الأرملة الصغيرة الجزء التاسع

2019

محتوى القصة

رواية الأرملة الصغيرة

الحاج : وزعمة بحال بحال كيف هنا كيف عندكم 
فاخيته : باا بغيت ناخد بنتي تجلس معايا وملي غتوحشوها راه غنجيبها عندكم 
الحاج : وجمعتوو حوايجكم ومعموليين 
راضية : الحاج صافي خليها على خاطرها 
الحاج : ايواا الله يوصلكم على خير وجلسوا بعدا تفطروا 
احمد : ياابسم الله فاخيته شوفي بنتك واش سلات تجي تفطر 
فاخيته : هاهياا كتلبس غير فطر انا مخصنيش.. 
جلساات فاخيته فطرف السداري وغاا ساكتة بحالا جالسة على جمر خاصها غا ايمتا تمشي.. خرجات اميرة لابسة عباية فالقهوي مغلوق وشان طويل كيف العادة فالكحل.. وتقيشرات وصاك محرفة بيه خرجت وباست يد جدها وباها وراسها جداتها .. 
اسماعيل : مغنسخاوش بيك امورة 
اميرة : حتا انا دابا نجي نشوفكم 
حنان : تهلاي فراسك وفوليديك بزااف وحتا حنا دابا نجيو عندكم 
فاخيته : فطري اميرة دغياا 
حنان : هاكي شدي اتاي ديالك جري عندك الخليع يااك عزيز عليك وكولو. 
اميرة : كلشي حدااياا.. 
راضية جالسة غا كتشوف ودموعها سابقينهاا صبرات راسهاا حتا عيات ومقدراتش شدات دموعها وناضت دخلت الكوزينة تمسحهم ولكن مقدراتش بقاات تما حتا سمعتهم خارجين واميرة كتعيط، عليهاا. عاد خرجات سلمت عليها فاخيته وطلعات لتام فوق وجهها وهبطت مع الدروج تبعها احمد
. وعنقاات اميرة وشدوهاا بكاا حتا حد مسخاا بلاخر... باست ليها اميرة جبهتهاا.. 
اميرة : معمري منسااك الميمة حيت نتي بصح ميمتك دوز هاد الايام ونجي نشوفك والله كنموووت عليك. اخر كلام هوا هادا هبطات اميرة مع الدروج وطلعات مع امها وباها فالطوموبيل وزادوو شادين الطريق.. 
فاخيته : عرفتي فين غنمشيو 
اميرة : لدارنا ولا 
فاخيته : ههه لا غنمشيو العروبية عندك لالاك ماين بااك 
اميرة : وااو بصح عمرني شفت العروبية مشوقة نمشي نشوفها 
فاخيته : وراه كنا كنديوك ونتي صغيرة غاا معقلتيش وصافي 
اميرة : مشوقة بزاف شحال ديال طريق 
احمد : شي 2 سوايع هكاك 
طريق كلها واميرة كتسول على عائلتها وكيفاش دايرة دنيا عندهم حتا خرجوا على المدينة ومشاو مسافة كبيرة 45 دقيقة عااد دخلو فالبادية... واميرة طالقة عينيها فالجو ديالها والسكن لي هوما فيه وناس شي غادي يسقي شي جاي من السوق ودراري كيلعبو بالغيس والبحيرات فكل جهة عامرين بالماء كانت الشتاء كتنقط واميرة فرحاانة كتشوف مور الزاج 
فاخيته : زياد وقيلة نعس راه وصلنا 
اميرة : اه هاهواا ناعس... زيااد نوض واااا نوض راه وصلنا 
زياد : (كيحك عينو) فين هوما حمير بغييت الحمير

اميرة : ههههه ونوض راهم 
احمد : يلاه نزلو 
فاخيته : واالغيس بزاف اسدي احمد وانا عندي صباطو يتقطع هنا قبل منوصل
احمد : معندناش كيف نديرو غاا طلعو بقات ليكم غا هاد طليعة وهانتوما وصلتو 
حبيبة : واااخوياا على سلاااااامة 
احمد : الله يسلمك احبيبة وعيطي لمختار يجي يطلع معايا هاد الحوايج 
.. خرجو ملين دار هابطين يطلقااوهم اميرة هزت جلايلهاا وشدت فيد خوها وبقات طالعة بشوية عليها فوق الحجر وفاخيته تبعاهم.. حتا وصلو سلمات اميرة على العيلات وولادهم وشدات جداتها مرا كبيرة فالعمر كتمشي حانيا عنقاتها وكتبوس ليها فيديها هكاك فاخيته سلمات ودخلو كلهم لداخل كانت شتاء بدات تصب جلسوا رجال بوحدهم ونساء بوحدهم، اميرة الفرحة متلفااها غا كتشوف ومبتاسمة.. وفاخيته كتسول وتجمع وتعاود.. 
...... ....... ...... ....... ....... ....

يعقوب : انا جبتك لهنى باش تراعي لياا شوية حيت اناااا غاااارق وضاااايقة عليااا واش عارفة هاد المسؤولية لي هاااز راه جبل وميهزهااااش واصلا مااا انا لي ختاريتك ما لا انا لي بززت هاد زواااج برضاااك نتي واخاا كنت متردد يمكن معرفش نختار.. يمكن مخممتش مزيان يمكن تسرعت.. واخا كنت كنخمم بعد مدة نقدروا نكونو بحال المزوجين عايشين طبيعين ولكن حتا حد مفيه خير.. انا مغادي نقيسك مغادي نزيد نهضرك لي بيناتناا تساالا وتسالا اليوم .. حتا لأمي وحبس!!

امك كنت دايراها بحال امي وكن... 
يعقوب : صاااااافي سكتي ايناا احترام هااداا؟؟ هادا كتهضري عليه سميتوا احترام ونتي الهضرة د الزنقة لي انااا راجل نقسم فمي بالله عمرني حتاا فكرت فيها عسااك نقولهاا ونتي صنااصلك واصلين لماعرف لين وحدا صحابي وناسناا .. 
ايمان : واخا دير لي بغيتي دابا معليش يحساب لياا كتعطي لكل واحد حقو ملي نتاا سالم ولاية على حقيقتك صافي.. 
يعقوب : تجهليني غنخسر معاك دبصح انها لي جيت وقلت ليك خرجي هاكااا حدا رجال /؟ انا لي جيت وقلت ليك سيري لقهاوي وسيري طلاقاي هادا وهدااك انا لي كنت كنقوليك لبسي هاد سراول وديري الحالة انا لي قلت ليك عايري امي ماشي مرا ماشي جوج يحساب ليك غاافل؟؟ يحساب ليك مفخباري والو؟؟ يحساب ليك مواصلني عليك حتا حاجة إذن انا حمار بالوذنين!! اولا واحد عاد حطو الكار من شي كوكب.. ياا سبحان الله 
ايمان : 😵😰😰😱😱😱😱😱 شكون قالك هادشي منين جبتي هاد الهضرة 
يعقوب : طاحت من السماء، هضرت معاك الله يعاون حنا سليناا 

خرج يعقوب ورجع هبط بحالو التحت عند اموو عنقهاا وحاول يصبرها.. هز لين كيفرح بيها وخالد ومعاذ عاطيينه العين مهضروش معاه كلشي كيضور فعينو. 

سميرة : يااختي طيبوني هاد الدرج 
جميلة : عندك غير نتعطلو بالغدا غير سربي دغيا 
سميرة : سليتي ديك مطيشة بالتنقية 
جميلة : بقات غير هادي لي فيدي سربي نتي
سميرة : دغيا نرد كوكوت طيب اووف عييت.. 
جميلة : سميرة.. وااا سميرة 
سميرة : مالك 
جميلة : اجي اجي شوفي شنو فسطل د الزبل 
سميرة : ياانتي مالك غاديا تقلبي ايكون فيه الزبل لي جمعناا وصافي 
جميلة : اويلي، جيت نرمي هاد القشور لقيت هاد خرقة بيضاء ماعرفت اش فيها اصحبتي 
سميرة : (جات ) وشكون حطها هنا اويليي.. انجبدها 
جميلة : لااااا لاااا ويكون شي حاجة تم لا 
سميرة : لا اختي نشوف نفسي متهنينيش 
دارت سميرة ليكات فيديها وجبدات داك الخرقة وحطاتها فالارض فوق الجفاف وبدات تحل فيها فالخيط لي مربوط بها حتا بدات تعطيها الريحة خانزة.. خارجة من ديكشي بقات كتحل، فيها حتا كيبان عليها سليب د يعقوب مجلس فيه داكشي.. 
سميرة : والعياااذ بالله 
جميلة : اويلي، يااااااا سميرة اش هادشي، لحمي تبورش ليا اختي 
سميرة : هه موصيبة المهم كملي شغلك نفهم هادشي 
حميد : سلاام عليكم الا باقي ليكم شي اتاي سخنوه معاكم 
سميرة : (غطات داكشي ) اجي اجي بعدا مشفتيش واحد خرقة بيضاء 
حميد : اييه واش طاحت ليكم من السرجم من بيت سي يعقوب راه رميتها فالزبل 
سميرة : لا هذه حناا كنا فبيت لاخر اوك معليش، سير ها جميلة تجيب الماكلة. 
خرج حميد وسميرة بقات واقفة كطلع وتهبط النفس وجميلة، كتصاوب شغلها وهيا مخلوعة.. 
خرجت سميرة وقفت فالدروج وعيطات اليعقوب.

