الأرملة الصغيرة الجزء 18

يعقوب : (غمزة ) انا غنغسلهم لداخل غير خليك 

اميرة : لا غير غسل بصحة (بحشمة ) 

مد يديه وهيا كتخوي عليه. عينيه معاهاا وعينيهاا غا فشلال مدات ليه الفوطة مشاا كيمسح وهيا رجعت الكوزينة كتغسل الديسير... خرجتو حطاتو فوق الطبلة وجلست فوق الكرسي مقابلة مع يعقوب 

الحاج : وعيطي ليهم 

راضية : اسماء والله ماابغاات قالت مفيها لي ياكل خاصها غا تنعس وفاخيته قالتلي حتا لبلاتي 

الحاج : ومرات ولدك فين هيا 

راضية : بجوجهم طلعوا غداهم يتغداو مع رجالهم ولادهم حتا زياد وانيس طلعوا معاهم لفوق 

الحاج : وحشومة كاع عيطو البنت تجي تمد يديهاا

يعقوب : صافي اعمي غاا خليهاا هاديك كتاكل غاا بالرشوق (شاف ف اميرة ) عيطي لماماك تجي 

اميرة : واخاا.. 

راضية : غاا جلسي ابنتي راه مغديش تبغي ..سيري حدا راجلك بلاما تبقااي مقلزة على داك الكرسي عالي 

اميرة : لا غاا خليني هناا بحال بحال

الحاج : نوض ابنتي راك.معذبة تما.. 

ناضت اميرة ويعقوب كحز عطاهاا بلاصتهاا وضار عندها ب ابتساامة ..

الحاج : وسميو الله .. بنتي ولفتي شوية 

اميرة : شوية 

راضية : ناس الله يعمرهاا دار غا ولاد باب الله بسيف متولف معاهم 

الحاج : ايوا الحمد الله هادا لي كناا كنقلبو عليه 

يعقوب: كون هاني اعمي من جهتهاا حسبها كاع بحالا مزالة معاك فالدار 

الحاج : الله يكمل رجاك اولدي..

يعقوب : 📞تليفون كيصوني الله يسمعناا خير..

الحاج : جاوب جاوب اولدي 

يعقوب : الو سلام.. اه واخاا ...صافي ان شاء الله .. لا،لا كون هاني .. الله يعاون 

الحاج : ياك لباس 

يعقوب : والو باس غاا سي احمد قالي نجيبهم فعشية وصافي 

الحاج : تقلق بزاف ياا ولدي ايوا معندك لين 

يعقوب : نتغدااو ومور العصر نمشيو ان شاء الله 

الحاج : اللهم يسر... 

كياكل وداير راسوو ممسوقش مرة مرة يضرب اميرة لرجليهاا او يحط عليهاا رجليه جالس بحال فيه النعرة رجليه كيتهزواا بوحدهم.. من حتا اميرة كتاكل،معاه معذبة ومزيرة لا يدير شي ردة فعل تحشمهاا حدا اهلهاا... خملات طبلة ومشات غسلت المواعن ورجعت جلست معاهم متكية على صدر جداتهاا كيسمعوا لهضرتهم.. سمعت الغوات د لين مشاات طايرة لقاتهاا فاقت واسماء كتسكت فيهاا.. هزتهاا هياا ورضاعتهاا وخرجت كترضع وتراري بيها.. رجعت جلست حداهم شاف فيها يعقوب 

يعقوب : واش مبدلة 

اميرة : اه يلاه بدلت ليها

يعقوب : واخا ونوضي جمعي لي غتجمعي ولبسي حوايجك وجمعي لين امورهاا باش نمشيو 

راضية : غتمشيو داباا 

يعقوب : واا ماشي لخاطري اناا السيد هوا لي كيصووني وكيقولي نجيبهم اما اناا عادي

الحاج : راه بصح تعصب صافي الله يجعل البراكة نوضي اراضية قولي لبنتك تجمع شغلها باش تمشي تشوف راجلهاا. 

راضية : واخاا

ناض يعقوب كيلبس المونطو ديالو ويقاد فالكاشكول.. واميرة مشات لبست حوايجها.. حطات لين فالبطانية ولولتهاا مزياان وخرجت هياا واسماء. لقاات فخيته كتقااد لتامهاا.. سدت ليها اسماء الحمالة من اللور ومشات وقفت حداهم 

اسماء : (بالزعفة ) وانا دابا شغندير نرجع لدار ولا نمشي معاكم 

يعقوب : شدي ولدك ورجعي الدار حتا نهضر معاك .. 

خلاتو اسماء ومشاات دخلت البيت .. لبست صباطو وضار سلم على الحاج.. 

يعقوب : انا غنرجع على قبل داكشي لي قلت ليك 

الحاج : يكون خير مرحبا بيك وعلى راضية ودراري وهبط هروا الأول ..سلمت فاخيته واميرة وهبطوا موراه...

بقاا واقف فالباب حتا هبطو فتح الباب ل فاخيته وخوا ليها الطريق دوز .. وضار عند اميرة 

يعقوب : سدي موراك الباب 

اميرة : زياد عاد هابط 

يعقوب : حتاا هوا غيمشي وااخا... 

طلع هوا شد بلاصتو حنى باش يفتح ليها الباب من الداخل وهيا تفتحهاا من اللور وطلعت جلست حدا امهاا.. استغرب يعقوب وخلاهاا هكاك مقاليها والو.. هبط زيااد وجر الباب موراه حتا سدهاا حليه يعقوب الباب طلع حداه.. على براكت الله شد الطريق لفااس نيشان فاخيته مضورة وجهها فالشوارع غاا كتشوف بعينيهاا ويعقوب خدم الألعاب ف تليفون وعطى لزياد يلعب. اميرة معنقة لين لي نعساات ليهاا على صدرها كتحك ليهاا فراسهاا... ومتكية كتخمم ... طريق كلهاا وهوماا غاا الصممممت. من غير زياد هوا ويعقوب لي كيهضروا... وصلو لفااس 

يعقوب : (شاف فالمرايا ) منين غندوز داباا

فاخيته : ضور من ديك الرومبوان وسير على يدك د شمال

يعقوب : فين هاد،الرومبوان مكتباانش 

فاخيته : هااهياا غتباان ليك هناا هانتا زايد. 

بعد دقائق ..

يعقوب : واش هادي 

فاخيته : اه وضوور من هنا (كتنعت ) وسير نيشاان حتا غدخل فالزنقة .. 

يعقوب : واخاا.. 

بقاا متبع معاهاا وهيا كتنعت ليه حتا دخلو الدرب ديالهم... دراري كيلعبوو الكورة وناس كلها كيصااوب شغاالو والعشاابة والكزارة.. حي شعبي ! 

فاخيته : صافي حبس غاا هنا هاهياا الدار 

يعقوب : هادي ؟؟ (كينعت ) 

فاخيته : اه صافي 

يعقوب : واخا انا نباركي هناا .. 

وقف يعقوب عطاه زياد تليفون وخرج طااير دق فالباب حالو ليه الجيران وطلع لدارهم كيجري خرجت فاخيته جارة ساكها فيديها.. ضور عينو ف اميرة 

يعقوب : مالك من قبيلة ونتي كتمسحي دموعك ياك لباس واش شي حاجة !!

اميرة : لا مكاين والوو شغيكون 

يعقوب : هضري نيشان قوليلي مالك واش كاين شي حاجة خصك شي حاجة 

اميرة : لا والله مااخصني شي حاجة يلاه نهبطوا..(خرجت ) ..

خلاتو متبع خطواتها وهياا خارجة من الطوموبيل سدت الباب ومشات وقفت فباب دارت ليه اشارة ب راسهاا (زيد يلاه ) 

خرج وسد الباب وحكم الطوموبيل مزياان... 

يعقوب : فين واش هنا 

اميرة : لا حنا لفوق ف الثالت زيد 

يعقوب : (طالعين ) علاه هادي ماشي داركم 

اميرة : لا حنا بابا شرا غاا سكنة وحدة فالفوق وصافي اغلبية هنا فاس كيرهنوا ولا واحد كيشري سفلي ولاخر كيشري هواء زعمة الصطح ويبني فوق وهكاك 

يعقوب : امم هكااك .. واخا واش مزال عاد غنطلعوا !

اميرة : لا صافي هاحناا وصلناا .. هاا باب شتيه محلول.. 

يعقوب : ماعرف باباك واش تما ولا 

امين : وقيلة.. 

دخلت اميرة ودخل موراهاا يعقوب سد الباب شافت ف بيت ماماها لقاات الضوء مشعول الداخل وباب مشدودة وزياد فالحمام وصالون لي كيطل على الزنقة وسط الدار صغيرة خاويين. حنى لوذنيهاا يعقوب 

يعقوب : ماك مكاينش هناا وقيلة ! 

اميرة : معرفاش وقيلة خرج 

يعقوب : واخاا حتا انا غنخرج داباا شوية ونرجع ..

اميرة : فين غتمشي 

يعقوب : غاا هنى حطي لين فشي بلاصة راها معذبة هكاك 

اميرة : صافي واخا...

يلاه هوا هابط فالدروج وهوا يطلاقاا احمد طالع فالدروج هاز التقدية فيديه .. سلم ورجع هوا ويااه.. اميرة يلاه كتفسخ الحمالة وهوما يدخلو ضارت لقاات باهاا متقل.. حط داكشي ومشاات لعندو عنقااتو وجرت ليه يدو تبوسهاا حنى هوا على لين باس ليهاا راسهاا وجر يعقوب من كتافو

احمد : وزيد تفضل مرحباا دار داركم 

يعقوب : وداباا غاا خليني انخرج شوية ونرجع 

احمد : دوز تجلس صافي .. اميرة فين امك !

اميرة : فالبيت وقيلة 

احمد : وديرو ليناا شي كاس د،اتاي 

يعقوب : لا بلاش داباا خليناا حتاا لبلاتي هاحناا جالسيين 

اميرة : لي بغيتو.. 

مشات اميرة دخلات لبيتهاا حطات لين تماا وغطاتهاا ودارت ليها المخااد مع طرافها باش متقلبش.. خرجت جرت شانطتها دخلاتها معاهاا لبسات حوايجها وقداات زيفهاا.. خرجت دقت على ماماهاا دخلات عندهاا 

اميرة : ماما شكديري 

فاخيته : والو 

اميرة : ها بابا جا نوضي نجلسوا برا 

فاخيته : باغا تجلسي سيري خليني داباا.. 

