صورة مصغرة لـقصة أنقذوني عبيقة كيبغيني

قصة أنقذوني عبيقة كيبغيني

qisat 9isat
رواية أنقذوني عبيقة كيبغيني

دخلات كي العجااجة كيف عادتها لاحت الشكاارة فالبااب السبرديلة ماحيداتهاش دخلات بيها حتال الصالون شعرها واقف لسما وحوايجها معنكشين تقول كانت كتجاهد...داخلة وكتنكر..
**:تفووو قهرني الطوبيس يخ على نهار كيداير
الأم:أديك عوجة الفراقش ياك تنقول لمك حيدي السبرديلة فالباب..حسن عوان هادا لي غادي يديك
**:من نيتك الوليدة حسن عوانو ..هادا لي غادي يديني مزغرتة عليه مو وراضيا عليه
الأم:اه مزااااغرتة عليه..ياوأنا أش بغيت ليك ..بغيت ليك غير طيارة المغرب تهزك متحطك..
**:(هزات يديها لسما) أميين الوليدة من فمك لسما. شي طيارة لتركيا.الحياااة
الأم:يخليك بالخلا يا زريعت القنب
**:فين هو راجلك..
الأم:راجلي يانا بوحدي مالو مباااكش..
**:نفس الديسك الميمة..دوي دابة فين هو العربي..
الأم:قدك قدو النعجة..تي قولي باااا 
**:وا صافي صافي فين هو باابي..
الأم:مشا لجاامع..هادي هي وقيتو يدخل..تكعدي غسلي يديك ورجليك الخانزو
**:يد الفلاح نقية..أجي حس البرهوش مقطوع فينو
الأم:نتي طفرتيها البرهوشة بيدهاا..معاد خارج كيلعب..
خلات مها كتنگر عليها كيف العاادة مولفة هي النگير لدرجة لامنکراتش عليها مها ميدوزش ليها النهار..دخلات لبيت لبسات بيجامة كل حاجة من جيه وكل لون فشكل..جمعات شعرها بقراص الفوق ولات بحال بلارج..وتلاحت فالصالون تتسنا باها يجي يتغداو..ومرة مرة تمشي عند مها تزاوگ فيها تحط ليها شوية المرقة حتى عصبتها وشيرت عليها بصندالة العربي نيميرو 40 جابتها ليها جيهت الصدر .رجعات لبلاصتها تتحك فيها..
عاد بردت وشدت الأرض..بانت ليها التلفزيون.شداتها كتقلب من قناة لقناة حتى دخل خوها معاذ... لي هي وياه مرة سمن على عسل ومرة كي المش والفار..ودابة هاهوما جالسين سمن على عسل تا قال ليها معاذ تقلب ليه Mbc3 مبغاتش وهو يجمع الدفلة تا جمعها وعطاها ليها الكمارة جابها ليها حدا عينيها..هاو هوما يقلبوها مش وفار وناضت الكومبا بيناتهم مستعملين جميع أنواع الأسلحة الملموسة:..المخاد الصنادل.التلكوموند.والأسلحة المعنوية:الدفال.والسبان هي تتقول ليه البوال البرهوش .وهو تيقول ليها الكسولة البايرة..حتى دخل الحكم فرقاتهم بالقريص والعضان..تاشد كل واحد فيهم قنت هو سروالو طاح ليه وهي شعرها واقف شاد الريزوات..
ها العربي دخل كيغوت على صداعهم لي سمعو من راس الدرب ..دغيا قادات شعرها..وهو دغيا هز سروالو تقادو فالجلسة مربعين يديهم دايرين نضرة البرائة..وقف فالباب كيشوف فيهم عايق بقوالبهم..ناضو كيتسابقو باسو ليه يديه..جات الأم وفيديها الماكلة حطتها فوق الطابلة ولتفو حولها كيهضرو فصمت..حتى فجر ليهم الأب الخبر القنبلة لي خلا البطلة توحل ليها وتخرج عينيها ..

الأب:إنشاء الله سيمانة الجاية نهزو رحيل 
الأم:لاش تاني العربي.
خنزر فيها
الأب:سيري سوليهم لاش .شدي 45 وطلعي النيابة قولي ليهم لاش محولين ليا راجلي
الأم:وانا غيسولتك مالك
الأب ..كل مرة محوليني لقنت فينما نشد الوتاد فشي مدرسة يحولوني قهروني .
**:وفين حولوك هاد المرة تاني 
الأب:الدارلبيضا..
الأم:الله الله وشحال بعيدة..
**:وأنا مابغيتش نتحول عييت أپا
الأب:(بالغوات)أيللللووول
أيلول:ناضت من الطبلة..بصحتكم
الأب:ضسرتي البرهوشة وعليا بيميني لا بقات فيك..يخ ندموني على النهار لي ختاريت فيه التعليم 
الأم:صبر العربي صصبر دابة تشد التقاعد وترتاح
الأب:وتابقات سيمانة عاد عالميني.بحالا الدار غادي تنزل عليا من السما..
الأم:فيد الله ..راه ماشي أول مرة نتحولو ربي يسهل فحال كل مرة..
معاد:أححح أنا بعدا من شحال وأنا نحلم بكازا ياااس
الأب:أش هاد الألفاض السوقية..
الأم:(تتغمز فمعاد)هيهيهي غيتيضحك كول لاديشاي عليه العربي..
دخلات لبيتها تتفقص وتتغدد ..من طبعها ماشي إجتماعية وكتلقا صعوبة عاد كدير الصحاب والصحابات .أخر مرة تحولو من أکادير..باش يجيو يسكنو فتطوان ..تفارقات معاهم بالدموع والتحيار حتا شواتها مها بجوج دقات عاد ركبات معاهم فالطوموبيل..ودابة هزات الهم تاني لفراق

باقاا فبيتها مفقوصة ومغدة لاعنة الحض لي كل مرة دايرها ليها..جالسة فالأرض مسرحة رجليها ومتكية بضهرها على جنب الناموسية تتلوي فشعرها وتهبط القصة وطلق شعرها وهادشي كامل وهي تتفكر كيف غادي تكون كازا وكيف غادي تعيش فيهل وهيا سامعة عليها بلي مدينة كبيرة بزاف وكتفكر كيف غادي تولف مدراستها الجديدة ودارهم كيف غادي تكون..بقات هاكاك مرة تهرنن مرة تخبط رجليها مع الأرض..تا ضربت ليها طن فراسها تنوض تقيس شي لبسة.. قيسات السروال والحوايج ودارت المكياج وشدت لرض تاني تخمم وتفكر..هذا ديما حالها تكون مابيها ما عليهل تتنوض تقيس لبسة ولا جوج غا مع مخها..
وهاكا دازت سيمانة بطلتنا أيلول الهبيلة من التخمام لقراية لجميع الرحيل والحوايج ..وتوديع الصحاب والتهرنين على مها وطبعا الكومبات مع خوها معاد لي عكسها طاير بالفرحة حيت غادي يتحول من تطوان ويمشي لكازا وهاذا هو عقل الصغر 😉 العربي مسكين سيمانة محكش فيها راسو بزز باش لقا دار مناسبة فالتمن و قرييبة من المدرسة لي حولوه ليها.. ومهم (فتيحة) مجلساتش كاع الأرض من حيلتها لولادها ولل لرحيل وغسيل الماعن وتصبين الكواش حيت بغات كولشي يمشي نقي...وهاهو نهار لي غادي يتحولو فيه من مدينتهم لي منقدرش نقول عليها موطن لأن ماكاملاش 7 شهر باش جاو ليها...

