سكتات.. وضرباتها اللقوة.. وهو حاكمها مزيان من خصرها ويديها فوق صدرو وعينيها فعينيه.. وبزوجهم كينهجو بقوة ما جراو.. حسات بتوتر عجيب.. والنفس تقطعات فصدرها.. وبفشلة خواتلها الركابي.. كون ما هو لي شادها كون طاحت.. وبقات غير كتبرقق فيه ونطقات بصوت خافت وهي مرفوعة..
تالاسين :رخي مني
براء :ماشي قبل ما تهضري
تالاسين :(دوخوها عينيه وزادت كملات عليها ريحتو) رخي مني ابراء
براء :(زاد زير عليها وتبسم بخبث) اتهضري.. ولا انهزك ونرميك.. ختاري واحد فيهم
سرطات ريقها بتوتر والهضرة ثقاالت فلسانها.. وهي حانية راسها ما قاداش تشوف فعينينه وهي راسها يله ضاربلو فذقنو حيث هازها معليها واقفة على ريوس صبعانها.. وكتحس بالنفس ديالو كضرب فوجهها فاش كيهضر... قريييييبة بزااااف... والجو كان خالق واحد الهدوء غريب.. غير هما ولبحر..
براء :غير قولي.. واخة يكون معيور ما نديرلك والو.. بلحق ما تكذبيش.. راه انعيق بيك
تالاسين :(زيرات على جاكيط ديالو) رررر.. رخ.. رخي من..
قبل ما تكملها.. طاحت بين يديه سخفانة.. كلها فاااشلة ومرخية.. وبانطوفتها مشات مع الماء هذا شحااال.. يله شدها طلقاتها هي.. طلق كلاكيطتو تبعات البانطوفة.. وشدها بين يديه مخلوع.. ما عرف راسو باش تبلا... شدها كيضرب فوجهها بشوية مفتون..
شافها ما دارت حتا رد فعل.. حط يدو تحت ركابيها وهزها وتم خارج بيها.. ومرة مرة يشوف فوجهها واش فاقت.. وهي رااخية يديها وراسها.. ما هيااااش فهاد العالم.. طلع بحالو بصعوبة حيث الطريق دالطلعة فيها لحجر حتاا وصل لسيارتو.. بغى يفتحها لقى سوارتو فالجيب ما عندو كي يدير.. تمحن معاها.. وحاول يوقفها على رجليها وهو شادها من خصرها وهي كتعواج بين يديه.. حتا فتحها وجلسها فبلاصتها وشعل الضوء.. وبقى واقف عند راسها كيضرب فوجهها.. لقاها مزالة غايبة.. فتح البيبان لور.. هز قرعة دالماء عندو تم.. وبدا كيرش على وجهها.. مع الرشة الثانية مع قوصات حجبانها وبدات تفتح عينيها وتسرط فريقها..
تنهد براحة.. وحط يدو على أعلى السيارة وحط جبهتو عليها وهو كيشوف فيها حتا فاقت على خاطرها وكتشوف فجنابها..
تالاسين :شني وقع!
براء :نسولوك نتي شنو وقع!!! ما كليتيش ياك!!!
سكتات كتشوف فيه.. وعاد كترجع الكاسيطة لور وتستوعب شنو وقع.. حتا تعقلات وهي تجلس عليها كتقاد فحالتها وعينيها كيدورو ما قاداش تشوف فيه..
تالاسين :اه ما كليتشي.. ومع جريت.. عليها يمكن
براء :(معبس) وعلاش ما كليتيش
تالاسين :غير ما قديتشي.. (شدات فراسها كتلف) نمشيو بحالنا!! عيييت..
شاف فيها مطولا مخنزر.. ورجع هز راسو وسد الباب ودار جلس فبلاصتو ومدلها القرعة..
براء :هاكي شربي
شداتها منو ويديها كيرجفو.. القرعة كتلعب بين يديها.. هبطات عليها كتشرب وتعاود تفزك ريقها لي نششف عليها.. وهو كيشوف فيها معبس..
براء :تبقاي تاكلي.. ونتي على سبة
تالاسين :الصمت
بغى يديماري الاوطو وهو يشوف راسو بلحفا.. وتنهد..
براء :بسبتك لحجر كامل دخل فرجلي وانزيد نسوك بلحفا
تالاسين :الصمت
سكتات.. ما بقالها لسان لي يهضر.. ولا جهد باش تجاوب.. وغير الحشمة لي فيها مخلياها تلقوا ما تهضرش.. شاف فيها وقلب وجهو كيحرك راسو يمين شمال..
فاتو ثلاث ايام.. عاديين.. ما فيهم حتا جديد.. من غير ان الحاجة رقية صحات ورجعات تجلس معاهم فالطبلة.. كما العادة.. أما الباقي فمزال على حالو.. شي مبعد على شي.. وفاش كيتلاقاو لوجوه.. كتقلب الطريق..
ناضت هاد الصباح كالعادة.. من بعد ما قادات حالتها ولبسات عليها وصلات.. نزلات باش تلحق الطبلة دلفطور..دخلات عليهم لقاتهم مجموعين..شافت فبيسان وزينب.. تنهدات وحدرات عينيها وجلسات فبلاصتها..
تالاسين :صباح الخير
الجميع :صباح النور
التزمات الصمت.. ومدات يديها تفطر.. وغير جهاد وجواد لي حاميين السوق وكيجبدو لي حداهم ولي قدامهم ومهضرين كلشي.. حتا دخل عليهم براء عاد جاي من السبور..ووقف فالباب عرقان..
براء :غير لبروجرام لي كنت خدام فيه.. مزال ما كمل.. دايرين معايا شهراين وانا ما كملتهاش.. وخاصني ضروري نكملها.. راه بيناتنا كونطرا..
فراس :راه حتا خداو تعويضاتهم على هاد المجية لي جا عاد طلقوه
جهاد:اترجع لكندا عاود
براء :لا محالش
هما كيهضرو وهي عينيها كتمشي وتجي بيناتهم مصدومة.. والدغمة واقفالها فالحلق..
فراس :اااه ما حدي مفكر.. خاصك تسنيلي واحد الوكالة قبل ما نسى
براء :وكالة؟ ديالاش
فراس :على قبل طلاقكم
حصلاتلها اللقمة وخرجو عينيها وبدات كتكح ووججها رجع حمر ايطرطق وهي كتنش على راسها وكتسعل..
رؤيا :بسم الله عليك.. هاك شرب
هنية:حلال ابنتي حلال
شدات منها الكاس هبطات عليها خطرة وحدة.. وعينين الكل عليها.. حطات الكاس ويديها على صدرها وكتسرح فحلقها وعينيها دمعو بقوة ما سعلات..
تالاسين :غير وقفاتلي.. ولا عليكم..
فراس :(شاف فيها مطلع حاجبو وقلب وجهو لبراء) مهم.. انا انتكلف بطلاقكم.. ولكن نتا دابا اتسافر وخاص شي حد يسني فعاوطك
كانت عينو عليها عاقدهم.. هي لي كتهرب بعينيها منو ما تشوفش فيه.. سكت شوية ورجع شاف فباه وطلع حجبانو بزوج لفوق وتنهد...
براء :واخة.. ندوش ونهبط ونسنيهالك.. يله بصحتكم...
قلب الدورة طلع بحالو كيسوط.. وهي تزيرات فبلاصتها.. بقات غير كتبرقق..ما عرفات ما تقدم ولا توخر.. بقات مصدومة فبلاصتها.. حساتهم بحال الا شي حد زرب عليها.. كانت ناوياه ايبقى هنا.. ولكن دابا هو ايخرج من الدار ومن لبلاد وزيد عليها الطلاق... سقرات فمكانها كتحط الدغمة ففمها ساعة عاد كتسرطها.. وهي بالها ساااارح...
ناضو على الطبلة.. وناضت حتا هي دغيا.. وبالزربة طلعات لبيتها.. باغة تبقى بوحدها... دخلات لبيتها كتمشي وتجي وتخمم.. وتعض فصباعها وطرطقهم..
تالاسين :اواعدي شعندي انا.. علاش رجعت هايدا.. ياك هادشي لي كنتي باغة.. ايوا شعند حسك دابا.. تفو تفو تفو.. وحتا هو مزروب يمشي.. (حطات يديها على فمها) شني انعمل دابا!!!!!...
