طلعاتها وهبطاتها.. واقفة بكولون مزير فالرمادي مع ديباردور بيضة.. وكلاكيطة حمراء فرجليها.. الاظافر مصبوغين.. والشعر مجموع خفيف وريحة لعطر فايحة منها زوينة.. ثارت اعجابها بنت زوينة.. وقوصات حجبانها باستغراب..
وصال:(ابتسامة) سلام
تالاسين :وعليكم السلام..
وصال:سمحلي.. يمكن ما عرفتينيشي.. انا جارتكم
تالاسين :ااه عرفتك (تبسمات)
وصال:عافاك بغيت نطلب منك طليبة..
تالاسين :مرحبا
وصال:بغيت شارجور ايفون.. انا ديالي تخصر وواقفة عليه دابا ضرووووري.. كان سبقلي خديتو من عند ميسيو براء
تالاسين :ااه.. واخة هانا نجيبلك ديالي.. حيث هو ما كاينشي
وصال:واخة شكرا
تبسماتلها وخلاتها واقفة ودخلات جابتلها الشارجور ورجعات لقاتها واقفة موكية على الباب وكتبرم خصلة من شعرها على صبعها..
وصال :اووه شكرا بزااف.. انشارجي بيه ونجيبولك..
تالاسين :مرحبا ماشي مشكيل.. خود راحتك
وصال:بالمناسبة.. انا وصال(مداتلها يديها)
تالاسين :(صافحاتها) وانا تالاسين.. متشرفين
وصال :حصلي الشرف.. نتينا ختو دميسيو براء
تبسمات كضحك فخاطرها على الطريقة باش كتقول ميسيو براء.. بطريقة محلونة..
تالاسين :وي تقدر تقول هايداك
وصال :ااه مزيان.. مرحبا بيك معانا.. الا كنتي اتبقى هنا نرجعو صحابات هههه شني ظهرلك
تالاسين :ان شاء الله علاش لا..
وصال:ههه اوك ما نزيدشي نعطلك.. يله بسلامة.. وشكرا مرة ياخرا
تالاسين :مرحبا
تبسماتلها وسدات الباب ودخلات تكمل شغلها.. شوية وهي تسمع تيلي ديالها صونا.. هزاتو وجاوبات.. وشوبة وقطعات وهي فرحاااااااانة بالكوموند الجديدة لي جاتها.. واخييييرا.. بقات واقفة فبلاصتها كتخمم شنو خاصها وكتضحك مع راسها..واول حاجة مشات جابت ورقة وستيلو وجلسات كتخمم شنو اتصايب بالضبط وشنو محتاجة.. قادات داكشي فورقة.. ودخلات جبدات داك البركة دلفلوس لي كانت باقة ليها.. جمعات شعرها فكاسكيط وهزات صاكها ومينوشتها موراها وتمات خارجة وعينيها كيبريو بالفرحة.. وحنوكها موردين وكتبسم..
غير خرجات وهي تلاقا بوصال عند السانسور.. بنفس لبستها دقبايلك.. ولابسة صبردين ونظاظرها.. شافت فيها تالا كترمش.. ووقفات حداها..
تالاسين :سلام
وصال :اهلا حبيبة.. خارجة؟
تالاسين :اه..
وصال:فاين ماشة.. زعما الا كانت نفس لبلاصة نمشيو مع بعضنا
تالاسين :انمشي لسوبر مارشي
وصال :ههه حتا انا.. ايوا صافي نمشيو بزوج
تالاسين :ههه واخة
هبطو بزوج فالسانسور.. ووصال غير كتهضر وتجبدلها فلسانها.. وهي كتعطيها جواب حدو قدو.. حيث ما مضاسراش معاها.. مهم كدير معاها الصواب.. حتا تمو دايزين من حدا الكونسييرج وهو يعيط..
الكونسييرج :مدام وصال.. تسناي شوية
وصال:(زفرات ساخطة ورجعات عندو) شحال من مرة قلتلك ماشي مداااام.. وا ما بقيتشي مدام طلقت ما كتفهماشي
تالاسين بدات غير كترمش وعرفات بلي هي مطلقة وبقات غير كتشوف..
الكونسييرج:ااا سمحيلي الالة وصال.. راه غير اللسان ما فيه عظم.. ما ديش عليا
وصال :دابا شني كاين؟
الكونسييرج:اا غير هاد لبريات جاو بسميتك.. قلت نعطيهملك
وصال:واخة خليهم حتا نرجع
الكونسييرج:واخة لي بغيتي امد.. ا لالة وصال
خنزرات فيه ودارت معصبة.. شافت فتالا وهي تبسم بزز وتمو خارجين.. وحتا تالا ما زادتش هضرات او سولات فالموضوع جاها عادي..
رجعات للدار.. حطات السخرة وبدات كتوجد لغذا هو لول.. عيطلها جواد كيسول فيها وكان معاه جهاد.. قشبو عليها شوية حتا قطعات عليهم زاعفة ورجعات لشغالها..
كانو كيوجدو راسهم يجلسو للطبلة دلغذا.. هي كتحط الطبلة وهو كيعاونها.. من بعد ما دوش ولبس عليه سروالو دالكيطمة..وهي ما بقاتش كتعلق عليه.. صافي ولفاتو يلبس هاكاك ما عندها ما دير.. يله جلس على الطبلة وتمات هي جاية بأخر صحن وهما يسمعو الصوني دالباب.. بغا يوقف يمشي يشوف شكون وهي توقفو
تالاسين :خليك.. هانا نشوف شكون
قبل ما يجاوبها عطاتو بالظهر ومشات باش تفتح الباب.. ولقات وصال واقفة قدامها كتبسم..
وصال :برزطتك هاد نهار غير سمحلي ههه
تالاسين :(تبسماتلها) لا هانية
وصال :هاك شارجور ديالك وشكرا
تالاسين :اذا كنتي مزالة محتاجاه خليه ماشي مشكيل
وصال :لا لا صافي.. دابا نخرج ونشريه
تالاسين :اوك.. على خاطرك
وصال:راكي بوحدك.. الا كنت بوحدك نجي نونسك شوية شني قلتي.. انا قنطت فالدار بوحدي ما كاين ما يتعمل
تالاسين :هاا؟؟ لا ماشي بوحدي.. ولكن مرحبا بيك.. دخل تغذا معانا
وصال:شكون نتوما؟
تالاسين :انا وبراء.. جبرتينا عاد انتغداو
وصال:اااه ميسيو براء هناااااا
قالتها بمياااعة خلات تالا غير كترمش.. وتبسمات كتضحك..
تالاسين :وي هنا ههه
وصال:زعما ما يتقلقشي؟ عنداك ندورينجيكم؟
تالاسين :لا علاش اتبرزطنا.. مرحبا
وصال :اوك حبيبة.. ناري نتينا شحال ضريفة
تالاسين :شكرا.. دخل
دخلات كتعوج وتدور عينيها فالدار وتبسم.. فرحانة وعاجبها هي كانت حاضياه غير فوقاش يجي.. وغير شافتو دخل للدار وجدات راسها وجات دايرة السبة بالشارجور.. وقفات فبلاصتها كتسنا تالا حتا سدات الباب.. شافت فيها تالا وتبسماتلها..
تالاسين :زيد دخل..
تقدمات بخطوات واثقة من راسها.. حتا وقفو حداه وهو هز راسو فبهم وطلع حاجبو.. هي غير شافتو بلباسو وصدرو معري وشعرو الفازك حيث دوش.. حلات فمها وهبطو ريوگها وترسمو لقلوبة فعينيها. ..
شاف فيها مطلع حاجبو.. ورجع شاف فتالا باستفسار ووصال غير حالة فمها..
تالاسين :هادي وصال جارتنا.. قلتلها تجي تغذا معانا
شاف فتالا ساكت وما عاجبو حال.. ورجع قلب عينيه لوصال.. تبسماتلو وحرك راسو ليها بابتسامة علاين ما تبانش وناض وقف..
تالاسين :فاين ماشي؟
وقف ودار طلع وهبط فوصال لي غير كتفرنس وكلاتو بعينيها.. ورجع قلب عينيه وشاف فتالا
يله مدو يديهم بداو ياكلو.. وهو يتم خارج عاقد غوباشتو ولابس عليه اكس رمادية ستر راسو من لفوق.. هزات تالا راسها فيه ورجعات شافت فوصال لي كتشوووف فيه وحنات راسها كتاكل.. ججلس وبداو كياكلو وهي تنطق
وصال:ميسيو براء.. نتمنى ما نكونشي برزطتك ولا
براء :(هز راسو فيها بنبرة جافة) لا مرحبا
وصال:انا كان سحابلي بعتي الدار.. حيث شحال ونتينا غايب
براء :امممم كنت مسافر
وصال:ااه.. ايوا على سلامتك.. (بمياعة) نورتييييييي
هز راسو فيها مطلع حاجبو.. وقلب عينو لتالا لقاها كتشوف فيها وترمش.. ورجع حنا راسو كياكل..