واقفة كتشوف فدارهم خاوية كتصفر مافيهاش الأتات..الأتات لي تحمل فكاميو وشد الطريق لكازا وبحال والو يكون وصل..جات ماماها عنقتها وطبطبت عليها مصبراها 
فتيحة:كيف ولفتي تطوان أبنيتي إنشاء الله تولفي كازا 
أيلول:يعلم الله ناسها كيف دايرين أ مي
فتيحة:كيعاودو على ناسها ناس طيبن تاع الجود والكرم..وراها مدينة ولافة دغيا تولفي ..وكبيرة وزينة وفيها موروكو مول نقادو أمورنا فيها ونديك ليه شري لي عحبك..
أيلول:بصح حلفي ولامبغاش العربي
فتيحة:تي راه باك هداك الحمارة. والعريبي خليه عليا يالاه مسحي خناينك وزيدي باك كيتسنا 
.. ..هزات باليزتها حطتها فكوفر الطوموبيل ركبات لور حدا خوها معاد كتشوف فمدينتها وكتودعها بعينيها..جاها القنط فالطريق حتى التلفون لي تلاها بيه محيدو ليها باها تتشد الباك عاد يعطيه ليها..تكمشات فبلاصتها موسدة رجل معاد حتى داها النعاس..خليوها ناعسة ونوصفها ليكم أش نقوليكم أسيادي من ناحية الزين زينة واخدة حقها وكفاية عينين كباار كحلين ومشفرين وفم صغيور و نيف منقاد صغيور وشعر فوق الطرمة بشوي..بيني وبينكم رطب غير بالشيشوار. بشرتها حنطية.. فورمتها مقبولة طرمة على قد الحال ماصغيرة ما كبيرة.وصدر ومتوسط وماكاينش حس الكرش .فيها فالطول 1:66 وها الزين كاين والعقل الله يجيب..😔

مكتفيق إلا وعلى مها كتزعزع فيها تنوض تاكل شي حاجة كانو وصلو لإستراحة قبل مدينة فاس ..مامشات مها حتى شافتها فاقت وتوگضت ..قادات شعرها بيديها مرجعاه ورا ودنيها ..طالقات تفويهة من الأعماق عاد خرجات من الطوموبيل مضهشرة ..سرحات عينيها باش يبانو ليها ..والو عيات متقلب وماشفتهومش حتى دارت ليها ماماها باي باي عاد شافتهم وكانو غير حداها..
تغداو تما كالعادة فجو هادئ ..مرة مرة تنوضها هي وخوها حتى كيضور فيهم العربي عاد كيسكتو ..شدو الطريق تاني والنعاس طار ليها .بزز وبرغيب وبتزاويگ باش يبغا باباها يعطيها التلفون تلاها بيه..دارت يوتيب طلقات موسيقى ودارت ليزيات ..تكات على الزاجة مقابلة الطريق..وكتفكر فكيفاش غادي تعيش فكازا ..بعد 4 السوايع وصلو للدخلة ديال كازا ..وموراها ب 40 دقيقة وصلو الحي لي غير،قربات ليه الطوموبيل وشافتو أيلول وشافت شنو ضاير بيه وديورو كيف دايرين والدراري لي مجمعين فالقنات أشكال أنواع قلبها تهز وتحط دغيا نقزات تسول باباها..
أيلول:باا مالقيتي غير هاد الدرب
العربي:ومالو كيجاك..
أيلول:شوف كيداير وشوف الشمكارا مجمعين لهيه
العربي:الشمكارة بعدي منهم ميهضروش معاك ..
أيلول:ولكن أبابا..
العربي:ششش صقلينا هاحنا وصلنا..
بلاصة الطوموبيل ورا الكاميو ديال الأتات ..بقات كتهرنن حتا شافت ماداها فيها حد عاد نزلات متكية على الطوموبيل كتشوف فيهم كيدخلو الأتات لدار لي تسيقات وتنضفات قبل..كتشوف فالحي وضور عينيها كي موكا.. حتى دازو جوج بنات لابسين تونيات كلهم ألوان وتقاشر بيضين وصندلات بحال بحال دياول الزغب ضاربين الفم حتى سكت والحجبان مطراسيين بالكحل ..دازو من حداها وبداو يميقو فيها طلوعا ونزولا ..تخلعات ومشات كتجري لاصقة فماماها..

دخلو الخداما الفراش لدار قادوهم.. تحت إشراف العربي..دخلات لدار كتشوف فيها وتفحصها كانت عبارة عن دار ببجوج طاج الفوق والتحت ..الفوق كاينين جوج بيوتة وصالا ..وحمام والتحت كاين صالا كبيرة وكوزينة وطواليط وحمام وبيت النعاس كبير..عاد كاين الكولوار..لي تيدي الباب لي كيخرج..عطاوها بيت الفوق لي قاداتو ليها ماماها باش ترتاح فيه لأنها عارفة بنتها كتمرض بقوة التتقل..جابيتها حدا بيت خوها معاد..وباها ومها خداو البيت لتحتاني.. ..
الدار زوينة ونقية من غير الحي شوية مشرمل.. مع الوحدة تجمعو على الغدا لي وجداتو الأم بقا ناقصهم الخبز..عياو فمعاد يتسخر والو مابغاش..مابغاتش تقولها لعربي باش ميسلخوش عصا..ودارت تتعورط فأيلول ..ماتحركات ليها حتى شدات من عندها 10 دراهم تضويرة خشاتها فصدرها .. عاد شدات فلوس الخبز ..وخرجات بقات واقفة قدام الباب تضور فعينيها على الله تشوف شي حانوت ملي مابان ليها والو ..بدات كتقلب على شي حد تسولو..زادت تمشات شوية القدام..حتى بان ليها واحد الوليييد صغير كيلعب تكون فعمرو ديك 8 سنين لابس شورط لاكوسط كحل وكيطمتو بيضة حتى هيا لاكوسط ..وزوين كيحمق فوجهو.. كان كيلعب البي(دوك الكورات الصغاااار الخضرين) حمقها ومشات تسولو . أيلول:البکوص واخة نسولك.. 
هز فيها راسو طلعها وهبطها..قالت يمكن مسمعنيش نعاود نسولو..
أيلول:أشنو سميتك الزوين.. 
الولد:تشي مالك أختشي شفتك تتلوطي عليا بالعلالي..
أيلول(صدمها): لا لا والله بغيت غير نسولك.. الولد:يالاه سولي..
أيلول:أشنو سميتك بعدا..
الولد:الأخت خدامة مع البوليس لا!!
أيلول:ههه لا أنا ياللاه تحولت هنا جديدة..سكنت فهاديك الدار(وراتو بصبعها)لهيه. 
الولد:ومالي أنا لاش تتعودي ليا قصة حياتك..رولي بحالك(سيري) 
أيلول:دابة قول ليا أش سماك الله 
الولد:سماني رياض أختشي صافي شي حاجة يالاه قلبي 6|9..