واحد زوج ثلاثة.. ما حسات براسها حتا كانت واقفة قبالة بابو لي اصلا قدام بيتها.. كتحط يديها دق وترجع تردها عندها.. وتالفة غير بوحدها.. حتا تفتحات فوجهها على غفلة.. وشهقات مفزوعة.. وهو واقف قدامها عاقد حجبانو مستغرب ولابس حوايجو وباين عاد مدوش من شعرو...
كان كيبينلها بروووودة فجوابو.. وهو راه ربي لي عالم بيه.. ولكن باغي يحط حد لحالتو.. وللعذا لي هو فيه.. وما بقاش باغي يبزز عليها شي حاجة..
تالاسين :مزيان.. انا جيت نقولك بسلامة
مداتلو يديها.. ورسمات ابتسامة بلهاء على وجهها.. شاف فيديها ورجع شاف فيها عاقد حجبانو بتركيييز فوجهها.. وحتا هي كانت عينيها وسط عينو.. حسات بدفء كف يدو لي شدات يديها.. وزيرات عليها.. وفجأة.... هووووب جرها لعندو عنقها وزير عليها كأنه كيودعها...
مع حسات براسها وسط حضنو.. مع زيراتها البكية وبزز باش حبساتها... حطات يديها على ظهرو... وبشوية بشوية بدات كتزير على تيششورط لي لابس.. وتزير على فمها كثر باش ما تبكيش.. ما بعداتوش... هي بيدها كانت محتاجة هاد العناق.. كان كتسمعو كيتنهد ونفسو كضرب سخونة.. وهو يد حاطها على ظهرها ويد فوق راسها... كيشبع منها.. ومن ريحتها... حتا نطقات بنبرة منغنغة..
تالاسين :أدورت دوت (ما تمشيش)
بعدها عليه بشوية.. وشاف فيها عاقد حجبانو.. وربع يديه...وهي حنات راسها كدور فعينيها...
براء :عاود!!! بلعاني كديريها
تالاسين :(ضحكات كتلف) هههه شعندك ما تخافشي.. ما زبلتشي فيك.. قلتلك غير طريق السلامة زعما وصافي
براء :(مصغر عينيه بتشكيك) مأكدة؟؟؟
تالاسين :امممم.. مهم نخليك دابا... ما نزيدشي نعطلك
براء :الصمت
شافت فيه.. وشاف فيها... ما تنكرش بلي ما كرهااتش تنطقها.. وتقولو ما يمشيييش.. باغاك تبقى.. بصريح العبارة.. ولكن لسانها كيخونها وما كتقدرش تهضر.. وفلخر قررات تسكت..
براء :تهلاي فراسك
تالاسين :حتا نتينا.. وما تبقاشي ترمي راسك فين ما كان.. رد بالك مع ديك الكاميرا
براء :(ضحك بزز) ههه ان شاء الله
سكتات..وشافت فيه مبسمة.. ودارت داخلة لبيتها.. وقفات عند الباب.. ودارت شيراتلو لاخر مرة.. وهو تبسم فوجهها ابتسامة خفيفة وهو واقف مربع يديه.. وفتحات بابها ودخلات...
🍃🍃🍃🍃🍃
وقف عليهم فباب الصالة من بعد ما سنا لباه الوكالة.. بغى يسلم عليهم قبل ما يمشي..
براء :ايوا الله يهنيكم.. خليتكم هاد الساعة
رؤيا :صافي مشيتي... خليك غير حتا تغذا
براء :لا نمشي.. بحال بحال
رؤيا :(باسى) براحتك.. واخة نشبرك عارفاك ما اتبقاشي
ناضت كتسلم عليه.. وتبادل معاها الاحظان.. ومع باقي العائلة لي كانو اغلبيتهم باقيين جالسين.. وفراس واقف كيتسناه حيث ايخرجو مجموعين.. ولحسن الحظ ما كانتش بيسان وزينب.. حيث كان ايقمعهم قمعة قبيحة وسطهم..
تم خارج وهو يهز عينيه.. وشاف فيها واقفة فالهبطة دالدروج.. زاد هز عينو وهي تبانلو بيسان لي كطل عليه من لفوق.. غير جات عينيها فعينو عبس وقلب وجهو خارج بحالو.. وخلاها هي الدمعة واقفالها على طرف عينيها..
خرج بحالو هو وباه.. جر امينو معاه.. وديمارا وزاد.. مخلي لعقول كلها معاه.. وهكاك توالات الايام عليهم فالدار.. نهار مور خوه.. وتالاسين بشوية بشوية رجعات تهضر مع ختها.. ولكن غير سلام.. لباس.. مزال ما وصلات معاها لدرجة الصفح.. بلحق كتشوف حالتها كتعز عليها.. أما هي فعقلها كووووولو كان معاه.. كتقيل وتبات تخمم فيه.. وكتعياااااا تعافر باش تزولو من بالها ووالو... ورجعات لصفحتها والمعجبين ديالها لي شحاااال ما طلات عليهم غير باش تلاها وما تبقاش تخمم.. وبيسان حالتها مع سعد هي هي.. كل نهار معيطلها بنمرة.. وكل مرة مبلوكياه... وهو حااالف حتا يهضرها.. وهي حاااالفة ما تعبرو.. وفوسط المعماااعة لي هي فيها.. اااخر واحد هازالو الهم هاد الساعة.. هو سعد...
🍃🍃🍃🍃🍃
مجموعين على الطبلة دالعشاء... هضرة من هنا وهضرة من لهيه.. ومرة مرة السكات.. حتا نطقات رؤيا وهي كتشوف ففراس..
رؤيا :هضرت مع براء عاد دابا شوية.. قالك غذا مسافر.. وما علمني حتاااا لاخر ساعة.. زعما داك الولد.. ما عرفت منين نشبرو
رقية:اويلها على غذا.. شهاد الزربة زرب علينا
رؤيا :هانتينا كتشوف.. كون غير جا قيل معانا هاد النهار نشوفوه.. هو حراااام ولا عذب راسو
فراس:حتا لغذا وسيرو سلمو عليه وصافي.. بلا ما ديرو فيها اليدين والرجلين
رؤيا :(ميقات فيه) نتينا بعدا غير سكت.. بااااينة كونتي عارف قبااااال وما قلتي والو
فراس :ياك ديك نهار قالكم من دابا سيمانة ايمشي
رؤيا :ولكن ما قالشي شمن نهار بالضبط
فراس :حتا دابا ما وقع والو.. الطيارة عندو حتا لمور ظهر.. سيرو عندو فالصباح شوفوه
رؤيا :نتينا ما اتمشيشي؟
فراس :انا دابا نجي نسلم عليه فاش يقرب يمشي
رؤيا :باازلك اخويا باااز.. موحالش واش عندك القلب
ناضت وقفات على غفلة.. وشافو فيها كلهم بعدم فهم.. عاد حسات براسها وبالوقفة لي دارت..
تالاسين :سمحولي.. شبعت.. وجاني النعاس انطلع بحالي
فراس:(كيمسح فمو) قبل ما تمشي.. اجي معايا للبيرو واحد شوية!!
رؤيا :ياك لباس
فراس:والو باس.. كملو عشاتكم(غمزها)
ناض خارج.. ولحقاتو.. دخل للبيرو سبقها ودخلات هي موراه وهو يتقدم فتح لمجر ديالو وجبد منو ورقة..
شافت فيه ساكتة.. وزيرات على اطراف تيشورط ديالها بيديها.. حسات بقلبها تزير عليها كثر ما كان مزير.. وبلي شي حاجة كتمشي من بين يديها بشوية بشوية... شافت فديك الورقة.. صافي.. بقى غير تهز ستيلو وتسني وايرجع كلشي كما كان... وفحال الا عمرو كان... كلشي ايسالي.. وكلشي ايحبس.. هزات عينيها فيه... باغة تبكي.. وباغة تقول لا.. وباغة تقول ما بغيتش.. وما قاداش... بشمن حق تقولها وبشمن وجه.. وهي لي كانت نهار وما طال وهي تلعن فهاد الزواج... شدات الستيلو بيديها لي كترجف.. سرطات ريقها.. وعينين فراس عليها..
