إرحموني الجزء 13

جمد فبلاصتو مصدوم.. شنو هادشي كيقرا!!! لا ما يمكنش!! لسانو تشلل عليه.. كانت كتبغيه هاد السنين كااااملة.. شحال من ليلة باتت كتبكي بسبابو.. شحال من ليلة حلمات بيه وناضت فرحانة.. شحال من مرة قالها كلمة بسيييطة خلاتها طييير بالفرحة بلا ما يرد البال.. شحال من مرة دار تصرف خلاها تبات بلا نعاس وهو ولا على بالو.. شحال من بنت دعات فيها وكرهاتها غير بسابو هو حيث كيهضر معاهم.. فين كان هو من هادشي كااامل.. ولكن صبر صبر.. شنو هادشي عاود!!! كيفاش غارت من ختها!!!.. كمل قراية وها هي الصدمة لكبيرة.. اااااخر حاجة كانت طيحلو على بالو.. حط ديك المذكرة من يدو ورجع لور كيشوف قدامو فالفراغ..حتا قال اينساها حيث ما متستاهلش ويمحيها من بالو وها هو اليوم ايعرف بلي ما عندها حتااااا يد فلي وقع.. لا هي لا براء.. بثلاثة بيهم كانو ضحية ديال لعبة لعباتها لحفيدة وجداتها..

حك جبهتو بعصبية.. ضحكات عليهم كاملين.. لعبات بيهم كي بغات.. ناض وقف ساخط.. خلص داكشي لي ما حطوش يديهم فيه اصلا.. شاف فديك المذكرة كينهج وهزها وتم خارج كيعيطلها وهي ما كتجاوبوووش.. رما تيلي حداه وشاف قدامو فالطريق كيحك لحيتو ويزفر بغضب.. وقلب الطريق غادي لدارهم.. 

🍃🍃🍃🍃

فاش كان عندهم الصباح.. تالا وبراء كان مزال عندهم ليل.. ومن بعد ما خدا الصور لي باغي.. كانت الأضواء القطبية بدات كتلاشى حتا ما بقاتش كتبان.. دخلو فحالهم وهما مزالين تحت تأثير داك المشهد الرباني لي شافو.. كان مشعول لبيل باش كل واحد يعرف يتقاد فبلاصتو.. تخشات هي فبلاصتها وهو جلس على جنبها كيشوف الصور لي خدا.. كانت راااادة البال من الصباح للضربة لي فحنكو.. وضرها راسها تعرف باش.. بقات كتشاور مع راسها تهضر ولا لا وكتهض على فمها حتا كتبغي تنطق وكترجع دير بالناقص.. وفلخر زعمات وهضرات..

تالاسين :براء ؟؟

براء :(شاف فيها ورجع شاف فلا كام) اممممم!!

تالاسين :شعندك فوجهك؟ ياك ما الكلب لي عملك هايداك.. واش نقز عليك؟

براء :(بلا ما يشوف فيها) علاش كتسولي؟

تالاسين :ما نسقسيشي؟! 

براء :(مزال عينيه فلاكام) ياك قلتي بلي ما انبقاش فيك وحو فيا!! شنو وقع دابا!! بقيت فيك؟؟؟ 

شافت فيه بنظرة ساخطة.. ندمها لي سولاتو هي كاع.. زفرات بغضب ونطقات وهي كتقلب للجنب لاخور وتعطيه بالظهر.. 

تالاسين :بالناقص كاااع.. مووووت ويانا سوقي.. وااا كبرو لبنادم

هز عينيه فيها فاش عطاتو بالظهر.. وتبسم عاجبو الحال.. حيث عصبها وحيث فنفس الوقت اهتمات لأمرو وردات البال ليه.. حط الكاميرا من يدو وتقاد فبلاصتو ينعس حتا هو..

خرجات من البيت كتقلب عليه بعينيها.. ناضت وما لقاتوش.. مشات كتقلب عليه حتا كيبانلها واقف بعيد شوية مع تيكا ولا كام واقفة قبالتو وفيديه حربة كيجربها.. تقدمات حتا وقفات حداهم.. 

تالاسين :صباح الخير

تيكا:صباح النور

براء :فقتي بكري! 

تالاسين :ما جيتشي باش نبقى ناعسة

شاف فيها وقلب وجهو كيجرب الحربة لي فيدو وكيضربها فخنشة قدامو..

تالاسين:شني اتعملو! 

تيكا:انصيدو

تالاسين :بصح.. شني اتصيدو! 

تيكا:انصيدو الفقمة.. حيث هي لي كاينة كثيرة هنا 

تالاسين :ههه.. واااااو..(شدات لبراء فدراعو) انمشي معاكم

براء :شاف فيها.. وشاف فيديها.. وسكت

تالاسين :ما تقوليشي لا عاود.. عافاك

براء :(تنهد وشاف فتيكا) تقدر تمشي.. زعما ما يوقع والو

تيكا:كنضن ما عندو ما يوقعلها.. 

تالاسين :شفتي.. ايوا خليني نمشي معاك.. عافاك

براء :شاف فيها وسكت

تالاسين :(تبسمات) انمشي ياك

براء :ان شاء الله 

تالاسين :(نقزات فبلاصتها) يييييييس ههه شكرا شكرا شكرا هههه

ضحك حتا هو معاها.. وسكتات كتصنتلهم هما لي كيهضرو على هاد الرحلة.. هزو الحربات فيديهم وهو علق لا كام فعنقو وقبل ما يشدو الطريق دار عندها ووقرب ليها..

براء :خليك حدايا.. سمعتيني.. اتشدي فيدي وما طلقيهاش.. ما نبغيكش تندميني

تالاسين :لا كون هاني ههه

براء :(مدلها يدو) يله! 

تالاسين :(تبسمات وشداتها) 

زير على يديها وقربها ليه وتمو غاديين لمنطقة جات بعيدة شوية.. هي لي معروفة بنشاط الفقمات الكثيف فيها.. يدو فيديها ما طلقهاش.. وتيكا قدامهم كيهضر ويشرح.. 

تيكا:اغلب الفقمات كتحفر حفرات فالثلج.. حيث كتحتاج تخرج تنفس.. وحنا خاصنا نقلبو على دوك لحفاري

تالاسين :(شافت فهاد الصحراء لي هما فيها بدهشة) دابا نتوما اتفتشو على حفرة فهاد لخلا كاااااامل.. من نيتكم؟؟ 

تيكا:ههه لا.. حنا انقصدو واحد المنطقة

بالخصوص.. هي لي كيكونو فيها الفقمات بكثرة.. وتما انقدرو نلقاوهم دغيا

تالاسين :ااااااه

بقاو غاديين فالطريق شي ثلث ساعة.. حتا وقفهم تيكا وهو كيشوف فالارض.. 

تيكا:شفتو هادي

كانت حفرة ولكن تغطات بطبقة رقيقة من الثلج.. باين بلي تفتحات هادي شي ساعتين الشيء لي خلاها بدات كتسد..

تيكا:هادي حفرة جديدة.. يعني الفقمة اتكون غير هنا.. مهم قربنا.. انزيدو شوية للقدام ونشوفو 

براء :اوك

زادو عاوتاني وكيقلبو بعينيهم.. ومرة مرة تيكا كيعطيهم معلومة جديدة.. وهما مستمتعين بهادشي لي جديد عليهم.. يديهم فيد بعضهم سخاااااان.. الذريق طوالت وما لقاو والو.. حتا نقزات فبلاصتها وهي كتنعت لواحد الجهة فيها الماء.. 

تالاسين :راهي راهي.. شفتوها! 

دارو بزوج كيشوفوها فين كتنعت.. كان بابن شي حيوان كيسبح فوسط الماء.. ضخم ولونو مايل للسواد.. 

تيكا:لا ماشي هي

براء :مأكد.. 

تالاسين :هي.. شوف راه هي.. يانا كنعرفها كي عاملة

تيكا:لا.. هداك حيوان الفظ

شافو فيه باهتمام كيتسناوه يكمل ورجع براء هز لا كام يصور ووذنيه معاه.. 

تيكا:حيوان الفظ كيشبه للفقمة عليها ظنيتيه هي.. ولكن العكس.. هي كتخاف منو.. ولبلاصة لي كيكون فيها هو كتخويها هي.. 

براء :يعني ما انلقاوهاش! 

تيكا:هنا لا.. احتمال ضعيف.. 

براء :يعني!! 

تيكا:انشوفو الخطة باء.. انقلبو الطريق لمنطقة اخرى.. 

براء :بعيدة؟ 

تيكا:شوية 

براء :(دار عندها) عييتي!؟ نرجعو

تالاسين :لا لا.. ما عييتشي.. غير خلينا نكملو

براء:اوك

تيكا:مشينا

براء :وي

قلبو الوجهة للشرق غاديين عاود.. وكيقلبو على هاد الفقمة لي ما بغاتش تبان.. 

تيكا:انقصدو منطقة الجليد كيكون فيها رقيق شوية.. عليها من المرجح تكون تما.. الوغ فاش نوصلو ردو بالكم

عقد حجبانو ودار شاف فيها.. وهي ردات البال لشوفتو وقلبات وجهها عرفاتو شنو بغى يوصلها بديك الشوفة.. تنهد وزاد زير على يديها وكملو طريقهم فوسط الثلج والارض مسرحة قدامهم بيضة كتشعل.. حتا كيوقفهم تيكا.. 

تيكا:حبسو حد هنا

وقفو فمكانهم كيشوفوه فين كيشوف.. وهو يبانلهم قدامهم الثلج كيتحرك فحال الا كيدفع بعضو.. كان منظر كيخوف وفنفس الوقت عندو جمالية خاااصة.. 

تيكا: هذا المد.. فاش كيبدا المد ديال لبحر كيبقى يدفع الثلج.. وكل طرف كيدفع خوه حتا كيبدا يتهرس.. ومع هنا الثلج رقيق.. دغيا كيتهرس.. 

براء :(عجبو المنظر) بففففف.. وااو.. بلحق كيتحرك بشوية.. ماشي بسرعة لي كتخلع

تيكا:اه.. ولكن ما تقدرش ضمن شنو يوقع.. كنضن من الأحسن نرجعو بحالنا

براء :انرجعو.. ولكن خاصني زوج دقائق 

تيكا:علاش

براء :(شاف قدامو بابتسامة تحدي) خليك حداها.. هانا راجع

تيكا:بلا ما تقرب حسن.. 

براء :غير خليك حداها

تالاسين :(شداتو) فاين ماشي! 

براء :هانا راجع.. خليك هنا

تالاسين :حمقتي ولا.. ما سمعتيهشي شني قال

براء :ما ايوقع والو.. ما تخافيش.. انقرب غير شوية وصافي

سكتات كتشوف فيه.. طلق منها وتمشى قدامهم بخطوات بطيئة.. عارف بلي ما خاصوش يزرب هنا.. حيث اذا فورصا على الثلج يقدر يتهرس.. قرب وهو مبهوووور بداك المنظر قدامو.. فعلا الكون فيه شي حاجات لي كتخليك تسبح لله لي صنعو.. الثلج كيتحرك وطبقة كتجي فوق ختها ودفعها حتا كتكحز وتهرس الطرف لي قدامها.. والتشققات كيكبرو شوية بشوية ويسرحو فالثلج.. وقف هو فمكان اختارو يكون آمن شوية ما قريييبش وماشي بعيد.. كافيه باش ياخد لقطات اتبقى فالبال.. ما يمكنش يجي حتا لهنا ويضيع الفرصة باش ياخد صور العمر.. وخلاها هي موراه حاطة يديها على قلبها وكدعي فخاطرها.. 

تالاسين :ما ايوقعلو والو ياك

تيكا:(تبسملها) ما تخافيش.. راجلك ايكون بيخير

شافت فيه.. ديك راجلك اول مرة اتسمعها وتحس بيها.. هاداك راه راجلها لي غادي قدامها وحاسة بقلبها ايخرج من بلاصتو بقوة ما كيضرب وهي عارفاه بلي رمى رجليه للخطر.. عينيها على رجليه ومتبعة الثلج لي قدامو كي كيتحرك.. وهو واقف فبلاصتو خدام خدمتو وعينيه على العدسة.. كانت حاااظية معاه حتا بانلها بلي الجليد لي واقف عليه بدا كيتشق والشقة جاية من جيهتو دليمن وغادية وكتقسم الثلج لي واقف عليه.. والطرف دالثلج الا تقسم ايبدا يعوم بوووحدو وسط الماء وما ايبقالو منين يرجع.. خرجو عينيها وغوتات غوتة وحدة بسميتو وتمات غادة كتجري جيهتو بلاااااا ما تفكر.. تيكا ما فهم والو زربات عليه وخلعاتو.. وبراء دار بالزربة على الغوتة ديالها مطفوج حتا كتبانلو جاية كتجري وشوية وهي تغبر وسط الثلج وهبطات لتحت.. خرجو عينيه.. عرفها طاحت وسط الماء.. قلبو تهههههز.. وجهو بيااااض بالخلعة كثر ما هو ابيض بالبرد.. تهز من بلاصتو بالزربة غادي جيهتها..وهو يتفرق الطرف لي واقف هو عليه.. نقز تنقيزة وحدة قبلما يبعد الطرف على خوه ومشا جيهتها كيجري والطريق جاتووو طوييييييلة.. هو جاي من جيهة وتيكا من جيهة.. بغى قلبو يسكت.. حس براسو عرااااق فوسط هاد الجو الباااارد.. غير وصل للحفرة لي طاحت فيها ولقاها كتضرب بيديها بشوية حيث جمدات بلبرووودة دالماء.. وبدات كتغرق واخة. كتعرف تعوم.. ولكن لبرودة. كتخلي الدم يجمد فعروقك والحركة. كتشللك.. خشا يديه بزوج وبالزربة جرها من كتافها وجرها عندو مطلعها.. وصل عليه تيكا وعاونو جرها.. 

