صورة مصغرة لـقصة شريك القرن 21

قصة شريك القرن 21

qisat 9isat al9arn
رواية SHREK القرن 21

👸🏻 كان يا ماكان في قريب الزمان 🖤

كلنا كنعرفو قصص الأميرات والحكايات لقديمة 📚 المقتاصرة على الماضي ولي تناقلات من جيل لجيل حتى وصلات لينا 😈 هاد الخبير كيما كيسميوه اللوالا الناس كاملين متافقين لا ومتيقنين على أنوو مجرد خيال لاصحة له.. ولكن أش غيطرى الى فقنا شي نهار ولقينا راسنا جزء من هاد القصص وفعصرنا الحالي⁉

المهم مانحرقش عليكم نخليو حتى تعرفو الأحدات مع البطلة 😝
قصة بموضوع مادايرش.. هاد المرة بشي حاجة من الخيال المنسوج بالواقع 🔮💎⚜🏚 جامعة الكوميديا والافعال الشيطانية 😻
مايمشيش بالكم بعيد الأحدات لي غنعيشو أحدات جديدة ماشي أحدات فيلم شريك كاينة علاقة بسيطة غتعرفوها ف فالقصة إن شاء الله 💫

القصة تحت عنوان: SHREK القرن21
بقلمي أنا: Rayhanee Regraguii



وقف كاميوو كبيير فزنقة من زناقي المدينة الشرقية المعروووفة.. قدام دار من الديور لقدام لي بقاو من عهد الاحتلال الفرنسي.. وخا قداااام تصميمهم عصري وزويييين.. وباقين شادين فراسهم رغم السنين لكثيرة لي دازت..

هبطات من القدام.. كتشالي بشعوراتها.. لابسة توني ديال المنتخب حمر.. عاقداه فجنب مع سروال جينز طاي أووط (طالع حتال الصرة).. هازة فيديها ِليُون🐈.. مشها لمزغب.. لي بسبابو تجرجرو هاد التجرجيرة.. وهزو قلوعهم من كازة لهناا..

شداتووو فجنبها وتمات غاديا بيه حتى وصلات للباب حلاتو بالساروت وخلات الدراري لي جايبين معاها الرحيل يطلعوه.. تار انتباهها صووت وقووف طموبيل.. تلفتات لقاتو منصف.. يالله وصل من مور ماتفارقو فدخلة دلمدينة.. باش يجيب ماياكلو فلغدا..
هبط هاز فيديه كراطن دلحووت.. 
داز من حداها جرليها نيفها وطلع.. يوريهم كل حاجة فين يحطوها.. الدار ماكانتش خاوية.. أصلا هيا دولديه كانو ساكنين فيها قبل مايتقاعد باه ويطج من الجو ديال تم..

بقات هيا لتحت.. حاضية الطالع والنازل.. جالسة مربعة فوق الكابو ديال الطموبيل.. حتى خواو داك الكاميو كامل.. 

وقفوو بتلاتة قدامها ونقز واحد فيهم..
الشخص: راه سالينا اختي.. واش نعاودو نطلعو عندو ولاشنو؟
فيونا: صبر.. (هبطات جمعات الوقفة وكتعيط بصوتها على جهدو كي شي عزري) الوليييييييد.. وااا الوليييد.. أمووووونصييف 🗣

🎶🎶 وخليييييني نكملك سيدي لجيج L'juge وحكم نتايا ..
وراها صراتلي قصة خلصتها غاااالية ..
ودرتها بيدي اااانا .. ورأيي دّاني بعيييد ...
وبقيت وحدي ااانا .. و j'ai pas l'habitude
ويا اللي فالقلب يدري بيه الرب ..
والله ماكنتشي نشرب يا كيما ولّيتْ .. 🎶🎵

مخشعين مع الأغنية لي كيسمعوو.. واحد فووق اللحاف عالي شوية محطوط منو للزربية.. لايح رجلوو فوق الطبلة ديال الزاج.. يديه على مخدة حاطها فوق رجلووو.. وشاد المانيطة..
فالجيهة لخرى.. مربع رجلو لاخر فوق الزربة.. ونفس الشدة شاد حتى هو اللعيبة ديال لبلاي بلمخدة.. خداااامين كيلعبووو..
حتى قفزهم صوووت تبراحها لي كسر دنيا..

شافو فبعضياتهم.. حبيسو الموسيقا وتفرزااات الهضرة..

فيونا: اا موووونصييييف.. (صفرااات)

ناض أنير من بلاصتو ناوي على خزيت.. أصلا ولاد الحومة كلهم قاطعها فيهم.. ياويلوو لي يبرزطوو.. كينوض قربالة..
حل الشرجم كيتنتر نااوي على يعرععععر ..

طل.. بانت ليه واحد البعلوكة واقفة بين الطموبيل والكاميو.. مقابلة مع الدار لي قدامهم.. عاطياه بالظهر وكتغوت مزال على شي حد سميتوو منصف.. 

أنير (بصوت غليض ومسمووع): مال دينك گالبالنا راسنا واش باغياني نخرج نسبك 😠

دارت بالعرض البطيء مخصرة وجهها كتقلب على مصدر الصوت..
طلعات فيونا راسها للشرجم مطلعة حاجب ومهبطة لاخر.. لقاتو مقنزع.. حاط كف يدو على حاشية الشرجم.. كون كانو فعنيه القرطاس كون قتلها..

خنزرات فيه باستحقاار.. ودارت بالعرض البطيء گأنها مشافت والوو.. 
فيوووونا (مامسوقاش ليه): واموووووووونصف 🗣 واااا العمالة 🤭
مع غيعاود يعاير أنير طل منصف من الشرجم ديال الكوزينة.. خرج فيه نيشان..
من مور ماسمعوو كيخاصم.. عارف الا جاوباتو الحريگة لي عندو غيصدقو شابكينها.. 
اللهم يتدخل ويفك الجرة بلا مايسيل الدم.. 

منصف(لأنير): فين اولدي لباس؟ 
أنير (حاول يبرد بزز): الحمد لله ونتا كي راك داير؟
منصف: الحمد لله بارك الله وفيك 😊 
حدر راسو لقاها حاطة يد على جنبها وباقة معنقة ليون🐈 بيدها لخرى..
منصف: مالنا؟
فيونا (ببراءة بحالا ماشي هيا لي كانت كتبرح بحال عُمَر مول اللبن): الدراري بغاو يمشي فحالهم.. 😇
منصف: هانا هابط..
شاف أنير حتى عيا وحشم على وجه منصف لي باقي كيعقل عليه ياماا هزوو مني كان صغير.. عندوو ديك سبع سنين.. الوقت لي كان مزال منصف ساكن مع واليديه حداهم.. قبل ما يحرگ للطاليان..
دخل وخلاهم..

هبط منصف خلص دوك الخدامة على الهزان وحتى على الفاياج لي جابو ليه فالكاميوو ومشاو فحالهم..
دار لقاها باقة واقفة موراه كتدور فعينيها..
ربع يديه.. وحط وحدة منهم على لحيتو كيحك فيها وكيشووف فيها..
منصف: ماتتسنايش زعما حتى تصخني بلاصتك؟ 
حبسات الضحكة.. دوزات ليوون قدامها.. هزات كتافها بجوج بلا مبالات ودارت دخلات للدار قدامو كتتعيوج..
منصف: لاا حول ولاقوة الا بالله العظيم ههههه 
دخل من موراهاا وسد الباب..

🔙🔙🔙 فالدار لي كانو ساكنين فيها فكازاا.. كانت دارهم ملاصقة مع دار واحد الشارف.. نوووونو وكحل عيوونو هيا ومشها ماكيحملهمش من عند الله.. 
فيييينما تكوون دايزة يسمعها الهضرة.. ومع منصف مبري فيها ماتجاوبش الناس لكبار وخا ماعرفت اش يديرو ليها.. كتبقى تتغدد وتتفقص كل مرة تلاقاتوو فالزنقة ولا جاهاا مشها مضرووب فشي قنت.. حيت عارفااه هو لي كيشير عليه بلحجر.. جاب الله حداهم تما غا الكيااص اما كون راه صفاها ليه من شحاال هادي.. مع أنو ليوون مربي وقليل فاش كيخرج.. غا الا تبكت وبغا يدير تشاتشا 🙊 ههههه

استمر الحال على ماهو عليه حتى بدات كتلاحظ ان ليوون ولا غير مرخي وكيعطس.. فلول سحابليها غير من البرد.. قالتها لمنصف عيط لصاحبو بيطري يستاشرو.. قالو بلي يمكن غير من البرد ووصاه تديه عندو يدير ليه كونطروول..
صافي على داك الأساس.. هزاتو عنقاتو.. داتو لكوزينة حطاتو فووق البوطاجي وحطاتليه ياكل.. يالله بدا فيه وهو يرد.. خلى قلبها غيخرج من بلاصتوو.. 
خلاتو رجع داكشي.. غسلاتليه وجهو ومشات كتجري لواتو فواحد العيبة فحال مانطة صغيورة رقيقة ومشات نوضات منصف وطاروو بيه للعيادة دالسيد مع العشرة دليل..

لحسن الحظ أنه رد.. لقاو عندو تسمم.. دگ ليه برا ودار ليه غسيل المعدة باش يتحيدو بقايا السم لي وكلووه.. 
جالسة حداه بأسف.. شادة ليه فيديه الصغيورة.. الدمووع هابطين لا شعوريا من عينيها على حالتو.. 💔
حتى سالا ليه.. هزاتو لاوياه فاش جابتوو.. مگمطااه وخاشياه فيها كي الدري الصغيور..

خرجو من الكابيني ديال الطبيب (العيادة) ورجعو فحالهم للدار.. 
الطريق كاملة كتفكر فشنو يكون كلا باش دارليه هكاك.. حتى طاح ليها عمو عبد السلام(جارهم) فبالها..

تشكات لباهااا مأكدة عليه أنوو هو مول الفعلة ومفكراه فالمرات لي كيعطبو ليها فيهم.. ولكن مرگ يدوي معاه.. جاتو عيب وحشووومة غيگولو عليه هو مامربيش وخا يكون الراجل لكبير لي غالط.. اللهم يدفع ب التي هي أحسن.. 
صبرها ووصاها تحضي مع ليون ماتخايه يخرجش حتى تكون معاه.. وواعدها أنو غيفكر ليها فشي حل لهااد الموضووع.. 

مابرداتش ليها الحرقة وكلما تفكرات حالتو كي كانت كتبغي تبخ الدم.. حقدات على الوضعية.. وزاد عليها باهاا لي ماداار حتى شي ردة فعل..
هزاتوو هو باقي مرخي فيديها وكيدور فعوناتو.. باستو وتمات غاديا لبيتها..
تخشات هيا ويااه كتتحلف وكتتوعد ليه ماتبقى فالشارف الهارف.. 