وعينين فراس عليها.. مراقبها مزياااان.. خدات نفس وسنات دغيا وهزات راسها فيه كترمش بالزربة وحلقها محبوووسة فيه البكية...
تالاسين :صافي.. نقدر نمشي
فراس :(بنظرة غريبة) اممم.. مزيان دابا.. كوني هانية.. كلشي ايتصلح ويرجع كما كان
تالاسين :اه.. ان شاء الله...
فراس :اصلا براء ايسالي الرحلة ديالو ويرجع لسويسرا.. ما ايرجعش للمغرب.. يعني ما اتبقايش تحاكي معاه وهاكة ما ايكون بيناتكم حتا إحراج
خرجو عينيها فيه... ما قدو فيل زادو فيلة... ما بقات عارفة واش تشد رجليها لي كيغزلو ولا تشد راسها... زاااد زعزعها كثر وكثر... خلاها غير كتبرقق فبلاصتها... تزير عليها خاطرها.. وحسات بقلبها تقبض.. بزز باش قدرات تحرك لسانها وتجاوبو غير باش ما يعيق بوالو واخة حالتها كانت باينة..
تالاسين :اه.. مزيان.. الله يعاونو
فراس :(تبسم ابتسامة. جانبية) امين
تالاسين :ااا.. اانا.. انمشي.. انطلع.. خاصني نعس..
فراس :اه واخة.. تصبحي على خير
دارت خارجة بحالها.. دارت فالدورة تخبعات.. وتكات على الحيط حاطة يديها على فمها باش ما تسمعش الشهقة ديالها لي ما قدراتش تحبسها.. وتبعوها دموعها... وحدة كتجر ختها... حاسة بقلبها كيتعصر.. شافت فجنابها وضرباتها بجرية طالعة لبيتها كتبكي.. غير دخلات وسدات عليها الباب وجلسات فالارض...
حسات بروحها كتزهق منها وهي كتفكر هضرة فراس.. صافي ايمشي ما ايرجعش.. والطلاق غاد ييطلقوه... ويقدر يمشي ويرجع بمراتو وولادو... فاش طاحت هاد الفكرة فبالها بغات تحماق... بغات تسطى.. ولفاااتو حداها.. كيحميها.. كيتهلا فيها.. كيبغيها.. الراحة لي لقاتها حداه ما لقاتها فحتا بلاصة... راحة فشكل مبدل... كتحس براسها مع راجل يفرط فروحو وما يفرطش فيها... ولكن دابا... كلشي ضاع.. وهي لي ضيعاتو من يديها...
🍃🍃🍃🍃🍃
كان جالس فالبالكون دالدار ديالو.. حاط كاس قهوة حداه.. وكاميرتو كيمسح فالعدسات ديالها ويقادها.. وامينو كيلعب حدا رجليه... وعاااقد حجبانو... حتا هو عارف راسو ايحن.. عارف راسو ما اينساهاش.. عارف راسو ايتعذب... ولكن بالنسبة ليه هو "الحاجة لي ما تجيش بالخاطر.. ما تجيش حتا بزز"... وهو عيااااا بالخاطر.. وتهد حيلو وما بقاش قادر يزيد كثر...
سمع الصوني دالباب.. هز راسو مطلع حاجبو باستغراب.. هز تيلي شاف شحال فالساعة.. كانت 12:30 دالليل... شكون ايجي عندو فهاد الساعة..حط داكشي لي فيدو.. وناض كيجر فرجليه بلحفى وسروال كيطمة مبين خط البوكسور لي لابس... ومن الفوق كالعادة.. وشعرو مخليه على راحتو.. طايح على جبهتو... وشاعل ضوء خفيييف فالدار.. والسكاااات والكالم كيتسمع غير صوت امينو لي كيلهت.. فتح الباب... وشاف فيها كيرمش وهي واقفة قبالتو...
شاف فيها.. واقفة قدامو.. ببيجامتها لي كانت بيها فالدار.. رامية عليها كاب طويييل حد الركبة ساترها.. شعرها مخربق...وجهها حمر ايطرطرق.. ودموعها ملاقيين فذقنها.. وعينيها حمارو بقوة ما بكات... شافت فيه وشفاه ديالها كترجف.. وشاف فيها هو مصدوم من المجية ديالها فهاد الساعة.. وزاااد تصدم بحالتها..
براء :(بدهشة) تالا!!!!!
قبل ما يزيد يهضر.. رمات راسها فحضنو... تلاحت عليه وزيرات بيديها على عنقو وهي واقفة على طراف صباعها... وخلات دموعها وبكاها يتسمع فوذنو.. رجليها جابوها حتا لعندو وحتا لقدام باب دارو بلا ما تحس... خلاتهم حتااا نعسو ولبسات عليها وهزات الاوطو وخرجات فنص الليل جاية عندو... هادي هي اااخر فرصة عندها... والا ضاعت منها هاد الفرصة ايضيع من بين يديها للابد... وكما جروها رجليها عندو بلا ما تحس... جرها قلبها عندو وخلاها ترمى بين يديه وفوق صدرو... وتنطق لا شعوريا...
تالاسين :كنبغيك اههئ اههئ ما تمشيشي وتخليني اههئ اههئ
خرجو عينيه.. وشاف قدامو مخلخل... زربات عليه زربة خايبة.. ما فهم راسو من رجليه... بقى غير واقف جامد فبلاصتو وكيرمش.. حتا يديه لي يهزهم يعنقوها ما بقاش عارف يحركهم.. واش هادي تالا!!! تالاسين لي جاية عندو فهاد الساعة وفهاد الوقت وعنقاتو.. وزادت قالتلو كنبغيك!!!!!!!!.... زادت زيرات عليه كثر.. وهو يتأكد بلي بصح معنقاه... هو ما كيحلمش... هز يدو بشوية... وحطها على خصرها.. زاااد تيقن بلي واعي وصاحي... وكلها كترجف بين يديه.. وهو مزال فدوامتو نطقات مرة أخرى..
تالاسين :ما تخلينيشي اههئ اههئ
قوص حجبانو..عقلو حبس.. باغي يتيق شنو سمعو وذنيه وما قادرش... حس بقلبو كيزدح وسط صدرو... وحط يدو الثانية على خصرها... وطلعها ببطء مع ظهرها حتا استقرات على كتفها.. وبعدها عليه بشوية... شاف فوجهها... مزالة كتبكي... ونطق بصوت باين عليه بلي مبهوض..
براء :دخلي بعدا.. اجي
شدها من يديها... حس بيها شحال كترجف.. وهو ما كانش حسن منها... كان بصح مبهوض ومصدوم... ما بقى قشبل والو.. تبعاتو كتخنن.. دخلها وسد الباب.. وزيدها جلسات.. خلاها ومشى جابلها كاس دالماء.. مدولها تشربو وجلس قبالتها على الطبلة وهو كيششووف فيها.. حتا سالات ومداتولو وهي كتمسح وجهها بكمها وحانية راسها...خدا نفس طويييييل ومن بعدها زفيييير كأنه كيتبث راسو ومد يدو.. وشد دقنها باطراف صبعو.. وهزلها راسها حتا شافت فيه..
براء :شوفي فيا وهضري.. واش لي سمعتو عاد دابا شوية بصح!!!!
شافت فيه ساااكتة.. وعينيها كيقطرو بالدموع لي ما بغاوش يوقفو.. وهو كيتسناها تجاوبو..
براء :ما تبكيش جاوبيني.. واش سمعتك قلتي كنبغيك ولا غير انا بديت كنخربق
حنات راسها كتلعب بصباعها وساكتة.. كااااع ديك الزعامة لي جابتها حتا لعند بابو وخلاتها ترمى بين يديه مشات دابا... وبقات غير الحشمة وهو قدامها مسفح عاود... عااد دابا رداتلو البال.. قبيلة فاش عنقاتو كانت معمية... كان الادرينالين لاااعبلها على عينيها ومضببلها الشوفة... قريب ليها وفاتح رجليها بجلسة رجولية قبالتها على الطبلة.. وهي قدامو جامعة رجليها وملاصقهم... وضاربة الطم...
براء :جاوبيني قولي شي حاجة ما تخلينيش هاكة... واش داكشي لي سمعت بصح...
