قصة أسيرة جبروته

من تأليف Chaimae de Fes
2019قصة كاملة سفالة متوسطة

محتوى القصة

رواية أسيرة جبروته

قصة متعددة الابطال فيها كلشي من لي كتبغيوه...ولأول مرة كوميديا نوعا مااا...واكيد رومانسية و شغف و اثارة و تشويق و التفرشيخ علا الجهد خخخخ ومحبوبتنا لي مايمكنش نتخلاو عليها السفالة فوق الشوايييية هاد المرة هههه..
القصة بعنوان أسيرة جبروته...
غي من العنوان غنفهمو بلي البطلات غادي ياكلو الدق مزيان سيغطو البطلة الرئيسة...
نتمنى تعجبكم حيت فري حاطة فيها جهد وتعب وأفكار جديدة ومختالفة...
مانطولش عليكم ونخليكم تكتاشفو القصة

🎀🎀التقديم🎀🎀

خارج مدينة كبيرة كاين فيلاج..تجمعو فيه فئة من الناس منهم جوج طبقات معروفة علا مدى العصور القديمة والجديدة...الطبقة الكادحة لي خدامين علا ولادهم فشتى المجالات..لي كيتعذبو ويعراقو ويديرو كثر من جهدهم باش ياكلو طرف دالخبز... وأكيد كاين الطبقة الغنية لي عايشين ف فيرمات واعرين وعندهم أراضي لا تعد ولا تحصى عايشين وفري معيشين معاهم اعداد هائلة من الناس لي كيسهرو علا خدمتهم وكيتخلصو عليها...
ووسط هاد المجتمع الصغير..مقسم لفيلاج لجوج احزاب من أول الزمان...والمعروف ان كل واحد فيهم عندو حكم وهيبة فايقة تا الأمن والحكومة....
تعاقب الاجيال ماخلاش هاد العداوة تموت ولا تنقص تا شوية..ولكن كل واحد فيهم تالدبا شاد تيقارو وشي ماكيتدخل فشي ماحد كل عائلة ماكتجبد لوخرا...
عائلة الحسناوي...مكونة من الأب طاهر الحسناوي والأم لطيفة و 3 الدراري:خالد وصلاح وكريم وبنت لي هي حسناء..عندهم أملاك فوق الخيال واسطبل عامر خيول وزيد و زيد..
اما العائلة الثانية هي عائلة الطراشن فهي مألفة من الأب محمد الطراشن والأم رحمة و 2 ولاد حميد وأمين و رؤيا...تا هما ماكيقلوش أهمية علا لولين مي لي ناقصهم هو البرلمان...
العمدة ديال الفيلاج والامن ديالو ديما كيحرصو علا العلاقة الطيبة بين هاد جوج د العائلات..تا واحد مايتمنى يسخطو عليه ولا يدخل معاهم فشي مشكل..وفالمقابل كل واحد فهاد جوج عائلات كيحاول يجذب ليه اكبر عدد..وفري مساعداتهم للناس وتلبيهم لحل المشاكل خلا هاد الناس يقدرو يضحيو بحياتهم فداء ليهم ومايخليوهم لا فسراء ولا ضراء...
كلما كتكون شي مناسبة ولا شي حفل كيتعذبو كبار الفيلاج بزاااف بقوة لي خصهم يتهلاو فعائلة الحسناوي وعاوتاني فعائلة الطراشن باش تا واحد مايتقلق وتبقى العلاقة سلمية بيناتهم ومايهرسها والو...
====>على بركة الله..

صباح جديد....
بنت لابسة فوطة دالجلايل وطالعة بزربة فالدروج ديال فيلا كتحمق غالب عليها الطابع التقليدي..مشات فالكولوار كتجري وقبطات ودخلات لبيت بلا إذن ومشات نيشان باتجاه الفراش..
سعدية:ختي رؤيا ختي رؤيا فيقي.(رؤيا كتكسل وحلات عينيها فيها كتكمش جبهتها وتفوه)فيقي ا ختي راك سيد الحاج غيرجع دبا من صلاة الصبح وخصك تكوني فالطبلة..
رؤيا:اوووف فوقاش ربي يحن علينا من هاد الفيقة..والله ماتقولي انا لي غنسرح البقر ولا الغنم..بففف..
سعدية:وا نوضي اختي راك عارفة الا ماتجمعتوش يقدر تجي فيا انا يقولك مافيقتكش..
رؤيا:صافي صافي هانا نايضة..ماما فاقت؟؟
سعدية:اه هي لي صافطاتني كيف العادة..ياله سربي ا ختي الله يخليك..
رؤيا:واخة صافي..نصلي ونهبط..
سعدية:واخة ختي..صباحك مبروك..
رؤيا جاوباتها بابتسامة وحكات فشعرها وناضت..دخلات نيشان لحمام غسلات وجهها وقضات حاجتها وتوضات..صلات وهي كتجمع الصلاية سمعات صوت طوموبيل باها..لبسات صباطها وبقات بحوايج الصلاة لي هما نيت الحوايج لي كيرضيو باباها...اه رؤيا من النوع لي كتلبس الواسع وكتخلي الفولار ديما فوق راسها مدرقة شعرها شوية واخة شعرها ديما طالقاه كحل كيلمع وكتعتابرو جزء مهم كيكمل جمالها..مهم لابسة عباية واسعة فالغري مغلوق وفوقها فولار ديالها رخاتها شوية وجرات كل طرف علا كتفها وعنقها بقى كيبان شوية..
هبطات كتجري فالدروج تا وصلات حدا ماماها:صباح نور ماما..
رحمة:صباح نور بنتي..
رؤيا وقفات حدا ماماها تا دخل الحاج محمد معاه ولدو لكبير حميد لي تقريبا مسؤول علا كلشي..
الحاج محمد بصوت خشن قاصح:السلام عليكم..
رؤيا وماماها جاوبو بتبات:وعليكم السلام..
الحاج:فين هو الفطور..
رحمة:ها هو لداخل ا سيد الحاج...
سبقهم الحاج ودخل وهما موراه حانيين الراس..
دخلو وجلسو ياكلو فصمت غي حس الماكلة لي كيتسمع مرة مرة..
بعدما سالاو...ناضت رؤيا تهز مع سعدية الفطور.. وتا رحمة كتدي فيديها لكوزينة..حيت هكا دايرين واخة الخدامات كاينين.. كيبقى ماكاينش لي يخدمهم حسن من نفسهم و تا الحاجة رحمة ضروري طيب بيديها وتشرف علا الكوزينة حيت ماكلتها ماكاينش لي يدير بحالها وحيت الحاج ماكياكل غير من يديها..
اما الحزب الثاني ههه زعما الفيلا الثانية ياله فاقو وغي صوت الزغارت لي معمر المكان..اه ولدهم الوسطاني الليلة عرسو..فيقوه خوتو الدراري بالضحك واللعب..اما النسا مشاو لحمام بكري باش يستاعدو لليلة المعتبرة..
الكبير فيهم(خالد):ا نوض ا سي بحرا نمشيو تا حنا لحمام..
الصغير(كريم):ههه ليوم نفركوك تا تولي كضوي هههه..
العريس كيضحك والابتسامة علا وجهو لي كتسحر(صلاح):هههه والله ويقيصني شي حد تا نطيحو فداك الحمام ههه ها انا علمتكم..
خالد:وا نوض نوض..العيالات سبقونا وخصنا تا حنا مانتعطلوش حيت حباب لعروسة مع 12 يكونو هنا..
صلاح:وا صافي ماكاين لاش توترني علا الصبح هههه..
كريم:ههه نوض قالا توتر..بيني وبينك شهيتيني فالزواج..
صلاح ضربو لظهرو:هههه تا نوض وكون تحشم..
ناضو هزو حوايجهم وتحركو بالطوموبيل باتجاه الحمام التقليدي..اما باهم لحاج طاهر كان واقف علا شغالو ومخلي ولادو علا راحتهم فهاد اليوم لي ماكيتكررش بسهولة...

رؤيا جالسة كتقطع الخضر فالكوزينة وسعدية كتغسل الماعن معاها ويهضرو..
سعدية:عرفتي ليوم شنو كاين؟؟
رؤيا:شنو؟؟
سعدية:عارفة بلي لحاج الحسناوي ليوم...
رؤيا بزربة:شوووت واش حمقا كتقولي سميتو بالجهد فالدار..بغيتي تنحاي اليو!!.😨
السعدية:ويلي ويلي نسيييت ا ختي رؤيا وحق سيدي ربي 😰😱..
رؤيا ضحكات وشافت فيها بغمزة:شنو عاوديلي!!
سعدية بالحس:ولدو الوسطاني ليوما عرسو..
رؤيا:شكون فيهم؟(غوبشات)ماتقوليليش لي طلق شحال هادي كلبو عليا؟!
سعدية:ههه اه..هوااااا هاداااااك هههه..
رؤيا:تفوووو..لكلب لاخور..وشكون هاد المتعوسة لي غتزوجو مسكينة؟؟
سعدية:والله مانكذب عليك يمكن ماشي من هنا واقيلا..
رؤيا:تفووو باش فكرتيني..
#فلاش_باك
قبل 10سنوات..
رؤيا حدا الاراضي ديالهم كتمشى وخوها لكبير حميد مشغول فشي حاجة قالها تبقى تساينو تماك ولكن عقل الصغر...والورد فالارض خلاها تبقى غادية وكتجمع فيهم وفرحانة..بقات غادية علا رجليها تا تلفات ليها طريق الرجعة ومع كانت صغيرة بزاف ياله 9 سنين..بدات تبكي وتغوت وغادية علا رجليها..دور فبلاصتها وتقلب بعينيها الحومر بالبكى..كتمسحهم وتشوف الطريق وحالها ماعالم بيه غير الله.....بقات غادية شحال تا وقفات حدا الطريق وتكات علا شجرة حاطة يديها علا وجهها ودموعها هابطين..
شوية وهي كتشوف ولد كبير شوية تكون عندو شي 17عام جاي وشاد كلبو بسنسلة..
بقات كتشوفيه وخايفة تا وقف حداها..
صلاح قرب حداها مستغرب:شكون نتي وشنو كديري هنا؟؟
رؤيا رجعت حنات راسها:اهئ تلفت اهئ اهئ..
صلاح بقات فيه حنى عندها:صافي بلا ماتبكي..قوليلي سميت باباك نديك عندو..
رؤيا بابتسامة وبراءة:بصاااح!!
صلاح:ههه اه ماتخافيش..ياله شكون هو باباك ولا عائلتك؟
رؤيا:ب بابا سميتو محمد الطراشن..
صلاح غي سمع السمية بحالا دقيتي ليه ابرة ناض عاقد حجبانو ومخنزر فيها:واش عارفة راسك فين واقفة؟.
رؤيا بتوتر:ل لأ..
صلاح رافع راسو فالسما..نتي دخلتي لأراضي الحسناوي...
رؤيا ياله عرفات بالعداوة لي بيناتهم وتفكرات هاد الكنية لي ديما كتسمعها فالدار بشكل غير مرحب بيه والتوصيات ديال باباهم ليهم..تلفات مالقات ماتقول عينيها دمعو وهو مخنزر فيها..
رؤيا ببراءة:ص صافي سمحلي وريني غي منين نرجع بحالي ونمشي..
صلاح:هههه نوريك؟؟واخة..ها هو ريكي يوريك..
رؤيا حلات عينيها وهو يطلق لكلب من يديه وشير ليه باتجاهها وهي تبدا تغوت وتجري وريكي تابعها..مسكينة كتغوت ربي لي خلقها وهو ضحك ومين شافها كتجري عيط ل ريكي بالجهد ورجع عندو اما هي والو مازالة كتجري والخلعة غتقتلها..بقات كتبكي وتمسح عينيها تا كانت غدخل فطوموبيل خوها..
حميد خرج كيجري من الطوموبيل مزنك ومعصب:ف فين كنتي؟؟
رؤيا مشات عنقاتو وكتبكي:أهئ اهئ تلفت اهئ كلب اهئ كلب..
حميد:آش داك تمشي..هادي هي الحدود بينا وبين داك المصائب.ياااك قلتلك ساينيني مال راسك قاصح!!.دبا كون شافك شي حد منهم فين غنصدقو؟؟
رؤيا بقات كتبكي ومابغات تقول والو خافت ينوض الصداع بسبابها..أما خوها طلب يبقى هادشي بيناتهم باش باه مايعاقبوش وداكشي لي وقع..مي الخوف لي عاشتو داك اليوم عمرها تنساه وأثر عليها لمدة طويلة بزاااف..وخلاها تخاف من الكلاب بطريقة لا توصف...

رحمة:اوا بنتي ساليتو باش نصب لغدا؟
رؤيا عاد فاقت من التخيلات ديالها..
سعدية:اه ا لالة كلشي واجد..
رحمة:بنتي..مال وجهك؟؟
رؤيا:لا لا ماماليش ا ماما..ها الخضر مقطعين واللحم فوق البوطاجي..
رحمة:واخة بنتي..نتي خرجي شوفي الدار واش قادوها مزيان ورجعي ديري الشلايظ الزوينين بحالك..
رؤيا بهدوء:واخة ا ماما..
رحمة وقفات بنتها:مالك ا رؤيا شنو فيك؟
رؤيا تأففات وجاوبات ماماها:واش معقول نقرا حد الباك وفالتالي نبقى مقابلة غي الدار وشغالها..(ربعات يديها بعصبية)تا القراية مانكملهاش والله حتى حرااام..
رحمة دارت يمين وشمال:اويلي ا بنتي سكتي..راك عارفة رأي باباك فهادشي..
رؤيا:و ولكن اماما راه عييت..عام وانا جالسة فهاد القنط..فبلاصة مانمشي نقرا ونشوف الدنيا..وزايداها بهاد اللباس لي مانقدرش نبدلو ولبس بحال كاع لبنات..
رحمة:واش غنبقاو نقولو ونعاودو!!صافي هادشي لي كتب الله..مين تزوجي داك الساع ديري نتي وراجلك لي يريحك..انا عيييت من هادشي وماقادة علا صداااع..
مشات رحمة تجلس ورؤيا تعصبات وخرجات كتسووط بوحدها..صعيب بزااف تحس بلي حريتك مقيدة..وبلي ماقادرش تحقق تا جزء بسيطمن احلامك..اصلا من ديما رؤيا كتحس بباباها كيفضل الدراري عليها وماعندوش مع لبنات..بحالا هي ختارت تكون بنت..ولكن شنو غدير هكا كتب عليها الله تا الولد الوحيد لي عجبها ماكانتش كتلقا كيدير تحسو باهتمامها تا سافر وتقطعو اخبارو....بقات مخنزرة وحاضية شنو كيديرو الخدم ولكن عقلها غايب فعيشتها المملة...
جا الغدا ودار الحسناوي عمرااات بزااف..العروسة لفوق فواحد لبيت كتقاد حالتها والرجال لبسو وهبطو يستقبلو الناس لي جاو...
داز الغدا عادي فالدار لوخرا..السكات معمر المكان..تجمعات الطبلة وكل واحد طلع لبيتو بنفس الروتين..
جات العشية والحفلة بدات..
صلاح فرحان ولابس جلابة دالخيط تحتها جابادور بلونكاسي..وخوتو متيتزين قدامو..
اما العروسة لفوق قاداتها النكافة وحداها حسناء خت الدراري الضحكة عندهم من لوذن لوذن وفرحانين..اصلا العروسة سميتها آلاء زعرا وزويونة وباينة فيها ضريفة واخة حاسة براسها شوية(شعور عادي عند تيتيزااات)..
هبطو اخيرا برفقة العريس لي مفتاخر والسعادة باينة فعينيه..جلسو حدا الناش والنشاط بدا..وصوت الموسيقى تعالى فالسما وكلشي متمني يحظر لهاد العرس لي علا أعلا مستوى..
الحاج محمد غادي فطوموبيلتو هو وولدو حميد وراجعين لدار تا كيشوفو العافية نايضة فالارض ديالهم وهما يحلو عينيهم مزياااان وحبسو الطوموبيل بزربة وخرجو كيغوتو..ومن الزهر الارض ديالهم لي قريبة شوية لحدود ديال أرض الحسناوي..
خرجو وحميد كيصوني علا الرجال يجيو يطفيو هاد النار لي الا طولات غتكون كارثة..
الحسناوي جا عندو خدام وقالهالو فوذنيه تصدم وعيط لولدو خالد يجي معاه..
صلاح حس بشي حاجة فشكل وهو يصافط كريم يشوف شنو وقع..
مشاو لعندهم وكريم هز طوموبيلتو تابعهم..
حميد والحاج غيطرطقو والرجال كيجيبو فالما ويطفيو والبومبيا كيف العادة تعطلات..
بقاو علا داك الحال تا مشى الحسناوي لأرضو كيطمن عليها لا تمشي العافية تقيصها..
الحاج محمد كان حاير فهمو تا جا عندو خدام وهضر فوذنو وبلا تفكير مشى لطوموبيل ركب وولدو ركب حداه بزربة ومافاهم والو..
حميد:لواليد فين غاديين؟؟غنسمحو فالارض دبا؟
محمد هضر مع الشيفور:سير نيشان..
حميد كيشوفيه وفالطريق..
بقاو غاديين تا هضر محمد بصوت قاصح ومعصب:حبس هنا..
خرج من الطوموبيل والحسناوي شافيه خرج عينو فيه:نتا عارف راسك فين واقف دبا؟!
محمد:صافي درتوها..
الحسناوي:شنو كتخربق نتا وفوق أرضي؟؟
محمد:بزعط الا كانت أرضك..ولا نتا كديرلها القيمة وباغي ضيعلي رزقي.(غوت)الا الارض الااااا الارض راه طيح فيها الروح..والا سحابلك كاين عرس ولدك وغتغمق عليا بلي مامساليينش غتكون غالط..ماكاينش من غيرك نتا..نتا وعائلتك لي غديروها ماكاينش من غيرك..
الحسناوي:تاقي الله تاقي الله واش انا مسالي باش نفكر فيك لا نتا ولا ارضك لي ماكيهموني تا شوية..
محمد:هادشي غيخرج منك وبقى عاقل اهيااا..والله لا بقااات فيك فهمتي..