تيكا:ما تحطهاش.. هزها نبعدو من هنا.. هاد لبلاصة تهرسات.. دغيا قبل ما تزيد تهرس.. 

تيكا كيهضر وهو عقلو ايخرج كيشوف فوجهها.. رجعات زرقااااااااء فحال الا فيها الموت... كلها كتصفك بين يديه.. جمعها بين يديه وخشاها فيه.. وهي بزز باش كتحرك.. حاسة بداتها جمدات.. وحتا طرف منها ما بقات كتحس بيه.. 

براء :تالاسين..كتسمعيني..شوفي فيا..

صدرات صوت انين وشفايفها كيشطحو وسنانها كيطقطقو.. حس بقلبو نغزو وديك النغزة ضراااااتو.. وجرها خشالها راسها وسط عنقو مزير عليها وهي كتقطر بالماء.. 

براء :اتكوني مزيانة

تيكا:دغيا.. خاصنا نبعدو

بعدو على المنطقة لي واقع فيها المد.. مهم وصلو لمنطقة امنة واخة مزالين قراب.. وهي الماء لي على حوايجها بدا كيجمد.. كيشوف فيها وكيفلي فوجهها وكل ساعة كيزيرها عندو.. وفلخر جلس وحطها فحجرو وزول عليه الجاكيط ديالو.. بقى بكبوط كان لابسو من لتحت سخووون بالكول.. قلعلها ديك الجاكيط لي لابسة هي ولواها فالجاكيط ديالو لي غطاتها مزيان.. اصلا هي جاكيط فحال شي مونطو.. كتجيه طويلة حد لفخاض.. لواها فيها مزيان.. وحيدلها الطربوش دارلها طربوشو.. وعنقها عندو وهو محروووووق عليها.. 

براء :(كينهج) ما ايوقعلك والو.. ما انخلي حتا حاجة توقعلك

تيكا:خاصنا نرجعوها للقبيلة دغيا.. 

حركلو راسو وناض وقف هازها.. وكيقول غير فوقاش يوصل.. والطريق كتبان قداااامو مجببببدة.. ندم كاع لاش جابها.. كون غير خلاها واخة تبكي ولا يبقى فيها الحال.. مهم ما يوقعلها والو...لي خاف منو ها هو وقع.. كيلوم فراسو ويعاود.. وكيخشيها فيه وهي مزيرة على التريكو ديالو ويديها ما بغاتش ترصى بقوة ما كترجف.. 

كان مزال صايك.. ومرة مرة كيرجع يحاول يعيطلها.. وهي ما كتجاوبش.. وما حدها ما كتجاوبوش وما حدو كيزيييييد يشعل كثر.. حس بالشمتة لثاني مرة.. واحساس الشمتة قبييييييح وما يحس بيه غير لي مجربو.. اخييييرا جاوباتو.. وتسمعات الو ديالها بصوت هادئ عكسو هو لي غادي يطرطق..

سعد:(بحدة) فيييينك!

بيسان:قريتيها؟

سعد:(تحت سنانو) وكتسولي؟؟ اااه قريتها.. وضرووووري خاصنا نتشاوفو..

بيسان:سعد..انا قلتلك.. كنتمنى تسمحلي.. 

تسمع صوت حداها خلاها تسكت:مدموازيل.. ميسيو فراس سالا الاجتماع يمكنلك دخلي.. 

سعد:فينك!!!!! 

بيسان:مهم.. خاصني نقطع.. وانعاود نطلب منك السماحة حيث داكشي لي عملت ما فرحاناشي بيه.. ويا ريييت تكون عدرتيني.. بسلامة

قطعات عليه وخلاتو كيشوف فتيلي بدهشة.. 

سعد:شنو ادير هادي! 

استرجع الهضرة لي سمع.. وعرفها اتكون مشات عند باها للشركة.. وتقريبا توقع علاش مشات عندو.. زفر.. وقلب الدورة غادي لعندها.. 

🍃🍃🍃🍃

كانت جالسة قدامو فالبيرو.. هو كيشوف فيها وكيتسناها تهضر ومركز معاها.. وهي كرهز عينيها تشوف فيه وترجع تهبطهم.. كتلعب بصبعانها وتسرط فريقها وما قداتش تخرج الهضرة.. 

فراس :(هز حاجبو) ما اتهضريش!! شنو واقع؟

بيسان:الصمت

فراس:شطنتيني ابيسان.. شنو كاين

هزات عينيها فيه مدمعين وخدات نفس طويييل حبسات فيه دموعها.. 

بيسان:بابا.. هانتينا.. انا باغة نقولك واحد الحاجة.. وسمعني حتا لخر

فراس:هضري.. هانا كنسمع.. 

بيسان:(حنات راسها كتشوف فصبعانها) ما عرفتشي كي انبدالك.. بلحق قبل كلشي بغيت نقولك ابابا تسمحلي.. (تنغنغ صوتها) عارفاك مور هادشي لي انقولك تقدر ما تبقاشي حتا تشوف فيا.. ولكن تيقني.. ندمت ابابا والله حتا ندمت اههئ اههئ 

فراس:(عقد حجبانو) كتبكي كاع ؟؟؟؟ شنو واقع هضري ابيسان.. بلا تبعكيك فالهضرة

بيسان:(جمعات راسها) واخة واخة.. هانا انقولك.. (سكتات شوية ورجعات كملات) براء وتالا بصح ما عندهم حتا ذنب فداكشي لي وقع! 

فراس:(قلب وجهو) هادشي لاش جاية.. هداك الموضوع تسد

فراس:(باهتمام) يعني؟؟؟ 

بيسان:هما ما تزوجوشي برضاهم.. هما بيدهم ما كانوشي عارفين بلي تزوجو.. حتا لداك النهار.. وما كدبوةشي عليك فحتا حاجة.. هما ما بيدهم والو.. 

فراس :بغيتي تقولي بلي شي حد اااااخور لي زوجهم بلا ما يعرفو؟ 

بيسان :اه

فراس :(ضحك بسخرية) اهاه.. وشكون هذا؟! 

بيسان:(سرطات ريقها) انا.. انا وعزيزة

عقد حجبانو فيها.. وسكت لوهلة كيستوعب.. طلعها وهبطها وهي مهبطة راسها ما قاداش تشوف فيه.. وقف وهي هزات راسها فيه.. دار وعينيه عليها بنظرة حاااادة.. وجلس قبالتها فالكرسي مخنزر... ونطق بنبرة قاصحة فحال الا كيزعف.. وباين فيه كاتم الغضب.. 

فراس:بداي من لول!! بغيت نفهم

بيسان :واخة.. بلحق عافاك ابابا.. فهمني!

فراس:هضري!

سكتات شوية.. خدات نفس طوييييل.. كتستعد باش تهضر وكترتب لكلام قبل ما تبدا..جاتها صعيييييبة كيفاش اتنطقها.. وهي عارفة باها.. واصلا شحال ما زوقاتها ديك الفعلة ما فيها ما يتزوق.. سرطات الريق.. وتوكلات على الله.. صافي ما بقالها فين ترجع.. الرمانة والبوم خاصها تفركع.. وبدات كتسرسبلو القصة من لول.. وهي فكل مرة كتهز عينيها فيه وتشوف شوووفتو ليها كتنزل من عينيها دمعة وتهبط راسها حشمااانة.. سالات.. وسكتات.. شافت فيه من تحت لتحت.. لقاتو كيشوووووف فيها شوفات دلقتييييلة.. عينيه نقطة دالدم.. وعروووقو بانو وهو مزير على فكو.. داك الشوفة قتلااااتها.. حنات راسها كتبكي فصمت وتمسح.. حتا سمعاتو نطق بصوت زعزعها..

فراس:علااااش؟؟؟؟

سكتات كتخمم وتعض على شفايفها.. اكيد ما تقدرش تقول حيث كنبغي سعد.. مستحيييييل.. راه باها هداك ماشي صاحبتها.. واختارت اسهل طريق بانتلها ولي تقدر تسلكها.. 

بيسان:(كتشهق) ععع.. عع.. على قبل براء.. هو.. اههئ اههئ هو كيبغيييها.. وما قدرتشي نشوف خاي كيتعذب اههئ اههئ ويانا ما.. 

سكتات على إثر الصفعة القوية لي جاتها للحنك شللاتولها.. زعزعلها راسها حتا حسات بالدوخة.. وحنات راسها شادة فحنكها ومغمضة عينيها.. زيرات على فمها حابسة البكية.. كانت متوقعاها.. ولكن جاتها قااااااصحة.. باها لي عمرو حتا غوت عليها ولا زعف.. اليوم ضربها.. بلحق ما تلومووووش.. سكتات وما نطقات بحتا حرف.. وهو ناض وقف كينهج.. ومع الوقفة مد يدو شدها من دراعها وقفها مززززززير عليها حتا توجعات..

فراس:هاكة ربيبيييتك.. هممم!!! هاكة عللمتك انا... ربيتك على لكذووووب ولفعايل!!! هااااا!! هضري😡..(مخضها بين يديه) واش نتي بنتي!!! نتي بنتي لي ربييييييت... نتي بنتي لي كببببببرت..

بيسان:صافي ابابا عافاك اههئ اههئ اههئ 

فراس :(عطاها للحنك لاخور بظهر يدو ودفعها جات جالسة) سكتييييييييييييي😡.. ما تحليييييييييش فمك.. ما تسمعينييييش صووووتك.. 

بيسان:بابا اههئ انهنههئ 

فراس:(خرج عينو فيها مححححممممر) ماشي باك انا.. سمعتيني.. ماشي بااااااك.. كون كنت بااااك اديريلي قيييييمة.. اتعبريني.. اتحتااارميني... ساعة نتي ستحمرتي فيناااا حتاااا شبعتي وجاية كطلبي السماااااحة وتقوليها بوجه حممممر.. خليتي فيها نتي شي بابا.. انا بنتي بااااااااااح صافي.. من اليوم ما بقاو عندي بناااااات.. 

بيسان:(خرجات عينيها) لا أبابا لا عافاك اههئ انههئ الا هادي عافاك.. ضربني سبني عمل فيا لي بغيتي اههئ اههئ الا هادي عافاك.. نبوسلك يديك

شدات يدو باغة تبوسها وهو ينترها منها باشمئزاز ورجع لور مبعد منها.. طلعها وهبطها بنظرة كأنه كيستحقرها بيها.. 

فراس :(بنبرة حسرة) تحرميات ولفعايل ولكذووووب.. هادو ماشي ديال بنتي لي ربيت انا..

هزات عينيها فيه بترجي.. وهما عااامرين دموع.. قتلها بهاد الهضرة وبديك الشوفة.. حسات براسها دبصح ما كتسوا واااالو.. ها هي خسرات حتا باها.. حنات عند رجليه هازة راسها فيه وعنقاتو من كرشو مزيرة عليه.. 

بيسان :عافاك ابابا سمحلي عافاك اههئ اههئ اههئ.. عافاك ما نقدرشي عليك انهنههئ اههئ عافاك ابابا

تنتر منها ورجع لور.. وبعد عليها ووقف عاطيها بالظهر كيشوف من الزاج لي كيطل على الشارع.. وخلاها هي حانية على ركابيها.. وبنبرة غااااااضبة.. نطق بلا ما يشوف فيها.. 

فراس:ما بغيتش باقي نشوفك.. تهزي من قدامي

بيسان:بابا انا.. 

هز يدو وهو عاطيها بالظهر بمعنى سكتي.. سرطاتها وسدات فمها ودموعها ملاقيين.. وقفات بزز ورجليها فشلانين عليها.. شافت فيه مطولا كتسناه يدور ويشوف فيها.. ولكن واااالو.. وفلخر دارت خارجة كتجري ودموعها كيتسابقو وخلياه هو موراها شاعل.. كرهات راسها.. كون لقات فهاد اللحظة تموت ولا هاد الحالة.. خارجة كتجري وما مسوقاش للعينين ديال الخدامة لي حاااضياها وكيتوشوشو عليها.. كتجري وتفكر هضرتو وتبكي وتشهق.. خرجات غادة جيهة الاوطو ديالها حتا كتشدها شي يد ودوراتها عندها بقوة.. 