تالاسين :الصمت
براء :(حنا راسو طل عليها)هضري... واش بصح داكشي لي سمعت!!!!
سرطات ريقها.. ودوزات لسانها على شفايفها لي نشفو.. وحركات راسها بالايجاب... بمجرد ما دارت هاد الحركة... حل هو عينيه على وسعهم.. وناض وقف كيضحك ويرجع يسكت.. يديه على خصرو كيمشي ويجي ويرجع يشوف فيها بحال الا كيتأكد..
براء :(مسح على شعرو) ما يمكنش... لا ما يمكنش هههه... كضحكي ياك..
رجع جلس قبالتها.. وحط يدو على جبهتها وهبطها لحنكها وللحنك لاخور وكيقلبها عنداك تكون طالعالها السخانة..
براء :ما بيك والو... مأكدة؟؟؟
شافت فيها مطولا... وشدات يدو لي على حنكها هبطاتها... وحطات عينيها فعينو.. ونطقات بصوت كيرججف بلبكية...
تالاسين :براء اههئ ما اتخلينيشي ياك!!!!
تبسم.. وشد راسها بين يديه بزوج.. وحط عينيها فعينيه لي كيبريو...
براء :كتبغيني ؟؟؟
تالاسين :الصمت
براء :هضري.. ما تسكتيش
تالاسين :(حركات راسها بالايجاب وهي غارقة فحوايجها)
براء :حلفي؟؟؟
حنات راسها.. وهو قرا الحشمة فوجهها... تبسم وااحد الابتسامة... ابتسامة فرحة.. ابتسامة حلم وتحقق.. ابتسامة رااحة.. قلبو كيحس بيه ايخرج من بلاصتو.. وبدون شعور تلاح على خدودها ووجهها كيبوس فيها وهي تبهضات بين يديه...
براء :وانا كنحامق عليك.. وكنتسطى عليك.. وكنموت على جد جدوووودك
بعد وشاف فوجهها وهو كيضحك وفرحاااان.. وهي كترمش بعينيها... وجرها عندو ودفنها فصدرو... قربها لقلبو وزير عليها... بغاها تحس بيه... حس براااااااحة... وفرحة ما كتوصفش... كون لقا يشدها يعبزها... ياكلها.. يرفسها... كيعنقها ويرجع يبعدها عليه ويشوف فوجهها يتأكد بلي صاحي ويرجع يعنقها... زفر كأن حمل تحيد على كتافو... وتنهدات هي... وهي كتدور يديها عليه... من بعد ما ارتاحت.. وخرجات لي فقلبها... ومن بعد ما رجعات لحضنو لي استفقداتو... خلاها هاد المرة هاكاك بين يديه.. وسااااكت.. عاطي لراسو مساحة فين يتهدن ويضبط راسو... حيث الفرحة لعباتلو على المخ وشوية وينوض يغوت...
طالت لحظتهم.. وطال سكاتهم.. حتا قرر يبعدها عليه شوية.. ويشد وجهها بين يديه وهو مبسم وينطق..
براء :غفلتيني هههه
تالاسين :(ضحكات حشمانة)
براء :(شدها من حنكها) يخليلي لحشمان ديالي انا.. (زول يدو وشاف فيها) ياك مأكدة بلي ما شاربة والو
تالاسين :(ضرباتو لكتفو) بركة من الطنز ديالك
براء :(ضحك) وراه ما متيقش ههه.. اجيي.. عاوديها نسمعها باش نتيقن مزيان
تالاسين :(حنات راسها كتشوف فيديها لي كتحكهم) هاد النهار.. عمي عطاني نسني على ورقة طلاقنا.. (سكتات)
براء :ايوا؟؟ وسنيتي!!
تالاسين :(تنهدات) اه.. سنيت.. ومن بعد قالي بلي نتينا اتمشي من الرحلة لسويسرا وما اترجعشي (غلباتها لبكية) نتينا ما اتمشيشي ياك.. ما اتخلينشي...اههئ اههئ قولي بلي ما اتمشيشي عافاك..
براء :دابا نتي.. جيتي فنص الليل.. وبوحدك.. وقلتيلي كنبغيك.. غير حيتاش عرفتيني انمشي ما نرجع!!!
تالاسين :(سكتات كدمع)
براء :ونااااري عليك على كااامونية ههههه... كون سحابني كون من شحال هادي مشيت ما رجعت
تالاسين :شوف.. انا جيت عندك فالليل.. اه.. وقلتلك... اححم.. وقلتلك داكشي... اه.. ودرعتك.. ولكن ما تفهمنيشي غلط
كانت كتهضر وتهرب بعينيها.. والحشمة باينة من هضرتها لمتفتفة.. وخدودها لي حمارو ويديها لي غير كتحرك فيهم فما جاب الله.. وهو كيشوووف فيها مطلع حاجبو ومبسم..
براء :نتي لي ما تفهمينيش غلط.. ونقي داك لعقل عندك... ودابا اجي
شدها من يديها جرها على وقفتها جابها جالسة بين رجليه... دور يدو عنقها.. حط ظهرها على صدرو.. ويديه فوق كرشها مدورهم عليها.. وحضنها عندو.. غفلها غفلة من داكشي.. خلاها كتصفار وتخضار فبلاصتها.. وترمش بعينيها.. وحشمانة منو واتغرق فحوايجها... حيث هاد المرة ماشي بحال اي مرة.. اليوم هي اعترفاتو بلي كتبغيه.. ومن ديك اللحظة كلشي تبدل...
تالاسين:براء ا..
براء :شششش.. انا بغيتك غير تبقاي حدايا هاكة.. ما بغيت والو
تالاسين :(النفس مقطوعة فيها وبزز باش كتنطق) خخخ.. خاصني.. نننمشي
براء :(شد وجهها بين يديه) شششش.. بلا بكى.. شفتي والله الا اول مرة نكره الخدمة... والله ما كرهت نبقى حداك.. واش عارفة شحال وانا نتسنى فهاد النهار..
تالاسين :(بترجي) وا بقى معايا.. ما تمشيشي
براء :ما نقدرش.. عاطي الكلمة.. وزيد عليها ساني معاهم كونطرا.. يعني ضروري خاصني نمشي
تالاسين :(سكتات شوية كتشوف فيه وعينيها مدمعين عاد نطقات) وا ديني معاك.. منين ما تقدرشي تبقى.. نمشي معاك
بعد يدو على وجهها.. وشاف فيها مطولا.. قلب وجهو تنهد ومسح على شعرو.. ورجع شاف فيها ورسم ابتسامة على وجهو.. وحط يدو على راسها ونااازل بيها مع اطراف شعرها.. وكيرجع يطلعها عاود.. وعينيه سارحة فوجهها
براء :انا أكثر واحد باغي نبقى معاك.. وباغيك تبقاي حدايا.. نصبح على وجهك.. ونمسي عليه.. تكوني اول وحدة تقوليلي صباح الخير.. واخر وحدة تقولي تصبح على خير.. وعمري نفرقك حتا لنهار تطلع روحي.. ولكن.. هاد المرة مجبور نبعد.. ما نقدش نبقى وما نقدش نديك معايا.. ولكن كنواعدك.. دغيا انرجع.. شهر ونص وهانا معاك
تالاسين :(كتغبن) علاش ما تقدرشي تاخذني معاك.. ياك مشيت معاك لمرة لي دازت... اولا
براء :ديك المرة غير هاد المرة.. ديك المرة ما كانش عندي معامن نخليك.. دابا كاينين مالين الدار.. يعني ما نخافش عليك.. وزيد عليها ديتك وشفت شنو وقع ليك.. يعني ما انعاودش نفس الغلط.. انديك ايبقى بالي كلو معاك عاود
السي المختار :(تلف) ااا.. نتي فعار الله ابنتي.. السي براء مشاااا.. هادي شي ساعة باش خرج
رجعات لور ما متيقاش.. حاطة يديها على فمها وبداو دموعها يسيلو.. وهي كتحرك راسها بلا.. خرجات كتجري عاود خلاتو ما فاهم والو... قالت يمكن تلحقو فالمطار.. خرجات كتجري ما كتشوفش قدامها.. بغات تقطع الطريق لسيارتها.. وما شافتش الاوطو لي جاية.. وخرجات وسط الطريق على غفلة.. وما حساتش حتا تهزات لسما وتخبطات للارض.. وتسمع صوت تكراط الروايد فالارض.. ومن بعد منها الصمت.. شافت فالسماء وعينيها كيتغمضو شوية بشوية.. شافت مها.. شافت باها.. راااهما.. كيعيطولها.. شهقات شهقة حاسة فيها روحها كطلع.. وكان هاداك هو اخر نفس ليها.. وتوتة توتة خلصت لحدوثة.. ماتت تالا.. وبراء وصلاتو لخبار وما قدرش يستحمل.. ونقز من الطيارة وهو كيغوت..
