إرحموني الجزء 12

شيماء :شنو فيها اذا مشات معاك ودوزات معاك هاد الرحلة.. هي ديجا يوتيبرز تبارك الله عليها.. ومعرووووفة.. الوغ غادي تكون مزيانة ليكم ولينا.. نتوما ما تفارقوش.. وحنا غادي نستافدو من خبرتك كمصور ومنها حتا هي.. (سكتات كتشوف فيهم) ايوا.. شنو بانلكم

شافت فيها وشاف فيها كيستوعبو.. هو جاتو عادية وبلعكس مخيرة ومضخمة كاااع.. ولكن هي تصدمات حيث جاتها على غفلة.. 

براء :ما عرفتش.. (شاف فتالا) شنو بانلك نتي

تالاسين :(كتشوف فيهم) ما عرفتشي الصراحة..

براء:(تنهد) فففف.. منقدش نديها معايا وما نقدش نمشي بلا بيها

شيماء :علاش ماتديهاش؟

براء :نتي عارفة هاد الرحلة ما اتكونش ساهلة..

تالاسين:الصمت

شيماء :الا بغيتو زيدو فكرو وجاوبوني.. بلحق الماكسيموم جوابكم غدا يكون عندي.. حيث ما عندناش الوقت.. هاد التجربة انا مأكدة ما اتندموش عليها.. بلعكس اتستمتعو فيها.. حسبوها نتوما فحال شهر العسل هههه.. 

شافو فبعضهم بالزربة ورجعو قلبو وجههم.. حمارت فبلاصتها وبقات غير كدور فعينيها.. وكتخمم.. شاف فيها هو بنص عين حاط يدو على ذقنو ومطلع حاجبو ورجع حط راسو بين يديه كيخمم.. وفلخر رجع هز عينيه فشيماء.. 

براء :خلي من بعد ونجاوبك

شيماء :اوك.. ماش.. 

تالاسين :(قاطعاتها) ما يحتاجشي.. انا موافقة

شافو فيها بزوج بيهم.. وهو متفاجئ من جوابها.. شاف فيها مطولا كيقرا عينيها وهي براسها ما عرفاش شنو لي خلاها توافق بهاد الزربة.. يمكن ما بغاتش تبقى بوحدها من موراه.. وما بفاتوش يضيع حلم حياتو.. تقابل معاها وقرب منها.. وبنبرة منخافضة نطق.. 

براء :مأكدة؟؟

تالاسين :(بتردد) اه.. مأكدة

براء :قاصحة عليك.. 

تالاسين :(تبسمات) عارفة ما اتوقعلي حتا حاجة وانا معاك

شاف فعينيها..صدماتو بهاد الهضرة وفنفس الوقت عجبو الحال حيث ثايقة فيه.. حركاتلو راسها باه تبسم وبعد عليها وشاف فشيماء.. 

براء :اذا تافقنا

شيماء :مرحبااااااا ههه.. مهم منين تافقنا انهضرو على التفاصيل.. حنا انتكلفو بكلشي ديالكم.. بالتنقل بكلشي.. ولكن نتوما اتكونو بوحدكم فهاد الرحلة.. مي اذا وقعات شي حاجة اتعلمونا وحنا انحضرو.. 

جلسو كيتافقو على التفاصيل.. هو كيدي ويجيب معاها فالهضرة وساعة ساعة يدور يشوف فتالا فحال الا كيتشاور معاها بعينيه.. وهي غير كتحرك فراسها..حتا سالاو وناضو سلمو عليها على أمل اللقاء قريبا.. ركبو راجعين فحالهم وهي مرة مرة تشوف فيه باااااين عليه الفرحة غير من عينيه والابتسامة لي ما فرقاتوش.. 

تالاسين :(بصوت هادئ) فرحان؟ 

براء :(دار شاف فيها مبسم) بزااااف.. رحلة عمري هادي.. تسنيتها شحاااال وكتابت تكون معاك ههه.. ما تخايليش فرحتي قداش.. متحمس هههه

تالاسين :(تبسمات) مزيان.. الله يخليك ديما فرحان

براء :(بعفوية) خليك ديما حدايا وانكون فرحان

فاجئها بجوابو على غفلة وسرطات ريقها بتوتر وقلبات وجهها كتشوف من السرجم وهزات شعرها من مور وذنيها.. وهو شاف فيها مطولا مبسم ودار شاف قدامو عاض على شفاهو السفلية.. وصبعانو كيطبل بيهم على الفولون.. والفرحة اتنقز من عينيه..

🎬 تسريع احداث:

من بعد ما بداو استعداداتهم.. كانت اخر خطوة يديروها هي انهم يودعو العائلة.. حيث الرحلة تقد تكون طوييييييلة ولابد ما يسلمو عليهم.. فاختارو انهم يديرولهم عزيمة جماااعية فالدار.. وفعلا تجمعو كاع العائلة باستثناء فراس.. لي رفض انه يجي.. وما بغاش يفرض قرارو عليهم حتا هما.. 

دازت لعراضة فجو لابأس بيه.. شي متوتر شي فرحان.. شي ضارب الدنيا وما مسوق لحد.. حسن وهنية حتا هما رضاو بلي كتاب.. واخة مزال حتا ما فهموش.. ورؤيا وزينب وبيسان لي عارفين لبلان غير كيدورو فعينيهم.. اما جهاد وجواد ورقية هادوك حالة خاصة.. خالقين مهرجان غير بيناتهم.. ما كاين غير قولها وضحك عليها ولي بغا يهز الهم شغلو هداك.. 

فصباح الغذ ليه.. ركب هي وياها.. بزوجهم غاديين على اعصابهم.. ساكتين ما كيهضروووش.. وصلو لباب الشركة ونزلو.. خداو نفس طويل.. شاف فيها تبسملها باش ترتاح ومدلها يدو.. 

شافت فيه ورجعات شافت فيدو.. بقات واقفة وعينيها فعينيه.. ما بقاتش كتعرف مالها.. غير كتشوف فيه كتسهاااا.. سرطات ريقها وحطات يديها فيديه وهو زير عليها مزيان ودخلو.. 

وقفو عند بابو..ومن بعد ما دقو دخل جارها موراه وهو هاز مناخرو للسماء.. كان باغي يودعو حتا هو.. الدنيا والزمان هذا.. ما يعرفو شنو يوقع.. ما باغيش يندم ويمشي ويخلي موراه شي حد غضبان عليه.. خاصة واليديه.. وهداك كما كان كيبقى باه.. وقف قبالتو وهي مخشية موراه حشمانة.. غير شافهم وهو يعقدهم وبقى جالس فبلاصتو كيطلع فيهم ويهبط.. 

براء :(بنفخة) السلام عليكم

فراس:(طلع حاجبو وكارز على فكو) وعليكم السلام.. (رجع حنا راسو) سدو الباب ونتوما خارجين

براء :(لعب بفكو وضحك بالفقصة ورجع هز راسو فباه) مهم.. اندخل فالموضوع ديريكت.. حنا جينا غير باش نسلمو عليك قبل ما نسافرو.. عارفك هاز فقلبك علينا.. ولكن كما قلتلك قبل وانرجع نعاودها.. حنا فهادشي كااااامل لي وقع.. ما عندنا حتا يد.. فحالنا فحالكم.. نتا ربيتيني.. وعلمتيني ما نكذبش وما نقبلش لكذوب.. وحتا دابا ما كنكذبش وما عندي علاش نكر.. كون درتها انجيك فاص ونقولهالك.. ولكن نتا ما بغيتيش ثيق ودابا هادشي كيبقى راجع ليك.. نتا تعرف الواليد.. انا لي عليا انقولك نتا اذا بغيتي تعرفنا واش كذبنا ولا لا راك اتعرف.. ولا بغيتي تعرف شكون دارها اتعرفو.. ولكن نتا ما باغيش حتا تحاول ثيقنا..

فراس :(ما هزش راسو عاقد حجبانو وساكت) 

براء :مهم من هادشي كامل انا باغي غير نقولك الله يهنيك.. انا مسافر ونقدر نطول.. نبغيك تهلا فراسك.. وترد البال لصحتك.. (دار عند تالا) مشينا؟ ؟

تالاسين :(هزات راسها دموعها مغرغرين عينيها) عمي.. تهلا فراسك.. وكنتمنى تسمحلنا.. حنا ما عملنا والو اعمي.. (شهقات وزير على يديها).. مهم بسلامة اعمي ورد بالك على راسك

شافو فيه اخر مرة. كيتسناوه يشوف فيهم.. ما هزش راسو.. براء تنهد وزير على يديها وجرها وخرج وهي دموعها سايلين معاها... 

🎗️🎗️🎗️🎗️

فوق القطب الشمالي.. وبالضبط فشرق كندا..كانو كيحوومو فالسماء وسط الجو البااااااارد والصقيع.. ومن وسط الهيليكوبتر.. كانت بين احضانو مشدودة معاه بباراشوت وهي قدامو.. بزوجهم لابسين ملابس سخووووونة وحاطين دي كاصك فوق راسهم ونظارات على عينيهم.. ومكبطين مزيان.. كان جالس وهي قدامو ومعاهم الطاقم ديال الطائرة والصوت ديال هيليكوبتر مجهد..والباب بجنبهم مفتوحة حيث كيستعدو للهبوط.. حس بيها خيفااانة وكترجف بين يديه.. خشا راسو وسط عنقها قريب لوذنيها وشدلها فيديها.. وهضر بصوت مرتفع شوية باش تقد تسمعو..

براء :(زير على يديها) ما تخافيش.. انا معاك

تالاسين :شاداني الخلعة.. قلبي ايخرج

براء :ما تخافيش.. ما ايوقع والو.. 

حركات راسها وهي كتسرط فريقها.. والخلعة باينة من عينيها لي كيدورو.. حتا هضر واحد من الطاقم بالانجليزية.. 