من موور تلاتة أياام.. 
كتجمع ماعن لفطوور من فوق الصالاموونجي وحاضية الشرجم.. قانية على عبد سلام حتى بان ليها غيخرج من الدار..
مشات كتجري لماكنة الصابون.. خوات لحوايج لي فيها.. هزات المقابط وتمات طالعة للسطح.. 
دازت من قدام منصف لي باغي يدخل يدوش باش يمشي لخدمتوو.. لابسة سورڤيط وجارة بانطوفتها.. مادا ماجاب وخا كان داير عليها العسة هاد الأيام عارف الشمتة كتبيتها بلا نعااس وماتبرد حتى تفدي دقتها.. 

طلعاات وليوون موراها كيلعب حدى رجليها.. 
طلات مابان ليها حد تما.. سدات عليه الباب دالسطح باش مايتبعهاش.. وشداتها بدرديبة وحدة حتال الگراج.. 
هزات تيوو.. قلبات على سلك حتى لقاتو ربطات معاه واحد الطريف صغير ديال التوب هبطاتو معاها فجيبها.. وخشاتو فالتيووو.. 
لبسات ليگات فيديها باش ماتبقاش فيها الريحة من بعد.. شدات الجيهة لي فيه التوب.. حلات لغطاية ديال لبلاصة لي كيعمرو منها ليصانص.. وخشاتوو..
حطات سطل حداهاا.. غير جرااات داك السلك بدا كيتجبد ليصانص من المطوور ديال الطموبيييل.. حتى وصل للقدر لي بغات وحبسات.. سدات داك لعجب.. وخبات ادات الجريمة.. هزات السطل كباتو فبوديزة كانت موجدة ففمها دواااز حتى عمراتها (هادي هيا الطريقة لي كيخرجو بيها ليصاانص من الطمووبيل).. هزاتها ومشات جيهة الباب.. 
حلات.. خرجات راسها كتطل ليكون شي حد.. الدنيا كتصفر.. خرحات كتتسلت ببوديزتها حتى وصلات عند باب دار عبد السلام .. دفعات الشراجم دالسفلي لي مخليهم مردوديين.. خواااات ديك البوديزة مفرقة على كل شرجم شوية وهيا كتدور فراسها ليشوفها شي حد.. 
حتى سالات شعلات وقيدة لاحتها لداخل وهربات دغيا.. 
حيدات الليكات خباتهم هوما والشي لاخر فين دارت التيوو.. وطلعات طاااايرة للسطح..

حلات الباب على ليوون.. لقاتووو غادي جااااي.. هزاتوو باستوو وعنقاتوو.. طلقاتوو ومشات لطواليط ديال تم.. غسلات يديها ورجليها ووجهها بصابونة (دووڤ).. رشات الديدوووغووو والريحة.. وخرجات تنشر كتغني وتصفر غابوووحدها..

بدااو الدخااخن يطلعوو.. وبدات ريحة الشياااط تنتاااشر.. خرجو الجيران يتجاراااو.. ولي باقي ناعس فااق بتولويييل لعيالات.. ماعرفو منين يبداااو يطفيو ديك العافية.. شي يگول الماا وشي يگوول الرملة.. وشي يعيط على رجال الإطفاء .. داخت بيهم الحلوفة مساكن 😹 والعافية قاااضية غراااض.. 
خرج منصف كيجري من الدووش.. لبس بلا عقل.. خرج كيقلب منين جايا الريحة.. لقا كلشي بلاصتوو.. طل هو يتصدم.. عرف الصهد منين جااي ههههه

قلب عليها فبيتها مالقا حد.. تبعها لسطح.. لقاها كاتنشر وتغنيييي ومامسوقاش للشياط لي طااالع حداها.. 
وقف عليها كي القدر المستعجل.. حاط يديه على جنابوو..

منصف (مخنزر): نتي مولاتها؟
فيووونا (باستغراب): شناهياا؟
منصف: خلا دار عشتك 😠
تبتات القراسة.. حيدات يدها من لحبل ودارت عندو..
فيوونا (كتتمسكن): مادرت وااالو أنا 😇 من گبيلة وأنا كننشر..
منصف: كون كان دابا فالدار فين غنولييو؟ هاا؟!
فيوونة: ماتخافش راه تسنيتوو حتى خرج 😈
منصف (شداتو الضحكة): الله ينعل الحمار تاع بووك 😂
فيوونا: الحيلة حسن من العار 😝 فين وصلو طفاوها؟ هههه
منصف(دار يديه فراسو كيحكو): باقي.. أنا غنهبط عندهم.. ماتخرجيش نتي..
فيوونا: واخااا ههه 

نزل هو.. لقى صحاب الاطفاء يالله وصلوو.. وبدااو كيرشوو على الداار الما يطفييو ديك لعافية لي كلات النص فالدار..
سالات هيا نشيرها جمعات الشبكات وحدة فوحدة ومشات كتطل.. ومع البامبيااا لي جاو غا اللحية على خوووه.. حطات يدها تحت حنكها.. حلات فمها فيهم وگلسات تتعزل.. هدا ينفع هدا يضر..
ههه الناس فالناس والقرع فمشيط الراس 🤣

جا عبد السلام مع الحفلة.. مدعوووق.. كتبان ليه غير الجووقة ولحمووم.. غا وصل للباب وفهم الموضووع هو يشدوه لمسلمييين..
طاح ليهم تم يبكي وينووح ويدعي فالظاالم.. 
جاو البوليس حتى هوما وبداو كيحققوو.. رويينة كحلة ولات.. وفيونا كتدور فعينييها لفووق..

عبد السلاااام (كيغوت ويترعد فحالا فييه بوتفتااف وينعت فمنصف): نتااا نتاااا.. بنتك بننننتك مولاتها بنتك.. بنتك لي ديرها دييييك الجنية الفليفلة.. انا لي كنعرفها انااا..
البوليسي: متأكد من هادشي لي كتگول الشريف ؟
تعالات أصوات الناس.. استنكاراا لشكيگوول..
..: لاااا حول ولا قوة الا بالله..
..: نعل الشيطااان الحاج..
..: استغفر الله العظيييم..
..: اللهم ان هدااا منكر..
..: وقر علييك البنت الحاج الله يهديك..

قرب عندو منصف بكل ثقة..
منصف (بصرامة): عندك شي دليل الحاج؟ الى عندك مرحبا.. أراه وأنا نديها بيدي للكوميسارية أما الا غنجيو غير الهضرة حتى أنا غنووض نگول نتا لي سممتي ليا مشي وكتشير عليه بالحجر كلا مرة.. ونتا لي هرستي الزاج دالطنوبيل نهار باتت برا ونتااا ونتاا.. الباطل ماكاين ماسهل منوو 😠
عبد السلام (تقرص): ااا.. اا.. لا لا أنا زعما غيير شكيت.. والشك من طبع الانسان..
منصف: ماكنتناقشوش هنا اسي باش تشك.. هادشي لي كتقول فيه راه جنحة وكيعاقب عليها القانوون.. زگي معانا الله يرحم الولدين خليني نحشم على عكازك وكبر وسنك.. 
بقا كيشوف البوليسي فعبد السلام لي جاه كيدخل ويخرج فالهضرة وباين عليه علامات التردد عكس منصف لي تايق فاش كيگول وكيخرج فعينيه..
البوليسي (للشارف): براكة من الخوا الخاوي وخلينا نديرو خدمتنا ولا غنديك نتاا نيت بتهمت تظليل العدالة 😒

سمع هكااك وهو يضرب الطم..
أما العفريتة كتتخبا تضحك حتى تشبع وتعاود طل عليهم وتتسنط عليهم أش كيگولوو.. 
لقات باش تتلاها وتدوز الوقت.. 
تعاشاااات لعشية.. طفااو العافية.. دخلو البوليس عيااو يقلبو على شي دليل يبين ليهم مول الفعلة.. واااالو مالقااو حتى حاجة توصلهم لراس الخيط.. 
شافو حتى عياااو وخلاو داكشي هكاك وزادو فحالهم.. 
أما عبد السلام فجات بنتو داتو معاهاا بزز.. سواات معاه يمان عاد تزعزع ليها من تم.. 
دخل منصف حتى هو فحالوو.. گلس شحال شاد راسو بين يدييه.. 
فكر حتى عيا ولقى أنسب حل أنو يهز بنتوو ويطلع لدار باه فوجدة يسكن فيها.. 
هز تليفونو عيط لخووه كلفو بالمشرووع لي حال فكازا وبإدارتوو.. 

سمعاتو فيوونا وجات جلسات حداه كتدور فعينيها.. خبرها بقراروو وداك النهاار نيت بداو كيجمعوو حوايجهم الأساسية لي غيديو معاهم.. 

خمسيام هكاك دازت وهوما كيدورو من هنا لهنا ويتأكدو لاينساو شي حاجة..
كانت بدات دار عبد سلام كتتصلح فديك لوقيتة.. وبداو يصبغو فيها..
هزوو رحيلهم.. سدو دارهم وغادرو مدينة الدار البيضاء مع لفجر.. 
مركنة حداه ومع ماناعساش بكري ومفيقها مع النبوري دااتها عنيها.. حتى ضربو ربعة دسوايع دالطرييق عاد ناضت وتوگضات شوية.. 
حلات على ليون الكاج ديالوو (بحال لقفز وهو كبيير ديال لمشاش) جراتو عندها عطاتو رضاعة صغيرة فيها لحليب حيت ماعندها كيدير تحطو ليه فالطاس.. 
فيونا (دارت شافت فمنصف): باباااا..
منصف: يعطيك لوبة 😒
فيونا: مالي ماشي بنتك؟ 😰
منصف (كيجاوبها بلا مايدور عندها): يبني عليك حيط.. فعايلك فعايل لبنااات 😒
فيونا: وااامنصف وااصاحبي الصباح هدا اوو.. را سيمانة هادي باش داز داكشي نسا نسا.. 
منصف: لااا حول ولا قوة إلا بالله..
فيونا: وااااراه فيا الجوووع 😭
منصف: جمعي خناينك راه قربنا نوصلو لصطاسيوون وغتفطري..
فيونا: لااائح مانجمعهاش لي بغاني يبغيني بخنونتي 😝
منصف: أنا راه عارفك غتوحلي فيا غا أنا.. ماغتزوجي ماغتخلي لي يتزوج.. 
فيونا (دارت عندو بالعرض البطيء): شتي هاحنا غنوليو فتخصار الهضرة 😠
منصف: ومالني كبرت عليها هههه
فيونا (دارت مبدلة الموضوع): بغييت ناكل 😏
وقفوو هبطوو حتى فطرات ووصل عليهم الكاميوو.. سيفطها فيه هيا وليوون حيت عارفها الى بقات معاه غتگلب ليه راسو وهو مامكافي حتى مع الشمش لي ضاربة فيه..
طلع لبلاصتوو وديمارا تابعهم.. كيضحك وكيتفكر.. 
فطوكوووبي ديالوو.. فعايلها ماجايباهم من خلى..

