ناض طالع ليه الدم مشا نيشان للبيت سد عليه خلاها جالسة كتشوف حابسة الدمعة فعينها ... غير غبر وهي تعطيها للبكى بوحدها ونحيط بحال الى مات ليها شي حد ... بردات قلبها فلبكا وناضت سمحات فالطبلة كما هي وتبعاتو للبيت كتبكي خلعاتو كان ناعس عاطي وجهه لباب البالكون حتى دخلات عليه بالجهد كتبكي خلعاتو وطلعات فوق الناموسية عنقاتو وجلسات دمع .. عنقها مستغرب وبدا يطبطب ليها على ضهرها وقال
- علاش احبيبة كتعصبيني ؟ علاش كنكونو مزيانين حتى كتقلبي لينا لمورال ... ماشي اول مرة ديريها ... درتيها لبارح فالطموبيل وانا سايق ومابغيتش نهضر معاك ... وليوم عاودتيها شخال من مرا
قالت كتبكي خاشية راسها فيه : غير كنضحك ااااااعىء ااهىء اهىء
مريامة : لاالا الف درهم ماشي شي حاجة ... انا كنخدم ل 2000درهم
قدس : فين خدمتي ب 2000درهم
مريامة: خدمت في فيلة ب 2000درهم وكنت ساكنة معاهم وبيخير مكنخلص لا كرا لا والو
قدس : انا قلت ليك الثمن ... عجبك مرحبا ماعجبكش مغاديش نبزز عليك ... انا عندي اباختومون ماشي فيلا فيها جوج طبقات... طبقة وحدة وكل حاجة بلاصتها .. ولافيسيل كاينة ... دونك شنو اللي غديري نتي؟ ماعندكش شي حاجة فيها لعداب ... جميع الدار راه باين ... نبغي نشوف الغبرة ممسوحة .. الارض نقية ... التلاحة منضمة ... وكلشي نقي ماشي روينة وحنا اصلا مافيناش الروينة
مريامة : غير لكرا راه بكتر... انا غنخدم عندك نهار اه ونهار لا .. وداك النهار اللي مغانجيش فيه غنبداها مع شي واحد اخر يختالف معاك فالتوقيت و واخا هاكاك مغاديش يتجمعو ليا فلوس لكرا
قدس : غنزيد 100 ... مي فاش نحتاجك شي نهار اللي متكونيش فيه ولا نكون عيانة ولا عندي ضيافة تجي
مريامة : واخا يكون خير
قدس : غير هوا نبغي لمعقول ... الانضباط الله يخليك اوك
مريامة ان شاء الله ... فوقاش نبدا
قدس : غدا مع ستة دلعشا اجي وجيبي ليا فوطو كوبي ديال لاكارط ديالك ... غدا غنوريك كل حاجة كفاش دايرة هنا باش تكوني على بال ... ابخي دوما عاد تبداي لخدمة فالصباح اوك .
مريامة : اذا حتى للسبت عاد غنبدا
قدس: فوااالا السبت ان شاء الله
مريامة : اواخا .. غادي نمشي حتى لغدا ونرجع
ناضو خرجو وسدات قدس باب دارها ، وهما نازلين فلاسانسور قالت فام دميناح لمريامة
- قلتي ليا ساكنة غير هنا
مريامة : قبت ليها هاكاك باش تخلصني مزيان ... ساعة والو زادت 100 درهم وقالت ليك فاش نحتاجك نعيط ليك ... مجااابدة هادي باينة فيها
فام دميناج : راه شاافة فلخدمة هاديك عارفة كي تعامل مع لخدامين ولاباس عليها راه عندها واحد الطموبيل حمرا كتعيط بلعداو وراجلها عندو واد رانح كحلة كضوي بالليل وبالنهار
انصار : انا غير قلت ليك وصافي .. عنداك تعداي على شي واحد ...1000 درهم دابا ماتقضي ليها والو
قدس : صافي يكون خير... انا غير حيت قالو ليا فلخدمة شحال نعطي وصافي
رجعات قدس لروتينها اليومي بعد الخدمة ... لاكن بدات كتعكز و حتى الطياب مابقاتش كطيب كما اللول ... حدها كدير شلاضة ولا شي حاجة ناشفة وتمشي تنعس ، لاكن انصار بدا يشكي ويبكي ويرغب عليها كيطلب الشهيوات اللي طمعاتو بيهم النهار الاول وحلات ليه عينيه ومن بعد هزات كولشي خلاتو كيرمش وكملات ليه بالعضان كل مرة تعطيه وحدة حر من اللي قبل منها حتى كيصعر وترجع ترغب فيه وضحك