أيلول:وريني شي حانوت ولا مخبازة عفاك. رياض:وأري شي درهم لايحاافضك.
أيلول:هانتا والله ماعندي الصرف..يالاه معايا نشري السخرة ونعطيك(دارت ليه بصبعانها 2) جوج دراهم كاااع 
رياض:اهاه تاهادا نضر يالاه تحركي قدامي..نشوفو بلانك..
أيلول:شحال فعمرك.
رياض:واها المرض شفتك باغا تشري المعرفة.. رجع بحالي گاع...
أيلول:صافي صافي هانا سكت..
بقاو غادين كيتمشاو هيا لابسة سروال تجينز كحل وتيشورطة كحلة و سببرديلة بيضة..طالقة شعرها ورياض غادي كيتمشا حداها ..
بعقلو واخا مشيرمل..وديك التحسينة وجوج خطوطة فقرفادتو..خاشي يديه فجياب الشورط.. مسافة 5 دقايق كانو قدام المخبزة..دخلات هي وياه شرات الخبز وخلصات بقا واقف ليها حسكة حتا عطاتو 2 دراهم ورجع معاها..وفالطريق طالقة عينيها وكتسكشف الحي.. 
أيلول:خويا رياض شنو سميت هاد الحي..
رياض:درب سلطان..نعطيك نصيحة ردي الباال ناسو مامعاهمش اللعب.. 
أيلول:وعلاش.. 
رياض:فيك الأسئلة بزاف صدعتيني .. بقا غادين كيتمشاو حتى قربو يوصلو لدار وهي توقف عليهم نفس البنت لي شافت ملي كانت واقفة كتسناهم يدخلو الأتات مولات التوني الملون ..حاطا يديها على نصها وكطلع وتهبط فأيلول..
سميرة:زريقة(اللقب ديال رياض نسبة لعينيه مابلين لزروقية)شكون هاد المعوقة لي معاك..
أيلول:معايا!! 
رياض:هادي عشيرتي و ختي(شد لأيلول فيديها ) سميرة:وااايلي.. رياض
:واايلوز ..تلاحي 
سميرة:(خبطات لأيلول على ضهرها تاساستو ليها) تهلا فيها راه باينة جديدة هنا.. 
رياض:مهلي فيها غي رتاحي..سيري قضي،شغلك.. دخل فيها جار معاه أيلول واخا صغير إلا وفارض شخصيتو فالدرب..وشريع مع راسو..وأيلول عجبها بزاف جاها كيوت بقات كتمشا وشادا على ضهرها قسحاتها ديك سميرة يديها كي الراجل..وصلها لدارهم سلمات عليه باستو فخدو وشكراتو دخلات لدارهم شبع فيها باها سبان حيت تعطلات واخا هاكاك والله ماتقلقات وجلسات تاكول..هي مستحيل تقلق على كرشها

تغدات وطلعات لبيتها كتقاد حوايجها فالماريو ..كتطوي وتستف..وكيف عادتها تنوض تقيس لبسة ولا جوج وترجع تكمل شغلها..شوية سمعات الغوات فالزنقة ..شي واحد كيغوت وكيخسر الهضرة..طلات من الشرجم..بانو ليها جوج دراري واحد فيهم عريان من الفوق..ولاخور هاز فيديه جنوية (14) وكيتهدو على بعضياتهم..ناويين على خزيت..حطات يديها على حنكها وبدات كتفرج فيهم خصوصا أنها أول مرة تحضر لشي مدابزة موالفا غير كيعاودو ليها..قلشات ودنيها كتسمع لتعراق والسبان الأصيل من السمطة للتحت..
الش1:حيد الجنوي وأجي نخرجو ليگة..
الش2:وااا بربي لا بقات فزامل بوك..نتا تحگرني .وناري والعمالة قودتيها..
الش1:وفيك غير قوة بلابلا..لوح المضا وخرج دراع أزبي..
لاح الجنوية ومشا عندو كيجري وبداو دقا فيا دقة فيك حتى ولاو كيتلاوحو.. وبنادم مجموع كيتفرج..وممنوع شي واحد يفك ولا يتدخل..
فواحد اللحضة كيبان ليها خوها معاد كيتفرج وقرييب منهم بزاف ..ضربات على حناكها وبدات تولول..
أيلول:أويلي على الزامل..باغي يموت القواد لاخور.(غوتات بجهد)معاااد طلع لدار.
هز فيها راسو شافها ودار ليها فاك بصبعو الوسطاني..
والله لا بقات فيك تيجي العربي والله تنقولها ليه..
قلز ليها..وهبطات كتجري عند مها وصلاتها ليها سخونة..لي خرجات ليه بصندالة ..دخلاتو للدار بالعصاا والقريص..رجعات كتجري شادا الشرجم لقاتهم تفرتكو ..
أيلول:تفووو ديما خارج عليا..مشفتش الخاتمة..
كملات طويان الحوايج..ونزلات دير كسكروط معا ماماها وخوها والعربي..
العربي:أيلول راه قيدتك فالمدرسة..
أيلول:قريبة من الدار بعدا ..
العربي:15 دقيقة من هنا لمدراستك.
أيلول:صافي مزيانة..
العربي:ونتا أمعاد..مدراستك راها غير ورا الدار..غدا توصلك ليها مك..
معاد:لا غادي يضحكو عليا عشراني..
العربي:عشراني!! أش هاد المطلح أقليل الأدب.
فتيحة:صافي العربي متكبرش الموضوع.
العربي:باقي نسمعك تتقولها نقطع ليك الشلاقم باش كتهضر..
كملو مسكروطهم وجا الليل..تعشاو وطلعو ينعسو..

بعد ليلة طويلة عند بطلتنا..لي منعسات حتى تقلبات شي 100 مرة..وحتا قرب يطلع الفجر عاد نعسات..هادشي ديما كيوقع ليها ملي كتتبدل الفراش..جات فتيحة كتفيق فيها..مافاقت غير بزز مشات لطواليط..جلسات تبول وعيينيها مغمضين..حتى نعسات وهي مازالا كتبول مافيقها غير الخبيط فباب الطواليط كان معاد لي زيراتو البولة.وبدا كيهلل عليهل تحل..توضات دغيا وخرجات مخنزرة فيه قرفداتو. و هربات دخلات الحمام لي جنب الطواليط غسلات وجهها وحكات سنانها..رجعات لبيتها...مشطات شعرها وهبطاتو دغيا بالبلاك..لبسات حوايجها لي كانو سلوبيط خزي(زيتي) قصير من جيهت الرجلين..وتيشورطة كحلة وسبرديلة كحلة طلقات شعرها طويل ومسبسب رطب.. دهنات فوندوتان ..جبدات عينيها بماسكارا وفراجو .هزات شكارا كحلة خاشية فيها كتوبتهت وطابليتها...نزلات تفطر .حتى عمرات كرشها مزيان عاد خرجات ..ماعارفاش ليسي فين جات فقط عارفا سميتها..دارتها فيد الله وقالت لي عندو فمو ميتلف..وفعلا داكشي لي دارت غادا كتمشا وشكارتها فضهرها شاداها بيديها..بعدات من الدار..حتى كتقشعو جاي كيتمشى بالزربة مخنزر وعاقد حجبانو الصغيورين..بلا شك عرفتوه..إنه رياض..مشات عندو طايرة..وبدات كتعيط عليه بجهد..
أيلول:رياااض.وااا رياض..(مشات كتجري عندو حتى وصلات)
رياض:سمعنااك مالكي تتغوتي..
أيلول:(إبتسامة غبية)صباح النور..
رياض:صبحنا على الله..
أيلول:مالك مغوبش..
رياض:وصوقك ..نتي مالك..
أيلول:نطلبك واحد الطليبة..
رياض:مشطبااا معاك..طلبي 
أيلول:واخة تنعت ليا فين جات تانوية عبد العزيز مزيان بلفقيه..
رياض:زيدي تبعيني..نيت راها ورا مدراستي..
أيلول:يحفضك ليا..
رياض:شنو سميتك بعدا..
أيلول:سمتي أيلول..

