زينب:ما عندك علاش تخلعي.. هادشي لي انديروه هو لي خاصو يكون.. ما انشوفش ولادي بزوج كيتمحنو ونجلس مربعة يدي.. نتي كتبغي سعد.. وبراء كيبغي تالا.. والا جمعانهم كلشي ايتهنى.. وتالا براء ايديرها فعينيه غير هي لي مزال ما عارفة بقيمتو..
بيسان:خايفة اعزيزة الا تفضحنا
زينب :بيسان صافي!! جمعي راسك وكوني شجيعة كي كنعرفك.. ودابا اتمشي عند تالا واتخرجيها وتمشيو لشي كافي مهم نتي اتلقايلها السبة.. وغير تلقاي شي فرصة عطيها الدواء لي عطيتك.. ياك باقي عندك!!
بيسان:اه باقي راه فصاكي!! اجي هاد الدواء ما ايضرومشي ياك!!
زينب:بففف اتمرضيني ابيسان شحال من مرة قلتلك راه جيست غادي يدروgيهم..و ايبقاو يتحركو بلا عقل لي قلتيهالهم يقولولك ييه فحال شي محششين.. وفاش ايمشي مفعولو ما ايبقاو عاقلين على واالو.. وعطيها غير قياس لا دوز لي قلتلك.. ما تكتريلهاش دوخ فمرة ما تبقاش قادرة تحرك.. حنا بغيناها تبان فحال الا بوعيها اوك
شافت فيها مطولا وتبسمات ابتسامة خفيفة بلا خاطر وخرجو هي وياها وحدة مشات عند تالاسين وزينب توجهات عند براء..
وكما كانو مخططين للخطة ديالهم نفذوها بالحرف والزهر خدم لصالحهم وكلشي داز كما بغاو.. وقدرو بالفعل يشربوهوم الدواء بلا ما يعيقو حيث خلطوهلهم وسط العصير و القهوة وما خداش منهم بزاف دالوقت حتا كانو بزوج مرفوعين كيتحركو بلا عقل.. وغير كيفرنسو بوحدهم بحال السكرانين غير هما ما كيميلو ما كيطيحو.. وتجمعو فدارو هما ولعدول والشهود وبما ان زينب يديها واصلة قدرات تقاد لوراق ديالهم ففترة لا بأس بيها وبشي بركة دلفلوس كلشي تحل بالساهل.. وما دوزوش حتا نص ساعة كانت تالاسين زوجة براء مكتوبة عليه وبسميتو.. وباش يكملو خطتهم حطو شرط انه مهما وقع ما يمكنلهومش يطلقو الا اذا دازت عامين على زواجهم..
🔙 - عودة
حتا حد ما فاهم شي لعبة وخاصة هما بزوج.. فوقاش خداو هاد تصاور.. وفوقاش تزوجو.. وفوقاش وقع هادشي كامل.. شي حاجة كتلعب على المخ دالواحد..
براء:راه ما يمكنش هادشي.. هاد لاكط مزور اكيد وهادو فوطوشوب.. راه ما يمكنش.. مستحييل
خدا من عندو تيلي و شدو كيخربق فيه شي 10 ددقائق عاقد حجبانو وكلشي كيشوف فيه وسكاااااات.. الذبانة ما كتزنزن.. كلها وفين كيدور فعينيه وسعد لي اياكل براء وتالا بعينيه وهو غير كيخنزر ويحك سنانو عليهم.. وفراس مزال خدام فتيلي حيث دومينو هذاك..
هز تيلي ديالو.. ودوز النمرة لشي حد باش يتأكدلو من القضية دزواجهم واش دبصح ولا مزوج.. وبقاو كيتسناو على نار حتا رجعو عيطولو وعلموه بلي بصح والزواج مسجل وداز هادي 4ايام..
طاحت جالسة على السداري وعينيها مكوانسيين قدامها.. ويديها فاشلين عليها وغير ساكتة ما نطقات ما تكلمات..
فراس :شنو دابا همم! يله زيد كذب
براء :ما كنكذبش.. ما تزوجتهااش اعباد الله.. واش باغيين تحمقوني
سعد:دابا نتا وياها جالسين كتمثلو علينا.. لا برافو برافو.. تقنتو الدور الشمايت نتا وياها
براء :(هجم عليه) اجمااااااااااع فمااااااااك
طاح عليه ضربة فيا ضربة فيك وكلها كيبرد غذايذو فلاخر وهما كيمشيو ويجيو بيناتهم باغيين يفاكهم..وهما حلفو ما يتفكو وبراء دافع عليه كيعطيه ويقول ما عطاه.. حتا كيحس بيد قوية جراتو بالجهد حتا دار ونزلات عليه بطرشة لحنك حتا دار وجهو وكلشي وقف مخرج عينيه..
فراس:(بغضب) اتهز راسك عليا نتا ومرتك وتخرجو عليا.. ياك تزوجتو بوحدكم ايوا حتا دابا اتهزها وتخرج عليا.. وما نبقاش نشوف كمارتك.. ما عطيتو قيمة لحد.. ما اعتبرتوناااش.. ايوا حتا حنا ما انحسبوكومش واش كاينين.. يله هزهااااااا وخرج😡
عينيه فباه ساخط وحاط يديه على حنكو ما راضيش.. كارز على سنانو وكيشوف فيه وهو واقف قدامو لكتف قد لكتف مخرج فيه عينيه وكينعتلو جيهة الباب.. كلشي مخرج عينيه مزال ما فاقو من الصدمة دالطرشة لي عطاه حتا عطاهم صدمة دخروجو من الدار..
رؤيا :علاش ابراء علاش؟؟ علاش اولدي عملت هادشي.. حشومة عليكم اولادي اهئ اههئ علاش ما قلتوهاشي..علاش اتالا ابنتي اهئ انهنههئ
بغات طيح وهو يشدها جهاد وجلسها فوق السداري كترجف وتبكي وكلشي جلس حاط راسو بين يديه مبهوض.. مصيبة وطاحت على راسهم.. وما عرفوها منين سلاطت عليهم.. جلسات بيسان حدا مها كتبكي وتشهق على هادشي لي دارت ولي تنادم معاها لحال عليه وفنفس الوقت مخلوعة على مها.. الدار ترونات وكلشي تقلب وكل واحد فين جالس مصدوم فقنت..
فراس :(تحت السنان) هزهاااا وخرجو علياااااا 😡
بيسان:(وقفات شادالو فدراعو) اهئ اهئ لا ابابا لا شني كتعمل اهنهئ اههئ
شاف فيه براء شوفة قااااصحة وفراس بشوفة قصح منها.. زفر ساخط وهز راسو خارج فحالو وجرها من يديها حتى وقفات وتم غادي جارها موراه وهي تابعاه بلا حركة..راخية يديها وعينيها خارجين فالارض ودموعها كيقطرو..
بيسان:لا ابابا لا وقفو ما تخليهشي اهنهئ اهئ اههئ عافاك ابابا لا.. (حنات على رؤيا ) ماما هضر معاه عافاك اهنهئ اهئ براء ايمشي اهئ اههئ
رؤيا :الصمت غير كتبكي
هنية:لا حول ولا قوة الا بالله.. لا حول ولا قوة الا بالله
خرجها كيجر فيها.. مخنززززززر وغيطرطق وفنفس الوقت تالف وما فاهم حتا لعبة.. صدرو طالع هابط قبط لكرافاط نترها بالجهد ورماها وحل الصدايف على صدرو بقوة.. يله قربو لسيارتو وبغى يركبها وهي توقف فبلاصتها ونترات يديها.. دار شاف فيديها وهز راسو فيها عاقدهم وهي ما هضرات ما تكلمات تمشات غادة فحالها مصدومة وكتجر فرجليها بزز حتا حسات بيه جرها من دراعها ووقفها قدامو زاعف..
براء :فين غادة!
رجعات نترات يديها وقلبات وجهها خارجة فحالها وهو يجرها كيسوط..
تالاسين :(خرجات عينيها فيه) طلق مني
براء :فين اتمشي!!
تالاسين :ماشي شغلك ابنادم.. طلق مني
براء:زيدي طلعي
تالاسين :(تنترات منو) واااااا رخي منييي رخييي.. بعد مني.. ما تبقاشي دور بيا.. بعد من طريقي.. منين خرجتيلي منييين
براء :(زفر كيكبت غضبو) طلعي اتالا.. طلعي نمشيو من هنا ونتفاهمو
تالاسين :(دفعاتو) واااااا بعععد مني بعد اههئ انهئ اههئ ما تبقاااشي تدور بيااااا اههئ انهنههئ خرجتي عليا اهئ اههئ شني باغي مني شنييي
براء :شنو درتلك انا هااا! شنو!! ياك بعدت من طريقك!! ياك ما بقيتش حتى كنجي جيهتك.. دارنا خويتها على قبلك.. شنو بغيتي مزال..
براء :(قلب وجهو كيمسح وجهو) ما عرفتش ما عرفتش.. هادشي ايحمقني.. ما عرفتش كيفاش..
تالاسين :نتينا لي عملتيها ياك!! غير قول.. غير اعتارف اهئ اههئ غي قولي كيفاش!
براء :(خرج عينيه) لواه للل...(زير على فمو) تفووو شوفي بلا ما تحمقيني فراسي.. راه فحالي فحالك.. كما نتي ما عارفاش حتا انا بحالك.. ما درتلك وااالو وما فكرتش فيها اصلا.. كنبغيك اه.. بلحق ماشي بلا نفس.. فهميها ودخليها لراسك..
تالاسين :ما يمكنش اهئ اههئ الا ما كنتيشي نتينا شكون ايكون..