رجعات من لخدمة لقات مريامة واقفة فلباب . سلمات بيدها وطلعاتخا معاها للدار . انصار دخل للبيت وبقات قدس كتوري لمريامة كل ركن فالبيت
قدس : هادي لاكويزين ... ها لافيسيل ... هاكا كتخدم ... ولاماشين الافي هاكا كتخدم ... هاد المجورة كل واحد شنو فيه وكل حاجة معزولة بوحدها
مريامة : واخا
بدات قدس كدور وتوريها كلشي من المطبخ للحمام للصالونات للبالكونات حتى فهماتها مزيان شنو كتبغي شنو مكتبغيش وكل حاجة كفاش كتبغيها على حقها وطريقها وختمات فالاخير وقالت
- الى درتي خدمتك مزيان .. غادي نضوبل ليك صالير .... هانتي شفتي كلشي ... ستيلو مكنبغيهش يتحط فوق شي طبلة ... ولا شي حاجة بلاصتها معروفة ونلقاها محطوطة فبلاصة اخرى ... وكاتي خليها دير لي بغات ... هي عارفة بلاصتها ... خليها غير تاكل ماتعطيها والو ... طاستها فيها الماء راه معروفة وطاس ديال كروكيت راه ديما عامر... ماتزيديها حتى حاجة حيت تقدر ضرها ولا تمرضها .. ومكتاكلش اي حاجة وماشي بحالها بحال لقطوط كاملين .. هادي عندي ماكلتها خاصة بوحدها و مولفة دير لي بغات ومغاديش ديرونجيك اصلا
هز حاجبو فيها معبس وعطاها علبة مربعة وصاك غوز ديال الهدايا تقيل مافهمات فيه والو . حلات لعلبة وهي تخرج عينيها مصدومة .. يالاه بغات تهز راسها وهوا يبوسها فحنكها كيضحك
حلات عينيها فدهشة كتشوف فلعلبة ويدها على فمها حتى بدات تنخص وتبكي مبلوكية وهوا كيعنقها ويبوس فحنكها كيضحك .. متوقعاتش يفاجأها و يجي حتى لعندها بحلوى فالشيبي كاملة فيها سكاتة الوسط فلغوز حقيقية .. كانت كتسنا تشوف ردة فعله لاكن طلعات اكثر مللي كانت كتوقعها .. عنقاتو بقوة كتبكي بالفرحة وقالت
- كنت مخلوعة حساب ليا جاي ناوي على خزيت ... ميغسي بوكو
لاللة عيشة : انا الجنة !!! ياك اولدي يا انصار ... حتى ساق كوولشي لخبار... ومعيطى ليا مها كضحك فرحااانة هي للي قالتها ليا .. حتى عيطتي لنسابك وانا ؟ وانا ؟ شكووون؟ شكون انا ؟ انا والو نسابك دابا هما اللي ولدوك ماشي انا ايوا سير عند نسابك مانتا ولدي ما انا مك
قطعات عليه خلاتو كيشوف .. بدا يصوني ويعاود تا بدون جدوى وقرر فالاخير يتاصل بقدس ويخبرها بانه غادي يشوف مو اللي جالسة عند خوه ... بعدما خبرها شد طريقو مباشرة لدار ربيع خوه بدون موعد ، استقبلاتو نجية مفاجاة لالخضور بالحضور ديالو وبدات تفتف فبلاصتها لأنه حسب ما وقع اخر مرة من صدع في فاس .. قالت موحال يعتب دارهم ولا يهضر معاها ، بجدية وبلا ملاغة طلب يشوف مو اللي جالسة عندهم بلا ميدخل لداخل .. لاكن نحية استغلات الفرصة الذهبية اللي جات حتى لليت يديها باش ترجع المياه لمجاريها وتكسب محبتو من جديد ... ضحكات ليه كأن شيء لم يكن واصرت عليه باش يدخل بدارها وبللي دارها مفتوحة فوجهو داءما وابدا د ، حشم من إلحاحها ودخل لقا لاللة عيشة امه جالسة قدام التلفازة مربعة يديها ، مشات نحية تجري للكوزينة توجد للضيف اللي عندها اما لاللة عيشة قلبات وجهها قلبة حدة ومابغاتش دور جيهتو ... جلس بجنبها مكسور من ردة الفعل ديالها ماخلات ليه حتى طريقة يتعرف يتعامل معاها بيها .. واش يقصح ويخرج اعصابو اللي جامع ولا يدير لخاطر فكما كان الحال كتبقى امه والرسول صلى الله عليه وسلم وصى على الام ثلاتة مرات ، تنهد بعمق ماعرفش باش يبدا وشنو يقول وهوا فدار ماشي دارو والاذان صاغية وهوا اللي كان من دينا كيكره يسقو ليه الناس لخبار لمشاكلو ويطالعو على شنو كيوقع بينو وبين اهله حتى ولو كان داك الشخص نيت من اهله لاكن بعيد على الموضوع ولا يعينه شيءا وبالاخص من مور المشكل لكبير اللي وقع بينو وبين قدس وتنشر وسط العاءلة كاملة
