صورة مصغرة لـأنقذوني عبيقة كيبغيني الجزء الثاني

أنقذوني عبيقة كيبغيني الجزء الثاني

tani
رواية أنقذوني عبيقة كيبغيني

دخلات لدارهم مضهشرة.. طلعات لبيتها..ومازال كتحلل وتناقش غير بوحدها..وفالأخير خرجات بنتبجة تحيدو من بالها بمرة..واعدات راسها ماتعاودش تفكر فيه أبدا لأنه رجل متزوج..
حلات الماريو وجبدات حوايجها..توني گرونة وسبرديلة بيضة..جمعات شعرها كوب شوفال..حيدات الكتوبة ديال لبارح..ودارت لكتوبة لي عندهم ليوم..لبسات طابليتها..وهزات فيديها كويرة ..نززلات لتحت لقات ماماما حاطة ليها غداها..تغدات بالزربة وخرجات شادة طريق لليسي ..وصلات مع الباب كيتحل..مشات نيشان لتيران ديال السبور حطات حوايجها فالفيستيير..وخرجات كدير تسخينات..
حط التقضية فالكوزينة..ورياض واقف حداه كياكل فشيبس..ستف داكشي فالتلاجة طيب الغدا بالزربة ..وشد رياض مطلعو معاه لبيت لفوق..دخلو لبيتو.لي كان باللون الأحمر والأزرق..كيتوسطو سرير على شكل سيارة سباق..وفاليمين ماريو كبير واليسار مكتب وكورسي وحداه سلة كبيرة عامرة لعب ..وفالحيط معلقين تصاورهم وتصاور رياض...ورا الباب كاينة خزانة صغيرة عامرة كتوبة..حيد ليه حوايجو خلاه غير بالسليب وتعرا حتى هو .دخلو بجوج لدوش..غسل لولدو حالتو ونقاه مزيان..وهادي هي حالة الأب الأعزب مكلف بكولشي من ماكلتو لحوايجو لقرايتو وكيف كاينة أم عزباء كاين أب أعزب..دوش حتى هو وخرج لابس بينوار..ملوي رياض ففوطة ومخرجو معنقو..حطو فوق الناموسية نشف ليه شعرو ومشا لماريو جبد ليه توني لاكوسط ومشط ليه شعرو مطلع ليه التشاوك ..مشا حتا هو للس حوايجو لي كانو سروال تجينز تيشورط بيض وتجاكيطة بلومارين خفيفة وصباط قهوي ..نزلو تغدااو ..وغسل الماعن هو ولدو عبيقة يغسل وزريقة واقف على كورسب كيمسح ويستف..

ركب فموطورو راكب وراه ولدو شادين الطريق..بعد ساعة وصل لگاراج كبير فيه جوج طاج ..متوسطاه لافتة كبيرة مكتوب فيها
"رياض للدراجات النارية:بيع.إصلاح .قطع غيار"
مشا رياض كيجري تعلق فالسيمو..لحق عليهم عبيقة تسالم هو والسيمو من اليدين..ومشا يدير كزنطرول للخدمة..شاف السلعة وشاف شنو تباع فهاد النهار شنو دخل وشنو خرج..هز لفلوس من لاكيص .هز ولدو ومشا بعد ما سلم على سيمو لي هو عشيرو ولكن ماشي روح روح.حيت الضروف علماتو مايتيقش..
عبيقة:فين بغيتي نمشيو أرياض
رياض:ديني لشي قهوة الشيشة الوليد...بغيت نجرب
هبط عندو حاط يديه على ودنو وباليد لاخرة مجبد ليه ودنو ..
عبيقة:لا واقيلة شرفت ومابقيتش كنسمع
رياض:اي اي طلق الواليد غير ضحكت معاك..
عبيقة:تعاود تقولها نقطع لمك باش تتبول 
رياض:(حط يديه على المعلم)لا لا والله مانعاود..
قرفدو وطلعو فالموطور مركبو القدام وعبيقة وراه..
رياض:بابا حبيبي..
عبيقة:من اللخر..
رياض:ملي نجح فالتاني تشري ليا موطور..
عبيقة:هاكا (قلز ليه )ها موطور..لي فعمرك باغين شي لعبة ..طابليط إلا كترو..نتا نيشان موطور..الله يعطيني وجهك أولدي..
رياض:لهاد الدرجة حاسدني على وجهي ...
عبيقة:لا بغيت نسعى بيه..نيت وجهك ديال السعاية
رياض:هاهيا عندك 1_0 نرجعها ليك فساعة الخير..
كملو طريقهم ضاحكين وصلو لماكدو دخلو وطلب الماكلة ليه و لولدو.. كلاو وناض كيلعب مع ولدو..
والبنات خاضيين عبيقة وتيتغامزو عليه..بلعاني كيمشيو عند رياض يبوسوه..ومع هو حرايمي كيخليهم تا كيبوسوه وكيقمعهم مخليهم غارقين فحوايجهم...

كملات حصصها عادي أو نقولو عادي لأنها بدات كتولف ديك المعاملة الجديدة عليها..وقفات قدام ليسي كتشوف فالسما وخايفة يتعرض ليها شي واحد.. حيدات الطابلية لبسات كويرتها وسداتها خشات يديها فالجياب وبدات كتمشى شادا الطريق لدارهم..الطريق لي مخلاتش من المعاكاسات وبسالة ولاد كازا ..خصوصا أنها عاطية لعين بشكل كبير واخة هبيلة وهيشة إلا وأنها تيتيزة وباينة من الطيارة بلي ماشي بنت المدينة...غادا كتمشى بشوية عليها..حتى قربات لدخلة الدرب. ديك البلاصة فين وقف عليها مروان ..جاها واحد النوع من الخوف والرهبة خصوصا ديك البلاصة مضلمة مافيهاش الإضاءة..رجعات اللور ..دايرة فبالها تسنى شي مرة دوز ولا شي بنت وتحرك معاها..ساعا والو ماداز حد ..حتى كتبغي تمشي وتوصل لديك البلاصة وتعاود ترجع توقف فبلاصتها..
كمل هو وولدو اللعب..ركب فموطورو راجع لدربهم..درب السلطان..حتى كيقفزو رياض ..لي هضر بالجهد..
رياض:بابا حبس حبس..
عبيقة:(مازال سايگ)أش كاين..مالنا على الغوات..
رياض:حبس نرجعو عند أيلول..
عبيقة:كتحلم ولا مالك..فين هيا!!
رياض:ونااري راه فتنااها..واتا حبس الواليد..
كان رياض شافها واقفة هي ماشافتوش..واخة فاتها وبعد بزاااف بقا رياض مصر يرجع عندها واخة صغير وفسن 8 سنوات إلا من ااشوفة عرفها خايفة..قلب عبيقة الضورة..راجع لعندها.. شافها معنقة راسها من البرد وكتشوف فالإتجاه لاخور..ستغرب منها ومن السهيان لي كتسها..أو حتى الموطور ماسمعاتوش..ولي معروف على طاي ماكس صوتو مجهد بزاف..شد الفران حدا رجليها..حتى قفزات ضارت عندو مخلوعة ..شافت فيه عاادي ورجعات شافت فرياض بتاسمات ليه..وهو ينقز عبيقة هضر...

وهو ينقز عبيقة هضر..
عبيقة:كاين فاش نعاونوك..
أيلول:لا شكرا أخويا..
عبيقة(بينو وبين راسو )خويا!!!
رياض:مالكي أأيلول بنتي ليا مخلوعة..
تحنات لعند رياض مكوزة بطرمتها..
أيلول:غير خفت شفت هاد البلاصة مضلمة ..قلت نتسنا شي مرا دوز ونمشي معاها ساعة ماداز حتى واحد..
رياض:يالاه معانا نوصلوك..ياك أبابا..
كان كيشوف فأيلول..كيف كتهضر مع رياض..
عبيقة:اه ضروري..حشومة نخليوها هنا..يالاه ركبي نوصلوك..
أيلول:ضروري نركبوو..
رياض:وأش بغيتي نطيرو..
أيلول :لا نتمشاااو ..واش ممكن أخويا عفاك..
والو متسرطاتش ليه ديك خويا ..اهاه الزويمل نسيتي ملي قلتيها ليها نتا 
عبيقة:ااه ممكن يالاه مشينا..
شدات لرياض فيديه..سابقين عبيقة لي بقا وراهم فوق الموطور كيتمشا بشوية ومع راسو كيقول اش سر هاد التغير المفاجئ حيت أيلول ماداتهاش فيه..وهو فهاد القاءات القلال لي شافها فيهم لمس الإعجاب فنضراتها ..نضرا لتجربتو الكبيرة مع النساء..
أيلول قطعات على راسها وعد..وهي ملي كتوعد كتوفي وبدات كتخرجو من بالها..قبل ماطيح كتر..
عينيه نيشان مشاو لطرمتها كتبومبا..كيفو كيف جمبع الرجالا داكشي لي كيشوفو.. مركز عليها الشوفة مشادا هي ورياض وكيهضرو..
دخلو لدرب وقررات تتفصل عليهم قبل ماتوص لدارهم تفاديا لشي صداع..
أيلول:شكرا بزااف أخويا..(نزلات لعند رياض باستو فخدو بجوح)شكرا البوگوص
عبيقة:وايلي هانية..شوفي من نهار هضرت مع مروان راه مايهضر معاك حد فالدرب غير سيري وكوني هانية..
رياض:واش دوا معاها مروان..ناري مشتوش كون سلختو(وبدا كيدير حركات بيديه فحالا كيضرب)
جرو عبيقة قدامو..
عبيقة:زيد زيد ونتا باغي غير معامن..
أيلول :الله يعاونكم..
عبيقة:تهلاي فراسك
دارت ليه اه براسها وكل واحد مشا دخل لدارو..

