قدس: كفاش واش كنبغيه ؟ بيان سيغ كنبغيه احسنا واش نكدب عليك .. كان عندي امل نتصالحو وكنت عايشة عليه واخا عارفة يقدر يطول.. مي دابا صافي شاف غيري
حسنا : شوفي غيرو حتي نتي
قدس: ماشي بهاد السهولة .. الى شفتي نتي واحد مت غير راجلك نرفع ليك الشابو
جلسات تبكي وتشكي حتى طابت فاللخر دخلاتها ختها لداخل عطاتها كينة شرباتها ودارت ابرة مهدئة وتكات مضيومة عاطياها للبكا معنقة بنتها كتشوف فيها بتعب وتبكي . دوزات النهار كامل حتى وصلات لعشية وهزات بنتها رجعات لدارها وحالفة حتى توقفو عند حدو الى جا عندها وماتبقاش تسكت ليه ولا تبين خوفها وضعفها قدامو ، رجعات لدارها معاندها خاطر ولا كانة لاكن كتحمد الله اللي معاها بنتها في الدار والل كانت تقدر توقع بيها شي حاجة مللي سمعات الخبر وبنتها عندهم فالدار .
بدا تيليفون كيصوني بالليل وكتسمعو كيصوني ويعاود ومابغاتش طل عليه ... شوية ناضت من الفراشو ساخطة وفتحات الخط قالت
- شنو ياك لاباس اسيدي هادا وقت كيعيطو فيهم الناس؟
انصار: بهدوء) دابا مالنا على هاد الزعفة ياك لاباس؟
تفاجأت بطريقة هضرتو وهي اللي كانت متوقعة منو يخرج ليها من تيليفون ، خفضات صوتها حتى هي كتألم داخليا وقالت
قدس: سمع السي انصار غادي نقول ليك اخر كلام عندي ومغاديش نعاودو ، بنتي غتعيش معايا بالسيف ولا بالقانون ، بغيتي نتا ولا كرهتي .. غنبقاو على نفس السيستيم اللي كنا عليه ... تشوف بنتك فالبلاصة اللي عايشة فيها وماتاخدها لحتى بلاصة .. بغيتي هادشي مرحبا .. مابغيتيش راه القانون الى عطاك شي حاجة اجي خودها ، ماتبقاش تتاصل بيا بمرة .. بغيتي تشوف بنتك سيفطي ليا مسج ونسا هاد النمرة اولد الناس الله يخليك
انصار: غيير بشوية عليك .. مالك على هاد الطلعة هادي! انا ماجيتش نحيد ليك سجى حيت فكرت وقررت نخليها تعيش معاك .. لاكن توقع شي حاجة ليها منرحمكش هاني كنعلمك
حركات راسها كتسرط الحرقة وقالت : اصلا سجى مابقات كتعني ليك والو غير سميتها اللي لاسقة فيك ودابا بما انه تبدلو شي حوايج ووقع التغيير ... فالله يخليك نسا واش كنتي كتعرفني من الاساس ، بيناتنا بنت عندك الحق عليها والسلام . خليت ليك الراحة والله يرحم ليك الواليدين ماتعاودش تتاصل بيا مرة اخرى
انصار: ببرودة ) ماقلتي عيب ... الله يعاون
قطعات التيليفون وقلباتها بكا وشهيق ... انقاطعات على العالم وخدات كونجي تكمشات فيه فالدار مريضة وتعقدات من جيهة انصار ومن جهة الحب ومن الناس ومن كلشي لاكن مادخلاتش فالاكتآب بحال المرة اللي قبل لانها سارعة وتاصلات بالطبيب النفسي ديالها وبدات كتبع معاها غير من تيليفون ومقابلة سجى كتربيها ، غبر انصار داك الشهر كامل ماجاش يشوف بنتو ، كيسول عليها فالمساجات فقط وكتجاوبو قدس بكلمة ولا جوج وتحبس وحتى هوا كايزيدش معاها الهضرة ، ضغطات على نفسها وكان صعيب عليها ضغط عليها باش متبعش اخباره فين وصل ولا تشم شي ريحة جايا من جهته . تأزمات لاكن حاضية بنتها وكتربيها ومقابلاها وزادو تعلقو ببعضياتهم اكثر واكثر ، بدات سجى كتمشى وتجري مسبقة وجهها للقدام وبدات كتعاود الهضرة مور قدس وتنقل منها وتتعلم والكلمة اللي قالتها ليها قدس كتعاودها سجى موراها حتى انها كدير شي افعال وحركات كتخلي قدس تضحك بزز منها .. بحال مللي كتكون فلكوزينة كطيب كتجي سجى توقف حدا الباب وتبدا طل عليها غير بعين وحدة وتخبا وفاش
كتشوفها قدس كتهرب وتخبا مور شي حاجة وهنا كتعرفها قدس دارت شي زبلة ، بحال زلعات اريال كامل ديال الماكينة اللي فالحمام حدا لاماشين ولا تجبد ليها المكياج وتخوي ليها الصاك وتزلع ليها كلشي وتلعب حتى تشبع وتنوض عاد تعرف راسها قفراتها وتمشي طل على قدس .. لاكن كالعادة كتبدا قدس ضحك عليها ومكتغوتش ومولفة تهضر معاها بالسياسة وتشدها فوق ركابيها وتجلس تجمع هي وياها وتعلمها تهضر ولا تشد شي قصة بالفرنسية او العربية وتبدا تقرا عليها وتعبر ليها بالاصوات بعيدا على قصص الخوف ولا الوحش ولا الشر .. كتحكي ليها فقط قصص الضحك والسعادة والاميرات ، دازت ست اشهر جات مها عندها مقابلة ليها بنتها وحاضينها من الهواء لا يقيسها ، دوزو رمضان مجموعين الام والاب وخوها معاها و وصل