وجا صباح جديد..فاق البطل ديالنا أيغد او الملقب بعبيقة..مع 6 ونص على إثر المنبه ديال التلفون..طفاه وخرج من السرير بتكاسل فاتجاه الحمام ..غسل وجهو..وتوجه لغرفة رياض لي فيقو بمشقة الأنفاس..حتى شافو حل عينيه ودخلو لحمام يغسل ويقضي حاجتو..ونزل هو يوجد لفطوور ..طيب أومليط..وسخن لخبز..وجد كونفليكس..وحط كاس لحليب لرياض وعمر ليه هو براد ديال أتاي منعنع..
وجد الطبلة عاد تم رياض هابط.بلباس كلاص كيف كيبزز عليه عبيقة..قميجة كحلة وسروال تجينز وسبرديلة بيضة ..هاز شكارتو فضهرو.حطها وجلس يفطر بسكات..مع كيفيق مگلوب بالنعاس..خاصو مدة باش يرجع ليه المجاج..وداكشي نيت لي كيدير عبيقة ماكايدويهش ولا كيقرب ليه ..كمل فطورهم وخرجو ركبو فالموطور فاتجاه مدرسة رياض..وفالطريق تلاقا مع أيلول..حتى هيا كتر من رياض فايقة مقلوبة بالنعاس كتر من رياض..عيا فيها عبيقة يوصلها مابغاتش..فقرر يخليها على راحتها ..وصل رياض لمدراستو وقلب دوميل روتور راجع لأيلول..لي لقاها يالاه قربت توصل لمدرسة..حتى وقف عليها مقفزها..
عبيقة:كتسهاي بزاف
أيلول:اه شوية.أصلا باقا مضهشرة بالنعاس..
عبيقة:كي بقيتي..
أيلول:شوية.شكرا على لبارح...
جرها من نيفها..
عبيقة:مابيناتناش الخيبة..معاش خارجة..
أيلول:مع 10..علاش.
عبيقة:أوكي 10 تسنايني ملي تخرجي..بغيت نوريك واحد الحاجا
أيلول:شناهي..
عبيقة:صبري على خبزتك
أيلول: اوووف واخا..
عبيقة:يالاه بسلامة حبي..وديها فقرايتك..
ومشا مخليها كتفكر شنو باغي يوريها..حتى وصلات لمدراستها ودخلات اما هو فمشا يقابل خدمتو..
دخلات لقسمها..مشات لبلاصتها لي هي ما قبل لأخيرة..مابقا حد كيدوي معاها .لأنها صافي مابقاتش ديك لبنت الجديدة..راها قدامت..وخصوصا ملي ضارت الهضرة عليها فالقسم بلي هي خطيبت عبيقة ومن لا يعرفه على صعيد درب سلطان وما جاورهما..فقررو يتقيو شرو ويبعدو منها.وفعلا دوزات ديك لحصة كالم بزاف..بدا الدرس شي شداتو وشي ما قفلاتو..حتى صونات ااساعة اللولة وبداو فالساعة التانية عند نفس لمادة...الساعة التانية دوزاتها غير تفكير فعبيقة وفين غادي يديها..حتى كملات الحصة التانية ..جمعات كتوبتها وخرجات ..وقفات قدام ليسي كتسنا فيه بعد ما قلبات عليه بعينيها ومابانش ليها..وغير دازت 10 دقايق وقف عليها بالموطور سلم عليها بلابيز..تحت. نضرات الحضور الكرام..مد ليها الكاسك دارتو وشدو الطريق..
وبلعاني كيكسيري حتى كيحس بضفارها مخشيين فالتجاكيط لي لابس..من. شدة خوفها..
حتى وقف الموطور..ونزلات هي اللولة حيدات لكاسك. هزات راسها..كان الگراج ديالو..دارت عندو بعدم فهم..
أيلول:جيتي تصاوب مطورك..
عبيقة:(جرها من يدها)زيدي الهبيلة زيدي..
أيلول:وا قول ليا...
عبيقة:هادا المحل ديالي جيت نعرفك على صحابي..
غير قال ليها ديك صحابي السيدة عقلها سافر..هرب..طار..طلقات من يدو راجعة اللور..
عبيقة:مالكي..
أيلول:والو ..(بتردد)بغيت نمشي..
عبيقة:(كيضور السوارت فيدو)وعلاش بالسلامة..
أيلول:ها..لا لا والو غير خفت نتعطل..
سكت لتواني وشاف فيها ممصدقش...
عبيقة:نو..متقوليش ليا عقلك مشا لداكشي..نوووو
أيلول:(دافعة الجبهة)أشمن شي فشي..
عبيقة:بربي معندك گرام ديال العقل..
أيلول:وعلاش مالي..بنت ليك كنضرب بالحجر..
عبيقة:أنا معنديش عائلة..وهادو لي خدامين معايا كتر من عائلتي..داكشي علاش بغيت نعرفك عليهم..