براء :(تقابل معاها عينيه فعينيها ساخط) ماشي انا ثيقي ولا كااااعلك.. انا ما درت وااالو وما عارف وااالو.. وما تنسايش بلي انا لي قلتلك غير سيري وتزوجي بيه.. وبعدت من طريقك فمرة.. علاش انجي حتا لدابا ونلعب هاد اللعبة هااا؟؟ راه كما نتي ما عارفة والو حتا انا فحالك فهمييييها..
تالاسين :وشكووون شكووون راه انتسطى.. التصاور ولاكط كيفاش هادشي كامل!!!
براء :وااا ما عرفتش ما عرفتش..
حط يديه على خصرو غادي ججاي فبلاصتو وكيسوط وهي كدمع فبلاصتها وتالفة غير بوحدها.. زفر وضرب رجليه مع الارض وقلب وجهو شاف فيها..
دفعاتو وزادت كتخلف بالزربة ودمع وتمسح وخرجات بحالها غادة كتمشى وسط الطريق فين ولين ما عارفاش.. غير غادة ومخلية دموعها كيقطرو.. بغات تحماق.. كيفاش تزوجات بواحد بلا ما تعقل.. منين خرجلها هادشي عاود.. ما عرفات راسها باش تبلات دبصح.. كانت جاالسة حتا لقات راسها مزوجة وهادي 4 ايام كيفاش وفوقاش الله اعلم!!!!
ساط هو كيبخ الدم فبلاصتو وطلع للاوطو وتم خارج فحالو حتى لحقها وخفف السرعة وبقى تابعها من لور طافي ضواو باش ما تحسش بيه..
تابعها من لور بشوية وعينو معاها عاقد حجبانو وسلوكة دمخو ملاقيين وما باغيش يمشي ويخليها بلا ما يطمن عليها.. ساط معصب وهز تيلي ديالو عيط لجهاد وفلبلاصة جاوبو مفتون..
جهاد:الو براء.. فينك!! ناضت القربالة اخويا موراك.. داك لحمار نوض روووعة فالدار عاد جرا عليه الواليد.. اما هو صاعر اخويا صااااعر..شحال ما شفتو هاكة.. غير غادي جاي ويزدح تقول فيه البيضة.. والواليدة اتحماق بلبكى وعزيزة وبيسان وكلشي مرون..
براء :بفففف مصيبة هادي
جهاد:(كيوشوش) اجي نسولك اخويا.. ياك ماشي نتا لي درتيها!
براء :وا لا لا لا.. شحال من مرة انعاودها.. ما فخباري والو.. بلحق مولاها ما نمشي حتا نجبدو
جهاد:ودابا شنو اديرو؟؟
براء :ما عرفت.. مهم.. بغيتك تخرج دابا للطريق لكبيرة اتلقى تالا هزها ديها لشي ابارطومون ولا شي اوطيل مهم ما تفرقهاش حتا تدخل وتسد عليها
جهاد :علاش ماشي معاك؟
براء :بلا هضرة بزاف الله يرضي عليك وخرج دغيا يله
جهاد:واخة صافي كون هاني
دازو دقائق قليلة وهي مزالة كتمشى وتحني راسها تمسح فدموعها وتشهق.. حتا حسات باوطو وقفات عند رجليها وهي تبدا تمشى بالزربة حتا سمعات صوتو كيعيطلها..
تالاسين :(هزات راسها) شو الا بغيتي تعاوني.. مشي للدار جيبلي مينوشة ما نقدرشي نبقى بلا بيها.. وجيبلي صاكي وصافي
جهاد:واخة هانا انرجع ونجيبهم ويله طلعي
تالاسين :لا غير مشي انا انتسناك
جهاد:علاش معكسة ابنتي علاااش
تالاسين :(كتبكي) جهاد خليني عليك.. لي فيا كافيني
جهاد:(هبط من الاوطو) وا يله غير طلعي تسنايني فالاوطو ما تبقايش واقفة فالشارع.. انا انمشي نجيبلك هادشي ونجي
تالاسين :واخة.. وما تعطلشي
طلعات هي للاوطو وهو مشى وتم دايز من حدا الاوطو دخوه وشيرلو من بعيد وبراء حركلو راسو.. وبقات هي جالسة فالسيارة كتسناه وبراء واقف حاضيها حتا جا جهاد وجابلها قطتها وصاكها.. طلع ومدهوملها وديمارا وهي طير على مينوشة معنقاها وكتبكي وجهاد كيشوف فيها بطرف عين بقات فيه.. دازت من حداهم سيارتو مكسييرية وفاتهم ومشا غبر.. ودار جهاد عند تالا كيتأسف لحالتها.. وبغى يلطف الجو شوية وهو ينطق..
تالاسين :ما بغيتيشي.. اوك وقف الاوطو غير هنا.. يله وقف
ججهاد:بففف معكسة.. صافي على خاطرك.. انديك فما بغيتي غير هنينا
خنزرات فيه وقلبات عينيها وسكتات وهو هز تيلي ديالو كيكتب ميساج لبراء وكيقولو بلي ما بغاتش تمشي معاه.. وصلو وقراه وججاوبو يديها فما بغات ويوصي عليها ويصردلو العنوان..
🌿🌿🌿🌿
وصلها لاوطيل زوين ونقي.. وشدلها غرفة وما خلاتووووش يخلص عليها حتا فرنك.. جبدات كارط گيشي ديالها لي هادي زمان وهي مخبعاها وكتجمع فالكونط فلوس خدمتها لي ما كانوش كيخليوها تصرفها.. ونيت كانت جامعة حصيصة.. خلصات على راسها هو يحلف وهي تحلف حتا طلعاتلو زعاف وما بقاش زاد تغان معاها.. وصلها لبيتها ودخل معاها كيشوف الحالة كي دايرة.. طمن عليها وباسلها راسها كيواسيها وقبل ما يمشي شداتو وعنقاتو مزيرة عليه وكتبكي وهو كيطبطب عليها...
دخل هو لدارو.. ملامحو ما بقات عاطية حتا تعبير.. سد الباب وتنهد ورمى السوارت وزول الصباط بطراف رجليه.. قرب لفوطوي لي فالصالة وترمى على طولتو جا جالس ناشر يديه ورجليه وحط يدو على عينيه كيحكهم وقالب وجهو للجنب.. ورجع قلب وجهو شاف فالطبلة قدامو.. بقى كيشوف فيها شحال وكيخمم.. واش يفرح.. ولا يتعصب.. ولا شنو يدير.. البنت لي بغاها وتمناها وحتا قال صافي مشات من بين يديه ها هي اليوم رجعات مراتو وتحت سميتو.. وكيفاش وفوقاش الله اعلم.. فقط عارف بلي حلمو تحقق ودعواتو استجابت وبلا ما يدير حتا شي حاجة.. وفنفس الوقت ما فاهمش كيفاش هادشي يوقع.. كيفاش يتزوجو وعما ما عارفينش.. اكيد شي حد وراء هاد اللعبة ولكن شكون ما نعرف.. معصب حيث هو كان باغيها ولكن ماشي بهاد الطريقة وانما بخاطرها.. تكون باغاه كما باغيها.. كان مقسوم على زوج.. عقلو معصب.. وقلبو فرحااااان وما قاداه فرحة.. خرجاتلو ابتسامة بلا ما يشعر ورجع جمعها فاش تفكر لي وقعلو مع باه.. وبلي جرا عليهم بزوج.. كون غير جرا عليه بوحدو عادي اصلا ساكن ساكن بوحدو.. ولكن تالاسين لي عارف شحال قاصحة عليها وهي لي كانت كتحسبهم عائلتها لي مشاتلها..
🌿🌿🌿🌿
دازت عليهم ديك الليلة كلها وكيفاش.. شي محروق شي ندمان شي مخلطين عليه لعرارم.. كلها وحالو وحتا حد ما هاني.. وحد ما قدر ينعس ديك الليلة ولا تغمضلو عين..
صباح الصباح وناضت من فوق الفوطوي حالتها ما هي حالة.. كلها مجرتلة وعينيها دبلانين وطايبين من لتحت بقوة لبكى لي بكاتو.. دخلات للحمام غسلات وجهها وخرجات.. حيث ما كتصليش هاد الفترة.. قلبات على صاكها لي ما عقلات فين رماتو حتا لقاتو وجبدات تيلي ديالها.. تنهدات ودوزات نمرتو..
تالاسين :الو
براء :(بصوت ثقيل) اححم وي
تالاسين :(بنبرة جافة) خاصني نهضر معاك
براء :حتا انا.. كنت عوال نعيطلك.. من دابا ساعة مزيان!
تالاسين :وي مزيان..
براء :اوك فلكافي لي حدا الاوطيل لي نتي فيه..
تالاسين :(خنزرات) وباش عرفتيني فين انا
براء :بسلامة
قطع عليها وخلاها كترمش..حطات تيلي وناضت مفقوصة هزات صاكها ومينوشتها وخرجات.. مشات لاحدى المحلات التجارية لقريبة شرات لمينوشة ما تاكل ودازت شرات دواء لحريق الراس وتوجهات للكافي لي داير معاها فيها.. جلسات فلاطيراس ديال القهوة وطلبات قهوة تفيقها وعطات لمينوشة تاكل فالارض حداها وجلسات هي كتشوف قدامها وتخمم لحريرتها..
وقف عليها حتا شَمات ريحتو قريبة ليها.. هزات راسها فيه واقف مبندر عليها هاز مناخرو لسماء بسروال ابيض وتيشورط ازرق فاااتح سامبل.. داير نظاظر كوحل والشمس ضاربة فيه.. وقبل ما يجلس نطق..