كيف العادة لقاتهم مجمعين فالصالا لي لفوق ..رمات السلام ومشات بدلات حوايجها..نزلات لكوزينة ..سخنات أتاي وطيبات جوج بيضات ..كلات تما وغسلات الماعن غير بزز خافت مها تعايرها .ورجعات لعندهم...لقات باها حاط فوق الطابلة بزاف ديال الدفاتر ديال 100 ورقة كيصحح فيهم وباينة فيه معصب..وكيهضر وينگر غير بوحدو..
العربي:داابة هاد التلاميد واش متسقطهمش وتهنا..
فتيحة:مالهم العربي!! 
العربي:ماكيقفلو والو فالصرف والتحويل..الأستاد القديم ممفهمهم والو خاصني نعاود ليهم كولشي من اللول..
فتيحة:مساكن راه باقين صغاار..سايس معاهم..
العربي:دابة هادا متحطش ليه صفر..الإملاء زرگ فيه..يستوطن معرفش يكتبها صحيحة
أيلول:(هضرات بشوية)أنا ومنعرفش نكتبها بقا غير دري صغير 
العربي:... والخط عندو خايب نشوف اش سميتو بعدا نتفاهم معاه غدا..
رجع لصفحة اللولة فالدفتار..قرا السمية وضحك باستهزاء
العربي:هههه وأنا تنقول شكون هادا ..قول البرهوش ديال داك النهار وباه داير ليا فيها صعصع يمشي يقري غير ولدو..رياض الوزاني(كتب السمية فواحد الورقة حداه)
سمعات سميت رياض قلشت ودنيها ..قالت يكمن يكون رياض لي كتعرف..قاطع حبل أفكارها باها لي غوت عليها مبرد فيها أعصابو..
العربي:معندكش الحفاضة..تگعدي تحفضي ..ولكن منهضرش معاك دابة حتى تسقطي وتكون الهضرة..
فتيحة:ماحنا على فالك بعد ليا من بنتي...
أيلول بديك الفقصة مشات هبطات الماريو كاامل وبدات تغدد على دوك الحوايج..نصهم قطعاتهم..حتى دخلات عليها مها ولقاتها فديك الحالة كتبكي..مشات جلسات حداها وطبطبات عليها شادة ليها الخاطر..شوية شافت لحوايج لي قطعت وبدات تبكي..شداتها فتيحة نتفاتها..عاد سكتاتها وقالت ليها بلي غدا يمشيو يشريو حوايج..
جبدات كتوبتها وبدات لحفاضة..

بعد ماتفارقو مع أيلول ..دخل هو ولدو لدارهم ..حلف عليه يغسل رجليه ويديه عاد يمشي يتفرج..وفعلا داكشي لي دار..عاد جا تكا فالسداري وجلس يتفرج..دخل عبيقة لكوزينة..لي كانت نقية كتشعل..لبس الطابلية وجبد بطاطا نقاها ودارها فريت..جبد حتى الدجاج قلاه فالزيت ونشفو..وصاوب عصير صاوب ماكلة الزوافرية أصلا مكيعرفش يطيب..حط داكشي فالطبلة لي فالكوزينة وعيط على رياض..عمر ليه طبسيلو وجلسو كياكلو ..فجو مليء بالضحك والمرح..خالقين السعادة من والو..غسل ليه يديه بعد ما كمل ماكلتو..
عبيقة:هبط كتوبتك نراجع معاك..
رياض:ولكن غدا غير الحد..
عبيقة(خنزر فيه)مانعاودش معاك الهضرة..طلع
رياض؛هوا طالع..
هبط شكارتو وراجع معاه وفينما يغلط يجبد ليه ودنيه...كملو وجلسو يتفرجو شوية فالرسوم ..طل عليه لقاه نعس..هزو بشوية وطلعو لبيتو..هازو وكيبوس فيه..حيد ليه التوني وهو مازال ناعس خلاه غير بالشورط وبيل سميطات بيضين..غطاه مزيان.وطفا عليه الضو وخرج..مشا لكوزينة غسل دوك الماعن ..لبس تجاكيطتو وخرج..ركب فموطورو ومشااا.
عيطات عليها مها تعشاا مابغاتش تعشى ماباغاش تشوف وجه باها لي معمرو حسسها بالحنان ولا بالأمان كان ديما صارم معاها وقاسي..كملات حفاضتها ومشات تخشات فداك الشرجم..دايرة ديك الوضعية العجيبة..بقات تما ساعات طالقة شعرها وكيضرب فيه البرد كتسد عينيها وكتخليه يضرب فيها..كتحل عينيها ملي كتسمع صوتو ميزات صوتو من بعيد ..جاي وكيهضر مع شي واحد..طلات من الحديد بان ليها جاي معنق شي بنت لابسة المعري كتر من المغطي..وضاربة ليك واحد التعكيرة.ديال القلب..قالت فعقلها يمكن مراتو..شوية قالت لا مراتو مايمكنش يخليها تلبس هادشي..
أيلول:(ضربات حناكها بجوج بيديها)أويلي كيخون مراتو..تفو على زامل..
حل ليها الباب ودخلات وهو حاط صبعو على فمو بمعنى تسكت ..دخلو وسد الباب..وأيلول ماحيداتش عينيها..على دارو ..شوية بان ليها الضو شعل لفوق..دغيا هزات عينيها لبيت لفوق بعد ما كانت كتشوف فالباب..بان ليها دوز الخامية..عرفاتهم بداو الطرح..ضربات بيديها على الحديدة وكانت هاديك هي الإنطلاقة ديال شرارة الغيرة .لي بدات كتربى عند أيلول..

باقا فالشرجم ..مقابلة دارو ومركزة الشوفة فالبيت لي،شاعل فيه الضو..حولات نضرها لساعة لي معلقة فبيتها لقاتها 2 ديال الليل وملي دخلو لدار كانت 12 ونص ..ومازال ماخرجو والضو مازال ماطفى..هادشي كامل كان كيضور فبالها..ماصبراتش تبقا تشوف فشرجمهم وبدات كتخايلهم ..زعزعات راسها يمين وشمال رافضة تخايل داك المنضر لي وصفاتو بالمقزز..نعلات شيطان وقالت ماصوقهاش فيه..تخشات ففراشها وماهي إلا تواني حتى ناضت قافزة من فراشها وبالها خدام كيخطط ويفصل مقدراتش تشوف الخيانة بعينيها وتسكت لي فيها ما مهنيها... رجعات طلات لقات الضو مازال شاعل..لبسات بينوار على البرد..خرجات على صباع رجليها ..كتشوف يمين وشمال بان ليها ضو بيت مها وباها طافي عرفاتهم ناعسين ..نزلات فالدروج بشوية حتى وصلات لباب الدار وحلاتو دار داك الصوت العجيب زييييط سدات عينيها خايفاهم يفيقو ...شافت القضية صاقلة ومافاق حد ..خرجات وخلات الباب مردود..
الزنقة خاوية كتصفر..شدات بينوارها بيدها وغادا بتجاه دارو.. غير وصلات هزات راسها بان ليه الضو مازال ماطفااا..طلعات لعتبة وبدات كتصوني صونيط مورة صونيط محيداتش يديها من فوقو..
فبيتو هو وياها مجردين من تيابهم فقط مغطيهم ليزار لي مغطي غير نصو ونصها ..فوضعية جد حميمية هي لتحت وهو فوق منها...خداام السي عبيقة كيحفر حتى كيسمع الصونيط..بحهد..ناض قافز لبس سروال التوني وبلا بوكسر..نازل فالدروج كيجري همو الوحيد مايفيقش رياض..نازل وكيتسائل شكون لي جا وفنفس الوقت كيسب وينعل فهادا لي قاطعو وهو في أوج العطاااء ..
حل الباب بجهد ..كانت مازال حاطا يديها على الصونيط ملي تحل الباب وقف قريب ليها رجعات اللور..أما هو تفاجأ..
عبيقة:أيلول 😯
أيلول تخلعات تزعزعات ملي شافتو عريان واخا شافتو ديك المرة من الشرجم ولكن ماشي بحال دابة واقفة حداه قريب..وتزعزعت كتر ملي نزلات عينيها لجيهت المعلم وبان ليها داكشي مهبر أ واقف خصوصا السيد مازال مقيم ومالبسش السليب.. نسات راسها ونسات راها جاية على ود عمل إنساني لي هو وقف الخيانة (الله يعطينا وجه هاد أيلول)
عبيقة:أش كاديري هنا..نتي وفهاد الساعة.