تمشاو فوسعة كبيرة..غادا وكضور فعينيها..فالماطر غير الفريع والواعر وبلاكارات ديال الزاج مستفين فيهم قطع لغيار ....هبطو فالدروج طوال حتى لقات راسها لاكاب .. لقاو محل خاص بالميكانيك..بقات غير كتشوف وكتمارس هوايتها المفضلة لي هي التبرگيگ..حتى قفزات تاني ملي سمعاتو كيعيط..بصوتو لغليض..
عبيقة:سيمو...وا سيمو..أفينك أصاحبي..
جاي من بعيد كيمسح فيديه من لاگريس بشيفونة وكيهضر بجهد
سيمو:أمالك أصاحبي..هانا كنت ملهي فواحد السونطروا كنبقشش فيه..
عبيقة:أيلول هادا سيمو صاحبي..سيمو هادي أيلول المدام إلا كتاب..
مد يديه ليها حشمان منها مع يديه مسخين..سلمات عليه بدون تردد..متبادلين الإبتسامات..
سيمو:متشرفين أختي أيلول..
كتافات بإبتسامة..
عبيقة:فين الدراري..
سيمو:لبوز ديالهم هادا..غادي يكونو تيشربو قهوة..
عبيقة:أيلول نمشيو عندهم..
أيلول:نمشيو..
جرها من يديها طالعين فالدروج..رجع لنفس لبلاصة لي دخلو منها ولكن هاد لمرة ضارو على ليمن..كان فطوي كبير فالكحل جالسين فيه 4 ديال الدراري..غير شافو عبيقة وشافو معاه الزايد بداو تيضورو فعينيهم.خصوصا ان هادي أول مرة يجيب معاه شي بنت لمحل ديالو..
عبيقة:ها واحد السلام عليكم..
الدراري:السلام عليكم..
عبيقة:هادي أيلول..خاطيبتي..أيلول هادا عصام..
عصام:متشرفين أمرات البوص
عبيقة:وهدا مراد..
مراد:متشرفين أختي..
عبيقة:وهدا أسامة..
اسامة: متشرفين مرات خويا..
عبيقة:وهذا..
مجا فين يكملها..حتى نطقو كاملين معاهم حتى عبيقة بصوت واحد..
جر السيمو ومشا مخليها مع الدراري..كيتيق فيهم وعارفهم مايشوفوش فالحاجة لي ديال خوهم..
تيشوفو فيها فحالا جايا من الفضاء ..تاهيا كتشوف وكتبرگگ فيهم واحد واحد مربعة يديها لعند صدرها ..الصراحة تقال. عندهم حقهم من الزين وإيهاب هو التيتيز فيهم .
فكوزينة صغيرة كاينة نيت فالگاراج..كيجبد عبيقة العصير من التلاجة..وكيكبها فكاس..وعلى راسو واقف سيمو..
سيمو:بصح كتبغيها..
عبيقة:ماعارفش راسي واش كنبغيها ولا لا..المهم ولفتها ومادا بيا تكون حلالي حيت بصح باغيها ليا..وغادي تكون..
سيمو:والحب فينهوا..
عبيقة:يجي من بعد.حنا يالاه بدينا..مازال قدامنا الوقت
سيمو:باينة فيها ضريفة..
عبيقة:ضريفة وزوينة وهبيلة وقلبها بيض كلشي مجموع فيها..
سيمو:اوا الله يدومها..
عبيقة:أمين...
هز الكاس وخرج ..متوجه لفين كاينة أيلول..لقاها واخدة راحتها كيكركرو ..كيعاود ليهم مراد النكت مع أصلو مراكشي..فيه التقشاب سها فيها هو هاد المرة وسها فضحكتها لأول مرة يشوفها..تنهد .. ومشا حط لكاس فوق الطابلة وجلس حداها مرجع يديه ورا ضهرها..وهوما ضايرين بيهم.. كيضحكو ويكركرو دغيا نساجمات معاهم ..نسات مشاكيلها فهاد الجلسة ونسات لعربي ومايجي منو..وهذا هو هدف عبيقة ملي جابها لهنا..ماكانش عندو لغرض يعرفها عليهم كتر ما كان هدفو يضحكها حيت عارفهم سبيطار..
ضربات 11 ونص ..سلمات عليهم مواعداهم تعاود الزيارة ..ركبو فالموطور وصلها لراس الدرب حطها وتسناها حتى دخلات عاد مشا يجيب ولدة..وماشي غير عبيقة لي كان حاضيها..عيون حاقدة كانت مراقباها..
دخلات لقات غير ماماها فالدار.
خوها وباباها مازال ماجاو من المدرسة..سلمات على ماماها..وطلعات لبيتها..جبدات كتوبتها وبدات كتخرج شي تمارين عندها فالعشية..حتى سمعات ماماها كتعلمها تجي تغدا..خلات الكتوبة جنب وناضت تغدا..مشات لصالا لقات خوها وباباها جاو..جلسات قالبة وجهها..كلات بزربة..وناضت فحالها ..بقا العربي غير كيشوف ويخنزر..
العربي:(كياكل وكيهضر)ضسرات هاد البرهوشة..
فتيحة:نتا ضاربها وبغيتيها تجلس معانا فالطبلة..
