صورة مصغرة لـإرحموني الجزء السادس

إرحموني الجزء السادس

sads
رواية ارحموني

حقا أيقنت أنك بلهاء..🍃
فكيف لهذه الدرجة أنت عن حبي عمياء!🍃
وعن نداء عشقي لك أنت صماء!🍃
فإرحميني يا سيدة قلبي وكفاني منك جفاء🍃

هزات راسها فيديها لبواطة ديال الدواء وناضت كتجر فرجليها وكتمشى مرفوعة..كتضرب اخماس فأسداس وعقلها كيدي ويجيب.. واش تغزل بيها عاد دابا ولا هي فاهمة غلط ولا شنو..لا لا أكيد غير قصد أن باغي يشوفها ديما ضاحكة وأنه ما مقلقشي منها..ولكن علاش قالها بديك الطريقة!!..فلخر نعلات الشيطان وحركات راسها يمين يسار كتمخضو..
تالاسين:لا لا ما يمكنش..شني كنخور يانا اواعدي ههه مستحيل
طلعات بحالها لبيتها ودخلات زولات عليها الشال وترمات فناموسيتها من بعد ما هضرات معاه وارتاحت نسبيا وغمضات عينيها فرحانة بعلاقتها مع سعد وفلبلاصة ودعات حيث اصلا ما مولفاش تقصر حتا لهاد الوقت..
أما هو فالنوم جافاه وخلاه سهران..شغاينعس وهو ما يعلم بيه غير لي خالقو..ناعس فبيتو على ظهرو..عريان من الفوق وصدرو لعريض لمزغب بزغب خفيييف لي هابط مع كرشو فخط واحد كيطلع ويهبط بنفس بطيئة..وشورط باج حد لفخاض مبين لي مولي لمطراسيين..شعرو فازك حيث دوش كمان يطفي العافية لي فيه..شنو يدير..كيفاش يفهمها كيفاش يشرحلها ويخليها تحس بيه..علاش ضروري يهضر باش يبينلها! ويا رييييت لو كانت تفهم بالهضرة حيث حتا بالهضرة وما فهماتوش..واش ضروري يقولهالها بصريح العبارة..كيفاش يدير يعبرلها وهو فالشرق ولكلام الرومانسي والتعبير فالغرب..واش كاع هاد ست سنين كاع افعالو تصرفاتو نظراتو حركاتو كلها ما خلاتهاش تفهم..وفاش زعم وقال هاد النهار نهارو يوقع لي وقع ويخرجلو سعد من جنب..تنهد هاز كتلة من الهم فصدرو وغمض عينيه باغي ينعس ويغرق فالنعاس باش ينسى ولكن فيييين هو هاد النعاس..

🍀 🍀 🍀 🍀

فاقت فصباح نشطانة وكتكسل وتبسم..طاح فبالها سعد وهي ضرب الفكرة فتيلي لي من البارح وهو طافي..رمات عليها لغطا وناضت كتقلب عليه فصاكها..جبداتو كان طافي ودارتو فالشارج ودخلات للحمام..بعد الروتين الصباحي العادي..لبسات سورفيط كالعادة وجمعات شعرها فكاسكيط وقادات الحالة وجلسات فجنب الناموسية كتشعل تيلي..يله تفتح وهما يبداو يدخلو عندها ليزابيل ديالو ولي ميساج..تبهضات من الكم الهائل لي واصلها منو ودوزات نمرتو وما دازش بزاف كان مجاوبها ملهوف..
سعد:تالاسين هادي نتي! فين كنت! ياك قلتلك شعلي تيلي ديالك نهضرو!! خليتيني انحماق الليل كامل!! الو فينك!
تالاسين:بشتيتو عليك ههه
سعد:بشوية عليا كطنزي! واش عارفة شحال عيطت وشحال سيفطت من ميساج ولا لا!
تالاسين:(بصوت هادئ)سمحلي غير نسيت ما شارجيتو البارح وصافي
سعد:وشنو لي نساك!ياك انا غادي وانا كنوصي فيك
تالاسين:بففف وراه كنت مشطونة مع براء
سعد:كيفاش! مالو!
تالاسين:كيفاش مالو! دابا نتينا لي كطنز..راه البارح منين خرجني من الريسطو ما رجعت شفتو وحتا فلانيف راك شفتيه ما جاشي وتخلعت عليه نتينا مشفتيشي كيف كان وبقيت كنتسناه حتا جا وهضرت معاه
سعد:وشنو قالك! غوت عليك!
سهات للحظة كتفكر كلامو فليلة البارح حتا فيقها هو بصوتو
سعد:الو تالا!
تالاسين:اه وي ها يانا..لا ما غوتشي عليا..مي ما عرفتشي حسيتو فشكل 
سعد:كيفاش فشكل!
تالاسين:ما عرفت والله ما فهمتوشي..مي يانا جاني مزال معصب منا ما عرفت
سعد:بففففف مشكيلة هادي..شفتي شنو أيجيك مليح
تالاسين:شني!
سعد:أنهضر معاه
تالاسين:(خرجات عينيها)اواعدي! كضحك ياك!
سعد:بنتلك كنضحك
تالاسين:واش حمقتي! شني اتقولو!
سعد:انقولو لي كاين..انقولو أفلان انا كنبغي ختك وبغيت معاها المعقول..براء صاحبي وخويا ما نبغيش نخسر معاه وهو أكيد فاش انهضر معاه ايفهمني..وخصوصي فاش يعرفني بلي ناوي المعقول ماشي التفلية..وانا انهضر معاه هو اللول نفهمو لي كاين ومن بعد نهضر مع الواليدة باش نجيو نخطبوك وفهاد الصيف نتزوجو
تالاسين:شنيييي! نتزوجو!! من نيتك!!
سعد:(باستغراب)علاش! ما باغاناش نتزوجو
تالاسين:ااا..لا ماشي هايداك مي ماشي بهاد الزربة..بفففف سعد يانا عاودتلك لي كاين وعرفتي شني داز عليا..وزواج هاد الساعة مزالة ما واجدة ليلو
سعد:ايوا وشنو! نبقاو هاكة..تالاسين انا راه باغيك للمعقول ماشي لتفلية
تالاسين:وحتا يانا باغة المعقول مي ماشي بهاد الزربة..شو هانتينا نعملو خطيبة اه وديك الساعة نشوفو زواج نخليواه من بعد
سعد:فوقاش من بعد!
تالاسين:ما عرفت..مهم ماشي دابا..مزال ما واجدة اسعد
سكت ما عاجبوش الحال ورجع تنهد ونطق بعدم رضى..
سعد:اوك اتالا..على خاطرك نصبرو مغاك حتا وكان ترشقلك..مي انا اليوم انهضر مع براء
تالاسين:بلاش اسعد والله
سعد:لا خاصني نفهمو هو لول..ونشرحلو شني شاف داك النهار ويعرف بلي نيتي حسنة..كيما كان كيبقى هو خوك لكبير
تالاسين:(تنهدات)اوك هضر معاه..ورد عليا باش ما كان واخة
سعد:واخة أحبيبة
تالاسين:تبسمات حشمانة 
سعد:مالك سكتي ههه حشمتي...أحبيييييبة (طول فيها) ههههه

بقات كتهضر معاه شوية وفلخر استاذنات منو باش تمشي تريني.. وكالعادة نفس الروتين ديال ديما.. دازت على بيسان وخرجو.. رجعو طلعات دوشات وهبطات هي ومينوشتها باش تفطر مع العائلة لي مجموعة ولي ما كانش معاهم براء فيها.. جلسات كتفطر حتا سمعات صوتو وهو كينطق السلام وهزات راسها فيه ما كانش كيشوف جيهتها.. لابس شورط اسود وتيشورط بلومارين مع صباردين وكاسكيطة زولها وخلا شعرو يهبط على جبهتو فازك والفونيص مدليين من عنقو وكلو عرقان.. 
براء:صباح الخير
الجميع:صباح النور
رؤيا:(بخوف) شعندك فوجهك!! 
شافو فيه كاملين كيحققو فوجهو لي باينين فيه الخبشات فخذو وجنب عينو.. 
براء:(كيحك مؤخرة راسو) ماشي شي حاجة.. غير كنت كنلعب مع امينو 
رؤيا:ويدك! واش عضك! 
براء:(شاف فيدو لي مزالة بالفاصمة) لا غير تجرحات فاش كنت كنلعب معاه
رقية:نتين داك سلوgي هو لي أيخرج عليك
براء:ههه ماشي شي حاجة ا رئوشتي هه
هنية:زيد تفطر اولدي
براء:انطلع ندوش بعدا
فراس:مزال ما عوال تمشي معايا للشركة
رؤيا:خلي الولد يرتاح شوية هاء.. عام ونص وهو فتمارة خليه غير يتنفس
فراس:ومالو الا خدم ما ايتنفسش
رؤيا:لا خليه.. يكفي تينا ما كنشبروك غير بزز
براء:ههه ولا عليك الواليد.. اليوم إن شاء الله نمشي معاك
رؤيا:(شافت فبراء بطرف عين) لي كيحن كيتمحن.. الله يتاوي سعيد على سعيدة غير كنبغي نضيع الحجرة معاكم
براء:ههه يله انخليكم
قلب الدورة خارج بحالو.. ما شافش فيها عكس هي لي كانت كتشوف فيه وساهية كتفكر فالهضرة دسعد وبالها مشطون.. 
اما هو فيله قلب الدورة تبدلو ملامحو المتبسمة لملامح باااردة.. ومحى الابتسامة الصفراء لي كان راسم وعقد حجبانو بنظرة جدية.. وطلع لبيتو معصب غير مع شراوطو.. ما ناعسش الليل كامل وزيد عليه راسو ضارو.. زول الفونيص رماهم وطلع تيشورط رماها وبانو تقاسيم جسمو لي مرسوم عضلة عضلة بظهر عريض مقسوم فالنص..شاف فيدو لي ملوية فالفاصمة عاقد حجبانو..ومشى بالو كيشوفها قدامو شادة فيدو وجالسة حداه كداويهالو.. زاد عقد حجبانو كثر وبدا كيحلها وينتر فيها ساخط ورماها فالارض.. زول صبردين برجلو.. ودخل للحمام يدوش.. 
خرج بعد مدة بفوطة علي نصو كيمسح شعرو وهو يسمع تيلي كيصوني.. قرب كيطل شكون وهو يبانلو إسم سعد.. غير شافو كحل بلعمى وكرز علي فمو.. خلاه كيصوني ومشي كيلبس عليه ساخط وغير كيشنت وتيلي مزال كيصوني دارلو الشقيقة.. كيقطع الخط ويرجع يصوني حتا طلعلو زعاف وقلب وجهو للجنب كيسوط وتمشى جيهتو مطلع حاجبو لابس غير السروال ولفوق عريان.. حط يدو فجيبو وهزو كيجاوب بدون نفس وصوتو مبحوح.. 

براء:الو! 
سعد:براء! صافا! 
براء: شنو بغيتي! 
سعد:(توتر من لهجتو فالهضرة معاه) اححم.. واش يمكن نتلاقاو هاد نهار
براء:وعلاش! 
سعد:باغي نهضر معاك 
براء:(كيحك لحيتو مفقوص)وفاش بالسلامة!! 
سعد:نتلاقاو وتعرف! 
سكت براء ما جاوبوش كيلعب بلسانو وسط فمو.. شك بلي باغي يهضر معاه علي تالا او نقولو متأكد..
سعد:ألو!! براء كتسمعني! 
براء:الصمت
سعد:ألو!! 
براء:اوك.. فين! 
سعد:كافي ***** من دابا نص ساعة مزيان؟ 
براء:اوك
قطع عليه ورمى تيلي فوق لكوافوز ودار كيلبس عليه ساخط.. 
سالا لباسو وتم خارج من البيت ومع الحلة دالباب كيلقاها قبالتو كانت ناوية دخل لبيتها.. وقفات كتشوف فيه وترمش وهو عاقدهم حتا نطقات.. 
تالا:(ابتسامة) كيبقات يديك دابا! مزيانة! 
براء:الصمت
تالاسين:(توترات من نظرتو العابسة ليها) علاش زولتي بيندا (الفاصمة)!!! كون خل.. 
خلاها كتهضر وجر الباب زدحها وعطاها بالظهر غادي وكيزرب فلمشية.. وخلاها غير كترمش ودور فعينيها.. وقلبات الدورة حتا هي دخلات لبيتها.. 