وصال:(كضحك) ههه سبحان الله خوت وما كتشابهوشي فمرة نتينا زعرة وهو سمر ههه
مشا ودخل فحالو مخنزر وغير كيسوط.. وهما متبعينو بعينيهم..
وصال:شعندو؟
تالاسين :(تنهدات) والو.. غير هو ماكلتو خفيفة واصلا جا عيان
وصال : اممم.. مزيان..
عوجات فمها فاش ناض.. ما بقاتش راشقالها على الجلسة.. هي سكتات وتالا حتا هي.. وتالا كل مرة كتنهد عرفاتو تقلق..
سالاو لغذا وناضت مشات فحالها.. غير خرجات ومشات هي جلسات فالصالة كتحك فيديها وتخمم واش دخل عندو او لا لا.. وفلخر خدات نفس عميق وسرطات ريقها وتمات داخلة لبيتو كتقلب عليه..
دخلات للبيت كتقلب.. ما بانلهاش.. حتا فالحمام ما كاينش.. وهي تعقد حجبانها.. ما فهمات والو.. فين مشا.. خرجات كتقلب فالدار والو ما كاين.. ورجعات لبيتو كتقلب ووالو.. بقات غير واقفة فبلاصتها مسمرة.. زعما خرج؟؟ ولكن هي ما سمعاتوش.. شافت فالبيت وهو يبانلها تيلي والسوارت مزالين تما.. يعني ما خرجش.. ولكن فين مشا..
بقات واقفة فبلاصتها مبلقة عينيها.. ما فاهمة والوحتا كتسمع شي حاجة طاحت.. ودارت متبعة الصوت.. شافت فخزانة موراها.. فيها مجموعة من الكاميرات قديمة وحديثة.. ومنهم قطع تصوير اثرية.. عقدات حجبانها وقربات لجيهتها.. حتا كتبانلها كاينة شقة بينها وبين الحيط وضوء احمر خارج منها.. عقدات حجبانها ومدات يديها حطاتو بين الخزنة والشقة وهي تكحز الخزانة للجنب.. بقات غير كترمش ودفعاتها وهو يبانلها باب موراها ديال بيت صغير.. وستار اسود نازل على بابو وضوء احمر كيبان منو.. هزات الرواق وهو يبانلها واقفة كيعلق فالتصاور.. كان استوديو صغير ديالو.. كيقاد فيه التصاور لي كيصور.. ما عمرها شافتو.. وعمرها رداتلو البال.. واول مرة اتشوفو.. بقات غير واقفة وكترمش.. وتشوف فيه هو لي عاطيها بالظهر.. حتا دار شاف فيه وشافت فيه وقلب وجهو..
براء :(بنبرة قاصحة) سدي الباب
تالاسين :هااا؟
حلات فمها فيه وهو ساط ودار وتم جاي كيخلف بالزربة وهي تخلعات ووقفات فبلاصتها جامدة.. داز فيها ومشا جيهة الخزنة جرها حتا تزدحات ورجع لشغلو بلا ما يشوف فيها حيث الصور ما خاصش الضوء دالنهار يضرب فيهم .. وخلاها غير كتبرقق وتسرط فريقها..
تالاسين :(كتشوف فالاستوديو بدهشة) ما كنتشي عارفة بلي عندك هنا استوديو
براء :الصمت
بقات حالة فمها وكتشوف فجنابها.. بانلها كيغطس التصاور فشي ماء وكيهزهم ينشرهم.. ودورات عينيها كتشوف التصاور لي معلقين.. صور للطبيعة.. للطريق.. للحيوانات للناس.. مهم صور مختااالفة..
تسارات بعينيها على تفاصيل الاستوديو باعجاب.. ورجعات شافت فيه.. هو لي ما كيشوفش حتا فيها.. عاطيها بالظهر وكيخدم شغلو.. قربات وقفات قدامو.. شافت فوجهو بانلها مخنززززززززر وباين عليه معصب.. تنهدات وجمعات النفس..
تالاسين :(بصوت خافت) براء؟
براء :ما جاوبهاش
تالاسين :براء.. شوف فيا
هز صورة من وسط الماء بلقاط خاص.. وعطاها بالظهر كينشرها حتا هي ورجع كيكمل وخلاها غير كتشوف..
بقات واقفة كتشوف فيه وهو كيمشي ويجي قدامها ويقضي شغالو وما معبرهاش..
ما نطقش.. وما شافش فيها.. وما تسوقلهاش.. فحال الا ما كتهضرش اصلا.. شافت فيه معوجة فمها وزفرات..
تالاسين :اوك.. على خاطرك
شافت فيه كتسناه يشوف فيها او يعمل شي ردة فعل.. ولكن لا شيء.. مكمل شغلو وعاقد حجبانو.. تنهدات وعطاتو بالظهر وخرجات فحالها ونسات الخزانة مفتوحة حتا كتسمعو زدحها حتا قفزات فبلاصتها ودارت حاطة يديها على قلبها..
تالاسين:بففف.. مريض..
هزات كتافها وخرجات تقضي شغالها وتبدا توجد للكوموند لي خاصها توجد بعد يوماين..
🎗️🎗️🎗️🎗️
دخلات عليها للبيت..كالعادة..كتنوض من النعاس تاكل وترجع تنعس.. طلات عليها وتنهدات.. وقربات جلسات فوق راسها كتحسر على بنتها لي ما لقاتلها جهد.. حطات يديها على شعرها كتسرحولها وحنات باستها..
رؤيا:شششش.. سكت.. ما تهضرشي.. يانا لي انهضر دابا.. عيقتي وزدتي فيه.. شني هاد الحالة.. شني هاد المنظر.. علاش عاملة فراسك هاد الحالة.. غلطتي اه ولكن ندامة ولبكى باش اينفعووك.. باش اتنفعك هاد الحالة لي عاملة فراسك.. كتبات تبكي وتقيل تخمم..
بيسان:(بدات كدمع) شني بغيتيني نعمل.. يانا راه ضعت صافي.. ضيعت كلشي.. وفاش ايعرفوني شني عملت كلشي ايكرهني.. وحتا سعد اههئ اههئ هو اصلا دابا وما بقاشي حامل يشوفني.. وفاش يعرف شني عملت ايكرهني فخطرة.. يانا راه ضيعت راسي بيدي.. خرجت على راسي اههئ اههئ
رؤيا :دابا لي وقع وقع.. والندامة ما عندها فاش تنفعك.. بلعكس.. شوف للقدام.. ما تفكرشي فلي وقع.. يقدر يكون هادشي لي وقع فيه خير.. ونتينا ما تبقاشي حابسة راسك هايدا.. ما اتنفعك فوالو هاد الحالة لي عاملة فراسك..
رؤيا :ما عرفت.. كما كنتي قبل.. نوض خرج.. تسارا تلاقا صوحابك.. ولا مشي عند خاك وتالا
بيسان :ما نقدرشي.. ما عنديشي لوجه لي يشوف فيهم
رؤيا :اوك ما قدرتيشي تلاقا بصحاباتك.. ولا اجي نخرجو يانا وياك.. مهم ما تبقاشي عاملة هتد الحالة فراسك ابنتي.. راه نتينا كتعذب ويانا كنتعذب معاك..
عنقاتها كدمع وهي ساكتة ورؤيا كطبطب عليها حتا نطقات..
بيسان:علاش ما بغانيشي اماما اههئ
رؤيا :(تنهدات) سمعني نقولك ابنتي.. ما كاينشي شي حاجة اسمها علاش.. كاين شي حاجة اسمها لمكتاب والنصيب.. والقلب وشنو بغى.. ما نقدروشي نلوموك نتينا لي بغيتيه ولا هو لي بغى تالا.. عرفتي شني.. ايجي شي نهار واتفكر هاد الحالة لي نتينا فيها واتبدا تضحك على راسك.. يقدر يكون سعد ما فيهشي خير ليك.. يمكن مزال ما جا هذا لي اتبغيه ويبغيك دبصح.. يمكن لمكتاب مخبيلك شي حاجة ما حسن.. عرفتي يانا فاش تزوجت باباك شحال بكيت.. ولكن دابا ندمانة على كل دمعة نزلتها من عيني .. من مور ما تزوجت باباك عرفت بلي كااااع داكشي لي داز ما كانش كما كنت حاسباه.. كلشي تبدل.. ولكن تبدل لما حسن.. مور ما تزوجت باباك عرفت الحب دبصح.. حيث داكشي لي كنت حاسباه حب كان غير ولف او مودة او سميها لي بغيتي.. مهم الحب دبصح عرفتو مع باباك.. وكون كان ترجع بيا الايام لداك الوق ويقولولي اتبغي فلان كنت انشبع عليهم غير ضحك.. (شدات وجهها بين يديها) ثيقيني ربي ما كيعمل غير لي فيها الخير
حركاتلها راسها بالإيجاب وعينيها مدمعين.. تبسماتلها وباستها من جبهتها..