العربي:بلا متوحليها ليا تاني..كولي وسكتي..
فتيحة:هانا سااكتة..
دخلات لبيتها كملات التمارين..شافت فالساعة لقاتها قريبة ضرب الوحدة..ناضت سدات الشرجم والباب..حيدات حوايجها بقات غير بدوبياس زرقين..حلات لماريو وجبدات كسوة كحلة لاصة تحت الركبة ماكتبينش فخاضها يعني ماطويلاش بزاف وماقصيراش بزاف مع تجكيطة تجين زرقة وسبرديلة بيضة..وصاك كحل جمعات فيه كتوبتها وجمعات حتى التلفون..طلقات شعرها وداارت ميكياج خفيف وخرجات..نزلات فالدروج ومشات عند ماماها لبيت لتحت كان حتى العربي تم..علماتها بلي غادي تمشي تقرى..وخرجات..
هنا أيلول عاد تفكراتها ودارت ليها طرن بلي هادي هي نفسها لبنت لي جات عند أيغد هاديك الليلة ..إيلا عقلتو عليها سميتها سارة..بدات كدي فشعر أيلول وتجيبو وتسبها غير من السمطة لتحت..معا هي عودة تبارك الله تكرفسات عليها..والدنيا خاوية تما ماكاين لي يفك ..ولو يكونو الناس تم..ماكاين لي يفكها..عيات تراما ليها حتى هي لشعرها ولكن ماوصلاتش. ...زيرات ليها على شعرها حتى تهز وجهها..وجمعات معاها بتصرفيقة اللولة. حتة سال ليها الدم من نيفها أيلول الضبابة بانت ليها ديك الساعاة..هزات يديها لمرة لتانية كتستاعد باش تعطيها التصرفيقة التانية..حتى كتجر بالجهد راجعة اللور ..
.هزات يديها لمرة لتانية كتستاعد باش تعطيها التصرفيقة التانية..حتى كتجر بالجهد راجعة اللور ..طالقة أيلول لي كانت غادي طيح على وجهها. كون ما شدها عبيقة فاللحضة الأخيرة ..مجلسها فالموطور ..ماشافش لوجهها..
ورجع لسارة لي كانت طاحت فالأرض كتسوس فحوايجها ..ماشافتش گاع عبيقة لي جا..أما كون هربات ..شدها من كتفها مضورها عندو بجهد... لي غير جات عينيها فعينيه..شداتها البولة..خصوصا عينيه الخضرين لي خباتهم الحمورية..
سارة:ععع عبيقة انا ..
قبل ما تكمل هضرتها قاطعها بتصرفيقة خلطات ليها نيف مع الفم..
أيلول:كون مكنتيش كتعرف فحال هاد لأشكال ماكانش غادي يطرا ليا هاكا...اون بليس نتا إنسان عندك ولد ماكانش عليك من اللول دخلها لداارك..لنفترض كون دخل رياض هاداك النهار وشافكم اش تديرو...
عبيقة:(بابتسامة)على شنو كونا كنديرو.
أيلول:دااكشي لي كنتو كديرو..
عبيقة:وشنو ..قولي ليا..
أيلول:احم والو..نسااا هاد الموضوع..
قرب وشد ليها يديها بجوج مقربهم من فمو..باسها فكف يديها بجوج..
عبيقة:سمحيليا...
أيلول:(ضهشرات) ها لا ماشي مشكل..عادي والله..
عبيقة:يخلي لي الحب..
جاب ليهم السرباي الماكلة..ومع هي تتحشم فالمااكلة ..كلات حتى تگرعات..كياكلو وكيهضرو..خداو تصاور مع بعضياتهم ..ورجعها لمدرسة..
رجعها لمدرسة..وهي كتشوف فيه مستغربة..
أيلول:لاش رجعنا ليسي..
عبيقة:والغياب لي غيبتي..شكون غادي يبررو..ياكما كتسنايهم يعيطو ليك على العربي..
شهقات بخوف من أن باباها يعرفها غيبات..مد ليها يديه ..ترددات فاللول وشدات فيه قدام أعين البنات والولاد لي مجموعين تما..هضر مع الحارس ديال الباب حل ليه..ومشا لإدارة وهو مازال قابط ليها فيديها..
لقاو الحارسة العاامة جالسة فالبيرو ديالها..شافتهم مشادين من اليدين ستغربات..
عبيقة:السلام عليكم..
الحارسة:وعليكم السلام..كاين فاش نعاونكم..
عبيقة:(مد ليها يديك)ايغد المنصوري..خطيب ايلول..
الحارسة:متشرفين..
عبيقة:بغيت نبرر ليها واحد الغياب..
الحارسة:(فتحات الملف)اشمن قسم..
أيلول:تانية باك علوم انسانية 2 ..غيبت ساعتين المااط..
الحارسة:اممم شنو سبب الغياب..
عبيقة:مشينا نختارو الخواتم...
الحارسة:اااه الله يجعل كولشي مبارك ومسعود...بنتي ايلول متبقايش تغيبي بزاف..خصوصا هاد العام مصيري ليك..