يعقوب : اجي حيدي من هنا 
سميرة : وي 
يعقوب : شي جديد 
سميرة : اه 
يعقوب : ياك لباس عوتاني
سميرة : صبر انا جاية 
رجعت سميرة هزت ديك الخرقة ورجعت عندو وهوا داير يدو على فمو كيخمم وعاقد حجبااانوو وعينيه حومر 
سميرة : حشاك وعز ربي وجهك الكريم وسمح لياا ماشي لخاطري ولكن هادشي ضروري واش هادا ديالك!! (وراتو ليه) 
يعقوب : !!!!!!!!!!!!!!!!!!! شهادشيي منين جا وكيفاش 
سميرة : صراحة دالله والله اعلم ايمان دارت ليك هادشي لقاه حميد طايح تحت السرجم ديالهاا وملي حليتو لقيت ريحتو خانزة وملوي بخرقة ومعقود مزيان 
يعقوب : سحور زعمة يكون هادشي 
سميرة : اه الله يسترناا ويسترك 
يعقوب : فخبارك واحد الحاجة نتي زدقتي حسن من اي واحد اخر.. فعلا وقفتي معااياا ملي سافرت كنتي كتعلميني صباح وعشية بشنو كاين وشنو الجديد واخا كنت نطلب ختي مغديش دير هادشي لي درتي معايا نتي هي لا كانت كتكذب عليا وانا داير راسي متيقهاا واخاا خبارها كلها عندي وكنت خاايف نضلمها. عرفتي شنو يجازيك الله وحاشة شي نهاار توقفي عليها ومتلقينيش.. 
سميرة : سمحلي ولكن راك خووياا والله شاهد الله يسر ليك نمشي نكمل شغلي.. 
يعقوب : سيري الله يعاونك 
شد منها يعقوب داكشي وتم طالع فالدروج كيخلف على جوج درجات حتا وصل عندها لبيت لقاها معكرة مقالة لابسة ومدليا راسها فالسرجم كطل وتشوف 
يعقوب : كتقلبي على هادي ياااك 
ايمان : ااااه خلعتينيي دير غاااا غا الحس بعدا
يعقوب : الا نتي مصمكة انا شغادي ندير ليك خصكي تعرفي هادشي مكيكرش فيا واخا تمشي عند كبيرهم حيت متشبت بالله اكثررر ماااتصوري وحيت مأمن بالله وبالقدر خيره وشره.. وحيت عاارف ان هادشي كااامل واخاا يعيااا يلسق فيا غيضوور ويضووور ويرجع لمولاه لي فيك يكفيك. وكيف قلت ليك قبيلة والله لا قستك ولا هضرتك. ليلة مغديش تزيديهاا هنا خوي عليا والله يفرقنااا اخر كلامي هوا هاداا... 

5 ايام بعد هاذشي.. 

خالد : زعمة مزال منفخ عليها 
يعقوب : صافي سكتني
خالد : كنت خاايف تيقهاا وانا تكذبني ونخسرك ولكن طرا العكس واخا مقلتش زدقت انا لي منسواش
يعقوب : انا ماشي كنرضع فصبعي ولا مزال عاد كنتعلم كلشي واضح وبااين هضر معاايا وتبع، معايا كلشي وراني غنفهك مي سميرة دارت الواجب وزدقت حسن من شحال واحد.. 
خالد : وااخا المهم تهلا فراسك انا وعبير غنمشيو راه طولناا بزاف 
يعقوب : جلس 
خالد : مبقاا منجلس ندير 
يعقوب : جلس جلس.. تجلس على شوووك ان شاء الله الماسخ 
خالد : راك عارف نتاا صاحبي وخوياا كتر ولكن كنخااف نآديك شي نهار، بدون قصد، ونزدق خاسرك 
يعقوب : صافي سكانها المرض ونتا طيحتي لياا الحلاقم بهضرتك
خالد : توحتشك والله 
يعقوب : يتوحشتك الوحش عاارف لي كاين يلاه نمشيو القهوة 
خالد : زيد على باركت الله

اميرة : ههههه زياد وقف زياااد هاهوا غيركلك هرب هرب اجي 
زياد : هههه وااا الخوافة وا الخوافة. انا غنطلع عليه نمشي نتسارا 
اميرة : راه امي غضربك اجي متمشيش ليه 
حبيبة : عنداك يركلك ديك الحمار متيقش، فيه 
اميرة : عمتي شكديري شنو سميتو هادا 
حبيبة : هادي الفرنة غنطيب الخبز 
اميرة : كيفاش كطيبيها فيه
حبيبة : جيبت الحطب وشعلتم ايوا حتا حماات الفرنة ودابا كنسفرطوا مزيان باش نمرمي الخبز
اميرة : يااه سبحان الله كيفاش دايرة هادي
حبيبة : هادي سميتاا سفراطة غير الشراوط ملويين على هاد، العود ملي كنقيو الحطب يحمي الفرنة سفراطة كنخشيوها فالماء فهاد البيدو الحالي كنشطبوها باش الخبز متجيناش موسخة 
اميرة : الله دابا عاد فهمت ياه مزيان 
حبيبة : ايوا دابا نوريك شحال من حاجة 
اميرة : هاد البلاصة دابا شنو سميتها 
حبيبة : هادا جبل غفساي 
اميرة : يااه زوين بزااف حتا هضرتكم زوينة 
حبيبة : ايوا جبالة ههه واافااتحة وجيبلي الطبلة دالخبز 
.
فاتحة : هاك انا راني مشغولة الداخل دابا مدعيطلي منعيطلك 
اميرة : ههه شكديري نتي 
فاتحة : انا كنبيض وكنحنك 
اميرة : انا تدخل معاك نشوف اش كديري.. 
دخلات اميرة مع فاتحة لبيت لداخل لقاتها حاطة جوج بوادة مقطعين فيهم شي حاجة واحد لونو بيض واحد لونو خضرر مغلوق هزت اميرة جلايلها من الارض وحنات، كتشوف اش تما 
اميرة : دابا هادو شنو هوما 
فاتحة : هاديك وحدة بياضة وحدات حناكة 
اميرة : ولاش كيصلاحوا هادو 
فاتحة : ايوا هانتي كتشوف كنبيضو البيت ونحنكو الحزام 
اميرة: هاد بياضة صباغة 
فاتحة : هههه لا هاديك بحال الطوب كتكون فجراجف فين ممشيتي تلقايها كنهزوها حنا نفزكوها بالماء ونجريوها ونبيضوا بيها
اميرة : وهادي 
فاتحة : هداك زبل دالبقر كنخلطوه مع الماء حتا، هوا ونحزموا بيه البيت والارض 
اميرة: اواه 😂😂 وكتجلسوا فيه هكاك، 
فاتحة :ههه جاتك عجوبة الالة اميرة راه عادي من قديم الزمان 
اميرة: وكتقبل ليكم الصلاة ! انا منقدرش نصلي هنا 
فاتحة : ههه حيت كنفرشو مكنجلسوس فالارض وراه حتا جوامع محنكين بهادشي 
اميرة : الله هكاك 
فاتحة : اجي تصاوبي معايا 
اميرة: ههه اه نجرب 
فاتحة : هانتي غطسي، هاد الخرقة مزيان وعصريها شوية ودوزي على الارض. 

هزات. اميرة خرقة حرشة وكدوز بها على الارض وكتهرب وجهها باش مطلعش فيها الريحة.. حتا سلاو هيا وفاتحة وخرجوا بيضو البيت من برا شميسة بدات شرقات وايمن ولد حبيبة هوا وزيادة مخرجين البقار يرعاو برا .. واميرة فرحانة بالجو دخل من على باب وتخرج من، على باب وناس مراقبيها من بعيد في صمت.. عجباتهم عفوياتها وضارفتها وكلامهم الموزون كلشي دخلات ليه لخاطروا..