كريم عيى صابر وفالتالي خرج كيجري:باراكة ماطيح علينا فالباطل..سير فحالك حسن ليك..
الحسناوي غوت:كرييييم..سكت خليني مني ليه..
محمد:لا تباركلله ولاو تا البراهش يدويو مع الحاج محمد الطراشن..
كريم تغلغل:برهوش..لبرهوش هو نتا لي جاي تنزل لباطل علينا..
حميد بعصبية:آهيااااااا حدك تم البرهوش هو نتا ولي ولدك..قلالين الحيا مافيكم لا عفة ولا شرف..
اوا صافففي دبا زندات القضية وخالد واخة حكيم فعقلو زاد تاهو كيغوت:هنيونا واش هكا باغيين تحلو الخلاف..خليو لكبار يهضرو ويتفاهمو(جر خوه باش يهدن القضية)
محمد:هههه نتفاهمو..علاياش نتفاهمو؟علا نتوما كتعرفو تفاهمو..لمهم قلبتو علينا غتلقاونا..العين بالعين والسن بالسن والبادئ اظلم..
كريم تغلغل:بربش قرب لارضنا ولا ملكنا وتشوف شنو يصرا فيك..
محمد:لاااا خلعتيني..(مشى باتجاه الطوموبيل ورجع جابب فيديه بريكا)
الرجال تخلطو نصهم مع الحسناوي ونصهم مع الطراشن..وترونات بين الدراري اما كريم مشى كيجري لطوموبيل جبد من الطابلو مسدس ورجع كيجري وهو كيشوف محمد كيدافع مع باه وداير عينيه تا هو يحرق الارض وخوه كيضارب مع حميد والرجال شي كيضرب فشي صافي تلف وبقى غادي باتجاههم تا شاف باه طاح لأرض ومحمد غيشعل شرويطة يلوحها وبلا تفكير صوب المسدس لفوق كيحاول يخلعهم ويبعدهم تا تسمع صوت القرطاس مجهد كلشي قفز وشافو فين تا كيبان ليهم محمد بكل هيبتو وقوتو عينيه تقلبو وطاح علا ركابيه(حميد غوت:بااااااااااااااااا)وهو يتزدح علا وجهو وحميد كيجري لعندو ويحرك فيه..اما كريم داااخ مافهمش شنو وقع...هو صوب المسدس لفوق..اذن كفاش الضربة جات فمحمد..الرجال وطاهر وخالد تصدمو بدااو يتصرفو بزربة خصهم يبعدوه وكريم كيدفع فيهم مازال ما استوعب..
كريم بهستيرية:ماشي انا والله ما انا ليضربتو..
خالد بعصبية:ياااله تمشي دبااا..
كريم:طلق مني انا مادرت والوووو...
طاهر غوت:واش باغيهم يقتلوك تحرك...لاااش تابعنا لاااش؟؟؟
داوه لطوموبيل بزز اما رجال الطراشن تابعينهم وهما هربانين وفلحظة ترون كلشي وحميد كيفيق فباه ويغوت باش يعيطو لومبيلونص واخة شاف باه بدا يغيب والضربة جاتو فالصدر ديالو ماعرفوها لا واش فقلبو ولا فالرية ديالو...
بقا تماك محمد كينزف وماقادينش يخركوه خايفين يضروه ولومبيلونص شوية ووصلات...طلع معاه ولدو مزروب ومشاو لوبيطال بزربة..
محمد كينازع:ح ح حاا حميد..
حميد:باااا هني راسك ماتهضرش..
محمد واخة دارو ليه الاكسيجين كيحيدو ويهضر بكلمات متقاطعة:د دم دمي ف فرقبتك...
حميد بخوف:لا لاااا باا ماتقولش هاد الكلام..رتاح بعدا ودبا تعيش لينا...
محمد ترخى وسكت كيشوف بعيد...
الممرض:كتسمعني...الحاااج كتسمعني...
صوت الخطر بدا كيتزايد..ناضو كيجبدو الالة دالقلب وكيلتخوه تالفوق والنبض مازال شبه معدوم...اما حميد كيشوف وقلبو كينبض فالمية وساكت..
بقاو معاه شحال تا تسمع تييييييييييييط فالجهاز دالنبض وهما يخطو داكشي مصدومين..
حميد بصدمة:علاااش..علاااش حبستو كملو..
الممرض عذرو بقى ساكت وهو يشنق عليه:كملللل...لاش حبستي!!بااا غيعيييش فهمتي 😤..
الممرض حنى راسو لأرض مخليه شانق عليه:درما لي علينااا..باك ا سيدي 5دقايق وقلبو متوقف..الله يرحمو..
حميد رخى منو وعينيه مدمعين:ص صااافي..م ماااات!!
طاحو ركابيه لارض وشدلو يديه حنى عليه ودموعو هابطين:باااا صاافي سخيتي بينا 😰😖😣..(علا عينيه حومر)ولكن والله لا بقاات فيهم..ودمك ماغيمشيش غي هكاك..كووون هانيييي...

صلاح جالس فالبرزة وعقلو ماشي معاه..حاس بلي شي حاجة ماشي هي هاديك واقعة..بقى مرة مرة يشوف فالساعة..
آلاء قربات منو:حبيبي مالك!!
صلاح حاول مايبينش ليها:لااا والو احبيبة(اصطانع ابتسامة وهي دارت فرحانة مكملين العرس)..
دق دق دقققققق...
هبطت رؤيا كتجري من بيتها بقوة الدقان لي كيخلع...خرجت سعدية من الكوزينة كتجري وهي كتعقد فولارتها ومعاهم الحاجة رحمة لي كتساين تعرف شكون جا..
سعدية كتحل لباب:الله يسمعنا خبار الخير..
رؤيا بتوتر:سربي حلي...
تحلات لباب كيبان ليهم با سلام(با سلام هو ذراع محمد الايمن..فأي حاجة كيكون معاه الا هاد النهار كان فشي شغال فالمدينة مصيفطو ليه الحاج وماحضرش للحريق والرجال وصلولو الخبار جا يعلم العائلة بكلشي حيت ياله رجع)
سلاام صفر فوجهو:السلام عليكم..
رؤيا زادت حداه:با سلااام اش هاد تلدقة تخلعنا ياك لاباس..
سلام:الصراحة...ماعندي مانخبي عليكم..
الحاجة رحمة بخوف:قول ا با سلاام ياااك لاباس!!
سلام حنى راسو متأثر:الحااج..
رؤيا بدات تفتف:ب بابا م مالو؟.
سلام بأسف:ضربوه بالقرطاس ولاد الكلب...
رؤيا دارت يديها علا فمها وغوتات:بااابااا..
رحمة ضربات علا وجهها:اويلي محمد...
سعدية حلات عينيها وتصدمت..
سلام:جيت باش توجدو راسكم نديكم عندو..
رؤيا:اميمتي عاا بابا اهئ اهئ..
رحمة:ياله ابنتي لبسي نمشيو اهئ اهئ..
رؤيا جات تطلع وهو تيلي ديال الدار صونا..
رحمة مشات تجاوب حيت قريب ليها ورؤيا واقفة كترقب..
رحمة:ألو............(طاح ليها تيلي من يديها ودموعها فعينيها)الله اكبر اهئ الله اكبر اهئ اهئ(رؤيا حالة فمها والسواقي هابطين من عينيها)ان لله وانا اليه راجعون 😭😭😭..
رؤيا طاحت علا ركابيها وسعدية مشات كتجري عندها كتبكي كتنوضوها وهي صافي فشلات بدات تشوف غي الضبابة بقوة الصدمة تا طاحت ليهم تماك...
رحمة:بنتيييييي 😫😫..
هزها باا سلام لي فهم وتصدم وطلعوها لبيتها يبكيو ويندبو علا فراق المرحوم...
الطوموبيل رجعات لدار الحسناوي وكريم علا فمو كلمة وحدة..
كريم:مااشي انا لي قتلو نحلف ليكم..
خالد:نتا مالك واش هربلك..كلنا شفنا كلشي نتا لي ضربتي ودبا عاد فقتي..
كريم تعصب:واا ماشي انا ا ردم..وا راااه..
قاطعو بااا بتصرفيقة(طرااااخ...كريم شد حنكو وعينيه حومر ماثاقوش بيه):كون ماجيتي ولدي كون نحرتك علا فعلتك...ولكن دبا الكبدة لي كتهضر....تحرك جمع حوايجك وغبر من هنا...طفي تيليفون وهرب قبل مايجيو ليك...انا غنقولك فين تمشي..
كريم بحكرة:ولش ماثايقينش فيا...مادرت والو وباغيين تنفيوني؟؟انا ماقتلتش..وماغاديش نهرب..
الحاج طاهر بقلة صبر:خالد دي هاد الموصيبة من قدامي حيت الا بقى اما انا لي غنموت ولا غنقتل دينمو...
خالد جر خوه حيت شاف القضية حماضت وغي شوية يتفرش اللعب والمشكلة العرس خدام...
كريم تنهد ورخى راسو ومشى مع خوه لي بدا ينصحو ويوصيه وهو مازال مامثيق شن وقع وكفااش وقع اصلا فنفس اللحظة لي تا هو ضرب فالسما القرطاس..لدرجة شك فراسو وقال يمكن غلط وصوب لجيهت محمد..ولكن تالهاد الدرجة هو قناص..باش يصيب الهدف فالضربة لولا!!..اسئلة بزاااف حيراتو وهو غادي بطوموبيل الخدامين يوصلوه لمدينة خرا...
خالد:شوف فالطريق غنعلموك فين تخبى...وشوف ماغيطولش غيابك..ثيق فيا يالك انا خوك..
كريم اكتفى بالصمت والصدمة...
خالد وجه كلامو للشيفور:ياله تحرك..
مشات الطوموبيل ورجع خالد للحفلة باش يحبسها قبل ماتوقع شي فضيحة..
صلاح اول ماشافهم ماكرهش ينوض يسول ويهضر ولكن تا كيتفاجئ بخوه خالد وقف علا راس الاوركيسترا وطلبهم يحبسو اللعب...
صلاح رسم استغراب علا وجهو وآلاء تصدمت ماعرفت باش تبلات..
خالد هز لميكرو:سمحولينا ولكن الحفلة سالات...والعرس هو هادا..تصبحو علا خير...
الحظور تصدمو وتمو خارجين بلا كرامة كيتأففو..اما العروسة غتبخ الدم ومافاهماش..ناض صلاح باش يفهم لفيلم من لول...
صلاح مشى عند خالد:خويااا ..آش واااقع؟؟

خالد شافيه كيمسح علا وجهو:اجي معايا...
صلاح دار شاف ف آلاء لي غطرطق..غمزها بلي غيمشي وهي حنات راسها..
مشاو للمكتب شدو لباب..
حسناء وقفات حدا آلاء:حبيبة ياله طلعي لبيتك..
آلاء عينيها مدمعين:آش واقع باش يخسر عرسي اهئ اهئ..
حسناء مالقات ماتقول:ياله دبا بلا ماتبكي مين يخرج صلاح غيقولك كلشي..
العائلة كلها ساقت الخبار ولطيفة كتبكي وتناني حدا راجلها فلبيت..
طاهر:صاافي ا لطيفة..ماتخافيش غادي نحميه واخة مايستاهلش الحماية..
لطيفة:اهئ اهئ..الله يا ربي ولدي..مسكين غيتغرب..
طاهر حط يديه علا كتفها حيت كيخاف يطلع ليها السكر:راه غنصافطو عند يامنة...غي بغيت نوصل لعنوانها الجديد..قالولي رحلات لبارح..
لطيفة:اه يامنة ضريفة وعزيز عليها كريم..غتهلا فيه اهئ اهئ يااك..
طاهر:داكشي علاش ختاريتها..من نهار سالات الخدمة عندنا وهي علا تواصل معانا..ودبا ماكنظنش ترفض..
لطيفة:يا ربي 😖..
صلاح عاقد حجبانو وداير يد فجيبو:آش طرااا؟؟
خالد جلس علا الكرسي معصب:كريم..
صلاح بترقب:مالو!!
خالد:ضرب محمد الطراشن بالفردي...
صلاح حل عينيه:شنو!!!..
خالد تنهد:اه ياله هربناه..مافينا لي يشدوه..
صلاح:فين هربتوه؟؟
خالد:ماعرفت..الواليد صافطو لمدينة خرا ومازال ماقالينا فين غيجلسو..
صلاح مسح علا راسو:موضيبة هادي...ولكن مافهمتش شنو وقع لهادشي كامل؟؟
خالد حنى راسو وبدا يعاودلو كلشي..
رحمة كانت غتمشي لوبيطال ولكن بنتها تلفاتها وتا حميد عاود عيط واكد عليهم بلا مايطيو هو غيدير كاع الاجراءات..
سعدية دارت العطر فيديها كتفيق رؤيا:ختي اهئ اهئ الله ياربي الله...فيقي ا ختي اللهم قضى وقدر..
رؤيا بدات تنفس وتحل عينيها بزز:ءءء ب باباااا ب بااا باااباا..
رحمة دايرة يديها علا فمها كتبكي ومافيديها مادير..حنات عندها شدات يديها..
رحمة:بنتي بنتي اهئ اهئ..
رؤيا فعالم آخور كتغمض عينيها وتحلهم وكل مرة تشوف فقنت وتبكي:ب بغيت بابااا..جيبولي بابااااال اهئ اهئ...
رحمة كتمسحلها عينيها وسعدية ماقدراتش تصبر تا هي جربات اليتم وتفكرات همها بقات تبكي بالجهد فبلاصة ماتصبرها...
سلام مشى عند حميد يعاونو فداكشي ومراتو جات بدات تعيط لعائلة يجيو...وسبقات ب أمين لي عايش فكازا خدام فشركة كبيرة مختصة فالمواد الكيميائية..وبسبب دراستو كان مخاصم مع باباه لي ماكانش باغيه يكملها باش يحظي رزقهم..وبكن تعنتو خلا الامور توصل لاقصاها وختار يبعد ويرسم حياتو بكفائتو...
آلاء طلعات لبيتها بلبستها كتندب:اوفف علا زهر عندي اهئ اهئ...
حسناء:تهدني ا آلاء ماديريش فراسك هكا..
آلاء:لا ندير لا واليدين ولا خوت ودبا تا عرسي مافرحتش بيه..
حسناء شدات ليها يديها:صافي بردي وربي دبا يعوضك اختي...دبا نخليك غنهبط عند ماما..
آلاء بقات مفقوصة جالسة وتبكي علا الشوهة لي وقعات اما حسناء هبطات كتجري طمن علا ماماها..
أمين فتح تيلي:ألو..
حادة:ولدي أمين..
أمين:اهلا خالتي حادة لاباس..
حادة:حمدلله لي عرفتيني...لمهم اولدي بغيت نقولك راه...اممم..
أمين جلس فبلاصتو مقاد:خالتي ياك لاباس..هضري...
حادة:الصراحة اولدي سيد الحاج...(بنبرة بكاء)اممم الله يرحمو...