الراجل:ready ؟؟؟(مستعدين) 

براء :(هز اصبع الابهام كدليل انه مستعد) 

عطاه الراجل اشارة بصباعو.. كيحسب واحد زوج ثلاثة.. زيرات هي على سماطي الباراشوت لي شادين جنابها ولضقات مع ظهرو كثر وزيرات على عينيها مغمضاهم.. حسات بالهواء كيضربها كثر فوجهها وعرفاتو قرب حدا الباب.. تنفسات بعمق وهو شد يديها زير عليها.. وواحد زوج ثلاثة هوووووووب.. غوتات بقوة وحسات براسها طاااايرة فلهواء والصقيع كيضربها لوجهها.. حلات نص عينيها وما كيبانلها غير البياض في البياض.. والبرد وهي كتحس بيه مدفي ظهرها..

حطو رجليهم فالأرض.. وحنات هي على ركابيها كتنهج.. زرب هو فك لحزام وهو كيضحك..وجلس قبالتها كيشوف فوجهها لي صفار بالخلعة ونيفها حممممر بالبرد.. 

براء :ههه خفتي

تالاسين :(الصمت كتنهج)

براء :هههه فكي عليك هادشي

جرلها لحزومة من رجليها ويديها ونظاظر والكاصك وهي غير كتشوف بعينيها.. شافت فجنابها.. غير لخلا والقيفار.. صحراااء ثلجية.. هو وياها وحداهم زوج صيكان هبطو معاهم بالباراشوت وطاحو بعاد عليهم شوية.. هزات راسها فيه وهو كيطوي فلباراشوت وبجمعها.. 

تالاسين :ما كاين حد؟؟؟

براء :(حاني راسو بجدية) لا غير انا وياك فهاد لخلا.. (هز راسو فيها بنبرة قاصحة) هنا انحدهم ليك وانتصافاو انا وياك.. وكاااع داكشي لي درتيه اتخلصيه.. وبالضووووبل

تالاسين :الصمت

براء :تيقتي بلي كاينة رحلة.. من نيتك.. ههه انا جبتك هنا غير باش نهرسلك داك الراس.. 

تالاسين :من نيتك؟ 

براء :شوفي فيا.. بنتلك كنضحك

تالاسين :(ناضت واقفة كتنفض حوايجها من ثلج) بركة من لملاغة الباسلة

شاف فيها كيطلع ويهبط.. وبدا كيقرب منها بنظرة قاااصحة.. هزات راسها فيه شافت فيه خلعها.. وبدات راجعة لور بشوية.. 

تالاسين :شعندك؟

براء :(حمر فيها بنظرة قاصحة ونبرة قوية) انا باسل؟ 

تالاسين :(تخلعات) شني؟؟ شكون قالها؟

براء:نتي؟

تالاسين :فوقاش؟.. ااا.. شعندك كتشوف فيا هايداك.. شني اتعمل.. واش من نيتك.. 

براء :نتي لي قلبتي عليا

تالاسين :(بخوف) بببب.. براء.. واش من نيتك.. راه ما قصدتشي.. غير ضحكت معاك..واش بصح ما كايناشي الرحلة؟؟ 

شاف فيها مطولا بحدة.. هو كيزيد لقدام وهي كترجع لور وتدور فعينيها.. حتا حسات براسها تعكلات فخيوط لبراشوت وكانت اطيح ولحق شدها من يديها وجرها عندو دغيا مزيرها لصدرو.. وتفركع بالضحك فوجهها.. بقا كيضحك حتا دمعو عينيه وهو كيشوف فيها حالة فمها فيه.. وهز يدو وشد نيفها بين صباعو وجرو.. 

براء :هبيلة هههههه 

تالاسين :كنتي كضحك؟ 

رخا منها وعطاها بالظهر كيجمع لي بقى وكيضحك وهي تنزل عليه بضربة للكتف واخة ما وصلاتش اصلا ليه حيث مبطن بلحوايج.. 

تالاسين :باسل.. سحابني بصح.. 

براء :نتي راك واااحد لغشيمة رقم واحد.. لي جا يضحك عليك ههههه

تالاسين :(عوجات فمها وهي واقفة عند راسو) امممم.. خليك غير نتينا لي كتفهما طايرة

ضحك وما جاوبهاش.. حتا سالا وهز صاكادو ديال لباراشوت.. وتم غادي جيهة لي صاكادو لوخرين.. 

تالاسين :فاين انمشيو دابا

براء :انهزو لي صاكادو ديالنا

تالاسين :شو على طنَّاز.. 

براء :ههه غير زيدي وسكتي.. ما تخافيش

تالاسين :ما خيفاشي غير خاصني نعرف

براء :اوك الالة.. دابا حنا فمنطقة كتسما نونيفيك وطبعا عرفتي راك فكندا ياك هههه

تالاسين :وراه عرفتها هاء.. ماشي راني مكلخة.. 

براء :ايوا ما عرفت ههه.. 

وصل حدا لي صاكادو وبدا كيقادهم ويزول الباراشوت منهم.. 

براء :مهم.. وانا وياك انمشيو لجيهة الغرب.. تما انجبرو شعب الإينويت.. 

تالاسين :كيفاش؟

براء :ناس مستقرين فهاد المنطقة من زماااان.. هادي قرون..عايشين غير بالصيد.. وحنا انمشيو لتما.. ديجا عارفين بلي انجيو.. وكاين تما لي ايورينا وايمشي معانا فين ما بغينا نمشيو.. فحال لگيد ديالنا.. 

تالاسين :اهاه.. مزيان.. نتينا تعرف

حط صاكادو على كتف وصاكادو على كتف لاخور وهز واحد فيديه ودار تقابل معاه.. 

براء :نتي غير بقاي حدايا وما ايوقعلك والو.. خلي كلشي عليا.. وان شاء الله ايعجبك الحال.. (تبسملها) اوك؟

تالاسين :(حركات راسها بالإيجاب) ارا نهز معاك

براء :بلاش.. هانا هازهم

تالاسين :ارا غير واحد

براء :(زاد قدامها) بلاش.. هضرت

تالاسين :(خطفاتلو واحد من فوق كتافو وحطاتو على ظهرها) 

براء :اريه لهنا.. ثقيل عليك

تالاسين :لا غير خليه.. خفيف

بدات الرحلة ديالهم... وسط الثلج.. فين ما دارو ما كيشوفو حد.. وهو شاد البوصلة فيدو مگيد بيها..وهي موراه متبعاه بعينيها.. لابس ومكبط وفوق راسو طاگية سخوووونة والقفازات فيديه وبوط فوق الكعب.. وبقوة لبرودة الطبقة الفوقانية دالثلج قاصحة.. دار شاف فيها واش باقة موراه وتبسملها.. مشات عينيها للحيتو الزوينة لي مغطية ذقنو وبقاو شفايفو حومر كيبانو وسط منها.. قلب هو وجهو وكملات هي الشوفة فيه.. 

تالاسين :ما جبرو فاين يصردونا.. غير نهاد لخلا

براء :(وهو عينو على البوصلة) انا لي اختاريت هاد لبلاصة.. 

تالاسين :وعلاش؟

براء :حيث قليل لي جا ليها.. وفيها بزاااف ما تشوف.. وبزاف دالحاجات الجداد لي اتجرب

تالاسين :انا ما بانلي والو من غير الثلج

براء :دابا تشوفي.. ها حنا وصلنا

شافت قدامها ا.. وهما يبانولها مجموعة من الكرات الثلجية المقوصة فحال شكل قبة.. باحجام مختالفة ولكن شكل موحد.. سبقلها شايفاهم فالانترنيت ولكن عمرها شافتهم فاص.. هما كيقربو وشخص اخر كيقرب عندهم.. لابس ملابس اغلبها بني.. حيث اغلبها من جلود الحيوانات.. ملامحو كتوحي بأنه من اصول الهنود الحمر.. مغطي ذاتو كاااااملة وغير وجهو لي كيبان.. قربو منو حتا هما لقاواه واقف كيتسناهم مبسم فوجههم.. وغير وقفو حداه نطق هو بالانجليزية :مرحبااا.. كيف الحال.. انا تيكا.. ونتوما اكيد المصورين ياكو؟

براء :(مدلو يدو) اهلا.. متشرفين.. انا براء وهادي مراتي.. تالاسين

تيكا:مرحبا بيكم بزوج..شرفتونا.. شعبنا ايفرح بيكم بزاف.. هذا شرف انكم تزورو منطقتنا

براء :الشرف لينا.. شكرا

تيكا :اذا دابا نمشيو.. القبيلة كتسناكم.. وحتا نتوما اتكونو عييتو

براء :اوك.. شكرا 

تيكا :ارا نهز معاك

براء :نو.. بلاش

تيكا :عيب يطلب منك شي واحد من شعبنا شي طلب وترفضو

براء :هااا.. اوك.. ننا تعرف.. هاك خود

مدلو صاك من عندو وعطاهم تيكا بالظهر غادي وهما موراه يله بغات تزيد وهو يشدها من يديها وزير.. 

تالاسين :مالك

براء :يدي ما حدنا هنا ما طلقيهاش.. خليك ديما حدايا واخة 

تالاسين :على اساس عندي فين نمشي 

براء :مهم يدي ما تفارقش يدك.. هنا ناس ما كنعرفوهومش.. واخة

تالاسين :(حركاتلو راسها)

تبسم وزير على يدها وجرها موراه.. وتيكا كيهضر قدامهم.. 

تيكا :خاصنا نلحقو نبنيو ليكم بيت قبل لا الظلام يطيح

تالاسين :واش بيت فحال هادوك..

تيكا :وي.. بيوت الاسكيمو.. واخة كيبان صغير ولكن ايهزكم بزوج 

تالاسين :حنا بزوج!!! علاش اتبنيو بيت واحد

تيكا :اه.. علاش.. ياك نتوما مزوجين

تالاسين :اه ولكن.. 

براء :(قاطعها) اه مزوجين.. ماشي مشكيل يكون صغير مهم يكفينا

شافت فيه محمرة وهو شاف فيها بمعنى مالكي.. 

تالاسين :من نيتك!!