براء :سلام
تالاسين :(كمشات جبهتها وقلبات وجهها) وعليكم السلام
جلس أونفاص ليها.. مسرح يدو فوق الطبلة.. زول النظاظر حطهم فوق الطبلة وطلع حاجبو فيها وهي قالبة وجهها.. شاف فجنبو عيط للگارصون يجيبلو حتا هو قهوة يفتح بيها عينيه.. هي ما هضرات وهو ما نطق وبقى جالس كيتسنى فقهوتو حتا جات وهزها كيجغم منها شوية بشوية وحتا هي قبالتو مرة مرة تهز تشرب قالبة سيفتها.. وهو كيلعب بفكو بعصبية وصابر مخليها حتا تهضر.. وفجأة دارو بزوج شافو فبعضهم ونطقو..
براء /تالاسين : شنو انديرو!
شافت فيه وشاف فيها لمدة ساكتين وكملات هي..
تالاسين :خاصنا نطلقو
قلب وجهو كيتبسم بسخرية وهز قهوتو جغم منها وهي متبعاه عاقداهم حاساه بحال الا كيستفزها ورجع شاف فيها مكمش جبهتو..
براء :دوماج.. مي ما نضنش يمكن هاد الساعة
تالاسين :(خنزرات) وعلاش!! ياك ما عجبك حالك حيث تزوجتيني.. ما عرفت هادشي كي وقع ولا كيفاش ولا فوقاش ولا حتا واش بصح.. مزالة كنقول بلي غير كوشمار وانفيق منو.. ولكن اذا كان بصح غير بلا ما تفرح بزاف.. هاد الزواج ما عندو ساس اصلا.. وخاصنا نطلقو اليوم قبل غذا
براء :(حنا راسو معبس كيلعب بالفنجان قدامو) سمعيني نقولك.. الزواج وقع وبصح.. وموثق وبوثائق حقيييقة يعني انا وياك دابا قانونيا مزوجين.. السؤال ديال كيفاش وفوقاش انا براسي ما عارفوش..اما بالنسبة لواش فرحان ولا لا.. فنبغي نقولك بلي الفرحة اخر حاجة نفكر فيها وانا مزوج بوحدة ما باغانيش حيث ما شايطش على راسي ديري هادي فبالك.. اما بالنسبة لطلاق.. فهذا لي لعب لعبتو وزوجنا صدق مطور وشارط بلي ما يمكنش نطلقو الا اذا دازت عامين على زواجنا.. وهاد الشرط ما منو هروب.. (سكت وهز راسو فيها طانز) امدام...
شافت فيه كتنهج وعينيها خارجين وكتعض على فمها شاربة الفقصة مزيااااان وهو مبرد كيشرب قهوتو ويشوف فجنابو ومرة مرة يهز راسو فيها..
تالاسين :بغيت غير نفهم.. هذا لي عمل هادشي فينا.. شنو استافد زعما!! (كتمعني عليه) حيث لي عمل هاد الروينة كاملة اكيد عندو شي ربح منها.. ويانا ما كنعرف حتا شي واحد مستافد.. من غيرك
كمل جغمتو لي كان كيشرب على خاطرو وحط الفنجان وشاف فيها مبسم..
براء :فاش نلقاوه.. سوليه.. صافي؟
تالاسين :(بانفعال) شفتك مبرد!! عاجبك الحال يمكن ياك؟؟ فرحان براسك.. يانا مزالة شاكة بلي نتينا موراها.. وما دخلاتليشي هاد القضية لمخي
براء :(كيشرب القهوة) علاش نتي عندك شي مخ بعدا!
تالاسين :احتارم راسك
ضحك بالجنب بسخرية وخلاها هي كتقلا فسمها وكتشوف فيه..
تالاسين :(حطات راسها بين يديها) بففففف يا ربي.. عقلي ايخرج من موطعو.. اوف اوف اوف
براء :(ربع يدو وتقابل معاها باهتمام) نسولك؟
تالاسين :هزات راسها فيه عاقداهم
براء :(مصغر عينيه) ما بايناش فيك وحدة عرسها مع لي كتبغي تفركش.. كتفكري غير فشكون زوجنا..شفتك ما مسوقاش لحبيب القلب
تالاسين :(بعصبية) يانا قلبي ما بقى عندو حبيب.. ما بقى كيهمني حد.. كنت باغة نتزوج باش نخرج من ديك الدار وهانا خرجت.. تهنيتي
براء :(عقد حجبانو) وعلاشش كنت باغة تخرجي!
شافت فيه ساكتة وما جاوباتوش ورجعات قلبات وجهها لجنب مكمشة فمها وعاقداهم.. بقى كيشوف فيه عرفها ما اتجاوبش وقلبوجهو لجنب كيسوط ورجع جغم من قهوتو..
براء :ما عندك ما تبقاي كديري فالاوطيل..
تالاسين :وفاين بغيتيني نمشي! ؟
براء :لدار راجلك.. مثلا هههههههه
ضحك حتا تغمضو عينيه قالب وجهو لجنب ورجع شاف فيها كيحاول يحبس الضحكة ووالو وهي قدامو كتحك وكتفقص..
تالاسين :راه قلتلك عاجبك حالك
براء :ههه ماشي قضية عاجبني الحال.. مي الموقف كيضحك والله هههههه
تالاسين :هيهي لبياخة..
براء :(جمع الضحكة وتنهد) ما كدبوش لي قالو مول النية كيغلب.. ضرتي ضرتي وما طحتي غير فيا هههه(غمزها)
تالاسين :(قلبات وجهها كتمتم) تهجرو.. بو عاعا (خراي)
براء :(طلع حاجبو) شكتمتمي تما!
تالاسين :ديها فراسك.. واخة
براء :ماشي مشكيل.. ما انديش عليك حيث معصبة.. مهم نرجعو فين كنا.. ما عندك ما تبقاي كديري هنا بوحدك
تالاسين :دارك غير نساها هي لي ما انزطمشي فيها غير تهنا
براء :وعلاش!
تالاسين :ياك ما نسيتي شنو وقع اخر مرة دخلت ليها.. نسيتي؟؟ نفكرك!؟
براء :ونتي نسيتي شنو درتي..
تالاسين :ما نسيتشي.. وحتا نتينا ما تنساشي شني عملتي.. نتينا لي بديتي بالعيب
براء :(هز مناخرو) دابا نساي عليا هادشي.. ما اتبقايش هنا
تالاسين :(تجبهات معاه) سمعني نقولك..باش نتافقو على واحد الحاجة.. دارك ما ماشالاشي واخة نعرف نموت.. وحياتي ماشي شغلك فيها..و هاد الزواج راه ما زواج ما تااا لعبة.. غير تخربيقة والسلام.. ما داخلي لا من هنا لا من هنا.. فبلاااا ما تحسب راسك راجلي بصح وتبقى تعمل داك الشغل دالسي السيد وتأمر عليا.. يانا وياك تورطنا وانتسناو حتا تسالي هاد العامين وكلها يمشي فحال سبيلو وسدينا..
شافت فيه وهو عاقد حجبانو فيها.. خلاها حتا سالات على خاطرها وناض وقف جبد 200 درهم رماها على الطبلة.. وورقة كانت فجيبو حطهالها بجنبها ووقف عليها حاني راسو شوية ومخنزر..
براء :هادي ورقة زواجك.. عطيتهالك غير باش تعرفي بلي هادشي بصح وماشي كوشمار.. اوك
هز راسو وهز نظاظرو ردهم وشاف فيها من تحت عينيه حاط يديه فجيبو.. عاطي للشمس بظهرو وهي هازر راسها فيه والشعا ضارب فيها..
براء :نتشاوفو.. (بسخرية) من دابا عامين
عطاها بظهرو ومشا وخلاها هي جالسة متبعاه بعينيها كتاكل فجنابها.. كيستفزها بالبارد.. هزات الورقة لي حطلها فتحاتها.. كانت نسخة على لاكط دزواجهم.. زواج قانوني حقيقي ما فيها حتا شك.. وبالفعل كان الشرط مكتوب وسط العقد بالخط العريض.. وبلي الزواج ما يمكنش يتلغى ابدا ابدا الا بعد مضي هاد العامين.. حطات الورقة مفقوصة حاطة يديها تحت فكها.. وقلبات وجهها معصبة كتشوف فالشارع..صونالها تيلي وهزاتو.. كانت بيسان وجاوباتها كتنهد..
بيسان:(باسى) الو.. ختي.. تالا صافا!
تالاسين :الحمد لله.. ونتينا
بيسان :الحمد لله.. كيبقيتي.. نتينا مع براء ياك
تالاسين :لا.. يانا جالسة فواحد لوطيل
بيسان:وعلاش ماشي معاه.. ياك هو راجلك دابا
تالاسين :بيسان.. بلا ما تعصبيني الله يخليك
بيسان:صافي واخة.. على راحتك.. مهم نتينا مزيانة ياك
بيسان:نوضاتها مع ماما.. جات ساخطة.. شافت لحالة ديال سعد وجات معصبة.. قالتلها ولد واحد لي بقالي بغيتو تحمقوهلي.. ومعصبة منكم بزاااااف.. ودابزات مع ماما.. وماما ردات اللومة كلها ليكم.. مهم كلشي مرون وخلاص
تالاسين :بففففف.. ما عرفت هادشي مناين كيخرجلي.. والله ما فهمت كيفاش.. انتسطى ابيسان والله.. كيفاش تزوجنا والله حتا انحماق
بيسان:(سكتات شوية وتسمعات النفس ديالها طويلة فتيلي) تالا.. سمحيلي
تالاسين :علاش.. شني عملت نتينا
بيسان :مهم سمحيلي وصافي
تالاسين :الا كان غير على قبل التصاور انا ما تقلقتشي منك.. مي بغيت غير نعرف كي وصلو عندي دوك التصاور.. وكي عملت تزوجتو اعباد الله..عقلي ايخرج
بيسان:بلا ما تبقى تفكر بزااف.. مهم نتوما دابا مزوجين.. عيش على هاد الاساس وعطيه فرصة.. راه والله حتا كيبغيك وبزاااف واتعيش معاه فوق مزيان.. غير تقرب منو وفتح عينيك واتشوف
تالاسين :ما باغاشي نهضر فهادشي ابيسان..