العيد ، لبسات فيه قدس جلابة فالصباح وهي ففاس مع عاءلتها وبلغة ولبسات لسجى حتى هي نفس الجلابة بنسخة مصغرة وبليغة وجلسات كدور هي وياها فالدار ويستقبلو الناس فصباح العيد وكلشي بالبلدي وكلشي مبشور .. حطات صورة ليها على الانستاغرام اللي مسحات تصاورو القدام كاملين ونزلات فيه الجديد ديالها . صورة ليها جالسة دايرة رجل على رجل بابتسامة وشعر مطلوق ومكياج العيد وجلابة انيقة جميلة وشادة بنتها مجلساها عندها كتبوسها فحنكها بنفس الجلابة وضاحكين بجوج بيهم . في حين جالسة حاضية غير بنتها تنوض معاها وتجلس معاها وصلها مسج من عند انصار " مبروك العيد بجميع المامنيات
عيد مبارك سعيد يا وجوه الخير واعز الناس
ابتاسمات ابتسامة عادية وردت على الرسالة كاتبة " عيد مبارك يا قاطع اخبارك "
جاتها رسالة من عندو كاتب عليها : العيد بعيد على الاحباب صعيب والغربة فالاعياد الدينية كحلة ، الى كان ممكن نهضر مع سجى
ردت عليه برسالة " اوك "
تاصل بيها فالحين لاكن مارداتش هي وعطات تيلي لسجى شداتو كما كدير ديما فاش كيتاصل ، كتعطي تيليفون لسجى وتنوض مباشرة تخليها كتهضر معاه بصوتها الطفولي وهي كتخرج الكلمات مخربة .. كتخليها شادة تيلي جالسة كتجمع وتبجغط حتى كتشوفها حطاتو عاد كترجع ليها ، خرجات مع عاءلتها يزورو الاحباب والاقارب وجلسات فالصالة عند خالتها شادة سجى وبدات تدخل وتخرج تشوف مواقع التواصل الاجتماعي مفاش معيد .. دخلات للانستا كتشوف شكون دار ليها لايك وهي تلقا سمية " انصار لحلو " داير ليها لايك على الصورة اللي حطاتها هي وسجى ودخلات ليه كتشوف لقاتو حاط صور حصرية برا البلاد فكوريا .. بدات تفرج على التصاور وكتقرا التعاليق واغلبهم رجال قليل فين تلقا شي بنت .. لاكن مللي طاحت على تعليق فآخر صورة حط عليه جوج قلوبة ومولاتو " جهان العلمي " دخلات ليها مباشرة تعرف شكون باش ترضي فضولها ، لقات جهان حاطة عندها بعض الصور ليها مع انصار
فالسيارة قراب لبعض باينة كان كيسوق وخدات سليفي هيا وياه ضاحكين قراب ، صورة اخرى كانت لابسة فيها ققطان بلدي فشي عرس وهوا لابس لكلاص جالس داير يدو ورا ضهرها ومصورة معاه
شافا تصاور مع وحدة اخرى وبقا فيها الحال وفاقو عليها الجروح لاكن كمداتها وخرجات فخطرة من الانستا مابغاتش تكمل باقي الصور ، رجعات كتلف الوقت وتنسي شنو شافا مع بنتها وتجمع مع العائلة على الله يتحيدو من بالها التصاور اللي شافت ، لاكن واخا عيات تنسي وتلف كترجع ليها الصورة لدماغها ، تعجبات فيه علاش ماحاطش حتى صورة ليه معاها فالحساب ديالو وحاط تصاورو هو فقط وتصاور سجى معاه وهوا هازها كضحك ولا مجلسها عندو ولا ناعسة عندو ، بقات كتساءل مع راسها علاش محاطش تصاور ليه معاها فالحساب ديالو ، واللي زاد فقصها هوا انه داير ليها ليها لايك للصور اللي حاطة معاه . بدات كل شوية تدي وتجيب بتفكيرها ومرة مرة تبدا تجمع وتلهي راسها مع العاءلة ، داز نهار لعيد بحال العادة ؛ زارو فيها للحباب وزاروهم ودوزو النهار مع العاءلة كل مرة يدوزه واحد . تعشاو ومشات لبلاصتها فبيت ختها وتخشات فالفراش مجلسة عندها سجى وكتهضر معاها وتجمع هي وياها بعقل الكبار كما ولفات ليها وكما رباتها مللي كانت عاد كتلقط الحروف وتعلم وتعاود الهضرة حتى تسرح ليها اللسان ورجعات كتهضر وتجاوب ، هزات قصة بدات كتقرا ليها وهي تمد سجى يدها للتيليفون بغات تهزو ومنعاتها قدس بشةية وقالت
- ماشي ديال البنيتات الصغار امامي .. هادا ديال لكبار .. كنهضرو فيه مع الناس ماشي كنلعبو فيه
دار سجى يديها مور ضهرها وقالت بصوت طفولي
- وانا؟ فين دالي؟
قدس : ديالك خاصك تشريه راسك نتي .. فاش تكبري وتخدمي وترجعي طبيبة ولا مديرة فالشركة بحال باباك .. عاد ديك الساعة تشريه باش تهضري فيه
نقشو ليها وجلسوها بقطان حاطة يديها فوق مخدة كتشوف فيهم كما وصاتها قدس باش متخسرهاش ومظات يديها حتى هيا نقشلت واحد الصبع ونقشو خواتاتها وخوالاتها ودارو لعشا بيناتهم وصورو سجى وتصورات معاها حتى قدس وحطاتها فالانستا عمدا باش يشوفها انصار وشوف علاقتهم ببعضياتهم ونشاطاتهم وسعادتهم بلا بيه وكفاش هما عايشين احسن من بزاف . وفرحانين بيه ولا بلا بيه .