براء :نتي لي واش من نيتك.. تنعسي بوحدك فشي بيت انا عرفت شنو يوقعلك..بغيتيهم يطمعو فيك ؟؟؟

يله بغات تزيد تجاوبو وهي تلقى ناس لقبيلة واقفين قبالتهم ولولاد الصغار جايين كيجريو جيهتهم.. تنترات من يدو وشافت فيه بنص عين مخنزرة.. شاف فيها مطولا وخنزر فيها ما عجبوش الحال..وتقدم كيسلم على اهل القبيلة والدراري كيلعبو وينقزو ويدورو بيهم.. زادت حتا هي موراه كتبسم لدراري الصغار وما فاهمة منهم حتا حرف.. وغير تيكا لي كيترجملهم شنو كيقولولهم.. وهما كيرحبو بيهم.. وكلهم لابسين ملابس مصنوعة من جلد الحيوانات وريشها.. وقفو قدام راجل كبيييير واقف حاط يديه مور ظهرو وهاز راسو بنظرة جادة.. وفنفس الوقت مبسم..حنا راسو ليهم بمعنى انه كيرحب بيهم وحتا هما هبطو راسهم ردو التحية.. عرفهم تيكا عليه.. كان كالأب الاكبر ديالهم.. تقدمات امرأة مسنة من موراه بابتسامة على وجهها.. ومداتلهم معطفين من الجلد.. شدوهوم منها وشكروها.. عطاوهم الطريق يدوزو حيث مزال خاصهم يبنيو بيتهم قبل ما يطيح الظلام.. 

شافت فيه زايد قدامها وما رجعش شاف جيهتها.. عرفاتو تقلق وهزات كتافها زعما ما مسوقاش..حتا وقفهم تيكا قدام مكان خاوي قريب لباقي المنازل.. 

تيكا:(بالانجليزية) حطو لي صاكادو ديالكم باش نبداو 

تالاسين :(شافت فبراء) شنو انبداو؟

براء :(حط لي صاكادو من من بعد ما كانت جالسة حاطة راسها من جاوبهاش) 

خنزرات فيه هي وزفرات بقوة من مناخرها ونترات الصاكادو ورماتو فالارض ووقفات مربعة يديها كتشوف فيهم.. 

جبد هو الكاميرا بحدايد طوال كيخليوها تبقى واقفة.. ثبتها فبلاصة مزيانة وخلاها خدامة وبدا هو وتيكا الخدمة هو كيوريه وهو متبعو.. كان عندهم مجموعة ديال لحديدات حادة فحال لماس كيقطعو بيها مورصويات دثلج كباااار فحال الطوبيات حيث اصلا الثلج قاااصح.. وهي واقفة كتشوف فيهم شكيديرو..

تالاسين :عطيوني نعاونكم؟

براء :الصمت

تيكا:اوك.. هاكي قطعي بهذا وعنداك يديك

حناا حتا هي كتعاونهم وعاجبها الحال.. وهو حاضيها بنص عين وعاقد حجبانو.. قطعات مورصو معاوط وعجبها الحال وهزات راسها شافت فيه كضحك وهو يقلب وجهو معبس.. شافتو مزال مقلق وصغرات فيه عينيها وهي مقردة فالارض.. بقات كتشووووف فيه بنفس النظرة حتا هز عينو فيها لقاها كتحنزز فيه.. شاف فيها مطولا ورجع حنا راسو ورجع هزو لقاها مزالة على نفس الوضع.. عقد حجبانو فيها وحرك راسو بمعنى شنو.. حتا شافها بدات كتبسم وما حاسش فوقاش حتا جاتو كومة دثلج لوجه على غفلة وناضت واقفة كضحك وتيكا شاف فيهم وضحك حتا هو.. مسح وجهو وهو مزال حاني وجهو وهز راسو فيه محمر عينيه.. وهو واقفة كتموت بالضحك عليه.. بدات كتنقص من الضحك شوية بشوية فاش شافتو كيشوف فيها محمر.. وحتا تيكا بقى غير كيرمش.. جمعات الضحكة وهي كتشوف فيه..

تالاسين :راه غير ضحكت معاك.. بلا ما تقلق

سرطات ريقها وما رضاتش يشوف فيها هكاك قدام البراني.. وتزيرات حتا بغات تبكي وهو ينزل حنا وهز كومة دالثلج وعطاها لوجه كيضحك.. قلباتها حتا هي ضحك وقلبوها مضاربة.. ضربني نضربك والضحك بيناتهم.. وتيكا مكمل لخدمة وكيشوف فيهم ويضحك.. شافوهوم لبراهش الصغار وتجمعو عليهم حتا هما كيلعبو بالثلج معاهم.. هز كومة دالثلج وخشاهالها فوجهها وكيمسحو على وجهها وهي كتضربو لصدرو وتهرب وجهها.. عطاتو بالظهر مخبية وجهها ودور يدو علبها كيتماطا لوجهها وهي كتزافط معاه والدراري موراهم حتا هما كيلعبو.. حتا طاحت وطاح فوق منها شاد بيديه.. وهي تحت منو فاشلة بالضحك.. شاف فيها حتا هو كيضحك.. وبشوية بشوية بداو كيجمعو الضحكة وهما كيشوفو فبعضهم.. حسات براسها فين هي.. وشمن موقف طاحت فيه..حسات بقلبها بدا كيضرب وكيزدح وسط صدرها بالجهد.. الرجفة شداتها من صبعها الصغير.. واش لبرودة دالثلج هادي؟؟؟.. ما عرفاتش مالها.. حاسة براسها اطرطق بالصهد وفنفس الوقت الرجفة شاداها فحال الا فيها البرد.. وهو فوق منها مبسم ابتسامة خفيفة وعينيه فعينيها.. كتسارا على وجهها.. كان شكلو زوييين.. خاصة بالبرد لي خلا وجهو يحمار.. شاف فيها حتا شبع وحنا عندها كيقرب بشوية وهي غمضات عينيها مزيرة عليهم حتا وصل حدا وذنيها ونطق.. 

براء :(بهمس) كتجي زويييينة فاش كضحكي

سرطات ريقها وهي مزالة مغمضة عينيها وبعدات وذنيها عليه بشوية.. هز راسو هو ببطء شافها مزيرة على عينيها وضحك بشوية.. فهاد اللحظةما كرهش كون يهبط يبوسها ففمها الصغير لحميمر.. يبوسها فحنكها البردان.. فعينيها لي مسدودين.. فنيفها لي حمر بالبرد..باغي يعنقها وباغي يشبع منها.. ساعة حتا وحدة فيهم ما قادر عليها.. تبسم وناض جمع الوقفة.. وبقى واقف عند راسها كيشوف فيها والضحة شاداه على المنظر ديالها.. هي غير حسات بيه وقف ناضت جمعات الوقفة حتا هي وشافت فجنابها.. 

تالاسين :ااا.. مشا الحال.. الدار.. خاصنا نبنيوها.. بدا يطيح.. زعما الظلام.. ياك.. ااا..خلينا تيكا بوحدو.. 

هي كتهضر بوحدها وهو كيشوف فيها بلا ما يهضر.. صغر فيها عينيه وقال بابتسامة.. 

براء :وي خاصنا نطلقو راسنا.. باش نبنيو عش الزوجية 

غمزها وضحك وعطاها بالظهر خلاها كتدور فعينيها بتوتر.. والخلعة شاداها ما عرفاش علاش.. والحشمة بغات طرطق.. وهو مشا يكمل شغالو وخلاها هي ما عارفة توقف ولا تجلي.. تلفها وفافاهاَ..

بناو البيت ديال الثلج.. بحجم معقول كافيهم بزوج.. كان تصميم البيت كباقي بيوت الاسكيمو على شكل نصف كرة مع باب غارقة فالارض.. البيت كتحفرلو حفرة فالثلج وعاد كيطلعوه.. وتصميمو صعيب ماشي ساهل.. خاص كل طوبية تحط فبلاصتها.. والفراغات لي كتبقى كيكبو فيهم الماء لي فلبلاصة كيجمد.. وتصميمو كيخلي الحرارة داخل البيت تكون مرتافعة حتا لاربعين درجة مقارنة بالبرودة برا.. سالاواه وفرشولهوم فيه جلود فالارض باش يدفاو بيها.. وحط فيه براء لي صاكدو ديالهم مع زوج فراشات كيتفتحو ويتسدو بالسنسلة سخان ورجع خرج.. كان قرب الظلام يطيح.. ولعشية وصلات..

تالاسين :هههه جا واعر

براء :(شاف فتيكا) نقدر ناخذ صور لناس لي هنا؟

تيكا:اكيد.. اجي معايا

براء :اوك.. (قرب عند تالا) هانتي.. دخلي لداخل وجلسي واخة.. هانا دابا وانا جيت

تالاسين :واخة.. (وقفاتو قبل ما يدور) وما تعطلشي.. 

براء :(تبسم وقرب عندها عاض على شفاهو) ياك ما بديتي طيحي فيا هممم؟؟ (غمزها) 

تالاسين :(توترات من شوفتو) نعااااام.. ههه من نيتك.. مشي باينا بديتي كدوخ.. شعندك حفرة نطيح فيك.. ولااااااااهيلا.. مشي مشي

براء :(زاد قرب كثر كيشوف فعينيها ) شوفي وكان؟؟ 

تالاسين :(سرطات ريقها) شني انشوف؟

براء :(زاد قرب حتا ما بقى بيناتهم غير القليل) طحتي فيا؟ 

تالاسين :(سهات) فين طحت؟ 

براء :(حبس الضحكة) فيا؟

تالاسين :(كترمش حالة فمها) شكون نتينا؟

براء :(بهمس) ما عرفتيش شكون انا؟ 

تالاسين :(بصوت خافت) شكون نتينا؟ 

براء :بهمس) شكون انا! 

تالاسين :(بصوت خافت) شكون نتينا! 

براء :(حدا وذنيها) انا.. راجلك احبيبة ههههه 

طلق ضحكة فيقاتها من القلبة وبعد عليها خلاها هي غير كترمش.. غمزها ومشا كيضحك وخلاها واقفة فبلاصتها كتستوعب شنو وقع.. وما عرفاتش شنو طرالها.. بقات غير كتشوف.. حاسة بالنفس تقطعات فيها..وبرجليها خواو بيها.. تنفساااات بعمق ونفضات راسها.. 