رؤيا :ايوا دابا يله نوض
بيسان :فاين
رؤيا :شني كنا كنقولو من الصباح.. نوض انخرجو
🎗️🎗️🎗️🎗️
خرج هو من الاستوديو.. كيطرطق فعنقو بقوة لعيا ولعصب لي رجعلو بلحريق.. تنهد ودخل للحمام يدوش.. وخرج بفوطتو على نصو.. لبس حوايجو وتعطر.. وفتح لمجر يجبد ساعتو.. هزها حطها فيديه وطاحت عينو على بواطة صغيرة فالازرق قاتم.. سهااا وهو كيشوف فيها.. هزها بين يديه وفتحها.. كان فيها خاتم زواج بسيط بجوهرة وحدة.. مشا بالو لنهار شراه.. كان فرحااان ومتحمس باش يعرض عليها الزواج.. كانت هادي نيتو نهار عيد ميلادها.. كان باغي يعتارفلها بكاااع لي فقلبو ويلبسها هاد الخاتم.. تبسم بسخرية وهو كيشوف فين وصلو.. هزو بين صباعو كيشوف فيه.. كيتخايلو بين يديها.. كان غادي يجيها زوين بزاف.. قرا سميتهم لي مكتوبة وسط منو..كيحس براسو غير كيحلم.. وعمر لي فبالو يكون..كيحس براسو كيصارع على لخوا الخاوي.. وغير كيضيع الحجرة معاها بدون فائدة.. شنو كيتسنا من واحدة كتحسبو خوها..
براء :تمنيت يجي نهار لي نعطيك فيه هاد الخاتم وتعطيني قلبك..
جبد بواطة وحدة خرا كانت حداه.. كان فبها خاتمو.. دورة عادية من الفضة واسمهم محفور وسط منو حتا هو.. شاف فيهم بزوج بحسرة..تنهد وخشاهم فجيبو وسد لمجر وخرج..
وقف عليها فالكوزينة عاقدهم.. وبنبرة جافة وبدون مقدمات..
براء :ما تسناينيش فليل.. انتعطل
تالاسين :فين..
قبل ما تكمل كان خرج فحالو حتا سمعات الباب تسدات وخلاها واقفة كترمش..
دازو دوك اليوماين.. الحال هو نفسو.. ما كيهضرهاش.. ولا هضراتو ما كيجاوبهاش.. وما بقاش كيعمر معاها فالطبلة.. كيخرج فالصباح ويجي فالليل..وحتا هي مخلياه على خاطرو..
ناضت هاد الصباح بكري باش تلحق الكوموند وتكملها.. ودخلات للكوزينة وغرقات فيها..
وصلات لعشية.. موجدة كلشي وحاطاه فلكراطان مدريسيين مزيان.. ستفاتهم كتشوف فيهم فرحانة.. توحشات تخدم.. لبسات عليها سروال واسع مخطط اسود وابيض مع طوب واسع شوية دخلاتو فيه فالابيض وصباردين حمراء.. طلقات شعرها وجمعاتو بالنظاظر.. وهزات صاك طويلخالفاتو على كتافها..وعيطات للكونسييرج يطلع يعاونها فالهزان.. وداكشي لي كان هز هو وياها وتعاونو حتا هبطو كلشي.. ووقفو حتا شدات طاكسي.. عاونها طلعات كلشي.. وتوجهات للعنوان لي عاطيينها..
وصلات.. لقات راسها قدام فيلا صغيرة.. خلصات ونزلات سخرتها ووقفات عند الباب.. صونات فلانطيرفون ووجاوبوها الخدم.. وخرجو باش يدخلو معاها..
دخلات هازة زوج كراطن فيديها وكتشوف فجنابها.. كانو الاضواء عاطيين من الجردة.. وكيبانلها شي غادي شي جاي.. زوج خدامات غاديين قدامها بصبابط طالون وهازين معاها لكراطن.. وهي مفتونة مع لكراطن لي فيديهم..
تالاسين :عافاكم غير بشوية عنداكو يطيحولكم
خدامة:(بابتسامة) لا ما تخافشي..
تالاسين :(هزات راسها) اوك.. شكرا
زادو قدامها وهي تابعاهم..دخلو بيها للكوزينة لقاتهم مفتونين كيقادو ويوجدو..
تالاسين :ياك ما تعطلت؟
خدامة:لا..مزال ما بداو.. ولكن دابا وهما بداو يجيو الناس.. كلشي واجد بقى غير نستفو هادشي وصافي
تالاسين :اوك..
خدامة:نتينا خرج وتسنا فالصالة.. هانا انعيط لميسيو يوسف
تالاسين :ميسيو يوسف هو مول الحفلة؟
خدامة:وي ووصانا غير تجي نعلموه..باش يشوف لا كوموند واش هي هاديك
تالاسين:اه ضروري
خدامة :اوك.. تفضل معايا
تبعاتها تالاسين متحمسة والضحكة مشرگالها فمها.. خلاتها جالسة فالصالة كتشوف فجنابها وفالتحضيرات لي دايرين.. حتا كتشوفو نازل كيقاد فالكول دقميجتو وكيتبسم.. شاب وسيم.. اكثر حاجة فيه كتجذب هي الضحكة ديالو.. جاي كيشوف فيها من بعيد وتبسيمتو سابقاه.. وهي غير شافتو جاي ناحيتها وقفات وهي كتبسم بتوتر.. اما هو كان فرحان بشوفتها.. كان كيتسناها غري فوقاش تجي ويشوفها فاص.. كان دائما كيشوفها غير فالصور والفيديوهات.. واليوم ها هي قدامو.. ما كانتش كتجيبها الفرصة يشوفها حيث كان خارج المغرب.. وغير قرر يدير حفلة بالرجوع ديالو وفنفس الوقت يستغل الفرصة ويخليها تجي..
وقف قدامها كيشوف فوجهها.. كانت كتبانلو زوينة ودابا عجباتو كثر.. تبسم ومد يدو..
يوسف:اهلا
تالاسين :(صافحاتو) سلام
يوسف :واخيرا تلاقيتك
تالاسين :نعام؟
يوسف:والو والو.. مرحبا بيك.. يوسف القاسمي
تالاسين :بارك الله وفيك.. تالاسي..
يوسف:تالاسين ايت بعمران
تالاسين :(بدهشة) وي.. متشرفين
يوسف:الشزف ليا
سكت كيشوف فيها وكيتبسم وهي كترمش فعينيها ودور بجنابها وترها..
تالاسين :اممم.. يمكن خاصك تشوف لكوموند ديالك
يوسف:الصراحة ما يحتاجش.. عارف خدمتك
تالاسين:(قوصات حجبانها )
يوسف:ههه حيث سبقلي شايفها.. كنشوف لي بوسط ديالك
تالاسين :اااه.. ههه ايوا لهلا يحشمنا
يوسف:(ساهي فيها) امين
تالاسين :اححم.. دابا اتشوف الكوموند ولا لا
يوسف:ههه اوك نشوفوها.. (وقف بالجنب ودارلها حركة بيده) تفضلي
تبسماتلو وتمشات قدامو كتلعب بالسمطة دالصاك وهو موراها كيتبسم.. دخلو وشاف لي كوموند ديالو.. ما تسوقش هو اصلا وما هاماهش اصلا.. كون ما كانتش هي ما كيهتمش بهادشي.. ولكن غير لقاها سبة والسلام..
نسى راسو وسط الخدامة وهو كيشوف فيها.. حتا حس براسو وحنحن وقاد كتافو..
يوسف :نمشيو للبيرو نتفاهمو
تالاسين :اوك
يوسف:(دار لعند لخدامة) غير يجيو الضياف علموني
الخدامة:اوك ميسيو
خلاها تقدمات قدامو.. حتا خرجو من الكوزبنة وفات جا بجنبها باش يوريها منين الطريق.. وصل للبيرو وفتحلها الباب
يوسف:تفضلي
دخلات بشوية عليها.. ودخل هو موراها حتا بغى يسد الباب وهي توقفو..
تالاسين :عافاك بلاش.. خليها مفتوحة
يوسف:(استغرب وضحك) ههه اوك.. لي بغيتي.. جلسي
جلسات وجلس حتا هو يله جا يهضر وهو يصونيلو تيلي وتبسم..
يوسف:سمحيلي نجاوب وهانا معاك
حركاتلو راسها باه وناض هو وخرج من باب البيرو لي كطل على الجردة ووقف حاط يديه فجيبو كيمشي ويجي ومرة مرة كيدور يشوف فيها..
يوسف:الااا اصاحبي والله وما تجي ما نعقل عليك.. لا ماشي شغلي... زعما راه هادي شحال ما تشاوفنا اولا... ما تديرليش فيها مشغول.. مهم الا ما جيتيش غير قلب عليا.... يله بسلامة
قطع ورجع تيلي لجيبو ودخل عندها..
يوسف:سمحيلي خليتك تسناي
تالاسين :لا ماشي مشكيل هانية
يوسف:ما سولتكش.. تشربي شي حاجة؟
تالاسين :لا شكرا.. ما يحتاجشي
يوسف:اوك على راحتك
تالاسين :شكرا
يوسف:واحد دقيقة
فتح لمجر لي حداه وجبد منو برية ومدهالها..