حبست الدموع فعينيهاا خرجت وسدت الباب موراهاا دخلت الكوزينة لقااتهاا فايضة بالمواعن لي كان كيطيب فيهم باغاا المقالي محروقين وزاج مهرس والقشور مزال فلابابو...جبدات الصابون وجلساات كتغسل فيهم وتبكي وتمسح بكمامهاا.. تشلل ودير فالشبكة مخلات حتاا حااجة. هزت المقراج د الماء رداتو يطيب فوق البوطة وخرجت عندهم عينيهاا حومرر... 

اميرة : بابا ندير اتاي ولا قهوى..

شافها يعقوب طاير ليهاا وحس بيهاا كانت كتبكي وهادشي واضح على وجهها شوشااتو وبغاا يعرف اش كااين ولاحض الأم ديالهاا لي مخرجاات مجلساات معاهم مهضرت.. سكت وجاوب اميرة 

يعقوب : على حسابي اناا مديري والوو مخصنيش باك الاا بغااه ديريه ليه 

احمد : وهاحناا مجمعين ونشربو كاس 

يعقوب : الا بغيتوو انوض نوجدوا راسي دابااا غاا خليناا جالسين .. اميرة جلسي 

احمد: ايوا واخا جلسي ابنتي حتا لبلاتي .

اميرة : واخا..

مشات اميرة طفاات على المقراج وامهاا خرجت جلست معاهم فالصالون مركنة فالقنت مطلعة حواجبهاا رجعت اميرة حتا هياا جلست حداهم .. 

احمد : هياا غتعطل واقيلة 

يعقوب : غادي مع تيسير الله غنحااول ماا امكن يوجد ليها الوراق دغياا ونفك اموري حيت غنبداا الخدمة.. وخاصني منبداهاا حتا نكون ديتهاا فهمتي 

احمد : والله يسر ليك الأمور اولدي فاش غتخدم بعداا

يعقوب : الا كتب الله الطب 

احمد : هاا هياا عندناا طبيب ههه بلاما نبقااو نمشيو لسبيطار وشمن تخصص 

يعقوب : ههه الله ينجيك ، وشغادي نقولك انا تخصص ديالي هوا زرع القلب اصطناعي اصعب شيئ.. ونتبعو المريض واش خدام ليه القلب ولا لاا واش امور غاادا مزيان الخ...

احمد : مخليتي لياا منقول الحمد الله راك دمرتي بالمعقول

يعقوب : تكرفسناا تعذبنااا شلااااا يااا سي احمد ولكن بعد الضيق فرج وبعد التعب كنحصدو لي زرعناا كيف كنقولو هه 

احمد : الله معين بنتي وقيلة ديك التربية كتغوت 

ناضت اميرة كتجري مشاات لقااتها فاقت وكتبكي هزاتهاا ضماتها لصدرها كتسكت فيهاا نعسااتهاا على الفراش وتكات حداهاا.. طاح الضلام وفاتت المغرب ناضت فاخيته لكوزينة وجدات ليهم العشاء واتاي وحطاات كلشي وصلات 9 د ليل.. احمد دخل ليه يعقوب لخااطرو ورتااح ليه كذالك يعقوب دفى خاطروا فيه... تعمقوا فهضرتهم ودخلوو فمواضيع شخصية كترر... وفاخيته كتشقى وطالقة وذنيهااا كتسمع ..زياد تزندح فوق السداري نااعس.. 

دخلات فاخيته عند بنتهاا نوضااتها تعشى مبغااتش طالعة عليهاا السخاانة خلاتهاا ومشاات حطاات ليهم رجع احمد دخل عندهاا كينوض فيهاا مقدراتش خرجو وبقاات تماا بوحدهاا ويعقوب شااد تليفون كيصيفط ليهاا فالميسجاات واحد مور اخور. عطاااتهاا لبكااا حدااا لين كتشهق جاتهاا كبيرة من جوج جيهات...

نقب يعقوب شوية من العشى وبالو غاا مع الباب .. كيقول مع بالو هاهياا غتخرج هاهياا غتباان. والوو توخر اللور كيمسح يدوو وفمو وهوا كيجمع مع احمد. 

جمعت فاخيته طبلة كتخمل ويعقوب ناض حيد المونطوو ديالو وكشكول حطهم فالجنب وتكاا حداه 

احمد : ياكماا جاك النعاس 

يعقوب : وي شوية بديت نحس بالعياا 

احمد : وتنوض تنعس فالبيت داباا ولا !!

يعقوب : اه واخا .. نوض نرتاح باش نفيق بكري 

احمد : واخا راه سير اولدي تصبح على خير..

يعقوب : اه لا لا هداك بيتكم 

احمد : لا واخاا بحال بحال . ها المرا تنعس مع بنتها واناا غنعس هنا حداا زياد غا سير 

يعقوب : واميرة فين ! 

احمد : راها فبيتها صغيور. اولدي على قد الحال وصافي هانتا دخل نعس فالبيت ورتاح

يعقوب : لا صافي غاا سير انا غنعس هناا وصافي 

احمد : و...

يعقوب : وصافي بحال بحال غاا خليني هناا وصافي 

احمد : واخا انا نجيب ليك الفراش..

جمعت فاخيته مواعن حطاتهم فالكوزينة ودخلات لبيتهاا كتسنى راجلهاا حتا دخل عندهاا جر كرسي وطلع عليه فوق الماريو كيجبد المانطاات جداد.. حيدهم من ميكتهم وداهم ليه والبونجاات لقااه كيبدل حوايجوا لبس تيشورط فالبيض وسروال د كيطمى فالأكحل وتقيشرات... حط ليه الغطى وهز زيااد قادوو فبلاصتو وغطاه... دفع يعقوب الطبلة دالماكلة د الزاج وطبيلة صغيوة فوقهاا القرآن وصلاية... وجلس كيفرش بلاصتو طلق بونجات والبطانياات ودخل تكاا رجع عندو احمد 

احمد : هئ نعستي تماا معذب فرش فوق سداري 

يعقوب : لا هنى والله حتا مخير كااع مزياان 

احمد : واالي بغيتي 

يعقوب : هه معليش..،يلاه يصبحك على خير 

احمد : نطفي الضوء 

يعقوب : اه غاا طفيه صافي 

احمد : يلاه تلقاا الخير سلام عليكم .. 

مشاا احمد الحمام تعطل فيه عااد خرج دخل بالحس هز الصلاية من حدا يعقوب وخرج فرش فوسط الدار شااعل الضووء ضارب فالصالون لي فيه يعقوب .. صلا شحال وهواا كيركع عااد طفى الضوء ودخل لبيتو سد عليه...

ناض يعقوب جلس فبلاصتو متكي على جنب السداري .. شعل تليفون صيفط مسج ل أميرة شاف بلي المسج وصلها ومدخلاتش تشوفو صونى عليهاا عاد دخلت قرات المسج ديالو.. 

يعقوب : نتيي كااينة شي حاجة وضروري خاصك تقوليلي اش كاين حالك معجبنيش .. وزيدوون بغيت ندخل عندك وقالي باك حقى صغير ولا ماعرفت المهم حسيت بالزمتة والله... 

اميرة قرات المسج ديالوو هزت تليفون كتكتب وتمسح فعينيهاا 

اميرة : ماماليش ايعقوب معندي والوو 

يعقوب : شوفي غداا انخرجوا ونهضروا فالتيسااع وغتقوليلي اش كاين .. تعجبت فراسي مزوجين وكنهضروا بالميسجات بحال الشفاارة مراتي ومعنديش الحق فيهااا نجلس معاهاا ولا ندخل عندها 

اميرة : ماشي هكاك كل واحد علاش طبع وحناا عائلتناا هاكا .. واخاا يبغي بابا انا والله حتا غتجيني ناقصة تكون معاياا فبيت ..

يعقوب : علاه شفيها معامن غنكون انا 

اميرة : وغير كتجي فشكل يضنو شي حاجة عوتاني وصافي

يعقوب : ههه علاش شغاادي يضنواا ...واش من نيتك كتهضري بحال هاكا..

اميرة : vu 

يعقوب : وهضري 

اميرة : غدا ونهضر معاك صافي 

يعقوب : اوك... 

اميرة : يلاه تصبح على خير وسمح لياا بزاف...

يعقوب : vu.. 

حط تليفون حداه وتكاا على ضهروا كيخمم فشغاالوو... دازو سوايع حتا وصلت 2 د ليل تسمع غوات لين حل يعقوب عينو ومتبع الصوت هزاتهاا اميرة فيديهاا وخرجت كتراري بيهاا وتسكت دخلات الكوزينة توجد ليها البيبرون ديالهاا عطتو ليهاا كترضع ورجعت دخلت بحال حتا ولاا غاا سكات .. شوية عاد نعس يعقوب 

اصبحناا واصبح الملك لله...

فاق يعقوب على صوت الماء مطلووق فالكوزينة ماعن كيتغسلو.. حل عينيه بزز كيستوعب فين هواا وايمتا جا.. ناض من بلاصتو وجلس كيطوي الغطى حط منطات وحدة فوق وحدة وجمع البونجات حطهم فجنب جر صندالة لبسهاا ومشاا لحمام توضى وخرج كيمسح وجهواا. بانت ليه فاخيته كتصفي القهوة مشاا عندهاا

يعقوب : (وقف فالباب ) صباح الخير .نعاونك فشي حاجة 

فاخيته : صباح الخيير.. لا مكاين فااش 

يعقوب : لا معليش اري نخرج معاك الا بغيتي.

فاخيته : وا حتا يجي احمد راه مشاا يتسخر 

يعقوب: (كيضور عينو ) اميرة مزال ناعسة !

فاخيته : وقيلة فايقة ...

خرج يعقوب من الكوزينة ومشاا نيشاان البيت حلو لقاا اميرة كتلوي شعرهاا سفنجة ولين كتفركل حداهاا مبدلة. 

اميرة : (ناضت) يعقوب جيتي 

يعقوب : شد الباب ) ..

صباح الخيررر (عنقهااا ) توحشتك توحشتك 

اميرة : بابا هناا دخلتي حدااه !!

يعقوب : حناا ف باك داباا ولا كيفااش ...؟؟

اميرة : اناا غاا سولتك وصاافي 

يعقوب : وهاهواا كاين وهاناا داخل حداه شفيهاا كااع 

اميرة : وغير حشمت من باباا ونتا معاياا وصافي.. 

تزيرر وذنيه حمااارو وجهوا تخطف.. حنى على بنتو باسهاا وكيلعب ليهاا فيديااتهاا واميرة بالهاا متلوف.. 

