أسيرة جبروته الجزء الخامس

رؤيا مسحت عينيها وعلات عينيها فيه وكلشي لي كانو حاطين للعين عليها...شحال باش عاد هضرت..

رؤيا:م مانقدرش...

أمين تصدم:ش شنو!!..واش حماقيتي...علاش ماتقدريش..خايفة منو..انا نقدر نحميك اختي..

صلاح كيشوفيها عاض علا شنافتو..

رؤيا:ل لا لا ماخايفاش..و ولكن خصني نبقى هنا...مابغيتش نزرعو الفتنة من جديد..

أمين باستهزاء:واش باش ماتنوضش الفتنة تمشي نتي فيها...هاد المرة تهرستي...مرة خرا يوعتوك من رجليك ولا يقتلوك..باش غيفيدوك هاد الناس؟؟

رؤيا:انا ماشفت من هاد الناس غي لخير...نهار زطمت فهاد الدار وعمي وخالتي واخة كانت العداوة عاملوني مزيان..وعتابروني بنتهم..داكشي علاش قلتلك بلاصتي وسطهم..

أمين تعصب ومشى شنق علا صلاح:باش مهددها ءءءء؟؟قولي شنو قولتيلها باش ترفض تعيش حياتها وتبقى منفية عندك!!

صلاح نثر ليه يديه وغوت:ختك هاهي قدامك...تفاهم معاها هي والا بغات تمشي ماغاديش نمنعها..ولكن باش تديها بزز منها عمرها تكون ليك..

أمين رجع شاف فرؤيا:لايمتا غتبقاي راضية بالذل اختي..علا ود شكون..علا ود خوك حميد.(هبطو دموع من عينيها)خوك لي مامسوقش ليك وعايش حياتو بالطول والعرض...علاش غي قوليلي علاش...

رؤيا:انا من نهار جيت واخدة وعد نكون سبب فنهاية هاد الصداع..واخة يكون علا حساب حياتي..ودبا ماغاديش نكث هاداك الوعد...سير اخويا ورتاح من جيهتي..انا غنكون هنا بيخير..

أمين عينيه حمارو وتنهد عرف بلي مامنهاش فايدة..تم غادي وهو يرجع وقابل صلاح..

أمين:والله لانسيتلك شنو درتي...عقل مزيان..فهمتي..

العين بالعين والسن بالسن والبادئ اظلم..

خرج أمين حاني الراس كأنو مهزوم والتاباقي واقفين معصبين من شنو جرا..

رؤيا ضربت الدورة وطلعت لبيتها كتبكي وتقول فبالها ياريتها مشات مع خوها..ولكن لااا شي حاجة منعاتها خلاتها تبقى هنا..مازال ماعرفتش شنو هي..

اما صلاح فاش خرج أمين عاد تنفس الصعداء وخرج للجردة بوحدو..كان خايف تمشي رؤيا معاه قبل مايعتاذر منها...رتاح فوق الكرسي كيشوف فالسما...

جلسو فالطبلة باقي العائلة..تا واحد ماكيهضر وكلشي كيفكر لطريقتو فشنو وقع..

أمين كان ياله جا من المدينة الليل كامل وهو سايق فاش عاودلو حسن علا لي وقع..ودبا عاد غادي لدارهم كيفكر ومحتاج يفدي الصرف لصلاح بالضبط علا لي دارو فختو..

خرجت مريم من السبيطار هي وماماها...ومشاو للدار ديالهم..غي طلعت فالدروج بدات تخيل مواقف وقعو بينها وبين كريم..تأزمت والدموع تعمرو فعينيها...تا نجية حست بيها..وجراتها تطلع للدار..دخلو للدار وهي كتشوف فلبلاصة لي جلس فيها..ماقدتش تصبر وبدات تبكي وهي نجية بقات مزيداها لبيتها..

نجية:صافي ابنتي باركة عليك من الدموع..

مريم:ماقاداش نجلس هنا اماما..عااافاك ياله نبعدو شوية..

نجية عنقتها:شووت صافي ابنتي..انا مجمع حوايجنا ونمشيو شوية عند خالتك واخة؟.

مريم هزت راسها كتمسح دموعها..

جا الليل وكل واحد شاد بلاصتو..

أمين فالدار تالف كل مرة يعيط فتيلي تا دخلت عندو رحمة..

رحمة:اولدي مالك مين جيتي ونتا مع تيليفون...

أمين:غي الخدمة ا لواليدة..نسالي ونجلس معاك..

رحمة:واخة اولدي...علا خاطرك..

أمين ناض باسلها يديها فاش حس بيها تقلقت:انا جيت علا غفلة والخدمة خليتها مرونة..عطيني غي نص ساعة ونجي نجلس معاك..

رحمة بسمت:واخة اولدي..

خرجت وخلاتو وهو ينتابه لرجاء كتصوني عليه قطع عليها ورجع يكمل الشغال لي بادي فيه..

نجية ركبت هي وبنتها فالكار ساكتين ومتكية راس بنتها عليها حيت مازالة عيانة..كتمنى بلي تبديل المكان يريحها شوية..

تعشاو كاملين منهم تا رؤيا لي بقات غي تلعب فالغطار حداهم وناضت..مساات عليهم وطلعت لبيتها..

حسناء تحسرت عليها وسكتت..

تخشات رؤيا فبلاصتها ناعسة علا جنبها ليسر حيت يديها معلقة فليمن..حطت راسها تنعس وطفات الضو..

صلاح بقى فبيتو كيلعب غتيلي ويتلف والو ماقدرش يصبر..وناض ببيجامتوو دخل لبيت رؤيا وشد لباب...

بقى كيشوفيها علا ضو فييوز صغير..وقرب بالشوية تخشى فالبلاصة لي حداها علا جنبو ليمن كيتأمل فيها داير راسو علا يديه وكيدوز يديه بالخف علا شعرها...

أصبحنا وأصبح الملك لله..

ضربت الشمس غبيت رؤيا..وهي نحل عينيها بعماشهم ولكن غي حلتهم لقات صلاح قدامها مغمض عينيه ومقابلها...تصدمت وطلع ليها الدم بدات تحاول دور(صلاح بدا يحل عينبه حيت حس بيها)نسات يديها تا كانت غتكي عليها وهي تقصح..

رؤيا:ااءءء ي...

صلاح شدها بيديه من جنبها ليمن كيقادها وهي تحيد ليه يديه..مالت شوية ومدورة وجهها منو وهو يقرب عندها..ودار يديه علا كرشها ويد حطها حدا راسها..

صلاح بصوت حنين:مازال كضرك يديك؟؟..

رؤيا ماشافتش جيهتو وهو شدلها يديها لي مهرسة من جيهة الصبعان غي بالشوية وحنى باسها..رؤيا قلبها بقى كيضرب بالجهد وواخة هكاك مصبرة راسها..

صلاح بصوت حنين:سمحيلي...ماكنتش فوعيي.(رؤيا مازال ماشافت فيه وهو كيدوز يديه علا شعرها)شوفي فيا...

رؤيا كأنها ماكتسمعش..دفعتلو يديه وبغات تنوض من بلاصتها..وهو يجرها طيحها علا ظهرها وتكى علا يديه مقابلها شاد فوجهها بيدو باش تشوفيه بزز..

صلاح بابتسامة:غتشوفي فيا بزز منك ياله...

رؤيا تعصبت:طلق مني..

صلاح:لاء..ماغنطلقش تا تقوليلي سمحتي ليا...

رؤيا بجدية:علاياش غنسمحلك!!غي قولي علاياش(عينيها دمعو ومارضاتش تبقى تشوفيه ودورت وجهها مخنوقة)..

صلاح تبدلو ملامحو:عارف...اه عارف بلي ظلمتك بزااف وقصحتك كثر..ولكن ماشي بيدي..خصك تعذريني...

رؤيا شافت فيه بعينين حومر:وانا شكون يعذرني!!مين جيت وانا كنحاول نبعد عليك باش ماتحسش بلي جيت ناخد بلاصت شي حد..واصلا مافنيتي والو ونتا عارف..ولكن نتا العكس..كنتي ديما كدير اي حاجة باش تضرني...كل ساعة كل لحظة..ليوم كان كيدوز عليا طويللل بزااف(دموع هبطو ليها)كنت ديما كنتمنى تعتابرني بحال ختك..وتخيل الا ختك كانت تزوجت بواحد فخوتي شنو غيوقع فيها..وتحاول دير معايا الخير باش ربي ينسيك همك..ولكن لااا...قاسي بزااف وعمرك غتبدل..اه كنحس بيك شي مرات كتندم ولكن كتولي وكتعاود شي تصرف صعب من لي قبلو..

صلاح مازال متكي قبالتها شادها من جنبها وكيسمع فيها وهي كتخوي قلبها وساكت...متبعها فكل كلمة..فكل دمعة هابطة من عينيها لي كتزيد تخليه يكره راسو..

صلاح وسط هضرتها وبكاها هضر:سمحيلي...ماغاديش نزيد ندير شي حاجة نقلقك..عارف ظلمتك بزااف ولكن صاافي..دبا فهمت ..فهمت بلي نتي بعيدة بزاف علا داك العائلة..

رؤيا خنزرت فيه:ماتهضرش نكا علا عائلتي...حيت فري مادارو ليك والو...وماشي هما لي قتلو مرتك..

صلاح دور وجهو معصب:رؤيا .عافااك بلا ماتحامي عليهم..هاد الهضرة كتجهلني..ماكنحملش نسمعها..

رؤيا:نتا ماكتحملش غي تسمعها..اما انا خوك قدامي وقتل ليا بابا ماشي غي راجلي...وكنحاول واخة هكاك نتعايشمع الموقف..كلما كنشوفو كنتخيل دم بابا فيديه اهئ اهئ كنحس بلي الا عاملتو مزيان بابا غيغضب فقبرو..والا ماتقبلتوش غنرجع كاع الصداع لي كان..(كتمسح عينيها وصلاح متأثر كيسمع فيها)شتي قبل ماتشوف ألمك ومشاكيلك...شوف الناس لي قدامك..ماشي غي نتا لي كتعاني.....خليني نوض عافاااك..

صلاح:حاولي تسمحيلي ا رؤيا..

رؤيا تعصبت وبغات تنوض حيت فري ماقاداش تسمحلو ولكن هو زير عليها وحنى عليها بالجنب باسها فشنايفها خلاها تزيد تعضب وكدفعو بيد وحدة ولكن ماقداتش عليهكلما كتبعدو كيزيد يلصق فيها بحالا فيها العسل..شوية وهي تحبس وبدات ترخى وهو كيمص فشنايفها كل مرة كيشد وحدة بفمو وكيتلذذ بنشوة غريبة...اما هي غمضت عينيها وعاد عرفت السبب الحقيقي لي خلاها ماتمشيش مع خوها وتبقى هنا ..مع الشخص لي لمس حاجة غريبة فيها وخلاها رغم العذاب تحس لاحساس جديد نقي وزوين..عمرها حساتو من قبل..وخلاها تبدا تنسى كااع داكشي لي داز عليها منو واخة هي مازالة مجروحة وبزااف..

وبعد اندماج بيناتهم لمدة طويلة حيد شنايفو وطلع عينو فيها وهي عاد حلت عينيها فيه وهو قريب منها...بسم وباس ليها راسها..

صلاح بصوت خافت كيبورش:الله يسامح..

رؤيا تنهدت كتشوف فعينيه ماقدتش تزيد تغضب منو..هضرت بعفوية خارجة من القلب:واخة..

فرح صلاح وضحك فوجهها:رتاحي انا غنمشي نجيب لفطور لهنا ونجي..

رؤيا بحشمة:غي خبينا نهبطو لتحت نفطرو كاملين..

صلاح بجدية:صاافي راه هضرت..

رؤيا صقرت وهو يغمزها باش مايخليهاش تزيد تخاف منو😜..

خرج وهي حكت راسها وناضت بالشوية غسلت وجهها وخرجت كتساينو يجي..اما الصلاة دبا خصها تا دير الوضوء لكبير بعد لي وقع فيها فداك البوسة هههه...

دخل صلاح للكوزينة ناشط:صباح لخيررر..

فاطنة ولطيفة:صباح نوور..