براء :مشات وما خديت منها حتا بوسة.. دعيتك لله ا اسماااااااااااااء
النهاية 😂😂😂😂😂😂
اعتذر غير ضاحكة بلا دعاوي 😇
قلبات وجهها ما عاجبها حال.. وجلسات مربعة يديها كتخنصص.. وهو جالس حداها ثاني رجل فوق الفوطوي ورجل حاطها فالارض.. وكيشوف فيها مبسم وعاجبو الحال.. عاجبو الحال وبزاااااف.. عاجباه وهي مقلقة عليه.. وهي كتعاتبو وهي باغاه يبقى حداها... فرحان لدرجة هو ما قادرش يستوعبها.. فرحان لدرجة حاس براسو كيحلم حلم زوييين.. حلم ما باغيش باقي ينوض منو.. مد يدو يحطها على وجهها وهي تضربهالو وقلبات وجهها..
براء :ههههه عاد قلنا بسم الله خاصني نبدا بالتحزار.. علاش نتوما لبنات هاكة علاش ههه ضروري تخصرو اللحظة..
تالاسين :(شافت فيه مخنزرة ميقات فيه وقلبات وجهها)
براء :ولكن نحزر حبيبتي علاش شحال عندي من حبيبة انا
زادت قلبات وجهها لجيهة لوخرا باش ما تبانش التبسيمة لي ترسمات على وجهها ورجعات جمعاتها..
براء :حتا لهاد الدرجة رجعتي كتبغيني.. لدرجة ما ساخياش نبعد عليك فمرة
تالاسين :الصمت
براء :من فوقاش بديتي تبغيني.. هممم!!!
تالاسين :(حانية راسها وساكتة)
براء :اتبقاي ساكتة..
تالاسين :(تنهدات وهزات راسها بتذمر) دابا ضروري تمشي.. شوف ما انعمل والو غير ديني معاك
براء :(مصغر عينيه) وبشمن وجه اتمشي بيه معايا هممم!!
تالاسين :كيفاش!!!
براء :ياك الورقة دالطلاق سنيتي عليها.. واخة ما نحسبوهش زواج دبصح.. والواليد وكلشي عارف بلي شي زواج ما بقى.. ايوا وكي اديريلها.. فين مشات الحشمة ديالك... اتقوليلهم غادة مع الراجل لي كنبغي حيث ما قاداش بلا بيه هههه لا لا صبري انا عرفت شنو اتقولي.. اتقوليلهم انمشي معاه هو راه بحال خويا ونحضيه حيث الا وقعاتلو شي حاجة خالتي اتقلق عليا هههههه
طرطق بالضحك فوجهها مخليها هي فبلاصتها اتنفرج.. واطرطق.. شافت فيه مطولا ميقة فيه.. ونزلات عليه بدقة لكتف غفلاتو حتا تقصح وهو كان كيموت بالضحك..
براء :احححح.. شهاد لحب لمسوفج عندك.. من الصباح ونتي خبط يا ما تخبط فيا...
تالاسين :بركة من داك الطنز ديالك.. راه كنهضرو بالمعقول
براء :غير خليك مزال.. حتا يقرب يطلع الصباح ونوصلك.. وهي هاديك نسلم عليهم
تالاسين :(سكتات كتشاور ورجعات كتنتر يديها) لا لا.. ايعيقو.. نمشي
براء :اربي على معكسة بلاني بيها الله..
حط جبهتو على يدو.. وهو كيحرك راسو يمين شمال.. ورجع هز راسو فيها.. شافت فيه.. وشاف فيها.. وهو يمد رجلو فوق الفوطوي سرحها.. وجرها عندو نعسها بين رجليه.. ولصقلها ظهرها على صدرو.. دور يدو عليها ورجليه حتا هما وخلاها كترمش فبلاصتها...
براء :(ضحك) لا ما يمكنش ههه.. راه هادشي بزاااف فليلة وحدة ههه
تالاسين :(قوصات حجبانها) علاش كتهضر!!!
براء :فليلة وحدة.. كتبغيني.. وتغيري عليا.. قرصيني باش نثيق
شافت فيه معبسة وكتسوط.. وهو كيضحك... صغرات عينيها فيه بشر.. وبغات تشدو بقرصة من دراعو.. لقات لحمو قاااصح.. وهي تشدو من اليد لوخرا ووالو.. هبطات يديها لكرشو كتافو ووالو... وهو كيضحك وهي كتمجنن..
تالاسين :(ضرباتلو يدو بعصبية) اااه غرت.. ومن بعد.. انا ما تقدرشي تديني معاك.. واتدي وحدة ياااخرااا.. هي اتبقى تعملا كما كنتي كتعمل معايا يااك؟؟؟... تشبرا يدااا.. تنعس معاها فنفس البيت.. تضحك معاها.. وتمشي وتجي نتينا وياها..ودوز معاها شهر ونص علااااااا قدو... شهر ونص ما دوزتاشي معاك حتا يانا... وبحال والو ترجعو مزوجين... ااااااصلا نتوما الرجال كلكم ولاد لحرام... البنت لي جات بسم الله.. وتجي ضحك عليا انا... شفتي غاااااا رخي يدي نمشي بحالي.. وحسبني ما جيتشي.. وما هضرتشي.. ونتينا ما سمعتي والو
شاف فيها ساكت.. مخليها تهضر وتعبر على خاطرها... وهي كتهضر وتحرك فيديها وتشوف فيه وتشوف فجنابها ومخشعة وهي كتسرسر لي فقلبها بلا ما تحس...وهو عينيه على تعابير وجهها لي كيتبدلو.. وشفايفها لي كيتحركو.. حتا سكتات وشافت فيه كتنهج..
براء :ساليتي!!!
تالاسين :اه ساليت الله يعاون
دارت غادة بحالها وعطاتو بظهرها وهو يجرها لصقها مع صدرو ودور يدو على كرشها مزيرها عندو وخشا راسو فعنقها كيهضر حدا وذنها بهمس..
براء :عرفت فحياتي بنات بزاف.. وشفت فحياتي بنات كثر وكثر.. ولكن نهار بغى قلبي.. بغاك نتي... ونهار اختاريت.. اختاريتك نتي.. ونهار تمنيت شي بنت فحياتي.. تمنيتك نتي... ما كانت حتا بنت من غيرك.. ديما كنتي نتي واتبقاي نتي.. وعمر شي وحدة ما تدي بلاصتك.. لا فقلبي.. لا فعيني.. اتبقاي ديما نتي احسن وحدة فيهم.. فهمتيني
سكت كيتسنا منها شي حركة.. شي جواب.. شي رد فعل.. ولكن فييين هي الذات لي تحرك.. ولا لسان لي يجاوب.. ولا لعقل باش تكون شي ردة فعل... البنت تشللات وطاح فيها النص.. القلب كيزدح.. الرجلين فشلانين.. اليدين كيرجفو.. ولعقل حابس.. والمعدة كتعصصصر.. وفنفس الوقت حاسة براسها كتفرفر... ذوبها بكلامو.. بهمسو.. بالطريقة لي كان ضامها ليها.. وبصوتو وسط وذنيها لي كان كيبورشها.. طلق منها شوية ودور عندو و شاف فعينيها وهو مبسم ويدو كداعب خدها.. وهي ساهية فيه..
براء :تفاهمنا..
حركاتلو راسها بالايجاب وهي ساااارحة وحالة فمها... والفراشات كيطيرو فوق راسها.. وصبعو كيتحرك فوق خدها ببطء.. زاد ضحك.. وحنى شوية وطبع قبلة على خدها وطوووول فيها.. خلاها غمضات عينيها عايشة اللحظة.. حتا بعد وهو ينطق كيضحك..