احمد : والله ما عرفت صراحة 
الحاج : وفكر معاياا مزياان. راه احسن شيئ بنتك تزوج وتكون قريبة ليكم حاول تقنع فاخيته ورد عليا
احمد : واخا ان شاء الله 
الحاج : شحال ونتوما تما دابا 
احمد : وراه اليوم 10 ايام كنا غنمشيو واميرة وزياد عجبهم الحال وبقينا 
الحاج : ايوا باش ما كان رد عليا وحاول تفكر حتاا نتاا 
احمد : وراه والله مااكرهت نزوجها ورافد ليها الهم كبير وليني الغالب الله 
الحاج : ايوا دير شغلك الله يعاون 
.... 
اميرة اي، حاجة شافتها كتخشي راسها فيها باغاا ديرهاا وباغا تعلم ليها..مكتبقااش غا جالسة دغيا عجبها الجو ودغيا عرفات سيستيم ديالهم كتوجد معاهم وتحط معاهم وملي يساليو تهز الماعن تحطهم فالمرح وتخوي الماء من البوادة فبانيوات وتجيب الصابون وتخرج الطبلة وتبدا تغسل فالبانيو وتشلل فالسطل وتحط فوق الطبلة حتا كتسالي كلشي وينشفو ودخلهم لبلايصهم.. اغلب ناس.. كيشوفو فاخيته جالسة برا مجمعة مع ناس. كيبغيو يجلسوا معاهاا ويجبدو معاها الهضرة على زواج اميرة ولكن هي لا كتحااول متعطي الدخلة لشي حد.. وجوج نساء طلبو يد اميرة لولادهم. وكان الرفض على طرف لساان فاخيته.. دوزو تما 16 اليوم كلها ضحك ونشاط وبهجة واميرة حولات تنساا همها شوية .. سلموا على كلشي. وطلعوا فالطوموبيل كيشيرو عليها مور الزاج.. واحمد كيدخل الحوايج لكوفر هوا ولاد ختو والبيض البلدي والحليب والبقولة بالرباطي وجوج دجاجات مربوطين. وشدو الطريق راجعين الفاس 

(مذكرة أميرة) 
أميرة : امم وقت غزال دوزتو ملي مشيت البادية.. شفت عائلتي وحبابي ودمي لي اغلبية مكنعرفهمش.. عرفت عماتي وعمامي والاقارب.. حناكة ههههه ناري نتفكر هادي نبقا نموت بالضحك حياتي كلها اووو!! كيفاش دابا الوسخ د البقر كيخلطوه بالماء ويرجع بحال الصباغة ويصابوه فبيوتهم ههه والموصيبة كيعطي لون جميل وكيزوق البيوت ههه هاد المذكرة غنعمرها اليوم بهادشي لي كتشفت دكانة ههه جلسة فيها غزالة مبهجة.. المرح واطية زوينة بحيرة.. بيار .. اووه كون كانت عندي كاميرة كن صورت كلشي ويبقاا ذكرة 
زياد : (داخل) تكلمي لماماا 
اميرة : اه واخا انا جاية.. 
شدات اميرة كتابها وحطاتو فالمجر وخرجت لوسط الدار عند امها.. 
اميرة : امي هانا 
فاخيته : جيتي تجلسي معايا وتشوفيني ولا تجلسي فبيتك بوحدك ايوا ملي وصلنا قبيلة ونتي تما
اميرة : لا هه انا داك الكتاب لي خديت من المكتبة ملي وصلنا راه كتبت فيه مذكتي ملي سافرنا وداكشي لي عرفت عجبني الجوو بزاف 
فاخيته : ودوزي تجلسي راني موحشة فيك بزاف
اميرة : (جلست حداها) حتاا انا بزاف والله ميمتي بغيت نطلب منك طليبة 
فاخيته : اههاه شنو 
اميرة : بغيت نقرا بغيت نعاود نكمل منين وقفت
فاخيته : موحال ينبغي باك ابنتي مكاين لا اصلا لي قرا مهوا فربح ر
اميرة : بغيت نقرا ونوصل للحلم ديالي والله 
فاخيته : بنتي نتي، عارفة باباك بحال جدك عندهم عقلية وحدة وانا واخا نبغي نقنعوا راه منقدرش مباغا ضد ما باغا عكس 
اميرة : وقولي لبابا نمشي لجامع نكمل قرايتي فيها 
فاخيته : ويكون خير 
شنو نديرو العشاء 
اميرة : امم عندنا الكفتة 
فاخيته : وسيلة اه كاينة 
اميرة : نصاوب ليكم بيتزاا راني تعلمت ليهاا مزيان والفريت واتاي
فاخيته: سير عام الله يلاه ها المغرب كتوذن 
اميرة : انا نمشي نتوضى نصلي وندخل الكوزينة.. 
مشات اميرة توضات ودخلت لبيتها تصلي.. وفاخيته صلاة ورجعت تكات فبلاصتها كتفرج فشميشة.. دخل احمد لقا اميرة دخلات الكوزينة كتصاوب العشاء وحاطة حداها راديو طالقة الاذاعة الوطنية كتفرج.. 
احمد : فاخيته 
فاخيته : ايوا فين شدرتي 
احمد : والو نوضي نهضروا..

فاخيته : الله يسمعنا خير
احمد: هضرت انا والوالد ديالك وراه تافقناا غنعطيو البنت للسيد لي جا يتقدم ليها 
فاخيته: ومعامن تشاااورتي وشكوون قالك حنا خصنا نزوجو البنت ولا انا مكينااش انا مولداش انا معندي قمة ومال بها واحد اش مشالوو اشمن غراض عندو 
احمد :سمع لبارح كانت بنت وعاطياا لعين لكل راجل ودابا راها بحال المطلقة ياا فاخيته جاها ولد ناس وانا مرجعش فكلمتي صافي تفقناا وتراضينا والسيد هضرت معاه وتفاهمناا والله يجعل الباركة وداك ساعة نحددوا وقت الخطبة والعقد وتمشي لدارها
فاخيته : باغي تحرقلي دمي باغي ترزيني فصحتي وفشباب بنتي علاش داير معايا هادشي كولوو علاش حرام عليك.. واش نمرض، ولا نحماق ولا اش يطرا فيااا البنت مزال مبردات من كيتها ومن موت راجلها وعاود تزوجها واش نتا عندك شي عقل ولا متكسابووش انا ممزوجااش بنتي ولي بغاا يكون يكون ولي بغاا يطرا يطرااااا 
احمد : هضرة خاوية هاديك.. لي عندي قلتو سوا بغيتو سوا لا 
فاخيته : باغي دير الضد يااك واجي اسيدي نشدوه كاملين 
احمد : (ناض ) لاحول ولا قوة الا بالله 
لبس احمد بلغتواا وهبط مع الدروج وفاخيته جلست دايرة يديها على راسها كتنهج.. اميرة من طبعهاا ومن التربية لي رباوها ملي كتشوف ماماها مع باباهاا كيهضروا كتسد الباب او كتمشي لشي جهة خرا.. ولكن سمعات غواتهم الهضرة نيشان دازت مع وذنهاا والقضية ديال الزواج شدات الباب وحنات الارض كتبكي فالصمت وحوايجهاا تختخوا بالبكاا..جاتها قهرة حتا دخلات عندها فاخيته وشافتها فديك الحالة عنقااتها بالجهد وكتبووس فيهاا وتشد ليها راسهاا وتبوسو..
اميرة : قنطو مني حتا لهاد الدرجة تعذبت فالزواج الاول ومزال معذبة ياا امي 😭😭😭😭علاش انا كيطرا فياا هاكا واش معنديش الحق نكون فحال الناس هانيا مرتاحة اهئ هئ اهئ اهئ اهئ.. مكيخليوني ندير حتا حاجة همهم كامل هوا زواج عاد حسيت براسي معندي قمة لا عند بابا ولا عند با سيدي 
.. 
فاخيته تقاصت بكلام بنتهااا ولكن بغات تصبرها بكلامها واخا عارفة كلامها ممنو والو مغيزيد مغدي يقص 
فاخيته : مكينش شي حد ابنتي لي يااخدك مني داباا غتبقااي فداركم واكلة شاربة مهنية واخا يجيبو الوزير انا مكنديها فكلام حد راك بوحدك لي عندي نتي الضوء د عيني ونتي ختي وصحبتي وكلشي فيك بصح راه عندي ختي ولكن مكنتفاهموش على الشربة دالماا وداك النقص لي كان عندي كنت كنقول مصاب تكون عندي شي صحبتي قريبة لياا نعاود ليها وتحس بياا