صلاح:وجدولي لفطور فشي بلاطو..غنطلعو لفوق ..

لطيفة وفاطنة فهمو وعجبهم الحال:واخة اولدي شوية ونوجدوه...

صلاح حس بيهم فهمو دور وجهو من شوفاتهم وواخة هكاك ماقادرش يحبس ابتسامتو لي باينة فعينيه..

وجدو ليه الفطور بزربة وعطاوه ليه وهز تم طالع وهي تشوفو حسناء بغات تهضر علا حاجبو فيها وهي تسكت..هبطت كتجري لعندهم وكضحك..

حسناء:ايييه لفطور ولا يطلع لفوق هههه..

فاطنة:سكتي حسن ماتعينيهم ههه..

وصلت نجية وبنتها للفيلاج وشدو خطاف يوصلهم للدار..

اما رحمة وأمين جالسين فالدار كيفطرو..

أمين:فين هو حميد مين جيت ماشفتو..

رحمة:هانتا كتشوف اولدي..من نهار تزوجت رؤيا مابقى يعمر معايا فالدار وديما معصب..

أمين بكره:هاداك راه غي شماتة وماشي راجل..كون كان راجل ما...

رحمة ماعارفاش وهي تفاجئ فهضرتو:ش شنو اولدي اش كاين؟.

أمين تراجع وكان غيعاود شنو وقع لرؤيا:لااا والو غي عصبني من نهار خلا ختو تزوج من داك العائلة دالزفت..

رحمة:اوا الله يهديه اولدي ماعندنا مانديرولو..

دق دق..حلت سعدية لباب وهي تلقى مريم ونجية فوجهها..

سعدية بفرحة:اهلا اهلا مرحباااا..

رحمة دورت وجهها تا شافت ختها وبنتها فرحت وناضت طايرة غيعمرو عليها الدارمن جديد..مشات عنقتها وفرحت بيها ودخلتهم..اما أمين سلم عليهم وناض يقضي شغالاتو ويشوف احوال الارض والزريبة والكوري دالبقر..

صلاح دخل لبيت لقى رؤيا جالسة:طلعي لبلاصتك..

رؤيا طلعت وتقادات وهو جاب لبلاطو حطها علا رجليها وجلس مقابل معاها كياكلو بجوج وكيدهن ليها الخبز حيت يد وحدة صعيب توكلها...

وصل أمين للكوري وغي شافو خدام تما فرح..

الخدام:سي امين حمدلله علا سلامتك..

أمين:شكرا..اوا امدرا كلشي مزيان؟؟

الخدام حنى راسو:الصراحة الحمدلله لي جيتي...هادي ايام وحنا معذبين هنا..لا ماكلة دالغنم كتجي فالوقت..وعلف للبكر..ترونت القضية..

أمين عقد حجبانو:وعلاش؟؟

الخدام:سي حميد..مابقاش يطلل علينا وديما كيقولينا قضيو بلي كاين...كيغبر شحاال عاد كيبان لاغراضو..

أمين:اينا اغراض؟؟

الخدام بخوف:ك كيجي وكيطلب نبيعو ليه جوج بكرات وكياخد لفلوس ويمشي..

أمين تصدم:كفاااش!

حسناء بقات لاصقة ماماها تمشي للسوق وهي تصافطها مع الشيفور باش تجيب لي باغية..وهي غرضها غي الغورميط مسكينة..

صلاح هبط لبلاطو لعندهم وخلا رؤيا لفوق ترتاح..تلاقا خوتو وجمع معاهم شوية..

أمين كيسمع لخصايل خوه وكيتعصب حيت فري كيضيع ليهم فرزقهم ومافخباروش...شوية وهو يجيه تيلي...جاوب عليه مزروب ومشى كيجري بلا هضرة..

مريم ونجية قادو حوايجهم فلبيت..شوية نجية خلات بنتها ترتاح وتفدي النعاس حيت مريضة..اما هي مشات عند ختها كتفش قلبها عليها وتبكي...اما رحمة كتهدن فيها وفشي لحظات كتبكي معاها فاش كتعرف لحال لي وصلت ليه مريم مسكينة...

قرب وقت لغدا وكلهم تجمعو فالطبلة تا رؤيا هبطت حداهم وصلاح تالف معاها مامسوق لتاحد كيبسم ليها وهي كتحني راسها وتحشم..اما حسناء ماليها أثر عيااات لطيفة تصوني عليها ماكتجاوبش..شوية سمعو الدقان حلو..لقاو الشيفور لي صافطاتو لطيفة مع بنتها مضروب فراسو..

لطيفة غي شافتو شداتها السخفة..

اما صلاح زاد قدامو هضر معاه:جيلالي..اش واقع ياك لاباس؟؟

الشيفور شاد راسو المضروب:ضربوني اسيدي..

لطيفة:اويلي فين بنتي؟؟

صلاح بجدية:علاش حسناء كانت معاك؟؟

الشيفور بخوف:ءء اهههه..كانت معايا ول ولكن.....

لطيفة زادت حداه كتغزل:ولكن شنو فين حسناء..ياك ديتيها للسوق تسخر وتجي..

الشيفور:ءء اه مشينا وفاش كنا راجعين..حبسونا فالطريق..وو..داوها...

لطيفة:اويلي فين داوها؟؟

كلشي تصدم وخافو..

طاهر هضر بصدمة: ش شكون داها؟؟

الشيفور:ل لي خطفوها ق قالولي وصل للحسناوي خصوصا صلاح...بلي ختو غيدوز عليها لي داز علا رؤيا بنت الطراشن..

رؤيا تصدمت وصلاح دار خنزر فيها مصدوم...

كريم هضر بتأكيد:ء أمييييين!!!!

رؤيا تصدمت بقات مسمرة فبلاصتها اما طاهر قلبو ناض يحرقو جلسوه خالد وكريم..

ولطيفة كتهدنها فاطنة...

صلاح كيهضر مغزف:عاودلي بالتفصيل..شنو وقع؟؟

الشيفور بدا يتخيل....

#فلاش_باك...

حسناء راكبة لور وراجعين من السوق فرحانة حيت لقات لغورميط واجدة وماتعطلتش..شوية وشي طوموبيل بدا تزاحم معاهم فالطريق..والشيفور تزير خاف يوقعلو بحال كيفما وقع للشيفور لي قبل..بدا يحاول يسلك طريقو..ولكن حسناء حست بيه..

حسناء:عمي الجيلالي..اش واقع؟.

الشيفور:لا ابنتي ماتخافيش..غي الطريق عامرة وصاافي..

حسناء رتاحت ولكن شوية وقفولهم فالطريق فاش خوات..طوموبيل لقدام وطوموبيل لور..تصدمو بقاو يدورو وجههم لور ولقدام..شوية وخرجو رجال عراض وجاو هاجمين علا الطوموبيل..غي جا يسولهم الشيفور خرجوه.وشدوه من دراعو بجوج كيغوت..

الجيلالي:طلقوووني..اش بغيتو منا!!

اما حسناء بدات تغوت:عتقووونا...

خرجوها كدفع فيهم ودارو ليها مشوار فيه منوم وهي ترخى بعدما بقات تفركل برجليها..اوا هما هزوها ودخلوها للطوموبيل..

الجيلالي كيفركل:طلقووو لبنت...طلقوووهاااا..

واحد فيدور هضر معاه:شوف نقولك...نتا غترجع لعند الحسناوي وغتقوليهم ..خصوصا سيدك صلاح...غتقولو بلي ختو غيدوز عليها لي داز علا رؤيا بنت الطراشن...فهمتيييي...

مع الكلمة التالية مع الضربة للراس دوخوه بيها ومشاو..

#العودة_الى_الواقع..

الجيلالي:هادشي لي بقيت عاقل عليه..

لطيفة بدات تبكي:الله ياربي الله...اهئ اهئ بنتي مسكينة مشااات...

صلاح دار عينيه حومر متاجه عند رؤيا لي قلبها كيزدح فلمية ومامثيقاش بلي خوها يقدر يدير هكا...

صلاح شدها من يديها لي مامهرساش ومزير عليها:فين خوك؟؟؟

رؤيا بدات تفتف وعينيها كيدمعو:و والله م مااا..

صلاح بعصبية:بلا مادوخي علا دينمي...هادشي ديالكم تعدى القياس...فين خوك!!(غوت تا قفزت)هضررررري..

رؤيا بتوتر:س ساين ا انا غنصوني عليه وعلا ماما نشوفو فين...

رؤيا هزت تيلي متوترة كتصوني عليه وصلاح واقف عند راسها...التيلي بقى يصوني يصوني ووالو ماكيجاوبش..

رؤيا بخوف:ك كاااع ماجاوب...

صلاح بغوات:عيطي للدار...

رؤيا تيلي كان غيطيح ليها من يديها وماكتعرفش تخدم ليد اليسريا بزز باش كتقلب بيها..تا صونات علا ماماها..

رؤيا:هاه الو ماما..

رحمة:اهلا بنتي...توحشتك...

رؤيا بزربة:تا انا..ماما..سمحيلؤ نسولك..امين صونيت عليه ماجاوبنيش واش راه فالدار؟.

رحمة:لا ابنتي..قبايلا خرج..مارجعش..كاين هنا غي نجية ومريم..

رؤيا بلا مبالاة:واخة ممكن تصوني عليه وقولو يجاوبني ضروري واخة؟.

رحمة تخلعت:ببنتي باك لاباس؟؟

رؤيا:ءء امم لا والو غي بغيتو فشي حاجة وصاافي..

رحمة:واخة انا نحاول والا جاوبني نرد عليك واخة..

رؤيا:واخة..

قطعت رؤيا وصلاح مخنزر فيها:شتي الا وقعت شي حاجة لختي..ماتلومو غي راسكم ا الطراشن...

رؤيا شدتها الخلعة وماعرفت مادير..زعما معقول يكون أمين هو لي دارها ولا شي حد آخر وجات لاصقة معاه...حيت هي كتعرف أمين مزيان..وكتعرف قداش عقلو كبير ومايمكنش يدير شي حاجة بحال هكا..

فبيت مشدود جالسة حسناء علا كرسي شادين ليها يديها ورجليها ملتحت وواقف واحد عند راسها داير مضاد للمنوم فمشوار آخور وبدا يشمو ليها باش تفيق...تا بدات تحرك وتحل عينيها بزز مع راسها مازال ثقيل....شوية وهي تنتابه فين هي وبلي مربوطة غوتت..

حسناء بخوف:مااامااااا...عقوونييييي اهئ..

شد ليها فمها الشخص لي موراها وحنى عند وذنيها وهضر:شووووتتتت ماغيسمعك حتى واحد...

حسناء خرجت عينيها ودورت وجهها شوية وهي تشوفو....

بقات رؤيا جالسة علا اعصابها تا صونات عليها ماماها جاوبتها بزربة..

رؤيا:ألو ماما..جاوبك!!

رحمة:لااا ابنتي...ماجاوبنيش..

رؤيا تأزمت:اوك الا جا ولا هضر معاك قولو يهضر معايا ضروري..

رحمة:مالك ابنتي..شكاين خلعتيني!

رؤيا:لا لاماكاين والو..ياله خليتلك الراحة..وحقى سلميلي علا خالتي وعلا مريم..

كريم غي سمع سيرة مريم عرفها جات لهنا..قلبو بدا يضرب وتفكر كلشي دوزو معاها..

قطعت رؤيا وشافت فصلاح:ماكيجاوبش..زايدون يقدر يكون خدام وماداير والو..

صلاح بعصبية:ماكاينش من غيرو يتجرأ ويدير هكا..أصلا هو قالها بفمو"العين بالعين والسن بالسن والبادئ أظلم.."يعني كان عوال ينتاقم..

رؤيا حدرت راسها وهي لطيفة ناضت عندها:الله يخليك ابنتي اهئ اهئ فكري فين يكون خوك نمشيو نجيبو حسناء..يااك هي صاحبتك ياااك..عمرها دارت فيك العيب اهئ اهئ...عاافاك قولو يجيبهالي اهئ اهئ..