🍃🍃🍃🍃

كانت اطول طريق بالنسبة ليه.. قد ما هي مجبدة وبعيدة قد ما كتزيييد تجبد فعينيه وهو كيشوف حالتها.. مكمشة فيه كي لقطوط.. كلها ساااردة وكتقرقب بين يديه.. فاتها زروقية ورجعات كلها بيضة.. سنانها صوتهم كيتسمعو عند وذنو.. كيشوف فيها وما لاقيلها جهد من غير يكمشها فيه ويجري ويزييييييد يجري.. ولهواء البارد كيجرحو فحلقو بقوة ما كينهج.. شاف فوجهها بأسى.. عزات عليها وقلبو ضرو عليها.. زاد علاها وحششالها راسها وسط عنقو حتا حس ببرودة وجهها بورشاتو.. زيرها عندو بقوة وعصرها فيه وهو مزير على فمو وعيااااا يحبس فدمعة ولكن نزلات بلا هواها وهو كيشوفها قربات تموت بين يديه.. يدفن راسو هنا موراها وما يكملش بلا بيها.. الموت ولا العيشة بلا بيها.. واخة دير فيه ما دارت.. كيبقى قلبو عندها وبين يديها..

دار عندو تيكا لي براسو مخلوع عليها.. وكل مرة كيشوف فيهم.. عزات عليه وعز عليه.. 

تيكا :ما بقاش بزاف.. قربنا

حركلو راسو بلا ما ما يهضر.. فين هو اللسان لي ينطق اصلا.. وكملو طريقهم.. حتا بداو يبانلهم الديور ديال لقبيلة.. وهي جمدااات بين يدو.. من بعيد صفر تيكا تصفيرة خاصة.. فحال الكود بيناتهم.. حيث باعتبارهم ساكنين وسط الذئاب والدببة فهما معرضين لبزاف دالمخاطر.. وهما غير سمعوها.. بدات مراة كبير لقبيلة كتوجد راسها.. حيث هي بمقام طبيبة ليهم.. وصلو ودخل بيها لبيتهم وحطها وبقى تيكا والباقي مشطونين برا.. والحكيمة قربات منها وحطات يديها على كوعها كتشوفلها النبض.. وهو فوق راسها جالس وعينو عليها

براء :(كينهج وعينيه خارجين) ما فيها والو ياك.. ياكي مزيانة

بقوة الخلعة لي فيه.. هضر معاها بالدارجة.. واصلا واخة كون هضرها بالانجليزية ما اتفهموش.. ولكن كان باين بلي خايف عليها وبزااااف.. نطقات بشي حاجة هو ما فهم فيها والو.. عرفاتو ما فهمهاش.. وعيطات لتيكا.. لي دخل كيجري.. هضرات معاه ودار شاف فبراء

تيكا:خرج خاصها تفحصها.. وما كتبغي حد يكون حداها..

براء :ما نخليهاش.. انبقى معاها

تيكا:ما عندك ما دير حداها.. هي اتكلف.. ما تخافش..

براء :ما نخليهاش..

تيكا :(قاطعو) غير كضيع الوقت.. خرج وخليها تشوف شغلها دغيا

شاف فيه ورجع شاف فيها هي بقلة حيلة.. زير على فمو وحنا عندها بايها من جبهتها بقوة ونطق بصوت خافت.. 

براء :كنبغييك.. رجعيلي عافاك.. 

ما سخاش ينوض من حداها.. وبزز باش ناض وهو غادي وكيشوف موراه.. خرج بحالو ووقف عند باب البيت.. هز راسو للسماء وخدا نفس طويييييييييل ودوز يدو على وجهو... 

براء :ياااااااااا ربي

جلس فالأرض فشلان.. وكى على ظهر البيت ويديه على ركابيه مسهوت.. غمض عينيه كيدعي فخاطرو.. والقهرة لي فيه ما عالم بيها غير الله.. ما كانش راد البال ولا مسوق للناس لي دايرين بيه وكيشوفو فيه.. حتا هز راسو وناض تهز َيقلب على الماء بحال لحمق.. وتيكا تابعو كيسولو مالو وهو مرفوووووع.. لقاه وحنا كيتوضى بيه بارد هكاك.. ما حسش ببرودتو قد ما حس بالعافية شاعلة فيه.. سالا لوضوء وبقى جالس كيرش وجهو بالماء ويعاود.. حوايجو فزكو عليه وهو والا على بالو.. وناض بعد شوية وقلب وجهو للقبلة وبدا كيصلي.. منو للثلج.. جبهتو كيحطها للارض كيحس بلبرودة وصلات لااااخر عرق فدماغو.. ولكن ما مسوقش.. كيدعي ويزييييد يدعي.. ويترجى الله يرجعهالو سالمة غانمة.. حتا كيسمع تيكا كيعيطلو يتكلم للحكيمة وتحى وسلم وناض كيجري دخل لعندها.. لقاها مبدلالها لحوايج ومكمشاها فلغطى وعلى جبهتها مدورة خرقة مطلية بشي عشوب.. وهي مزالة بيضة وكترجف.. وفمها ناااااااشف.. 

براء :(بلهفة) كيبقات؟؟ .. مزيانة؟؟.. فاقت.؟؟. 

هضر تيكا لي لحقو.. جاوباتو هي ودار كيترجملو وهي كتهضر.. 

تيكا :حالتها صعيبة.. بردات بزاااف وخَدينا وقت بزاف باش نوصلوها.. دارتلها عشوب خاصين بحالتها فراسها ورجليها.. وانتسناو من هنا حتا لليل ونشوفو شنو ايوقع.. الا ما جابش هاد العلاج نتيجة.. انظطرو نشوفو علاج اخر.. 

تنهد بحسرة.. وشاف فيها حاط يدو على فمو بحرقة.. رجع يدو مسح بيها على شعرو وشاف فتيكا.. 

براء :شمن علاج هذا؟ 

دار تيكا سول الحكيمة.. لي كتهضر بالثقاااالة وبصوت خافت.. شاف فيه تيكا متوتر شوية.. 

براء :شنو قالتلك!! شنو هاد العلاج

تيكا:اححم.. كتقول بلي الا ما طلعاتش حرارتها بلعشوب.. خاص راجلها يتصرف.. زعما نتا

براء :يعني!!

تيكا :يعني تحاول تخلي حرارتها تطلع بطريقة بين لمراة وراجلها...

تجرات من يديها.. ودورها حتا تقابلات مع وجهو.. حمراااء ووجهها كيقطر بالدموع.. وحاطة يديها على حنكها لي كيضرها.. غير جات عينيها فعينيه وهي تغوت كتنتر منو.. 

بيسان:رخي مني اههئ اههئ خليني عليك اههئ اههئ 

شاف فيها بنظرة قاصحة.. باغي يغوت عليها وفنفس الوقت شايف حالتها لي ما كتسمحش.. عقد حجبانو كيحقق فوجهها ويدو مزيرة على دراعها.. وهي كتنتر وتعفرت وتبكي.. شد يديها لي على حنكها كيزولهالها وهي مزييييرة ما بغاتش تحيدها.. 

بيسان :رخييييييي مني اههئ اههئ بععععععععد منيييييي انهنههئ 

ما تسوقلهاش وبقى شادها حتا زولهالها وشدها من ذقنها دورلها وجهها حتا جا حنكها قبالة عينيه.. كان حممممر وصباعو مطراسيين فيه.. وهي ما خلاتوش يكمل الشوفة ونترات وجهها من يديه.. وهزات يديها كضربو لصدرو ودفعو..

بيسان :شني كتشوف شنييييي اههئ اههئ كتشوف فاين وصلتيني انهنههئ.. بسبااااااابك انا هايدا.. بساااابك عملت هادشي كامل.. بسبااابك خسرت حياتي وخسرت عائلتي وخسرت بااااباااا اههئ اههئ.. خرجتي عليا.. خرجتي عليا اههئ اههئ

شدلها يديها لي كضربو بيها وقرب مخرج عينيه فيها بغضب.. 

سعد :نتي لي خرجتي على راسك وعليا.. وعلينا كاااااملين.. نتي لي وصلتي راااااسك لهاد الحالة.. نتييييييي..بيديك ما دارهالك حد

بيسان :اااااه ااااه.. انا لي عملتها نرااااسي بلحق هذا سبااااابي(نعتات لقلبها).. هو لي وصلني لهاد الحالة والذل لي يانا فيهم...كرههههتو وكرهتك وكرهت رااااااسي اههئ اههئ.. 

سعد:(بحسرة) كنت جاي نتحاسبو.. ساعة لي فيك يكفيك.. غير هادي تعلمك.. 

بيسان :اه اسيدي تشفاااااا.. زيدني نستاااااهل.. طلق مني عافاك.. ططططططلق اههئ اههئ ياك طلبت منك السماحة وقلتلك نددددمت حتا ندمات الشعرة اللخرة فراسي.. غير خليني عليك عافاك اههئ اههئ.. طلق مني اههئ اههئ 

سعد:بغيت غير نعرف شنو استفادتي دابا!! ما ربحتي لي باغة ما خليتي بلاصتك كما هي.. ديك الصورة ديال بيسان البنت الصغيرة لي كبرت انا وياها من الصغر..جيتي نتي وشوهتيييها فمرة.. يا خساااارة ابيسان.. كنتي عزيييييزة وغالية.. كنت حاطك فعيني.. 

بيسان :نتينا لي مزال ما باغي تفهم اههئ اههئ .. ديك البنت الصغيرة لي كنتي حاطها فعينيك كانت هي حاطاك فقلبهااااااا.. اههئ اههئ ديك البنت الصغيرة لي كنتي نتينا كتعزها هي كانت كتحمااااق عليك اههئ اههئ.. ديك البنت كبراااات وهي كتحلم غير بيك.. كبراااات ونتينا مزال كتشوفها صغيرة.. كبرااااات ولي فقلبها كبر ونتينا ما بغيتي تفهم اههئ اههئ

سعد:ماشي سبب يخليك ديري لي درتيه.. نتي فكرتي غير فراسك.. حتا خوتك وما فكرتييييش فيهم.. 

تنترات من يدو بقوة حتا كانت اطيح وشافت فيه بنظرة قاااصحة وعينيها عامرين دموع وحومر.. 

بيسان:هادشي عااارفاه.. وما محتجاكشي تقولولي.. غلطت وندمت وما نفعاتني ندامة.. بلحق ما بيدي ما نعمل دابا من غير نطلب السماحة وطلبتها.. كثر ما تسناهشي مني.. كما نتينا تأديتي انا تأديت كثثثثر منك وكثر من كلشي.. غلطت غلطة وكنتحاسب عليها و بالضوووبل.. 

سعد:نتي ضيعتي كلشي!! 

بيسان:اه ضيعت كلشي.. وعارفة راسي.. ولي بقى فيا هي انني ضيعتو على شي حاجة ما تستاهلش

شاف فيها هاز مناخرو.. فهمها معنات عليه.. سكت وحتا هي سكتات وغير العينين لي كيهضرو.. كان كيشوف فيها بغضب وفنفس الوقت بحسرة.. كما كانت راه ما دوزش معاها لقليل.. راهم ترباو بزوج.. وهادشي لي شفعلها عندو.. خنزرات فيه ومسحات دموعها بقوة وبعدات عليه.. 

بيسان :عافاك.. ما بقيتش باغة نشوفك.. بغيت نسى.. بععد مني الله يخليك.. كنرغبك.. بعد من طريقي الله يخليك

دازت فيه وتمشات للاوطو ديالها بالزربة.. وخلاتو هو واقف متبعلها العين.. معصب منها.. وفنفس الوقت عزات عليه.. زفر وقلب وجهو كيمسحو.. وتوجه لسيارتو ركب فيها وتحرك.. 

🍃🍃🍃🍃

تجمد فبلاصتو.. وما عرف باش ينطق.. فهم مقصودو وما عجبووووش.. شاف فيها مطولا بحسرة.. مجبدة عوود واحد.. ما كتحرك ما كتململ.. ولحمها بيض من الثلج لي فوق راسها.. رجع لور شوية وجلس.. دارت بيه الدنيا.. ما باغيش يتحط فداك الموقف.. حط راسو بين يديه.. وغمض عينو.. هز راسو ومسح على وجهو وتنهد.. وناض وقف وشاف فتيكا.. 

براء :قولها تعلمني باش ما كان.. انا انكون برا

هزلو تيكا راسو باه.. وخرج فحالو.. مشى لبلاصتو فين كان كيصلي.. ورجع كيكمل صلاتو.. ويدعي ربي يرجعهالو.. وما يحطوش بين نارين.. ووسط زوج خيارات واحد كفس من اخر.....