قالت بلا مبالات : مانهضر معاك ما تهضر معايا ... سير عند نسابك
حس براسو بدا سخن و مارضاش و قال بصرامة : نوضي معايا ماتضحكيش فيا الناس ... غنهضر معاك على برا ... جيت حتى لهنا عندك ماشي باش تمرمديني قدام شي واحد وتجبدي ليا النساب ولا منعرف شنو ... راه الولد صغير وميبغيش مو دور فيه قدام نابخوطكوا علاش عزيز عليك تشوهينا و تجبدي فضايحنا قدام اي واحد وطيحي بينا للأرض وديري فينا الضحك ؟ علاش ؟ راه كبرنااااا اامي كبرناااا مابقيناش صغار... نوضي دابا ننهضرو على برا ولا فشي بلاصة بلا ماديري ليا هنا شوهة
بدات قدس تستوعب سبب غضبه من الكلام المخربق اللي كيخرج من فمو وهوا معصب وشوفاتو الاخيرة كتهديد على انه بغا يدير شي حاجة ولا يقول شي حاجة .. خافت تسمع شي هضرة ولا يدير فيها يدو ويكبر المشكل وهربات للبيت ديال لبيبي سدات عليها خلاتو مخرج عينيه كيهضر بوحدو وسدات ونديها باش متسمعش شي كلمة تأثر عليها فلحضة غضب وهوس عارفاه معصب معارفش اش كيقول ... من الاحسن تسد ودنيها ماتسمعش وخلاتو كيقول للي بغا .
طولات قدس الجلسة فداك البيت ... خافت تخرج عندو وينوض ليها تاني ، فضلات تجلس وتخلي السحابة حتى تفوت باش مينوضش شي مشكل بينو وبينها وهي مقادرة على صدع معاه . حسات بالجو هدا والحركة حبسات وخرجات كطل بتردد ... مشات للكوزينة سالتة هزات عشاها وقرعة دالماء ورجعات لبيت النعاس كتسلت طلات مابانش ليها حسو ماعرفاتوش فين هوا ودخلات سدات عليها وجلسات بوديناتها باردين .. ماسمعات كلام كطرطق مرارتها ولا هضرة تبقا كتحفر فيها وطلع وتنزل وتبيتها الليل كامل كتبكي. تعشات وتخشات فالفراش كتسنى يدق عليها ... ضربات الوحدة دلليل والو .. جوج ... قالت يمكن خرج ولا داه نعاس فوق شي فوطوي ، جاها لفضول تعرف شنو كيدير وخرجات كتسلت كتشوف الضوء ديال الكبس الخافت كااع باقي مضوي ومشات طلات لقاتو ساجد كيصلي .. تلفتات بان ليها القرآن محلول فالجنب ... خلاتو كما هوا ورجعات بلاصتها تنعس .. ضرباتها الفيقة للطواليط مع الربعة وناضت جلسات كتشوف بلاصتو خاوية حداها .. بالرغم انها خلات ليه الباب محلول لاكن بلاصتو خاوية... ناضت للطواليط وخرجات بالبانطوفة كتسلت ..قبل متوصل للصالون سمعات صوتو كيقرا القرآن بتجويد وبصوت خافت .. طلات بشوبة بان ليها جالس فالارض بسروال كري وتيشورط كحلة مربع رجليه ومخشع كيقرا والسجادة مطلوقة قدامو .. رجعات ادراجها لبيتها نعسات لاكن عقلها بقا معلق معاه كل شوية ضربها الفيقة وتنوض تطل عليه .. مرة تسمعو كيجود مرة كيصلي وحتى لعشا للي طيبات بقا كما هوا ماكلاش منو وكترجع لبلاصتها تنعس حتى صبح الحال وضرباتها الفيقة مع 8 دالصباح .. تلفتات لقاتو ناعس حداها على كرشو ويدو تحد المخدة ... باستو فراسو بشوية خايفة تحصل ورجعات تكمل نعاسها
صبح الحال ومشا انصار للخدمة وبقات قدس ناعسة .. جات مريامة وبدات خدمتها حتى فاقت قدس على خاطرها وبقات بلاصتها
جالسة ، اول ما دارت هزات تيليفونها تاصلات بماملها هي اللولة..