كان رياص لابس قميحة بيضة وسروال تجينز وسبرديلة بيضة وداير شكارتو فضهرو..مرجع شعرو جنب جا كيوت..
أيلول:جيتي كتحمق بهاد اللبسة..
رياض:راه على ود هاد اللبس علاش لقيتيني مغوبش.مفيقني على النبوري كيلبس فيا..
أيلول:شكون !!
رياض:حشمت نماركي عليك..ماتبقايش تقولش شكون..
أيلول:وااخة..شكون لي لبسك حوايجك..
رياض:الواليد..
أيلول:عندو الدوق هاد باباك..
رياض: تلاحي راها مدراستك..معاش خارجة..
أيلول:10 يمكن..
رياض:يالاه الله يعاونك..
أيلول:شكرا..
مشا رياض فحالو لمدراستو كيقرى فالإبتدائي فالتاني..ودخلات هي ليسي كانو عندها ساعتين إجتماعيات..ماكملاتهم غير بزز.محملاتش الليسي مع هي جديدة بغاو يلعبو عليها العشرة.وفين ما دوز يلوحو عليها نويطات..ويستفزوها..فيها ماتجاوبهم ولكن قررات تبعد من الصداع هاد العام.
خرجات مع العشرة ..راجعة فالطريق لي حفضاتها ملي كانت جاية هي ورياض..مهبطة راسها كتشوف فالأرضض وكتضرب برجليها فالحجر لي مليوح فالأرض..غادا ساهيا ودماغها معرفت فين وصل...

وصلات لتقاطع الطرق..كتسنا فالطريق تخوا باش تمشي لدارهم ..كتسنا فالإشارة الحمرا..بعد 2 دقايق وقفو الطوموبيلات وقطعات الشانطي وماجات فين توصل للنص...حتى كتشوف سكوتر جاي بجهد لجبهتها فحالا جاي قاصدها..واخة شافتو من مسافة بعيدة إلا ورجليها تشلو عليها مقدراتش تهرب وتبعد من الطريق..حطات يدها على وجهها وكتسناه يضربها.. تتقول فعقلها هادي هي لاخرة ليا..الإشارة الخضرا طلقات والطوموبيلات تحركو كتسمعهم كيكلاكصونيو عليها وكتحس بيهم كيدوزو من حداها ..حيدات يديها من على وجهها وباقة سادة عينيها..حتى سمعات شي واحد هضر قريب ليها بزاف..
**:واش غادي نقابلك غير نتي.. حيدي من الطريق العمياا..
صوتو دخل ليها مع الأعماق وتغلغل ليها مع مسامعها مزيان صوتو كيجيب واحد النوع ديال التبوريشة واخة عيرها ..بدات كتحل عينيها بشوية وحيدات الشعر لي كان مغطي ليها وجهها..
وشافت قدامها بنية صخمة فوق الموطور لي واقف قريب لرجليها بزاف..لابس. كاسك على راسو..وجهو ماكايبانش.. لابس كولشي كحل فكحل وداير صاك صغير مدوزو على عنقو گوتشي..
ماشافتوش كيحقق فملاميحها من ورا الكاسك ومالاحضاتش أنه سها فيها ونسا راسو أنهم واقفين وسط الشانطي ومعطلين حركة السير وأنه كان مزروب..مفيقو غير صوتها ..
أيلول:سسسمحليا..معرفتش شنو وقع تخلعت يمكن..
**:(بصوت خشن)بقاي تردي البال..
نطق هاد تلاتة الكلمات وديمارا الموطور مطير معاه شعر أيلول فالهوا..بقات متبعاه بعينيها وهو بقا حضيها من المراية..قطعات داك الشانطي غير بزز بعد ما غبر عليها الموطور..كملات طريقها كتفكر فشنو وقع...أنا نقول ليكم شنو طرا..لي وقع أنها بقات كتفكر حتى سهات تاني أوقفات وسط الشانطي وتحركو الطوموبيلات..ومول الموطور عيا مايكلاكصوني عليها وهي ولا على بالها..

كملات طريقها غادا كتمشى فشرود. ساهية كيف عادتها
كتفكر فشكون مول الموطور ..لي غير من صوتو جدبها ليه..حركات راسها يمين وشمال بزربة..نافضة عليها هاد الأفكار من راسها.. وصلا لراس الدرب..ضورات عينيها فيه كامل وهي مازال كتمشى بانو ليها صحاب التحاسن شادين القنات..هالي كيفتخ فجوان..وهالي شاد گارو تيكمي فيه..زادت تمشات شوية بانو ليها كوبل حتى هوما فواحد القنت يعلم الله أش كيديرو..وفكل مرة كتزيد تمشا شوية..كتسمع المعاكاسات والدراري كيبسلو عليها..كتسمع عبارات بحال"كلك زبدة ومنين نبدا" "تقدري طيحي فالدروج .طيحي من السطح.ولكن أحسن طيحة هيا طيحي فيا" "الشعر الكحل مانشوفوش معاك".. وصلات لدارهم مهلوكة بالطريق ..مشات عند مها لكوزينة كتسولها كيف داز نهارها الأول فليسي..بتاسمات ليها وطمناتها بلي المدرسة زوينة وحتى ناسها ضريفين..ودغيا دارت الصحابات..كدبات على مها غير باش متشوش عليها وتبقا مرتاحة من جيهتها..
طلعات لبيت بدلات حوايجها..لبسات بيجامة بسروالها بحال التوني فالشيبي..جمعات شعرها ببونضو من القدام وخلاتو مطلوق..ونزلات تقرقب الناب مع مها بيننا ما طاب الغداا..
حطات ليها كلتوم الخبز والفرماج وزبت العود وأتاي..عاودات الفطور..للمرة التانية..حتى وصلات 12 و قسماين..دخل العربي ومعاه معاد ..ناضت باست ليه يديه..ورجعات جلسات فصالامونجي لي فالكوزينة..سولها على نهارها ونفس الهضرة لي قالت لمها قالت لباها..
فتيحة:كبيدتي..
أيلول:كبيدتك!! من إمتا وليتي تقولي ليا كبيدتك..من اللخر أش كاين..
فتيحة:تسالا الخبز..نوضي جيبيه..
أيلول:(كتغني)غنجيبو غنجيبو غاانجييبو الحبيب ديالي..درتو فبالي..ودوري معايا..
فتيحة(كتحل فالبزطام):ماكتعيايش أبنيتي..شدي ها 20 درهم شري 10 الخبزات ولي شاط خوديه..
أيلول:يحفضك ليا أ تيتيحتي ..
طلعات لبيت زادت عليها بوليرو من الفوق.لبسات صندالتها ديال الصبع وخرجات مشات نيت لديكك المخبزة لي وراها رياض..شرات الخبز وتمات راجعة فحالهاا.حتى كتشوفو جاي..

