ساط وقال : ولايني هضرة خاوية تانتي !! هي معندكش التقة فراسك؟
قدس : هزات خنافرها ) عندي كتر من اللي عندك
انصار: وكن كانت عندك مغاديش تقولي عاد الهضرة ... واش غندير راسي فهضرة ماليها معنى كنشوفها انا تخربيق وهضرة خااااوية نعمر بيها راسي ونبقا نمرض فراسي على والو ... انا عارف راسي ومتصالح مع نفسي وتايق فراسي مغتزعزعنيش هضرة خاوية مكتنطابقش عليا اوك .. تفاهمنا ... حسابي فراسي .. وخلي بنادم ينبح كيما بغا ... وحتى الى مكانش كاااع حنا عندنا باش نخلصو هاد لكلينيك .. لا يكلف الله نفسا الا وسعها .. مغايجيش واحد مريض يخرج مرضو فيا ونتأثر ... غنقول بنادم الله يهديه مريض ... الى كان هوا كيشوف راسو فوق كولشي .. مغاديش يخليني انا نشوفو حسن مني بهضرتو ...
داك النوع كنضحك عليه حيت كادب عليه راسو والكدبة ديالو متيقها وبغا كولشي يتيقها ... ماتبقايش تعمري راسك بالتفاهات ... بعدي من السلبيات راه الوسواس غيحمقك و بنادم خايب فين ما مشيتي تلقايه ميمكنش نصلحو كاع الناس ... نشوفو راسنا حنا بعدا .. وبنادم الله يهديه واش غنتبعو على اي كلمة قالها . هوا كيهضر خليه وانا اللي كتسلكني راه كنديرها وزايدون راه لقات جوابها وماكانتش ليها على البال كاع غتمشي تولدي ففرانسا
قدس : عبرتي عليها ياالاه هههه
انصار: ماشي هاكاك اقدس ... راه من لغباء نبانو بشنو عندنا قدام واحد اخر ... يقدر داك الشخص يكون حسن منا وكيسايرنا فلهضرة .. وحنا دايرين الضحك فراسنا وداكشي باش كنتباهاو عليه كيجيه هوا لاااا علاقة وساكت كيسمع للكلاخ ديالنا ... والى كان كاع ماعندوش وماواصلش ليه حرام نبينو ليه كفاش عايشين وفين واصلين .. الى ربي عطانا وماعطاهاش ... راه عطانا باش نعاونوه ماشي نسيفطوه مريض كيحس براسو دون المستوى . غير مأخرا جالسين فلقهوى انا دراري صحابي بينا 3 وواحد جاب معاه صاحبو .. مللي جلس وهوا طابخ لينا مخنا بفرنسا .. المغرب ماشي حاجة ... بنادم معايش هنا .. بنادم ماعرفت كي داير .. فرانسا فرانسا فرانسا ... طيبني انا بعدا... بقا يهضر حتى نضنا مشينا بحالنا ، واش غندير راسي فبنادم راسو خاوي ونبقا نتجاحد انا وياه وفاللخر نخرج سخفان بالهضرة ! حتى انا نقول ليه راه غادي فرانسا ومرتي غتولد تما وراه مشيت وجيت تا عييت وماخليت حتى بلاد ونبقا انا وياه كندورو فلخاوي .. ولاكن لا .. صافي هوا كيهضر وانا كنضحك .. مشا عند بالو دار مزية وهوا الواعر .. ولاكن لحقيقة راه دار فراسو الضحك ومرة اخرى يجيبوه مانمشيش كاع نجلس معاهم .. حتى فالرجال كاين اللي سوقو خاوي وكيبغي يبان و غير كيخربق .
قدس : انا غير حيت شفتك بقيتي ساكت تفقصت
انصار: الهضرة فبحال هاد المواضيع خسارة . نهضر مع واحد يستوعب هضرتي ونستوعب هضرتو .. اما نبقا انا نشرق هوا يغرب حتى الفهامة ميفهمني بلاش مافياش. والواليدة راه مرى كبيرة وهضرت معاها حتى عييييت ونوضتها معاها ونتي مافراسكش وصلنا لفين وفين و تافقنا وعاود تافقنا .. وعاودنا تافقنا مليون مرة باش تميك عليك وهضرت وعاودت وكدوز سيمانة كترجع تنسا وترجع للقاعدة ديالها .. كتر ديك القيامة اللي ناضت بيني وبينها راه ماكاينش .. وصلنا للطوب او واالو .. صافي مغنبقاش حياتي كاملة تابع الخوا لخاوي والصدع اللي عمرو مغادي يسالي والهضرة عمرها مغاتقطع .. طبعها هاكاك شغادي تدير ليها .. وكتبقا مي واخا تكون شنو مابغات تكون . وماشي فير معاك نتي بوووحدك ... مع كووولشي .. وحتى رجال ختي مافلتوش منها باش ميحسابش ليك غير حنا . ولاكن راه مكتجبدش الصدع ومافيهاش تاحراميات .. غير الهضرة اللي فيها .. وديك الهضرة الى ماديتيهاش فيها راه عمر الصدع يدور عندنا فالدار .
دخلات قدس تنعس بالليل و دخل موراها انصار كيدور فبلاصتو يضحك بوحدو عاق بيها دارت شي حاجة
تخشا حداها كيتسنط لكرشها ويتجمع معاها على السفر ديال غدا .. وبقات كتهضر وتغيب حتى نعسات خلات كيدور على كرشها من كل الجهات
حتى عيا ونعس
صبحو الصباح فايقين كاملين واجدين ... هبط قدس الشانطات لطموبيلت خوه ولقا تما حتى لاللة عيشة جالسة حداه . ضحك وطل عليها من السرجم قال
- مالك فايقة فهاد الوقت هههه جلسي تشبعي نعاس
لاللة عيشة : واش لخاطري اولدي ... راه ماقدرش
انصار: ايوا مافيها باس .
طلع للدار سدها ونزل مع قدس ومها .. البرد محرك لابسة ليبة غليضة وبوت وكاب كحل حد الركبة .. طالقة شعرها ومقادة حالتها ومها بسروال توب والمونطو والبوط ديال الطالون .. فتح ليها انصار الباب لور طلعو وطلع حداهم ومشاو مباشرة للمطار ، من بعد الاجراءات توادعو بالاحضان ومشاو جلسة كيتسناو طيراتهم تحرك .
طلعو فالطيارة بحال جميع المسافرين .. جلسات قدس حدا مها وجلس انصار قدامهم فالصف الاخر جات حداه وحدة كبيرة فالسن مزوقة كي الطعريجة باينة من دوك لميمات اللي عزاز عليهم الشباب .
