااف فصغرك
تالاسين :(سكتات كتشوف فيه عاد نطقات) باش عرفتي؟ خالتي عاوداتلك؟
تنهدات وتبسمات ابتسامة خفيفة.. وعينيها الخوضر ضارب فيهم الشعا دالشمس لي بدات كتغرب.. وهو كيشوف فيها عاطياه بالجنب كتشوف قدامها.. مشات عينيه لجنب فمها لي تحفرات فيه الغمازة الصغيرة مع ابتسامتها.. ورجع شاف فعينيها.. وهو مسحور بيها..
تالاسين :رجلي لي داوني عندها.. كنت هربانة من البوليس وكنفتش على دار الأيتام حتا عييت وجلست فباب العمارة.. ما حسيتشي براسي حتا نعست.. وفاش فقت جبرتها قدامي..وهي طلعاتني معاها للدار وعاوناتني.. كون تشوف الفرحة لي فرحتها فاش جبرت شي واحد كيفهمني ههه
براء :عارفاها فاش كانت خدامة؟
تالاسين :(شافت فيه مبسمة) ما كنتشي عارفة.. بلحق من بعد عرفت.. وما كيهمنيشي.. كاين ناس كيكونو غااارقين فلوسخ ولكن قلوبهم نقى من لحليب.. لي جبرتو فحياة ما جبرتوشي فرجال بشلاغمهم ونساء بخمارهم.. واخة غير نهار واحد..ولكن باش يدخلك لواحد لدارو ويوكلك ويشربك ويتهلا فيك وهو ما كيعرفكشي.. هادي بوحدها ماشي كلشي يقدر عليها.. (شافت فيه) مزال كتلاقاها؟
براء : لا.. شحااال ما شفتها.. ولكن على حد علمي تابت.. ما بقاتش خدامة فداكشي
تالاسين :احسن حاجة.. الحمد لله.. ربي يفرحها فيما كانت
براء : كان مكتابلنا نتلاقاو فديك الليلة.. نتي رجليك جابوك لدارها وانا رجلي داوني عندها.. باش ربي يحطك فطريقي.. مزال نعقل داك الصباح داز عليا كحل.. كنت غادي نحماق
رجعات بيها الذاكرة لووور.. لداك الصباح فاش فتحات عينيها ولقات راسها معرية وهو واقف عند راسها كيفيق فيها.. شداتها التزنيكة وبقات غير كدور فعينيها.. هزات يديها رجعات بيها الشعر مور وذنيها واخة راه مجموع.. مهم قاعدة وولفاتها.. تبسم بالجنب وهو كيشوف فيها.. عرفها شنو تفكرات.. فحال الا كيقرا افكارها.. وسكت ما بغاش يزيد يحرجها..
براء :ما كيجيكش هادشي لي كيوقعلنا غريب؟
هزات راسها وشافت فيها باستفهام وهو شاف فيها..
براء :زعما كيفاش تلاقينا.. وكيفاش كتاب وتربيتي معانا.. وكيفاش كتاب وتزوجنا.. ماشي شي حاجة غريبة؟؟
قلبات وجهها وسرطات ريقها.. عرفاتو كيلمح لان هادشي كيذل على أنهم مكتابين لبعضهم.. وما بغاتش تبين..
تالاسين :صُدف
براء :(تبسم وعينيه فلبحر) لا.. نصيب
شافت فيه وشاف فيها.. تلاقات عينيهم بنظرة غريبة.. كلمة النصيب بزوجهم كيآمنو بيها.. إلا ان النصيب كان كما تمناه هو.. ولكن ماشي كما تمناتو هي.. كانت نظرة فائضة بالمشاعر المتضاربة.. هو كان كيشوف فيها بنظرة مليئة بالحب ولكن هي كانت نظرتها نظرة فارغة منو.. نظرتو نظرة عاشق متيم بحبيبتو ولكن هي نظرتها نظرة إنسانة لإنسان كتعزو.. وبيناتهم بحر من الاحاسيس.. ولكن سرعان ما قلبات وجهها ما قادراش تزيد تشوف فعينيه.. وركزات على الشمس ليَ تبدل لونها وبدات تغبر مور البحر..
غربات الشمس.. وطاح الليل مخلي الهدوء طاغي على المكان.. غير صوت لمواج لي كيتسمع.. مع صوت انفاسهم الهادئة.. دار شاف فيها لقاها مكمشة فراسها..عرفها بردات..
براء :مشينا؟
حركات راسها بالايجاب وطلعو للاوطو ورجعو فحالهم.. طول الطريق ما هضرو ما تكلمو.. حتا وصلو ونزلو بزوج.. غير دخلو للدار وهما يتصدمو.. الدار مقلوبة سفاها على علاها.. وشحال من حاجة مهرسة وطايحة فالارض والزاج غير مترش.. خرجو عينيهم ما فاهمين والو.. حتا كيسمعو نبيح امينو ودخلو كيجريو للكوزينة.. لقاو مينوشة معلقة فرق لبلاكار وهو لتحت كينبح عليها.. اما الكوزينة فما بقات فيها حتا بياسة صحيحة.. شخشخو كلشي.. وعاد تفكرو بلي خلاوهم بزوج فالدار..