فيقها من داك الحلم الزوييييين لي عيشها.. وهي تخنزر فلبلاصة وهزات يديها كتشعط فيه.. تضرب وتعاود.. وتقمش فيه وهو زبط من الفوق و كيحاول يشدلها يديها وراجع لور...
براء :انا لي زمر غاااااا رصاي... احححح وا صافي ما تقمشييش هههههه
هي كضرب بيديها.. وبضفارها.. وهو محاول يشدلها يديها... وهربان لور.. حتا تعكلو رجليه فجنب الفوطوي وجا طايح فوق منو وجرها من يديها لي كان شاد طاحت فوق منو... هو كيموت بالضحك... وهي كتنهج بالاعصاب.. وكتنتر يديها وتفركل باغة تنوض من فوقو..
تالاسين :رخيني المرض رخيني
براء :(زاد زيرها) هههههههه والله حتا ضحكتيني
تالاسين :(هزات راسها فيه) وانا قلتلك تهجرو...
براء :(دور يدو على ظهرها) صافي البرهوشة ديالي.. راه غير ضحكت والله
تالاسين :ما ضحكشي معايا داك الضحك الباسل ديالك
براء :وا دابا غا سكتي وتهدني.. راه اطرطقي... شوفي كي رجعتي حمراء
تالاسين :(ساطت) وا رخيني نوض بعدا..
براء :ما اضربيش
تالاسين :لا.. ما انضربشي.. غير رخيني
طلق منها ناضت جلسات كتعاوط حوايجها وشعرها وتمسح على وجهها.. وهو تجلس حداها كيضحك ويقلب فالقمشات لي فيه ويشوف فيها... بقات جالسة حتا خدات نفس.. وهي تشوف فيه ونزلات عليه بالقبضة ديالها لكتف عوجاتو...
براء :اححح.. ياك قلتي ما اضربيش
تالاسين :(مكمشة فمها) حو فيك بحرا ما تعاودشي
براء :كتغفلي... راه انضربك ضربة وحدة نعوجك
تالاسين :ايوا حربش تمد يديك
براء :ههههه غير لقيتيني ولد الناس ما كنضربش لعيالات.. (كيشوف فالخبشات) بفففف.. تعلمتي لقميش من ديك المشة عندك
تالاسين :ونتينا تعلمتي الصعرة من داك الكلب لي عندك
برا:(هز راسو فيها مطلع حاجبو) هااااا وما فخباركش لكلاب شنو كيديرو للعضان...(كيقرب ويشوف فيها بشر) وخصوصا اذا كانت شي مشة... كيااااكلووووها
تبعاتو من سكات... فتحلها الباب طلعات.. سد الباب ودار لبلاصتو... ركب وشاف فيها وغمزها وديمارا الاوطو...
براء :ديري سمطتك
قلبات عينيها من بعد ما كانت كتشوف فيه... دارت سمطتها.. وقلبات وجهها لسرجم عاضة على شفايفها ومبسمة.. قلع غادي.. وهي مزالة قالبة وجهها.. حتا حسات بيد سخونة شدات يديها.. وجراتها عندها.. قلبات وجهها جيهتو... وهي تحس بقبلتو على كف يديها من لداخل... وقلب وجهو جيهتها وسيفطلها بوسة فلهواء... حبسات الضحكة ما تبينهاش قدامو.. وقلبات وجهها كتشوف قدامها حشمانة...
قلبات وجهها كتشوف قدامها حشمانة... وهو شد يديها شابكها مع يدو... وما طلقهاش... كتحس بيديها كتحرك وتمشي وتجي معاه.. وهي حانية راسها.. كتسمعو كيدندن ويطبل بصباعو على الفولون.. وعاجبها الحال... فرحانة حيث فرحان...
وصلو.. فتحولهم الباب دخل بشوية حتا وصل حدا بابا الفيلا.. باش ما يفيقهومش..وقف.. ودار شاف فيها...وحتا واحد فيهم ما ساخي بلاخور
تالاسين :وصلنا
براء :اه وصلنا.. خسارة
تالاسين :يله تصبح على خير..
جرات يديها من بين يديه.. زولات السمطة.. كتحرك ببطء.. بحال الا باغة الوقت يطوال.. تنهدات وفتحات الباب.. وهو يشدها من يديها..
براء :تسناي.. انطلع معاك
تالاسين :(خرجات عينيها) فاين..
براء :للبيت
تالاسين :واش حماقتي.. ولا حصلوك
براء :مالي براني.. حتا لا حصلوني نقولهم جاي نبات عندكم.. يله زيدي
دار خرج بحالو.. وهي بقات غير جالسة وكتشوف فيه.. حتا فتح الباب ووقف عليها..
براء :ما نازلاش.. نرجعو!!!
تالاسين :(خرجات ووقفات قدامو هازة. صبعها) الا حصلتي ما كتعرفني ما كنعرفك..
براء :امممم.. كتحشمي زعما
تالاسين :ومالي كي بنتلك
سكت ما جوبهاش.. اكتفى بابتسامة خلاها تفسرها على هواها.. سد الباب ودارو بغاو يدخلو وهي توقفو...
تالاسين :يله من باب الجردة... بلا ما تصوني ويفيقو..
تالاسين :هانتينا دخل من هنا لا بغيتي... انا اندخل من لهيه..
عطاتو بظهرها غادة.. وهو يتبعها دغيا وتمشى بجنبها ورمى يدو عليها... غاديين داخلين وهو شاقمها..وهي كتسكت فيه باش يهضر بشوية عندك يسمعوه.. وهو ما على بالوش... حتا وصلها لبيتها.. وتم باغي يدخل وهي توقفلو فالباب
تالاسين :(بهمس) افاين داخل اسي..
براء :(حط يديه بزوج على لكادر دالباب) غا نعسك فبلاصتك..ونعس حداك شوية و نمشي
تالاسين :تنعس حدايا!!!! دابا نتينا لي ضربك حمار الليل
براء :غااااا شوية مالك
تالاسين :هههه سير بحالك راك بديتي تخرف
براء :يله بلاش شوية... غااااا شْوَينة
تالاسين :مشي ابراء ههه
براء :يله غااا نعسك فبلاصتك
تالاسين :(كدفعو) وا مشيييييييي
براء :حشومة عليك... يله بوسيني ونمشي (عطاها خدو)
تالاسين :كتحلم فايق
براء :وا كملي على خيرك هاد الليلة وبوسيني.. غا بوسة صغيرة
تالاسين :تصبح على خير
بغات تسد الباب وهو يحبسها.. وهي مخرجة عينيها.. هو كيدفع وهي كدفع
تقلبات على ظهرها كتشوف فالسقف.. كتفكر احداث الليلة.. شنو وقع.. شنو دارت.. شنو قالت.. ردة فعلو.. تصرفاتو.. كلشي لقطة بلقطة.. مرة تحشم.. مرة تضحك.. مرة تسب فراسها.. مرة تسبو هو.. وترجع وتبدا ضحك.. شنو ما وقع وشنو ما قالت.. مهم مرتاحة.. فرحانة.. ما نادماش.. كانت اتندم دبصح كون سكتات.. كون بقات فعزة نفسي وما خرجاتش لي فقلبها.. ولكن كترجع وتفكر بلي غذا ايمشي.. غذا ايغيب عليها.. وكترجع تهز الهم.. دوزات ليلتها فالتقلاب والتخمام.. وهو ما كانش حسن منها.. مزال كيحاول يستوعب.. ولكن ما ينكرش بلي فرحااان.. وأول مرة من بعد مدة اينعس مرتاح.. وهو كيفكر بلي لي عطاها قلبو... اخييييرا.. دق قلبها ليه..