عرفتي شنو نوضي نوجدو انا وياك العشاء وعاد نهضروا ونتعاودو بيناتناا ..
اميرة : (ناضت) غا سيري اماما رتاحي انا نصاوبو ونجي عندك 
فاخيته : لا لاا غسلي نتي غاا دوك المواعن انا غنصاوب العشاء الله يرضي على بنتي.. 
شدات اميرة لبابو كتغسل الماعن و فاخيته شدات ديك الكفتة كتقطع فيهاا جامدة يلاه خرجاتها من الفريكو.. شرملاتها وكوراتها وحطاتها فالجنب وشدت كتحك مطيشة فجهة خرا دارتها طيب واميرة نقات البطاطة كتقلي فيهاا ومجمعين بيناتهم. حتا سلاو بااتوجاد طفاو على كلشي وخرجوا جالسين فالصالة كيتسناو احمد حتا يدخل باش يحطو العشاا زياد بقا كينشف بالخبز والزبدة وكيتفرج فالرسوم حتا عياا طاح دودة فوق البونجة فالارض. 
فاخيته : انا غنوض نحط العشاء ناكلو حنا وملي يجي هوا ياكل بوحدو 8:30 هادي وهوا باقي مبان نوضي خوك يتعشا 
اميرة : زيااد نوض 
زياد : انننن
اميرة : ونوض تعشاا ونعس 
زياد : مفياش
اميرة : شنو مفيكش نووض تعشا 
زيد : اننن وصااافي مينعس معاكم حد هنا خليني مواكلش 
اميرة : ايوا هاناا جلس 
.. ضار زياد على جهة خرا كيشخر واميرة ناضت تحط، مع امها العشا جلسوا كيتعشاو يلاه قالو باسم الله حتا طار زياد من بلاصتوو وزاد لطبلة 
فاخيته : شحال وانت نااعس سير غسل يدك 
زياد : ياا مال يدي اش فيهم 
فاخيته : ياا ما حكيتي مهزيتي محطيتي سير غسل يدك عاد اجي 
زياد : مغاسلش غناكل هاكا
فاخيته : والله حتا نجيب الصمطة نغرد لمك نوض تكعد
زياد : اعنن اهئ اهئ 
ناض مقمل سروالو كيفلت غا بوحدوا دخل الكوزينة جر كرسي ركب عليه غسلت يدو ونقز طاير 
اميرة : كول بشوية ماشي هربين 
زياد : كولي نتي باشوية عليك اانا هااارب شكون قالك مهاريش 
اميرة : هههه ههههه
فاخيته : ومبقيتيش ساهل القرد رخيت عليك فرعنتي..
كولي كولي ابنتي جري كفيتة لعندك 
اميرة : هانا كناكل غا كولي نتي امي 
فاخيته : (كتحط ليها حداها ) وهزي خلاص 
زياد : 😠😏 هاكي ابنتي هزي ابني كولي ابنتي تقولي هاادا ماوالدة ها عشاكم منااقص (ناض) 
اميرة : استغفر الله اناري مالك اجيي زيااد زياد اجي 
فاخيته : نتي حمقة علاش كتعيطي عليه والله وكون كان جيعان لا تحرك من هنااا ولا خلا شي حاجة هادا راه نفخاتو ديك البقولة لي كلا فيها حتا مبقا ليه فغبن 
اميرة : ههه وماعرفت ..

يعقوب : امي خاصة شي حاجة قبل منطلع نعس 
ربيعة : بغيت نهضر معاك 
يعقوب : ربي يسمعناا خير وي ميمتي 
ربيعة : قنت اولدي هنا توحشت البلاد ومكرهتش نمشيو ونشوفو العائلة ندوزو تما شي 15 يوم هكاك 
يعقوب : وامي نتي عارفة دابا هاد سيمانا عندي طبيب د لين وطوموبيل خسرت لياا معندي كيف ندير 
ربيعة : الصمت 
يعقوب : واش نيتك نتي تمشي ها معاذ شد العطلة وسيري نتي وياه 
ربيعة : صافي بلاش 
.. رجع يعقوب هاز بنتو ناعسة فيدو وجلس حدا امو 
يعقوب : امي متقلقيش علياا عفاك دوز هاد الاياام ونمشيو جلسي شحال مبغيتي 
ربيعة : قنت بزاااف هنا وحتا من الدار خوات كلها ختك مشات بحالها هيا وراجلها وخالد ومراتو بقينا غا حنا ..
يعقوب : واا شغادي نقوليك السيمانا الجاية نمشيو صافي بيدماا نتسخروا لي غنديو فيدينا ندوزو طبيب د لين ونمشيو 
ربيعة. : ايوا واخاا ان شاء الله 
سميرة : سلام عليكم 
يعقوب : سلام 
سميرة : بغيت نطلب منكم شي حاجة ..
يعقوب : اه وي شنوو !
سميرة : وصراحة مدة ممشينا لديورنا توحشناا عائلتنا وشحال مصيفطنا ليهم شي حاجة مكرهناش تعطينا شي ايام نمشيو انا وجميلة 
يعقوب : امم شحال خاصكم تقريباا 
سميرة : شحال مبغيتي نتاا 
يعقوجدوا انا وامي سيمانا الجاية غنمشيو ونتوما غتمشيو معاناا وانا غنخلص ليكم كلشي صافي مزيان؟؟ 
سميرة : احسن بزاف صافي واخا 
يعقوب : المهم وجدوا حوايجكم واموركم انا دابا غادي نطلع نعس ..

طلع يعقوب لبيتو حط لين فوق الفراش حداه غطاها ورجع شد الباب .. قلع حوايجوا ودخل الحمام فتح الرشاش وقف تحتوا كيتحمم.. خرج ملوي عليه فوطة جلس فطرف الفراش كيضور فعينيه كيخمم حتا تلف ليه تخمام. رجع ناض لبس شورط ديالو وتكا حدا لين كيشوف فيها ويبوس يديااتهاا حتا نعس حداها معنقها... 
_________________________
فاخيته : (دخلات لعندها ) ايوا نعستي 
اميرة : لا مزال غا متكية كنقرا شوية 
فاخيته : باك تعشى جمعت الطبلة وغسلت داكشي غنعس حداك 
اميرة : بصح هه اجي تكاي حدايا 
فاخيته : الله واخيرا طلقت جنابي 
اميرة : زياد نعس 
فاخيته : ينعس ولا يجلس الليلة موحال نعسوا انا وياك غنباتو مبرطعين عينينا 
اميرة : ههه هيا غتعاوديلي كلشي 
فاخيته : كنتعجب فراسي بعد مرات هه بنتي علاين قدي ههه 
اميرة : هذه اه بصح شحال فعمرك دابا نتي وانا كنشوفك نتي والتي تقريبا قد قد 
فاخيته : شمال تعطيني يلاه 
اميرة : ماعرفاش بالضبط قولياا 
فاخيته : عندي 34 
اميرة : هذه سبحان الله قداش تزوجتي
فاخيته : تخطبت على 14 وتزوجت على 17 ولدت فنفس العام مكنت عارفة لا زواج لا مسؤولية لا والو 
اميرة : ايوا 
فاخيته : انا ابنتي شغادي نقوليك كنا محكومين كتر منك بابا مزير عليناا بزاف متقرا متخدم متخرج ما تلاقا مع ناس متمشي لعرس والو نهار لي جا خطبني باك مكنعرفوا مندريه زوجني ليه نيشان بلاما يتشاور معاياا ايوا شغادي نقوليك عشت واحد عام مكفس لهلا يعطيه لشي حد 
اميرة : علاش زعمة الله يحفض 
فاخيته : هه هادشي نتي صغيرة عليه مكاين لاش نعاودو ليك 
اميرة : لاا عفااك قوليلي 
فاخيته : نساي الله يرضي عليك صافي. ايوا المهم زواج قسمة ونصيب كلها وزهروا وكل نهار ونهاروا مرة مزيان مرة مكفس نربيو دراري وصافي 
اميرة : مكرهتش نسولك صراحة ولكن حشمت والله 
فاخيته : وغات قولي شنو 
اميرة : دابا نتي كتبغي بابا زعمة مور زواج واخا مكنتيش كتعرفوا ..بغيت نقول .. صافي نساي مقلت والو

فاخيته : ههه اخخ على حياة قليل لي كتعطيه حقوا هاكا كتجيني انا.. عرفتي كنت ديما كنقول مصاب كون كانت ماما مفاهمة معايا بحال صحبتي تعاود لياا ونعاود ليها نهار لي ضيق بياا نجي نبكي على صدرها وتصبرني وتواسيني انا ديماا ملي كان يصبح الصباح.. نطيب نعجن نخمل نسيق زواج صافي مكيحسوا بيك لا مشهي شي حاجة ولا نفسك تاخدك حاجة تخصك والوو بابا حاكم بزاف ونهار لي ولدتك وكانت حالتي مكفسة واخا نتي معارفة والو بزز مني عطيتك لامي بيدماا تفك اموري ساعة ولاو بحالا هوماا لي والدينك ميبغيونيش حتا نجيبك عندي 
اميرة : علاش امي زعمة شنو مشاكيل لي كانت عندك ومعامن 
فاخيته : مع لالاك ديماا صيطرة فيدهاا وكتبغي تحكمني واخا فداري كتجي من العروبية وتصرف كيف بغاات وانا نحرق فيدي ونوجد ليهم عيشتني شي حوايج ميتقالوش كاع.. من طبعي ولافة وقلبي مكيهز حقد ولا دغينة صافي باباك فالايام الاولى دوزتهاا معاه عادية .. ولكن جداك حارة خرجت لياا بحال عود فوجهي عييت منصبر المهم قضية طويلة وبلامااا نطولوهاا كتر.. حصول باباك حسيت بيه باغيني بالخصوص فهاد السينين لاخرة ولكن ... انا معرفاش واش نقوليك باغاه ولا لالاا .. فاخيته كتهضر وتشوف فبنتهاا وكتمسح دموعهاا باش متشوفهاش اميرة .. اما اميرة بلاماا تحس هابطين من عينيهاا كيجريو.. تفكرات يونس وفالايام الاولى لي كانت حاسباه عادي ولكن مع الوقت بغااتوو وخداا بلاصة كبيرة فقلبهاا .. حديث فاخيته واميرة كان طويل.. بحالا عاد كيتعارفوا او بحال شي صحبات عيعادو على حياتهم. مشاا ليل وقرب الفجر اميرة كان قلبهاا طاب بشي لي عودات ليها امهاا على الصعوبات لي دازت منها وعلى الضروف القاسية لي ملقات فيهاا لا حنين لا رحيم... اميرة حسات ان امها محتااجة لصدر لحنين ولصديقة مثالية .. فكرات حتا عياات وخدات قرار من هناا لفوق متبعد على امهاا متخليهاا تحاشيهاا لشي حد عنقااتها بالجهد وحاولات تصبرها.. ناضو بالجوج توضاو وصلاو حدا بعضياتهم .. اذن الفجر صلاو وفاخيته تغلبت بالنعاس مشات لبيتهاا بعدماا طلباتها اميرة تمشي لحدا باباهاا.. بقات كتقرا فبلاصتها القرآن وكدعي حتا عياات.. وناضت لبلاصتهاا تكى حتا نعست