يوسف:تفضلي.. هذا الثمن لي تافقنا عليه
تالاسين :بسم الله.. شكرا
يوسف :الشكر ليك
تالاسين :(ناضت) الوغ.. انا انمشي
يوسف:(وقف حتا هو) لا صبري
تالاسين :(وقفات) ياك لباس.. مزالة شي حاجة
يوسف:(حك عنقو) لا كلشي هو هداك.. غير هو الصراحة.. اححم.. ما عرفتش كيفاش.. مهم ما كرهتكش تبقاي وتحضري معانا للحفلة
تالاسين :(استغربات) وعلاش؟
يوسف :هااا.. اممم.. مهم ما جاتش تعذبتي وضربتي تمارة وما تحضريش معانا
تالاسين :لا عادي.. هاديك خدمتي
يوسف:اححم.. الصراحة انكون فرحان لا بقيتي وحضرتي.. كما قلتلك انا كنعرفك مزيان.. زعما كنعرفك من السوشال ميديا وايحصلي الشرف لا بقيتي وحضرتي معانا
تالاسين :ربي يخليك.. بلحق ما نقدرشي والله سمحلي
قبل ما دور وتخرج كان هو وقف قدامها..
يوسف:لا حشومة اترفضي الدعوة ديالي..
تالاسين :راه ماجاتشي.. يانا ما كنعرف حد هنا.. وما جاتشي اي حد خدمتلو نحضر عندو
يوسف:هانتي كتعرفيني انا بركة اولا؟
تالاسين :ما جاتشي والله غير خليني نمشي
يوسف:(هز راسو وحط يديه فجيبو) لا.. ما انقبلش الرفض..
تالاسين :ولكن را..
يوسف:وا صافي ما تكونيش معكسة.. غير اتحضري معانا وصافي ماشي شي حاجة.. ما كنطلبش شي حاجة امبوسيبل
تالاسين :سكتات كتشوف فيه
يوسف:الوغ صافي.. السكوت علامة الرضا ياك ههه
تالاسين :(هزات كتافها باستسلام)
يوسف:اذا مرحبا بيك
تالاسين :شكرا
تسمع دقان.. وتفتحات الباب من بعد ما سمحلهم يوسف باش يدخلو..
الخدامة:ميسيو يوسف.. ضيوفك بداو يوصلو
يوسف :اوك هانا جاي
خلاها زادت قدامو وخرج هو وياها وهي حشمانة ومتوترة.. جاتها غريبة وخاصة انها ماشي شي وحدة لي دغيا كطلق الطبيعة.. خرج هو وياها للجردة وخلاها واقفة ومشى كيسلم على صحابو وهي وقفات عند واحد الطبلة طويلة وكتشوف فجنابها.. وهو كيهضر ومرة مرة عينو كتمشي ليها..
بدات الجردة كتعمر..وتشعلو الأضواء باش يضويوها وسط عتمة الليل.. كانت واقفة كتشرب فكاس دالعصير حتا جا ووقف حداها مربع يديه فوق الطبلة..
يوسف:كي جاتك الحفلة.. عجباتك
تالاسين :وي زوينة
يوسف:(تبسم) ما تكونش قدك
شافت فيه كترمش.. زرب عليها.. تبسماتلو وهي مبعدة عينيها ما كتشوفش فيه.. جبد معاها الهضرة باغي يدي ويجيب معاها.. وكل شوية يرميلها شي هضرة ويخليها غير كتصفار وتحمار..
فنص الحفلة.. دخل حاط يدو فجيبو وكيحك ذقنو بطرف اصبع الابهام.. تيشورط كحل مع سروال كحل حتا هو وصباردين كحلة مع رشيشات دالابيض..شعرو ماشطو ومرجعو لور والريح كيدي ويجيب فيه بشوية..هز راسو كيقلب عليه بعينيه.. حتا كيبانلو واقف عند الطبلة.. شاف فيه وتم غادي جيهتو حتا كيهز راسو فيه وهو كيهضر وتبسملو..
داز من حداها هي لي كانت عاطياه بالظهر ومشا نيشان جيهة يوسف كيسلم عليه وكيطبطبو على ظهر بعضهم..
يوسف :صاحبي ههه توحشنااك
براء :ههه ربي يحفظك.. على سلامتك
يوسف:الله يسلمك.. روسيا توحشاتك
براء :انا بعدا ما توحشتهاش ههه
بعدو على بعضهم كيضحكو.. وكاع ما رادين البال لتالا لي واقفة مخرجة عينيها فيه.. تفاجأت فاش شافتو هنا.. وعاد صدق كيعرف يوسف.. بقات غير واقفة..وكترمش فيهم..حتا دار وجات عينو فعينيها وهو يعقدهم.. شاف فيها لوهلة كيستوعب ويوسف كيشوف فيه باستغراب من شوفاتهم لبعضهم..
براء :شنو كديري هنا؟
تالاسين :نتينا لي شني كتعمل هنا
يوسف:كتعرفو بعضكم؟
براء :(شاف فيه بحدة) نتا لي منين كتعرفها؟؟
يوسف:ياك لباس..شنو كاين؟
شاف براء فيها عاقدهم وهي ما حملاتش الطريقة باش كيهضر وكمشات فمها ما عاجبها حال وكتشوف فيه بتحدي.. ويوسف بيناتهم ما فاهم والو..
يوسف :الانسة تالا هي لي تكلفات بالمقبلات دالحفلة وفاش جات عرضتها تبقى وتحضر حتا هي.. واش كاين شي مشكيل؟
براء :ما قولتيليش جاية لهنا
تالاسين :(بتحدي) قلتهالك.. نتينا لي ما تسوقتيشي
براء :(سكت وخنزر فيها)
يوسف:فهموني.. منين كتعرفو بعضكم
شافت فيه وشاف فيها.. طلع حاجبو وهز مناخرو للسماء حاط يديه فجيبو.. وعينيه فعينيها ما نزلوش على بعضهم..
براء :نعرفك..هادي ختي
شاف فيها بتحدي وهي باستغراب.. عارفة هاد الكلمة ما كيحملهاش.. ولكن عرفاتو كيردلها الصرف زعما..
يوسف:(بدهشة) ختك.. بصح؟؟؟؟
براء :(هز راسو وعينيه فيها) امممم
يوسف:هههه سبحان الله صدفة زوينة هادي
تالاسين :(ميقات فبراء) اممم.. بزاف
تبسملها يوسف وشاف فكاسها خاوي.. شير لواحد من لي كاغصون وهز كاس دالعصير دلفريز مدولها..
يوسف:كاسك خوا؟
شافو فالكاس ونطقو بزوج:لفريز.. لا
شافت فيه وشاف فيها ورجع قلب وجهو..
يوسف :علاش
تالاسين :عندي حساسية منو
يوسف:بصح.. اوك نبدلوه..
جابلها كاس اخر وبراء غير كيشوف فيها بطرف عين.. ما حاملش اهتمامو بيها.. قلب عينو فيها ودار هو كيهضر مع صاحبو وما معبرهاش.. وفما كيبغي يوسف يشركها فالهضرة او يهضر معاها ما كيخليهش يكملو وكيزرب عليه قبل..
يوسف وبراء علاقتهم علاقة زوج لاقاتهم الغربة.. قراو مع بعضهم ادارةة الاعمال وكانو مرة مرة كيتلاقاو ويخرجو ينشطو مع بعضهم.. ولكن ما كانتش بيناتهم شي صحبة قوية لي تخليهم يعاودو اسرار بعضهم.. وفاش قالو ختي.. مادا ما جاب.. خاصة انه ما كانش حضر للايف لي تمسح فساعتو..
كانو واقفين وكيهضرو.. وهي غير واقفة وكتسمع.. حتا وقفو عليهم ثلاثة دلبنات باينين كيعرفوهوم مزيان.. وهي واقفة كترمش فيهم..
بنت1:برااااااء توحشناك..
تبسملها وهي تهزات عنقاتو.. دور يدو عنقها واليد الثانية مزالة فالجيب
خدات نفس طوييييل.. وهزات راسها وخرجات.. لقاتو مزال واقف كيتسناها.. تعجبات وهو تبسملها وقربات عندو
تالاسين :ماكان لاش تسناني
يوسف :ماشي مشكيل
تالاسين :اوك.. مشينا
بغات تزيد وهو يشدها من دراعها وجرها قبل ما تمشي.. شافت فيه وفيدو وهو يفهم راسو وطلقها..
يوسف :بغيت نهضر معاك
شافت فيه مقوصة حجبانها كتسناه شنو ايقول..
تالاسين :وي.. شني
يوسف:(كيحك عنقو) مهم.. الصراحة.. ما عرفتش كيفاش نشرحلك
تالاسين :خلعتيني.. ياك لباس
يوسف :لا لا والو باس.. غير هو.. بغيت نقولك.. احححم مهم انجيك من لخر..