رؤيا تزيرت وحشمت منهم كاملين وهي تبوسلها يديها:ماتخافيش اخالتي...حسنااء غترجع بأي طريقة..والا كان خويا لي دارها انا اول وحدة غتشهد فيه..

صلاح تعصب وغوت:علاااش كطلبيها ..حنا غنجيبو ختنا شنو ماوقع...بقالنا غي نرغبو فالطراشن...

رؤيا شافت فيه كتبكي وهو كاره الشوفة فيها..

حسناء بخوف:ن نتا!!

دار وقابلها:اه انا...

حسناء:حرااام عليك...شنو درتلك انا باش تجيبني هنا اهئ اهئ..

هو:وشنو دارت رؤيا باش تاكل الدق من عند خوك..(غوت)جاوبيني!!

حسناء:اهئ اهئ انا عمرني آذيت رؤيا وسولها الا بغيتي..

أمين جلس علا كرسي قبالتها مقلوب حاط يديه علا الظهر ديالو ومخرج رجليه مع الجناب:عارف...

حسناء:اوا علاش خطفتيني!!

أمين:باش خوك يحس بالنار لي شاعلة فيا...

حسناء بخوف:و ودبا شنو غدير فيا!!غتقتلني ياك اهئ اهئ..

أمين ناض ودور وجهو وخرج..

بقات حسناء كتبكي ربي لي خلقها وكتحاول تفك يديها ورجليها..

أمين خرج علا برا ووصى جوج رجال:شوف..غتبقى هنا لبنت..شوية ونرجع..لي تجرأ ومد يدو عليها غنهرسهالو فهمتو!!هي هنا أمانة تا ترجع لدارهم..

لول:اه ا سيدي كون هاني..

اما الثاني واخة هز راسو فيه الدغل..

صلاح بعصبية:واش غنبقاو جالسين..نوضو نقلبو عليها..

خالد:وفين غنقلبو..لي خاطفها ماغيخليهاش فدارهم ولا فبلاصة معروفة..

كريم:ولكن ماخصناش نبقاو جالسين..فهمتو..

صلاح دورها فدماغو ومشى عند رؤيا:اري النمرة دخوك..

رؤيا خافت علا أمين واخة هكاك:ع علاش!!

صلاح بغوات:واش عاد كتسولي...اريهاااا..

رؤيا عطاتو تيلي وهو خدا النمرة سجلها فتيلي ديالو:خالد كربم تبعوني..

طاهر:قلبو علا ختكم وماترجعو تا تجيبوها فيديكم اولدي..ولكن بلا قتيلا وصداااع..

صلاح عينيه حومر وشاف فرؤيا حاقد:مانضمنش ليك..

خرجو الدراري سايق بيهم خالد وصلاح كيجري مكالمة..

صلاح:ألو شاف نسيم..بغيت نعرف واحد النمرة فين الموقع ديالها ممكن!

نسيم:سمحلي ا صلاحمانقدرش نعاونك فشي حاجة بحال هكا الا ماكانش اذن من النيابة العامة..

صلاح:ولكن المسألة..مسالة حياة او موت..

نسيم:عالي شنو واقع باش ندخلو السلطات فالبحث..

صلاح:لاااا..مايمكنش..كاين مشكل بسيط وغنحلوه...ونتا الا مابغيتش تعاونا بلاش...تيييط تتتتيط تييط..

صلاح حط تيلي معصب..

خالد:دبا حنا فين غاديين!!

صلاح باتجاه لفيرمة ديال هاداك نشوفوه واش تما..

نسيم رجع صونا علا صلاح حيت شحال من مرة عاونو فخدمتو..وهو يجاوبو ببرود..

نسيم:صافط النمرة ةانا غنعاونك..

صلاح بسم جنب:اوك قطع انا غنصافطها..

قطع عاجبو لحال ومتحمس وريكل الامور كيساين يجيه الموقع..

وصلو لفيرما وبداو يسولو علا أمين وعرفو بلي من الصبح ماعاود رجع..حاولو يعرفو كثر عليه ولكن والو.

شوية وهو يجيه مساج بالموقع ديال تيلي..هنا خرج صلاح بزربة وخوتو تابعينو..

رؤيا جالسة حشمانة وسطهم..ماعارفة مادير..تا قالت بلي حياتها غتقاد وتضرب ليها كلذي فالزيرو..

فالمكان لي فيه حسناء داز لوقت شحال علا غياب أمين..وهو لول بغى يمشي يقضي حاجتو..

لول:شوف غنمشي شوية ونرجع..وماغاديش نتعطل واخة..

الثاني عجبو لحال:غي خوك راحتك ههه..

لول:عاندااك يجي شي حد هنا حظي راسك..

الثاني:كون هاني غي سير..

غي تحرك لول دخل لاخور عند حسناء وحاس براسو سخون مع شاف حسناء من قبل وعجباتو بزااف..

حسناء غي شافتو خافت:خ خويااا عافااك عاوني نخرج من هنا اهئ اهئ..

هو بابتسامة فيها رغبة:اهاه نعاونك ازين...علاش لااااا...

حسناء من نبرة صوتو حساتو فشكل خرجت عينيها:ش شنو...شنو بااغي دير..

هو بشهوة قرب وقاس شعرها وهي كتبعد:بغيت ندوق الحلوة ا زين هههه...

صلاح شاد التيلي وكيقلب علا الموقع بي صافطولو نسيم..ولكن فاش بدا يوصف لخالد لبلاصة تفاجئو بلي الموقع لي غاديين ليه هو فيرما الطراشن..

مشاو ووقفو فلباب ولكن لقاو الحراسة مشددة علا الفيرما..

خرج خالد حيت صلاح وكريم دغيا كيتعصبو..

خالد:السلام..

لكارد مخنزر:سلام..

خالد:بغينا نهضرو مع سي أمين الطراشن!!.

لكارد:سي امين ماكاينش..

خالد عقد حجبانو:مايمكنش!!هو قالينا غيكون هنا..

لكارد:وانا كنقولك ماكاينش..

خالد:ممكن تعيطلو تقولو حنا كنساينوه..

لكارد:عيطلو نتا نيت لي داير معاك...هادشي الا بصاح كان داير معاك..

خالد:دبا حنا كنتفلاو..

لكارد بعصبية:سير حسن ليك..ماتبقاش مصدعلي دماغي..

خرج صلاح وكريم تا هو موراهم..

صلاح:اش واقع هنا!!علاش مابغاوش يحلو لباب..

لكارد:سايبة باش نحلك..خويو عبيا من هنا ولا غتشوفو لي مايعجبكمش..

صلاح:شنو غدير كااع..

بداو يدافعو وكريم وخالد كيشدوه..

نجية ورحمة كانو فالجردة سمعو الصداع وتمو خارجين بزربة..

رحمة لكارد لداخل:حل لباب..

لكارد:لااا..سي امين منبه عليها ماندخلو حد..

رحمة تعصبت:شنو كتخربق وشنو واقع..واحنا فالحبس..ولا كفاش؟؟

نجية زادت مخنزرة:اهيا نتا اراس الطرومبية..حل حسن ماندير شرع يديا..

لكارد دور وجهو منهم خلاهم يتقلاو ويغوتو بوحدهم..

صلاح كيغوت:حل لباب ا داك الشماتة...راني عارفك لداخل..حلللللللل...

شوية وهي تجي طوموبيل ووقفت فلباب خرج منها حميد كيشوف مافاهم تاوزة..

حميد بغوات:اييي اش كاين؟

صلاح دار جيهتو:جيتو ا الخطافة...فين ختي!!هضر فينهيا..

حميد ببرود:اينا ختك..واش لي تلفتلو شي حاجة يلصقها فيا..زايدون ماعارفش بلي ممنوع عليكم تقربو من الفيرما ولا نسيتي...ونتااا(شاف فكريم معصب)ا لقتال اش كادير هنا؟؟صاافي قتلتي قط..دغيا سحابلك غنساو؟؟

خالد كيبرد اعصابو وشاد فصلاح وكريم:شوف ا حميد.ماشي وقف نجبدو لماضي...ليوم تخطفت ختنا..وتأكدنا بلي خوك لي دارها..وعارفينو لداخل..قولو يخرج يواجهنا وبلا مايدير بحال الشمايت..

حميد شافيه:أمين!!فين عمر امين خطف شي حد..واش كتفلاو عليا..اصلا أمين ماكاينش هنا..

صلاح:صباح لخيرررر..راه جا لبارح وكيهدد فينا..

حميد كان فعالم آخور ماعارف والو:لمهم دبا اش بغيتو؟؟

صلاح:فتح لينا نشوفو خوك..

حميد:والا ماكانش لداخل..

خالد:كنواعدك مانديرو والو..لمهم بغينا غي نشوفوه..

حميد ببرود:انا غندخلكم..حيت الا اصلا فكرتو ديرو شي حاجة غتجنيو غي علا راسكم..ولكن هاداك ماغيدخلش..

كريم:لا انا غندخل مع خوتي..ماغاديش نخليهم بوحدهم..

حميد:ياااك زعما نتا لي غتحامي عليهم..ههه اوك دخلو ولي دار شي حاجة ياويلو مني...اصلا من شحال هادا كنتمنى تجيني فرصة نسطحكم كاملين..

خالد هدن خوتو..وغمزهم مايجاوبوهش..دخلو مور حميد للدار حابسين راسهم بزز باش مايضربوهش..

رحمة شافتهم ماعرفتش اش واقع!!اما نجية مستغربة فالرجال لي داخلين مع حميد تا كيبان ليها كريم وهي تصدم...

نجية مع راسها:ك كرييم...ولد لحرااام..شكايدير هدا هنا؟؟

حميد:لواليدة فين أمين؟؟

رحمة كتشوفيهم كاملين:ماكاينش..اولدي....هادو شكايديرو هنا؟؟

حميد:جاو يقلبو علا امين..قالك خطف ختهم هههه..كيتفلاوو علينا...

صلاح كيدور فعينيه اما خالد سول رحمة بهدوء:خالتي عاافاك ممكن تدخلي تشوفيه واش كاين..حنا متأكدين بلي كاين هنا..

رحمة:والله ماكاين اولدي..خرج قبايلا..وكااع مارجع..

حميد:دخلي الواليدة شوفيه فبيتو..واخة!!

رحمة:واخة اولدي..

صلاح هز تيلي كيصوني عليه فالنمرة..اما كريم شاف نجية تلف ماعرف مايدير..وهي واقفة مخنزرة فيه غتقتلو..

حسناء كتغوت ربي لي خلقها ولاخور كيتلمس فيها بالشوية ويحاول يحيد ليها حوايجها بلا عياقة..

حسناء:بعدددد منييي اهئ عتقوووونييييي اهئ اهئ..

هو:شوتتت بلا غوات ا تيتيز..مازال تغوتي..بدا يحل ليها رجليها كيقيس فيهم..تا بغى يتخشى وسطهم..

أمبن بغوات:شكادبر ا داك الزا**ل..

دار كيشوفيه مصدوم وأمين واقف مخنزر فيه:ج جيتت غ...

أمين مشى جرو من الكول ديالو وبدا يضربو برجليه لجحرو ولبونيات وحدة مور وحدة..

أمين:جبتك تحضيها ولا تطلق وسخك ا شماتة تفو..(طيحو للارض وكيركل فيه)ولد الكلب...حيوااان...

جا لول وبدا يفرقهم..

حسناء كتبكي وكترجف مسكينة..

أمين:خرجو عليا..لي بحالو مانبغيهمش يخدمو معايا..تفو بل موسخ لاخور..

نوضو هاداك وخرجو علا برا..يمشي بحالو..

دخلت رحمة كتقلب مالقاتوش وهي تسمع صوت تيلي..لقاتو ديال أمين هزاتو وخرجت..

أمين حط داكشي لي كان فيديه وبدا يبرد اعصابو:نتي مزيانة؟؟

حسناء هزت راسها بخوف..

أمين:ماتخافيش..انا ماجبتكش هنا باش نضرك..انا جبتك حيت بغيت خوك يفهم قداش كيتقصح الراجل فاش كيشوف ختو فالخطر والعذاب..

حسناء حدرت راسها كتسترجع قوتها..

رحمة خرجت عندهم بزربة:ولدي..كيف قلتلكم أمين ماكاينش...ولكن لقيت تيليفون ديالو لداخل...هاهو..

