الأرملة الصغيرة الجزء 23

ناضت اميرة ف صبااح بكري خلات يعقوب ناعس ولين مشقلبة حداه ، ردات الماء يطيب ونقصاات ليه ومشات الحمام دارت دوش خفيف وخرجت بالبينوار ومغطية راسها بالفوطة هزت حوايجها من الماريو وخرجت لوسط الدار تلبسهم.. نشفت شعرها ورجعت لبيت حلت الماريو وهياا تهز راسها فالمراياا كتشوف كريشتها لوات زيف على راسها وضارت تشوف يعقوب لقااتو مزال ناعس زادت المرااياا كتشوف كويرة صغيرة فكرشهاا كتحط يديها عليها كتلقااها قاصحة وهياا كدوز يديهاا.. 

يعقوب : جاات معاك 

سمعاتو اميرة وضارت لعندوو كتشوف فيه بخجل .. 

اميرة : صباح الخيرر 

يعقوب : صبااح السعد لي مصبح عليه كل نهار 

اميرة : هه انا نمشي نوجد لفطور يلاه نوض 

يعقوب : اوك هاناا تابعك..

مشات لكوزينة شحرات اتاي وجبدت بعض من شهيوات لي ولات كتوجدهم فدار.. وقطعاات الكيك وبداات تخرج... ويعقوب كيصلي حدااها جلست كتسنااه حتا سالا وكباات ليه اتاي وبداو يفطروا

يعقوب : وتاتك الكريشة هه

اميرة : (ببراءة ) عرفتي ملي كنتفكر الولادة كنخااف بزاف وقيلة غنمووت 

يعقوب : شهادالهضرة صبحناا عليها ياا مالناس لي ولدو كلهم ماتوو 

اميرة : معرفتش وليت خاايفة بزااف 

يعقوب : داباا تبارك الله هانتي فالشهر رابع وطبيبة قاالت ليك كلشي مزياان غيرر هواا خاصك الحركة وتاكلي .. غتمشي اليوم لنادي 

اميرة : اه غنبقاا نمشي غاا صباح حيت غدا اول د رمضان 

يعقوب : ان شاء الله المهم انا غنمشي لخدمة وفالعشية ملي نجي نخرجو نتسخروا ليغنحتااجو 

اميرة : واخا ان شاء الله الله يعينك 

يعقوب : (كيلبس لافيست ) هضري مع ديك المربية قوليها ترد بالهاا مع لين ولات كتكاامش شوفي وجهها كيف رجع مقموش

اميرة : هضرت معاها قالت لياا كتقيل تزغرت وتغوت ههه وضاارب 

يعقوب : داكشي لي بقااا وصيها نتي اناا مفياا مندوز عندها 

اميرة : صافي واخاا 

يعقوب : يلاه الله يعاون 

هز يعقوب محفضة ديالو ومشاا لبس صباطو وخرج واميرة كملات كاسهاا وهياا طالعة نازلة فالفيس لقاات عراام د ميسجاات خلاتهم ومشات تشوف اش كاين حتا كتباان ليها شي بنت حاطة صور ديال كروشيه لبنيتات صغاار على اشكال فجروب نسوي صيفطاات ليها طلب صداقة مع رسالة قصيرة وناضت لكوزينة غسلات الماعن وجمعت الدنياا وهياا مرة مرة طل فالفيس تشوف واش جوباات البنت خرجاات لين بشعكاكتهاا طالعة فسماء لقاات طيور الجنة فالتلفاازة خرجت كتشطح وتحيح براسها وهيا كطيح وتعاود تنوض

شداتهاا اميرة كتبغي تبووسهاا وهياا كتبعدهاا وتبغي تنتفها 

اميرة : لين اجي نغسل ليك وجهك اجي تفطري 

لين : انن ناا اgاا (كدفع) 

اميرة : يلاه نخرجك تمشي عند صحباتك 

لين : (كتنقز ) صياات وسيام ايا سول يالله راا لو ليري ري 

اميرة : ههههه شكون علمك تزغت اجي نبوس الكبييييدة ديالي (عنقااتها ) 

لين : (بعصبية ) اgااااا نو نوو 

خلاتها اميرة على خاطرها ودخلت البيت لبست عبايتها وهياا يلاه كتقااد زيفها شافتها لين وجات كتجري عندهاا بغاات تشعلق فيهاا هزاتهاا بين يديها 

اميرة : (كتبوس فيها ) حتا كتشوفي لبست حوايجي عااد كتجي عندي يااك باغاا غا تخرجي 

لين : خاا تر ين 

اميرة : هههه كاترين تمشي عندهاا 

لين : (كتشير بصبعها جهة الباب ) خاتر ين 

اميرة : واخا انا نديك عندهاا يلاه اجي نلبسوو حويجات ونحيدو ليكوش ونمشييو .

خرجاتها اميرة برا جلساتها على رجلها من جهة د شمال وكلاتها حتا شبعت وناضت دخلتها بدلات ليها ليكوش وحويجااتها مشطاات ليها شعرها ب ستة وستين كشييفة وهياا كتغوت وترعرع قلبت عليها دنياا بالغوات دارت ليها الكرينات وخرجت...هازة المحفضة ديال لين فيها ليكوش ورضاعة وحويجاتها.. وهزت صاكها فيديها حلاتو حسبت شحال الفلووس عندهاا من فلوس لي كيخلي ليها يعقوب الا حتاجت شي حاجة.. شدتو وطفات التلفازة وخرجت هابطة مع سانسور... شداات الطريواار غادية فيه ويديهاا طابو بالهزاان د لين موصلاتها حتا سخفت.. وكملت طريقهاا لنادي دوزت الدرس لي كان عندهم وراجعوه مزيان حتا دوزت سوايع ديالها ومشات عند سليمة 

اميرة : ختي واش غنكملو مزال فرمضان 

سليمة : واه راح نكملو ان شاالله غي هوا توقيت راح يتبدل دوك نقولك ساعة لي تجي فيهاا ملي نروح لدار..

اميرة : واخا شكراا نهارك مبروك.. 

خرجت قبل الوقت وغااادياا بشوية عليهاا مربعة يديهاا وطالقة عينيهاا.. بان ليها محل كبير كيبيع الاكسيسورات على اشكال دخلاات ليه وكتشوف بعينيها وحاول تهضر بالفرنسية مع صاحب المحل..

اميرة : سلام عفااك نلقاا هناا شي سعات د رجال 

... مرحبا كاينين اجي معاياا.. 

دوزهاا من جهة الأخرة وداها لبلاصة فيهاا سعات والكرميطات على شكال.. وبدات تختار فالمكنات لي تماا وكتخايلها كيف غتجي على يد يعقوب.. عجبااتها وحدة وسوماتها لقاات تمنها غالي والفلوس لي عندها مكافينش باش تخلصهاا.. 

اميرة : عجبااتني بزااف ولكن معنديش فلوسها كلها واش تقدر تخليهالي؟

اميرة : متبيعهااش حتا نجيب ليك الفلوس

.... منقدرش نخليهاا الا جاا شي حد وبغا يشريها اكيد غنبيعهاا 

اميرة : واخاا سمحلي شكرا

ضارت وخرجات بحالهاا غادية بشوية عليهاا جلساات فواحد الجردة وجبدات تليفون لقاات البنت لي رسلات ليها مسج جوبااتها وعاوت اميرة صيفطاات ليها

اميرة : ممكن تعطيني رقمك اختي بغيت نتاصل بيك 

.... امم اوك +2126....