ماجاوباتش فقط بقات ساكتة كترتب الكلمات فعقلها كتحاول تكون جملة مفيدة وتقول ليه علاش جات..هي بيدها معرفاتش شنو وقع ليها..فحالا دار ليها الطلاميس..مكتفيق من سهوتها إلا على صوت فرقعة صبعانو قدام وجهها..مكرر السؤال
عبيق:فين سهيتي..وشنو جيتي ديري فهاد الوقت..
أيلول:(كتشجع راسها لداخل)أحم جيت نقوليك بلي هادشي لي كدير فيه عيب..عيب بزاف..
عبيقة:جيتي لعندي فهاد الوقت باش تقولي ليا عيب..
(تكا على الدفة ديال الباب وغمزها) شنو لي عيب بالضبط وضحي
أيلول:عارف إحساس الخيانة شحال خايب..لا راك ماعارفش حيت ممجربش..نتا إنسان واعي مسؤول ورب أسرة.كيفاش عطاتك خاطرك دير هاكا وفقلب دارك..وولدك كاين يا حصرة..
عبيقة(صعر وبدا كيهضر بيديه):وااا العمالة من الصباح ونتي درتي فعلتي..وضحي كتر وشرحي..من الأحسن تختاصري
أيلول مسكينة تخلعات..رجعات اللور بعدات منو شادة بينوارها بيديها..
أيلول:اش غادي دير ..سمحليا ..وماشي صوقي أصلا..تصبح على خير..طلع كمل خدمتك..الله يعاونك فشنو كنتي كدير..
جات راجعة فحالها وهو يجرها مرجعها لعندو..طلقات واحد الغوتة..زرب عليها ساد ليها فمها.. وجرها دخلها لدار ساد الباب تكا على الباب مزيدها قدامو كيشوف فيها كيتسناها تهضر..أما هي مازال مستوعبات الموقف لي طرا.
عبيقة:وناري الشوهة نتي ...كيسحاب ليك دخول الحمام بحا خروجو..فهميني بعداا
دفعات السنطيحة..وهضرات بجهد سادة عينيها
أيلول:نتا راجل مزوج..ماخاصكش تخون مراتك..حشومة..على الأقل ماشي فدارك وحدا ولدك..
عبيقة:هههه ونااري طيرتيني بالرب..مزوج..وماخاصنيش نخون مراتي واااع ههه
أيلول:(ربعات يديها)كنضن مقلت حتى حاجة لي تستاهل هاد الضحك كامل 
عبيقة:شكون قاليك راني مزوج؟
أيلول:وداك الولد ولدتيه باغ بلوتوت..
عبيقة:وعلى غير المزوجين لي كيولدو..ماكايناش مطلق ،ميتة ليه المرا،هاربة ليه..
أيلول:بلاتي بلاتي دابة نتا ممزوجش..
عبيقة:لا ممزوجش.
عطاتو بالضهر ودارت ياس بيديها.ورجعات ضارت كتهضر عادي عكس لداخل ديالها لي فرحاات بزاف ومعارفاش باشنو غادي تفسر هاد الفرحة..
أيلول:واخة مزوج ماخاصكش دير هاد العمل الشنيع فالبيت ديالك أمام ولدك..(بغات تبان بعقلها زعما)
عبيقة:أحم أحم عندك الحق..ولكن أش ندير الحالة مكتعلمش وأنا راجل وحداني نعيا نبعد من الحرام ونرجع ليه..
(حط يديه على صدرو كيدير حركات دائرية مقرب نصو لفوقاني لأيلول) والله يجيب لينا شي بنت الناس تبعدنا من الحرام وياريت تكون سميتها أيلول

بعدات راسها..
أيلول:أحم مزيان ملي وضحنا هاد سوء التفاهم..دابة خاصني نمشي .سهرة سعيدة..
عبيقة:تصبحي على خير(مع غمزة)
حل ليها ااباب وطل ليكون شي واحد ..شاف الدنيا خاوية وحل الباب مزيان ومبعدش منو بلعاني بغاها تقيسو..خرجات من الباب مزاحمة..بقا حاضيها حتى وصلات لدارهم ..ولكن المفاجئة بغات تحل الباب مابغاش يتحل ليها..بدات كتندب فحناكها..وهو كيتفرج فيها مافاهم والو..

هو واقف كيتفرج فيها مافاهم والو..باقا كتندب فحناكها وكتحاول تحل الباب..شوية بدات كتبكي..وجلسات فوق العتبة..تتندب على زهرها العوج لي مكوز وعاطيها بطرمتو..
كيحاول يفهم شنو طاري وماالها على ديك الجنازة..بدا كيعيط ليها بشوية..باش ميسمعو حد..
عبيقة:(بصوت خافت)أيلول..أيلول..وا المرض..
مع كلمة المرض هزات راسها فيه..دار ليها بيديه أجي..هزات كتافها بمعنى لا..حط يدو على وجهو كيحاول يكتم غضبو..عاود قاليها أجي ..مسحات دموعها وناضت كتمشى لجيهتو..وصلات لعندو وحل ليها الباب دخلات..بقاو واقفين فالكولوار ..هو متكي على الباب وهي قدامو كيشوف فيها وكيتسناها تفهمو شنو وقع ليها..
عبيقة:مالكي تاني اش وقع..
أيلول:قفرتها قغرتها ليوم يجري عليا العربي ..(كضرب فحناكها)ليوم يجمع ليا حوايجي ويصيفطني لعروبية نسرح الماعز..
ضحكاتو بهضرتها ربع يديه وبدا كيتفرج فيها بدون مينطق ولا كلمة فقط كيبتاسم..
أيلول:أش داني ندير شي عمل إنساني.أويلي ميمتي قفارت عليا..قاليك وقف الخيانة..بغيتها توقف ليا فالركابي..ناري ليوم ناكل وندوق..الله يربي فكني غير هاد المرة والله مانعاود(بدات كتبكي وضرب فحناكها) وااا قفرتها 
حيد ليها يديها من وجهها وشدها منهم معليهم لفوق وكيشوف فيها بنضرة حادة..ضورها ملصقها مع الحيط وهو مازال شاد ليها يديها..وبيناتهم مسافة. قليلة..
عبيقة:ششش سكتي رياض ناعس..ااأجي دخلي وفهميني شنو طرا بشوية باش نفهم.حيت لحد الأن مازال مافهمتيني تا ق..(كان غادي،يخصر الهضرة)أحمم تا وزة
دارت ليها براسها لا زعما مندخلش..
عبيقة:لي بغيتي..ولكن قولي ليا شنو طرا..
أيلول:(بالبكا)تسد عليا البااب أخويا..غادي نبات فالزنقة..
بدا كيضحك حتى دمعو عينيه ...وهو مازا شاد فيديها وقفات من الهضرة كتشوف فيه فذهول..
أيلول:واش كاينة شي حاجة كضحك قولها ليا نضحك معاك حتى أنا..
عبيقة:الهربة معااك والله..بقيتي كطيري حتى جبتيها فراسك..
نترات يديها من يديه وجلسات للأرض مسرحة رجليها على طولهم وبدات تبكي..
أيلول: اه عندك الصح كنطير وطيرتي خارجة عليا..نتا لي تضحك عليا..ماعارفش إلا لقاني با خارجة فهاد الوقت اشنو يقدر يدير ليا قفرتها..قفرتها هادي هي لاخرة ليا..اش داني نجي عندك أميمتي شغلك هاداك دخل نتا حتا 10 أنا مالي..
بقات فيه وهي كتبكي..هزها من الأرض موقفها وقرب بشوية مسح ليها عينيها بأطراف صباعو..

بقات فيه وهي كتبكي..هزها من الأرض موقفها وقرب بشوية مسح ليها عينيها بأطراف صباعو..
عبيقة:(بصوت حنين)صافي سكتي من البكا..وأجي معايا دخلي بعدا ونفكرو فشي حل..واخا !!
أيلول:واخة..
شدها من يديها غادي قدامها وجارها وراه..تمشاو على طول الكولوار.. حتى وصلو لصالا وقاليها تجلس.ورحب بيها مجاملة واخا ماشي وقت الترحيب هادا..بتاسمات ليه فعز دموعها..وبدات عمل التبرگيگ دورات راسها يمين .شماال..والفوق..لتحت..دوزت السكانير للصالا..عجبها الديكور ..وماطاحتش ليها على البال بلي عبيقة هو لي مفرش الدار على دوقو وعلى دوق ولدو..كانت عبارة على صالة مغربية 100% بسدادر ومخاد..مع تلامط فالگرونة والذهبي..ومخاد فنفس اللون ومزوقين ..وطابلة بلناب گرونة وزربية تركية حمرة ..هزات عينيها فالسقف بانت ليها ترية نازلة كتبري..نو ماغاديش نقوليكم من الكريسطال او الذهب غير ترية عادية..
جاب كورسي وجلس مقابل معاها..وهضر كيشوف ليها نيشان فعينيها..
عبيقة:دابة غادي نفكرو فحل ومايكون غير الخير.صافي !!
أيلول:ماكاينش الحل قفارت عليا والله..
عبيقة:لا متقوليش هاكا كاين الحل ...
بقا كيشوف ليها فعينيها ومع عينيه خضرين مايلين لزروقية دوخوها وسهات فيه حالا فمها..
أيلول:لي درتيها أنا معاك..
بقا كيمشي ويجي على طول الصالا كيفكر زعما..شوية وهوا يرجع عندها بزربة ..
عبيقة:باباك كيصلي..
أيلول:معلوك كيصلي..مالو ماشي مسلم..
عبيقة:كيصلي الفجر!!
أيلول:اه كيصلي الفجر والصبح والضهر..وحتى..
عبيقة:ششش فين كيصلي الفجر..
أيلول:فالجامع..
عبيقة:صافي لقيتها..
أيلول:اش لقيتي..
عبيقة:شوفي دابة 2 ونص الفجر غادي يأدن مع 3و40 دقيقة..إدن باك غادي يخرج من الدار مع 3 ونص حيت الجامع مبعيدش غير 5 دقايق ويكون فالجامع..
أيلول:(مقشبلات والو)هاااا شنو
عبيقة:نتي غير سكتي دابة وملي توصل تلاتة ونص غادي دخلي لداركم
أيلول:نااري عنداك نحصل
عبيقة:لا متخافيش..
أيلول:غادي نبقا هنا..
عبيقة:لا بغيتي طلعي نعسي حتا نفيقك..
أيلول:بقا لبويا غير النعاس..غير طلع نتا متخليش البنت بوحدها..
عبيقة:فكرتيني فيها..تسناي هنا..