تالاسين :(علات حاجبها باهتمام)
يوسف :نتي كتعجبيني وبزاااف.. والصراحة ما جيتش وعيطتلك غير هكاك ولكن كنت باغي نتلاقاك وما لقيتش شي سبة حسن من هادي
بلقات عينيها فيه مبهوضة.. وكترمش.. متفاجاة كالعادة.. صدمها وهي عمرها عرفاتو..
تالاسين :واش كتهضر من نيتك.. نتينا يله عرفتيني هاد نهار
يوسف :لا.. نتي لي عرفتيني هاد نهار.. انا كنعرفك.. من شحال هادي..كنت كنتمنى نهار لي نتلاقاك فيه.. وبحكم كنت فالغربة ما كانش عندي كيفاش.. ولكن غير جيت اول حاجة درتها هي هاد الحفلة.. غير باش نجيبك ونشوفك.. وما تخايليش شحال فرحت..
تالاسين :سمحلي.. خاصني نمشي
دارت اتمشي بحالها وهو يشدها من دراعها ودورها عندو..
يوسف :تسناي..
تالاسين :رخي مني
يوسف:سمعيني غير نهضر معاك اتالاسين.. انا ما باغيش نتفلا.. عاجباني وبزاااف.. ما تيقتينيش نخرج دابا ونهضر مع خوك.. غير سمعيني
تالاسين :ما عندي ما نسمع.. رخي مني..
يوسف:لا.. ما جبتكش لهنا باش نخليك تمشي هاكة.. غير سمعيني بعدا وعاد حكمي.. اجي نمشيو لشي بلاصة نجلسو ونهضرو
يوسف :ما بغيتي تخلينا نهضرو ما بغيتي تقولي علاش.. راه ما طالب منك والو.. طالب منك غير تجلسي وتسمعيني..
تالاسين :(هزات راسها فيه بنظرة حادة) لا..
يوسف :علاش؟
شافت فيه مطولا وهي كتسوط.. عصبها وهو كيمشيلها من هنا ويجيلها من لهيه.. زفرات بملل ونظرة واثقة شافت فيه..
تالاسين :حيث مزوجة
كان مزال واقف كيهضر مع لبنات وعينيه على الباب كيتسنا يوسف يرجع وبالو مشطون.. وهما ما بغاوش يطلقوه بالهضرة.. واقف معاهم وعقلو وعينو فجيهة خرا.. حتا كيحس بوحدة فيهم قربات وحطات يديها على صدرو.. وهو يهز حاجبو فيها..
شدلها يديها لي كتلعب بيها فالكول ديالو.. وبعدها عليه.. خرج يدو الشمال من جيبو وهزها قدامها حتا خرجو عينيها..
براء :انا مزوج.. حسن ليك فرقيني عليك
خلاها واقفة كتبرقق بحال لمصرفقة منبن شافت الخاتم.. ودخل هو كيزفر ويقلب عليهم بعينيه..
🎗️🎗️🎗️🎗️
خرج عينيه فيها.. وبقى غير كيرمش فبلاصتو وهي كتشوف فيه.. حتا تبسم وبدا كيضحك..
يوسف:زوينة هادي هههه.. كذبة واعرة..
تالاسين :ما كنكذبشي.. انا مزوجة
يوسف:كضحكي؟
تالاسين :(بجدية) لا.. شوف فيا.. كنظهرلك كنضحك
تبهض وبقى ساكت للحظات حتا كينطق وهو الهضرة كتهرب عليه..
يوسف :كيفاش تزوجتي.. فوقاش.. ما يمكنش.. نتي كضحكي عليا..شفتي انا مأكد كتكذبي عليا
تالاسين :راه ما عندي علاش نكذب عليك.. خليني نمشي دابا الله يخليك
يوسف:الا مزوجة فين هو الخاتم..علاش ما دايراهش
تالاسين :كاعلك لا ثيق
براء :الخاتم ديالها عندي.. نساتو فالدار وهي خارجة
دارو شافو فيه.. كان واقف حاط يديه فجيابو ومحمر فيوسف.. سرطات ريقها... ويوسف كيشوف ما فاهم والو.. حتا قرب ووقف بجنبها وعينيه فعينها.. وجبد الخاتم من جيبو..
براء :شحال من مرة قلتلك ما تنسايهش.. ولكن معامن كنهضر
هزلها يديها حطها بين يديه.. وهي كتشوف فيه مبلقة عينيها وحط الخاتم فصبعها.. مشات عينيها ليدو لقاتو لابس خاتم حتا هو.. هزات عينيها فيه ورجعات شافت فالخاتم لي فيديها.. خاتم زوييين كما كيعجبوها.. بسيييط وفنفس الوقت عاطي للعين... ذوقها تماما.. هز عينو فيها لقاها كتشوف فيه بنظرات غريبة.. بغى يفسرهم ما عرفش.. تبسماتلو وهو قوص حجبانو باستغراب.. ودارت شافت فيوسف مبسمة.. حنات راسها وشابكات يديها مع يديه وهو كيشوووف فيها معجب..
تالاسين :كنتمنى تكون ثيقتي دابا..انا مزوجة.. (هزات عينيها وشافت فيه ) وراجلي هو براء
يوسف :(ضحك ببلاهة) ههه صبرو صبرو نفهم.. كيفاش هادي؟؟ براء.. شنو واقع
براء :(زير على يديها) لي واقع هو اتجمع راسك.. وما نعاودش نشوفك كطيف بساحتها.. لي قدامك مراتي.. والا كانت شي حاجة فبالك اتمحيها.. باش ما نتخاسروش انا وياك
يوسف :مراااااتك؟؟ ههه كيفاش مراتك.. ياك عاد قلتيلي ختك
براء : هداك كان غير سوء تفاهم وتحل دابا.. لي خاصك تعرفو.. تالا مراتي ونقطة وسدينا..
جرها من يديها وتبعاتو هي حانية الراس وخرجها قدام الناس شاد فيها.. خلاوه هو موراهم مصدوووووم وما عارف باش تبلا..
كانت موراه.. يديها فيديه.. مزير عليها.. وهي كتشوف فيديهم بزوج وفالخاتم لي فصبعو.. جاها احساس فشكل.. ماشي فرحة وماشي حب.. وانما احساس بالانتماء.. حسات براسها منو وليه..ما عرفاتش علاش ولكن اول مرة اتشوف فيه براء الراجل لي كيحميها.. الراجل لي ديما واقف معاها.. هو خاتم بسيط ولكن تاثيرو كان قوي عليها.. حسات باحساس غريب كيجرها ليه ومخليها ساكتة وما قادرة تنطق بحتا حرف..
وقفها وفتحلها الباب.. دخلات وسدها موراها ودار هو باش يركب وهي متبعاه بعينيها فحال الا عمرها شافتو.. لاحظات هاد المرة شحال كتجي معاه التخنزيرة.. عمرها شافتها زوينة عليه.. قوصات حجبانها مستغربة من افكارها.. شافت فالخاتم لي فيديها.. وقلبات وجهها للسرجم ساهية فراسها.. وهي كتحاول تنفض هاد الافكار من راسها..سمعاتو طلع وسد الباب.. وبلا ما دور حسات بيه كيشوف فيها.. سرطات ريقها بتوتر.. ما عرفاتش علاش ولكن حسات بلي ما كرهاتش تغبر من قدامو فاللحظة.. حتا سمعاتو هضر بنبرة بابن فيها غضب مدفون..
براء :ديري سمطتك
حسات بصوتو زاد زعزعها.. ما عرفاتش مالها.. مزالة اللقطة ديالو وهو كيركبلها الخاتم فيديها بين عينيها..
براء :معاك.. ديري سمطتك
حنحنات بتوتر ومدات يديها للسمطة تقادها وشاداها الرجفة.. علاش ما نعرف.. جبداتها وهي تعكسلها وهي حاساه مزال حاضيها بعينيه.. بقات غير كتفافا فبلاصتها مع السمطة وتحمض حتا عصباتها وبدات كتسوط وهي حانية راسها كتحاول تغطي وجهها بشعرها وتخبيه على عينيه..
زفرات بغضب حتا كتحس بشي نفس قريييبة ليها وكتسوط الشعر حتا كيضرب فوجهها وهي مدوراه لور كتجابد مع السمطة..
حسات بيه قريب منها.. نفسو كضرب فوجهها وهي قالباه للجنب.. حسات بيه قريييب بزاااف لدرجة فاش كتنفس ويطلع صدرها كيقيس صدرو هو.. سرطات ريقها وحسات بالفشلة.. ما قدراتش دور حيث عارفة إذا دارت اتلقاه قدام وجهها.. بلقات عينيها وبقات جامدة وصدرها طالع نازل بالجهد وريحتو طالعة مع نيفها تلفاتها..