بيسان:(تنهدات) واخة.. على خاطرك
كملات معاها هضرة كتسول على أحوال كل واحد وبيسان دور دور وتحاول تقنعها تفكر فبراء.. حتا يئسات منها وودعاتها وقطعات..
ناضت هي وهزات مينوشتها.. وخرجات كتمشى حتا وصلات لمحل للملابس النسائية.. دخلات تقدات من عندو شحال من حاجة وخرجات راجعة فحالها.. وفطريقها بانتلها بلاكة ديال سمسار خدات نمرتو وتوجهات للاوطيل..
🌿🌿🌿🌿
رجع هو لدارو.. مع خرج من السانسور مع كيبانلو سي سعد سعود واقف موكي على بابو مخنزر وعاقدهم ولباخ خارج من وذنيه.. غير شافو وهو يوقف مقاد مخرج عينيه.. وبراء تنهد قالب وجهو للجنب ما باغي يدابز مع حد..
براء :شنو كدير هنا؟
سعد:خذيتيها همم! دوي اشماتة.. ما صدقتيييش سحابني راجل ساعة بزاف عليك الرجلة
براء :(خنزر فيه) اتجمع فمك ولا نهرسولك.. دردب من قبالتي حسن ليك..
سعد:(قرب مجابه معاه) ما انجمعوش.. يله وريني ارويجل وريني.. مزوج بالبنت بالتخبية..(ضربو لكتفو) الرجال كيجيو من البيبان ماشي من السراجم
ميل راسو شاف فكتفو فين ضربو ورجع قلب وجهو مخنزر فيه..
براء :(بغضب) اتجمع يديك.. ودرق زلافتك ولا راه ما ايعجبك حال.. خليني موقرك وداير بحساب العشرة
سعد:هههه دير بالعشرة.. العشرة كون درتي بيها قبل ما تزوج البنت لي باغي نتزوجها قبل ب 15 ليوووم.. نتا شماااتة وهي ما تسواااش
عياااا صابر على المعيور فيه ولكن غير جبدها على فمو ما حسش بيه حتا لقاه عاطيه ضربة للكمارة قلباتلو لملامح وحتا لاخور داكشي لي كان باغي.. ناضو ضربة مني ضربة منك واحد كيعطي لاخور وما كاين غير سبني نسبك.. لموبل ترون وكاع داك السهات لي فيه تقلب عجاجة وخرجو السكان يشوفو شنو كاين..
براء:(محمممر) ما تجبدهاااش على فمك الحماااار.. ما تجبدهاااااش(ضربو)
سعد: (ضربو حتا هو) تواتيتي نتا وياها.. الشماااايت
براء :اعععععععععععع
شعلو وكاع داك الصبر لي صبرو تبخر وما بقاش كيشوف قدامو بقى كيعطيه هي وفين جات.. تعصصصصب وجمع كاااع الفقصة لي كانت فيه بردها فيه.. شرشموووو بين يديه حتا فشلو وطاح مسهوت بزز باش كيهز يديه والجيران ما كاين غير كيليميني لخوه ولبنات لمبجقات حتا واحد ما زعم يقرب حدهم كيغوتو اوووه لا لا..
حنى فوق راسو شادو من لكول وهما كلها ودمو فين سايل.. هزو من الكول كيكح والدم خارجلو من فمو..
براء :(كينهج وعينيه خارجين) تعااود تجبدها على فمك نقبرك فبلاااصتك.. نصبرلك على كلشي ولكن باش تنعت فيها بنص كلمة نمحييك سمعتيني.. هاديك دابا مراتي فهمتيييها.. كانت حبيبتي ودااابا مراااتي.. عرضها من عرضي.. ولي يمس عرضي ما نعقلش على الكلب لي حطو.. حسابك معايا انا فهمتيها.. هي ما تجبدهاش حتا على فمك.. (طلعو عندو من الكول) هاديك مراتي دابا.. سمعتيني.. مرااااتي.. بغيتي ولا كرهتي.. ونساها عليك حسن ليك..
رماه من يدو وخلاه كيتوجع فبلاصتو ووقف عليه كينهج ولعرق مخلط مع قطرات من الدم نازل مع وجهو.. شاف فيه باستحقار وقلب وجهو شاف فالناس لي مجموعين كيتفرجو من بعيد غير شاف فيهم محمممممر وهما يرجعو لور مخلوعين.. خنزر فيهم وداز فيه خلاه هو مرمي وفتح باب دارو وزدحها موراه بالجججججهد حتا قفزهم من بلاصتهم ..
دخل لدارو كيسوط.. نتر تيشورط زولها رماها وزول صباطو رماه فقنت اخور.. حط يدو على ججنب فمو مقصح وبعدها لقاها مطلية بالدم.. خيب سيفتو ودخل كيزدح لحمامو.. صونالو تيليفونو رماه ما شافش حتا فيه ودخل..
دخلات هي للاوطيل.. واول حاجة دارتها دخلات دوشات وخرجات بدلات عليها.. وهزات تيلي دوزات النمرة دالسمسار.. هضرات معاه على غرضها وبلي باغة شي دار صغيرة على قدها بثمن معاوط واخة فما كانت مهم تكون نقية.. دار معاها يتلاقاها لغذ ليه فالصباح يتفاهمو ويوريها الديور لي عندو.. تفاهمات هي وياه وقطعات.. وبقات جالسة فبيتها كتخمم لحريرتها.. خاصها تضبر فين تسكن..ومشروعها اتحاول تكبرو وتبقى تسترزق منو وخاصها تبدا تعول على راسها من دابا لفوق..
داز داك النهار باش ما عطى الله.. ما خرجاتش من بيتها.. جالسة هي وقطتها وهي دور وتبكي ودمع وتندب على زهرها لمكوز.. وعلى الدنيا لي كتخليها حتا كتعلي عنقها وتعطيها حتا كتواطى مزياااان..
صباح الصبح وناضت لبسات عليها سروال وتيشورط عادين ومشطات شعرها.. وكلات قطتها وخرجات لكافي قريبة من الاوطيل جلسات كتسناه.. طلبات فطور بسيط بتيبان وقهوة وبزز باش كلاتهم.. حتا وقف عليها.. راجل فالثلاثنيات وداخل فالاربعين.. بكومبلي رسمي فاارمادي.. مسرح شعرو ومقاد الحالة.. وهاز كاغطابل فيدو وابتسامة راسمها على وجهو.. مدلها يدو ووقفات هي سلمات عليه بلباقة وابتسامة صفراء بزز باش راسماها..
السمسار: معاك رضوان القاسمي.. سمسار هادي 15 لعام.. وديور ديال طنجة كلهم حافظهم.. ونصهم دازو على يدي.. ولي حبات خاطرك تلقايها عندي.. الصغيرة ولكبيرة.. الواسعة والضيقة.. الطويلة ولعريضة.. لفريجة ولمزموتة..
تالاسين :(شافت فيه بتعجب) يانا بغيت غير دار صغيرة بيت وكوزينة وحمام كااافياني.. ما بغيت لا طول لا عرض..
رضوان:القضية مزلوطة ياكي ههههه
ضحك حتا بانتلو الضرسة دلعقل وهي كتحنزز فيه حتا جمع الضحكة وحنحن وهز لكاغطابل جبد لبيسي ديالو..
رضوان: اححم.. هانتي شوفي.. هانا انوريك واحد دار جات شوكة.. زوينة وكما بغيتيها.. جات فالطبقة الثانية.. حي زوين ما بيهش.. خاصها كوش دالصباغة وترجع غزالة
تالاسين :اوك بسم الله.. وريني نشوف
براء :شنو غادي يوريك؟
هزات راسها فيه.. لقاتو قبالتها مطلع حاجبو.. كعادتو ديما وسيم.. وطلتو ديما رجولية.. ويدو قليل فاش يخرجها من جيبو.. سروال باج مع تيشورط اسود ونظارات شمسية معلقها فكول تيشورط لي على شكل v وصباردين قليل فاش كيلبس الصباط كان كيلبسو غير فاش كان كيمشي للشركة باش يخدم مع باه.. ودابا ما بقات لا شركة لا خدمة.. ورجع يلبس كما كيرتاح هو.. وشعرو مقادو من جناب ومخليه طريل شوية من الوسط مرة مرةة كيهبط على جبهتو.. طلعاتو وهبطاتو وعقداتهم وشافت فيه مقندشة..
تالاسين :شني كتعمل هنا؟
ما داهاش فيها وجر كرسي جلس بجنبها كيطلع ويهبط فخينا لي قبالتو ولي غير كيدور فعينيه ويتبسم..
شاف فالراجل لي قدامو وناض وقف وجرها هي من دراعها مبعدها على الطبلة وعلى الناس وهي كتعافر وتنتر وما باغاش تغوت..
تالاسين :شني كتعمل.. رخي مني.. رخي
براء :(وقفها قدامو) شنو بغيتي السمسار
تالاسين :ياك ما بغيتيني نبقى حياتي كاملة عايشة فالاوطيل
براء :نتي اتعيشي معايا
تالاسين :نعام نعااام.. ما سمعتشي.. ضرباتك القايلة دالصباح يمكن.. فاين هو لي قالي نتشاوفو من دابا عامين.. تسالاو لعامين.. ولا سافرتي عبر الزمان.. ولا يمكن يانا لي كنت فسبات وعاد فطنت
براء :لبارح لبارح.. واليوم اليوم.. ما نقدرش نخليك تعيشي بوحدك.. ما ايخليوكش شمايت
تالاسين :علامن كتهضر
براء :ماشي مهم علامن.. مهم هي اتجي معايا
تالاسين :وبشمن صفة جالس تأمر؟؟؟
براء :بصيفتي راجلك
تالاسين :عاودها لمخك..