دارت ليه اه براسها وطلع هو فالدروج..لقا ختنا فالكرونة مسرحة فوق الناموسية ومغطية بليزار بزازلها كيبانو..شافت عبيقة جا وهي تقفز ناضت عندو عريانة تلاحت عليه بغات تبوسو وهو يبعدها..
سارة:تعطلتي عليا ..
عبيقة:سارة سيري لداركم..
سارة:وعلاش حبي..مالك شنو لي غيرك..
عبيقة:واش صوقك..سيري فحالك وخليها لمرا أخرا..دابة مامساليش..
سارة:واخة وعنداك تنسا عيط ليا.
عبيقة :واخة..لبسي حوايجك ونزلي..سربي متعطليش..
هز مانطى خفيفة من بيتو عطا لسارة 100 درهم وخرج.نزل لعند أيلول..لقاها حايدات بانطوفتها ومكمشة فالسداري جالسة ومعنكشة..مد ليها المانطة وقاليها تغطا إلا فيها البرد ..خداتها من عندو وتغطات بيها كاملة خلات غير راسها لي كيبان ويديها لي شادة بيهم طراف المانطة..عم السكوت حتى نزلات ختنا كتقرقب فالطالون..خرجات أيلول راسها كتبرگگ لي فيها ممهنيها..جات عندهم حتال الصالا وملي،شافت أيلول بدات كتخنزر فيها..وحتى أيلول خنزرات فيها وطلعات فيها وهبطات باحتقار ..بقاو تيتبادلو النضرات حتى قاطعهم عبيقة لي هضر بصوتو الخشن لي كولشي عارفو..
عبيقة:غادي نباتو هنا..يالاه الله يعاونك..
سارة:ماغاديش توصلني..
عبيقة:بانت ليك مكتوبة فجبهتي طاكسي..
سارة:(مرضاتش)أحم واخة 
دخلات لعندو لصالا وتحنات لفين جالس وطبعات بوسة على فمو..وهادشي كامل داز تحت أنضار أيلول لي خرجات عينيها مصدومة من وقاحتهم. ومصدومة كتر من كونهم ماهتموش لأنها جالسة معاهم..
غير حطت شفايفها على فمو..بعد دغيا وافف وشادها من يديها غادي بيها نحو الباب..خرجها وسدو ورجع لعند أيلول..
جلس فسداري مقابل معاها وبقاو شوف فيا نشوف فيك أطجين الحوت نتا ما طيب أنا مناكلك...كيشوف فيها متخشع فالشوفة فيها.. وهي ملمدة بحال بريوة بديك المانطة وتضور فعينيها فحال لبية ..حتى عاق على راسو..
عبيقة:نجيب ليك شي حاجة تشربيها..
أيلول:لا شكراا.شحال الساعة..
عبيقة:(جبد تلفونو)دابة ألالة قريبة ضرب 3
أيلول:مابقا والو..
ورجع الصمت سيد المكان..حتى عاودات نطقات أيلول

أيلول:نقوليك واحد الحاجة
عبيقة:قولي..
أيلول:عزيز عليك رياض ياك؟
عبيقة :بطبيعت الحال راه ولدي هاداك..
أيلول:وملي عزيز عليك علاش كدخل عليه البنات لدار..على الأقل ماتجيبهمش لدار ..
مسح على راسو وفكر فهضرتها شاف بعيد وبدا كيهضر.

عبيقة:هضرتك كاملة صحيحة..وعندك الحق ماخاصنيش نبقا نجيبهم لدار ولكن راه كيف قلت ليك أنا راجل وبوحدي من الفوق وعندي حاجيات وكنعيا نبعد من الحرام وفالأخير كنطيح فيه..
أيلول:تزوج وتهنا !!
عبيقة:مابغيتش نجيب شي وحدة لي تكرفس ليا على ولدي..(هضر بحدة)نقدر نقتلها ومنحنش فيها..(بتاسم)كاينة وحدة فبالي إلا قبلات
أيلول:الله يسهل عليكم ..(بإبتسامة)غادي تعرض عليا ياك.
عبيقة؛وايلي نتي اللولة..
أيلول:واخة نسولك ..وسمحليا فيا بزاف الأسئلة
عبيقة:سولي خودي راحتك ...
أيلول:فين هيا مامات رياض..
عبيقة:(تنهد)قصة طويلة..خاصها جلسة بوحدها 
أيلول:عاود ليا ..(شاف فيها مطلع حاجب ومهبط لاخر) زعما إيلا بغيتي..
شاف فالساعة و عاود شاف فأيلول
عبيقة: دابة قرب الوقت..خليها لمرة أخرة ونعاود ليك..
أيلول:وعد..
عبيقة:(بابتسامة)وعد.. باقا 10 دقايق..
أيلول:ياااربي تعاوني ومنحصلش ياربي.
عبيقة:ههه يكون خير... فين كنتي ساكنة قبل ماتجي لهنا..
أيلول:كنت ساكنة فطنجة..
عبيقة:اااه نتي شمالية دابة
أيلول:لا ..غير كونا ساكنين فيها..
بتاسم ليها ورجع شاف فتلفون..لقا الوقت وصل..طلب منها تسناه ..طلع للبيت لفوق ..شوية نزل لابس توني رمادي..طلعاتو من رجليه حتال راسو بإعجاب.. مشاو جيهت الباب وجلس فالعتبة كيتسنا فباها يخرج ..وهيا واففة حدا راسو ممخبية بالباب..

عبيقة:شووفي شوية غادي يخرج باك انا غادي نمشي نلاهيه ونتي غير تشوفيني هضرت معاه جري دخلي للدار..
أيلول:صافي مشات ..ياربي تعاوني ياربي معمري نعاود 
دازت 5 دقايق وهوما كيتسناو فالعربي يخرج..شوية بان ليه شي حد خارج لابس فوقية بيضة وداير القب وهاز صلايا فيديه..ماشافش وجهو..مشا عندو طاير قبل ما يسد الباب..
عبيقة:صباح الخير الشريف..
دار عندو العربي..لي غير شاف عبيقة كحل بالعما..خصوصا انه مازال كيذكر اللقاء لي كان بيناتهم..وماكانش ابدا لطيف
العربي:صبحنا على الله..
عبيقة مازال مصدوم كيحاول يستوعب هادشي ..ضورها فمخو وقال يصبر ويتحكم فراسو لايصدق خارج عليها..

..ضورها فمخو وقال يصبر ويتحكم فراسو لايصدق خارج عليها ..
عبيقة:انا جاركم ساكن لهيه ..كنت غادي لجامع نصلي وملي،شفتك قلت والو نتسامح معاك ونعتاذر منك على هداك النهار..
دار مضور معاه العربي لي حاضي جنابو يسحاب ليه شفار..دار غير باش ميشوفش أيلول..
لي غير شافت باها عاطيها بالضهر حيدات بانطوفتها وعطات رجليها لريح..مكتفصلها على بها إلا بضع سنتمترات قلبها كيضرب ..لقات الباب مردود..محلول شوية..كان عبيقة لي لحق باها قبل مايضور الساروت..وملي دخلات تسمع داك الصوت العجيب زييييط الشيء لي خلا العربي يضور وقبل مايضور كانت أيلول طلعات فالدروج..تتفس عبيقة الصعداء وحمدات أيلول الله وشكراتو..ضور العربي الساروت وضار مخنزر عند عبيقة ..
العربي:سير فرقني عليك..
وزاد فحالو مخلي عبيقة كيضحك 
العربي:قاليك الله يسامح وهو ماخلا فيا ما نسى المتخلف لاخور..
رجع عبيقة لدارو..فرحان من الحديت البسيط لي ضار بينو وبين أيلول ومتفاجئ من أن العربي هو باها طلع نيشان لعند ولدو غطاه وباسو..وخرج مشا لدوش دوش من الجنابة أحم أحم..وتخشا ففراشو ناعس غير بالبوكسر..
..أما هي مع الخلعة لاحت بانطوفتها فالدروج وتخشات فالفراش مغطية راسها.وسادا عينيها خايفة من باها يطلع ...ملي تأكدت من انه صافي مشا ومبقاش يطلع ..حيدات لمانطة من على وجهها وبدات كتبتاسم وضحك بصوت عالي لي،شتفها يقول غير تشيرات ..

أيلول: ها لاواه سيلاواه صدق ممزوجش ..إينينل ممزوجش.. ولاهيلا وكان يصحابلي مزوج..ولكن علاش يدخل الدريات الزامل لاخور..ناري مسكين عاوني ..واخة انا لي مني لافوت..احح عل تيتيز..
بقات هاكاك حتى داها النعاس..