أمين تصدم:ش شنو؟؟
حادة:اه اولدي..اهئ اهئ الله يبدل محبتو بالصبر..(امين درق وجهو بيديه ومتكي علا ركبتو ومازال كيسمع شنو كتقول)لمهم اولدي دبا هو فالسبيطار وبغيناك تجي دبا..كلشي هنا محتاجك..
أمين مازال واكل الدقة:واخة هانا جاي...
قطع معاها مألم حيت باه مات وهما متخاصمين بقى فيه لحال بزااف وجاتو قاصحة..ناض لبلاكار هز باليزتو وبدا يجمع حوايجو ماعارف راسو شنو كيدير..
فمدينة خرا وسط دار متوسطة..
مريم:مييي ا مييي..
نجية:يعطيك الغمة..كتقولك ماما ابنت الكلب..
مريم بخوف:صافي صاافي ماما...
نجية:آش بغيتي اوجه القزدير..
مريم:بغيت نمشي عند خولة..
نجية شافت فالساعة:واش دينمك ماكتشوفيش شحال الساعة!!مازال باغية تخرجي..
مريم:واا ماما راها ماشي فقرطاخنا..راها غي فالدار لي قبالتنا..
هزات نجية غراف دالبلاستيك شيرات عليها بيه..كون ماهربات كون تبوطات..
نجية:تحلك اللسان ا سليعفانة..وليتي تدي وتجيبي معايا فالهضرة..
مريم كترجف بالخلعة وبدات تغبن:والله ما ماتحل شي لسان..حاشا لله..ياك كنسولك قبل اي حاجة..خولة محتاجاني وقالتلي نهضرو شوية وصافي..
نجية بحدة:تجي هي مالها علا رجليها نقش الحناء..
مريم:لا غي هي كتحشم منك حيت فاش كتجي كتبقاي معانا 🙄..
نجية:شنو نخليكم بوحدكم ديرو الزبايل!! ءءء زعما كبرتو؟؟..
مريم جات تهضر قاطعها صوت تيلي..
نجية منفخة:سيري تجاوبي ونتي مسمرة قبالتي..بغيتلك لمسامر فقزيبتك..
مريم مشات كتسوط غطرطق هزات تيلي:ألو.....اه شكون معايا؟؟(بقات مدة طويلة كتصنت تا دترت يديها علا فمها)اويلي..لا حول ولا قوة الا بالله..ان لله وانا اليه راجعون..
نجية تخلعت بدات تغوت:اش كاين ابنت الحرام هضري..
مريم كملات فتيلي:واخة صافي ا شريفة دبا نجيو.بسلامة..(دارت عند ماماها)مي ءءء زعما ماما..
نجية:نطقي يعطيك الساكتة ابنت الحرام..
مريم:راجل خالتي رحمة سي محمد مااات..
نجية ضربات علا فخادها:اويليبيي...لا اله الا الله...الله ياربي علا ختي مسكينة الله اهئ اهئ..
مريم مشات شداتها:صافي اماما دعيلو بالرحمة..بلا ماتندبي عليه..
نجية:مسكين مازال صغير اهئ اهئ كيوقعلو؟؟
مريم:ماعرفت لي قالتولي شي وحدة تما قلتولك..لمهم دبا ياله نمشيو..خصنا نوقفو معاهم..
نجية مسحات عينيها:واخة سيري جمعي شراوطنا وياله..
مريم مشات كتجري دخلات لبيت وبدات تجمع..صونات علا خولة وقالت ليها شنو كاين..عزاتها وقطعات وهادشي قبالت مها حيت عندهم غي الفيكس..التيلفون ماتحلمش ديرو...مها صعيبة بزااف وماكتفاكش..
دخل خدام مزروب للمكتب ديال خالد وصلاح مازال معاه..
خالد بعصبية:ءء مالك داخل للجامع شكاين عاود؟؟
الخدام كيلهث:موصيبة..
صلاح خنزر بتبات:هضر شنو عاود؟؟
الخدام:محمد الطراشن مااات..
خالد شاف فصلاح وزادو تصدمو القضية غادية وكتغراق..وخوهم اكيد غيمشي فيها...
هبطت مريم ومها فالدروج تا كيتفاجئو بمرا كبيرة كتحل لباب..
المرا:سلاام..
نجية:وعليكم السلام..
المرا:انا جارتكم الجديدة هنا..
مريم:مرحبا بيك..(خنزرات فيها نجية وهي تسكت)..
نجية:امم مرحبا بيك ا خالتي..
المرا:الله يبارك فيكم..باين فيكم ناس طيبين.(نجية مافيها لي يهضر مزروبة)نيت تا انا بوحدي نتوانس بيكم..
نجية:انشاءلله..
مريم:دبا مسافرين اخالتي..فاش نرجعو نهضرو..
المرا:واخة الله يديكم علا خير..
هبطو دغيا وهي دخلات لدارها..شدو الطريق نيشان كيفما هو الحال بالنسبة لأمين لي هز طوموبيلتو وكسيرا بسرعة..
حميد وحل فالاجراءات تماك..ولكن مع البوليس كثر..
حميد واقف معاه سلام والكوميسير كيسول..
الكوميسير:سي حميد..شاك ولا كتاهم شي حد؟؟

سلام جا يهضر:اه ش...
حبسو حميد:لاااا..
سلام دار دورة دالكار فحميد مصدوم ومتفاجئ والكوميسير سامع شي تخربيق من لي وقع..
الكوميسير:سي حميد..من الافضل تعاون معانا وماتعقدش الامور..
حميد مخنزر وكيشوف بعيد:انا قلت لي عندي...
سمح فيهم ومشى وسلام بلع فمو ماقدر يقول والو حيتاش الا هضر كيضر حميد..
سلام:سمح لينا خصنا نكملو الاجراءات..
الكوميسير مخنزر وكيهضر مع راسو:بان ليا الدعوة غتكبر بيناتكم ونتوما لي باغيين هادشي بففف 🤨..
الدار عمرت بسرعة والناس تجمعو فدار الطراشن كيعزيو ولي داير معاهم شي خير كيبكيو عليه...وفري قدما كان الحاج محمد صعيب قدما كان عندو اعمال خيرية خلات النص فداك الفيلاج كيبغيه ويفديه بروحو...
صلاح كيتصنت مشوكي:دبا كريم دافع علا ارضنا باش هو ضرب محمد الطراشن؟؟
خالد:اه..ولكن ياريتو ماجا زاد عقد الامور..راك عارف خوك كفاش داير..عصبي ومتهور بزاااف..
دخل لحاج طاهر عند ولادو للمكتب:امدرا كاين شي خبار؟؟
خالد باسف:محمد مات..
طاهر تزير:لاحول ولا قوة الا بالله..
صلاح:اوا هو جابها فراسو..شكون قالو يبغي يحرق الارض..الصراحة تا انا كون كنت فبلاصة كريم ندير نفس الشي..
طاهر:ماشي هكا كتحل الامور..سحابلكم هنا غيحبس الموضوع(الدراري كيشوفو فيه)..نتوما غالطين وبزااف..غي الله يحفظ من لي جاي..
صلاح بتكابر:شنو فشلهم مايديرو..دبا يكمدوها ويسكتو نيت القانون معانا...محمد لي تهجم علا الارض باغي يحرقها ولجأ لاسلوب ندي..حنا مادرنا والو غي حافظنا علا رزقنا...
طاهر تأفف وجلس..
خالد:ودبا فين غيبقى كريم علاما نحلو المشكل؟؟
طاهر:صافتو عند يامنة..
خالد بدهشة:يامنة لي كانت مربية ديالو؟؟الواليد واش نسيتي بلي المرا جاها الزهايمر؟؟واش باغيها تكون سبب هلاكنا!!
طاهر:ماتخافش..يامنة كتحسبو بحال ولدها وكتحماق عليه وهي الوحيدة لي نقدر نثيق فيها..(شاف فصلاح)ونتا اولدي طلع عند مرتك ..غتكون مقلقة بزااف.(صلاح تنهد)اوفف مافرحناش تا فخاطرنا..
صلاح حنى عندو:برد ا لواليد..كلشي دبا يتقاد...ياله انا غنخليكم دبا..علموني بالجديد...
خالد:واخة..
حميد شاف باه مدخلينو لفريكو بعدما حيدولو القرطاسة لي جاتو فشريان القلب..بقى واقف متأثر وعينيه خارج منهم الحقد علا الناس لي حرموه من باه...ولكن كل تفكيرو فطريقة ينتاقم بيها منهم لأن القضية مابقاتش قصة عداوة ولكن ولات ثأر ماغيتهنى تا ياخدو...
دخل صلاح لبيتو لقى مراتو جالسة علا الفراش بحزن..
صلاح بابتسامة:حبيبة..
آلاء وقفات:صلاح شنو واقع باش تحبس عرسنا؟؟
صلاح شدها عندو كيمسح علا وجهها:غي شي مشكل بسيط..كريم دابز مع شي حد وكان خصو يبعد..
آلاء بعدم تصديق:كتفلا عليا ياااك..واش هادشي شغل دباز..(نثرات راسها منو وجلسات معبسة)ياك انا وليت منكم ولا مازال كتشوفني برانية..
صلاح مشى جلس حداها:لا احبيبة حاشا..غي مابغيتش نعمر دماغك فليلة بحال هكا..
آلاء باستهزاء:اينا ليلة..واش بقى شي عرس ولا ليلة عمر..دبا غي قولي لي وقع..
صلاح تأفف وعاود ليها كلشي..
آلاء تصدمت بقات طلع ماتهبط..
صلاح شافيها:كريم ظريف بزااف وماشي ديال هادشي مانبغيش تكوني عليه فكرة فشكل..هو فالاول وفالاخير حاول يحمي ارضنا وعزنا وشرفنا...
آلاء بعفوية:بالعكس..انا حاسة بيه ومن حقو..الله يعزو..(كتهضر وتشوف بعيد)اي واحد ظلم ولا تجرأ عليك خصك تدافع علا راسك..
صلاح ابتاسم:الله يخليك ليا..ربي عوضني بيك حيت باسنة درت شي حاجة مزيانة فحياتي..
آلاء تبدلو ملامحها:كتبغيني ا صلاح؟؟
صلاح باسلها يديها:كنموت عليك..وعمرني نفرط فيك..
آلاء عنقاتو مقهورة:الله يخليك ليا..تا انا الا نهار واحد بعدتي عليا غنموت..
صلاح خرج راسها دايرو بين يديه:شووت يموت عدوك..مازال نعيشو ونشوفو انا وياك احبي...ياله نوضي بدلي هاد التكاشط ههه واجي عندي راه موحشك..
آلاء بحشمة:و..زعما الظروف...
صلاح:كلشي عارف ليوم عرسنا وهما غيتكلفو بكلشي..(ضربها لكتفها)ياله نوضي سربي راسك..مابقيتش قاد تصبر..
مشات آلاء كضحك وتاهو كيضحك فوجهها حيت كيحماق عليها وباغي ينسيها شنو وقع بأي طريقة واخة بالو مشغول...

تعطل لوقت بزااف وكل واحد حاير فهمو..دغيا لبسات رحمة علا راجلها لبيض..ورؤيا مسكينة لبسوها جلابة مفتوحة وفولار بيضة..هبطو لتحت عند الناس يبكيو ويسكتو ويبكيو عاوتاني..تا وصل أمين...غي دخل طار علا ميمتو عنقها وهي كتبكي والناس بحالها...
أمين عينيه حمارو مخليها تبكي وتهضر:مشى باباك اولدي...مشى اهئ اهئ 😭😭..غدروووه اهئ اهئ..
أمين بحزم:تهدني ا لواليدة تهدني..
رؤيا كتبكي بالجهد:اهئئئ..جيبولي باباااااا...بغيتو دبا اهئ اهئ...ياربيييي ياربي برد النار لي فيا اهئ...
رحمة نسات راسها وبقات تشوف بنتها تبكي وسعدية وشي بنات شادينها...
أمين مشى عندها حنى علا ركابيه..اصلا عزيز عليه ختو بزااف وماكيبغيلهاش الاذية..
أمين بصوت حنين:رؤيااا..صااافي ماتبكيش ماديريش هكا..دعيلو فبلاصة ماتحرقيه...الله يرزقنا الصبر علا فراقو...
رؤيا كتشوفيه وتبكي:ماقاااداش اخويااا تكوييت انا تكويت فقلبي اهئ اهئ..
أمين جرها عندو عنقها وهي مخشية فيه دموعها شلال وبكاها واصل لبرا الفيرما مسكينة...اما رحمة شاداتها حادة جلساتها كيبكيو..
خرجات آلاء عند صلاح لقاتو كيخمم ببيجامتو..شافها بسم..
صلاح:تعطلتي عليا..
آلاء بحشمة:شوية وصافي..
جرها من يديها عندو:اجي معايا...
جلسها حداه وجبد سنسلة فيها S:هادي مابغيتش نشوف رقبتك بلا بيها..فهمتي...عمرك تحيديها واخة؟.
آلاء فرحات بزااف:كنواعدك احبيبي..
بسم وشدها ليها..وهي تحل المجر وجبدات بواطة جبدت منها غورميط بالبلاكة فالنقرة هو بسم حيت بجوج بيهم فكرو فبعضياتهم...
صلاح:اووو سعداتي مراتي الزوينة فكرات فيا..
آلاء:شي حاجة بسيطة وصافي نتمنى تعجبك..
صلاح:ماتقوليش هكا..عمرني غنحيدها تا انا باش تعرفي قداش كتبغيك ا بيبي..
آلاء فرحات:شوف راه كاتبة سميتي لور باش نبقى معاك فينما مشيتي هههه.
صلاح عنقها:عفريتة هههههه...
طيحها علا الفراش وبداو يحيدو حوايج بعضياتهم..تا تعراو صولو...طفى الضو وبداو يتسمعو آهاتهم وبوساتهم المشتاقة..تا دخل بيها وغوتات غوتة خفيفة وهي فرحانة بتعاملو معاها..وهو باسليها راسها فرحان وجرها ينعسها فحضنو...
أمين جمع الوقفة وقال لماماه غيمشي عند خوه...هزات راسها بالايجاب وهو خرج بالو معاهم..
كريم غادي الطريق كاملة غيتسطى فدماغو..ماعارفش كيدار وصل لهادشي..كيدارت القرطاسة خرجات فنفس لوقت لي صوب هو..مايمكنش شي حاجة ماشي هي هاديك..مايمكنش يكون هو لي ضرب حيت عمرو فكر يقتل شي حد..
الشيفور صونا تيلي ديالو الشي لي فيق كريم من تفكيرو..
الشيفور جاوب وعرف العنوان لي غيمشي ليه..حيت اخيرا الحاج طاهر قدر يوصل ليامنة ووصاها علا ولدو ..
الشيفور قطع وشاف فكريم لقاه كيشوف من الزاج بحالا مامهتمش بفين غيمشي وكلشي زايد ناقص...
أمين وصل عند حميد لسبيطار..غي شافو عنقو بعضياتهم..
حميد:مشى الواليد اخويااا مشى عند الله..
أمين مزير عليه:الله يرحمو ويوسع عليه(مصبر راسو بزز)..
حميد:غدرونا اخويا غدرونا..ياله كان معايا صحة سلااام..ولكن والله لابقات فيهم ..
أمين بهدوء:خويا عاود ليا كلشي بغيت نفهم شنو وقع...