طلعات اميرة النمرة وتاصلات فالبلاصة جوبتها البنت بعدماا سلموا على بعضياتهم دخلات معاها اميرة نيشان فالموضوع 

اميرة : ختي عفااك انا عجبتني خدمتك ديالي كروشيه ومكرهتش ناخد من عندك شي حاجة

... اهاه مرحبا انا فطنجة الا بغيتي شي حاجة مرحبا بيك 

اميرة : بصااح ديجااا جيت لطنجة زوينة بزااف لكن خصاارة انا ففرنسا وبالي فيهم ناخد شي جوج 

.... فقاش مبغيتي شي حاجة اختي مرحباا

اميرة : كيفاش نقدر اختي نتواصل معاك وتصيفطيهم لياا بغيتها لبنتي

.... معرفااش اختي انا عمري مصيفطت لشي حد على براا ومكنزعمش

اميرة : واخا نطلب منك طليبة الا قدرتي

.... مرحباا اختي قول اذا قدرت

اميرة : هانتي تقدري تعلميتي مثلا انا عندي واتساب الا عندك حتاا نتي نتواصلو وتصيفطيلي فيديوات نتعلم ومن بعد غنخلصك نصيفط ليك الفلووس ويلا بغيتي نصيفط ليك الفلووس من غداا المهم تعلميني 

.... الله يااختي مرحبااا نعلمك اناا عندي هاد نمرة فيها واتسااب دخل عندي صيفطلي واناا من اليوم نصيفطلك فيديو تشوفو وخدمها راسها

اميرة : اووه جزاك الله الف خير .. باش كتخدمي داكشي نيت اناا دابا خارجة ناخد لي نحتااج

.... ماشي شي حاجة غير كروشيه كيكون راسو عوج والصوف العادية او الكوردون 

اميرة : اه وشنو سميت دوك لعيباات لي بالخضر لي شفتهم فتصااور

.... هدوك كيجيو فوق الحوايج سميتهم توكات هادوك هوما ساهلين فمراا 

اميرة : اه ممكن تبدااي ليا شي فيديوو ملهوفة نخدمهاا عجبااتني بزاف عاودي قوليلي شنو ناخد

.... غير صوف والكروشيه نمرة 8

اميرة : عمري نسا خيرك انا نمشي نشوف هاد الصوف وملي ندخل الدار نصيفط ليك

.... واخا اختي

اميرة : سميتك مريم ياك

.... اه اختي

اميرة : واخا انا نسجلهاا شكرا بزااف 

ناضت اميرة غادية لعند لي كيبيع توب ولوازم الخياطة لعلى وعسى تلقاا عندو دخلت كتقلب وتشوف ولحسن حضها لقاات بلاكار وشااريوو طويل عاامر بالصوف طلباات منو الصوف نص كيلو وجوج كروشيه كيف قاالت ليها البنت دارتهم فصااكها ومشاات...

دازت مور لين هزتها ورجع الدار... شعلات ليها تلفاازة تلاها معاهاا وهياا دخلت بدلت حوايجها ودخلات كوزينة تشوف اش غتوجد وضيق الوقت مبقاا والو ويعقوب يكون معاهااا شرملات الخضرة والحوت وستفاتهم فالاطة دخلاتم الفران يطيبوو جبدات تليفون تشوف جديد

اميرة : سلام اختي لباس 

مريم : الحمد الله اختي ونتي غير سمحلي ملقيتش الوقت ولي نسجلك فيه وصافي ولكن عشية يكون عندك..

اميرة : واخا قولي نصيفطلك خلاصك غداا ان شاء الله 

مريم : كبرتي فعيني ملي قلتيهاا نتمنى تعلم وديري شي،حاجة وصافي 

اميرة : لهلا يخطيك ولكن ضروري حيت نتي عوتاني غتوريني 

مريم : يكفي دعي معايا اختي نساي قضية خلاص 

اميرة : واخا الله يرحم والديك. نتي علمك شي حد ولا كيفاش 

مريم : قريت على كروشيه كتر من عامين وانا كنتعلم وعندي ديبلووم ديالو الحمد الله 

اميرة : سعداتك والله صافي هادشي لي كتعرفي 

مريم : هه كلشي جعتو عندي ديبلوم د الفصالة والخياطة عندي ديبلوم د كروشيه.عندي ديبلوم د الطرز بجميع انواعه وحتا د مكينة.. صباغة على زجاج حدث ولا حرج شلااا ههه ولكن ساخطة الدنياا 

اميرة : متقوليش هاكا ربي كبير..متعرفي خيرك فين هواا مزال نتعارفو ونهضروا كتر مريم الا بغيتي طبعاا

مريم : ان شاء الله 

يعقوب : (دخل ) لينوووو اوباا بابل

اميرة : (بزربة ) نخليك اختي راجلي جاا من بعد نهضروا .. 

حطت اميرة تليفون وجلست كتشوف ف لين ويعقوب هوا كيبوسهاا وهياا ترد ليه اووبا ديالو. 

اميرة : لغداا مزال ما وجد غاا سمحلي اليوم تعطلت 

يعقوب :(جلس ) معليش

اميرة : يعقوب انا بغيت نتعلم صنعة 

يعقوب : فين 

اميرة : فالتليفون واحد بنت غتعلمني 

يعقوب : وفين عرفتيها هاد البنت

اميرة : فالفيس بووك انوريك شنو عندهاا 

شعلات تليفون ودخلت كتوريه تصااور لي حاطة وراتو صوف وكروشيه لي شرات.. 

يعقوب : ودغياا زعمتي وعطيتيها نمرة معرفااها اش تكون ومنين هياا واش كتهضر بصح ولا غاا كتفلاا شحال غنبقاا نهضر معاك ونوريك 

اميرة : (بالاسى ) الصمت 

يعقوب : (بعصبية ) تمزريك ديالك غيخرجك فشي زوبياا وغتندمي تايق فيك خديت ليك تليفون جديد ودابا جلستي كتفرقي فنمرتك هادي تعطيها لصااحبهاا صاحبهاا يعطيهاا لصاحبوو 

اميرة : وانا هضرت معاها وعلى ماا بالي ضريفة وغتعلمني و...

يعقوب : مخصووصة ملقيتي متعلمي ها لي سوونطر هناا بلاا قيااس سيري تسجلي وتعلمي تسلااو ليك غاادا لياا حتا الفيس..

لزمات الصمت وناضت الكوزينة تشوف الغداا واش طاب لقااتو مزال .. وبدات كتقااد فشلاضة وهياا كدمع وتمسح بكمها.. دخل يعقوب هاز لين فيدو مشا لثلاجة جبد ليها يوغورت يوكلها وهوا يشوفهاا مضورة وجهها وعينيها حومر ... 

يعقوب : مالك تاني شكااين 

اميرة : الصمت 

يعقوب : وهضري 

اميرة : (ضارت عندو ) علاش كتغوت عليا مالك ملي دخلتي ونتا كتغوت انا ممليش شغيكون مالي 

يعقوب : ايوا غاا هضرت معاك ونتي تقلبي ... 

اميرة : شبغيتيني ندير ولا اش غنقولك ندابز معاك ونوض نتصادع هضرت معاك مبغيتيش وصافي حتا هاد تليفون هاهوا هزو انا مبقيت خصني والو كل مرة دير لياا هاكا بسباب شي حاجة بسييطة صافي خليني 

عطاتو بالضهر ودموعهاا هابطين على خدودها كتقطع فمطيشة وهوا خلاهاا وخرج برا جلس لين حداه كيوكلهاا ويتفرج .. غسلات يديهاا وجبدت لاطة د زاج من الفران طاايبة محمرة هزت طباسل وبدات تستف الماكلة حطت فووق الطبلة كلشي ودخلت لبيتها شدت الباب وتكمشت فبلاصتهاا.. 

بقا يعقوب حاط يديه على فوق المخدة على رجلو وكيتسناااها تخرج حتا ناض ودخل عندهاا لقااها كتبكي وتنخطط.. 

يعقوب : علاش كتبكي مالك 

اميرة : وصاافي خليني عليك 

يعقوب : نوضي تغدااي 

اميرة : مخصنيش راه حداك كولو انا مبغااش

يعقوب : بلاااا تبقليل نوضي بلااما تخليني نزيد نغلي كترر راكي حتاا كتزبلييها وترجعي طلبي ماا مرة ماا جوج ديماا كندوزها ليك دابا ملي هضرت معااك نيشاان لمصلااحتك دايرة هاد الحالة ..

اميرة : وانا شنوو قلت ليك اهئ اهئ اناا... اهئ غا بغييت نتعلم اهئ اهئ وبنت لقيهاا تعلمني 

يعقوب : وهااادي وحدة خراا ودغياا تقتي وعرفتيهاا وزنتيهاا وهاد قلبك الهشيش رتااح ليهاا !!!! وعرفتي شنوو هانتي ديري لي بغيتي هضري معااهاا وجمعي وتعارفو وتعلموا ولا ديري لي بغيتي ونهار لي ديري شي كحلة ولا توحلي فشي غيسة ... قسمت فمي بالله مندوزها ليك....

خرج يعقوب وخلاهاا كتغدد بوحدهااا تقلبت على جهة خراا وهياا تسمع لين زكاات وطلقااتها بغوتة ناضت طياارة من بلاصتهاا لقااتهاا طايحة فالأرض مزوية وفمهاا محلول زراااقت خرج يعقوب من الكوزينة كيجري لقااهاا هزااااتها من الأرض كتسكت فيهاا وتبكي معاناا 

يعقوب : مالهاااا 

لين : 😭😭😭😭😭 انننيييي انيييياااااااااا انيياااا اهئ اهئ اهي اهئ... 