وشرقات شمس الصباح معلنة على بداية يوم جديد..
كيفيق على ولدو كينقز عليه فوق الناموسية باغي يفيقو..
رياض:وا عبيقة فيق..فيقق فيق عبيقة فيق
حك عينيه بكف يديه وجر رياض من رجليه خاشيه معاه فالفراش..وورجع سد عينيه ناوي يكمل نعاسو..
رياض:نوض أبابا راك واعدتيني زعما..ليوم تخرجني.
عبيقة:لموك نتا راك نااعس مع راسك ..أنا راه مشفتوش
رياض:وانا مالي نووووض
عبيقة:غير،سااااعة ساعة نعس شوية ونخرجك..
رياض:(غوت ليه فودنيه)وا لاااااا دابة
عبيقة:(دفعو عليه بشوبة) نوض تگعد ينعل حسك..
شاف فتلفونو لقاها 11 
.ناض كيتكسل وخرج من الفراش..مشا للحمام وتبعو رياض ..غسل وجهو وكيحك سنانو وكيهضر مع رياض من المرايا..
عبيقة:فين بغيتي نمشيو 
رياض:لفين ما بغيتي اباب غير خرجني..
عبيقة:واخة..غسلتي سنانك أ وجهك بعدا..
رياض:اه غسلتهم وجمعت حتى فراشي...
عبيقة:برافو عليك البطااال..
رياض:(ببرائة)نمشي نجمع ليك فراشك 
عبيقة:لا غير خليه انجمعو انا..
رياض:(كيتمسكن)لا أنجمعو ليك..
عبيقة:يالاه سير..
رياض:وارا درهم لايحاااافضك..
عبيقة:الجقيقير لاخور..غير نزل لتحت انجمع الفراش بوحدي
(شاف فيه رياض باغي يبكي) غير سكت غادي نعطيك درهم 
نزل فرحان فالدروج..شعل التلفازة وبقا كيتفرج فالرسوم ....حتى لحق عليه عبيقة بعد ما جمع فراشو لابس غير سروال التوني وعريان من الفوق شافو رياض حتى هو تعرا فحالو وبقا غير بالشورط...شافو هاكاك بدا كيبتاسم فرحان بولدو..
عبيقة عارف ولدو كيقلدو فكولشي..داكشي علاش كيخلي الجانب الخايب ديالو بعيد على ولدو..ماكايكميش قدامو ومكيخصرش الهضرة قدامو.. حيت عارفو غادي يقلدو فكولشي داكشي علاش كيبين ليه غير الحوايج الزوينين..
مشا لكوزينة وجد فطور مغربي ..عمر أتاي وحط الزيت والزيتون..والفرماج والكاشير..بقا خاص الخبز..هز فلوسو لبس تريكوه وصندالتو وخرج متاجه لمخبزة..

مسافة الطريق وكان فالمخبزة..دوموندا على الخبز..لقاه مازال ماطاب قالو ليه يتسنا بينما طاب.. خرج كيتسنا جالس فالكراسا ..جبد تلفونو كيبقشش فيه ومرة مرة يشوف فااساعة ماباغيش يتعطل على ولدو... هز عينيه فالدخلة ديال الشاريع كتبان ليه أيلول جايا لابسة بيجامة كل بياسة من جيه ولابسة التقاشر غلاض واخة كاين الصهد والسروال من لتحت خاشياه فالتقاشر..ولابسة صندالة ديال العربي كبر منها جاية وكتجر فيها..إييه إييه هاديك لي تتاكول بيها العصا.. شعرها جامعاه الفوق بقراص ..وهازا فيديها قفة صغيرة..كتمشى وكتجر فالصندالة ..خرج عينيه باغي يتأكد من هاد شي واش بصح. واش هاد كارتة الموضة لي جاية فاتجاهو هي نيت أيلول..
جاية كتجر فرجليها ماحاملاش راسها حيت مفايقاها مها بكري (كيف قالت) تجيب الخبز...ومع فاقت مقلوبة بالنعاس والگانة معندهاش.. لي لقاتها لبساتها ..جاية كتكوسل وتعيوج غير بوحدها..وجهات نضرها للمخبزة حتى كيبان ليها جالس فالكورسي والزوينة گاع دار ليها باي باي..وقفات مصدومة فبلاصتها..
أيلول:الله ياربي الله بريستيجي ضاع ..وهيا ناري ملي نكون مقادا ومحلقة على الحالة ميشوفني حد وملي نكون مبهدلة المغرب كامل يجي يطل عليا..
دارت ليه باي باي..ونزلات لرجليها حيدات التقاشر خشاتهم فالققة بالخف..عاودات جمعات شعرها وقاداتو شوية..تمشات جيهتو محرجة...طلعها وهبطها شاد الضحكة..ماشي كيضحك على حوايجها..كيضحك على الطريقة باش حيدات التقاشر والطريقة لي كتجر فالصندالة حيت كبيرة عليها
عبيقة:(بابتسامة ساحرة)صباح الخير..
أيلول:صباح نور..صافا
عبيقة:الحمد الله ونتي 
أيلول:الحمد الله.بغيت نقوليك شكرا على لبارح..
عبيقة:نو هااانية هادا واجب..
بتاسمات ليه وجات داخلة لمخبزة ..وهو يعيط ليها..
عبيقة:أيلول ..
أيلول:(رجعات)نعاام..
عبيقة:جيتي تشري الخبز..
أيلول:اه..
عبيقة:جلسي جلسي مازال موجد..
أيلول:غادي يتعطل !!
عبيقة:لا واحد 5 دقايق..جلسي..
جر ليها الكورسي وجلسات معنقة القفة..وهو جالس وحاط يديه على ركابيه...وحاني ضهرو..وكيشوف ليها فالصندالة..شافتو كيشوف ليها فرجليها ..شداتها البكية..عاق بيها تزيرات
عبيقة:وصنداالة عندك..
أيلول:(ابتسامة صفرة)هيهيهي ديال با كتعجبني مهوية..مع الصهد راك عارف..
عبيقة:الواحد هو لي يتهوا مع راسو..
بتاسمات ليه وسكتو تاااني حتى نطقات أيلول:رياض لاباس عليه..
عبيقة:لابااس عليه..

فقط قالو هاد جوج جملات وعم السكوت مرة أخرة..حتى كتكسر السكون..البنت لي مقابلة المخبازة كتعلمهم بلي الخبز وجد..تمشات أيلول سابقاه وتبعها هو 
كتسناها تجمع ليها الخبز ..ضورات وجهها فالمخبزة ..ومشات عينيها نيشان لحلاوي ديال لاكريم..عينيها خرجو..جبدات الفلوس من صدرها..تحت نضرات عبيقة لي تكا على الكونطوار باغي يعرفها شنو باغا دير جابت ليه الضحكة..
..جبدات الفلوس وحطاتهم فوق الكنوطوار كتحسب بالدرهم بالدرهم..حيدات 10 دراهم ديال الخبز دارتهم جنب..وحسبات شحال شاط ليها لقات غير 3 دراهم لي شايطة ليها خلصات الخبز لي دارتو فالقفة ومشات عند البنت سولاتها بشحال المورصو ديال الحلوة ...قالت ليها داير 5 دراهم ..نفخات فمها باغا تبكي ..دارت كتشوف لاخر مرة فداك الطرف ديال الحلوة نضرة وداع..ودارت عند عبيقة لي بقا مركز عليها الشوفة..
أيلول:يالله الله بعاونك..
عبيقة:تي اجي فين غادا..
أيلول:غادا لدار..
عبيقة:ياك طريقنا وحدة..تسنايني برا ونمشيو بجوج...
مع هبيلة قالت ليه اه وخرجات كتسنا فيه برا..هازا القفة بحال الصاك...بعد 3 دقايق خرج عبيقة هاز فيديه الخبز وفاليد لاخرة كارطونة صغيرة مدها لأيلول ..لي،شافت فيه مستغربة..
أيلول:ديالاش هادي..
عبيقة:ديالك..خوديها بالصحة والراحة..
شداتها من عندو وحلاتها..غير شافت الحلوة وهزات عينيها كتشوف فيه ممتنة..ولكن دارت فيها عزة نفسي حگا ما حگا منقدرش ناخدها من عندك.. ولكن عبيقة عتارض قايل..
:عتبريها كهدية بداية صداقة(مع غمزة وبتسامة)
الدرية داخت .تلفت.تزعزعت..بتاسمات ليه ديك البتسامة الغبية لي كتميزها وشدات من عندو الكارطونة..
عبيقة:اري ليا نشد عليك القفة..
أيلول:لا بلاش..
عبيقة:كوني تسمعي الهضرة ..
عطاتو القفة هزها ليها..وخشات يديها فالجيب جبدات ديك 3 دراهم وخشاتها ليه فالجيب..شاف فيها بمعني واش من نيتك..
عبيقة:من نيتك..
أيلول:اه ..خلاص الحلوى..
عبيقة:وشكون قاليك راه ب3 دراهم..
ايلول:عارفة تسال 2 دراهم..
عبيقة:بالرب تا حمقة..
هز الفلوس ولاحهم ليها فالقفة..غادين كيتمشاو هو هاز عليها القفة وهي هازا الكارطونة ..كيتمشاو وبنادم حاضيهم وكيتسائلو شكون هاديك لي مع عبيقة..وشي وحدين كيصحاب ليهم مامات رياض..اما النص لاخور راهم ديجا سامعين عند مروان بلي هاديك خطيبتو...
وصل لدارو وجلس فالعتبة حتى وصلات لدارهم ودخلات عاد دخل هو..لقا رياض مرون الدنيا مرجعها حالتها..