بالليل متكية قدس عاسة على الانستا كل شوية طل واش دار ليها لايك حتى دارها وعرفاتو شافها وشاف الحفلة كفاش دايرة ومتولة وكفاش فرحانة وكتبين انها نساتو وعايشة حسن بلا بيه بألف درجة . وبينما كتشوف التصاور اللي حطات وتحقق فيها كيفاش جاو دخلات عليها سجى للبيت ببيجامة دايرة ديها على ودنيها في دهشة وقالت
- مامي !!! توفي نو لكيت؟
خرجات قدس عينيها من دهشة بنتها وهي طرطق بالضحك بالجهد حتى دمعو عينيها وسجى باقا مصمرة مصدومة وعينيها محلولين ويدها على ودنها .. دخلات لاللة نزهة مستغربة وقالت
- شفتي ... الحورية الطاءرة هي اللي جات عندك دارتهم ليك .. بحالي انا هاني شوفي حتى انا دايراهم
بقات سجى حاللة عينيها فدهشة ولاللة نزهة كتقول
- ويل الشيطان علاش كتفلاي عليها مسكينة
عضات قدس على فمها وقالت: لالا غير خليها راه عارفة علاش كنهضر .(شافت فسجى ) عرفتي علاش دارتهم ليك؟
سجى: لا!
قدس: حيت غير لبنيتات الزوينات اللي كيسمعو لمامهم الزوينة هما اللي كتجي عندهم وديرهم ليهم ... وهادو كيديرهم فاش كيكبرو .. بحالي انا ... دابا دارتهم ليك حيت قريبة تكبري
سجى: انا !!!! (شدات ودنها )
حطات قدس يدها على ودنها وهزات راسها كتشوف وقالت
- بلاتي !!! اااه سمعتها دابا قالت ليا ماتحطش يدعا على وديناتها باش يبقاو زوينين ... ماخاصكش تحطي يديداتك على وديناتك ...
قاطعها صوت الواتساب كيصوني وهزات تيلي شافت انصار كيعيط ليها فيديو .. خرجات مها مشات تنعس وفتحات قدس الخط بلا ماتبان هي ولا حتى تقرب وجهها جيهتو .. بان ليها لابس قميجة والنهار عندو والصباح والضوء داهل من زاج الاوتيل اللي جالس فيه فكوريا عكس هي عندها الليل ووصل وقت النعاس، شافتو سجى ومع السلام عليكم دارت يدها على ودنها وقالت كتعوج راسها وكتفها بابتسامة بالطريقة اللي كتهضر بيها قدس تماما والطباع ديالها .
سجى: ثوف بابا
قرب وجهه بابتسامة وقال : دارو ليك حلاقات فودنيك ابابا
سجى: لولية داتهم لي هنا
انصار: قرب ودنو * شنو؟
سجى: انا كبيلا
انصار: اه نتي كبيرة ازين ديالي .. ماتوحشتيش باباك؟
حركات سجى راها وقالت : اه
انصار: حتى انا توحشتك ابنتي بزاف ... غنجي ونجيب ليك نونوس كبير
عضاتها قدس فحنكها وباستها مت بعد بدات تعاونها وتفتح معاها الكارطوة .. خشات يديها الوسط وهي طلع ليها نونوس كبير حمر كبيير .. خرجات سجى عينيها وبقات واقفة مصدومة حاللة فمها ، حطاتو ليها قدس قدامها وقالت كضحك
- هادا ديالك
قالت سجى وهي حاللة فيه فمها : دالي!!!!!
قدس: اه ديالك ... هاهوا خوديه
من الدهشة بقات سجى واقفة كتشوفو قدامها فيه النص من طول قدس .. شدات فيه بدهشة وبدات تشوفيه .. رجعات شافت فقدس وهي تلاح عليها عنقاتها عاد بدات كضحك وتغوت بالفرحة .. طلقات ليها قدس كدور بنونوس ديالها مت هنا ومن لهيه وتعنقو وتنقز عليه وبدات تلتاقط ليها صور فجميع الوضعيات وجمعاتهم فصورة وحدة وحطات على الانستا مكتوب تحتها " ما اجمل ان ترى السعادة بعيون صغيرك ❤"
حطات الصورة ودوزات النهار كامل لعب وضحك مع سجى وفنفس الوقت عساسة عليه واش حط ليها لايك ولالا ، جات تنعس بالليل وهي دخل طل على الصورة اللي حطات لقاتو حط ليها لايك .. عجبها الحال مالي شافها ونعسات راشقة ليها معنقة سجى .