تالاسين :اعوذ بالله.. اعوذ بالله.. ياااا ربي.. شعندي انا

حكات جبهتها لقاتها باردة عكس الشخانة لي حاسة بها.. 

تالاسين :بفففف.. انا باينة جاني نعاس

دخلات هي للبيت كتشوفو من لداخل.. لقاتو سخون.. عجبها المنظر من للداخل.. واخة صغير ومجموع ولكن حلو.. تخشات فلفراش لي تما وتكمطات فيه على جنبها ويديها تحت راسها.. تنهدات وبدات تخمم فراسها وفيه وفلي فات وفلي جاي.. حاسة بشي حاجة تبدلات فيها.. زولات القفازات من يديها وحطاتهم حداها وشافت الخاتم فيديها.. سهات فيه وفنهار لي ركبولها فيه.. وبانت على وجهها ابتسامة خفيفة دغيا مسحاتها وتقلبات على جنبها وغمضات عينيها ما باغاش تزيد تفكر حيث اصلا عيات بالطريق..

دخل هو.. كان طاح الليل واغلب ناس لقبيلة دخلو للبيوت..كان هاز فيدو صحن فيه الماكلة لي أغلبها حوت لي كيصطادوه بصعوووبة.. مع دخلة كتبانلو مكمشة وغير وجهها لي كيبان وسط ديك الكومة لي مخشية فيها.. تبسم وهو كيتفكر منظرها قبايلة.. جلس قدامها فالارض وحط طبسيل على جنبو.. وجر كاميرتو لي فعنقو هزها مدور العدسة جيهتهم فحال الا ايصور سيلفي بيد وحدة.. وقرب حدا راسها موكي على المرفق ديالو.. وخذا ليعم صورة وهي ناعسة.. باغي يخلي هاد الرحلة فالتاريخ.. وباغي يستغل كل دقيقة فيها.. رجع شاف فيها وتبسم.. وهبط حتا قرب وحط شفايفو على خدها بلا ما يبوسها.. مررهم ببطء عليه كيتحسس رطوبتو.. عجبو الحال وستاحلاها حتا هزات يديها كتحك حنكها حيث هرها وهو يبعد كيشوف فيها ويضحك.. كالعادة كتسحرو فكل حالاتها.. ولكن فاش كتكون ناعسة كبكون ليها عليه سحر خاص.. تنهد وقرب عندها كيهمس ببطء 

براء :(حدا وذنيها) ابتسامتك نداء من الجنة.. شعرك طريق أردت سُلُوكه مدى الدهر.. عينيك مسروقة من إحدى الحور العين.. ملمس خدك قصة لم تروى من قبل.. وشفتيك.. (سكت شوية) وشفتيك كالفردوس الأعلى.. أرغب في تقبيلك بشدة.. أرغب في ضمك بقوة.. أرغب في الغرق فيكِ بدون قارب نجاة.. 

تبسم ابتسامة أعرض منها ما كاين وهز راسو بعد عليها شوية ..

براء :تالا.. تالاسين نوضي

تالاسين :امممم.. 

حركات راسها كتحك عينيها وشافت فيه بين رموشها.. 

براء :نوضي تاكلي وتصلي ورجعي تنعسي

تالاسين :حركات راسها بالايجاب

فتحلها هو السنسلة وناضت هي كتحك فعينيها وتشوف فجنابها.. 

تالاسين :انتوضى ونصلي هو لول

براء :غير تيممي.. ما اتقديش على لوضوء فهاد الجو

تالاسين :لا غير خليني

براء :كوني تسمعي.. وعاد دابا الليل الجو برد كثر.. راه تيممة جبتها فالصاك جبديها وتيممي وصلي هنا

تالاسين :(استسلمات) واخة.. نتينا صليتي

براء :صليت باقالي غير لعشاء

تالاسين :وذنات

براء :وي.. محقق تيلي باش يعلمني

تالاسين:امممم.. مزيان

براء :نوضي تيممي وصلي لي فاتك واجي نصليو لعشاء بزوج.. شنو بانلك

تالاسين :هاااا.. ااا.. ما عرفتشي.. لي بغيتي

براء :يله نوضي

تالاسين :واخة

ناضت من بلاصتها وهي حاسة بيه متبعها بعينيه.. مدات يديها للصاكادو جبدات التيممة وقملات حوايجها وبدات بالتيمم.. سالات ناضت جبدات حوايج الصلاة لبساتهم ووقفات شادة الصلاية فيديها...

تالاسين :فاين جات القبلة

نعتلها بيدو وهو مبسم وموكي على الحيط هاز ركبة ومسرح وحدة ومصغر عينيه فيها.. عرفها كتهرب من عينيه.. ولكن ما عندها فين فبيت بعرض اربعة متر.. توجهات للقبلة تصلي وهو فهاد الأثناء تنهد ومد يدو لتيممة يتيمم عاود.. سالات ودارت كتشوف فيه وجا هو قبالتها وقام الصلاة وهي موراه وتخشعات مع صوتو.. بقات كتخمم فحالتهم.. كل مرة كتلقى راسها منغااامسة فهاد زواج كثر وكثر.. تزوجات بلا ما تعرف.. ركبلها الخاتم فلحظة لي ما كانت لا على البال لا على الخاطر.. جاهم شهر عسل من حيث لا يدرون..واليوم ها هي دي موراه واقفة وهو كيصلي بيها.. نعلات شيطان وحاولات تصفي بالها وتركز فصلاتها ورجعات متبعة معاه.. 

سالا الصلاة وجمعو صلايتهم وتجمعو على داك لعشا كياكلو ..

تالاسين :خديتي تصاور لي بغيتي

براء :اه.. بلحق مزال شحاااال من حاجة خاصها تصور.. عاد بدينا

تالاسين :(تبسماتلو) مزيان

براء :ياك مرتاحة بعدا

تالاسين :ما تشغلشي راسك بيا يانا مزيانة.. وبلعكس تجربة زوينة هادي ههه

براء :زعما ما قلتيش هذا فين جايبني لهاد لخلا وجلا

تالاسين :هههه وا هي الصااااااارحة.. راه خلا وجلا هههه وقووولتها.. ولكن واخة هكاك هاد التسافيرة اتبقى فالتاريخ عمرها تنسالي.. عمري كنت كنقول شي نهار نجي لهنا وما كانتشي كطيحلي حتا على البال

براء :ايوا هاني جبتك انا

تالاسين :هههه

كملو الهضرة عادي وهو مضويين بلبيل حتا سالاو وناضو جمعو داكشي وتخشات هي فبلاصتها وهو شد الكاميرا ورصاها باش يصور وجلس قدامها.. 

تالاسين :شني اتعمل

براء :خاصني نصور تقرير على هاد النهار ونسيفطولهوم.. باش اينزلوه على شكل حلقات فالانترنيت.. 

تالاسين :اااه مزيان.. 

كمل هو شغلو وتقابل مع كاميرتو لي كتصور بالاضاءة الليلية وهي متكية ومتبعاه بعينيها وكتشوووف فيه وتصنتلو.. كيفاش كيهضر وكيفاش كيعبر ويضحك.. والفرحة باينة فعينيه.. يستاهل يكون فرحان.. هادشي ما طاح فبالها.. انسان بطيبتو وحنيتو ونيتو الصافية يستاهل كل خير.. تبسمات فاش شافتو سد الكاميرا وشاف فيها.. 

براء :سالينا.. ودابا انعسو.. حيث راني انموووت بالنعاس

هي غير قالها انعسو وعااااد تفكرات بلي اتنعس حداه.. وبقات غير كترمش فبلاصتها.. شداتها الرعادة وكون لقات تنوض تخرج وطج فهاد لخلا.. شافتو كيقاد بلاصتو حداها ما بيناتهم والو غير مسافة صغيرة ما فايتاش بعض سنتيميترات.. سرطات ريقها وقلبات وجهها لجيهة لوخرا عاطياه بالظهر وخلاتو هو كيشوف فيها بنص عين ويتبسم بسخرية..

تجبد حداها فالأرض ساكت وحط يدو فوق جبهتو.. بقى ساكت شحااال كيتششاور مع النعاس.. شاف جيهتها هي لي عاطياه بالظهر.. 

براء :نعستي؟

ما جاوباتوش.. عرفها نعسات.. تقلب على جنبو ومد يدو لشعرها لي مليوح بيناتهم.. شد اطرافو بين يديه كيلعب بيهم وساهي حتا داه النعاس.. 

🎑🎑🎑🎑

صباح الصباح.. وكانو واقفين بثلاثة.. تالا وبراء وتيكا.. وقدامهم زوج عربات ثلجية مع مجمووعة دلكلاب القطبية مربوطين ببعضهم وكلهم كينبحو وينقزو فبلايصهم شكلهم ششبيه للذئاب.. كان هو كيركب لا كام فالمقدمة ديال العربة باش تصور كلشي وهي واقفة حداه كتقاد فالطربوش على راسها وتشوف فلكلاب خيفانة..

تالاسين :فاين يبان امينو مسكين وسط هاد المصاعير؟؟ 

براء :ههه كون جبتي مينوشة كون كلاوهالك

تالاسين :هيييييه برا والباس عليها...(تنهدات)اوووف توحشتها.. تكون مزيانة زعما؟؟ عنداك يكون امينو عاود شدها فشي قنت 

هز راسو فيها كيضحك.. وهي كتهضر وتغبن وتقوص حجبانها.. ونطق فنفسو:(نتي لي كون لقيت نشدك فشي قنت ناااكلك) 

براء :هههه ما تخافيش.. دوك زوج حلاقم ايكونو قايمين بالواجب.. ما ايطرالها والو

تالاسين :ايوا على الله.. واخة دوك زوج هما وخاص لي يحضيهم..

تبسملها وهز راسو شاف فتيكا لي كان كيتسناه يسالي باش يعطيه التعليمات.. 