أمين غي سمع كلشي تصدم:علاش ماقلتيش لبوليس؟؟
حميد:نتا حمق!!واش مسطي..شتي البوليس ماغيديرو والو..حنا لي غنديرو!
أمين بصدمة وكيخنزر فيه:آش غنديرو!!
حميد بشر:غنتاقم منهم...وكيفما قتلو بااا والله تا نقتل شي واحد فيهم..
أمين وقف بالصدمة:لااا نتا الموت دوخاتك..واش حمق باغي دفن شبابك غالي...شنو كتخرف علا نتا قتال ولا عاد غتولي؟!.انا عمرني نشارك فشي جريمة..والبوليس غادي نعلمهم يديرو خدمتهم..
حميد:شوف كنتي معايا ولا لا غنتاقم منهم..اما لبوليس الا هديتي تا دخلتيهم لا نتا خويا ولا كتعرفك..
أمين تزير:وحد الله ا صاحبي...واش كتركع غي هكاك..باغي تولي مجرم علا آخر يامك..فخبارك فتنوض الفتنة هكا..
حميد:تنووووض... حيت كون كنتي نتا حدا بااا(أمين تصعق بالهضرة)ووصاك تجيبلو حقو ماكنتيش غتكون بااارد هكا...ودبا خرج سوقي..ياك انا لي غنخرج علا راسي..اوا مين نتحبس تبراااو مني...
سمح حميد فأمين لي بقى مسمر فبلاصتو ماعارف مايدير..
رحمة شافا بنتها كتعاني بزااف شداتها هي ولبنات وطلعوها لبيتها..
خرجو كاملين وهي تكات ورحمة فوق راسها..
رؤيا بألم:أنا السبب ا ماما اهئ اهئ..
رحمة كتمسح علا راسها:شنو كتقولي ابنتي؟
رؤيا:انا فقت الصبح بكري بسباب بابا وقلت الله يعفو عليا من هاد الفيقة لي كنفيق...اهئ اهئ دعيت فيه ياااك اهئ اهئ..
رحمة كتمسحلها عينيها:لااا ابنتي لااا..هادا قدر ربي..واش حنا كندخلو فيه..نتي تمنيتي باباك يرخف عليك وصافي مادعيتيش فيه...الله راه عالم بالنيات ابنتي..
رؤيا كتشهق:حاسة بالذنب اماما..
رحمة باستلها راسها:شوووت ماتحسيش هكا...باباك دبا غيكون فرحان بيك وكااع مامقلق فهمتي...دعيلو بالرحمة احبيبتي..ودبا حاولي تنعسي..حسن ماتبقاي علا هاد الحال..
رؤيا:الله يرحمو اهئ اهئ...
رحمة بقات علا راس بنتها تا داها النعاس ودموعها علا خدها..مسحاتهم ليها وباستها وغطاتها وعاد هبطات عند النسا..منهم لي مشى بحالو ومنهم لي مازال فايق ومصدوم من الكارثة لي وقعات..
بدا كيطلع الصبح وكريم ياله دخلو لمدينة لي حاس براسو غيتحبس فيها لأجل غير مسمى..
اما مريم ونجية قربو يوصلو..مريم ناعسة علا ماماها فالكار ونجية غي تفكر وتخمم فختها لي ترملت مسكينة..
حميد وأمين جالسين علا الكرسي وعلامات الارق باينين عليهم بقلة النعاس..
أمين جلس مقاد كيدور عنقو يمين وشمال..
أمين:تشرب شي قهوة معايا؟؟
حميد بحزم:لأ..
أمين شافيه:واش هادشي مازال طويل؟.
حميد:غي يصبح الصبح يخرجوه..
أمين:اممم واخة..مهم انا نشرب قهوة ونجي..
حميد مادار تا ردة فعل..
الشيفور:هاحنا وصلنا ا سي كريم..
كريم:اينا دار فيهم؟؟
الشيفور:الدار الثانية..
كريم هز راسو وخارج:سي كريم..
كريم دار شافيه:الله يخليك عطيني تلفونك..
كريم بلا تردد هزو وعطاه ليه..
طلع للدار وبدا يدق..كانت ياله 7 دالصبح..
يامنة ناضت مخلوعة وعاد كتحاول تستوعب...ناضت حلات وهي ناسية شنو وصاها طاهر الحسناوي علا ولدو..
حلات لباب بقات مدة كتركز اما كريم هز عينيه فيها وبسم بزز..
يامنة:شكون نتا؟؟
كريم تصدم:نسيتيني ا مي يامنة..
يامنة غي سمعت مي يامنة تفكرت بلي كريم هو الوحيد لي كيقولها(اه واخة فيها الزهايمر كاين شي حوايج ماكيتنساوش حيت كيتزرعو فالقلب ماشي غي العقل)..
يامنة بابتسامة فارطة:ك كريم ولدي؟؟ههههه..
كريم فرح:هو انا...
عنقاتو وهو بادلها العناق حيت بحال مو الثانية..واخة كبيرة شوية ولكن ظريفة بزاااف..
دخلاتو وشدات لباب فرحانة بيه...
يامنة:آش فكرك بيا؟؟
كريم باستغراب(ماعارفش فيها الزهايمر):ياك الواليد هضر معاك لبارح..
يامنة:آءءء لا ماهضرش معايا...
كريم:😳😳(والله تا تحمقك هادي ههههه)

صلاح فاق بكري كيشوف فمراتو لي فحضنو فرحان بيها واخة فرحتو ماكاملاش..ناض قادها بالشوية باش ماتفيق ودخل لحمام دوش وخرج غي كيشوفها كفاش ناعسة مخشية فليزار مطروز بالازرق كيبسم بوحدو..لبس دغيا سروال كحل ثوب مع شوميز بلوغوا جاتو لاصقة..تعطر وهبط لتحت..
حميد مشى يسول فوقاش يخرجو باه...
حميد:اخويا فوقاش غتخرجو الواليد؟؟
الممرض:الصراحة..مازال حيت القضية كبيرة وفيها قتل بالرصاص..دونك غنحتاجو الجثة باش نديرو التشريح..
حميد بصدمة:كفاش؟؟شنو كتقول ياك واعدتونا يخرج دبا...
الممرض بقلة اهتمام:هادو قوانين خدمتنا..
حميد تعصب وبدا يغوت:واش كتفلاو علينا هنا..بنادم كيقولي غيخرج بكري ودبا كل واحد كيدير شغالو...ياك خرجتو القرطاسة..صاافي ماكاين لا تشريح لا والو..
الممرض بغى يسمح فيه وهو شنق عليه والجوقة تما...تا رجع امين كيجري..
أمين هو وسلام كيفكوهم:طلق اخويا طلق ونعل الشيطان..
حميد بعصبية:خليني نربيه..قالك ماغيخرش دبا..كلعبو حنا...
أمين نثرو:ماشي هكا كتحل الامور ا خويا...صاافي تهدن..(شاف فالممرض)نتا سير فحالك..(دار عند خوه)انا غنمشي وغنتكلف كون هاني...بااا سلام بقى معاه الله يخليك..
سلام:واخة اولدي كون هاني...
مشى أمين كيقلب علا مدير المشفى تا لقاه..دخل لبيرو بعدما دق وتما تلاقا ب حسن..(صاحبو دكتور)..
أمين:سلام..
حسن بابتسامة:أمين!!
أمين:حسن...لاباس خويا!!
تسالمو:لاباس حمدلله..
مدير المشفى:سلام تفضل..
حسن:خويا يااك لاباس؟؟
أمين:الواليد توفى!
حسن تشوكا:الله أكبر...عمي محمد مااات مسكين ان لله وانا اليه راجعون..البراكة فراسكم..
أمين:ما مشى معاك باس..لمهم من لبارح وهو هنا فالفريكو وخرجولو القرطاسة لي فقلبو ودبا مابغاوش يخليونا نديوه ندفنوه..
حسن بصدمة:عمي مات مقتول؟؟شكون هاد المجرم لي دارها؟؟
أمين حنى راسو:مازال ماعرفنا...
المدير:وباش نقدر نعاونكم؟
أمين:تسرعو من الاجراءات الله يخليك..بغينا ندفنوه فالظهر ماكاين لاش يبقى معذب خثو يرتاح فقبرو..
المدير:ولكن هكا اجراءات المشفى..
حسن وقف:صافي انا غنتكلف..خير عمي معايا عمرني نساه ودبا غنحاول نخرجو قبل الظهر غي تهنى..
أمين:هذا المظنون فيك اخويا..
المدير:اوك..الا ساليتي كلشي غادي نخرجوه..
حسن:انشاءلله...ياله معايا ء أمين ..
خرجو بجوج ومشاو باتجاه لاموغج وتماك حبس أمين خلا حين ولي معاه يديرو خدمتهم..
حميد جا عندو:شنو درتي؟؟
أمين ربت علا كتفو:كلشي غيتقاد وغادي نخرجوه فالوقت..نتا دبا تكلف بخروجو من الدار واخة!!
حميد هز راسو وجر سلام باش يمشيو يوجدو كلش..
خالد وطاهر جالسين فالبيرو تا دخل عندهم صلاح..
صلاح:صباح لخير..
خالد:صباح نور خويا..
طاهر غي ساكت وكيخمم..
صلاح:امدرا كريم وصل؟؟
طاهر هز راسو..
صلاح جلس حدا باه:شوف الواليد كلشي غيتقاد..زايدون كريم دار لي خصو يدااار..حافظ علا ارضنا ودافع علا بلادنا..دونك واخة يتشكاو عليه موقفو ماغيكونش صعيب بالعكس كلشي فصالحنا...
طاهر بهدوء:هادا هو المشكل..
خالد:كفاش زعما؟؟
صلاح:زعما ماتشكاوش علينا...يعني عوالين ياخدو حقهم بيديهم...
طاهر مهدن وساكت..
خالد:ماكيهمش..اصلا ماغيقدو يديرو والو...
صلاح:واخة هكاك نديرو احتياطاتنا...
طاهر:اه ضروري...
حميد عيط لماماه ووصاهم يوجدو كلش حيت غيخرجو باهم قبل الظهر...
فاقت رؤيا مقلوبة عليها الدنيا كتمنى تكون كتحلم..غسلات وجهها وشافت فالمرايا عينيها عمرو دموع..لبسات حوايج بويض وهبطات لقات الدار طتقاد والكراسا بزااف كيتستفو شداتها السخفة وبدات تبكي عاوتاني...شوية وهي توصل نجية ومريم دخلو غي تعانقو بداو يبكيو ومريم شادة فرؤيا لي من صغرهم بحال الخوت..
رؤيا:اهئ اهئ مشى بابا ا مريم اهئ اهئ..
مريم تاهي يتيمة الاب:اهئ اهئ الله يرحمو اخيتي حاسة بيك اهئ اهئ...
بقاو علا البكاوات ونجية كتهدن فختها وتواسيها وتعزيها فراجلها..
قربت 10 وهي آلاء تفيق لقات صلاح ماشي حداها تفكرت بلي عندهم مشكل ناضت دوشت ولبسات سروال خفيف مع شوميز طويلة..وهبطت عندهم..

حسن خرج ودار علامة بيديه لأمين:ممكن تديوه دبا..
أمين بسم بحزن:واخة شكرا بزااف..
حسن:هدا واجب(عنقو)غنحاول نكون عندكم فاش تخرجوه..
أمين:واخة..
حميد صاافي لاشااا..جابوليهم لامبيلونص وهما ركبو الطوموبيل وداوه للدار..
رؤيا كانت جالسة تا سمعت صوت الطوموبيل ناضت كتجري..
هما كيخرجوه مكفنينو وهي عقلها بغى يخرج ومريم وسعدية شادينها كيبكيو معاها..
رؤيا كتغوت:باابااا بااااباا اهئ اهئ...
رحمة كتبكي:رجوع لله ابنتي اهئ اهئ..
دخلوه لبيتو وكل مرة واحد يسلم عليه ولكن رؤيا طاحت فكرة مابغات تنوض تابكات العالم 😭😭😭..
خرجوها بزز وبقاو يساينو تا يقرب الظهر ويخرجوه..
تجمعو عائلة الحسناوي فالفطور ولكن تا واحد ماقادر ياكل..
طاهر:سمحيلنا ابنتي...لقيتي المشاكل علا وجهك..
آلاء بابتسامة:ماتقولش هكا اعمي..كلشي غادي يتقاد انشاءلله..وكريم غلقاوه وسطنا..
لطيفة:آمييين ابنتي...
كريم ناعس فبيت عطاتولو يامنة ..خاشي راسو فالمخدة باش ينسى همو لي تسلط عليه..
جا الوقت وناضو يخرجو الميت..وكلشي كيردد"لا اله الا الله محمد رسول الله"..مرة وجوج وثلاثة والعيالات مصبرين راسهم مع دموع مابغاتش تحبس..
حسن جا وهزو معاهم تا حطوه فالطوموبيل دالموت..
هنا رؤيا غوتات وطاحت..عياو يفيقوها والو...حسن مشى كيجري عندها...وأمين بالو معاها..
حميد:ياله طلع خصنا نمشيو..
أمين غوت:حسن تكلف بختي حنا غنسبقوك لحق علينا..
حسن هز راسو وهزوها دخلوها لداخل..طلعوها لبيت وهو بدا يشوف النبض ديالها وفالتالي طمنهم وطلبهم يخليوها مرتاحة حسن ماتفيق...هبط كيجري ولحق عليهم للدفن..
صلاح عيط للخدام ديالو:واش دفنوه؟؟
الخدام:آه ا سيدي..
صلاح:شوف غتجيب شي 10 د الفيدورا ووصلهم لعندي نهضر معاهم..
الخدام:واخة اسيدي شوية ويكونو فالمكتب عندك ..
صلاح هز راسو بالايجاب ودخل..
الدراري دفنو باهم وترحمو عليه عاد رجعو للدار لقاو الدنيا عامرة..علا برا الرجال والعيالات لداخل...طابو غي بالسلام..
اما رحمة عي وختها مقابلين الناس لداخل مرة يبكيو مرة ربي يرزقهم الصبر..
أمين دخل معاه حسن عاوتاني بعدما جاب العدة ديالو وبدا يفحص رؤيا لي مافارقاتهاش مريم..
دق ليها ابرة مهدئ حيت من الافضل ماتوليش تعصب..
آلاء دخلت عند صلاح لبيرو:حبيبي نسيتيني..
صلاح:لا اجي.(جلسها فجرو)توحشتك..
آلاء:انا كثر منك..
قرب يبوسها ولباب تدق ناضت بزربة..كان الخدام وجايب معاه فيدورا بزااف..
خرجت آلاء وخلاتو يتفاهم معاهم..
حسناء شافت المنظر:شكون هادوك؟؟
آلاء:ماعرفتش تايسالي ونسولوه..
حسناء:اممم يمكن للحماية وصافي..
آلاء:داكشي لي غيكون..
حسناء جراتها كتحاول تبدل الموضوع:حقى قوليلي كيدازت ليلتك ههه..
آلاء حشمت:ويلي هنينا ههه..مي بيني وبينك داكشي كان واعر..
حسناء بضحكة:بصحتك ههه..
دازت ليلة صعيبة وقاصحة بزااف علا كلشي وكل واحد حاير فهمو..
كريم فاق تاليل..لقى يامنة ناعسة لبس عليه بيجامة اديداس كحلا وصبادري بيضة وكاسكيط وخرج ياكل برا ويكتاشف المدينة..
يوماين علا نفس الحال والموت مازالة مأثرة فالجميع..
رؤيا مرة تنعس مرة تنوض وتبكي..تا بدا سيدي ربي ينزل عليهم شوية الصبر وبداو يتعوذو شوية علا الفكرة..
صلاح وآلاء ناعسين معانقين فبيتهم..
آلاء:حبيبي..غدا خصني نهبط للمدينة..
صلاح باستغراب:علاش؟؟
آلاء:غدا خصني ناخد فلوس داري ونسني علا البيع..
صلاح:ولكن انا غدا مامساليش..عندي خدمة بزااف..
آلاء:ماشي مشكل..غدا نهبط دغيا ورجع..
صلاح:لامستحيل نخليك تمشي بوحدك..
آلاء:لا ماتخافش..زايدون صافط معايا شي حد..
صلاح:اوك صافي انا انصافطك فطوموبيلتي مع الشيفور ديالنا وموراك بوديكارد..
آلاء:اووو هههه هادشي كامل..
صلاح:روحك مارخيصاش عندي..خصك حماية وهدا شرطي باش تمشي..
آلاء:مانخسرش ليك احبيبي لمهم تكون مرتاح..

