دخلو يديهم فيد بعضهم.. وكيشوفو فالدار.. الدار لي جراو عليهم منها.. حسات بقلبها كيضرب بالجهد.. فوق لقياس.. وزيرات على يديه وتخشات فيه بلا ما تحس.. بالنسبة ليها رجع هو داك الحيط العاااالي لي كيحميها.. لي بإرادتها او لا لا كتلقى راسها محتاجة ليه.. قلب وجهو شاف فيها وطمنها بعينيه وهمسلها..
براء :انا معاك
حدها تبسمات وشافت قدامها وهما داخلين للصالة ورؤيا وبيسان كيدورو بيهم تالفين مزالين ما ثيقو بلي هما لي رجعو..
رؤيا :عزيزة.. شوف شكون جا!
هزات راسها لي كانت خاشياه فالتلفازة.. وشافت فيهم.. تبهضات بحال لي سبقوها.. وهبطات النظاظر شافت فيهم من تحتهم باش تأكد عنداك تكون غير تخايلها ولا ما شافتش مزيان..
هنية:شكوون!! براء وتالاسين!!!
براء : عزيزة.. صافا؟؟
هنية: هههه
ناضت فرحانة وقبل ما تقرب قربو هما عندها كيسلمو عليها ويبوسولها راسها ويديها.. وحتا هي فرحتها ما كانتش قل من رؤيا وبيسان..
رؤيا :اجيو جلسو.. ارتاحو
جلس وجلسات حداه.. لاصقين فبعضهم ومزالين مشادين.. الشيء لي لاحظوه كلهم بدون استثناء..
رؤيا :قولولي.. شني وقع؟؟ علاش رجعتو
براء :شفتك كاع ما كنتي باغانا نرجعو يمكن ههه
رؤيا :بركة من لبسالة وهضر.. شني وقع؟ ياك ما وقعاتلكم شي حاجة تما؟
ضحك بسخرية وهو حاني راسو.. وهز راسو شاف فبيسان لي جالسة وضاربة الطم.. ولي عاد سرات معاها.. وبدات كتخمم فلي جاي عاود.. وكطقطف فصباعها وتحك يديها.. متوترة...
براء :بيسان!!!
بيسان :(بدهشة) هاااا.. نعام اخاي؟
براء :لباس عليك
بيسان :اااا.. اححم الحمد لله.. لاباس لاباس..
براء :ايوا مزيان.. الواليدة ما عارفاش فاش بغاني الواليد
رؤيا :هممم!! ااا.. هو دابا لي وقع... كيف شفتي اححم زعما
براء :(طلع حاجبو) الواليدة شنو واقع!!!
فراس:على السلامة!!!
هزو راسهم كلهم على صوتو.. واقف بعيد فباب الصالة بقندورتو فلكحل وكيشوف فيهم بنظرات غريبة.. وهما كيشوفو فيه.. ما عرفوه واش كيهضر من نيتو ولا طانز عليهم.. وتالاسين تخطف لون من وجهها وشداتها الرعادة.. وجاوبو براء بنبرة جافة..
براء :الله يسلمك
نقزو من مور فراس كيف لقرودة بلقنادر هازينهم حتا لفوق الركبة وببلاغي مبدلينلهم اللون..
جهاد/جواد:الخااااااااااااوة
طارو عليه عنقوه فبلاصتو وهو كيضحك ليهم ما بيدو والو.. حتا شاف جهاد مشى كيعنق فتالا ويرفس فيها وهو يبعد على جواد لي شانق عليه..
براء :طلق.. طلق اصاحبي واجي لا باغي غير التعناق عنقني انا
جهاد :هههه خليني توحشتها
جواد:حتا انا والله
ترمى عليها حتا هو باغي يعنق وهي غير كترمش وتضحك حتا جرهم براء وهما شادين معاهرضد ما بغاوش يفارقوها..
براء :طلقو منها... راه انكعا معاكم.. خليونا زوينين
جواد :وااااا قهرتونا غير نتا وباك لي مزوجين.. كتموتو بالغيرة
جهاد:هههه عقنا بيك المغيار
سكتات هي كدور فعينيها حشمانة فبلاصتها.. تخلطو عليها لعرارم.. لهضرة لي دايرة.. وفراس لي واقف كيراقب فصمت..
جواد:(عنق خوه) اجي الخاوة اجي.. غير عليا ونغير عليك حتا يحن الله 😒
سكت براء وتنهد وهز راسو بحزم فباه.. حيث ببساطة ما عندو لاش يحشم.. عكس تالا لي قربات تدخل فالسداري.. وقف وبغى يطلق يديها وهي تزير عليه وناضت وقفات معاه..
براء :(هاز مناخرو) الواليد.. لباس
فراس :(بهدوء) الحمدلله
حسن:(عاد داخل) هاااااا.. براء
براء :جدو..
حسن:هههه لغالي.. اجي عندي اجي
خداو بعضهم بالاحضان..واكيد حتا تالا ما سلماتش من حضنو.. ولكن هي كانت مرفوعة.. ما بالها مع حد.. غير لي عنقها كتعنقو... اما هي فربي لي عالم بيها وبالروينة لي عندها فعقلها...
بعد على جدو ووقف كيحنحن ويشوف فباه.. والباقي كيشوفو فيهم.. جو مكهرب بامتياز.. واخة فرحانين بيهم الا وأنهم حاسين بغرابة الموقف.. خصوصي وأنهم دابا عرفو لي كاين..
براء :قالولي بغيتينا.. نقدر نعرف فاش
فراس: ماشي انا لي بغيتكم
براء :(طلع حاجبو) وشكون
فراس :يما!!!
براء :(عقد حجبانو) مالها.. شنو وقعلها
فراس : (تنهد) عيات شوية.. وبغات تشوفكم
براء :(تخطف لونو) شنو وقعلها.. ما تخبعوش عليا.. فين هي اصلا.. علاش ماشي معاكم..
تنفض وتم غادي جيهة بيتها حتا حس بيديها لي مزالة شادة فيه.. دار شاف فيها حانية راسها وشاف فيديها... وجرها عندو وشاف فباه وداز فيه وقصد بيتها وهي موراه.. مخليين العينين تابعينهم..
دفع الباب ودخل مدرم.. عينيه كيقلبو غير عليها.. وهي يديها فيدو ورجليها كيتلاوحو موراه بقوة ما غادي بالزربة.. دخل وبانتلو جالسة والتسبيح فيديها.. هزات راسها فيه كتشوف فيهم مصغرة عينيها حيث الشوفة ما وضحالهاش..
رقية:شكون!!
مدات يديها للنظاظر لي بجنبها لبساتهم وهزات عينيها فيهم.. وهي تبسم ابتسامة عرييييضة بشفايفها الرقاق..
رقية: براء!!!! تالا!!!
شاف فيها وتنهد.. حمد الله حيث ما بيها والو.. قال اتكون واقعالها شي حاجة وهما ما بغاوش يقولولو.. قرب وهو مبم وجاس بجنبها وشد يديها باسها..
براء :لميمة!!! توحشتك
جراتو عندها عنقاتو.. قربات تبكي بالفرحة.. كتعنق فيه وتهضر وتبوس..
رقية :الغنضور ديالي وشحال توحشتك.. العزيز.. على سلااااامتك الغالي..كنت انموت اوليدي و بلا ما نشوفك اههئ اهئ
تالاسين :وي الحمد لله مهم غير نتينا مزيانة دابا ياك ما كيضرك والو؟
رقية:والو والو.. غير ئلبو عليا هاد الهضرة.. طلعولي فراسي هاد الاسئلة.. انوض نشطح باش تعرفوني مزيانة
براء :الله يطولنا فعمرك..
رقية:(شافت فيهم مبسمة بخبث) راه ما نموت حتا نشوف ولادكم.. غير تهناو ههه (هزات يديها كدعي) يا ربي ما تحنتنيشاي وكتبلي نشوف ولادهم ياااا ربي.. ونتوما طلئو راسكم دغيا
صفارت وخضارت وحمارت وكاااع الوان الطيف دازو على وجهها.. وتزيرات فبلاصتها.. وهو شاف فيها بنص عين.. لقاها غارفة فحوايجها ما كتهزش فيه العين.. وحيث عاارف لي كاين.. وعااارف حساسيتها من هاد المواضيع.. ما بغاش يحكر.. وقلب الموضوع..
شافت فيه مطولا وساطت وخرجات ما عجبهاش الحال وهو دار عاقد حجبانو وكيشوف قدامو ويتأفأف...
رقية:ما بغيتيش على ئبل باك ياك
براء :نتوما عارفين لي واقع.. وكلشي داز على عينيكم.. وشفتوه كيف جرا علينا.. ومزال لحد الساعة ما باغيش يتيقنا.. وبغيتيني نمششي نتغذا معاه على طبلة وحدة بحال الا ما واقع والو.. وا لهبال هذا.. شفتي كون ما سيفط مورانا من طرف الدنيا باش نجيو كاع ما نزطمها هنا.. حيث عااارفو ما ايعيطليش نجي غير هكاك.. منين عيط الا وواقعة شي حاجة.. وحتا دابا هانا جيت وشفتك.. وانرجع بحالي.. ونتي الا بغيتي الميمة كنقولها ونعاودها.. داري راها دارك.. اجي وجلسي معانا
فراس :لميمة ما عندها فين تمشي.. هادي هي دارها
هزو راسهم فيه.. بدل قندورتو ولبس ملابس بيتية مريحة.. وواقف نافخ صدرو وهاز مناخرو.. وحاط عينو على براء لي هز عينو فيه وشاف فيه بتحدي..