هبط كيجري فالدروج وخرج بلا فطور بلا والو.. راسو الطبولة كيضربو فيه بقوة لحريق.. ركب فسيارتو كسيرا وزاد.. وما وقف حتا وصل للكافي لي داير معاه فيه.. نزل هاز راسو وتم داخل كيقلب عليه بعينيه حتا كيشوفو وقف كيشيرلو من بعيد.. وتمشى جيهتو هاز خنافرو لسما وحجبانو معقودين ووقف عليه حاط يديه فجيابو.. 
براء:سلام
سعد:(مدلو يدو) صافا! 
براء:(شاف فيديه مطولا وعاد جبد يديه من جيبو وسلم عليه) الحمد لله.. فاش باغيني
سعد:جلس بعدا اصاحبي مالك ههه
قلب وجهو لجنب كيصبر راسو ورجع جلس.. موكي ظهرو على الكرسي وطالق يدو فوق الطبلة كيضرب فيها بصبعانو وكيطلع فسعد ويهبط.. 
براء:ها حنا جلسنا.. شنو! 
سعد:(حك شعرو بتوتر) هههه مزروب اصاحبي.. مالك
براء:عندي شغلي
سعد:(ضحكة صفراء متوتر من طريقة هضرتو) هههه اوك.. اندخل فالسيجي نيشان
براء:الصمت وكيشوووف فيه
سعد:اححم.. الصراحة انا بغيت نهضر معاك على لبارح.. يعني عليا انا وتالاسين
براء:شاف فيه بنظرة حادة
سعد:شوف أبراء حنا صحاب وخوت قبل ما نكونو ولاد الخالة.. وانا ما باغيش ندير شي حاجة مور ظهرك ولي تخليك تقلق مني.. نتا صاحبي وعارفك اتفهمني وتعذرني.. البارح فاش شفتيني جالس مع تالا عارفك تقلقتي مني.. ولكن ما تفهمنيش غلط.. انا الصراحة من شحال هادي وانا كتعجبني تالا وما قدرتش نفتح هاد الموضوع لا معاها لا معاكم حيث كنت كنقول مزالة صغيرة.. مي انا دابا نويت المعقول..وكنت باغي حتا نهضر معاها هي لولة ونعرف رأيها عاد نجي ونطلبها منكم وداكشي لي شفتي البارح.. 
سكت كيشوف ردة فعلو وبراء مزال بنفس النظرة ونفس الجلسة ورجع كمل.. 
سعد:انا كنبغي تالاسين..ونويت معاها لحلال وحتا هي ما عندها حتا شي اعتراض.. وبما انك خوها لكبير وصاحبي قلت نهضر معاك نتا لول ونتا لي اتفهمني كثر..والا كتاب نويت نجي نخطبها رسمي من داركم مي بغيت نقولهالك هو لول.. (سكت كيتسناه يهضر ووالو) شنو قلتي!!! 
قلب وجهو براء لجنب كيضحك ويحك فلحيتو ويلعب بلسانو ففمو.. ورجع شاف فسعد كيتبسم مفقووووووووص.. 
براء:(بسخرية) شنو قلت ههه ها شنو قلت
جمع الضحكة فلبلاصة وناض وقف بلا بسم الله وهز القبضة ديالو نزل عليه بيها للحنك خلخلولو حتا طاح من الكرسي.. ووقف مخرج فيه عينيه سااااااخط وصدرو طالع هابط وسنانو كيتغززو عليه ولاخور طايح شاد فحنكو ما عرف راسو الدقة منين جاتو.. 
براء:(بغضب) لولة هاديك ماشي ختي.. الثانية ما تبقاش دور بيها... والثالثة حنا ما بقينا لا خوت لا صحاب 😡😡
شاف فيه حاااااااقد وخلاه طايح كيبرقق فيه وخرج مخلي بنادم غير كيشوف.. ركب فسيارتو وقصد نيييشان الفيلا مغزف وكيقول غير فوقاش يوصل عندها...

دخل كيقلب عليها وما كيشوفش الطريق قدامو.. سخط صاااافي وما بقالو فين عاد مزال يصبر.. عينيه لعافية كتشاير منهم وهو كينهج.. طالع هابط كيقلب عليها حتا قالولو راها فكوزينتها وهبط نيييشان قاصدها..
كانت هي سادة عليها الباب وخدامة على شي كوموند جديدة.. وقبالتها طابليط فوق لبوطاجي خدامة بيه لايف.. كتخدم وتشرحلهم كيفاش كتخدم وتجاوبهم على اسئلتهم.. ومع ديجا عندها متتبعين بزاااف وكيتسناوها غير امتا تحط شي حاجة او تعمل لايف فكانت نسبة المشاهدين بالألاف.. جامعة شعرها بضفيرة سبولة مع شوميز فزيتي فاتح وسروال ابيض.. ومنغاااامسة فخدمتها ولايف ديالها و كتقطع فالخضرة قدامها.. حتا كتفرع عليها الباب ودارت مخلوعة تشوف شكاين وفيديها الموس لي كانت تقطع بيه وهو كيبانلها داخل شااااعل.. 
تالاسين:براء!!!!!! 
قبل ما تكمل او تفهم كان واقف قدامها وجهو حمر ايطرططق.. وشدها من دراعها وجبدها حتا تساطحات مع صدرو وخرج عينو فيها بغضب وهو لاصق فوجهها. .وبدا يهلل ولايف مزال مطلوق.. 
براء:شنو هادشي لي سمعت همم! 
تالاسين:(خلعها) اي يدي ضريتيني ابراء
براء:شنو هادشي شنووووووو! باغة تزوجي!
تالاسين:شني!! 
براء:باغة تزوجي بسعد هااااا هضري!!! باغة تزوجي بيييييييه (زير على دراعها) 
تالاسين:(تقصحات) انهننن اي يديييي قصحتيني
براء:(صعر) تقصحتيييي!!! (حط صبعو علي قلبو) وهذا لي كيتحرق شنوووو ندير فيه شنوووووو! هذا لي هادي سنيييين وهو يتحرق وصاااابر شنو ندير فيه هضري!! شنوووو! 
تالاسين:شني كتقول! علاش كتهضر! رخي من يدي ابراء! 
براء:وااااااااااش نتي مكلخة! وااااش ما كتفهمييييش!! (حط صبعو علي راسها كيدفعو) شنوووو عندك هنا شنووووو! وااااش عورة! ما كتحسييييش! 
تالاسين:علاش كتغوت دابا! ما فهمت والو!!! 
براء:(بصوت خافت) ما فهمتيش! (غوت) علاااااااااااااش نتي فووووقاش كنتي كتفهمي!! 
جرها عندو لصقها معاه كثر حتا خرجو عينيها وما بقى كيفصل بينو وبينها سوي سنتيميترات وهي هازة راسها باش تشوف وجهو.. 
براء:شوفي فعيني!! شوفي فيهم مزياااااان.. شنو كتشوفي هاااا شنو! 
بقات معلقة وكتشوف فعينيه.. ما عرفات راسها باش تبلات.. ما فاهماهش علاش كيهضر ولا علاش معصب.. زعما هادشي كامل غير حيث قالو سعد باغيين يتخطبو!!.. عينيها فعينيه ونفسو كضرب فوجهها سخونة وهي كتعوج فيديه باغة تفك يديها.. 
تالاسين:(بصوت خافت) ما فهمتكشي علاش كتهضر!!! 
طلق منها وعطاها بالظهر كيمشي ويجي وكيدوز يدو على وجهو وراسو وكيضحك بالفقصة وهي غير كترمش فيه.. 
براء:ما فهمااااتش ما فهماتش ههههههه 
رجع وقف قدامها كيهضر ويعبر بيديه مغلغل طالعلو لخز... 
براء:شنو ما فهمتيييش شنو!! واش مزالة ما فهمتييي بلي هذا (حط صبعو علي قلبو) كيضرب غييير ليك... واش مزالة ما فهمتي بلي هذا (حط صبعو علي راسو) ما كيفكر غييييير فيك.. واش مزالة ما فهمتي بلي انا مااااااااااشي خوووك.. وعمري نكون خووووك.. واش مزالة ما فهمتي بلي عيني ما كيشوفو حتاااا وحدة من غيييرك.. واش مزالة ما فهمتي بلي كنبغييييييييييييييييييييك!!! 
غوت وسكت كينهج وكيشوف فعينيها قلبو ايسكت.. وهي واقفة جااااامدة وعينيها ايخرجو من بلاصتهم مصدومة.. وكلمة كنبغيك كتعاود فوذنيها ما قادراش تيق.. ما يمكنش!! لا أكيد كتحلم! ما تحركات ما نطقات فقط كتشوف فيه مبهوضة حالة فمها.. 
بقي ساكت كينهج وصدرو طالع هابط.. واخييييرا قالها وخرج ما فقلبو.. بقي كيشوف فيها تهضر ورجع قرب منها هو كيشوف وسط عينيها ويهضر محروووووق.. 
براء:عييييت وانا كنتسناك تفهمي ما بغيتي تفهمي.. تضبرت بالصبر وانا كنتسناك تحسي بيا ما بغيتي تحسي.. مكلخة ولا ما باغاش تفهمي ولا فاهمة ودايرة راسك هبيلة ما عرفتش!! كان ضروري نهضر هااا واش ضروري!!كان ضروري نقولهالك فراااااا !!!! كلشي عاق وفهم ونتي ما بغيتي تفهمي راسك... وكتكمليها قالتلك خوويا!!! الاااااالة انا ماشي خوووووك.. سمعتي ماااااشي خوووك... ما تراضعنا ما خرجنا من كرش وحدة باش نكون خوك سمعتييييييي!! 
تالاسين:(شافت فيه كتمتم مصدومة بحال الا صرفقتيها)
بببب.. براء.. شششش ششني كتقول!! نتينا راك خاي!!!

زير على عينيه مغمضهم وكرز على سنانو..حتا بان الفك ديالو من الجناب.. وزير على القبضة ديالو.. كتلعبلو على اعصابو ببرودتها وتبوهيلها لي ما عرفو واش بصح ولا بلعاني.. زفر بقوة من مناخرو ونطق وهو كيبرك على الحروف وينطق كلمة كلمة مغززززف.. 
براء:أنااا.. ماااشي...خوووك..(حط يدو على دراعها كيمخض فيها) وااا مااااشي خووووك.. منين كتفهمي منيييييييين!! 
بقات ساكتة وكترمش فيه.. جاتها اللقوة مزالة ما تيقات وضربات طم كتشوف فيه وهو صاعر قدامها.. 
براء:(عطاها بالظهر كيدوز يدو على راسو) كي ندير نفهمها اعباد الله كي نديييييير (دار عندها) انا وياك ماشي خوت سمعتي.. وااااا ما كانشوفش فيك ختي اعباد الله.. باش نشرحهالك بااااش.. انا عندي خت وحدة سمعتييي وحدة وهي بيساااان.. نتي ماشي ختي وعمرك تكوني.. واش اعباد الله كاين شي حد كيبات يحلم بختوووو هااا هضري! واش كاين شي حد كيحلم بولادو مع ختوووو! واش كاين شي حد كيتمنى يتجمع مع ختو ففراش وااااااحد.. (دار على غفلة جر داكشي كاااامل لي على بوطاجي جابو فالارض منهم طابليط) اععععععععععععع علاش باغة تصعريني علااااش
وقف كينهج مخرج عينيه وكيمسح على وجهو وهي مزالة كما هي.. ما كتحرك ما كتكلم فقط كتشوف فيه مخرجة عينيها..
براء: فهميها ودخليها لهناااا.. نتي ما كتخرجيييش من هذا (حط صبعو على راسو) عششتي فهمتيها سكنتييييي هنااااا.. فايق بالي معاك.. ناعس بالي معاك.. واااا عباد الله كنبغي غير نغسل وجهي كنشوف هااااد الحرقات لي فيدي كنتفكرك.. كل صباح خاصني نتفكرك.. نبغي نلبس ساااعتي نشوف يدي نتفكرك.. نبغي ناااكل نشوف يدي نتفكرك.. ما كتمشيش من بالي حتا دقيقة وتجي نتي تقوليلي خوووويا.. 
تالاسين:ووو..ووا واش عارف راسك ششش.. ششني كتقول!!! 
براء:(قلب وجهو لجنب كيصبر فراسو) علاش مصرة تحسسيني بلي كندير شي حاجة حرام ولا مستحيل تكون!! 
تالاسين:راه هادشي لي كتقول فيه اصلا مستحيل.. 
ضرب ضربة بالقبضة ديالو لبلاكار دالكوزينة حتا مشاو وجاو لماعن لي فيه وغوت ربي لي خلقو.. 
براء:واااااااااااااااااا سكتييييييي..
غوتات هي مخلوعة وجمعات يديها عند وجهها مخبعاه حيث غوت فوجهها.. 
براء:منااااش مصنوعة اعباد الله.. واش باغة تقتلييييني هاااا هضرييييييي هانتي ديريها وتهنااااي
شد على الموس لي فيديها كيبرك عليه بيدو حتا تغرز فلحمو وبدات الدمايات تقطر وجرلها يديها معاه وحط الموس على قلبو.. 
براء:هانتي قتليييني.. يله ديريها
تالاسين:(هرب الدم من وجهها) ييي.. ييدد.. يدددك!! يدك
براء:دييييييييرييييها.. يله.. ديريها وتهناي وهنيني
تالاسين:(كتجر لموس وتشوف فيديه) رخي أبراء يدك! رخي كتسيل بالدم
حط يدو على عنقها هزلها راسها وحط جبهتو على جبهتها حتا شوكاها.. ويدو مزالة مزيرة على الموس.. 
براء:(بلهفة) شوفي فقلبي! شوفي قلبي اما يدي خليها عليك! داويلي قلبي كيما داويتيلي يدي! داويه اتالاسين.. داويه!! 
تالاسين:(تزيرات ودمعو عينيها) رخي ابراء خليني نشوفلك يدك!
بعد عليها وضرب الموس مع الحيط وغوت صااااعر.. 
براء:وااااااااااااااا خلي عليك يدي 😡😡
دار شاف فيها مخرج عينيه وعروق راسو وعنقو كيطلبو شرع بقوة ما خارجين.. 
براء :ما اتزوجيهش سمعتي.. ما اتزوجيهش! ما خاصكش تزوجيه (شدها من دراعها كيمخض فيها حتا طبعو حوايجها بدمو).. نتي ما خاصكش تزوجي شي حد من غيري.. ما خاصكش وما انخليكش.. (عطاها بظهرو غادي جاي) ما انخليكش.. انحماق اعباد الله انحماق.. علاش اتالاسين علااااش.. نتي ما اتزوجيهش سمعتي.. ماااااا عمرك تكوووووني ليه.. مااااا عمرك!!! 
خرج عينو فيها كينهج ووجهو حمااااااار ودمو سخن.. وهي واقفة كدمع قدامو فصمت.. وهز راسو وخرج وزدح الباب موراه حتا كانت اتقلع وخلاها هي واقفة حتا طاحت جالسة فالأرض مصدوووومة وكتشوف فنقطة وحدة.. ما بغاتش تدخلها لراس وومزالة ما قادرة تيق.. من ديما حاسباه خوها وعمرها طاحت ولا كانت ليها على البال يكون كيبغيها.. عمرها ردات البال لتصرفاتو حيث حاسبة راسها بحال ختو عليها كيتصرف معاها هكاك وكيعتاني بيها.. وما جاتش فبالها ابدا ابدا بلي اهتمامو كان اهتمام حبيب بحبيبتو ماشي اخ بختو..