أمين فاق يشرب لقى حميد جالس فالظلام..
أمين قرب حداه:خويا...مازال مانعستي؟
حميد:لااا..
أمين جلس:مالك اخويا علاش هازها مين ثقالت...كون قلتي لبوليس كلشي وتهنينا..
حميد خنزر:أمين نوض تنعس..
أمين:مالك اصاحبي راه كنقولك المعقول..حنا مامستاعدينش نخسروك تا نتا..
حميد تعصب..سمح فيه وناض دخل لبيتو اما أمين بقى حادر راسو وكيحك فشعرو حيت هاد الدوامة لي دخلو ليها حريرتها طويلة..
أصبحنا وأصبح الملك لله..
كريم فاق مدوخ حيت نعس معطل..
يامنة شافتو بقات شحال تشوفيه..
كريم فهم بلي كتنسى:مي يامنة..
يامنة بفرحة:ولدي كريم...توحشتك انا...فوقاش جيتي؟؟
كريم:😒 ياله جيت...
يامنة:اوا جلس جلس فطر معايا نيت كنت غناكل بوحدي..
كريم بسم وجلس عرف الفريخ طاارر..
مريم كتنوض رؤيا حيت كتنعس معاها فبيتها..
مريم:حبيبة...رؤياااا نوضي..(رؤيا عينيها مغورين حيت الماكلة قليلة والفقصة مازالة خادمة عليها)نوضي احبيبة نفطرو..
رؤيا:مافياش ا مريم..هبطي نتي فطري..
مريم:رجلي علا رجلك والله وماهبطتي معايا مانهبط..
رؤيا ناضت بزز من بلاصتها تنوض وترتاح..دخلت توضات وخرجات صلات فوجود مريم..
نجية كتوجد الفطور هي وحادة ورحمة مسكينة جالسة فوق الطبلة كتخمم..
أمين دق فلباب..
مريم:دخل..
أمين:صباح نور عليكم..
مريم:صباح لخير خويا..
رؤيا سالات الصلاة:صباح لخير خويا..
أمين مشى حداها:دبا شوية؟؟
رؤيا:حمدلله..
أمين:ياله نهبطو نفطرو..
مريم:اصلا كنا هابطين انا وياها(كضحك معاها)..
عنقها أمين ومريم هبطات موراهم...غي شافتهم نجية ورحمة بسمو..
رحمة:بنتي الزوينة كيصبحتي؟؟
رؤيا باست ليها يديها حمدلله اماما..(باست خالتها)..
نجية:لا تباركلله لاباس دبا..
رؤيا بسمت وجلست حداهم..واخة ماقداتش تفطر لمهم بدات تحاول تسترجع قوتها وتنسى الهم خيت الدنيا ماكتوقف عند تا واحد والموت علينا حق...
آلاء وصلاح خرجو علا برا..
صلاح كيوصي الشيفور ولي كارد:شوفو ماتفرقوش عليها فينما مشات..
الشيفور:كون هاني ا سي صلاح..
آلاء بسمت:ماتخافش بزااف كلشي غيكون بيخير..
عنقاتو وهو زير عليها وباسها فخدها:غنتسناك ماتعطليش..
آلاء:اوك بيبي..
ركبت فطوموبيلتو لور وشيراتلو بيديها وتاهو بادلها السلام وبقى حاضي تاخرجات الطوموبيل الثانية موراهم..
ضرب الدورة ودخل لكاراج..
صلاح:خويا توصلني معاك للاسطبل؟؟
خالد:علاش فين طوموبيلتك؟؟
صلاح:صافطت فيها آلاء لمدينة..
خالد:اوك ياله..
ركبو بجوج ومشاو..
مريم:الزين ياله نخرجو للجردة..لجو زوين..
رؤيا:مافيا لي يخرج..
مريم:خلاااص نوضي..القنطة هنا وماكاين مايدار..
رؤيا شافت تا عيات وناضت معاها..
خرجو علا برا كيتمنظرو فالجو الربيعي الرائع..كلما كتجبد مريم شي موضوع كتشدو رؤبا حيت مافيها لي يهضر ودماغها عامر..
رحمة كتشوفيهم من بعيد..
نجية:غتولف اختي..غتولف...ضروري صعيبة فلول ولكن الحياة كتستمر...
رحمة:اه عارفة..ولكن لي شاغل بالي هو حميد...مبدل بزااف ودماغو مقلوب...
نجية:اوا راه بااه لي مات ضروري يتبدل..
رحمة:لاااا ولدي وعارفاه..شي حاجة فبالو..وماعاجبنيش...
نجية:اوا ربي يصاوب وصاافي..
الشيفور غادي حاضي الطريق ولوخرين موراه..شوية بدا يبرك علا الفران مابغاش يحبس...تزنك ومافهمش شنو واقع بقى يبرك ويعاود والسرعة مجهدة مابغاتش تحبس..
آلاء حساتو مبدل:عمي مالك؟؟
الشيفور:ءءءء...
آلاء:شنووو قولييييي ياك لاباس...
شي طوموبيل دخلات بين جوج طوموبيلات وتلفاتهم علا بعضياتهم كيحاولو يزربو تخلطو بزااف دخلو بيناتهم..
الشيفور تالف مع السوقان كيحاول يلقى شي حل والمشكل الطريق كلها حفاري وفيراجااات..
آلاء حسات بالخطر:شنووووو هضر اعمي شكاين؟؟
الشيفور بصدمة:ماكاينش لفرااان...
آلاء غوتات:أويلييييي😱😱..

حسناء خرجت للجردة مالاقية مادير..ومكاينش معامن تجلس رجعات لكوزينة وبدات تهاود مع ماماها ..
حسناء:دبا حنا غنبقاو عايشين هنا ديما؟؟
لطيفة:وفين بغيتي نمشيو!!
حسناء:قنطت هنا ماكاين مايدار..
لطيفة:اوا نتي ساليتي قرايتك مابغيتيش تزيدي..
حسناء منفخة:حيت نتوما ماخليتونيش نمثل كيفما كنت باغية..
لطيفة:داكشي لي بقى..غي التمثيل..
حسناء:وشنو فيها؟
لطيفة:عرفتي شنو خرجي عليا...
حسناء هزات تيلي ديالها وخرجت..
صلاح عندو مشاغل بزااف فالاسطبل..كيتكلف بيه ويشوف شنو ناقصو..نتابه للساعة بدا يصوني علا مرتو يطمن عليها ..
صلاح هاز تيلي كيسمع:الرقم المطلوب غير موجود بالخدمة...المرجو اعادة الاتصال لاحقا..
عقد حجبانو ورجع صونا علا تيلي دالشيفور..والو ماكيصونيش كاااع..تعصب وبدا يحس بشي حاجة فشكل..
عاود دور نمرة لمرتو والو..كيحاول يقنع راسو بلي راهم فبلاصة مافيهاش تغطية..ولكن نورمالمو يكونو وصلو للمدينة..
هاد المرة تاصل بالكارد..
لول:ناري سي صلااح كيصوني..
الثاني:اوا جاوبو ماعندنا مانديرو..
لول حل لخط:ألو سي صلاح!!..
صلاح بتوتر:ألو...فينكم من الصبح وانا نصوني عليكم كاملين..علاش ماكتجاوبوش..
لكارد:س سي صلاح الصراحة تلفو علينا..
صلاح بعصبية:كفاش تلفو عليكم؟شنو كتخور؟؟
لكارد:ر راه الطريق عمرت بزااف..وغابو علا عينينا..
صلاح كيغوت:واش انا مخدمكم باش يتلفو ليكم..(تعصب وخرجو عروقو)دبااااا تشوفلي فين كاينين ولا والله تا نحر مكم ..
لكارد:اوك اوك..ا سيدي كون هاني..
قطع صلاح دماغو تالف كيصوني ويعاود والخط ماكيشدش ليه..تعصب وسمح فكلشي ومشى خدا السوارت من عند خوه..
خالد:صلاااح مالك صلاح؟؟
صلاح خرج معصب كيجري:آلاء مابايناش كااع..
خالد تصدم ودخلات معاهم بداو يتجمعو باش يقلبو عليها..
وبلا شقا عليه خرج غادي باتجاه المدينة كماعلله يلقاهم..بقى غادي شحال وفنفس لوقت اطمن لا تكون رجعات مالقاهاش وزاد كمل...وخالد ورجالهم تابعينو ويقلبو ويصونيو..
الخبار وصل لكااع الدار وكلشي استنفر وشداتهم الخلعة ان عائلة الطراشن يكونو انتاقمو فيها...
دازت الطريق طويلة عليه وفاش قرب من المدينة لقى الجوقة فواحد المرتفع والبوليس دايرين وشادين الطريق...للحظة حس براسو تزير خرج دغيا وسول واحد تماك..
صلاح بحزم:آش واقع هنا؟؟
السيد:كيقولو شي طوموبيل دارت كسيدة وطاحت لتحت تحرقات...
صلاح تصدم وبدا الشيطان يجيبها ليه عوجة..دفع السيد ودخل عند البوليس لي كيحاولو يوقفوه ولكن هو بحال شي وحش تا واحد ماقادر يوقفو..
جدارمي:اهيااا نتا..شنو كدير؟؟
صلاح بعينين حومر:بغيت نعرف اينا طوموبيل حيت مرتي تاهي كانت جاية من هنا وتقطع الخبار عليها..
الجدارمي حس بيه:خليوه يزيد..(عيطلو)اجي معايا..
صلاح طلل علا المنظر ماقدرش يعرف واش هي ولا لا..
الجدارمي:صعيب تفرز يااك؟؟
صلاح:اممم..كلشي كحل..
الجدارمي:لحسن الحظ الكاميرا دالرادار سجلات كلشي..غتساين معايا واحد 10 دقايق منها يكونو عرفو شكون فالطوموبيل ومنها يوصلنا التسجيل..
صلاح مسح علا راسو والوقت جاه طويل:ممكن تسربيو...ياربي مايكونوش هما..
بداو الشرطة العلمية يديرو خدمتهم وصلاح واقف علا اعصابو كيساين..تا عيط لواحد فيهم داك الجدارمي..
الجدارمي:آش بان ليكم؟؟
شرطي:راجل سايق ومعاه بنت..
صلاح تصدم وهضر بلا شعور:ط طوموبيل فورد؟؟
شرطي:للأسف آه...
صلاح الدنيا دارت بيه تصدم وبقى مخرج عينيه وهبط كيجري فين كاين لبوليس وهما كيمنعوه يقيس اي خاجة وشادينو بقى كيشوف الطوموبيل عن قرب عرفها هي تا الماطريكيل واخة تحرق شوية فيه علامات الطوموبيل اللولا لي خلاتو يتعرف عليها..طاااح فيه النص وغوت بأعلى صوتووو..
صلاح:آلاااااااااااااااء...

فالليل فدار الحسناوي كلشي كيبكي والدنيا مقلوبة..
صلاح جالس فالركنة ديال بيتو ساكت ومصدوم فيديه غي السنسلة ديال مرتو لي لقاوها حدا موقع الحريق وكيتخيل غي صوت آلاء وهي كتقولو"عمرني غنحيدها من عنقي".."حبيبي توحشتك".."كتخاف عليل؟؟"..."نقضي شغالي فالمظينة ونرجع"..مهم رنة صوتها لي فبالو مابغاتش تحيد وفالمقابل منظر الطوموبيل وهي فالحافة كيرجعو للواقع..ويخليه يتفكر حالتها وهي مشوهة جابدينها من الطوموبيل مسكينة فأسوء حالة ماترضاهاش لعدوك..
دخلات ميمتو عندو كتبكي ومشات جلست حداه..
لطيفة كتمسح خناينها بكلينيكس:ولدي 😭😭..
صلاح عينيه حومر وساكت ..
لطيفة:جاوبني اولدي...اهئ عارفة الدقة جاتك صعيبة بزااف ولكن اهئ الله يرحمها اهئ اهئ ربي بغاها اولدي...مشااات عروسة مسكينة دعي ليها بالمغفرة وتلاقاو فالجنة انشاءلله 😫😖..
صلاح ساكت كيدور السنسلة علا يديه ومخنزر قبالتو بحالا غادي يحفر داك الارض لي قدامو بعينيه..
لطيفة فقدات فيه الأمل ربتت علا ظهرو وناضت كتبكي...
حسناء تلاقاتها فلباب:ماكيهضرش اهئ اهئ...
لطيفة بحزن:مصدوم مسكين اهئ بقات فيا مسكينة وبقى فيا هو كثر ..اصعب حاجة تفارق الحبيب..
حسناء والدموع هابطين من عينيها:الله يرحمها ةيصبرو اهئ اهئ..
خالد هو وطاهر كيستقبلو الناس لي كيجيو ويعزيو فلبنت مع ماعندها لا خوت ولا واليدين..يتيمة من اول ماعرفها صلاح..
طاهر مفقوص:شفتو فين وصلنا...القضية مابقاتش عداوة ولات ثأر..
خالد:مايسحابليش غيقدرو يوصلو لينا هكا...ولكن تقدر تكون صدفة من عند الله..
طاهر تغلغل:اينا صدفة؟واش حماقيتي..لبوليس قالو ماكانش لفراان..
خالد:ولكن مازال ماعرفناواش غي هكاك ولا لاعبين فيه..اصلا كفاش كيوصلو لطوموبيل صلاح لي ديما فحماية الدار والخدامين ويلعبو فيها؟؟
طاهر تنفس الصعداء:فاش كيبغي شي حد شي حاجة كيوصل ليها...هادشي خلاني نشك فأقرب الناس ليا..حيت لي دارها غادي يكون منا وعايش فهاد الدار..
خالد بتفكير:لااا مانضنش..كلشي كيبغينا وكايقدوش يغدرونا..
طاهر بحكمة:خثك تعرف بلي الثقة ولات حرااام فهاد الزمان...والانسان لي ماتشكش فيه هو لي يقدر يطعنك فظهرك...
خالد سكت وبقى يدورها فدماغو...
أمين دخل للدار معصب..زدح لباب تا كانت غطير وكلشي وقف واقف..
أمين بعصبية:فين حميد؟؟
رحمة:أمين مالك اولدي ياك لاباس؟؟
رؤبا ونجية ومريم غي واقفين وقلبهم كيضرب عارفين بلي أمين ماكيتعصبش بسهولة...
حميد هبط من بيتو كيتمختر:هاهو ..آش بغيتي؟؟
أمين كشاكشو خارجين:صااافي تهنيتي؟؟درتي لي فبالك..حققتي مرادك..
حميد:؟؟؟
أمين:اش دخلها هي مسكينة فداكشي..حرااام عليك..حذرتك تا عييت..قلتلك نسا فكرة الانتقام من بالك..خلي القانون يدير خدمتو ونتا عماك غضبك خلاك تشوف راسك لي علا حق..(تعصب وكيزير فالقبضة ديالو ويشالي بيديه)علاش زعمة علاااششش؟؟
كلشي واقفين مافاهمين تا وزة..
حميد:آش كتخربق تما نتا...شنو كتقصد جيني نيشان..
أمين باستهزاء:اممم رسم عليا دور البريئ..
رحمة تدخلات:اش واقع اولدي ياك لاباس؟.هضر راك خلعينااا...
أمين كيغوت:سي حميد..نتاقم لواليد وقتل مرات ولد الحسناوي...
كلش تصدمو ودارو يديهم علا فمهم..
وحميد حل عينو:كفااااااش؟؟؟