براء : هادي دارها.. وهاديك دارها... وفين ما ارتاحت مرحبا
سكت كيشوف فيه.. وبيناتهم نظرات تحدي وعتاب.. وجو مكهرب سيطر على كاع لي جالسين..
فراس :تبعني نتا ومراتك للبيرو..
براء :(طلع حاجبو) فاش باغيني انا ومراتي
فراس :تبعني و اتعرف.. (سكت وكمل) هانا سبقتكم
خرج وخلاهم كيشوفو بدهشة.. وبراء عاقد حجبانو ما عاجبو حال.. زفر وناض وقف ودار شاف فرقية..
قلب وجهو كيسوط ويمسح على وجهو ويجمع لكلام فعقلو.. حيث ماشي ساهلة من مور لي دار يجي ويهبط كواريه دقة وحدة ويطلب منهم السماحة.. رؤيا اذا كان طلبها منها فحيث مراتو حبيبتو شريكتو.. هادشي تزاوجوه من زماااان.. ولكن هادوك راهم ولادو.. ماشي نفس الشيء....
فراس :واخة.. باش نفهمكم.. انا عرفت قصة زواجكم.. وبلي ما كان عندكم حتا دخل فيها...
براء :وشنو الجديد.. ياك قلناهلك قبل وعاودناها..
فراس :لي وقع دابا هو ان لي زوجكم ودار لي دار معاكم.. عرفتو.. وبفمو اعتارف بشنو دار
تالاسين :😳...
براء :(تبسم بسخرية) قلتهالك.. كون بغيتي تعرفو اتعرفو.. نتا ليماكنتيش باغي تقلب عليه اصلا
فراس :ما قلبتش عليه.. هو جا عندي
براء :(قوص حجبانو) شكون؟!
فراس :(بعد صمت) ختك.. وجداتك.. زينب
براء :(بدهشة) كيفاش!! بيسان و جدا!؟
تالاسين :(بصدمة) ماشي بصح.. بيسان ما تعملاشي
فراس :(تنهد) للاسف دارتها.. ولي عطا الله عطاه
ضرباتهم اللقوة.. وبقاو غير كيشوفو.. تبهضو بهضة من داكشي.. ااااااخر شخصين كانو يطيحو فبالهم.. خاااصة بيسان.. فراس كيهضر ويشرح القضية وكيفاش وقعات وكيعاودلهم شنو طرا فغيابهم وهما مبنجين فبلاصتهم.. ليهم وذن تسمع ما ليهم فم يدوي..
حسات بيديها كيرجفو وذاتها كتغزل.. حسات بيهم استغلوها ولعبو عليها.. وهما اصلا داكشي لي دارو.. شحال ماكانت نيتهم حسنة ولكن الطريقة كانت قبييييحة.. عمرها تنسى داك النهار شحال بكات.. ولا لي وقعلها مور داكشي.. ولا الاهانة لي حسات بيها واخة ما ليها يد فحتا حاجة.. وهو واخة كان كيتمناها ولكن ما عجبوووش الحال.. لعبو بيهم كيف بغاو وداروهم ضحكة وخلاو كلشي يشوف فيهم شوفة ناااااقصة.. ما بغااتش تسرطلو لا هو لا هي... خاصة أنها من اقرب الناس.. هزات عينيها شافت فيه.. وجات عينو فعينيها وهي كتجري بدموع القهرة.. تفرح حيث بانت براءتهم ولا تبكي حيث الدقة جاتها من الجهة لي ما نواتهاش منها..
شاف فيها مطولا.. وزير على فمو والقبضة ديدو ودار خارج كيسوط حتا وقفو صوت باه..
فراس :ما تقربلهاش.. حتا هي خدات حقها
زفر وكمل طريقو خارج قاصدهم وتبعو باه.. حتا وقف ورجع شاف فيها هي لي واقفة فبلاصتها جااااامدة وكتشوف فنقطة وحدة.. تنهد وقرب جيهتها وعنقها عندو وباس راسها وهي تشهق بين يدو وحطات يديها على فمها مزااالة ما قادة تيق.. طبطب عليها ورجع قلب الدورة للباب يمشي يلحقو.. وخلاها هي مزالة واقفة فبلاصتها...
🍃🍃🍃🍃🍃
وقف عليهم بلاااا بسم الله.. كانو جالسين فالصالة مزالين كيتسناوهم يجيو يتغذاو.. غير دخل حط عينو عليهم بزوج.. وهما غير شافوه هكاك عرفو القضية شنو فيها وبقاو غير كيدورو فعينيهم..
بيسان :خخخ.. خاي.. هانا انفهمك غير..
براء :(بحدة) شنو اتفهميني شنو.. اتفهميني بلي لعبتو علينا نتي وياها.. درتونا ضحكة.. خليتو كلشي يلومنا على شي حاجة حنا ما لينا يد فيها ونتوما سااااااكتين وكتشوفو
براء :(قاطعها) اسيييييدي ما تفكرييييش.. خليوني مني لراسي... كون فكرتي كااااع ما ديري لي درتيه... واش عاارفة فاش حطيتينا ولا لا.. عااارفة شنو دوزنا ولا لا... خليكم مني انا... واش عااارفين شنو داز على ديك البنت.. عجبكم الحال ونتوما كتشوفوها كتمحن.. ونتي.. ونتي اللي دايرة فيها الاخت العزيزة.. ما بقاتش فيك.. ما عزاتش عليك.. ما فكرتيش فيها..
بيسان:(كتشهق) انا قلت هي اتكون معاك فرحانة..
براء :(غوت) شكوووون قالهااالك.. واش بزز.. وا السيدة ما بغاااتنيييييش.. كتفهموووها.. ماااا بغاااتنييييش
شهقات هي.. وهي واقفة لاصقة فالحيط وكطل عليهم من بعيد.. كتبكي وما قدوها دموع..
رؤيا :ولدي.. تهدن.. سمعهم بعدا
براء :الواليدة نتي ما دخليييش.. خليني مني ليهم.. حتا حد ما شغلو
فراس: (غير ساكت وكيشوف مخليه يخرج غضبو)
بيسان :غلطنا اخاي.. عارفة.. وشني ما عملت عمري ما نسمح لراسي اههئ اههئ
براء :فكرتو فكلشي زعما.. ما عندي ما نسالكم.. حبكتووووها.. على شوية ونشك فراسي زعما برافو والله.. (صفق عليهم) شابو..
زينب : كنا غير باغيين نشوفوكوم فرحانين اههئ اههئ
براء :فرحانين؟؟ من نيتك.. شوفي فيا.. كنبانلك فرحان.. سيري شوفيها هي واش كتبان عليها الفرحة.. سيري.. البنت نهار عرفات راسها مزوجة بيا بكاااات الدم سمعتيني.. ديك البنت كتسنا دوك العامين لي فلاكط يدوزو دغيا باش تفك مني.. وريني فين هي هاد الفرحة لي كتهضري عليها..
كتسمع هضرتو وقلبها كيتحرق.. كتفكر ما داز عليها وما وقعلها.. وشنو قالتلو وشنو دارت.. وكااااع ما طرا من نهار وقع لي وقع وكتزيييد تقهر كثر وكثر.. وحسات براسها فوسط دواااامة من الافكار والأحاسيس والرويييينة الكحلة.. ما بقات عارفة راسها من رجليها.. وكلامو خلاها تفكر.. واش بصح هي مزالة كتسنا العامين يتسالاو!!!!
عطاهم بالظهر كيمسح على راسو بعصبية وكيمشي ويجي وكيسوووط.. بغى يطرطق.. حتا بانتلو من بعييييد مقنتة وكتخنصص ويديها على فمها.. وقلب وجهو ما باغيش يشوفها.. ورجع شاف فيهم..
براء :مزال لحد الساعة ما متيقش بلي نتوما لي درتوها.. (ضحك بسخرية) التمسكييين.. زعما مظلومين.. ونتوما فعايلكم فعايل الشياطين
فراس :(بحدة) برااااااء.. بركة
براء :(دار شاف فيه) نتا بالذااااات الواليد ما تهضرش.. ما عندكش الحق تلووومني.. وما انخليييكش.. حيث نتااااا لول عطيتينا بظهرك وما تيقتيناش.. وكلشي غير على قبل مبادئك... اما اناااااااا راه تظلمت هنايا.. تظلمت انا وديك البنت.. لي قدااامك عطيتيه طرشة وجريتي علييييه.. الا نتا نسيتي انا ما نسيتش.. وما تسنانيش نعذر شي حد حيث حتا حد ما عذرني انا
فراس :(سكت كيزفر.. شنو ايقول وهو سكتو.. وكل كلامو صحيح..)
براء :ولكن نتا لقيتي كيفاش تعاقب كل واحد بطريقتك.. وانا حاجة وحدة لي بغيتها منهم.. ما يعاودوش يطوفو بساحتي.. خليتيها نتا.. كما ما بقالك ولد سميتو براء .. حتا هما ما بقالهم لا اخ لا حفيد سميتو براء
قلب الدورة خارج بحالو كينهج.. وخلاهم هما كيقطرو عشرة من العين.. حتا شدو فراس من دراعو وشاف فبه بالجنب عاقد حجبانو...