تالاسين :اواعدي على حالة؟!
براء :(بملل) بففففف.. امييينو
شافو فيهم وتلاح امينو على براء كيدور بيه وهو كيحك شعرو ويشوف فحالة الدار كي رجعات.. وهي قربات عند مينوشة كتعيطلها وتسايس معاها باش تهبط..
حنا هو كيغوت على امينو وينهض فيه.. وامينو حاني راسو كيعرفو فاش كيبدا يغوت عليه.. تجلس امينو فالأرض مسرح رجليه وكيصدر صوت انين خفيف.. هو خنزر فيه ووقف يله هز راسو.. ومع الدورة لي ايدور.. كتبانلو طلعات فوق لبوطاجي معلقة كتمد باش تشد مينوشة لي مقنتة وخيفانة.. مزال ما كمل الشوفة حتا كيقشع رجليها زهقات وغوتات شادة فلبلاكار ودغيا فلتات يديها ورجعات لور.. وقبل ما توصل للارض كان هو خلف بالزربة وشدها قبل ما تجي فالارض ومع جاتو على غفلة ما قدرش يشد التوازن ديالو وزهقو رجليه وطاح على ظهرو وهو شادها وجات فوق منو.. غوتات هي مخلوعة وتسمع منو صوت انين وزير على فمو كاتم صوتو..
خرجو عينيها كتنهج..وهزات راسها لي كان مخشي فعنقو وشافت فيه ويديها على صدرو.. لقات تعابير وجهو كتبين بلي مقصح.. مقوص حجبانو وعاض على فمو.. ساط قالب وجهو ورجع شاف فيها ونطق..
براء :مزيانة
سرطات ريقها وحسات بيديه فوق ظهرها.. وتهزات بالزربة باغة تنوض وهو يشدها ورجعها وهي تخرج عينيها فيه شادة فكتافو وهازة راسها وقبل ما تهضر نطق هو..
براء :عنداكي رجليك.. الزاج فالأرض
حركات راسها بالايجاب وناضت دغيا وهي كتعزل فين اتزطم.. غير وقفات وهو ينوض مجلس ومخيب سيفتو.. وحط يدو مور ظهرو وهي كتشوف فيه.. مشات عينيها مو ظهرو وهو يبانلها الدم فالارض.. وخرجو عينيها.. وقربات كثر كطل تشوف فالدم موراه.. وهو يبانلها ظهرو مجروح مخشية فيه زاجة صغيرة حتا سال دمو.. شهقات حاطة يديها على فمها وحنات كتشوف فالجرحة ومفتونة معاه..
تالاسين :براء تجرحتي؟؟ دخلات فيك زاجة.. كيسيل منك الدم ابراء..؟؟
براء :اححح.. ما تخلعيش.. ماشي شي حاجة
تالاسين :لا لا.. تجرحتي بزااف.. نوض نمشيو للسبيطار.. (شداتها البكية مخلوعة) راه الدم كيسيل.. الزاجة تغرزات فظهرك.. عافاك خلينا نمشيو
ناض وقف وحاضي مع الزاج وهي كتشوف فيه مخلوعة.. هز راسو فلبلاكار بانتلو مينوشة نقزات منو لفوق البوطاجي وخرجات من السرجم لي كيطل على الصالة.. وشاف فتالا لقاها مخلوعة..
براء :ما تخافيش.. ردي البال غير لرجليك
تحنا شوية ودور يد وحدة على خصرها وهزها عاطياه بالظهر.. حتا خرججو عينيها حيث غفلها بقات غير كتشوف مبهوضة..خرجها حتا لباب الكوزينة وحطها حيث كانت لابسة غير كلاكيطة وخافها تجرح.. حطها وتم غادي لبيتو وهي تابعاه كترجف.. دخل وشد تيشورط شرگها من لقدام وزولها بشوية وهو مقصح.. ووقف عاطي بظهرو للمراية وكيشوف الضربة وهي مزالة قدامو كتصفگ..
تالاسين :خلينا نمشيو للسبيطار.. شوف على ضربة..
براء :لا.. هانا انداويها
تالاسين : واش نتينا طبيب.. هادي راها خاصها تغرز
براء :اححح.. ما كنحملش السبيطارات
بقى كيتماطا كيحاول يلحق للزاجة يزولها ويدو ما كتساعدوش..وهو عاض على سنانو..
براء :(كيحاول يوصل للزاجة) مزالين انتفاهمو على ديك الطلعة فوق لبوطاجي.. كون ما كونتش كون جات فيك نتي
سكتات حاطة يديها على فمها وهي كتفكر بلي بسبابها وقعلو هاكاك.. شافت فيه وعينيها مدمعين وقربات شوية لعندو..