قدس: ماديري فراسك والو صافي ... يالاه اماما نخليك وغير تهناي مكاين حتى مشكل... هي طبعها هاكاك بلا متصدعي راسك
الام: الله يرضي عليك ابنتي ... تهلاي فراسك وماديريش مجهود باش ماتوقع ليك حتى حاجة
قدس: كوني هانية ..يالاه بيزو
قطعات وناضت لبسات بينوار سخون فوق البيجامة الدافية اللي نعسات فيها وخرجات بقات مريامة كتشقى ... ابتاسمات قدس وقالت
- بونجوغ
مريامة : صباح النور امدام .... نوجد ليك شي حاجة؟
قدس : نة سيبا كغاف انا نوجد راسي
دخلات للكوزينة دارت لما يغلي ووجدات بلاطو ديال لفطور .. تلفتات عند مريامة وقالت
- كفاش كيصايبو املو؟
مريامة : كل واحد شنو كيدير فيه ... كاين اللي كيدير فيه اللوز .. كلين اللي كيدير فيه كاوكاو ... لعسل واللوز مطحون وزيت اركان ... كل واحد شنو كيدير فيه ... شريه طالع حسن ليك
مريامة : موجودين الشلوح ... بغيتيها بعد غدا نجيبها ليك
قدس: واخا جيبيها ليا بشحال ما جبتيها نخلصها ... بغيت نبعد على هادشي ...بفيت شي حاجة طبيعية ... ماكرهتش حتى زيت لعود الى كتعرفي شي واحد يجيبها
مريامة : صافي .. شحال بغيتي؟
قدس: جيبي قرعة ... الا كانت مزيانة نزيدو منها
مريامة: صافي بعد غدا نجيبها ليك حرة
قدس: ان شاء الله
هزات البلاطو ديالها داتو للصالون وجلسات فطرات على خاطرها ومرسامة فلكوزينة دايرة كي الجراد ... خاصها دوق من كولشي ... طلبات منها قدس تصايب ليها شي حاجة بلحليب صحية ووجدات ليها دشيشية بلحليب شربات منها جوج زلافات فلغدا وضربات مريامة اللي بقا فالطنجرة كامل ... دارت بيهم الصوبة للعشا خلاتها فلكوكوت وزادت عليها قدس فواكه البحر مشحرين لاحتهم فيها مع مقبلات علمات مريامة كفاش تصايبهم ووجداتهم ودخلات معاها لبيت النعاس بقات قدس واقفة حداها حتى خملاتو ورداتو وسلات شغلها وضربات واحد الطاسة ديال الصوبة مع البيض مسلوق وزادت خلفة مشات بحالها فرحانة
ومرتاحة فلخدمة مكاينش اللي يتحاسب معاها على شنو كلات ولا شربات ولا يبقا يحسب ليها لحكاك ديال دانون واش نقصو ولا زادو وحتى مولات الدار مافيهاش النكير والدار باينة هي وركانيها دغيا كتجمع وتبان .. ماعندهاش تمارة اللي ضرب ولا البز اللي يرون ليها ولا مالين الدار يجبدو ليها لكواش والزرابي .. حتى من كاشة وحدة طلبات منها قدس تهبطها ليها للمصبانة ورفضات مريامة .. دخلاتها للطواليط وشتفات عليها شتيف وطلعاتها للسطح ومشات بحالها
وصل الوقت اللي موالف انصار كيجي فيه من الخدمة ووجدات قدس كاسكروط ليه ووجدات راسها باش تبان نقية وزوينة حتى الى غضبات تجي معاها الغضبة .. دخل للدار وكانت هي ماتكية فوق الفوطوي كتسنط لعضامها وتفرج فتلفازة لايحة عليها غطا ومكمشة .. لاح السلام وردات عليه وهي عينيها فتلفازة مشافتش فيه ... دخل نيشان لبيت النعاس بدل حوايجو وخرج عندها جلس لقا كلشي محطوط فوق الطبلة مغطي والحليب قتيرموس... خلاه وناض طحن الشوفان جابو وجلس كير كاسكروط بلا ميهضر وهي حداه كتفرج فتلفازة ... تلفت عندها وقال
-سافا ؟ واش مريضة؟
مارداتش عليه كأنها ماسمعاتوش وحتى هوا معاودش سولها ... كمل كاسو وهز داكشي للكوزينة ولاح عليه جاكيط ولبس سبرديلة وهز سوارتو ناوي يخرج وقل للباب وقال
- انا خارج نتلاقا بصلاح عيط ليا
مارداتش عليه ومشافتش فيه .. خرج وسد موراه الباب ومشا طلع فطموبيلتو نيشان للرونديفو فلقهوى لقا صلاح جالس كيتسناه ... سلم وجلس وسبق صلاح الهضرة بارك ليه هوا الاول عاد فتح معاه الموضوع ديال مو وخبره باللي ربيع اللي حكا ليه كولشي وطبعا مو للي عاودات ليه ... ماعجبوش صلاح داكشي اللي وقع وخلاه انصار حتى كمل هضرتو مابقا ليه مايقول عاد رد عليه
انصار: مكانش خاصني نتعصب ... ومكانش خاصني نخرج ديك الهضرة ... ومكانش خاصني ندير مع مي هاكاك ... ولاكن هادشي كامل اللي وقع ..فوق طاقتي وراني مامرتاحش الى كان كيحساب ليك مرتاح ... راه مرضت اصاحبي كون غير وقع هادشي مع شي واحد اخر وميوقعش مع مي ... بلا متزيد عليا حتى نتا اللي فيا كافيني وخاصني معامن