فراس :مزال ما ساليت هضرتي معاك.. غوتي وقلتي لي عندك.. حتا انا مزال عندي ما يتقال..
براء :حيث حتا حد ما بقى كيوقرني.. ونتا لول تبريتي مني.. ماشي انا
فراس :(زفر وخدا نفس باش يتهدن) ما انلومكش حيث عارفك معصب.. ودابا اتجي معايا لبرا.. تهدن ونهضرو.. راجل لراجل
براء :الصمت
فراس :كون كتسمع.. وبرد واجي نخرجو و نهضرو
براء :(شاف فيه بتحدي ونطق) انخرج ماشي حيث قلتيها.. انخرج حيث انا ماشي بحالك.. ما كنخليش الهضرة فنص ونفهم غييير لي بغيت
نتر دراعو وخرج بحال ما كيشوفش قدامو.. تنهد فراس وتبعو.. وخلاوهم هما ما عارفين فين يشدو.. مرونة على كل جهة وطريق.. حتا كيقولو تفكات وترجع تكفس..وداك لغذا بقاااااا تما ما كاين لي ياكلو..
نفس الموال.. ونفس المنظر.. ونفس الحالة.. شي كيشوف فشي بقلة حيلة.. وهما ساكتين وكيبكيو باش يبردو على قلبهم.. اما الباقي فما عليهم غير يشوفو ويسكتو.. حيث الهضرة بزاااف والسكات حسن.. عياو يواسيو ويهدنو.. ونفس السينتة كدور.. تنهدات رؤيا بتعب وقربات من بنتها وعنقاتها عندها كطبطب عليها فصمت..
أما هي فكانت فبلاصتها واقفة وكتشوف فيهم من بعيد.. ما عرفات ما دير فهاد اللحظة.. الصدمة سرطاتلها اللسان.. هو هضر وغوت وخرج لي عندو.. وهي ما بقالهاش اللسان لي ينطق.. تهزات عين بيسان فيها على غفلة.. وجات عينيهم فعين بعضهم.. شافو فبعضهم مطولا.. كانت كتوصلها شحاااال من كلمة غير بعينيها.. ما طولاتش بزاف وقلبات وجهها طالعة بحالها.. ووقفها صوتها..
بيسان :تالاسين اههئ اههئ ختي.. سمعيني عافاك
وقفات فبلاصتها كتشوف قدامها وتبكي.. خدات نفس طويل باش تحبس الشهقة وتقدر تنطق وهي مزالة عاطياها بالظهر..
تالاسين :(بقهرة) ماشي ختك.. لخوت ما كيضربوشي فالظهر
بيسان :انهنههئ اههئ لا اختي عافاك.. ما تقولشي هايدا اههئ .. نتينا ختي
ما زادتش سمعات شنو قالت وضرباتها بجرية وحدة لبيتها كتشهق و دموعها غالبينها.. وتبعاتها بيسان كتجري حتا شداتها رؤيا..
تالاسين :(هزات رسها من حضنها) هي ما حسباتنشي ختها.. كون كنت بصح ختها ما تعمشي فيا هاشي.. هي فكرات غير فخاها لي من دمها ولحمها.. وما فكرتشي فيا انا اههئ اههئ حيث انا ماشي ختها دبصح..
رؤيا:(حطات وجهها بين يديها) ما تقولشي هايدا ابنتي اههئ اهئ..
تالاسين :واش كذبت!!! (شهقات) اههئ خاها لي بصح خاها فكرات فيه.. عز عليها.. هزاتلو الهم.. وانا.. انا ااااااخر همها.. اههئ اههئ شافتني كيفاش كنت.. وشني وقعلي.. وما تهزاتشي فيها شعرة اههئ اههئ وقداااامي وفوجهي كتقولي جبرت التصاور فتيليفونك.. خلاتني نشك فرااااسي وهي عارفة كلشي وسااااكتة وكتشوف اههئ اههئ
رؤيا :غلطات ابنتي.. ما اندافعشي عليها.. غلطااات اااااه.. وعندك الحق فكل كلمة قلتيها.. ولكن ما تخليوشي هادشي يفرقكم.. راكم بناتي بزوج
تالاسين : عرفتي اخالتي داك النهار باش حسيت.. حسيت براااسي تيتمت للمرة الثانية اههئ اههئ حسيت براسي رجعت لنقطة الصفر.. نفس لوجع ونفس القهرة اههئ اههئ حسيت براااسي بوحدي والدنيا كتدي فيا وتجيب وتلعب بيا كيف بغات اههئ اههئ حسيت بلي بصح راني مقطوعة من شجرة اههئ اهئ اهنههئ... زعما ما بقيتشي فيها حتااا شوية.. ما بقيتشي فيها وهي كتشوف عمي كيجري عليا من الدار فتالي الليل اههئ اههئ ما قالتشي بلي ختي ما كتعرف حد من غيرنا وما عندها فاين تمشي!!!!!
رؤيا :لا ابنتي لا.. ختك هاديك ما تفرطشي فيك.. راها والله حتا كتبغيك.. سكتات غير حيث شافت براء معاك..
تالاسين : ما كتبغينيشي.. كون كانت كتبغيني تفكر فيا.. هي ما تسوقاتشي ليا لا باش كنحس ولا شني باغة.. همها كان غير خاها اههئ اههئ
رؤيا : نتينا ما عارفة والو
تالاسين :شني ما عارفاشي اخالتي شني!!! اههئ اههئ ياك هي لي قالتها بدقمها.. قالتلو غير على قبلك اخاي.. غير على قبلو عملات هادشي كااااامل اههئ اههئ.. خالتي زينب ماشي شغلي فيها.. ولكن بيسان!!! لي كنت حاسباها ختي وصاحبتي وكلشي فيها!!!! اههئ اههئ تققققهرت اخالتي تقهرت.. ضرني خاااطري.. عرفت بلي ما نسوى عندها والو...
رؤيا :(كتبكي) صافب الله يرضي عليك.. صافي قلبي كيتحرق عليكم
تالاسين :(ضحكات وسط دموعها) ههه قالتلك على قبلو.. على قبل خاها لي كيبغيني زطمات عليا ههه.. (رجعات لبكاها) يا ريتو ما بغاني اههئ اههئ يا ريييييييتو... يا ريتو بقى كيشوفني غير ختو كما كنت كنشوفو اههئ اههئ كون ما بغانيشي كاع ما نطيحو فهادشي كااااامل اههئ اههئ لا هو مزيان لا نتوما.. اما حتا انا ولفت
خوات قلبها.. بكات وهضرات وخرجات كاع لي عندها.. وفلخر سكتات.. وشافت فيها رؤيا بقلة حيلة.. هما عياو والهم ما بغى يسالي.. تنهدات وبقات جالسة معاها حتا بدات تهدن شوية وتسكت من لبكى..وهزاتلها راسها تشوف فيها..
رؤيا :(زفرات) ما عرفتشي.. ايكون مزال كيهضر مع فراس.. فاش بغيتيه!!
تالاسين : والو غير سقسيت وصافي
رؤيا :بفففف الله يهديه حتا هاداك.. كفر كفرة وحدة.. بلحق ما نلوموشي.. عندو الحق.. حنا لي ظلمناكم على والو.. ونتوما ما عملتوها لا بيدكم لا برجليكم
قلبات وجهها وما جاوباتش.. شنو اتقول.. حيث فعلا ظلموهم.. خرجات رؤيا وخلاتها هي حطات راسها بين رجليها كتفكر ودموعها كيهبطو بلا شوار.. تقهرات منها بزااااف.. حيث جاتها الدقة من الجهة لي قرييييبة ليها.. ما اهتماتش لزينب كي اهتمات ان بيسان حتا هي دارتها بيها.. ختها وصاحبتها لي تقيسيها فعينيها وما تقيسيهاش هي..
هزات راسها وشافت فبيتها.. مزال كما خرجات منو.. خدات نفس طويييييل وناضت دخلات للحمام.. قلعات حوايجها وتخشات تحت الدوش.. الماء سخوووون والحمام طالع فيه لباخ.. شحاااال ما دوشات كانو غير كيطرفو بالفوطات معطرة.. جمعات دموعها عندها وجمعات راسها.. ما بغاتش تبكي فالحمام.. حتا كتغلبها البكية وتحبسها.. دوشات ولبسات بينوارها وفوطة على راسها وخرجات.. لبسات عليها بيجامة سروال وفوقاني.. وتخشات فبلاصتها.. وتكمشات على وضع جنين.. وعينيها فالبالكون كتخمم.. فشنو وقع وشنو لي جاي.. شنو تقال وشنو سمعات.. شنو ادير وشنو لا.. شنو ايوقع فهاد الزواج.. ايكمل ولا يحبس.. واش هي فرحانة بيه ولا لا.. باغة تكمل ولا لا... فوسط هادشي تفكرات سعد.. سعد لي مشا من بالها بحال الا عمرو ما كان.. كون تزوجات بيه كانت اتكون فرحانة!!!.. كان ايخليها مرتاحة بحال كي مرتاحة مع براء.. اه ما تقدرش تنكر بلي مرتاااحة معاه.. وحاسة بشي حاجة كانت ناقصاها وكملات فهاد الفترة لي جلساتها معاه.. شلااااااا حاجات فبالها.. خلاوها ترون.. ما بقات عرفات فين تشد ولا فاش تفكر.. وبقات هاكاك حاجة تديها وحاجةة تجيبها حتا ما حسات براسها فوقاش نعسات بقوة لبكى لي بكاتو ولعيا لي عياتو..