العمدة ياله وصل للمدينة كانت عندو خدمة فمدينة خرا هاد السيمانة...وأول ماحط رجليه فالفيلاج عرف المشاكيل كاملة لي واقعة...تصدم حيت من ديما هاد العائلات شي مكيهضر مع شي واخة كاينة عداوة قديمة ولكن دبا...تكفسات القضية بالمزيان...هز راسو ومشى عند عائلة الطراشن باش يعزيهم فباهم..
أمين:اممم تصدمتي؟؟مسكين مافخباركش..
حميد ضحك:هههههههههههههه...
كلشي مستغربين فيه وهو كيضحك..
حميد فرحان:حلف بالله حتى ماتت مرات ولدهم؟؟
أمين غي كيشوف:🤨..
حميد:هههه ءء الله..ربييي كبيررررر...حمدتك ياربي وشكرتك..شتي...شتي ظلمونا وهاهو ربي خرج فيهم ظلمهم..
أمين تغلغل:واش كتفلا عليا؟؟
حميد مشى جلس ودار رجل علا رجل:واش من نيتك؟سحابلك انا لي قتلتها...وزايدون ها انا تافكرت...اش داني نقتل مرات ولدو ..نقتل ولدو حسن ..مانضيعش حياتي علا الخاوي...
أمين:وا راها كانت فطوموبيل د راجلها..
حميد مبتسم:ربي كبييير...
رؤيا بخوف:د دبا اخويا واش ماشي نتا لي درتيها؟؟انا عارفاك ماتقدر تظلم تا واحد؟؟
حميد:لا نقدر نظلم..ولكن ماشي انا لي درتها...اصلا ماشي مسطي نضرب الضربة فهاد الوقت..مازااال كنخطط ليهم بلش نطيح الراس لكبيرة ونرجع حق بااا..وزعما بعدو ولدهم باش مالقاهش...انا غنسطحهم كاملين باش يكونو تبرة لغيرهم لي كيفكرو يطيحو عائلة الطراشن..
رحمة بصدمة:لااا لاااا مستحيل تكون نتا ولدي..ولش حماقيتي..علا ماكاين مخزن فالبلاد تاخد حقك بيدك..
حميد وقف مخنزر:اه ماكاين مخزن فالبلاد..وفهاد الفيلاج المخزن هو أنا...
ناض وخلاهم واقغين حالين فمهم..وغي جا يخرج لقى العمدة واقف فلباب كان غيدق..
العمدة:ولدي حميد..البركة فراسكم..
حميد:مامشى معاك باس...سمحلي لقيتيني خارج..دخل راه كلشي لداخل..
العمدة حسو مبدل ولكن ماعاتبش عليه..دخل وشاف كلشي جالسين بحالا ضاربهم الضو..
العمدة:السلاام عليكم..
أمين تواكض:وعليكم السلام سي عبد الجبار..
العمدة:الباراكة فراسكم..سمحولي جات معطلة ولكن ياله رجعت وعاد عرفت..
أمين:عارفين لي كاين..تفضل مرحبا بيك..
العمدة:لالة..بنتي الله يصبركم..
رحمة:باركة الله فيك..ياله حنا ندخلو لداخل..تفضل مرحبا بيك..
دخلو النسا والعمدة عجبو الحال بقى غي هو وأمين..
أمين:تشرب شي حاجة؟؟
العمدة:لااا..(دخل فالموضوع بعد صمت قصير)اش هادشي سمعت اولدي؟؟تصدمت الصراحة..مافهمتش كيدرتو وصلتو لهاد الحالة..
أمين:هانتا كتشوف ا سي عبد الجبار..انا براسي مازال مامثيقش..
العمدة:وعلاش ماعلمتوش البوليس وختاريتو تاخدو ح
حقكم بيديكم..
أمين بحزم:لااا ماخدينا لا حق وا لا والو..
العمدة:ولبنت لي ماتت مسكينة !!
أمين:شوف انا مانكذبش عليك..شكيت فخويا ولكن أكدلي بلي مادار تالدبا والو..
العمدة:وثقتي بيه؟.
أمين بجدية:آه...حيت لوكان دارها ماغاديش يخجل يقولي خويااا وكنعرفو مزيان..
العمدة:لااا هادشي مابقاش عاجبني..انا متأكد عائلة الحسناوي غيشكو فيكم..وماغاديش يدوزو هادشي بسهولة..اذن نتابهو راه ماخفي كان أعظم..
أمين بعصبية:شنو مازال غيديرو؟،يااك قتلو بانااا كاين شي حاجة كثر من هكا...ولنفرض كااع ماتت مرات ولدهم..فين تجي هي حدا بانااا؟؟
العمدة:عارف عارف ولكن هكا فتحتو علا وجهكم جهنم سوا نتوما ولا هما..
أمين:الا قلبو علينا غيلقاونا...
العمدة:لا اولدي نتا عارف الفيلاج مقسم علا جوج..دونك الا ناضت الحرب بيناتكم راه الحرب غتعم الجميع وهكا غديرو الفتنة..
أمين:عارف وماكنتش نتمنى نوصلو لهادشي ولكن الا حكمت الظروف ماعندنل مانديرو..
العمدة تأسف:اممم خصني نحاول نلقى شي حل..حيت تا الجدارميا مقلقين بزااف وعافين بلي استغنيتو علا خدماتهم وكتحاولو تاخدو حقكم بيديكم....لمهم انا غنوض نمشي..(شدلو فكتفو)كنتمنى تعتابرني لحال باااك..الا حتاجيتي شي حاجة ها انا معاك..واخة تكون تا شي مشورة مرحبا...
أمين:شكرا بزااف ...
العمدة:ياله خليتك علا خير..
أمين:بسلامة..
النسا جالسين فالكوزينة كيفكرو...
مريم:ز عما حميد يديرها؟؟
رحمة:معضرني كانحسو مبدل فهاد ليااامات..ياربي السلامة .اش هادشي تسلط علينا...
رؤيا:شوتتت اماما نشاءلله ماغيكون والو..لحظة غضب وغادوز..
نجية:اه خصنا نحبسو هادشي..من الافضل ماتزيدوش تطورو المشاكل بيناتكم..
رؤيا باستهزاء:علا دبا هما ماغيشكوش فينا؟؟راه غيكونو كيوجدو لينا شي موصيبة خرا..
مريم:اويلي...دبا حياتنا فخطر؟؟

رؤيا:ماتخافيش امريم..نشاءلله ماغيكون والو من هادشي..
رحمة:كنظن السيد مشى نوضو نخرجو نعرفو شنو قال لأمين..
نجية:ياله اختي..
صلاح بقى فبيتو جالس بنفس الشوفة الحاقدة حيت تحرم من حبيبتو لي كانت معمرة عليه حياتو...وقف قبالت السرجم كيكمي فالسيجار وعينيه خارج منهم شر كيخلع..حس بلي تغدر ومن شكون!من عائلة الطراشن لي عمرو دارهم فبالو وديما كيحس بلي هما حسن منهم...جهل وواحد اللحظة عيى صابر وهو يبدا يهرس ويغوت بأعلى صوتو كيحاول يتقبل فكرة انه عمرو غيولي يشوف آلاء وبلي حياتها معاه ماطولاتش...
العائلة لتحت سمعو التهراس طلعو عندو بزربة..
طاهر كيدق فلباب حيت كانت مشدودة بالساروت..
طاهر:صلااااح صلاااح ولدي حل...
لطيفة كتبكي:الله علا ولدي الله اهئ اهئ مسكين تحرق فقلبو اهئ الله يبرد عليه..
حسناء بخوف مخلط مع البكى:ديرو شي حل واش باغيينو تا يدير شي موصيبة فراسو...خالد خويا فتح لباااااب..
خالد غوت:حيدو..(وقف حدا الباب وبدا يدفعو باش يهرسو)..
شوية سمعو الهدوء فلبيت تخلعو كاملين شي بقى يشوف فشي..وهو خالد جهل قالو غيكون قتل راسو ولا شي حاجة..بعدهم وبدا يخبط ثاني فلباب تا تحلات..وهما يتفاجئو بالمنظر قدامهم..
صلاح جالس علا الارض يديه كلهم دمايات كيشوف فالفراغ وساكت وداير بيه الزاج وكااع الروينة لي دار..
لطيفة غوتات:ولديييييي...
دخلات كتجري عنقاتو وهو عينيه الخوضر ولاو حومر بجسمو الضخم كينهج وهادئ هدوء غريب...
جات تا حسناء بعد مراقبة من بعيد وطارت عليه عنقاتو كتبكي فوق كتفو وماماها فلكتف لاخور...اما طاهر واقف مصدوم هو وخالد مافيديهم مايديرو..
وفلحظة تحرك صلاح وحيدهم عليه وناض باتجاه الحمام...دخل وشد لباب...
خالد:لااا حالتو ماعاجبانيش خايف عليه بزااف...
طاهر:بالعكس الحمدلله لي خرج شوية كنت خايف من سكاتو..دبا كنظن غيفيق شوية..
لطيفة:اهئ تغدر ولدي حبيبي اهئ اهئ..
طاهر:وا قولو الحمدلله..راه طوموبيلتو لي كانت بلا فران..كون ركبها هو كون راحنا نبكيو عليه...قدر حسن من قدر...
لطيفة عاد تكالمات:حمدلله ياربي حمدلله..
خالد:ولكن لينا حساب مع هادو لي كانو السبب..
طاهر:شنو وليتي لحال كريم..باغي ديرنا الصداع ونخافو نخرجو لاناكلوها..
خالد:وشنو المعمول؟راهم بداو الحرب معانا والا تراجعنا غنبانو ضعفا..حنا خصنا نوقفوهم عند حدهم..آلاء ماشي غي مرات خونا آلاء ختنا وخصنا نجيبو ليها حقها..
لطيفة غوتات:لاااا ماقلدة علافراق شي حد فيكم..بغيتكم تبقاو سالمين...نساو كلشي وخليوهم منهم لمولاهم..
صلاح خرج كيمسح يديه:ههه منهم لمولاهم؟؟كتحلمو...
خرج صلاح من بيتو وهبط فالدروج...
لطيفة:عتق عتق خوك...اهئ يمشي يدير شي موصيبة...
خالد هبط كيجري وطاهر موراهم كيعيط لرجالو باش يلحقو علا صلاح..
اما صلااح غايب خارج ولي كيحاول يشدو كيدير بحال الثور كيدفعو ويدوز..
شوية العمدة داخل من الباب الرئيسية دالفيرما..كيلقى الجو مرون حبس الشيفور وخرج كيشوف..وصلاح خارج بطوموبيلتو تا كيوقفلو العمدة عرفو باغي يدير شي زبلة..
صلاح كيشيرلو يحيد والعمدة حابس وزاد كمل خالد وقف قبالتو وطاهر كينهج مع مسكين كبير فالسن..
صلاح بعصبية:حيدوو...
العمدة:خرج من الطوموبيل..حنا ماغاديش نحيدو..
صلاح ناض وخرج عندهم:واش باغيين تجهلو دينمي...حيدو من هنا...
العمدة:غوتتت زيد غوت ولكن لي فبالك عمرك تلحقو..
صلاح جهل:بيميني تاندوز فيكم...
تقلب راجع لطوموبيلتو وهو العمدة ينطق:ماشي هما لي قتلو مرتك..
صلاح دار وطلق قهقهات سمعوها كاااع لي تما:هاهاهاهاهاهاهاهااهاهااا...نكتة زوينة هادي...ضحكتيني واخة مافيا لي يضحك..
العمدة:قدي قدك باش نكث معاك.(طاهر وخالد كيشوفو)..ياله هادي المجية ديالي من عندهم...الطراشن ماشي هما لي داروهااا..
صلاح باستهزاء:ونتا ثيقتيهم!!
العمدة:اه...
صلاح:ههههههه وهادي نكثة حسن من هاديك لي قبل...علا هما غيعتارفولك..
ترننن ترن(بوليسي كيصوني علا خالد)
خالد:هادو البوليس..
طاهر:جاوب اولدي الله يسمعنا خبار لخير..
صلاح بحدة:فتح السبيكر..
بوليسي:ألو سي خالد..
خالد:ألو تفضل..
البوليسي:الصراحة عيطت باش نخبركم خبر ياله عرفناه..
خالد:شنو هو؟؟

البوليسي:تأكدنا عاد دبا بلي....الطوموبيل كانو لاعبين فالمكابح ديالها...شي لي كيأكد بلي الحادث كان مدبر..
كلشي تصدم ومنهم تا العمدة لي بدا يشك فراسو...
صلاح زاد تعصب:وكاتقولوليا بلي ماشي هما...اصلا شكون اعدائنا من غيرهم..
دفع كلشي وبغى يمشي..
البوليسي سمع صلاح وهو يغوت من تيلي:صلااح..اي تصرف غديرو غادي تعقد بيه الامور...خلي السلطة دير خدمتها...
صلاح بغوات:هاديك لي ماتت مرتي وانا لي غنجيب ليها حقها فهمتو..
خالد:قطع عااافاك من بعد ونهضرو..
البوليسي:صلااح...حنا لي غادي نعتاقلوك الا مادرتيش عقلك...زايدون مازال مالقينا تا دليل يبين بلي الطراشن لي داروها...والا كان هكا غنعتاقلوك باش نفضيو هاد النزاع لي ممكن يقلب الفيلاج سفاه علا علاه..
صلاح عينيه حمارو:حق مرتي غنجيبو بيدي فهمتووووو؟؟؟
خالد قطع علا البوليسي لي ناض جمع رجال معاه وداهم لفيرما الطراشن باش يحبسو اي مشكل يقدر يوقع..
صلاح بدون اكثرات مشى يركب فطوموبيلتو وهو يتسمع غوات حسناء:مااااااماااااا..
كلش دور وجهو ومنهم صلاح..
طاهر وخالد مشاو كيجريو ولطيفة طايحة فالارض وحسناء كتبكي...اما صلاح بحالا تلفاتو مو..وهو العمدة يستغل الفرصة..
العمدة:واش حياة الام ديالك وعائلتك ماكتهمك فوالو..تخيل بلي نتا الا درتي شي حاجة غادي تخلي الصرااع يزيد وتموتو كاملين..كنظن تا واحد ماغادي يفرط فثأرو منكم..اذن غترضى تكون سبب فموت كلش؟؟فكر اولدي فكر مزيان وماتخليش لحظة غضب تعميلك عينيك وتندم من بعد...والا كانت مرتك بقات فيك تا هما مات باهم وبسبابكم..دونك ماتعقبش عليهم حيت تالدبا 1/1..والا زدتو كملتو ماغيبقى تاواحد..
صلاح زير علا القبضة ديالو وهو يجرو العمدة وداه لداخل حدا الام ديالو ...
أمين عاود ليهم كلشي:لمهم انا خصني نجيب حماية من لبوليس ونحاولو نحسبو خطواتنا قبل من أي تصرف ..
رحمة:زعما حنا فخطر اولدي؟؟
أمين تنهد:كلشي ممكن..
رؤيا:ولكن هما لي قتلو بابانا..وحميد قال مادار والو...
أمين:حميد مامتأكدش منو الصراحة..ولكن لمهم نحبسو أي خسائر ممكن توقع ..
رحمة:الا كان هكا..غدا توصل خالتك ومريم للمحطة..مابغيتهمش يتآذاو...وتا رؤيا تمشي معاهم..
رؤيا تصدمت:انا عمرني غنسمح فدارنا فهمتو..غنبقى هنا واخة نموت...حياتي معاكم هنا...
نجية:شتو كتقولي اختي..حنا نسمحو فيكم فهاد الظروف؟؟
رحمة:ريحيني اختي وسيرو بحالكم..هنا ولات العيشة معانا خطر..خليكم بعاد مانتحملش تآذاو بسبابي..
أمين:آه اخالتي الواليدة عندها الحق...خليكم بعاد تا نشاءلله تقاد الامور ونتشاوفو..
نجية:ولكن بالنا غيبقى معاكم..
رؤيا:غنتواصل انا ومريم كل نهار ونطمنوكم..
مريم:كون غي خليتونا معاكم حسن..
رحمة:صاافي سمعي الهضرة ابنتي..
نجية:الا كنتو غترتاحو هكاك واخة..
رحمة:اممم ونشاءلله الا بغى الله غنتشاوفو من بعد...
العمدة جر طاهر علا جنب:واش باغيين تحلو هاد الخلاف ولا تعقدوه..
طاهر:اكيد نحلوه..
العمدة:غدا غنتجمع انا والمهمين فهاد الفيلاج ونحاولو لقاو حل انشاءلله...حيت صعيب يبقى الصداع بين عائلاتكم..
طاهر:واخة..وكنواعدك غادي نقنع ولادي مايتصرفو فوالو تا تلقاو هاد الحل..
العمدة:صافي تافقنا..ياله نخليكم دبا..والله يشافي لالة لطيفة..
طاهر:واخة..شكراا بزااف وجودك معانا ليوم قدر يحمي ولدي من غلط كان غيندم بزااف كون دارو..
العمدة:درت غي الواجب...راكم عارفين بلاصتكم..بسلامة..
خرج العمدة ورجع لدارو بعد ليل كان عامر بالصداع والمشاكيل..
صلاح واقف قبالت مو كيشوفيها وهي بدات تحل عينيها..
لطيفة:و ولدي...(مدات يديها وهو قرب)باغي تحرمني منك اهئ اهئ..باغي تحرق قلبي عليك..
صلاح:شووت ماتبكيش..تهدني دبا..
لطيفة:وعدني مادير والو..وعدني ماتقتل حد ما تخاطر بحياتك..