هز راسوو شاف فيهاا 

يعقوب : (بصوت منخفض) سمعي الأمور كلهاا واضحة وضوح الشمس.. وعندكم كلشي معيق وعرفتي شغيجيك مليح.. خلي حوايج لين مجموعين عشية غنمشي بحالي وغنديهاا معاايا.. وصافي 

ضور وجهوا وخرج مع باب غادي جهت الصالون وفاخيته من كوزينة متبعااه بعينيهاا... سمع دقاان ومشاا يحل لقاا سي احمد. هاز ميكات فيديه..دخل وسد موراه الباب..ورجع جلس فالصاالون كيقلب فالجزيرة .. خرجت اميرة هازة لين فيديها دخلات الحمام دوزات على وجهها الماء ودخلت عند امهاا .. 

اميرة : ماما صباح الخير نقاد معاك شي حاجة..

فاخيته : الصمت.. 

شافت فيهاا حتا تغرغوا ليهاا عينيهاا بالدموع ورجعت قلبت الضورة مشات الصالون حنات على يد باها باستهاا ويعقوب شد منهاا لين كيلعب معاها ويهر فيهاا... واحمد واحل مع زياد كينوض فيه اميرة شوفاتهاا مركزة مع يعقوب وباغاا تفهم منو علاش قاليهاا هكاك وشنو سبب... خرجات فاخيته الفطور كتحط فوق الطبلة واميرة ناضت كتخرج معاهاا ..

فطر يعقوب عاادي عينيه فالتلفاازة وفالارض ومجمع مع احمد... اميرة هزات الكاس فيديهاا وتوخرات اللور وفاخيته ناضت لكوزينة طيب الغداا.. زياد جالس حدا يعقوب كيلعب مع لين ويمضغ... 

يعقوب : الحصول الله يخلف الله يجعل الباركة .... 

احمد : زيد كمل فطورك مكليتي والو 

يعقوب : لا صافي نخرجوا داباا شوية نشوفو دنياا كيف دايرة باش فعشية غنرجع لمكنااس نفضيو القضية د سعيد 

احمد : ايوا دخلتي بالخير.. الله يجازيك 

يعقوب : هادا مكان... اميرة نوضي لبسي حوايجك نتي ولين نخرجوا 

اميرة : واخا (مشات 

احمد : حتا تغداو وخرجوا 

يعقوب : ايواا جينا فالوقت نتغداو تعطلناا غاا تغداو بصحة 

احمد : ومجاتش تاني 

يعقوب : لا والله هاانياا المهم هاحناا جلسناا وتشاوفناا وهادا الأهم.. 

دخلات اميرة .. لبست عبايتها وشانهاا والليبوط عالي شوية. قدات لين طريبش ديالها وصباطها والمونطو ديالها ودارتها فالحمالة هزت صاكها فيه تليفون وبيبرون عامر لين وزيف وريااكة . وخرجت لقاتو كيلبس فصباطو .. 

خرجت فاخيته كتمسح يديهاا 

فاخيته : وحتا تغداو عاد خرجو مالك مزروب 

يعقوب : لا معليش غاا بصحة... يلاه اميرة 

مشا حل الباب واميرة تبعاتو هبطو فالدروج يلاه سمعوا الطوموبيل خرجت من الحومة وهياا تنوض فاخيته مع احمد كتعااود بحال الكاسيطة وهواا كيتصنت..

فاخيته : غاا قولي فين غنوصلوو .. واش درية مهزاش حتاا راسهاا وغتهز بنت ناس تربية دراري سااهلة حتا لهاد الدرجة !! 

احمد : ونتي سوقك عندك شي دخلة فهادشي بينها وبين راجلهاا داباا تزوجات لمن غيعطي بنتو يمشي يجيب وحدة خرا تربيهاا ليه ولا شنو وزيدون هناا هاهيا معاك ونتي انهاا هزي معاهاا وعاونيهاا ولهيه راه غتكون امو وخوتو 

فاخيته : انا منهزهاااا ماا سوقي ضبر راسهاا 

احمد : ضبري راسك نتي وديهاا فشغاالك وخلي البنت فخاطرهاا نهار ديتيهاا لمك وفرعتيلي راسي بغيت بنتي بغيييت ترجع لياا بنتي كنتي بحال ناس..ودابا هاهيااا حداك وفجنبك ونتي منكداهاا عليهاا 

فاخيته : داباا انا لي رجعت ممزينااش ياك 

احمد : حسبيهاا كيف بغيتي المهم سيد الله يعمرهاا دار ولد ناس مسمعنااا عيبوو ومنبغيو يسمع عيبناا وداباا سيري قضي شغلك راك طيبتيلي ربيب الوذن.

اميرة : فين غنمشيو 

يعقوب : نشموا الهواء فتيسااااع 

اميرة : مالك 

يعقوب : (بالزعفة ) مالك نتي وشكااين وكيفااش داير هاد ماماك واش هادا طبعهاا ولا غاا ...

اميرة : الصمت 

يعقوب : سيدة م.... مبقالي منقول هضرتها مقنزعة تصرفهاا كنحس كديرو غاا معايااا يمكن متقل عليهاا.. 

اميرة : لا ماش...

يعقوب : سمعي ربي عطاااناا عقل كنميزو بيه وراه كنفهموا بناادم واخاا تكون مااعرف مالهاا وفين واصلة ليهاا مغاديش تصرف هاكا واخا هادشي باااين كديرو غاا حيت لين غتبقاا معاك

اميرة : شوف انا بغيتها تبقاا معايا تونسني ولفتها بزاف وا.. 

يعقوب : واناا غنديهاا مفيا منسمع شي هضرة لي تخليني نتصرف تصرف غالط . غنمشي نقضي شغلي وغنرجع فمرا ونهني راسي من هادشي كامل 

ضورت اميرة وجهها لزاج وعينيهاا مغرغريين ومعنقة لين فصدرهاا وسكتات 

يعقوب : المهم فين نمشيو نبدلو الجو شوية واخاا كنت باغي نجلس معااك وندوز هاد الوقت لي بقالي 

ضارت عندو كتشوف فيه بعينين مدمعين ويديهاا باردين كيتهزوا..

اميرة : لين ولفت عليهاا وكتونسني بزاف انا معندي غراض بحد انا غنقد بيها ونهزهاا ونكون معاها عفاك خليها عندي وتيق فياا علاش تحرمني منهاا 

يعقوب : مغتقديييش عليهاا بوحدك واصلا مفيا لي يسمع شي هضرة 

اميرة : لا والله حتا ندير كتر من جهدي لين غتاخدها ونتا غتسافر معامن غنبقاا 

يعقوب : هكااك ويلا مقديتيش 

اميرة : غنقد باذن الله غاا عول ليا

يعقوب : واخاا يكون خير 

وقف يعقوب حدا واحد المطعم كبير شعبي معروف فاس دخلو ليه هوا واميرة شدو بلاصتهم بعيد على ناس والسيااح الأجانب لي تما.. 

يعقوب : معرفتش علاش عائلتك طبعهم غريب لهاد الدرجة لبارح قلت بحال والو يقولي شي حد سير دخل عندهاا ولا راه بيتكم فلاخر ناعس فصالون 

اميرة : تيق بياا الا قلت ليك كنحس بابا بعيد علياا بحالا شي شخص غريب والله العضيم هاك كيجيني ديماا كنحس با سيدي هوا بابا بصح . ودابا فدارنا صراحة وسمحلي منقدرش نكون معاك فبيت واحد سادين علينا والله حتا تجيني عيب 

يعقوب : ههه ااه غيقولو راهم كيديرو بسالة امم وقلة الحياء بااز ههخ 

اميرة : هه 

يعقوب : صراحة ولفت نشوفك كل نهار وليت كنتوحشك دغيا ومعرفتش بالضبط شحال غنبقاا تماا غيبقاا بالي كولوو معاك المهم غنصوني عليك كل ساعة نشوف اخبارك واخبار لين لي حتاجيتيهاا فنصيفطهاا ليك المهم دابا غناخد ليك الحليب ديالهاا لي بيسكويت لي كتاخد ليكوش كلشي. وغنخلي ليك 1000 درهم هياا لي عندي داباا بيدماا يوصل الشهر عاد نصيفط ليك 

اميرة : لا مكاين لاش انا مزال ليا الفلوس من داك المرا ومغنحتاج والو دابا 

يعقوب : ضروري تحتاجي متعرفي اش يبان ليك عاد 

اميرة : واش خدام وكتخلص 

يعقوب : علاش زعمة هاد سؤال بالضبط 

اميرة : لا متفهمنيش غلط انا غير سولت وصافي سمحلي

يعقوب : لا اناا بغيت نعرف غير زعمة علاش سولتي واش منين كيجيوني الفلوس وانا عاد غنخدم ههه هادشي علاش زعمة كتسولي 

اميرة : اه سولت حيت جاتني فشكل ودابا قلتي ليا ايوصل راس د شهر مفهمتش،

يعقوب : من بعد وغنهضروا فكلشي غنعاود ليك على شحال من حاجة.. بحول الله 

تغدا يعقوب هوا واميرة دوزو نهارهم غاا فالهضرة ملي كيهضر على سفر كتقج مع نفسها.. مشاو تقداو لين لي خاصها... وصلات العشية وتموا راجعين بحالهم وصلو لدار اميرة زادت فالأول ويعقوب موراهاا.. طلعوا الفوق واميرة كتمسح عينيهاا ممتيقااش من داباا شوية غيمشي ويخليهاا.. دخلو لدار لقات بااها يلاه فاق من نعاس وفاخيته كتخبز المسمن .. دخلت حطت لين تحبو فالأرض وجلست فالطرف .. حط يعقوب داكشي وجلس كيهضر مع احمد وكيتواادع هوا ويااه مشاا باس لين كيعنق فيهاا ودخل عند فاخيته سلم عليهاا يديهاا غاا زيت لوات ليه جوج مسمنات ورق الزبدة وعطاتهم ليه ياكلهم فالطريق. شدهم منها وخرج باس زياد وعطاه 50 درهم يشري بيها لي بغاا.. دموع اميرة تفضحوا والشهقة لي طالعة وتهبط فيها كتمسح عينيها ومقدراش تحبس عينيهاا ضورات وجهاا مبغاش تشوف فيه كاع. هز المحفضة ديالو وتم زايد عند اميرة مد ليها يديه وزير على يديهااا وهيا عينيها فالأرض .. 

احمد : نوضي ابنتي هبطي مع راجلك التحت 

اميرة : واخا ناضت فتحت الباب وخرجت هياا اللولة ويعقوب تابعهاا شد ليهاا فكتفهاا وصلو لطابق لقبل السفلي باسيو طويل خاوي ضورهاا عندو وعنقها بالجهد لصدرواا... بحالا طرطق نفاااخة انهاارت بالبكا فصدروا تجوبات معاها وعنقاتو وفمهاا كيدعي معاهااا وهياا كتشهق ...