أيلول:كوني هانية...
عطات الملف لعبيقة سنا وبرر ليها الغياب..وخرجو تيضحكو..عاجبها راسها..خارجة نافخة ريشها على البنات لي تما..عطاها لكاسك وركبت وراه..تحت انضاار الجميع..أصلا غير داك الصوت لي كيدير الموطور كيخليك تشوف فيه وتبعو بعينيك بلا هواك....
حطها فراس الدرب وقلب الضورة..شافت الساعة فالمگانة لي فيديها لقاتها 4 و10 دقايق ..جاتها مزيانة الا سولوها اتقول خرجات مع 4 ..
رياض:تي مالك تتقفقفي عليا...عادي اصلا..انا ماشي من دوك المكلمنين..لي نحرمها عليكم..غير هو تهلاي ليا فعبيقة راه هو لي عندي..
أيلول:كون هاني
..يالاه تلاح فيا لهيمري..
رياض:تشاو أمرات الواليد..
باستو فحنكو ومشات تضحك..غير دخلات سلمات على ماماها وطلعات لبيتها..
طلعات لبيتها..سدات الشرجم..حيت مقابلين معاها الديور..يقدرو يشوفوها وهي كتبدل..دوزات حتى لخامية..وحيدات حوايجها بقاع غير بالسليب..حيدات الضوني والسوتيامات وهي طيح 20 درهم...هزاتها كتسأل..قلبات الجيب ديال السروال لقات 20 درهم تاني..هازاهم كل وحدة فيد..وكتشوف فيهم منين جات التااانية..بعد معاناة مع التفكير..عاد عاقت بالبلان وبشنو وقع ليها..وبلي اصلا لي عطاها باها ماطاحتش..خشاتهم بجوج فالمجر لي فالكوافور لي حدا راسها ..ولبسات بيجامة..ومشات كطل من الشرجم..شوية تحل لباب ودخلات ماماها..
فتيحة:بنتي ليا ماشي هي هاديك
أيلول:علاش مالي..
فتيحة:موالفة غير دخلي لدار ..تبداي تنبحي على الماكلة...اش جاك دابة؟؟
أيلول:لا لا فيا الجوع...(تگرعات)الحمد الله..
فتيحة:واالكلة...فين كليتي الخانزة..
أيلول:شريت غير بوكاديوص بديك 20 درهم لي عطاني لعربي..
كملات ماكلتها على خاطر خاطرها..ومشات تخشات فالصالا مقابلة التلفازة..كتفرج فمسلسلها "حب للإجار"...حتى قرب يسالي وهو يدخل العربي ..غير شافتو طفات التلفازة وناضت فحالها..بقا غير كيخنزر..ومشا شعلها تاني..وجلس تيتفرج فالأخبار..اما أيلول سورتات عليها باب البيت..وجبدات تلفونها..دخلات لواتساب..جبدات نمرت أيغد..لي مدخلاه ب عبوقتي❤
وخرجات من الواتساب طارت لماريو جبدات ديك السقاطة لي جاب ليها عبيقة حطاتها حداها مدوزة بيها الوقت ..
..ومشات ليوتيب..كتفرج فالفيديوات..دازت ساعة بالتمام والكمال..حتى كيصوني ليها التلفون..وشكون من غيرو..عبوقتي احم احم بغيت نقول عبوقتها..جاوبات مخرجة راسها من الشرجم..
عبيقة:واش الحب..
أيلول:شفتي الواتساب..
عبيقة:شفتو..الواتساب نور العمر..
أيلول:(ضحكة عذبة)ههه شفتي التصويرة...
عبيقة:شااافتها..خاصنا نزرروها ملي ولدات...
أيلول:أيييغد كطنز عليا...
عبيقة:حاااشا الحب...
أيلول:أصلا عقت بيك..نتا لي حطيتيها تما..
عبيقة:نووووو..
أيلول:نتا...غدا نرجعها ليك...
عبيقة:ترجعيها..نهرس ليك رجليك...
أيلول:ياك ..
عبيقة:يالاه اعويناتي تهلاي..حتال ليل ونعيط ليك..
أيلول:تهلا فراسك...
وقطعات المكالمة ورجعات ليوتيب..
رجعاات ليوتيب كتفرج فلفيديوات ووالأغاني حتى تقاضات ليها الكونيكسيون وتقاضات ليها السقاطة..عاد خرجااات من لبيت ومشات لصالا لقات العربي خرج يصلي لعشا...رجعات لبيتها هزات تجاكيطة وخرجات قدام لباب جالسة فالعتبة تتبرگگ ..ولبنت لي دازت من حداها كتتضربها ليها بتخنزيرة دايزها لكلام...بسيف والخباار دارت فالدرب بلس عبيقة وأيلول كيبغيو بعضياتهم حتى هي ماشي من العاگزين مع عارفا عبيقة قاطعها فيهم تضربها ليهم بدل تخنزيرة .جوووج😒 ..
جاب الله العربي ممعاشر مع حد فداك الدرب أما كون وصلات ليه سخونة كتفرفر...