صلاح : بهدوء ) حنا دابا غير كنهضرو ... وغير كنتناقشو انا مكنعاتبعكش ... عارفك غادي تمرض فنفسيتك ومغاديش يديك النعاس ... وعارفها هي خرجاتك على طوعك حتى مابقيتيش كتشوف .. الشيطان كيحضرالله ينعلو ويخزيه والمشكل ناض على والو
انصار: ااشمن على والو ... راه كن بغيت نكبرها غتكبر ... المشكل جاي من مامات قدس عيطات ليها قالتها ليها ولا منعرف شنو دار بيناتهم ... انا كنعرف ماماها مغاديش تكون دارتها بلعاني حيت شفتها كفاش كتهضر ... وانا ااصلا كن سايق فالطريق وكنكول غير نوصل للباب نعيط ليها حيت عارفها غتشدني بلهضرة وانا فالطريق ... قدس سبقات هزات تيلي عيطات على مها
قالتها ليها ... شنو نقول ليها لااا حبسي حتى نعيط اانا لمي ونقولها ليها عاد عيطي نتي !!! ااش هاد التخربيق ولخوا لخاوي .. كنت سايق وهي جالسة كفاش بغيتني ندير ومطاحش ليا كاع فبالي غيوقع هاكا ... والله اصاحبي الى تلف ليا الري ... كنكون مزيان حتى كنلقا راسي فمشكل لاااعلااااقة ومعندو حتى معنى وسوقو خاااوي .. كيرجع من سبب تافه لمشكل يمرضني انا .. ونتوما .. وهي ... وهضرت معاها قلت ليها خلي مشاكيلنا التافهة بيناتنا مضحكيش فيا الناس
صلاح : دابا صافي راه مك هاديك ماعندك عليها لاين ... وراه مساخطاش عليك .. عيطات ليا كتجري قالت ليا سير عندو .. من لبارح وهي كتعيط ليا وانا كنعيط ليك تيليفونك طافي... لاحولة ولا قوة الا بالله ... هانا دابا سديت لاكابين قبل الوقت وجيت ! ومن الاحسن ماتعيطش لنسابك ولا تهضر معاهم على هادشي
ضحك انصار بسخرية وقال : اش غنقول ليهم ؟ واش هادشي كيهضرو عليه الناس ... كن غير يخرجوني من هاد المشاكل ديالهم يتقاتلو بيناتهم ميدخلونيش فهاد التخربيق ومايشكيوش عليا .... غيسون تخيفيال كي كوز دي بخوبليم ! ... خفت نرجع نطلب منها السماحة وماتبغيهش .
صلاح : راه مك ... وراااه مك ااااهاد الولد راه مك .... واخا دير فيك اللي دارت كتبقا مك .. واش كتعرف شنو معنى الام ولالا .... ها باك مات ... مكتقولش كون غير يرجع واخا يدير فيا اللي دار منهزش راسي فيه ! شحال من واحد مشات ليه مو وكيقول كن بقات كن دار ليها وفعل وترك ... حيت الام مكتعوضش ... تعوض المرى ... يتعوضو الدراري ... يتعوضو لفلوس ... يتعوضو الديور ... ولاكن الواليدين مكيتعوضوش ا انصار ... ونتا زعما كتعرف بيننك وبين اللي خلقك وبفضلو وفضل رضات الواليدين وصلتي لهادشي كامل ... متاقي الله وكتخدم عقلك زعما .. جيتي حتى لهادي ودرتي فيها عقلك ! نوض الله يرضي عليك ... نوض راه ديتها عندي للدار وجالسة مقابلة مع الباب من الصباح وهي حاضياه ... واش قليل اللي داز عليا انا عتمان ... فين يباااان هادشي اللي كدوز منو دابا ... حنا مسحات بينا الارض ما مرة ماجوج علنا وبقينا ساكتين ... اش عندك مادير ... غترد عليها طيح ليك بالسكر وتندم ديك الساعة .. اللهم نسكتو راه منا ماعندنا مانديرو ليها ... هي هاكاك من نهار حلينا عليها عينينا ... الله غالب مافجهدنا مانديرو غير نصبرو راه كما كان الحال حسن من شحال من ام ... نصبرو ليها فكولشي الا طاعة الله .. هاديك اللي لواحد كيسمح فواليديه ويتبع دين باش كيآمرنا الله عز وجل . اما شي حاجة اخرى من غير هادي ماعندك علاش تعصا واليديك .. مك كبرات غادي تصبر ليها كما صبرات ليك فاش كنتي صغير كضربها ومكتديش عليك وتقول ولدي صغير ... ودابا كبرات لعالم الله باش كتحس .. واللي داز عليا انا مزال ماوصلتي ليه نتا .. انا راه طلقت حنان ورديتها بسبب المشاكل ... الى لقيتي ما تسلك سلك والى مالقيتي لاسلاكة لا جهد صبر وقضى ربك الا تعبدو الا اياه وبالوالدين احسانا ، اما يبلغن عند الكبر احدهما او كلاهما فلا تقل لهما اف ولا تنهرهما وقل لهما قولا كريما . هادا كلام الله عز وجل وميجي فوق كلامو حتى كلمة . كلام الله باين بلا منبقاو نحرفو فيه والاية واضحة و لايعلم مافي الصدور غير الله سبحانه وتعالى وسلات الهضرة . يالاه نوض راك بقلك ونعل الشيطان