بقى ساكت ساكت ونهار هضر النص فالمغرب ضرب بيه طررررر 😌 وهادي هي عمرو حبى ونهار حبى كملو نتوما 😅

تصدمات دبصح.. وعقلها حبس.. يعني كلامو ديال ديك نهار فاش قالها يدفنوني فيها فهماتها صحيحة.. ولكن كانت كتقول مستحيل غير كتخربق ما يمكنش.. واش حتا لهاد الدرجة كانت معمية ليها البصيرة.. هبطات عينيها كتشوف فدمو لي مقطر فالأرض وكلامو مزال كيتعاود فوذنيها.. جالسة فالارض وحاطة يديها على فمها ومرفووووعة.. وما أتفيق من سهوتها غير على الدخلة دبيسان لي وقفات فالباب كتنهج ومخرجة عينيها لحومر وكلها كترجف.. قربات من تالا ووقفات عند راسها.. 
بيسان:بصح لي شفت! اتزوجي سعد! 
تالاسين:(هزات عينيها فيها بشوية مستغربة) باش عرفتي!! 
بيسان:يعني بصح!! 
تالاسين:باش عرفتي!! 
بيسان:(كتنهج) من لاااايف.. دابا نتينا وسعد اتزوجو! 
تالاسين:(حنات راسها) فففف هو طلبني وانا قبلت 
مع آخر كلمة نطقاتها مع طاحت بيسان قدامها على طولتها سخفانة.. خرجات عينيها وشهقات مخلوعة وقربات عند راسها على ركابيها كتضربلها فوجهها وتفيق فيها.. وما فهمات حتا مالها.. 
تالاسين:(مخلوعة) بيسان!! بيييسان.. نوض شعندك بيييسان!! نووووض
وقفات مخلوعة وغير كتفتف.. كلشي تجمع عليها وشداتها التلفة.. اش هادشي واش هاد نهار واش هاد الحالة.. كتقلب على الكاس وتلفات عليه حتا فين هو.. وفلخر عمرات يديها بالماء وحنات كترشها وتطبطب على خذها باش تفيق.. حتا كيتم داخل جهاد كيفرنس وغير شاف داك المنظر وهو يتخطف من وجهو لون وقرب من ختو مخلوع..
جهاد: بييييسان!! شنو واقع.. شنو واقعلها.. بيسان حلي عينك.. بيسان!!! شنو واقع معاها! 
تالاسين:ما عرفت ما عرفت انهننئ اههئ كانت كتهضر معايا حتا طاحت
جهاد:بففففف (حنى هزها وجاتو ثقيلة) زمر نقصي من الماكلة
طلعها كيتعافر معاها حتا وصلها لبيتها وتالا موراه كتجري.. حطوها فبلاصتها وتجمعو عند راسها.. جاب قرعة دلعطر كيرش فيدو شوية ويقربها لنيفها حتا بدات كترمش وتعقد فحجبانها..وحلات عينيها بشوية كتشوف فجنابها دايخة.. 
تالاسين:(بلهفة) بيسان حبيبتي شعندك! شني وقعلك اهئ اهئ واش لباس!! كي كتحسي براسك مزيانة دابا!! 
بيسان:اي راااسي.. فاين يانا!! 
جهاد:كيبقيتي صافا! كتحسي براسك مزيانة! 
بيسان:دايخة شوية.. شني وقعلي! 
تالاسين:ما عرفت اختي.. كنت واقفة كتهضر معايا حتا طحتي.. خلعتيني عليك ابيسان والله
شافت فيها بيسان كتفكر.. وهي تستوعب وتقاد دماغها وعقلات على ما شافت وسمعات فلايف.. وهي تبلق عينيها حابسة الدمعة بزز.. وكتشوف فتالا بعيون متحسرة كأنها كتعاتبها.. 
تالاسين:(شداتلها يديها) واش مزيانة اختي! 
شافت فيدين تالا ورجعات شافت فيها ورسمات ابتسامة بزز على وجهها ما قادراش تحبس الشهقة.. وجرات يديها من يد تالا مسحا بيها عينيها وهي كتضحك.. 
بيسان:والو غير لعيا.. بايتة قصارة ما نعستشي مزيان ويمكن طاحلي طونسيو
جهاد:يييييه نتي يطيحلك طانسيو وانا طيحيلي صحتي.. شوفي نتفاهمو.. يا نقصي ماكلة.. يا ما تبقايش تسخفي الله يرحم باك ولااا سخفتي سخفي فبلاصتك.. قسمتيلي ظهري عاد وصلتك.. 
بيسان:(ضحكات بزز) ياك بعدا هههه
تالاسين:نجيباك شي حاجة اختي.. تاكل تشرب.. شني نعملك
بيسان:ههه والو بغيت غير نعس هاد ساعة
جهاد:ايوا سهطي..(باسلها جبهتها) رتاحي الكارثة
بيسان:(تبسماتلو) واخة
تالاسين:يانا انبقى معاك حتا تنعسي
بيسان:هه لا بلاش.. يانا اندخل ندوش ونخرج نعس.. ما عندك لاش
تالاسين:مأكدة ما فيك والو!!! 
بيسان:والله
تالاسين:(تنهدات وباستها) الله يشافيك احبيبتي.. يله انخليوك.. ارتاحي
تبسماتلهم.. وخرجو هما خلاوها وهي متبعاهم.. ويله سدو الباب وهي تحط يديها بزوج على فمها كتحاول تشد البكية لي ما بغات تشد.. عينيها كيقطرو بالدموع والشهقة كتخرج منها بحال الا قلبها كيزهق وروحها أطلع.. عضات على كف يديها لي سادة بيه فمها بقوة والبكية ما بغاتش تحبس.. بغات تحماق وهي كتخايلهم بزوج.. تالاسين ختها وهو الراجل لي تمنات.. شكون تلوم.. تلومها هي ولا تلومو هو ولا تلوم راسها.. لا هي كانت عارفة ولا هو كان عارف ولا هي قدرات تنطق وتخرج ما فقلبها.. حاسة بالدنيا ظلامت فوجهها وقلبها كيتقطع ما قدراش تخايلها.. 
بيسان:علااااش أربي علااااش اهههئ اههئ اههئ أربييييييي وكنبغيييه اهئ اهئ علااااش ما بغانيشي يانا علااااش اهههئ اهههئ 
طاحت فبلاصتها كتعوج وتبكي وتقول ما بكات.. تخشي راسها فلمخذة وترجع تهزو كتطلع النفس لي تقطعات فيها.. شعرها لصق على وجهها بلبكى وعينيها قطرة دالدم بقوة لحمورية.. وهي كتعصر وتعض فيديها بغات تسطى...

🍃 "قالو ان هناك من الحب ما قتل..
وانا أقول ان الحب سفاح القلوب بلا جدل.."🍃

خرجات من عندها مرفووووعة ودخلات لبيتها.. تلاحت جالسة على جنب الناموسية كتشوف قدامها ساهية.. وكترجع السينتة لور.. لأيام كانت كتدرو على غفلة تلقاه كيشوف فيها.. لأيام كانت كتوقعلها شي حاجة كتلقاه واقف عند راسها كيداويها.. لأيام كانت كتطلب شي حاجة كتلقاه جابهالها قبل ما ترمش عينيها... كتفكر وتفكر وتفكر حتا ضرها راسها وشداتو بين يديها حانياه علي ركابيها مزيرة عليه.. حتا هزاتو وهي مخرجة عينيها ومبهوضة.. 
تالاسين:اواعدييي.. لايف!!!! 
ناضت واقفة حاطة يديها على فمها كتفكر فلايف لي كان خدام والمنظر لي شافوه كاع الناس.. وهبطات كتجري فالدروج لكوزينتها لقات الطابليط مرمي فالارض طافي ومهرسالو الزاجة.. شداتو بين يديه وبلا ما تشعر هزاتو حتا لسما وشعطاتو مع الحيط مشي بياس ديطاشي.. ووقفات كتنهج حاطة يديها على جبهتها.. تلفات ودارت بيها الدنيا.. وهي مزالة واقفة حتا كتسمع تيلي كيصوني.. قربات طلات عليه وخرجو عينيها فاش شافت سميتو.. وهزاتو كتجاوب وكتعض فضفارها وتمشي وتجي فوسط ديك الروينة لي فالكوزينة.. 
تالاسين:الو! سعد! 
سعد:شنو داكشي شفت اتالا!! شنو داكشي! كيفاش براء! 
تالاسين:بففففف حتا نتينا شفتيه! 
سعد:(معصب) شكون لي ما شافوش.. المغرب كامل تفرج!! شنو وقع من بعد.. هضري شنو وقع فاش تقطع اللايف! تالا نطقيييي
تالاسين:(قلبات وجهعا لجنب ما حاملاش تهضر) سعد عافاك خليني هاد الساعة ما عارفة راسي من رجلي.. انا بيدي مزالة ما فهمتشي كيفاش وفوقاش.. عافاك بلا ما تزيد عليا يكفيني هاد لفضيحة
سعد:خاصنا نتشاوفو.. وضرووووري
تالاسين:سعد!! عافاك ماشي دابا! 
سعد:علاش ماشي دابا! خاصنا نتشاوفو.. خاصك تشرحيلي كيفاش براء كيبغيك!! راه ما بغاتش تدخلي لراس
تالاسين:(زعفات) وشفتيني يانا لي دخلاتلي..شني انشرحلك راه فحالي فحالك ما فهمت والو ومزالة ما فاهمة والو
سعد:ياك ما عجبك الحال!! 
تالاسين:(تعصبات) جمع راسك واخة! 
قطعات عليه ووقفات كتنهج فبلاصتها.. حطات قبضة يديها علي عينيها كتحكهم.. هزات راسها صفراء ووجها هارب منو دم وطلعات لبيتها مخلية كلشي مرون.. وتيلي فيديها كيصوني وهي ما كتجاوبش... 

🍀 🍀🍀🍀

في إحدى الإقامات الفخمة.. وفدارو لي شاريها ليه بوحدو.. مفرشها على ذوقو بأثاث عصري وحيوطها معلق فيهم التصاور لي كيصور.. جالس فبيتو على جنب ناموسيتو.. يديه مرخيين فوق ركابو وراسو مهزوز فصورتها لي قبالتو.. صورة شادة الحيط بطولتو بعرض زوج مترو تقريبا.. كان صورهالها فيوم عيد ميلادها 18..هازة راسها لسما كضحك وتشوف فالالعاب النارية.. بكسوة طويلة حمراء وشعر كيرلي جامعة فيه النص منفوخ من القدام.. سااااهي فيها وما هواش فهاد الكون...كون يرجع بيه الوقت لداك نهار يقولهالها بلا ما يفكر وما كانش يخلي شي حد يسبقو ليها.. كيفصل فملامح وجهها وعاقد حجبانو.. فاتتو ثورة الغضب وجا موراها البرووووود التااام.. كيعاود سيناريو ما وقع هاد نهار فبالو ويتنهد تنهييييييدة من القلب.. حاسو هم ونزاح مهم خرج لي فقلبو وتهنى.. ويا رييييييتو قدر يخرجو قبل ولكن تذهب الرياح بما لا تشتهيه السفن.. سمع صوت تيلي ديالو.. وفاق من سهوتو وخشا يدو لمطلية بالدم جبدو من الجيب.. طلعاتلو النمرة دجواد.. وجاوب وفصوتو باين مهموووم.. 
براء:الو! 
جواد:براء شداكشي اخويا!! واش بصح كتبغي تالا! 
براء:(عقد حجبانو) علاش كتهضر!! 
جواد:علاش ما فخباركش.. تالا كانت دايرة لايف.. وداكشي لي وقع بيناتكم كامل تفرجو فيه الناس.. حتا عيطاتلي واحد البنت قلتهالي ودخلت نشوفو... تصدمت اخويا!! 
براء:(حط كفو علي عينو كيبرك عليها ويسوط) بففففففف.. داكشي لي كان ناقص
جواد:خويا! واش بصح كتبغي تالا! وهي بصح اتزوج سعد! 
براء:(خنزر) جواد قلب الساعة
جواد:واخة..فينك دابا
براء:فداري..مسح داك لايف ما بغيتش أثرو يبقى يبان.. ولا تنشرات شي لعبة عليه مسحها.. ما تخليش سيجي يكبر.. 
جواد:مسحتووووو.. ما تخافش الواليد معلمني الحرفة مزيان
براء:اوك.. بسلامة
قطع عليه خلاه مزال لا ي يهضر.. وشاف فصورتها لي قبالتو مخنزر ومزير على تيلي.. وفجأة.. هز داك تيلي وخبطو مع الارض حتا طارو شقوفاتو.. ما حملش راسو وما حملش الحالة لي وصلها.. الله ينعل بوه حب هذا لي يدير فيه هاد الحالة.. كره راسو وكره حالتو وما بقاش عندو غرام دالخاطر.. ناض زاعف هز تيليكوموند صغيرة برك عليها وهبط معاها ستار بلون الحيط علي صورتها حتا ما بين اتش تبان وسط الحيط.. رمي تيليكوموند فوق الناموسية وتبعها تيشورط ديالو وسروالو ودخل للحمام يدوش بالمَاء بارد يطفي حرقتو..