صلاح تأقف وعرف بلي أمين مخلي تيلي غي باش يتلفهم اكسبري...

مريم سمعت الحركة بزااف فالدار ناضت بالشوية كتقلب عليهم مازالة مدوخة بالنعاس..

خرجت تابعة الصوت تا لقاتهم فالجردة..

مريم:ماماااا...

كريم غي سمع صوتها تشوكا ودور وجهو سبونطاني يشوفيها...

اما مريم عاد انتابهت ليه وحلت فمها مصدومة:ك كريم؟؟!!

نجية مشات عندها:ب بنتي ياله معايا..

مريم:م ما ش شنو كيدير هنا!!جا يقلب علينا ولا شنو؟؟

صلاح تعصب:ياله نمشيو ماشي هنا داكشي لي باغيين..

حميد:قلتهالكم..ياله برااا..

كريم عينيه مع مريم ولكن خالد جرو وخرجو وهي كتشوفيه بعينين مدمعين والألم باين عليها..

نجية:م ماتديهاش فيه..عرفتي شكون صدق!هاداك واحد من أعداء ولاد خالتك..اذن ماتفكريش فيه..مايستاهلكش..

مريم هبطو دموع من عينيها فصمت وعاد فهمت علاش بعد اول ماعرف سمية راجل خالتها..دخلت لبيتها مبعدة علا الصدااع..

رحمة بتوتر:فين هو أمين اولدي؟؟

حميد:ههه ماعرفت..مي الا كان هو لي خطف ختهم..غيكون ولا راجل اخيرا هههه..

رحمة:شنو كتخرف وختك لي وسطهم؟؟

حميد ببرود:ماغيديرو ليها والو...

دخل وسمح فيها حايرة فهمها..

أمين هز لبلاستيكة كيجبد منها ماكلة:جاك الجوع!!

حسناء:لااا..بغيت نمشي بحالي..عافاااك ردني لدارنا..

أمين:لا خصك تاكلي..تعطل لوقت ودبا تكوني جعتي...

حسناء:واا عافااك اهئ دبا يكونو كيقلبو عليا واكيد غتجي فيك..

أمين:ماتخافيش عليا..(فتح ليها يديها)هاكي كولي وكلشي غيتقاد..

خدات حسناء الماكلة من عندو كدور فعينيها وتقلب منين تهرب..

خرجو الدراري ركبو فالطوموبيل مكرهين حيت طاحو فالفخ..

خالد:دبا فين غنمشيو!!

صلاح كيحك راسو:ما عرفتش..اوووف...

أمين جالس كياكل مع حسناء تا جاه تيلي..وعاودو ليه كاع لي وقع..تفاجئ بتصرف خوه..لي دخلهم للدار بعد كااع لي داروه..وناض خرج حدا لباب كيهضر معصب..

أمين:انا جريت علا واحد فداك الجوج لي صافطتي ليا..شوف مين نقولك صافطلي رجال..(حسناء كتحاول تنوض وتقلب منين تهرب)شوفلي رجال دبصح..ماشي لي كيمشيو بالغريزة ديالهم..عالم موسخ تفوو....لاااا دبا مامحتاجش لواحد آخور..اي جديد علمني بيه....

دخل أمين ولقاها فبلاصتها مابانت ليها تا بلاصة تهرب منها من غير لباب لي كان حداها..

أمين:شبعتي؟؟

حسناء:اه..حمدلله..شكرا..

خدا امين الماكلة وحطها مع الجنب جالس حداها حيت مابغاش تعرض حسناء لأي حاجة ممكن تضرها..

حسناء:علاش ضربتي هاداك قبايلا!!

أمين:حيت انا ماجايبوش باش يدير لي بغى..

حسناء:اوك..شكراا..

أمين:علاش؟؟

حسناء:حيت عاونتيني وحميتيني منو..

أمين جبد تيلي وحنى راسو عليه ماجاوبهاش...وهي بقات حاضياه كتشوف كفاش كيتصرف..

حسناء:ماغاديش تربطني؟.

أمين ماكيشوفش فيها:لاا..

حسناء:علاش ياك نتا خاطفني؟؟

أمين خنزر فيها:ماغتسكتيش..اوووف..

حسناء سكتت وغوبشت..اما هو حنى راسو كيعيب فوجهو مكره منها..

تعطل لوقت والدراري كيقلبو تا عياو مابانش ليهم الاثر..شوية ورجع بيهم خالد للدار..

صلاح:عااش رجعتي؟؟

خالد:خصنا نمشيو للدار حسن مانبقاو ندورو منها تا نظمو افكارنا..

صلاح:ولكن حنا مازال مالقيناها!!

خالد:غلقاوها غي تهدن..

كريم سارح فتفكيرو وكيخمم غي فمريم وحالتها لي ماعجباتوش..

دخلو للدار وكلهم مترقبين..رؤيا وقفت هي ولطيفة..

طاهر زاد بزربة سولهم:امدرا لقيتوها؟؟

صلاح حدر راسو ودخل..

خالد:لا ماازاال..

صلاح مشى يجلس محمر غي فرؤيا..وهي خايفة..ماشي منو..خايفة علا حسناء..لاتوقع ليها شي حاجة..

قرب ليل والدراري طالقين رجالهم والكلاب يقلبو فكااع لفيلاج والنواحي وهما كيحاولو يصبرو..ومايديرو تا حاجة يعقدو بيها المسائل..

لطيفة عيات صابرة وهي تنوض كتبكي وتغوت:انا بغيت بنتي اهئ اهئ..هادشيي بززاااف اهئ اهئ فين غتكون فيننن اهئ..

صلاح تنهد وهو يصوني ليه تيلي لقى نمرة غريبة جاوب بسرعة..

صلاح:ألو..شكون!!

أمين:ههههه صلاااح...باينة فيك عييتي بالتقلاب علا ختك ياك!!

صلاح وقف معصب:أمين!!

رؤيا خرجت عينيها وكلهم واقفين كيتصنتو..

أمين:هو أنااا هههه..

صلاح:فين ختي ا زا**..فين ديتيها هضر...كدير الخدمة دالشمايت...غي باان قدامي ونشوفوك علاياش تقد..

أمين:هههه برد...مالك معصب اصاحبي...ختك عندي...هاك سمع صوتها..

حسناء:صلااح..

صلاح:حسناء(رؤيا تصدمت عرفت خوها لي دارها..صاافي تسالاو ليها والدموع بقاو هابطين)..ماتخافيش انا غلقاك..ياك نتي لاباس..

حسناء جات طمن خوها وهو يحيد ليها تيلي:ماتخافش..تهليت فيها هههه..

صلاح عينيه حمارو:والله وتقيس شعرة فيها تا نقتل دينمك ..

أمين:شعرة ههه...نتا كتهضر غي علا شعرة..اما ختي هرستيها وهنتيها وماخليتيش طريقة ماعذبتيهاش بيها..ودبا كتهضر علا شعرة....(صلاح مغلغل وكيسمع)دبا الا تبعنا هضرتك..خصني مانخلي ماندير فختك..

صلاح غوت:والله وتمسها تا نحيك..

أمين ببرود:حسيتي بيا!!ءءء..عرفتي باش حسيت فاش شفت ختي هكاك....هادا هو هدفي...تييط تييط..

صلاح تعصب:ألو..ألووووو...قطع تفووو قطع ...بيمنيني ولقاه دبا تا نقتلو..

تم خارج وخالد كيشدو:فين غادي؟.

صلاح:غنقلب عليه..باش نصفيها ليه..

رؤيا كتبكي بالجهد وهو يخنزر فيها:كتبكي....والله وتضرت ختي تا نبكيك دم..نتي وطاسيلك ييخ تفووو..

وفوسط غواتهم تدقت لباب حلت فاطنة وهما يتصدمو...

فاطنة بصدمة مخلطة مع الفرحة:ح حسناااء!!!

حسناء عنقتها وبسمت ولطيفة مشات كتجري وعنقت بنتها...علا عينين كلشي..

رؤيا بسمت وحطت يديها علا قلبها..ومشات تاهي عندها..

صلاح واقف مصدوم..

طاهر مشى عندها:ب بنتي نتي مزيانة..

حسناء بابتسامة:اه ماتخافوش انا مزيانة والله..

لطيفة:متأكدة؟؟

حسناء:والله ..

صلاح قرب عندها:شكون جابك لهنا!

حسناء شافت فرؤيا:أ أمين...

صلاح عقد حجبانو:ومادار ليك والو!!

حسناء:لا ماتخافوش....اصلا فاش صونا عليك..كنا قرابين من الدار...

رؤيا بهدوء:علا سلامتك..

حسناء:الله يسلمك..

فاطنة:اوا دخل ابنتي..دخلي ترتاحي..

حسناء:واخة..

دخلت حسناء ولطيفة ماراخياش منها وكلهم مستغربين الموقف..

خالد:كفاش تا طلقك بها. السهولة؟؟مافهمتش!!

حسناء:هو قالي بلي كان باغي غي يحسس صلاح بقداش الراجل كيتقصح فاش كيشوف ختو كتعذب...وزعما يشربو من نفس لكاس لي شرب منو...ولكن الصراحة ما آذانيش...بالعكس حماني من واحد تماك..وعاملني مزيان وغداني ودبا جابني لهنا ومشى..

رؤيا ارتاحت وتنهدت كتمسح وجهها من الدموع:الحمدلله..

صلاح زير علا القبضة ديالو..ودار خنزر فيها:نتي...اه نتي شنو مازالة كديري هنا؟؟(رؤيا شافت فيه بخوف)مانبغيش نشوف كمارتك مرا خرا..تحركييي..

رؤيا دارت بغات تطلع لبيتها وهو يجرها من يديها لي مامهرساش..

صلاح كيهضر تحت سنانو:ماقصدتش طلعي لبيتك..قصدت تغبري كمارتك عليا فمرة..خرجييي من دارنا ماتعاوديش تحطي رجلك فيها...

رؤيا تصدمت بقات مخرجة عينيها فيه..

خالد وقف هو وطاهر:صلاح شنو كدير را...

قاطعهم بغوات:تا واحد مايتدخل...هاد الجنس مستحيل يبقى عايش معانا..مين جات وحنا فالمشاكيل وبسبابها لبنت تخطفت..دبا ماعندي ماندير بيها(رؤيا هبطو دموع من عينيها وهو مزير علا يديها)كيفما ختي رجعت..تا انا غنرجع ليهم هاد الموصيبة ديالهم..

لطيفة وحسناء تصدمو..

لطيفة:اولدي نعل الشيطان..اولدي ...

صلاح حبسهم بيديه وغادي بالزربة جارها جيهة لباب وحلها ولاحها بالجهد تا كانت غطيح..

صلاح:آخر مرة نشوف كمارتك..فهمتييي...ونتوما(كيهضر مع لكارد)تا واحد مايعاونها..خليوها ياكلوها الكلاب ديال الطريق..زدح لباب فوجهها ودخل كيسوط غي شافهم مصدومين فيه طلع لبيتو ماحاملش يصدعولو دماغو...

بقات رؤيا مدة وهي واقفة قدام لباب كتشوف فالفراغ..ودموعها هابطين مابغاوش يحبسو..دورت وجهها لقات لي كارد كل واحد فين واقف..هبطت بالشوية كتجر رجليها وحانية راسها..خرجت علا برا خايفة كتشوف غي الظلام ولكن كرامتها ماخلاتهاش تبقى واقفة..بالعكس...بقات غادية كتمسح عينيها وتفكر كلشي داز عليها...

صلاح طلع لبيت كينهج..جلس فوق كرسي داير يديه علا راسو..كيحاول يحسس راسو بلي تهنى من حمل كبير..كان مثقل عليه..ولكن غي برد شوية بدا يعقد حجبانو ويفكر فشنو دار...يتفكر الصبح كفاش كان هو ورؤيا ودبا شنو دار فيها...اه خوها غلط ولكن هي شنو ذنبها!!حيد يديه وعقد حجبانو..كان كيظن بلي تهنى من مشكل كبير صدق غرق راسو فمشكل كبر..

حسناء:ماكانش خصو يدير فيها هكا...هي مادارت والو مسكينة..