طال النهار.. هو كيصلي ويدعي.. ولقبيلة كاملة كتسناها تفيق.. والحكيمة معاها فالبيت مقابلاها بلعشوب ولكمادات.. طاح الليل.. ودخل هو مهموم ووجهو صفار.. مزال بنفس لحوايج ونفس التريكو لي فزك ونشف عليه.. كيخطو خطوة ويتنهد وحاس بصدرو مثقل عليه.. دخل عليهم لقا الحكيمة ججالسة عند رجليها ومعرياهوملها وكتدهنلها تحت رجليها.. تقدم حتا جلس عند راسها.. حط يدو على شعرها كيمررها ببطء وعينو كتفلي فيها.. هز راسو فالحكيمة بعينين باااين فيهم حزن.. وحزن كبييييييير.. وحووومر.. شافت فيه مطولا.. فهماتو.. وحركاتلو راسها بلا.. غمض عينيه وتنهد بأسى ورجع شاف فيها.. هبط يدو دوزها على حنكها.. لقاه بااااااارد.. وديك لبرودية قصحاتو فقلبو.. هز يديها لقاها جاامدة.. عينيه تغرغرو وهبط راسو حاط يديها على فمو وباسها بوسة قويييييية فيها..

هز راسو على إثر صوت الحكيمة لي كتمتم وتشوف فيه.. قوص حجبانو بعدم فهم وهي طبطبات على فخضو لي ثانيه قدامو وهزات راسها كتعيط لتيكا.. 

وقف عليهم تيكا.. لي كان قريب.. شاف فيهم براء وهما كيهضرو وكيتسناه يترجملو.. 

براء :شنو قالتلك!! 

تيكا: قالتلك لعشوب ما جابوش نتيجة.. وحرارتها مزالة منخافضة.. ونخافوها ضيع منا.. وهذا كيعني بلي من الاحسن تصرف نتا

حنا راسو وشاف فيها وسكت.. شنو يقول وشنو يدير.. يخليها ضيع منو؟؟؟ ما يقدرش حتا يفكر فيها.. ولكن فنفس الوقت ما يقدرش يقيسها بزز منها.. ما كيتخايلهاش.. عارفها اذا فاقت وعرفات اتكرهو كره لعمااااا وهي اصلا غير على سبة.. 

تيكا:حنا انخرجو.. واخة.. حتا لغذا فالصباح وتجي عندها امنا لكبيرة(الحكيمة) وتشوفها

سكت.. ما دار حتا حركة.. هو اصلا بالو ماشي معاه.. مسحاتلها الحكيمة جبهتها ووجها من دوك لعشوب ونقاتها مزيان.. وخرجات وخرج تيكا وخلاوه جالس كيشوف فيها قبالتو.. هي مراتو اه.. وتمنى هاد النهار من شحاااال اه.. ولكن ماشي هاكة.. ماششي وهي غااايبة.. باغيها تكون فايقة.. عارفة وحاسة.. واهم شيء مواااااافقة.. تنهد بحيرة.. تنهيييدة طوييييييلة.. شد يديها بين يديه بزووج وزير عليها.. حنا راسو باس جبهتها مغمض عينيه.. وهاكاك بقى ما هزش راسو ومخلي شفايفو على جبهتها.. 

براء :ما باغيش نخسرك.. ما باغيكش ضيعي من يدي.. ما نقدش نتخايل هاد الدنيا بلا بيك.. عافاك فيقي.. فيقي احبيبتي.. فيقي وتخاصمي معايا وغوتي ودابزي وديري لي بغيتي غير فيقي.. عافاك اتالا.. 

بعد راسو كيشوف وجهها ويديها مزالة بين يديه.. مزالة كما هي.. ما كتحركش.. حنا راسو مغمض عينيه.. وجلس شحااااال وهو كيشوف فيها وكيتسناها دير واخة غير حركة بسييييطة.. اي حركة تعطيه شي أمل ولو قلييييييل..ولكن خاب ظنو..

هز راسو.. وشاف فيها بحزم.. خاصو يقرر.. يا إما يختار يا إما يخسرها.. زير على فكو وخدا نفس طويييييل كأنه كياخذ جرعة من القوة باش يطبق قرارو..قرب كثر و هز يدو وحطها على السنسلة دلفراش لي مخشية فيه وهبطها بشوية.. طلعها وهبطها بعينيه ناعسة لا حول ولا قوة لها.. نفض راسو.. ما خاصوش يتراجع..ما خاصوش يضعاف قدامها.. خاصو يزطم على قلبو.. زاد كيزولها حوايجها ومع كل بياسة كيحس براسو كيضعااااف وغادي يتراجع.. ما باغيش..ما حاملش راسو.. حتا خلاها غير بديباردور وشورط.. كانت جميلة.. مثيرة.. ولكن هو ما حاس بوالو فهاد اللحظة.. ما قادش يشوف فيها بديك النظرة ديال الشهوة.. كون جاتو فنهار اخر اه.. كان تقدر تحرك فيه وتحرك فيه بزااااااااف كاع.. ولكن دابا.. لا.. ما حاس بوااااالو من غير قلبو لي ضاااارو وبزاااف.. تنهد وغطاها بغطا سخون.. ونتر حوايجو حتا هو.. وكيحاول يتعطل بحال الا كيتسنا شي معجزة توقع.. شي حاجة توقفو.. ولكن والو.. خلا راسو غير بشورط من لتحت.. كان البرد.. تجلس عليه وناض تخشى حداها.. قاس لحمو لحمها وبورشاتو بقوة ما باردة.. ضرو خاطرو وجرها عندو زيرها وخشاها وسط صدرو.. 

براء :(بأسى) سمحيلي.. عافاك سمحيلي

جمع عليهم لغطا.. تقلب جابها تحتو وطلع فوقها مكالي بيديه.. شاف فعينيها ناعسة ما كترمش.. خدودها لي كانو كيكونو حميمرين بويض ما فيهم لون.. هبط عينيه وشاف فشفايفها.. زووووورق.. زاااد تأزم كثر.. ياااااه شحال تسنا هاد اللحظة.. شحال هو وكيقول يا ريت.. وفاش تجي تجي هاكة؟؟؟ .. كاع احلامو لي كان بانيها معاها كتهدم وحدة مور وحدة.. خطط لاعترافو بحبو ليها وما صدقش كما هو مخططلو.. كان ناوي يتزوجو ولكن للقدر هضرة يااااخرا وتزوجو بطريقة لا هي على البال ولا على الخاطر.. كان كيتسنا نهار يركبلها الخاتم فيديها.. وركبولها ولكن ماشي كما تمنى.. واول قبلة ليهم.. اول لمسة.. او ليلة.. كان متخايلهم فشكل.. فجو ااااخر.. ولكن.. كالعادة حتا حاجة ما كتصدق كما باغيها والمكتاب ديما لاعب لعبتو معاه.. واحلامو الوردية كتلاشى وحدة مور وحدة.. ولكن فهادي.. حاس براسو عايش كابوس ماشي غير حلم وما تحققش.. 

قرب لشفايفها بشوية.. حاس بالقهرة وغصة مزيراه فصدرو.. وحط شفايفو عليهم.. وغمض عينيه.. حس ببرودتهم.. حط يدو على عنقها وباسها.. كيحاول ينفض كاع الافكار من بالو.. ما كانش مستمتع بالقبلة.. واخة ما ينكرش بلي حس بقلبو ايخرج من بلاصتو بقوة ما كيزدح.. باسها بوسة حنينة.. وفنفسو كانت ديك البوسة كترجي أنها تحس بيه وتفيق..ولو دير غير شي حركة بسيطة.. بوسة خفيفة وهز شفايفو عليها وشاف فوجهها.. ما تحركاتش.. زير على فكو.. تعصب وتنرفز.. حاس بضغط كبيييير وحمل ثقيل.. قرب يطرطق.. خدا نفس ورجع هبط وباسها عاود ولكن هاد المرة رخاااااااا ثقلو عليها وشدها من عنقها بزوج يدين مزير عليها.. وخدا شفايفها وسط فمو وباسها بقووووووة.. كان كيبوسها بقوة فحال الا باغيها تقصح وتفيق.. ما رخاش فمها من فمو حتا حس بشفايفها سخنو وسط فمو.. بعد عليها ونترلها الديباردور وهبطلها الشورط.. ما شافش فيها وما حققش فجسمها بتاتا.. دغيا غطاها بجسمو وهبط راسو كيبوسها فعنقها ويديه معنقاها عندو من خصرها ومزيرها.. وذاتو السخووونة متلاحمة مع ذاتها وهو مغطيها كلها وخاشيها تحت منو حتا ماا بقاتش تبانَ..

دخلات لبيتها ساكتة.. مصدومة.. تالفة.. وجاامدة.. جلسات على طرف الناموسية وسيناريو اليوم كيتعاود قدامها.. لقطة بلقطة.. كلمة بكلمة.. داز صباح طويييييل وخايب.. ولكن واخة هكاك حاسة برااااحة.. راحة هادي شحال ما حساتها.. حمل ثقييييل ونزاح من على كتافها.. ولكن شنو لي جاي؟؟.. شنو ايوقع من بعد!!!.. شنو كيتسناها.. 

هكاك بقات جالسة فبلاصتها.. ما بكات ما والو.. غير كتشوف فالحيط قدامها وساكتة.. حتا سمعات صوتو لي زعزعها من بلاصتها وناضت وقفات طافجة.. شافت فيه كان واقف فالباب مخننننزر.. طلعها وهبطها وهي ما كرهاتش تشق الارض وتسرطها..

فراس :(ببغضب) لحقيني

حدو قال هاد الكلمة وقلب وجهو هابط وما رجعش شافها.. سرطات ريقها وطلعات معاها الصهدة.. ومسحات يديها فحوايجها حيث عراااقولها.. تبعاتو كتخلف خلفة وترجع لور.. قلبها ناغزها ومقبوض عليها.. هبطات غادية. جيهة البيرو ديالو.. مع الدورة تلاقات برقية. وهنية وحسن وخوتها لي واقفين ما فاهمين والو.. اما حتا رؤيا ما كايناش وراها فخدمتها.. بغاو يوقفوها يسولوها شنو واقع.. ولكن ما عطاتهومش فرصة حتا كانت دفعات الباب ودخلات.. مع الدخلة كيبانلها باها واقف عاطيها بالظهر.. يديه فجيبو وكيشوف على برا.. شافت موراه كتبانلها زينب جالسة غير كتشوف بعينيها.. مزالة ما عارفة والو.. حنات راسها وتمات داخلة وهي تسمعو..

فراس :سدي الباب

هزات راسها فيه.. تنهدات ورجعات لور سداتها وهي كتشوفهم برا واقفين متلوفين ورجعات دخلات.. وشدات بلاصة قبالة جداتها لي كتسولها بعينيها وهي حناتهم كتشوف فصبعانها لي كتلعب بيهم.. 

السكوووووت.. هو ما دارش وهما ما تحركوش.. هو ما نطقش وحتا هما ما هضروووش.. وبزوجهم جالسين متوترين واخة زينب ما عارفة والو ولكن حسات بلي شي حاجة خايبة واقعة..

دار هو على غفلة.. شاف فيهم وحدة وحدة بنظرة كأنه مستحقرهم.. ما حاملش يشوف فيهم.. قلب وجهو وشاف فمو لي كتشوف فيه.. طلعها وهبطها.. وحط يديه على البيرو وهو واقف وتقابل معاها.. 

فراس :(بهدوء مع نبرة جافة) اليوم رجعتيني سنييييين لور.. كنتي جالسة نفس هاد الجلسة وكطلبي السماحة.. كتبكي وترغبي وعلى مااااا قلتي.. ندمتي.. ولكن اليوم عرفت بلي الشطاح عمرو ينسى هزة لكتف.. 

زينب:كيفاش!! ما فهمتش!!! 

فراس:(ضحك بسخرية) ههه ما فهمتيش.. شنو ما فهمتيش!! ما فهمتيش بلي حفيدتك خوات بيك.. ما فهمتيش بلي بنت ولدك تربية يديك فرشاتك وفرشات اللعبة لي لعبتيها نتي وهي.. فهمتي دابا ولا نزيد نشرح

ضربات الطم.. شداتها اللقوة.. خرجات عينيها وتصمكو وذنيها.. قلبات وجهها جيهة بيسان مصدومة فيها.. لقاتها كتشوف فيها بنظرة غريبة.. نظرة متأسفة وفنفس الوقت كتعاتبها بيها.. جمدات فبلاصتها بحال الا ضاربها الضو..

زير على فكو مصبر راسو.. وهو كيشوف فيهم بزوج بحسرة وفنفس الوقت بغضب كون لقى يطرطق فيهم.. 

فراس:لثاااااني مرة كتغدريني.. لثاني مرة.. ما كفاااكش راسك.. زدتيها معاك..(نعت لبيسان).. التخرويض كيمشيلك فالدم.. وواخة تعياي تبغي توبي ما يگرش فيك.. ترجعي ترجعي لطبيعتك...

شافت فيه والدموع فعينيها.. هادشي لي ما كانتش باغة.. هادشي لي ما توقعاتوش.. فكرات فولادو وما فكراتش فيه هو فاش يعرف.. وما فكراتش فراسها.. نزلات هضرتو عليها فحال السم.. سنييييين بقات باش رجعات ولدها فراس لي كانت خسراتو.. واليوم ها هو كيضيع من يديها مرة أخرى.. هزات عينيها فيه باغة تهضر وهو يسكتها بضربة على البيرو حتا قفزهم.. 