كانت عندو تلاتين عام فاش حرگ لطاليان من مووور مادفع وعاود للڤيزا وترفضات ليه.. 
تعرف تم على واحد الگاورية.. ضرب هو وياها لكحل فلبيض وتزوجوو على أساس دير ليه لوراق..
وقبل مايدور عليه لعام ووخا كان داير احتياطوو.. حملات الصفريطة..

ووخا كان رافض الفكرة ومابغيهااش هي أصلا.. ماشي خايبة هي بگوووصة بلحق هو فيه عرق مغريبي ودموو سخوون.. 
وهي ماكتساليش من الرجالة هدا الصديق ديالي.. وهدا ولد عمي ولاخر ولد خالت جد مي.. اوا بوس هدا وعنق لاخر وقداموو عيني عينك.. صبروه عليها غير لوراق.. 
زادت كملاتها مني ولدات لاحت ليه البنية باقية لحيمة صغيورة وناضت لاصال كترد فورمتها وتتقاد.. وعطاتها لخرووج.. ها الشوبييينگ.. هالبروشينگ.. عايشة الحيااة ومامسوقة گااع..
ولا هو لي مقابل فيونا.. من ليكوشها لرداعتها لدوشها.. حتى من فياقها بليل هو لي كيسهر معاها.. 
طلعات ليه فراسو.. وكره دوك لوراق ومايجي منهم.. يخرج يخدم وفاش يرجع يلقى البيبي كيما خلاه كاسر دنيا بلبكى وكتتسنا فيه حتى يجي يقابلها .. ربع شهوور على نفس الحال حقد.. ومني لقا راسو فيه فيه كلشي دار بناقص منها ومن لي يجي منها ووقف على الطلاق..
الواعرة أن جوليا (مرتو) مابغاتش.. أحگا ماحگا كتبغيه وماتقدرش تعيش بلا بيه وبدات عليه فالدراما.. مني ماتشدش ليها ومادازش عليه تروحينها.. خرجاتليها طاي وولات كتخرج فيه عنيها تاني.. عارفة راسها الا تمسكنات على القاضي بحجة أنها مابغاتش اسرتها تتشتت غتبقى فيه ويبقى يأجل فالدعوة بدافع انساني وعلى أمل أنهم يتصالحوو.. 

ولات كتبان ليه كي شي خرية عندها رجلين.. منينما دازت كيقلب الطريق.. ويخوي لبلاصة لي تكون فيها هي..
كيخلي حتى يرضع بنتو وينعسها ويهبط للبار يعطيها للقرعة والكاس.. كيفكر ويعاود على شي حل.. طلاه خضر أما كون كان يابس كون راه حتحتوو ههه
حتال واحد النهار.. طاحت عليه فكرة جهنمية.. خلص وطلع فحالو.. لقاها لابسة دوك جوج خيوط باش كتنعس.. باس بنتو وقاد عليها لغطى ومشى تخشى بلاصتو عاطيها بالضهر..
صبح عليهم الصباح.. فاقت جوليا هيا اللولة.. طلعات معاها الريحة مجهدة.. باقا كتحاول تستوعب اش طاري حطات يديها فووق لفراش ديال النموسية كتلقى داكشي فازگ.. ناضت قافزة من حداه كتقلب.. عرفاتو هو مولاها.. عيات فيه يمشيو لطبيب رفض ودار فيها نفسيتو متضررة.. 
بقى كيعاود ليها نفس الفيلم كل صباح.. كل نهار مصبحها عايمة فالبوول.. 
شافت حتى عيات وطلبات هي الطلاق هاد المرة.. سمحات ليه حتى فالبنت.. عدفها فحياتها ولات باغا غير تتفك..
ومن داك العهد وهي غابرة عمرها هزات تليفوون سولات فيهم حتى واش عايشين..
حتى كملات فيونا تلت سنين.. تلاقاو صدفة فحفلة واحد صاحبوو طالياني كيعرفها حتى هي.. وقفات سلمات عليه.. وبغات تاخد من عندو البنت غير تشوفها وتبوسها.. ساعا كرمات عليه وحلفات لا مشات عندها.. وفينما تحط عليها جوليا يديها كتطلق زواكتها وتتخشى لمنصف فعنقو تگوول موصيها.. 
من مووور داك النهاار عاد تفكرات بلي عندها بنت وفاق فيها احساس الامومة.. ولات باغا تشوفها وتتعرف عليها.. وتعرف اش كتبغي واش لا.. وقبل ماتحاول تبدا فالفعايل دولاد لحرام وتوصلها للمحاكيم ولا شي لعبة هز بنتو وهبط فحالو للمغرب.. سامح فكلشي.. كل هموو أن بنتو تبقى معااه.. 
دخل فحالو حل ريسطوو دالماكلا طاليانية.. الباسطا والبيتزاا وغييرها.. ودوز ديك خمسطاش لعام كاملة لي دازت هو وياها راس فراس كي العشران.. أغلبية الوقت كيهبطو عندهم ولديه لكازا.. وهوما نهار كيطلعو عندهم كيمشيو ديريكت للدار لي عندهم فالسعيدية..

وقف طموبيلتوو فالدخلة ديال وجدة.. عطى لفيوونا سارووت الدار ومشا هو يجيب باش غيتغداو عااد يلحق عليهم..

🔚🔚🔚 نهاية لفلاش بااك..

طلع هو وياها ديريكت للكوزينة.. كان حط الحوت لي جاب فطباسل.. فوق الصالامونجي.. 
جلسو منصف فكرسيه.. تبعاتو فيونا.. وقبل ماسطاسيوني بلاصتها
تفكرات تحط ل ليون فالطاس لي كياكل فيها ولاماعرفت أش كيسميوها.. يالله جات تنوض.. لقاتو واقف حداها لاوي لخر ديال ديلو.. 
فيونا (دارت عند باها): مالو؟
منصف: مالو؟
فيونا: شي حاجة ماعاجباتوش.. (تحدرات عندو كتقيس فوجهو) مالو بب؟ 
دار عضليها صبعها بشوية.. 
فيوونا: شكاين الزمر؟ 😾 
وقفات كتقلب على سبب انزعاجو.. تمشى هو قدامها حتى وصل لطبسيلو وبدا يدور عليه.. 
ليون (كيوريه ليها زعما): ميييو ميييو
دارت شافت فمنصف مصغرة عنيها 😒
هزاتو عندها كتعنق فيه وتبوس وتحك ليه على راسو كتحزر فيه.. وهو حتى هو مستحليها وعاجبو الحال.. هزات ليه ماكلتو وحطاتو هو وياها فوق الطبلة وگلسات.. 
منصف: نلقى شي زغبة فالماكلة نگلب بوك نتي وياه.. 😠
فيونا: ماتقلبنيش غير أنا وخود راحتك 😝

نرجعوو عند هداك لي خلينا فالشرجم ههه
سدو ورجع لفين كان گالس مضارب مع ذبان وجهوو.. 
أنير (عاقدهم): ياخويا وتگّول واش بنادم يخليك تشد راسك ولاتسمع لمخك (يعني تگلس هاني) 😠
سفيان: واشا فيها؟ شكون هاد بنادما لي كانت تزگّي؟ (كتغوت) 
أنير: واحد البزا (البعلوكة) كتلغا (كتعيط) لمنصف عقلتو.. لي دارهم گبالتكم..
سفيان: واش جابو؟ هادي شحال ماجاش هنايا.. سمعت بلي الحاج هو لي كيمشي عندو..
أنير: مانيش عارف.. (دار شاف فيه مخسر سيفتو) من نيتك راك تسولني.. 
سفيان: من فمي..
أنير (خدم لبلاي): لعب الا باغي تلعب وخطينا من هضرة النسا.. 

نرجعو واحد تلاتين عام لوور.. 
ڤيلة بعيدة كل البعد على أصوار لمدينة لقديمة.. غادي جاي سي الشرابي (بات أنير) فحيرة من أمروو.. بين المرا لي كتطلب فيه وتعاود باش يبيع ليها الأرض.. وبين الرجال لي كيباتو واقفين عليه فلمناام يحلفو فيه ويعاودو مايفرط فأرض باه.. 
ديك الأرض لي ورتها على والديه وجدودوو.. ولي ماعارفش أنو مدفوون تحتها كنز.. لي عارف هو أنو من نهار جات عندو ديك لمرا ومن نهار حطات رجلها فدارو وهو ماشي على برجو.. ولى يحلم كل ليلة ويوقفو عليه رجال بسلهامهم بيض.. دايرين كي لفرسان.. كيوصيوه مايخونش الأمانة..
تزاد معاه الزايد ولا يبات بالقران ويفيق بيه.. ووخا هكاك نفس الفيلم كيتعاود كل ليلة.. 
وحتى اصرار والحاح ديك لولية عليه دخل ليه الشك..
كترات لمشي ولمجي.. كل شوية تتم داخلة احگا باغا تشوف واش صافي فكر.. وكل مرة يصدرها.. متحجج بأن الأرض ديال الورتة والقرار ماشي بيدو بوحدوو.. 
حتال نهار قصد واحد لفقيه أهل تقة.. عاود ليه الواقعة من أولها لاخرها.. 
فسر ليه لفقيه الوضع على حساب الحالات لي دازو عليه من قبل ولي مشابهين لحالتوو.. وحدرو ما يبيعش الأرض.. 

رجع فحالو واعي بأش داير بيه.. مني رجعات ديك خايتي.. گلس معاها هو ومرتو وحاولو يتسلو منها غي بالفن ويخرجو الشوكة بلا مايسيلو الدم.. خبروها برفضهم للبيع.. متحججين بلي الورتة ماتافقوش بيناتهم ومعروف أنو الا عكس غير واحد فيهم مايمكنش للبيعة وشرية تتم.. ومع هوما ناس طيبين وماليهمش تحريميات تلبكو بان فيهم الاحراج وماعرفوش يكدبوو..
عاقت.. مارضاتش وناضت فحالها مقرنصة.. عارفة راسها قفراتها..
السيدة أصلا مشعودة.. وسحارة.. شياطينها لي مسيفطينها تخدمهم مقابل خدماتهم ليها.. 
مني تعكسو ليها فالأرض فشلات فالمهمة.. وأكيد أقل الخسائر أن دوك الشياطين مايبقاوش تحت امرها هادشي الا ما أداوهااش.. حالفاتها فيهم حسيفة.. وبالفعل التجآت للسحر .. وجات حتال باب ڤيلتهم غفلات لعساس ولاحتوو.. 
تخطاااوه وعاودو وموور مدة عاد ردو معاه لبال.. 
نقاو لبلاصة.. لي لقاوه فيها.. جابو لفقهة قراو تما.. وولى العساس كيطلق كل ليلة القرآن.. 
داز عليها ايااام وليااالي وشهووور.. حتى تنسى الموضووع..
حملات مرات سي الشرابي.. ومن مور سبع شهور.. وحيت سي أنير زربان على رزقو خرج قبل الوقت.. كمل شهرين لي باقية ليه فالقرعة عاد ردوه لدار هو ومامااه.. 