كان جالس..فوسط الجردة فجلسة مغطية من الشمس دالنهار.. مرافقو على ركابيه لي كيفيفري بيهم وكيشوف قدامو بنظرة حااااادة.. وغير كيسوط ويعاود.. وباه جالس على جنبو وكيشوف فيه وساكت.. كيقاد فالهضرة ومنين ايبدا وشنو ايقول.. وفلخر تنهد وجاه من لخر.. وحط يدو على كتفو كيضرب عليه..
فراس :ما اتسمحش لباك
هز عينو فيه.. شاف فيه مطولا بنظرة خااالية من اي تعبير.. نظرة جااافة.. وقلب وجهو شاف قدامو..
براء :(بحدة) كون كنت بلاصتك انتيق ولدي.. وحتا واذا كان بصح غلط.. انجلس ونجلسو قبالتي ونحاسبو.. ماشي نصرفقو قدام العالم ونجري عليه.. وماشي غير عليا.. جريتي حتا على ديك البنت ونتا عارفها مقطوعة من شجرة وما سولتي لا عليها لا والو
فراس: ما تخلطش الامور..حسبتكم تزوجتو.. يعني راها معاك ماشي بوحدها..
رجع قلب وجهو وشاف قدامو كيزفر.. وباه كيشوف فيه عاقد حجبانو بتركيز.. قلب وجهو حتا هو وساط.. خدا نفس طويل ورجع شاف فيه..
فراس :ما يكونش قلبك قاصح بحال باك
براء :مزيان اسيدي منين عارفو قاصح
فراس : سمعني اولدي.. حنا كنكبرو ماشي كنصغارو.. ولعمر كيجري بينا.. غذا ولا بعدو يدي مول الامانة امانتو.. وما باغيش نموت وانا معادي مع شي واحد من ولادي.. وما نبغيش نموت ونخليهم مورايا قاطعين الصلة.. انا غلطت وكنعترف.. ونتا خلي قلبك كبير وسامح.. سامحلي... وسامح لختك وجداتك
براء :(هز راسو فيه) الله يطول فعمرك.. وانا ماشي معادي معاك.. حيث حاشة واش نكون مسخوط ونعادي واليديا.. والعربون نهار بغيت نسافر جيت لعندك.. ولكن خاطري ضرني من جيهتك.. ما تقتيش فيا نتا لي ولدتيني وكبرتيني وربيتيني.. ودرتي بحال الا عمرك عرفتيني.. نتا تبريتي مني كاااااع.. عرفتي شنو هي تبريتي مني.. عرفتي شنو هي بااااك يتبرا منك.. كتبقى تشوف غير السخط قدامك
فراس :(حط يدو على كتفو) وانا حاشة واش نسخط عليك.. ساعة غضب وغلطت فيها وكنعتارف.. ولكن ما عمرها توصل بيا نسخط على ولادي
هزو راسهم فيها.. لقاوها واقفة عند راس فراس.. ودارت وجات جلسات حداه.. وهو عنقها عندو..
فراس :نبعدك عليا.. وقلبي لي حطيتو عندك كي ندير فيه؟
رؤيا :ههه يخليلي قلبك
فراس :ويخليك ليا..
مسح على راسو حاني راسو وكيضحك وسط عصبيتو الضحكة دبزز..
براء :اودييي.. الناس فالناس ولقرع فمشيط الراس ههه
فراس :(شاف فيه) شنو كتبركم؟
براء :اوالو غير كملو نتوما.. ما تديوش عليا.. غير كنهضر
فراس :نتوما همكم ما بغى يسالي.. وانا نبقى مقابلكم.. نقابل مراتي حسن لي اولا!
براء :اهاه قابلها وتقابلك.. الله يا ودي
فراس :وزايدون لي حسدنا يدير بحالنا!
براء :(تبسم طانز) انا مراتي خاطيها هادشي..
فراس :(تنهد) مزالين على نفس الحال.. ما تبدل عندها والو
براء :وعمرو يتبدل.. وما كاينش شي أمل يتبدل..
سكت كيشوف فيه.. ما لاقي باش يواسيه.. حتا هرسات رؤيا داك السكات..
رؤيا :فرحت منين شفتكم مصالحين.. الحمد لله
شاف فيه فراس وبراء وتبسمو.. ورجع براء حنا راسو كيشوف فيديه لي مشابكين قدامو.. وبالو ماشي تما..
رؤيا :العقبة نشوفك نتينا وختك وعزيزاك مصالحين
براء :(بلا ما يهز راسو) بلا ما تسناي على لخوا الخاوي..
رؤيا :ما يكونشي قلبك قاصح.. ما كنعرفكشي هايدا..
براء :اسيادي انا قلبي قاصح حجرة وما مزيانش غير خليوني
رؤيا :راه عرفنا بلي لا فوت منهم.. ما قلنالكشي سمحلوم دابا.. مهم حتا تبرد ود..
براء :(قاطعها) لا دابا لا بعدو.. يفرقوني عليهم.. بنادم فيه تخرويض ما عندي ما ندير بيه
رؤيا :(سكتات شوية) هي حتا انا ما اتسمحليشي
هز عينو فيها عاقد حجبانو باستغراب.. سولها بنظراتو شنو كتقصد.. وفراس حداها حنحن وحط القبضة ديالو على فمو وشاف فولدو..
براء :علاش نتي مالك!!!!
رؤيا :(شافت ففراس ورجعات نطقات) انا كنت عارفة
براء :نعااااااااااااام!!!!
🍃🍃🍃🍃🍃
كانت فبيتها جالسة.. كتبكي محروقة على ختها.. غلطة وحدة وحسابها ما بغاش يسالي.. وكل مرة كتلقى راسها كتعاقب للمرة الالف.. صونالها تيليفون حداها.. ما داتهاش فيه.. خلاتو حتا قطع.. ورجع كيصوني.. عاد هزاتو لقات نمرة ما مسجلاش عندها.. شافت فيه ما فيها لي يهضر وخلاتو حتا قطع عاود.. وحطات تيلي.. ما دركاتش تنزلو من يديها حتا رجع يصوني.. تنهدات ومسحات عينيها وجاوبات بصوت منغنغ باين عليه لبكى...
رؤيا :فهمني اولدي الله يرضي عليك.. راه سكت حيث خفت على ختك.. حالتها كانت فالويل.. وخفت من باك عليها.. ما قدرتشي نهضر.. ها هو فاش عرف هزها ما عرفتو حتا فين داها.. كون ما لميمة كون راه قلبي مزال محروق عليها..
براء :(حط راسو بين يديه) زيدوني..شنو باقي مزال.. زيدوني راه هادشي ما كافيش
رؤيا :فهمني اولدي.. كبدتي لي خلاتني نسكت.. نتينا راجل.. قاد براسك.. هي غير بنت.. وعاد كون شفتي حالتها تعز عليك.. خفتها تمشي تعمل شي حاجة فراسها.. راها كانت تنوض بلبكى وتنعس بيه.. نتوما ما شفتوهاشي كيف كانت.. راها ندمات حتا ندمات الزغبة اللخرة فراسها..
براء :(ناض وقف)
فراس :فين غادي
براء :(بعصبية) غادي بحالي.. ما عندي ما ندير هنا
فراس:(وقف) اتجلس..
براء :(شاف فيه معصب) الواليييييد!!!
فراس :اتجلس.. واخة غير هاد اليوماين.. لميمة مزالة باغاك وهي عيانة ما باغيهاش تزيد تأزم
براء :الصمت كيعض على سنانو
فراس :عارفك معصب.. وما حاملش تجلس هنا.. ولكن على وجهي انا لي كنطلبك وعلى وجه لميمة بقى.. هانتا طلع لبيتك وسد عليك وتكالما مع راسك.. ما ايبرزطك حد..
قال هاد زوج كلمات وزاد خلفة بحالو.. وخلاها هي شادة فراسها هازة الهم.. جلس فراس حداها وجرها عندو وحطات راسها على كتفو..
رؤيا :حتا انا تقلق مني
فراس :دابا يرجع.. خليوه يتهدن.. دابا مزال معصب
تنهدات وسكتات..اما هو فدخل من باب الجردة وتم طالع لبيتو.. حتا وقف عند الباب وهو يشوف فباب بيتها لي قبالتو.. وقرب وقف كيتشاور واش يدخل ولا لا.. ما عارفهاش واش تما غير مجرد احساس.. دق بشوبة ما جاوبو حد.. ودفع الباب ودخل وسدها موراه..
طاحت عينو عليها.. ناعسة ومكمشة فراسها من البرد لي كيضرب من البالكون.. شعرها مزال اطرافو فازكة والفوق بدا ينشف.. وهو مفرش على خديتها.. تنهد ووقف موكي على الحيط ومربع يديه وكيشوف فيها بتعب.. وبالو كيدي ويجيب.. قرب ببطء سد باب البالكون ورجع وقف عند راسها.. مرر يدو على راسها وحنا باس جبهتها وهز راسو ويدو مزالة كتلعب فشعرها.. خدا نفس طوييييل.. صدرو مثقل عليه.. وبغى غير يرتاح.. بعد عليها ما بغاش يفيقها.. ويخرج بحالو مشا لبيتو يرتاح.. حيث بصح عيا...