مد يدو للسمطة هو حتا دازت من حدا وجهها.. حس بيها مخلوعة.. استغل الموقف لي هما فيه وقرب نيفو لشعرها كيستنشق ريحتو.. ما نكرش بلي هاد اايوماين توحشها.. خذا نفس عمييييق وطلق موراه تنهيدة خافتة.. وشد السمطة وهو عينيه على وجهها لي قالباه.. تبسم ابتسامة خفيفة وجر السمطة جوج جرات وهي تسرح.. جرها وقادهالها وبعد عليها وهي مزالة جامدة فبلاصتها.. وديمارا وزاد..
ساد الصمت طول الطريق.. هي جالسة وكتحك فيديها وتلعب بالخاتم فصباعها وكتفكر شنو وقع.. وهو عاقد حجبانو وعينو فالطريق وعليها.. شافها كتدور الخاتم فصباعها وقلب وجهو شاف فالطريق..
براء :ما تبقايش تحيديه
هزات راسها فيه باستغراب.. شاف فيها وهو سايق وشاف فالخاتم..
براء :كيفاش علاش؟؟ واش عمرك. ديري شي حاجة بلا ما تهضري بزاف
تالاسين :ما انعملوشي هاء.. علاش انعملو
براء :اديريه باش نهار اخور ما يوقعش لي وقع دابا.. ما انتسناهمش حتا يجيو يخطبوك مني على اساس خوك.. اديريه فيدك باش كلها يلزم حدودو.. (هزو ومدولها وعينيه فالطريق) شدي حطيه فصبعك
تالاسين :(شداتو منو ورجعات حطاتو فين كان) لي وقع هاد النهار وقع بسبابك
براء (ضرب الفولون ودار كيغوت قالب وجهو) الله ينعل طاسيلتي انا نييييت لي جالس نحمق راسي معاك.. كاع عمرك لا تلبسيه.. تفوووو المرض كيداير.. التبرهيش
تالاسين :دابا انا برهوشة
ما جاوبهاش وكمل السوقان كيحك فلحيتو وساخط دبصح.. وهي شافت فيه مطولا وزفرات وقلبات وجهها عاقدة حجبانها وما عجبها حال.. وهو حداها كفس منها حتا وصلو وفرانا بالجهد.. فكات السمطة ونزلات فحالها وزدحات الباب.. هو كان نزل شاف فيها من مخنزر وهي عطاتو بالظهر وتما داخلة.. زفر ساخط وزدح الباب حتا هو وتم داخل تابعها..
وقفات مربعة يديها كنتسنا السانسور ومكمشة فمها وكتشطح برجليها.. وهو وقف بجنبها حاط يديه فجيابو ما كيشوفش قدامو.. كتمرضو دبصح معاها.. وواخة كيقول صغيرة ما يديش عليها ولكن الصبر ليه حدود.. تحل السانسور ودخلات وتبعها.. كل واحد فيهم فين كان قالب وحهو فقنت.. وحد ما كيشوف فلاخور والسانسور طالع.. حتا فجأة هووووووب.. تقطع الضوء وحسو بالسانسور تهز هزة وحدة وحبس فبلاصتو..سرطات ريقها ودارت كتفتف فبلاصتها..
تالاسين :ششش..شش..شني وقع؟بب براء فاينك
حسات بيه وقف حداها وهي تشدلو فالتيشورط كترجف..
براء :هانا حداك.. ما تخافيش
تالاسين :ظلام.. شني وقع
براء :باين تقطع الضوء.. دابا وهو رجع
تالاسين :(تخلعات) وانبقاو هايدا
براء :هانا انشعل لبيل فتيلي
شعلو وضوا بيه السانسور.. لقاها لاصقة فيه وعينيه كيدورو فبلاصتهم مخلوووووعة وكتسرط فريقها.. هزات عينيها فيه وزادت زيراتلو على التيشورط من الجناب..
تالاسين :خايفة
عقد حجبانو وهز يدو حطها على راسها..
براء :ما تخافيش.. انا معاك
زيرات على تيشورطو كثر.. وهو دور يدو على كتفها ومضوي بلبيل.. ما رضاتش البال راهم معانقين بقوة الخلعة.. حتا سمعو السي مختار كيعيط وصوتو كيتسمع غاارق وبعيد..
السي المختار:سي برااااااء.. سي برااااااء كتسمعني
براء :(بصوت قوي) ها حنا هنا..
السي المختار :راه تقطع الضوء على المنطقة كاااااملة.. وحتا المولد ما خدااامش
براء :كيفاش ما خدامش.. وعلاش دايرينو منين ما خدامش
السي المختار :نعااااام.. راه ما كنسمعكش مزيان السي براء.. مهم غتصبروووو شوية انجيبو مولد جديد وااااخة.. حيث يقدرو يتعطلو باش يردو الضوء
براء :(زفر قالب وجهو) اوك.. وطلقو راسكم
تالاسين :دابا انبقاو هنا حتا يرجع الضوء
براء :هادشي لي بانلي
بقات شادة فيه وكتشوف فجنابها.. رد ليها البال بلي مزيرة. على تيشورط ديالو.. تبسم وقرب حدا وذنيها وهمسلها..
براء :ما تخافيش.. ما حدي معاك عمر شي حاجة تأديك
قوصات عنقها للجنب حيث بورشها.. تبسم كيضحك عليها بنظرة زوينة.. حنحنات وطلقات منو بشوية وبعدات عليه.. وهو مزال مبسم عاق بيها..
تالاسين :اححم.. على الله ما يتعطلوشي
براء :امممم.. ان شاء الله
شاف فيها مطلع حاجبو ولبيل مزال مشعول.. رجع لور شوية ووكى على السانسور كيطلع فيها ويهبط وهي عاطياه بالجنب وكدور فعينيها.. حتا هزات الشعر مور وذنيها وهو يقلب وجهو كيضحك بشوية وكيحك نيفو..بقاو واقفين هكاك وساكتين.. هو كيطلع فيها ويهبط وهي عاطياه بالجنب وواقفة.. حتا تنهد وهبط جلس..
براء :غير جلسي راه باين هادشي مطول
زفرات عيانة واستسلمات وهبطات حتا هي جلسات حداه ومع السانسور ما كبيرش.. جاهم لكتف عند لكتف.. كان جالس حاط يديه على ركابيه لي مثنيين قدامو.. شاف فصبعان يديه وبانلو خاتمو وهو يتنهد..
براء :دابا حنا شحال انبقاو هاكة
دارت شافت فيه مقوصة حجبانها باستفهام..
تالاسين :كيفاش هاكة؟؟
ما شافش فيها وبقى كيشوف فيديو وصبعانو كيلعبو بالخاتم.. شافت فيه فين كيشوف وتسناتو يهضر..
براء :انا عارفك ما مرتاحاش.. وعارف بلي زواجنا ماشي زواج عادي.. وبلي صعيييب تقبليه.. ولكن كنت كنتمنى منك انك تحتارميه على الأقل.. ما كنطلبش منك شي حاجة صعيبة.. زواجنا ما ختاريناهش ولكن تفرض علينا.. ولكن كيبقى حقيقي.. ونتي كتبقاي مراتي.. وغير هاد الكلمة كتعطيني شحال من حق عليك وكتعطيك شحال من حق عليا.. ما تفهميش هضرتي بلي باغي منك شي حاجة.. ولكن كاين شي حوايج ما نقدرش نتنازل عليهم.. حيث واخة نعياااا نميك وما نتسوقش كنبقى راجل.. ورااجلك.. وكتبقاي محسوبة عليا.. مراتي وعرضي.. ما نبغيش لي يضرك.. وما نبغيش لي يجي جيهتك.. وغير هادشي لي وقع هاد النهار يفهمك شنو كنقصد.. والخاتم بغيتك ديريه حيث ايخلينا نتفاداو بزاااف ديال الصداع.. زواجنا ايدوم عامين.. وفهاد العامين ما باغيش نتحط فشي موقف لي يخليني نغلط.. حيث كنصبر اه.. ولكن شي حوايج ما نقدرش نصبر عليهم..
كانت كتسمعلو من نيتها.. حيث كان كيهضر بطريقة مهدنة.. خلاها مركزة معاه وكتصنتلو..
تنهد هو وسكت.. وحنات راسها هي كتشوف فصباعها وكتفكر فالخاتم وفالاحساس لي حساتو.. داك الاحساس لي حساتو خلعها وخلاها تزولو.. حساتو أثر عليها وهي ما باغاش.. تنهدات بصوت مسمووووع فحال الا هازة. جبال فوق كتافها.. شاف فيها هو مهمومة وخدا نفس عميق..
براء :صافي نساي.. ما ديريش فبالك
ما هزاتش راسها فيه.. وما جاوباتوش.. بقات ساكتة ويديها على صباعها حانية راسها.. بقاو ساكتين حتا تشعل الضوء وهزو راسهم فيه وبدا طالع بيهم السانسور.. ناضو وقفو كينفضو حوايجهم وهما ساكتين ما كينطقو ما كيتكلمو.. حتا تفتح الباب ولقاو المختار قدامهم هو ومجموعة من السكان من بينهم وصال.. غير شافهم بداو عليهم بالأسئلة
تالاسين :(شافت فيها كطلع وتهبط وهي لابسة غير بيجامة شورط وديباردور وكلاكيط)
براء :(ما جوبهاش) السي المختار رد بالك لخدمتك الله يخليك..