ناض مشا معاه للفيلا ديالو ... دخل مع الباب لقا مو فعلا جالسة مربعة وعينيها معلقين .. غير شافتو وهي تقلب وجهها وعقدات دوك الحجبان وهزات قنانفها للسما ، مشا مكسور جلس بجنبها ساكت .. هضر صلاح بدا يرطب الامور بيناتهم وبدا انصار كيشرح ليها كما شرح لخوه .. كفاش وقع حتى معيطش ليها وسبب اللي خلا ان قدس تسيق لخبار قبل منها وباللي هوا براسو عاد عرف ... بقات ساكتة مكتهضرش .. ناض صلاح عند مرتو للكوزينة وقف عليها وقال كيدور فعينيه
- درتي شي غدا ؟ قلت ليك انصار جاي معايا
حنان : راه قريب يوجد ... حتى هيا كل شوية تقول ليا نوضي وجدي راه غيجي معاه انصار ... مالها علاش ثلبات وجهها دابا؟
صلاح : وصافي حتى نتي اش هاد الاسءلة ... خليها ولدها هاداك مادخليش فيها .. راه تولي نتي اللي مامزياناش اما مع ولدها واخا يكون دم سنانها مادوزوش
حنان : ايوا انا اخويا راه خدامة راك عارف ... قول ليا واش غطول معانا ولا غيديها معاه
عبس صلاح فيها وقال : اش هاد الهضرة هادي ! راه مي هاديك الى بغات تجلس تجلس واش نجري عليها ! مزياان تبارك الله ... كملي شغلك ولا غادي نتفاهم معاك... يوا هادي هضرة اخرى !!!
حنان : مالي اااش قلت .. سولتك وصافي باش نعرف ... اش فيها من عيب
صلاح : كفاش انا خدامة واش غتبقا ولا تمشي ... شنو زعما خدامة نخرجوها ولا شنو ؟ راك كتهضري على مي يا الشريفة ... راه مي هاديك تبقا فوق ما بغات ولا تمشي فوق ما بغات والى لحتي ليها شي هضرة ديك الساعة حسابك معايا .. ها ودني منك راني عارفك وعارف سمك
مشا خلاها كتنكر ... تلفتات عند لخدمة وقالت بنرفزة : طلقي راسك واش غنباتو هنا ! سربيني ونتي كدوري حدايا بلا فايدة
رجع صلاح لقا خوه مزال فمفاوضات مع مو ... جلس وقال بابتسامة
- امدرا فين وصلتو
لاللة عيشة : انا راضية عليك دنيا واخرة ... ولاكن راك غلطتي فحقي ... باش تصلح لغلط ديالك معايا ... ولدك ولا بنتك انا اللي نسميه ليك والصلاة على النبي .
الايام كطير ولاللة عيشة كتسنى ولد ولدها يتزاد باش تسميه وطرطق العينين للعديان ! العديان اللي محاسبينهاش اصلا عدوتهم ، اما قدس بدات تشكي كل شوية ضرها جيهة .. الخاطر مشا ليها ولوحم ماغلبها حتى دخلات فالسادس والسابع عاد بدات .. كلشي كيقول فشوش .. مقادة على ولاد اش داها ليهم ... واش بنات دانون هما اللي غيولدو ويربيو ! الحاصول بزاف ديال الهضرة كتقال وراء ضهرها وشي مرات كتقولها ليها لاللة عيشة فوجهها فاش كتجي عندها تغدا ولا تعشا لان صلاح مابغاش يخليها تجلس عندهم باش تخلي بنت الناس تسنط لعضامها حتى يفك الله ويحالها . اما حتى للخدمة مابقاتش كتمشي بزاف ولحسن الحظ طاحت مع المديرة ديالها متفهمة وكتميك عليها بزاف من غير الى كان شي اجتماع مهم فكتتاصل
بانت كرش قدس وبان التغير فمزاجها ... من نهار هزات النفخة على انصار وهي هاكاك .. غير كتسوط وحتى حاجة مكتعجبها وحتى راسها مابقاش كيعجبها .. تنفخ ليها الصدر وكرشها خرجات وزادت فالوزن ... كتافها عمرو ويديها ورجليها طبزو ... جاتها الحمالة مع وجهها وعمر ليها وزيانت لاكن هي مكتشوفش الزين فراسها ... كتشوف غير الحوايج السلبية والنفس اللي كتقطع فيها والعيا والارهاق والصهد اللي خانقها في فصل الشتاء والليالي والسم ديال البرد وهي كتعري راسها باش تنفس ومقابلة التدواش كل ساعة زعما يخفافو عليها عضامها ، مالقات راحتها فحتى حاجة وحتى الماكلة ولات كتاكل كتر من القياس وتنوض فنصاص الليل تقلب على ما تاكل والى متلقاتش تبدا طيب راسها وتقلي وتاكل وترجع تنعس والصباح كتصبح ترد وتقيا مع النبوري كاع داكشي اللي كلات ... هادشي بلا البولة اللي كتجي كتجري بلا متعلم وكتمشي كطير كتقطر فحوايجها وتصدق مبدلة كولشي ومدوشة لنصها بسبب بولة فيها بزقة