وهنا بدا كيبان مفعووول السحر الأسود.. ولاو كيلاحظو اخضراار أطراف البيبي ههههه من يدين ورجلين.. خضورية خضورية.. تزاد معاهم الزايد.. 
هزوه ولاو دايرين بيه من طبيب لطبيب مالقاو عندو حتى حاجة.. والامر لي حيرهم أن لحمو كيرجع لطبيعتوو فحالا عمرو كانت فيه شي حاجة.. 
كيدخل ليهم الشك فراسهم كيولي يجيب ليهم الله بلي غا تهيء ليهم وغير كانو كيتخايلوو.. كينعلو الشيطان وكيتعاود نفس المنظر قدامهم.. بغاو يحماقوو.. مافهموو والوو.. 

دازو سنين.. جاو للدار لي عندهم وسط لمدينة.. بدا كيكبر لوليد وولا كيقرى.. 
وماحد عمرو كيزيد ماحد القضية كتزيد تطور.. كيكون طبيعي تاكتوصل واحد لوقيتة ديال الليل كيبدا يتلون.. 
اترات هاد القضية على نفسيتو.. ولا منعازل وخايف شي نهار يتفرش قدام الناس.. وهروبا من هاد القضية ولا كيلجأ للعنف.. 
شافو والديه حتى عياو ودخلوه للفري فايت (رياضة فحال جيدو ولفول كونطاكط والكراطي غير هادي جامعة شحال من رياضة) تما تلاقى مع سفيان لي فالأصل جارهم ولي عكسو فالكراكطير.. بقى كيهبش عليه ويحك عليه وأنير كيصدوو.. ماعيا ما مل حتى تصاحب معاه صحا وتعاشروو.. 

توالات سنييين خرى.. مابقاش الأمر مقتاصر عند أنير فلوون لي كيتحول ليه.. وولى كلوو كيتسيف.. وزيادة على ليزابدو ولكتاف لي ربا بلونطرينمو طول هاد السنين.. ولا كيتحول بشكل كامل.. وزيادة على اللون لخضر لي كيولي عليه كيضاعف حجموو تلاتة المرات على حجمو الطبيعي.. حتى وجهوو كيتبدلو ملامحوو وكيولي كيخلع.. 
ماخلى كتوبة ولامجلدات قلب وبحت فيهم على أمل يولي طبيعي شي نهار ووالو.. ديما محاولاتو كتفشل وكتفشلو معاها.. حتى من الكتوبة دالسحر دار عليهم واحد واحد وللاسف بلا جدوى.. 
بالصدفة عرف سفيان حتى هو سروو لمخبي.. ومن داك النهاار سماه شريك.. لشبه لكبير لي بيناتهم لا لونا ولا بشاعة..

النااس مني سمعوو سفيان كيعيط ليه هكااك مشاو زالگين ومشى بالهم مع حجموو ومهارتو فالفري فايت حيت نيت فاش كيكوون فشي كومبا كيتحول لوحش وماكيرحمش الخصم ديالوو.. وولاو حتى هوما شاديين عليه ديك السمية.. 
شوية بشوية.. بطولة من مور بطولة.. ولا معروف وطنيا.. أنير الشرابي.. الملقب بشريك.. 
مني وصل للباك.. علي(باه) هز مرتو ورجعو لدارهم لي خارج لمدينة.. صلحوها وعاودوو قادوها بطريقة عصرية.. وخلاوليه الدار لخرى باش يلقى راحتو ومايبقاش غير ساد على راسو فالبيت..

وخا گاع الصعوبات لي كان كيواااجه مع الحالة لي هو فيها.. حاول يتأقلم وصبر ومافرطش فقرايتوو حتى تخرج.. 
ولى كيقد يسيطر على أعصابو وولى عارف الأوقات لي كيتحول فيهم وكيعرف كي يتصرف.. ماشي بحال قبل غضبوو كان كيمرضوو.. وكيخليه ماقادرش يختالط بالناس..
وبالرغم من ان التخصص لي قرا عندو مستقبل الا انّ حلمو كان هو يكون عندو كلوب (نادي).. جامع گاع الرياضات.. سباحة.. جيدو.. ايروبيك.. الخ
شاف حتى عيا علي وحقق ليه أمنيتوو فاخر المطاف ولدو الوحيد وباركة عليه غير المشكلة لي فحياتو بسبابهم.. مابغاهش يواجه صعوبات كتر.. أصلا مايحتاجش يحكو ولايدوز عليه دكاكة.. طالع ليه راجل من صغروو.. ورافع ليهم راسهم لفوق..

نشاغل بتكبير مشروعوو وتطويروو.. ولات حياتو مقتاصرة بين تلاتة دلحوايج.. لكلوب، التوجاد للبطولة لعالمية لي قرر أخيرا يشارك فيها من مور سنوات من الاصرار ديال المدرب ديالوو، والبحت على طريقة لابطال السحر الأسود لي رافقووو طول هاد السنين..

واحد الصبااح.. فغابة بوعرفة.. بكري قبل مايكتر الغادي والجاااي.. 
لابس بيل ديال السبور (تريكو ولا سوفيطمة) بلا كمام وشورط كحل فوق الركبة.. 
كيجري كيما موالف.. حتى لفتات انتباهو واحد لبنيوتة صغيورة.. تكون عندها شي ربع سنين هكاك.. لابسة كسيوة بيضة وصبيبييط.. وشعرها تبارك الله مسبسب وطويل فايت خصرها.. واقفة.. دايرة يديها بجوج من مور ظهرها وفحالا كتتسنى شي حاجة.. خفض من السرعة لي غادي بيها.. حيد لكيط من ودنيه.. وتلفت من وراه وقدامو وسرح عينيه فلبلاصة لعل وعسى يبانو ليه ولديها ولا شي حد معاهاا..
مابان ليه حد.. الدنيا كتصفر.. 
قرب عندها وتحدر.. لقى السلااام.. ردات عليه وهيا باقة على نفس الوضعية وكتضحك بطفولية.. سولها على والديها قالت ليه بلي كانت متبعة فراشة فاش دارت بغات ترجع عندهم مالقاتهمش.. حاار شنو يدير.. وخاف ليمشي يقلب عليهم وتصدق مودرة عليه حتى هو.. شاف حتى عيا شد فيها وجرها معااه كيقلب ويعااود.. 
وهوما غاديين وهوما داويين فأموور فسنها.. على غفلة منووو نطقااات فجأة : 

{ وَالحظَة التي سَيبطُلُ فِيها هِي لحظَة اهتِزُاز ورَنِين وانسِجَام وانعطَاف بينَ النَفس و بينَ مَوضُوع اكتُشِفت فِيه النَفسُ ذاتُها وحقَائِقها وأسرَارها الدَفِينة.. 
سَيبطُل حين تُجِد مَن يُحبك عَلى مَاأَنتَ عَليه.. وأَنتَ في أسوَءِ حَالاَتِك. }

فدهشة دار يشوف فيها.. مالقى حتى حد.. هز يدو لي بقات ممدودة بعد ماكان شاد فيها بها.. قربها قدامو كيقلب فيها.. دار مدهشر كيسرح فعينيه حداه وبين الشجر مالقى ليها اتر.. كأن الأرض تحلات وبلعاتها.. وكأنها عمرها كانت.. تزاد معاه الزايد.. ماتيقش شنو طرى وحاجة وحدة كتعاود فودنيه.. الجملة لي گااالت ...

رجع فحالو.. فحيرة من أمرو.. كيحلل ويناقش فهضرتها.. كيحاول يرجع السينتة لاتكون فلتات ليه شي حاجة.. وكيحاول يفهم ماوراء الكلمات وشبغات توصل ليه..
كتبها فورقة وفيكساها قدااموو فبلاصة باينة.. يدوور ويدوور ويهزها يقراها..
جا سفيان.. حل بالدوبل دالساروت لي مخرج ليه وطلع.. لقاه جالس مقابل معاها ومربع يديه.. كشوف فيها وساهي.. 
قدصها هزها كيقرا فيها وجا حداه..

سفيان: وشتا هداا؟
أنير: مانيش عارف.. 
سفيان: شكون غيعرف؟ منين جاك؟
أنير: نعاودهالك كي لخرافا.. 
حط سفيان الورقة وبقا كيشوف فيه ويتسنى.. سكت شحاال وزااد..
أنير: فاش كونت نجري الصباح.. لگيت واحد البنت صغيرة... (عاود ليه اش طرى)
سفيان: واشتا هو هادشي تاني 😒 
أنير: كن عرفت غادي تلگاني گاعد هاد الگعدة من الصباح.. 
سفيان (عااود هز الورقة تاني كيشوف فيها): لي فهمت من هادشي بلي غيتبطل مني غتلقى لي يبغيك كيما نتا.. (شاف فيه) يكونو زعما يهّضرو على التحول ؟!
أنير: مرانيش عارف أصاحبي راسي فرعني(ضرني) بكترة ماراني نفكر🤕
بقاو على داك الحال.. ضارهم راسهم.. كيفصلو ويخيطوو.. 

ومن مور شهر بالتحديد.. تلاقى بالصدفة مع واحد البنت كانت كتقرا معاه يامات ليسي.. سلمو على بعضياتهم كيسولو على الأحوال.. خدات من عندو نمرتو باش يبقاو على تواصل.. حتى هو مامانعش وماصدهاش.. 
بقا بيناتهم مسجات.. مرة مرة كيتلاقاو.. حتى ولات السيدة كتبغيه.. ومنوو تخلااق.. 
كل ساعة تعيط.. كل ساعة مسجاات.. وتحزر وتبزر.. 
هو أصلا بطبعو مامولفش يتحاك مع بنادم بزااف.. ووخا قجرات عليه مابغاش يقمعها.. خلاها على هواها..
ومانكرش أنها حتى شكلا عجباتوو.. ميلحة.. ولطاي ديالها مقادة.. وخا عرف أنها مطلقة ماكانش عندو مشكيل.. ومن مور بزاااااااااااف ديال التلميحات خرجات ليها طاي وصارحاتو.. دار ليها خاطرها وولا معاها..
ست شهووور وهوما داخلين.. خارجين.. مسافرين.. 
ولات كل شوية تتم جاية عندو للدار.. شاف حتى عيا گال مع راسو طاليه طاليه اللهم يتزوجها.. 
قتارح عليها الفكرة.. تگول كانت تتسناها.. وافقات قبل حتى مايكمل الجملة.. طارت عليه.. ماقاداها فرحة.. وهو الحاجة الوحيدة لي كانت شاغلة بالوو هي كيغيدير يصارحها.. 
شاف حتى عيا.. وطلقها ليها ديك الساعة ماحدها فرحانة..