لطيفة:خليها تمشي..يمكن يكون هكاك حسن ليها وليه...تاهي داز عليها بززافف وباراكة الصراحة..

حسناء:و ولكن ولفناها معانا مسكينة..

لطيفة:قوليلي بعدا..أمين علاش عاملك مزيان..

حسناء تفكرت وهضرت بهدوء:أمين باين فيه ولد الناس..ماحاولش يضرني تا بالهضرة..بالعكس..عاملني مزيان ودار معايا فوق بيخير..

لطيفة:اوا الحمدلله ابنتي...

طاهر جالس مع ولادو:عاجبكم شنو دار؟؟واش هادا باغي يفتح باب الحرب علينا؟؟

خالد كيحك فراسو:ماعرفتش..والله ماعرفت..هو اصلا السبب فهادشي كامل..كون ماهرس لبنت من يديها ماغاديشنوصلو لهنا..وبيني وبينك داك أمين واخة دارها قبيحة ولكن معذور..وهاهو فالتالي مادار والو لحسناء..غي كان باغي يفدي فيه..

كريم ببرود:هادشي كامل وفالتالي مارضاش يبان هو القبيح وجرا علا مرتو..

خالد:اول مرة كتقول شي كلمة صحيحة..

كريم:ههه يااك..زايدون مااتخافوش..دبا يندم..

رؤيا بقات غادية فالظلام كتشوف مع جنابها وخايفة كتقلب لا تلقى شي حد يوصلها..ولكن الدنيا خاوية..

صلاح ناض مخنزر كيتنفس بصعوبة وهبط بزربة لتحت..لقاهم مجمعين..سمح فيهم وخرج دغيا..

كريم بابتسامة:ها لي قلنا..

طاهر:حمدلله لي فهمها لراسو..

صلاح عاد دخلت معاه وحس بلي زاد فيه بزااف..خرج يقلب عليها فداك الليل..حيت صعيب لحال تما..ركب طوموبيلتو وكسيرا علا للجهد...

رؤيا تمشات شحال علا رجليها غادية مع الطريق تا كتسمع طوموبيل جاية موراها كحزت من الطريق وكتشوف شكون..

شوية ومول الطوموبيل حبس وخرج ومع الضو ديال الطوموبيل ضارب بزااف..ماشافتش شكون...

وقف قبالتها مول الطوموبيل واخيرا تحيد الظلام من عينيه بسباب الضو لي دخل لعينيها..

شافت وحست بالراحة:ع علاء!!

علاء باستغراب:رؤيا..ماكنتش مثيق عيني بلي هادي نتي؟؟شنو كديري هنا فهاد ليل..

رؤيا دمعو عينيها:خ خويا ممكن توصلني لدارنا اهئ اهئ..

علاء:شووت ماتبكيش..و ولكن واش داركم لولا ولا...

رؤيا:دارنا...الطراشن..

علاء:اهاه واخة طلعي...

مشى علاء معاها كيركبها بالشوية وشد لباب موراها وعاد مشى لجيهتو بابتسامة وركب فالطوموبيل وديمارا...وهادشي علا عينين صلاح لي غي شافها ركبت معاه زير علا لفولون وتبعهم معصب...

رؤيا كتشوف فالزاج تا عطاها علاء كلينيكس:شنو واقع..اش خرجك فهاد ليل؟.

رؤيا:ماقاداش نهضر دبا سمحلي...

علاء:اوك اوك خودي راحتك...وماتخافيش انا معاك وماغادي نخليك تانوصلك..

تييط تييييط...تيييييييييط..

علاء استغرب من الطوموبيل لي موراه كتكلاكصوني..

علاء:مال هادا واش مكلخ..الطريق ها هي خاوية حداه علاش مصدعنا..بففف..

رؤيا دارت تحيد شكوكها وهي تحل عينيها وهضرت بخوف وتوتر:ماتوقفش!!

علاء:مالك؟؟

رؤيا كترعد:غيكون صلاح..عافااك ماتوقفش..

علاء:اوك تهدني ماغاديش نوقف..

بقى علاء غادي وهنا تعصب صلاح وبقى غادي بسرعة خيالية تا سبقهم وزاد شحال عاد وقف ووقفهم تا هما..

أمين رجع للدار وهما يتقبطو بيه..

رحمة بعصبية:واش بصااح خطفي لوست ختك..

أمين باستهزاء:لوستها هههه..

رحمة بغوات:جاوبنييي..

أمين:اه ولكن راه رجعتها علا مافخباركمش؟.

رحمة:اوا بااز..تلفقيه لي نساينو بركتو دخل للجامع ببلغتو...واش نتا..لي كنقول عليك بعقلك..صدقتي نتا لي داير لفتنة فينا...ماخفتيش شنو يقدر يوقع لينا..جاو هاجمين كون مات شي حد فينا؟؟

أمين:مافيديهم مايديرو..لمهم بردت جنوني وحسستهم بالوجع لي حسيت بيه فاش شفت ختي..

رحمة بصدمة:علا مال ختك؟؟(أمين كيشوفيها)جاوب...

أمين:داك الشمكار هرس ليها يديها وآثار الضرب مازالة فيها كون ماكان صاحبي الطبيب لي شافها وقالهالي كون راحنا ناعسين علا وذنينا..

رحمة:اويلي علا بنتي!!

نجية ومريم كيهدنوها وهي كتبكي..

أمين:ماتخافيش راها بيخير..شتي علاش ماكنتش باغي نقولك..

رحمة:الله الله علا بنتي اهئ اهئ...

صلاح خرج وزدح لباب..اما رؤيا شافتو سخطت وشداتها الرجفة..

علاء خرج معصب:وااش باغي تقتلنا!!حماقيتي!

صلاح:هضرتي ماشي معاك..

سمح فيه ومشى يفتح لباب علا رؤيا وهو يشدو علاء:فين غادي؟؟رؤيا فحمايتي!!

صلاح تحت سنانو:حيد حسن ليك...وماتدخلش فلي ماكيعنيكش..

مشى صلاح بلا تفكير مخلي موراه علاء وحل لبالطب علا رؤيا:هبطي...(رؤيا جالسة مابغاتش تحرك..)قولتلك هبطييي..

رؤيا غوتت:لأ ماغنهبطش..

صلاح جرها من يديها وخرجها بزز جا يعاونها علاء دفعو يبعد..

رؤيا بدات تبكي:طلق مني...

صلاح:زيدي قدامي..(بقى جارها يديها لطوموبيلتو)..

رؤيا نثرت يديها منو بالجهد معصبة:بعدد منييي...ماغنمشيش معاك..واخة تعرف تقتلني..فهمتيي(غوتت بنبرة بكاء)قتلنيييي..اه قتلني حسن مانمشي معاك..حيت كرهت العيشة معاك اهئ اهئ كرهت نبقى نتعذب كل يوم..كل لحظة كنقول غتبدل..ولكن لا..خصك غي الفرصة باش تجرحني...صااافي..عييت من دور الضحية...مليت من داك العيشة...حراام عليك..نتا مامليتيش تعذبني اهئ اهئ ياك نتا لي جريتي عليا..وانا هانا خرجت من دارك...صافي..ها هي السبة جات..انا غنرجع لدارنااا(صلاح واقف كيشوفيها مصدوم وهي ركزت فعينيه)..ماغنمشيش معاك فهمتييي..غنمشي لدارنا...وعلاء لي غيوصلني...

دارت تمشي وهو يجرها لعندو تا تصاطحت معاه وهو يعنقها بقات كتشوفيه وتنهج..شوية استدركت الموقف ودفعاتو..

رؤيا:بعد مني اهئ مابقيتش باغياك..فرقني عليك ااااوووف...

صلاح تزير ولكن عارفها مجروحة بزااف.تألم وهو كيشوفها غادية فدامو باتجاه الطوموبيل...اما علاء استغل لفرصة ومشى حل ليها لباب وركبت بعدما شافت فصلاح بعيون مدمرين...علاء ركب وحرك الطوموبيل بسرعة..

صلاح بقى واقف كيشوف فالطوموبيل وبالاخص فرؤيا وهي غادية بلا مايقدر يوقفها حيت عرف فري بلي من حقها دير فيه كثر من هكا ...

ومشات رؤيا...وهي كتبكي وتمنى لو كان كاين فرصة تخليها تشوفو مرة خرا...واخة هو فلحظة غضب غوت وقالها"مابغيتش نشوفك كمارتك مرة تانية"..بقاو دموعها هابطين شلال وهي ساكتة وفينما كتحس بلي ماكانش خصها تخليه..كتفكر شي حاجة قبيحة دارها ليها..

صلاح مشى بطوموبيلتو بحسرة فقلبو..حيت حس بلي فقدها...ولكن هادشي مامنعوش يتبعهم ويطمن انها وصلات للدار عاد يمشي بحالو..

مريم:صاافي اخالتي..واخة ماكتجاوبش غنكون بيخير ماتخافيش..

رحمة:آشمن بيخير..فبلاصت مايعاونها زاد شعل لعافية بينها وبين راجلها وعائلتو اهئ اهئ ياربي تكون بيخير..

نجية:غتكون بيخير انشاءلله ..

أمين وقف:بربي ويقيسها هاد المرة تا نقتلو بلا تفكير..

نجية:هنينا ها وجه الله..انا لي زعما كنت كنقول بعقلك ساعا صدقتي بحالك بحال داك الخيال لي كيزورنا فوقما رشقتلو..مرة صااحي ومرة معصب بوحدو(حميد)..

نجية:صاافي ا أمين..بدل الساعة بخرا وخليها ترتاح..ماحدكم كتهضرو هكا والامور كتزيد تعقد..

أمين فري..دخل لبيتو معصب وعاد رجعت معاه بالندامة..خاف لاختو تضر ولا يوقع ليها شي حاجة بسبابو..

رؤيا حلت السمطة:شكراا بزااف..وسمحليا عذبتك..

علاء:ماتقوليش هكا..الحمدلله لي ربي دارني فطريقك بعدا نحميك من كلاب الزنقة..

رؤيا:ياله تصبح علا خير..

علاء:تصبحي علا خير..

خرجت رؤيا ودقت فلباب لكبيرة تحت نظر علاء وصلاح..وتا دخلت عاد تحركو بجوج..ولكن صلاح كان هو المقهور وعلاء فرحان بزااف وباينة عليه..

با سلااام:بنتي..رؤيا..توحشناك..

رؤيا بابتسامة خفيفة:تا انا توحشتكم..كلشي لداخل ياك؟.

با سلاام:اه ابنتي دخلي(شاف يديها)مايكون باس..

رؤيا:شكرا..والحمدلله علا كل حال..

دقت رؤيا فلباب وهي سعدية تمشي تحل مستغربة تا لقاتها فوجهها وغوتات بأعلا صوت:رؤياااااااا...

رحمة ونجية سمعو السمية مابقى ليهم عقل..ومريم تابعاهم كتأكد..خارجين من الصالون كيجريو..

رحمة غي شافت بنتها معنقة سعدية بيد وحدة مشات كتجري والدمعة فعينيها..

رحمة:بنتيييي...

رؤيا طلقت من سعدية ومشات كتجري..عنقت ماماها لي كانت توحشتها بزااف ومدة ماشافتها..وعركوها بكاوات..

رؤيا:اهئ اهئ توحشتك اماما اهئ اهئ .

رحمة مامثيقاش كل مرة تشد ليها وجهها بيديها وترجع تبوسها وتعنقها..

رحمة بصوت حنين:غبىتي عليا ابنتي...والدنيا ظلامت فوجهي اهى اهئ..

نجية كتمسح عينيها:علا سلامتك ابنتي..

مريم:علا سلامتك خفنا عليك بزااف..

طلقت اخيرا رؤيا من ماماها وسلمت علا خالتها وبنت خالتها..

اما أمين خرج مستغرب فاش سمع الهضرة..تا لقى رؤيا قدامو..مشى حداها كيشوف فحالتها وقلبو ضرو عليها..

أمين هضر بهدوء:شكون جابك لهنا؟؟

رؤيا شافت فيه بألم حدرت راسها وبدات تبكي...