تيكا:دابا اول حاجة خاصك تسرج لكلاب باش يولفو عليك.. خاصهم يعرفو شكون لي ايقود بيهم..

تالاسين :ياك مربوطين

تيكا:لا.. الرباط مربوط غير على ظهرهم.. خاصو يربطو على عنقهم ورجليهم باش يحكمهم مزياااان

براء :(حك يديه) اوك.. نبداو اذا

تيكا:وخاصك تعرف أربعة دلكلمات أساسية.. أَوْ يعني سطوب.. وَا يعني زيد.. مارا يعني اليمين.. و أوكْ يعني شمال.. هادو هما لي اتمشي بيهم لكلاب.. اوك

براء :امممم.. اوك مزيان

تيكا:واهم حاجة خاصك تعرفها بلي ما خاصكش تفلت من العربة وما تفلتش اللجام من يديك.. حيث اذا فلتيه وطحتي لكلاب ما ايوقفوش وايسمحو فيك.. واذا كنتي فشي منطقة لي بعيدة تما اتوقع المشكيلة حيث صعيب ترجع على رجليك ويقدر يطيح عليك ظلام ونتا بعيد وتما يقدرو يخرجولك الذئاب ولا الدببة.. هادشي الا ما جاتش شي عاصفة ثلجية لي قاصحة..

تالاسين :هادشي كيخلع.. بلحق واخة هايداك كيحمس 

براء :نتي اتبقاي هنا معاهم فلقبيلة حتا نرجعو

تالاسين :شنييي.. وعلاش

براء :حيث بغيتَ

براء :(تنهد) ما فهمتكش انا.. مالك معكسة

تالاسين :ايوا منين انبقى غير جالسة علاش جايبني معاك.. 

براء :فين اتمشي.. واش ما سمعتيش.. تمشي توقع شي حاجة فين انوصلو ديك الساعة

تالاسين :ما ايوقع والو..

براء :سمعيني اتالا.. انا اول مرة انجرب هادشي كون غير كنت عارف راسي متمكن انديك.. ولكن دابا لا..(جرلها طربوش على وذنيها وتبسملها) وا كوني تسمعي

تالاسين :(بترجي) عافاك ديني معاك

براء :(سكت وعطاها بالظهر) ما اتمشيش وسالينا

تيكا:(لي ما فهمش شنو قالو) كاين شي مشكيل؟

براء :نو.. ما كاين والو.. شنو نبداو

تيكا:شووور.. نتا مستعد

براء :اكيييد

خلاها هي واقفة وكتشوف فيها ومشا هو وتيكا قدامها كيسرجو لكلاب واحد واحد.. كيخشيلهم رباط فرجليهم وفعنقهم وكيحاول يخليهم مكالميين ويلعب معاهم شوية باش يولفو عليه.. قربات منو مرة اخرا وهو واقف فوق احد الكلاب باللون الابيض وفاتح رجليه ولكلب بيناتهم باش يحكمو مزيان.. هو يله بغى يخشيلو الرباط فرجلو وهو يسمع صوتها..

تالاسين :(بنبرة هادئة) خليني نمشي معاك

براء :سكت عاقد حجبانو وما جاوبهاش

تالاسين :(بنبرة فيها بحة باكية) حشووومة عليك

هز راسو فيها مغوبش.. لقاها بصح كدمع.. زفر ساخط والكلب مزال بين رجليه كيفركل ويتعنتت بين يديه وهو كيحاول يزير عليه ومعافر معاه.. 

براء : مالنا على لبكا هممم؟؟ غوت عليك؟ ضربتك.. هزيت صوتي عليك؟؟ علاش كتبكي

تالاسين : سكتات شفايفها كيرجفو حيث حابسة لبكية

براء :كتبكي حيث خايف عليك.. 

تالاسين :ما ايوقعلي والو

براء :(معافر مع الكلب لي ما بغاش يرصا) وانا شنو لي ايضمنلي..سيري فحالك اتالا

رجع شد الكلب لي كيلعب براسو ومخرج نيابو كيبغي يقلب راسو جيهتو باش يعضو وهو كيحاول يشدو وهي حداه كتغبن عليه حتا تعصب..

تالاسين :ما انمشيشي معاك.. نمشي مع تيكا هو مولف

براء :(زير على سنانو) سيري فحالك.. 

تالاسين :لا انمشي معاه

براء :(هز راسو فيها مخرج عينيه) ما تعصبينيييش.. فين اتمشي معاه.. كي درتيلها.. بغيتي تجلسي وسط حجروووو.. من نيتك.. (زفر حيث وترو الكلب).. شوفي اتمشي تبدلي الساعة وتكمشي فداك البيت ولا غادي تسمعي لي ما يعجبك

تالاسين :ماشي شغلك.. تيكا انركب معاك واخة

تيكا:(تفافا حيث عرفهم كيدابزو بلحق ما فهمش علاش حيث كانو كيهضرو بالدارجة) اااا.. مرحبا.. لي بغيتو.. انا ما عندي حتا اعتراض

طلق يدو من عنق الكلب وجرها هي عندو سااااخط حتا جات قبالتو وركابيه مزيرين على الكلب برجليه الشيء لي زاد وترو وخلاه كينقز وينبح ولكلاب كينبحو معاه..

تيكا:براء.. كالم الكلب كيحس بستريس ديالك

براء :(ما تسوقلوش وزير على يدها محمر فيها) اتهزي راسك واتقلبي الدورة وما تلعبيليش على اعصابي.. هاد لفشوش دلبراهش ما كنحملوووووش سمعتيني😡.. وتهزي دابا من قدامي اووووووووف ميغد

حس بالكلب شدو من يدو بعضة.. وطلق منها ودفعها على الكلب وهي خرجو عينيها.. 

تيكا: كالم كااالم.. غير توتر.. ترخا باشش يطلق منك

ما كانش حاس بالعضة مقصحاه حيث لحوايج لي لابس بزاف ما خلاوش سنان الكلب يوصلولو للحم وبدا كيحاول يخلي لكلب يطلقو وهو معصصصصب وحجبانو معقودين.. 

تالاسين :(كتبكي) حوووو فيك اههئ اهئ والله ما تبقى فياااااااا اههئ اهئ

براء :(غوت) تحركيييييييييي من قداااااامي😡

خرج غوثة خلاتها تفزع من بلاصتها.. اخر مرة غوت عليها هاكة هي فاش اعتارفلها وقالتلو حنا خوت.. ديك الغوثة زااادت لكلب توتر وخلاتو يصعر ويصعر لكلاب معاه.. زيرات على فمها وقلبات الدورة غادة كتجري وتبكي وهو فبلاصتو متبعها بعينيه لي ساخطين ويدو فوسط فم الكلب.. وتيكا تالف ما عرف يبردهم ولا يبرد لكلاب..

مشات فحالها كتجري ودخلات للبيت وجلسات كتبكي وتشهق بوحدها.. ربعات رجليها ونترات الطربوش من فوق راسها ورماتو قدامها..

تالاسين :كنكرررررهك اههئ اههئ

هو بقى معافر مع داك الكلب حتا طلقو وبعد عليه خلاه حتا تكالما ووقف هو كيشوف من بعيد مربع يدو ومخنزر وبالو معاها وما بقات عندو گانة لحتا حاجة.. 

كانت هابطة فالدروج.. باينة عليها غادة لشي بلاصة.. شافتها بيسان وناضت عندها كتشوف فيها..

بيسان:فاين ماشة؟

رؤيا:(وقفات قدام مراية حدا الباب كتقاد شالها) انمشي عند خالتك شامة نطلل عليها

بيسان:ااه..مزيان

سكتات شوية وكتشوف فيها ورؤيا مرة مرة كتشوف فيها من لمراية عرفاتها باغة تقول شي حاجة.. 

رؤيا :شعندك.. شني باغة 

بيسان :(بتردد) نمشي معاك؟! 

رؤيا :(طلعات حاجبها) علاش؟

بيسان :نشوفها

رؤيا:شكون اتشوفي فيهم؟ 

سكتات كتلعب بصبعانها وحنات راسها.. ورؤيا كتشوف فيها من لمراية.. 

رؤيا:واخة طلعي لبسي دغيا هانا كنتسناك

بيسان:(هزات راسها) ههه واخة.. دغيا نكون عندك

طلعات وخلات رؤيا واقفة حايرة فأمر بنتها.. شنو ديرلها وكيفاش تصرف معاها وشنو الحاجة لي تخليها تزولو من بالها.. حتا نزلات عندها لابسة جلابة خفيفة وصندالة وجامعة شعرها كوتشوفال.. تنهدات رؤيا وتمات خارجة ولحقاتها بيسان لي متوترة من هاد لمشية وكتفكر فاخر مرة. شافتو وكتمنى ما تشوفوش فنفس الحالة..

وصلو للفيلا ديالهم ونزلو.. وهي كتسرطفريقها ودور فعينيها متوترة حتا صوناو فالباب وفتحاتلهم هي.. 

شامة:(بابتسامة) بنت خالتي.. مرحبا

عنقاتها رؤيا ووقفو كيتسالمو دخلات وسلمات عليها بيسان ورحبات بيهم يدخلو.. جلسو فالصالة كيهضرو ويسولو على احوال بعضهم.. حيث سبقلهم تلاقاو وتصالحو.. حيث شامة شافت حتا عيات ولقات بلي هما ما عندهم دخل فلي وقع بين تالا وبراء.. هما براسهم تصدمو بحالهم.. وبيسان كانت جالسة وسطهم فحال الا جالسة على الشوك.. حتا سمعات مها نطقات..

رؤيا:امدرا.. سعد كيبقى ؟!