اميرة : صافي احبيبة صافيي طاحت وقيلة من فوق الفراش 

يعقوب : اري نشدهاا اجي عندي احبيبة اجي صافي صاافي (هزهاا ) 

لين : اهئ اهئ اهئاه اهئ اهئ 😭😭😭😭😭 انننياااا انييييي اننااا 

يعقوب : صافي احبيبة صاافي الحمد الله بعدااا مطراا والو 

اميرة : مسكينة مبغاااش تسكت غير كتزيد تغوت خرجهاا شوية لجردة لعلى وعسى تسكت شوية 

كيهز فيهاا يعقوب وهياا بحال الشرويطة فيدوو والحلق ديالهاا غيخرج من بلااصتو وجهها رجع زرررق حتا كينتاابه يعقوب ليديهاا سد عينوو وقوة ومقدرش يحلهم كازة على سنانووو 

اميرة : صافي احبيبة صاافي اجي عندي نهزك اناا اجي 

يعقوب : (غادي جيهت الباب ) هزي السوارت وتبعيني لتحت بالزربة 

اميرة : واش غتخرجها للجر....

يعقوب : (بعصبية ) ليين يديها مهرسة العضم خرج من بلااصتو تبعيني سدي الباب نديهاا لطبيب 

تصدمت اميرة بهاد الخبر لي سمعاات ممتيقاااش راسهاا بقاات غا حالة فمها وعينيهاا كيدمعوا بحرقه ممتيقاااش خرج يعقوب هابط فالساانسور وهيا جرت عبايتهاا ولوات عليها شانها هزت السوارت وخرجت كتلبس وتقاادد موراه كتزطم فدموعهااا لي مبقااتش كتقشع فين كتحط رجليها لقاااتو غادي جاي حدا طوموبيل وهياا عينيها غاا فيدين لين لي باينة زرقة ومايلة والعضم خارج .. دخلات فالطوموبيل ويعقوب حط ليها لين فحجرها 

يعقوب : شدي ليهاا يديهاا عندااك تزيد تكمل عليهاا ..اووف لا حول ولا قوة الا بالله العضيم 

طلع يعقوب لبلاصتو شد الباب وغادي بسرعة وعينيه معاهاا هز تليفون ودوز المكالمة 

يعقوب : (حوار بالفرنسية ) نتا تماا اوك هاناا جاي متخرجش 

.. 

حتا وصل الكلينيك خرجت اميرة هزاهاا بيد وشاداهاا بيد خراا 

يعقوب : اري نهزهاا عليك 

اميرة : لاا غاا خليهاا عندي يلاه 

دخل يعقوب فالأول غاادي واميرة موراه حتا لقاا صديق ديالو جالس كيشرب قهوة واقف كيتسناه 

..... يعقوب ياك لباس 

يعقوب : بنتي تهرست نوض دغياا شوف يديهاا 

.... وبلاتي نديرو ليهاا راديو نشوفوو مالهاا بعداا ..

شد يعقوب لين من يدين اميرة وخلاهاا جالسة فوق الكرسي ومشاا معاه طلعواا لفوق 

اميرة بقاات جالسة مربعة يديها كتشوف ناس مدخلينهم فالبيااص والاسعااف كتزوي والداخل كتر من الخارج بقاات حانية راسها فالأرض حتا طابت بالجلاس وقف حداها يعقوب

شافتو وهياا تقفز من بلاصتهاا

اميرة : (بالاسى) ياك لبااس 

يعقوب : هرسة خاايبة العضم خرج من بلاصتو وتهرس يديهاا مدغدغة بزاف

اميرة : أسئل الله سلاامة لاحول ولا قوة الا بالله العضيم

يعقوب : معندناا منديرو المهم هاهواا كيدير ليها العملية يلاه نوصلك لدار باش نرجع نبقاا معاها 

اميرة : لا يعقوب انا غنبقااا معاهاا منقدرش نجلس بوحدي بلا بيها سير نتاا رتاح غاا وريني فين هيااا اناا نمشي عندهاا 

يعقوب : شوفي راكي عياانة يلاه بحالك وملي نخرجوهاا هاهياا غتبقاا معاك 

اميرة : لا مغنمشي حتا لبلاصة واخا يكون لي كاان عفااك غا سير نتاا

شاف فيهاا وعينيه ذابلين هازين الحزن والهم وعنقهاا لصدروا شي كيصبر شي بقاو جالسين تماا حتا صونى تليفون د يعقوب 

يعقوب : وي هاهياا معاياا فالطبيب مخرجاتش معاهاا تليفون 

ربيعة : اويلي على طبيب اولدي هزيتيلي قلبي مال اميرة 

يعقوب : امي لين تهرست فيديهاا جبناهاا هناا 

وصلات خبار لخالد لي جاا بسرعة هواا وعبير هازة ولدهاا فيديهاا وربيعة موراهم جات هيا وجميلة لقااوهم تماا جالسين عاودو ليهم كلشي كيف طراا معاهاا. طلعوا كلهم لفوق لجناح الأطفاال بعدماا سلاو لين العملية ودخلوها لشومبر مع بنيتات وتلفاازة مطلوقة حداهم وهياا حرام واش بغات تسكت من البكااا مبقاش كيبان وجهها من شدت الزروقية شافتهاا اميرة فديك الحالة طاح فيهاا النص ومصبراااش كتعنق فيها وتبووس وتشوف يديهاا لي ملويين عليهاا الفاصمة ازمااتها حالتهاا وكلشي باغي يهزهاا يبوسها ويسكت فيهاا.. دازت عشية مكفسة مشاو بحالهم حيت وقت الزيارة تسالا ومن المفروض لين يباات معاها غاا واحد وقررت اميرة تباات معاهاا مشاا يعقوب بعدماا عنقهاا بحزن شديد وكيبوس فيديهاا جاب ليها ليكوش ولي غتحتاج فالليل وعشاا اميرة ومشا بقاات اميرة كتحاول تلعب معاهاا وتلفهاا على حريقهاا شوية بدات كتباان ابتساامة د لين ساهية فالرسووم لي فالتلفاازة وكلاتها اميرة وبدلات ليها وبقاات معنقاها حتا نعساات وطاحت طيحة وحدة واميرة من شدت عياء نعست حداها وكل ساعة ضربها الفيقة تشوفها عنداك تعقر يديها حتا نعسات وصبح الحال...

6:00 صباحا 

دخل يعقوب لاشومبر بشوية لقاا اميرة واقفة حدا السرجم كطل شد الباب وغاادي جيهتهاا حست بخطواتو ضارت عندو بوجه شااحب وعينين ذابلين وشنايفها يابسين

يعقوب : صبا..

اميرة : صباح الخير رمضان مبارك 

يعقوب : (عنقها ) ميرااا صبااح نور كيف صبحتي كيف بقاات لين نعساات شوية 

اميرة : اه الحمد الله نعساات رتاحت شوية ناضت فالليل كتبكي بدلت ليها ليكوش ورجعت نعست 

يعقوب : يلاه تهبطي تفطري 

اميرة : لا انا صايمة يعقوب 

يعقوب : نوو مغاديش تصومي نتي عياانة حتا يخرج رمضاان عاد وتولدي وترتاحي عاد رديه دابا لا

اميرة : لااا ابدا منقدرش انا صايمة الله يقبل منقدرش نفطر 

يعقوب : وتسحرتي بعدا

اميرة : شربت الماء قبل الفجر وصافي صليت وبقيت فايقة حتاا طلع الصباح 

يعقوب : الا مقدرتيش بلاش دابا

اميرة : لا يعقوب ربي غيعاوني

يعقوب : غنخرجوهاا اليوم انا هابط التحت عندي عملية ما 8:00 وملي نسالي ان شاء الله نمشيو