يعقوب : مالك كتبكي دابااا علاش هاد دميعات 

اميرة : متعطلش عفاااك اهئ اهئ اهئ 

يعقوب : ههه اهاه نبقا معاك 

اميرة : اه بقاا اهئ اهئ 😢😢 والله غا بلاما تمشي 

يعقوب : ههه جابتهاا الضروف..غنتشااوفو قريبة احبيبتي الغالية وكوني على يقين ديما نصوني عليك وبالي غيبقاا معاك 

اميرة : الله يديك ف نجى الله ويرجك على خيرر ياربي 

يعقوب : امين دعي معاياا كتر محتااج لدعواتك.. 

اميرة : متوصينيش 

رجع ضمها لصدروا كيبوس فيهاا ويطمأنهااا. هبط مع الدروج وخلاهااا غاارقة فدموعهاا من بعد شوية مسحات دموعهاا وطلعات بحالهاا دخلت نيشان الحمام كملت على البكاا ديالهاا غسلات وجهها وخرجت لقات زياد كيلعب مع لين وباهاا متكي شاد تليكومند جلست حداه.. 

رجع يعقوب لمكنااس ف اسرع وقت. وصل كانو كيتعشااو كلا معاهم شوية ورجع جبد الموضوع مع سي الحاج وبصعوووبة كبيرة بالرغيب ومزاوكة عاد واقف .. طلعوه لسطح مبني فيه جوج بيوت وطواليط... باقين كوحل بالسيماا ديالهم... صونى يعقوب على سعيد يجمع امور ديالو وبعد ساعة يطلقاااو داكشي نييت لي كاان ... مشا عندهم طلقااهم هزين شواكشهم ورجعهم لدار.. دخلات سمية سلمو عليهاا غاا كريمة وحنان وعجوزتهاا مدات ليهاا يديها وسعيد بغاا يسلم على باه.. حرام الحاج واش على عينو فيه... حطو ليهم العشاء كلاو شوية وكل واحد شنو عطاتهم شي حصيرة ما يفرشو شي مواعن شي فراش وبونجاات فين يقاادو امورهم .وقف يعقوووب على جهد ليل كولوو وهوا مساندهم وكيصلح خواطر.... 

بعد 15 يوم.... 

فاخيته : وفطر دغياا ونوض سير لقرايتك ونتا ناعس ودغمة فمك 

زياد : اه هانا نايض 

فاخيته : سير نوض باك باش يقطعك الشانطي

زياد : اه هانا نايض

فاخيته : انوض تكعد تحرك دغياا ف ليل كتباات سااهر على افلام د جنون وفصباح تصبح كتشقلب بنعاس 

احمد : (داخل ).امالك معاه 

فاخيته : كنوض فيه باش ينوضك الحال غيمشي عليه وهوا كيتشقلب لياا هنا 

احمد : نوض تحرك لبس طبلية ديالك وجمع كتوباتك باش نوصلك.. 

زياد : واخا (مشاا

احمد : اميرة مزال مافاقت ! 

فاخيته : ايوا قول راهاا عاد نعست بايتة ليلة كلهاا وهيا فايقة مع ديك طفلة 

احمد : درناا غلط ياافاخيته لي خليناا بنت عند والديك هانتي كتشوفي بعينك الماكلة قليل فين تجلس معاناا الهضرة مكتهضرهاش ولات غااا هازة ديك الدرية مرة هاهياا فالبيت شادة عليها مرة هاهياا مقوندة بوحدهاا وحتا نتي زايدة معفرة عليها راعي شوية الله يهديك 

فاخيته : خليها تحس بترابي باش عمرهاا متمزرك من نهار مشا راجلهاا ماهياا ناعسة بحال الناس ماهياا واكلة بحال النااس هانتاا على عينيك كتشوف عينيهاا ولاو بالحواوق كوحل وضعافت كتر ماهيااا عليه كون راهاا ناعسة مرتااحة مهازة هم لوالوو مرة فدارناا مرة هاحناا هنا مخيريين كااع وهياا خاصهاا تهز ايواا هزي على قلبك..

احمد : جلسي مع بنتك سمعيهاا وتسنطي ليها راها محتااجة ليك نعلي شيطاان اهاد المرا واش هازة نحير مع بنتك صغيرة ومعارفة لوالو. نوضي نوضيها تجي 

فاخيته : ونوض فيقهاا نتاا 

احمد : تسليم.. 

فاخيته : اه حقى بغيت نمشي لدارناا نشوف امي مريضة وحتا سعيد بغيت نمشي نشوفو كيف ولا كتعاود ليا حنان ف تليفون صونات علياا ولا بحال محابسي شي لحية مغوفل وشي حوايج بحالا كان مدفوون فشي جايحة 

احمد : معندك فين تمشي جلسي فدارك يضبر راسو خلي حتاا تكون بعدا الحركة عيانة فالحانوت عاد نمشيو

فاخيته : ايوا جلس نتا انا غنمشي انا وزياد

احمد : ايوا وبنتك لمن غتبقاا واش عندك شي عقل ولا مت... 

(ضور وجهوا ) شاف اميرة خرجت من البيت شادة على فمها ...

احمد : شكاين ؟؟؟؟ مالهاا نوضي شوفي بنتك

ناضت فاخيته كتنيش عينيهاا دخلاات عندهاا لحمام كترد قلبهاا غاا طالع مشات شداات فيهاا واقفة حداهاا وهيا كتغسل فمها عينيهاا خاارجين حوومر وشنايفها مشققين وكيترعدواا غطيح فبلاصتها شدات فيها فاخيته جلساتهاا فوسط الدار متكية جا جلس حداهاا احمد كيحط يدو على راسها ويقيس يديها 

احمد : بنتي شوية مالك ياك لباس 

اميرة : كرشي كتحرقني والمعدة 

احمد : ياكما الحوت د لبارح هوا لي ضرك ودار ليك هادشي

اميرة : وقيلة. 

زياد : بابا غنتعطل 

احمد : فاخيته هانتي مع بنتك انا نوصل دري ونمشي الحانوت 

فاخيته : واخا غاا سير الله يعاون.. 

مشا احمد لبس حوايجو وصباطو وشد فولدو خرجو.. وفاخيته جالسة حدا راسهاا وتالفة هزت اميرة راسها وجلساات صدرهاا كيطلع ويهبط وسادة فمها قالبهاا طالع

فاخيته : مالك ياك لباس 

اميرة : معرفااش 

فاخيته : شنو كيجيك واش هادشي غاا داباا ولا كيفاش باش حاسة 

اميرة : المعدة ليل كولو وهيا كتحرقني وشدني الردان ف ليل بايتة غاديا جايا لحمام تجرح لياا حقي 

فاخيه : واش غير من الماكلة د البارح ولا شنوو 

اميرة : معرفاش انا كليت غاا شوية لبارح 

فاخيته : نوضي جلسي فالصالون انطبخ ليك الزعتر شربيه يعزف ليك المعدة .. يلاه نوضي 

اميرة : واخا.. 

ناضت فاخيته دخلات الكوزينة واميرة دخلات البيت طلات على لين لقااتها كتفركل فايقة.. مشات هزتها عنقااتها وخرجاات بيها شادة فالحيط الدوخة شداهاا جلست فالصالون كتبووس فيها وتلعب ليهاا فرجليهاا قطعت طريف د الخبز جبداات ليه لبابة ديالو كتغمس فزويتة وتوكلهاا والتلفاازة مطلوقة 2M .. داخت وعينيهاا تقلبوو شدت لين بيديهاا بجوج وتكات سادة عينيهاا حساات بالردة واصلة ليهاا الحلق حطات لين فوق السداري وناضت طايرة لحمام خرجات فاخيته هازة براد صغيور فيديهاا بقات واقفة حضيااهاا حتا خرجت شادة فكرشهاا وفمهاا هزت عينيها فاخيته لقاااتها واقفة حداهاا وزادت مشات لصالون جلست حدا لين شادة فيها 

كبات ليها فاخيته الزعتر فالكاس وعطاتو ليها تشربو 

شدتو اميرة فيديها ومقدراش تشم ريحتوو كدوخ...

فاخيته : شوفي حالتك كيف ولات واش مبقيتيش حاسة براسك فين غتوصل بهاد الريجيم ديالك غيبقااو العضومة يبانو فيك ليل ومطال ودرياا كتزوي شهاد الحالة لي رجعتي عليها بحالا فاايتة 30 عام يهديك الله

اميرة : الصمت 

فاخيته : عاجبك هاد الحال قلبي غيطرطق عليك وااحلة لياا فالحلق 

اميرة : اماما انا هضرت معاك انا باغا هاد البنيتة تبقاا معاياا وصافي وانا غاا مريضة وحاسة براسي مزيرة وصافي مفيا لا جوع لا والو وعفااك اماما صافي خليني ماشي كل مرة غتعاوديها ليها 

فاخيته : اهااه محسابليش وهانتي ربي وطيحي صحتك حتاا تبقااي طيحي على طولتك راهاا غتكبر وغتهز بيك والله لا كاانت ليك حتا تكون سميتك غاا مرت بااا الخير فهاد الوقت مينفع مع حد وداباا توقفي على رايي 

اميرة : حرام عليك اماما والله هاد البنت باش آداتك راها غاا ملاك صغير مزال معارفة والو علاش قلبك قاصح بحال هاكا انا مهمنيش تنفعني ولا لا. لي دار شي حاجة كيديرها لي وجه الله سبحانه وتعالى ومعرفنااا ربي باش غيختمهاا لياا كنت حاسبة غنبقاا معاك وغنكون مرتاحة ساعة حسيت براسي درت ليك التقلة 

فاخيته : ايواا الله يمسخك هادا منقوليك ملي رديتي راسك عندي تقلة مخليتي منقول ولكن سري انااا (كضرب صدرهاا) هازة همك وتقلك باش متعذبيش من بعد ولكن الله يزيدك هانتيي هزي على قلبك وربي وملي تمشي معاه الله يجعلك تلقاااي ولاد خرين وربي باش تاخدي اجر مضاااعف دابااا تلاا بيك وهاانااا فين قلتهاا ليك ودابا توقفي على رأيي وكلامي وتندمي ونهار تندمي منعرفكش.. 

ضورت فاخيته وجهها غادية واميرة كتبكي وتشهق وقلبهاا طالع ناازل كترعد فبلاصتهاا. 