حتى كتشوفو جاي ..هو نفسو مول الموطور باقي بنفس اللبسة والكاسك مغطي وجهو ماكايبانش..راكب فالموطور..وراكب رياض قدامو..لي غير شافتو وشافها دارت ليه باي باي ..حتى هو ردها ليها وغمزها واخة كان مغوبش..وسهات تاني فمول الموطور متبعاه بعينيها حتى حبس فدار بعيدة على دارهم بخمسة الديور..
شافها من بعيد معنقة الكيس ديال الورق لي فيه الخبز وغادا كتمشا كيف عادتها ساهية..شافها شيرات على رياض وستغرب فين كتعرفو..بقاا متبع ليها العين من المراية ديال الموطور..حتى وقف..حيد الكاسك .ولكن ماشافتوش فوجهو حيت كان عاطيها بالضهر..حل الباب.دخل رياض ودخل هو وسد الباب..عاد عاقت براسها تاني وكملات طريقها لدارهم..دخلات وحطات الخبز فالكوزينة.. تغداو.وعونات مها بزز جمعات معاها الروينة
دخل هو ورياض للدار.. طلعو نيشان لبيتو حيد ليه حوايجو دخلو للدوش غسل ليه حالتو.ولبسو توني لاكوسط كحل.نشف ليه شعرو ونزل يطيب الغدا .قاد الطبلة وجلس تيتسنا فرياض يهبط من البيت..
**:(بجهد)ريااض ريااض والبرهوش..
رياض:(نازل من الدروج)ومالك تتغوت أصاحبي..
**:عام باش تنزل..زيد تاكول
رياض:عودتاني البيض أعبيقة.
عبيقة:قدي قدك البرهوش..جمع راسك.خشي فوجهك وسكتنا
رياض:صافي صافي سمحليا الوليد
عبيقة:كول وطلع تنعس.
رياض:عفاك خليني نخرج الوليد عفااااك
عبيقة:.على ديك الحالة لي درتي فالمدرسة ممنوع تخرج سيمانة.
رياض:عيقتي أعبيقة.تا مالك أصاحبي
عبيقة:بلا متنيرڤيني أرياض..نصدق مفوت فيك شي دقة..
كمل ماكلتو فسكات وطلع لبييت الفوق..أما عبيقة غسل الماعن وخرج مشا لخدمتو..
..شافت فالساعة لقاتهل 2 طلعات كتجري البيت لبسات سروال كحل وقميجة صفرة وبلغينة كحلة..هزاات صاك كبير باج دارت فيه الكتوبة .لبسات طابليتها.وخرجات شادا الطريق لليسي..

تمشات على طول الطريق حتى وصلات لقدام ليسي لقات باقي الحال. بقات واقفة حدا الباب كتسناهم يحلوه..كيف عادتها ساهية ومرة مرة توگد وتبدا ضور عينيها تستكشف شنو ضاير بمدراستها كان ضاير بيها القهاوي والسناكات والحوانت وشي بوتيكات المهم جات فجي تجاري..دغيا عامرات الدنيا بالبنات والولاد..هالي واقف عليها صاحبها بموطور.وهالي مشادا هيا وصاحبتها كيمشيو ويجيو بجنب القهاوي باغين يتصيدو..مهم الددنيا عامرة بزاف..
فوقفتها قدام ليسي..ماخلاتش من. المعاكاسات من طرف الدراري.والمشادات من طرف لبنات لي باغيين غير يجبدو معاها الصداع.وجميع أنواع تخسار الهضرة سمعاتهم وهي كتسنا..
وأخيرا جاء الفرج وتحل لباب.دخلات هي اللولة مع كانت حدا الباب هاربة من شوفات الحاقدة تجااها جبدات من الجيب ديال الطابلية إستعمال الزمن..شافت القاعة لي قارية فيها..وطلعات فالدروج..لقات القسم خاوي جلسات فالطاولة التالتة..كتسنا القسم يعمر والأستاذ يجي..جبدات مقلمتها وكتوبت المادة لي داخلا ليها حطاتهم فوق الطاولة..حطات راسها على طاولة وسادا عينيها..حتى كتحس بشي واحد جلس فوق من الطاولة بجنب راسها..وقاسها بصبعو فراسها..
**:بس بس تهزي..
ناضت قافزة هازة راسها..
أيلول:أش كاين..
**:لا والو سمحيلينا فيقناك الأميرة..غير هو بلاصتي هادي تگعدي يالاه..
سدات أيلول ودنيها..وحطات صبعها على فمها بمعنى سكتي
أيلول: ششش كتهضري بجهد..قولي ليا هادي بلاصتي بشوية وغادي نوض.
نقزات وحدة من اللور .
##:مريم..عطي لمها جوج دقات تنوض بلا هواها
مريم:واييه الفردة..من نيتك أختشي هادشي لي بقا ندوي معاك المسخة بشوية..(شداتها من كتفها)من عاودش الهضرة..تهزي..
مابغاتش أيلول تجبد الصداع معاها. هزات كتوبتها وشكارتها ومشات تبدل لبلاصة وفينما تبغي تجلس يقولو ليها عامرة.. وتتعالا أصوات الضحك عليها ويضوروها بيناتهم ..حتى لقات الطاولة الأخيرة من الصف الأخير هي لي خاوية حتى السبورة ماكاتبانش ليها.

دخل الأستاد وبدات الحصة..وأيلول متبعة معاه ومركزة ..شوية بداو كيضربوها بالكواغط ..حتى عيات وطلبات من الأستاد يدخل..ولكن جاوبها بجواب صدمها..
الأستاذ:منك ليهم أبنتي..خدمتي هاني كنديرها..راني أستاذ ماشي مربية..
ودار يكمل الشرح..وهوما تكرشخو عليها بالضحك..وهي بقات مستغربة..لأن فمدراستها القديمة..إلا تشكاو من شي واحد كيهبطو بجوج الإدارة ولي غالط كيتعاقب..مشا ليها التركيز وهي كتفكر معامن طاحت ومعامن كتقرى..مافيقها غير الصونيط كيعلمهم بلي الحصة اللأولى تسالات معلنى على الحصة التانية..كانت غير فالقاعة لي ملاصقة مع هادي ناضت بزربة..ودخلات جلسات اللور فالصف الأخير تاني..ماكاملات الحصة غير بالكشايف.. 
وتسالات الحصة التانية مع 6 ديال العشية ..خرجات من ليسي كتمشا بالزربة تفاديا لشي صداع..كتمشى والضلام فديك الوقيتة الضلام كينزل بكري..جاها البرد وتكمشات محاوطة راسها بيديها قتلها الجوع ولات كتمشا بالزربة باغا غير توصل للدار..
مع قربات تدخل لدربهم مع كتسمع شي حد كيبسل عليها..