🍃 من لم يسمع حكايتي..!! 
إقترب واسمع لأروي لك محنتي.. 
أُعرفك اولا بنفسي.. أنا من على قلبي حَفَرتُ إسم معشوقتي..
وأنا من غرِق حتى النخاع في حب فتاة أَسميتها فاتِنتي..
أنا يا هذا من أَحَبَّ ولم يُحَبْ فازدادت لوعتي..
انا صاحب قلبٍ احترق شوقا من جفاء حبيبتي..
انا من أحببت.. عشقت.. اخلصت.. تمنيت.. وااااااهٍ يا حسرتي..
وياله من حب لعين غير مكتمل يقودني إلا نهايتي🍃

🍀🍀🍀🍀

خرج من لحمام بفوطتو على نصو.. الماء هابط على جسمو فخطوط طويلة وكيتفرق بين ضلوعو.. عينيه ناااعسين بقوة لعيا والقهرة لي فيه.. ما نشف لا حالتو لا والو وتلاح فناموسيتو بفوطتو ناعس على ضهرو ومغمض عينيه باغي ينعس.. يله غمضهم وهو يسمع لفيكس كيصوني.. عقد حجبانو مخيب سيفتو وحط يدو على عينيه وخلاه كيصوني ما باغي يهضر مع حد..بقى كيصوني ويعاود حتا قطع وما عاودش صونا.. يله بدى كيديه النعاس وعينيه بداو يتعسلو وهو يسمع الصوني دالباب.. زير على فكو وتكمشات جبهتو معصب.. ناض تجلس كيسوط ويحك فجبهتو بقوة ما راسو ضارو.. تنهد وناض كيجر رجليه الحفيانين وشعرو كيقطر على جبهتو.. فتح الباب مكره وطالعلو الخز عوال يلقى جواد يبرد فيه.. ويله حل الباب وهو يطلع حاجبو متفاجئ.. لقى باه واقف عاقدهم حاط يديه فجيابو.. طلعو وهبطو وداز فيه خلاه واقف متبعو بالعين مستغرب من جيتو وفهاد الوقت.. رجع سد الباب ودخل تبعو للصالة فين جلس..

فراس:مالك ما كتجاوبش
براء:(كيحك راسو) بففف ما سمعتوش
فراس:(طلع حاجبو) ما سمعتيهش.. اممم اوك
براء:انمشي لبس حوايجي ونجي
فراس:سير هانا كنتسناك.. ما تعطلش
براء:واخة

دخل لبيتو كيحك فجبهتو ما عندو گانة لهضرة.. جبد حوايجو دالدار لبسهم سروال كيطمة خفيف بلومارين وتيشورط بيضة وخرج عند باه لقاه مزال فبلاصتو وباين عليه كيخمم.. 

براء:تشرب شي حاجة! 
فراس:لا.. جلس
تنهد براء وجلس قبالتو حاط مرافقو على ركابو وشابك يديه وكيشوف فالطبلة لي قبالتو ساكت.. وفراس كيطلعو ويهبطو حاط صباعو على فمو ومطلع حاجبو.. حتا تنهد وتجلس مقابلو.. 
فراس:بصح لي سمعت!! 
هز براء راسو عاقد حجبانو شاف فيه متفاجئ ورجع قلب وجهو لجنب معصب وغير كيسوط.. 
براء:مييييغد بفففف
فراس:كتبغيها! 
هز راسو فيه كيشووووف فباه وفعينيه شلا كلام.. ولكن كالعادة ما كينطق بوالو وكيفضل يسكت.. تنهد فراس وهو حاس بيه وحك فلحيتو.. 
فراس:من فوقاش! 
براء:(كيشوف قدامو ساهي) ما عرفتش بالضبط.. مي شحال هادي
فراس:وعلاش ما هضرتيش

سكت ما جاوبوش.. شنو ايقولو.. ما قدرتش.. ولا خفت ولا شنو ايقولو.. بقى ساكت عاقد حجبانو وهو براسو هاد السؤال كيضرو وما لقالوش جواب.. فهمو فراس ما بغاش يجاوب ورجع تقابل معاه بجدية.. 

فراس:دابا نتا سكتي سكتي ونهار هضرتي gلتيها للعالم
طلع براء عينو فباه بحال الا كيقولو بلا ما تزيد عليا ورجع قلب وجهو.. 
فراس:شنو gالتلك هي؟؟ 
براء:(بسخرية) علاش ما تفرجتيش
فراس:لا.. غير وصلاتني لخبار
براء:(طلع شعرو على جبهتو وقلب وجهو) شغتقول.. بحال ديما.. نتا خويا
فراس:(كيحك لحيتو) بفففف مشكيلة هادي.. وهي باغة سعد!! 
براء:(مسح وجهو مغدد) باغاه ولا ما باغاهش.. ما قادرش نشوفها معاه ولا مع غيرو.. ما قادرش الواليد.. 
فراس:وشنو عوال دير.. غتخطفها ولا تخليها بايرة حداك ولا تزوج بيها بزز منها
براء:(كيدوز يدو علي وجهو مغزف وعينيه خارجين) ما عرفتش.. مهم ما تزوجش بيه.. راه نحماااق الواليد والله ما نقدر.. ما نقدرش نشوفها مع شي حد خور.. ما نقدرش
فراس:لا حول ولا قوة الا بالله.. (تنهد) حاس بيك ومزياااان وعارفها قاصحة اولدي.. حاط راسي فبلاصتك وعارفها ما سهلاش.. ولكن ما يمكنش تبقى هاكة.. خاصك تلقى حل

تنهد براء هاز هم الدنيا فوق كتافو ورجع لور تكى ظهرو حاط يديه على جبهتو.. 
براء:الحل؟!! شفتيني لقيتو الواليد وما درتوش! 
فراس:سمعني نgولك اولدي.. انا الا كنت انصحك بشي حاجة فهي أنك عمرك تبزز على البنت لي كتبغي شي حاجة... خاصةً راسك.. انا الا كنت ندمت على شي حاجة فهي أنني تزوجت بمك بزز منها.. هي ييييه رجعات كتبغيني وانا كنحماق عليها وكملنا حياتنا ولكن ماشي بالساهل وحتا انا عمري نسمح لراسي على الدموع لي نزلاتهم من عينيها بسبابي.. حتا عرسها ما خليتها تفرح بيه فحال الناس.. ودوزنا شحااال فشدلي نقطعلك حتا وصلنا لي حنا فيه دابا.. ولكن نتا ما تعاودش نفس غلطي.. ما كنgولكش بعد منها.. لااااا حارب وتقاتل عليها وحاول تخليها تبغيك.. الا بغاتك فعمرها تبعد منك.. والا ما بغاتكش فمن الأحسن تبعد عليها نتا.. 
براء:شاف فيها ساكت واصلة بيه لعضم
فراس:الا كتبغيها ما اتبكيهاش.. وتالا راها بنتي بحالها بحالكم وما نبغيش نشوفها مقلقة.. الا بغاتك اولدي فحنايا المسعودين بيكم بزوج.. ولكن اذا كانت باغية سعد وهو باغيها.. (سكت وتنهد بحال الا صعيب عليه يخرجها) خاصك تبعد عليها.. سمعتيني
براء:شفتيها ساهلة الواليد! اتgولي نبعد أنبعد.. وهانا بعدت.. شكون ينسيني.. شكون ينسيني فيها
فراس:ما ساهلش تنسا.. ويمكن عمرك تنسى.. ولكن لي مستحيل تنساه.. هما دموعها لي تقدر تبكيهم بسبابك.. إلا باغيها خليها هي تختارك.. ماشي تبزز عليها راسك.. والا كانت مكتابالك راه واخة طير لسما وتنزل غتكون ليك..
براء:الهضرة كتجي ساهلة الواليد
فراس:تيقني.. كنgول هاد الهضرة وقلبي محروق عليك.. راك ولدي وما باغيش نشوفك فهاد الحالة.. ولكن انا نصحتك.. ما نبغيكش تعاود لا فوط لي درت انا.. وما نبغيش نشوف دموع تالا.. حيث لي داز على ديك البنت يكفيها وبزيااادة.. ما باغيش نشوفها مقهورة.. هاديك أمانة ربي عندي حتا يدي مول الأمانة أمانتو.. يتيمة وما عندها حد من غيرنا ودازت عليها المحنة.. وباغي نشوفها حتا هي مرتاحة.. ونتا الا كتبغيها بصح.. اتبغي تشوفها مرتاحة.. سوى معاك سوى مع غيرك
غمض عينو كيكمد حر ديك الكلمة دغيرك فقلبو.. وما زاد حتا كلمة اكتفى بالصمت وفراس كيشوووف فيه.. بقى كيشوف حتا هي وناض وقف كيتنهد.. وقف عند راسو وحط يدو على كتفو وزير عليه.. 
فراس:السيجي ما انخليهش يتفضح.. ومك ما انخليش لخبار يوصلها حيث عارفها اترونها.. ونتا فكر فكلامي مزياااان.. هز سيفك وحارب على لي كتبغي.. ولكن نهار سيفك يجرح لي كتبغيها غير حطو ورجع لور.. حارب عليها ماشي تحاربها.. (زير على كتفو) انا مشيت هاد الساعة وداوي يدك.. ما تخليهاش هاكاك

طلق منو وخرج هاز هم ولدو وحاس بحرقتو وعارفها قاصحة عليه وما ساهلاش عليه.. وخلاه هو جالس فمكانو كيعاود هضرة باه فدماغو.. ساهي عاقد حجبانو وكيشوف فالسما لي باينة من الحيط لي كلو زاج قبالتو.. قلبو كيتشوى وما لقى لي يطفي كيتو.. جلس حتا عيا وناض كيجر فرجلسه بزز دخل لبيتو واول حاجة دارها حيد تيشورط حيث ما كيحملش يجلس بيه فدارو.. بقى غير بالسروال.. قلب على كينة دحريق الراس شربها.. ظلم البيت وطاح باغي ينعس وما كرهش ينعس ما ينوض.. حيث بصريح العبارة عيااااا وتقادالو الجهد وكره حالتو.. 

🍀🍀🍀🍀

النهار كامل وهي مخشية فبيتها.. تفكر فهضرتو وتعاود وتزيد تعاود.. ومزالة كدور السينتة وتعقل على شحااااال من حاجة ما كانتش رادالها البال ودابا عاااد فهماتها.. يااااه شحال كانت غشيمة باش ما عاقتش.. شحال من مرة كانت كتنوى وترجع تقول غير تخايل.. ولكن ما صدقوش تخيلات.. صدق بصح كيبغيها.. ولكن شنو دير دابا.. شنو الحل.. هي كتبغيه ولكن ماشي بديك الطريقة لي باغيها هو.. كتبغيه وتعزو بحال شي اخ او شي صديق او انسان مقرب.. ولكن كحبيب ما فكراتش فيه بهاد الطريقة ابدا.. وشنو دير مع سعد لي طلبها.. تكمل معاه!! واذا كملات.. تشعل لعوافي بين ولاد لخالة!! تسمح فيه وهي كتلقى فيه الإنسان لي كترتاحلو.. شنو دير ما عرفاتش.. تلفات ودارت بيها الدنيا وما بقات عارفة ما تقدم ولا توخر.. 

داز داك نهار كحل على كلشي.. براء لي كيقاسي وكيتقلب فبلاصتو النعاس هارب عليه.. بيسان لي دمعتها ما نشفاااتش ولا بغات تنشف.. سعد لي ايحماق بالتعياط ولي زابيل وهي ما كتجاوبوش.. وتالا لي كتضرب اخماس فاسداس وتفصل وتخيط ما باغة تجرح حد وما باغة تأدي حد واخة على حسابها.. 

ناضت فالصباح حاطة حاجة وحدة فبالها.. اليوم اتفري هادشي.. ما تريضات ما والو ما عندها گانة.. قادات مسائلها وهبطات فطرات قبل كلشي ما باغة تلاقى حد حشمانة يكونو شافو لايف حتا هما وعرفو.. وغير سالات هزات تيلي كتنهد ودوزات نمرتو.. 