السي المختار :راه غير نسيت ما صلحتو السي
براء.. مهم ما ايتعاودش.. مهم نتوما مزيانين
حركلو راسو وشاف فالجيران لي تما تبسملهم كامتنان وداز فيها هي لي واقفة. قدامو كترمش فيه.. وتبعاتو تالا هازة مناخرها.. وعاااد قشعاتها وصال..
وصال:حبيبة تالا.. مزيانة؟
تالاسين :(عوجات فمها) اممم.. مزيانة.. شكرا
تبسماتلها ابتسامة صفراء وزادت وخلاتهم واقفين وتبعاتو.. دخلو للدار ساكتين.. كل واحد باغي مساحة فين يفكر مع راسو.. مع اادخلة بانلهم امينو ومينوشة جالسين كل واحد فقنتو ومرصيين بعقلهم.. تصدمو فيهم.. شافت فيه وشاف فيها.. ورجعو قلبو وجههم وكلها مشا لبيتو..
فنص الليل.. كانت جالسة كتخمم.. كتقلب فبلاصتها وكلامو كيتعاود فراسها.. تنهدات وناضت جالسة.. بقات شحال كتشاور وفلخر زعمات وناضت خرجات كتسلت.. حتا وقفات عند بيتو كتشاور تدخل او لا لا..
خدات نفس عميق.. ودخلات بشوية.. طلات عليه بانلها ناعس فبلاصتو.. وقلبات الدورة كتقلب على حوايجو لي كان لابس.. وبدات كتقلب فجيابو على الخاتم.. فلاتهم فليان وما لقاتوش.. حطاتهم كتسوط وحطات يديها على جنابها كتشوف فجنابها.. هزات راسها فيه مزال ناعس.. وبدات كتقلب فوق لكوافوزات ما بانلهاش وهي تهز راسها كتسوط.. ما لقاتوش وهي تنفض راسها وتمات خارجة فحالها.. حتا وصلات للباب وهي توقف فبلاصتها كتفكر ورجعات كتقلب عليه فلمجورة حسي مسي.. حتا كطيح فلبواطة ديالو وغير فتحاتها وبانلها وسطها وهي تهزو وحطاتو قدام عينيها كتبسم..قلبات وجهها شافت فيه مبسمة ولبساتو فصبعها.. شافت فيديها عاجبها.. وعاد خرجات فرحانة ومشات لبلاصتها تنعس..
🎗️🎗️🎗️🎗️
صباح عليهم الصباح.. وناضو كالعادة.. هاد الصباح لقاتو كيوجد لفطور وما خرجش بكري.. صبحات عليه وبدات تعاونو فلفطور فهدوء تام.. حتا جلسو يفطرو.. وجلس هو قبالتها وهز عينو فيها فاش هزات الكاس دالقهوة وهو يبانلو الخاتم فيديها.. عقد حجبانو وشاف فيها ما كانتش كتشوف فيه..تبسم بلا ما يحس.. وهز اصبع الابهام كيحك بيه نيفو من الجنب وهو قالب وجهو كيتبسم.. ورجع شاف فيها كياكل..
براء :جاك زوين فيدك.. بصحتك
هزات راسها فيه معجبة.. وقوصات عينيها باستفسار.. ما فهماتوش علاش هضر.. وهو ينعتلها بعينيه للخاتم.. شافت فيه وعاد طلعات معاها.. وبقات غير كتدور فعينيها.. ما عرفت ما تقول.. وحسات بالصهدة طالعة معاها.. وهو كيشوف فيها مبسم.. شافها تحرجات وهو يجمع الضحكة وكمل فطورو عادي.. ما بغاش يحكر وهو راه فرحااااان وعاجبو لحال فوق لقياس..
🎗️🎗️🎗️🎗️
كانت فالكوزينة كتجمع فالطبلة.. وهو مشا لبيتو كيلبس عليه باش يخرج.. حتا كتقشع شي حاجة دازت مع جنب الحيط دالكوزينة كتجري.. دارت بالزربة تشوف شنو هي.. ما بانلها والو.. وهي مزالة كتحقق حتا كيتم خارججلها فار من مور الثلاجة كيزعرط.. وبدوووون سابق انذار غوتات ربي لي خلقها وما عرفات كي دارت حتا كانت فوق البوطاجي علي يديها ورجليه.. وكتغوت وتعاود واتحماق معاه.. حتا كيبانلها تخشا فواحد القنت وغير شوالو لي كيبان..
كان كيلبس عليه حوايجو حتا سمع غواتها وخرج طافج لعندها.. غير وقف عليها لقاها فوق لبوطاجي كتغوت ما فهم وااالو.. حتا هزات راسها فيه وبدات كتنعتلو بصبعها للقنت وعبنيها خارجين وكتنقز فبلاصتها..
شاف فين كتنعتلو وهو يبانلو من مور الثلاجة.. وعاد فهم شنو واقع وقرب بشوية كيهدنها..
براء :ششش.. صافي صافي.. هانا انقتلو غير تهدني
تالاسين :دغيا دغيا اههئ اهئ
براء :(حط يدو مور عنقو كيحكو ويشوف فجنابو) خاصني باش نقتلو.. فين هي شطابة
تالاسين :لهيييه لهييه.. دغيا قتلو
مع غواتها مع خرج الفار كيرودع هربان لقنت اخر وهي تبدا تغوت حتا تلفاتو ما عرف يحضي الفار ولا يهدنها حتا كيشوفو جاي جيهتو ونقز خلاه داز تحت منو وخرج من الكوزينة..
تالاسين :واااا هرب هرب.. مشاااااااا
براء :وا غير سكتي ها حنا انقتلوه..
تالاسين :لاااااا لا لا نتينا لي اتقتلو ماشي حنا..
براء :واخة واخة انا لي انقتلو.. غير سكتي
تالاسين :وا دغيا دغيا
خرج هو تالف وخلاها هي عينيها خارجين فبلاصتها كترجف بالخلعة.. بقا كيقلب عليه وهاز الشطابة فيديه وهو حراااام ولا بان.. حتا عيطاتاو من الكوزينة بصوت عالي..
تالاسين :قتلتييييييييه
براء :هانا هانا.. قريب..
كان كيقلب ويحني تحت طبالي ويشوف فلقنات سطاه بالتقلاب وما بغاش يبانلو.. حتا كتبانلو مينوشة قانتة على واحد القنت.. عرفها حصلاتو وعاسة عليه.. مشا لتما كيتسلت بشوية.. يله جر الطبلة لي مع الحيط شوية وهو يتم خارج كيجري.. نزل عليه بالشطابة ما جاتش فيه ونقزات مينوشة كتجري موراه وهو هربان.. حتا بدا كيصونيلو تيلي وهزو يجاوب وهو مفتون معاهم هما لي كيتجراو قدامو وكيحاول يتعرضلو يقتلو وكينهج وينقز من هنا لهنا..
براء :الو.. اه السلام عليكم.. لا لا هانا جاي.. دابا دابا غير تسنايني... واخة ما انتعطلش دابا..(هربلو) اووووف المرض.. هاه لا لا ماشي معاك.. مهم هانا جاي
قطع كيسوط وداك الفار محمقو ما بغاش يتشدلو.. حتا كيشوف مينوشة قنتات عليه وشداتو حاطة يديها على شوالو وما ترددش ثانية باش ينزل عليه وخلاه كيفرطط فبلاصتو..
رجع دخل عندها شاداه الضحكة.. وهي غير شافتو بدات كتسرسر.. وهي راكعة على ركابيها
براء :(قرب منها) وا نزلي يهديك الله واش اتبقاي تما
تالاسين :اوووف رجلي فشلولي
براء :اجي لهنا اجي هههه
حط يدو على خصرها.. وهوووووووب هزها بين يديه خلاها غير كترمش.. حطها فالارض وهو كيشوف فوجهها لي قريب ليه مبسم.. حسات بقربو ليها موترها.. وما قدراتش تكمل فيه الشوفة.. شافها حنات راسها وهو يبعد يدو عليها وحط يدو على فمو كيحنحن.. هي غير حطها بعدات راجعة لور وكتشوف فجنابها.. حتا صونالو تيلي مرة أخرى جبدو شاف شكون وهو يسوط..
براء :بفففف تعطلت.. مهم هانا خارج صافي
تالاسين :(خرجو عينيها) فاين ماشي.. اتخليني بوحدي
براء :علاش شنو ايوقعلك.. انا عندي واحد رونديفو مهم بزاااف وديجا تعطلت
خرج وهي وقفات كتستوعب ورجعات تبعاتو كتجري وفنفس الوقت كتشوف فجنابها مزالة. خايفة لا يخرجلها حتا دخلات عليه لبيتو لقاتو خارج هاز تيلي ديالو وسوارتو..