ماتيقاتوش فاللول.. شحاال وهو كيشرح ويعاود ليها الموضووع من بدايتوو.. عااد ستوعبات شوية.. حاولات تتفهم القضية وتتقبلها.. ووخا هكاك فقرارة نفسها مامتيقاش أن شي حاجة فحال هكدا تقد تكون حقيقة.. 
گالت مع راسها غيكون غير كيختابرها وغير كيضحك.. تبتات راسها.. واستقبلات الأمر بسعة نفس وخاطر.. 
بقات كتتكلم بأريحية.. وكتتصرف بمياعة كالعادة.. 
حتى ظلام الحال.. تعمد أنير يشدها تتعشا معاه.. زعما احتفالا بقرارهم وبالخطوة لي مقدمين عليها.. 
وما ان وصل الوقت المعلوم.. بدات العلامات كتبان عليه.. بدا كيخضااار.. وحجمو كيتبدل.. 
كانو ديك لوقيتة كيوجدو فشنو غياكلو فالكوزينة.. 
جايهز من حداهاا الموس باش يقطع اللحم سطيك ويحطو فوق الشواية ديال الضوو.. جر لمجر لي واقفة حدااه.. مع الحركة حداها.. تلفتات لا اراديا وهي منشاغلة بالخضرة لي كتقطع وعاود دارت قدامها.. وماهيا الا تواني عودات دورات وجهها جيهة يديه.. وتحلو عنيها على مصارعهم وتحل معاهم فمها حتال اخروو.. تشلات حركتها.. مافهمات والوو.. لوقت لي هز هو شنو بغا ورجع وكمل شنو كيدير..
تخلعات ووجهها صفار كتر ماهو صفر.. مابقات عارفة ماتقدم ولا توخر.. رجعات لخضرتها بمشقة النفس.. كتقطعها وعينها فيه كتتحقق من صحة داكشي لي كتشوف ومن سلامة عنيها.. 
بقات هكاك عين تخرى وعين تقلب على باش تمسح ههه حتى صدقات عاطبة صبعها.. وقافزة من بلاصتها وتهرنط..

على اثر صرخاتها.. دار أنير وقرب عندها يشوف مالها.. مد ليها يديه بتردد يشوف صبعها.. بقات كارمة بلاصتها.. على شحال عاد صدرات ردة فعل بخوف ظاهر عليها.. 
خلاها تغسل يدها ومشى جاب ليها سبرادرا.. مدها ليها دارتها.. 
قادوو الطبلة من مور ماكملو طيابهم.. 
جالس حداها.. كيدور عنيه ويقيد..
مني كانو فالكوزينة وهو كيشوف فيها بنص عين.. وكيدقق أي حركة دارتها..
كيگولك تبع الكداب حتال باب االداار.. وداكشي لي كان.. داكشي لي دار حتى يشوف فين يوصلو معاها هاد الشي.. مابغاش يظلمها حيت ردة فعلها طبيعية كونها أول المرة تواجه شي حاجة فحال هكا.. 
ماتعطلاتش.. غير غسلات معاه لماعن وتسلات على غير عادتها.. وماسلمات عليه حتى التسلام، هي لي مولفة تعنق وتبوس.. وتظل لاسقة فيه.. 

سد الباب موراها.. ودخل فحالوو.. جلس تاني تاني رجل فوق لفوطووي ولخرى مخليها محطوطة فالأرض.. يدوو ليسرية متنية تحت راسو.. ويدو لخرى قداموو.. كيشووف فيها.. فعروووقها لكيزيدوو يبرزو بشكل غير طبيعيي وهاد اللون لي من نهار عقل على راسو وهو مرافقووو.. 
برهنات ليه أنو عمروو غلط فاش بعد على الناس.. 
ناض للدوش.. تقابل مع لمراية كيحقق فملامحو لي كتبدل تلتمية وستين درجة.. 

تفكر شوفاتها وخوفها.. أي واحد كيما كان غيدير هكااك.. فعلا كيخلع.. قمة البشاعة.. هو وماكيتقبلش راسو فهاد السيفة.. كيفاش كيتسنى يتقبلو واحد اخر.. 
تفكر البنت الصغيورة.. تفكر هضرتها..
بتاسم باستهزاء.. وضرب ديك لمرايا حتى تشخشخات كااااملة على كبرهاااا...

خشا يديه لي ولات كتقطر بالدم تحت الروبيني.. وصورتو باقة كتنعاكس فالطراف لي باقين فالحيط.. 
ضرو راسو.. لوا يدو ففوطة وخرج من تم..

دازت يومين على داك النهار.. عاد بانت لعقوبة المنقوبة.. المشكل أنها رجعات لسابق عهدها.. كتتصرف عادي.. والحب مشتت.. هازاه بحبيبة حاطاه بكبيدة.. ودايرة فيها جوليييت فياماتها.. 
وخا عاودات شافتو متحول.. تصرفات بطلاقة ولا نگولو تدعات أن الأمر عادي وأن داكشي ماكيهمش.. المهم هو يكون معاها..
جبدات معاه موضوع الزواج.. وكتسايس معاه باش يقربو تاريخو ما أمكن.. 
خرج من النقاش من باب واسع.. بأنو غيهضر مع ولديه وهوما لي غيقررو امتى يمشيو عندهم.. وبدل الموضوع..
ولكن سرعة تقبلها ليه كوحش من مور داك الاشمئزاز لي بان عليها قبل وفمدة قصيرة دخل لأنير الشك ولي زاد حيرو أنوو مادام هي كتبغيه كيما كتگول وهي عارفة حقيقتوو علاش مارجعش لطبيعتو؟
أكيد كاينة إن فالموضوع.. 
مابغاش يظلمها.. وقال يمكن خاص حتى هو يولي يبغيها.. عاد تتفك العقدة..
مابغاش يظلمها بسوء ظنوو.. وخلا الأيام تبين.. 

مرووو أسابيع.. ماتغير والوو من غير طلباتها لي ولاو كيزيدو نهااار من بعد نهار.. أحگا خاصها هادي.. أحگا ماكرهاتش تكون عندها هادي.. 
كونو ماشي من النوع لي كيهمووه لفلوس ماكانش كيبغي يخليها مخصوصة من شي حاجة.. ولا يخليها تحس بالنقص لي حلات عليها فمها كتكون عندها.. حتى كتْرااات بشكل ماشي طبيعي.. 
شاف حتى عيا.. حيد الطموبيل داها لدارهم لخرى.. والكلوب جاب لي يقابلو ليه ديك الفترة.. 
ولات شَيْمَا فينما تجي عندو تلقاه غير فالداار.. كتبغيه يخرجها كيتحجج ليها بطموبيل لي حيد ليه باه.. وبلفلوس لي قربو يساليو ليه وماعندو منين يجيبهم مادام باه مقاطع معاه وقاطع عليه الما والضو.. 
علامات الاستياء وعدم الرضا على الوضع دغيا بداو يبانوو.. ماقداتش تخبي.. الحاجة لي كانت شاداها ليه ومصبراها مابقاتش.. فحالا هو لي طلبها نهار اللول وماشي هي لي لسقات فيه كي لحم الراس.. 
تبدلات تصرفاتها وتملقها حبس.. وهو عاجبو لحال.. حاظيها وفنفس الوقت محافظ على تصرفاتو الرجولية وصرامتوو وحدة طبعوو.. شي لي مخليها ماتتماطلش عليه ولا تزعم دير شي تصرف لي خايب.. 

ولكن كونو كيحلل أي حاجة دازت قداموو.. ماخفاوش عليه تصرفاتها.. وشكو كان فمحلوو.. لقى جواب أسئلتو.. تأكد أنها تابعا غا لفلوس.. 
ولا هو لي كيقول ليها امتى نجيو باش نخطبوو.. بلعاني ويضحك على ردة فعلها والطريقة لي كتتهرب بيها.. 

حتى وقع ما لم يكن في الحسبان..

عيط ليهاا.. وتسناها حتى جات عندوو.. حل ليها ودار طلع.. تبعاتو لطاج اللول.. جلس هو وجلسات هي مقابلة معاه فوق لي فوطوي.. حاط مرافقو على ركابيه.. مشابك يديه وعاقد حجبانو.. شوفاتو ماكتتفسرش وماكيبشروش بالخير.. 

جاها أنير من اللخر.. گالها بلي ماغيصلاح ليها ماغتصلاح ليه.. وأنو ماعندوو حتى مشكل.. كان مجرد اختبار ليها وصدقات ماطيرياليسط يعني صاحبة حاجتها.. وانو مايمكنش ليه يكمل حياتو معاها.. تهرسو بزاف ديال لحوايج لي عمرهم يقدوو يرجعوو.. أحسن حل يتفارقو خووت كيما تلاقاو النهار اللول خووت.. ماغيقلبش عليها ماشي برهووش ولكن يبقاو مجرد أصدقاء من بعيد.. كيلمح ليها باش ماتبقاش كل شوية خيطي بيطي عندوو وتشد شوية رجليها عندها.. 
وعمرها تتسنى منو شي حاجة خرى.. حدرها بحزم ماتلعبش بديلها معاه حيت مَاهْما دارت ماغتوصلش لشنو يقدر يدير هو فيها..

كمل كلامو وناض دار يديه فجيب سروال السرڤيط لي كان لابس.. ومشا وقف حدى الشرجم عاطيها بالظهر.. ماباغي يسمع منها حتى كلمة مزاال.. 

صفارت وزراقت گاع وراقيها تكشفو قداموو.. صدمها.. نعلات راسها وتسرعها حتى بردات.. تمنات كون رجع الوقت اللور وماتصرفاتش هكااك ولكن ندمها دابا ماعندوو فاش غينفعها.. بقات ساهية شحال فشعرو لمخربق لي مرة مرة يدوز عليه يديه يردو لور.. وتضاريس ضهروو لمطراسية كتبان من تحت التيشورط لي لابس.. 
بدات كتهبط فدمووع التماسيح وتتنخصص كتتمسكن.. يالله جات تدوي.. تنهد ماعاجبوش الحال.. وهي تجمع الوقفة.. كتتسناه يسمع حركتها ويدور عندها.. ساعة والوو لا حياة لمن تنادي بقا واقف مامسوقش ومادازتش عليه الدراما لي حاولات تدير.. شافت حتى عيات وهبطات مشات فحالها.. محافظة على جوج گرام دالكرامة لي بقات ليها..