تالاسين:الو.. سعد!
سعد:(معصب) فين كنتي.. علاش ما كتجاوبيش.. من لبارح وانا نعيط ونتي ما مسوقاش مخلياني انحماق!!!
تالاسين:(غمضات عينيها كتهدن راسها) سمعني.. خاصني نشوفك
سعد:اه دابا عاد.. وعلاش البارح ما بغيتيش! 
تالاسين:بففف.. شو سعد الله يخليلك صحيحتك صافي.. بغيتي تلاقاني اجي لنفس لكوفي ديال ديك نهار من دابا نص ساعة نكون تما.. ما بغيتيشي على خاطرك
قطعات عليه كتاخذ نفس طويييييل تحبس الغصة لي فحلقها والدمعة لي باغة تهبط.. 
تالاسين:يااا ربي.. يااا ربي وقف معايا
تنهدات وتوجهات لبلاكارها.. اختارت حوايج من الطرف لبساتهم وخرجات.. يله فاتت بيت بيسان وهي ترجع دخلات باش طل عليها كي بقات.. دفعات الباب ودخلات.. اابيت كان مزال مظلم وهي مرمية ففراشها ناااعسة وشعرها لي كلو مخبل مغطي وجهها ومعنقة مخدة ومخدة خاشياهابين رجليها.. قربات عراتلها على وجهها كتفيقها حتا حلات فيها عينيها بشوية.. وبانو شحال منفوخين وحومر.. هزات عينيها فتالا شافت فيها بين رموشها ورجعات خشات راسها فلمخدة.. 
تالاسين:بيسان.. شعندك واش مريضة.. شعندوم عينيك
بيسان:(كتجاوبها ووجهها فلمخدة) والو.. غير قصرت بزاااف وما نعست حتا لصباح عليها
تالاسين:بفففف نتينا اتخرج على راسك.. نضم وقتك الصحبة شوية هاء
بيسان:اممم ان شاء الله
تالاسين:(باستها) يله نعسي وارتاحي.. انا مشيت
ما جاوباتهاش بيسان وبقات ساكتة حتا خرجات وهي تهز راسها من لمخدة كتشوف فالسقف والدمعة سايلة من جنب عينيها وتبعوها خوتها.. تنهدات تنهيدة طلع فيها صدرها وهبط وهزات يديها كتمسح دموعها.. 
بيسان:علاش اتالا علاش!! علاش اختي اهئ اهئ اههئ

🍀🍀🍀🍀

جالسة هازة كاس دالقهوة فيديها.. ميلة رججليها للجنب وملاصقاهم وكتشوف من الزاج لي كيطل على الزنقة.. وساهية كتخمم حتا وقف عليها مغوبش.. 
سعد:سلام
حطات الكاس ودارت شافت فيه وهو يمدلها يديه.. 
تالاسين:(مداتلو يديها) وعليكم السلام
سعد:(جلس قبالتها مضروب من جنب فمو) تعطلت عليك! 
تالاسين:لا ماشي بزاف باش جيت
سعد:اوك مزيان
تالاسين:الصمت
سعد:(حط يديه علي الطبلة مربعهم وعاقد حجبانو) دابا شرحيلي.. كيفاش داكشي دبراء.. كيفاش كيبغيك همم! ما بقيتوش خوت
تالاسين:كيفاش وعلاش وفوقاش انا براسي ما عارفاش فبلاااا ما تعذب راسك وتسقسيني
سعد:(زعف) وشكون ايعرف!! انااا! علاش نتي عمرك رديتيلو لبال!! مالو فليلة ونهار بغاك ولا شنو! 
تالاسين:(ساهية كتشوف فالزاج) ماشي فليلة ونهار.. انا لي كنت معمية
سعد:بفففففف.. اوك اتالا ماشي مشكيل..نتي ما عندك حتا دخلة فيه هو لي بغاك ماشي نتي.. اولا!!!! 
تالاسين:(فهماتو وشافت فيه بجدية) براء معزتو فقلبي بحالو بحال جهاد ولا جواد.. كنبغيه كيما كنبغي اي واحد من عائلة سلطان اوك 
سعد:فهمتك ولكن هو ما باغيش داك الحب هذاك.. هو طامع فغيرو
تالاسين:ما ايلقاهشي عندي
سعد:اوك.. (شد يديها بين يديه) سمعيني اتالا.. بما أن القضية وصلات لهنا فما بقالنا فين نزيدو نعطلو بزواجنا.. انا انهضر مع الواليدة اليوم وهي اتكلف.. ما خاصناش نزيدو نعطلو بيه.. والصراحة ما بقيتش باغيك تجلسي فديك الدار معاه وانا عارف شنو تحت راسو
شافت فيه مطولا ساكتة وهو كيتسناها تهضر.. حتا جرات يديها من بين يديه وقلبات وجهها للجنب ما باغاش تشوف فيه.. 
تالاسين:على هادشي بغيت نهضر معاك
سعد:حتا نتي كتفكري بحالي ياك.. خاصنا فهاد الشهر نساليو هادشي
تالاسين؛ (تنهدات) لا أسعد.. من دابا لفوق (سكتات شوية) ما بقاتشي شي حاجة اسمها حنا.. ويانا وياك سالينا قبل ما نبداو
شاف فيها كيستوعب ورجع كيضحك بشوية.. 
سعد:بركة من لمزاح ههه.. خلينا كنهضرو فالصح دابا
تالاسين:ما كنتمازحش كنهضر دبصح
سعد:(زعف) كيفاش بصح كيييفاش! شنو زعما انا وياك صافي! ياك هضرت معاك وكنت قابلة شنو تبدل.. شنو هااا هضري
تالاسين:(بهدوء) اول حاجة بلا ما تغوت واخة.. وثاني حاجة.. يانا قبلت اه ولكن قبل ما يوقع كاع هادشي.. شوف فيا أسعد.. نتينا وبراء ماشي زوج غراب باش نعمل عين ميكة عليك ولا عليه.. نتينا وياه ولاد لخالة فهمتي شني هي ولاد لخالة يعني فحال لخوت.. وما نرضاهاشي لراسي نفرق لخوت ولا نشعل بيناتهم لعوافي.. ولبارح شفت يله هضرت معاه شني عمل.. وبانلي حتا هاد الضربة لي فوجهك هو سبابها.. 
سعد:(شاف فيها عاقدهم وكارز على يديه)ماشي شغلك نتي.. خليني مني ليه
تالاسين:شغلييييي قالك ماشي شغلي.. كلشي وقع بسبابي وكلشي انساليه بيدي.. هو ييه حتا واحد فينا ما ايرجع يتصرف عادي كيما كنا قبل بحال الا ما كاين والو.. مي على الاقل ما انكبروشي القضية.. نتينا وبراء فحال لخوت اسعد.. ما خصكومشي تخسرو بعضكم على قبلي.. ما نقبلاشي وما نرضاهاشي.. كنتمنى تفهمني.. يانا وياك هنا وحبس..

بقات كتسناه يهضر وهو كيحقق فيها ويلعب بفكو.. رجع قلب وجهو لجنب حاط يدو تحت ذقنو ورجع شاف فيها.. 
سعد:دابا نتي شنو يحسابك راسك.. اتقوليلي بعد افلان انبعد!! اتقوليلي سالينا نساليو!! ايوا الالة لا.. انا منين خذيت موافقتك صافي ما انتراجع حتا ناخذك.. وخاااصة على سبب بحال هذا.. 
تالاسين:دابا نتينا غير باغي تعقد القضية ياك!
سعد:القضية داك خينا لي عقدها وجا خشى كرموصتو وسطنا
تالاسين:دابا يانا ولا نتينا ولا هو ما كينشي الفرق.. المهم هو ان هادشي خاصو يحبس فهمتي
سعد:ما ايحبسش اتالا.. ماشي الا قلت نتي ايحبس ايحبس
تالاسين:(عقدات حجبانها) سعد.. بلا ما تصعب القضية
سعد:نتي لي كتصعبيها.. انا طلبتك وقبلت علاش تقلبت دابا! وهاد القضية ديال انا وبراء خوت ما داخلاليش لدماغ.. الا كنتي باغاني ما شغلك فحد
تالاسين:(زفرات قالبة وجهها) يانا قلت لي عندي.. ونتينا تعرف دابا
سعد:(حط يدو على يدها) تالا.. واش ما كتبغينيش! 
شافت فيه مطولا وهو مفيكسي نظرتو على عينيها.. بنظرة متلهفة وخايفة فنفس الوقت من جوابها.. تنهدات كتصبر راسها ونطقات.. 
تالاسين:كنبغيك او لا لا.. هادشي ما ايبدل والو (جرات يديها ووقفات) بسلامة اسعد.. تهلا فراسك
بغات تمشي وهو يوقف قبل ما تحرك. جرها من يديها.. 
سعد:(مخرج عينيه) ما اتمشيش.. ما انخليكش.. هادشي ما حبسش هنا وعمرو يحبس
تالاسين:(نترات دراعها) ماشي لخاطرك.. 
عطاتو بالظهر كتزرب فالمشية خارجة بحالها.. وخلاتو هو موراها ايحماق بغى يتسطى.. ركبات فالاوطو ديالها كترجف ومزيرة على الفولون وكتشوف قدامها.. وبشوية بشوية خلات دموغها يهبطو وتطلع معاه شهقتها.. كتبكي وتمسح وترجع دمع عاود.. هزات راسها قبل لا يخرج ويلقاها مزالة تما.. وديمارات الاوطو وهي كتغزل والدموع كيهبطو بلا شوارها.. 

🍀🍀🍀🍀

ناضت بيسان من فراشها.. كتفكر فحالتها وفحالة خوها كي اتكون حتا هو.. هازة دبيلة ليها وليه.. حيث عارفاه شحال كيبغيها ويمكن كثر ما كتبغي هي سعد.. كتفكر فيه وفيها وفسعد وفتالا وفهاد لحريرة لمحرحرة لي طاحو فيها.. ما قادرة تلوم حد ولا تحقد على حد.. لا تالا لا سعد.. حيث عارفة تالا كون كانت عارفة بحب بيسان لسعد عمرها تقبل تكون ليه.. واخة على حسابها.. عارفة بلي سكاتها هي وبراء هو لي وصلهم لهاد لحالة.. هي خبعات على ختها اقرب الناس ليها وهو خبى فقلبو وخلا غيرو يسبقو ليها.. خذات نفس عميق وناضت من بلاصتها دخلات للحمام.. وما هي الا دقائق خرجات مدوشة.. نشفات شعرها وقادات حالتها ولبسات عليها وخبعات وجهها الذابل تحت القليل من الماكياج.. حتا وجدات راسها وناضت هزات تيلي ديالها.. 
بيسان:الو!.. صافا!.. الحمد لله.. فاينك خاصني نشوفك!؟.... خاصني نهضر معاك.... صافي واخة
قطعات وهزات صاكها وخرجات بحالها.. ركبات فالاوطو ديالها وتحركات.. عقلها مرفوع وحابسة دموعها بزز.. 

🍀🍀🍀🍀

كان ناعس من بعد ليلة طوييييييلة ما نعس فيها حتا صلى لفجر وصبح الصباح.. مجبد على ظهرو وحاط يديه علي جبهتو.. ناعس بسروالو دالكيطمة لي نازل كيبان من تحت منو لبوكسور ومن الفوق مخلي صدرو كيضرب فيها لهواء.. ملامح وجهو مكروزة وباين فيه لعيا.. كان غااارق فنعاسو حتا كيضرب الصوني دالباب وفيقو.. زفر من مناخرو وهو مزال مغمض عينيه.. مال على جنبو وحط لمخذة على وذنيه وخلاها كتصوني.. عيا صابر وكيتسني الصوني يحبس ويرجع ينعس.. ما قادرش ينوض من بلاصتو.. عيا هو ولي كيصوني ما بغى يعيا.. حتا ناض تجلس ورمى لمخذة ساخط.. مع ناض تجلس مع عطس عطسة ونيفو حمر كيشمر بيه.. تروح فاش دوش بالماء بارد ونعس حدا لكليمة عريان.. ناض وقف ساخط عاقد حجبانو كيحك فعينيه ويشمر بنيفو وشعرو هابط على جبهتو.. والصوني مزال كيضرب مرة مرة.. قرب للباب وفتحها بالجهد مخنزر وطاااالعلو لخز لراس..

فتح الباب ساخط ومع حل الباب مع حل عينيه.. تفاجئ بيها قدامو.. عقد حجبانو ودوز يدو على عينيه ورجع شاف فيها كيتأكد.. لقاها هي لي واقفة قدامو.. حانية راسها وكتشوف فجنابها حشمانة تشوف فيه وهو ما لابس والو من لفوق وغير كدور فعينيها وخذوذها حمارو وطلعاتلها التزنيكة.. وهو واقف قابط فيد الباب وكيرمش فيها ويستوعب شنو جابها لهنا..