!!:زين وقفي نهضر معاك..
ماوقفاتش وكملات طريقها..عاود هضر تاني..
!!:كبيدة..الزين منشوفوش..
كملات طريقها كتزرب..حتى جرها من كتفها مضورها عندو..خرجات عينيها من وقاحتو والجرأة ديالو نافضة يديه منو بسرعة وراجعة جوج خطوات اللور محتافضة على مسافة بعيدة بيناتهم..مد ليها يديه..
!!:سميتي مروات ونتي..
مجاوباتش ومسلماتش عليه..
مروان:حرام عليك أزين من صباح وأتا تابعك ملي خرجتي من الليسي..
أيلول:مزيان..
مروان:أنا غير ولد دربكم ساكن فالزنقة لي وراكم..
أيلول:متشرفين..فرصة سعيدة الله يعاونك
وجات ماشية..وعاود وقفها بيديه..
مروان:أشمن سعيد ولا سعيدة..وقفي نهضرو جوج كلمات وسيري فحالك ..بلا متبقاي تنقزي عليا..
أيلول:خليني ندوز..
مروان:وأري نمرتك بعدا..راك عجبتيني..
أيلول:معنديش تلفون..تعطلت أخويا بسلامة..
مروان:تشاا راه أمبوسيبل مايكونش عندك تلفون.
حدرات راسها مكملة طريقها ..ساعة حلف لايفرقها..تبعهاا.شادها من كتفها دافعها مع الحيط حتى تأوهات بألم..
مروان:كبيدة راك مازال معرفيني شكون أنا..
دفعات الجبهة وخرجات السنطيحة..
أيلول:ياكما واقفة مع محمد السادس ومفخباريش..
مروان:قطيطة كتغوتي..
أيلول:إلا محيدتيش من طريقي عاد غادي نغوت نيت..
مروان:دابة ماغاديش ديري معايا شي حل..
أيلول:الحل هو الله يعاونك..
وتالت مرة جات ماشية فحالها ورجع موقفها حالف تياخد النمرة..عيات تقول ليه وتفهمو بلي معندهاش تلفون والو حالف لايفهم طاحت مع لصقة وأش جا مايفكها..

كمل خدمتو وراجع فحالو لدارو لعند ولدو..كيلمح جوج واقفين كيهضرو ماكتارتش لأنه عادي موالفين كيشوفو داكشي فالحي ..ملي شاف وجه البنت دغيا ذكرها فالسطوب وفالحي ملي دارت لرياض باي باي..زاد شوية وحبس حاضيهم من المراية ..كيسحاب ليه راهم كوبل ساعة ملي شافها..كدفعو باغا تمشي فحالها وهو كيدفعها وجابد تلفونو كيعطيه ليها باغيها تكتب النمرة صحة..
نزل بزربة وهو مازال لابس الكاسك..لابس توني كحل..حتى وقف عليهم كي عاصي ربي..<>
عبيقة:أش واقع هنا..
مروان:فين أخاي عبيقة..
عبيقة:قلت أش واقع هنا..
مروان:والو غير واقف كنهضر مع الحب..
خرجات أيلول عينيها ونقزات كتهضر بزربة همها غير تفك منو .. خصوصا عقلات على الشكل الخارجي ديالو والكاسك وتفكراتو راه هو لي كان مع رياض..
أيلول:لا لا عنداك أخويا والله ماكنعرفو ..(هضرات فير بفمها )فكني منو..أنا..راه.أنا كنعرف رياض..خوك
عبيقة:مروان واش عرفتي شكون هادي..
مروان:اه سكنات جديدة فدربنا..
عبيقة:(جر أيلول من يدها مقربها حداه)هادي خطيبتي أمروان..حسن ليك تقلب 6|9 قبل منطويك عل 10
مروان:بربي ماكونت عارفها..السموحات أخاي عبيقة..سمحي ليا أختي .مبروك عليكم..
عبيقة:تقود فحالك لا..
مروان:دابة أخاي عبيقة..بسلامة..
ومشا فحالو..عطاها عبيقة بالضهر حيد الكاسك حاضي مروان حتى مشا..هزات شكارتها لي طاحت فالأرض..وقفات كتشوف فيه كانت بنيتو ضخمة وعراضو كتاف بزاف..وشعرو قهوي مايل لزعورية..وطويييل..حتى ضار على غفلة لقاها حالا فيه فمها..وملي ضار وشافت وجهو..زادت حلاتو 180 درجة..أش نقوليكم..عينين خضرين زمرديين ..وفم غوز كلو على بعضو حلو .عندو لحية خفيفة.مزيناهم جوج تقيبات الزين كيبانو شوية..طرطق صبعانو حد وجهها..مفيقها من سهوتها..
عبيقة:كتسهاي بزاف..
أيلول:بصح شوية..شكرا بزاااف 
عبيقة:هدا واجب حنا راه جيران..
أيلول:يالاه نخليك وشكرا مرة أخرة..
عبيقة:أجي أجي..فين كتعرفي رياض.
أيلول:اااه رياض خوك ياك..غزال داك الولد تبارك الله (عاودات ليه ملي تلاقاتو)
رياض:خويا..ههه اه زيدي نوصلك دنيا خايبة هنا..
أيلول:شكرا غادي دير فيا خير..
تمشات ماه فالطريق وعطاها تهز ليه الكاسك غادا معنقاه قدامها وهو جار الموطور ..هو كيشوف نيشان وهي كتشوف فيه..ملي كيشوف فيها كتنزل راسها للأرض.كيبتاسم حتى كيبانو غمازاتو..كتشوف فيه غير بنص عين..وصلها لدارهم..
عبيقة:مقلتيش ليا أشنو سميتك..

أيلول:أيلول سميتي أيلول.
عبيقة:زوينة فحال مولاتها(عبيقة يتعنب)
أيلول:(بتاسمات)ونتا؟
عبيقة:كيعيطو ليا عبيقة...
أيلول:سميتك عبيقة..زعما مكتوبة فلاكارط
ضحك كيحك فلحيتو ..سهات مرة أخرة فضحكتو وتقيبات الزين.
عبيقة:لا عندي سميتي..
أيلول:وشنو هيا..واش عبد القادر ياك
عبيقة:عالام والله...ههه لا ماشي عبد القادر
أيلول: أممم مهم متشرفين..بسلامة 
وجات داخلة لدارهم حتى كتسمعو كيعيط بسميتها..
عبيقة:أيللووول
ضارت بالزربة..كتشوف فيه<
عبيقة:الكاسك..
أيلول:هااا شنو..
عبيقة:الكاسك ديالي..أريه.(نعت ليها فيديهها) 
أيلول:اااه (ضربات راسها بيدها)نسيت ..هاكا
بتاسم ليها وزاد فحالو ركب فالموطور ونزل قدام دارو..دخل لقا رياض داير الروينة فالدار..وجالس كيتفرج فالمصارعة..وكيقلدهم عطاه جوح تقرفيدات وطلعو لبيتو..جمع على سعدو ووعدو ديك الروينة..ومشا كيطيب العشا لابس الطابلية جبد الخضرةونقاها وقاد طاجين..ومرة مرة كتجي أيلول فبالو ..يبتاسم ويكمل طيابو 
دخلات لدارهم مبتاسمة..كتحيد فصباطها حتى كيوقف عليها معاد داير ضحكت شر..
معاد:10 دراهم 
أيلول:كتسالها ليا ولا مالم
معاد:10 دراهم ومنقولش للعربي كنتي واقفة مع داك الولد الطويل..
أيلول:سير قولها أصلا راه غير عاوني
معاد:واخة ..العربي..الواليد
سدات ليه فمو دغيا
أيلوول:سكت الحمار سكت...(خشات يديها فصدرها)شد ها 10 دراهم أوجه الطرمة.تفو..
شدها من عندها وطلع لفوق فين مجموعين..وتبعاتو لقاتهم مجموعين كل وشاد سداري سلمات وشدات القنت