خلاتو هو فبلاصتوو.. فاقد الأمل من أي حاجة.. واخا ماكيبغيهاش مي أملوو أنه يجي نهار ويعيش فيه حتى هو كانسان طبيعيي يولد وليداتو ويكبرهم هو لي خلاه يتغاضى على شحال من حاجة.. سد هاد الموضووع وتلاشى أملوو قداموو.. قرر يرجع لسابق عهدوو ويعيش كيما كااان متأقلم مع وضعوو حتى يدي مول الامانة أمانتوو.. 

🔚🔚🔚🔚🔚 نهاية لفلاش باااك..

ستقرو فدارهم الجديدة.. دار جداها لي ماكتجيش ليها من أصلوو.. فايتة واصلاها مراات معدودة وماگلسوش فيها.. دازو غير تسناو شوية على ما وجدوو جدها وجداها مني كانو باقين ساكنين فيها.. وشدو الطريق طلعو للدار لي فالسعيدية.. 
عمرها گلسات فيها ولا باتت.. المهم قادو امورهم.. بدلو شبغاو يبدلو باش يرتاحو فيها كتر.. ردو حوايجهم فلبلكارات وتخربيقهم حتى هو.. حيت حتى من داكشي لي الاساسي لي جابو حطوه الدراري فبلاصتو مني وصلوه.. 
منصف عندو ريسطو فكازا ديال الماكلة ديال الطاليان.. بيتزا.. لباسطا (لي باط والمعجنات يعني سباكيتي وماجاورها).. گاع مأكولاتهم زيادة على الدسير حتى هو.. 
هادشي لي كان خلى لخوه.. وفاش طلع لوجدة.. ومع الدار شوية كبيرة وفيها مگازة لتحت..عاود قادها على حساب الشكل لي باغي ولي غيسلكوو.. صلحو على الطريقة لي عاجباه.. جاب لماطرييل لكبير لي غيخصوو.. طبالي وكراسا وفطويات.. حتى ولى ريسطو(مطعم) صغيير.. 

🏠 فالداار لفوق.. شادة فيونا ليون خاشياه فالبينواار وسط لما وشامبوااانو.. واقفة على ركابيها كتمشط ليه بمشطة ديالوو وهو عاجبو لحال.. 

منصف(طالع مع الدروج): فدوى... فدوى.. 🗣
فيونا : اممم..
منصف: فينك؟
فيونا: هاني فالدوووش.. 
(طل على الكوزينة عاد وقف عليها) ودوك لماعن ماغيتغسلوش؟
فيونا(سدات عنيها بفقصة وحلاتهم): هاني غنمشي ليهم.. (دارت شافت فيه) كنتي باغي شي حاجة؟
منصف: طالع نفكرك.. عارفك غتخليهم منشورين تم..
فيونا: راني گلت ليك شري لاڤيصيل(ماكينة دلماعن) مابغيتيش 😒
منصف: مالنا مگرودين.. سيري تغسليهم لمك 😠
حيدات لبلاستيكة لي حابسة بيها لما.. هزات ليون شللات ليه بالرشاشة.. ولواتو بفوطة وداتو لبيتها.. مسحات ليه بيها هو اللول.. 
عااد نشفات ليه شعروو ولا زغبو المهم بسوشوار.. ردات ليه صمطتو ديال العنق.. وداتو معاها لكوزينة..
لقااتها مقلوبة سفلها على علاها.. وخا غابجوج بيهم.. هدا طبسيل هدا كاس.. ولاو جبل.. 
دارت يديها على جنابها كتشوف فيهم وشداها البكية.. ماعرفات منين تبدا.. داكشي كتير.. 
شافت حتى عيااات گفضاات يديها ومشاات كتطرف فيهم وتحيد الزبل وتنگر.. 

فيوونا (كتشوف فسما): يااااربي يموتوو لماعن 😰

صبرات حتى عياات.. وغسلات حتى برداات ولا هوما بغااو يحشموو تگولهم كيولدوو.. 
فكرة تديها ولخرى تجيبها.. بدات كتدور فعنيها والشيطان گالس حداها وكينعل فراسوو باش تزكا.. ووالوو...

كمشات فمها.. عاقدة حجبانها.. كان باقي حداها عرام دالطباسل اما حتى الكسان دوزاتهم هوما اللولين.. دارت كتشوف وتطل واش من موراها شي حد.. حلات لبلكار لي تحت لبوطاجي وجبدات الطارو دالزبل منوو.. هزات من دوك الطباسل نقصاتهم فيه.. وسربكات داكشي لي بقى دغيا.. 
شللات يديها ومسحاتها فسروالها.. لعگز الله يحفض لفوطة غاموراها.. 
تحنات عند داك السطل حشاكم تاني سدات لبلاستيكة لي كيديروها وسطوو عقداتها.. وجبدات وحدة خرى غشاتو بيها ورداتو بلاصتوو..
وهزات داك الزبل نزلاتوو فيدها لا يلقاه منصف.. 

خارجة بالسروال دالسورڤيط گري.. لما لي مسحات فيه باقي ما نشف.. وتقاشر بيضين قصار.. لفوق تيشورط نص كم صفر.. شعرها جامعاه لفوق بشكل مخربق..
خاشية لرجليها فصندالة منصف دلبلاستيك.. 
قطعات الشانطي لجيهة لخرى فين كاينة البركاسة لكبيرة.. 
لاحت فيه لميكة.. ماتتلاقى غير سفيان وأنير خارجين من الدار..
شافها سفيان تلف وحوالوو عنيه.. 

سفيان (كيشوف فيها ويدوي مع أنير): ابردي على التيتييز 😍 من أين لنا هدا؟

لاخر لمرة لي فاتت مع كان كافر ماداماجاب أصلا كان كيطل من لفوق ودغيا خنزرات ودورات وجهها.. مادا ماجاب فيها.. عاد وضاحت ليه الصورة.. 
بقى كيشوف فيها غير بالريط.. لعوينات مجبدين ملونين وشفارها طوال وكتاف (كتظل دير ليهم فزيت الخروع).. لفيم منفووخ.. ونويف على قدوو..
ومع قصيورة فيها ديك ميتروو وواحد وستين كتبان كي شي بنيوتة صغيورة.. كتتحرك بكل ثقة فالنفس.. 
سكاناااها بعينييه.. 

مع راجعة فحالها.. مع قربو جيهتها.. ردات لبال لداكشي جاي.. دورات وجهها جيهتهم بانو ليها بجوج.. ولكن لي شد انتباهها كتر أنير.. بفورمتوو والطولة.. وقفتوو الرجولية واللحية اللحية 😻 ركزو ليا على اللحية ههههه
فرمشة عين عاود طلع شاف فيها.. جات عينيها فعنيه.. دورات وجهها.. ومع الصندالة كبر منها تعكلات وكانت غطيح على وجهها وتجي مصلية كون ما يد سفيان لي تمدات ليها.. كان وصل حداها حيت أصلا لمسافة مابعيداش.. شدات فيه باش ردات توازنها..
دور أنير وجهو جنب.. حابس الضحكة.. 

فيونا (مرضاتش): شكراً أخويا الله يحفضك.. 😒

راااااح البرستيج في كلام فاحش 🤣
جمعات يديها عندها.. خنزرات فأنير.. زدحات فيهم وزادت فحالها.. هازا فيفها لسما.. وكون لقااااات الارض تتشق وتبلعها
دخلات عند منصف لرسطو.. لقاتو لداخل فالكوزينة كيقلد ماطريالوو مزال.. 
طلعات گلسات فوق البوطاجي ماحاملاش راسها..

شاف فيها منصف باستفسار..

منصف: أمالك؟ 
فيونا: ماليش 😾
منصف: شوفي وكان !!
فيووونا: كانت غطيحني صنداااالتك 😭
منصف: ههههه كنگوليك عطيها التيساع 🤣
فيونا: وماشي هو هدا المشكل 😭
منصف: وشنو؟
فيونا (كتتبغجن): شوهااااااااتني قدام داك راس الطبل لي كان كيغوت داك النهار 😭
منصف: شكون أنير؟
جمعات وطوات دغيا ودارت عندو..
فيونا: سميتو أنير؟ 😳
منصف (طلع حاجب وهبط لاخر): 😏
دغيا جمعات الوقفة وهبطات من تم..
فيونا: اححم.. أنا غنطلع نتفرج..
سلتات من قدامو دغيا قبل مايدوي.. 

من موور مامشاات.. انير دغيا جمع عنيه ودار عند سفيان يجاوبو لقاه وصلها بعنيه حتى الباب كيهندس فيها.. 

أنير (خنزر فيه): الرجوع الله 😒 عمرك شوفت لبنات.. 
سفيان: وشتا؟ راه التوت هدا التووت 😍 (شاف فيديه لي شدات فيها) رطيطبة.. 

طلعو لطموبيل.. 
قربها يدوو لنيفو شمها وقربها لنيف أنير.. حتى شمشم وعجباتو بعد وجهو..
أنير (مخنزر ودافع كبير): عاادي شتا زايد فيها.. ترجل معانا أدونكي 😠 (Donkey هي سمية لحمار لي مع شريك 🤣)
سفيان: اوا باز الى هادي ماعجباتكش راه ماكيجبكش لجب 😒 رواح شفت دخلات عند منصف.. كتجيه؟
أنير: مانيش عارف.. تكون مرتوو ولا..
سفيان: احااا.. لا موحال منضنش.. صغيرة عليه.. 
أنير: وشكون غادي تكون وهما غي روحهم (يعني غير بحدهم فالدار).. خوه عندو غير الدراري.. وهو ما راهش والد.. اوا؟
سفيان: لعجب 🙄

زادو فحالهم.. عفطة وحطة ماوقفو حتى وصلو لسوق مليلية.. 
دخلو كيدوروو لمگازات تماك.. شراو حوايج لي عجبوهم.. حطوهم فالكوفر دالطموبيل.. ومشاو يتقهوااو..

أما الجنية.. طلعات لبيتها فالطاج التاني.. وليون تابعها وكيميو مييو مني دخلات مع الباب..
حلات الشرجم كتهندس وكتتفكر منين كان كيطل نهار وصلوو..

قنات على الشرجم لي فطابق اللول ديال أنير.. بقات كتشووف ودخلات.. هزات البيسي ديالها.. وتلاحت فوق الناموسية كتتفرج..