تالاسين :دابا ما اتمشيشي للطبيب
شاف فيها من لمراية.. ورجع قلب وجهو.. فهماتو بلي ما باغيش..سرطات ريقها وعينيها على يدو لي معذب معاها باش يشد بيها الزاجة وكيزير على فمو حيث كيحرك العضلة دظهرو وكيتقصح.. بقى فيها وبصوت خافت فيه نبرة حزينة نطقات..
تالاسين:صافي هدا.. يانا انداويهالك
براء :غير خليك..
تالاسين :لا.. جلس ورصى.. هانا ماجة
تنهد وجلس فوق الفوطوي وهو كيحس بالدم كيسيح فوق ظهرو وهز تيشورط لي قطع كيمسحو.. شوية وهي تم خارجة وجلسات بجنبو وحطات لابواط حداها.. عطاها بظهرو وزيرات على فمها كتشوف الزاجة داخلة فيه تشوك عليها لحمها وعز عليها.. هزات لقطن كتمسحلو الدم هو لول.. وعاد حطات يديها على الزاجة وهي كتسرط فريقها وبدات كتجر فيها بشوية وقلبها كيضرها..
براء :(تقصح) بفففف.. نتريها دقة وحدة
تالاسين :اتقصح؟
براء :غير جبديها ذغيا وزربي عليها
تالاسين :(شداتها لبكية) اوووف.. واخة
زيرات على فمها مغمضة عينيها.. وقصحات قلبها ونتراتها نترة وحدة.. حسات بلحمو تزير عرفاتو تقصح وحطات لقطن على الجرحة حيث بدات تسيل بالدم كثر.. يديها كيرجفو وهي كتغقمهالو بلانكول وتمسح.. حتا بداو عينيها كيدمعو حيث كتلوم راسها.. ونطقات بصوت كيرجف وهي كتحطلو الفاصمة على الجرحة..
تالاسين :كتقولي معكسة ونتينا كثر مني.. كون غير مشينا للطبيب
طلع حاجبو ودار مستغرب من نبرة صوتها.. وداكشي لي طاح فبالو لقاه دبصح..
براء :كتبكي؟
تالاسين :(كتحطلو اللصقة وتهضر وهو قالب النص فوجهو لعندها) بسبابي..
براء :على هادشي كتبكي؟
تالاسين :(شافت فيه وعينيها مغرغرين ورجعات كتجمع داكشي فلابواط حيث سالاتلو) كون غير خليتيها تجي فيا.. بسبابي شوف شني وقعلك..
براء :(دار مقابل معاها) من نيتك؟.. تجي فيا ونصبرلها وما تجيش فيك.. نتي راك حمقة
سكتات وهي كتشوف فيه.. كتحس بيه كيعطيها اهتمام كبير.. كيفاش فاش طلباتو ما قدرش يردهالها فوجهها.. فاش هزها وخرجها من الكوزينة خايف عليها لا تجرح.. فاش ما فكرش فراسو وفكر فيها هي..كل مرة كيبرهن ليها بلي بصح كيبغيها ولكن هي مزال قلبها ما بغى يتفتح ويحس بلي كيحسو من جيهتها..
براء : اوك.. مي خلي عليك لكوزينة.. جمعي غير الصالة
تالاسين :واخة غير ارتاح
براء :لعشاء اندوموندي عليه من برا..
تالاسين :واخة لي بغيتي
خلاها واقفة وعطاها بالظهر غادي لبلاثتو ونزل بشوبة ونعش على كرشو وهو كيحاول ما يحركش كتافو بزااف باش ما يتعكرش وعاض فالصبر واخة راه مقصح.. يله سمعها خارجة وهو ينطق ووجهو بين لخدادي..
براء :دخلي للكوزينة نتفاهمو..