🍃🍃🍃🍃
حلات عينيها على نهار جديد.. تقلبات على جنبها سااارحة فالسماء لي كتبان من البالكون لي نسات ما سداتو فالليل.. تبسمات وخبعات وجهها فلمخدة.. وغير تفكراتو غادي يسافر.. تنهدات.. ناضت من بلاصتها.. قضات روتينها الصباحي.. لبسات عليها وقادات حالتها مزيان.. عوالة ايمشيو يشوفوه.. سرحات شعرها ودارتلو بوكلي خفيف.. مع سوميج بيضة معقودة من الكرش بيدين طوال.. وسروال طاي هوت.. شوية دالماكياج.. وصباط اسود.. وهي واجدة.. شافت راسها فلمراية عاجبها راسها.. هزات مينوشة لي كدور بين رجليها.. وتمات هابطة كتجري وتدندن..سمعات الضحك والهضرة جاي من الصالة دلفطور.. وتوجهات ليها.. حتا وقفات فالباب وهي تفاجئ.. جالس معاهم على الطبلة دلفطور.. باين غير من الفوق.. لابس تيشورط زرقاء... ونقص من شعرو لي كان طوال.. ونقص حتا من اللحية ديالو.. بااين ناشط وفرحان... غا هز راسو طاحت عينو فعينها.. وهو يتبسم كثر وكثر.. وغمزها.. خلاها غااا كتبيض فبلاصتها..
تالاسين :صص.. صباح.. الخير
الجميع :صباح النور..
هنية:زيد تفطر.. هادو ما كيتسناو حد
قربات بخطى بطيئة وهي عينيها كتمشي ليه وترجع تحدرهم.. عكسو هو لي ما هبطهومش.. حتا جلسات قبالتو فالطبلة ورخات مينوشة تمشي تلعب.. وهو ينطق
براء :(مطلع حاجبو بابتسامة) تالا.. صباح النور
هزات عينيها شافت فيه وهي حشماااااانة.. حتسة بلا كلشي كيشوف فيهم.. وعايق بلي وقعات شي حاجة. بيناتهم.. وهو راه حتا حد ما سايق لخبار.. غا هي لي منوية بوحدها..
تالاسين :(رجعات شعر مور وذنيها) صباح الخير..
جهاد :(جالس وكيتفوه)ااااااه جاي مفيقنا على نبوري.. ماشي حرام عليك
جواد:(كيتفوه معاه)ااااااه تقول بايت يحلم بين.. ييييخ
شافت فيه مخنزرة.. وناضت طالعة بحالها والسوميج ديالها كلها فزكات بالعصير من الصدر.. دفعات باب بيتها دخلات.. يله بغات تسدها.. وهي تحس بيها تجرات من بين يديها وشي حد شدها من خصرها ودورها حتا لصقات مع الحيط وتقابلات معاه... غاااا شافتو وهي تشهق.. وهو يسد الباب ولصق معاها...
براء :توحشتك
تالاسين :(دفعاتو من صدرو ولكن ما تزحزحش) شكتعمل... بعقلك؟؟؟؟ اواعدي.. بعد ايجي شي واحد
براء :(ما داهاش فيها وهز شعرها كيشمو) توحشتك.. وانتوحشك
براء :عليا انا؟؟؟... (شد شعرها بين يده) مسرحة شعرك.. مولفة تخليه على طبيعتو.. ودايرة الماكياج.. لي شحال ما شفتك بيه... ومقادة الحالة ومزيزة عليها... (بابتسامة جانبية) هادشي كامل غاااا حيث اتشوفيني
تالاسين :(سرطات ريقها) بسم الله عليك... كتحلم فايق... وزايدون بعد وهضر.. ضروري تلصق فيا
براء :(زاد كالاها) ما كرهتش نبعزك نتي.. غااااا سكتي..
براء :ماشي سوقك نتي فيهم.. انا طلعت نشوفك ونشبع منك.. ونعنقك قبل ما نمشي.. قدامهم عارفك ما اتبغيش
تالاسين :(تقبض قلبها) غادي دابا!!!
براء :(كيلعب فشعرها) امممم.. (تنهد) شوية وانمشي... انتوحشك والله... (شد وجهها بين يديه) مهم تهلايلي فراسك.. وردي لبال لصحتك.. نبغي نرجع نلقاك كما نتي ولا حسن... وعنداك نغيب عليك وتنسايني.. نجي ندير فيك لي ما درتش هذا شحال ههه
تالاسين :نتينا غا مشي ورجع دغيا.. وانا عمري نساك
براء :(تبسم وباس خدها بقووووة وشم ريحتها) اخخخخخ... اجا ما داني.. انمشي وانرجع عند حبيبتي دغيا...
تالاسين:(بأسى) ربي معاك.. حتا نتينا رد بالك لراسك.. وما تبقاشي فما مشيتي خاشي راسك فلمصايب.. خاف على روحك شوية
براء :ولا عليك.. دابا كاينة نتي خاصني نرجعلك ههه
تالاسين :الله يديك ويجيبك على خير
شاف فيها مطولا.. مزال لاصق عليها.. ووجهها بين كفوفو.. هازة عينيها كترمش فيه.. وتغرغرو ليها بالدموع.. تبسم.. وهبط على وجهها كيفرق بوسات ملهوفة عليه..
براء :كي اندير معاك كي اندير ... اخخخخ.. ما ساخيش بيك فمرة..
تالاسين :(ضحكها) هههه رصى بركة.. كون تحشم
براء :(بعد وحط جبهتو على جبهتها وتنهد) كنبغيك.. فوق ما كتخيلي
تالاسين :(تبسمات بخجل)
براء :(طلع حاجبو) فين هي حتا انا!!!
تالاسين :(جمعات النفس باش ما تبكيش وهزات راسها فبه بتحدي) ما انقولاشي.. ودابا رخيني نبدل حالتي
شاف فيها مطولا مصغر عينيه ومبسم.. وحرك راسو يمين شمال.. وطلقها من بعد ما قبلها اخر قبلة فخدها..
براء :هانتي.. يله سيري بدلي
طلقها.. وبعد عليها باش تمشي.. وتسناها تحرك.. ولكن بقات فبلاصتها.. غااا بعد شوية وهي تلاح عليه معنقاه وكدمع...
تالاسين :رجع دغيا عافاك اههئ اههئ
عنقها.. وزير عليها كيشم فريحتها.. ويتنهد.. وهي كدمع على كتفو.. عيات حبساهم وفلخر غلبوها.. بقات معنقاه لمدة حتا بعدات راسها.. أما هو ما سخاش يطلقها.. حنات وجهها كتمسحو.. وهو يهزولها حتا شافت فيه.. وباس جبهتها..
براء :ما نبغيكش تبكي فغيابي
تالاسين :(حركات راسها) واخة..
مسح على شعرها وخدها.. وطلق منها ودار خارج..
براء :يله سيري بدلي عليك.. وهبطي.. انهبط نسلم عليهم باش نمشي
تالاسين :واخة.. عندك تمشي قبل ما نهبط
براء :(ضحك) ههه لا.. وانا نقدر... يله دغيا
مشات هي تلبس عليها.. وخرج هو من بيتها وسد الباب من موراه.. يله فات شوية وهي تفتح باب بيت بيسان لي لاصق على بيت تالا.. وجات عينيهم فبعضهم.. ما كانتش جالسة معاهم.. بقى واقف كيشوف فيها بحدة.. وهي بدات كتقطرهم فصمت.. وتشوف فيه بترجي.. كتقولو سمحلي غاااا بعينيها.. وهو. جامد وواقف فبلاصتو... حتا نطقات
بيسان :اتمشي بلا ما تقولي بسلامة.. وبلا ما تسامح معايا؟؟؟
شاف فيها مطولا.. وقلب وجهو خدا نفس طويل... مسح على وجهو.. ودار شاف فيها.. كانت كتبكي.. ماشي شي حاجة غريبة عليها.. ولفات لبكى..
براء :(بحسرة) ماشي ديالك ابيسان.. ما تربيناش هاكة.. ما تربيناش على التخرويض
بيسان :عارفة والله حتا عارفة اههئ اههئ.. غلطت.. غدرت ثيقتك وثقة تالا والثقة ديال شحال من واحد فيا... فكرت غاااا حدا رجلي وما شفتش بعيد اههئ اههئ ضربت حساب وخرج حساب.. وهو الصراحة انا لي كنت كنضحك على راسي وكندرق الشمس بالغربال انهنههئ اههئ بلحق والله حتا ندمت.. عافاك سمحلي
براء :(تنهد) صافي سكتي.. لي فات مات
بيسان :يعني سمحتيلي اههئ اهء اهء قول اه عافاك
ما كانش قادر فهاد اللحظة يردها.. حاس براسو مرتاح وباااغي يزيد يرتاح... باغي يمشي وهو بالو هاني من جهة كلشي.. زيد عليها أنه فرحان.. وباغي فرحتو تكمل... ولي ما ينكرش بلي هاد الفرحة داك الزواج هو لي عندو دور كبير فيها..