صبح صباح الغذ.. لبسات عليها من بعد ما قضات روتينها الصباحي.. ووقفات عند باب بيتها شحال كتشاور واش تنزل ولا لا.. خدات نفس طويل وفتحات الباب وخرجات.. هبطات وجهها خالي من اي ابتسامة.. ووقفات عليهم فالطبلة دلفطور.. لي اغلبهم كانو فيها من غير براء وبيسان..
فراس :(وقف كيمسح فمو) تالا.. قبل ما تجلسي.. بغيت نهضر معاك
تالاسين :(بدهشة) هاااا.. معايا!!!
فراس :(تنهد) اه معاك.. اجي معايا ابنتي
شافت فيه مطولا.. وولحقاتو وبالها كيدي ويجيب فاشنو ايكون بغاها.. وهو غادي قدامها بطولو وعرضو.. فتح باب البيرو ودخل وخلاها مفتوحة حتا دخلات هي وسداتها..
فراس :جلسي
جلسات قبالتو.. يديها فوق حجرها كتلعب بصباعها وحانية راسها.. وهو كيشوف فيها..
فراس :مقهورة مني ياك
بقات حانية راسها.. وكطرطق فصباعها وساكتة.. قرب هو جلس فوق البيرو حداها وهز راسها.. شاف فعينيها مغرغرين وحومر باغة تبكي.. ومزيراها بزز.. تنهد وجرها عندو عنقها وهي طرطق بلبكى...بحال الا كتشكي عليه.. هو سكت ما زادش هضر.. حدو عنقها وزير عليها ويدو كتمسح على راسها واليد لوخرا على ظهرها وكيطبطب عليها.. خلاها حتا بكات براااحتها وبردات على قلبها.. وبدات كتسكت.. عاد بعدها عليه وقابل وجهها معاه كيمسحلها دموعها..
فراس:مزالة هازك فقلبك من جيهتي
تالاسين :(حركات راسها بلا وهط مزالة كتقطر فالدموع)
فراس:مأكدة.. انا عارف راسي ظلمتك.. وبزاف كاع
تالاسين :ما نهزشي فخاطري منك واخة تقتلني.. نتوما خيركم مغرقني.. ومنك من الواليد الله يرحمو.. لي عملتوه معايا عمري نساه..
فراس :حنا عائلتك.. خوتك وواليديك.. هداك ماشي خير درناه فيك.. راكي بحالك بحال ولادي.. لي درتولهم نديرو ليك
تالاسين :(مسحات دموعها) وانا شني ما عملت ما نوفيشي لي عملتوه معايا..
فراس :(باس جبهتها) نتي راك بنتي.. ديريها فراسك
تالاسين :(تبسمات)
فراس :شنو دابا.. السوسية و باها تصافاو..
تالاسين :(ضحكات وحركات راسها باه)
فراس:(تنهد وهز يديه) الله على راحة.. دابا عاد حسيت براسي كنتنفس..
تالاسين :الله يدومها راحة عليك..
فراس :اميين.. ابنتي امين...
سكتات مبسمة.. وهو كيشوف فيها ويضحك.. ورجع تبسم بخبث.. ونطق..
فراس :ما بقى عندك ما ديري مع براء... نتوما اصلا ما تزوجتوش حيث باغيين.. وغير مفروض عليكم.. وحتا زواجكم انا انشوف كي ندير ونحل القضية ديال داك الشرط.. ونشوفو كي نديرو نطلقوكوم.. هاد الزواج ما عندو معنى
خرجات عينيها فيه.. وسرطات ريقها.. ما عارفة ما تقول ولا باش تجاوب.. وبقات غير كتشوف فيه وترمش.. ولسانها تسرط..
فراس :مهم انا انشوف كي ندير..هو يمكن يبقى شي أيام ويمشي لدارو.. ونتي طبعا ما عندك ما ديري تما..
تالاسين :(خركات راسها باه)
فراس:ايوا صافي.. رجعي لداركم.. داكشي لي بغينا حتا حنا.. نتي ما باغاش.. وهو هاكاك.. وزواجكم ما منوش.. الوغ ما عندكم لاش تصبرو على بعضكم..
فراس:هههه.. مزيان.. يله مشينا.. عاد خاصني نمشي للخدمة
تالاسين :واخة
حط يدو على كتفها معنقها.. وتم خارج مبسم.. طلق لوقيدة وخلاها هي شاعلة فيها العافية.. ما بقات عارفة راسها من رجليها شنو باغة وشنو لا.. ما عرفاتش مالها بالظبط.. عارفة بلي اتنقصها شي حاجة.. ولفاتو فحياتها.. وهي لي ما كانتش حاملة تزطم فدارو ولا تعتبها.. ها هي دابا اترجع تسكن بعيدة عليه.. علاش ما عاجبهاش الحال..
عقل يديها وعقل يجيبها.. وحانية راسها.. حتا هزاتو مع الدخلة دبيت الماكلة.. طاحت عينيها فبيسان لي جالسة.. وهي تحمر فيها وزيرات على فمها وقلبات الدورة باغة تخرج..
ما رجعاتش شافت فبيسان لي اتاكلها بعينيها كتسناها تهز راسها فيها.. وهي والو.. عاقدة عبستها وكتهضر وباااينة فصوتها معصبة.. تزيرات فبلاصتها وتخنقات وهي غير ساكتة.. وكلشي عاق علاش ما بغاتش تجلس.. غير ما بغاوش يحكرو.. قلبات الدورة تالا خارجة وهي ترجع وشافت فرؤيا..
تالاسين :خالتي.. مينوشة فاين هي
رؤيا :(ضحكات) ههه فكرتيني فمينوشة.. سبحان مبدل الاحوال.. ما بقاتشي كتفرق على امينو.. من نهار مشيتو وخليتهم وهما كيف سمينة على عسيلة
تالاسين :بصح؟؟؟.. ما دابزوشي.. ما عملها والو
رؤيا :اواااالو.. وتقول.. رجعو كيلعبو مع بعضهم كاع هههه
قاطعهم دخول براء.. قال صباح الخير بلا نفس.. مخنزر وعاقد غوباشتو ما حاملش الجمعة معاهم فنفس لبلاصة.. قرب كيهز طرف دالخبز ويدهنو وساكت..
رؤيا :جلس تفطر.. شعندك واقف حتا نتينا
براء :ما كاين فين يجلس بنادم هنا..
رؤيا :يهديكم الله.. مالكم على هاد الحالة..
هز عينو فيها معبس.. ورجع حنا كيكمل دهين الخبز بالفرماج والكونفيتير.. يله بغات تزيد تهضر رؤيا وهي تحس بيد فراس على يديها.. سكتها بعينيها.. ضربات الطم وسكتات وخلاوه براحتو.. هز داك الخبز وخرج بحالو من تم.. مع خرج مع انفجراات بيسان حداهم بلبكى..
🍃🍃🍃🍃🍃
شاف فيها من بعيد.. جالسة مربعة رجليها وسط الربيع.. ومينوشة وسط حجرها كتعنق فيها وتبوس.. وامينو كيدور بيهم ويلعب بزنطيطو وهي كتداعب شعرو مرة مرة.. تبسم ابتسامة خفيفة.. وقرب جيهتها ببطء ووقف عند راسها.. ومدلها الخبز..
براء :شدي فطري
هزات راسها فيه بدهشة.. والشمس عاميالها عينيها.. ردلها البال كترمش مضرورة بالشمس وهو يحني قرفصاء قدامها..
براء :شدي
شافت فيه ساااارحة.. وكلام فراس كيتعاود فبالها.. وذكرياتها معاه كتكرر وحدة وحدة.. وهو مادلها يدو وكيتسناها تشد الخبز وامينو كيجر فيه من حوايجو.. باغي يلعب معاه..
تبسمات.. وشدات داك الطرف دالخبز قسماتو فالنص ومداتولو.. وهو كيشوف فيديها..
تالاسين :شْبّر.. ما تبقاشي بالجوع
براء :غير كولي ما قادش
تالاسين :الا ما كليتيشي معايا ما ناكلشي
شاف فيها مطولا.. وعبستو مزالة على وجهو.. ماشي عليها.. على حالتو .. والشمس لي ضاربة فيهم.. تنهد وقبطو منها وجلس قدامها..
براء :عارفك معكسة
ضحكات.. وشدات داك الطرف دالخبز كتعض فيه بالشوية.. وهو قلب وجهو لامينو كيداعبو ويضحك معاه.. موحشين فيهم.. وهي كتفرج فيه وتاكل وساكتة.. وحتا هو ما هضرش.. ما فيه لي يهضر اصلا.. سهات فيه عاود.. فتعابيرو.. فعصبيتو.. فقلقو.. فالعياء لي باين فعينيه.. فكل تفصيلة فيه.. تنهدات وقلبات وجهها ونطقات بصوت خافت..
تالاسين :هضر معايا عمي
براء :(شاف فيها) ايوا
تالاسين :تصالحنا
براء :(تبسم) مزيان.. حتا انا هضرت معاه البارح
تالاسين :(حركات راسها وهي حانياه) اممم.. مزيان.. الحمد لله.. رجعنا كما كنا
براء :(كيلعب مع امينو) اه
تالاسين :(كتلعب بصباعها) كلشي ايرجع كما كان قبل..
براء :(شاف فيها عاقد حجبانو باهتمام ويديه مزالة على ظهر امينو كيداعبو) يعني!!!