أمين عزت عليها وهو يجرها وعنقها..كلهم حسو بيها مقهور بزااف والهم دخل عليها مزيان...

رحمة كدوز يديها علا شعرها:صاافي ابنتي قطعتيلي قلبي اهئ اهئ..باراكة عليك من لبكى..

مريم كتبكي فصمت:دخلوها لداخل وخليوها ترتاح شوية بعدا..

نجية:اه مريم عندها الحق..

أمين دخلها داير راسها فكتفو ويديه فوق راسها ورحمة شدت لباب وتبعاتهم..

طاهر:اوا نوضو نعسو..عيينا بززاف ليوم..

كريم:اه عندك لحق..تصبحو علا خير..

خالد:تصبحو علا خير..

دخلو كلهم ينعسو اما حسناء وماماها متكيين فلبيت..لطيفة داها النعاس فلبيت بقوة لي عياو النهار كامل بالخلعة والبكى..اما حسناء حالة عينيها كتفكر وبالها مشغول بشنو وقع...استغربت موقف أمين وتأكدت من الشهامة ديالو فاش حامى عليها من داك الموسخ..بسمت وهي كتفكر فيه بلا ماتحس...

صلاح رجع للدار لقى كلشي ناعس..كان قالب وجهو وكاره راسو..فلحظة كلشي تقلب سفاه علا علاه..موالف يدوز الغلط ويرجع لوعيو ولكن دبا غلط ومايمكنش يصلح غلطو..حيت رؤيا بعدت عليه وصعيب يتجمع بيها مرة خرا..طلع نيشان لبيتو بلا هضرة..بدل حوايجو ولكن مالقاش راحتو تما...وهو يمشي لبيت رؤيا...حل لباب وبقى واقف كيتأمل فلبيت كيشوفيه ويشم ريحتها فكل بلاصة..دخل...وخدا فورلار من لبلاكار وحطها علا نيفو مغمض عينيه كيشم فيها ويحاول يتخيلها واقفة قدامو...شوية داوه رجليه لفراش تكى فوق منو حاط يديه علا الخدية ومافاهمش علاش هو كيدير هكا...يمكن احساس بالذنب!!ولا حيت ولفها وولف تكون قدامو شنو ماوقع...ماحمقش راسو بالتفكير..غي غمض عينيه مشى فالنعاس..

رؤيا جلست فالصالون وكلهم دايرين بيها..اما رحمة جابت ليها عصير تشربو ماقدتش..

رحمة:رتاحيتي شوية ابنتي..

(رؤيا هزت راسها)..اوا قولينا ابنتي شنو خلاك تجي فهاد لوقت بوحدك!!

أمين بهدوء:الا ماقاداش..ماتقولي والو..

رؤيا بهدوء:كان ضروري نجي...مابقاش باغيني نكون فحياتهم...سيغطو فاش حسناء رجعت وقالت شنو قاليها أمين..(أمين عقد حجبانو).صافي..خرجني من الدار....

نجية بعصبية:جرااا عليك!!

رؤيا بصوت فيه نبرة بكاء:صاافي مابغيتش نهضر فهادشي كثر...انا غنوض نعس...

ناضت رؤيا لبيتها وهي مريم تشوفيهم وناضت تبعتها..

رحمة:اميمتي علا بنتي..ضاعت حياتها مع داك العائلة..اهئ اهئ..

نجية:واا صاافي اختي...ماخصكش تزيدي تفكريها..باراكة غي لي هي فيه...

أمين:خالتي نجية عندها الحق..صاافي دبا تنسى مع الوقت..

دخلت رؤيا لبيتها وبدات تفكر كااع لي دوزاتو فهاد لبيت..حياتها لي عاشتها هنا...نهار كانت كتجمع حوايجها باش تمشي..ونهار بكات فيه علا هاد الزواج..بقات كدور عينيها فيه تا جات مريم وشدت لباب موراها..

مريم:مالك أ حبيبة؟؟

رؤيا:حاسة بلي غبت سنين علا هاد لبيت..بحالا عمرني كنت عايشة فيه..

مريم:طبيعي..حيت دوزتي ايام ونتي بعيدة عليه..

رؤيا:ماحاساش بلي كانت أيام...كأني غبت سنين..

مريم جرتها وجلست:واش ولفتي تماك ؟؟

رؤيا علات عينيها فيها حومر:امممم...

مريم عنقتها وبقاو يبكيو بجوج..كل وحدة كتفكر ف همها وتبكي عليه..

مريم:خوي قلبك عليا...ماكاينش لي غيحس بيك قدي..

رؤيا كتشهق:تجرحت بزاااف...وشفت العذاب لي عمرني شفتو فحياتي...وواخة هكاك دباا..حاسة بشي حاجة ناقصاني اهئ اهئ..

مريم:صااافي باراكة من لبكى واجي نعسو...غتكوني عييتي ليوم بزااف..

رؤيا:فوق ماتصوري(كتمسح علا وجهها)..

مريم:اوك..وتا انا غنعس معاك ا لالة ههه باش تعرفي قداش كنبغيوك..

بسمت رؤيا وناضت بدلت عليها..ولقات بيجاماتها فبلايصهم وهي تخيل حوايج صلاح حداها..غمضت عينيها وحلتهم وجبدت بيجامة خفيفة وجمعت شعرها وتخشات حدا مريم...

أصبحنا وأصبح الملك لله...

حميد جاي للدار مدوخ كيغني مع راسو...حل لباب وفاش دارت الصوت كيقولها"شووت سكتي هههه"..ولكن مانتابهش لمو جالسة فالصالون كتقرا القرآن...

حبست لقراية وناضت عندو:علا سلامتك ا سي حميد..

حميد قفز ولكن فاش دار ضحك:اهلاااا اهلااا ميمتي الزوينة...وينوووو كتقراي القرآن هههه...دعي معانا ماتنسايش ☺..

رحمة عقدت حجبانها وجراتو كتشمو:اويليي...سكرااان!!

حميد كيتلوى بين يديها:لاا لاااااا..ماسكرانش غي شربت شي جوج ...لا شي ثلاثة..لاااا ربعة ربعة دالكيسان...صااافي...

رحمة:ا نارييي يا ربي واش نتا هو الراجل لي خصنا نتحزمو بيه...فينك ا محمد...فينك تشوف فين وصلنا...هو ومشى ونتا رجليك خرجو الشواري...

حميد:علا مالي حمار خخخخخ...

رحمة جراتو زعفانة:زيد قدااامي زيد...

دخلاتو ومشات بيه للحمام وحدرت ليه راسو تغسلو ليه..وهو كيغوت..

رحمة:سكتت سكتتت واش مازال باغي تشوهنا كثر...فيق فيق شوية راك غتسكتلي لقلب...واش هكا ربيتك...باغي تخرج علا راسك..ء هضرررر..فين باغي توصل..

حميد طلع راسو:اش بغيتي عندي ا مييي...علاش كديري ليا هكا علا النبوري..

رحمة:عاد كتسول..نتا راه عواجيتي فمرة...واش نسيتي دينك وعائلتك وحياتك..دغيا تبدلتي هكا...شنو سبابك...هضرررر!!

أمين دخل لبيت معنكش علا الصبح:هاداااك راه بداا يدير لي عجبو تا فرزقنا...لبارح سقت ليه لخبار كيقيل يبيع فالبقر بلا خبارنا..

حميد تصدم:ش شنو!!شنو كتقول؟ومنين جبتي هاد لهضرة؟؟

أمين:سحابلك مكلخ انا...راه قلبت وحسبت فخيرنا لقيتو ناقص..اجي بعدا فين كدير لفلوس...وزايدون علاش كتبيع فالرزق بلا خبارنا...واش سحابلك داكشي ديالك غي بوحدك!!

حميد ضحك باستهزاء:هاهاهاهاعاد فقتي..عاد تفكرتي الرزق..فين كنتي مين كنا ندمرو ونخدمو باش نزيدو الخير..ولا باغي تاخدو بارد..

رحمة:اش كتخرف...نتا خوه لكبير اييه ولكن كلكم عندكم حقكم فالرزق لي خلا باكم..ولا القباحة نساتك بلي الحق حق..

حميد:صااافي تقلبتو عليا..مابقى عندكم غرض بيا...جا حبيب قلبك ونتي تنساي اش كنت كندمر علا ودكم..

رحمة بعصبية:سكت..سكتتتت ماتزيدش شي كلمة حيت هضرتك كتعصب..ايما تظلم ولا نظلموك حنا ماعندكش وسطية واعتدال...سيررر نعس كماعلله تفيق شوية..ومن بعد ونهضرو...

أمين باسلها يديها:ماتعصبيش ا لواليدة..ياله نبدلو ساعا بخرا..

حميد مخنزر فيه غيطرطق...ا خرجو من بيتو وهو يمسح وجهو بالفوطة ولاحها فالارض ومشى ينعس علا فراشو معصب بوحدو..

خرجت رحمة مسكينة كتندب علا الموصيبة دولدها..وأمين كالماها وخرج يضرب فيه الهوا دالصبح..

فاقت رؤيا كتشوف قدامها كيبان ليها لبيت ديالها تنهدت بهدوء وشافت مع جنبها لقات مريم ناعسة...ناضت بلا صوت ودخلت غسلت وجهها وبغات دوش ولكن خصها مساعدة حيت يديها مهرسة..خرجت من لبيت كتقلب علا ماماها ..هبطت لتحت سمعت صوتها فالكوزينة..

رؤيا:صباح لخير..

رحمة بفرحة:بنتي الزوينة صباح نووور(باستها)كيصبحتي؟؟

رؤيا بابتسامة خفيفة:الحمدلله..ماما..

رحمة:شنو ابنتي!

رؤيا:بغيت ندوش ولكن هانتي كتشوفي يدي...و..

رحمة:واخة ياله نطلعو نغطيهالك وندوشلك ونهبطو..

رؤيا:بلا ماتعذبي..

رحمة:ياريت كون كان العذاب هو هادا..

رؤيا بخوف:مالك اماما ياك لاباس!

رحمة:لا ابنتي غي خرجت هكاك وصاافي..ياله نطلعو..

رؤيا:والفطور لي كيوجد؟.

رحمة:هاهي تجي سعدية وتكملو..

رؤيا سمعت الهضرة وطلعت..

صلاح فاق كيتكسل وهو ينتابه لراسو فين..ناض طافج كيتفكر الاحداث لي دازت لبارح...ناض من بلاصتو ودخل يفيق مزيان..

حسناء فيقتها ماماها يهبطو يفطرو مجموعين..ناضت ولطيفة سبقتها...وهي تغسل وجهها وتفكر الغورميط لي جابتها لبارح لخوها...هزتها فيديها ومشات عندو...دقت عليه فبيتو مالقاتوش..

شوية وهي دور لقاتو خارج من بيت رؤيا بحوايجو ديال لبارح..بقات كتشوفيه شحال وهو عقد حجبانو فيها وحنى راسو..

حسناء:صباح لخير..

صلاح بخشونة:صباح لخير..

حسناء شافتو داخل لبيت:صلاح!!..هاك...

صلاح دار بنص وجهو وهو يشوف لغورميط فيديها عقد حجبانو:منين جبتيها!!

حسناء:رؤيا كانت لقاتها مقطعة وطلبتني نصلحها حيت هي ماتقدرش تخرج...وصلحتها وكنت غنعطيهالها تعطيهالك ولكن(حدرت راسها)مشااات دبا...

صلاح بصدمة:ك كفاش!!انا نسولتها عليها قالتلي ماشافتهاش ومن بعد قالتلي كانت عندها...

حسناء:ماكانتش باغية تقولك تا نصلحوها...

صلاح بدا يشوف بعيد:وعلاش ماقلتيهاليش؟

حسناء:كانت موصياني...حيت هي عرفت بلي لغورميط كادو من آلاء الله يرحمها وب بغات تبين ليك بلي هي ماباغية تاخد بلاصة تاوحدة بالعكس...هاكااا قالتلي..

صلاح تأفف وعض علا شنافتو:اوك اريها....

خدا لغورميط ودخل وزدح لباب...

حسناء قفزت مين تشدت لباب فوجهها وهبطت تفطر..