براء :ما عندو ما يوقع.. ياك الفار وقتلناه ايوا صافي..
تالاسين :لا خليك.. بلا ما تخرج
براء :راه ما نقدرش.. عندي رونديفو ما نقدش نفوتو
تالاسين :ديالاش؟
براء :دالخدمة..
تالاسين :ودابا يانا شني نعمل.. الا رجع خرجلي شي فار.. (كتشوف فجنابها) راه والله حتا نحماق ويانا بوحدي
براء :ها مينوشة معاك هي تكلف
تالاسين :دابا حرااااااام عليك.. خليك عافاك.. ما بقيتشي فيك
براء :راه ما نقدش نبقى.. راه هاد رونديفو الا ضيعتو صافي..
سكتات وشافت فيه مطولا وهي مقوصة حجبانها بترجي كتستعطفو بعينيها.. وهو مصغر عينيه فيها بابتسامة عايق بيها..
تالاسين :ديني معاك!!
شاف فيها مطولا.. ورجع تنهد وحط يديه فجيابو..
براء :اوك..يله..بلحق اتسربي راسك حيث راني مزروب
تالاسين :لا انلبس عليا دغيا دغيا
تحركات من بلاصتها غادة وكتمشا على طراف صباعها بحال الا مشمئزة وموسوسة عنداك يخرجلها عاود.. دخلات لبسات عليها سروال دجين ازرق فاتح مع طوب اسود بسميطات رقاق وكتاف طايحين وبشبكة خفيفة من الصرة للتحت وصباط ابيض وخرجات كتجري عندو.. لقاتو واقف كيتسنا فيها.. غير شافها وهو يطلعها ويهبطها وطلع حاجبو..
تالاسين :ما تعطلتشي ياك.. يله زيد
حبسها بيديه قبل ما تحرك.. رجعات لور وهي كتشوف فيه باستغراب وهو عينيه على النص فكرشها لي عريان..
براء :ومال ديك الكرش عريانة
تالاسين :(شافت فحوايجها) ماشي بزاف.. راه هزيت من طرف.. مهم زيد دابا بلا ما تزيد تعطل
براء :لا اترجعي واتبدلي ولا جلسي فحالك
تالاسين :ما بقيتيشي مزروب
براء :ماشي شغلك نتي.. (صونالو تيلي)
تالاسين :شفتي هااا لي قلتلك.. زيد فحالنا دابا
براء :(رجعها بنبرة قاصحة) بربي ما تمشيها واخة نعرف نجلس حداك.. اترجعي واتبدلي علبك هادشي ولبسي مقادة فحال لي مولفة تلبسي ولا جلسي هنا..
تالاسين :من نيتك!!!!
براء :(بجدية) اه من نيتي..(صونالو تيلي عاود)
تالاسين :يهديك الله وزيد.. شو راه كيعيطولك
براء :(جبد تيلي وقطع وهز راسو فيها معبس) ها هو هاد تيلي.. يله طلقي راسك
شافت فيه مطولا مطلعة حجبانها بتعجب.. وفلخر استسلمات ورجعات دخلات دغيا جبدات سوميج شيبية لبساتها دغيا وخرجات عندو.. شاف فيها مزياااااان وعاد فتح الباب ووقف عطاها تخرج ولحقها.. ركبو فالاوطو وديمارا وزاد حتا صونالو تيلي..
براء :اححم.. لا هانا جاي فالطريق.. غير سمحيلي راه غير مع سيركيلاسيون عااامرة وصافي.. انا واحد عشرة دقائق نكون عندك.. اوك اوك.. اوك شكرا.. الله يعاون
قطع ودار شاف فيها لقاها كتشوف فيه..
تالاسين :شعندك كتشوف فيا هايداك
براء :(قلب وجهو)
تالاسين :نتينا لي عطلتي راسك ماشي يانا هاء
ما جاوبهاش وكسيرا مزيان غادي بالزربة باش ما يزيدش يتعطل.. وهي ميقات فيه.. وجلسات ساقرة وكتشوف فالطريق قدامها..
وصلو لأحد المطاعم ونزل هو ونزلات هي وتمو داخلين بجنب بعضهم وهي ضاربالو غيرتحت لكتف.. غير دخلو وقف هو كيشوف بعينيه فارجاء المطعم.. حتا ترصات عينو على واحد الجيهة.. وحط يدو مور ظهرها زيدها قدامو شوية..
براء :را فين.. زيدي
تمشات بشوية عليها.. وما حدها كتقرب ما حدها كطلع حاجبها.. شافت فيه لقاتو رسم ابتسامة خفيفة على وجهو.. ورجعات ششافتو فين كيشوف.. كانت بنت تكون فاواخر العشرينات او فالثلاثينات.. ما كانتش زويييينة بزاف ولكن جذابة بلباسها وطريقة جلستها وشوفاتها.. ديال شي وحدة ثايقة فراسها..
تالاسين :(بصوت خافت) دابا هادي هي الخدمة
براء :كيفاش؟
تالاسين :(جمعات فمها) لا والو..
وقفو عليها وهي وقفات بضحكة عريضة استقبلاتهم ومدات يديها ليه..
شيماء :مرحبا
براء :(سلم عليها) الله يبارك فيك.. صافا
شيماء :صافا الحمد لله..
براء :سمحيلي تعطلت مي ماشي لخاطري
شيماء :لا والا عليك.. ماشي مشكيل
براء :هه اوك.. اححم.. نعرفك.. تالاسين.. مراتي.. تالاسين هادي مدام شيماء.. رئيسة تحرير مجلة الكترونية
شاف فيها لقاها كتشوف فيها وكطلع وتهبط غير سمعاتو قال مدام شيماء حسات براحة ما عرفاتش علاش..تبسماتلها ومداتلها يديها..
تالاسين :متشرفين
شيماء :الشرف ليا.. مرحبا جلسو
جرلها الكرسي جلسات حداه وجلس هو حداها.. هز يدو عيط للكارصون طلب ليهم ما يشربو.. ورجع تقابل معاها..
براء :نهضرو فالخدمة؟
شيماء :(كتشوف فتالا) قبل ما نهضرو على الخدمة.. مدام تالا انا شااايفاك وما عرفتش واش غير شبهتك ولا كيفاش
تالاسين :ههه ما عرفت..
شيماء :واش نتي يوتيبرز ؟
تالاسين :وييييييي
شيماء :اذا نتيييييي.. هههه متشرفة بيك امدام تالا... عرفتي شنو.. بنتي كتحماق عليك.. متبعاك على طول.. وحتا انا مرة مرة الصراحة كنشوف معاها بحكم خدمتي ما كنلقاش الوقت.. بلحق الصراحة تبارك الله عليك.. خاصة فالطبخ.. برافو عليك
تالاسين :(حمارت) ربي يخليك ههه.. ميغسييييي
شيماء :هههه هادي هي مراتك اسي براء ومخبيها علينا
براء :ما مخبي والو انا..
شيماء :هههه مهم احسن حاجة درتيها هي جبتيها معاك
براء :(شاف فتالا بطرف عين مع ابتسامة) ههه ضروري نجيبها.. ما تقدش تبقى فالدار بلا بيا هههه
تالاسين :(شافت فيه شوفة ناقصة)
شيماء :الله يخليكم لبعضكم
براء :اميييين.. مهم نهضرو علاش جينا
شيماء :اوك.. بسم الله.. مهم كما شرحتلك.. المجلة باغة منك شهراين كاملة دوزها فأي منطقة فالعالم لي انختاروها مع بعضنا او مناطق على حسب.. وفكل منطقة اتنزل فيها بغيناك تصورلنا شي ظواهر ناااادرة.. ورحلتك اتنشر فيديو فالمجلة وتصاورك حتا هما.. والمجلة لي اتكلف بكاع مصاريفك وتنقلاتك وغادي تأمنلك اي حاجة تحتاجها.. مهم حنا كنتسناو غير موافقتك.. وانا عارفة بلي هذا حلم حياتك من نهار بديتي فهاد دومين..
براء :امممممم مزيان.. شهراين؟؟بلحق راه عندي مسؤوليات ما نقدش نخليهم شهراين على قدهم
شيماء :شكون هاد المسؤوليات واش المدام؟؟
براء :(بلا ما يشوف فتالا) فحال هكاك.. مهم ما نقدش نغيب شهراين كلها عليها
شافت فيه تالا بنظرة شكر.. عجبها الحال حيث هازلها الهم وما باغيش يخليها بوحدها.. وزادت فرحات فاش عرفاتو كان حلم حياتو وها هو كيضحي بيه على قبلها..
تالاسين :الا كان غير عليا.. انا ما تهزليشي الدبيلة عادي.. قادة براسي
براء :(شاف فيها وما جوبهاش) مهم انا ما نمشي فين بلا بيها..
شيماء : طاحت فبالي فكرة
براء :امممم.. شنو هي ؟
شيماء :شنو فيها ادا مشات معاك ودوزات معاك هاد الرحلة
إرحموني الجزء 11
محتوى القصة
التنقل بين الأجزاء