بدات س كتفكر فشي سفرية غير هي وبنتها الراس فراس ترتاح فيها من تعب العمل والتربية وتسترجع فيها طاقتها اللي خسرات من نهار تزوجات .. بدات كتفكر تسترجع قدس اللي خسرات .. ترجع نفسها وترجع نشاطاتها و طموحها وآمالها و تفاؤلها بالحياة .. بغات تسترجع الايام الجميلة اللي كانت كتعيش قبل متقلب حياتها رأسا على عقب ، بدات كتفكر دوز شي عطلة الصيفية تعقل عليها حياتها كاملة وتعيش الحياة وتبعد على البشر وتنسا في كلشي ، فعلا رجعات لدارها هي وبنتها وبدات تخطط لسفرية فاعلة تاركة . خبرات واليديها ولسقات فبها ختها الطبيبة باش يمجيو بجوج ويديو ولادهم ويمشي مجموعين لاكن قدس رفضات رفضا قاطعا ومابغات يشاركها فرحلتها حتى واحد ومابغاتش صدع الولاد والبز ومابغاتش اللي يري عليها نمشيو هنا ولا تمشيو لهيه .. بغات بنتها فقط بعتات مسج لأنصار مكتوب عليه
- سلام السي انصار ... انا غادي نسافر ان شاء الله لآنطاليا (تركيا ) انا وسجى بجوج وخاصني الموافقة باش نديها معايا ... فرحانة بزاف مللي قلت ليها نسافرو
قطعات وبدات توجد راسها للسفر وتجمع اغراضها واغراض بنتها ودور براسها وتقاد دفارها وحالتها وكل مرة تفكر حاجة جديدة وتجمعها بالرغم انها دايرة فبالها انها متاخدش معاها الحوايج بزاف حيت غتمشي لتما وتشري حوايج جداد وتقدا كاع داكشي اللي خاصها ، قطعات التذاكر ديال السفر وجلسات كتسنى رد انصار عليها ، تعطل عليها بزاف وهي ماعندهاش بزاف ديال الوقت اللي تسنا ورجعات كتسنى على اعصابها ، فلعشبة بينما هي جالسة كتفرج فالرسوم مع سجى قدام التلفزة تاصل بيها وفرحها اتصالو حيت اخيرا ومن بعد انتضار تاصل يخبرها بالرد يالو
انصار: لفلوس اللي كتخلص لكريديات ماشي نوع الخدمة ... والى كنتي ناوية تبدلي البلاد وتجلسي تخدمي فتركيا ولا تزوجي تما ! نعطيك لوطوغيزاسيو تديها وماتعاوديش ترجعيها !
قدس: ناري نيتك خايبة ... انا غنصور ليك البيي فيه آلي وروتور وحتى لوتيل اللي غنجلس فيه مخلصة فيه 20 يوم اللي غنبقا تما وسول وقلب عليا الى كنت دايرة شي حاجة ماشي قانونية من حقك دير اللي بغيتي
انصار : غااادي نسول وغادي نقلب حتى حاجة ماصعيبة ، سيفطي ليا هادشي اللي قلتي دابا فجيمايل ديالي راه عندك نشوفو ونتأكد ونشوف البيي ديالكم ومزال فنقلب ، حيت باش تاخدي البنت خارج البلاد وبالموافقة ديالي خاصني نكون حمار ومكلخ .. ماشي غير اجي وخرج برا
قدس : لا سمح ليا انا مقلتش هادشي ، ربي عالم على نيتي بغيت نسافر فهاد الصيف انا وبنتي وصافي والى بغيتي نسيفط ليك تشوف نسيفط ليك
انصار: اوك يالاه سيفطي نشوف
قدس : اوك
قطعات ورسلات ليه الأدلة فالجيمايل ديالو وسيفطات ليه مسج كتعلمو انها بعتات ليه كلشي . دازت نص ساعة ورجع تاصل بيها
انصار: وي .. شفت داكشي .. مي ماشي كافي باش نعطيك الموافقة تخرجي سجى على برا.. سوري
قدس: انا وريتك كولشي ! علاش ماتعطينيش الموافقة
انصار: شوفي بغيتي تسافري سافري بوحدك مي سجى ماتمشيش ، الى كنتي خلصتي الطيارة بأمكانك تمشي مثلا نتي وياها ومترجعيش واخا مخلصة روتور .. و بأمكانك دوزي يامات فداك الاوتيل اللي مخلصة ومن بعد تخرجي منو وتبقاي تما .. شكون عرفني واش كتعرفي شي واحد ودرتو هادشي كامل باش نوافق ليك تخرجي
سجى ! باش غنعرفك انا كتهضري بصح ولا ناوية تخوي فخطرة وحدة وبنتي تبقا تما ، بغيتي تمشي نتي سيري .. نتي حرة .. مي سجى لا