اميرة : الله يعينك 

يعقوب : (ابتساامة ) امين

مشا يعقوب عند لين كيبووس فيها وخرج بحالوو واميرة متبعااه بعينيهاا خرجت موراه وهوا هابط فالدروج حتا دخل وسد الباب موراه ودموعهاا هابطين رجعت بحالهاا جلست متكية حدا لين هازة صبيعاتها كتسبح بيهم وتستغفر وهياا شادة عينيهاا حتا فاقو جوج عيلات حداها كانو ناعسين مع ولادهم حذرات عينيها ومهضرات حد ناضو غسلو وجههم وناضو كيفطروا حداهاا فاقت لين هزتهاا اميرة كتلعب معاهاا وتحاول تخليهاا متبكيش فطراتهاا بشوية عليهاا وشرباتهاا المااا وهزتهاا حداا سرجم كطل وتشعلق بقات معاهاا حتا سالا يعقوب وطلع لعندهم جمعوا حوايجهم ومشاو لدار تفاجئت اميرة ب عبير وربيعة وجميلة لي فالدار كيوجدو الفطور تسالموا وجلسوا كيهضروا حتا وصلات العصر واميرة معدتهااا كتلوااا بالجوع والسخفة شداهااا ناضت توضات وصلاة الضهر والعصر كتحنى غاا بزز مكملات حتاا مبقاا ليهاا جهد طالقين السادسة فيهاا برنامج ديني جاا خالد ويعقوب شاد التليفون كيعيط لمعااذ قربات توذن وهوا عااد داخل تجمعوا كاملين فالصالون وجميلة وعبير كيحطو فوق الطبلة كلشي هز تمرة فيديه كيفرق صيام واميرة هازة لين بيديهاا د شمال وهازة تمرة بيد اليمين 

اميرة : اللهم اني لك صمت وعلى رزقك افطرت وبك امنت وعليك توكلت فغفر لي ما قدمت وما اخرت وما اسررت وما اعلنت ذهب الضمئ وابتلت العروق وثبت الأجر ان شاء الله

جلسوا كيفطروا مجموعين وهوما مجمعين حتا ضار يعقوب لعند اميرة لي لقاهاا غاارقة فدموعهاا كتمسح وكتحاول متبينش... وصدرها كيطلع ويهبط 

شاف فيهم يعقوب لقاا كلشي حال فمو فيها مفهموا والو وربيعة ناضت من بلاصتها جلسات حداهاا وتلاحت عليهاا اميرة لصدرهاا كتبكي وترعد لربي لي خلقهاا شدت منهاا عبير لين وكتحاول تهذن فيها كلشي ناض من بلاصتوو 

يعقوب : اميرة مالك يااك لباس علاش كتبكي 

ربيعة : صافي خليهاا اولدي يلاه احبيبة نوض نوض 

جرتهاا ربيعة لصدرهاا وداتهاا لبيت ويعقوب جلس متمر كيحك لحيتوو 

خالد : هادا حالناا اصاحبي مع العياالات ههه 

عبير : هيييه شناهواا 

خالد : ماشي عليك هههه

عبير : وعلاه علامن شكون هاد عيلات لي كتهضري عليهم 

يعقوب : مديش عليه حريرة طلعت ليه المخ وبدااا يهبلج..

خالد : صافي هاهواا جاوبك هه رضى اولد خالتي.. 

يعقوب : كمل فطورك 

معاذ : وعيطو ليهم يجيو يكملو فطورهم 

يعقوب : غاا كمل نتاا هز حط حداك حتا يجيو 

عبير : معرفتش اميرة جاتني مغيرة بزااف مالهاا 

يعقوب : غير مع العياء داباا وصافي راكي مجربة 

عبير : ولكن عاادي ماشي حتاا لهاد الدرجة وجهها مخطووف وشوف ماا... فهمتش

يعقوب : الصمت .. 

خالد : المهم حناا انمشيو داباا يلاه نلحق نمشي لتراويح نتشااوفو من بعد 

يعقوب : حتاا انا غنمشي معاذ غتمشي 

معاذ : (كيضور عينو ) ماعرفت 

يعقوب : اووك.. 

مشات عبير دخلت لبيت سلمت على اميرة وخرجت هياا وخالد ويعقوب جر معاذ هبطو التحت لجردة.. 

يعقوب : مباغي غاا مصلاحتك ماشي شي حاجة خراا باغيك تكون راجل وداباا غاا نتتاا لي مع امك كون بيها عونهاا وقق معاهاا نعل عليك الشيطان ورجع لطريق الله هياا لي غتلقاا فاخرتك 

معاذ : شو...

يعقوب : مرا خرا سكت ليك داباا مغنسكتش فمك يتهرس اولد ميمتي.. باغيك تكون سيدي ومولاي وحسن مني نوض توكد معااياا سير ضربهاا بشي تحميمة دغياا ويلاه معاياا لجامع ..

حنى راسو معاذ فالأرض وهضر مع خوه... 

معاذ : سمحلي بزااف غلطت فحقك وضلمتك معنديش الوجه حتا نشووف فيك الله يسمحلي منك ومن قدرك .. 

يعقوب : نسمح ونفوت سميح لهيه الا عطيتيني وعد تنسى عليك الزنقة والليل وصحاب ودير كيف يديرو ناس ملاح كون راجل عارف بينك وبين لي خلقك يلاه نطلعوا لدار انا نجبد ليك الحوايج دوش ويلاه نمشيو 

معاذ : واخاا .. 

طلع يعقوب هوا ومعااذ لفوق لقاا ربيعة خرجت اميرة الصالون وكتعطيهاا تاكل... جبد ليه حوايج والفوطة وعطاه يمشي يدوش ورجع عندهم جلس قبالتها..

يعقوب : شوية داباا 

اميرة : (راسها فالارض ) اه 

ربيعة : توصلناا اولدي 

يعقوب : فين 

ربيعة : لدار 

يعقوب : باتي معانا هناا علاش غتمشي

ربيعة : لاا ولدي مرة خراا غدا عندي الشغل مرة خرا ان شاء الله 

يعقوب : والمهم انمشيو لتراويح وملي نجي نوصلكم 

ربيعة : نتاا ومن 

يعقوب : انا ومعاد 

ربيعة : (تعجبااات) علاه معا... 

يعقوب : على الله وصافي نديرو جهدناا 

ربيعة : ياا ولدي ومصااب .. 

ناض يعقوب دخل لبيت لبس شورط حد الركبة وكندورة بالسفيفة والعقااد نص كم وقصيرة شوية فاللون بلو ماري جبد بلغتوو مشط شعرو وخرج كيلبس مكانتوو.. وهوا كيشوف ف اميرة وهياا على حالهاا عينيها غاا فالارض. خرجو هوا ومعاذ نيشان لجامع. ناضت جميلة غسلات الماعن وجمعات الدنياا وشطباات الصالون لي كلاو فيه حتاا رجعو من الصلاة.. لبست ربيعة جلابتها ناضت اميرة سلمات عليهاا وخرجو هيا وجميلة هبطو فالدروج لقاوهم لتحت كيتسناوهم.. زاد يعقوب بسرعة حتا وصلهم لدار ورجع قلب الضورة غادي لدار كيطيير والصورة د اميرة قبالت عينوو حتا وصل باركاا الطوموبيل فالباركينغ عاد طلع لفوق

حل الباب دخل وسدها موراه لقاا غا تلفازة مشغولة وضواو كلشي مطفي دخلت لبيت نعاس لقاا اميرة متكية حدا لين كتنعسهاا. 

يعقوب : نعساات 

اميرة : اه نعساات 

يعقوب : تبعيني نهضر معاك 

اميرة : واخا. 

حطت المخاد من جوج جوايح باش لين متقلبش لبست صندالتهاا وخرجت عندو لقااتو شعل الضوء وجالس فوسط الدار كيقلب فالاذعاات جلست حداه كتشوف فيه.. حط تليكومند وضار عندهاا 

يعقوب : علاش كنتي كتبكي قبيلة مالك شنو طرا ليك تاني مالك 

اميرة : والو حتا حاجة 

يعقوب : درتي حالة قبيلة ومكاين والوو هضري علاش كل ساعة كتبكي شنو باغا شنو مقلقك شنو خصك قوليلي 

اميرة : داقت بياا بزااف حاسة براسي مخنوووقة ومريضة ممرتحاااش وشلاا حوايج. 