شامة:(تنهدات) ايوا شني انقولك اختي.. نحمدو الله.. بعدا بعدا خرج من داك البيت ورجع لخدمتو مع باه.. بعدا كيتلاها بيها من الصباح حتا الليل ويجي ينعس ويمشي عاود.. ما بقيناش كنسمعو حسو.. بلحق الحمد لله على كل حال 

رؤيا:اممم.. الحمد لله.. دابا ينسى

شامة:(بنرفزة) الصراحة راكي ختي قبل ما تكوني بنت خالتي.. وعلى وجه العشرة لي بيناتنا سكت.. اما راه داكشي لي داروه ولادك ما تماااش وما يتسكتشي عليه

رؤيا:(شافت فبيسان) بلا ما نهضرو على هادشي دابا.. لي فات مات.. وهو دابا ينسى ان شاء الله خاصو غير شوية دالوقت

شامة:لا.. انا ولدي خاصو شي بنت لي تنسيه.. وانا لي انقلبلو عليها هاد المرة.. الراجل ما كينسى لمراة غير بمراة ياخراااااا.. ويانا داكشي لي انعمل

بيسان ضربها الضوء وهي فبلاصتها.. بقات غير كتبرقق وقلبها كتحس بيه ايخرج.. شافت فمها مخلوعة ورؤيا شافت فيها وقلبات وجهها..

رؤيا :وهو باغي؟؟ 

شامة:واخة ما يبغيشي.. يانا عارفة شغلي معاه..

رؤيا :اه.. مزيان.. وفبالك شي وحدة

شامة:وي الصراحة.. شفت واحد البنت وعجباااتني.. قارية وبنت الناس وزوينة ومربية.. خاصني غير نهضر معاه ونتوكل على الله

رؤيا:(تزيرات كتشوف فبيسان) شكون.. كنعرفوها؟

وقف الزمن عند بيسان.. كتسنا تسمع شي حاجة لي تفرحها.. ما باغاش تصدم مزال.. باقة طامعة تقول سميتها.. باقة طامعة فيه وفأن فرحتها تكمل.. وركزات مع شامة كتسناها شنو اتنطق.. 

شامة:محااالش واش كتعرفيها.. هي بنت واحد صاحب ياسين.. ذهايبي فحالو.. وكان عندو محل حداه من شحااال هادي.. من قبل حتا ما نتزوجو.. عندو وااحد البنت غزاااالة تبارك الله.. هما كيجيو عندنا ونمشيو عندهم ديما.. وكانت كتعجبني ولكن فهاد الأواخر عاد حطيتها فبالي.. 

تقطعات فيها النفس.. تصمكو وذنيها.. حسات بقلبها وقف.. وشي حاجة مزيراها وسط صدرها وقااااجاها وما مخلياش النفس توصلها.. شافت فمها لقاتها كتشوف فيها.. دغيا عينيها حماااااارو وبانو فيهم الدموع كيلمعو.. ما قدراااتش تحبسهم.. عياااااااات وقلبها حرقها.. كل مرة كتزييييد تأكد بلي الفعلة لي دارت اتحاسب عليها طول حياتها وبلي سعد عمرو يكون ليها.. لاحظات شامة رؤيا لي كتشوف فبنتها بحسرة وشافت فبيسان.. 

شامة:بيسان!!! شعندك!! .. كتبكي؟؟

بيسان :الصمت

رؤيا :اااا.. والو والو.. غير حيث جبدنا تالا وبراء يمكن عليها وهي توحشاتهم هذا ما كان

شامة:اممممم.. (عوجات فمها) بصح لي سمعنا

رؤيا :شني سمعتي

شامة:بلي مشاو شهر عسل

رؤيا:لا.. ماشي شهر عسل.. هاديك رحلة جات لبراء على حساب خدمتو ومشات معاه

شامة :ااااه.. ايوا مزيان

رؤيا :راه قلتلك ديك المرة بلي هما براسهم ما عارفينشي كيفاش وقع لي وقع

شامة:بلا ما نجبدو هاد الموضوع حيث غبر انجبدو الصداع

رؤيا :(شافت فبنتها) ما علينا.. حنا انمشيو

شامة:علاش خليكم جالسين.. ما جلستو والو.. عاد جيتو

رؤيا :لا غير خلينا.. مرة. ياخرا ونجيو.. مهم شفتك. دابا فراس ايجي ما يجبرنيشي ما ايبغيشي راكي عارفاه

شامة:يانا لي عارفاه.. بلحق المرة. جاية اتجلسي.. ماشي الدخلة ديالك هادي

رؤيا :ان شاء الله 

سلمو عليها وخرجو.. وهي بزز باش حابسة. راسها باش ما طيحش تما.. حيث رجليها بزز باش كيحركوها.. حسات بالدنيا قدامها كتمشي وتجي.. والضبابة نازلة على عينيها ما عرفات واش الدموع لي حابسينلها الشوفة ولا شي حاجة ياخرا.. ريقها نشف عليها.. ورجليها فشلو.. قلبها حاساه ايسكت بقوة ما كيضرب.. ورؤيا شادة فيها وخايفة على بنتها وكتحاول ما تبين والو لشامة. ..

حدهم غبرو من قدامها ووصلو حدا الاوطو ديالهم وهي تطلقها بشهقة ضربات لرؤيا فقلبها فحال شي موس وجرات بنتها خشاتلها راسها فصدرها وبيسان مزيرة علييييها وعاضة على يديها.. 

رؤيا :صافي ابنتي صااافي اههئ اههئ ما تبكييشي.. نسااااه ماشي ديالك اههئ اههئ نساه ابنتي نساااااه

ما هضراااتش.. ما عندهاش اللسان لي ينطق.. حدها كتبكي وتعصصصصر بين يدين رؤيا.. وكتقطع صوتها بيديها لي كتعض فيها.. ورؤيا كتزير عليها وتبكي معاها.. حتا حسات بيها بدات كتفشل بين يديها وهي تزرب عليها فتحات باب الاوطو لي حداها ودخلاتها جلساتها.. ولوخرا ترخاااات كتشهق بشوية فشلااااانة.. 

❄️❄️❄️❄️

كان فوق العربة ديالو وتيكا فالجنب لاخور بعربتو بعيد عليه .. وكل عربة جارها قطيع من الكلاب.. كان كيشووووف قدامو وعاقدهم.. تعصب وبقى مشطوووون.. سهاااا واحد اللحظة وفديك اللحظة لي سهى فيها فقد تركيزو وفرمشة عين فلتات رجلو وطاح برا العربة.. حاول يتذارك الموقف بسرعة وناض حاول يلحقها.. شافهم كيجريو بالزربة وتلاح على كرشو وشد فحديدة كاين فطرف العربة من لور.. وبقى غادي ولكلاب جارينو وهو كيحاول يوقفهم ولكن خرجو عن سيطرتو.. كان معصب وزاد.. بدا كينهج وهما كيجرو فيه فديك الأرض حتا حس بالدقن ديالو تحردات مع الثلج القاصح حتا تجرد وجهو.. تقصح ولكن صبر راسو وشد العربة بزوج يدين وتمد لحديدة براس حاد معوج فجنب العربة حتا شدها ودغيا غرسها فالأرض وهي مربوطة مع العربة بحبل الشيء لي خلا العربة تفراني وما تزيدش تحرك.. جلس جامع رجليه قدامو كياخد النفس ويديه كيقيس بيها وجهو لي كيحس بالبرد كيشوطو فالجرحات لي تجرح فيهم.. وتيكا شافو من بعيد وقلب الدورة حتا وقف حداه.. ونزل يطمن عليه.. 

تيكا:واش مزيان؟؟

حركلو راسو بالايجاب وحنا راسو مغمض عينيه.. حاس براسو ماشي هو هداك.. المورال تخسر فمرة.. هز راسو بعياء وشاف فتيكا.. 

براء :نرجعو

تيكا:لي بغيتي! 

براء :اوك.. انصور فيديو قصير ونمشيو

ناض مكره ومشا قبالة لكاميرا لي كانت كتصور كلشي.. كان خاصو ضروري يعطي تقرير على هاد التجربة.. حيث ما خصو يفلت حتا ثانية.. غير سالا وركبو فعرباتهم راجعين فحالهم.. 

دخل للبيت ديالهم معبس وساخط على الوضعية.. ما لقاهاش وهو يرجع لور هاز حاجبو.. خرج من البيت كيقلب عليها بعينيه ما بانتلوش.. كيمشي بين لبيوت ويقلب ووالو ما بانتلو.. حتا كتبانلو خارجة من واحد من لبيوت كتضحك.. لابسة لباس فحال لباس النساء لي تما.. لباس كلو دالجلد بني فاتح.. جوب فوق الكعب بشوية مع معطف حد لفخض وبوط ديالها.. ومدورينلها خيط على جبهتها فحال خيط الريح مع زوج شوشات فاخر طرف كل خيط نازلين على وذنيها.. ودايرة زوج ضفرات فالجناب.. وعينيها كيبريو بالفرحة وسط لعيالات لي خارجين موراها من البيت.. غير شافتو وهي تعوج فمها وقلبات وجهها مخنزرة.. هو شاف فيها طلعها وهبطها ورجع دخل للبيت وخلاها مع النسا.. 

دخل للبيت هو كيدهن بوماد لوجهو باش ما يبقالوش الطابع دالجرحة.. وهي ما تسوقاتلوش وما دخلاتش لداك البيت ما حدو هو فيه.. بقات مع النسا واخة ما فاهمة وسطهم حتااااااا كلمة.. رجعوها لأيام زماااان فاش كانت صغيرة وتحطات وسط لمدينة ما كتفهم حتا كلمة.. ضحكات على راسها.. كل مرة كتلقى شي حاجة تفكرها بالذي مضى.. حنات راسها كترحم على واليديها وتفكرات الصلاة وناضت داخلة للبيت.. 

دخلات مع الباب بانلها مجبد كيرتاح ويدو فوق جبهتو.. خنزرات فيه ومشات جيهة اللباس دالصلاة ديالها جبداتو.. فرشات الصلاية وتيممات وهي كتوشف فيه بنص عبن فكعاااانة..عاقد حجبانو وهو ناعس.. بانلها وجهو مقموش من جيهة الحنك والخبشة غادية حتا غبرات وسط لحيتو.. ضرها راسها تعرف باش.. ورجعات هزات كتافها ما مسوقاش.. صلات صلاتها وهو ما تحركش من بلاصتو واخة كان فايق وفاطن بيها كتحرك حداه ولكن ما تململش.. حتا سالات وهزات راسها ورجعات خرجات.. 