فنفس الكافي كان سعد مزال جالس كيحك فلحيتو معصب ويشوف فالزاج وعينيه على الساعة.. عاقد حجبانو حتا طلبو معاه الشرع وغير كيسوط ويزفر قانط غير مع حوايجو فحال الا جالس على الشوك وبالو كلو مع تالاسين ومع الهضرة لي دارت بيناتهم.. حتا هز عينيه وشافها واقفة فالباب جميلة كعادتها واخة باااين عليها الضيم واخة عيات تحاول تخبي فيه.. شيرلها بيديه حتا شافتو ورجع حنى راسو وهي كتقدم عندو بخطى بطييييييئة وراسمة ابتسامة مزيفة على وجهها.. وقفات عليه كترمش بعينيها لكبار وشعرها مطلوق ومجموع من جناب.. وبصوت هاادئ صعيب باش خرجاتو مور التنهيدة لي تنهدات مداتلو يديها ونطقات..
بيسان:سلام!
سعد:(وقف تبسملها ابتسامة بلا خاطر) اهلا.. صافا!
بيسان:الحمد لله.. نتينا!!
سعد:(تنهد) نقولو الحمد لله.. جلسي!
تبسماتلو ابتسامة خفيفة وجلسات مقابلة معاه..
سعد:شنو تشربي
بيسان:والو.. ما يحتاجشي
سعد:لا ما يمكنش.. (عيط للكاغصون) 
الكاغصون:تفضل اسيدي! 
سعد:قهوة حليب بلا سكر..
الكاغصون:مرحبا اسيدي
مشا الكاغصون ودار تقابل معاها لقاها كتشوف فيه باستغراب.. 
بيسان:باش عرفتيها كتعجبني وبلا سكر
سعد:ماشي شي حاجة صعيبة نعرفها اولا! 
بيسان:اه.. بصح
سعد:(تقابل معاها بجدية) ايوا.. فاش بغيتيني! 
بيسان:(تبسمات كتشوف فجنابها وتحك يديها بتوتر) احم.. شفت لايف! 
سعد:(ضحك بسخرية) وشكون ما شافوش!! 
بيسان:(سرطات ريقها وهزات عينيها فيه بأسى والدمعة قرييبة وتنزل) بصح كتبغي تالا وباغي تزوجها! 
سعد:(قلب وجهو لجنب وعلى وجهو ابتسامة دالفقصة) هادشي لي كنا ناويين ساعة خوك خرجلنا من الجنب
بيسان:مي راه براء من هادي زمااان وهو يبغيها 
سعد:(غوت وضرب فالطبلة حتا خلعها) الالة يبعععد منهاااا.. لعام لي داز ولا لي قبل منو ما سووووقيش.. تالا ديالي وما ايديها حد من غيري.. فهمتوووووو😡
بيسان:(حاطة يديها على فمها ومخرجة عينيها مخلوعة) 
قلب وجهو لجنب كيسوط ويلعب فرجليه ويعض على شفايفو بالفقصة.. حتا تنهد مغمض عينيه كسحاول يكالمي راسو ودار شاف فيها لقاها مخرجة عينيها فيه والدمعة لي شحال وهي حبساها لقات طريقها وهبطات.. تأفأف ما حملش يبكيها وشاف فيها بتأسف.. 
سعد:سمحيلي ابيسان.. ما قصدتش نغوت عليك.. غير حيث معصب وصافي.. سمحيلي
بيسان:(مسحات دمعتها بصبعانها بالزربة وتبسمات مقهورة) هه ماشي مشكيل.. كتوقع عادي 
سعد:(حط يدو علي عينيه) بفففف.. كنا هانيين.. ما عرفت هادشي منين خرجلنا
بيسان:(بحسرة) من فوقاش ونتينا تبغيها! 
سعد:(تنهد وهز راسو فيها) شحال هادي.. شي 3 سنين ولا كثر.. كنت فلول كنميل ليها حيث كنحسها كتشبه لججيهان الله يرحمها.. مي من بعد لقيت راسي كنبغيها بلا ما نشعر.. كنبغيها ابيسان وما نقدرش نفرقها.. ساعة خوك بغى يدير فيها واعر ونقز قالك حتا هو كيبغيها
هو كيهضر ويعبر وهي ديك كلمة كنبغيها كضرب فقلبها بحال لخناجر.. خرجات من فمو قرطاسة ودخلات نيشان لقلبها قهراتها كثر ما هي مقهورة.. 
سعد:شحال وانا نتسنى فالنهار لي نقولهالها وتقبل ونتجمعو.. وفاش اخيييرا ربي حققلي ما بغيت.. جا خوك وفرتك كلشي
بيسان:(سرطات ريقها مزيرة لبكية) علاش شنو دار خويا.. ياك ما دار حتا حاجة فيها العيب.. كيما نتينا خرجتي لي فقلبك حتا هو خرج لي فقلبو
سعد:وما جاه يخرج لي فقلبو حتا لدابا!! يمشي يقو.. (سكت ورجع الكلمة) بفففف.. استغفر الله..
بيسان:(صوتها كيرجف) كتبغيها بزااف!! ؟؟
سعد:فووووق ما تخيلي.. 
بيسان:(قلبات وجهها لجنب كتعض على شفايفها ورجعات شافت فيه) ايوا.. وشني عملتو دابا! 
سعد:شنو انديرو.. لي ايدار دارو خوك.. جا وضربلي كلشي فالزيرو.. بلحق والله لا كانت ليه.. والله ما نتراجع حتا ناخذها.. 
بيسان:(بتعجب) كيفاش! ما فهمتشي! واش ما بقيتوشي اتزوجو! 
سعد:(زعفان) لا الالة.. جات ديك النية دالله قالتلك لواه هي ما تقدرش تفرق بين ولاد لخالة وخاصنا نساليو.. قالتلك حنا بحال لخوت.. لواه لخراااا

" هل أحدثكم عن وجع مميت.. 💔
هو حب لحبيب غافل ولا يكترث..💔
وغرَقٌ في الاوهام لشخص بالحلم مُتشبث.. 💔
هو حب من طرف واحد.. هو حب صامت.. 💔
فارحموني وأخبروه بأني عانيت.. 💔
بأني أحببت.. 💔
بأني عشقت.. 💔
بأني حد النخاع في حبه غرقت.. 💔
ارحموني واخبروه أني قُربَه تَرَجََّيت.. 💔
وحضنه تمنيت.. 💔
و قلبي له أعطيت.. 💔
وفي صلاتي له دعيت.. 💔
ارحموني وأخبروه.. 💔 "

🍀🍀🍀🍀

حلات فمها فيه بقوة الفرحة.. يعني صافي تالا سالات كلشي ما بقى لا زواج لا والو.. وبلا ما تحس ابتسامة عريييضة ترسمات على وجهها حتا دخلاتلو الشك وشاف فيها مطلع حاجبو بتعجب وهي تجمعها..

بيسان:واش دابا صافي.. ساليتو ساليتو!! 
سعد:ما ساليناش.. فوقاش بدينا باش نساليو.. أنا والله عليها لا تفرقت واخة تنطابق السماء مع الأرض 
بيسان:(زيرات على يديها كتصبر فراسها) ولكن هي ما بقاتشي باغاك.. شني اتزوج بيها بزز!!! 
سعد:اه.. بزز ولا بالخاطر انتزوجها
بيسان:هي راه قالت غير الحق.. وعملات غير لي خاصو يتعمل..احسن حاجة عملاتها هي أنها بعدات باش ما تخلقشي مشاكل بينك وبين براء
سعد:(ضحك بسخرية) دابا نتي ضروري اتجي مع خوك
بيسان: يانا قلت غير لي كاين.. ما جيت لا معاه لا معاك.. نتينا خاصك تبعد عليها من الاحسن..باش ما تخسرشي العلاقة ديالك مع براء.. راه فحال خوك
سعد:بالناقص منها اخوة هادي..الاخوة ديالو يزيدها فراسو ويفرقنا عليه يخلينا نعيشو هانيين

🌿🌿🌿🌿

واقفة كتسرط فريقها وهو واقف مبندر عليها بصدرو لعريض وكيحقق فيها عاقد حجبانو.. حنات راسها حشمانة ورجعات الشعر مور وذنيها.. حركة ولفها فيها فاش كتحشم وحااافظها مزيان.. تنهد وخلا ليها الباب مفتوحة ودار داخل بحالو بلا ما يهضر وخلاها غير كتشوف ودور فعينيها.. بقات لثواني قبل ما تزعم وتدخل وسدات موراها الباب.. 
دخلات كتمشى فالكولوار.. كدور فعينيها وتسرط فريقها وتقلب عليه بعينيها.. حتا لقات راسها فالصالة وهو واقف عاطيها بالظهر.. رجليه حفيانين وسروالو مزال نازل شوية كيبين ملابسو الداخلية.. هز كينة رماها ففمو وهز كاس دالماد كيشرب وهي واقفة موراه كتهز فعينيها وترجع تهبطها.. تلفها وهو عريان وتقاسيم جسمو المنحوت ظاهرة ولي اول مرة تشوفها.. طلعات معاها السخانة بالحشمة وبقات غير كتفتف.. حتا دار شاف فيها بطرف عين كيطلع ويهبط فيها.. عايق بيها حشمانة وغارقة فحوايجها.. تبسم بسخرية وجلس فوق الفوطوي مسرح رجليه وكيحك فجبهتو وعينيه مغمضين.. بقات فبلاصتها ما تحركات ما هضرات.. وغير كتهز فالشعر وترجعو مور وذنيه واخة ما يكونش طايح على وجهها.. هز راسو فيها مطلع حاجبو وبنبرة جافة نطق..

براء:عوالة تبقاي تما!

هزات راسها فيه وباازربة رجعات حناتو وقربات بشوية جلسات قبالتو حانية راسها ما كتهزوش فيه.. وهو غير ما جاه ضدد وحلف لا ناض لبس عليه.. وعاد ما زاد تشبح وسرح يديه فوق الفوطوي.. فاتح رجليه بجلسة رجولية وكيطلع فيها ويهبط عاقد حجبانو.. تسناها تهضر ولا تنطق وهي حلفات ولا تخرج حتا السلام من فمها..

براء:اتبقاي ساكتة.. الا ما عوالاش تهضري قوليها نوض نكمل نعاسي حتا ترشقلك
تالاسين:(شافت فجنابها وحنحنات كتسرح صوتها) عافاك.. واش واخة تلبس حوايجك! 
براء:علاش.. ياك ما شفتيني قدامك زلاط.. هاني لابس
تالاسين:(عقدات حجبانها ما عجبتهاش طريقتو فالهضرة) عافاك.. لبس شي حاجة من لفوق.. ستر راسك راه حشومة
براء:(ضحك بسخرية) ههه علاش حشومة.. ياك انا غير خوك اولا.. 😏

براء:ياك حنا خوت.. ايوا عادي! 
هزات راسها شافت فيه عاقدة حجبانها وما عاجبها حال وهو كيتبسم باستهزاء..

تالاسين:كاعلك.. مهم يانا جيت خاصني نهضر معاك
براء:عقد حجبانو بجدية كيتسناها تهضر

تالاسين:(خذات نفس عميق عاد هضرات) ما نكدبشي عليك.. من البارح ويانا نفكر فهضرتك.. صدمتيني ابراء والله.. ما بقيت عارفة راسي من رجلي.. تخربقت وتلفت والله

براء:(تبسم بالجنب) الا تلفتي شدي الارض.. 

تالاسين: (تجاهلات كلامو وكملات هضرتها) مهم باش بلا ما نطول ونجبد فالهضرة.. بغيت غير نقولك ما تخسرشي علاقتك بسعد بسبابي.. عافاكم يانا ما باغاشي نكون سباب لعداوة بيناتكم.. نتوما خوت ما خصكومشي تخسرو بعضكم لا على قبلي ولا على قبل غيري! 

براء:(ضحك مفقوص) ههههه شفتك نتي عمرتيلي الحالة المدنية بلخوت.. ما كفاكش راسك زدتي معاك حتا سعد هههه

تالاسين:(غمضات عينيها كتصبر راسها على تهكمو) بركة من طنز.. كنهضرو فالمعقول دابا

براء:ههه ربي ربي.. (جمع الضحكة وخنزر) راه نتي لي طانزة على الوقت.. ولاهيلا قالتلك خوت.. خاويني نتي مع العالم كامل وتهناي

تالاسين:(كمشات فمها معصبة) دابا مالك!! 
براء:مالك نتي.. اما انا ما مالي واااالو 

تالاسين:(زفرات) اوك.. مهم جيت غير نقولك خلينا نساو كاع هادشي لي وقع ونعتابروه فحال الا عمرو كان.. لا يانا ولا نتينا ولا سعد انساو كلشي ونطويو هاد الصفحة.. يانا ما باغاشي نكون ديك لبنت الخايبة لي فرقات ولاد الخالة.. عائلتكم عملات فيا خير عمري نساه وما باغاشي نجي يانا ونفرتكلها الشمل.. سعد هضرت معاه وقلتلو ينسى كلشي.. وحتا نتينا هايداك.. عافاك ابراء.. ما تخسروشي علاقتكم.. خليونا نطويو هاد الصفحة ونساو هادشي عافاكم.. 

براء:(تقابل معاها حاط مرافقو على ركابيه وشابك يديه) نساو!! شنو انساو! بنتلك تيليفون اتشديه تفورماطيه وغادي يتمسح منو كلشي.. انشد عقلي انقولو نسى ايقولي اه بسم الله ياك! واش نتي هبيلة ولا كتبغي تبوهلي ما فهمتكش..

تالاسين:هبيلة ولا كنتبوهل المهم يانا ما باغاشي نخلق بيناتكم الصداع.. 

براء:صداع هو لي خلقو نهار حط عينو عليك

سكتات كتشوف فيه ما لقات باش تجاوبو وحتا هو ما هبطش عينو.. مصغر عينيه وكيشوف فيها بهدوء تام.. رجعات قلبات وجهها للجنب وتنهدات ورجعات شافت فيه.. 
تالاسين: مهم هادشي خاصو يحبس هنا.. خليونا نرجعو كيف كنا.. خليونا نساو كلشي

قلب وجهو للجنب كيمسح على وجهو بيد وحدة ودار شاف فيها مفقوص.. 
براء: بغيت غير نفهم شنو عندك فداك الراس!! علاش فاش كتشدي فشي كلمة ما كطلقيش.. ساليتي من خوت لصقتيلي فخاصنا نساو!! (خرج عينو فيها كيهلل بيديه وعقلو خارج) واااااااا بنادمة واااا فهمي.. وااااا دخليها لداك الراااس..رااه كنبغيييييك.. فهمتييييها ولا لا!! .. شمن كنبغيك وااا راه مرضت.. مرضت بيك ومعاك.. مرضتييييني.. شفتي فاش كتقوليلي نسى راه بحال الا كتقوولي موووووت اداك البشر.. بحال الا كتقوليلي قطع النفس وخلي الروح تزهق!! واش كتشوفيني مرااهق ديال 14 لعام يبغي وحدة فالصباح ينساها فلعشية!!! كنبانلك حجرة!! ولا كنباناك باغي نلعب معاك عريس وعروسة!!! كطنزي عليا ولا على راسك ولا علامن!! قالتلك نسى.. شغاااانسى.. نتي راه عندك شي مونتيف فعقلك حيث كتبقاي غير تهضري بلا ما تفكري.. (هز كف يدو قبالتها) شفتي نهار يتمسح هاد الويل من يدي نساك.. كون عرفت راسي قادر نساااك كون درتها من شحااااال هادي بلااااا ما عاد تجي نتي تقوليهالي.. ياك ما يسحابك عااجباني حالتي هاكة!! 