فاقت فاخيته معطلة شوية ناضت بحريق الراس لبسات بينوارهاا وخرجت لصالة لقات تلفازة مشعولة وريحة دالقهوة جاية من الكوزينة.. لبسات صندالتها ومشات دخلت الكوزينة لقات احمد كيشحر اتاي وكيطيب قهوة وحاط فوق الطبلة بتيبنات والحرشة والرغيفاات والبيض مسلوق والطبلة مزوقة بقاات فاخيته غير كتشوف فيه وكضور فعينيها 
احمد : الالة صباح خير 
فاخيته : صبحتي حادك زعمة ولا كيفاش طراااا 
احمد : زعمة هادي اول مرة 
فاخيته : الا كانت مرة فالعام مقالها حد لحد 
احمد : البنت ناضت ولا مزال
فاخيته ؛ مزال ناعسة حيد نكمل هادشي
احمد: لا غاا سيري غسلي وجهك انا غنحط كلشي
فاخيته : امم ميحسابليش 
احمد : زدتي فيه 
فاخيته : مااعرفت شكون زاد فيه انا ولا نتاا (مشات.. 
غسلت فاخيته وجهها ودخلات عند اميرة تفيقها لقاتها غارقة ف 7 نومة.. خلاتها خرجت وسدت الباب واحمد غادي جاي كيحط فوق طبلة شدت تليكومند فاخيته وبقاات طالعة هابطة .. 
احمد : اتاي ؟ 
فاخيته : لي كاان 
احمد : مالك نافخة دابا 
فاخيته : الصمت
احمد : علاش لبارح مدخلتيش لبيتك عييت منتسنااك حتا نعست 
فاخيته : نعس ولا جلس مشيت نشوف بنتي ونحس براسي عندي بنت بصح ماشي محرومة منهاا 
احمد : واناا 
فاخيته : الصمت 
احمد : شدي 
فاخيته : حطوا 
احمد : الله يهديك وصافي 
فاخيته : نتاا مكتحس ماا كتفهم ماا عندك قلب كون غاا كان عندناا دراري بزاف نقولو اماا حنا عندناا غاا جوج وحدة كانت فجيهة ودري صغير ومبعد ماا قلنا صافي الحمد الله تجمعناا نخرجوا نضحكوا نشطوا نحسوا براسناا حتا حناا عايشين بحال الناس بغيتوا تتحرموني من البنت مرا خرا .. 
احمد : نساي صافي مغيكون لا زواج لا والوو يلاه رتاحي وبيني وبين بااك كنت كنحشم منوا مي دابا غنهضر معاه نيشان انا ممزوجش بنتي وهاهياا حداناا بجوج ويهديك الله اهااد المخلوقة 
فاخيته : حلف 
احمد : ههه حمقة نتي ويلاه سمي الله 
فاخيته : 😏😏 
احمد: وخنزريي كترر هاكاا كتزيدي تزيااني ههه
فاخيته : ونوض راك شرفتي 
احمد : حشااك ههه مزال بجوجناا صغاار خاصناا غير جوج وليدات خرين 
فاخيته : الله يحفض بااركة علياا
احمد : هه داباا نشوفوو عنداك غاا تعمري داك الكرش تاني وتنوضي تبكي بحال نهار كنتي حاملة ب اميرة هه 
فاخيته: ونااري فااش كتفكرني خليني نفطر فخاطري ولا نووض كااع 
احمد : المهم اناا هضرت ودابا هاانا ساكت هه غاا تسناي
فاخيته: عول متحلمش..

فاقت اميرة لقاتهم كيفطروا مجموعين.. غسلات وجهها. وباست يديهم وباست زياد فجبهتوا وجلست حداهم كتفطر.. 
فاخيته : نعستي شوية 
اميرة : الحمد الله 
احمد: انا غادي نجيب طومبيل
فاخيته : واخا. فطري ابنتي راه غنخرجوا اليوم 
اميرة : بصح فين غنمشيو 
فاخيته : والله ماعرفت باك فين غيديناا
اميرة : يااه مشوقة نمشي لشي بلاصة 
فاخيته : ايوا فطري دغياا انا غنوض نجمع هاد الكيسان وهادشي ولي فالكوزينة ونلبسوا حوايجنا 
اميرة : صافي واخا 
زياد : هاكي دهني لياا هاد رغيفة 
اميرة : شباغي ندير ليك فيها 
زياد : جبن 
اميرة : واخاا 
زياد : ونتي مالك كتغمسي الخبز وزيت ومخلياا هادشي 
اميرة : ههه كيعجبني حيت صحي اما هادشي دالزنقة معنديش معاه بزاف قليل واخا كنديرو 
زياد : وهياا نتي قديمة 
اميرة : ههههههههه اه انا قديمة وشارفة وكلشي 
ههه 
اميرة وزياد بقاو مجمعين حتا رجع احمد كيكلاكصوني عليهم.. خرجت فاخيته لابسة عبايتها ولتامها كتلبس اليكات فيديها.. 
فاخيته : يلاه نوضو تلبسوا جوايجكم محدوا على كانتو عوتاني يتقلب ليه الراي يزدق مخليناا هنا 
اميرة: ههه لا موحال انا غادية.. 
دخلت اميرة لبيتها جمعت شعرها سفنجة ولبست سروال طويل وتقيشرات ودخلت فيه سروال ولبست عبايتها فالبيض نفس الستيل لي كترتاح فيه واسعة وعندها حزام صغير فالوسط فالاسود مزين عبايتها ويديها مجموعين شوية بلاستيك .. لبسات شانها فالاسود وصباط فنفس اللون وخرجت لقات زياد مقاتل مع السبرديلة كيلبس فيها لبساتها ليه وهبطوا كاملين فاخيته سدات موراهم البيبان وهبطات هيا التالية. طلعت حدا احمد وزادو

فاخيته كل شوية ضور تشوف مع جنابهاا ف احمد واميرة وزياد كيطلوو يشوفو الدنياا كيف دايرة . حتا وصلو مسجد القرويين خرجات اميرة شادة فخوها مبتاسمة وعاجبها الحال.. ضارو فجوايه ديالو شوية وبقاو غاديين على حتا وصلو لمولاي دريس ولو فمدينتهم ولكن اميرة اول مرة كتكتااشف هاد الاماكن، الجميلة خدا عليهم احمد صورة جماعية يحتافض بيها .. مشاو كيضورو فالدروبة والمحلات د الحوايج والذهب والشرابل والحلوة والخليع لي بغيتيهاا وتشهيتيهاا تلقاهاا تما .. كيف عادة اميرة عشقها الوحيد هوا الخليع والفقاص الحار والقديد.. احمد منساش وخدا ليها سطل دالقديد وكيلو د الفقاص مشكل .. والقديد وبقااو غادين لسق زياد على واحد السبرديلة متفك معاهم وماا سكت حتا شراوهاا ليه وصلو لعند مالين شرابل كيهز احمد ويعطي لبنتو تقيس جاا قدها واحد شربيل دالصم الحر مخرز من داكشي الرفيع وحتا من اميرة عجبها خداه ليها وزاد وفاخيته غير كتشوف فيه وترمش ملقاات متقول
احمد : باغاا شي حاجة خراا 
اميرة : لاا بابا براكة 
احمد : الا خصك شي حاجة قوليهاا محدنا مزال ممشيناا 
اميرة : الله يطول فعمرك صافي 
زاد احمد فالاول هوا ولدو واميرة شاد ف امهاا وغاديين موراهم حتا آذن الضهر رجعوا المسجد صلاو وخرجوا غاديين وصلو لعند الجزار خدا كيلو قل شي حاجة د الكفتة ومشاو المطعم عطاها ليهم حدا عينو شرملوهاا وشواوها وجدوا اتاي والبيض مسلوق وحطوا ليهم تغداو ..احمد كيتغدا وكيهضر مع ولدو وفاخيته مضورة وجهها كتشوف فجيهة خرا واميرة كتشوف فيهم بجوج مفهمات والوو.. دوزو نهارهم كامل فالضوران حتا طاح ليل وتأخر الوقت عاد رجعوا الدار.. دخلات اميرة لبيتها تبدل حوايجها وزيادة طاح فالبلاصة نعس.. فاخيته دخلات لبيت ودخل موراهاا احمد.. 
احمد : مالك مغوبشة نهار كامل 
فاخيته: الصمت 
احمد : وقولي مالك مغوبشة علاش هاكا 
فاخيته : وصافي خليني عليك مفياا لي يهضر 
احمد: اهااه اذن هناا شي حاجة امم ناس منفخين علينا. (جبد احمد من الفيستا ديالو قجر صغير وزاد عند فاخيته كانت كتحيد اتامها 
احمد : هادي بغيت نشوف كيف غتجي فعنق شي ناس..