قدس: انا دابا بغيت غير نسافر درتي ليا هاد الحالة .. ونقولو كاع طلع هادشي بصح ! تقدر تجي حتى لعندها وترجعها
انصار: وي نقدر نجي عندها مي باش نرجعها لا .. غيخصني موافقتك نتي وغادي نبقا تابعك على الموافقة باش نرجع بنتي للمغرب . ومالنا حنا على هادشي ! راه المغرب تساراي فيه حتى تشبعي علاش بالضبط بغيتي تخرجيها من المغرب وعلاش بالضبط ختاريتي تركيا
قدس: شدات جبهتها كتنهد ) راه كاع هادشي ما منو والو غير وسواس .. انابغيت نمشي لآنطاليا نفوج شوية انا وياها ونجي بحالي
لاللة عيشة : بأسى ) اانا اللي حاسة براسي ... انا اللي كنحلم باك كل ليلة واقيلا بغا يديني
انصار: لا حولة ولا قوة الا بالله العلي العضيم ... استغفري وكتري من الصلاة والاستغفار باش ميبقاوش يجيوك الوساوس بحال هاكا ... هانتي مزياانة ... كن تشوفي فكورية لمرى مسكينة رقيقة فيه شبر وشارفة ومع ذلك كنتلاقاهم كيجريو فالصباح بكري فالشارع .. منين مادزت كنلقاهم كيجريو .. نتي صغر منهم ومزالة يالاه عندك 60 عام بديتي ترشاي.! توكضي الله يهديك راه الحياة كنعيشوها مرة وحدة صافي
تنهدات وقالت : انا من نهار مرضت .. كولشي جا طل عليا ... من غير الخطيبة ديالك جات مرة وحدة طلات عليا هي ومها ومن تما ما عاودات جات ... الناس جاو عندي من فاس وهي كتخسر عليا الو خالتي كي بقيتي ! ماالها اللي ماتجي عندي وتكبر بيا وتشوفني وطل عليا ... مالهم كيحسبو فراسهم زعما وانا مريضة وعارفاني مريضة .. مرة وحدة اللي جات عندي من مور ما طحت بالسكر كنت غنموت وهزوني سبيطار .. حتى دازن 3 ايام عاد جات .. عيالات اخر الزمن مابقا فيهم مايعجب .. ماعرفت منين كطيح على هاد الكنوس الله يخليها ماركة
هبط راسو كيتنهد بابتسامة مخلهيا تقول لي بغات مكيديش عليها و ولا يتجاحد معاها حيت عارف راسو غيخرج بلا نتيجة فمنافسة الحوار .
بقات تهضر وتشكي حتى شبعات وهوا كيسمع ليها ويديخا على قد عقلها .. عيا فيها تمشي معاه للدار لاكن رفضات حيت عارفة راسها مكاينش اللي يجيب ليها حتى كاس ديال الماء وهي بوحدها .. اللهم تبقا عند صلاح بعدا عندة الخدامة وكضل تدي فيها وتجيب . بينما كيتعشا معاهم بدا تيليفون كيصوني
ويعاود .. كان فالطبلة جالس مع العاءلة كيتعشاو ويتجمعو ماصلاحش ليه كاع يجاوب حتى ناض بغا يمشي وتوادع مع مو وخرج وكان تيليفون مزال كيصوني ويعاود وماصلاحش بيه مرة اخرى يهضر وهوا حدى صلاح حتى وصل للدار ودخل عاد جبد تيلي بدا كيتاصل لاكن والو مكاينش رد .. صونا وعاود فاللخر حط تيلي ودخل عيان لبيت النعاس كينصل تيشورط .. مشا دوش وخرج سرح السجادة وبدا يصلي ، عاود التيليفون بدا كيصوني مرة اخرى وهوا كيصلي وخلاه حتى كمل صلاتو وناض هزو جاوب وجلس على الاريكة
انصار: وي جهان سافا؟
جهان : اممم سافا !! كتقولها ليا ببرودة زعما بحال الى مادرتي والو !
جهان : ببرودة) انا مابغيتش نجاوبك وأنا اخر وحدة تسول فيها ياك حتى ساليتي مع كولشي
انصار: هو حاجبو) كفاش حتى ساليتي مع كولشي ؟ مابغاتش تفهم ليا طريقتك فالهضرة ... هاد كولشي راه ما فامي ... فاش وصلت فالمطار عيطت ليك من بعد صافي تشغلت مع العاءلة ! اش هاد الهضرة! ... وكفاش نتي مابغيتيش تجاوبني واش شوية لاباس اجهان؟ كتقولي ليا بوجهك حمر انا مابغيتش نجاوبك !!