صلاح ساكت وكيشوف بعيد...
لطيفة:اهئ مانقدرش نعيش بلا واحد فيكم اولدي..نتوما هوايا لي كنتنفسو..صاافي برد..ياك خوك قتل ليهم باهم..ودبا هما قتلو مراتك مسكينة..اذن هدنو هادشي..ماعنديش القوة باش نصبر علا فراق شي حد فيكم..
صلاح:بهاد السهولة؟؟دمها يمشي غي هكاك...
لطيفة:هادا قدر الله...والا كنتي نتا خسرتي مرتك..هما خسرو باهم قداام عينيهم ..الله يسمح ليك اولدي كريم اهئ اهئ..
صلاح ناض سمح فيها وطلع لبيتو غيطرطق..ماقادرش يتصور بلي ماياخدش حق مرتو منهم...
أصبحنا وأصبح الملك لله..
أمين هز الباليزات ديال خالتو وبنتها ومشاو للمحطة بعد سلام وتوصيات بزااف..
اما رؤيا وماماها كيحاولو يقادو الدار ويهضرو مع حميد باش يهدن اللعب..
صلاح جالس علا كرسي فالبالكون ديالو..وعينيه زراقو ملتحت بقلة النعاس..كيفكر غي فآلاء لي طارت من بين يديه فلحظة..وكمية هائلة من السيجار محطوطين علا الطبلة لي حداه..
العمدة تجمع مع كااع الناس المهمين فالفيلاج..من السلطة ومن الخدمات وجالسين كيتناقشو باش يبردو القضية..خصوصا ان البوليس كيجيوهم شكايات من ناس بزااف عاديين كيدابزو مع بعضياتهم حيت كل واحد فيهم فطرف عائلة..قررو يحبسو كلشس باش يرجع الفيلاج للهدوء بي كان فيه قبل أيام...وفالتالي خرجو بقرار كيتمناو يطبق..ولكن غيطرحوه فوجود هاد العائلات بجوج فمجلس البلدية الخاص بالفيلاج هاد العشية...
عائلة الطراشن جالسين كيتغداو مجموعين تا دخل عليهم واحد الخدام..
الخدام:سلام..
أمين:سلام..اش تما؟؟
الخدام:هادي دعوة ياله وصلات..
أمين:شكون وصلها؟؟
الخدام:واحد من البلدية..
أمين:واخة شكرا...
خرج الخدام ورحمة هضرت:ديالاش اولدي؟؟
أمين:أنا نفتح ونشوف..
"يتشرف مجلس البلدية لدعوتكم لايجاد حل لجميع المشاكل الحالية وتسوية الخلاف القائم داخل القرية الصغيرة...اللقاء علا الساعة السابعة مساءا داخل المقر...المرجو الحظور..."
رؤيا:غتمشيو؟.
أمين:آه غنمشي(شاف فحميد)وتا نتا غادي؟.
حميد بحدة:لأ..ماكيهمنيش تقاد الامور...
أمين خنزر فيه وحنى راسو..وتا واحد مابغى يناقشو حيت ماكيتقبل تا هضرة..
نفس الشي بالنسبة لعائلة الحسناوي..وطاهر هو لي استلم الدعوة..قراها وعلم كااع ولادو..
خالد:انا بعدا ماقابلش...
صلاح جالس وساكت..
طاهر:واش كتهضر من نيتك..راه الا ماحضرناش غنبانو حنا لي باغيين نطورو الامور...
خالد:وشنو ضمن لينا بلي هما غيحظرو؟؟والا حنا حظرنا وماجاوش؟؟
طاهر:غيولي كلشي فصفنا وغنكسبو ثقة الجميع...(شاف ف صلاح)شنو ا صلاح غتمشي؟؟
صلاح هز عينيه فيه:شنو سبب هاد الدعوة؟؟
طاهر:العمدة واعدني يلقى لينا حل باش نتهناو من هاد الصداع لي نايض.(صلاح كيفكر).من الافضل نمشيو اولادي..حيت فالصراحة حنا لي بدينا بالقتل..
صلاح:وهما لي بداو بالباطل...باهم قلب علا الصداع وجابو لراسو..
طاهر:بلا ماندخلو فتفاصيل.(وقف مخنزر حيت هاد المرض طلع ليه فراسو).انا قررت وصافي..وليوم غادي نمشيو وجدو راسكم..
خرج طاهر وخالد هضر:غتمشي؟؟
صلاح بهدوء:نمشيو..باش نبينو ليهم بلي ماغلبوناش ومنها تا نشوفو شنو غيخرفو تماك..ولكن لي فراسنا فراسناااا...

العمدة هز تيلي وصونا علا الحسناوي...عرف بلي غيحظرو..شوية وصونا علا امين وعرف بلي حميد معكس...قطع معاه ورجع صونا ليه .
حميد خلا تيلي شحال كيصوني عاد جاوب..
حميد:ألو...
العمدة:سلام ولدي..
حميد:السلام سي عبد الجبار..
العمدة:شنو...وصلاتك الدعوة؟؟
حميد:وصلاتني اه وماغانجيش..
العمدة عوج فكو التحتاني:اممم وعلاش؟؟
حميد:حيت مافيا لي يتلاقا بدوك القتالا...
العمدة:اممم ولكن هادشي ماشي فمصلاحتك..
حميد:كفاش زعما..
العمدة:واحد من البوليس صاحبي قالي بلي لقاو آثار بصماتك فالطوموبيل(حميد تقاد فالجلسة مخلوع).وانا طلبتو يخبي تانشوفو فين توصلو فالتسوية ليوم..
حميد بتوتر:ك كفاش بصماتي...هادا باين شي ملعوب...
العمدة:نتبتلك؟؟ولكن الا تعرفت هاد المعلومة حسب راسك مؤبد..حيت جوج دالارواح ماتو اذن قتل مع سبق الاصرار والترصد...
حميد غوت:انا مادرت والو...ماشي حنق نقتل وحدة منهم..انا باغي نتاقم من لي قتلو ليا بااا ..هاداك غي جزاؤهم...
العمدة كيهضر بهدوء وبالشوية:لمهم الا ماجيتيش غتعقد الامور و...
حميد:صاافي نتلاقاو تمااا..
العمدة ضحك وعرف بلي الخطة نجحت:اوك فانتظاركم..
حميد قطع وتزير بقى يحك فشعرو ولحيتو..ناض يوجد راسو باش يمشي..
أمين:الواليدة هانا مشيت..
حميد هبط:ساين غنمشي معاك..
رحمة وأمين عجبهم لحال حيت بغى يحل الامور..
أمين:ياله..
مشاو نيشان للمقر..وتا عائلة الحسناوي كانو فالطريق..
العمدة جالس مع بعض الرجال تا كيدخل أمين وخوه...
سلمو عليهم وجلسو فطرف...مادازش وقت طويل ودخلو العائلة دالحسناوي...هنا حميد تزنك وخوه شدلو يديه باش مايدير تا تصرف يندم عليه..
اما صلاح القرطاس خارج من عينيه ماكرهش يقتلهم كاملين..
جلسو مقابلينهم طتهر فالوسط ودايرين بيه ولادو..
العمدة بدا:جمعناكم ليوم بهدف نحلو هاد الصرااع الكبير..مابقيناش باغيين مشاكيل ..بغينا نرجعو كيف لول..الهدوء والسكينة بيناتنا وكل واحد داخل سوق راسو..
حميد قاطعو:شنو كتقول اسي عبد الجبار(أمين كيشوفيه ولوخرين مخنزرين)هاد الناس حنا لينا عندهم ثأر كبير..ماغاديش نساوه..يكفي انهم قتلو الاب ديالنا قدام عينينا...
صلاح مزير وخالد هضر بعصبية:نتوما زعما لي ماشي قتالا؟؟حاولتو تقتلو خويا وهاهي ماتت مرتو..
حميد وقف:انا ماشي شماتة بحالكم نقتب ولية..انا الى قتلت نبدا بيك نتا ونكمل بخوتك..
صلاح مصبر راسو حيت الا سعر مايحبسو حد وزايد طاهر شاد فيه ومسكتو..
خالد:اهيااا حتارم راسك نتا هو الشماتة..لمهم قتال...
أمين حبس خوه:خويا عندو الحق...هادو قتلو بانااا وفالمقابل حنا مادرنا والو دونك الحق عندنا حنا...
طاهر:اينا حق ونتوما لعبتو فالطوموبيل وقتلتو لبنت..
حميد:سير قلب شكووون غدرات وهو يقتلها بعد عرسها...
صلاح طار من بلاصتو ومشى باتجاهو شنق عليه وترونت القضية..ناض كلشي يفك وحميد واخة كيفك صلاح داير بحال شي ثور كيضرب ويعاود وواخة كيجيو فيه شي ضربات ماكيحسش بيهم بقوة لي واصل للطوب..
امين دافع علا خوه وكيحيدو..وتا خالد وطاهر والعمدة كيبعدو صلاح تا تمكنو اخيرا يفرقوهم..
العمدة بغوات:راه ماجبناكمش هنا باش دابزو...جبناكم نخلو المشكل...
أمين بغوات:علا هادو ناس يتفاهمو..
خالد:اييي هنينا...
العمدة:شوفو ليوم الا ماتحلش المشكل ليوم كااه الالة لي وصلنا ليها غتقدم للبوليس وداك الساع واحد من كل عائلة غتعطالو مؤبد..
سكتو العائلات بجوج وهو يشير ليهم يرجعو يجلسو...وهما بهدوء بداو يرجعو لبلايصهم ..
العمدة جلس:بلا مانطول عليكم..الحل لي لقيناه هو ان العائلات بجوج خصهم يتناسبو...
كلشي تصدم وغوتو:كفاش؟؟؟؟

وصلت مريم وماماها لموبل وهما يتفاجئو بالدروج موسخين..
نجية:ويليييي تقول غبرنا 100عام الله يستر..
مريم:وا راك عارفة اماما غي حنا لي كنعناو بيهم..السفلية ماكتجيش تالليل و الوسطانية مرا كبيرة...اذن الدروج يبقاو علينا..
نجية:اوا هي دبا...ندخلو لدار وخرجي سيقيهم..
مريم:اويلي ا ماما حراام عليك..خلينا غي نرتاحو من السفر..
نجية:ا نوضي باراكة من لفشوش...شمري علا ذرعانك وتكعدي..
مريم كتبحلس:اوا الا انا مابقيتش فيك ماعندي ماندير..
نجية ضرباتها لضهرها:طلعي قدااامي طلعي باش تسيقيهم..
مريم نفخات وطلعت مفقوصة تامارة تابعاها تابعاها..
العمدة بثقة:لمصلحة الجميع هو ان العائلات يتناسبو..الشي لي غادي يخلي العداوة تبرد والاحزاب تفرق ونوليو يد وحدة بلا مشاكيل..
أمين هنا وقف:أنا مستحيل نتناسب مع عائلة الحسناوي واخة نعرف نموت..
خالد:شفتينا حنا غنموتو باش ناسبوكم..واخة تحلموها ماغاديش طبق..
طاهر هو وصلاح غي ساكتين...
العمدة:هادشي من مصلحتكم بجوج...تنساو لي فات وتبداو من جديد حسن ماتطور الامور..
حميد:وداك الراجل لي مات قط..ولا فار باش مانديرولو حساب..ولا حيت ماتولا يبان ليكم عادي تجاوزوه..
العمدة خنزر فحميد:حميد هضر وعرف راسك شنو كتخرج علا فمك..(حميد تزير مع تفمر الابيل)..سي محمد الطراشن الله يرحمو كان راجل ومات راجل وغنبقاو ديما محتارمينو تا فغيابو...ولكن نتا الا يبستي راسك ماغادي ينفعك والو وغتولي فخبر كااان..
طاهر نطق:أنا موافق نتناسبو...
كلش حلو فمهم وتصدمو..
خالد بالحس:آش كتقول ا لواليد..غتعطي بنتك لواحد فيهم؟؟
العمدة:اذن الطرف لول موافق...بقيتو نتوما(حمر فحميد)ونتا آش قلتي احميد؟؟
حميد:الصمت وتفكير طويل..
أمين تصدم فخوه لي سكت:كطلبو المستحيل..لا أنا ولا خويا نديو بنتهم ولا ختي نقبل نعطيها ليهم..
العمدة:أذن هكا غتدخل السلطة فكلشي وداك الساع نعرفو شكون مور كل جريمة..
حميد الخوف لعب عليه وبدا يتخيل راسو وسط الحبس وهو مادار والو..والعمدة مادام قالو الدليل اذن نبهو ليه...بقى يفكر ان النسوبية تقدر توصلو ليهم بطريقة أسهل وداك الساع يلعبها عليهم وينتاقم...
أمين:حنا أصلا مادرنا والو وماخاي...
قاطعو حميد:موافق...
أمين تصدم بقى كيشوفيه مطولا:حميد...عاود اش قلتي؟؟
العمدة بسم:نفهم من هضرتكم بلي الطرف الثاني قابل...مزيااان مزياان هادشي لي بغينا...
أمين وقف:ك كفاش؟؟وأنا رايي ماشي مهم ولا كفاش؟انا ماقابلش لهاد النسوبية كيفما كانت..يعني مستحييييل...
العمدة:حميد هو كبيركم وكنظن كلكم كتحتارمو كلامو...
صلاح غي ساكت وكيخمم والهضرة كلها علا وذنيه..
حميد:ماتخافش ا أمين ماغاديش ندخلوك فهادشي..
أمين جا يهضر وهو العمدة يقول:اممم ودبا خصنا نعرفو شكون لي غيتزوج فيكم...
نطق صلاح ببرود مع شوفة شر:أنا غنتزوج ختهم...
كلشي تصدمو الا أمين لي اعترض كيف العادة..
أمين:هادي بعدا فأحلامك انك تزوج بختي رؤيا...غي ريح بالك ونساااا...
خالد كيشوف ف صلاح:متأكد من شنو كتقول؟؟
صلاح هز راسو:فوق ماتخيل...
طاهر:ولدي ماشي ضروري نتا!!
صلاح:لاااا ...بالعكس...انا لي ضروري...
حميد ساقر كيدرسها من جميع الجوانب وأمين غيحماق بوحدو ماتخيلش ختو يزوجها تصلح امور عائلتين عمرهم تافقو..
أمين:غتبقى ساكت..ماغاديش دافع علا ختك تا بكلمة(عيب كمارتو)يييخ كنت كنظنك راجلك وغتحمي كلش ساعا الواليد مين غاب بغيتي دير ماعليك..
حميد ببرود وكيشوف فالعمدة:صااافي..موااافق!!
أمين تزير وبقى مخنزر فيه حيت شااف بلي خوه اوسخ من داك العائلة..بااع ختو فأول موقف...نااض ودفع الكرسي وخرج حيت شاف بلي تا العمدة مادايهاش فهضرتو وبحالا كيكب الما فالرملة..فكر ياخد ختو ومو معاه ويخلي خوه يعوم فبحرو..حيت عمرو غيوافق علا هاد الزواج...