اميرة : الميمة غاا رباتني وعمرهاا غوتات عليا ولا عيراتني ولا دعات فياا ولا ضرباااتني ولا قالت لياا شي هضرة تبقاا حرقااني وانتي امي عاد جيت وبغيت نبقاا معاك وملي وصلناا ونتي شوفتك حارة معايا محملانيش حتا لهاد الدرجة بنيتة صغيرة جاتك تقلة على قلبك ويلا حسنتي بيهاا ربي يحسن بيك ومااتعرفي جزائك. كنضن لو كنت بقيت مع الميمة مكانتش غدير معاياا هاكاا ديري جهدها وكتر باش نكون مرتاحة عمرهاا بززات علياا شي حاجة ولا خلاتني نبكي شي نهار عمرهاا فاقت وقالتلي ديري هادي ولا صاوبي هادي ولا فرضات علياا شي امر كتخليني على خاطري ملقيت اميمتي منقولك وماشي من عوايد نتجاوب معاك ولا نهز عليك صوتي غنقوليك الله يسمح ليك وصافي.. 

وقفت فاخيته حتاا سمعاات هضرت بنتهاا كلهاا وعينيها مطبوووخيين .. هزت لين فصدرهاا شاداهاا بيديهاا من ضهرهاا ودخلات البيت وسدات عليها...

يعقوب : ايواا يواا صافي غتهربي عليناا 

سميرة : وصراحة والله مساخية بيكم نتوماا عائلتي ثانية ودرتو معاياا كتر من جهدكم خصارة مغديش نلحق نتعرف على مراتك 

يعقوب : تشوفيها ان شاء الله ضروري.. دابا ايمتا عندك العرس هادشي جاك مزروب 

سميرة : وشغادي نقوليك ملي حط ربي خيرو حطو ف دقة وحدة هاحناا مشييناا غااا زايرين زدقت انا تخطبت وانت تزوجتي والحمد الله ههه العرس مزال شوية وقلت نجمع شوية لفلوس ونتقداا شي حوايج من هنى عااد نمشي 

يعقوب : المكاااتيب نعيااو منهضروا .. 

سميرة : لالة ربيعة مزال مغادي تجي 

يعقوب : غتجي فهاد اليومين قالت لياا ان شاء الله 

سميرة : واخا مزيان الله يجيبهاا على خير .. نخليك نمشي نشوف جميلة شكدير

يعقوب : واخا. 

هزت سميرة السينية د الفطور وداتهاا لكوزينة ويعقوب طلق رجلو فوق الكنابي هز تليفوون كيصوني على اميرة والوو جواب... صيفط ليهاا مسجات واحد مور واحد بلا رد يرجع يصوني زاد تشوش كتررر...

فاخيته بقاات كضور فعينيهاا وناضت مشاات لبيت بنتهاا يلاه حطت يديهاا على باب تحلهاا ورجعت بلور. دخلت جمعت الحوايج وداتهم تصبنهم 

دخلات اميرة لبيت شداات عليها من داخل وحطت لين وشدااتهاا على البكااا جاتها قهرة وقااصحة ،، حتا ناضت لين كتبكي لسقاات ليها الرضاعة فمهاا وكتخبط ليهاا فيديهااا حتا نعساات.. حطاتها وتكاات حداهاا كضور على اليمين وشمال مهناها حتا قنت محسااتش براسهاا حتا ساط فيهاا النعاس . فيقوهاا غا يدين لين كيدوزو على وجهها وكتبجغط حدااهاا حلات عينيها بالابتساامة وجرتهاا عنقااتها كتبوس فيها حنات كتشم لقااتها فيها الريحة.. حيداات ليها حويجاتها بشوية حلاتها غاا بتيسورط د خويطاات وليكوش غطاتها بليزار لي تما ودارت ليها المخدات مع جنابهاا باش متقلبش وناضت حلات الباب دوزت عينيهاا لقاات مكاين حد غاا المكينة خدامة فالحمام هزت بانيو فيه الماء ورجعت البيت سداتو وجبدات كلينيس بدات تحيد وتمسح ليهاا لبسااتها حويجات خرين .. هزاتها فيديها وهزات حويجاتها وشان طويل وخرجات داتها لصالون حطاتها فوق الزربية شدات ليهاا رجليها بداك الشان مع الطبلة ومشات الحمام حطات دوك الحويجات فلابابو خوات عليهم الماء ورجعت البيت هزات داك البانيو ورجعت الحمام شدات الصابونة وبدات كتصبن دوك الحويجاات شلالتهم دغيا وعصراتهم سمعات البكاا د لين ومشاات طايرة لعندهاا لقاتها طاحت جلست كتسكت فيهاا وهيا دخل فاخيته دايرة لتامها هازة شبكة دالحوايج فيديهاا وبانيو حنات اميرة عينيها ملهية مع لين وفاخيته كتشلل رجعت خرجت بشبكة خرا عامرة خلات الباب مشقق وطلعت السطح تنشر.. حلات اميرة السرجم كتشوف وتبلاني دير حبل صغير تنشر فيه .. طلقاات القرآن لين ومشات الحمام لقاات الحوايح مكينينش عرفات امهاا لي هزاتهم رجعت جلست فبلاصتها كتخمم اش غدير واش دخل بحالها ولا تبقا جالسة شوية وهيا دخل فااخيته تاني حطات الشبكة ومشات رمات جلابتها ولتامها ودخلات الكوزينة حطات جوج طريفات دجاج مخضريين بالقريعة وبطاطة وخبز فشبكة ودخلات كتحط فوق الطبلة مشات جابت لماء ورجعت.. 

فاخيته : نوضي تغداي 

اميرة : لا مافي...

فاخيته : هزي البنت من الأرض وزيدي تغداي عصر وذنات ونتي محاطة فحلقك والو .. 

فسخات اميرة رباط لين ومشات جلست مقابلة مع امهاا حطااها فوق رجليها كتغمس وتاكل وتعفس لين بطاطة وتوكلهاا وفاخيته عينيها طالعة هابطة مع بنتهاا وبتصرفاات لي كدير مع لين ...

تغدات اميرة هياا وامها وعمرات لين كريشتهاا ناضت اميرة هزاهاا غسلات يديها وغسلات ليها وجهها... ورجعت طلقتها فالصالون كتحبو حتا كتوصل الباب وتبغي توقف واميرة كتمشي ترجعهاا نفس الشي حتاا سمعو الدقاان ناضت فاخيته تحل لقاات جارتهاا جايت ولدها من المدرسة وجابت فيديهاا زياد...دخل نيشاان رمى شكارتو هز لين كيبووس فيهاا ويلعب معاهاا. شدت فاخيته الباب وجلست غاا سكات شي مكيهضر شي حتا طااح الضلام وجا سي احمد من المحل ديالو .. حنات اميرة على يديه باستهاا سخنات الماكلة وحطات 

احمد : لا غا بصحة عاد كليناا قبيلة 

احمد : وغا زيدي شوية اجي 

اميرة : لا والله مااخصني صافي.. 

بقااو جالسين مرة يهضروا مرة يسكتو.. حتا حساات ب لين عيات وترخاات باللعب مع زياد .. ناضت سخنات ليهاا الحليب عمرات ليهاا بيبرون ديالهاا ودخلاتهاا عطاتها ترضع فبلاصة نعست. غطاتها اميرة تفكرات تليفونهاا خشات يديها تحت المخدة جبدااتوو لقاات مكالماات بلا حسااب والميسجات مسطرين. صيفطات ليه مسج ..

اميرة : 💬 سمحلي مسمعتووش ومرديتش البال والله كيف مدوز نهارك لباس...

كان ناعس غاا سمع مسج ديالها وفيبرو ناض حال عين كيشوف. دوز المكالمة وشد عينيه كيهضر 

اميرة : سلام 

يعقوب : غاا قوليلي داك التليفون لاش صاالح ملي نهار كولو مشفيه زعمة مسمعتيش كيفااش هاد القضية ديالك 

اميرة : سمحلي ماشي بلعااني ومع عيانة شوية هادا مكان 

يعقوب : ياك لباس مالك شنو 

اميرة : لا والو غاا المعدة دراني وصافي

يعقوب: امم ميكون باس واحد بنتك فين هيا 

اميرة : هه ناعسة حداياا 

يعقوب : بصاااح امم. وباغي نشوفكم بجوج يلاه هانا نتسنااك تصيفطلي شي حاجة . وعنداك تصيفطيلي بحال داك النهاار ملوية عليك داك الشان بحال يمانو حنى هه 

اميرة : هههه ولا داك نهاار كنت مدوشة وشعري مزال فازك داكشي علاش

يعقوب : يلاه هانا نقطع لابيل بيدمااا نشوفك ونخضر عويناتي عاود نصوني عليك نهضروا شوية باش نعس 

اميرة : واخاا

ناضت جبدت مرايا من جنب الماريو حطاتها فوق نموسية مكاليااها بالمخااد جمعات شعرهاا لي كان مشعكك وقدات حوايجها وكضور فوجهها ... حطاتها حلت الكاميرة وحنات جنب لين دارو جوج صور ورسلاتهم ليه كان .. "اون لاين " يلاه وصلوه فالبلاصة شافهم وهيا كتسنى ردة الفعل ديالو وصونى عليهاا 

اميرة : الو 

يعقوب : مالك وجهك سفر وشاحب قولي باش مريضة 

اميرة : لا غا مرة مرة كتنوض المعدة تحرقني وصافي

يعقوب : صافي 

اميرة : اه صافي 

يعقوب : ومالك وجهك هاكا واش مكتنعسيش مكترتاحيش ولا مالك 

اميرة : لا كنعس غا بعد مرات كنتعطل مع لين وصافي 

يعقوب : اولا متبقايش تنعسيها مع المغرب.. من العصر لور خليهاا فايقة واخاا تبكي ولفيها هاكا باش ف ليل تنعس صافي 

اميرة : واخا . وفقاش غتجي

يعقوب : داباا شبان ليك 

اميرة : بصح اجي ليت توحشااتك 

يعقوب : امم و مامااهااا 

اميرة : ...... الصمت !!!!!!!!! 