فطر البطل ديالنا مع ولدو فجو مرح مملوء بالسعادة..عكس بطلتنا لي غير وصلات لدار..يالاه دخلات مع الباب كتجيها تصرفيقة من حيث لا تدري.. طيحات القفة..ومعاهم حتى الحلوى ..خلطات ليها الشرق مع الغرب ..هزات يديها كتمسح جنب فمها لي كان كيسيل بشوية الدم..ضارت تشوف شكون ضربها..لقات العربي..واقف عينيه غادي يخرجو من بلاصتهم وكشاكشو خارجين..قبل ما تحل فمها وتنطق مستفسرة على سبب الضربة..كان سباق جارها من شعرها مطلعها فالدروج ..كتغوت ربي لي خلقها من قوة الألم..سمعاتها فتيحة جات كتجري فكات بنتها من يديه ..وخبات بنتها وراها..
فتيحة:مالها اش دارت ليك..گااع لي تضربها..
العربي:ساعة باش سخرناها تجيب الخبز..مالها على هاد التعطال..
فتيحة:وهادا فنضرك سبب لي تضربها عليه..راك رجل تعليم يا حسرة وإنسان واعي..
أيلول:(تتبكي)والله أماما لقيت الخبز مازال موجد وبقيت كنتسناه.
العربي:قطعي عليا حسك..منسمعش صوتك..
فتيحة:حسبيا الله ونعم الوكيل..اجي أبنتي اجي..
جرات بنتها دخلتها لليتها جمعات ليها شعرها..ومسحات ليها فمها..ولكن بقا الأتر ديال الضربة باين..مسكتات ليها من البكا غير حتى حزراتها مها مواعدها غير يفطرو وتديها لمروكو مول..حتى هيا كامونية سمعات الخروج ومسحات خناينها
أيلول:صاافي ..ماما واحد الكرطونة ديال الحلوة ماباتتش ليك!!
فتيحة:اه راها فالكوزينة كنت غادي نرميها..كاملا تبغجات
أيلول:لا لا مترميهاش ..جيبيها ليا عفاك وجيبي ليا فورشيط..
فتيحة:الله يستر وصافي..
..هبطات فتيحة جابت ليها حلوتها ..وعاودات نزلات تاني حطات الفطور للعربي...وصاوبات صينية ديال الفطور ليها ولبنتها ولحتى معاد لي ضامن معاهم ..مخليين العربي كيفطر بوحدو بحال المنبوذ..
كمملو فطورهم .هزات فتيحة الصينية هبطاتها لكوزينة وكولا مشا لبيتو يلبس حوايجو باش يخرجو..
لبسات بطلتنا سروال تجين زرق مقطع من الركابي شوية ..وقميجة بيضة خشاتها فالسروال وبالغينة بيضة بالسيور..طلقات شعرها وجمعاتو بالنضاضر لي دارت فوق راسها..ودارت ماكياج خفيف..خرجت هي ومها وخوها شدو طااكسي متوجهين للوجهة ديالهم..

بعد ما فطر تسنا حتى جات المرا لي كتنضف ليه الدار.. غسلات لماعن وسيقات الدار وخملاتها..وقف على راسها حتى كملت خدمتها ومشات فحالها..طلع لبس ولدو شورط بيض وقميجة خضرة..مع صبرديلة بيضة..مشط ليه شعرو..وخلاه فالبيت كيلعب..ومشا لبيتو لبس شورط ديال التجين حد الركبة..وتيشورط غوز بااارد..مع سبرديلة بيضة وفيها جوج خطوطة بالحمر و الزرق..وساعة فيدو فالقهوي..مع نضارات كحلين..
هز سوارتو وهز ولدو وخرج ركب فموطورو دار الكاسك لرياض لي لاصق فيه من اللور وديمارا..خرج من الدرب أوقف قدام البنكة..مشا تيرا الفلوس ورجع ديمارا متوجه للبارك..
غير وصلو مشا رياض كيجري كيلعب فالزيطة..وجلس عبيقة فكورسي مقابل ولدو وداير رجل على رجل..
لعب ونقز حتى عيا..شوية جا جلس حدا بااه عاقد حجبانو وحاط يديه على حنكو..دار عندو كيشوف فيه عرفو طالعة ليه القردة..سولو باهتمام:
عبيقة:مال ولدي شكون قلقو ليا..
رياض:ماشي ولدك انا..
عبيقة:ياك لمك نكرتيني..مالي اش درت ليك..
نعت ليه بصبعو لواحد الولد جالس فحضن ماماه كتلعب معاه وتبوس ليه فيديه..وكتقيص ليه فشعرو..شاف عبيقة ولدو والدموع فأطراف عينيه..هزو لعندو مجلسو فحجرو فارق ليه رجليه ورا ضهرو ومعنقو لصدرو..
رياض:فين مااما أعبيقة..
عبيقة:دابة تجي أبابا مابقا ليها والو..
رياض:كل مرة تتقول ليا هاد الهضرة ومازال ماجات..فين مشات..
عبيقة:(قلبو كيتقطع)صبرتي هاد الوقت زيد صبر..
رياض:(كيبكي)واش انا خايب أبابا ..علاش مشات وخلاتني..
سمعو كيتنخصص عرفو كيبكي حيدو من صدرو كيمسح ليه دموعو 
عبيقة:ويلي زريقة كيبكي..شوف البنات أيضحكو عليك..
دور راسو بشوية يمين وشمال لقا بزاف الولاد كيشوفو فيه..
رياض:حضيني تربح روبيني..كنفرقو الشريحة هنا يالاه رولو..
تخلعو الدراري الصغار ومشاو هربو كيلعبو..وهاكا نسا رياض الموضوع..وهاد الطريقة ديما كيديرها ليه باه باش يتناسا الموضوع..
عبيقة:(وقف ومد يدة لولدو)مشينا..
رياض:فين..
عبيقة:حشمت نماركي عليك..(كيضحك)يالاه نمشيو نشريو توني لي عجبك..
رياض:قول والله أعبيقة..
عبيقة:وااايلي..زيد يالاه..
شد لباباه فيديه..وغادي كيتمشا بحماس..دغيا نسا دموعو ودغيا تحولو لضحك..وهادا هو حال الأطفال..ديمارا الموطور متوجه لأكبر مركز تجاري فالمغرب ..موروكو مول..

حطهم الطاكسي قدام موروكو مول..نزلات وهزات راسها كتشوف فالبناية وشحال كبيرة حاطة يديها على وجها حاجبة بيها الشمس واليد لاخرة حاطاها على نصها..خلصات فتيحة الطاكسي وجراتها هي من يد ومعاد من يد..مع الدخلة بقات مبهوضة حالا فمها..بان ليها حوض السمك كبير مشات كتجري. هي وخوها معاد فرحانين وكيقيسو فالزاج وكيلعبو مع الحوت..وفتيحة مقابلاهم وكضحك على هبال ولادها..متزعزعو ليها من تما غير بزز. بان ليها السلم الكهربائي ...فحالا بان ليها العلام..هربات تاني لمها هي وخوها..ومشات لهاداك لي كيهبط ..طلعات فيه..وعاودات طلعات ونزلات. طلعات ونزلات حتى ليعاتها فتيحة بقرصة عاد شدات لرض ..مشاو لحوايج البنات..وقالت ليها مها تختار شنو بغاات ..عينيها بداو كيخرجو منهم القلوبة..
جلسات مها فكورسي وخلاتها كتعزل..
مشات لسراول تجينز ختارت 2 واحد تجبن زرق أواحد بيض طالع ..داتهم لمها تشدهم ليها...من بعد مشات لقوامج..ختارت 2 وحدة زرقة بلو سيل .أوحدة. كحلة فيها البيض...وخدات تيشورطة گوتشي كحلة..
مشات مها على سعدها وعدها خلاصات ألف درهم فداكشي (20 الف) خرجو من داك المحل وجراتها لصبابط..شرات ليها سبرديلة رمادية أديداس..وبالغينة عاليى بيضة وفيها الكحل..خرجات من المحلات فرحانة ونسات قتلة العصا لي كلات..
أيلول:شكرا أماما بزاااف..
فتيحة:تستاهلي ابنتي المهم هو تكوني فرحانة..وهي لا حمرتي ليا وجهي وجبتي البااك.
أيلول:غادي نجيبو الوليدة كوني هانية..نتكرفص ونتمحن مهم نجيبو
دازو جوج ولاد وبداو كيضحكو عليها..
أيلول:(هضرات بجهد)الباك الباك غادي نجيب الباك
فتيحة:زيدي خاصني نكسي حتى معاد..
أيلول:ولاش غير كيقطعهم..
معاد:ماما شهدي عليها..
ايلول:ويتك ويتك على ماما..البرهوش لاخور
فتيحة:ايلول صقلينا..
ايلول:هاهي ساكتة..
جراتهم تاني وهوما كيتخابطو ليها فوق راسها...ودخلو لمحل لبيع ملابس الأطفال ..

بداو كيضورو فداك المحل ..كيختارو لمعاد الحوايج..وبطبيعت الحال فجو غير خالي من منواشات ايلول ومعاد لي خاصهم غير الفرصة ويدابزو ..دارو ليها الشوهة تما بقا ليها غير تندب حناكها بقوة الفقصة..
ايلول:(كتجرها من الجلابة)ماما ماما 
فتيحة:(كتختار وتهضر)أممم
ايلول:(مازال كتجر)ماما وا ماما..فتيحة ..
فتيحة:(دارت جاهلة)حيديها نتي گاع اش بغيتي
ايلول:عييت
فتيحة:ملي كونا نعزلو ليك شراوطك معيتيش ودابة درتي فيها عيانة..سيري جلسي لهيه (شيرات لفوطوي)ومتحركيش من بلاصتك..
حركات راسها بمعنى اه ومشات جلسات فالفوطوي..كضور عينيها يمين وشمال وكتأفأف بملل
شوية رجعات عندها ماماها كتعلمها بلي غادي تدي خوها يقيص الحوايج..مشاو وخلاوها بوحدها..
بلاصا الموطور فالباركينغ ديال الموطورات ودخل..طلع نيشان للمحل لي شاف فيه توني لي عجب رياض.. مشا لعند الموضفة لي مقابلة لمحل سولها على التوني ..وغير شافت عبيقة داخت خصوصا ملي حيد النضاضر وبانو عينيه السيدة دابت ولات تتقول ليه غير،سير جلس انا نجيبو ليك حتال عندك..نعتات ليه الفوطوي. فين يجلس وقالت ليه يتسناها..جر ولدو من يديه ومشا لفوطوي..شوية بان ليه رياض زهق من يديه ومشا كيجري فاتجاه شي واحد..
كانت ساهية حتى كتحس بشي حد تلاح عليها عنقها..وكتفاجأ ملي كتلقاه رياض..عنقاتو ضاماه عندها بحب .بعدااتو باستو فخدو جوج بوسات ..كان واقف حاضيهم ومتفاجئ من هاد الصدفة الزوينة..
عبيقة:(قرب ليهم)وحنا منتباسوش..
أيلول:(مسمعاتوش)صدفة زوينة هادي
عبيقة:زوينة بزاف..اش تديري هنا 
ايلول:كنشريو لخويا شي حوايج..
عبيقة:عندك خوك!! 
ايلول:اه صغر مني.. ونتوما شنو جيتو ديرو هنا..
عبيقة:غير رياض عجبو واحد التوني وجيت نشريه ليه..