جبد احمد سنسلة فطحة د الذهب ومشا جيهت فاخيته لبسهاا ليها فعنقها عاد ضحكات 
احمد : ايوا مالناا دابا 
فاخيته : يحساب لياا تفكرتي غا ولادك وانا نسيتيني 
احمد : الله يا ربي قداش قلتيها شحال عندي منك انا شحال فاخيته : امم ما عرفت زوينة هادي 
احمد : ايوا بصحتك هادي خديتهاا داك نهار ايوا عاد جات الفرصة نعطيهاا ليك وتلبسيها. 
فاخيته : شكرا 
احمد : اهاه ميحسابش ليا ههه
.. 
بقاو شادين هضرتهم واميرة صلات العصر والمغرب ودخلات الكوزينة نيشان توجد العشاء. بقاو على نفس الحال.. كل نهار يخرجهم احمد يمشيو الغابة يتغداو برا يتسراو يمشيو عند العائلة حسات اميرة بحال تولدات من جديد شحال من حاجة عاد كتشفاتهاا .. يوم غداا اليوم غداا.. دازت مدة واميرة رجعت شداها غير الحفاظة دالقرآن والمراجعة وقراءة الكتب الدينية شنو قال الله وشنو قال النبي.. امها رجعت لنشاط والحيوية ديالها عاد ولات تحس براسهاا مزوجة وعندها ولادهم فجنبهاا وحتا من احمد ممقصرش معاهم كيحاول مااا امكن يلبي طلباتهم وميخليهم مخصوصين من حتاا حاجة.. 

.... 
الحاج : توحشناا اميرة كانت معمرة عليناا
راضية : ايوا عيط عليها تجي عندك 
الحاج : مكرهنااش ولكن ديك بنتك موحاال تبغي
راضية : ايواا ديك بنتك حتا نتا غاا دات معاها بنتها تقلباات علينا كاع 
الحاج : ايوا رزق على الله وصافي 
راضية : صونات عليا مريم غتجي هيا وراجلها داك ساعة صوني عليهم يجيو 
الحاج : بصح ايمتاا 
راضية : لبارح قالت غتجي فهاد اليومين 
الحاج : مزيان هادي خباار السعد..

هبط يعقوب كيهضر فالتليفون وحميد هابط موراهم هاز الشوانط داهم فالكوفر.. وربيعة هابطة لابسة جلابة فالشيبي مبرد ومقادة زيفها ودايرة الصاك فيديها كتلبس فدمالجها.. 
سميرة : لالة بدلت لين وحنا خرجنا حوايجناا شنو نديرو دابا 
ربيعة : واا سدو بيبان دلفوق طفيو ثلاجات الا مفيهم والو وديرو شي ليزار فوق هاد الفراش من الغبرة وصافي 
سميرة : ثلاجات مسحناهم وطفيناهم مخلينا فيهم والو. الجميلة طلع تسد بيبان انا نغطي هادشي 
ربيعة : واخا وتبعونا هااحنا برا 
.. خرجت ربيعة لقات يعقوب كيستف الشووانط وسيكان 
يعقوب : امي فين لين 
ربيعة : هاهياا غتجيبها سميرة 
يعقوب : واخاا يلاه طلعي انا نجيب لافيست ديالي ونجي .. 
دخل يعقوب لداخل هز لافيست ديالو لقاا سميرة خارجة هازة لين فالحمالة وجميلة موراهاا هازة سطل صغير د الحلوة . 
يعقوب : جميلة ديك سطل شكون دارو امم 
جميلة : هه انا وسميرة قلنا نديو لعائلتنا شوية د الحلوة شحال وحنا غايبيين 
يعقوب : هاحنا غندوزو نتسخروا ويلاه تاخدوا لي بغيتو حتا نتوما يلاه سيرو طلعوا انا نسد الباب ونجي .. 
خرجت سميرة فرحة خارجة من عينيهاا كذالك جميلة. شد يعقوب البيبان ومشا عند حميد 
يعقوب : با حميد هانا مشيت هاك سوارت 
حميد : سعداتكم والله 
يعقوب : غير نرجع غنصيفطك كون على يقين 
حميد : الله يكون منك ويسهلهاا عليك
يعقوب : بااركة علياا هاد دعاوي لهلا يخطيك 
حنا يعقوب على راس حميد باسو وسلموعليه بالذرعان . وخرج طلع فالطوموبيل وزاد.. وصل لمحل خاص بالحلويات والشوكلاط. تقضاا ليه واجميلة وسميرة خلص وزاد .. زادو لمحل اخر عطا لسميرة لفلوس ودخلو شراو كل حجيات خرجوا متقليين...وزادو لمطار نيشان كان باقي نصف ساعة وتقلع طيارة... وصلت دارو اجرءات الازمة ديالهم وطلعوا يشدو بلايصهم..

عبد الكبيرة : واخيراا تجمعناا 
يعقوب : وعدتك غير تحسن امورنا ونجيو وهاناا وفيت بوعدي ليك 
ربيعة : ايواا يا خويا غير من هادي لهادي والله مكنتسلاو 
نزهة : ويحسن عوانكم صراحة ودابا صافي طلقتوا ولا شنو 
يعقوب : وي سليناا وكل غازي يشد بلدو كيف كنقولو 
نزهة: ايوا ملي وصلت حتا المعيور وطول على امك صافي هناك الله منها 
يعقوب : هادشي لي كاين بنتي قااد بيها وصلاة على نبي 
عبد الكبير : اسئل الله سلامة شحال دعيت ربي يوقف معاك كنت رافد ليك الهم 
ربيعة : هادا مكتب الله وصافي اخويا الحمد الله 
نزهة: واش جيتو نيشان لرباط ولا كيفاش 
يعقوب : وحنا اخالتي جيناا البارح نزلنا فالدار البيضاء بنات شدو الكار مشاو لديورهم وحنا دزنا عند عمي وتجمعوا ولادو تما قصرنا مجموعين . ايوا اليوم يلاه تغديناا هاحناا جينا عندكم 
نزهة : فيها خير اولدي وشربو اتاي شديناكم فالهضرة 
ربيعة : الماكلة كتمشي وتجي وشوفة فيكم مكنلحقوها على شحال اختي نزهة.. 
سليمان : والله ياا عمتي الا توحشنااك وبالاخص ملي كان كيقول ليناا بابا راكي عيانة 
ربيعة : ايوا الحمد الله نمشيوو مع الوقت حتا يفرج ويحن الحنان 
عبد الكبير : هادا مكان اختي.. 
اجواء جميلة العائلة مجموعة ومجعين وناشطين مع بعضياتهم
قصروا مجموعين وبقاو عندهم يومين.. بعدها شدو الطريق سلا عند خال ربيعة.. سيد كبير فالسن شاد الفراش مشاو يزوروه ويصيلو معاه الرحم.. زارو العائلة ودوزو وقت ممتع معاهم.. 
مريم مشات زارت عائلتها فمكناس هيا والزوج ديالها اول مرة غتجي بعد زواجها.. عيطو لفاخيته تجي عندهم باش يديرو الليلة بيناتهم.. جمع سي احمد ولادو ومراتوو شدو طريق المكناس. راجعين والفرحة عاامرة فعينيهم خاصهم غير ايمتااا يوصلوا ... يلاه حلو الباب طلقاوهم بتعنااق بحالا سينين طويلة متشااوفو وزغارييت والفرحة.. جلسوا مجموعين كيتعاودو واميرة جالسة حدا جدهاا لي معنقهاا وكيسولهاا كيف غاديا مع حفاضتها وقرايتهاا ولا صافي تكاسلت عليهاا . فكانت المفاااجئة الكبرة و الجميلة ان اميرة بقاا ليهاا 3 احزاب وتكمل حفض كتاب الله العضيم . خلاتو اميرة يحس انه فعلاا رباا وعرف اش يربي وداك الزياار والضغوط كان فمصلحتهاا انهاا مهدية محضية مرضية.. باست لجدها يدو من كل جيهاات وشكراتوو جزيل الشكر ان لولاه.. مكانتش توصل لهادشي لي هياا واصلة ليه جالسة فوسطهم وجههاا منور وعينيهاا كيلمعواا بالدموع لي مغرغريين فعينيها بقوة الفرحة..