يعقوب : مجوبتينيش

اميرة : حتا هيا 

يعقوب : زعمة امم 

اميرة : والله 

يعقوب : هههههه الله اكبر مزيااان خبار د سعد هادي،

كتهضر معاه وكلها شوق ليه لشوفتو لهضرتوا تعامل ديالو معاها.. رسل ليها صورتو فبلاصتوو كتشوف فيهاا ودموع هابطين مكورين ليها من عينيهااا . استأذن منهااا ينعس حيت غينوض فوقت مبكر بزاف مسخاوش حت يقطعوا المكالمة .. عنقات اميرة لين ونعسات وبقاات على نفس الحال مع امهاا لي مضرورة من جيهتهاا وفنفس الوقت كتجرح بنتها بكلماتهاا اميرة كتبردهاا غااا فالبكاا دخل وتسد عليها كتقاابل لين وتنوض تشقى مع امها وزاد شقى الكتر والزعفة كتر ملي جاو اهل احمد امو وخوتو ولادهم من العروبية يجلسوا عندهم شي ايمات ويبدلو الجو .. اميرة مرة تهز تحمل لين فضهرهاا وتنوض تشقى بيهاا ومرة تنعسهاا عاد تمشي ومرة كتخليهاا كتحبو حداهم ب ليل مكاتنعس وفالصبااح خاصها تنوض بكري تشوف ماا تقضي جداتهاا عياات ولات غاا متكية وخوت احمد ملي كترشق ينوضو يعاونو ملي مترشاقش هاهوماا تماا متكيين ... اما يعقوب ليه الله تليفون كيطيييب بالصوني وشكون يجاوب مرة تجاوبو ف ليل مرة مع عيااا وشغل كطيح دودة حتا لين كتفيق ب ليل وتبداا تنبش ومكتحسش بيها حتا كترجع تنعس راسهاا... داز الوقت شهر و20 يوم كتزيد اميرة تغم كتر ماا هياا مغمومة ومزموتة فدارهم متخرج بوحدهاا متخرجها امهاا هاهياا تماا..مشاو عائلة بحالهم ورجع الجو هادئ ولات لازمة غاا الصمت مكتهضر مع حد ما كتكلم حد ودموع ولاو باينين كل ساعة كتشوفهاا فاخيته كترعد وتشهق بقوة البكاا كتحس بيها مضرورة وهاازة فقلبهااا بزاف ومكتقدرش تقرب ليهاا ولا تسولهااا... صباح نهاار مشمس وفاخيته كتهز فالسدادر وتخمل وتسيق فاقت اميرة على عادتهاا بدلات لين حويجاتها وخرجتها هازاها فيديهاا وكلاتها شوية وحطاتهاا حدا زياد مقابلها وناضت تعاون امهاا فالتسيااق سلاو ودخلت الكوزينة دارت جوح مقارج د الماء يسخنوا دخلت لييتهاا هزات حويجااتها وفوطة ومشات دخلتهم الحمام حطاتههم فجنب جلست فوسط الدار حدا خوها ولين كيلعبو هزت شوية د زيت كذهن راسهاا بيه وتفك بالمشطة كولو مخرص معقد تقول المشطة شحال مدازت فيه ..شافتها فاخيته واحلة هزات مشطة د القرن وزادت عندها جلستها فالأرض فوق المخدة وجلست هيا عالية عليها كذهن ليهاا الزيت وتسرح ليهاا شعرها بشوية حتا فكااتو وهيااا كتنكر حتاا تسرح لواتو ليها وجمعات ليها الكزة دالزغب لي طاح من راسهاا .. هزت داكشي ومشاات الحمام كطلق الباارد وتقااد بلاصتها رجعت الكوزينة لقات الماء طلق السبولة هزات واحد دخلاتو وتبعااتها فاخيته بلاخر... حطاتو ورجعات الكوزينة توجد غداهاا. يلاه عرات حوايجها وبدات تخوي عليهاا الماء دوش وهيا تسمع لين كتبكي ناضت جمعات شعرها ولبساات البينوار وتمات خارجة لقاات امهاا هزاهاا كتسكت فيهاا 

فاخيته : علاش خارجة كملي تدواشك راها ماشي فالزنقة 

اميرة : واخا. 

حماروو ليها خدودها فاخيته وجاتهاا ناقصة بعدما خرجات الهضرة من فمها وفلاخر بنتهاا كتشوفهاا هزة البنية فيديهاا ولات كتسرط الريق بزز... نعسااتها فيديهاا ودخلاتهاا غطاتها لقات تليفون محطوط فوق النموسية شافت فالباب وحنات هزاتو يلاه دوزتو بيديها وهوا يتحل مشات نيشان لصور لقااات عراام تصااور د يعقوب لي مصيفط ليهاا ولي مصيفطا ليه ولي مصوريين ف طنجة و تطوان وطريق وبجوج بيهم ويعقوب معنقهااا لصدروا.... بكااات بدمووع سخااان حساات انو بنتهااا جاها الحب جديد لي غيخليهاا تنسى امها وتولي منفعااش حساات بتأنيب الضمير من البعد.. لي كان بينهاا وبين بنتها.. و من جهة اخرى تصرفها الجاهل لي دارت معاااها حطات ليها تليفونهاا فبلاصتو ومشاات عندهاا دخلات شافتها اميرة وهياا تكمش فبلاصتهاا وكتغطي راسهاا... هزاات فاخيته الكيس وجلست كتحك لبنتهاااا وتهز ليهاا يديها تحك ليها من كل جهة فضهرهااا ويديها هزت الماء شلالت ليهاا ودوزات ليهاا الصابونة وخرجت...

فرنساا #باريس

يعقوب : لا امي شي حااجة تماا ميمكنش شحال وانا نصوني وهيا مكتجاوبش لا ليل لا نهااار 

ربيعة : شوشااتني والله شوفهم فين وصلو 

يعقوب : هاانا كنصوني..📞....

الو 

نزهة : اولدي لباس 

يعقوب : الحمد الله فين وصلتو 

نزهة : مبقااش ليناا بزاف ونوصلو غاا تهنى اولدي 

يعقوب : شكون مشاا معاك 

نزهة : غا انا وسليماان 

يعقوب : واخاا الله يوصل،على خير ومتعطليش عليااا اخالتي باش مكان جاوبيني 

نزهة : ان شاء الله اولدي سلام عليكم ... 

بقاا يعقوب كيضور وبالو مع تليفون كل شوية يشووف وربيعة هازة كفوفهاا لسماء كتدعي فنفسها... 

#توجطات

الحاج : اسئل الله السلامة 

راضية : زرب الحاج الله يهديك راه عقل ديالي غيخرج على بنتي 

حنان : و كيف وقع ليهاا 

راضية : شكون عرف قالك جات لابيلانس داتها عييناا منصونيو والو تواحد مكيجاوب فين غتمشي الحاج 

الحاج : وقاليا احمد ف سبيطار المركب راه ف طريق صفرو 

راضية : الله على بنتي يعلم الله اش بيهاا وشطرا فيها 

حنان : صبري اخالتي مبقااش بزاف ونوصلو .. 

نزهة : صوني عليه اولدي نشوفو فين كاينة دارهم 

سليمان : واخاا.... 

📞...

يعقوب : وي 

سليمان : دخلناا لفااس ولكن فين غنمشيو معرفنااش الدار 

يعقوب : اووف مغنعرفش حتا كيف نعت ليك المهم حبس انا نعاود نصوني عليهم ..

سليمان : واخاا. 

يعقوب : انقيلوو حنا غاا ف الصوني ليووم...

📞.....📞...... 

والو مكتجاوبش 

ربيعة : عندك نمرت باهاا ولا امها 

يعقوب : انا غنصوني على باهاا نشوف ..📞... 

فاخيته : الو

يعقوب : سلام انا يعقوب 

فاخيته : اه لباس 

يعقوب : نتوما واش ياكو لباس من لبارح وانا كنصوني على اميرة مكتجاوبش ليل نهار واش مكتهزش تليفون ولا مالهاا مبغاش تجاوب

فاخيته : ايوا شغادي نقوليك راه لبارح جبناها لسبيطار راه حالتها مفيها ميتشااف...

يعقوب : شناهوااا ياك لباس علاش سبيطااار شطرا ليهاا 

فاخيته : والمهم بلاتي شوية عاود صوني انا داباا راني هازة التقل وفشاارع معندي كيف نعاود ليك 

يعقوب : وشمن طبيب هياا بعدا فيه ! جاوبي دغياا 

فاخيته : فالمركب الحسن الثاني 

يعقوب : فين جاا فين كاين هاد المركب 

فاخيته : طريق صفروا حدا تيران 

يعقوب : وقوليلي مالهاا بعدا عاد قطعي 

فاخيته : انا ندخل لسبيطار ونهضر معاك نعاود ليك 

يعقوب : يلاه واااخااا. (قطع..

قطع يعقوب واتصل ب سليماان وعلموا يمشي لسبيطار ويخبروا بلي كاين كان سليماان قريب من تماا وقلب الضورة حتا وصل لتما دخلو هوا ونزهة كيسولو الفرملياات يلاه فرملية كتنعت ليهم وفاخيته شدت ف كتاف نزهة ضارت عندهاا عنقااتهاا وكطبطب عليهاا وكتسولهاا اش طاري هز معاها سليمان بطاانية وشاكوش فيه الماكلة وحوايجهاا جرتها فاخيته لي محملة لين فضهرها ودايرة عليها البطانية .. بلاما تهضر معاها طلعوا الفوق وجلسوا ف الكراساا لي فالكولوار سليمان مشاا سلم على احمد لي واقف حدا الدروج جلسوا كيهضروا .. 

نزهة : قلبي تهز يااا بنتي شكاين مال اميرة علاش جبتوها لسبيطار

فاخيته : كانت كدوش خير سلام نعست ليها البنت ودخلت عندهاا حكيت ليها خليتها كتشلل وتلبس حوايجها وخرجت مدوزت والو حتا كنسمع داكشي تخبط الأض بقيت كنعيط ليهاا اميرة اميرة والوو مجوباااتش طرت من بلاصتي باش دخلت كنلقا الدرية طايحة الأرض لابسة غاا سروالها بيض وتريكو ديالو وملوية على راسها فوطة مزويااا مقدراتش حتاا تغوت شادة فكرشهاا وسيااحة الدم هابطة منهاا مشيت باغاا نهزهااا باغاا نسولهاا مالها عااد بداات كتغوت وتوجع وشادة فراسهاااا تلفت شغندير ومعامن غنهضر بقيت كنجر فيهاا 

نزهة : يا لطيييف يا لطييف 

فاخيته : شديتهاا كنجر فيهاا حتا لبراا وهيااا كتعرعررررر لربي لي خلقهااا كتقولي امي رجلي امي كرشييي مفيدي غاا خليتها وعيطت لباهاا من تليفونها قلتليه جيب لابيلانس واجي هزيت بينوار ديالي لبستو ليها سترتها بعداا وبقيت شادة فيهاا حتا طلعو هزوها وهبطوها ودرياا فاقت من جيه عيطت غا لجارتي هزتها لياا واناا سيقت داكشي دمياات مكلكلة مشا معاهاا باها عاد تبعتها انا .. 

نزهة : ويااك لباس شقالو ليكم

فاخيته : خصرت وتهرست من رجليهاا 

نزهة : اقلبي وشحااال ضرني لا حول ولا قوة الا بالله يااا بنتي ومسكينة متستااهل .. 