كان انصار متكي فبيت النعاس لابس بيجامة كحلة وشاد واحد الفيلم كيتفرج . شاعل الشوفاج سخون مع راسو حتى تمات جايا لابسة سروال بيجامة وتريكو ديالو مزيرين عليها فالشيبي هازة كاس ديال لحليب سخون فيه جوج قطرات ديال ماء الزهر ... جلسات حداه وحطات كاسها حداها وتكات مسرحة رجليها .. تلفت عندها كيضحك وقال
- مالكي ؟ كضرك شي حاجة ؟
قدس : باستياء ) كولشي كيضرني بلا منبقا نحسب ليك ... عييت وقنطت بحال الى الحياة تحدات
انصار: بديتي كدخلي فاكتأب واقيلا ... راه الحياة هي هي... غير نتي كتمرضي راسك ...مقابلة لحوايج لخايبة ... والوسواس... بزااااف عرفتي شنو داير فيك الوسواس ولا ! راه شي حاجة فوق لقياس (حط يدو على كرشها كيداعبها ) غير حبوبة ناضت ليك فصدرك كنتي غتسطاي !!! لا فيروس ! لا دخلات ليا مع العضام ... مشينا كنجريو وغتموتي بالوسواس .. كدبتي الهضرة ديال الاطباء .. ولااا والو ندير تحاليل وندير هادي وندير هادي ... صدقنا كنديرو فتحاليل لديك الحبة وقبل ميخرجو ويخرج ليك الدواء برات مشات بحالها ! ورجعتي مرة اخرى للوسواس ديال ومشيتي بلا خباري وزتي عليها ودرتي تحاليل ههه! لا حقا غير مخبية وكتحفر فيا ! الله يهديك ابطيبيطة ديالي هههه
بعدات وجهها باستياء وقالت : بغيت ندير شي حاجة ماعرفتش شنو هي ... بغيت شي حاجة وماعارفهاش ... محتاجة شي حاجة وماعرفتش شنو هي
انصار : واش هاد الحاجة ماكلة ؟ حوايج ؟ شنو
قدس : معرفتش
انصار : لاديبخيسيون اقدس... ديري شي حاجة خرجي من الروتين ديالك ... ديري ليوكا ... علاش ماشفتيش شي اونتخينوغ بوغ ليفام انسينت ... ديري شيوية ديال الحركات ... يعطيوك ارشادات .. نصاءح وتجلسي مع ليفام اونسينت بحالك تسمعيهم وتهضري حتى نتي... ماتبقايش هاكا سادة عليك غير نتي والمراية والبيسي ... ماتبقايش دخلي نشوفي كاع لولادة وداكشي ... كنشوفك كتقلبي غير على الحاجة اللي دير ليك الوسواس وتمرضك فراسك
قدس: خاصنا نوجدو لاشومبر لسالي هي اللولة
ضحك وقال : سالي؟ صافي سميتيها؟
قدس : امم (شدات الكاس فيدها ) غنسميها سالي
انصار : وشنو معنى هاد السمية؟
قدس : قلبت عليها لقيتها وردة كتنبت فعمق البحر ... ديك الوردة سميتها سالي ... وانا عجباتني بغيت نسميها سالي
قلبات وجهها باغا تندب .. عنقها من اللور وخشا يدو تحت حوايجها كيداعب كرشها وقال
- صافي متعصبيش ... انا غنشوف شي حل ... ضاروري مانلقاو شي حل
قدس : بنرفزة ) ماعرفتش فين كان هاد السفر .. عاد خرج لينا دابا
انصار : انا غنشوف شي حل احبيبة ... صافي ؟
قدس : انا كنت باغيا تبقا معايا وتكون حدايا نتا وماما وبابا وكولشي .. انا كل ليلة كنفيق مخلوعة كنحلم راسي فسبيطار كنغوت بوحدي كنبغي نحماق عساك الى كانت بصح
باسها فعنقها كيدوز يدو على خدها ويرجع ليها الشعر اللور وقال
- واخا صافي ... يالاه رتاحي انا كنواعدك غادي نلقا شي حل .. وحسن ليك تولدي برا ... راه رجعات دابا ديك الولادة فالماء حسن بزاف من العادية ومزال ماشفتهاش فالمغرب ... ديك المرة قالي عقلي قلب فليتوب وهي طلع ليا الولادة فالماء ... فكلينيك ولا فالدار . فين ما بغيتي ... غايديرو ليك خاطرك حسن من هنا وحتى لبيبي حسن ليه يتزاد لهيه
قدس : لا خويا انا بغيت نبقا حدا مي باغو مابغيت لا ماء لا عصير بغيت مي باغو ونتا حدايا صافي
بدات قدس توجد البيت للمولودة الجديدة بحماس ... وتجهزو بديكوراتو والوانو الزهرية والبيضاء ، وحتى من الحوايج بدات تشريهم ... تاصلات بالام ديالها خبراتها على السفر المفاجئ ... الكل فعائلتها تضامن مع انصار وبغاوها تمشي و حتى الام ديالها جاهزة تمشي معاها . لاكن كان لاللة عيشة رأي اخر مللي عرضهم انصار للعشا وبقات وباتت مريامة معاهم باش توجد لأن قدس مكتبغيش تجهد على راسها .