براء :بلا ما طلعيهم فيا وكوني تسمعي..
تالاسين :نتينا لي بلا ما تحمقني وديها فراسك وفرقني عليك.. خليوني نعيش ترونكيل الله يرحم بيها الوالدين
براء :ما لاصقش فيك حيث مشواق فيك.. بلحق دارتها الوقت وحيث خايف عليك.. اما انا والله ما نحاشيهلك
تالاسين :وحتا دابا ما تخافشي عليا وما تحاشيهليشي.. خليني مني نراسي.. ولا سمعتيهم قتلوني ما تجيشي لجنازتي
براء :(زفر قالب وجهو وخرج عينو فيها) بلا ما تعصبيني.. مالك معكسة مالك؟
تالاسين :ما نعصبك ما تعصبني.. نتينا لي لاصق فيا..
براء :اهااااااا.. دابا انا رجعت لاصق فيك.. اوك الالة نسرطوها..(عقدهم وحط يدو فجيبو وهز مناخرو لسماء) لااااااخر مرة انسولك ولا عاودت درت بيك او جيت جيهتك بزقيلي على كمارتي.. اتمشي معايا اه او لا لا؟؟؟..
هزات عينيها فيه بحزم مربعة يديها وهو واقف عاقدهم كيتسنى جوابها.. وبكل اصرار وبرودة جاوباتو وهي كتشوف فعينيه..
تالاسين :لا.. دارك زيدها فراسك.. ويانا قادة براسي
براء :(خنزر) مأكدة؟؟
تالاسين : شني بانلك؟
هز راسو مبعد عليها.. وزفر من مناخرو ساخط.. حط يديه الثانية فجيبو وهز مناخرو لسماء كيشوف فيها من لتحت لتحت وبنبرة كاتمة فداخلها غضب دفين..
براء :اوك اتالا.. كما بغيتي.. على راحتك.. كنتمنى بصح تكوني قادة براسك.. الله يعاونك
عطاها بظهرو ودار وجات عينو فعين السمسار لي كانت مراقباهم.. خنزر فيه حتا بغى يقلعو من بلاصتو وساط وخرج فحالو كيعض شفايفو بالفقصة..
رجعات هي شعرها بيديها لور وتقدمات عند السمسار.. جرات الكرسي وجلسات..
تالاسين :فاين كنا؟؟
رضوان:(عينيه مع براء لي خارج) راجلك باين عليه ماساهلشه وقاصح.. (خرج عينيه) ياك ما بوليسي؟
تالاسين :ما راجليشي.. وزايدون نتينا شغلك.. ديها فخدمتك وبركة ما تخشي راسك فالشبوقات لي ما عندك بيهم نفع..
رضوان :(ضحك حشمان من القمعة) ههه بصح بصح.. نرجعو لخدمتنا.. كنت كنوريك الدار.. مهم ها هي
عطاها بيسي تشوف.. دار كما بغاتها هي..فريجة ونقية.. وبفراشها.. وجات فحي مزيان.. شافت مزيان وهزات راسها فيه..
رضوان :اححم.. مولاها مفرشها ومخليها مرة مرة كيمشيلها وصافي.. عندو دارو وهادي باغي يبيعها
تالاسين :امممم مزيان.. ايوا وشحال طالب فيها
رضوان :(كيحك راسو) ههه ايوا هو طالب 9 دالمليون
تالاسين. :نعام؟؟
رضوان :9 دالمليوووووون..
تالاسين :بزااااف.. دابا هاد لقجير 9 دالمليون
رضوان :ايوا شنو سحابك.. راه عاد معاوط الثمن.. ومحال تلقاي شي دار بهاد المواصفات بقل.. راكي بزهرك منين لقيتي هادي وبهاد الثمن
تالاسين :ولكن 9..راه بزااااف..
رضوان:هادشي ما عطى الله.. نتي شحال جهدك؟
تالاسين :ايوا 5 ولا 6 دالمليون فالماكسيموم
رضوان :5 راه يله تشري بيها بيت فالسطح فهاد الوقت.. بهادشي لي باغة نتي هادي هي احسن وحدة..
شافت فيه كتخمم.. هي اصلا ما عندها غير ديك 9 وبحال الا طاح فيها نيشان.. الا عطاتهالو اتبقى الله كريم.. وما تقدرش على شي دار ما صغر حيث اتحتاج الكوزينة والتيساع فين تخدم.. وفكرة انها تكري ما باغاهاش.. ما باغة صداع وما باغة حد يشقمها ديري هادي ما ديريش هادي.. باغة دارها تكون مرتاحة فيها.. وما باغة حد يدق عليها كل راس شهر.. باغة تحس بالاستقلالية دبصح.. وحيث ضامنة بلي اتقدر تعوض لفلوس فالخدمات لي كيججيوها واخة غير بشوية بشوية.. فكرات حتا عيات وشافت فيه..
تالاسين :ديني نشوفها!
رضوان:تشوفيها!!
تالاسين :وي نشوفها.. ونهضر حتا مع مول الدار شخصيا يكون حسن
طلعاتو وهبطاتو وسرطات ريقها متوترة وغير كدور فعينيها..
رضوان :يله بسم الله
تالاسين :اححم.. ما كاين حد!
الرجل:كاين انا ههه
تالاسين :زعما واش ما كاينشي شي واحِد ياخور
الرجل:لا.. انا جيت غير باش نوريك الدار
تالاسين :اه واخة..
رضوان :ما ادخليش تشوفي
تالاسين :هااا؟ لا اندخل اندخل.. (خدات نفس عميق) يله بسم الله
تقدم السمسار وتبعاتو هي ويله الرجل بغى يسد الباب وقفاتو..
تالاسين :لا عافاك خليها مفتوحة
الرجل :(ضحك) ههه واخة على راحتك.. ايوا مرحبا زيدي
تالاسين :بسم الله
دخلات كتشوف فالدار.. صغييييرة ماشي كبيرة ولكن نقية..مفرشة وفراشها ما بيهش.. كتشوف فالدار وحاضية جنابها مع الرجال لي معاها.. ما دوزاتش بزاف ووقفات حدا الباب..
تالاسين :صافي شُفت..
رضوان :ايوا شنو بانلك
تالاسين :واخة نخرجو نتفاهمو برا
الرجل:(تبسم وشاف فالسمسار) مرحبا ما تكوني غير على خاطرك
سبقاتهم هي وخرجات هبطات فحالها وعاد تنفسات مزيان.. وتبعوها هما من بعد ما سدو الباب
الرجل :ايوا.. شنو بانلك
تالاسين :الصراحة الدار عجباتني.. ولكن الثمن قاصح الصراحة
بقاو مني منك والسمسار خاشي كرموصتو وسطهم وهي كتفاوض معاه وهو معكس كثر منها حتاااا هبطلها النقطة.. وفالأخير بزز باش خلاهالها ب8..
تفاهمات هي وياه..وتافقو باش غذا فالصباح يتكاتبو والسمسار حتا هو ياخد فلوسو.. وخلاتهم ورجعات..
🍂🍂🍂🍂
صباح الصباح.. ناضت لبسات عليها وهبطات فطرات وخرجات توجهات للبنكة جبدات لفلوس حيث مولاها باغيها كاش.. وتوجهات للمكتب دالسمسار حيث تما ايتكاتبو.. وصلات لقاتهم سابقينها السمسار ومول الدار وثلاثة دالرجال خرين.. واحد لي مكلف بداكشي دالعقارات وزوج شهود.. جلسات وبداو فالاجراءات دالعقد.. تكاتبو وعطاتو فلوسو وزايدة عليهم فلوس التكاتيب مع فلوس السمسار لي قربات توصل ل 100 الف فالمجموع.. وعطاها سوارت الدار ونسخة على العقد ديال الشراء.. سالاو ومشاو فحالهم وناضت هي سلمات على السمسار وخرجات فرحانة براسها رجعات عندها دارها بسميتها..
واول حاجة دارتها هي توجهات للدارها الجديدة.. وصلات وطلعات مبسمة حطات السوارت فالباب باغة تفتح وهما يتعكسولها.. كتجرب وتعاود وهو ما بغاش حتا يدخل.. عقدات حجبانها متوترة ومعصبة وجبدات تيلي كدوز النمرة للسمسار.. صونا ورجع صونا حتا قطع راسو..
تعصبات كثر ورجعات عاودات وهي تشدها العلبة الصوتية.. عقدات حجبانها وبقات غير كدور فعينيها.. زفرات ساخطة مكمشة فمها ورجعات دردبات هابطة فحالها.. شدات طاكسي من الباب والوجهة مكتب السمسار.. غير وصلات لقات المحل ساد.. بقات واقفة كدور فبلاصتها ورجعات كتصوني عليه ووالو.. توترات دبصح وبقات غير كتبيض فعينيها.. بانلها مول محل ديال التيليفونات بجنبو وتقدمات عندو تسولو..
تالاسين :سلام
الشاب:وعليكم السلام
تالاسين :عافاك واخة نسقسيك
الشاب: مرحبا اختي
تالاسين :السمسار لي هنا.. ما عارفوشي فاين مشا.. كنعيطلو ووالو ما كيجاوبشي ويانا محتاجاه
الشاب:هذا اختي واقيلة خوا المحل
تالاسين :نعاااام!
الشاب:اصلا ماشي بزاف باش جا.. يمكن شي 3ايام هاكاك.. وقبايلة شفتو كيخرج الرحيل ديالو..