تالاسين :لا ما اندخلشي
تنهدات وخرجات.. وحنات بدات كتجمع فالصالة.. وترد كل حاجة لبلاصتها.. قاداتها ووقفات فباب الكوزينة.. كتشوف منين اتبداها.. ما دارت غير لي فراسها.. وجابت الشطابة والبالة شطباتها من الزاج لي فيها هو لول وعاد بدات كتجمع فيها وتنقي.. حنات على ركابيها كتمسح دمو من الارض وزيرات على فمها.. مزالة كتفكر الضربة لي كلا كيضرها قلبها.. حسات بتانيب الضمير.. وحسات براسها كتجبدلو غير الصداع.. مزالة ما نسات بلي كان غادي يمشي يدابز مع سعد على قبلها.. ما بغااتش هاكة.. ما باغاش تحس براسها ثقيلة على شي حد.. تغرغرو عينيها وحسات بالخنقة.. علاش ما عندها حد؟؟ علاش مقطوعة من شجرة؟؟ كون كانو واليديها عايشين كااع ما ترمى هاد الرمية.. كاااع ما تحس براسها مثقلة على شي حد.. واخة عمرهم حسسوها بلي ماشي منهم.. ولكن ضروري ما تحسي بالغربة وسط ناس ماشي هما عائلتك لحقيقية.. مزالة كتفكر ايامها معاهم.. فاش كانت كتجي من المدرسة.. تمشي عند مها للفيرمة.. وتبقى جالسة كدور من الكوزينة للجردة.. وتمشي تعيط لباها يجي يتغذى ويبقى يضحك ويفرح بيها.. فاش كان كيهزها ويرميها فلهواء وتهز راسها كتشوف فالسماء وتضحك فرحااانة حيث عاارفاه ايشدها وعمرو يخليها طيييح.. فاش كانت كتخشى وسطهم فالليل وتبقى تبرزط مها تغنيلها وما تنعس حتا تسمعها كدندنلها.. هبطو دموعها كيقطرو حتا تخلطو مع دمو لي فالارض وهي مزالة حانية على ركابيها وبالها رجعها لوووور..لذكريات قديمة.. ما كاينش لي يحس بحريقو كثر منها هي لي مزااال الجرحة لي فخضها لحد الساعة محفورة فيها.. مزال كتعقل على داك الخنجر فحالو فحال ديك الزاجة..تخشى فيها وقطع من لحمها كيما تغرزات فيه.. شهقات بصوت خافت وحطات ظهرها متكية على لبلاكار وعاضة على فمها.. خشات راسها بين ركابيها وجلسات كتبكي فصمت.. ضاعت عائلتها لولة وسرقهوم منها الموت.. وضاعت منها حتا عائلتها الثانية وسرقهوم منها المكتاب.. كل نهار كتزيد تآمن بلي هي خلاقت باش تعيش بوحدها.. كول مرة كترييد تأكد بلي هي فال نحس.. وبلي فما مشات ضرووووري ما يلحقوها المشاكيل.. كتعيااااا تصبر راسها وتقول ما نبكيييش.. ما نضعاافش.. ما نستسلمش.. ولكن احساس القهرة أقوى منها.. قلبها كتحس بيه كيضرها وما قاداش تسكتو.. وما كتلقى باش تبرد حريقها من غير لبكاااا.. كاين لي كيشوف لبكى ضعف.. ولكن لبكى بحد ذاتو قوة.. حيث ماشي كلشي كيقدر يفصح على الضعف ديالو ويبينو بلبكى.. وكيتخباو وراء ستار العنفوان..
ناض من بلاصتو بزز.. وهو كيحاول ما يعكرش راسو.. قنطو السروال دجين وناض زولو عليه وجبد شورط لبسو.. يله بغى يرجع لبلاصتو وهو يطلع حاجبو فاش سمع الحس مقطوع.. وتم خارج يشوفها شكادير.. شاف ضوء الكوزينة مشعول وهو يزفر عرفها دارت لي فراسها وتم غادي عوال يوريها.. ساعة غير وقف فباب الكوزينة وهو يتصدم.. شافها مكمشة فراسها ومخشية فقنت الكوزينة بين لبلاكار والحيط.. معنقة رجليها وخاشية وجهها فيهم.. وفيديها خرقة بيضة كانت كتمسح بيها دمو.. تزير عليه قلبو وما حسش براسو حتا كان جالس قدامها وحط راسها بين يديه كيهزولها وعينيه خارجين وقلبو حاس بيه ايسكت..
حط راسها بين يديه مخلوع وكيحاول يهزولها وهي ما باغاش تشوف فيه وهي كتبكي.. وما حدو كيسمعها كتشهق وقلبو كيبغي يخرج..
هو غوت وهي زاااادت كتشهق كثر.. رخات من يديها الخرقة وفتحلها يديها لقاها ما فيها وااالو.. ما فهم حتا حاجة ورجع حط راسها بين يديها وكيتعافر معاها تهزو..
براء :هزي راسك وشوفي فيا.. هضري ماالك.. علاش كتبكي.. تالا عافاك سكتي.. ما تبكيش عافاك.. ششش.. تالا مالك
ما بغااتش تهز راسها.. وما بغاااتش تهضر.. فقط كتبكي.. وهو تعرمو عليه وما عرف باش تبلا.. ما كيحملش يشوفها كتبكي.. كيحس براسو كيتحرق معاها وهي كتبكي.. وكل ما شهقات كل ما روحو كتبغي تخرج.. خفض نبرة صوتو وهو مزال ضام راسها بين يديه.. وحط فمو على راسها وباسها بقوة ورجع حط جبهتو عليه.. وجالس قدامها ركبتو عند ركابيها والرجل الثانبة ثانيها تحتو..و نفسو كضرب سخونة فراسها بقوة ما مخلوع عليها.. وبصوت حنين وخافت كانه كيترجاها نطق..
براء :ما تبكيييش.. ما تبكييش.. صافي سكتي.. صافي..(مسح على شعرها) لحبيبة ديالي صافي.. ما تبكيش..
تنهد بحرقة وباس راسها وزير عليه بيديه كثر وهو ما كرهش يدخلها وسط صدرو ويسكتها.. دخل يدو وسط شعرها حتا حس بحنكها وححط يدو عليه كيحاول يهزلها راسها بشوية..