فراس :سكتيييييييي.. شششش.. ما تنطقيش.. دموعك وكذوبك خليهم عندك.. ما اينفعوش هاد المرة 😡.. ما باغيش نطول بزاااااف.. وما انعطيك لا نتي لا هي كثر من وقتكم.. حيث ما تستاهلوش.. حاجة وحدة انخسرها عليكم.. اتهزو حوايجكم والطيارة كتسناكم.. وما باغيش نرجع نشوف وجوهكم.. هزيها وسيري.. ياك بنتك هادي.. ايوا ديها.. وعلميها اصول الحرفة.. 

هزو راسهم فيه.. بجوجهم مبلقين عينيهم فيه.. صدمهم.. والدمعة وقفاتلهم فطرف العين.. وهو كيشوف فيهم وقبضتو مزيرة فوق البيرو..

🍃🍃🍃🍃

فوسط داك البرد.. وهو مخشي معاها فلفراش.. عنقها لصدرو العرقان.. وخشاها تحتو مكمشها فيه.. خشا راسو فعنقها وزيييييير عليها مزيااااااان.. نفسو سخووووونة كضرب فكتفها.. وقلبو كيضرب بالجههههد خلاه ينهج.. بلا ما يبعد عليها.. نطق حدا وذنيها بصوت ذااابل.. مقهوور.. محروق.. وفيه بحة..

براء :سمحيلي.. عافاك سمحيلي..

سكت حابس راسو ما يضعافش.. ما يبكيش.. ودور رجلو عليها وهو معنقها.. ولحمو لاصق على لحمها..

براء :اتفيقي.. اتحلي عينيك.. نتي اتعيشي.. اترجعيلي..

بعد عليها.. شاف فوجهها.. ذابل وسخفانة.. بعدلها الشعر على وجهها.. وقرب فمو لجبهتها وقبلها بحراااااارة حتا نزلات دمعة على خدها وساحت معاه..

براء :كنبغيك.. فيقي عافاك.. سمحيلي

رجع بعد عليها وناض تجلس عليه كيلبسها حوايجها.. وعينيه ما فرقاتش وجهها.. عطس عطسة قوية وتبعاتها ختها.. عرف راسو مرض.. ولكن اااخر همو هاد الساعة.. لبسها ولبس هو ورجع تخشا حداها وخشاها فيه.. حط يدو على جبهتها وبدا كيرتل ايات من القرأن الكريم.. كيقرا ويدعي..

هاكاك بات.. وهاكاك طلع عليه الصباح.. ناعس نفس النعسة.. ومزيرها عندو برجليه ويديه.. وكيقرا ويعاود ويعاااود.. ما عياش.. ما خاصوش يعيا.. كيتسنا غير فوقاش تحل عينيها.. ولكن مزالة على حالها..

سمع صوت تيكا فالباب.. تنهد وهز يدو على راسها.. بغى ينوض وهو يحس بيدو وجنبو لي كان ناعس عليه كامل مبنج.. تقصح.. تجلس عليه وهو كيطرطق فعنقو.. وجاوب تيكا بصوت مرهق..

براء :هانا جاي

تنهد وشاف فيها.. حنا باسها من خدها.. لقاه دافي على لي كان.. هز راسو وعينيه بان فيهم شوية دالامل.. ناض وقف.. لبس جاكيطتو وخرج لعندو.. لقاه واقف مع الحكيمة فالباب.. حناتلو راسها كتحية وخوالها الطريق ودخلات وهو تابعها بعينيه.. حتا حس بيد تحطات على كتفو.. دار لقاه تيكا..

تيكا :اتشافى.. دابا تشوف

براء :ان شاء الله.. شكرا

دخل.. وتبعو تيكا.. جلس قبالتها.. وهي كتفحص فيها..ومرزنة فكل حركة كديرها وبالثقااالة.. وهو متبع معاها وعااقد حجبانو باهتمام.. حتا هزات راسها فيه.. ورجعات شافت فتيكا كتهضر.. وقلبات وجهها جيهتو وابتسمات.. 

براء :شنو قالتلك؟

تيكا:قالتلك بلي حرارتها بدات تطلع.. والا بقات حرارتها كطلع بشوية بحال هاكة من هنا لغذا تقدر تفيق.. 

خدا نفس طوييييييل وتنهد بارتياح.. وتجلس معاوط وحط يدو على وجهو فوضعية دعاء وبدا كيشكر الله ويحمدو.. مسح على وجهو.. وشاف فيها مبسم.. وحنا باسها من جبهتها.. والفرحة عتد بدات تزورو.. 

تمتمات الحكيمة.. هز راسو فيها باستفهام كيلقاها كتهضر وتبسملو.. وحطات يديها على قلبها وهي كتهضر..رجع شاف فتيكا كيتسناه يشرحلو.. لقاه مقوص حجبانو باستغراب.. ورجع شاف فبراء.. 

تيكا:قالتلك.. كنتو بعاد.. ومن بعد هاد الليلة اتقربو.. نتا ما قدرتيش حيث كتبغيها.. ولكن هي قلبها حس بيك.. الجسد يقدر يموت.. ولكن القلب كيبقى عايش.. وحبك ليها اليوم نقذكم بزوج.. 

شاف فيها براء بدهشة.. صدماتو بهضرتها.. وبقى غير كيرمش.. وهي تبسمات وحطات يديها على ركبتو كطبطب عليه.. وشدات يديه ويديها.. وحطاتهم على بعضهم.. 

تيكا:كتقولك.. شدها.. وعمرك طلقها.. هي ليك ونتا ليها.. والبارح قلبك مْلَك قلبها

شاف فيها تالف.. وهي تبسماتلو.. زير على يد تالا لي وسط يديه.. ورجعلها الابتسامة.. قلب وجهو كيكح وعطس.. وحك نيفو..طلبات من تيكا يخرج وحطاتلها عشوب جداد تحت رجليها وتحت يديها وفجبهتها وتحت ركابيها.. جمعاتهوملها بطروفة دالثوب ورجعاتلها حوايجها وغطاتها.. وشدات مهراز صغير قدامها كدق فيه.. وهو غير كيشوف فيها.. دقاتو مزيااااان وخلطاتو فواحد لقريعة دلخشب صغيرة.. وحركاتو مزيان ومداتولو وفهماتو بيديها بلي يشربو على حساب صدرو.. شدو منها وهبط عليه.. جاه قبيييييح وخيب سيفتو بزز باش هبطو.. رجعلها القرعة وشكرها وهو كيمسح ففمو كاره المذاق لط ففمو.. شداتها منو وجمعات شغالاتها وناضت خارجة.. وغير خرجات دخل تيكا حطلو طبسيل فيه الماكلة وخرج..

شاف فداك الطبسيل وقلب وجهو شاف فيها.. وحط يدو على شعرها كيلعب فيه.. ومشا بالو مع كلام الحكيمة.. تبسم على هضرتها.. وهز يدها باسها.. فرحان حيث عرف بلي كاين أمل تشافى.. وعاد كلام الحكيمة لي خلا قلبو يفرح بلا هواه.. ولكن دغيا عقد حجبانو.. كيفاش عرفات!! كي دارت!!.. تعجب ورجع بالو للبارح.. 

كان فوق منها.. يديه مكالي بيهم فوق منها وفمو فعنقها وكيحك جسمو السخون على جسمها البارد.. كيفرق قبلات على دورة عنقها وتحت وذنيها وطالع مع وجهها.. شحال وهو غير فقبلاتو معاها من الفوق وحاكمها تحتو باش تسخن.. حس بذاتو كلها سخنات.. وكيزييييد يلصق فيها ويتحك معاها باش يوصلها ديك الحرارة.. قلبو كيزدح.. وعينيه مغمضين.. كانت بين يديه ولكن ما فرحانش.. كان كيقبلها ولكن ما قدرش يستمتع بحلاوة قبلاتو ليها.. حيث واخة عارف لي كيديرو خوفا عليها ولكن ما قادرش يسكت جانب فيه لي كيقولو بلي هادشي غلط.. وغلط كبييييييير.. هبط مع عنقها بقبلاتو البطيئة.. حتا قرب للشقة دصدرها وبغى ينزل اكثر وهو يوقف..هز راسو شاف فوجهها.. عنقها حمار بقبلاتو ليها.. وحنوكها حتا هما.. اما حتا فمها ما باسهاش فيه بزاف.. حيث شي حاجة كتجرو وتبعدو.. شاف فحالتها وهو مزال فوق منها.. شنو كيدير؟؟.. فين ايوصل؟؟.. فين غادي!!!!.. تنهد بحررررقة وغمض عينيه وحط جبهتو على جبهتها وانفاسو سخونة كضرب فيها..وقلبو كيضرب بقوة.. زير على فمو بقوة وحس بشي حاجة فزكات عينيه.. كانو زوج دمعات لي هبطو على وجهها كينقطو.. وبصوت مبحوح ونبرة منغنغة نطق.. 

براء :ما نقدرش.. ما نقدرش.. سمحيلي.. ما نقدرش.. (حط يدو على خدها وجبهتو مزالة على جبهتها) عافاك اتالاسين.. فيقي عافاك احبيبة.. ما نقدرش بلا بيك.. وما نقدرش نقيسك بلا خاطرك.. عافاك فيقي..

حط فمو على جبهتها وبقى كما هو.. وحاس بدموعو مزالين باغيين يهبطو.. وشحال من وحدة نزلات بلا شوارو.. تنهد بحرقة وخشا راسو فعنقها ودور يدو عليها معنقها وزير عليها بالجههههههد.. وكيحك رجليه مع رجليها باش تسخن ذاتهاَ..

تنهد وهو كينفض راسو من افكار البارح.. صافي خاصو ينسى ديك الليلة المشؤومة.. واخة عارفها عمرها تنسى.. ولكن ما باغيش يعقل عليها.. ما باغيش أول ليلة ليه معاها يتذكرها بهاد السوء.. حاول يركز غير على الحاجة لي تفرحو هاد الساعة.. وحقق فوجهها.. يديه كتلعب بصبعان يديها.. واليد الثانية فشعرها.. وسااااااارح وهااايم فيها.. حتا حس بصبعانها تحركو وسط يدو وهو يقفز فبلاصتو.. تجلس عليه كيشوف فيديها ويرجع يشوف فوجهها وابتسامة عريييضة بانت على وجهو.. 

🍃🍃🍃🍃

دخلات فلعشية.. كانت عاد راجعة من الخدمة.. دخلات مع باب الصالة.. وهي توقف متفاجئة.. كدور عينيها..هنية لي مجبدة فوق السداري وعينيها حووومر ووجهها ايطرطق.. وحسن لي جالس شاد راسو.. جهاد وجواد لي تالفين ما عرفو فيمن يشدو.. ورقية لي جالسة فوق كرسيها المتحرك وحاطة راسها بين يديها وكتديه وتجيبو وعقلها ايخرج.. 

رقية:وليداتي ترشوووو اربييييي.. واحد مور واحد .. ما بقاو لا لوالا لا توالا.. لا لي ولدتو لا لي ربيتو اههئ اههئ.. فيييينكم اولادي فينكم.. مشاااو لكبادي ديالي مشاااااو و ترزيت فيهم.. ترشوووو.. ترشوووو اربي ياااااا ربي اههئ اههئ 

تخلعات من ديك الحالة.. تقول داخلة للدار لجنازة.. ما فهمات حتا لعبة.. طيحات صاكها من يديها ودخلات كتسول شنو واقع ووجهها هرب منو الدم.. 

رؤيا :شني واقع!!! يما.. شني كاين.. عزيزة شني واقع!!! فهموني.. شني واقع؟؟ 

جواد:(قرب حط يدو على كتافها كيجلسها) الواليدة جلسي هو اللول.. 

رؤيا :شني كاين؟؟ 

جواد:جلسي بعدا الواليدة ونقولك

رؤيا :(تنترات منو) طلق مني.. شني كاااااين.. هضرو.. شني واقع؟؟؟ 

هنية:مشاااات بنتي مشااات اههئ اههئ.. 

رقية:مشا الغنضور وتبعاتو النوارة اههئ اههئ.. ولادي خواو عليا.. كون غير مت وما عشتش لهاد النهار.. كون غيييير مت اسيدي ياااا ربي

رؤيا :(تهز قلبها) علامن كتهضرو

جهاد:الواليدة جلسي

رؤيا :ما انجلسشيييييي.. هضر نتينا وياه.. شني كاين.. فاين هي ختكم؟؟؟ هاااا.. فاين هي بنتي!!! 

جواد:(سخط) بفففففففف..بنتك سيفطها باها لشي قنت هي وجدااااا.. هزاتها الطيارة ومااا عرفناه فين ايحطها.. 

بلقات عينيه فيه.. وجمدات فبلاصتها كترمش.. قلبها تهز وتحط.. غير سمعاتو قال هي وجدة فهمات لبلان.. اكيد عرف.. ما كاين حتا شي تفسير اخر من غير هذا.. تشللات فبلاصتها حتا بغات طيحلهم وهما يشدوها ولادها وجلسوها.. 