تالاسين :(قلبات وجهها لجنب كتشوف فالمحل حاطة يديها على خذها) مصيييييبة هادي.. واجي ما عارفوشي فاين مشى ولا فاين كيسكن
الشاب :لا والو اختي.. راه قلتلك السيد جديد ومطولش وقليل فين كان كيعمر المحل
شافت فيه مبهوضة وشكراتو وتقدمات واقفة قدام باب المحل فحال لمصرفقة..رجعات كتصوني ونفس المنظر.. العلبة الصوتية.. زفرات ساخطة ما عارفة ما دير وحتا نمرة السيد لي باعلها ما خداتهاش.. وقالت ترجع للدار وتشوف عنداك تكون هي غلطات ولا غير ما حاولاتش مع الباب مزيان.. وداكشي لي كان رجعات وطلعات للشقة كتحاول تفتحها ووالو حتا كتخرج مرى من الشقة لي قبالتها وشافت فيها معجبة وتالا هزات راسها فيها كترجف..
تالاسين :سمحيلي الالة نسقسيك
المرأة :مرحبا
تالاسين :واش عندك النمرة دمول هاد الدار ولا شي طريقة باش نوصلو.. اليوم فالصباح باعلي الدار ودابا فاش جيت نفتحها ما كتبغيشي تفتحلي
المرأة :باعهالك!! شكون هذا لي باعلك الدار
تالاسين :مولاها
المرأة:مأكدة؟؟؟
تالاسين :وي.. وبالامارة ها هو العقد(جبداتولها) شفتيه
المرأة:(شدات العقد فيديها كتقرى) شغنقولك ابنتي.. هادشي ما بانليش فيه..
تالاسين :كيفاش؟؟ علاش!
المرأة :شغادي نقولك.. هاد الديور لي فهاد العمارة راهم ماشي دالبيع.. مولاهم دايرهم غير لكرا..كيكريهم بالنهار للناس.. وعلى ما قريت هنا السيد لي تكاتبتي معاه سميتو يونس.. وانا على حد علمي مول العمارة راجل فرانساوي وماشي عربي اصلا..راه انا كل عام كنجي لطنجة فالصيف وكنكري هنا وعمري شفت شي دار هنا تباعت..
حلات عينيها وحلات فمها.. ركباتها الصدمة مع السخفة مع الشمتة وضرباتها اللقوة.. بقات غير واقفة وكترمش فالمرأة لي قدامها.. شي حاجة ماشي هي هاديك.. شنو زعما نصبو عليها.. كلاولها رزقها.. فلوسها مشاااو وبقات لا ديدي لا فانيدي!! خلاها مولاها لا ديالي بقى لا وجهي تنقى!!!
المرأة :نعلي الشيطان ابنتي.. ونوضي دخلي عندي غسلي وجهك وسري ديكلاري بيهم دااااابا ما حد القضية طرية
تالاسين :رزقي اخالتي رزقيييي اهئ اههئ كلاوني فرزقي وشواوني فيه اههئ اهئ دوك لفرانكات لي كانو عندي رزاوني فيهم اههئ انهنههئ
المرأة :دابا لبكى ما عندو فاش يفيدك.. نوضي غسلي وجهك وسيري للكميسارية
تالاسين :ما عندي زهر فوالو اعباد الله اههئ اهئ اههئ مناين ما شديتها تعواج انهنههئ اههئ
بقات معاها المرأة كتهدن فيها وهي كتمشي وتجيلها فالدروج وتعوج وتلوالها تما بالفقصة ولغبينة.. شمتوها شمتة من داكشي.. وطلعو معاها قالب صحيح وخلاوها الله كريم.. هزاتها المرأة دخلاتها غسلاتلها وجهها وعطاتها تشرب وهي قريبة تسخفلها تما.. كترجف والشهقة والبكية ما بغاتش تحبسلها.. تبكي وتقول ما بكيت.. وفلخر مسحات وجهها ودموعها مزالين كيقطرو.. شكرات المرأة وشدات الطريق للكوميسارية..
وصلات عاضة فالصبر باش ما تبكيش.. وعينيها حومر ومينوشة فالارض تابعاها فين ما مشات.. عمرها دخلات للكوميسارية ولا زطمات فيها.. ما عرفات لا فين تمشي لا منين تجي.. لقات راجل واقف فالباب باين عليه عساس ولا شاوش.. وسولاتو وصوتها كيرجف وقالتلو بلي باغة دير شكاية.. نعتلها البيرو فين تمشي.. مشات لقات سربيس دالناس واقفين..كلها وحالتو.. والريحة دلعرق والصبابط كتخنق والصهد كيقتل.. وقفات شادة نوبتها حتا هي فحالها فحال الناس.. وغير كتدور فعينيها ومزيرة فمها ما باغاش تبكي قدام الناس.. دازت ساعة وزوج وثلاثة وهي مزالة جالسة والناس مزالين شي داخل شي خارج ولا بغاو ينقصو.. ومرة مرة كيتمو مدخلين شي حد كيصرفقو فيه ويسبو.. وشي جالس كيعرعر حيث ما بغاوش يقادولو وراقو..الروبالة نايضة وهي جالسة كتخمم فحريرتها وكتسرط الشمتة..
حتا تم خارج رئيس مكتب الشكايات باش يتغذا وبداو الناس يتغاوتو وهو ما مسوقلهومش.. مشا وخلاهم جالسين.. وبقاو جالسين حتا طاب نصهم.. ساعة لغذا دازت وهو ما رجع.. ووصلات لعشية وهو ما رجع.. حتا طلعلهم الزعاف الناس وعاد تم جاي الشاوش كيجر فرجليه باش يقولهوم بلي ما راجعش!.. وهادي هي حالة الادارات ديالنا.. كلشي خدام بلفشوش ولي شد شي كرسي كيعجبو راسو.. ناض كل واحد فين كيغوت.. وتالا خرجات عينيها وناضت تابعة الشاوش كتجري ومينوشة كتخشا بين الرجلين لاحقاها..
تالاسين :عافاك.. اسي.. عمو!
الشاوش:(دار عندها مكره) نعام؟
تالاسين :واش السيد لي مكلف بالشكايات بصح ما راجعشي
الشاوش:راه هضرت معاكم وقلتلكم ما راجعش..
تالاسين :(مغبنة) اوووف.. ويانا خاصني ضروري نشوفو.. راهم نصبو عليا.. شي واحد باعلي دار ماشي ديالو وخدالي فلوسي
الشاوش:ايوا حتا لغذا ورجعي عندو
تالاسين :ولكن..
الشاوش :ما تحمقينيش فراسي الله يستر عليك.. غذا رجعي.. واجي بكري باش تلقايه.. انا ما عندي ما نديرلك
مشا وخلاها هي واقفة كتغبن وخرجات فحالها كتقطر فدموعها وتخبي وجهها بشعرها.. الشمتة بغات تاكلها وقلبها تحرق على رزقها.. شافت حتا عيات وهزات راسها راجعة للاوطيل وهي مزالة كتحاول يشدلها الخط ديال السمسار
وصلات للاوطيل.. ودخلات كتجر فرجليها ما قاداش تهز راسها.. غير دخلات لبيتها وترمات ففراشها تبكي وتنوح وتقول ما بكات.. كتلوى فبلاصتها والشمتة كتاكل فيها ماااااكلة.. ما بغاااتش تسرطلها ولا بغات.. كل مرة كترجع تصوني على نمرتو ومزالة طامعة يجاوبها.. فشلات بالاعصاب وبقات طايحة على كرشها كتخنن وتخمم فرزقها لي مشا وفلحصيصة لي كانت جامعة وما بقاااتش.. بقاتلها شي بركة كانت عوالة تخليها زعما باش تبدا الخدمة وتشري الماطريال لي كتحتاج.. ودابا واش تخلص بيها الاوطيل ولا تاكل بيها ولا تخليها لخدمتها.. تخورات تخويرة من داكشي.. وقصوحية راسها جابتهالها فلخر.. دوزات داك الليلة غير كتبكي ومينوشة مضيومة معاها وغير كدور بيها وتحك فيها زعما كتواسيها.. ما نعسات ما غمضاتو.. حتا حوايجها ما بدلاتهومش عليها.. وغير طلعات الشمس هزات راسها ومشات للكوميسارية.. لقات حتا حد ما كاين.. مزال حتا ما فتحو الباب.. بقات كتسنى وتسنى.. فمها ناشف حيث ما واكلة ما شاربة من لفطور دالبارح.. ووجهها صفر وحالتها حالة.. غير نظاظر لي ساترين عينيها.. تعرمو الناس بشوية بشوية.. حتا جا الشاوش وفتحلهم الباب وبداو دفع فيا ندفع فيك.. شدات نوبتها وجلسات كتسنى عاود.. حتا دارت العشرة عاد تم السيد جاي كيتعنگر بشوية عليه..
وصلات نوبتها ودخلات مخنزرة وكاعية وراسها كيتشقق بلحريق.. كطلع فيه وتهبط ما كرهاتش تطير عليه بعضة تبرد فيه غذايذها.. وهو قانت على كاس دالقهوة وقالب البيرو بالريحة دالگارو
خنزرات فيه وهو ولا بغا يفهم راسو ويحشم ويطفيه.. وفلخر زولات يديها وبدات كتعاودلو شنو وقعلها بالتفصيل.. وهو غير كيهز فراسو وكيخربق فديك الورقة قدامو زعما راه كيكتب.. حتا سالات وهز راسو فيها
الضابط:اوك.. انقدمو الشكاية ديالك وان شاء الله قريب انشدوهوم ونرجعولك رزقك.. كوني هانية
تالاسين :فوقاش؟؟؟
الضابط:مهم حنا انديرو خدمتنا وباش ما كان انردو عليك
تالاسين :وي مي فوقاش زعما
الضابط:ايوا على حسب.. مهم نتي اتخليلي نمرتك وحنا انعيطولك
زفرات من مناخرها ساخطة.. عطاتو نمرتها وخرجات فحالها كتسوط ولغبينة فيها كتحرق كثر من الشمس لي فوق راسها.. بغات تشد طاكسي وهي دير بناقص وبدات تسول على الطوبيس لي كيدي لجهة دالاوطيل.. حتا نعتولها المحطة ومشات خير ربي على رجليها وبقات كتسنا فيها حتا سخفات عاد ججات الطرمبية.. وركبات وحطاتها قريب للاوطيل وكملات على رجليها.. وطلعات وترمات فبلاصتها مرخية كتلهت والشمس حرقاتها وقلقلاتها المخ..