تالاسين:حتا حد ما قالك بغيني! 

براء:يييييه ما كذبتيييش.. عندك الصح الالة.. انا لي حمار لي متبع هاد القلب عندي.. ما كذبتيش.. حتا حد ما بزز عليا نبغيك.. قلبي لي دارهالي.. كون سحابني هاكة كون نهار حرقتيني جبدتو شويتو وتهنيت.. (شاف فيها مكره) كرهتيني فلبغوووو وفالزمر كااامل.. بالناقص

تالاسين:ما عرفتشي علاش كتلومني! شني عملتلك يانا غير قلي! شنو الغلط لي عملت!! واش حيث ما بغيتكشي كيما بغيتيني!! كيما نتينا ما بغيتينيشي بخاطرك حتا يانا راه ما نقدرشي نبغيك بخاطري.. نتينا ما قادرشي تنسى وحتا يانا ما نقدرشي نقول نراسي افلانة خاصك تبغي فلان وشوبيك لوبيك انرجع نبغيك..وعلى حساب كلامك راه نتينا اكثر واحد عارف بلي حتا واحد ما يقدر يتحكم فقلبو.. فبلاااا ما تبقى تلومني على شي حاجة ما بيديشي!! 

شاف فيها لمدة ساكت.. وحتا هي ما هبطاتش عينيها.. الهدوووء وغير لعينين لي كيهضرو.. رجع شوية لور وبصوت هادئ عكس عاد دابا شوية.. 

براء:عندك الصح.. القلب هو لي ما يقدر حد يتحكم فيه.. وكون كنا نقدرو كون تحكمت فيه انا لول.. ساعة ماشي بيدينا

ناض وقف وخشى يدو فجيب سروالو وهي حنات راسها ما بغاتش تشوف فيه وهو عريان.. شاف فيها بنص عين غير من تحت لتحت وهو هاز راسو لفوق..

براء:فاش تكوني خارجة سدي موراك الباب
عطاها بظهرو غادي لبيتو مخنزر وهي توقف بالزربة قبل ما يمشي.. 

تالاسين:براء! 

وقف فبلاصتو بلا ما يدور كيتسناها شنو اتقول..وهي واقفة موراه كترمش وتلعب بصبعانها وبصوت خافت كعادتها نطقات..

تالاسين:مزالين كما كنا ياك! 
براء:(بلا ما يدور) علاش كي كنا! 
تالاسين:الصمت.. 

تسناها تهضر ما هضراتش ودار عندها بالجنب كيهضر بصوت هاادئ سارط موراه الفقصة.. 

براء:ما كناش باش نبقاو.. انا لي كنت حاطك فقلبي وانبقى حاطك فيه..(دار عطاها بظهرو) اما باش نرجع براء لي عرفتيه قبل البارح.. غير بلا ما تسنايها.. ونتي يا تبغيني كيما بغيتك.. يا ما تعتبرينيش كاين.. اما ديك لمحبة دالخوت غير خليها عندك..

خطى خطوة بغي يمشي وهي توقفو مرة اخرى.. 
تالاسين:براء!! 

تنهد مغمض عينيه باغي غير فوقاش يبعد من حداها حيث حاس براسو غيطرطق.. ما باغيش يزيد ينطق بشي حاجة لي تجرحها او شي حاجة طيح منو يكفي الحالة لي وصلها ولي ما حملهاش.. 

تالاسين: خليني نداويلك يدك! 

سمعات ضحكتو وهو عاطيها بظهرو وحنى راسو كيحك عينيه بطراف صباعو ويحرك راسو يمين شمال بمعنى لا حول ولا قوة الا بالله.. وفلخر زاد تقدم دخل بحالو لبيتو وخلاها هي واقفة مصمرة فبلاصتها.. ما باغاش تخسرو.. عزيز عليها وما باغاش يتخلقو المشاكيل بيناتهم او يتكهرب الجو بيناتهم.. شافت حتا عيات وهو دخل بحالو وفلخر هزات راسها وخرجات.. 

🍀🍀🍀🍀

رجعات بيسان بحالها لدار.. ما نقدروش نقولو فرحانة وإنما ماشي بحال قبل.. هما اه ما ايتزوجوش وتالا سمحات فيه مي هو لا.. هو باقي كيبغيها وقالهالها بفمو.. هو صدق كيبغي تالا ختها وصاحبتها وماشي هي.. بفمو قالهالها... تسنات نهار ينطق كلمة نبغيك.. ونهار نطقها ما كانتش ليها.. 
اما تالا فحتا هي ما كانتش حسن منها.. وهمها هازاه بوحدها.. وغير خرجات من عندو جات نيشان للدار.. وتفادات تلاقى اي واحد وطلعات نيشان لبيتها.. دخلات وجلسات على جنب ناموسيتها كتشوف فالحيط قدامها مرفوعة.. مينوشة لي كانت فالبالكون غير شافتها دخلات وهي تجي وطلعات فحجرها كتلعبوتلمس عليها.. وبدون ما تحس لقات دمعة هبطات على خذها ببطء حتى حسات بطيبة لملوحة ففمها.. شدات مينوشة عنقاتها عندها لكرشها وعينيها كيدمعو. . 
تالاسين: علاش امينوشة ما مكتابليشي نفرح!! علاش فيما نقول حياتي تقادات خاص توقع شي حاجة لي تقلبلي كلشي اهئ ااه ء أهنئ علاش امينوشة!! واش يانا قبيحة! واش عمري اذيت شي واحد اهئ اهئ ااهء اهنئ.. قولي علاش!! شني عملت يانا اهههئ اهنهذ اااهء.. 

🍀 🍀🍀🍀

داز نهار مجبد عليهم باربعة.. وكلها وشايف راسو هو المظلوم.. وفعلا كانو كلهم مظلومين.. حتا واحد ما أدى لاخور عن قصد.. وحتا حد ما ضرب حساب لهادشي..كل واحد فيهم ذنبو انه بغى من قلبو.. كل واحد فيهم ما اختارش شكون يبغي ولا لمن يرتاح..حيث القلب ما يشاور.. لا بيسان ولا تالا ولا سعد ولا براء كان عندهم ذنب فهادشي.. مي النصيب والقدر لعب لعبتو وحطهم كاملين فنفس الملعب.. 

🍀🍀🍀🍀

تماسى الحال.. وتجمعو على طبلة لعشاء..فراس ضرب طم كانه ما فخبارو والو وحتا ولادو جهاد وجواد ساكتين على غير عادتهم هازين الهم لخوهم وكيشوفو فتالا بأسى.. لي غير حانية الراس وبزز باش كتاكل وحداها ببسان قالتلها ما كتعرفيش.. حتا نطقات رؤيا.. 

رؤيا:فاين هو براء!! ما شفتوشي واش مزال برا! 
شافو التوأم فباهم كيتسناوه يهضر وبيسان وتالا كيشوفو فرؤيا وساكتين.. 
فراس:ما غاديش يجي! 
رؤيا:كيفاش ما غاديش يجي... علاش فاين مشى
فراس:مشى لدارو! 
رؤيا:شنيييي... وعلاش! 
فرس:بغى.. هادي فيها علاش.. بغى يرتاح فدارو بوحدو
رؤيا:وعلاش مالو هنا! 
فراس:المهم شغلو هذاك
رؤيا:كيفاش شغلو! ما عندوشي الحق قالاك معامن تشاور!! ارالي تيلي ديالك نعيطلو.. يانا خليت ديالي لفوق
فراس:خلي الولد عليك
رؤيا:اتعطيني ولا نمشي نجيب ديالي! 
فراس:(شاف فيها بطرف عينو وعطاها تيلي) ها هو بيناتكم.. 
عطاها تيلي شداتو ودوزات النمرة حتا جاوبها بصوتو مبحوح.. 
رؤيا:فاينك! علاش مشيتي لتما! علاش ما جيتيشي نهنا! شكتعمل تما بوحدك! اجييي دااابا هز راسك واجي
براء:الواليدة.. انا ما انجيش.. انبقى هنا.. ودابا نجي نطل عليك
رؤيا:كيفاش طل عليا! علاش عوال تجلس تما! 
براء:اه.. انبقى هنا.. فاش نقدر اندوز نشوفك ونرجع فحالي

رؤيا:كيفاش هادي عاود!! علاش اتجلس تما! 
براء:مرتاح هنا الواليدة.. غير خليني
رؤيا:(بدات تغبن) دابا ماشي حشومة عليك!! عام ونص ونتينا غابر وفلخر تخلينا وتمشي تجلس تما بوحدك كي جنون!! هي هادي ما نبقاشي نفرقك الواليدة!! 
براء:بفففف.. الواليدة الله يهديك..راني ما مشيت فين راني معاك فنفس لمدينة وفوق ما بغيتي تشوفيني اجي عندي ولا نجي عندك! 
رؤيا:وااا علاااش! ياك كنت جالس شني جاك!! 
براء:غير هاكاك وصافي..(بغى يبرد الجو) الغربة ولفاتني لجلاس بوحدي هه ما بقاش عندي مع الدار عامرة ههه
رؤيا:يااااك ابراء.. دابا رجعتي كتقنط بينا!! واخة اولدي الله يرضي عليك
براء:(زفر ساخط) وا حشومة عليك الواليدة.. ماشي كما فهمتيها غير مرتاح هاكة.. عافاك فهميني
رؤيا:(بأسى) واخة اولدي.. على خاطرك بلحق علاش ما قلتيهاليشي قبل! 
براء:حيث عرفتك ما اتبغيش
رؤيا:واخة ابراء وااخة.. على خاطرك اولدي! 
براء:وا بلا ما تعصبي الواليدة.. انا غذا دابا نجي نشوفك
رؤيا:واخة.. ان شاء الله.. يله وتهلا فراسك اولدي وعندك تبقى بلا ماكلة!
براء:ما تخافيش.. يله الله يهنيك سلميلي على لي فالدار
رؤيا:مبلغ

قطعات معاه مغبنة وما عاجبها حال وردات تيلي لفراس ورجعات لور دارت بناقص من شي ماكلة..

زينب:ما ايجيش! 
رؤيا:لا والو.. قالك باغي يجلس فدارو تما مرتاح!
حسن:وعلاش.. مالو ياك كان جالس! 
رؤيا:ما عرفت والله.. ما عرفتو منين خرجلي بهاد لبلان

شافت قدامها مفقوصة ورجعات شافت فجواد وجهاد مصغرة عينيها..

رؤيا:ياك ما نتوما لي عملتولو شي حاجة قلقاتو! 
جهاد:الله يا الواليدة.. ديما ظالمانا
رؤيا:حيث راه كاانعرفكم ما ترتاحو ما تخليو لي يرتاح
جواد:وا والله القسم ما جينا جيهتو.. وا الله يهديك الواليدة
رؤيا:بفففف.. وشعندو ما فهمتشي
فراس:وا دابا بلاااا ما تحمقي راسك.. بغى يجلس فدارو خليه..المهم يكون مرتاح
رؤيا:(بدات دمع) حتا قلت جا ونشبع منو وهو يمشي 
فراس:وهااااا لي ما بغيناش.. مسحي دموعك

حنات راسها كتغبن وكتمسح فدموعها وفراس كيخنزر فيها تجمع البكية.. وجواد وجهاد غير كيدورو فعينيهم ويشوفو فتالا لي جالسة على الشوك.. عرفاتو مشى بسبابها هي وما حملاتش راسها وبقات غير حانية راسها وتلعب فطبسيلها وساكتة.. حتا قربات منها بيسان كتهضر بصوت خافت وتشوف قدامها..

بيسان:والله حتا كيبغيك.. علاش ما كتبغيهشي نتينا ما عرفتشي

دارت شافت فيها تالا باغة تبكي.. كان نازل عليها الضيم وزادت كملات فاش شافت رؤيا كتبكي وكملات عليها بيسان.. شافت فيها ورجعات قلبات وجهها قدامها..وناضت وقفات..

تالاسين:سمحولي انطلع نعس.. بصحتكم
هنية:جلس كمل عشاك
تالاسين :كليت الحمد لله.. الله يخلف.. يله تصبحو على خير

ردو عليها وطلعات بحالها لبيتها مقهورة وحاسة بتانيب الضمير كياكلها.. سدات عليها باب بيتها وتكات عليه كتشوف قدامها.. شنو دير دابا! ها هي ما كانتش باغة تدير المشاكيل وسط العائلة وفلخر ما طاحت غير فلي خافت منو.. بقات غادة جاية فالبيت كتفكر فشنو دير.. وفلخر مشات هزات تيلي ديالها.. فتحاتو لقات فيه شي 80 ابيل من عند سعد والميساجات بلا حساب ما دخلاتش ليهم فمرة حيث عارفاه شنو ايكون كاتب.. طلعات النمرة دبراء وجلسات كتشوف فيها وتشاور واش تعيطلو ولا لا.. بقات مقاتلة مع راسها.. حتا لقات الخط دايز وصوت الصوني كيتسمع فوذنيها وهي عاضة على شفايفها كتسناه يجاوب.. بقى كيصوني حتا قطع راسو وهي تشوف فتيلي مخنزرة.. رجعات عاود صونات مرة وزوج ونفس الشيء.. وهي تشعط تيلي فوق الناموسية وجلسات مخنزرة وشدات قطتها بين يديها مفقوصة..