جهان : ايوا حيت عصبتيني وانا كنصوني عليك ونتا مكتجاوبش
انصار: قلت ليك فمسج انا مع الواليدة عاطيها وقت و مريضة بزاف كنسول عليها وعلى حالتها شنو بغيتي كتر ... شوفي شوفي انا دابا عيااان مافيا اللي يتعصب وديجا طايرة ليا من جيهت الواليدة مريضة وماعندي خاطر .. باش منوصلوش لشي حاجة ماشي هي هاديك حتى لغدا ونهضرو اوك
قاطعها : قضية الاعصاب هادي مابقيتش كنبغي نسمعها .. وسيختو معاك نتي ديما كنسمع الاعصاب ومعصبة وعصبتيني وغتعصبني .. يعني الهضرة كاملة معصبة .. الوغ بلا منزيدو نتناقشو حيت انا على سبة .. يالاه بون وي
جهان: اوك اسيدي .. بون نوي
قطعات عليه قبل ميقطع عليها دايرة فيها عزة نفسي .. وحتى هوا ماتسوقش ولاح تيليفون وناض .. يالاه بغا يمشي للبيت وهوا يرجع هزو وتم غادي جيها بيت النعاس كيقلب فالانتسا ومشا نيشان لحساب قدس دخل يشوف الجديد
مع تكا على الناموسية طلعو ليه تصاروها وحدة مور وحدة وهي عايشة الحياة ضاربة الدنيا بركلة وكتبروزنزا مع راسها ورجليها كيبريو ، مصورة فالمااء كتشرب العصير ومصورة فوق الرولاكس كتبرونزا ومصورة رجليها بوحدهم فيهم صباغة ليمونية مشعشة ومصورة اللومبر اللي داهنة . ومصورة حتى من شرفة الاوتيل وهي ضاحكة والمنضر موراها باين خلاب . حاطة صور ليها فسهرة جالسة مكريبية شعرها الاسود ولا بسة دجين مزير وبودي مشبك مايل من الكتف ولحمها مبرونزي كيبري وحمر ووجهها كذلك دايرة مكياج خفيف برونز كيبري وشادة كاس ديال العصير فيدها ودايرة ابتسامة كتبوزا جالسة على كرسي طويل .. نص جالس نص واقف وصندالة عالية قدها قداش ودجين قصير ، باينة من ملامحها متحمسة وفرحانة عاجبها الحال وكتصور وتلوح ، دخل انصار للتعاليق كيقرا من بعد ماشاف التصاور ولقا كلشي كيقول ليها بصحة وشي رجال عمرو شافهم عندها حتى هما دايرين ليها القلوب وكيمدحوها فالتصاور وهي كترد عليهم وتشكرهم ... فالبلاصة دارت لايف فالانستا ودخل يشوف لقاها محيحة كتصور راقصات فالسهرة كيشطحو وينقزو والموسيقى مجهدة وصوتها كيتسمع وهي كتهضر وضحك مع شي حد حداها .. دورات الكاميرة جيهتها وبدات تلعب براسها وتمايل برقة وتحرك كتفها ومرة مرة تشوف قدامها وضحك مع شي واحد وترجع تشوف فالكاميرة .. بقا كيتفرج طول المدة اللي دايرة فيها اللايف حتى دارت بيزو فالهواء وقالت بونوي وقطعاتو .. حط تيليفون ويالاه جا يتكا وصلو مسج من عند جهان مكتوب عليه " بب نعستي ؟ توحشتك "
دار راسو مشاف والو ولاح تيليفون للجنب خلا المساجات كيوصلو واحد مور لاخر بلا ميتلفت جيهتو وغمض عينيه عاقد دوك الحواحب
الصباح مع حل عينو جر تيليفون دخل نيشان انستاغرام وهوا مزال ففراشو ناعس على كرشو وتحت يديه وجهه مخدة .. مع الدخلة لقا تصاور البحر وهي متكية فوق الفوطة دايرة نضاضر لابسة كاش ازرق فيه كويرات من الجناب فالالوان ودايرة كلوس غوز وابتسامة كيوت ، بقا متردد شوية وهوا يدير ليها لايك ودوز التصاور شافها مصورة المنضر والبحر ويديها فالسما بالدفار فالليموني بارد ومصورة رجليها تا هما وصاكها دالبحر .. المهم حاطة بعض التفاصيل على حسابها شافهم كاملين وناض حط تيليفون ومشا دوش ولبس حوايجو ناوي يشد الطريق لفاس باش يشوف بنتو حبيبتو اللي توحشها وكان كيتسنا النهار فوقاش يطلع باش يمشي عندها يشوف تفاصيلها حتى هي وشنو تزاد فيها وشنو تنقص لأن الكاميرة مكتشبعش بحال مباشرة ، تاصل بلاللة نزهة علمها وداز خدا نونوس باندا كبير ابيض وكحل جميل كيغني وينطق حتى الاسماء ... برمجو انصار على اسم سجى عند مو المحل وغلفو وخشاه فكارطونة كبيرة ومشا شد طريقو الصباح لفاس
وصل بفاس وتاصل بلاللة نزهة على قبل سجى ، قصد الدار وبقا لتحت حتى هبطاتها ليه هازاها على مزويناتها ملبساها كسيوة وسبيبيط و جامعة ليها شعرها بالمقابط ونقية كتبري وفيها ريحة زوينة ... شافعا انصار خارجة مع باب الدار وهوا ينزل بابتسامة مد يدو سلم عليها باليد وهز سجى فالسما وهي كتغوت بالفرحة وهبطها على وجهو كيبوس فيها ويعنق ويعضر ويضحك ..
وقف الطموبيل حدا بابا واحد النادي ترفيهي كبير ونزل خرجها من الطموبيل كيبوسها ويعضها ... حطاها فالارض وهيا كتلسق ليه فسروالو وفتح الكوفر خرج ديك الكارطونة وبدا يفتح ليها شوية بشوية .. خرج نونوس وهي دير يدها على فمها مصدومة وقالت
- نادا !!!!