يعقوب : كنسمعك 

اميرة : وا.. من جهة رمضان فكرني ف عائلتي لي من نهاار عقلت على راسي وانا كنصوم معاهم ومجموعة معاهم واجواء زويين بزاف ماشي بحال هناا .. كنشوف لين مسكينة صغيرة وكتبغي تنبش وتلعب ويديهاا غاا مهزوها ومعلقة كنتأزم كتررر نفسيتي كدمر . وزادني هاد.... ال...الحمل لي معرفااش كيف غتكون الولاادة كنبقاا نترعد وعاقلي غيخرج ونتفكررر وعائلتي بعيدة عليااا شكون غيكون معايا وفجنبي .. ن... نتا . غاا. ....كل مرة كنجي نهضر كتغوت عليا ونبقاا نرد لقلبي حتا كنكون غنحماااق فين ماالقيت الفرصة بوحدي سواا فالبيت ولا كوزينة ولا حمام ولاا فنعااسي كنفرغ قلبي غاا بالبكاا..وكنت بغيت غاا نتعلم شوف فين وصلناا يعني ماشي من حقي نهضر مع ناس ولا يكونو عندي معارف مندير حتا حاجة. وزادت كملت عليااا هاد البلااد لي غنحماااق فيهاا ماا انا مع ناس بحالي يهضرو هضرتي ونفهم اش يقولو ما اناا ب راحة.. مكنحس لا ب اماان ولا فرحة ولا راحة ولا شي ربح .. كنشوف راسي معندي زهر فالدنيا لا فدارناا مع امي لا مع جدي لا مع سيد الأول لي تزوجت بيه لا مع لي مزوجة بيه داباا نهاار كنغلط مكيهنيني حاالي وكنجي نطلبك ونرغبك باش تسمحلي واخاا عارفة كندير اغلااط كبيرة بزااف لي كندم عليهاا فلاخر... انا معندي لا لي يبغيني ولايحامي عليااا ولا لي يخليني نحس بيه وبالأمان دياللو معرفاش نهايتي كيف غتكون واخاا كنشوفها مكفسة. ياربي تسمحلي على هاد الضن... 

جلس حداهاا وعنقهاا وكيحااول يواسيهاا فصمت ونفسو كتغلي من الداااخل .. 

يعقوب : (بجدية ) المهم صاافي سمحلي متعااودش هانتي خودي راحتك كيف باغاا صافي ديري لي باغا ولي مرتاحة فيه.. يلاه صافي 

اميرة : مبقيت باغاا والو بالي داباا غا مع لين ايمتاا يتشافى 

يعقوب : كلشي بيد الله ملي كينزل القضاء كينزل اللطف معاه اللهم هاكا ولا شي حااجة كتر.. وصاافي مسحي دموعك 

هزت اميرة راسهاا كتمسح عينيهااا وهواا قالب وجهواا كيسووط 

يعقوب : نجيب ليك تاكلي 

اميرة : لا مخصنيش 

يعقوب : غداا مغاديش تصومي حاولي على راسك وكولي مزياان داباا هانتي الحمد الله واخاا مزال ممطلووقاش فاللغة راكي كتعرفي تهضري بيها غاا هوا خاص تراجعي من بعد وصافي داباا هانتي فدار مكااين ميداار غاا حضي معاك لين وملي تبغي تخرجي بعد الفطور نخرجك واخاا كل نهاار 

اميرة : انا منقدرش منصوومش دابا انبقاا غا فدار معندي علاش نفطر وانا اصلا منقدرش ناكل 

يعقوب : غدووخي غتسخفيي غتعيااي دابا تبارك الله 4 شهور عندك راكي مكينااش غاا نتي كولي على قبل لي فكرشك متغاانيش معاياا مور رمضان تولدي ويحن الله 

اميرة : الصمت 

يعقوب : 11:30 داباا غنمشي نعس باش يلاه نفيق 

اميرة : واخا .. 

دخل يعقوب لبيت يلاه حط راسو وهياا تنوض لين تبكي دخلت عندها اميرة هزتهاا من حدااه وسدت الباب وخرجت كضور بيها فالصالوون وتنعسهاا.. حتا نعست فرشت ليهاا وحطتهاا غطاتها وبعداا ليهاا يديهاا باش متعقرش وناضت الكوزينة تقلب اش كاين.. لقاات طنجرة عامرة بالحريرة جبدات طيسان فرقاات عليهم حريرة شي دارتو فالفريكو شي خلاتو فالثلاجة من التحت لفطور... لقاات شباكية باقا فميكتهاا ستفاتها ف طاسة وداتها فالبلاكار قدات كل حاجة فبلاصتها وجبدت الطحين كتغربل ودير فالخميرة وزيت طللات على لين واش باقاا ناعسة ورجعت كدلعك وتكتف فييهااا حتاا ترخفاااات وغطااتها تخمر غسلات يديهاا ومشات الحمام توضات والضواو كلشي مطفي خلات غاا الضوء تلفاازة وصوتهاا خافت وطلقاات صلايتها كتصلي وتسبح وهيا تفكر نفاار وطبال لي كان يجي كل ليلة ل درب يضرب ويفيق فالنااس وصوت التشفييع لي كيتسمع من الجوامع رجعت الكوزينة جبداات لاطة د الفراان دهناتها بالزيت حطاتها فجنب وبدات الطلق فالعجين وهياا كتلوي فيه وتفرق بالزيت والطحين والسميدة حطااتها فاللاطة تطلق وردات الماء يطيب كتوجد فالصحور ...

تسلق البيض وتستف الجبن وزبدة وسلوو والبريوات دوزات وقتهاا كولوو فالكوزينة وكتجارا مع الساااعة حتا سلات وبداات كتحط فوق الطبلة بشوية بلاا حس حتا سلاات علات عينيها فالسااعة لقاات قرب الوقت ودخلت عند يعقوب حطاات يديهاا على كتاافو كتفيق فيه خرجت وناض هواا خرج موراهاا وتعجب فالطبلة كيفااش مزوقة مشاا لحمام غسل وجهوا باش يتوكض توضى وخرج كيمسح فوجهواا.. 

يعقوب : وعلاش نضتي نقضي باش مكاان 

اميرة : الصمت 

يعقوب : شنو هادي واش عجنتي ولا شنو 

اميرة : اه عجنت هادا الملوي كيتصحروا بيه مولفين بيه وقلت نديرو . انا منعستش بقيت فايقة

يعقوب : ايوا الله يعطيك صحة ملقيت منقول 

اميرة : يعقوب انا منقدرش نصبح فاطرة اناا ضروري خصني نصوم عفااك منقدرش ومتقووليش لا.. 

بقاا كيشوف فيهاا وهواا محمر عينيه فيهااا

يعقوب : ديري لي بغيتي 

تصحرو مرة كيهضرو مرة كيسكتو .. سلاو وناضت اميرة كتجمع الطبلة ويعقوب كيدخل معاهاا ...مشا لصالون جلس فوق الزربية هاز كتاب الله كيقراا فيه كملت اميرة المواعن وخرجت كتمسح يديها من الماء صلاة شوية وجلست كتستغفر ناض يعقوب لبس حوايجوو وخرج مشاا لجامع بقاا هياا فبلاصتها حتا اذن الفجر... صلاة ومشاات هزت لين ودخلات لبلاصتهاا تكاات تماا... هزت التليفون فيديهاا بغات تشعلو لقااتو طافي دارتو يتشارجاا حداهاا حتا رجع يعقووب.. تكاا حدهاا بحوايجوو غاا ساكتين شي مكيهضر شي.. حتا دااهاا نعاس فاقت لقااتو مكاينش وساعة 10:30 لين حالة فمها حداهاا ناضت مدوخة ومغلووبة على الصباااح علات عينيها فالمراياا كتشوف فكرشهاا لي بداات تباان وتواتاات معاهاا كدوز يديهاا عليهاا بابتساامة مخطوفة .. ضارت جيهت البريز لقااتو محيد وتليفون فوق الكرسي عرفت يعقوب لي حيدو.. هزتو خرجت كتشعل فيه .. جلست فوسط الدار مكمشة رجليها فوق الفوطوي..فتحات الواتسااب لقاات كلشي مصيفط ليهاا من عبير اسماء نزهة سمية سعيد اسماعيل نهاد ربيعة مريم سجلات لكل واحد فيهم مقطع صوتي كتباارك ليهم رمضاان والعوااشر.. ودازت لعند مريم لقااتها مصيفط ليهاا 3 فيديوات كروشيه ...

دخلات كتشوف فيهم وتحااول تفهم مقشعاات والوو وكتعاود من جديد تشوف داااخت. شافت اخر ضهور ليهاا لقاات شي 2 دقائق.. اتصلات بيهاا فالواتساب مجاوبتش ورجعت كتشوف فيديووات لي وحلات معاهم.. حتا كيوصلها مسج من عندهاا... 

مريم : ختي رمضان مبروك كيف تينا كيف صبحتي وكيف صبح مول الدار والعيال ديالك 

عودت اميرة اتصلات بيهاا وجوبتها فالبلاصة بعد السلام وتبااريك .