فاخيته : صدماااتني مقدرت لا نرجع لدار ولا نشوف فيهااا متيقتش كاااع واش كانت حاملة كنسولهاا ونعااود اش داهاا كااع تركب على قبوو (الصورة 👇🏻) حتاا وصلات لهادشي

نزهة : ايناا قبو منين طاحت بعدا وشكان خاصهاا 

فاخيته : قبو عندناا فالحمام كنديرو فيه البوطة الا كناا غنسخنو الماء وفوق منو لابابو طلعات لتماا قالت ليك ياا لالة بغات غاا طل على السدة تجبد الصابون بلدي .. واش هادي عندهاا شي عقل ولاا متكسااابو 

نزهة : مفهمت والو ايناا سدة وكيفاش طلعت تقلب 

قاخيته : فالحمام عندناا سدة صغيرة كنحيدو فيها البكاج لي مضيق عليناا ايوا هياا طلعت لتما تشوف 

نزهة : واش مكنتوش عارفينهاا حاملة ولا شنو 

فاخيته : ديماا كنشوفهاا كترد مديت ماا جبت هيااا ديماا كضرها معدة وكدير ليها الدوخة وتقية انا هاداا مضنيت كاعماا طاح لياا ف بالي غتكون حاملة 

نزهة : امر الله وصافي ورجليها شقال ليها 

فاخيته : شغيقوول ركبو ليها صبااط ديال الهرس من البارح وهيا منشورة عاد اليوم ف صباح جاا الطبيب دار ليها الكبص.. ها امي جاات

راضية : بنتي بنتي (عنقااتهاا ) الله ياابنتي ومالكم اش طاري مال بنتي اميرة شطاري فيهاا.. 

جلسوا عودات ليهم فاخيته كلشي .. وكلهم تأزموا من جهت اميرة. ناضت نزهة عند ولدهاا عطاها تليفون وخرجاات برا تهضر.. خرجت الفرملية عندهم... 

فرملية : وقت الزياارة لي بغاا يشوف مرضى ديالو يدخل .....

دخلو عندهاا وكلهم ملهوفين باش يشوفوهاا يلاه حلات عينيهاا وكتنيين من شدة الحريق لي فيها وجهاا شااحب وعينيهاا طايبين. كل واحد كيعنق فيها من جهة ضارو عليهاا جالسين على البيااص وكيسولوهاا كيف بقاات ..

سمع يعقوب الخباار تشوكاااا مااعرف راسو باش تبلاا سد عينيه مد لموو تليفون تكمل الهضرة مع نزهة وجلس قبالتهاا فوق الكرسي داير يدو على وجهواا.. و ربيعة غاا كتستلطف.. كملات الهضرة مع نزهة وحطات التليفون فوق الطبلة

ربيعة : لا حول ولا قوة الا بالله العلي العضيم ازمتني يعقوب شغدير اولدي غتمشي 

يعقوب : الصمت 

ربيعة : قدر الله ما شاء فعل مكتاب عليها مسكينة 

هز يعقوب تليفون وعاود صونى على فاخيته ....

فاخيته : نعام 

يعقوب : هيا حداك 

فاخيته : اه هانا ندوزها ليك 

اميرة : سلام عليكم

يعقوب : سلاام شوية داباا كيف بقيتي 

اميرة : الحمد الله

يعقوب : حاولي على راسك وها خالتي نزهة غديك معاها منها تقابلك ومنها تقابل لين بيدماا نجي وتبع ليك مع طبيب 

اميرة : معرفاش 

يعقوب : انا غاا علمتك المهم انا غنهضر معاهاا ترجعك معاهاا ملي تخرجي

اميرة : واخاا. 

يعقوب : الله يزيد فراحتك.. (قطع 

عاود يعقوب اتصل ب نزهة خرجت برا تهضر معاه قال ليها لي كاين وفرحاات بزااف بهادشي.. رجعت دخلت عندهم.. يلاه فاخيته كتنقي لبنتهاا البنان وكتعطيهاا وهياا جلساات ضااحكة وشافت ف اميرة 

نزهة : غتمشي معااياا عاد قالهاا لياا فرحني بزااف 

ضارت عندها فاخيته وجهها مغوبش 

فاخيته : كيفاش فين غتمشي معاك 

نزهة : يعقوب قالي نديهاا معاياا ل رباط ... هيا ولين نقابلها ونتبع ليهاا مع طبيب .. 

فاخيته : ومال......

يلاه فاخيته بغات تهضر ورجعت قبلت وجهها شافت ف بنتهااا سكتات وخرجت البرا... انتهت زيارة ودنياا بدات كتخواا بقاات واحلة فاخيته على بنتها واش غتباات معاهاا ولا تمشي تاخد ضيافهاا لدار وتقابل لين. فكراات حتاا عياات خلات حنان معاهاا سلموا عليهاا ومشاو لدار ضيفاات ناس لي عندهااا عشاتهم وفرشاات ليهم عاد دخلات لبيتهاا ولين معاهاا كترضع فيهاا.. شوية وهياا تسمع تليفون اميرة صونى يلا قالت الو وهوا يقطع ..

فات الفجر باقي الضلام خلات فاخيته لين ناعسة وناضت الكوزينة دخلت وسداات عليهاا وبدات كتوجد الفطوور بشوية بلاماا تقرقااب باش متنوض حد.. سلقاات البيض وطيبات الخليع لي كيعجب بنتهاا. عمرات ليها ترموسة حليب وفالرومااج والخبز الدار وطرف دالحرشة سخونة ملوي ف زيف جمعات ليهاا فطورهاا حطاتو فجنب .. وقدات فطور ضيافهاا كانو بداو يفيقوو عطاتهم الماء سخون باش يطرفوا.. والفوطاات حطات ليهم الفطور كلاو لي قصم الله وناضو تاني شي مشاا ياخد ليها الفطور وشي بقاا فدار يطيب الغدا حتا لساعة د زياارة فعشية عاد يمشيوو.. 

متكية فبلاصتهاا غاا كتستغفرر وتبكي ممتيقاااش بلي كانت حاملة وخسراتو جاتهاا غاا بحال الكذبة ولا غاا هضرة محساااتش براسهاا الدموع هابطين شلال والوجع د رجليهاا لي تنفخاات ليهاا وعاطيااها الحريق حتا الفخض فشلاتهااا فمراا بالهاا غاا مع يعقوب .. واش ساق خبار ولا،لاواش عرف ولا مزال... جابو ليها الفطور كلات شوية ورجعت تكات

.. بقاات بوحدهاا غاا مع المرضى لي فوق البياص ديالهم كضور عينيهااا فيهم وترجع تشوف حداهاا. حتا داهااا نعاس... وصلات وقت الزيارة دخلو لقاوهاا ناعسة 

.. جلسو حداهااا بلاما يهضروا حتا فاقت على خاطرهاا دوزو نفس الشيئ زيارتهم ومشااو بحالهم صافي علموهاا تخرج لاغدا من سبيطار باتت معاهاا راضية . ليل كولو وهيا مقابلاهااا وحاضيااها لا تفيق،ف ليل تبغي تمشي لطواليط.. حتا صبح الصبح شافهاا الطبيب وعطاهااا بعد 2شهرين ترجع عندو.. شدو الورقة دالخروج..

جلسوهاا الفرملياات فوق كرسي متحرك وعائلتها كيجمعوا ليهاا حوايجهاا هبطوهم من سانسورط حتا وصلو لقاع مشاو لطوموبيل طلعوا اميرة هياا اللولة عاد طلعوا حداههاا .. وخرين شدو طاكسي تبعهم....

وصلو لدار مقدراتش طلع فالدروج هزهاا سي احمد بين يدو وهياا كازة على سنانهاا الحريق دالتحت والحريق د رجليهاا...طلعهاا بشوية لابسة بينوار مشان غليض مغطياا بيه راسها... سبقاتهم فاخيته حلات الباب وشعلت ضواو ودخلو ناس ... حطها احمد فوق السداري لي ف صالون قدات ليها فاخيته جلسة ديالهاا ومخدة مور ضهرهاا غطاتها من البرد جلس حدا راسها الحاج يعنق فيها وكيبوس ليها جبهتهاا واميرة دموع هابطين ليهاا مع جناب عينيها...وساكتة كتهز غاا راسها...شوية سمعوا الدقاان .. حلات فاخيته الباب لقات جارتها لالة خناتة هازة لين فيديها ويد لاخر هازة طبسيل دالحلوة سلمات عليها شدات منها لين ودخلاتهاا الصالون رجال خرجوا جلس فالوسط الدار وعيلات الداخل .. دخلت جارتهم سلمات على اميرة وجلساات حداهاا. واميرة فتحت ذرعاانهاا لين مكلاتها ليهاا فاخيته كتبووس فيهاا وتعنق ..

خناتة : يااا لحبيية وكيف بقيتي شوية داباا .. يحاسبي حتاا شويتيني بحال بنيتي..

اميرة : قدر الله اخالتي معندناا منديرو الحمد الله على كل حال كيف دايرة نتيا وليداتك 

خناتة : ايوا الحمد للواحد وحدو ياا بنتي... فاخيته بحال والو ياا خيتي يجيو جيران يطلو على بنيتك اليوم 

فاخيته : وشكون غيجي كااع 

خناتة ؛ ايوا لي ميطيح على بالك يجيك 

فاخيته : اها غاا بالوجهياات ميجي عندي حد الالة مباغاا تبركيكة لي غتجيبولي تخليه فدارها تخلي غاابنتي تسنت على عضامها 

خناتة : وااياخيتي انا مقالي حد غا علمتك وصافي وراه صبح كولو وانا نخبز ف رغيفاات ودرت واحد جوج شكيلات الحلوة تعاوني بيهم مع ناس لي غيجيوك 

نزهة : كتر الله خيرك هاكا يكونو الجيران 

فاخيته : هادي صحبتي وبحال ختي كااع كتعاوني ديماا فالصغيرة والكبيرة 

نزهة : هادا المضمون فيهاا 

..اميرة داباا باش حاسة 

اميرة : كضرني رجلي اخالتي بزااف وكتوزوز 

نزهة : الحبيبة غاا صبري اووف مأزماني والله 

خناتة : هداك ابنيتي غااالجبص كيوزوز ليك تماا غيفوتك ومصااب غاا تكوني لاباس (ضارت عند فاخيته ) راجلها مجاش !

فاخيته : عاد غيجي... نوضي يلاه معاياا الكوزينة 

ناضت فاخيته هيا وخناتة للكوزينة. ونزهة ابتسماات ف وجه اميرة وجلساات حدا راسها معنقااهاا وتبووس فيهاا... وحنان جالسة قبالتهم وراضية جالسة حدا رجليهاا . دوزات نزهة المكالمة ليعقورب حاطة تليفون على وذنيها 

يعقوب : (زاعف ) الو خالتي 

شدت نزهة تليفون بيديهاا وحطااتو ل أميرة على وذنيها 

يعقوب : وي معاك 

سمعت اميرة صوتو وهياا تشوف فيها هزاات ليها نزهة راسهاا بالايجاب وعطاتها اشارة تهضر معاه عاادي... بقاا قلبها كيضرب .. 