ضحك وقال : باندا ههه وكتقول سجى
سجى: انا !
انصار: نتي وشكون من غيرك .. سمعي
برك ليها فراس نونوس وهوا ينطق بسميتها ... تلاحت عليه عنقاتو (نونوس) وانصار هازو ليها من الارض ، فرحات بيه وبدات تلمس فيه وتحط عليه راسها حتى شبعات فالاخير رجعو انصار لبلاصتو وخشاه فلكوفر وهزها
- يالاه عطي بيزو لباباك
شدات ليه وجهه كامل باستو وهوا فرحان
انصار: غنخليه ليك هنا حتى نرجعو ليه صافي... دابا نمشي نديك تلعبي شوية
حطها فالارض باغي يشوفها كتمشا وتلعب قدامو ومشا موراها حاضيها .. دخلات للنادي وهوا موراها حاضيها و مكاينش اللي كيدوز حداها وميهبطتش عندها يبوسها وحتى هي كتبدا تمشي ليه عند لبنات عاطية شنايفها وتبغي تبوس .. شوية لسقات ليه على واحد الولد صغير قدها ومشات عندو نيشان باستو فحنكو وهوا يعنقها الولد .. بدا انصار وبابات داك الولد كيضحكو ويهضرو على الموقف وفاش بغا انصار يجرها من يدها قالت ليه " لا " ولسقات فالولد لسقة
جرها بخاطرها بلا عنف كيدير ليها فالخاطر وهزها عندو كيلهيها .. داها كتلعب وهوا واقف عليها عساس وحاضيها وكيصورها ويخبي عندو الصور .. جلس كيتغدا وهي حداه جالسة متبتة مامحناتو ما عدباتو ماقهراتو مادارت ليه بسالة .. تعجب فيها وتعجب فولاد الناس اللي منوضين الروينة لواليدهم وكل شوية ينوض واحد كيبكي فجهة ويغوت الا سجى بوحدها اللي جالسة مأدبة .. لاحظ انصار تصرفاتها وجلس كيدقق فيها مزيان بلخصوص فاش قطرات على حوايجها وهي تحط الرضاعة وجرات منديل بدات تديه وتجيبو كتمسح راسها وطيحاتو فالارض وبقات تشوف فيه من لفوق ... خلاها وشافها فاش ردات الرضاعة لفمها وعاودات حطاتها ونزلات مقاتلة بوحدها هزات المنديل من الارض ومداتو لانصار كتقول ليه هاك طاح من بعد رجعات بلاصتها وشدات رضاعتها وكل شوية طل على جنابها وتشوف حوايجها وفين ما يتخيل ليها انها طاحت عليها شي حاجة كتبدا تقلب حوايجها والرضاعة فيدها وترجع تكمل ماكلتها .. ماحيدتش انصار عينو عليها وبدا اعجابو بيها وفرح بزاف مللي شافها كدير هاكاك ، باسها على خدها بابتسامة وعلق ليها المنديل على عنقها وخلاها جالسة كتمنضر فالناس وترضغ .
تاصل بقدس وعاود الاتصال لاكن مكتجاوبش .. دخلو الفضول ودخل لحسابها على الانستغرام مالقاش الجديد ... عاود الاتصال من بعد بعت ليها مسج باللي غياخد سجى معاه شي يامات وحط تيليفون . ماتعطلشو فالنادي بزاف ..خرج هازها كيلعب ليها فوجهها ويبوسها وقال
- غادي نديك لواحد البلاصة تمشي معايا؟
حركات راسها وعنقاتو .. باس يدها وردها للور للطموبيل جلسها الوسط ودار ليها الرسوم ديال فالشاشة ديال السيارة وخلاها كتفرج وتعاود الهضرة مع الرسوم بوحدها وتجمع معايهم وتغني معاهم وتسفق معاهم .. خرج على فاس مشا لفيرمة كبيرة ونزل هزها معاه ودخل سلم على الفلاح وبدا كيضحك معاه
حركات راسها وهي مافاهماش علاش كيهضرو اصلا .. بدا كيضحك في حين خرج الفلاح الحولي المخيير لانصار وعزلو بوحدو وخرج عتروس صحيح حتى هوا دارو ليه مع الحولي .. وقف انصار صورهم وخلصهم كما موالف كيدير .. كيشري لمو ويشري لقدس وسجى ويسيفطو ليهم حتى للدار .. دفع تمنهم وخرج بحالو كيهضر مع سجى .. رجع للدار عطاها للاللة نزهة تبدل ليها ليكوش وهبطاتها ليه هي والشانطة ديالها وقالت
- راه هضرت مع قدس علمتها .. غير رد ليها البال... وماتعطيهاش كولشي تاكل ... الى كانت شي حاجة عيط ليا فتيليفون ... اجي بنتي نبوسك الله يرضي عليك ... غتمشي مع باباك صافي ههه
حركات سجى راسها بالايجاب وقالت
- اه
لاللة نزهة : هههه يالاه سيري
هزها دارها فالسيارة وتوادع مع لاللة نزهة وشد طريق لكازا
وصل لباب العمارة ونزل نزلها معاه وقفات على رجليها وهوا كيضحك ويهضر معاها فرحان
انصار: كاين باباك واحد هوا انا انصار ... شكون باباك الوحيد ابنتي
سجى: بابا ساسار
باسها فخدها وجبد ليها نونوس خلاها ملهية معاه وجالسة وسط منو وناض كيبخ الدم وكارز على سنانو هز تيليفون ومشا كيغزز سنانو وهوا كيصوني عليها ويعاود .. دخل لبيت النعاس ومع التفتح الخط قال بغضب
- سمعي غنقولك جوج كلمات دخليهم راسك مزيااان ... بنتي عندها باها واحد هوا انا كتفهمي ومنعاودش نسمعها كتقول لشي واحد اخر بابا ..