مريم : كيف دوزتي رمضان فالغربة 

اميرة : حاار بزااف متفكرينيش الحمد،الله على كل حال. عفااك غنمرضك فراسك بغيتك تشرحيلي راه والله ماا فهمت فدوك الفيديواات 

مريم : هههه اويلي انا بديت ليك من الأول كنوريك ونحسب ليك الغرزات ونوريك القناات ومفهمتيش

اميرة : شوف عفاك وسع خاطرك معايا راسي تقييل بزااف وانا هادا هوا سبب لي مكنبغيش ندخل اليوتيووب واحد نهار دخلت وتلفت يديهم كيطييرو كيزربوو بزاف هادا علاش بغيتك تصبري معاياا وتوريني 

مريم : واخاا شنو ندير ليك فيديوو اخر 

اميرة : مكرهتش والله 

مريم : واخا شوية يكون عندك .. 

قطعت الهضرة وبقاات كتسنى مريم تجاوبها ناضت جابت الكروشيه والصوف وربعت رجليهاا حتاا وصلهاا لفيديوو كتشوف فيه وتحااول تحفض الضرباات حتاا كدوخ وتعااود تشوف.. رسلات ليهاا مسج 

اميرة : ياا اختي اناا وقيلة موحال نطفروا.. معرفتش كيفاش غنشدو باش نخدم

مريم : عرفتي شنو تقدري نهضروا ابيل فيديو ونوريك مباشرة 

اميرة : لاا اختي منقدرش 

مريم : الصمت 

اميرة : شوفي لياا شي حل عفااك واخا عاارفة راسي صدعتك

مريم : (بالزعفة ) ايوا قلت ليك نهضروا فيديو نوريك مبااشرة ونتي مبغيتيش شغادي ندير ليك 

اميرة : اختي منقدرش والله راجلي ميبغيش

مريم : عرفتي اش غيجيك مليح حطي يديك على كاميرة كاااع مغاديش نشوف فيك ولا حتاا نعرفك ولا لسقي عليهاا سكوتش كحل وتبعي معاياا

اميرة : وصبري نشوف لاا لا بلاش غاا سجلي فيديو 

مريم : (تسجيل صوتي ------▶) واش اناا مساليااا ليك براكة متفرعيلي فموخي نقولو غاا نتي لي عندك الراجل والمسؤولية واناا مسؤوليتي وضروفي كتررر منك وهكاك درت معاك فوق الخااطر سليناا حناا من هادشي كااع الله يعااون...

بقاات اميرة كتسمع داك تسجيل وتعااود وجهها حمر مبقات قادرة لا تهضر ولا تزيد شي هضرة خراا.. وسجلات ليها 

اميرة : سمحلي عفاااك والله ماا لخااطري اناا غير راجلي شوية قااصح وميبغيش وبزز خلاني نتعلم داكشي علاش مبغيتش نهضر معاك فيديو فهمتيني يااك ... فهميني عفااك الله يرحم والديك وحاولي تعلميني مكرهتش ندير شي حاجة الله يسهل عليك

مريم : vu 

اميرة : عفااك اختي متقلقش علياا راعيلي شوية 

مريم : وخليني نرد الحريرة طيب ونهضرواااا

اميرة : ااه واخا صافي. انا نتسنااك 

جلست اميرة كتفرج فالتلفاازة ومرة مرة تشوف ف تليفون حتاا خرجت لين من بيت يديهاا مهزوزة وهياا عينيها باقين كيتسدوو بالنعاس جاية على رجيلاتهاا بشوية شافتها اميرة ناضت كطير عندهاا هزتهاا وجلست 

اميرة : الحبيبة ديالي فقتي صباح خييير محسيتش بيك الكبيدة 

لين : ايشي بيبي بي 

اميرة : خصك احبيية بيبيرو ديالك واخاا انا نصاوب لماماا لينوو اجي جلسي هناا انا نديرولك 

لين : ايشي ايشي بوا 

اميرة : واخاا اناا نجيب ليك تشربي 

خلاتها اميرة متكية على مخدة صغيرة ورجليها معلين فوق فوطوي كتجبد جابت ليهاا كاس صغير دالماء شربااتهاا ومشات توجد ليهاا البيبروون حتا لقااتها حداها فالكوزينة لاسقة فيها شداها بيد وحدة ورجيلاتها فالأرض هزاتهاا اميرة وخرجت كتمخض فالبيبروون دارتها فحجرها وعينيها ف عينيها كتهرهاا وتبووس فيهاا حطاتها حداهاا وهزت تليفون لقات مريم مصيفطاا عرام دالميسجات 

مريم : وهضري دغياا شنو غندير داباا 

بغيتي نهضرو فيديوو خير ليك نتي تفهمي ونشرح مبغيتيش راه واخا ندير ليك فيديو اخر متفهميش 

جلساات اميرة كتفكر وفنفس الوقت لايسيق يعقوب خباار وملقااات حل ناضت لبست بينوارهاا ولوات عليها الشان غطات عنقهاا ورجعت .. صونات ليهاا هيا ب ابيل فيديوو مباشرة ولأول مرة يشوفو بعضيااتهم ويتعارفو بالوجه... 

مريم : مرحباا الا بغيتي غاا غطي الكاميرة 

اميرة : لا صافي واخاا 

مريم : تبعي معاايا لوي الخيط هاكا ديري سريفة صغيرة دخلي فيها الكروشي ونبدااو نديرو سنسلة.. 

تبتات اميرة تليفون حدااهاا فوق الطبلة مكالياه ب الغراف دالماء وبدات كدير لي كدير مريم وتوريهاا بشوية لين كاانت ملهية مع الرسوم لي فالتلفازة يلاه شافت تليفون وهياا تنووض مقفوزة باغاا تشوف فالتليفون... 

هبطت رجيلاتها فوق الفراش خشاات راسها فالتليفون واميرة كتبعد فيهاا 

اميرة : حيدي احبيبة ... وحيدي من هناا بلااتي وتشوفي 

مريم : متبعة معاياا ياك 

اميرة : صبر اختي شوية عفااك.. 

مريم : الصمت 

اميرة : (هزتها ) يلاه اجي احبيبة نعسي هنا بلاتي ونعطيك تليفون تشوفي صافي 

اميرة كتجلسهاا وهياا كتشعبط فيهاا وتنقز عليهاا باغاا تشوف ومريم كيبانو غاا يديهاا واقفين 

مريم : بنتك هادي 

اميرة : اه اختي 

مريم : (تعجبت ) كتباانلي نتيناا باقاا صغيرة علاش شحال عنداا بنتك 

اميرة : (تلفت ) غير المكتااب اختي وصافي 

مريم : نعسي بنتك ومن بعد عاد نكمل معاك... 

قطعت مريم واميرة بقاات غاا كتشوف ملقاات متزيد ولا تقدم .. دارت ليها طيور الجنة وخلاتهاا ملهياا فيهم كتفرج خلاتها ناعسة وهزت تليفون ودخلت الصالون تبتاتو فوق الطبلة حدا الفاز د الورد وتصلات بيهاا كيتشاوفو مباشرة واميرة هازة الكروشيه فيديهاا وكدير لي كدير مريم تغلط وتعاود تبدا من جديد وهياا صابرة معاهاا تعاود توريهاا من الأول. واميرة مرة مرة طل على لين حتا شافتها نعساات عاد تهناات .. وركزت مزيااان مع التعلم بداات تفهم شوية الضرباات وكتحااوا الطبق وهياا كتحسب فالغرزاات. دازت سااعة طابت بالجلاااس 

مريم : ختي انخليك داباا تليفون ديشاارجاا وخصني نوجد الفطور بلاتي مور العصر الا بغيتي نكملك ساعة تجبرني هناا 

اميرة : صافي اختي الله يعااونك وسمحيلي بزاااااف برزتك منسااش خير 

مريم : بلا جميل.. 

قطعت وحطت تليفون... ورجعت كتعاود لي بداات دوزت وقتهاا كامل وهياا حدا سرجم تخدك وتعاود تحل وتعاود تخدم وتعااود تحل كتحفض . حتا دخل يعقوب حطات داكشي من يديهاا وهزت تليفون دارتو فالجيب وناضت.. 

يعقوب : فينك 

اميرة : هاناا ها انا جاية .. على سلامة 

يعقوب : (عنقها ) الله يسلمك سليت بكري وجيت

اميرة : انا مزال مصاوبت والو من قبيلة وانا جالسة ولين ناعسة هناا 

يعقوب : (باسها ) معذبة مسكينة دخليها لداخل ولا فرشي ليهاا فالأرض. 