تالاسين :عمي قالي اترجع للدار ديالك
براء :امم.. انرجع.. غير شي ايام تصح لميمة ونرجع
تالاسين :مزيان.. ايوا وديك الساعة تهنى مني ومن صداعي ههه (ضحكة صفراء)
براء :كيفاش
تالاسين :(كضحك بلا خاطر) انرجع نسكن هنا صافي.. انخويلك الدار انا ومنوشتي..
شافت فمينوشة بحال الا كتخاطبها بالهضرة وتضحك معاها.. وهي راها غير كتهرب بعينيها منو..
شاف فيها مطولا.. ما دار حتا رد فعل..كان عابس وبقى عابس.. ما استغربش اصلا.. كان متوقعها.. او بالأحرى كان متأكد.. قلب وجهو وتنهد..
براء :مزيان..
هادي هي الكلمة لي خسر عليها.. وقلب وجهو كيلعب مع امينو.. وخلاها هي هزات راسها فيه بدهشة.. تسناتو يقول شي هضرة.. اي حاجة من غير مزيان.. كيفاش مزيان!!! يعني بصح ايتهنى منها.. بقات غير مبلقة عينيها فبلاصتها ومينوشة كتجر ليها فشعرها.. وناض هو من حداها وبدا يجري وامينو كيلحق عليه.. وكيلعب مع الكلب ديالو.. ويضحك معاه.. ومخليها هي بحال الا كبيتي عليها سطل دالماء.. غير تابعاه بعينيها وهو مشى بعد عليها..
تالاسين :اصلا هادشي لي خاصو يكون
ناضت مخنزرة وجامعة فمها مكمشاه.. ومينوشة بين يديها قارقة عليها.. ومشات كتنفض.. دخلات من الباب دالجردة لكوزينتها لي توحشاااتها بالزايد.. طلقات مينوشة فالارض وشافت فجنابها.. مزالة كما خلاتها.. تنهدات ولبسات طابلية وحلات الثلاجة تخدم شي حاجة.. باغة تنسى وتلاهى.. والطياب والحلوى هي الحاجة لي كترتاح فيها وتلقى راسها فيها..
أما هو فلعب مع امينو حتا عيا وجلس معاه فوق كرسي فالجردة كيداعبو.. شاف جيهتها.. ما كايناش.. تبسم ابتسامة سخرية جانبية وشاف فأمينو كيهضر معاه...
تالاسين :حرام عليا!!!! انا!!! شكون لي حرااام عليه فينا انا ولا نتينا
بيسان :وراه عرفت راااااسي غلطت معاك.. بلحق غير سمعيني عافاك اههئ اههئ
تالاسين :شني باغاني نسمع.. نسمع كيفاش ضحكتي عليا.. كيفاش غذرتيني.. كيفاش خليتيني نطيح من عينين شحال من واحد.. كيفاش تأمرتي نتينا وجداك عليا.. والزوينة هي وقفتي قدااااامي بوجهك حمر.. وقلتيلي علاش كتكذبي اتالاسين انا شفت التصاور فتيليفونك...(ضحكات بالفقصة) ههه بااااز لوجهك.. عندك لوجه لي يهضر على لكذوووب.. وهادشي كاااامل علاش.. على قبل خووك.. اما انا لهلا يقلب ولا يشقلب.. زيرو على الشمال.. ما فكرتيشي فيا واش باغة ولا ما باغاشي ولا شني ايوقعلي من بعد... واااالو.. فكرتي غير فخاك
بيسان :(زادت قربات) لا لا لا اههئ اههئ ما تقولشي هايدا.. نتينا راك ختي اههئ انا.. انا..
تالاسين :نتينا شني!! هاااا شني
بيسان :سمحلي عافك اختي..
تالاسين :(زفرات وقلبات وجهها) بغيت نعس
شافت فيها بيسان.. دموعها كيتسرسبو وشفايفها كيترعدو.. وتالاسين قالبة وجهها ما باغاش تشوف فيها.. سكتات شحال وخدات نفس طويل ونطقات..
بيسان :غلطت فحقك كنعتارف.. فحقك نتينا وخاي وفحق كل واحد فهاد العائلة.. وفحق حتا راسي اههئ انهههئ اهء اهء.. ولكن ما قدرتشي اختي اههئ ما قدرتشي نشوفك كتزوج بيه.. اههئ والله ما قدرت
قلبات وجهها شافت فيها باستغراب.. حاطة وجهها بين يديها وكتبكي.. غمضات عينيها باش ما ضعافش قدام دموعها.. ونطقات..
تالاسين :كيفاش ما قدرتيشي!! زوينة هادي ههه
بيسان :(هزات عينيها فيها حوومر) اه ما قدرتشي... ما قدرتشي نشوفك مزوجة بالراجل لي حلمت نتزوج بيه.. ما قدرتشي نشوفك مشبرة فاليد لي تمنيتها شي نهار تمدلي اههئ اههئ... ما قدرتشي نسمعو كيقولك مراتي وتقوليلو راجلي اههئ اههئ ما قدرتشي اختي ما قدرتشي.. قلبي جرني وغلطت غلطة عمري اههئ اههئ خسرت فيها راسي وخسرتكم وخسرت ثيقتكم اههئ اههئ
حطات وججهها بين يديها وجلسات على طرف الناموسية كتبكي.. وخلاتها هي واقفة وكترمش فبلاصتها وكتستوعب.. غلباتها الصدمة.. كتقول واش لي سمعتو صحيح ولا غير غلطات.. كلامها نزل عليها شللها.. حسات براسها طاحت فديك الحفرة الباردة مرة أخرى.. تشوكات.. وجمدات.. ودارت شافت فيها كتهضر مبهوووووضة..
تالاسين :كتبغيه!! كتبغي سعد!!!
ما جوباتهاش.. حانية راسها كتبكي وتبرد على قلبها.. قربات عندها تالا بشوية وجلسات حداها... وهي مزالة حالة فمها ما متيقاش..
تالاسين :جاوبيني.. واش كتبغيه
بيسان :(هزات راسها كلها مجخلطة دموع) اه اه.. كنبغيه.. ولكن دابا كرهتو كرهتو اههئ اههئ
تالاسين :(بدهشة) من فوقاش!!!!!!
بيسان :من نهار نعقل فيه على راسي
رجعات اللور حاطة يديها على فمها.. شافت فيها مطولا وحطات راسها بين يديها.. هربلها الكلام.. وتسرطلها اللسان.. ختها كانت كتبغي الراجل لي كانت اتزوج بيه!!!! الصدمة.. كتخايل كون تزوجاتو شنو ايوقع.. شنو ايكون احساسها.. وكون عرفات من بعد الزواج كيفاش غتصرف.. تلفات وبقات غير شادة راسها وساكتة.. وكتسمع شهيقها حداها...حتا هزات راسها فيها..
تالاسين:علاش ما قلتيهاليشي.. علاش سكتي
بيسان :ما عرفتشي.. ما قدرتشي اههئ اههئ كنت مخلياها بيني وبين راسي حتا لنهار لي يتحقق لي فبالي اههئ اهء اهء ساعة وقع العكس اههئ وبغاك نتينا.. وديك الساعة ما قدرتشي نهضر
تالاسين :كون قلتيهالي كاااااع ما نوصلو لهاد لمواصل.. كون هادشي كااامل ما وقعشي..
بيسان :(شافت فيها ساكتة)
تالاسين :ما فهمتشي فاش فكرتي.. والله ما فهمت.. شني سحابك.. انعرف ونميك ولا شني.. اتقوليهالي وما نتسوقشي.. كون قلتيهالي ما نزيدشي نضرب معاه الضربة واخة نكون عند لعدول.. ولكن نتينا لا.. نتينا فضلتي الطريق العوجة.. كون جيتيني فاااص كون هاد الدوصي من زماااان تسد بلا صداع وبلا حريق الراس..
بيسان :سكت حيث عرفتك حتا نتينا باغاه
تالاسين :والله ينعل لبغو فين ما كان.. الله ينعل لقلب وما يجي منو.. من نيتك!!! مخورة فعقلك!!!! واخة حتا نكون باغاه.. وزايدون دابا طفرتيييييه!!!! زعما لي عملتيه حسن من كو كان جيتي وقلتيهالي... خلاها مولاها لا ديالي بقى لا وجهي تنقى.. باش طلعتي فلخر!!! بواااااالو.. غير ما زدتي كفستيها
بيسان :دابا انا هادشي كاااامل عارفاه.. وندمت ندمت ندمت اههئ اههئ وكون فكرت دبك الساعة بعقلي غير شوية ما نعملاشي اههئ اههئ
تالاسين :(ضحكات بسخرية) كنتي كتبغيه حتا لهاد الدرجة وهاد الوقت كاااامل ومخبعة عليا!!!! يا حسرة زعما راني ختك
بيسان :حتا نتينا كنتي كتبغيه وما قلتيهاليشي
تالاسين :كنبغيه!!! واش كتقارني راسك بيا!!! انا ما كنت كنبغيه ما تااااا لعبة.. كان كيعجبني حيث كيفهمني وكنرتاح معاه.. لا أكثر ولا أقل.. ومااا كونتشي مأكدة من راسي وغير فالشهورة اللخااارة باش بقيت كنحس بهاد الزبل.. اما نتينا سنيييين وسنيييين.. كتحلم بيه وتبغيه وسااااكتة..