براء :(بصوت خافت) شوفي فيا.. هزي راسك
حسات بيه كيهزلها راسها وقبل ما يتقابل وجهها مع وجهو ترمات عليه معنقاه ومخبية وجهها فصدرو ما بغاتوش يشوف وجهها وهي كتبكي.. وهو غير ترمات بين يديه ما زادش فكر زوج مرات وعنقها كثر مزير عليها وحاط راسها على صدرو..حس بالجرحة كتزدح فصدرو وتعكرات حتا ضرو قلبو.. زير على سنانو مصبر راسو وسرح رجليه وجلس فالارض ودور يدو عليها دافنها فيه ويديه كدوز على راسها وكتسرحلها شعرها وكيبوسها مرة مرة فوق راسها.. وكيسكت فيها.. حتا نطقات وهي خاشية. راسها فيه بصوت مخنوووق..
زيرات عليه كثثثثر مدورة يديها على ظهرو.. وهو بقى معنقها وكيهدن فيها.. وهي كتشهق وتبكي على صدرو.. وكيحس بدموعها فزكوه.. وبشوية بشوية بدات تنقص من لبكى.. هو غير حس بيها تهدنات.. طل عليها وهي تهز راسها بعدات عليه بشوية وشعرها تشابك مع لحيتو.. دوز يدو على شعرها حتا تقاد وحط وجهها بين يديه وقابل عينيها مع عينيه ودوز اصبع الابهام على خدودها كيمسح دموعها.. وهي مهبطة عينيها كل مرة كتلقى راسها معنقاه بلا ما تشعر.. ولكن هو لي كيكون حداها فكل مرة كتحتاج لي يطبطب عليها..
بعدات وجهها من يديه بشوية وحركات راسها بالإيجاب وهي كتمسح وجهها.. حتا كيسمعو صوت الصوني دالباب.. عرف بلي دوموند لي طلب ايكون وصل.. وهي شافت فيه بتعجب زعما شكون لي ايكون كيصوني..
براء :انا انشوف شكون ونتي نوضي غسلي وجهك
تالاسين :(حركات راسها باه)
براء :ونلقاك حطيتي يدك فشي حاجة هنا مزال ما ايعجبكش الحال
تالاسين :(حركات راسها)
تبسم فوجهها وحط يدو على راسها وباسها من جبهتها بالخف وبعد..
براء :هاكاك.. ما تكونيش معكسة
ناض هو وقف بزز حيث حاس بالجرحة كتجبد فكل حركة وكتعطيه لحريق..وقف وخدا نفس وحاول ما يبينلهاش و مشا يفتح الباب.. وخلاها هي جالسة ومتبعاه بعينيها.. تنهدات وناضت كتجر فرجليها ودخلات لبيتها.. جلسات على حرف الناموسية ومينوشة نقزات من الارض جلسات حداها.. هزات يديها كتلعبلها فشعرها وحاسة براسها مهمووووومة.. تنهدااات تنهيدة من القلب وناضت غسلات وجهها وخرجات لقاتو واقف كيحط كراطن فوق الطبلة.. هز راسو فيها وتبسم وشيرلها تجي..
براء :اجي تعشاي ما حدها سخونة
تالاسين :لبيتزا!
براء :وبالكفتة.. كما كتعجبك
تبسماتلو وقربات جلسات قبالتو.. هو من جيهة وهي من الجيهة لوخرا وكل واحد وكرطونتو قبالتو وبدات كتاكل وهو كيشوف فيها.. فحال ديما ما كيقدرش يبعد عينو عليها.. وهي كتاكل بالثقااااالة وعااجباها جاتها لذيذة.. هزات عينيها تشوف فيه وهو هبطهم بالزربة قبل ما تقشعو كيشوف فيها.. كتشوف فيه عمرها ما عرفات بلي هو حنين حتا لهاد الدرجة.. ما كانتش قريبة منو باش تعرفو.. كيعرف عليها تفاصيل صغيرة يمكن هي وما كترضلهاش البال.. فوق ما كتحتاجو كتلقاه واقف معاها.. ماشي عاد دابا.. من ديييييما ومن شحال هادي غير هي لي ما كانت لا كتدي لا كتجيب.. تبسمات وهي وسط افكارها وبصوت هادئ وهي كتشوف فيه نطقات..
تالاسين :شكرا
هز راسو فيها مستغرب.. والطرف دلبيتزا كان فيدو كيعض منو.. بعدو وششرب العصير يهبط بيه وشاف فيها..
براء : (رتاح منين ضحكات) ههه وما تنسايش.. لي مزوجين ما بيناتهومش شكرا
شافت فيه بنص عين وما جاوباتوش وهو كيضحك..ونسا راسو وحرك يديه بالزربة وهو يتعكر
براء :احححح
تالاسين :شعندك.. عقرتي راسك
براء :بففف..
تالاسين :هضرت معاك نمشيو للطبيب وما بغيتيشي.. كون راه عطاك شي دواء يكالمي عليك
براء :ماشي شي حاجة دابا وهو فاتني.. كملي ماكلتك
شافت فيه بقلة حيلة.. سالاو عشاتهم.. وناض كل واحد لبيتو.. دخل هو لبيتو ووقف قبالة لمراية. كيشوف الفاصمة بان فيها شوية ديال الدم.. خيب سيفتو حيث عاطياه لحريق.. وهز كينة شربها وتماد فبلاصتو على كرشو كيحاول ينعس..