براء :(مسح على راسها) الله يسامح
تلاحت عليه عنقاتو.. وبادلها العناق كيطبطب على ظهرها..
بيسان :شكرا اخاي اههئ اههئ شكرا حيث سمحتيلي
براء :دابا غا سكتي.. صافي
بيسان :اههئ اههئ انهنههئ
براء :(بعدها عليه وشاف فيها) صافي نساي.. وقع لي وقع.. وحنا ولاد اليوم.. (ضرب على خدها بشوية وتبسم) يله سيري غسلي وجهك وهبطي.. انا شوية وانمشي
حركات راسها بالايجاب.. وهو تنهد وبعد عطاها بالظهر.. وبقى متبعاه بعينيها حتا هبط ودخلات لبيتها تغسل وجهها..
🍃🍃🍃🍃
نزلات من بعد ما بدلات عليها السوميج بالزربة.. قادات حالتها وهبطات كتجري.. لقاتهم واقفين كيسلمو عليه.. وكيودعوه بالاحضان.. وكاين لي نزلو دموعو.. وهو كيحاول يسكتهم.. حتا حد ما ساخي بيه.. نزلات بخطوات بطيئة وقفات معاهم كتشوف فيه حابسة راسها ما تبكيش حتا هي... كان كيسلم على زينب فديك اللحظة... حاول ما امكن يصفي خاطرو.. واخة مزال ما قاد يطلق راسو.. سلم عليهم كلهم.. ودار كيقلب عليها بعينيه واش نزلات.. حتا جات عينو فعينيها وهي واقفة فواحد القنت.. تبسمات فوجهو بحزن.. وبادلها ابتسامة.. تنهد.. وقرب عندها.. وهي تكهربات فبلاصتها.. وكتشوف فيهم..
شاف فيديها.. وتبسم.. مد يدو كيضحك بسخرية.. وكيشوف فعينيها وهي كدور فيهم.. وبزز باش كتهزهم فيه.. شاف فيها مطولا.. وضحك.. وجرها عندو عنقها..
براء :اجي لهنا اجي ههه
مركات فبلاصتها.. ما عرفات باش تبلات حتا لقات راسها على صدرو ويديها كدوز على راسها.. شم ريحتها وطول فيها حتا تنهد.. وهي عاااااد ما زيراتها البكية.. خدات نفس استنشقات فيه ريحتو بلا ما تعيق.. ونطقات بهمس حدا وذنيه.. بينها وبينو..
تالاسين :حتا انا
غمض عينيه.. وتبسم.. كان باغي يبوسها فهاد اللحظة.. يعنقها ويزير عليييها حتا توجع... يهزها ويهرب بيها.. ولكن ضبط راسو بزز قدامهم.. وبصعوبة بعدها عليه وشاف فيها بابتسامة.. مخبعة موراها حنين لي بدا يتكون من دابا...
براء :تهلاي فراسك
حركات راسها بالايجاب.. والتزمات الصمت.. وغي عينيها لي كيهضرو.. تنهد وقلب وجهو وشاف فباه.. عارف الا ما بركش على راسو.. ما ايقدرش يخرج..
براء :مشينا!!
رؤيا :(شافت ففراس) اتمشي معاه!!
فراس:من تما للخدمة..
رؤيا :(بأسى) اه مزيان..
خرج بحالو.. وهو كيسمع الدعوات موراه.. كلشي كيدعي معاه ويوصي فيه.. وهو غي كيحرك راسو ويتبسم.. وتابعينو حتا خرج غادي موجه للسيارة هو وباه.. شاف فيها لآخر مرة واقفة مخبعة مور الباب وغير شوية لي كيبان منها.. ودموعها مخبعاهم وسط عينيها.. ضرو خاطرو.. ورجع قلب وجهو ما بغاش يزيد يشوف فيها.. وطلع بحالو.. وكسيراو بالطوموبيل..
كان مع باه.. وبالو معاها.. فرحان.. وفنفس الوقت هاز الهم وكيفكر.. وسرحاااان فااسرجم.. حتا حس بضربة ففخضو..
فراس :فاش كتخمم؟؟
براء هاااا.. ههه والو
فراس :عليا انا!؟
براء :ما ديرش فبالك.. اححم الواليد..
فراس :غا هضر
براء :خلي داكشي كما هو.. ما دير والو حتا نرجع
فراس :شنو داكشي.. علاش كتهضر
براء :قضية الطلاق
فراس :(طلع حاجبو) اهاااااه.. وعلاش زعما
براء :(حك شعرو) نجيك من لخر.. ما بقيناش باغيين الطلاق
فراس:شكون نتوما
براء :الواليد.. بلا تمرگين
فراس :ههههه اصلا كنت عااايق بلي غاااا كنحرق راسي.. هي القلب حن!
براء :(تنهد براحة) وييييييه.. واخيرا
فراس :ولكن داك الزواج راه ما دايزش.. واخة يبقى لاكط..
براء :وا حتا نرجع ونشوفو شنو نديرو.. نتا غا ما دير والو.. ويتسمى علينا طلاق
🍃🍃🍃🍃
طلعات لبيتها وهي كتفكر.. صافي مشى.. مشى وخدا قلبها معاه.. سييييير فوقاش تشوفو ثاني.. شحاال قدها تصبر وهي من دابا توحشاتو... خلا عليها فراغ كبير.. بدات كتحس بيه من دابا.. تلاحت على بلاصتها متكية كتشوف فالسقف ورجليها كيلعبو فالأرض.. كتحسب الثواني.. والدقائق.. والساعات.. ولي بشوية بشوية رجعو أيام.. يوم مور يوم...وحتا حاجة ما كتبدل.. من غير الشوق لي كيكبر فداخلها نهار على خوه.. نهارها كيدوز روتيني.. رجعات لخدمتها... لصفحتها.. ولعائلتها.. ولي يوم بيوم كانت كتسترجع علاقتها بيهم كما قبل بشوية بشوية... وعلاقتها ببيسان لي كانت كتحسن ولكن بوتيرة بطيئة...
اليوم ومن بعد إصرار ديال بيسان.. وافقات تخرج معاها.. لبسات عليها.. قادات حالتها.. وخرجات عندها.. لقاتها واجدة.. بيسان دايرة جهدها ترجع علاقتها بيها كما قبل.. وهي كتحاااول انها بصح تنسى لي فات وتبدا معاها صفحة جديدة... خرجو قاصدين المحلات كيشريو حوايج جديدة.. من مول لمول.. ومن محل لمحل.. وكيضحكو وكيحاولو يفوجو وينساو الهم... حتا وقفات تالاسين عند محل دبيع معدات التصوير.. سرحات فديك لافيترين.. ما كانش بالها مع شنو فيها... كان بالهااا غاااا معاه.. كتفكرو فين ما مشات.. حتا سمعات بيسان لي نطقات...
بيسان :توحشتيه!
تالاسين :(بدون شعور ساهية) بزاااااااف!!!
بيسان :(حابسة الضحكة) قداش كتبغيه
تالاسين :(تنهدات) ما تخاي...
قطعات الكلمة وسط فمها.. ودارت عندها مخرجة عينيها... وهي تفركع عليها بالضحك...
ما فهمات والو علاش جاراها... دارت تشوفها فين شافت... وهو تلقاه موراهم... تابعهم باغي يلحقهم قبل ما يخرجو... تبهضات فيه.. وبقات غا كتشوف... شحاااااال بينها وبينو ما شافتو... دارت شافت فيها وتبعاتها.. حتا كيوقف قاطع عليهم الطريق...
سعد :فين اتهربي عاود؟
شافت فيه مخننننزرة... وقلبات الطريق ولكن جا قدامها مرة أخرى... وتالا غاااا كتشوف.. هما كيجيو من هنا.. هو كيتعرضلهم من هنا... حتا عصبها
إرحموني الجزء 17
محتوى القصة
التنقل بين الأجزاء