بيسان :الصمت
تالاسين :دابا من هادشي كاااامل.. كلشي طلع خسران.. حسابكم طفرتوها ونتوما غير رونتوها.. ما خرجتو بحتا فائدة.. وكلشي هاز فقلبو وحتا حد ما هاني..
بيسان :عارفة راسي كنت مكلخة وبزاااف.. بلحق حتا عملت لي عملتو عاد فهمت...
تالاسين :(شافت فيها مطولا) صدمتيني والله.. اخر حاجة كانت طيح فبالي.. وانا فحال لكمبوية كاااع ما عقت بيك
بيسان : شني دابا سمحتيلي.. ثيقيني والله الا زواجك ببراء عمرك تندمي عليه اههئ اههئ راه خاي وعارفاه وعارفة شحال كيبغيك.. سعد عمرو ما كان يبغيك بحالو
تالاسين :دابا واش نتينا سحابك انا عاملة هادشي حيث ما تزوجتشي بسعد ولا!!!! ااااااخر همي... سمعتيني... ااااااخر همي هو راجل فهاد الدنيا... انا لي بقى فيا هو نتيييينا ختي.. حبيبتي وصحييبتي لي طعنااااتني فظهري.. ضربتيني ضربة خليتيني موراها شحااااال ما عارفة راسي من رجليا ونتينا كتشوف فيا وسااااكتة.. ما بقى فيا لا سعد.. ولا زواج.. بقى فيا غير راسي حيث ما توقعتاااشي منك... كنت ثاااايقة فيك ثقة عمياء
بيسان :(شدات يديها كتبكي) ما تقولشي هايدا راه والله حتا كتقتليني اههئ اههئ ختي نتينا.. ختي وحبيبتي اههئ اههئ تعماااولي عيني مرة وحدة وغلطت وعمري نسمح لراااااسي.. ولكن نتينا سمحلي عافاك اههئ اههئ...
جرات يديها من بين يدين بيسان وشافت قدامها..
تالاسين :ماشي بالساهل.. حيث والله حتا ضرني خاطري من جيهتك بزااااف
نزلو دموعها حتا هي.. وقلبات وجهها للجنب كتمسح عينيها وهما نازلين بلا خاطرها...
بيسان :سمحيلي عافاك اههئ راه ما بقيت كنقدر لا نعس ولا وااالو.. بالي كلو معاكم... والله حتا كرهت راسي.. بابا شحااال وهو معصب مني.. عمري نسا شوفاتو ليا وهضرتو اههئ اههئ وفلخر نفاااني برا لبلاد كون ما لميمة كون راني مزالة تما اههئ اههئ حتا تصالحت معاه وعاود هانتينا وخاي نفس الشيء اههئ اههئ راه والله ما بقيت قادة.. اههئ اهء اهء اهء
شافت فيها مطولا.. شافت فحالتها.. فضعفها.. فدموعها.. فانهيارها.. فقلبها لي كيتوجع.. حطات راسها بلاصتها.. كون عرفات بلي لي كتبغي كيبغي ختها باش اتحس.. تفكرات نهار اللايف فاش سخفات وعرفات علاش.. حسات بالشفقة عليها.. عزات عليها وضرها خاطرها...ولكن ما كانش خاصها دير لي دارتو.. مهما كانت الاسباب.. كون كانت هي فبلاصتها ما ديرهاش.. خدات نفس طويل ورجعات قلبات وجهها..
بيسان : ظلمتك.. وغلطت فحقك.. وندمت والله.. بلحق سمحلي.. الله يرحم ليك الوااالدين لما سمحلي..
شافت فيها شحال وهي ساكتة.. كتفكر فكلشي.. فيها فراسها فلي وقع.. وراسها ايطرطق.. هي لي بقى فيها كثر هو ان ختها عملاتها بيها.. أما هي ما بقى فيها لا زواج لا هم يحزنون.. بقى فيها راسها والحالة لي كانت فيها.. تنهدات وشافت فيها..
شافت فيها مزيرة على فمها و يديها شادة بيه طراف التيشورط ديالها ومزيرة عليهم.. جمعات النفس باش ما تزيدش تبكي.. وشافت فيها لاخر مرة وخرجات بحالها.. وخلاتها هي فدوااااااامة من الافكار.. فعلا تصدمات.. وعقلها حبس فهاد اللحظة.. ما بقات عارفة شمن طريق تشد.. حطات راسها فبلاصتها.. كانت زعما ديرها!!!! اكيد مستحيل.. كانت تجيها فاص وتقولها كنبغيه ولا تسد عليه فقلبها وتسكت.. وفنفس الوقت... عزات عليها.. ولكن واش الحب كيخلي بنادم يتعماولو فمرة!!! حتا لهاد الدرجة الحب صعيب.. حتا لهاد الدرجة كيخليك تخرج عن طوعك.. حتا لهاد الدرجة كيبدل بنادم.. ولكن هي باش اتعرف.. وهي عمرها جرباتو.. باش اتفهما وتحس بيها وهي عمرها حسات بلي حساتو.. تنهدات وقلبات وجهها وناضت للبالكون يضربها لهواء...
🍃🍃🍃🍃
وسط الليل.. كانت فبيتها.. فوق فراشها.. كتميل يمين يسار.. حتا قنت ما ريحها.. حيث لعقل خدااام.. تقلبات على ظهرها وساطت قنطانة بقوة التفكير.. بغات غير تغمض عينيها وتنعس.. شافت فالسقف مطولا وتنهدات.. قلبات وجهها للجنب وما عرفاتش علاش طاحت صورتو فبالها وهو ناعس بجنبها.. هادي مدة وهما كينعسو جنب للجنب.. بلحق الليلة ما كاينش حداها.. ثاني ليلة بلا بيه.. ولكن البارح ما رداتش البال ما حساتش بالفرق.. حيث متين نعسات فالنهار ما فاقت حتا للصباح.. عكس هاد الليلة لي ما بغاااش يديها النعاس.. تبسمات للحظة وهي كتفكر ذكرياتها معاه.. ذكريات زوينة وقبيحة عمرها تنساها.. من نهار حطات رجليها فدارو حتا للحظة فاش حطاتهم طيارة.. ضحكو.. فرحو.. مرضو..تناقرو.. دابزو مرااات ووقفو يد فيد مرااات.. عاشو حاجات جديدة وعرفو ناس جداد.. ضحكات وهي كتفكر نهار دخل عليهم الفار للدار.. ونهار جراو موراهم البطاريق.. وزادت ضحكات فاش تفكرات الدب لي حصلوه.. تفكراتو فاش كان قريب يبوسها.. فاش فاقت وطبايع قبلاتو معمرة عنقها.. فاش نعسات كتلعب فلحيتو.. فاش وفاش وفاش... تنهدات وهي كتفكر بلي صافي.. هادشي كامل كان زمان.. فترة ودازت.. وهو ايرجع لحياتو وهي هاكاك.. ويقدر يرجع يسافر لفين كان كيقرا فسويسرا.. على إثر هاد الفكرة ناضت جالسة كتعض فشفايفها بتوتر وتدور فعينيها.. زعما يمشي!!!.. زعما ما تبقاش تشوفو!!!.. شافت فنقطة وحدة ساااهية... ورجعات ساطت وتلاحت على مخدتها..
تالاسين :وانا شغلي.. يمشي فاين ما بغى..
غمضات عينيها باش تنعس وتقلبات على جنبها.. وما حسات براسها حتا لقات راسها واقفة عند باب بيتها ببانطوفة ورمات عليها كاب قصير ديال لبيجامة باش يسترها حيث غير ديباردور معري مع سروال.. وفتحات الباب وطلات غير من الطريف تشوف واش كاين شي حد.. حتا كتسمع بابو كتحل ورجعات لور وسدات الباب دغيا وعينيها خارجين..ويديها على قلبها لي كيزدح..
حنات كطل عليه من الثقبة دالساروت.. كيبانلها غير خيالو مع الظلام فالكونوار.. بقى واقف فبلاصتو شوية.. عاد جر الباب سدها وعطا بظهرو غادي.. قوصات حججبانها وفتحات الباب كطل عليه مخرجة غير راسها
تالاسين :(بهمس) فاين ماشي هذا فهاد الليل؟؟
شافتو قرب يهبط فالدروج.. لابس جاكيط ورامي القب فوق راسو.. وهي تخرج وسدات الباب موراها بشوية.. وتبعاتو كتسلت على طراف صباعها.. طلات عليه من الدروج.. بانلها هبط.. وهي تلحقو كتجري ومع لابسة غير لبانطوفة رقيقة ما كيتسمعش زطيمها.. حتا كتسمع باب الدار تحلات عرفاتو خرج.. وتبعاتو قبل ما يمشي.. يله هو ايديماري وهي طل عليه براسها من السرجم لي من جيهتو حتا قفزاتو..
تالاسين :فاين ماشي!!!
شاف فيها عاقد حجبانو.. ما عرفها منين خرجات.. حتا نقزات عليه كيف قباط الرواح.. ما فهم والو..
براء :شكديري هنا!!!
تالاسين :نتينا لي فاين ماشي فهاد الليل
براء :(تنهد) ما جانيش النعاس.. وقلت نخرج يضربني لهواء.. نتي شنو كديري هنا فهاد الساعة
تالاسين :علاش.. شني فيها.. نتينا ما جاكشي النعاس وحتا انا ما جانيشي النعاس.. نتينا خارج يضربك الهواء وانا هايداك.. ايوا صافي.. نمشيو بزوج.. موانسين حسن
براء :وبهاد الحالة!!!