🎗️🎗️🎗️🎗️🎗️
كانو فبيتهم ناعسين.. هي حاطة راسها على صدرو وهو كيلعب بشعرها وكيحاولو ينعسو.. حتا نطقات وهي كتلعب بيديها فعنقو ولحيتو..
فراس :انا ما عندي لا ولد لا بنت.. وا جمعي دابا ودوزي تنعسي
رؤيا :ماشي لخاطرك.. راه ولادك هادوك
فراس :دابا شنو بغيتي.. ياك نتي ما شديتكش عليهم.. ولادك ضبري راسك معاهم.. ما حبستكش عليهم.. بغيتي تمشي عندهم ومشيتي.. وما بززت عليك والو.. ايوا حتا نتي ما تحطيش راسك فشي موقف لي ما ايعجبكش فيه الحال..
رؤيا :غير سمع منوم بعدا.. ما عرفتي يكون عندوم شي سبب لي خلاهم يعملو هايداك..
فراس:شمن سبب هذا لي يخليهم يتزوجو بلا خبارنا..
بقات ساكتة.. كتفكر واش تهضر ولا تسكت.. تقولو ولا لا.. عارفاه فاش ايعرفها خبات عليه حاجة فحال هادي ايكعى فيها كعية دبصح.. وفنفس الوقت خايفاه فاش ايعرف يقدر يتبرا من مو فمرة.. ما خافتش على بيسان قد ما خافت على زينب.. حيث هو ما سمحلها على لي دارت فيه غير بزز اما فاش يعرف دابا شنو دارت محااالش يرجع يسمحلها.. وتحطات امام نارين.. احسنهما سيئ... وحصلات ما عرفات ما دير.. وخلاتو كيتسناها تهضر وهي كتضرب اخماس فاسداس.. والهضرة حتا كتبغي تخرج وترجعها..
رؤيا :(بتردد) ما عرفتشي.. مهم واش اتبقاو هايدا حياتكم كاملة
فراس :نعسي لا اتنعسي وخليني عليك
رؤيا :عافاك افراس.. ما بقيتشي قادرة نشوفكوم هايدا والله.. راه هو ولدي ونتينا راجلي.. واش باغي تعاود ما وقعلك نتينا مع باباك
شاف فيها مخنزر.. زفر ساخط وتقلب عطاها بالظهر وغمض عينيه..
رؤيا :فراااس.. نوض كنهضر معاك.. نوووض.. فراس
فراس :خطيني عليك ونعسي
رؤيا :(صوتها تنغنغ حابسة البكية) حرام عليك.. ما حسشي بيا.. راه كنتقطع ويانا كنشوف عائلتي ترشات.. حس بياااا.. اههئ اههئ
سمعاتو تنهد.. ودار وهو كينعل الشيطان.. شاف فيها لقاها جالسة موراه وكدمع.. وبلا ما يهضر جرها عندو وحط راسها على صدرو وعنقها كيدوز يدو على راسها..
رؤيا :اههئ اههئ اتصالحو ياك
فراس :نعسي...
عرفاتو ما بغاش يزيد يهضر.. وزيرات على فمها مقهووورة وعنقاتو مدورة يديها على صدرو وحشات راسها فيه وهي كدمع.. وهو كيمسح على شعرها وساااااكت..
🎗️🎗️🎗️🎗️🎗️
فنص الليل خرج كيمسح وجهو من لعرق.. ودخل للكوزينة جبد قرعة باردة يشربها.. حس بجسمو شاعلة فيه العافية وعينيه كيتغمضو فيه النعاس ومرخيييي وما قادرش ينعس.. فشلاان وذاتو كاملة كتحرقو.. هز ديك القرعة وخرج للبالكون يضربو لهواء شوية وهو بزز باش كيحرك يديه.. حيث الضربة عاطياه لحريق لكتافو وخلاتو مهدود..
ناضت حتا هي حيث جاها لعطش..لابسة بيجامة سروال وديباردور كالعادة وشعرها ضافراه للجنب.. دخلات وشربات وتمات راجعة فحالها وهو يبانلها جالس فالبالكون.. قوصات حجبانها باستغراب.. وتقدمات عندو حتا وقفات موراها وهو حس بيها وقبل ما تبان قدامو نطق بصوت فشلااان..
براء :سيري تنعسي
زادت تعجبات من نبرة صوتو العيانة وشعلات ضوء البالكون وهو يبانلها جالس حاط مرافقو على ركابيه ويديه على جبهتو.. باين لحمو كلو عرقان.. غير شعلات الضوء درق عينيه..
براء :والو.. غير ما جانيش النعاس.. سيري نتي نعسي فحالك
قربات وحطات يديها على راسو وعلى جبهتو.. ولقاتو سخون وهي تزعف..