وصلات ديك ستة ونص.. طلع منصف يفيقها..
لقا لبيسي مامحلول مامسدوود.. حداه فيونا منشورة.. مخشش فيها ليوون.. 
وقف كيدوز يدو على راسها.. 
منصف: فدوى.. نووضي ابنتي الله يرضي عليك..
وااا فدوى تگعدي خلاص يالله يالله تلبسي.. 😠

ووالو ميتة.. حلفاات هي لا حلات عينيها.. 

منصف: واااااا الزمر 😠
فيونا: اممممم 😴 

تقلبات لجيهة لخرى على جنبها.. قالبة معاها حتى ليوون.. لايحة يديها عليه معنقاه.. وتانية رجليها لايحاها حداها فحالا متكية على كرشها وهي باقا غير على جنبهااا.. 

منصف: ماغاتفيقييش؟ 😠
فيونا: (لا جوااب)
منصف: واااخا..

هبط بلا عگز عليه حتال الكوزينة.. خدا طراف ديال الثلج من لفريگوو دارهم فغراف كبير ديال الألمينيوووم ورجع لعندها.. 
حركها من رجليها.. ولاا حياة لمن تنادي..
مشا جيهت راسها.. حط الكاس فوق الطابل دونوي.. 
جر التيشورط لي لابسة من جيهة الكول..
هز بيديه الثلجات وخشاهم ليها تم.. خلاها ناضت قافزة كتشطح السامبا.. 
وقفات مضهشرة فوق الناموسية كتحيد التلجات من ظهرها..
فيوونا (حالا عينيها بزز): أححححح 😾 وعلاش هكا؟ 
منصف: ههههههه اوا دابا لبسي وتبعيني الناس كيتسناو فينا..
داار غادي خارج فحالووو.. 

فيونا: واااا صاحبي وافيقني بفمك لاش هاد اللعب غيضرب حسي البرد 😾
منصف (دار عندها): غتضرب جدك الجايحة.. طلقينا.. (شاف قداموو مكمل طريقو وكينگر) گالك يضربها البرد.. تضربي قبيلة وتجيك قليلة ابنتي 😒

هبطات كتحك فعينيها.. دخلات لدوش دغيا غسلات وجهها.. لبسات حوايجها وهبطات.. لقاتو لابس كيتسناها.. 
منصف (شاداه الضحكة): مشينا؟
فيونا: مشينا 😾
منصف: عاوديها لمك ربعة دالسوايع وانا نحزر حلفتي ماتفيقي شبغيتي نديرليك 😒
فيونا: هاااوضربيه.. 
منصف(عنقها وخرج هو وياها): ههههه 

طلعو لطموبيل.. 
فيونا(كتقاد فالسمطة): دابا لاش غاديين عندهم حنا 😒
منصف: سيد عارض عليا.. نكوليه لا؟ حشومة
فيونا: گوليه مابغاتش فدوى 😒
منصف: نتي هي الأميرة ديانا هههه 
فيونا (هبطات لمرايا وكتتعوج): وماالها حسن مني؟ هههه
منصف: سبحان من خلقك هههه

دازو لباتيسري خداوو بلاطو ديال الحلوة ديال اللوز وبواطة ديال الشكلاط.. 
وصلو لحدا دار صاحبوو.. سطاسونا.. وطلعوو.. دقوو ووقفو كيتسنااو..
مع الحلة ديال الباب تحل فم منصف..

حلات ليهم لباب واحد البنت تكون عندها ديك ستتة وعشرين عام.. حريفاتها حلويين.. شعرها ماطويل ماقصير.. وطبيبيزة شوية.. المهم كل حاجة عندها بلاصتها..
مدات ليه يديها.. سلم عليها وبقا شاد يديها وكيحقق فيها الشوفة حتى نغزاتو فيونا بمرفقها عاد وعا على راسو وطلق من البنت لي مافهمات فيه والو.. ومابغاتش تبيين..
سلمات على فيونا بلوجه..
تبعها خووها.. محمد رضا (صاحب منصف) سلمو عليهم ودخلوهم مرحبين ومكبرين بيهم.. 

محمد رضا: مرحبااا وألف ورحبا.. 😊 (عنقوو)
منصف: ترحب بيك الجنة اصاحبي
محمد رضا: وهاد الغيبة (اش هاد الغيبة)؟ كي راك داير؟ 
منصف: هااحنا غا مع الزمان ههه
محمد رضا: وليت كازاوي اخويا ونسيتنا هههه
منصف: واييه هههه مشات الوجدية..
محمد رضا: اوا درك تولي ههه دخلوو مرحبا..

مد لبلاطو لزينب.. شداتو من عندو حادرة راسها ومشات لكوزينة.. 
دخلو هوما ومحمد رضا لصالوون عاد تبعاتهم البنت.. 
بقا گالس منصف مجمع هو وصاحبو وعنيه يدورو يدورو ويمشيو ديريكة لزينب بلا هوااه.. وفيونا حداه گالسة حاضية الفيلم وجارية معاه العشرة..
حطوو تعشاو.. عاد حطات ليهم زينب أتاي مع ديك الحلوة وشدو عليها الجماعة.. 

منصف: فين لمدام ودراري مسافرين؟
محمد رضا: واه.. بغات حناهم تشوفهم وسيفطتهم.. دروك راك عارف مع العطلة بعدا يبدلو الجو..
منصف: مزيان واللهيلا احسن ما درتي..
محمد رضا: لا ياخويا خوات علينا الدار.. بقيت غير أنا وزينب كنرجع من الخدمة.. وحتى هي من لافاك عيانين كلها فين كيترمى شي مرات ماكنشوفوش حتى بعضياتنا..
منصف (دار شاف فزينب): على زينب مزال ماسالات قرايا؟
محمد رضا: هادا عامها التالي وتشد الدكتورا ان شاء الله..
منصف (دار عندو مبتاسم): تبارك الله.. كنعقل خليتها غير صغيورة فاش مشيت..
محمد رضا: واه الأيام فيساع كيفوتوو.. 

بقاو معاهم حتال اينا وقت عاد ناضو يرجعو فحالهم.. ودعوهم ومنصف ماحشم مارمش غمز محمد رضا.. وهبطو هو وفيونا..
طلعات حداه عاقداهم وضاربة الطم.. ماحاملاش راسها.. كتتسناه غايجبدها..
وهو حتى هو عارفها غتتفرگع..

منصف (حابس الضحكة بزز): فيوونا..
فيونا: ماسميتيييش فيووونا 😾 كنگوليك ماتبقاش تعيط ليا بهاد السمية.. 
منصف: على نتي شنو سميتك؟
فيونا (دورات وجهها لشرجم وكتجاوب بزز): فدوى 😒
منصف: وأنا راه عندي فالحالة المدنية فيونا.. 
فيونا: ماكيگولوش ليها الحالة المدنية فالطاليان 😒
منصف(كيصوگ ويدور يشوف فيها): وأش كيگولو ليها؟ هههه
فيونا: مهم سميتي فدوى.. وفيا نعاس عفاك سربي دغيا.. أصلا ليون غنلقاه عند الباب كيتسنى 😔
منصف: أجي نتصالحووو.. ههههه

شافت فيه ودورات وجهها.. 

منصف: واش بغيتي فاخر يامي نولي باير؟
فيووونا (دارت عندو): راك مطلق ماشي عازب باش تبوور 😒
منصف: ههههه ودابا بيني وبينك مازويناش؟
فيونا (عوجات فمها): بقات فالزين.. شويني فيها
منصف: اوا حتى لحداگة راها حادگة ههههه
فيونا: بزعطة 😒😒😒

حيدات السمطة.. 
وقفوو قدام باب الداار.. حلات باب الطموبيل.. هبطات.. ودخلات.. تعجبات من السقييييل لي كاين.. طلعات مع الدروج كتقلب.. وتعيط..

فيونا: ليووون.. 

ماكاينش حسو.. قلبات فالصالات.. مالقاتوش..
طلعات لبيتها أخر بلاصة بقات.. عند بالها غيكون فقد الامل وهو كيتسناها قدام لباب وطلع نعس.. لقات لبيت خاوي كيصفر.. مشات كتقلب ليكون مخبي فشي قنت.. والووو..
رجعات هبطات كتجري..

فيونا (مخلووعة): منصف.. مووووونصف..

كان حيد الشوميز لي كان لابس لفوق وحطها.. ويالله ناوي يگلس فالصالة دالطاج اللول.. 
سمع تعياطها.. خرج عندها قافز حتى هو من صوتها لي ماشي طبيعي..

منصف: مالك؟ 
فيووونا (باقا هابطة): ليوون.. (تقطعات فيها النفس.. كتلهت)
منصف: مالوو؟ شكاين؟!
فيوونا: مالقيتوش 😰
منصف: خلعتيني 😖 تلقايه غير مخشي فشي قنت..
فيونا: ماكاينش.. قلبت.. ونتا عارفو كيسمع الحس كيجي يجري 😰😰😰

مالقى باش يجاوبها.. طاح ليها الما فالركابي..
كملات الدروج.. نزلات لتحت گاع.. حلات لباب مضهشرة.. 
غتبدا تقلب وماعارفة حتى فين.. 
كيبان ليها خونا فلگرونة هازو وغادي بيه جيهة طموبيلتو..

مني خرجو.. بقى ليون كيدور تم من قنت لقنت حدا باب الدار.. غادي جاي حتى طاح فالباب لي فاصل بين الريسطو والدار لتحت.. دخل كينقز تم.. حتى وصل للباب لي كيخليه منصف غير مردود.. باش الكموند لي وصلاتو ديال المطريال يدفع الگارديان غا الباب ويخليهم يدخلوها..
بقى معافر ليون مع داك الباب كيلعب حتى تحلات وخرج..
جابالله لخرجة لي خرج مايتلقا غاأنير وسفيان راجعين من القهوة.. 
شد أنير البلاستيكات فيد وحدة ومشى ليه.. 
كان وصل لنص الشانطي.. هزوو.. دق فالدار وعاود مني ماجوبو حد.. داه معاه لداروو..