حتى أدن العشا..وبانو ليها الناس راجعين من الجامع..علد نعلات شيطان ودخلات فحالها خوفا من العربي الا لقاها خارجة..مشات نيشان لكوزينة مجمعة مع ماماها حتى طاب لعشا ..ونيت كان باباها جا ..تعشاااو وناضت بزز جمعات الطبلة وغسلات لماعن..
وطلعات لبيتها تخشات ففراشها. ولات كيف الحنش تاكل وتخشا فبيتها..دخلات نيشان لشرجم لي ولا هو المتنفس ديالها .هو لي كايفاجيها عليها ..سهات وسافرات فلخيال ديالها وهي كتشوف فالنجوم لي يالاه بداو كايبانو وبداو كيزينو السما...
حتى وصلات بخيالها لباك وتفكرات بلي عندها الوطني ..دغيا نقزات من الشرجم..وشتات كتوبتها وبدات زعما كتحفض فينما تبغي تحفض وتركز كتلقا راسها سااافرات وسهات مرة فعبيقة وفين غادي تكمل قصتهم..ومرة فالعربي وعلاقتها بيه...وكتحاول تستعيد تركيزها ولكن والو بدون جدوى ..بقات هاكاك مقاتلة مع عقلها حتى سمعات تلفونها كيصوني ونيشان عرفاتو شكون ...دارت من ناقص من الحفاضة ومشات سدات لباب وتخشات ففراشها عاد جاوبات..
تخشات ففراشها عاد جاوبات...
عبيقة:عويناتي توحشتك..
أيلول:بزربة توحشتيني..
عبيقة:وكتر ما تخيلي..مكرهتش كون كنا مجموعين فسقف واحد..انا ونتي ورياض ونكونو أسرتتا الصغيرة ..
ومشا كيقاد فشي كراطن فيهم المسائيل ديال العيد ميلاد...حتى ريگل كولشي وتأكد من الأمور عاد طلع فحالو لبيتو دوش بالما داافي...
وخرج لابس بوكسر گرونة وإيكسا بيضة..وتلاح على كرشو بنعاسو ..
فاقت الصباح مع 6 بعد ما فيقاتها فتيحة بالموال الصباحي غسلات وجهها ..ولبسات توني گري مع سبرديلة بيضة...جبدات شعرها لقوق شفنجة..دارت غير إيكخون وماسكارا ...
هبطات. فطراع عرگتها مزيان عاد شدات الطريق لمدراستها ...
أما حبيبنا عبيقة..فمفاق حت ل 10..تهنا من لفياق ليوم..حيت رياض حلف ليمشي لمدرسة بحجة ليوم عيد ميلادو وماخاصوش يقرا خاصو عطلة كيف قال...غير حل عينيه..صيفط ميساج لأيلول فواتساب...
💌صباح النور عمري 💙
ومشا طل على ولدو..لقاه مكرشخ على كرشو طايح كومة..ولغطا مليوح فالأرض...مشا بشوة باش ميفيقوش حل عليه الشرجم على الصهد ولكن خلا الخوامي باش ميفيقش...وهز داك الغطا حطو جنب ..ونزل فحالو لكوزينة كيوجد لراسو لفطور...طيب أتاي منعنع ..حط لخبز ولبتيبان سخنو ..وزبدة العسل ..الزيتون .. شعل گارو وجلس تيفطر مع مخو مكونسونطري مع لكاس ولكارو ..حتى كمل وغسل لماعن لي كلا فيهم..تسنا 5 دقايق حتى جات لمرا ديال الميناج وصاها على رياض وعلى فطورو مد ليه 200 درهم ..وطلع لبيتو لبس شورط وكيطمة ديالو گرونة..دار كاسكيطة قلبها ..نزل فالدروج وخرج فحالو يقضي أغراضو..
ركب فالسكوتر وديمارا فاتجاه الكراج.. سلم على الدراري قابل شوية لخدمة وراقبها..وخرج فحالو بعد ما أكد عليهم لموعد..
..وقف فباتيسري كان ديجا مضومموندي فيها على الگاطو خلصو وخرج حطو قدامو وديمارا بشوية خايف لايتقلب الكاطو وتريب لحفلة ....
بعد مشقة لأنفاس وصل لدار نيشان لتلاجة حط فيها داك الگاطو..وضور عينيه على لكوزينة بانت ليه كتشعل ..كذلك فالصالا دنيا نقية..مابانش ليه رياض عرفو ايكون فبيتو..وفعلا لقاه تيقيس فالحوايج..قاليك معندو مايلبس فالعيد ميلاد..شاف حتى عيا هز ولدو وخرجو لمول يشري ليه لي خاصو...
ركبو فالموطور كيف ديما رياض لقدام فحالا هو لي سايق وعبيقة وراه...حتى وصلو لمروكو مول..
بلاصا الموطور وطلعو فالسانسور لطابق لخاص بملابس الأطفال...دخلو لأول محل جا فطريقهم.. خلا رياض يختار لي عجبو وبقا هو تابعو ...