حطات ليهم مريامة 3 ديال الدجاجات فالطبسيل محمرين مجمرين بحال ديال العراسات وطبسيل داللحم بالبرقوق و ديسير وصينية ديال اتاي يتجمعو عليها . كان فالصالون انصار وخوه صلاح ومرتو حنان وقدس ولاللة عيشة معاجبهاش لعجب
بدات حنان تفهم عليهم وتنصحهم وقالت
- لكلينيك اللي ولدت فيه انا اححححسن كلينيك فكازا والاطباء كي داايرين ... دارو ليا كي لما لقليل
لاللة عيشة : لكلينيكات فيهم فير خسران لفلوس .. ها هما الناس كيولدو مع الشعب مالهم ماتو ! مزال تابعكم السبوع لقليلة غادي يخرج ليكم هادشي كامل فواحد 8 دلملاين
حنان : حنا راه جوج دلميلاين ونص اللي خلصنا فكلينيك فبناتي بجوج و الولد الصغير وعااااد السبوع طلع لينا ب 9 ديال لملاين
بقات قدس غير كتشوف فيها فشل ليها اللسان .. حشيان الهضرة هادا بطاي طاي .. !
قدس : سي با كيستيون داغجون .. انا معنديش الفكرة ديال السبوع والهندقة كاملة .. حفلة بسيطة صافي مابغيتش عرس !
تنهدات حنان وقالت ببرودة : لكلينيك اللي ولدت فيه انا كيةلدة فيه غير شكون وشكون ... الى بغيتي تولدي فيه نتوسط ليك تما ... 3 ديال الولدات اللي ولدت تما وليت كنعرف الطبيبات بزاف .. غير يعرفوك من طرفي غادي يتعاملو معاك
انصار: بجدية ) كل واحد كيقابل ولادو الوليدة .. نهار ولدو بناتك قابلتيهم .. و هي مها اللي غتعرف تقابلها . حنا مغاديينش نتساراو ... انا غادي خدام وهي غادي تولد ومها خاصها تكون مع بنتها باش نكونو واضحين
لاللة عيشة : ايوا راه حتا يانا بحال بنتي ... شنو فيها الى قابلتها !
انصار: راك فيك السكر ... تسنطي لعضامك وفرنسا دابا مصالحاش ليك .. درجة الحرارة تما 4 ... ني ضوران ني مسارية غير هني راسك .. وماشي انا اللي غنولد ... هي اللي غتولد ومها هي اللي تعرف ليها وتصلاح ليها
حنان : بحال عكوزتها لحال مها فين
قاطعها انصار : حنااان .. خليك عزيزة ... كنهضر مع الواليدة هي اللي معنية بالامر
شاف فيها صلاح وقال: صافي .. هادشي اللي بغيتي تسمعي .. يالاه سكتي
لاللة عيشة : انا مابانش ليا فهاد فرنسا
انصار: خليك من فرنسا نتي غانسيفطك تغسلي عضامك فمكة مور السبوع يالاه عطي الراحة راسك .
سكتات لاللة عيشة وجمعات يديها عندها معاوداتش هضراتش... ضحك صلاح وقال
- ايوا هانتي غتمشي ديري عمرة حسااان ليك من فرنسا .
قالت لاللة عيشة ويديها فالسماء : ايوا الله يرضي عليه .. راه ديماااا كنقول ليكم هوا الليي فيكم وميقد عليه حد ... (حنات راسها) الله يرضي عليك اولدي ... (رجعات هزات راسها ةصبعها) غير هوا فاش تولد سميها صونيا
لالة عيشة الجزء السابع
محتوى القصة
التنقل بين الأجزاء