ضارت عند رياض:
أيلول:بالصحة أسيدي..
رياض:(بابتسامة)الله يعطيك الصحة..
انتابه لضربى لي جنب فمها دغيا هز يديه الصغيرة وحاطها جنب فمها كيسول فيها بخوف..
رياض:ايلول مالكي شكون ضربك..
نزل عندها عبيقة مخلوع نوعا ما لي كان واقف وماشافش الضربة ..حاط يديه على ركابيها وجالس على ركابيه..
عبيقة:مالكي شكون دوا معاك..
أيلول:لا لا والو..
عبيقة:واش دوا معاك شي واحد من الدرب..(تعصب )هضري خلاص..
هزات فيه عينيها مغرغرين وداز بين عينيها المشهد كامل ديال باها كيضربها..وتوالاو وراه لقطات اخرا كلات فيهم العصا من عند باها وبدون انذار نزلو دموعها..

شافها كتبكي..معرف شنو يدير فقط بقا كيشوف فيها..دور ليها رياض راسها عندو..ومسح ليها دموعها وعنقها واخة مشيرمل ولكن راه حنين والرجولة من البزولة..مسحات البقايا ديال دموعها ورجعات لبتسامتها وعاود سولها عببقة بفضول..
عبيقة:قولي ليا مالك..علاش هاد الدموع
ايلول:(بابتسامة)والو 
عبيقة:(وقف وربع يديه)اهاه وديك الضربة مالها..ماكانتش فيك الصباح.
نقز رياض كيهضر..
رياض:تتلاقاو بلا بيا 😈
ايلول:ههه صدفة البگوس.
عبيقة:قولي ليا مالك أأيلول شكون لي،ضربك واش شي واحد من الدرب..غير قوليها ليا والله تا ندبح مو من الودن حتال الودن..
أيلول:ههه لا لا عير سخانة هاديك..
عبيقة:(ميل راسو)سخااانة..اه واخة(بعدم تصديق)الله يشافيك 
أيلول:(بابتسامة عريضة)أمين..
عبيقة:بغيت نشري لرياض شي حوايج.تجي معايا..
أيلول:غير من هنا ياك.
عبيقة:اه غير من هاد المحل..
أيلول:وواخة..
شد فيها رياض من يديها وتمشا هو وياها ..
عبيقة:نسيتيني اابرهوش..
رياض:تنسااك الموت الوليد..
رجع هو وأيلول عندو وشد فحتا باه ولا هو الوسط وهوما شادينو..جاو بحال شي عائلة كيوت..
بدات كتختار ليه ..وهي تجي الموضفة هازا فيديها التوني ..شافت معاه ايلول ..تصدمات..خصوصا انها عاطية لعين وتيتيزة ..صفارت وخضارت وتزيرات مدات لعبيقة توني ومشات فحالها..
مد التوني لولدو..وصيفطو يقيصو ويرجع يوريه .ليه..بقاو واقفين كيتسناو فيه يرجع ساكتين معجبوش السكات وبادر عبيقة بالحديت ..
عبيقة:قارية غدا..
ايلول:اه..
عببقة:معاش..
ايلول:10..
عبيقة:ومعاش خارجة..
أيلول:11..
عبيقة:ااه شنو عندك هاد العام..
ايلول:الباااك غير سكت شاداني الخلعة..
عبيقة:ماكاين مناش تخافي..
تفكرات هضرت باها وتهديداتو ليه فحالة سقطات بلعات ريقها وبتاسمات ليه هازة راسهت ومؤكدة كلامو..

بعد مدة رجع رياض لابس التوني..وهاز نيفو لسما تيتعنگر فالمشية..
أيلول:هاي هاي اش هاد التبوگيصة..
رياض:اصلا انا بوگوص..
عبيقة:شكار راسو داز من هنا..
رياض:كيف جاتني الحطة (وبدا كيضور)
عبيقة:زاااز لوز..يالاه سير لبس حوايجك باش نمشيو..

مشا رياض وبقا كيضور هو وأيلول فالمحل كيختارو لرياض لحوايج هو كيهز وهي كتعطيه رأيها ..حتى رجع عندهم ومشاو رجعو لفوطوي...يالاه غادي،يودعوها وهي تجي مها..مارادتش لبال لعبيقة ولولدو..
فتيحة:تي غير قولي ليا فين كنتي أكحلة ليام.أزرگة الكراوع..
أيلول:(عاضا على سنانها)ماما
فتيحة:يااو يعطيك الغمة..ياك قلت ليك متحركيش من هنا..تي دوي فين مشيتي ..الدودة لي فيك مازال مابغات تمشي
نقز عبيقة شاد الضحكة غير بزز كيهضر باغي يشرح ليها..
عبيقة:سمحي ليا الميمة انا لي طلبتها تختار معايا حوايج لرياض..
ضارت عندو وحطات يدها على حنكها ملي،شافتو..مامات أيلول تزعطات..
فتيحة:ياو مزينااااتك دري..(طلعاتو وهبطاتو)
تبارك الله أش كانو كيوكلوك والديك تا طواليتي قد هاكا
أيلول:ويلي مااما سكتي..
فتيحة:(هضرات بشويوة)تي فين تتعرفي هاد الشي كامل..
أيلول:جارنا هادا..أماما..
فتيحة: دخلنا عليك بالله ..تبارك الله..تا بصح جارنا أوليدي!!
بابتسامة مد يديه كيسلم وكيعرف على راسو 
عبيقة:انا عبيقة بصح جاركم الميمة..
فتيحة:ععع عبيقة تا شناهيا هاد عبيقة تاني..
عبيقة:(كيضحك)ههه سميتي 
فتيحة:ومالهم على قلت السميااات يا وييييلي 
أيلول:ماما نعلي الشيطان..سمحليا أخويا عبيقة يالاه الله يعاونك..
عبيقة: وااايلي هانيا..الله يعاونكم ..
جرت مها عير بزز لي غادا وتضور تشوف فعبيقة وهو تيدير ليها باي باي ويضحك ..جر حتا هو ولدو ومشا فحالو...
مشاو لصناك كاين غير تما نيت تغداو وجلسو شوية ضحكو ونشطو وأيلول لهبيلة نسات قتلة العصا لي كلات.. بعد ما كملو غداهه شدو طاكسي راجعين للدار..

وصلهم الطاكسي لدار ..وقبل ماتدخل وتهنى بجوايجها .نكدها عليها باها فالباب..
العربي:مالك شاريا ليها هاد شي كامل ..على نقاطها الزينين..شحال خسرتي فهادشي..
دفعات بنتها تمشي لبيتها ودخلات هي لصالا وتبعها العربي..
العربي:معاك كنهضر..شحال خسرتي فهادشي..
فتيحة:(حيدات شالها)صافي العربي راه لي تخسر تخسر
العربي:الهضرة ماشي دابة الهضرة حتال لخر لعام..بقا ليها شهر وديك ساعة يكون الحساب..
جبداات الحوايج لي شرات وشتتاتهم فوق الناموسية..حيدات حوايجها وبدات تقيص وتحط..
طوات الحوايج فالماريو بعد ما ختارت شنو غادي تلبس غدا..جاها الملل ومشات طلعات فوق الناموسية..كطل من الشرجم حاضية لغادي والجااي وكتشوف فالبنات لابسين تونيات وكتشوف فالدراري وفتحاسنهم الغريبة. هاد أيلول كتعطي للحضية عشرة لضص....حتى تعاشات لعشية وعيطات ليها مها كتعلمها تجي دير كسكروط..
تغدا هو ولدو بالغدا لي جاب معاه من ماگدو ..جمع دغيا الروينة وشنق على رياض حتى هبط شكارتو وبقا معاه كيحفضو ويعاود..طل عليه لقاه نعس..هزو معنقو طالع بيه وكيبوس فيه..حطو فبلاصتو غطاه بليزار مع الصهد ..طفا عليه الضو وخرج ..
عصر قهوة وشد بيها الستون كيتفرج فتلفازة فالصالا ضور عينيه فين كانت جالسة..وهي تجي فبالو أيلول ..بتاسم تلقائيا وملي تفكر هضرت ماماها بدا كيضحك فحال الحمق..وكيقول فراسو مازال يكون بزاااف الحوايج بيناتهم ..
بعد ما دارت كاسكروط طلعات لبيتها حافضات شوية دازو ساعات ومابغاتش تعشا.. مشات لناموسيتها و طاحت بنعاسها..