هز عليه عبيقة داكشي وتوجهو لاكيص..خلص وخرج فرحان بحوايحو الجداااد...👞👔
ركبو تاني فالموطور وتوجهو للدرب ولكن قبل وقفو قدام صالون لحلاقة الرجاال..مولفين كيحسنو عندو...جلس كل واحد فيهم فكورسي..وجا لحلاق حسن لرياض هو اللول قاد ليه تحسينة نااضية جات ليه مع وجهو ..زادت بوگصاتو ..حتى كمل ليه عاد مشا لعبيقة حسن ليه شوية الجناب وخلا لفوق...عاد قاد ليه اللحية وطراسها💇..خلصو وشدو الطريق تاني للدرب...
غير دخل طلعو نيشان للدوش..تعراو ودخلو فدقة عامو من الزغب ديال لحسانة..وخرج ملوي ففوطة ..وهاز ولدو مكمشو ففوطة اخرة..بدل ليه هو اللول على لبرد..شافو كيگمع بالنعاس..غطاه وخلاه ينعس فبيتو..ومشا لماريو لبس بوكسر كحل وشورط زرق مع كيطمة بيضة..👕
نيشان نزل لصالا نفخ النفاخات وعلقهم ..وقاد الصالا على حقها وطريقها.... لاح فوق السدادر بالونات كبار على شكل رقم 7 نسبة لسن ديالو...ومشا لكوزينة شاف واش كلشي هو هاداك...حتى تأكد بلي حتى حاجة ما خاصا ...عاد مشا لبيتو تلاح حدا ولدو..حيت باقي لحال على لعيد ميلاد...دوز نمرت أيلول وكيتسناها تجاااوب..حس براسو توحشها حيت النهار كاامل ماشافهاش ومدواش معاها...فحالا شي حاجة ناقصاه...
كانت فديك لوقت فلقسم ملي بدا كيصوني عليها عبيقة..كانت حاطا التلفون فالسوتيامات فصدرها...بدا كيڤيبري وبدات حتى هي كتڤيبري معاه..عارفاه غير أيغد لي كيصوني،حيت هو الوحيد لي عندو نمرتها ونمرتو هي الوحيدة لي كضور فتلفونها....ستأذنات من الأستاذ تخرج بحجة غادا لطواليط..تعكس معاها فاللول وقال لا ..ملي شافها كتنقز وكتلوى كيسحاب ليه غيرر مزيرة من البولة ..وخلاها تمشي أما هي فللأصل غير الڤيبرور لي داير ليها هاكاك...غير قاليها الأستاذ:
"نوضي خرجي ..لاتصدقي طالقاها ليا هنا فالقسم"
بدا كولشي كيضحك وشكون تصوق ليهم..ناضت طايرة كتجري حتى وصلات لطواليطات عاد جبداتو من صدرها وجاوبات...
أيلول:ألو أيغد..
عبيقة:ألو حوبي...صافا..
أيلول:الحمد الله ونتا !!
عبيقة:بيخير الحمد الله...فين راك...
أيلول:فالمدرسة..خرجت من للقسم باش نجاوبك...
عبيقة:وايلي(بعد التلفون من ودنو وشاف فالساعة لقاها 5:30) على نتي باقا فالمدرسة..
حتى صونا الجرس معلن على نهاية الحصة..جمعات كتوبتها فصاكها وخرجات غادا فالطريق وكتخطط كيف غادي الدير تخرج من الدار هاد الليلة..عندها مهمة صعبة وان صح القول مستحيلة..حتى وصلات لدربهم..نفس السينايرو كيتعاود..التخنزير والنضرات المحتقرة ليها ..الحض وقف فصاليحها ملي رتابطات مع عبيقة أما كون هنشروها بنات درب سلطان وملقاو مايجمعو فيها...
حيدات سبرديلتها وحطاتها فالبلاكار الخاص بسبابط.. طلات على ماماها لي كانت فالكوزينة وطلعات لبيتها باغا غير تلاح بقوة لعيا..لاحت الشكارة مع الدخلة ديال لبيت لينعل بو لقرايا.. وتلاحت على كرشها فوق الناموسية..حتى ردات النفس عاد ناضت لماريو كتبقشش فيه على شي حاجة مناسبة وأنيقة وفنفس الوقت زوينة وتجي معاها باش تحضر بيها للعيد ميلاد...
فرعااااات لماريو كامل بجيهاتو بتلاتة..كتشوف غير بعينيها مابانت ليها حتى حاجة وهي تهبط لحوايج كاملين فالأرض..كتهز لبياسة تشوفها وتلوحها وراها ..والو ملقات متلبس ..تأفأفات بغيض ..من حيلتها كتقلب على ماتلبس ومن حيلتها تاني خاصها السبة لي غادي دير باش تخرج..خلات لحوايج هاكاك منتورين مغطيين لأرض وخرجات من لبيت طلات على لعربي بان ليها شاد التلفازة..وهي تنزل عند ماماها بالسلتة لقاتها كتطيب فالعشا جلسات فصالا مونجي حطات. يديها على حنكها وبدات تفكر حتى شوية بدات كتبكي وتنحط نحيط..الشيء لي خلا ماماها ضور مفزوعة ..حيت ماشفتهاش ملي دخلات لكوزينة...قربات لعندها مخلوعة وهي مازال هازا لمغرفة فيدها...