قلعات الطيارة وبدات الميمة كتجمع مع انصار وقدس حاطة عينها عليهم بجوج كتشوف المرا كضحك بحال الى بدات تضسر .. بلا متشعر نوضات مها من حداها وقالت
انا الميمة غير ناض من حداها انصار وهي تلفت شافتو جلس فبلاصة اخرى وتلفتات لام قدس بابتسامة وقالت
- ولدك ؟
الام : اه ولدي
الميمة : الله يخليه ليك ..تبارك الله مصواب كيدخل فلخاطر ... واش مرتو هاديك
كمشات ام قدس فمها كتنفخ وتقلب عينيها وقالت
- وي سا فام ... نجلس حدا السحاب الى جات على خاطرك
نزلات الطيارة فمطار باريس شاغل ديغول الدولي . نزلات قدس واناصر معنقها بيدو كيضحك معاها وامها قدامهم جارة الباليزة ديالها الصغيرة ... جلسو فمقهى على بيدمن يوصل الطاكسي اللي خدا انصار من uber ، طلبات حليب بالشكلاط هي ومها وحليوات صغيورين والناس قدامها كيتجاراو .. شي غادي كيجري شي جاي كيجري وحتى واحد ماعندو الوقت ولا مسالي يشوف فواحد اخر من غيرها اللي ماعندها مايدار كتشرب لحليب بالشكلاط ديالها وحاضية الناس كتجارا ، كاشي بزاف باش وصلات الطاكسي وركبو يمشيو مباشرة لكارتي " saint placide" فين شاد انصار لكاغسونيغ . حطاتهم الطاكسي حدا عمارة بالبني الفرنسي القديم ونزلو دخلو ليها .. حل انصار صندوق الرساءل وجبد منو سوارت وهنا ضحكات ام قدس وقالت
- كن عندنا فالمغربي كوراه خملو الدار . وميقدرش يخلي ليك السوارت تما خاصو حتى يدخل معاك للدار ويبدا يوريك بيدو ويعطيهم ليك ليدك عاد يتهنا
انصار: ههه هاد السيد جزاءري .. كنعرفو شحال هادي .. كنت كنقلب على دار ولقيتو داير لا لونص ف Airbnb .. وليت فين ما نبغي نجي لهنا كنعيط ليه . الى كانت خاوية مامشدوداش كنشدها .. هادا مكان ... يالاه .. على سلامتكم ههه
حل ليهم باب الاسانسور طلعو ومن بعد فتح باب الدار دخلو .. جلسات قدس على واحد الاريكة حدا الباب كترد النفس وحيدات لبوط سرحات رجليها كتكمدهم وتنهج سخفانة وتشوف فالدار كيايرة
قدس : زوينة ... مكاينش البرد لداخل
انصار: بلاتي نشعل ليك شوفاج .. راه فيها 2 ... كيسخنو الدار . متقدريش تبقاي جالسة هاكاك
قدس: لا بلاش اصلا فيا واحد الصهد كيقتل
جلسات حداها مها وقالت : راه مكتحسيش بالبرد ابنتي .. راه غتنفخ ليك البنت فكرشك متقدريش تولدي عادي وغادي تعدبي
خرج انصار من بيت النعاس لسيجور فين كاينة كويزين اميريكان محلولة على الجلسة فين جالسين وقال
زير على كتفها ضمها عندو وقال : حتا حنا ... حساب ليك انا مامخايفش ! حتى انا هاز ليك هم ماتصوريش قداش ... عارفك خايفة ومخلوعة وماعرفتش كيفاش غاديري.. هاز ليك واحد الهم ماعالم بيه غير الله
ماكاملاش 5 دقايق وقفات لومبيلونص عليهم وسط ديزني لاند ... هزوها هي ونفاختها وطربوش ميكي ماوس بو ودينات اللي دايرة .. داوها كتغوت وتجر فمها وتجر فأنصار وديك النفاخة كتمشي وتجي وضرب هنا ولهيه وكطلب وتزاوك فيهم بحال غيولدو فبلاصتها
وصلوها لسبيطار مباشرة دارو ليها فحص ... مزال الوجع الحقيقي مابداهاش لاكن الخلعة طغات عليها .. جات طبيبة قلباتها من لتحت وخبراتها باللي الوالدة تحلات وغادي تولد ... لقات العناية من الفريق الطبي لاكن الخوف عما ليها عينيها ... كتسمعهم كيهضرو على السقية اللي مزال مابغات طرطق والوجع اللي باديها ... فهمات القضية بلغلط يحساب ليها شي حاجة خايبة وبدلت تبكي ليهم وتطلب وتزاوك يبنجوها ويفتحو ليها .. لاكن مها مابغاتش فكرة العملية القيصرية وحتى الاطباء خلاوها حتى تولد طبيعي على خاطرها . اما هي مابغاتش تعيا ... جالسة كتبكي فوق البياص بالليبا لغليضة والتقاشر .. حيدات الكاب بقات بالبودي وكرشها قدامها .. انصار كيحيد ليها النفاخة وهي كارزة عليها بلا متشعر حرام واش بغات تحل يدها .. الطربوش ديال ميكي عواج وهي مرة تجلس على ركابيها مرة تسجد مرة تكا جنب ماشدات حتى بلاصة .... بدات مها كضحك وانصار حتى هوا غلباتو الضحكة عليها وكفاش كترغب اي واحد دخل عندها باش يبنجها واخا تكون فام دميناج . شافتهم كيضحكو ويخبيو وجههم وهي دور ليهم وبدات عليهم
قدس : كضحكو على البالون ... انا باالون ؟ اه راه بالون ... ضحكو . عيليا ضحكو
شافت ممرضة دخلات وهي توقف على ركابيها كتعيط ليها وترغبها باش تفكها ... اللي دخل عندها للشومبر كيبدا يضحك عليها ، شوية بشوية
بدات مرة ترخا حتى كتقول ليهم يالاه مشل لوجع مكاين ولادة ومرة ينوض فيها الوجع وترجع ترغب وتبكي على اي واحد طل عليها .. شوية وهي متكية .. مشا الوجع واستحلاتها .. حتى كتحس بالماء هابط بين رجليها ...
ناضت مخلوعة كتقيس بيديها ... خرجو عينيها وبدات تفتف .. دارو بيها حيدو ليها لحوايج وعبرو ليها الطونسيو لقاوه هابط .. بداو يهضرو معاها ويفسرو ليها بشوية باش تخيد الخوف اللي فيها لاكن هي كتحرك راسها بمعنى فهمات واللي فيها مزال مامهنيها .. بدا كيدخل معاها الحريق ديال بصح تدريجيا ..رجعات كتمايل من قنت لقنت .. علقو ليها السيروم وعي كتغوت وتعصر وترعد .. دخلوها لغرفة الولادة فيها باينو فيه ماء دافي درجة الحرارة ديالو هي نفسها درجة الحرارة اللي فكرشها ... تخشات لابسة سوتيان بوحدهم وعطاتهم بضرها كتوجع وترعد ... قدامها وحدة مكادير والو فير كتهضر معاها اختصاصية فالكلام وضبط الاعصاب ... كتهضر معاها وتبني ليها احلام وتوريها شي حوايج زوينين من هنا لقدام مللي تولد ... اما انصار جالس القرفصاء موراها كيدلك ليها اسفل ضهرها بطريقة داءرية وفين ما يوقف كتغوت باش ميوقفش الحركات الدارءرية ... اما امها ماخلاوهاش دخل . فقط واحد اللي عندو الحق يدخل ... لاكن مللي تزاد الحال على قدس ورجعات تغوت لمها وسخفات ليهم وسط الماء وفقدات الوعي .. دخلات حتى امها معاهم وبداو كيحاولو يفيقوها ... فكل مرة تفيق وتزوحم كتغيب ويرجعو يفيقوها باش تكمل العملية .. بقات هاكاك لفترة طويلة والكل كيشجععها وبالاخص انصار وامها اللي واقفين عند راسها و كل شوية تغيب بيناتهم ويتخلعو عليها .. ماولدات حتى شافت الموت بالخلعة وحتى البيبي اللي ولداتو ماشافتوش فالبلاصة غابت .. نقلوها من البانيو للباياص .. شي كيدور ليها من هنا وشي كيجبد لخلاص من هنا وشي كيفيقها وشي كيشوف دقات القلب ... فاقت واحد اللحضة شافت انصار واقف حداها شاد لبيبي ومخلوع عليها .. سمعات غوات مولودتها ويالاه قربها ليها انصار حدا وجهها رجعات غابت مرة اخرى وتقطع فيها النفس ... دارو ليها الاكسيجين وهنا خرجو الزوج والام والمولودة داوها وخلاوهم برا كيمشيو ويجيو بجوج مخلوعين ... الام كتبكي ودعي وانصار واقف فالباب وجهو صفر اللي خرج من تما كيشدو يسولو