صلاح دخل هاز لغورميط فيديه وجلس...لأول مرة هاد الغورميط واخة كادو من آلاء مافكراتوش فآلاء..بالعكس..فكراتو ف رؤيا..وفشنو دار فيها...نهار هرس ليها يديها وهو معصب.....ياترى علاش دارت هكا؟علاش قصدت خير وهو عمرو فرحها؟..يمكن كان فاهمها غلط...وجرحها واخة ماتستاهلش...

دوشت رحمة لرؤيا وخرجت كتنشف ليها شعرها ويديها لمكبصة بالسيشوار..

مريم فاقت:صباح نور..

رؤيا ورحمة:صباح لخير..

لبست رؤيا سوفيطمة فوقها كاب محلول فلزرق وسروال ثوب واسع..شعرها جامعاه مخربق ليها ماماها..وهبطت تفطر معاها مريم..

نجية بابتسامة:صباح النور علا الزيونات ديالي..

مريم ورؤيا:صباح نور..

سعدية:ها لفطور واجد..

أمين:غتفطرو بلا بيا ؟؟ههه..

رحمة:لا مانقدروش..

أمين:رؤيا كيصبحتي..

رؤيا:حمدلله ا خويا..

جلسو يفطرو مجموعين..

حط صلاح لغورميط فوق طابل دونوي وهبط صلاح قالب وجهو كيف العادة باش تاواحد مايتجرأ ويهضر معاه..

مريم جلست فالجنب مع رؤيا وبقات تحاول تهضرها..

مريم:قوليلي...دبا صلاح هو داك الصلع؟؟

رؤيا عقدت حجبانها:ونتي باش عرفتيه؟؟

مريم:جاو لبارح كيقلبو علا أمين..

رؤيا تفاجئت:بصاااح...

مريم:ايييه..ودبا خلينا فموضوعنا..ياك لصلع هو راجلك؟؟(رؤيا هزت راسها بالايجاب)ياختي شخصية مع راسو..تيتيز وعويناتو خوضر واخة كان معصب جاي تيتيززز..

رؤيا مابغاتش طول فالهضرة عليه باش ماتفكروش كثر:وا صااافي مالقيتي فاش تهضري دبا!!

مريم:زعما ماكانش كيعجبك؟؟

رؤيا تنهدت:ماشي مهم...هو كان ومازال كيبغي مرتو لي ماتت..

مريم:و ولكن نتي زوينة و...

رؤيا:بدلي لموضوع عاافاك..

مريم فهمتها:واخة..ولكن عندي سؤال(رؤيا شافت فيها مربعة يديها)..كريم شنو كيجي لصلاح؟؟

رؤيا باستغراب:ونتي منين عرفتي داك كريم!!

مريم:لا ح حيت...دبا جاوبيني فلول..

رؤيا:خوووه(مريم حلت عينيها)خوه الصغير...وهاداك هو لي قتل بابا..

مريم غوتت:اويليييي....قتاااااال(دمعو عينيها)مايمكنش اهئ لا مايمكنش كريم يكون قتاال..

رؤيا بصدمة:ونتي علاش كتغوتي وتبكي...منين كتعرفيه باش تقولي عليه مايديرهاش...سولي غي حميد يقولك راه كان حاضر..

مريم:اهئ لا مانثيقش..مستحيل يكون قتال..كريم لي كنعرف مايقدر يآذي تا واحد 😭😭..

رؤيا:اويلي مريم رجوع الله...تهدني وعاودي ليا نفهم...منين كتعرفي نتي هاد كريم؟؟..

مريم بدات تمسح عينيها وهي كتفكر كفاش تلاقاتو...ماعاوداتش كلشي بالتفاصيل ولكن اختصرت الموضوع انو كان ساكن مع جارتهم وتعرفت عليه وبغاتو وبغاها..ولكن وهي كتعاود عاد طلع معاها القالب..

مريم:نااري دبا عاد فهمت..

رؤيا بتعجب:اش فهمتي؟؟

مريم:فاش جا يتعرف علا ماما سولاتو علا اصلو منين ومين عرفت قالتو عليكم وهو يصفار ويخضار...اممم عليها تقلب 190°..

رؤيا:سميتها 180° ههه...لمهم هنااك الله من داك القتااال الحمدلله لي ماتزوجتوش عاد سقتي لخبار..

مريم بألم:ولكن ء رؤيا بغيتو بزااف والله ومازال كنبغيه...لبارح فاش شفتو(تزرعت ابتسامة مخلطة مع الدموع فوجهها)حسيت بروحي رجعت ليا..نتي ماعارفاش غيابو آش دار فيا اهئ اهئ...

رؤيا حست بيها:صافي ماتبكيش(عينيها دمعو)حاسة بيك..مي هانتي كتشوفي مكتاب الله كيتصرف..

مريم مسحت عينيها بألم:اجي نقولك(رؤبا كترقب)علاش مانهربوش بربعة..نتي مع صلاح وانا مع كريم ونبعدو علا المشاكيل ونساوها هههه🤔..

رؤيا وقفت:سريي انا لي دايرة فيك عقلي...مسطية وبالوراااق...

مريم:اجييي غي ضحكت معاك ههه اجييي...

دخلت رؤيا وخلاتها علا برا...

صلاح جلس يفطر قبالتهم ساكت ماكيقول تا كلمة...

حسناء علات عينيها وهي تنتايه لغورميط ماكايناش فيديه..استغربت ورجعت حدرت عينيها...

طاهر وقف:صلاح فاش تسالس فطورك تبعي للمكتب..

صلاح كياكل فهدوء:واخة..

خالد:كريم ونتا تبعني..لخدمة كتساين..

كريم:اوك..نسالي كاسي ونمشيو..

ناض صلاح ودخل نيشان للمكتب وشد لباب..

طاهر:جلس اولدي..

صلاح جلس وكيشوف قبالتو حيت عارف فاش غيهضر معاه باه..

طاهر:شوف اولدي..انا بغيت نهضرو الراس فالراس باش نحاولو نحلو المشكل بلا صداع...دبا ختك رجعت والحمدلله ماوقع ليها والو..داكشي علاش بغيت نفهم منك واش نتا قابل تبقى مرتك فدارهم ولا غترجعها؟؟

صلاح حك لحيتو:مازال ماعارفش..

طاهر:لا خصك تعرف..

صلاح:محتاج شوية دلوقت..حيت خصني نفكر مزيان واش ترجع ولا تبقى بعيدة علينا ونتهناو من الصداع ومن عائلة الطراشن..

طاهر:لمهم..نتا شوف لي يسلكك وانا هاد المرة ماغندخلش بيناتكم ولا نحاول نفرض عليك شي حاجة..حيت تا داك لبنت عانات معانا بزااف ويمكن الا طلقنا سراحها يكون حسن..

صلاح شافيه مين قال هاد الهضرة:هي مازالة مرتي واخة هكاك..وانا غنقرر واش ترجع ولا لا..

طاهر مابغاش يطول معاه:لمهم يكون خير..

أمين مشى لبيت حميد وشد لباب عليهم...جلس حداه علا الفراش وبدا يفيقو..

أمين:حميد..حمييييد...

حميد:امممم..

أمين:نوض بغيت نهضر معاك..

حميد مدوخ:بلاتي..دبا باغي نعس..

أمين:لااا غتنوض دبا ماحدنا بوحدنا نهضرو..

حميد حل عينيه حومر:شكاين..واش مايرتاح حد معاكم فهاد الدار؟؟

أمين:فين كدير لفلوس لي كتاخد؟.

حميد:اينا فلوس عاوتاني؟؟

أمين:لي خديتي من البقر لي بعتي..

حميد:كنصرف بيها ولا سحابلك الصرف علا الارض والكوري والزريبة ساهل..

أمين:ماتكذبش..انا مشيت ليهم كاملين ولقيت بلي ناقصهم بزااف ديال المصاريف والعلف..غي قولي بصراحة فين درتي الفلوس؟؟

حميد:دبا انا كداب..يااك انا كداب..راه مين نهضر معاك قول اييه ماتنساش انا خوك لكبير..

أمين:هادشي تاواحد ماناسيه..نتا بوحدك لي نسيتيه(حميد مخنزر)نسيتي بلي الاخ لكبير هو لي كيسير عائلة ..هو لي كيقوم بيهم ويحاول يحافظ عليهم وعلا فلوسهم..

حميد:شنو كتقصد بهاد الهضرة؟زعما انا شفار؟.

أمين ببرود:شنو كتعاطى؟؟(حميد تصدم وماعرف مايجاوب)..شووف راه ماكاينش لي غيفهمك ويعيق بيك من غيري...نتا باينة كتعاطى لشي حاجة..خلاتك تبدل وتولي عصبي واناني..وتاخد منا وتصرف علا راسك ونزواتك..

حميد ناض ودخلت معاه لهضرة:انا ماكنتعاطاش..انا غي وليت نحاول نعيش شوية..عن عندي صحاب و و كنخسر شوية من نعار تولدت وانا ندمر..

أمين:ماشي عيب هادشي..ولكن خصك تعرف شنو ليك وشنو عليك..

حميد:صافي صافي..فهمنا..من دبا لفوق غنقيد كلشي ولي عندو شي حق غياخدو..غي هنيني..صاافي..

أمين:كنتمنى...

رؤيا دخلت كتفكر فالهضرة لي قالت مريم علا صلاح..حست بلي توحشاتو وماقداش تنسا شنو دوزت معاه سوا قبيح ولا مزيان...

رحمة:بنتي..شنو تبغي نديرلك للغدا؟؟

رؤيا:لي كان من يديك زوين اماما..

رحمة:اه عقلت..نديرلك الدجاج محمر لي كيعجبك بزااف..

رؤيا هزت راسها ورحمة دخلت..وماعرفتش بلي فيقت ذكريات كثيرة علا بنتها بهاد الدجاج محمر..

رؤيا سرحت فتفكيرها..كتخيل فاش طلب صلاح من فاطنة ديرولو..بسمت لا شعوريا ورجعو ترسمو علا ملامحها الحزن والحنين..

صلاح ناض:انا غنمشي للخدمة..

طاهر:الله يعاون..

خرج صلاح من المكتب وهو يسمع الدقان..مشات حسناء كتجري حلت لباب ولكن..طلقت غوتة وحدة وطاحت تا تخلع كلشي...

لطيفة غوتت:بنتي بنتييي...(شافت فلباب وهي تسمر فبلاصتها)

صلاح خرج عاقد حجبانو:مالكم شنو كاين؟؟

علا صلاح عينيه فلباب وهي تقولو:هادي أنا ...

صلاح خرج عينيه فيها مصدوم:أ أ آلاء!!!

آلاء:اه انا احبيبي(مشات كتجري وعنقاتو وهو مازال مامثيقش خرج ليها راسها وكيتأكد وتولي تخشى فيه)توحشتك توحشتك بزااف...

صلاح بصدمة:م مايمكنش...قالو بلي م متي..شنو وقع قوليلي..واش نتي بصااح ولا غي كنتخيل؟؟

آلاء بدموع فعينيها:أنا بصاااح ا صلاح هانتا(حطت يده علا وجهها)..

صلاح فرح ورجع عنقها مزير عليها وفاطنة ولطيفة مازالين حالين عينيهم بالخلعة والصدمة مخلطين عليهم العرارم..

اما واحد حسناء سخفانة وماداها حد فيها ههه..

صلاح بقى معنقها ومزير وقلبو كيضرب لأقصى درجة..هادي هي الحاجة لي كان محتاجها..انها ترجع وتزين ليه حياتو لي ظلامت بلا بيها..

صلاح:ك كفاش تا بقيتي حية...كنت غنموت فغيابك والله..حياتي ولات جحيم..فين كنتي وعلاش تالدبا عاد جيتي!!

آلاء:انا غنقولك كلشي..

#فلاش_باك..

آلاء شيرت لصلاح ومشاو فطريقهم عادي...خرجو علا الفيلاج وهي كتخربق فتيلي..علات عينيها علا غفلة لقات بنت كتشير للطوموبيل..

آلاء:حبس ا عمي حبس..

الشيفور:ماكاين لاش..

آلاء:حبس نشوفو مالها مسكينة؟.