غير ولادها لي دارو بيها.. اما حتا لوخرين فبرااااسهم مكويين ومحروقين وخاصهم لي يواسيهم.. جلسات فبلاصتها فشلااانة.. يديها ما بقاتش كتهزها.. وولادها دايرين بيها وتحد حاني عند رجليها وواحد واقف فوق راسها.. وهي ما كتجاوب حد.. شمن لعنة هادي صابتهم.. ولادها واحد من مور واحد كيتسل من وسطهم.. مصيبة ونزلات على راسهم وفرتكاتلهم الشمل فمرة.. هما كيهضرو معاها وهي ما كتهضر ما كتكلم.. حتا تكون كتسمعهم ولا مسوقالهم.. 

وعلى غفلة شافت فجواد لي حاني عند رجليها بنظرة قاااصحة وفنفس الوقت عينيها مغرغرين..

رؤيا :فاين هو!!! 

جواد:الواليدة..نعلي الشيطان

رؤيا :قلتلكم فاين هو؟؟؟ 

جهاد:عافاك الواليدة.. خليه غير حتا يتهدن

رؤيا :فااااااين هو؟؟؟ 

جهاد :بفففففففف

تنترات منهم وناضت وقفات ما كتشوفش قدامها.. بغاو يتبعوها عرفوها ما اتشدش ليهم.. وخلاوها تمشي وجلسو بزوجهم كيسوطو ويشوفو فهاد الحالة لي هما فيها.. 

وصلات لباب البيرو ديالو ودفعات الباب بالجهد حتا تزدحات مع الحيط.. ودخلات كتنهج.. الضبابة نازلالها على عينيها.. حاسة برجليها بزز باش هازينها وفنفس الوقت باغة طرطق فيه.. 

مع الزدحة دالباب مع قلب وجهو هو لجيهتها من بعد ما كان جالس فوق الكرسي دبيروه.. حط رجل ثانيها على ركبتو وموكي راسو لور ومغمض عينيه وساقر.. خنزر فيها وقصح فيها الشوفة.. وهي كتشوف فيه ساااااخطة كثر منو.. وقفات حدا البيرو وضربات بيديها بزوج فوقو وعينيها فعينيه حووووومر ايطرطقو والدمعة على طرف عينيها... 

رؤيا :(بحدة) فاين ديتيلي بنتي؟؟؟ 

زفر ساخط.. وشاف فيها مخنزر.. ما عجباتوش نبرتها فالهضرة.. زير على القبضة ديالو وهضر تحت سنانو.. اصلا هو شاعل وما ناقصش لي يزيد عليه...

فراس:خرجي بحالك

رؤيا :(ضربات على البيرو وهي كتغوت) قلتلااااااك فاااين بنتي... فااااين صردتييييها هضر.. فاااين هي بنتييييييييي

خدا نفس طويييييييييل كاتم غضبو فيه.. وشاف فعينيها بغضب وعينيه جمرة وشااااعلة.. 

فراس:(بكلمات متقطعة) خرجي ارؤيا.. خرجي فحالك

رؤيا :(نزلو دموعهاه) وااااااا فاين ديتيلي بنتيييييييي اههئ اههئ بغييييييت بنتيييييي

نضرب على البيرو حتا تهز وهو مزال جالس وغوت فوجهها حتا قفزات... 

فراس:ما تغوتيييييييييييييش 😡... خرجي فحااااااالك..

رؤيا :(حمرات فيه) ما خارجااااااش.. جيبلي بنتي... بغيت بنتي.. جييييبلي بنتي

وقف متقابل معاها وبيناتهم البيرو.. هو مكالي فوقو بيديه وهي كذلك.. وبزوجهم ايطرطقو فبعضهم..

فراس:بنتك نسااايها.. محيها من بااالك.. ما بقات كتربطنا بيها حتا حاجة

رؤيا :بنتييييي هاديك سمعتيني.. الا نتينا ما بقاتشي رابطاك بيها شي حاجة انا هاديك راها كبدتي.. اتجييييبلي بنتي ولا ما اعجبك حااال افراس... فرقتيني على لول وجات نوبتها هي.. سكت المرة اللولة هاد المرة ما انسكتشي..

فراس: قلت لي عندي.. وسدينا

جلس فبلاصتو ورجع عطاها بالظهر مخنزر.. جر الكول ديال ااسوميج فكو على عنقو حيث تخنق.. وهي كتشوف فيه مزيرة على فمها ودموعها مسرسربين كيسيلو قطرة قطرة.. سكتات شحال كتشوف فيه وفلخر نطقات بصوت هادئ عكس العافية لي حارقاها فقلبها..

رؤيا :عرفتيها شني عملات ياك؟؟.. عرفتيها بلي هي ويماك لي مور زواج براء وتالاسين

مع كملات جملتها مع دار شاف فيها.. بنظرة مصدومة وفنفس الوقت كتخلع.. مخرج فيها عينيه.. وعنقو كيبري بلعرق.. طلعها وهبطها.. وحط قبضتو على البيرو وهو هاز راسو فيها مصغر عينيه..

فراس:كنتي عارفة؟؟

رؤيا :(بتحدي) اه كنت عارفة.. كنت عارفة وساكتة.. عارفة وخبيت عليك.. عارفة وما قلتلكشي.. شني اتعمل!!! اتنفيني حتا يانا.. اتجري عليا!!! جري عليا يله... شكتسنا..

زير على فكو بقوة حتا بانت العضمة ديالو خارجة.. عينيه جمرة.. وحجبانو تلاقاو ما بغاو يتفرقو.. وعروقو تنفخو لدرجة تحسببهم من بلاصتك.. شعل شعلة وحدة.. بغى يطرطق.. حس بكلشي شامتو.. وهو الحاجة الوحيدة لي كتعصبوووووو وما يقدرش يسرطها هي الشمتة ولا يكذب عليه شي حد... ما كيحملهااااااش.. اما هي فواقفة فمكانها.. دموعها سايلين وهي جامدة.. وعينيها كيشوفو فيه بتحدي.. وصدرها طالع هابط كتنهج..

فراس: من فوقاش! 

رؤيا :من شحااااال هادي.. صاااافي.. من شحااال هادي.. يله وريني شني اتعمل.. 

طلعها وهبطها بنظرة قبيحة.. قاصحة.. وشاف فعينيها وساااااااكت.. بحال الا كيقوليها ياااا خسااااارة.. طحتيلي من عيني.. ديك الشوفة واخة قصحااااتها وما حملاتوووش يشوف فيها هاكاك.. تنساتها.. لي هامها هي بنتها فهاد الساعة... وكلشي تعمات عليه.. 

فراس: كلكم طينة وحدة.. لكذوب كيمشيلكم فالدم

رؤيا : ونتينا من يوووم يومك ما كتسمع لحد.. ونتينا لي كتخليني نكذب عليك... على هادشي كذبت عليك يانا.. على هادشي بالذااااات ما قلتلكشي.. حيث خايفة على ولاادي.. خايفة على بنتي منك.. ولي خفت منو طحت فييييييه.. سكت وكمدتها حيث عارفاك وحافظاك.. وفكل مرة كتبثلي بلي نتينا هو نتينا وعممممرك تبدل.. 

شاف فيها مطولا ساكت وفلخر خسر عليها زوج كلمات... 

فراس :طحتي من عيني

شافت فيه بصدمة حاولات تخفيها.. قصحها بديك الكلمة.. واخة ما بغاتش تبين.. سرطاتها وسكتات.. وحاولات ما تسوقش ليه.. 

رؤيا :بغيت بنتي

فراس: بنتك سيفطتها تربى..

رؤيا :(دارت وقفات قدامو) قلتلك بغييييت بنتي.. واش ما كتحسشيييييي.. ما كيحرقكشي قلبك على ولااادك اههئ اههئ.. 

فراس:(وقف وشاف فيها بغضب) من الاحسن تحيدي من قدامي هاد الساعة.. حيث انا داااير بحساب العشرة لي بيناتنا وما باغيش نغلط فيك.. ماشي بحالك نتي لي ما درتيييش بحسابها وغذرتيني.. عااارفاني.. وعااارفة مزيااااااان بلي لكذوووووب عندي خط حمممممر.. واليوم نتي تعديتيه.. 

رؤيا :على ولاااادي ندوز فييييك وفغيرك.. ما فكرتيييشي فيا فاش صردتيها بلا خباري.. ما عملتيييشي حساب لحرقتي على بنتي اههئ اههئ.. ما عملتي حسااااب لحد.. وحتااااا يانا من هنا لفوق ما انفكر لا فيك لا فغيرك.. بغييييت ولادي والباقي ما سوقيييشي فيه انهنههئ اههئ نتينا ويمااااك خرجتو علينا... هي كتخروض فقنت ونتينا كتشتت فولادي فقنت.. هي بداااات ونتينا كتكمل.. اههئ اههئ بااااغييين تحمقوووني.. نخرج فالصباح نرجع ما نجبرشي بنتي.. ما نعرفشي حتاااااا فاين هي اههئ اههئ واش باغي تحمقني غير قوووول

شاف فيها مطولا.. من هضرتها كاملة عقل غير على ديك الجملة لولة لي قصحاااتو كثر حتا هو.. هز راسو وشاف فيها بنظرة معاتبة ونطق بنبرة هادئة.. 

فراس:دوزي فيا وفغيري!!! هذا ما نسوى عندك!! 

رؤيا :(بلا ما تفكر) ما بقى كيهمنييييي حد.. بغيت بنتي وبسسسس.. الا بنتي افراااااااس.. الا بيسان..براء سكت حيث كيبقى رااااجل.. قاد براااسو.. موالف عايش بوووحدو.. ولكن بنتي لااااااااا.. بنتي عمرها خرجات من تحت جنااااحي اههئ اههئ جيتي نتينا خديتيها مني.. بشمن حققققق.. شكون عطاهلك..

شاف فيها كأنه كيعاتبها بعينيه.. كلامها قصحو.. ولكن عذرها.. عارفها كتهضر غير من حرقتها.. ولكن مزال ما تسرطاتلو بلي خبات عليه حاجة فحال هادي.. كلشي رجع كيبانلو ظلام.. ويا حسرة هي اكثر وحدة عارفاه شحال كيمقت ويكره لكذوب.. حط يديه فجيابو.. طلعها وهبطها.. وداز فيها وخلاها واقفة مخرجة عينيها فبلاصتها.. ولكن قبل ما يزيد خطوة شداتو هي من دراعو حتا غرزات ضفارها فيه ووقفات قدامو كتنهج.. 

رؤيا :قلتلك بنتي.. جيبلي بنتي.. ولا قولي فاين هي؟ 

شدلها يديها وزولها وزير عليها وعينيه فعينيها قريب لوجهها.. 

فراس :وانا هضرت وساليت.. بنتك دارت الذنب تستاهل لعقوبة.. وما باغيش نزيد عليك حيث لي فيك يكفيك.. اما كون تحاسبت معاك على هاد الفعلة.. وما انديش عليك دابا.. وانحسب راسي ما سمعت واااالو من هاد الهضرة.. واندير بحساب حرقتك على بنتك.. 

رؤيا :(كتبكي) غير حاسبني.. حاسبني وصردني عند بنتي حتا يانا اههئ اههئ بغيت بنتي افراس حرام عليك

فراس:بنتك ما انرجعهاش دابا

داز فيها بغا يمشي وهي تشنق عليه من الكول مخرجة عينيها.. صعرات.. كتبكي وتغوت.. وشالها راجع لور وشعرها خرج منو.. 

رؤيا :اترجعهااااااا.. اترججعلي بنتي اههئ اههئ وا بغيت بنتي اعباااااااااد الله.. بغيت بنتيييييي.. اترجعلي بنتي ولا ما ايعجبك حااااااال انهنههئ اههئ

فراس:(زفر ساخط) رؤيا حيدي من قدامي حسن ليك

رؤيا :ما انزولللللللشيييي.. جيبلي بنتي.. جيبلي بنتي ولا انعمل شي مصيييييبة فراسي.. 

فراس: قلتلللللللك حييييدي من قداااامي

رؤيا :(زيرات عليه كثر كتغوت) واااااا بغييييت بنتيييي.. اننندمك.. سمعتيني.. جيبلي بنتي ولا اندددددددمك

غوت وهز يدو حتاااااا لسماء وبغا ينزل عليها.. يله قرب لوجهها وهو يزير يدو عندو.. وخرج عينيه فيها سااااااخط.. هو كان شاعل وزادت شعلاتو بهضرتها وغواتها.. وبلاااا الفعلة لي دارت وما بغاتش تهضملو.. وهي قطعات الحس مبرققة فيه عينيها ومغمضة عينيها كانت كتسنا الدقة..