اخيرا فاقت وارتاحت وجلسو كيهضرو معاها بشوية ويقريوها عاد خرجوها من تما فشلانة مقادراش حتى تحل عينيها .. حسات بيد انصار شدات فيها وهي غادية ويد مها تحطات على راسها وكيسولوها كيف بقات لاكن ماقدراتش تهضر بحال الى منبجة .. دخلوها لغرفة اخرى دافية فوق بياص اخر وغطاوها بليزار ابيض هزات عينيها فانصار اللي حداها وسولات على بنتها ، دخلوها ليها فلحين نقية ومدوشة ملبسينها لبسة وردية ويديها مغطيين وعطاوها ليها ليديها ، حدها شداتها بدات كتبكي وتبوس فيها وانصار كيبوس ليها راسها ومها واقفة كتشوف فيهم متأثرة حتى دمعو عينيها ... تكلفات امها بعمل الممرضات . بقات معاها غير وحدة كتعاونها وانصار شاد البيبي فيديو كيأدن ليه بينما لخرين كيبدلو ليها ويطرفو ليها .. مسحات ليها مها لحمها كامل بفوطة وبخاخ فيه ماء دافىء كل مرة تعمرو ليها الفرملية
الام : صااافي .. هانتي تفكيتي على خير ... اري رجلك
قدس : كنت غنموت ... هادي وتوبة .. عمرني نجبد لولادة على فمي
الام : ههههه الله يهديك ههه حتا انا كنت كنقولها وهانا فين ولدت وعاودت ... حمدي الله راكي مرضية .. مادرتي لا غراز لا والو ... كن درتي لغراز وتشوفي عاد الولادة كيف دايرة .. ماتقدريش حتى طلعي النفس ... اما كن ولدتي فالمغرب .. هاديك حاجة اخرى ماتلقاي حتى لي يعطيك تشربي
قدس : عمرني نعاود لا هنا ولا فشي جزيرة اخرى ... صافي
الام : شفتي الولادة فالماء شحال زوينة ... واخا سخفتي لينا وكنا غنسخفو حتى حنا معاك ... الحمد لله هانتي بيخير .. والبنيتة مشاء الله بيخير وعلى خير ... داوها دوزو ليها لقاها مزيانة ... كلشي في أمان الله
قدس : بغيت غير نعس
الام : بلاتي نلبسك حوايجك ... مابقاش لينا الوقت حتى نمشيو للدار نجيبو ليك حوايجك بقينا هنا مخلوعين ... غنلبسك ديك البيجامة اللي شريتي من ديزني لاند وبانطوفتها حتى يمشي يجيب ليك حوايجك من الدار ... هاهما عطاوك ليكوش واولويز خاصك غير سليب .. غنقرط ليك داك السليب اللي كنتي لابسة ونعلقو على الشوفاج ينشف دغيا ولبسيع على بيدمن جاب ليك الحوايج ... شديها رضعيها .. ولبسي حوايجك ونعسي باش منفيقوكش
قدس : واخا
الام : انصار ... عطيها اولدي ترضعها الله يرضي عليك
قرب منها عطاها ليها بشوية ليديها بينما مشات امها دوز داك السليب بالزربة . شافت فيه قدس بنص عين وهي كتشد البنيتة وقالت
- غير شديتيها ونتا تنساني!!
حل عينيه فيها وقال : انا!!! لا ! سولي ماماك واش نسيتك هي تعاود ليك .. علاش نساك !( باس راسها وابتاسم ) نسا انا حبيبة ديالي ومامات بنتي (باس يديها وشاف فيها بعيون براقة ) je t'aime chérie
دوزات يدها على وجهه بابتسامة وباستو فحنكو . ماعرفاتش كفاش دير ترضع حتى رجعات مها عندها وراتها وبقات معاها شوبة بشوية حتى خرج لحليب وشدات البنيتة البزولة كترضع و عطاتها البزولة لخرى وبدات تشوف فعيونها وخدودها وتتأمل فصورة الخالق سبحانه وتعالى هي وانصار وكيكتاشفو اليديات ورجيلات ديالها .. باست ليها قدس يدها وقالت
- مامتيقاش ! دابا هادو يدياتي ! وهادو رجيلاتي ! .. شوف شعرها سبحان الله قوي بزاف
انصار: تبارك الله ... شفتو .. كحل بحال صابغاه!
قدس : اه ! قوي (دوزات يدها على شعرها ) شفت ولاد ختي فاش يلاه تولدو كانو قورع
انصار: ايوا بنتي كتشبه لماماها فالشعر
قدس : غير الشعر ؟
انصار: كوولشي يالاه يرتاحي
قدس: مزال مايبان لمن كتشبه اصلا ههه
انصار: شنو غتسميها؟ سالي؟
قدس : هه ومالك قلتيها هاكاك معيبة؟
انصار: ماعجباتنيش
قدس: نسيمها سجى
حل عينيه وقال : بصح!!! (فرح ) حتى انا نييت هاد السمية اللي عطيتهم ههه
قدس: اييه!!! عطيتي السمية واللي وقع وقع عليها كتعيب ليا فسميتي؟
انصار: لا .. غير .. غير جات على فمي ... مالها سجى خايبة؟
قدس: لا زوينة ... غير حيت نتا اللي قلتيها .. اما كن قالها شي واحد اخر كاع منبغي
لاللة عيشة : نعل الشيطان ... انا مزاوكة فيك اولدي مادير شي حاجة تندم عليها ... حتى سجا مخيييرة .. غير خليها ... الله يرضي عليك اولدي سمع ليا ... صافي خلي السمية كما هي راه مزيااانة
لاللة عيشة : الله يرضيك اولدي .. سمعني... وراه سجا حسن من صونيا كاااع ... نعل الشيطان راك ماشي فبلادك غادي تخرج على راسك ... صافي مبارك مسعود علينا سجا ... ولاهيلا الى زويييينة عجباتني
انصار: بصح؟ حسن من صونيا؟ واخا نتي باغا صونيا؟
لاللة عيشة : امااابغينا لا صونيا ... لا صونيييت اش بغينا بيها ... سجا حسن .. يالله اولدي لعن الشيطان
انصار: الله ينعلو ويخزيه
لاللة عيشة : ياك صافي تافقنا ... عنداك تكون كدير ليا خاطري وتمشي دير شي موصيبة
انصار: المهم هوا تكوني نتي على خاطرك ... الى بغيتي دااابا نرجع نقلب عليهم البيرو واللي ليها ليها
لاللة عيشة : علااااا خاطري وخواطري الله يرضي عليك .. راه كنقولها ليهم ... المرضي فيكم هوا انصار ... انا ولدت مرة وحدة صااافي نتوما غير زايدين ... عارفاك اولدي ماتخسرش ليا الخاطر واخا يوقع اللي وقع
انصار: المهم عجباتك سجا ؟ صافي نخليوها
لاللة عيشة : صافي خليها مخيييرة ... ها عار ربي دير عقلك ماخصناش مشاكل ... راك تما وقلبي معلق هنا ... واعندي ماترجعش عندهم وماتبدل والو
انصار: صافي .. المهم نتي على خاطرك ... كنوااااعد مانبدلها تما تبقا لاسقة ليوم الدين .