شدات القنت وجلسات حتى عيراتها مها باش تنوض تبدل حوايجها..ناضت كتخبط فرجليها..وتتفخ غير بوحدها..دخلات لبيتها حيدات دوك الحوايج لاحتهم والله ماطواتهم..ولبسات بيجامة بسروالها..رجعات عندهم ..لقات مها حاطة ليها الگوطي ليها هي ومعاد..قهوة وكيكة والكومير والفرماج.. كلات هي وخوها فجو لا يخلو مم المعيور والمضاربة..حلفات فيه على 10 دراهم لي خدا ليها..جمعات الطبلة..وجلسات تفرج بعد ما خرج باها يصلي العشا..وبعد ما فازت بالطيليكوموند مور حرب دامية بينها وبين معاد التي انتهت بيه طريح الأرض كيحك فطرمتو جراء،ضربة قاضية من أيلول بالمخدة ونتوما عارفين مخادنا كيف دايرين ..يضربوك بحجرة وميضربوك بمخدة..
دارت المسلسل لي متبعة.."حب للإجار" وبقات كتفرج متبعة معاه..شوية جا جلس حداها معاد .عجباتو البطلة"ديما" گرن فيها وتبع المسلسل على ودها..
مور ساعة رجع العربي..وحطو العشا..لتفو كاملين على الطبلة.وبداو كيهضرو ويذاكرو كيف عادتهم فبعض الأحيان..
أيلول:با كيف جاتك المدراسة الجديدة..
العربي:مسينا على الله..
أيلول:علاش مالك..
العربي: واحد التلميد حمقني كيطير مع الطيور.ملي عاقبتو عقاب بسيط..بلل حوايجو(بال )اضطررنا نعيطو لولي أمرو..
أيلول:(حاطة يدعها على حنكها متبعة معاه)اهاه كمل..
العربي:ملي جا باه صدق همجي كتر من ولدو..وبغا يضارب معايا گااع..
أيلول:وباش فاريتوها..
العربي:فكونا الإدارة..شوهني فأول نهار ليا الله ياخد فيه الحق..
أيلول:شفتي أبا من نهار اللول ماحملتش هاد المدينة..
العربي:غير سايسي أبنتي التقاعد مابقا ليه والو ونتحولو حنا من هنا گااع بمرة ..
كملو عشاهم..ومشاو لواليدين لبيتهم..وأيلول ومعاد بقاو كيتفرحو ففلم كرتون حتى نعس معاد..وهزاتو بالكشايف لبيتو ..غطاتو وجات خارجة..وهي تطيح عليها فكرة شريرة..ضارت نص ابتسامة..ورجعات عندو قلبات ليه جيب السروال لقات العشرة دراهم خداتها ورداتها لصدرها..طفات عليه الضو وخرجات منتاصرة..

ومع هي قارية حتال 2 بقات سهرانة شوية..حتى فاق العربي يشرب .وشاف الضو ديال التلفازة شاعل .لقاها باقة فايقة..جرا عليها لبيت وطفا التلفازة ومشا يكمل نعاسو..
دخلات لبيتها كتنگر..مازال مافيها النعاس..عيات تفكر شنو دير مابان ليها غير الشرجم تجلس فيه شوية يضربها البرد... كان شرجم كبير وفيه لحديد..جا فوق ناموسيتها..طلعات فوقها وجلسات فالشرجم كاملة جامعة رجليها عند صدرها ومعناقهم ..نيشان مشات عينيها لدار عبيقة... كيبان ليها الضو باقي شاعل فدارو.. شوية طفااا..وشافت باب دارو تحل ..وخرج منو عبيقة بشحمه ولحمه لابس سروال التوني وعريان من لفوق..مخرج معاه كورسي(بحال هادوك لي كايكونو فالبحر) حطو قدام باب الدار..وعاود دخل وخرج تاني هاز فيديه كاس ديال القهوة..جلس فوق الكورسي وحط داك الكاس حدا رجليه فالأرض..جبد من الجيب باكية الگارو.وجيب لاخور بريكة..شعلو وبدا كيكمي..منتشي ومرة مرة كيرشف من القهوة..وهادشي كامل وأيلول منزلاتش عليه العين..كيبان مهموم وهو كيرتاشف من كأس القهوة وكينتر من الگارو..وكيخرج الدخان تقيل من فمو..
ضور عينيه فالحي..الصقيل كاين والدنيا خاوية 2 ديال الليل تقريبا..قليل فين كيدوز شي دري.ولا شي بنت (كتخدم مع الدولة😉) فجأة وبدون سابق إنذار جات فبالو اللحضة لي وقف عليها فالسطوب وكيف كانت مخبية وجهها بيديها..
عبيقة(مبتاسم ساد عينيه):أيلووول 
حل عينيه ومشاو نيشان لدارها..طلع عينيه فين جالسة حتى كيقشعها جالسة فديك الوضعية العجيبة..لقاها كتشوف فيه.. دغيا حولات النضر منو وشتاتو ..ولكن ماقدرااتش تصبر وعاودات شافت فيه لكي تجده هز كاس القهوة موجهو ناحيتها (زعما دار ليها بالصحة)..تصدمات وضهشرات بتاسمات ليه ابتسامة غبية بليدة..ودغيا نقزات من الشرجم لفراشها فينما كتبغي تنعس كيجي فبالها وتعاود تحل عينيها حتى نعسات..ضحك على ديك التتقيزة حتى تسمعات ضحكتو فأرجاء الحي..وبقا عاصر بديك القهوة حتى قرب يطلع الصباح عاد دخل لدارو... حقق تلفونو على 6 ..وتلاح فالسداري لي فالصالون طايح بنعاسو..