دازت عليها 5 ايااااام فحال 5 شهوور.. كتقيل غادة جاية لكوميسارية وفليل تبات بلا نعاس.. دازو عليها ايام كووووحل لا ماكلة بقات تاكلها لا نعاس كتنعسو لا بال كيهدالها وعاطياها غير لبكى وتخنطيط.. فما تمشي لكوميسارية يردوها بلي مزال ما لقاوهم وتسنا حتا يعيطولها وهي الصبر هو لي ما بقالهاش.. عيات ما تمشي وتجي ومزالة كتحاول تعيط فديك النمرة رجعات للدار كمان تلقا داك خينا والو.. مشات للمحل دالسمسار ووالو.. كاع البيبان تسدو فوجهها وكحالت الدنيا فعينيها..
ناضت اليوم..تحت عينيها زراق وضعافت ووجهها صفااار..بزز باش كتجر رجليها.. لبسات ما عطى الله وجمعات شعرها..وجلسات شادة تيلي فيديها وكتخمم وتشوف فيه.. تنهدات ودوزات النمرة دجواد..بقى شوية وجاوبها..
هزات قطتها وحوايجها وخرجات من البيت.. هبطات عطاتهم السوارت ديالو وخرجات وقفات فالباب مغطية عينيها بنظاظر وكتنفس كمان ترجع فيها الروح.. وشدات طريق طوييييلة على رجليها..
🍂🍂🍂🍂
مع اذان المغرب.. وقف بسيارتو حدا باب العمارة ونزل منها بشورط باج وتيشورط بيضة وصبادرين وكاسكيطة كحلة.. وكاميرتو فعنقو.. تم داخل للعمارة وهو يوقفو الكونسييرج كيتبسم..
الكونسييرج :ميسيو براء.. مساء الخير
براء :(تبسم فوجهو) مساء الخير.. (كمل طريقو)
الكونسيبرج: اه قبل ما طلع
براء :(رجع دار كيشوف فيه باهتمام)
الكونسييرج: راه شي دالناس من صباح مولانا وهما يتسناو فيك..
براء :ناس!! شكون هاد الناس!!
الكونسييرج :ختك
براء :ختييي! بيسان؟
الكونسييرج:ما عرفتش سميتها الصراحة.. مهم راها مسكينة من الصباح وهي تسنا فيك..
تفتح السانسور وخرج ومع الهزة دراسو فتح عينيه مبهوض..جالسة على صاكها موسدة الباب وقطتها بين رجليها لي مربعاهم.. غير سمعات السانسور لي تحل وهزات راسها وشافت فيه بنظرة مكسوووورة.. ما راضيااش وفنفس الوقت ما لقات عليه لين.. تمشي عندهم هما لدار ما بقالهاش وجه اصلا.. تطلب لفلوس من شي حد ما ترضاهاش على راسها خصوصي من بعد لي وقع واخة حتا بيسان.. عيطات لجواد لقاتو ملهي فالخدمة مع باه لي رمى عليهم الخدمة من مور ما خوا براء وكيبرد فيهم الدقة..وحشمات تزيد تشطنو براسها حتا هي.. شافت حتاااااا عيات وقالت نجي عندو بعدا هو كان فااتحلي باب دارو وانا لي تهزيت وتعفرت عليه.. وحيث جانب فيها كيقولها بلي ما ايسمحش فيها وهو لي ايوقف معاها واخة گاع لي دارتلو..
شافت فجنابها ما قاداش تشوف فعينيه ومكمشة فمها لقدام عاضة فالصبر حيث زطمات على نفسها باش توقف عند بابو..
هو غير شافها بقا واقف مصمر فبلاصتو لثواني..كيرمش فعينيه وعاقد حجبانو كيحقق فيها وكيفليها فلياااااان.. قلبو كيحس بيه بدا كيضرب كثر من لي كان..توحشهااااااا وتوحش يشوفها ولكن ماشي بهاد الحالة.. باينة فيها عيانة ومريضة وحالتها حالة.. قرب منها وهي هزات راسها ووقفات حانية الراس وكتلعب بطرف التيشورط وتسرط فريقها وتدور فعبنيها.. وهو واقف مغطيها ما كتبانش ومزال كيحنزز فيها..
براء :(بتعجب) شنو كديري هنا!
هزات راسها فيه ورجعات حناتو وفحال الا بركلها على شي بوطون وقاس الوتر الحساس.. زاد كمل عليها بهاد السؤال وشفايفها بداو كيرجفو باغة تبكي وهي مزيراااهم وهو يعقد حجبانو..
براء :تالا.. مالك!! (طل على وجهها) كتبكيي؟؟؟؟؟
حنات راسها كثر قالبة وجهها ما راضياش تبكي حتا سمع شهقتها ودور وجهها عندو بطرف صبعو مخلوع.. لقى دموعها كيتكركبو.. تخلع وخرجو عينيه وما فهم والو..
براء :ششش ما تبكيش.. سكتي.. اجي ندخلو للدار بعدا
فتح الباب وعينيه مع الباب ومعاها.. فتحلها الباب وخلاها دخلات وسدها موراه.. بقات واقفة فبلاصتها كتلعب بصباعها..
براء :زيدي.. دخلي
تقدم كتخلف بزز وجلسات فطرف الفوطوي.. وشلاااا كلام كيدور فراسها.. شنو ايكون كيقول عليا دابا!! بقيت نتهز ونتحط ونتحلف فلخر جيت كندق بابو..بشمن وجه انقولو لي وقعلي.. نرجع نمشي فحالي..وفين انمشي.. انااا لي درتها لراسي..
كتهضر بينها وبين راسها ودموعها مزالين هابطين وكتمسح فيهم وهو تجلس قدامها كيشوف فيها مخلوع..
براء :هضري.. مالك.. علاش كتبكي
تالاسين :الصمت
براء :واش اداك شي حد!!! ياك ما سعد!! والله ويكون هو حتا نقبرو.. هضري مالك!! علاش كتبكي
هزات عينيها فيه كترمش وعينيها فازكين كتمسح فيهم وجامعة ركابيها ملاصقاهم وكتلعب بصباعها..
تالاسين :تسرقت
هبطات راسها كتبكي وتنوح وحطات وجهها وسط يديها.. وهو تفافا وخرجو عينيه فيها مخلوع.. كيهز يدو يحطها عليها يسكتها وكيرجعها.. باغي يعنقها وما قدرش.. وبقا مفافي فبلاصتو..
براء :كيفاش!! فهميني.. سكتي بعدا.. تالا هزي راسك بركة من لبكى.. ششش صافي الله يهديك.. تالا.. سكتي
تالاسين:(هزات راسها فيه كلها مجلخة وكتهضر كلمة وتهشق عشرة) شمتوني ابراء اهء اهء اههئ
شمتوووني وخداولي فلوسي اهنهئ اههئ
براء :وا سكتي وهضري وفهميني..
ما بغاتش تسكت وهو يضرب فالطبلة حداه ساخط ومخرج عينيه وهو الدم كيغلي فيه مخلوع عليها وما فهمهاش علاش كتهضر..
براء:وااااا سكتي وهضريييييي.. جمعي دموعك
شهقات بلبكى وحنات راسها باغة تسكت وما قاداش.. حيث فاش كتكون مقهور واخة تعيا صابر بمجرد ما كتلقى علامن تشكي كتحس بداك البركان انفاجر فيك وما كتقدش تحبس راسك.. وحتا هي داكشي ما وقعلها 6 ايام وهي واكلة الدق فقلبها وعاضة فالصبر وما لقات لي يواسيها وغير لقاتو هو ما قدراتش تسكت..
زاادت خلعاتو كثر وهو يقرب كثر كيطل على وجهها.. وباغي يحط يدو عليها وما زاعمش.. وهبط من نبرة صوتو كيترجاها..
هزات راسها وبلا ما تحس رمات راسها بين يديه معنقاه وكتبكي على صدرو وتنووح حيث هادي ايااااام وهي كتمنى تلقى لكتف لي تحط عليه الراس وتبكي... وخلاتو هو هاز يديه كيشوف قدامو مبهوض..
تالاسين :سرقوووووني ابراء انهنههئ اههئ اهئ
تكوانسا فبلاصتو..بقا هاز يدو وكيشوف قدامو وهي مدورة يديها عليه وحاطة حنكها على صدرو كتشهق وتبكي.. وبشوية بشوية حط يدو على ظهرها فحال الا خايف يقيسها.. غير حط يدو عليها وهو يزيرها عندو بجججججهد وخشاها فيه حاط ذقنو على راسها وكيكالميها وقلبو كيتشوا معاها وهو ما عارفها حتا علاش كتبكي..
هو كيسكت وهي اصلا بالها ماشي معاه كانت باغة غير شي حضن تخشى فيه وتبكي عليه وها هي لقاتو.. بكات حتا طابو عينيها وهو صابر معاها كيكالميها.. حتا بدات كتسكت بشوية بشوية وهزات راسها بعدات عليه بشوية وشعرها لاصق على وجهها.. بعداتو بيديها كتمسح عينيها وكتشوف فجنابها عاد طلع معاها بلي كانت معنقاه وزادت طلعات معاها التزنيگة ديال لحشمة مع ديال لبكى.. وهو كيشوف فيها باهتمام وعاقد حجبانو..
براء :نوضي غسلي وجهك واججي..
حركات راسها وناضت بالزربة.. لقاتها سبة تهرب من قدام عينيه حيث حشمات من راسها.. دخلات للحمام غسلات وجهها وبردات على عنقها.. وبقات واقفة كتنش على راسها بيديها وتنفس.. عاد خرجات حانية الراس..