🍃🍃🍃🍃

وصل الليل.. هي ما فاقت.. وهو مزال ما تحرك من حداها.. النهار وما طال وهو قانت حداها.. كينوض يصلي ويرجع.. والحكيمة مرة مرة كترجع طل عليها.. و

كان جالس.. قنديل شاعل حداهم.. وهو جالس حداها كيتسنا جواب من صحاب لبروجرام من بعد ما صردلهم رسالة بلي وقع.. سمع صوت أنين جاي من جيهتها.. ودار بالزربة لعندها.. واللهفة باينة فعينيه.. شافها كتحرك عينيها وحجبانها.. وقرب شد يديها وحط يدو على راسها..

براء :تالا.. حبيبة.. فقتي.. كتسمعيني.. حلي عينيك

حلات عينيها بشوية ورجعات سداتهم.. وكتحرك صبعانها بالثقااااالة.. وهو غير شافها فتحات عينيها وهو يتبسم حتاااا بان الصف دسنانو كااااامل وحنا باسها من جبهتها بقووووووووة خلاهالها مطبعة حمراء فجبهتها وبعد كيضحك.. 

براء :الحمدلله.. على سلامتك..

تالاسين :(لسان ثقيل) الما.. الما

براء :تشربي

غمضات عينيها وفتحاتهم كاجابة وهي كتحرك شفايفها الناشفين بشوية.. حاسة بحلقها نااااااشف وفمها لاصق بقوة لعطش.. هو بعد وعينيه ما فرقوهاش وجر الصاكادو كيجبد منو قرعة دالماء لي جايبين منهم بالزااايد هما وأكلات معلبة.. رجع قرب وهزلها راسها جلسها كيشربها بشوية وهي هبطات على النص فالقرعة بقوة لعطش لي فيها.. وبزز باش كتحرك راسها فشلانة.. رجع نعسها وشد يديها بين يديه.. 

براء :كي كتحسي براسك.. مزيانة دابا!! فيك البرد.. مزال فيك لعطش.. 

حركات راسها بلا بشوية.. لسانها ما مطوعهاش باش تهضر.. وبزز باش كتفتح عينيها.. وهو فوق راسها بغى يطير بالفرحة.. عاد ارتاح ورجعات فيه الروح.. 

براء :هانا جاي

تم نايض ورجع حنا وباسها من خدها وخلاها غير كتشوف.. ما عندها الجهد لا لي تهضر لا تحرك.. حدها شافت فيه.. بانلها كيضحك فوجهها ودوز يدو على شعرها بعدو على جبهتها بكفو.. 

براء :شكرا.. حيث رجعتيلي

تبسم وناض خرج.. وخلاها كترمشوتستعقل شنو وقع.. وبشوية بشوية بدات تفكر شنو وقعلها وكيفاش طاحت فالماء ومن بعد ما بقات عقلات على والو.. حتا تم داخل وموراه الحكيمة وتيكا.. لي داخلة وكتشوف فيها مبسمة.. 

براء :ها هي.. فاقت

جلس عند راسها فرحاااان.. وجلسات الحكيمة عند رجليها كتفحصها..وتيكا واقف.. وهي غير ساكتة وكتشوف بعينيها.. ما قادرة دير حتا حركة.. 

تيكا:على سلامتها

براء :(بفرحة) الله يسلمك

فحصاتها ورجعات لور.. هزات راسها فيه وفيها.. وشافت فبراء وابتسامة كتخليك ترتاااااحي مرسومة على وجهها.. حركاتلو راسها بمعنى بلي راها تحسنات.. وزولاتلها لعشوب من رجليها ودارتلها واحد جديد وجمعاتولها..وبدات تهضر.. 

تيكا:قالتلك.. بلي دابا فاتها الحال.. انزيدو نتبعولها العلاج شي ثلاث أيام أخرى باش تولي حسن.. واتعطيك واحد لعشوب تشربهم.. حتا تاكل وتسيفطهملها وشربهوملها.. والله يشافيها ويخليكم لبعضكم.. 

براء :(شاف فالحكيمة) شكرا بزاااااف

تبسمات.. وناضت جمعات شغلها وهزات راسها وخرجات.. وتبعها تيكا وخلاهم يرتاحو.. وهو جالس عند راسها مكالي بيديه لي كتلعب فشعره ويديها فيديه كيلعب بصبعانها.. وهي غير ساقرة وكتصنت على جنابها.. بحال شي مصرفقة.. مزالة تالفة.. 

براء : بغيتي تمشي وتخليني..

هزات عينيها ذبلانين فيه.. لقاتو مبسم وكيشرف فعينيها ويلعب بشعرها.. غير شافت فيه هبط لمستواها وقرب لوذنيها.. 

براء :بلحق انا ما نخليكش..

كانت فشلانة وزاد فشلها بكلامو.. غمضات عينيها وهي كتسمع همسو فوذنيها.. خلا قلبها يترعد.. بعد شوية وفتحات عينيها كتشوف فيه.. وهو عينيه كيوصلو شلااااا كلام وكلام.. سرطات الريق لي مزال ناشف.. وبصوت مبحوووح بزز باش خرجات وكيتسمع بصعوبة..

تالاسين :شحال وانا ناعسة؟

براء :من البارح..

تالاسين :شني وقعلي.. عاقلة على راسي طحت فالماء ومن موراها والو

براء :نساي عليك لي وقع.. المهم هو دابا فتحتي عينيك.. (سكت ورجع كمل) خلعتيني عليك..

سمع شي صوت على برا كيحنحن وهو لي قاطعهم.. عطاه الاذن باش يدخل.. كان تيكا لي جايب ليها الماكلة والدواء.. شكرو ورجع خرج وهو تقابل معاها..

براء :تجلسي تاكلي

تالاسين :ما قاداشي

براء :انا انوكلك.. غير خليك

هزلها راسها شوية بلفراش.. وتجلس قدامها مربع رجليه.. وبدا كيوكلها بشوية عليها.. كانت ماكلتها ثقيلة ومع المرض زاااادت ثقالت.. ما كتمضغ على ساعة.. وهو عااطيها الكانة والخاطر وغير كيشوف فيها ومبسم.. وهي كتدور فعينيها ما قاداش تشوف فيه.. 

وكلها.. شربها دواها.. وقادها فبلاصتها.. وتنهد وهو كيشوف فيها.. 

براء :علاش تحركتي من بلاصتك؟ علاش ما كتسمعيش الهضرة.. ياك قلتلك خليك واقفة حدا تيكا.. ديما ما كتسمعيليش الهضرة وما كتجيبيها غير فراسك.. كون دابا وقعاتلك شي حاجة.. شنو ندير انا؟ 

تالاسين:(حنحنات كتسرح صوتها) كان الثلج كيتشق.. كنتي اتغراق؟

براء :(صغر عينيه فيها) ولا غراقيت.. شنو!! خفتي عليا؟؟

تالاسين :(كدور فعينيها) خفت على راسي.. انبقى فهاد لخلا بوحدي

براء :غير على هادشي.. مأكدة!! 

تالاسين :(كتهرب) فيا النعاس

براء :(عاق بيها وخلاها بخاطرها) ما عييتيش من النعاس..

سكتات كتشوف فيه حيث بصح حاسة بجنابها ضارينها بالنعاس.. 

تالاسين :بغيت نصلي

براء :واخة.. انجيبلك تيممة صلي ونتي جالسة

ناض جابهالها.. عاونها جلسات شوية.. تيممات وبدا كتصلي ما فاتها.. ومشا هو كيشوف واش وصلاتو شي رسالة.. لقى الشبكة ضعييييفة.. وتيلي بدا يديشارجا.. جبد باطري وبرونشاه مع تيلي وخلاه كيتشارجا حتا تقاد الشبكة..وبقى جالس حاضيها وكيخمم.. وكيحمد الله وشكرو حيث ناضت على خير وبيخير.. حتا بدا كيتفوه.. عيااااا وبزاف.. مع ما نعسش ليلة كاااااملة.. غير سالات من صلاتها ناض هو كيقاد بلاصتو حداها وتجبد.. وهي كتشوف فيه وساقرة.. 

نعس حاط يدو تحت راسو وعينيه فالسقف.. تنهد.. عاد ارتاح ويقدر ينعس.. وفجأة دار يشوف جيهتها لقاها كتشوف فيه ومبسمة.. غير دار وهي تفزع وتوترات وبدات غير كترمش.. تبسم هو ابتسامة جانبية ودار على جنبو تقابل معاها.. 

براء :توحشتك

طلعات معاها واااحد التزنيكة.. خلات حنوكها يحمارو فلبلاصة.. ما عرفت تهز راسها ولا تحطو.. تلفها كاع.. وبقات غير جامدة فبلاصتها.. وبجوجهم عاطيين لبعضهم بلوجه ناعسين على جنابهم..

بقات غير جامدة فبلاصتها.. وبجوجهم عاطيين لبعضهم بلوجه ناعسين على جنابهم..

براء :توحشت نشوف عينيك مفتوحين.. توحشت نشوفك كترمشي.. توحشت نسمع صوتك.. توحشت نشوف حنوكك حومر بحال دابا.. (تنهد) ما تعاوديهاش.. قتليني وما تخلينيش نتخلع عليك بحال هاكة..

تالاسين : وعلاش انا طحت بخاطري

براء :نتي راسك قااصح وما كتسمعيش.. كيبانلي نربطك فهاد البيت ونتهنا.. ندمتيني لي جبتك معايا كاع

تالاسين :(عقدات حجبانها) حتا حد ما بزز عليك.. نتينا قلتي ما تجيشي بلا بيا.. شني انعملك.. بنادم كي عامل.. تربطني!!! بهيمة ديالك انا!!!

براء :(ضحك بعياء وبالثقااالة) هههه.. فليفلة ناضت عاود.. على سلامتك هههه

تالاسين :علاش نتينا كتخلي شي حد يمرض ولا يموت فخاطرو!!!

براء :خلي عليك الموت.. ما تجبديهش على فمك

تالاسين : راه كلنا انموتو شي نهار.. الموت علينا حق.. وانا ما كنخافشي من الموت

براء : بلحق انا كنخاف منها.. كنخاف منها تديك مني

تالاسين :عمر واحد انعيشوه.. وما عرفنا أجلنا فوقاش يتحد

براء :عرفتي شنو.. بدلي الموضوع حسن.. 

تالاسين :لي بغيتي.. (حكات عنقها) اووف.. عنقي ضارني.. 

براء :غير بالنعاس يمكن

تالاسين :لا ماشي .. حاسة بيه مضبور.. فحال الا كيوزوز

براء :(برق عينيه وسرط ريقو) احححم.. يمكن تجرح فاش طحتي ولا غير فحال هاكة.. مهم نعسي نتي وارتاحي.. 

تقلب على ظهرو كيشوف فالسقف.. والصهدة طلعات معاه.. فاش كيتفكر شنو دارلها.. الا عرفات اتنوض عليه لعجاجة وسط الثلج.. وهي استغربات من جوابو.. حيث زرب عليها.. وحسات بيه فحال الا كيهرب من شي حاجة.. رجعات نفضات دوك الافكار من بالها.. وغمضات عينيها باغة تنعس.. 

🍂🍂🍂🍂

زير على القبضة ديالو بقوة.. وجرها عندو.. وهي طلقات من كول قميجتو ومبلقة عينيها فيه مصدومة.. 

رؤيا :باغي ضربني!!!! 

فراس:(هز صبعو) ما دووووووريش بيا.. فرقيني هاد الساعة

تنتر من حداها وتم خارج.. وخلاها هي واقفة مرعودة فبلاصتها.. فشلو عليها رجليها وجات جالسة فوق الكرسي ديالو.. وترخات حاطة يديها على البيرو مربعاهم وجبهتها عليهم.. كتبكي وتعض على فمها باش ما تغوتش.. حاسة بقلبها كيتعصصصصصر.. حتا حسات بشي يدين عنقوها.. وهزات راسها فيه.. لقاتو حسن لي دمعتو واقفة فطرف عينيه.. غير شافتو وهي تلاح عليه معنقاه.. 

رؤيا :خدااااالي بنتي ابابا اههئ اههئ.. خدالي بنتي.. ولدك خداهالي اههئ اعنععععع اههئ 

حسن:(كيمسح على راسها) دابا ترجع.. غير خليه يتهدن.. راه معصب.. وهي غلطاااات ابنتي.. (زير على فمو بغضب) ولكن اللومة ماشي عليها.. اللومة على لي حرشااااتها.. كبرات وشرفات وفعايلها مزالين هما هما.. 

رؤيا :بغيت بنتي أبابا اههئ اههئ.. ما بغيت والو.. قولو يجيبهالي

حسن:صافي ابنتي.. سكتي من لبكى.. خليه يتهدن ونهضرو معاه.. لبكى ما عندو باش ينفعك.. هو باغي غير يربيها باش ما تعاوداشي.. وباش تحس بلي عملات

داز عليهم داك النهار كحل فالدار.. كلشي عاطيها لبكى ونحيط.. وكلها مقنت فشي قنت بوحدو وكيخمم.. حد ما كيهضر مع حد.. وحتا الماكلة كلشي قاطعها.. ما بقات عندهم گانة لحتا حاجة.. وكلشي مهموم وكطفكر فهاد لحريرة لي طاحو فيها.. 