قطع كيسوط .. اخيرا تهنا من جيهت السمية اللي كانت نايضة عليها الفتنة .. سما السمية اللي بغا هوا برضى الجميع ، خرجات قدس المستشفى فصحة سليمة هي و المولدوة ديالها .. رجعو للدار هازة بنتها فيديها ومعاها مها كتعاونها فالتربية وكتسهر معاها بالليل وقايمة بشغل المنزل كامل ، اما انصار كيمشي للعمل اللي جا عليه وكيرجع فلعشية موحش سجا .. كيمشي ليها نيشان يهزها وبراري بيها ... دخلو الحنان ولاحضاتها فيه قدس وتبدلو فيه شي حوايج .. مابقاش كينفاعل بزاف ورجع مبرد دمو وحنين معاها كتر من الاول ، دازت شهراين ونص على الولادة بدات سجا كضحك معاهم وتجاوب لحركاتهم معاها .. لقات معاها قدس مشكل فالاول فكيفية تربيتها لاكن الام ديالها قامت بالواجب واكثر . وصل النهار باش يرجعو للمغرب وشرات قدس كل مايلزمها هي وبنتها من اغراض ومشاو فاتجاه المطار .. سبقو الحقاءب الكبيرة وبقاو بالشنط الصغيرة اللي كطلع فالطيارة وطلعو كيتسارو على بيدمن توصل وقت الركوب ، شرات من تما الريحة باش واعدات لاللة عيشة وشرات لراسها ولعاءلتها و لضحى حتى هي ولانصار ولمها .. ماخلات ماشرات .. خسرات فلوسها كاملين فلمكياج والروايح وكملات بجيب انصار حتى هوا عاد طلعات فالطيارة . بعد
وصلات الطيارة للمغرب في امان الله وحفضه .. نزلو المسافرين لقاو صلاح بالسيارة واقف في الانتضار استقبل انصار بالاحضان وباس سجى من راسها وسلم على الجميع .. وصلهم للدار وجلس معاهم شوية كيتجمع . بقا انصار شاد سجى وقدس وامها مشاو نيشان للكوزينة وجدو الصينية حطوها .. ماطولش صلاح فالجلسة دغيا ناض مشا ومارتاحش انصار من السفر ختى هوا ناض مشا يجيب التقدية والسخرة كاملة للدار اللي خاصة .. بقات غير قدس كل مرة تستقبل اتصال من خواتاتها اللي ناويين اليوم التالي يجيو يزوروها كاملين بيهم . اتصالات بمريامة خبراتها باش تبدل تجي فاليوم الموالي . العيا والتعب ومها حتى هيا عيات يالاه تكاو بغاو يرتاحو شوية من السفر وهما يسمعو الدقان فالباب .. مشات امها حلات لقات العكوزة فالباب هي وحنان جايين بلا موعد ... استقبلاتهم قدس اللي سمعات صوتهم بالتسامة ودهشة فنفس الوقت .. واخا ماعجبهاش الحال علاش يجيو بلا موعد وهي يالاه واصلة وكاملين عيانين مزال حتى مرجعوش النفس . جلسات لاللة عيشة كدور عينيها وتشوف فنسيبة ولدها كفاش وقالت
- لا حاشة ... راه انصار عيط ليكم .. قلت بلا منعيط حتى انا
ابتاسمات حنان وهي كطلع وتهبط فيها مراسها لرجليها وتشوف شنو تبدل فيها .. واش دبلات ورجعات كي لفلفلة مشوية مور لولادة باش يرتاح ليها القلب ولا مزال هي هيا واحلة ليهم فلحلق .. لاكن بالرغم من التعب والارهاق الا وكانت داياها فراسها .. حوايج نقين ودوق زوين وشعر ممشوط مجموع لور بمقيبط وبانطوفة فرجليها و وجها واخا عيان باين فيه الضوء .
لاللة عيشة : بسم الله الله واكبر .. الله واكبر .. مشاء الله ... غير ولدي انصار محطوط منسوط
حوالو العينين لقدس هي ومها والشعر فلحمهم وقف ماحملوهاش تقول كتشبه لانصار ... بلهلا يتبتو لمها هضرات وقالت بابتسامة
- كتشبه حتى فقدس شوية ... هاكا كانت سبحان الله فاش ولدتها
لاللة عيشة : لااالا ... فاش ولدت انصار حتى انا كان عندو الشعر كتااار من هاكا كاع ... لعوينات غير ديالو ... والنيف غير ديالو .. والفم ... كوولشي ديالو بنت ولدي تبارك الله مشاء الله
ام قدس : واخا هاكاك كتشبه لقدس
لاللة عيشة : لا كتشبه لانصار
ضحكات قدس بالاعصاب وقالت : صافي كتشبه ليه (شافت فمها) صافي ... كتشبه ليه .. كل واحد كفاش كيشوف
حنان : بصح ... غير انصار سبحان الله
خرج الدخان من نيف قدس وقالت بصوت منخفض قالبة وجهها جيهة امها كتحك فودنها
- بقيتي ليا غير نتي فلحساب.. قولي ليها تبعد وجهها البنت تخنقات خايب تشم نفس بنادم كبير
ام قدس : خليها الله يرضي عليك راه مزالة صغيرة مامزيانش ليها النفس دبنادم كبير
بعدات حنان بابتسامة صفرا وقالت : لا عااادي ... ماتعلميهاش لفشوش من دابا غادي توحلي فيها
تنهدات قدس وقالت بصوت منخفض بيندما لاللة عيشة مراهاش فداك العالام جالسة تقرا المعودات على بنت ولدها
قدس: انا نوض لكوزينة .. خليك هنا معاهم
غمزات مها وناضت مشات للكوزينة خايفة على بنتها
مشات للكوزينة تشوف باش تبدا حيت عارفة لاللة عيشة ماتخرج حتى تتعشا ، واحد الشوية سمعات الباب تحل وصوت انصار كيقول بالضحك
لاللة عيشة : ويل الشيطان ! علاه مالها متعرفك ! لفرحة تلفاتك الله يستر .. راه بنتك دمك ولحمك ونتا باها وبلا متشوفك غير تشم ريحتك تعرفك
انصار : زعما كتعرفني انا باها ها شنو بغيت نقول
ساطت قدس وقالت : متأ! اففف بحال الى جات من السما ! راه انا اللي ولدتها مكيهضروش عليا ! وانا اللي شركا عليها لحمي وخرجات من لعروق ديالي
الام : بداتك الغيرة .. هاكا كنت حتى انا منحملش اللي يهضر على شي واحد فيكم وينسبو ليهم بحال الى ماشي انا اللي ولدتو ولا يقولو بيا كيشبه لشي واحد واخا يكون باه
قدس : افففف ... عيييت عضامي مزالين كيضروني ومسخسخة بغيت غير نعس ... مافيا اللي يوجد شي عشا ... الى ماوجدناهش تخلى علينا
الام : ايوا ماشي مشكل ... نقضيو باللي كان راه مو هاديك ... هاهوا جاب الدجاج بلاتي نزرب عليه دغيا فالكوكوت ديري نتي غير شلاضة ديال مطيشة ولخيار
قدس : بزاف عليك اماما مارتاحيتيش كاع ... شوفي شحال ونتي هازاني انا وبنتي راه واخا تكوني مصنوعة من لحديد غتعياي ... غير سيري جلسي انا ندير هادشي
الام : غير بلاتي نعاونك الله يرضي عليك راه بزاف عليك ... مزال عضامك كيضروك ... 9 شهور ديال الحمل راه ماشي ساهلة وعاد الولادة وداك التعصار كيفك لعضام
قدس : خرجات عينيها ) هاديك مكنحححملها مكنقبلها واحد السمووومة ... كن شفتي اخر مرة فاش جات . كتبغي تبين ليا راني عزيزة عليها وهي مكتحملنيش ماعرفتش شنو درت ليها . . . وانا اصلا مكتمشيش عندهم لا هيا ولا لخرين غير باش ميجيوش عندي ويبعدو مني ... عرفتي اماما كن تعرفيهم كي دايرين .. ماشي ديال الهضرة وماشي ديال التفاهم ... وحتى الضحكة ماضحكيش معاهم حسن كاع
الام : وخواتاتو مزيانين معاك؟
قدس : مزال مكنعرفهم ومزال ما جات فرصة باش نعرفهم ... ضحى بوحدها اللي كنعرف الله يعمرها دار ... عيطات ليا باركات ليا هي اللولة ... لخرين سبحان الله واخا باركو ليا كنحس بيهم كيباركو بزز منهم غير صواب . دابا عاد غنعرفهم مزياان فالسبوع
الام : شوفي نوصيك ... ماتفقسيش راسك وتمرضي راسك ... ديما النفيسة مسكينة لابد تبكي فالسبوع وتفقص راسها .. دابا غنتجمعو حنا و هما حاولي ماديريش من الحبة قبة وميكي ... لابد مكيوقع الصدع فالسبوع فاش كيتجمع كولشي ... اللي نوصيك عليه ... بنتك جمعيها فالبيت مايدخل عندها حتى واحد ... نتي مزالة جديدة ومعارفاش النية دبنادم كي دايرة . يمشيو يدخلو عليها بشي موصيبة الله يستر . بنتك خليها فالبيت ونتي لبسي حوايجك وخرجي عندهم
قدس : مابغيتش يجيو عندي لهنا للدار .. اصلا كيقلبو غير على السبة وكنشوف فيهم فعينيهم كفاش كشوفو ليا فداري وفيا ... هاديك اللي جالسة تما راه عندها فيلا و واخا هاكاك كنشوف فيها كفاش كتفلي ليا الدار بعينيها وشي مرات كتبدا بلعاني تعيب عليا
الام : ايوا ديري فقاعة وهني راسك ... سدي بابك وسيري عند ختك لبسي تما وديري كلشي تما هاهيا غير حداك هنا باش كولشي يمشي للقاعة مايلقاوش السبة كاع يجيو عندك هنا
قررات قدس دير العرس فالقاعة ... وباش ماتعكسش ليها العكوز زربات عليها بشوية ديال الكادويات ... بدات تجري وتجاري هي ومها وانصار معاهم مرة مرة ... هاهيا فالقاعة .. هاهيا عند النكافة هاهيا عند تريتور ... كولشي وربات عليه ف 15 ليوم باش تسالي وترجع لخدمتها ... عرضات الناس لاكن غير لقليل ... اما لاللة عيشة ...