قالت بدهشة: شنو كتخربق بلاتي غير بشوية نفهم
انصار: بغضب : راك فااااهمة مزيااان ... اهرومرة نسمع بنتي كتقول لشي واحد بابا سمعتي ... هل ودني منك اقدس خليني مزيان معاك راه كتقلبي عليا ... راني مانصلاحش ليك ... هانا كنعلمك ... مرة اخرى نسمعها قالت لشي واحد بابا منعقلش عليك ... بنتي خليها بعيدة باااها واااحد اللي كاين هوا انا طيري ولا نزلي
قدس : واش حماقيتي ؟!!! واش كتهضر بصح ولا كتقلب على السبة ؟
قال بصوت صاعر: عاااارفاني علاش كنهضر بلا مادوخي علياااا سمعتي .. صحابك يبقاو بعاد على بنتي نحصلك كتلاقيها بشي حمااار ولا كتقول لشي واحد بابا نكحل ليك حياتك سيري دابا الله يعاونك
قطع عليها ورجع عند سجى ، شوية بدا تيليفون كيصوني .. طل لقا جهان ورجع حطو بلاصتو وكمل الحوار ديالو مع سجى .. بقا تيليفون كيصوني حتى عيا وهوا كيسمعو ومخليه .. هزات سجى عينها فيه وشارت بصبعها قاءلة
- لا مابغاش يتزوج .. النهار الاول قالي ميخصك معايا حتى خير ولاكن الزواج لا ... قلت ليه صافي اللهم العمش ولا عما ... مبرعني بعدا ... شوفي حتا شي واحد يهزك نتي وبنتك ماكلي على حالتك
قدس: لالا حرام ... منقدرش ... انا كيصرف على بنتو الصراحة وحتى فلعيد لكبير اللي فات جاب لينا حولي كبير وسيفط ليها النفقة فلكونط ديالي زايدة على اللي مولف يسيفط وكل مرة كيعيط يسول فينا ، ماشي ناسي بنتو فخطرة
- وهوا مزوج ؟
قدس: اه مزوج
- ايوا تسناي يدير ولادو وشوفي واش باقي يوصلك شي حولي ولا معزة
خرج انصار مع سجى ومعاهم حتى جهان يتقدا الخضرة وكل ما سيفطات ليه قدس .
كيدور فمرجان مجلس سجى لقدام فشاريو وجهان شادة فيه عاجبها الحال ... بقاو كيدورو ويتقداو حتى بدات سجى كتمايل براسها وهوا يهزها عندو دار ليها راسها على كتفو نعسات . تمو خارجين مرجان وقال انصار
- مشا عليك الحال مغاتمشيش للدار ؟
جهان : لا غندوز معاكم هاد الليلة
سكت ماقال والو . حط سجى للور ناعسة فبلاصتها وركبات حداه جهان عايشة اللحضة عاجبها الحال .
رجعو للدار و حط سجى فوق الناموسية وخلاها ناعسة ومشا للكوزينة بدا كيصايب ليها ماتاكل ويدوق وينقل من الوصفات
طيب ليها خضرة مشكلة مسوسة كما قالت ليه قدس وجات جهان بغات دردر عليها الملحة ووقفها
- لا بلاش كتاكلها مسوسة
جهان: !!!! اويلي وعلاش؟ ومال هاد لحليب حتى هوا مسوس! واش مكتاكل لا سكر لا ملحة !
انصار: لا مكتاكلهمش... خلي داكشي كما هوا عنداك تزيدي شي حاجة عليه .. صافي خليه هاكاك حتى تفيق
جهان: اممم باينة عزيزة عليك سجى
ابتاسم وقال: بيان سيغ ... راه بنتي
جهان : هي حتى ولادي انا غيكونو عزاز عليك
قال ببرودة كيبرد الحليب : وا حتى تولدي بعدا ويكون خير .. شووو!!! بلاتي
قطعو الحس وهوا يسمع صوت سجى كتبكي بصوت خافت وتقول
- مما مما ماما
حط القرعة بالزربة تا كان غيطيحها ومشا كيجري عندها لقاها جالسة شادة واحد نونوس كتخصص ويدعا على عينها كتعيط وتبكي بوحدها .. تلاح عليها عنقها وهزها كيسكتها وداها للكوزينة وجهها حمر بالنعاس وحناكها مطبزين سخونة .. بدات دور راسها وتعيط
قطعات عليه وبدات تصوني فيدو .. حط تيلي وحل الباب بالجهد ومشا لجهان نيشان كارو على سنانو ... حيد ليها الموس باش كتقطع الربيع من يدها و طلق ليها الماء وهي مافاهمة والو وقال
لالة عيشة الجزء 11
محتوى القصة
التنقل بين الأجزاء