تالاسين :هاا لي قلتلك.. ما كتسمعشي.. ياك قلتلك نمشيو للطبيب.. شفتي تزاد عليك الحال
سكت ما قادرش يجاوب وما عندو لا لخاطر لا لگانة باش يبقى يهضر ويعاود.. هي شافتو ساكت وزادت تشطنات عليه.. جلسات بجنبو وحنات راسها كطل على وجهو..
تالاسين :براء.. واش كضرك بزاف؟؟
تنهد.. عرفها تخلعات وما بغاش يشطنها عليه.. وهز راسو بزز.. وشاف فيها ورسم ابتسامة مرهقة..
براء :ما تخافيش.. دابا يفوت
تالاسين :شربتي شي دواء؟
براء :(حرك راسو باه)
تالاسين :ديالاش
براء :دلحريق
تالاسين :انجيبلك واحد ديال سخانة.. وزيد حبة من الدواء لي خديتي باش تزيد تهدن عليك
براء :(حرك راسو وهو كيعض على فمو من لوجع لي نغزو)
تالاسين :(عز عليها) خلينا نمشيو لطبيب.. عافاك
هز راسو فيها وهو بزز باش كيحل عينيه.. وهز يدو حطها على ركبتها كيطمنها..
براء :ما تخافيش عليا
شافت فيه وشافت فيديه لي على ركبتها.. سرطات ريقها وناضت وقفات..
تالاسين :انمشي نجيبلك الدواء
قبل ما يجاوبها تمات خارجة فحالها كتهرب من حداه..وخلاتو هو جالس ورجع راسو لور وتنهد.. بعض المرات كيتمنى يبقى طول حياتو مريض.. حيث غير المرض هو لي كيخليها تبينلو اهتمامها بيه.. باغيها تخافيه عليه.. وتردلو البال.. وتبقى حداه.. زاد تنهد بحرقة حيث حس بوجع فظهرو ووجع فصدرو.. قلبو لي عياااااا وهو هاز حمل ثقيل.. وكيتسنى نهار يتفك سراحو.. حيث واخة كيصبر الا وراه محروووووق وحرقتو ما يعرفها غير لي مجربها.. اما هي فمشات لبيتو جابت الدواء لي خاصها ودازت للكوزينة جابت كاس ورجعات عندو..
رجعات عندو.. لقاتو موكي راسو على يديه.. قربات جلسات قدامو وهو تجلس عليه.. شد من عندها الكاس والدواء وشربو وتبسم فوجهها كعربون شكر.. وتنهد ورجع حط راسو بين يديه..
تالاسين :نوض ترتاح فموطعك
براء:لا.. جاتني الغمة تما
تالاسين :غير السخانة لي عملاتهالك
براء :نتي نوضي تنعسي..
تالاسين :ونتينا اتبقى هنا؟
براء :اه شوية.. نرتاح ونوض فحالي
تالاسين :اوك..
ناضت من حداه وهي كتشوف فيه وخلاتو جالس.. تنهد هو ورجع راسو لور.. وقاد الجلسة ديالو عيا وهو مقوص ظهرو.. وبغى يوكي ظهرو.. حاول ما امكن باش ما يتقصحش وهو مزير على فمو .. ولكن ما قدرش.. زفر وناض مشا لفوطوي طويل شوية.. وتمد فيه على كرشو واخة جاو رجليه خارجين منو.. حط خذية تحت راسو وتجبد.. هو يله تمد وهو يحس بغطا خفيف تحط عليه.. هز راسو بانتلو واقفة حداه كتقاد لغطا على كتافو..
تالاسين :بلا ما يضربك البرد.. هاكة حسن
تبسماتلو وجلسات فالكرسي لي حداه وتغطات بغطاء حتا هي وجمعات رجليها فوق الكرسي وجلسات مكمشة..وهو كيشوف فيها.. سحابو مشات تنعس.. ولكن لا.. تبسم وعينيه عليها وهي كتشوف فجنابها وتشوف فالسماء.. حتا جات عينيها فعينيه وتبسماتلو.. سهااااا فيها وبلا ما يحس خرج تنهييييييدة ثقيييييلة مرافقاها ابتسامة ساحرة واخة ما كتبانش مزيان..
تالاسين :حاول تنعس باش ترتاح
براء :اتبقاي جالسة هنا
تالاسين :انا حداك.. اصلا الجو مزيون
تبسم وهو حاط راسو على يديه وقالب وجهو لعندها.. ومرة مرة كيغمض عينيه ويرجع يفتحهم ويشوف فيها.. وهي عينيها فالسماء ومرة مرة تشوفو واش نعس.. تبسمات وعينيها على القمرة لي مضوية.. هاد الليل تفكرات واليديها لي عمرها نساتهم.. وتفكرات معاهم الاغنية لي كانت كتغنيهالها مها.. وبدات كدندن بصوت مسموع نفس الاغنية.. "ترخام ايما"
فتح عينيه بشوية على صوتها.. مولف كيسمعها كتدندن هاد الاغنية.. رجع غمض عينيه وسهاااااا مع صوتها لي سحرو مع سكون الليل.. حنين وخافت واخة ماشي صوت كيحمق.. ولكن عندها حنية فصوتها كتخليك ترتاحي ونتي كتسمعيها.. وبشوية بشوية بدا كيديه النعاس..