🍂🍂🍂🍂

صباح عليها الصباح.. وناضت حلات عينيها كتكسل بشوية وجنابها ضارينها.. شافت حداها ما لقاتوش.. وناضت تجلسات حاسة براسها ثقييييل عليها.. وعينيها منفوخين.. وكلها مدكدكة..وغير كتكح.. حطات يديها على جناب الكول دالكبوط لي لابسة كتبعدو على عنقها.. حيث حاسة بالضبرة.. ومع دالصوف قنطها.. ناضت كتحرك بشوية وبالثقالة وبزز باش كتهز رجليها.. دفعات طوبة دالثلج قدام الباب سداتو باش ما يدخل حد.. حيث الباب اصلا صغيرة وحتا كيحنيو عاد كيدخلو منها.. وناضت جبدات حوايجها باش تبدل.. ومناديل معطرة تمسح بيهم حيث قنطات من راسها.. وطبعا ما تقدرش دوش دابا.. قلعات من الفوق وخلات حوايجها لتحت.. ما قدراتش تحيد كلشي فخطرة.. مسحات جنابها بدوك لمنادل.. وغير جات تدوزهم على عنقها وهي تحس بيه تشوط وكيضرها.. ومدات يديها جبدات مراية صغيرة جايباها معاها.. وحطاتها قبالة عنقها.. وهي تبهض.. تخلعات من شوفة عينيها.. عنقها وكتافها كللللللللهم طبايع زورق وحومر.. مزوقين تزواااااق.. ما فهمات والو شنو هادشي.. منين جاها.. هادو ماشي جراحي ديال طيحة.. وماشي قمشاااات.. تخلعات دبصح.. وهي كتشوف ذاتها كلها مزوقة.. 

تالاسين :اواعدي.. شني هادشي.. منين جاني.. هيييييييه اواعدي شني هاد لعجب.. 

سمعات صوتو عند الباب وهي تطيح لمراية من يديها مفافية.. كانت مخلوعة وزاد قفزها هو.. 

براء :تالا.. نقدر ندخل؟

تالاسين :لا.. خليك.. ما دخلشي دابا

براء :اوك

حطات ديك لمراية.. وبدات تلبس حوايجها.. نقات حالتها حتا من لتحت وبدلات حوايجها.. وهي عقلها مع هادشي لي شافت.. جاوها فحال شكل البوسات.. حيث ديجا طايحة فشي تصاور فحال هكاك.. ولكن منين ايجيوها.. وكتحاول تنفض هاد الفكرة من بالها ولكن وااالو.. غير هي لي لصقات فبالها وتشوش عقلها.. 

لبسات وسالات وجمعات روينتها.. وبعدات ديك الطوبية من الباب.. وهو يتم داخل.. كالعادة مبسم.. وعلاش ما يضحكش وهو كيشوفها ناضت صحة سلام الحمدلله... 

براء :صباح الخير 

تالاسين :(عاقداهم كتخمم) صباح النور

براء :كيصبحتي

تالاسين :الحمدلله..(حطات يديها على فمها كتسعل) واخة حاسة بذاتي كلها مدكدكة

براء :دابا يفوتك.. ضروري تحسي بشوية دلعيا

تالاسين :امممم 

براء :فطرتي؟

سولها واش فطرتي حيث كيفطرو بصندويتشات باردة ومغلفة جايبينها معاهم وعصائر معلبة.. وهي كتجاوبو بلا ما تشوف فيه.. وحانية راسها كتقاد فحوايجها.. 

تالاسين :مزال

براء: مالكي!!!! 

تالاسين :والو

براء :مأكدة؟؟؟

تالاسين :اه

براء :اوك.. وا فطري

تالاسين :واخة

هز حاجبو باستغراب فيها.. حس بيها ماشي هي هاديك.. جوابها ناقص.. وما شافتش فيه فمرة.. بلا حجبانها المعقودين ونبرتها لغريبة.. قال يمكن غير حيث عاد فاقت من النعاس.. وتم خارج مخليها براحتها.. ويشوف شغلو شوية حيث هادي يوماين ما ضرب فيه الضربة.. وعاد هما ما جايينش يتفيكو.. ضروري خاصو ما يعطي للناس لي مسيفطينهم..كلات هي علاش قدات.. وشربات من الدواء لي خلاتلها الحكيمة.. وصلات صلاتها.. وتكبطات مزياااااااان وخرجات يضربها لهواء شوية.. ومع خرجات مع دارو بيها من كل جهة فرحااانين بيها.. ما كتفهمش شنو كيقولو ولكن باااين المعنى وهي غير كتحرك فراسها وتبسم.. واخة كان مزال باين فيها لعيا.. ولي دازت من حداه كيشدها بالهضرة حتا وصلات حداه وهو عاطيها بالظهر وجالس مع تيكا.. لي كان كيهضر غير شافها وهو يسكت وهز راسو فيها مبسم.. لاحظ براء فين كيشوف ودار حتا هو.. وهي تبانلو واقفة موراه تبسمات لتيكا وشدات بلاصة حداهم.. 

تالاسين :السلام

براء :علاش خرجتي من بيتك.. مزال خاصك ترتاحي

تالاسين :تخنقت تما.. وحرقوني جنابي بالنعاس.. 

براء :واخة هكاك البرد ايفرعك

تالاسين :ما ايوقعلي والو

براء :هاد ما ايوقعلي والو حفظناها وديما كيوقع

تيكا :مرحبا بيك بيناتنا مرة أخرى.. خلعتينا عليك

تالاسين :(ابتسامة) شكرا

تيكا :دوزنا أسوء ساعات واسوء يوم.. وما تخايليش شحال خفنا عليك.. ولكن راجلك هو لي تخلع عليك كثر.. كون تشوفي حالتو كي كانت هههه

براء :الصمت 

تالاسين :(حشمات) شكرا.. وسمحولي شطنتكم معايا

تيكا: حنا درنا غير الواجب.. 

تالاسين :حتا تشكرلي الحكيمة بالنيابة عليا

تيكا:اكيد.. ههه ولكن لي خاصك تشكريه هو راجلك.. حيث هو لي قدر ينقذ حياتك ههه

تالاسين :(قوصات حجبانها) ما فهمتشي!!! 

براء خرجو عينيه فتيكا.. فحال الا كبيتي عليه سطل دالماء وسط ديك لبرودة.. تمرمق وبقى غير كيبرقق فبلاصتو.. 

براء :ما عندك ما تفهمي.. نوضي سيري للبيت.. نوضي ايجمع معاكي البرد

تالاسين :ما بغيتشي أبراء هاء!!! (شافت فتيكا) شني قصدتي.. واش حيث جرني من الحفرة!! 

براء :(وقف وشدها من دراعها) بلا هضرة بزاف.. نوضي للبيت

تالاسين :شعندك!! خليني كنهضر مع السيد.. شني فيها.. 

براء :ما عندك ما تفهمي.. سيري للبيت هانا جاي

تالاسين : ما بغيتشي ابراء

براء :رجعنا عاااود للعكوسات!!! 

زفرات وشافت فيه مطلعة حاجبها.. تنترات منو وتمات غادة للبيت.. دخلات وجلسات كتشوف قدامها وتعض فضفارها.. وكلام تيكا ورد فعلو هو خلاها تنوى وتبدا تضرب اخماس فاسداس..

جلسات فداك البيت كتخمم مع راسها.. ودوك لبراقع لي فيها زاااادو خلاوها تشك.. كتعض فضفارها وتغزز وفيفري برجليها ومعبسسسسة بالمعقول.. شنو دير ما دير!!! تيكا هو لي غادي يحلها هاد الفزورة.. ناضت رجعات خرجات.. حتا كيبانلها مزال جالس معاه فنفس لبلاصة.. وبقات واقفة كتشوف فيهم من لبعيييد وكتسنى حتا يخلالها لجو.. تقنتات فواحد لقنيت كطل حتا شافتو ناض من حداه وبقى تيكا جالس وغير غبر براء من قدامها ضرباتها بجرية لعندو حتا وقفات عليه.. 

تالاسين :تيكا.. 

تيكا :(هز راسو فيها) مدام!!!

تالاسين :(جلسات قبالتو) بغيت نسقسيك وجاوبني بصراحة

تيكا :وي مرحبا! 

تالاسين :شني وقع مني كنت مغيبة!! يعني كيفاش زعما براء نقذني!! واش قصدتي حيث خرجني من الحفرة ولا شي حاجة ياخرا!. 

تيكا :(بقى غير كيرمش) ااا.. انا.. ما عرفت..علاش ما تسوليش راجلك! 

تالاسين :لا.. انا بغيتك نتينا تقولي! 

تيكا :(حك شعرو) وا ما عرفت ههه.. مهم نقذك بطريقتو

تالاسين :كيفاش بطريقتو؟؟

تيكا:ههه راه كنحشم

تالاسين :علاش اتحشم.. علاش شني وقع؟؟ 

براء :انا انقولك شنو وقع

دارت وهزات راسها فيه.. لقاتو واقف عند راسها.. مع الدورة مع شدها من دراعها وتم غادي جارها لبيتهم وهي تابعاه وساكتة.. دخل وتبعاتو ووقفها قبالتو وششاف فيها بنظرة حادة.. 

براء :بغيتي تعرفي شنو وقع! 

تالاسين :(بحزم) اه.. بكلشي.. بالتفاصيل 

براء :اوك.. بلحق بشرط! 

تالاسين :لي هو؟ 

براء :تسمعيني حتا لخر.. بلااا ما تقاطعيني.. 

تالاسين :(ربعات يديها) اوك.. هانا كنسمع

خدا نفس طويييييل وهو كيشوف فيها.. قلب وجهو وزلو الطربوش من على راسو وبانو وذنيه حومر.. حرك يدو فوق شعرو وهبطها على وجهو حتا مسح بيها لحيتو..

براء :واخة.. هانتي سمعيني.. فاش طحتي فالحفرة وجبدتك.. بقينا شحااال عاد وصلنا لهنا.. الطريق كانت طويلة.. وفاش وصلنا وجات الحكيمة لقاتك بردااانة بزاف.. وبدات كداويك بلعشوب.. ما نكذبش عليك.. دوزت أطول نهار فحياتي.. لحد الساعة كنتفكر حالتك كيف كانت كيضرني قلبي

تالاسين :(تبسمات وهي كتسمعو بلا ما تحس) 

براء :ما علينا.. وصل لليل ونتي مزالة على نفس الحالة.. بينك وبين الموت خطوة.. وهنا الحكيمة شافت بلي لعشوب ما ايجيبوش نتيجة.. ولا تسنينا كثر نقدرو نخسروك.. 

سكت كيشوف فيها.. كي غادي يدير يقولهالها.. كي ايدير يوصلهالها بلاااا صداع.. هي غير نهار باسها فحنكها ودارتلو لوييييل.. ودابا شنو!! تنهد وقلب وجهو كيحك عنقو بتوتر.. وهي طلعات حاجبها كتسناه يكمل.. 

تالاسين :ايوا!! ومن بعد! 

براء :(تنهد وشاف فيها) ومن بعد جات نوبتي

تالاسين :(عقدات حجبانها) كيفاش جات نوبتك! 

قرب عندها وعينيه فعينيها.. هي غير شافتو كيقرب رخات يديها وتفافات فبلاصتها.. وصل حداها ما بينها وبينو غير شوية.. حط عينو وسط عينيها.. باغيها تقرا عينيه قبل ما تسمع كلامو.. 

براء :سمعيني.. يقدر لي اتسمعيه ما ايعجبكش.. ماشي يقدر.. انا مأكد.. ولكن تيقيني كنت مضطر وبزز مني.. ما كنتش قادر نشوفك كضيعي من بين يدي وما ندير والو

تالاسين :(بقلق) شني وقع ابراء؟؟ 

براء :(عقد حجبانو ودوز لسانو على شفايفو وساط) الحكيمة فاش حاولات معاك بلعشوب وشافت بلي ما ايعاونكش.. طلبات مني نتصرف معاك كما كيتصرف اي راجل.. (سكت) مع مراتو

سكتات كتشوف فيه.. صدرها كيطلع ويهبط بالزربة وعينيها كيدورو فبلاصتهم.. سرطات ريقها.. هي فهماتو.. ولكن ما بغاتش ثيق.. مزال كتقول يمكن فهمت غلط.. 

تالاسين :(كترجف) كيفاش زعما؟؟

شاف فيديها كترجف.. وشاف فيها بدات كتخلع.. زاد قرب وهي ترجع خطوة لور.. وقبل ما تزيد تبعد هز يديها وشدها بين يديه.. 

براء :سمعيني اتالا وفهميني..راه كانت حالتك صعيييبة وبزااف وانا راه.. 

تالاسين :(قطعاتو) كيفاش راجل ومراتو!!! 

براء :(زير على يديها) سمعيني.. 

تالاسين :(نترات يديها من يديه) قلتلك كيفاش زعما راجل ومراتو.. شني زعما!! 

براء :(تنهد) راجل ومراتو اتالا.. 

تالاسين :يعني! 

براء :(قلب وجهو) يعني نعس معاك

يتبع...