هزتها اميرة دخلتها لبلاصتهاا ويعقوب دخل يبدل حوايجو مشاات اميرة لحمام سدت عليهاا وشعلت تليفون مسحت الميساجات كلهم والمكالماات. دوزت الماء على وجهها عاد خرجت. ...

توضى يعقوب وصلاة وتكاا فوق الفرااش كيرتااح... واميرة ناضت الكوزينة تشغل وتوجد الفطور حتاا فااتت العصر وعشية تعشاات هزت الصوف ديالهاا وجلست قبالت التلفازة كتفرج ودايرة سيلونس ل تليفون. ضور يعقوب وجهواا جيهتهاا شافتهاا خاشياا عينيهاا كتخيط 

اميرة : شوف شنو درت هادا العنق د كسيوة غنديرها لين

يعقوب : اهاه وشكون وراك ياك مكتعرفيش

اميرة : ديك البنت لي قلت ليك 

يعقوب : الصمت 

اميرة : وراتني مسكينة صيفطاات لياا الفيديوات 

يعقوب : اوك .. 

قلب وجهوا كيتفرج فالتلفااازة وهيا قلبهاا تهذن بحالا الجبل لي كاانت هازة حطااتو ورتااحت عاد تحمسااات كتر كتكمل على الكسوة لي باادية حتا بداات تكبر شوية وصلاات المغرب.. وناضت كتحط الفطور وتستف فوق الطبلة فرقو فطورهم ولين مرونة دنياا حداهم بشطيح مشا يعقوب لتراويح واميرة صلاة وجمعت الدنياا شدت التليفون تشوف اش كاين هضرت مع مريم لي كانت كتسناهاا نهار الكامل وراتها اش خدمات وعجبهاا الحال وشجعتهاا كتر.. بجوجهم رتاحو والقلوب دفاو لبعضيااتهم اميرة تحببت ف مريم ومريم هكاك.. وشودهاا هضرة اميرة مرة مرة طل فالسرجم تشوف يعقوب واش جااي باش تحيد تليفون.. كانت ليلة خاصة ليهم ماشي فالتعلم انماا لتعاارف وتقاارب اكثر.. كل وحدة كتعاود على تجريبتها فهاد الحيااة وكيف كدوزهاا... تقااصت اميرة من حيااة مريم لي كتعيش ف ضروف قااااسية بزااف ضوبل د حيااة اميرة ... لي خلاتهاا تشوف راسهاا انهاا من ناس المخيريين ومخصهااا خير وكل طلبات البنات موفرين عندهاا... زوج .. بيت .. استقرار.. حب.. بنوتة تاخد فيهاا اجر وتكون بنتهاا.. والأهم انهاا حاملة من بنتو او ولدو لي جاي فالطريق

ربيعة : وشنو المعمول اولدي صبر ومعندك مدير 

يعقوب : كنعياا نصبر امي ونقول معليش هادي دوز هادي دوز. انا ماشي منعهاا ولا مبغيهااش تعلم ولا مبغيهاش يكون عندهاا معرفة ..امي الوقت خايبة وبزاااف هياا دغياا كتيق وتعطي نيتهاا غداا بعد غدا فين نوصلو 

ربيعة : (تنهدت) اووف اووف. وسع خاطرك انا راضية عليك الحمد الله ربي عطااك بنت ناس تكون بيها وتكون بيك وهاهياا مسكينة هازة ليك بنتك واحلة فراسها نتاا دغيااا كتعصب وتيساع الخاطر معندش والحيااة راه خصها الصبر وخاصهاا تسكت على حقك نبهها وعطيهاا فرصة الا بانت شي حاجة ماشي حتاا لتما عاااد هضر راه اولدي صغيرة ومغربة حس بيهاا دير بوجهي 

يعقوب : يكون خير امي....

رجع يعقوب لدار متأخر لقاا اميرة فالكوزينة كتوجد الصحور غسل يدو ودخل يعاونهاا وهوماا كيجمعواا. جلسو يتصحروا واميرة كتفتف باغاا تهضر ومقدراش

اميرة : نهضر معاك ومدابزش معايا 

يعقوب : شي حاجة عوتاني

اميرة : لا مكاين والو. غا بغيت نقولك احم قح قح. احم بغيت شوف عطيني فرصة نهضر مع ديك البنت لي قلت ليك مريم ياك وحق الله العضيم حتا جاتني ضريفة كنبغي نهضر معاها وكنخاف عندااك ضور فياا 

يعقوب : (شاف فيهاا وحذر عينو ) اوك 

اميرة : ويي شكراا بزااف 

يعقوب : بشرط اري نمرتهاا 

اميرة : وعلاش باغيهاا 

يعقوب : نتصااحب معااها شبان ليك 

اميرة : الصمت

يعقوب : واري نمرتها نشوف شكون هياا وفين ولاا غاا طالقااها عليهاا ونتي حالة فمك 

اميرة : اه واخاا هاهياا (كطلع فالنمرة ) 

عطاتو اميرة نمرها سجلها عندو وبقاا خاشي وجهوا فتليفون كيطلع ويهبط حتا حط تليفون ديالوو وكمل مكلتو 

اميرة : شنو 

يعقوب : كولي شغيكون شوفي راه غطلعت شكون هادي وصافي نتأكد المهم ردي بالك واخاا هكاك ومن الأحسن خلي العلاقة عادية مفيناا منهز صداع اخور

اميرة : (بالفرحة ) لاا كون هاني والله صافي

اياام رمضان كدوز وكل يوم كدوزو اميرة غاا تليفون مع مريم والتعلم والخدمة فالكسيوة لي بدات لين مرة يجيو يفطروا عندهاا ويقصروا معاهاا مرة هياا تمشي عند ربيعة مرة عند عبير. ومرة مرة كيخرجهاا يعقوب مور التراويح تساراا وتطلق رجليها شوية فينماا مشاات هازة صاك فيديهاا فيه الصوف والكروشيه تخدم فينماا جلست. وبالهاا كامل مع لين كتحاول تبدل ليهاا بشوية ودوش ليها بلاما تقيص يديهاا. والحمل لي بداات تحس بيه وتقل رجليهاا بدااو يفشلو ولكن كتكااابر وكتحااول تقوي راسها اسبوع الاخر د رمضاان ليلة 27 عيد على الأبواب .. بعد صلاة خرج يعقوب واميرة كيتقداو لي غيحتاجو. بعض من الحلوياات والمملحات داها لبوتيك كبير وجميل فيه لباس محتشم وطويل خداا جوج عبايات ستيل الخاص لي كيعجب اميرة وترتااح فيه وبعض حويجات خلص يعقوب ومشاا لبوتيك رجال صاحب المحل مغربي خلا اميرة واقفة شادة لين فيديهاا ودخل خدا كندورة جديدة بالعنق خرجهاا لأميرة تشوفها وتعطيه رأيهاا عجباتهاا . وخدهاا ومشااو دوزت ايام قليلة غاا فالصابون وتسيااق وجميع الدار والكوزينة من رغيفااات لكيكات كتعمر ودير فالفريكوو فطروا اخر نهار وهوماا حاضيين تلفازة شغادي يقولو حتا علنو على العيد غدا

💬: زهر والورد وريحان... قطفته من حديقة الرحمان لأعز انساان بمناسبة العيد الفطر.. 