لاللة عيشة : رزق ولدي نعرض علامن ما بغيت مالها هي مخلصة شي حاجة ؟
في غرفة النوم ...
قدس : تفقصت .. تققصصصت . (دار يديها على وجهها) غادي نطرطق بزاااف ا انصار والله بزااااف... حشومة عليها شنو كندير ليها ؟ علاش كدخل ليا حتى فالسبوع
صلاح : نعلو الشيطان واش غادي تكبرو الموضوع على والو ... لاللة نزهة نعلي الشيطان
لاللة نزهة : بعصبية ) الله ينعلو ويخزيه .. ولاكن ماشي كل مرة تهضر تقول ليا رزق ولدي ودار ولدي ! (رجعات حمرا) واش حنا هنا كنسعاو ؟ انا جالسة عند بنتي .. والى غتبقا كل شوية تقول ليا دار ولدي رزق ولدي نمشي لوتيل حسن ليا انا كاع
ناضت لاللة نزهة وجهها حمر مارضاتش ومشات للبيت دغيا بغات تجمع حوايجها ... سمعات قدس الهضرة بالجهد وخرجات كتجري تشوف هاكا وهاكا .. شافت صلاح كيهضر معصب مع امو .. بدات كتقلب على مها بلهفة .. اما انصار مشا نيشان عند مو كيستفسر شنو وقع ... لقات لقدس امها عينيها مغرغرين كتلوح فالباليزة و وجها حمر . خرجو عينيها وبدات تسول مالها ... هزات لاللة نزهة راسها فثها وفمها كيترعد بالاعصاب و وحلة ليها غصة فحلقها وقالت
- منزيد هنا حتى دقيقة ... من نهار جيت وانا حاسة براسي يتيمة ماعندي دار ما عندي عاءلة وحاينة الراس ... مالي على هادشي ... هي مرى وانا شنو ؟؟ ابدا تمسح فيا رجليها مالي كنسعاها
قدس : مالكي ؟ غير قولي ليا مااالكي ؟ .. هوا ديك المرة ضربني على قبل مو ... وكووولشي عندو يدوز على وجهه مو .. وانا مي جفاف ! اللي جا يمسح فيها رجليه ... واخا
لاللة نزهة : انا غادية عند ختك حتى نتلاقاو فالقاعة ... ونتي جلسي فدارك ماعندك فين تمشي
قدس : داري هي دارك ... نبقاو بجوج ولا نخرجو بجوج ... انا هادشي طلع ليا فراسي... مرضني فحياتي مغاديش نبقا صابرة على المرض ... راني نييت على سبة ... بغاو السبوع خليه ليهم
قدس: بصوت مرتفع) نتي راكي ماااااما ... خاصها تفهم هادشي ... اللي يخسر ليا لخاطر لواليديا ما عندي ماندير بيه ... كل واحد عزاز عليه واليديه ... ماشي هي ام ونتي لا .. كما ليها بلاصة راه ليك حتى نتي ... وزايدون ماخصني سبوووع ماخصني والو ... صافي طلع ليا هادشي فراسي مابقيتش قادرة نستحمل
خرجات وهي تلاقا مع انصار جاي كيسمع فيها ... دازت فيه وقالت بتهديد
- شوف ... تخرج ماما من هاد الدار غادي نتبعها انا وبنتي ... كما مك عزيزة عليك حتى انا عزيزة عليا ماما ... والله وفاتت داك الباب لا ضربت هنا الضربة ... طلع ليا هادشي فراسي بناااقص كاااع
خرج فيها عينين وهز صبعو وطلع حجبانو وقال بغضب
- هضضضضري بششششوية.... ومتعليش عليا صوتك
قدس : كفااااش منعليش صوتي؟ غير نتا اللي تعليه عليا.... (زفرات بتعب) شوف ... انا مغنعلي عليك صوتي ... مغادي نزيد معاك حتى كلمة اوك
دخلات للبيت وزدحاتو اما هوا دخل عند مها كيهدي لخواطر ويبوس ليها راسها لأنه شاف المجهود اللي كدير معاهم والسكات اللي كسكت فاش كتجي مو وتبقا تحشي ليها فالهضرة .. جلسات لاللة نزهة لابسة جلابتها كتنفس مللي هضر معاها انصار وهدنها ... لاكن سرعان ماخرجات قدس لابسة جلابتها من البيت هازة بنتها فيديها متوقعوهاش منها ... رجعات امها اللي كتهدنها وتدخل صلاح ... بدا انصار حتى هوا كيحاول ميتعصبش معاها وهي كتهضر بكل جرأة قدامو فرغات كاع داكشي اللي جامعة حتى مابقاش كيستحمل الهضرة ديالها وبدا كيخاصم حتى هوا عليها
قدس: مغاديييش نبقا هنا ... صااافي ها السبوع ديرو اللي عجبكم فيه
قدس : ماتهضرش معايا انا ... هضر مع مك ... انا نسكت على كوووولشي الا واليديا سمعتي ... هبطت راسي بما فيه الكفاية وكنسكت ... مي دابا صااافي اللي بغيتو ديرو ديرو
مسح على لحيتو وقال بعصبية مغمض عينيه
- حطي البنت وسيري تجلسي نعلي الشيطان ... حطي البنت اقدس خلي العشية دوز على خير
قدس : مك اللي ماخلاتهاش دوز على خييير ماشي انا ... واش دوز على خير على ضهري انا و ماما ! وشي يفرح شي يقرح
جات ليها لاللة عيشة : مالك .... ماااالك اش كااااين ؟ مك مك مك من الصباح ونتي عليه مك مك مك ... ها مو مالك
صلاح : قدس نعلي الشيطان ... الواليدة خليونا ندوزو ها السبوع على خير
نفض انصار يديها وقال : خليونا ندوزو هاد الخراااا على خير ... قلت(شاف فصلاح) ليك ماخصني سبوع ماخصني زمر ... ها السبووووع .... واش وجهنا وجه الفرح حنا !!
لاللة عيشة : هااا الباب ... بغيتي تخرجي ها الباب مااالك غير نتي اللي مرا ... مزال يجيب لالاك
قدس: ايوا ديه ... ديه جوجيه كما درتي ليه دابا وبقاي تساريه من وحدة لوحدة وديريه ليه السكاتة راه خليتها ليك ... اصلا كن كان راجل مغيخليكش تهزي صوتك عليه وتلعبي بيه كما بغيتي ...