العمدة:الحمدلله...اخيرا وصلنا لحل يرضيكم كاملين...وغادي نحددو موعد الزواج فأقرب وقت..نقدرو نقولو بعد 3أيام(كلشي سكتو)اوك مزيان...كلشي يكونو واجدين فهاد الموعد وغنديروه عند العدول بلا مانسبقو النزاعات علا فين يكون وعندمن نمشيو...
الصمت عم المكان حيت كلش مصدومين من هاد المواقف والقرارات لي تعرضو ليها اليوم...صافي ناضو بحالهم والاجتماع سالا وخرج القرار اخيرا...
مريم هزات سطل دالما وناضت علا وعدها وسعدها تسيق..
بقات هابطة وكل مرة تطلع تجيب الما تهدات مسكينة..شوية وصلات حدا باب جارتهم الجديدة..دقات عليها حيت عيات تطلع تجيب لما وتهبط..دق دق دق..
يامنة ناضت بالشوية حلات لباب..مريم:سلام خالتي!!
يامنة عاقدة حجبانها:سلام ..
مريم:خالتي انا كنسيق الدروج ممكن تعطيني شي سطل دالما نهبط الدروج؟؟
يامنة عاد فهمت وعرفاتها جارتها:اه ابنتي ولكن..ظهري ضارني دخلي هزي من الحمام قياس الما لي بغيتي..
مريم بابتسامة:واخة اخالتي..
دخلت مريم هزات سطل كتعمر الما...
يامنة للحظة تواكضات:هاااء شنو كندير انا هنا...حالة لباب غي بوحدي..الله يتبقي الستر..
شدات لباب وبغات تدخل شوية وهي تشوف مريم خارجة من الحمام هازة السطل وهي تغوت ربي لي خلقها..
يامنة بالغوات:اويلليييي شفااارة اعباد الله شفااارة(مريم خرجت عينيها)...عتقو الررروح(حلت لباب كتغوت)عتقوني غتقتلنيييييي....
مريم مسكينة داخت لاحت داك السطل وكتحاول تهدنها مشات عندها كتجري والخلعة راكباها..
مريم بخوف:خ خ خالتي ...راه نتي دخلتيمي انا جارتك نسيتيني؟؟؟ا خالتي نعلي الشيطان...
يامنة زادت فالجهد:اويليييي غتقتلني...عتقو الروح...
مريم تلفت مسكينة الباطل غيطيح عليها بدات تحاول تهرب ماخلاتهاش وهي تنثر يديها منهاهاربة فوسط الدار كتندب..شافت بيت جات تحلو...
كريم كان ناعس مع نهارو ولا ليل..تخلع وسحابلو فري كاين الشفارا فالدار ناض واخة لفوق عريتن ولابس غي سروال كحل دالكيطما..مشى باتجاه لباب..حلو قد قد معاها وهي تعكلات فيه مع كانت كتجري وطاحت جات فوق منو...وهي تشدها الصدمة..عارفة هاد المرا بوحدها دبا هاهو هادا كاين هنا...اما كريم طاح لأرض وهي فوق منو بقى مخنزر وكيشوفيها...
وفنفس اللحظة تجمعو الجيران منهم تاهاديك دالسفلي لي علا غفلة جاية من الخدمة...ونجية لي خافت علا بنتها فالدروج من الشفارا لي كتقول الجارة..
نجية بخوف:ياااك لاباس؟فين الشفارا.؟؟
يامنة بتوتر:لداخل عتقووني..ماخليتهاش تمشي..
نجية تمات داخلة هب وهاديك دالسفلي وياريت مادخلو..كيلقاولك كريم طايح للأرض وفوق منو مريم...حلات فمها وخرجات حلقها فلحظة...
نجية:ءويلييييييي علا بنت الحراااااااام...آش هادشي!!!!!😳😳😳

أمين وصل للدار حل لباب بزربة ودخل بعجاجتو...
أمين:رؤياااا...الواليدة....
هبطو كيجريو عندو مخلوعين..
رحمة:أمين...مالك اولدي...
أمين بعصبية:جمعو حوايجكم دغيا...غتمشيو معايا...
رؤيا كتشوف فماماها.وهي تقولو:فين غنمشيو اولدي وعلاش؟؟
أمين:غتمشيو تعيشو معايا وسمحو لهاد الشماتة فالدار...
رؤيا بهدوء:خويا فهمنا والله مافهمنا والو...
أمين:عرفتو شنو الحل لي قرروه هاد النهار؟؟(رؤيا ورحمة راسمين علامة استفهام علا وجههم؟؟؟ وهو شاف فرؤيا)..قررو نتناسبو..(تصدمو😳😳)وفرأيكم شكون؟؟؟(الترقب فعيونهم)صلاح لي ماتت مراتو يتزوج رؤيا...
رؤيا كلات الصدمة بالبيان ورحمة ضربات علا صدرها:أويلي؟؟ونتوما وافقتو؟؟
أمين:ولدك المصون لي وافق..اما انا مين شفتو باع الماتش قررت ناخدكم معايا وتسمحو فالزبل...
رؤيا بصدمة وكتشوف فالأرض وتعاود تهز راسها:ح حميد وافق؟؟
أمين شافيها:ماتفكريش دبا هكا...لمهم انا ماموافقش..وعمرني غنديرك طريق باش نصلحو مشاكل حنا بالضبط مالينا دخل فيها..
رحمة:وزعما داك العائلة وافقو؟؟
أمين باستهزاء:هاااء بحالا متافقين...لي ماتت مراتو هو لي نطق بيها وقال" انا نتزوج ختهم " سكابلو شماتة بحالو باش نوافق..
رؤيا بحكرة:ومالقاوني غي أنا..علاش مافكروش فحل آخور؟؟
أمين:لأ قالك هادا هو الخل الوحيد باش تبرد هاد العداوة للأبد...
دخل حميد فهاد اللحظة:ماحشمتيش كتخاول تصغرني حدا الناس...
أمين:نتا لي صغرتي راسك وصغرتي قيمة ختي...سحابلك غنزوجها ليهم؟؟واخة تحلمها فمنامك..عمر ختي تكون لديك العائلة..
حميد:صاافي ساليتي؟؟اوا اسيدي انا راه باغي نطيحهم فالشباك...نزرعو وسطهم رؤيا لي تجيبلينا الخبارات..وتخليهم يثيقو فيها ونجيبو خوهم المخبي باش نصفيها ليه...ومن بعد نكونو انتاقمنا لبانااا...ونوليو بهمتنا وشانا لي كنا فيهم..
رؤيا ورحمة خرجو عينيهم:بغيتي دير ختك طريق ليهم ءءءءء...بغيتيها طعم لناس ماكيعرفو لارحمة ولا شفقة..واش حمق...هادي هي وصايت باااك...طحتي من نظري اولدي..ماضنيتش تبيعنا دغيا...
أمين:شتي شنو قلتلكم؟؟ياله نمشيو بحالنا ونتهناو من هاد الصداااع..
رحمة بدموع فعينيها:ياله ابنتي..واخة هنا بلادنا وهنا عشنا ولكن دبا تفرض علينا نمشيو...وسلامتكم عندي اهم حاجة...
تمو طالعين وحميد شافها ماشي دالبيع:وتبغيو ليا نتحبس..(رؤيا ورحمة تصدنو ودارو عندو).آه..الا مشيتو غنتحبس..
أمين عاقد حجبانو:وعلاش غتحبس؟؟يااك مادرتي والو!!
حميد حنا راسو:اه انا مادرت والو...والله شاهد عليا..ولكن العمدة هو لي قاليا بلي لقاو شي بصمات ديالي فالطوموبيل وحاولو يسكتو تا يشوفو واش نساليو هاد الصداع ولالا...
أمين مستغرب:هاااء ياك قلتي مادرتي والو كيدارت وصلت البصمة ديالك لتما؟
حميد:هادشي لي والله مافهمتو..عارف يقدر يكونو نصبولي شي فخ باش تا انا نمشي فيها...راهم جوج رواااح لي ماتو..ولكن مافيدي ماندير..خصني لقى شي دليل يخرجني من هاد الموصيبة..والا مشيتو دبا انا لي غنتحبس حياتي كاملة..
رؤيا تصدمت وعينيها دمعو وأمين جلس وحدر راسو مكاليه بيديه بجوج..اما رحنة بدات تبكي وتفكر لهاد الموصيبة..
حميد عينو دمعو:الا فكرتو تمشيو ماغاديش نوقف فطريقكم..الله يعاونكم...غي انا الا كنت داخل داخل للحبس..نمشي نصفيها ليهم كاملين باش نتحبس مرتاح ونريح الواليد فقبرو..(مسح عينيه)بااا كان هو كلشي عندي وهما بغاو يزربو عليا قبل مانردلو حقو..ولكن والله لا كانت ليهم..(ناض غادي وهي رؤيا تشدلو يدو)..
رؤيا بدموع فعينيها:لأ ماغادي دير والو...وماغاديش دخل للحبس...ح حيت ...انا موافقة..

أمين علا عينيه بصدمة:آشنو؟؟
رحمة مسحات عينيها:بنتي شنو كتقولي؟؟
رؤيا:ماغاديش نخلي خويا فيديهم..وحق بابا غنرجعوه واخة يكون الثمن حياتي...😭
حميد بسم:فاش غنجيبو حقنا غادي يعجبك الحال والله..وغترتاحي..
رؤيا مسحت عينيها بقلة حيلة:انشاءلله...
أمين بعصبية وعينيه حومر:وااش حماقيتي؟؟باغية دفني شبابك معاهم...غي نساي انا عمرني نوافق علا انك تبيعي راسك ليهم مقابل انتقام..
حميد:بعد منها...ختي عارفة راسها شنو كدير فهمتي!!!
أمين غوت:نتا راك موصيبة وباغي تخرج عليها...
رؤيا حبساتو:صافي ءء أمين...الا كان زواجي غيصلح كلشي انا موافقة ومقتانعة...
أمين حبس وجهو وكيشوفيهم واحد واحد:صااافي ماشي سوقي..بغيتو الذل هانتوما فيه...ومن دبا لفوق ديرو لي عجبكم مابقاش هامني..من الاحسن نرجع لخدمتي وحياتي بعيد عليكم...حيت كنت كنظن غي بااا لي ماكيفهمنيش ساعا انا يمكن لي ماكنفهمكمش كاملين...
طلع لبيتو معصب يجمع حوايجو وحميد رتاخ واخة لداخل ديالو حاس بلي هو احقر انسان علا الارض مي مسكت هاد الصوت وكيتناساه..ورحمة عنقات بنتها كتبكي علا سعدها وزهرها فهاد الدنيا..حيت واخة رؤيا غتظلم ولكن أهون من ان حميد يعيش حياتو كلها فالحبس...
نجية جرات بنتها من شعكاكتها ومحمرة فيها اما مريم لبولة كتفلت ليها هههه..
مريم:ءءءء مامااا..اهئ اهئ والله مادرت شي حاجة..
يامنة:شكون نتوما وشكاديرو فداري؟؟باينة فيكم شي عصابة باغيين تقتلوني..
كريم كيحك فراسو معصب وغيطرطق...
نجية:زيدي ابنت الكلب..كتشوهيني باغية ضربي ليا الطر فالحومة..
الجارة التحتانية:اه اختي غصبيها قبل ماتغصبك..
مريم:ييخ تفووو كلشي قلبو عامر...ا ماماااا والله حتى الدروج سبابي ايييي اييي راسي بالشوية اهئ اهئ...
كريم ناض وحبس نجية:راه بنتك مادارت والو ماتفهميهاش غ...
قاطعاتو بصوتها القوي بحال شي طيابة دالحمام:نتا بعدا ماتهضرش معايا...وحسابك علا تالي غي خليني نربي هاد السلكوطة..
يامنة:ا خرجو عليا وتا نتا معاهم باينة فيكم متافقين رباعة النصابة..
كريم بعصبية:اوفففف ا مييي يامنة نسيتيني عاود؟؟
يامنة عاد دارت فدماغها:ءءء ولدي كريم...توحشتك بزااف سمحلي ماعرفتكش(عنقاتو كتبوسو فرحانة وهو مخنزر غيتفركع)فوقاش جيتي!!لاااا ماتقوليش هادي مراتك..وهادي تكون زعما حماتك!!(شافت فيهم بحشمة)سمحولي والله ماعرفتكم..
نجية بقات غي دور فعينيها باغية تفهم اما مريم ماكرهاتش طير عليها..
مريم:حمقا والله تا حمقا يا الشارفة الهارفة..
يامنة مسكينة تقصحات وهو كريم يغوت:اهياااا نتي..حتارمي راسك..مي يامنة مريضة وكتنسى داكشي لاش كيوقعلها هكا..
مريم كتغوت:هي مريضة وتمرضني معاها..فلول تقولي دخلي عمري لما باش تسيقي الدروج..شوية نولي شفارة باغية نسرقها...شوية نوليو عصابة ودبا زوجاتني ليك...تقتل القتيل وتمشي فجنازتو..
نجية ضرباتها للراس:سكتي اداك القردة(مريم مارضاتش)كنقول لدينمك مادخلي عند حد...آش داك دخلي لدارها ءءءء؟؟
مريم كتمسكن:والله اماما حتى بقات فيا..قالتلي ظهرها ضرها وندخل نجيب الما ثقت بيها..واصلا قالت لينا بوحدها..منين تسلط عليها هاد الموصيبة لي لقيتو فالبيت الله واعلم...
كريم كيمسح علا وجهو:الله يعطيني الصبر...
يامنة هضرات بحالا ماكاين والو:ولدي كريم تكون جعتي نوجد ليك!!
نجية جارا بنتها من شعرها:زيدي نمشيو حسن مانظير شي موصيبة هنا..
مريم:اييي اييييياااي اميمتي رخفي راك طيرتي شعري من جذورو...
نجية زادت زيرات عليها وطلعاتها للدار..
الجارة الثانية:لي شاف شي يقول الله يستر..لبنت ماكتخلي مها مادير علا حسابها وهي ملوية علا الراجل..كون كانت غي شي زين(كتقاد شعرها)ها الزين دبصاااح...
كريم سمعها دار خنزر فيها:شكاتسايني نتي..ياكما الطوبيس كيدوز من هنا؟؟
😂😂😂
يتبع ..

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.