.. صباح الصباح.. كلشي نااعس غير راضية فالكوزينة كتصاوب الفطور و الحاج مصطفى هابط من السطح ومقراج دالماء فيدوا.. دخل الكوزينة عند راضية.. 
الحاج : راضية صبحتي مبكرة 
راضية؛ ايوا راجل براني هنا ولادك جاو ندير الفطور نتا فين كنتي
الحاج : كنت فالسطح سقيت دوك المحابق لي لداخل الحال مغيم وقيلة غطيح الشتاء 
راضية : ايوا الله يرحمناا 
الحاج : شنو كاين فالثلاجة شي لحم شي دجاج 
راضية : وكاين شي حاجة راه مزال 
الحاج : راه اليوم غيجيو عندنا شي ضياف ديرو شي حلوة ولا شي حاجة نحطوها ليهم مع اتاي
راضية : شكون هاد الناس ومنين غيجيو 
الحاج : ولد سي عبد الفتاح الله يرحموا يعقوب الا عرفتيه 
راضية : لا معرفتوش داك السيد لي كان كيجي عندك من فرنساا ولا 
الحاج : اييه هدااك الله يواليه برحمة الله . صونى علياا ولدو هاد الصباح وقالهاا لياا غيشدو الطريق بكري لمكناس 
راضية : واش غيجي بوحدوا ولا شكون غيجي معاه 
الحاج : غيجي وقيلة هوا ومراتو وليداتو وامو
راضية : هياا قول ناس بزااف ايوا على هاد الحساب غاا سير شوف دجاج ولا لحم ولا شوف اش غتزيد هادشي مكافيش راجل مريم وراجل فاخيته ولادك وعاد زيد حناا وشوف شكون يجيب معااه 
الحاج : ايوا عرفتي نوضي سعيد يطلع لسطح يذبح داك بيبي لي لفوق وشي دجاجة
راضية : صافي هادا مغادي طيب 
الحاج : ونزيدو الحوت والخير كاين 
راضية : واخاا وشوف ليا فاخيته الا كانت ناضت تجي عندي تعاوني باش نوجدو الغدا بكري .. 
خرج الحاج مصطفى لقا اميرة مقاتلة مع زياد كتلبس ليه حايجوا وفاخيته كتخمل البيوت.. 
الحاج : فاخيته تكلمي المك 
فاخيته : واخا اباا . 
الحاج : مالكم نتونا صبحتوا مبكرين 
اميرة : هادي ساعتي انا كنوض بكري 
الحاج : زياد ونتا اش خبارك مع قرايتك كتمشي لجامع ولا شحال حافض 
اميرة : مصاب وكون كان ينوض غاا من نعاس 
زياد : كذابة انا كنقرا مزيان وحافض 
الحاج : ايوا هياا الا جيتي تعرض عليا دابا نشوف هاد الحفااضة كيف دايرة 
زياد : ماشي دابا خليوني نمشي نعس
الحاج : دوز اجي لهنى ولا والله لا تفكيت معااك.. 

مشاا زياد عند جدو كيدمع فعويناتو واميرة دخلات عندهم الكوزينة لقاتهم مشطوطين .. 
فاخيته : ايوا انا نوجد لغدا انا كريمة وحنان تعجن وديك ساعة نشوفو شغادي نديرو 
راضية : ماعرفت حتا شحال د ناس غيجيوو وبرانيين منعرفوهم مندريوهم . 
اميرة : علاش شكون غيجي الميمة 
راضية : غيجي شي راجل ولد صاحب جدك هوا ولادو وامو تلفناا حتا اش غنديرو 
اميرة : ايوا لي كتب الله كلها يدير حاجة ونساليو. 
راضية : وشغنديرو مع اتاي وحتا من هاد نعاس معرفنهم حتا شكيبغيو وشنو مبغيينش 
اميرة : ندير كيكة دالكركاع وتمر وبيسكويت كتجي زوينة وندير شي بسبوسة وشي حاجة نزيدهاا 
راضية : وغتزدقيهم عنداك تجيك شي شفااية 
فاخيته : ههه الله ياا امي قداش قلتيها كلشي كيجيهاا فن والله صافي هنيتينااا ابنتي 
اميرة: واخاا صافي
فاخيته : امي سليتي
راضية : ندير غاا حليب والقهوة فطرموسات ونخرجهم نتي كملي تسخات الرغايف واميرة تخرج هادشي لي محطوط..

كانت الساعة 7 د صباح... فطرت اميرة وفاخيته وجداتها وجدها وسي احمد اماا خرين كلشي مزال ناعس ناض سعيد مدوخ بالنعاس جلس حداهم 
سعيد : هاناا شنو 
راضية : كيفاش شنو مكان لا صباح الخير لا مسار خير 
سعيد : وحتا نفيق عاد نقوولهاا دابا شنو 
راضية : نوض غسل وجهك واجي تفطر طلع ذبح ليناا ديك بيبي لي لفوق باش نطيبو الغدا بكري غيجيو شي ناس 
سعيد : اينا ناس 
راضية : واحد راجل هوا وعائلتوا 
سعيد : وشكون كنعرفوه ولا 
الحاج : ماشي راك قويتي فالهضرة ونوض خلاص.. 
ناض سعيد دخل لحمام توضى ودخل لصالة لي قبالتهم صلا وجاا حداهم يفطر 
اميرة : تسخر لياا 
سعيد : شغادي نجيب ليك 
اميرة : وحتا تفطر وعاد نقولك. ناضت فاخيته بعدماا كملات فطورها دخلات لكوزينة دارت جوج مقراج د الماء يطيبوو وجبدات جوج بنيوات كبار حياتهم لسعيد فالدروج. 
سعيد : نوض اخويا طلع ذبحهم لياا عاد هبط تفطر على خاطرك يلاه نساليو بكري 
سعيد : ومالكم مزروبين جااي العاميل خليوناا نفطروا 
راضية : ونوض تكعد جمع راسك نتاا عاد غدير الولاد والمرااا 
سعيد : لا حول منااقص 
ناض سعيد هز الموس مضااهاا وطلع هوا واميرة.. شدات معاه كبر وذبح وهيا مبعدة باش ميطيرش فيها الدم . هزاتهم فالبانيوو وهبطت وسعيد بقاا تما كيخوي المااء ويسيق. جلست فاخيته وراضية كيريشو فيه واميرة مشات لصاكهاا جبدات المذكرات ديالهاا كتقلب على المقادير.. جلست كتقيد فورقة خرا لسعيد اش غتحتاج .. هبط هوا كمل فطورو وعطاتو الورقة يجيب ليها داكشي و50 درهم باش يجيب ردها ليهاا تخليها عندها ومشاا.. 
فاقت مريم وراجلها حطو ليهم يفطوا.. وكلهاا ناض يبالي بشغلو. رجع سعيد جاب لي حتاجت كامل وعطاه ليها 
اميرة : حبيبو واخاا تخليلي تليفونك نشوف فاليوتيوت شي حاجة ونردولك .. 
سعيد : سيري هزيه راه فالشارج..

مشات اميرة هزاتو ودخلات الكوزينة فتحات اليوتيوب كتقلب وتشوف.. جبدات المولينكس كتفقي فيه البيض وسكر وتخلط وتشوف فالتليفون عنداك تنسى شي حاجة.. خلطاات عجينهاا جارية ودارتها فمول طويل وصوباتها فالفرن. رجعات غسلت دوك المواعن وفتحت تليفون كتشوف مرا خرا.. بدات كتخلط وتصااوب... ودارتها فمول اخر .. بعد 45 دقيقة عطات الريحة جميلة طلات عليهاا لقاتهاا طابت جبداتها وخشات الاخرى .. ذوبات الشكلاط وجلست كتزوق فيهاا زينتها بالكركاع وخشاتها فالثلاجة.. ومشات توجد سيرو كتحرك فوق البوطة وبالهاا مع الزاج دالفران كل عندااك تحرق.. حتا عطات ريحتهاا خرجاتها سخونة وسقااتها.. ودارتها فالثلاجة تبرد. وجبدات المقادير الاخرى كتوجد الحلوة بلا فران. وامها كتنصب الغدا حداهاا خرجت اميرة جبدت الجفاف والبانيوو وهابطة كتجفف حتا وصلت القاع وطلعت بحالها عيط عليها جدها ومشات عندو 
اميرة : باسيدي هاانا 
الحاج : جمعي الله يرضي عليك الفوق فين غيجلسوا الرجال 
اميرة : راه مجموع كلشي صوبتو 
الحاج : ايوا مزيان راه قربو يوصلو الله يرضي على بنتي 
اميرة : صافي واخاا الله يوصلهم على خير .. 
مشات اميرة الكوزينة تشوف واش مزال خاصهم شي حاجة... لقاتهم كيصاوبو شلايض ..ويطحنوا العاصير.. 
فاخيته : مسااليا اميرة !! 
اميرة: اه ندير شي حاجة 
فاخيته : شوفي ديك اللوبياا خضرا الا تفورات جبديها نصاوبها مع الماكلة طيب يجيو ناس يلقااونا مزال كنتفتفوا هناا.. 
اميرة : ايوا منجيو فين نحطوا اتاي حتا يكون غدا طاب 
فاخيته : ايوا راه خصناا نجلسوا معاهم ماشي غنخليوهم يشوفو الحيووط ونجلسوا منغريين هناا. 
اميرة : واخاا انا غنكمل هادشي 
.. اميرة شدت شغلهاا وجداتها وفاخيته وحنان وكريمة كل واحد طااير بشغلة.. حتا دخل عندهم .. سعيد ..
سعيد : هاهوااا جاو خرجوا طلقاو ناس..