Message envoyé 

صباح العيد ..ونهار ماا بحالو نهار صبحات اميرة فقمة اناقتها لابسة البلدي فالكرونة والشعر مطلووق والكحل فالعين واقفة فالكوزينة كتفيض الحليب ويديهاا فالتليفون كترسل التهاني والمباركة لعائلتها ويد خراا كتقاادد فالطبيسلات دالحلوة والمالح والمعسل ... حطات تليفون فجنب وبدات كتخرج لصالون وتستف وتقاادد الطبيقات صغار الملونين فالحمر والموف لي عامرين بالفااكية .. رجعت لبيتهاا واقفة قدام المراياا كتقاادد شعرهاا وتمسح عينيها كتنقص منهم الكحل حتا كتكون خارجة وترجع تكحل من جديد.. فيقاات لين ناضت ليهاا بزز كتهرن وهياا كتسكتهاا وتحيد ليها الحوايج بشوية لبسااتها جبادور فالبيسطااجي وشربيل مشطاات ليها شعرهاا وزينااتو بمقييضاات.. وهيا ناعسة فيديهاا خلاتهاا فبلاصتها وناضت الماريو جبدات بواطة لي فيها الذهب ديالها هزت حوالق والدمالج كتلبس فيهم وتقاادد هزت شان لواتو عليها وخلات خصلات شعرهاا مطلوقين خرجت الصالون كطل مور الخامية على يعقوب واش وصل وترجع تفيق لين وهياا كتهرنن وتغوت وتنتف بيديهاا ضارت المراياا كتشوف راسهاا وقلبهاا غيسكت حاسة بحالا اول مرة غتشوف يعقوب رجعت حيدات داك الشان وقداات شعرهاا وجلست فطرف النموسية كتهزز رجليهاا حتا فاقت لين مغوبشة ومضورة وجهها واميرة كتحزر فيهاا هزاتها فيديهاا وصابرة على تقلهاا يلاه خرجت من البيت وهياا تسمع الهضرة جيران العرب كيبااركو العيد وصوت يعقوب معاهم وقفت حداا الباب كتنفس بسرعة .. حتا حل يعقوب الباب لابس قندورة لي شراا وبلغة والشعرو ممشوط للور وريحة عااطية.. وهواا يشوفهاا واقفة حداه بحال العروسة سد الباب وهياا تعنقوو وهواا شاد فيهاا وف لين.. رجعت باللور وشافت فيه 

اميرة : مبروك عيدك تعيد وتعااود 

يعقوب : نعيد ونعاود معاك ومع هاد الفنوون لي هازة اجي اباباا عندي 

لين : (بعصبية ) اننن كاا طاا بيخ 

يعقوب : (تعجب ) مال هادي شقاالت 

اميرة : ههه قالت ليك aga هياا رصى عليها متشدش فيهاا نتاا بيخ خايب 

يعقوب : ياااكي وااااخاا الالة تاناا منبقااش نهضر معاك 

اميرة : انا صبحاات كتقمش فيهاا شوف يدي كيف ولات (كتوريه) 

غاديين للصالون وكيهضروا 

يعقوب : الله الله.. شهادشي واناا قلت راكي مزال منضتي حتا من نعاس هه باسم الله

اميرة : هه لا فقت بكري دوشت وجمعت الدنياا عاد وجدت الفطوور 

يعقوب : (كيطلع ويهبط فيهاا ) مي....! شهاد زين كولوو صبحتي منورة وشعوراات يااا لالة 

اميرة : احم نخوي ليك حليب ولا اتاي

يعقوب : ههه لي بغيتيي 

اميرة : (عينيهاا فالسينية وهياا كتخوي ) ايمتاا انمشيو عند خالتي 

يعقوب : بلاتي شوية لين نعساات تااني حطيهاا حداك راهاا معذبة 

اميرة : مبغااتش تفيق هاد الصبااح قصراات لبارح بزااف. ايمتاا خرجتي نتاا فالصبااح اناا كاعما حسيت بيك.. انا لباارح نعست معطلة حتا كملت ديك الكسيوة لين وزوقتهاا بالدونطيل عااد نعست نوريهاا ليك ؟ 

يعقوب : بلااتي..!

خرجت بكري طلاقيت جارناا لي لفوق مشيناا انا ويااه ورجعناا انا ويااه .. (جبد تليفون ) انصونيو بعداا على الحاج نبااركو ليه العيد هوا والعائلة عااد نصونيو على ماماك اوكي 

اميرة : ااه واخاا وعطيني نهضر اناا اللولة عفااك... 

اتصل يعقوب بالعائلة كلهااا دوزو وقتهم كاامل وهوماا فالتبااريك والضحك وجمامع .. واميرة شداات الهضرة مع فااخيته لي شوقهاا لبنتهااا زاد كتر وهياا كتهضر معاها وهياا كتبكي فطرواا مع بعضيااتهم وناضت تبدل حوايجهاا وتقااد فولارهاا دخل يعقوب حيد الساعة من يدو وجبد وحدة خراا كيلبس فيهاا وهوا كيشوف ف اميرة 

يعقوب : ميرا اليوم دار غتكوون بلااان برجال مسحي الكحل داباا وملي ترجعيي اراا مديرييه اووكي..

اميرة : (وعينيها فالارض) اه غنمسحوا واخاا 

يعقوب : (عنقها ) رتاحيتي ملي هضرتي مع ماماك 

اميرة : اه بزااف الحمد،الله هيا على خير..غتمشي عند الميمة اليوم وغدا غتمشي عند حنى فغفسااي

يعقوب : اهاه مزيان يلاه كملي انا نهز لين ونسبقك لتحت شدي معاك الباب 

اميرة : لا بلاتي حتا نلبس لين توكة لي خدمت ليهاا مع طربوش 

يعقوب : ولاا ما...

اميرة : عفااك عفااك انا بايتة ساهرة عليهاا باش نكملها ونلبسها ليها 

يعقوب : واخاا

ضارت لمرااياا مسحات عينيها بالكريم هزات تليفونها وصاكهاا ومشات لبساات لين تويشية لي صوباات ليهاا وهياا غارقة فنعااسها

اميرة : (بالأسى) هئ جاتهاا صغيرة وااخاا عبرت عليها ؟؟

يعقوب : معليش حيديهاا ليها داباا ومرة خرا ديريها كبيرة

اميرة : بقاا فياا الحال بزاف كنت باغاا نلبسها ليها 

يعقوب : ممكتاابش حيديهاا ليهاا و يلاه نمشيو اميرة : واخاا

حيداتها ليها اميرة وقداات ليها كسوتها هزتها يعقوب وخرجواا بجوج مشادين فيدين بعضياتهم

طلعوا فالطوموبيل وزادو غااديين لدار .. واميرة باغاا تنتف جناابهاا على الكسوة لي جات لين صغيرة وملبساتهااش ليهاا.. 

حتا وصلو لدار لقااو الباب لوراني محلول وحميد واقف مع حاتم برا كيكمي... و2 طوموبيلاات واقفين لداخل وقف يعقوب وخرج مشاا عندهم واميرة موراه هازة لين ( من البعيد

اميرة : عمي حميد عيدك مبروك ..(شافت ف حاتم خاي عيد مبروك

حاتم : الله يبارك فيك.. 

خلات يعقوب معاهم ومشاات جيهت الباب داخلة وهياا طلاقاا خالد ولد عمت يعقوب وراجل خالتو وعمو.. خارجين.. وقفت خوات ليهم طريق وبركات ليهم العيد وعينيها فالارض من بالعيد دخلت عندهم لداخل لقات الصالون عامر بالعائلة دازت كتسلم عليهم كلهم وجلست حداا عبير واسماء كيتجمعوا ويشربو اتااي ولين كتنقز حداهم نتفاات مقابضهاا وجلست كتحيح ويديهاا مزال مهزوزة .. دوزت نهار كامل معاهم تغداو مجموعين رجال بوحدهم لفوق ونساء بوحدهم لتحت هكاك فليل تعشاو مجموعين حتاا تعطل الوقت عاد هبط يعقوب عيط لأميرة باش يمشييو واميرة كترجى ربيعة بعينيهاا باش متمشييش وتباات معاهم وقفاات عليه ربيعة كتحزر فيه وتحصروا يبااات .. بكشاايف باش بغاا ورجع طلع لفووق مع رجاال.. مشاات اميرة لبيت ربيعة عطاتها بيجامتهاا طويلة لبسااتها ولوات عليهاا زيف وخرجت براا لجردة هياا واسماء وعبير وبنات عائلة كل وااحد كيعاود على راسوو واميرة غاا كتشوف فيهم وتسمع لكلامهم.. وملي يسولوهاا كتكتفي " اناا الحمد،الله فوق بخير ... معطاات راس خيط لحد وخلات الأمور هكاك... حتا داز ليل طويل دخلو نعسو حداا بعضيااتهم... نعست اميرة هياا اللولة وحداهاا لين حتا صبح الصبااح مشمش فااقو معطلين لقااو الفطور محطوط فطروا مجموعين وتغداو هكاك وفالعشية كل واحد تفرق مشاا بحالو واميرة ويعقوب هوماا لاخرين حتا طاح الضلام عاد مشاو بحالهم...

جلسوو حدا بعضيااتهم ساكتين..كيتفرجو ولين حداهم واميرة شداهاا الغمة ناض يعقوب دخل لبيت تجبد بحوايجو نعس وخلا اميرة كضور فعينيهاا عاد هزت تليفونهاا كتميسااجاا حتا جاهاا نعاس ودخلت لبلاصتهاا ولين حداهاا كتنعس فيهااا.. 

صبح الصبااح...

يتبع ...