صونات لالغم مع 6 كيف حققها..ناض مخنزر وعاقد حجبانو..ماشابعش نعاس يالاه ناعس 2 سوايع..
طلع نيشان لحمام لي لفوق..قضا حاجتو وغسل وجهو..مشا لبيت رياض..لقاه شبعان نعاس..
تكا حداه..وبدا كيدوز بيديه على شعرو..باسو فوجهو عاود باسو ففمو..وتقول واش تحرك..ولا تزعزع..عاود باسو فنيفو..تقلب لجيهة لاخرة عاطيه بالضهر..بتاسم وهو كيشوف فولدو كيكبر نهار على نهار..ضار ليه لجيهة لاخرة فين كاين وجهو جلس قفازي (على ركابيه)وقرب وجهو لوجه رياض وبدا كيحك لحيتو على وجهو..
عبيقة:باراكا عليك أبابا نوض غادي تعطل على المدرسة..
باقي،ساد عينيه..وتلاح على باباه عنقو ..هزو عبيقة غادي بيه للحمام..غسل ليه وجهو عاد حل عينيه وتوگد..حك ليه سنانو..ورجعو لبيت جبد ليه سروال كحل وقميجة گرونة وصباط بسيور كحل..لبسهم وليه وداه لحمام كيمشط ليه شعرو..واقف على كورسي مقابل مراية كبيرة وعبيقة وراه كيهضر معاه وكيشوف فيه من المراية..
رياض:واش ضروري نلبس هاد الحوايج أعبيقة..
عبيقة:اه ضروري
رياض:خليني نلبس التوني الجديد..
عبيقة:لا غادي تلبس هادشي .هادو هوما حوايج المدرسة..غادي تبقا نلبسهم ليك.تانموت 
ضار عندو عنقو وييديه الصغار متلاقاوش ليه بقا غير حاطهم على كتافو..
رياض:والا الوليد ماتبقاش تجبد الموت..تانتا باغي تخليني
عبيقة:لا أبابا عبيقة عمرو يخلي زريقة..متفرقني عليك أولدي غير الموت..نتا هو الحاجة الزوينة فحياتي..
رياض:(بعد منو)مشط الوليد مشط ونتا وليتي كتهضر بحال الوليات..
خنزر فيه وقرفدو..
عبيقة:يالاه كملنا هبط للتحت تسناني..
باس باه من فمو وهبط كيجري فالدروج..دخل عبيقة جمع فراش ولدو..وهو باقي عريان من لفوق..قاد ليه شكارتو ونزل يقاد ليه الفطور بعد ما لبس حوايجو لي كانو سروال تجينز و تريكو زرق غامق ..شاف الحال مشا عليه صاوب ليهم غير كونفليكس وحط كاس لحليب لولدو..فطرو وخرجو ركبو فالموطور..وصلو لمدرسة ونزل رياض وعبيقة باقي راكب فالموطور..
عبيقة:ماديرش المشاكيل أرياض..
رياض؛الله يا ودي كون هاني الواليد.
عبيقة:المرة الجاية بربي تنعلقك فراس الدرب..
رياض:باراكا من بلابلا سير خليني نقرا على ولادي..
عبيقة:هههه سير دخل سير ماغاديش ندوز عليك مع 12 رجع بوحدك ورد بالك لشانطي(تفكر أيلول)عنداك تسهى فالسطوب..
رياض:صافي تلاح..
دخل رياض وبقا مقابلو باه حتى دخل عاد ديمارا راجع لدار..

رجع لدارو..عصر ليه قهوة وجلس كيتسنا فالمرا ديال الميناج تجي..بعد ساعة جات ..جمعات الدار وخملاتها خلصها ومشات فحالها..جبد تلفونو..دوز النمر ة وكيتسنا يجاوب...
عبيقة:واش أسيمو.
سيمو:فين المعلم..جاي ولا مازال
عبيقة:ماجايش ليوم..كولشي مززيان..
سيمو:كولشي فأمان الله..
عبيقة:والبياس لي ضومونديت عليه جا..
سيمو:اه راه يالاه جا وخلصنا مول السلعة ومشا فحالو..
عبيقة:العز ..قابل معاك الخدمة ..تاندوز فالعشية إلا سليت.
سيمو:وجيب معاك رياض..
عبيقة:إنشاء الله تهلا..
وقطع عليه المكالمة..
شاف ااساعة لقاها قريبة ضرب 11..لبس صندالة ديال الصبع..سد الباب بالساروت..ركب فموطورو وديمارا لأقرب سوبر مارشي ..
وصل وخدا شبكة متوسطة الحجم..مشا بلاصت الدجاج خدا دجاجة وخدا اللحم والكفتة ..خدا ليباط وخدا الحليب وخدا شوية السقاطة بحال شيبس والحلوة والشكلاط..
كمل قرايتو ورجع لدار عيا مايدق فالباب ملي محل ليه حد خشا يديه فالجيب الصغير ديال الشكارة ضرب على راسو مالقاش الساروت ..نسا ما هزو معاه الصباح..حيد شكارتو وجلس فعتبة الباب كيتسنا باه يجي..حيت عرفو مشا بعيد ملي مالقاش الموطور..
فاقت تال 11 غسلات وجهها ونزلات تفطر من بعد صخرتهل مها تجيب ليها الملحة..قضات سخرتها وتمات راجعة ولا إراديا كتمشي عينيها لدارو حتى كتشوفو جلس فالعتبة حاط يديه على حناكو كيخمم مسكين..عيطات ليه بجهد ودارت ليه بيديها يجي عندها..دار ليها براسو لا وحرك يديه بنعنى جي نتي..ومشات عندو باغا تعرف مالو..
أيلول:مال الزين. جالس بوحدو..
رياض:عنيبة لاخرة..
أيلول:ههه مالك تتخمم
رياض:الوليد ماكاينش وكنتسناه يجي..
أيلول:يالاه معايا لدارنا تايجي باك..
رياض:بغيتي ضبري ليا فسلخة ديال العصاا
أيلول:أش غادي دير تسنا ندي الصخرة ونجي نبقى معاك تيجي..
رياض:صافي مشات..
مشات كتجري عطاتت لمها الصخرة ورجعات لعند رياض..جلسات حداه فالعتبة وبداو كيهضرو ..
أيلول:وفين ماماك تحل ليك..
دار ليها بصبعو تسكت..ضحكها وعاودات سولاتو..وهي واقفة مقابلة معاه..
أيلول:وفين خوك ! ماكاينش فالدار..
وقف فرحان كيشوف فشي حاجة وراها..
رياض:ها عبيقة جا..
نزل من الموطور كيشوف فيها ...تحنى على ركابيه باش يوصل لمستوى ديال ولدو..
رياض:ماشي خدمة هادي الواليد
عبيقة:صافي سمحليا أبابا مانعاودش..
حل ليه الباب دخل دار باي باي لأيلول ومشا دخل..وهي باقا واقفة كتشوف فيهم وكتحاول تفهم. كيفاش صدق باه ..يعني مزوج..ضار عندها عبيقة ..لقاها ساهية فااتجاه لتحت..
عبيقة:لا كتسهاي بزاف خاصك تحلي هاد المشكل..
أيلول:رياض ولدك..
عبيقة:اه ..مهم شكرا أختي حيت بقيتي معاه..
أيلول:ماشي مشكل..
وضارت غادا فحالها وكتهضر وكتحرك يديها.
ختك..ولاهيلا ختك يخوي ليك الضراس..ولدو صدق والد..ناري مزوج..
حتى دخلات لدارهم عاد دخل حتى هو بعد ما كان متبعها وكيشوفها كتحرك فيديها...

يتبع ...