وجا نهار جديد..
فاق قافز ومخلوع شاف فالساعة لقاها قريبة ضرب 7 بيلا..لاح عليه الغطا ومشا كيجري لبيت ولدو..وكيتفاجئ بيه ماكاينش ففراشو ولي زاد تفاجؤو ان الفراش مقاد ومصاوب فحالا ماكامدن ناعس فيه حد..دخلو للعجب ..مشا طل فالحمامات بجوج والو ماكاينش..نزل كيجري فالدروج..طل فالصالا ماكاينش..قلبو بدا كيضرب والخوف تسلل للداخل ديالو..حتى كيسمع صوت جاي من الكوزينة ..تمشا بخطوات متسارعة..حتى كيلقاه طالع فوق الكورسي وكيغسل فالماعن ديال الفطور لابس الطابلية ولابس حوايجو وماشط شعرو ومفركس..تكا على الباب وبقا كيشوف فيه بحب شي نهار يحمقو هاد الولد..
عبيقة:أحم أحم..
دار عندو بزربة مخلوع..
رياض:خلعتيني الواليد..دير غير الحس أصاحبي
عبيقة:اش فيقك..
رياض:سبحان الله ضرباتني الفيقة طليت عليك لقيتك ناعس ..صافي بدلت وفطرت..راه فطورك فوق الطابلة 
عبيقة:(ضار شاف فالطابلة لقاه موجد كونفليكس وكاس العصير)معجزة هادي رياض فايق بكري..
ريياض:اوا الا جيت نعول عليك بقيت خلا..
عبيقة:أسيدي معندي مانسالك..
رياض:طلع بدل حوايجك واجي وصلني راني غادي نتعطل أعبيقة..
قرب لعندو طلعو وهبطو كان لابس سروال تجينز محكوك من الركابي وكيطمة لاكوسط زرقة وسبرديلة بيضة..واخة عبيقة ماكايبغيش يلبس ولدو السبور فالمدرسة ولكن معندو مايدير الجن ديال رياض دارها بيه ودار لي فراسو..قرب لعندو وعنقو من اللور كيبوس فيه وفرحان بولدو..
عبيقة:(كيبوس)شي نهار ناكلك..
باسو وطلع فالدروج كيجري لبس سروال تجينز زرق غامق وتيشورط رمادي وتجاكيطة زرقة ودار كاسكيط ولبس سبرديلة رمادية..وعاود نزل مدردب فالدروح هاز فكتفو شكارة رياض..خرج هو ولدو وصلو للمدرسة كيوصي فيه ويعاود يبعد من الصداع وخصوصا من العربي أستاذو ديال العربية خصوصا ملي عرفو عبيقة راه بابات أيلول..بقا حاضيه حتى دخل وديمارا فاتجاه الگراج..

فاقت بطلتنا على صوت نگير مها ..تتحلف عليها الا مافاقتش..تكسلات على خاط خاطرها..طلات من الشرجم هو اللول بانت ليها الشميسة والدنيا منورة والجو زوين..استنشقات الهوا..واخة ماكاين بو هوا زين..مشات لطواليط قضات حاجتها وغسلات وجهها بالصابون وحكات سنانها ..خرجات تتنشف فوجهها بالفوطة ..لاحتها فوق الناموسية ومشات لماريو جبدات اللبسة لي ختارت لبارح..حطاتها فوق الناموسية..ومشات كتصاوب فشعرها...

صوبات شعرها ساامبل وخلاتو مطلوق .قادات وجهها بماكياج خفيف لي كان عبارة على. فوندوتان وماسكارا وفاغاجو ماكايبانش بزاف..لبسات حوايجها.تيشورطة ديال گوتشي فالحكل واسعة و سروال تجينز زرق باهت طاي هوت وسبرديلة رمادية..لبسات الطابلية وهزات شكارتها بعد ما قادات فيها كتوبتها ..نزلات فطرات وخرجات كتزرب فالمشية حيت تعطلات..وصلات مع الباب محلول جاب الله كاينة استراحة كون تسد عليها الباب..بقات فالساحة شوية حتى صونات وطلعات لقيسمها ..تسنات حتى عمر لقيسم عاد دخلات باش لبلاصة للي بقاا خاوية تجلس فيها..وداكشي لي دارت لقات كورسي ماقبل لأخير جلسات فيه..تفاديا لشي صداع..دازت لحصة عادية كانت ساعة ديال الفرنسية حاولات تبع ولكن العقل مرة يحضر مرة يغيب. صونات الساعة جمعات كتوبتها وجات خارجة مع الباب حتى كتعكلها مريم برجليها كانت غادي طيح على فمها كون ماشدات راسها. القرودة بداو كيشطحو ليها فوق راسها...ضارت مخنزرة كتشوف فيها ناوية على خزيت. ولاخرة كطلع فيها وتهبط باستفزاز..
مريم:أوبس ماشفتكش..
أيلول:هيا الأخت عاميا..عندي شي نضاضر فالدار ديال جدة الله يرحمها لاببغيتيهم مرحبا وألف مرحبا
مريم:(تقرصت)تشي مالكي شفتك ضسرتي..

أيلول:(قربت ليها حتى مابقا فاصلهم غير سنتيمترات)راه نتي لي شفتيني ساكتة بغيتي تلبسيني بالمقلوب..
(ربعات يديها)ياكما كيصحاب ليك جاية من ورا الجبل..
مريم بقات عير كضور فعينيها خصوصا ملي عطاتها أيلول القاصح..كولشي كان كيسحاب ليهم دمدومة وساهل يحگرو عليها..ساعة طاحو مع أكتر وحدة لسانها سليط كيف كتقول ليها مها لسانك ماضي ودراعك گاضي..بقات غير مبلقة عينيها فأيلول .وأيلول تتخنزر فيها..
أيلول:نهار لي باقا توقفي فطريقي وديري دوك الفعايل ديال البراهش غادي نوريك وجهي لي مازال ماشفتيهش..واخلي هاد الشهر لي بقا يدووز على خير..
قالت ليها هاد جوج كلمات وضارت بجهد حتى ضرباتها بشعرها..حتى بعدات عاد بدات مريم تتعربط وتتحلف عليعا وتغوت..خسرات عليها أيلول فاكيو بصبعها وزادت فحالها كتمختر فالمشية ..الحاصول مريم فيها غير الفم 😁

خرجات فرحانة من ليسي فحالا هم كبير كان على كتافها ونزاح..فرحات ملي مخالاتهمش يحگرو عليها..خارجة والضحكة واصلا لودنيها ..يالاه خرجات مع الباب وغادي ضور شمال باش تشد الطريق لدارهم حتى كيبان ليها عبوقتي(احم احم) فالجهة لاخرة من الشانطي.. جالس فوق الموطور جنب وشاد الكاسك فيد واليد لاخرة شاد بيها التلفون..كان مهبط وجهو على التلفون كيبقشش فيه...طلعاتو وهبطاتو بزربة وغير بالريط..من جلستو الرجولية بامتياز ..وصولا ليدو لي شاد بيها الكاسك معضلة وعامرا عاضلات..نزولا لرجليه لي وحدة حاطها على الموطور ووحدة طالقها..ومرة مرة كيقاد الكاسكيط بيديه..ضربات على الحطة لي جاتو كتحمق..سهات فيه كتفكر اش جا يدير هنا قدام مدراستها(ولاهيلا مكلخة هاد أيلول)..
كيهز راسو على غفلة يشوفها واش خرجات حتى كيتفاجئ بيها واقفة أون فاص ليه لا والزوينة گاع ساهية فيه..هي ملي،شافتو هز راسو على غفلة وشافها كتشوف فيه..دغيا رجعات شعرها ورا ودنيها وكملات طريقهاا..حتى كتسمعو كيعيط ليها..مسكينة ضهشرات ولات تتقول ياكما تنحلم..ضارت عندو بالعرض اابطيئ وهو يدير ليها باي باي ..راداتها ليه..وهو يدير ليها أجي وهو مازال فالجهة التانية من الشارع وبيناتهم شانطي..دورات راسها يمين وشمال ملقات حد..شافت فيه وحطات صبعها جيهت صدرها..زعما واش أنا ..ضحك وهو كيهز راسو إيجابا..تمشات جيهتو بخطوات تقال..وهو راد معاها البال وكيقول ليها ترد بالها لشانطي..قطعات عندو وقفات أون فاص معاه هازا راسها باش تشوفو وحاطة يدها على جبهتها حاجبة بيها الشمس..واخة جالس وباقي طول منها..بتاسمات ليه وبادلها لإبتسامة..
أيلول:صدفة زوينة هادي مالاحضتيش كنتلاقاو صدفة بزاف
عبيقة:(ضحكة جوهرية)ههه لا لا ماشي،صدفة..
أيلول:ها كيفاش..
عبيقة:دابة ماشي صدفة(مد يديه لشعرها مرجعو ورا ودنيها)
يعني جيت على ودك مخصوص باش نشوفك..
أيلول:(مع هبيلة مسكينة وضهشرات)بصح !!حلف يالاه
عبيقة:ههه لا نتي بزاف..
أيلول:ولاش جيتي..
طلع فيها حجبانو فحالا مخنزر..
عبيقة:من نيتك..جيت بغيت نهضر معاك..
أيلول:بصاااح يالاه هضر..
عبيقة:نو ماشي هنا..
أيلول:وفين بسلامة..
عبيقة:ركبي وتعرفي..
أيلول:لا لا أخويا غادي نتعطل ويصدق مجري علي العربي..
عبيقة:ههه وامي كرشي..لا ماغاديش نتعطلو..
أيلول:(بابتسامة )وعد
عبيقة:وعد..يالاه ركبي.بلاتي(دار ليها الكاسك)أمم دابة مزيان..
ركب وركبات وراه ...وانطلق فالوجهة ديالو فين الله وأعلم..وهاد اللقاء البسيط كامل داز تحت انضار العديدات لي كانو حاطين العين والطرمة والرجل على عبوقتي..خصوصا انه معروف على الصعيد الكازاوي..

يتبع ...