اميرة : سلام عليكم كيف بقيتي لباس ...؟

يعقوب : (تنهد ) اناا لي خاصني نسولك واش لبااس وكيف بقاات ميرا ديالي 

اميرة : الحمد الله لباس كيف دايرة خالتي واسماء وكلشي لباس عليهم 

يعقوب : خرجتي من طبيب

اميرة : اه قبيلة شوية جيناا

يعقوب : حاسة براسك شوية ولا مزال 

اميرة : رجلي ضاراني بزااف وتنفخاات لياا الحمد الله على كل حال..

يعقوب : كن صبت كن طرت وجيت فالبلاصة الغالب الله.. خاصني نجي مفضي ولكن مبقااليش بزاف .. ردي لبال لراسك. 

اميرة : (كتشوف ف جداتها ومرات خالهاا لي مبتاسمين وكيهضروا مع نزهة... ) واخا ان شاء الله الله يكون معاك 

يعقوب : حداك ناس يااك 

اميرة : اه 

يعقوب : المهم تلقااي الفرصة تكوني بوحدك .. صوني علياا وقطعي ولا صيفطيلي مسج باش نهضروا شوية صاافي !!

اميرة : ان شاء الله حتا لعشية

يعقوب : خليت ليك الراحة وحاولي على راسك عفااك.. متفورصيش على صحتك ها خالتي غديك معاهاا وترتاحي 

اميرة : لي بغيتو.. ها لين كتسلم عليك هه 

يعقوب : مرحباا راني كنسمعها كتغني حداك .. 

اميرة : هه اه.. 

يعقوب : يلاه نخليك داباا عشية نهضروا نهارك مبروك (قطع....

عطااتها اميرة تليفون وتكات فبلاصتها ولين كتحبو فجنبهاا... راضية ونزهة مجمعيين وحنان جلست حدا اميرة كدوز يديها على راسها ... 

خناتة : (طلات عليهم ) خليت ليكم الراحة انمشي نقضي شي شغال ونعود نجي عندكم مور الغدا..

راضية ؛ الله يهنيك ان شاء الله سمحيلناا احبيبة 

نزهة : الله يكتر خيرك... 

خرجت خناتة وفاخيه كتوجد الغدا ف كوزينة وكتعيط لمهاا.. 

راضية : هاناا جاية..

مشات عندهاا راضية وسدت الباب فاخيته دارت يديها غلى جنبها 

فاخيته : دخلت عليك بالله واش نهضر ونوض شي صدااع ولا شغندير واش هادو عندهم شي عقل ولا ميكساابوهش واش غيتركب فياا العصب 

راضية : شكاين عوتاني مالك 

فاخيته : قالك مااا قالك غيديو درياا معاهم واش انا مكنجيهاا مكتجيني ماشي بنتي معنديش الحق فيهاا والا شنووو مريضة انا غنقاابلهاا واناا غنهزهاا مغادي يهزهاا معاياا حد 

راضية : ويلا راجلهاا بغاا شوفي باركة مدخلي فالكلوووف سكتيناا خليهم يديرو شغلهم 

فاخيته : عرفتي واخاا يمشي يطرطق بنتي غتبقاا عندي حتاا تبراا .. هادي مااهياا اموو ماهياا ختو مرااات خالو وغتمشي بنتي تمرض عندهاا وانا امهاا غنبقاا هناا نتشوا

راضية : نعلي شيطان خليها تمشي والله يجيب ليها تسير هاد قصوحية راسك غتخرج عليك. 

فاخيته : شوفي حداك داك كسكسو واش تفور انكمل هاد المواعن . غاا خليهم يبلانيو 

راضية : الله يهديك هاداا منقولك .. 

نزهة بعفويتهاا وطيبة قلبهاا وابتساامتها الخارجة من القلب جلست حداا اميرة كتجمع معاهاا ومصغرة راسهاا غاديياا على كانتهااا كتحاول ضحكهاا وتلف ليهاا الوجع ديالهاا سقاات فاخيته جوج قصرياات كسكس. وحدة حطاتها لرجال جالسين فوسط الدار قبالت كوزينة... وحدة دخلاتها لصالون لنساء.. مشات جلست بنتهاا بشوية عليهاا مقدراش تجلس نيشان ماايلة على جنبهاا .. شدات منهاا لين وزيدات ليهاا تاكل 

فاخيته : يلاه زيدي باسم الله

اميرة : اري اماما انا نشدهاا عليك غا تغداي نتي 

فاخيته : غا زيدي نتي انا نوكلهاا لالة نزهة زيدي 

نزهة : كلشي حدايا عطاك الله صحة كسكسوو فاسي ههه 

فاخيته : قبلي عليناا وخلاص نزهة : خيرر والعذر اختي.. هضرت مع يعقوب بالميسجات قبيلة قالي الا شوية فالعشية نمشيو 

مبغااتش تسرط لفاخيته بحالا الحجرة وحلات ليهاا فالحلق بدات تهز لقيمة صغيرة تبردها وتعطيهاا لين توكلهاا وجهاا تخطف وغاا كتسووط.. سلاو غداهم وناضت حنان تخمل وفاخيته منعسة لين فيديهاا داتها لبيت حطاتها تما وغطاتها خرجت كتخمل هياا وحنان ويوجدو لكسكروط د العشية لناس لي غيجيوو.. احمد وسي الحاج وسليمان وزيااد خرجوا برا بقااو غا نساء.. صونى تليفون ل نزهة يلاه سمعااتو فاخيه خرجات دارت راسهاا كتقاد الغطى طبلة وهيا طالقة الوذن... 

نزهة : ايوا معرفتش هاهياا تهضر معاهاا...

يعقوب : بلاش منهضر المهم غا سيرو اخالتي وصافي 

نزهة : كلامك هوا الكبير.. ولكن سليمان خرج داباا حتا يجي وصافي 

يعقوب : اذن صبااح بكري توكلو على الله قولي اخالتي ل أميرة تجاوب على تليفون راني كنصيفط ليها 

نزهة : واخاا اولي ..وعلى آله ان شاء الله.. الله يعاون...

بنتي قالك شوفي تليفون راه كيصيفط ليك فيك

اميرة : اه واخا... ماما واخا تجيبيه لياا 

فاخيته : واخا 

هزت راسهاا ودخلات لبيت سداات عليهاا شدت تليفون صونات على نمرة يعقوب فالبلاصة جاوبهاا.. 

يعقوب : الوو

فاخيته : سلام لباس

يعقوب : الحمد الله ياك لباس

فاخيته : شوف بنتي غتبقاا معايا انا غنقاابلها معندهاا علاش تمشي عند ناس وبالي يبقاا معاها وزيدون مزالهاا مريضة بزاف حتاا تبراا وتولي على خير وحتاا تجي عاد تاخد مراتك مغادي يديهاا حد. 

يعقوب : بشوية عليك الالة شكون كيجري عليك ضربيني حسن وعلاش هاد الغواات وهاد التقنزيعة 

فاخيته : المهم اناا هضرت معاك وقلت ليك لي كاين البنت مغاديش تمشي مع هاد المرا 

يعقوب : هضري ولا متهضرييش سوقك هدااك .. والهضرة بالطيبة ماشي غتغوتي علياا بحال هاكا بنتك باغاها تبقاا معاك هاهيااا معاك مخداهاا ليك حتا حد.. حنا غاا هضرناا وصاافي وفكرت غتهزي الحمل بنتي من جهة واميرة من جهة خراا قلت اللهم تاخدهاا مرات خالي وتجيب لي يعاونهااا ولا تبقاا معذبة.. وهانتي كااع سيري معاهااا وبقاي تماا 

فاخيته : وحتاا اناا غاا هضرت وقلت ليك بنتي تبقا معايا انا غنقابلهاا وبنتك هاهياا معاياا حتا هياا 

يعقوب : الله يخلف عليك (قطع...

قطع يعقوب المكالمة مع فاخيته مسحات نمرتو وخرجت مكلات لبنتها تليفون ورجعت تكمل شقااهاا فالكوزينة.. بدات الدنياا كتعمر داخلين جيران وحدة مور وحدة شي مدخل الديسير شي مدخل الحليب ودانون كيسلموا ويجلسوا يسولو يطلعوا فيها ويهبطوا.. وفاخيته كتجري وتجااري .. اميرة الابتساامة مرسومة على وجهها من خلال الرسائل لي بينهاا وبين يعقوب وكل مرة دخل لصورة بروفيل تكبرها وتشوف ودقق فيهاا.. وهيا كلها لهفة وشوق باش تشوفوو... كلاو الناس وجمعوا وهضروا طاح الضلام ومشاو بحالهم بقااو غا مالين الدار جالسين حدا طبلة... نزهة شادة تليفون فيديهاا كتهضر مع يعقوب... 

نزهة : لي بغيتي نتاا لي يرضيك اولدي 

يعقوب : واا هادشي لي باان لياا المهم تبقاا فدارهم حتااا يولي شوية عاد تمشي معاك ان شاء الله 

نزهة : وا ولدي انا غدا خصني نرجع بحالي نهاد عندها القرايااا وعاد عروستي عياانة عاد فتحت راك عارف خاصني نرجع لدار 

يعقوب : واخاا ان شاء الله لهلا يخطيك عليك وسمحيلي بزااف 

نزهة : الله ياااودي راك بحال نفسي ... 

ناضت لين تبكي دارتها فاخيته فضهرهاا وحزمات عليهاا كضور بيهاا وتخمل طبلة ...وجدو العشاء خلاوه يطيب وجاو يجلسوا 

اميرة : الميمة بغيت نمشي لطواليط 

راضية : واخا ابنتي ان...

فاخيته : غاا جلسي امي اناا نديهاا 

نزهة : انا نوض نديهاا معاك عنداك طيح ليك

فاخيته : لاا لا غاا جلسي هانا نديهاا ...

حطات فاخيته لين فحجر امهاا ومشات مكلات العصى ل أميرة شداتها بيديها اليمين وفاخيته وقفاتها من جهة د شماال ومشاات شادة فيديهاا بشوية حتا وصلاتهاا الحمام جلسااتهاا فوق لاساش حتاا شهد عليهاا الله.. خلاتها تما ومشاات الكوزينة دارت الماء فالمقرااج وزرعااات ليه البوطة سخن شوية عاد دخلات ليهاا 

فاخيته : نعاونك 

اميرة : لا انا نتوضى ونعيط ليك 

فاخيته : عندااك طيحي تاني

اميرة : لا مغاديش نوض انا غنعيط ليك ملي نسالي...

يتبع ...