جلسات قدامو ساكتة ونيفها حمر بقوة ما بكات ومينوشة مقنتة ما كتحركش حيث موالفة فاش كتخرجها لشي بلاصة ما عرفاهاش كتجلس ودير عقلها زعما..
شاف فيها بجدية عاقدهم وحاط يديه تحت ذقنو..
براء :يله دابا.. هضري
تالاسين :(سرطات ريقها عاضة على فمها)
براء :وا يله.. نطقي.. مالك!! علاش هاد لبكا كامل؟
تالاسين :(بصوت خافت) واخة.. هانا انشرحلك
براء :يله.. كنتسنى
تالاسين:(كدور فعينيها) دابا يانا ماشي كنت انشري دار
براء :اممم.. ايوا!
تالاسين :مهم.. داك السمسار لي تلاقيتيه داك النهار وراني واحد الدار.. مشينالها.. تفاهمت مع مولاها وكلشي.. (كتلعب بصبعانها) ايوا ولغذ ليه تكاتبنا.. وباعلي الدار(سكتات)
براء :ايوا.. ومن بعد؟
تالاسين :(نزلات دمعة صامتة مسحاتها دغيا) وفاش مشيت لدار جبرت السوارت لي عطاني ما كيفتحوووشي اههئ اههئ
براء :(حط صبعو على فمو) ششش.. بركة من لبكا.. ياك بكيتي حتا تفشيتي.. وا جمعي دابا وهضري بلا بكا
تالاسين :(هزات راسها كتمسح فدموعها) واخة
براء :دابا قولي.. كيفاش ما كيفتحوش؟
تالاسين :ما كيفتحوشي.. وفاش عيطت للسمسار طافي تيلي.. مشيت عندو للمحل جبرتو رحل.. وفلخر فاش رجعت للدار عرفت بلي ديك الدار اصلا غير ديال لكرا.. ومولاها فرانساوي وماشي حتا مغريبي.. كلاوني فرزقي وسرقوني.. شمتوني شمتة نموووت وما نساها
براء :(بدهشة) شنو دابا.. زعما نصبو عليك؟؟؟؟؟
تالاسين :(حركات راسها) اه.. نصبو عليا ف 8 دالمليون.. رزقي كامل.. وفاش مشيت للكوميسارية بقاو داييني جايبيني وما شفت والو.. كل مرة يقولولي غير مشي دبا نعيطولك.. وما شفت وااالو..
رجع ظهرو وكاه على الفوطوي وحط يديه بزوج على راسو كيشوف قدامو مخنزر وهز القبضة ديدو ضرب بيها الفوطوي حداه مزير على فمو..
براء :ولاد لكلاااااااب.. والله ما تبقى فيهم..(دار شاف فيها مخننننننزر) ونتي علاش بقيتي ساكتة.. علاش ما جيتيش عندي ديك الساعة
براء :المرض.. (ناض وقف غادي جاي كيمسح فوججهو ويديه على خصرو) ياك هضرت معاك!! يا قلتلك غادي يديروها بيك الشمااايت.. هانتي ما دوزتي حتا سيمانة مقادة جمعولك لحصيصة وسيفطوك.. ياك عيييت فيك ونتي دايرالي فيها عزة نفسي... وهانتي جبتيها فراااسك دابا.. شفتي قصوحية الراس فين كتوصل؟؟
تالاسين :بلااا ما تزيد تكمل عليا الله يخليك
براء :راااه انطرطق.. ولاد لكلااااب لقاوك غشيمة وضحكو عليك.. شفتي علاش قلتلك اجي معايا.. عرفتي علاش.. حيث بنادم ما كيرحححمش.. قالتلك قادة براسي!!! باش غير قوليلي بااااش.. فيك غير لفم...يله فالحة معايا انا.. وهادو داروها بيك وخلاوك حالة فمك
خنزرات فيه وناضت وقفات طالعالها قنديشر لراس وتمات خارجة..
تالاسين :اصلا يانا حمارة.. نستاهل حيث جيت عندك
شدها من دراعها معصب ودفعها حتا جات جالسة فوق الفوطوي مخرجة عينيها..
براء :دوزي تجلسي.. فين اتمشي.. هاد الطيران والنفس الخااويةَ لي فيك هي لي جابتهالك...
زدحها مع الفوطوي وخرج عينو فيها..وهي بقات غير كتبرقق وتسرطلها لسان.. باش اتجاوبو.. ما كذبش عليها.. تسنطيحها هو لي دارهالها..
براء :ولاد لكلاب.. والله يا مهم ما تبقى فيهم.. نشدهم نشدهم.. (شاف فيها) عطيني لادريس ديال داك السمسار دالزفت وحتا لادريس دالدار.. ولاكط لي دارو معاك.. مهم كلشي لي عندك اريهلي
براء :(كيقرا لاكط) نتي جلسي هنا ما تخرجيش حتا نرجع.. (هز راسو فيها) قسما بالله وتعتبي برا هاد الدار ما يعجبك حالك.. انا انخرج ونرجع
قلب الدورة وخرج فحالو مغذذ ومخليها هي موراه غير كترمش فعينيها..هبط بحالو كاعي شافو الكونسييرج وناض وقف متبعو مبهوض فحالتو.. تقدم براء حتا وصل للباب وهو يرجع دار شاف فالكونسييرج حتا خلعو.. قرب عندو عاقدهم ولاخور مبرق فيه عينيه..
الكونسييرج :سسس..سس..سي ببب.. براء!! ياك لباس؟
براء :(بحدة) هاديك لي لفوق مراتي.. ماشي ختي ديرها فبالك..
الكونسييرج :(حل فمو) نن.. ننن نعام!! مراتك؟؟؟؟
عطاه بظهرو وخرج خلاه غير كيدور فعينيه وحال فمو مبهوض وغي كيتفتف بوحدو ويهشر مع راسو بحال شي حمق..
الكونسييرج :مم.. مراتوووو!! كيفاش مراتو!! علاش ماشي ختووو؟؟ تزوج بختوووو؟؟ استغفر الله؟؟ شهادشي!! كي دارولها.. ختو رجعات مراتوووو؟؟ دابا واش مراتو ولا ختو؟
ركب فالاوطو وجبد تيلي ديالو كيدوز المكالمة وهو ساخط وغير كيسوط حتا تحل عليه الخط..
براء:الووو!! معاذ؟ صافا!
معاذ:اهلاااااااا بلعشير.. لباس عليك؟
براء :لباس الحمد لله.. مسالي؟؟ بغيت نشوفك؟
معاذ:ياك لباس؟ حيث عارفك ما كتشوفني غير على شي مصيبة هههه
براء :الله يسمحلك.. مهم فينك نجي عندك
معاذ:انا فالخدمة.. اجي عندي للبيرو
براء :اوك.. 10 دقائق نكون عندك..
معاذ:اوك كنتسناك
قطع عليه ورما تيلي فالكرسي حداه.. وديمارا مكسيري للولاية العامة فين خدام صاحبو.. حيث هو لي ايفكو وايجيبهوملو واخة يكونو تحت الارض.. اما باه فاكيييد ما ايمشييش يطلب منو يعاونو من بعد لي وقع..
🍂🍂🍂🍂
جلسات هي فوق لفوطوي.. ما عندها خاطر.. وغير كتاكل فجنابها بالفقصة.. وكلامو كيتعاود فوذنيها حرف بحرف.. وما رضاااتش بيه.. بقات جالسة تقطر فيهم.. حتا نقزات مينوشة فحجرها مخلوعة.. دارت شافتها فين كتشوف وهي تلقى امينو خارج من بيتو.. خرجو عينيها وزيرات على قطتها بين يديها..
تالاسين :اواعدي.. شكيعمل هذا هنا!! اواعدي؟؟؟
غير شاف مينوشة وهو يبدا ينبح ويغزز فنيابو وهي مخشية فتالا خيفانة.. زيراتها عندها معنقاها وجامعةة رجليها فوق الفوطوي كتبرقق فيه.. حتا لواحد اللحظة وهو يتم جاي كيجري جيهتهم وهي تنقز من بلاصتها كتجري هربانة منو وخيفانة على قطتها..
🍂🍂🍂🍂
طاح الليل .. ودخل مع الباب لقا السكااااات وحتا الضوء ما مشعووولش.. عقد حجبانو ورما السوارت فوق الخزنة وشعل الضوء ودخل كيقلب عليها بعينيه.. ما لقاهاش ودخل لبيتو كيشوفها عنداك تكون تما وهو يبانلو امينو مجبد حدا باب الحمام وكيلعب بشوالو وبانلو خيالها هي من مور الزاج جالسة فوق لاشاث وغير ضوء الحمام لي مشعول.. كمش جبهتو باستغراب وعيط بصوت غليظ..
براء :امييينووو..
هز راسو امينو وناض عندو كينقز وينبح ويدور بيه وهو مزال واقف كيشوف فيه سمع صوتها من الحمام كتغوت..
تالاسين :جيييتي ادااااااك الجحمووووم.. مشي الله يعطيك الزحمة والعصمة وقلة لما خلاتهاااا يما... منييييين المصعور ديااالك هنا علااااش ما تقولاشيييي.. مخليني من صباح مولانا ويانا مقلزة فلحماااااااام.. حتاااا لبيوت ما عندهم بيبان فحال النااااس.. هادي دار ولا زرييييبة.. بااااغي تنتاااقم منيييي غير علمني بعدا.. مخليني لعشية كاملة ويانا مخشية هنا كون راه عوجني شي مصرفق بحالك.. الله ياخذ فيك الحق على هاد التقليزة لي عملتيلي.. سمعتيني اداك بو عاعا.. يانا بغيت ربي ياخذ الحق
إرحموني الجزء الثامن
محتوى القصة
التنقل بين الأجزاء