الشيفور حبس ولكن شاد الطوموبيل وماخلاش آلاء تهبط..

آلاء حلت الزاج لور:مالك اخيتي شنو بيك؟؟

لبنت:مشى عليا الكار اختي اهئ وفاش ركبت مع طاكسي بيضة لقيت فلوسي ماكايناش..حطني هنا سحابلو كنكذب عليه وخلاني اهئ اهئ..

آلاء:لاحول ولا قوة الا بالله..طلعي نوصلوك ياك غادية للمدينة؟.

لبنت:اه اختي..

الشيفور:صافي نصافطولها لي يديها..حنا نمشيو..

آلاء:شنو كتقول؟؟نخليو لبنت هنا؟؟لااا غنديوها معانا..طلعي..

حل الشيفور لباب وهي طلعت حدا آلاء..

لبنت كتمسح دموعها:الله يكثر من مثالك..شكرا بزااف..

آلاء:عادي اختي..مرحبا...

بقاو غاديين شحال تاقربو للمدينة وهو الشيفور يبدا يضرب فالفران مابقاش خدام...تزنك والسرعة غادية وكتجهاد..

آلاء سولاتو فلول مابغاش يجاوبها ومين اكدت عليه وغوتت..

الشيفور:ماكاينش لفران..

آلاء:أويلييي..

لبنت:الله ياربي..

الشيفور:ماتخافوش غلقى الحل غي تهدنو..

بدا الشيفور يعافر وهما كيغوتو من السرعة الزايدة..حاسين بلي غيموتو صاافي..

الشيفور حاول يستنجد بالكارد لي موراه مالقاهمش زاد تعصب ولكن الطوموبيل صاافي ولات كطير بوحدها كأنو بدا يفقد الامل..

الشيفور:لا اله الا الله..

آلاء:لاااا اهئ اهئ..خرجو من الطوموبيل...صافي..خرجوووو..

لبنت:مانقدرش مانقدرش اهئ اهئ..

آلاء:الا طاحت الطوموبيل فالحافة غتفركع..اللهم نتلاحو دبا..

لبنت:لااا لااا اهئ..

آلاء:انا غنبدا فلول...اجيو مورايا..(خدات نفس عميق..ونقزات)ااااهههههه....(قاصت لباب وطارت السنسلة لي فعنقها وهي بدات كتكور لور تا طاحت فواحد الحفرة قريبة فاقدة الوعي)..

لبنت:لا مانقدرش مانقدرش اهئ اهئ..

الشيفور بالو مع آلاء بقى سايق تالف ماعارف مايدير تا لقى راسو خرج علا الطريق من الجيهة لوخرا وطاحو فالحافة كيغوتو..

لبنت:لااااا اهئ اهئ..

الشيفور:ياااا ربييييي...

انفاجرت الطوموبيل وماتو لي فيها اكيد..

#الرجوع_الى_الواقع..

آلاء:وهكا..سيدي ربي نجاني من الموت ورجعني ليكم..

صلاح:د دبا لبنت لي طلعت معاكم هي لي ماتت وسحابلينا نتي؟؟

آلاء:اه الله يرحمها مسكينة..

لطيفة:و ونتي علاش تالدبا عاد جيتي؟؟

آلاء:كنت فغيبوبة..الحطاب لي لقاني مسكين داني لسبيطار فالمدينة..ماكانوش عارفين شكون انا مع صاكي بقى فالطوموبيل..بقيت 20يوم فالغيبوبة..ومين فقت ماقدرتش نتفكر بزااف..تقريبا ايام وهما يحاولو معايا مع الضربة كانت عندي فالراس..وفاش تفكرت صلاح..كان صعيب عليا نتفكر نمرتو..ولكن داك الساع بديت نقدر نمشي...قلت نتعالج واكيد غنقدر نرجع عندكم..

صلاح فرح وعنقها:علا سلامتككك...(باسها فكتفها)..

آلاء:الله يسلمك احبيبي...شتي..ربي كيبغينا وبغى يرجعنا لبعضياتنا بجوج..

صلاح بسم ولكن فاش تفكر رؤيا تبدلو ملامحو وعرف بلي صعيب يعتارف ل آلاء بلي تزوج عليها بعد ماسمع خبار موتها بايام قليلة...

فاطنة فيقت حسناء ولكن غي شافت آلاء تخلعت:الله الله ياربي..اعوذ باللن من الشيطان الرجيم..

آلاء:ماتخافيش..انا كااع مامت..انا عايشة..

حسناء بخوف كتشوف فكلشي:امم اههه..

خرج طاهر من المكتب وهو يتفاجئ بالمنظر:ء آلاء...هادي نتي؟؟؟

رؤيا كانت جالسة تا تخطف قلبها وحست باحساس غريب وقبيح..شدت علا قلبها مخنوقة...

نجية شافتها ماشي نورمال:مالك ابنتي..شنو فيك؟؟

رؤيا مزيرة علا عينيها:ل لا والو غي قلبي ضرني..تخطف مني..ياربي تحظر السلامة..

نجية جلست عنقتها:شووت تهدني..لي داز عليك ماشي قليل..غيكون غي تفكرتي شي حاجة قلقاتك دارتلك هكا..

رؤيا قنعت راسها:يمكن...عندك الحق واقيلا..

حميد لبس حوايجو وخرج ماكيقشعش قدامو..الهضرة لي قالو أمين خلاتو يتأكد بلي يارا فري ضحكت عليه..هو كان شاك فيها ولكن دبا عرف لي كاين وحالف يدوزها عليها..

طاهر سمع القصة من عند آلاء:سبحان الله..علا كل شيء قدير..الحمدلله علا سلامتك ابنتي...نورتي دارك..

آلاء:شكرا اعمي..تا انا توحشتكم بزاااف..بحالا غبت عليكم مدة طويلة..بزااف...

صلاح تنهد:كثر ماتصوري..

آلاء:اوا عاودولي..شنو وقع فغيابي..

صلاح تزير..ولطيفة شافت فطاهر اما حسناء مازال كتستوعب اش وقع..

صلاح:لمهم رجعتي دبا..وداكشي من بعد وغتعرفيه..

لطيفة:اوا نوضي ابنتي طلعي لبيتك ترتاحي..غتكوني مازالة عيانة..

آلاء بابتسامة:واخة اخالتي..بحالا علمك الله...شنو صلاح تعاوني نطلع..

صلاح بسم:ياله..

طلعو بجوج متشادين باليدين وهي حسناء تهضر:الله علا رؤيا..كلات الدق وداقت العذاب غي علا الخاوي...

طاهر:لمشكل ماشي فداكشي..لمشكل فلبنت لي دبا غتعرف بلي تزوج عليها فهاد الوقت لي غابت..

لطيفة:الله يحظر السلامة..وخلااص..ماعرفت شنو غنديرو فهاد الحريرة عاوتاني..

دخلت آلاء لبيتها وهي تبسم:اووو كلشي كيفما خليتو..

صلاح بسم وشد لباب:ضروري..اصلا فينما كنت كنتوحشك كنجي هنا ونعنق تصويرتك..

آلاء دارت شافت فيه:علاش فين كنتي كتبات؟؟

صلاح عاد انتابه لهضرتو:لاا غي حيت شي مرات ماكنتش كنقد نجلس فيه ونتي مافيه..

آلاء مشات عنقاتو من عنقو:كتبغيني تالهاد الدرجة؟؟

صلاح دازت احداث غريبة فبالو دوزها علا رؤيا بسبابها:كثر ماتصوري..

قربت وحطت شنايفها علا شنايفو وباستو بوسة حنينة وفيها شوق كبير ولكن المشكل ان صلاح كان مخليها دير لي بغات وهو مغمض عينيه ومكالمي..

آلاء:امممم...نموت فيك انا(هزت يديه تبوسها وهي تنتابه مافيهاش لغورميط)ف فين هي لغورميط لي فلتي ماتحيدهاش من يديك؟؟

صلاح تواكظ:ءء اممم هاهي..(مشى خداها)تقطعت ليا وياله ص صلحتها وكنت غنديرها..

آلاء:علاش تقطعت؟؟

صلاح:بلا ماتفكريني...دبا اجي رتاحي غتكوني عييتي..

آلاء:امم واخة..بعدا ندخلو ودوش ليا وتلبسني حوايجي عاد نعسو علا مايوجد لغدا(عنقاتو بابتسامة وشهوة)..

صلاح شاف قبالتو وعلا عينيه للسما باحساس فشكل...مافاهمش هاد التخربيق لي واقع ليه...

مشات لبلاكار لقات كلشي فبلاصتو فرحت وهو بادلهت الابتسامة..هزت شوميز دونوي غوز بارد ودوبياس لون الذات وبينوار ليها وفوطة ليه وجراتو للحمام...صلاح تبعها برجولة وتبات..

حسناء دخلت للصالون وهي تلقى تيلي ديال رؤيا محطوط..هزاتو وبدات تقلب فيه وهي تلقى نمرة ديال أمين..بسمت بوحدها وسجلتها عندها فتيلي..وفنفس لوقت بغات تطمن علا رؤيا لي مين مشات ماعرفو واش هي بيخير ولا لا...

وصل حميد عند يارا..غي حلت ليه لباب هز احسن تصرفيقة وعطاها ليها تا طاحت لأرض...

ياراا:ااااي...مالك..الصباحاتو لله..شواقع تاني..

حميد:لدينمك كضحكي عليا.ءءءء..سحابلك غتلقايني علا قد يديك(جرها من شعرها وهي كتجرجر فالارض وتبكي)فين داكشي فين؟؟

يارا كتغوت:ايي طلق مني اهئ طللللق...شنو بااغي اهئ..

حميد:فين داكشي لي كتحطيه ليا فالشراب..هضري لدينمك قبل ما ندبح القح**مك..

يارا شادة شعرها باش ماتقصحش:ماعرفتش علاياش كتهضر(زير عليها)ايايااااي...اهئ رخف شعري يعطيك القطيعة..

حميد لاحها وبدا يقلب فالمجورة .وهي فينما كتجي تهرب كيشدها...

حميد قلب تا عيى شوية وهو يلقى دوا واخدة منو بزااف ولونو حمر...

حميد:شنو هادا؟؟

يارا:د دوااا..

حميد هز بونية عطاها ليها تا غوتات ورجع جبدها من شعرهامطلع رجل علا الفراش ورجل لتحت وهي جالسة قدامو...

حميد:هضريييي...هادا لي كتحطيلي ياااك!!

يارا هزت راسها بالايجاب:اهئ اههه...

حميد سخن عليها:شكون مسافطك لدينمك شكون؟؟

يارا:ءء اهئ عااافاااك رحمني...

حميد جمع الفك ديالها فيدو:هضريييي...

يارا كتهضر بزز:و والله ماعارفة اهئ اهئ...و واحد جا عندي وعطاه ليا... و ...

حميد:كملييي...

يارا:و وخلصني اهئ اهئ ...

حميد لتخها وهي تبدا تبكي وهو دماغو عامر..شكون هادا لي بغى يخرج عليه ويشربو دواياات بحال هكا..

رجع حنى عندها:فليل تجيبيلي سميتو ولا تموتي..فهمتيييي...تموووتي ...

يارا:اهئ أهئ صاافي..

خرج حميد المغفل وخلاها تما مليوحة..غي ركب طوموبيلتو جمعت حوايجها وعلمت داك الفيدور بلي كاين وهو ينصحها تخوي باش مايلقاوهاش...

خرجت كتجري وركبت طاكسي للجيهة لي دارو معاها فيها باش تخبى...

اما حميد غادي ويفكر..شكون هاد العدو لي باغي يصفيها ليه...فلول شك فعائلة الحسناوي ولكن بدا يفكر بلي يقدر يكون شي حد آخور وهو ماعارفوش!!مشى باتجاه سبيطار..كان هدفو حسن لي يقدر يعطيه الاضرار الحقيقية ديال هاد الادوية..

يتبع ...

كيجاتكم الصدمة!!

فنظركم شنو غيوقع من بعد وكفاش غتغير الاحداث!!..

وشنو غتكون ردة فعل رؤيا فاش تعرف!!!

أسيرة جبروته الجزء الخامس

محتوى القصة

التنقل بين الأجزاء