خرجت راضية وموراها فاخيته كتقاد زيفها وقفو فالباب حدا الدروج كيتسناو عيلات يطلعوا. سعيد والحاج مصطفى كيتسالموا فالباب مع يعقوب وعمو سي حمزة.. ربيعة طلعت هازة لين فيديها حتا طلقاتها راضية تسالموا مع بعضياتهم وهكاك فاخيته مريم وعيلات ولادهم. دخلو ربيعة لداخل لصالون وفاخيته بقاات رامياا عينيها الدروج واش طالعة شي مرا خرا. كيبان ليها غا سعيد طالع فالاول وباه موراه هوا وجوج رجال دوزات ريدو ديال الباب ومشات لصالون تجلس معاهم. شي حشمان من شي. لا من ربيعة لا من راضية ولادها وعرايسها. ربيعة كتهزز رجليهاا كتسكت لين وراضية كتسفق بيديهاا كتبغي تسكتهاا والوو.. 
فاخيته : اري نهزها عليك 
ربيعة : والوو متبغيش تسكت خاصهاا باباهاا 
فاخيته : سبحان الله مولفة عليه وقيلة 
ربيعة : وي سي ساا. ديزولي غنوض نعيط ليه مغتبغيش تسكت لياا.. 
ناضت ربيعة خرجت برا وقفات فالدروج وعيطات يعقوب. 
فاخيته : هاي هاي ههه
حنان : ياا ارض نهدم عليك ادي 
فاخيته : هه قلبتيهاا نتي مصرية ههه فرنساوية ياالالة 
حنان : ويييه كيتناا حناا تلقايها عندها الفيس بوك زعمة 
فاخيته : ههه هداا علياا انا تليفون نوكياا وبزز مخليه ليا احمد 
حنان : زيد عليها خوك معندي لا تليفون لا والوو هه 
فاخيته : صافي قلبي الهضرة عليناا 
.. هبط يعقوب هز لين من عند امو واميرة طلات من سرجم دالكوزينة مبان ليهاا غاا خيال د بنادم حيت الريدو مدوز.. دخلت ربيعة تالفة جلست معاهم معرفوا الهضرة منين يبداوها. 
راضية : مجاتش مرات ولدك 
ربيعة : لا طلق 
راضية : وخلات ليكم بنتهاا مداتهاش ولا كيفاش 
ربيعة : ام هاد البنية ماتت بتسمم مور ما ولدت.. وعاود، ولدي تزوج ومتفاهمش مع ديك السيدة وطلقوا ايوا دابا ممزوج ما والوو كيبي غاا بنتو 
راضية : الله اكبر الله يكون معاه 
فاخيته : حنا كناا عاقدين غتجي حت مراتو ولادو 
ربيعة : لا بنتي عندو غير هاد البنيتة وصافي وغير هادي راهاا شيباتنا..
حنان : ولاد تربيتهم صعيبة بزاف وبالخصوص مع راجل الله يحسن عوانو...

الحاج : وكبرتيي يااا ولدي هه وليتي اب 
يعقوب : وييه ياا عمي الوقت وصافي 
الحاج : كنت كنشوفك صغير مع باك اما ملي مات باك صافي غبرتي غبرة وحدة.
يعقوب : وياا عمي القراية والخدمة والمسؤولية لي هزيت وانا مقدرش عليها وزواج وشغادي نقولك ملي مات باا تقلب علياا كلشي ومزال هادشي راه مكتلقاا حتا حد فجنبك وعاد كيزاد المشااكيل مجموعين عليك من كل جهة.. ايوا هاحناا 
الحاج : الحمد الله على كل حال سعيد نوض جيب اتاي نجيب عليهم يعتقوا راهم جاو على الطريق. 
حمزة : اسيدي مكان لاش غاا خلينا جالسين دابا مجمعين 
الحاج : نتاا لا سكت حسابنااا قديم خاصناا نجددوه 
حمزة : ههههه يلاه اراا مكان 
الحاج : وخصناا عليه براد د اتاي ياا شريف اولا سي يعقوب 
يعقوب : وييه عندك الحق شوف هادي اشريف واش تعقل عليهاا

شوف هادي اشريف واش تعقل عليهاا

الحاج : هههه هادي بااين سي عبد الفتاح خداها لياا وعرفتي شحال وانا كنقلب عليها باز 
يعقوب : اييه هادي راه عندي وحدة كبيرة دايرها فكادر يااسيدي محتافض بيهاا 
الحاج : امعندي منسالك.
دخل سعيد الكوزينة لقاا اميرة طيبات اتاي وقطعات كيكة فجوج طباسل وبسبوسة فجوج طباسل وحلوة والرغيفاات معمرة كلشي.. 
سعيد : امضراا سليتي،
اميرة : اه هاك طلع .. نطلع معاك 
سعيد : اه واخاا زيدي قربيلي لفوق وانا ندخل. 
مشات معاه اميرة هازة هوا كيدخل وهيا كتمد ليه.. رجعت بحالها الكوزينة وفاخيته دخلت عندها 
فاخيته : امضرا طاب الغدا 
اميرة : اه طاب وطفيت عليه 
فاخيته : وهاد البراد عامر ولا شنو 
اميرة : راني طيبتو ومسليت كلشي غاا خرجي 
فاخيته : وزيدي خرجي معاياا وسلمي على المرا 
اميرة : شكون تماا كاع 
فاخيته : وغاا المرا بوحدهاا 
اميرة : غا سيري نتي اناا غنبقاا هنا بلاش 
فاخيته : زيدي خلاص خشومة كااع 
اميرة : لاا لاا غاا سيري ،، ديالمن هاد الغوات 
فاخيته : واحد البنيتة مبغاتش تسكت راهاا الفوق.

خرجت فاخيته هازة السينية فيديهاا لقات سعيد هابط بلين حلقهاا غيخرج من بلاصتو بقوة البكاا عطاها لمريم دخلاتها ل ربيعة والوو عياات واقفة بيها ماشاا ماجا حرام واش بغات تسكت هزاتها حنان فيديها خرجت كضور بيها شافتها اميرة وخرجت 
اميرة: عطيني نشدها اناا 
حنان : متسكتش ليك خليني نعسهاا 
اميرة : طيني نهزهاا غاا شوية 
حنان : يلاه هاكي شدي..
هزاتها اميرة بين يديها عنقاتها فصدرها وبقات كضرب عليها بيد خرا وتراري بيهاا ودوز يديها على راسهاا وتقراا عليها القرآن .. شوية دارت بحال السااااكت بداات كتخفض صوتهاا بشوية حتاا سكتات ولقاات راحتها نعساات عليهاا. 
دخلات عندهم لصالون. شافت فربيعة وبتسمات حطات لين فجنب الفراش ومشات سلمات على ربيعة 
اميرة : مرحبا بيك كيف دايرة خالتي لباس صحتك لباس 
ربيعة : مزيان الحمد الله. تبارك الله بنت من هادي 
فاخيته : هه بنتي 
ربيعة : سبحان مزال صغيرة والدة هاد زينة كلها الله يخليها ليك 
فاخيته : الله يخلي ليك الصحة 
ربيعة : زوينة هاد كيكة مشرياا يااك 
راضية : لا دارتهاا اميرة 
ربيعة : واش هادي اميرة سميتهاا بحال تصرفهاا سبحان الله صغيرة وكتعرف دير هادشي كامل 
راضية : هه ايوا حنا عندناا بنات غير كيطنشوا كينوضو الكوزينة نيشاان كتعلم كلشي 
فاخيته : اميرة نخوي ليك اتاي 
اميرة : اه واخا شوية 
ربيعة : مزيان ونعم التربية وكتقرا ولا شنو كدير 
راضية : لا غا جالسة فالدار داباا امم.ننن كانت المهم حصول الحمد الله على كل حال 
جلسات حداهم اميرة بالها كامل غا مع لين وربيعة كتشوف فيها عجباتها عفويتهاا وطيبتهاا وصوابهاا ورزانتهاا.. محيدااتش عينيها من عليها كتاكل وتبنن فشغل يديهاا وتشوف فيهاا اميرة ناضت الكوزينة جبدات الديسير كتغسل فيه حتا بدات لين عوتاني كتبكي وعيطو لأميرة تهزها وهوماا يحطوا الغداا..

يتبع ...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.