تالاسين:شفتي على بنادم.. شنو حاسب فراسو.. كاعلو ما يجاوب.. دحش تفو.. (بدات تغبن) ولكن بسبابي طج من الدار امينوشة..وخالتي مسكينة بكات بسبتي.. اوووووف المرض

رجعات شافت فتيلي بنص عين.. وجراتو عندها وعودات صونات ولكن ما جاوبهاش حتا هاد المرة.. وهي تمجنن..

تالاسين:اعععععععععع دحش دحش.. بو عاعا ياخور😖😖 (خراي لاخور) 

بقات جالسة وتغزز فضفارها وتهضر مع مينوشة بالفقصة.. وتيلي مزال مرة مرة يصوني حداها وهي معصبة.. حتا طلعلها الزعاف وهي تجاوب معصبة..

تالاسين:نعام! 
سعد:علاش ما كتجاوبيش! 
تالاسين:حيث عارفاك شغتقول! 
سعد:خاصنا نتلاقاو
تالاسين:لا اسعد.. هضرت معاك.. صافي سد الموضوع يانا وياك سالينا
سعد:ما ساااليناااش وما انسالييييوش.. بربي ما نفرقك فهمتيها..
تالاسين:اوك..تصبح على خير

قطعات عليه وطفات تيلي وترمات على لمخذة كتشوف فالسقف عاقداهم.. 

صبح الصباح وناضت مخسرة هزات راسها طلات على الساعة لقاتها 7..حطات يديها على كرشها موجوعة وناضت بزز باش كتخلف دخلات لطواليط وداكشي لي طاح فبالها هو لي كان لقات حبيبتها زارتها.. خيبات سيفتها وقدات امورها وخرجات جبدات دواء موالفة تشربو.. ورجعات تخشات فبلاصتها.. ما بغاش يديها النعاس ولوجع مرة مرة ينغز فيها.. تفكرات تيلي وجبداتو من لمجر شعلاتو لقات لي بواط فوكال ديالو بلعرام.. تنهدات حابسة الغصة فقلبها ودخلات لميساجاتو كتقرى وتغبن.. زاد قهرها كثر ما هي مقهورة.. وجاوباتو بميساج واحد.. " سمحلي اسعد"..

يله بغات تحط تيلي وهي تفكر براء عاود.. بقات شحااااال وهي كتشاور واش تعيطلو.. وفلخر زطمات على نفسها ودوزات لابيل.. بقى يصوني يصوني ووالو.. تعصبات وناضت وقفات عاقداهم وحالفة حتا تخليه يجاوب.. خرجات للكولوار فين كاين فيكس محطوط هزاتو دخلاتو لبيتها وجلسات كدوز نمرتو وتسناه يجاوب.. صونات وعودات ورجعات عودات ولا بغى يجاوب.. حتا بدات كتخلع وتشطن وهو حرام ولا جاوب.. حطات السماعة وجلسات كتهضر مع راسها

تالاسين:اواعدي.. شعندو هذا!! ياك ما تكون واقعالو شي حاجة!..(سكتات) لا لا شغيوقعلو.. ايكون غير ما بغاشي يجاوب الدحش ياخور.. اسنووس (دحش) الله يعطيه خبزة.. ولا كانت وقعالو شي حاجة.. بفففف مشكيلة هادي.. اححح اكرشي اوووف

بقات جالسة كتشاور.. وفلخر لقات راسها لبسات سروالها دجين وشوميز من الفوق فالاسود طويلة شوية.. صباط بلا مشطات شعرها بيديها فالطريق وهي خارجة من البيت.. وصلات للاوطو ديالها وركبات شافت فراسها فلمراية كتقاد شعرها وديمارات والوجهة دارو..

لقات راسها واقفة قدام بابو.. شادة فطرف السوميج وحتا كتمد يديها تصوني وترجع تجرها.. باغة طمن عليه وخايفة يكون غير ما باغيش يجاوبها وتصدق مطيحة براسها.. خذات نفس عمييييييق كتقوي بيه راسها وصونات.. الصوني لول والثاني والثالث وما فتح حد.. بصح بدات تقلق.. بقات كتشوف حتا عيات قالت يمكن يكون خرج وهبطات فالسانسور عند الكونسييرج..

تالاسين:سلام!

الكونسييرج:وعليكم السلام ابنتي!

تالاسين:عافاك بغيت نسقسيك على ميسيو براء واش خرج هاد الصباح!

الكونسييرج:لا والو.. ما شفتوش خرج من نهار جا! وحتا هاد الصباح ما خرجش

تالاسين:مأكد!!!

الكونسيرج:وشنو كنلعب هنا

تالاسين:ولكن يانا كنصوني عليه ما كيفتحشي وكنعيط فتيلي وما كيجوبنيشي.. خفت تكون وقعالو شي حاجة!!

الكونسييرج:يقدر غير ناعس وما سمعش!

تالاسين:ما عرفت.. ما نضنش نعاسو ثقيل حتا لهاد الدرجة.. (رجعات شعرها لور) بفففف مشكيلة هادي.. (شافت فالكونسييرج) اكيد عندك دوبل دالسوارت ياك!

الكونسييرج:اه عندي

تالاسين:عطيهوملي.. خاصني ضروري ندخل نشوفو واش كاين ولا لا 
الكونسييرج:لا لا ما نقدرش.. وباش عرفتك انا شنو اديري!

تالاسين:راه ما انسرقشي

الكونسييرج:ايوا الله وعلم

تالاسين:ايوا طلع معايا فتح بيدك.. غير نشوفو واش كاين وواش بيخير

الكونسييرج:وا مااا عرفت ابنتي راه يقدر ما يبغيش

تالاسين:عافاك الله يخليلك صحيحتك.. راه من لبارح وهو ما كيجاوبش.. عافاك

شاف فيها كيفكر مع راساتو.. وهي كترغبو بعينيها.. وفلخر وافق.. وطلع هو وياها لدار.. فتحو الباب ودخلات كتجري وتقلب عليه بعينيها وتعيط بسميتو مخلوعة.. 

دخلات كتقلب عليه فالدار مفتونة.. وخلات الكونسييرج داخل موراها..كتعيط بسميتو وتقلب.. عقلات على البيت لي دخل ليه اخر مرة جات عندو ومشات قاصداه نيشان وقلبها كيضرب فالمئة..

بيتو ما كانش عندو الباب ودخلات نيشان مدرمة.. دورات عينيها فالبيت حتا طاحت على الناموسية لي جات فالراااس دالبيت فوق درجة من الاسمنت.. سرير منو للارض وجاي مخشي فقنت بحال شي سدة وسقفو مضوي بضوء خافت والريدويات نازلين فالبيت كامل مظلمينو.. بانلها ناعس عريان من الفوق بنفس السروال دالكيطمة لي خلاتو بيه.. مكمش على بعضو وجار عليه ليزار مغطي بيه وكيرجف فبلاصتو.. قربات منو كتجري حتا كانت اتعكل فالدرجة.. وقربات حنات على ركابيها عند راسو.. بانلها عرقان وشعرو لصق على جبهتو بلعرق.. عاقد حجبانو ووجهو حمر وشفايفو كيرجفو.. نيفو حمر وسنانو كيطقطقو.. خرجو عينيها وحطات ظهر يديها على جبهتو لقاتو كيشوي..

تالاسين:(حطات يديها على فمها) هيييييه اواعدي.. (حطات يديها تحت حنكو كتهزلو وجهو ) براء!! براء!! كتسمعني.. براء!! 

براء:امممم.. 

حل عينيه شوية كيشوف غير بين شفارو.. بانتلو جالسة فوق راسو وهو يتبسم ابتسامة خفيفة بزز باش حرك فيها فمو.. وضحك ضحكة خافتة بتهكم.. سحابو راسو كيحلم بيها وجاتو الضحكة على راسو.. رجع رخى راسو فشلان وغمض عينيه كيزير على فمو باش يحبس طقطيقة دسنانو وزاد تكمش فراسو.. 

بقات غير كتفتف وتدور بيه وبجنابها.. هزات عينيها فوق منو بانتلها لكليمة خدامة.. وناضت كتفتف تقلب على تيلي كوموند باش طفيها.. كتدور فبلاصتها ووالو ما لقاتها.. حتا ضرباتها برجليها حيث كانت طايحة فجنب الناموسية.. طفات لكليمة هي اللولة ورجعات حنات كتهضر معاه وتهزلو فراسو..

تالاسين:براء.. جاوبني براء!! شوف فيااا.. براااء

رجع حل عينو مرة اخرى عاقد حجبانو فيها وبزز باش كتبانلو بقوة الضبابة لي نازلالو على عينو..

تالاسين:فتح عينك.. شوف فيا!! كتسمعني!! 

براء:(بصوت فشلاااان) تالا!!.. جيتي!! 

تالاسين:اه جيت جيت.. نوض نمشيو لكلينيك نوض

بغات تنوضو ويله حطات يديها على دراعو وهو يخيب سيفتو ما باغيش ينوض.. 

براء:لا.. خليني
تالاسين:لا نوض.. خاصك الطبيب ضروري

تكعرر معاها ما بغاش ينوض.. من صغرو ما كيحملش شي حاجة سميتها كلينيك.. ما كيحملش يمشيلو واخة يكون كيموت.. لكلينيك الوحيييد لي داخلو هو ديال رؤيا وغير حيث كيمشي يطل عليها مرة مرة فيه وصافي.. اما هو ما عندوش مع المستشفيات فمرة..تأففات ما عارفة ما دير..وكتشوف فيه معدوم قدامها وحالف ولا ينوض.. 

تالاسين:واخة خليك.. انعيط نخالتي تجي! 

بغات تنوض وهو يشدها من يديها قبل لا تحرك وتقلب على ظهرو مغمض عينيه.. وكيهضر بلسان ثقيل..

براء: لا.. ما تعيطيلهاش.. اتخلع

تالاسين:ولكن واش اتبقى هايدا! 

براء:الصمت

تالاسين:بفففف.. شني انعمل يانا دابا شني! ما عرفت ما نعملك! 

براء:غغ.. غطيني.. البرد

تالاسين:نتينا كتشوي شغانغطي فيك!! 

براء:سكت مكمش

تالاسين:اوووووف ابراء اووووووف

ناضت من حداه مخلياه كيرجف وخرجات كتجري عند الكونسييرج لي بقى فالصالة ما قادرش يدخل وما قادرش يخرج ويخليها.. 

تالاسين:عتقني! مشي لفارماصي جيبلي شي دواء دالسخانة

الكونسييرج:ياك لباس! 

تالاسين:جبرتو مرة معدوم! هو سخون كيشوي وفيه البرد.. مهم مشي لفارماصي قولوم فيه السخانة الباردة وهما ايعرفو ما يعطيوك.. وطلق راسك

الكونسييرج:(تفافا) اااا ولكن.. نتي انخليك هنا! 

تالاسين:بفففف وراه ماشي سراقة شعندك! هانتينا طرق عليا وخرج صافي! 

الكونسييرج :ااا ولكن.. 

تالاسين:مزال كتقولي ولكن.. عتق راه السيد كيموت لداخل يعلم الله من فوقاش

الكونسييرج:اا.. ووو..واخة وواخة

خرج الكونسييرج وطرق عليها ورجعات هي دخلات لعندو.. جلسات فوق راسو ما عارفة ما دير.. بقات كتشوف فيه حايرة وهو ساقر ومرة مرة كيعقد حجبانو ويصدر صوت أنين خفيف.. فلخر جبدات تيلي ديالها وما لقات قدامها غير عمي غوغل تستنجد بيه.. دخلات كتقلب فهاد الحالات شنو خاصها دير وشنو لا.. حتا سالات وناضت طايرة للحمام كتوجدو..

كان حمام وسط البيت جاي مطرف وكلو زاج مضبب شوية.. دارو كانو بيوتها قلال ولكن كل بيت كتلقاه بزوج بيوت.. 

دخلات كتقادو وتعمر البانيو ورجعات عندو مقردة باغة تحط يديها عليه تهزو كتلقاه زبط وحشمات تحط يديها عليه.. بقات مضاربة مع راسها تقيسو ولا لا.. وفلخر حنات كتهضر معاه.. 

تالاسين:براء نوض! وقف يله للحمام
براء :اممممم.. 

تالاسين:عاوني راه ما نقدرشي نهزك.. نوض! 

ما جوبهاش وبقى مججبد ما قدر حتا يهز راسو بقالو غير ينوض.. بقات كتشوف فيه مغبنة وفلخر وقفات كترجف ضربات رجليها للارض.. حسات بنغزة شعطاتها فكرشها بلحريق وهي تزكي فبلاصتها بصوت خافت وزيرات على كرشها عاضة على فمها.. 

يتبع...

أحدث القصص
قصة اللؤلؤة السوداء من تأليف شرقاوي حسناء
قصة اللؤلؤة السوداء شرقاوي حسناء
قصة تيريزا من تأليف سكينة سليماني
قصة تيريزا سكينة سليماني
قصة ضحية ذئاب من تأليف Sanae El Marzouki
قصة ضحية ذئاب Sanae El Marzouki