فتيحة:(كتخبط ليها على ضهرها بحنان)ششش سكتي وقولي ليا مالك الزغبية..
أيلول:(سكتات) نقوليك...
فتيحة:قولي...
أيلول:بغيت نمشي لواحد لانيف...
فتيحة:شناهي هاد لانيف تاني..
أيلول:عيد ميلاد أماما..
فتيحة:اااااه وإمتا ؟؟
أيلول:اليوم...
فتيحة:نعم إيييه يا روح امك...
أيلول:ومالكي افتيحة مالكي تعاملي معايا عفاااك.
فيحة:لا لا لا...
أيلول:ماما عفاااك.عفااك
فتيحة:ها انا بغيت وشنو غادي ديري مع باباك...
أيلول:ماغاديش يعرف...
فتيحة:لا نتي باغا تخلي دار بويا...فين بعدا هاد لعيد ميلادد...
أيلول:غير هنا فالدرب ...عيد ميلاد داك الفنيكيش.(مها غير كتشوف فيها)ريااض...
فتيحة:منعرف لجد بوه لكلب...
أيلول:صافي تخليني نمشي...
فتيحة:(تنهدات)واخا ابنتي غير خليها على الله وصافي...
نقزات على ماماها تتعنق فيها فرحانة ...
أيلول:يخليك ليا اتيتيحتي..💙
وطلعات كتجرري لبيتها تانني ..بقوة الحماس والفرحة تفكرات واحد الشاكوش فيه شي حوايج من الخاريج كان صيفطاتهم ليها خالتها مليكة من الطاليان معاهم شي كساوي..مع متتلبسهمش خلاتهم فالشاكوش مجبداتهمش...طارت لعند مها سولتها على الصاك...نعتاتو ليها كان فالسدة لي فالبيت ..تعاقرات معاها حتى هبطاتها وجراتها لبيتها..حلاتها وبدات كتجبد حتى طاحت فكسوة كحلة بالكمايم حد المرفق مع كول ولكن فيه فتحة الوسط كتبين الصدر..فوق الركبة بشوية مع حزام فالخصر ذهبي..جبداتها كاملة مكمشة وفيها الغبرة ...خرجاتها من الشرجم نفضاتها مزيان حتى مابقا فيها والو ..جبدات لمصلوح وصلحاتها ورشات عليها الريحة...حتى ولاتكتبان يالاه خارجة من البوتيك..بتاسمات برضى ورجعات لداك الصاك كتقلب على شي صباط حتى لقات بزز و ب66 كشيفة صباط حكل طالون رقيق معاليش بزاف مع نتوما عارفين دوك الصبابط العوجين لي كييصيفطو لينا صحاب جوج عام ماجيت لمغريب...هاداك الصباط لي لقات النواور وكيبان عاطي لعين
...خدات الزيت ديال الشعر دارتو فقطن ومسحات بيه الصباط حتى ولا كيلمع...حطاتو جنب وجمعات داك الشاكوش حطااتو جنب..والحوايج لي جبدات من الماريو كوراتهم ورجعاتهم ليه مافيها لي يطوي شي حوايج...
الحوايج والسبة باش تخرج دبرات فيهم اوا والكادو اش دير فيه.تنهدات فحالا هازا هم الدنيا والدين..مع الهزة لي غادي تهز راسها بان ليها توني ديال الرجاء معلق فكادر فالحيط..ومسيني عليه جميع اللعابة
..كانت ربحاتو ملي تخاطرات مع ولد عمها نسيم وخداتو ليه كجائزة خلاتو كيبكي عليه مع هو من عشاق فرقة الرجاء ..اما هي ماتتحمل لا راجا لا وداد..طلعات فوق الكورسي وجبداتو ..حيداتو من الكادر باقي جديد ونقي ..حطاتو فوق الناموسية
طارت للباب سورتاتو ومشات جبدات التلفون ودوزات نمرة عبيقة لي كان فالكوزينة كيقاد هو وسيمو لي جا يعاونو ..صونا تلفونو لقاها أيلول خرج من الكوزينة عاد جاوب...
عبيقة:الو حبي..
أيلول:الو..ايغد بغيت نسولك رياض ودادي ولا رجاوي؟؟
عبيقة:رجاوي حتال موت احبي علاش...!!
أيلول:لا واللو يالاه بسلامة ..
عبيقة:اجي بعدا واش جاية ولا لا ؟؟؟..
أيلول:وانا نقدر منجيش..
عبيقة:لعز..
قطعات المكالمة وبتاسمات برضى كأن داك الهم نزاح عليها..مسحات لكادر من لداخل من الغبرة ورجعات ليه التوني(كيطمة) طواتو بطريقة احترافية ..بقا ليها دابة غير بابي كادو..مشات لبيت معاد قلبات فالمجورة ولقات واحد مطوي فالحمر لمااع اش كان كيدير بيه الله وعلم..