شحال وهو وسفيان گالسين وهو كيدور حداهم.. حتى ناض سفيان مشا فحالو وبقى غير هو وياه.. 
أنير متكي وهو گالس على لفوطووي ورجليه باقين فالأرض.. مرة مرة كيرمي عينو معاه ليهرس ليه شي حاجة ولا يحط ليه شي 💩 حشاكم فشي ركنة.. ماعارفوش بلي كلاها شحال من مرة على هاد القضية ومستحيل يقرب ليهم.. 
ماشي شي عصى نيت ولكن غير بشوية وهي كتدوي معاه وسبحان الله لقطوط كيفهموو وهكاك كيترباو 
(كندوي على لقطوط لي كتجيبوهم صغار ماشي مش تجيبوه كبير من الزنقة.. وماشي ضربوهم دبصح غير غوتو عليهم ونتوما كتقيسوهم راه مرة على مرة مايعاودوهاش)
على شحال هو يجي طلع حداه كيشوف فيه ويغوت ويدور بلاصتو.. 
قربو ليه أنير بيديه كيقلب مالو.. خاف تكون تجرح ولا قاستو شي لعبة.. فلاه.. لقاه صحة سلام.. بانتليه السمطة لي فعنقو مكتوب فيها ليوون.. وفيه نفس الريحة لي شم فيد سفيان.. 
قربو عندو كثر كيشم فيه ويعاود بلا ما يشعر..

ليوون (مابغاش يسكت): ميييو.. ميييو.. ميييو.. 

ناض على وعدو وسعدو دخلوو لطواليط مادار والوو..
حطليه شوية دلما وشوية دلحليب واالو.. لا هو خدا منهم ولا هو سكت.. 
شاف حتى عيا لبس عليه وهزو فيدوو وخرج..
يالله قرب لطموبيلتو باغي يحلها.. وقفو صوتها.. 

فيونا (طالعة ليها القردة لسطح): أفين غادي بيه الشريف؟

دار بشوية عليه وبكل تقة.. طلع فيها وهبط مخنزر..
أنير: كتهضري معايا أنا؟
فيونا: كيبانلك شي حد غيرنا هنا؟
رجع كي كان.. ليون باقي فيديه.. حل لباب.. 
فيونا: وااا السمحمد 😾 واقيلة معاك كندوي..
أنير (ببرودة): كي تتعلمي تهضري بشوية غادي نجاوبك..
فيونا (قربات عندو مخنزرة): شوية لباس؟ كتشرب دواك؟
(بغات تاخدو من يدو ليون هو يبعدو) عطيني مشي 😾
أنير: وملي هو مشك علاش مخلياه يترامى فالزناقي؟
فيونا: وأش حرگ شطاطتك؟

طلعات ليه لخرا.. حط ليون فطموبيل لداخل.. دار عنها عاقد حجبانو.. 
أنير: حتى دابا فاش نبغي أنا غنردو فين لقيتو وروحي دعيني لرباط 😠

صوت ليووون من لداخل كيقطع ليها قلبها وهو راسو كتر من لحجر.. وهي گالت ليه ماكتعرفش.. مامفاكاش.. تمووت وماتحني راسها.. 

فيوونا: غندعيك لله عطيني ولدي قبل ماندير يدي فودي ونجمع عليك الدرب كامل 😾 وخرانا مايجمعوه شراوط!!
أنير: أعلى مافخيلك ركبيه.. نشوفو جهدك فين يوصل..

ماحملاتووش.. جات تديرها ليه على قد فموو.. 
مع غتحل فمهاا.. ماعرفات منصف منين خرج ليها كي الجن لكحل.. 
منصف (قبل مايوصل عندهم): فينو لقيتيه؟
فيونا: جابك الله تشوف هاد السيد علاش كيقلب فهاد الليل..
[تسعود ونص يعني باقي لحال على التحول]
منصف (شاف فيها): هنينا 😠 (دار عند أنير) مالكم أولدي؟ 

شرح ليه أنير كيفاش حتى لقى ليون بلا مايعاود ليه التناگيرة لي تناگرو.. شكرو منصف وخداه من عندوو..
أنير (كهضر مع منصف): مانعرف مالو نص ساعة وهو يزگي.. (يغوت)
فيونا (خداتو من عند باها.. كتهضر بشوية): فيه الجووع.. كلاخ 😒
سمعها.. خنزر فيها واحتراما لمنصف ماجاوبهاش أما كون لقى منين يدوز ليها كون قج جدها..
متسوقاتش ليه.. دات ليون داخلة بيه لدار.. 

كمل هو هضرتو مع منصف
أنير: حطيت ليه لحليب مابغاهش.. 
منصف: راه مولفاه هاد الوقت كتعطيه ياكل.. مايشربش ليك لحليب..
أنير: مفشش.. 
منصف: وااييه.. 
أنير (بصوت شبه مسموع): لحاجة لي ماتشبه لمولاها حرام..
منصف: نعام؟ قلتي شي حاجة؟
أنير: اححم گولتليك تصبح على خير..
(ضربليه على كتفو) تصبح على خير اولدي.. شكرا..

سلم عليه.. وغيدوى فحالو.. تمات راجعة فيونا.. باقا هازا ليون فيديها..
منصف: مالك تاني؟
فيوناا (بتمسكين): سالا ليه الويسكاس (ماكلة دلمشاش)
منصف: يالله جينا مافيا لي يزيد لشي قنت تاني 😒
فيونا (مداتليه يديها ببرائة): عطيني غير السوارت.. 😋
منصف: اها باش تدخليها ليا فشي حيط 😒
فيونا: واش غندير ليه أنا دابا راه هكا غيبقى..

طل أنير على ساعتو لقى باقي لحال.. بقى فيه.. شاف حتى عيا حشم يخليه هكاك مادنبو والو مسكين.. قاطع منصيف لي كان يالله غيهضر..
أنير (ونيفو فالسما): أنا نديها.. ماعليش.. 
منصف: الله يرضي عليك.. غدير فيا خير.. 
أنير (حل الباب باش يطلع): هانية.. 
دار منصف عند فيونا..
منصف: سيري معاه ابنتي خودي شبغيتي ورجعي..

لاخر مع گلس مع سمع ديك بنتي.. دار شاف فيهم ما فاهم والو.. 
لقى منصيف مد ليها لفلوس.. شداتهم من عندو وباست ليه يديه.. 
فيونا: يحفضك الوليد.. 
منصف: يولدك من عنيك البعلوكة.. أري هداك (ليون).. 
فيونا: غاخليه أبابا غنديه معايا..
منصف (تحدر عند أنير): رد معاها لبال الله يرضي عليك.. 
أنير: ماتخافش راها گبالتي..
كانت هي دارت للباب لخرى حلاتها وطلعات.. 

تقاد منصف فالوقفة.. ديمارا أنير وتحرك.. 
أنير (بصوتو الغليض وبلا مايدور عندها): السمطة 😠
فيونا (شاد ليون قدامها): ضربني 😒
أنير: راكي ديال لعصا..
فيونا: 😒 
خنزرات فيه تخنزيرة ديال لقتيلة..جرات السمطة قاداتها.. وعاودات دارت عند ليون..

فيونا (كتدوي معاه وتبوس): مامي حبيبة.. زاك الزووع.. بغيتي تاكل أمامي.. خليتك بلاش.. خيبى أنا يااك..

أنير (كيشوف فيها بنص عين): الله يستر..
فيونا: علعمى والزحاف 😾

أنير (حرك راسو يمين وشمال): بزة.. (بعلوكة)
فيونا (عنقات ليون): كيتك.. شارف وداير فيا راسك ههه
أنير: مشيت غالط.. 
فيونا:😒

مشا ديريكت لكارفوور.. وقف فالباركينگ لتحت.. نزل وتبعاتو.. 
أنير: تخليه فلوطو؟
زيرات فيونا على ليون لي شادة فيديها وخزرات فيه.. 
أنير (دور وجهو وتم غادي حابس الضحة من حركاتها الطفولية): رواحي رواحي.. 

تبعاتو حتى هي كي الجنية.. حالفة حتى تسطيه.. 
طلعو لفوق.. جر معاه الشاريوو..

فيونا: وهدا لاش؟ 
أنير: ياكما يسحابلك جاي غير على قبلك أصاحبة السمو.. 
فيونا: شويني فيك.. مالي طلبتك 😒
أنير: دزتي على وجه منصف.. (زادت فيونا قداموو كتتعيوج)
أنير: جيبيه لشاريو حتى تلگاي شبغيتي..
رجعات حطاتو قداموو.. ومشات..
أنير(بلعاني باغي يعرف سميتها غا بالفن): ماتبعديييش أ..
فيوونا (تلفتات): فدوووى..

دارت گدامها ومشات.. 

تبسم هو ابتسامة جانبية وبقى كيدور ويهز فشنو خاصو ومرة مرة يشوف فالساعة.. أما هي قصدات ديريكت لبلاصة لي فيه ماكلة لمشاش.. وقفات قدامها وبدات كتهز داكشي لي موالفة تدي ليه.. ودازت كتقلب فبلاصتيكات جداد أول مرة تلقاهم..
غارقة فقراية الكتبة دلومبالاج.. سمعات صوت جاي من موراها..

...: أبردي على الفورما.. ناكلك 😋
فيونا: تاكل جنابك مسينا على الله.. (دارت مقندشة)
...: ابردي على لعوينات.. تلفتلي القبلة 🤤
فيونا: جمع ريوگك أزنيبر (يعني عنيبة من درجة ضابط)
...: وشتا راك تگولي.. هضري بشوية باش نفّهمَك..
فيونا: لهلا يفهم أصل بوك وبدل الساعة بخرى قبل مانوليو فشي طاب شي تحرگ.. عوج..
...: اححح على التيتيز وكي راه يتجبد هههه.. بصح مانيش محرك حتى ندي النمرة..

طالعات وهبطات فيه باحتقار.. ودارت مخسرة سيفتها عند داكشي لي كانت كتقلب فيه.. 
من سعدوو ووعدو.. أنير سالا وجا يقلب عليها.. 
لقا داك خاينة باقي واقف عليها كيدوي ويعبر فيها.. وفحالا باغي يمد يديه.. وقف عليه وشدلو يدو.. كيشوف فيه شوفة دلقتيلة.. 

أنير: شوية لباس؟
سمعات فيونا صوتو وهي تتلفت عندهم..
...: الحمد لله.. مالك اخويا واش جابك هنا؟
أنير: نتا لي واش جابك ليها؟
..: أنا وياها ونتا مالك؟
أنير: أنا غادي نوريك مالي..
جمع يدو حتى جمعها وعطاها ليه لوجه.. مع يدو تقيلة جابو فالأرض..
طارت فيونا شداتو ليمشي يزيدو وحدة خرى يصدقو واحد فالسبيطار واحد فالكوميسارية.. 
حابساه بيديها وهو داير منها تلاتة.. وهكااك تحكم فراسو ليصدق دافعها شي دفعة خايبة..
أنير: طلگيني.. 😡
فيونا: تا فين غنطلقك تسطيتي باغي تقتلوو؟ صافي راك عطيتيه علاش كيدوور..

يتبع ...

أحدث القصص
قصة يامنة من تأليف Sana mina
قصة يامنة Sana mina
قصة بريق عينيك من تأليف سكينة أيت الكبير
قصة بريق عينيك سكينة أيت الكبير