تالاسين :شمن حالة؟؟؟
براء :ببيجامة.. وبانطوفة
تالاسين :ياك غير فطوموبيل.. وزايدون راه الليل..
براء :الصمت
تالاسين :وا صافي.. بلا ما تبقى تبعكك..
شاف فيها مطلع حاجبو.. وكيطلع فيها ويهبط.. تنهد وقلب وجهو وديمارا.. وزاد.. وتقادات هي فبلاصتها مبسمة..
دام الصمت.. هو ساكت ومركز مع الطريق قدامو.. وهي فاتحة السرجم كيضربها لهواء لخفيف ديال الليل.. الشوارع مزالة عامرة شوية.. حيث الصيف وطنجة.. ما كتخواش.. واخة قرب الصيف يخرج.. وقف الطوموبيل.. بلاصاها.. وهزات راسها.. كانو قدام لبحر.. نفس لبلاصة لي جاو ليها قبل.. نفس الهضبة.. ونفس المنظر.. غير هاد المرة فالليل..
نزل بالسكات.. ونزلات حتا هي تبعاتو وكتسد السنسلة دالكاب لي لابساه من البرد.. شاف قدامو وخدا نفس طويييييل.. لهواء النقي دلبحر لي كيرد الروح.. وقلب عينو شاف فيها..
براء :نهبطو؟؟
تالاسين :(تبسمات وعينيها فامواج لبحر لخفيفة) اه
براء :يله
زاد وتبعاتو.. وتمو هابطين من بلاصة مصايبينها باش كيهبطو الناس للبحر.. ومع كان الظلام بزز باش كيشوفو فين كيزطمو.. هز راسو فيها وهو قدامها بخطوة.. ومدلها يدو
براء :اري يديك عندك طيحي..
شدات فيديه.. زير عليها.. وخطاو بخطوات بطيئة باش ما يطيحوش.. وصلو للرملة.. زولا بانطوفتها وزول هو كلاكيطتو.. وتمشاو كيقربو لبحر.. حط يد فالجيب.. ويد هاد بيها لكلاكيط.. وعينو على لبحر.. وهي حداه سارحة بعينيها..
جلس.. وجلسات.. وطااال الصمت.. هو كيخمم وهي هاكاك.. كان محتاج يفكر فالاحداث لي دازت.. وحتا هي كانت محتاجة هاد الجلسة.. ما هضروش.. هو ما باغيش يهضر.. وهي ما قاداش تنطق.. صوت الامواج مع صوت لهواء بحال شي سينفونية وكتعزف.. حتا قررات تهرس داك السكات وتنطق بصوت هادئ وهي مزالة كتشوف قدامها..
تالاسين :تقدر تسمحلهوم؟
براء :واخة نسمح عمري نسى.. وماشي شي حاجة لي دوز بجغمة دالماء
تالاسين :هضرات معايا بيسان اليوم.. كانت حالتها حالة.. (تنهدات)
براء :مزيان فيها.. بحرا تحس براسها شنو دارت.. خليها تعلم
تالاسين :(سكتات شحال مترددة تنطق لي فبالها) ما ضنيتكشي تاخذ منها موقف حتا لهاد الدرجة
براء :(شاف فيها) علاش!!!
تالاسين :(بتوتر) زعما.. هي.. مهم.. عملات هادشي.. كما قالت..
براء :(قلب وجهو مبسم بسخرية) بغيتي تقولي دارتو على قبلي
تالاسين :(كدور فعينيها) وي.. زعما
براء :ما شكيت على حد.. وما تسنيت حد يدير فيا شي بليزير.. وما كنتسنى نبقى فحد.. الحاجة لي ما تجيش بالخاطر ما تجيش حتا بزز..
قلبات وجهها شافت فيه مقوصة حجبانها.. خشالها الهضرة غير بالفن.. وخلاها غير كترمش.. ما كانش كيشوف فيه.. كيشوف قدامو.. والقب فوق راسو وشعرو باين طايح على جبهتو.. وهو مصغر عينيه فلبحر.. وساااهي.. يمكن قصد يخليها تحس بديك الهضرة.. ويمكن غير هضرة خرجات من قلبو بلا ما يحس.. ولكن فكلا الحالتين فمعناها واحد.. والمقصود باين وواضح.. زيرات على فمها كاتمة الغضب ودارت قدامها.. ونطقات حتا هي بلي جا فبالها لا شعوربا..
تالاسين :بلحق كنعرف لي كيبغي شي حاجة كيدير جهدو باش ياخذها
براء :(بنفس الهدوء) بلحق الا كان جهدو ما كافيش.. فهنا خاصو يحبس ويرجع لور.. ما ايبقاش كيجري مور حاجة وحدة لعمر كامل
والصاااعقة.. كان كلامو بحال لقرطاس.. كيضرب فيها ويعاود.. هو ما قصدش يهينها او يقصحها بهضرتو.. هي فتحات معاه حوار.. وهو بينلها وجهة نظرو.. ولكن هي لي حسات بالهضرة لي خارجة من فمو.. هي لي ما ولفاتوش هاكة معاها.. جاها تبدل بزااف.. غير بين ليلة ونهار.. ولكن علاش اتلومو عاود.. باك هي لي ما كانتش باغاه.. وهي لي خلاتو ماشي هو لي خلاها.. وهي لي قالتلو انرجع للدار.. ايوا شنو كتسنا منو!!!! شنو باغة!!! هي براسها ما عرفاش تجاوب... سكتات كتبرد هضرتو لي نزلات عليها بحال السم.. وبقات كتحفر فيها.. وخدات نفس طويل.. ما عندها علاش تاخذ منو موقف.. هي سولاتو.. وهو جاوبها..
تالاسين : فوقاش عوال ترجع للدار.. زعما دارك
براء :(شاف فيها ورجع قلب وجهو وتنهد) ما عرفتش.. بلحق قريب..
تالاسين :خاصني نجيب حوايجي لي عندك..
براء :بلا ما تعذبي.. انا نسيفطهوملك مع شي حد
تالاسين :(شافت فيه ورجعات قلبات وجهها معبسة) مزيان..
براء :حتا هو دابا نحلوه.. الواليد يدو واصلة وايلقى شي حل ما تخافيش.. (بسخرية) واصلا هداك ما زواج ما حتا لعبة ههه... راه شرعا باطل
تالاسين :(باستفهام) كيفاش؟.. علاش؟
براء :راه بااين علاش.. اهم شرط من شروط الزواج هو ان الطرفين يكونو موافقين وبكامل قواهم العقلية.. وحنا حتا واحد فينا ما عاقل على راسو.. يعني.. زواجنا باطل..
براء :(ضحك بثقاالة وبنبرة ساخرة) كنت كنغطي الشمس بالغربال وكنضحك على راسي.. بلحق اليوم هضرت مع الواليد وفيقني وقالي بركة ما تحلم..
تالاسين:(حالة فمها متفاجئة) يعني!!
براء :يعني الالة..ما كاين زواج.. كاين زواج على الاوراق ودغيا يتحل.. يعني داكشي غير شكلي.. وحتا القاضي فاش يعرف الضروف لي كنا فيها وبلي ما كناش صاحيين ايلغي داك العقد.. يعني المسألة مسألة وقت وصافي
شافت فيها مطولا كترمش.. وهو كيشوف فيها بنظرة غريبة.. غاامضة.. ما قدراتش تفسرها.. شبهاتها لنظرة وداع.. ما عرفاتش علاش.. حساتو كيقولها صافي سالينا.. حد هنا وكل واحد وطريقو.. تنهدات وقلبات وجهها.. غارقة فدواااامة من الافكار.. وطاااال الصمت مرة أخرى حتا كسراتو هي للمرة الثانية.. وهي سارحة بعينيها قدامها.. وكتهضر بهدوء عكس الصراع والروينة لي كتحس بيها...
تالاسين :سنخ اسرايي ورتفهمت مساتينيخ..غاكاد أيوفن..مهم ريخ اتنيخ...اسان اللي ديك زريخ شوان..اراستجون تناساخ..سنخك ...قربخ سرك..دغايللي اراتناكرخ...ميارخك..ارسنخ مدريخ...دمامنك اسدوديخ غاكا..ميشا غايللي سريخ اتتسانت اريخك اتدوت...اريخ انتباعدت..... (عارفاك ما اتفهمنيش شنو كنقول.. واحسن حاجة هي انك ما اتفهمنيش.. مهم بغيت نقولو.. كانت ايام زوينة دوزتها معاك.. عمري نساها.. عرفتك كثر.. وقربت منك كثر.. ولي ما قاداش نكرو.. هي انني ولفتك.. ما عارفاش شنو باغة بالضبط.. ولا علاش انا رجعت هاكة.. بلحق لي عارفاه هو انني ما باغاكش تمشي.. ما باغاكش تبعد..)
سكتات.. وما دارتش شافت فيه.. وخلاتو هو جالس كيشوووف فيها وعاقد حجبانو..
شاف فيها عاقد حجبانو.. ما فهمهاش.. وما فهمش علاش هضرات بالسوسية فجأة.. وضرو راسو يعرف شنو قالت..
براء :شنو قلتي.. ما فهمتش.. هضري بالدارجة
تالاسين :(تبسمات بسخرية) كون بغيتك تفهمني كون هضرت بيها
إرحموني الجزء 16
محتوى القصة
التنقل بين الأجزاء