غلفات الكادر وقاداتو على حقو وطريقو وحطاتو جنب حدا الكسوة والصباط...ورجعات كتفكر فشعرها وشنو دير ليه والماكياج...
وطلعات لبيتها عاودات شعرها بالسوشوار خلاتو هابط رطب ..لبسات لكسوة لي بينات ليها شوية صدرها ممعيقش بزاف جاتها زوينة مع فصالتها ..عاد جبدات لماكياج قربات لكورسي لمرايا وبدات تترسم فالتربية ااتشكيلية...بدات بفوندوتان خبا ليها العيوب ديال وجها مع بودر وفاراجو قهوي وأيلاينر رقيق لي حلف مايتقاد ليها فحال الناس مسحاتو شي 6 لمرات عاد صدق ليها بعد معاناة جبدات عينيها بماسكارا ..مع عكر گرونة رسماتو على فمها جاها خطير ..قلبات لقصة على جيهة وحدة ونفخاتها مخلياها مطلوقة هابطة على جبهتها...
رشات ريحتها لي شاريها ب 30 درهم من طنجة لبسات الطالون لي جا مع اللبسة ..شافت راسها فالمرايا كولشي هو هاداك وجات من أشياء بسيطة وقديمة زوينة وخطيرة...خدات سيلفيات قدام لمراية ..
و مشات هزات جوج مخدات حطاتهم فناموسيتها وغطات لفراش بعدات جوج خطوات لور بان ليها داكشي ممقنعش ..مشات لدوك لمخاد وقاداتهم حتى ولاو كيبانو فحال بنادم ناعس..جبدات ليزار من الماريو تلمدات بيه كاملة بحال لحايك مدرقة حتى وجهها ..هزات لكادو وحيدات الساروت من الباب ..خرجات راسها بان ليها الكولوار خاوي..خرجات بزربة سورتات باب بيتها باش حتى الا جا شي حد ليه بليل يلقاه مسدود وخشاتو فصدرها مع الساروت ديال الدار ونزلات كتختل فالدروج مرتاحة من واحد الناحية ان ماماها فخبارها..
حلات باب ديال الزنقة الدنيا خاوية شوية..مشان تطرطق فطالونها كتبان بداك الحايك والطالون فحال شي قح***بة مخبية..حتى وصلات لدار عبيقة ودقات كتسنا فيهم يحلو لباب وكتسمع فالموسيقى والزدحة ...
ملمدة كاملة فداك ليزار مغطية حتا وجهها مخلية غير عينيها كيبانو ..والكادو حاطاه تحت من باطها..كايبان غير الطالون..عاودات دقات وصونات كتر من مرة والو ماجاوبوهاش حتى لمرة اللخرة عاد تحل لباب كان عبيقة لي حلو ..بقا كيشوف فيها وكيحاول يعرفها حتى حيدات اللتام وهو يتشتت فالأرض بالضحك..جابت ليه التمام فديك اللحضة ...هي غير كتشوف فيه كيف تيضحك عليها ومرة مرة كضور راسها لجيهت دارهم...
أيلول:كملتي الضحك وحيد خليني ندخل لايصدق خارج شي واحد من دارنا..
عبيقة: ههه والله حتى نتي علام.(بعد من الباب)دخلي دخلي..
ضار عندها يشوفها اش بغات ..مع الضورة مع تشوكا..طلعها وهبطها بإعجاب ماشي بشهوة بنضرة حب بريئة...
عبيقة:أوووبا...
أيلول:(حشمات) مالك ..
عبيقة:جيتي زوينة...(سكت)زوينة بزاف...
أيلول:ههه شكرا.. فين هو رياض
عبيقة:راه لداخل..تفضلي أمادموزيل...
خدا من عندها داك ليزار وخشاه فالبلاكار لي حدا الباب ..هزات لكادو من الأرض ..و دازت قدامو غادا وكتهبط فللكسوة واخا هي فوق الركبة غير بشوية...تمشاو على طول لكولوار حتى وصلو لصالا ..
كانت عامرة شوية حاضرين غير الناس المقربين ..كان سيمو هو وصاحبتو و إيهاب حتى هو وصاحبتو ومراد جايب معاه مراتو وأسامة مع خطيبتو ..وكاينين وليدات صغار وبنات كيقراو مع رياض ...الصالا مزوقة بطريقة كلاص وزوينة وعاطية منضر زوين...
غير وقفات فالدخلة ديال الصالا جا عندها رياض كيجري عنقها من رجليها مع طول منو ..فرحان حيت جات...
نزل من عندها ومشا يلعب..تمشات هي وعبيقة وسلمو على الدراري لي فرحو ملي شافوها وسلمات حتى على عيالاتهم.لي كانو ضريفين ..ومشات هي وعبيقة شدو سداري كيهضرو وكيتناقشو ..
أنقذوني عبيقة كيبغيني الجزء الرابع
محتوى القصة
التنقل بين الأجزاء