- هادشي اللي كتقدر عليه ... سابقينك يديك ... والله حتى نوريك الضرب بشحال كيسوى(شافت فلااللة عيشة ) غير بلاتي ..والله حتى نوريك نتي وياه
انصار : تحت سنانو ) خليها تخرج ..
صلاح : كيترعد) نعل الشيطان حشومة هادشي اللي كديرة يا هاد الناس .... ولاهيلا عيييب وعااااار ... قدس الله يهديك ...راه ساعة الغضب فايتة
قدس: يالاه اماما
جرات مها والباليزة وخرجات كترجف وتبكي
- الى ماربيتو رااني ماشي قدس
مشات طلعات فسيارتها ومها لور هازة البنت مفمضة غينيها وكتنفس وقدس مطلعة الجلابة حتى للفخاد وتحتها بيجامة وسايقة كتشهق وتبكي وتنخصص وتتحلف ، شدات الطريق للرباط نيشان وغادية كتعيط لخواتاتها وباها باش بلا ميتعدبو ويمشيو للقاعة لان السبوع فديك الليلة ... مافهموش علاش وشنو واقع حتى حيدات ليها معا تيليفون مابغاتش تخليها تسوق وهي هاكاك وبدات تفسر لباها بالدرجة الاولى كلشي بالتفصيل الملل والدقيق فالطريق كاملة حتى وصلات للعمارة ديالها فين ساكنة ونزلات طلعات الباليزات ... وجلسات على البكا حتى طابو عينيها .. وصل باها اللي كان غير تما عند ختها حسنا فالدار على نية يمشيو للسبوع ... وصل هوا وبنتو وراجل بنتو عندهم كيجريو ... لقاو قدس حمرا ومها جالسة مهمومة حداها والبنت فوق الفراش ناعسة حداهم .. ملاك نازل من السماء .. شنيفات مقفزين ولدية وخدود وردية وجهه ابيض ناصع وشعر اسود كالضلام ... ناعسة على جنبها راسها للور .. من بعد شد والرد فالكلام بيناتهم وتحليل وتفصيل لكل ما حدث... دار باها رجل على رجل وهز راسو تكل بالجنب وقال بصرامة
- صافي سالينا ... الزواج بحال هادا بلاش كاع منو الله يعاونا ويعاونهم... فازت بديك البنيتة حتى الى بغات تكمل بلا كحل الراس المهم عندها بنتها
لاللة نزهة : راه غلطات حتى هي اسي خليل ... الراجل جا عندي وباس لي راسي وطلب مني السماحة وقالي مسحيها فيها ... هي مكانش خاصها تقول ليه ماشي راجل... كان مكمدها حتى قالت ليه ديك الكلمة
قدس: بجرأة) اه ... ماشي راجل ... كن كان راجل ماتلعبش بينا مو بحال الكراكيز ... انا من نهار تزوجت وانت صابرة لمو ... الله يجعل البراكة ... بغاو السبوع الله يربحهم بيه
كريم : المهم ... فوقاش بغيتي ترفعي دعوة ... التعويض غيخرج ليك حسب هوا شحال كيشد ... الى كان كيتخلص مزيان المحكمة غادي تعطيك النفقة ليك ولبنتك في حالة ما بغا يطلق حتى هوا ... حنا غادي نشوفو ونشوف القاضي اللي غدوزو عندو غادي نهضر ليك معاه ولا عليك
قدس: غدا .. اصلا ماعندي مانتسنا .
كريم : صافي
عم الصمت المكان ... كل واحد فين ساهي وكيخمم حتى نطقات قدس وقالت
- حوايجي كاملين بقاو تما
كريم : كلشي غادي يوصلك وبالمحكمة غير هني بالك
فاقت سجى وبدات تجبد يديها ..شافت فيها قدس وسهات كتأسف والحزن مالي عينيها ... رضعاتها وناضت لأقرب عيادة دارت فيها شهادة طبية ورجعات بحالها ... طاح عليهم الضيم ديك الليلة اما وباتت بلا ماتاكل ولا تشرب ... تكات معا حداها وقالت
قدس: الحولي سنة ماشي فرض ... وغادي ندبح ليها انا جوج ان شاء الله ماشي غير واحد ... بلحق مزال غادي ندمهم على هادشي مزيااان ... قالت ليك رزق ولدها ... انا غنوريها رزق ولدها
لاللة نزهة : ماكنتيش هاكا ابنتي ... مالك على هاد الحقد ... واخا هاكاك انصار ميستاهلش
قدس : يستااهل .... ومزال غادي نوريه .. قالت ليك غادي تزوجو لالاك ... ايوا دابا نوريها انا هاد لالاك هوا وياها ... ماشي غير انا اللي مرا وماشي غير هوا اللي راجل . يالاه بغاو السبوع .. ها السبوع ياكلو دابا داكشي اللي موجدين ... (كتنخصص) خسرات ليا السبوع لبنتي مانسمحش ليها لا دنيا لا اخرة .. الله ياخد فيها الحق
بدات كتبكي وتنخصص ومعا ساكتة ... الاكتأب والضيب والمرض .. مرحلة صعيبة بدات كدوز منها قدس مايعلم بيها غير اللي مجربها ... الجرح جديد والدنيا كحالت فعينيها ... رفعات دعوى ديال الطلاق وغرقاتو حتى لودنيه بكاع داكشي اللي داز عليها ... الضرب والإهانة والاهمال حتى هوا والطرد جوج مرات من البيت .. مرى فمنتصف الليل مرى هي ومها وحطات ليه الشهادة الطبيبة القديمة والجديدة .. عمرات الملف حتى لودنيه كما قال ليها كريم وعطاتو ليه ليدو هوا تكلف .. خلات بنتها لمها شاداها ليها ديك الفترة وجالسة معاها فالدار وبدات هي الخدمة ... وقبل وماتبداها دارت بحالتها شوية حيت دخلات فأكتآب حاد ومكانتش متوقعة شي نهار تكم عليها الاقدار وتلقا راسها مطلقة ببنيتة .. وحتى كن قالها ليها شي واحد كانت غادي ضحك وماتيقش . لاكن الواقع اللي كتعيشو مر ... التيليفونات ديال عاءلتها مكيحبسوش كولشي باغي يعرف شنو واقع وعلاش وهي ماباغا تعطي راس الخيط لحتا واحد و حلفات واليديها وخوتها يسكتو واللي سولهم يقولو ليه الله واعلم .
فترة قاصية كتمر بيها بكتحلا ليها بحتى حاجة .. كتبات بالليل كتبكي وتخوي قلبها وتصبح الصباح كدوش وتقاد راسها وتلبس وتبان للمجتمع كما موالفة تبان بلا ميبان عليها حتى تغيير لامن جهة الولادة .. لا من جهة الطلاق ، بلوكات نمرتو ونمرت مو ونمرة ضحى حتى هي وجميع النوامر اللي يجيو من ديك الجهة ويهزو ليها قلبها اللي كتحفر ليه باش دفنو .
كترجع فلعشية مع الخمسة وترضع بنتها ... وترضعها بنتها الصباح قبل ماتمشي للخدمة هادا هوا التوقيت ديالها المعروف وخلاص فاش كتكون فالدار اما فاش مكتكونش كتعوض ليها لاللة نزهة بحليب الصيدلية .
يوم على يوم كيمر على قدس كحل وطويل ميكمل غير بمشقة النفس حتى وصل النهار ديال الجلسة قبل مايكمل الشهر ... لبسات سروال كلاص وقميجة زرقة وصباط كلاص وهزات صاكها مشات فأبهى حلة كما موالفة الناس يشوفوها وباش نيت تبين لأنصار انها بيخير وعلى خير ماشي مهمومة ولا ميتة عليه واخا واقع معاها العكس وكتخفي داكشي بالمضاهر ... مشا معاها باها وراجل ختها .. دخلات تقابلات هي وياه ... كان جالس بسروال كلاص وقميجة باين داز من الخدمة حتى هوا ... مهموم وخافي الهموم ديالو لاكن جبهتو المخططة وحواجبو كيقولو حاجة اخرى .