طاح الليل.. كانو مجموعين فالبيت شي ما كيهضر شي.. هي منفخة وهو قالها ما كتعرفيش.. كانو ناااعسين.. حتا حسات براسها تزيرااااات.. حلات عينيها كتشوف فجنابها وكتحاول تحصرها.. بغات تنوض تخرج ساعة خافت والظلام برا وعاد خافت لا يمشي يخرجلها شي ذيب من شي قنت.. والظلام وهذا وقتهم.. وبقات ناعسة كتقلب من جيهة لجيهة وهي حاسة بنبولتها اطرطق وما مشا بالها غير لخالتي رقية نهار تحصرات.. حتا شداتها الضحكة ورجعات جمعاتها حيث حسات بيها اتفلتلها فالسروال... 

تالاسين :احححح .. اوووووف.. يا ربي

عيات كتلوى فبلاصتها وتعوج فرجليها وتحبس فيها.. كرشها ضرااااتها والبولة حاسة بيها اتزهق.. خاصة وان البرد طالع معاها من الجو البارد لي هما فيه.. مالت على الجنب دالشمال جيهتو هو لي ناعس.. كتوشف فيه ناااعس على ظهرو وداير بوجهو لجيهة لوخرا.. شداتها البكية.. تفيقو.. لا ما تفيقوش.. تحبسها.. ما بقالها والو وتهبط.. تخرج بوحدها.. ما قاداش.. حارت وهي كتعصر فبلاصتها حتا وصلات بيها لجذر ووصلات لمرحلة لي ما بقاتش قادرة مزال تحبسها وهي تنغزو بصبعها من كتافو..

تالاسين :(بنبرة مغبنة) برااااااااااء.. برااااااء

براء :الصمت نااعس

تالاسين :(زادت حركاتو) برااااااء نوض.. عتقني

حرك حجبانو وفطن بيها ودار عندها كيشوف فيها بين رموشو ومكمش جبهتو وصوتو مبحوح وخافت بالنعاس..

براء :شنو!! .. مالكي!!

تالاسين :محصورة!

براء :(كيحك شعرو ويتفوه)اااااه... كيفاش محصورة

تالاسين :وا محصورة محصووورة.. اووووف.. باش كيتحصرو الناس

براء :(فتح عين وساد عين) فيك البولة!!!

خرجات عينيها فيه كترمش.. رماهالها هكاك حرفية خلاها غير كتشوف بعينيها.. مرگات وهي مخشية فلفراش ويديها على حجرها حاصراها.. 

براء :هضري مالك

تالاسين :(حركات راسها) 

براء :(تكسل) اااااااااه.. ما لقات هاد لبولة ايمتا تجيك.. فين اتبولي فهاد البرد والليل.. حصريها حتا للصباح 

غمض عينيه وقلب وجهو عاود وترخا نعس مدوخ بالنعاس وعينبه بزز باش كيحلهم فيها.. هي غير شافتو غمضهم وهي تزعزع فيه.. 

تالاسين :انووووووض راه انرخيها فحوايجي نوووض.. 

براء :(قالب وجهو ومغمض عينيه) غير طلقيها.. بحرا تسخنك راه البرد

تالاسين :(شداتها البكية) وااا نوض حرام عليك.. 

براء :بفففففففف

ناض بزز عليه باش كيتحرك مثقل الحركة عاد كيتواكض وهي اتعواج فبلاصتها.. 

براء :لبسي جاكيط ديالك بعدا

ناضت مجلسك لبساتها بالزربة هي والطربوش وهو قبالتها حتا هو كيلبس.. وناض وقف ونوضها معاه وهي مقوصة ظهرها وكتمشي معوجة وبزز باش كتخلف.. الدمووووع قربات تهبطهم قبل ما تهبط البولة.. هو يله حط الخلفة اللولة برا البيت وهو يحل فمو وحل معاه عينيه.. هاز عينو فالسماء بذهووووول.. كيشوفها كلها مزينة باضواء على شكل خطوط كانها كتسبح فالسماء.. أضواء ملونة.. بتدرجات الاخضر والاصفر والأزرق.. منظر سبحاااان الخلق.. خلاه فاتح فمو وهي موراه براسها مدهوووشة بالمنظر لولا البولة لي خسرات عليها اللحظة وما خلاتهاش تستمتع بالشوفة.. 

براء :وااااااو .. الشَّفَقْ...الكاميرا.. فين هي الكاميرا

سمح فيها وتم داخل للبيت يقلب على الكاميرا وناسيها هي.. ولكن هيهات قبل ما يعتب قفزاتو بغواتها.. 

تالاسين :واااا فاين ماااشي ومخليني انعوااااج انهنننننننن

براء :(تلف كيشوف فيها وفالمنظر وباغي يجيب الكاميرا) ااااااه.. البولة!!..تسناي نجيب الكاميرا ونبولو.. زعما نجيب الكاميرا ونْبْوْلَكْ!!! (شاف فالسماء) اووووووف المنظر واااااااااااو 

تالاسين :اجي شمن كاميرا.. المنظر ما ايهربشي.. وا عتققققققني

براء :وا حتا البولة اتالا ما اتهربش.. غير طلقيها عافاك.. على حسابي.. غير ما نفلتش هاد المنظر

تالاسين :حراااااااااااام عليك اههئ اههئ 

براء :(تلف ما عرف يدخل ولا يمشي معاها) بفففففف.. على زهر.. يله طلقي راسك قبل ما يمشي.. دغيا

زيدها قدامو وهو بالو كووولو مع السماء وهي كتمشا وتعواج.. حتا وصلو لبيت اسكيمو صغير مقنت دايرينو كطواليط وحافرينلو فالارض مزيااان.. دخلات كتجري وخلاتو هو واقف كيتمنظر فروعة الخالق.. بقات شوية وخرجات بشوية عليها.. وأخيرا ارتاحت.. هو غير بانتلو خرجات وهو يتم غادي جيهة بيتهم كيخلف بالزربة.. وهي موراه كتشوف فالسماء حالة فمها.. 

تالاسين :منظر كيحمق

براء :دابا عاد كيحمق..

تالاسين :(عوجات فمها) وشني كنتي باغيني نعمل هاء.. وزايدون راه خاصك تشكرني

براء :علاش

تالاسين :(بالنفخة) حيث بسبابي فقتي باش شفتي هاد المنظر.. اما كون راك مزال كتشخر.. 

براء :(طااانز) اممممم.. لهلا يخطي علينا بولتك

دخل هو للبيت وخلاها هي كتبيض.. حشمهاوخلاها كون لقات تخشا وسط حوايجها.. رجعات هزات راسها فالسماء بابتسامة وكتسبح الله.. حيث منظر الشفق منظر فعلا كيحمق فالسماء لي كتكون مظلمة.. شبيه بقوس قزح لكن هو كيكون كيتحرك كانه عبارة عن موجات فلبحر.. خرج هو بالزربة هاز كاميرتو الليلية لي تقدر تصورلو هاد الظاهرة.. وبدا كيلتقط الصور المناسبة..وهي واقفة موراه..حتا نطق وهو عينيه على العدسة.. 

براء :هاد لقبيلة كتضن بلي هاد الأضواء عبارة عن أرواح رجعات للأرض من الحياة بعد الموت.. هذا هو معتقد شعب الإنويت

تالاسين :(باستغراب) من نيتهم!!! 

ضحك وما جاوبهاش.. وكمل تصوير وفالاخير بدا كيلتقط فيديو باش يقدر يصور تحركات الأضواء لي كتعووووووم فالسماء.. وهي موراه ساكتة وكتشوف فيه وفالمنظر..

ناضت هاد صباح بعيون ذبلانة..جسم مهلوووك.. وراسها كيضرها.. هزات راسها من فوق لمخدة بعياء.. شحال قدها تبقى هاكة.. شحال قدها تبقى كتبكي وتندب عليه.. خسرات شحاال من حاجة غير باش تربحو وفلخر غير ما كيزيييد يبعد عليها.. خسرات خوتها.. خسرات حياتها.. خسرات راحتها.. ضحكتها.. ومزاااال لي جاي كثر.. تنهدات بنفس ثقيييييييل وشافت قدامها بنظرة حادة وناضت من بلاصتها..

وقفات فباب المحل.. ها هو قبالتها من مور الزاج.. واقف كيتفاهم مع زبونة وكيوريها اشكال لسناسل ذهبية.. تيشورط اسود.. وسروال اسود.. وشعرو ماشطو وخلا لحيتو كبيرة غير هي مقادة على اخر مرة شافتو فيها.. ما عرفاتش واش زيان بصح ولا غير فعينيها هي بوحدها حيث شحال ما شافتو.. خدات نفس عمق حبسات فيه دموعها.. شحال قدها مزال تبكي.. حد هنا وصافي.. خاصها تزيد للقدام.. ما تبفاش واقفة فبلاصتها.. الحياة غادية ما اتوقفش.. لي وقع وقع.. خاصها تشوف لمن بعد دابا..

تسنات دقائق حتا خرجات الزبونة عاد خدات نفس ودخلات.. المحل لي هو فيه غير لي كان خدام فيه باه.. حيث خدمتهم توسعات وفتحو ثلاثة دالمحلات.. باه شاد واحد وهو واحد ودايرين معاهم الخدامة.. كان كيقاد داكشي لي جبد فبلاصتو فاش سمع الباب تحلات مرة ثانية.. غير هز راسو وهي تغير نضرتو وطلع حاجبو.. بقا لثواني كيشوف فيها وتنهد.. 

وقفات قدامو بنظرة حاولات ما امكن تخليها خالية من اي تعبير.. نظرة خبات من موراها شحااال من حاجة.. شوق .. حزن.. وجع.. وحب كبيييييير.. 

بيسان :(بهدوء) سلام 

سعد:(بهدوء مشابه ليها) وعليكم السلام

سكتات كتشوف فيه او بالأحرى كتسناه يهضر.. بغاتو يهضر هو.. يسولها هو لول على حالها.. حيث غير المجية لي جات لهنا راها عفرات بزاااف باش تجيها من آخر لقاء بيناتهم.. 