🎗️🎗️🎗️🎗️
🌞هلَّ الصباح.. وطلعات شمسو.. مضوية وكتعلن على نهار جديد.. ضرب فيه الشعا فوجهو وحط يدو على عينيه مغطيهم.. تنهد وبقى شوية وهز راسو كيشوف فجنابو.. توجع شوية فظهرو ولكن دغيا فاتو.. ومع هز راسو مع بانتلو هي قبالتو.. ناعسة جالسة وراسها مايل للجنب ومكمشة فغطاها.. تبسم وناض تجلس بشوية كيفتح عينو بزز وسط الشعا دالشمس.. قرب عندها وتقابل مع وجهها..
سرح فملامح وجهها وهي ناعسة.. لحظة ما كتعوضش.. احسن صباح بالنسبة ليه حيث صبح على وجهها.. ثاني مرة كيقدر ينفارد بيها وهي ناعسة.. المرة لولة فاش كان مريض وهاد المرة عاود.. تبسم فاش تفكر بلي كل مرة كيمرض كيلقاها حداه.. شاف الشعر طايح على وجهها.. وبهدووووء نفخ لهواء على شعرها حتا كيتهز على وجهها.. بقى مقابلها لدقائق ورجع ناض دخل لبيتو.. هز كاميرتو وخرج قبل ما تفيق..شاف فالساعة لقاها ستة ونص.. وقف قدامها وصورها.. تبسم وهو كيشوف فيهم.. ورجع حط الكاميرا وحنا باسها من راسها بهدوء وهي ناعسة ما بغاش يفيقها..
ناضت كتكسل فبلاصتها.. عوجات عنقها كطرطق فيه شوية حيت ضرها فالنعاس.. وشافت فبلاصتو ما كاينش.. شمات ريحة القهوة وعرفاتو فاق.. وناضت داخلة فحالها.. طلات عليه لقاتو جمع الكوزينة وخايد مع لفطور.. عيات فيه يمشي يرتاح وما خلاهاش.. بدعوى انه صبح مزيان.. وما كذبش كان كيحس براسو احسن
داز صباحهم كالعادة.. فطرو وسالالو.. وناضت هي كتجمع الطبلة وناض هو دخل لبيتو كيلبس حوايجو حتا وقف عليها كالعادة كيلبس ساعتو وكاميرتو فعنقو..
براء :هانا خارج
تالاسين :فاين؟؟
براء :عندي شي شغال
تالاسين :شمن شغال هذا.. بغيت غير نعرف فاين كتقيل نهار كامل متلوف ونتينا غير شومور.. لا خدمة لا ردمة
براء :(ضحك) ههه كتوحشيني ولا
تالاسين :(شافت فيه شوفة دعيقتي)
براء :ههه صافي فهمنا.. وا شنو بغيتيني نبقى نابت حداك.. وزايدون شكون قالك راجلك لا خدمة لا ردمة
تالاسين :عاااود راجلي ابراء!!!!
براء :ههه شو غير كتجمعي راجلي وبراء فجملة وحدة كي كتجي.. خارجة من فمك كي لعسسسسسل
تالاسين :نتينا السخانة لعباتلك على دماغك.. ما انديشي عليك..
براء :(تبسم بسخرية)
تالاسين : وا قولي بعدا.. واش خدام بصح
براء :مالنا كنضحكو
تالاسين :وفاياش
براء :فلحشيش
تالاسين :راه قلتلك السخانة لعبات عليك
براء :ههه.. كنخدم الخدمة الاصلية ديالي.. (شد الكاميرا بين يدو) كنصور
تالاسين :كيفاش زعما
براء : الالة انا اصلا كنت خدام مع واحد المجلة الكترونية معروووفة.. هادي عامين.. وعندي ركن مخصص ليا ولتصاوري فيها فهمتي.. كناخد تصاور كل مرة وديالاش وهما كينشروهوم.. والواليد خدمت معاه غير باش نعاونو ماشي حيث باغي..
تالاسين :اهاااه.. ويانا زيالي راك بيطالي
ضحك على الطريقة باشقالها وحرك. راسو يمين شمال ورجع هز راسو فيها..
براء :هانا مشيت
تالاسين :واخة
براء :الا احتاجيتي شي حاجة عيطيلي.. انا فلغذا نكون هنا
تالاسين :ان شاء الله ربي يعاونك
تبسم ليها.. وخرج فحالو ودا امينو معاه فحال ديما باش ما يبقاوش محمقينها.. وهي رجعات كتكمل الشغل لي فيديها.. حتا كتسمع الصوني فالباب
تالاسين :شعندو رجع.. ما خداشي سوارت ولا؟
مشات باش تفتح.. ويله فتحات الباب وهي توقف فبلاصتها..
إرحموني الجزء العاشر
محتوى القصة
التنقل بين الأجزاء