جلسات قدام القاضي وهوا كيشوووف فيها ... كفاش تبدلات من وحدة لوحدة ... بحال الى ماشي هي قدس اللي كيعرف ... حتى الشوفة مشافتش فيه .. هازة راسها بصرامة حتى بدات الجلسة ... شكات على القاضي وحكات كاع داكشي اللي كاين واللي وقع ليها من نهار تزوجات ليومها .. وكتقول وتردد انها كطالب بالحقوق ديالها كاملة وبالطلاق حتى هوا ... سمع ليها القاضي اللي كان رجل كبير شايب الراس ومتقدم فالسن وطرح السؤال على انصار اللي سمع كاع كادشي اللي قاليت وبقا غير ساهي ... تنهد وقال بعد تفكير
انصار: مافكرتيش فبنتنا اللي غادي تكبر وسط واليدين مشتتين
قالت و و جهها فجهة اخرى : بقا غير نتا حدا مك ... اما بنتي قادرة تعيش بلا باها ... كيف كنتي كيف ماكنتيش ماغاديش تزيدها مغادي تنقصها
هضراتها دخلات التناوي لراسو ... صغر عينيه فيها كيفكر وسكت مجاوبهاش .. رجع القاضي بعد استراحة قصيرة وسولهم هل من محاولة صلح . رفضات قدس وبقا انصار متشبت بالقرار ديالو ... لاكن القاضي حكم لصالح قدس بالطلاق والنفقة ديالها قدرها 2000 درهم وتعويض قدره 8 ديال المليون ونفقة لبنتها قدرها 2500 ورفع الجلسة ... ناضت قدس هازة راسها وفنفس الوقت بغات تنهار تما لاكن انصار استأنف الحكم ... رجعات مع باها وراجل ختها شادة البكية حتى للدار عاد طلقاتها .
مشات للخدمة الصباح و فوقت الغدا خرجات باش تغدا واخا ماعندو منين يدوز .. لقاتو واقف فالباب .. غير شافتو جاي عندها وهي ترجع دخلات وبقات غادية حانية راسها حتى دارت وضرباتها بجرية غبرات .. دخلات للمرحاض وبدات كتنفس ويدها على صدرها ... علاش جا عندها .. شنو بغا منها ...ابا حيت رجع خدام فالرباط حتى هوا غيبدل كل مرة جاي! .. من بعد ما رجعات النفس خرجات لقات لمها غير ازهار دايز ... وقفاتو وطلبات منو يجيب ليها اي حاجة تشربها المهم ترجع فيها الروح ومشات رجعات للبيرو ديالها جلسات ... مع الجلسة سمعات تيليقون كيصوني فصاكها .. جبداتو بانت ليها نمرة جديدة مكتعرفهاش .. شكات فيه يكون انصار وقطعات عليه ... عاودات صونات ديك النمرة مرة اخرى وقطعات تاني .. عاودات للمرة الثالتة وهي تفتح الخط بلا متهضر سمعات
دخل ازهار عندها هاز فيدو ماكلة و عصير حطهم ليها وجلس قدامها جايب ماكلتو حتى هوا وحطها كياكل معاها ويسول على احوالها واحوال بنتها وزوجها ... لقا قلبها عامر وجا فطريقها هوا .. تنهدات بعمق وقالت
- بلا متسولني على حتى حاجة هاد الساعة ... عيانة واللي فيا كافيني
ازهار: مالك؟ واش مريضة ؟ ولا واقيلا مزال مارتاحيتي
تنهدات وقالت: الراحة هي اللي مكيناش .
سكتات وبدات تاكل مازادت حتى كلمة ... شافها مابغاتش تهضر ولا تحكي ولا تقول حتى كلمة وسكت حتى هوا ... كمل ماكلتو وناض خرج مشا للبيرو ديالو ... اما هي العشية كاملة وهي مرفوعة حتى حاجة مادارتها فخاطرها .. خرجات وسط الموضفين اثناء انتهاء العمل كدور عينيها وتشوف واش كاين .. مابانش ليها حسو ومشات نيشان لسيارتها طلعات ورجعات بحالها للدار موحشة بنتها ومفتاقدة للدفىء والجو اللي كان عندها فدارها .. شدات بنتها كترضعها وبدات تجمع هي ومها على المشاكل اللي عايشين
قدس: وهاهوا داير يدو ... راه استأنف ومانعرف شنو غادي يطلع من هاد الاستأناف . . . خليه .. واخا يستأف الف مرة مغاديش نرجع ... عييت كنرطب مع مو وهوا كيزيد يقول ليا قبليها كما هي... انا ماشي مجبرة نتقبلها كما هي وماشي مجبرة نبدل راسي باش نرضيهم ... انا هيا انا .. كما هي ماباغاش تبدل حتى انا ميمكنش ليا .. جلست انا وياه طيط اطيط ودرنا لاليست وقيدنا فيها كاع الناس اللي غادي نعرضو ... فرقنا الطبالي .. النص فيهم ما فامي والنص لاخر سا فامي ... حقي راه عرضت فيه على الناس اللي قراب و حقو راه عرض على الناس اللي بغا .. علاش خلاتنا حتى لنهار السبوع وجابت لينا وحدين اخرين ماكاينينش فلاليست ... حنا تعمدنا ما نحضروك لا نتي لا هيا ونعرضو حنا اللي بغينا وصافي جمعنا وطوينا ... جات هي حطاتنا امام الامر الواقع ! زاءد مكتحتارمكش وبدات ضسر كما ضسرات عليا ... و ولدها جاي من جهتها صافي ... خليه
قدس: ويجي دابا عاوتاني ونعاود نقولها ليه وماندمتش ... ماكدبتش عليه ... ماشي راجل وطاح من عيني صافي .. ماغادياش نزوق وندم فراسي و نشوف كيفاش نصلح ولا مانعرف شنو حيت اصلا ماباغاش نرجع ونزيد نقول ما كتر ... انا هاد الناس فاش ضريتهم؟ ... اشنو درت ليهم ؟ كنشوف فيهم كاملين حتا واحد محاملني ... كن غير يبعدو مني كاع لا يبغيوني ما بززتش عليهم باش يبغيوني... يوقروني كما موقراهم ... ماشي انا صافي مكنبغيش شي وحدة فيهم غادي نبقا نسممها ونتحاك معاها ولا نعتب باب دارها ... مكنحملهاش ما نمشيش عندها ومانقربش ليها .. هما ما باغيينيش ولاكن فين ما تكون فرصة يجيو كيجريو ؟ علاش هادشي علاش؟
لاللة نزهة : دابا صافي .. يبغيوك ولا لهلا فين يبغيوك . سالينا هاد المسلسل
قدس: دابا هضرتي ... نتي معارفاش شنو كنشوف انا ... من نهار مشيت عندهم وانا فالصدع معاهم وحتى فاش جا رجعني ... مور السبوع ناض الصدع مع شي وحدين ماعرفت حتى شكون هادوك على الباب علاش نسدو وانا ماعرفتها شكون اصلا واش جارتهم ولا بنتهم ولا مانعرف ... وكنسسسسسكت مكيسمعوش حسي وكنشوف بعيني ونميك ومكانمشيش نشكي عليه ... وكن ما وقع معاك نتي داكشي كنت مزال غادي نسكت على راسي .... ولاكن السيدة طغات نقزات مني انا ليك نتي ويجي بابا تحشي ليه الهضرة ولا تقول ليه شي كلمة ... مالقاتش اللي يحكمها .. شكون تكون كاع فملك الله ... دار ولدها .. رزق ولدها ! غير هي اللي عندها وبدها بدارو ورزقو ؟ وهوا ساكت .. غير هوا اللي عندو مو ومايبغيش اللي يقول ليها شي كلمة ! ايوا الله يسخر ليهم كاملين حتى انا عزاز عليا واليديا ... انا غير يطلقني ويمشي مابقيتش باغا نسمع حسهم
لاللة نزهة : لهاد الدرجة كرهتيه زعما
هزات قدس راسها وقالت : مابقييتش باغا نشوفو ... واخا يوقع فيا اللي بغا يوقع ... واخا نشرب السم ونموت ... واخا نكون ماشي غير كنبغيه مغاديش نفوت ليليميت ديالي سيختو الى كان الامر كيتعلق بواليديا ... وعاد دابا هادشي اللي قع والطرشة اللي عطاني تاني مرة ... كرهني فيه مكندبش عليك ... اش غادي نبغي فيه دابا؟ ماخلا ليا مانبغي على هادشي اللي دار ليا ... غير يبعد مني يخليني نساه على خاطري
عمرني نجبد الزواج على فمي ولانفكر فيه
بقات لاللة نزهة غير ساكتة كتشوف فيها ... حطات بنتها ناعسة على جنبها وناضت بدلات حوايجها ومشات نعسات بلا ماتاكل ولا تشرب ، وهي ناعسة حدا بنتها فوق الناموسية بدا تيليفون كيصوني برقم مجهول ... كل شوية يصوني وهي ناعسة مجايبة للدنيا خبار ... فيقاتها بنتها فنص الليل بغات ترضع وعطاتها البزولة وتكات حتى داها النعاس .