سعد:مزيانة! 

بيسان :الحمدلله.. نتينا! 

سعد :(ضحك بسخرية مخفية) حسن من قبل

بيسان :مزيان

سعد:جلسي! 

كان كيحاول ما يخليش الجو غريب..حتا هو داير حساب بلي اخر لقاء ما كانش حتا لهيه.. 

بيسان:كنت بغيت نهضرو شوية.. ولكن ماشي هنا.. 

سعد:(سكت شوية) واخة.. حتا انا خاصني نخرج نتغذا.. جلسي شوية نسالي شي شغال ونخرجو.. 

بيسان:واخة

رجعات لور وجلسات ففوطوي وخلاتو هو كيكمل جميع المحل ودخل لبيت كاين لداخل.. ورجع خرج بعد دقائق.. 

سعد :مشينا؟!

ناضت بصمت.. هزات صاكها وزادت خارجة قدامو وهو موراها.. سد الباب ووقف حدا سيارتو.. 

بيسان :نتلاقاو حدا كافي****.. انا انمشي فالاوطو ديالي

سعد :ركبي نمشيو بزوج

بيسان :لا.. الاوطو ديالي كاينة.. 

عطاتو بالظهر وتمشات قدامو مخلياه متبعها بعينيه.. كتخلف بخطوات واثقة هاد المرة وهازة راسها بعزيمة.. هدوؤها جاه غريب.. ماشي عادتها.. وماشي هاكة والفها.. حتا اخر مرة فاش تلاقاها غوتات عليه.. دابزات معاه.. هضرات وتكلمات... على عكس هاد النهار.. نفض هاد الأفكار من بالو وطلع للاوطو وتسناها حتا زادت قدامو وزاد هو موراها.. 

دخلو وجلسو.. طلبو شي حاجة ياكلوها..وشافو فبعضهم فصمت.. حتا قررات تبدا الهضرة

بيسان:مزال كتكمي؟

سعد :(رجع لور موكي ظهرو) مزال كتسنايني نقطعو!! 

بيسان:لا ما كنتسناكشي.. غير تمنيتك تقطعو باش ما ضرش راسك.. اما قراراتك شي حاجة خاصة بيك.. حتا حد ما يقدر يبزز عليك شي حاجة

سعد:مزيان منين فهمتيها

بيسان:ما تخافشي.. فهمتها.. واخة معطلة

شاف فعينيها.. نظرة غريبة.. شنو كتعني هاد الشوفة.. خلاتو حاير فمغزى هضرتها غير بعينيها.. 

بيسان:البارح كنا عندكم.. انا وماما

سعد:بصح.. مزيان

بيسان:(تبسمات) عرفت بلي خالتي كتقلبلك على عروسة

عقد حجبانو فيها بتسائل.. هادشي هو ما عارفوش.. وما كانش فخبارو.. 

سعد:شكون قالك هاد الهضرة! 

بيسان:شكون من غير خالتي شامة.. 

سعد :(مطلع حاجبو) اهاه.. وشنو قالتلك اخر؟ 

بيسان:شني اتقولي مثلا..قالتلنا بلي باغة تعاونك باش تنسى.. وبلي ما يقد ينسيك فلمراة غير لمراة.. ياك ما كذبات!!!

سكت كيشوف فيها.. هو ما فخباروش اه.. ولكن ما بغاش يبين بلي ما عارفش.. ما باغيش يبين راسو بلي هو داك سعد الضعيف لي خلاتو مراة محطم موراها.. 

سعد:لا ما كدباتش.. بصح.. ما كينسيك فالمرأة .. غير مرأة حسن منها

بيسان:وفين مشى داك الحب لكبييير.. تبخر!! دغيا بانتلك فمراة ياخرا

سعد:الحب كيتعطى للي كيستاهلو.. اما الا خسرنا حياتنا على واحد لي ما كيستاهلش وما كيبغيناش غير حيث حنا كنبغيوه.. فهذا كيتسمى غباء.. وانا ما مستعدش نخسر حياتي على قبل انسانة ما كتستحقش

قلبات وجهها للجنب بابتسامة سخرية عريضة.. خلاتو يقوص حجبانو باستفسار.. ورجعات شافت فيه بنظرة خلاتو يزيييييد يستغرب

بيسان: بصح..ما كدبتيشي.. الحب فاش كيتعطى للناس ما كتستاهلوشي كيتسمى غباء.. ولا ضيعنا حياتنا عليه فكتسمى بلادة.. واليوم نتينا زدتي أكدتيلي بلي انا بصح كنت مكلخة وبزااااف

سعد:ما فهمتكش

بيسان:اصلا كون فهمتيني من شحاااال هادي كاع ما يوقع هادشي كاااامل.. المشكيل انك نتينا ما فهمتينيشي.. وتالا ما فهماتشي براء.. ونتينا ما فهمتيشي تالا.. وانا.. (ضحكات) وانا ما فهمتكشي.. المشكيل من لول وقع حيث حتاااا واحد فينا ما فهم ياخور.. 

سعد:شنو كتقصدي! 

بيسان :(كاع ما تسوقات لسؤالو) ولكن واخة لي وقع.. مزيااااان.. تعلمنا شحال من حاجة.. وفهمنا حاجات.. واهم حاجة عرفتها انا.. بلي كما المرأة ما كتنسيك فيها غير مرأة.. اكيد حتا الراجل ما اينسيك فيه غير راجل فحالو.. 

سعد :علامن كتهضري!!!

شافت بابتسامة ثقة.. قررات قرار نهائي.. كانت جاية عوالة عليه ولكن دابا تأكدات بلي ما خاصهاش تراجع عليه.. شحال قدها تخبع!! شحال قدها تبكي؟؟ شحال قدها تلوم راسها؟؟ شحال قدها تخاف من لي جاي؟؟؟.. صافي.. هي دارت الذنب.. ولكن أحيانا الاعتراف بالذنب يعتبر فضيلة..حلات صاكها وجبدات منو دفتر صغير عبارة عن مذكرة وحطاتو فوق الطبلة.. 

بيسان:اليوم جيت عندك باش نشد اخر صفحة من كتاب حليتو هادي زماااااان.. من نهار كنت صغيرة.. كنت معمية واليوم حليتيلي عيني.. غلطت وندمت.. وكنتأسف على غلطي.. وكنتمنى يجي نهار وتسمحلي فيه.. ولكن مزال كنرجع ونقول بلي يمكن هادشي لي وقع مكتاب.. يمكن كما تالا ما كانتشي كتستاهل حبك ليها فحتا نتينا ما كنتيشي كتستاهلها.. يمكن نتوما ما خلاقيتوشي لبعضكم.. يمكن هي دابا بين يدين لي يستاهلها بصح.. ونتينا مزال ما جبرتي لي تستاهل حبك ليها.. الغباء الحقيقي ماشي فأنك تبغي شي حد ما يستاهلشي.. الغباء هو انك تعرفو ما يستاهلشي وتبقى مكمل فحبك ليه.. وتالا ماشي ما كانتشي كتستاهل.. وإنما نتوما ما خلاقيتوشي باش تكونو بزوج.. هذا ما كان..

تبسمات فوجهو مخلياه هو فحيرة ما فاهم وااالو.. وما عرفش شنو كتقصد بكلامها..

بيسان:عرفتك ما فهمتي والو.. مي فاش نمشي نبغيك تقرا هاد المذكرة.. قراها واتفهم كلشي.. واتعرف الأجوبة دكاع الأسئلة لي فبالك.. علاش.. كيفاش.. فوقاش.. كلشي.. وانرجع وانطلب منك السماحة اسعد.. كنت انانية معاكم.. ظلمتك وظلمتكم كلكم.. وما تخافشي ههه.. حتا انا كنتعاقب معاكم ويمكن كثر منكم.. حيث تانيب الضمير هو اصعب عقاب يقدر يعيشو الواحد..

شافت فيه وتبسمات.. بغاتو يشوفها اخر مرة كتضحك ماشي كتبكي.. جرات ديك المذكرة وخدات الستيلو من جنبها وهو متبعها بعينيه.. وفتحات ااااخر صفحة فيها.. ووسط منها كتبات بالخط العريض.. سداتها وناضت وقفات.. وهو مزال كيشوف فيها ببلاهة ما فاهم والو.. زربات عليه خلاتو غير مبلق عينيه.. 

سعد:شنو واقع؟! 

بيسان :ههه اتفهم.. اتفهم كلشي.. وكنتمنى فاش تقرا تحس بيا وتعذرني.. ومرة ياخرا كنطلب السماحة اسعد

سعد:علاش كطلبي السماحة!! 

بيسان:(هزات صاكها) تهلا فصحتك.. ورد البال لراسك..وحاول تقطع الكارو.. ما بغيتكشي تضيع صحتك بسبابي.. 

تبسماتلو وخلفات خارج فحالها.. وخلاتو هو جالس حال فمو وكيرمش.. كيفاش بسبابها!! هو ماشي بسبابها تبلا بلگارو.. علاش قالت بسبابي.. وعلاش كطلب السماحة.. ما فهم والو.. قلب وجهو للمذكرة وهزها كيشوفها شنو كتبات.. فتح اخر صفحة لقاها كاتبة بخط جميل.. "ماضي أنثى غبية"... عقد حجبانو وعلامات استفهام كثيييييرة كدور فوق راسو.. خلاتو غارق فدوامة من الاسئلة.. ولكن ما ايطولش.. دغيا فتح اول صفحة وبدا كيقرى.. كيقرى سطر بسطر.. من أول يوم نبض فيه قلبها.. من اول يوم عرفات راسها كتبغيه.. من نهار رجعات مهووسة بيه.. يوم بيوم.. أحداث دازو ما كانش رادلهم البال.. ما كانش حاس وما كانش فاهم.. كان داكشي لي كيقرا بالنسبة ليه صدمة.. صدمة تابعة ختها.. كل ما كيقلب لشي صفحة كل ما كيزيييييد يتبهض كثر وكثرَ..

يتبع...