الصباح وجدات راسها كالعادة .. سروال كلاص وبودي كحل سامبل كلاص وصباط وصاك .. طلعات فسيارتها ومشات مباشرة بلخدمة .. يالاه نزلات وقف عليها وقال
البنات حاولو على المحلبة بغيت نقول المحكمة .. نو بغيت نقول البرلمان ... بلا منوضو الصدع اللي بغات تعبر تعبر بلا متقصد وحدة اخرى . ولكل واحد وجهة نضرو لازم نحتارموها . خليو المحلبة .. باغدون المحكمة دوز على خير
زادت وخلاتو مابغاتش توقف وحتى هوا ماضغطش عليها بالمرة .. مشات للمكتب يالاه جلسات جاها تيليفون من ديك النمرة المجهولة و فتحات الخط
الو شكون معايا
لاللة عيشة : السلام
قدس : وعاليكم السلام
قدس: شكون معايا؟
لاللة عيشة : زعما ماعرفاينيش! باز
نكرات قدس وقالت : نو ماعرفتكش شكون معايا
لاللة عيشة : كاع لا تعرفيني ... سمعي شنو غنقول ليك ... داكشي اللي بغاها راكي مغاديش توصلي ليه ... و داك الكدوب اللي طلقتي عليه فالمحكمة باش تسوسيه راه ماعندو باش غينفعك
ضحكات وقالت : المحكمة حكمات وسالات ... ياكما غادي تسخطي عليها حتا هي ؟ ... ولا واقيلا المحكمة ديالك !
لاللة عيشة : حنا درنا فيك التقة و زوجناك ولدنا حساب لينا بنت الناس .. ساعة طلعتي لفعة مقطرة ... فاش جاتك 8 ديال المليون ويصرف عليك ونتي مطلقة فاش؟!
قدس : سمعي ... ديك جوج ديال الريال راه ماعندها ماتقضي ليا ... وزايدون حقي واخا تكون فيه غير درهم ناخدو ... وغادي نقول ليك جوج كلمات دابا ... كنت كنحتارمك ونقدرك فاش كنت مرت ولدك ... دابا مكتجيني مكانجيك وحتى ديك البنت اللي جامعانا نساوها سيختو نتي ... عمرك فحياتك تحلمي تشوفيها فهمتيني ... الى نتينا مولفة تلعبي على بنات الراس وديري عليهم قايدة .. انا راه ماشي وحدة منهم يصبرو لهبالك ... لا نتي لا ولدك لاوك جوج دريال اللي غتعجيوني كتهموني ... وانا اللي غادي نقولها ليك دابا بالطريقة اللي كتفهمي بيها ... سكت ليك بزاف وقلتي هادي خيط قصير وحكرتيني ... ولعود اللي تحكرو يعميك .. وانا مزال غادي نوريك ... و ولدك غير سيري زوجيه حتى ب 10 .. ماشي غير وحدة اصلا طلعتو ليا فراسي ماكرهتش نبيعكم كاملين ونرتاح منكم
قطعات عليها قدس ولاح تيليفون فوق البيرو كتخيخ ... اما لاللة عيشة بقات كطلع فيها وتهبط وهي جالسة وسط الفيلا عند ولدها دايرين بيها عيالات ولادها .. حنان ، نجية ولمياء
لاللة عيشة : بنت لحراام شوف شنو خرج منها
نجية : النهار اللول قلنا ليك راه بنت الحرام وماسمعتيش لينا ... هانتي زوجتيه ليها وحتى ولد معاها وتربط بيها عاد فقتي من القلبة
حنان : حسن ليه تفك منها .. دابا يجيب لالاها ... انا بعدا مابغاتش دخل ليا لخاطري يخخخ تهنينا منها
لاللة عيشة : بنت لحرام ... 8 ديال الملاين مليون كتنطح مليوح غادي تاخد وعاد الصروف ليها ولبنتها على دايم الدوام ... فاش جاتها الله وعلم !
حنان : اويلي على 8 ديال المليون ! مالها شكون تكون كاااع .. زايدون راه خدامة وكتخلص يعطيها مصيبة فهاد النهار
لاللة عيشة : المحكمة اللي عطاتها ليها
.. بغات تنتف ليه الريش ... الله ياخد فيها الحق ... ضحكات ليا على ولدي ولعبات بيه كيف بغات ... ولاكن انا اللي جبتها ليه بيدي ماشي هوا اللي مشا قلب عليها ... بلحق دايا نجيب ليه لاللاها ونوريها ونخليها تموت فسمها
لمياء : نتي خاصك اللي تحن فيك وديرك فعينيها وتهلا فيك وفولدك ... ماشي وحدة تزيد ليك الهم
نفخات حنان وعقات بيها كضرب على راسها وقالت
- هوا خاصو وحدة تقابلو وتكون مزال عزبة ماشي فايت فيها الزواج
ماحملاتهاش لمياء دازت ليها بحال الدم بين سنانها وقالت نجية وهي اصلا مكدوزش ليها من زمان
- مالو راه حتى مطلق وبالبنت ... مال المطلقة ! راه كيقلبو عليها للدواء حيت عارفة بحق الوقت
لاللة عيشة : حتى يطلق بعدا ديك الكارتة هي اللولة ... انا ولادي عمرهم اداو شي واحد واللي بغا ليهم الشر الله ياخد فيه الحق وينتاقم منو ... نهار اللول غلطنا فيها ومكانش خاصنا نزوجوها ليه ... حتى الصباح مابغات تجبدو لينا نشوفوه
حنان : كوراه ماشي بنت وستر عليها
نجية : باينة فيها .. وزايداها بالشيكي والعياقة وهي شابعين فيها وجات تضحك على الراجل ساعة لقاتو راجل
لاللة عيشة : حنا ماعرفناش واش كانت عزبة ولا ماشي عزبة ... ولايني الله وعلم ماتعرف
. هاديك راه يخرج منها العجب الله يستر
لمياء : واجي نقول ليك اخالتي ... كوراه حتى ديك البنت يمكن ماشي بنتو .. زعما تكون كتخونو ؟
حنان : انا بعدا جاتني مكتشبهش فيه كاع حتى شوية ! اويييلي وديرها زعما ؟
لالة عيشة الجزء الثامن
محتوى القصة
التنقل بين الأجزاء