دارت كتقلب فداكشي لي مجوود وتتشهى حتى طاحت على شنو بغات..
دارت تقلب على باهاا لقاتوو غارق مع شي كليان وماتقدرش تبرزطوو.. شداات قنووفتها التحتانية بجوج صباعها من الجنااب وگلسات تلعب بيها بتوتر.. مكالية بيديها على البطااجي.. حتى سمعاات عصافيير بطنها كيجعوقوة.. ضوراات عينيها وسط راسها وطلقاتها مضطرة..
فيوونا (عاقدة حجبانها): هادشي ديال شي حد؟
زينب (مع سمعاتها دارت كتتأكد واش فعلا الهضرة موجهة ليها عاد جاوبااتها): لا ما ديال حد.. خوديه الى خاطرك فيه.. (بغيتيه)
فيوونا (دارت قداامها تهز منوو وعطاتها بالضهر كتنگر يصوت ناقص): على أساس غنتشاور معاك 😒 عندلمي أنا 😖
هزاات تلطبسيل لي عمراات وحتى كانت غتگلس تماا وبانو ليها دايزين من حدى بعضياتهم كيدويو ويضحكو بيناتهم غا بريط.. دارت بنااقص گااع.. هزاات الزمر وطلعاات تكمشاات فالصالة لفوقانية لي فطااج لي فييه بيتها باش حتى فاش يطلعوو ماتشوفهمش..
طالعة وكتعيط على ليوون حتى خرج عندها وتبعها..
خدماات التلفاازة.. كونكطااتها مع الويفي.. وهبطاات على داك الطبسيل.. تاكل من هنا وتخشي لليون ففمو لي ماادو ليها وكيتسنى نووبتو من هنا.. حتى خلاوه كيبري.. رجعاات لوور وجراتو عندها تكااتو فووق صدرها وبقاات كدوز يدييها وسط شعر بحناان وكتتفرج.. ومرة مرة كتنزل رااسها تشووف فيه وتبووسو.. ولاات كتتوحشوو.. مؤخرا ومع اكتسااح أنير وسفياان لحياتها مابقااتش كتشوفو بزااف.. غا من ليل لليل والصباح فاش كتفيق فحال ياماات القراياا..
ساهيا فلي قداامها.. رجعاات ليها السينتة ديال شي أحدااث وهي تقفز من بلااصتها حاالة عينييها على مصرعهاااااا 😳
كل ما كيدوور فبالها هي هضرتوو.. حرف بحرف وكلمة بكلمة.. ماردااش لباال فاش كانت معااه حيث كانت كتبكي.. مي داباا بداات كتوضااح ليها الصورة شوية بشوية.. فحال الضباابة لي كتبدى تتبخر من شي بلاصة وتدووب حتى كتغبر سامحة ليك تشوف شنو وراهاا..
تفكراات نهار غضبها على منصف وخرووجها بالليل.. نهاار كانت گالسة فالجردة مابيها ماعليها حتى تسلطات عليها ديك خليقة الله لي ماعرفات معامن تصنفهاا..
داكشي لي گال أنير جوااب فحد دااتو على داشي لي عاوداات دااك النهاار فاش كانت كتخوي فقلبها.. جاوبها على حاجة بحاجة.. سربكهم ليها وتابعهم.. عااد ردات البااال وعااد فهماات..
يعني شنوو؟ يعني أن فعلا شكووكها كيزيييدو يقوااو وأنو دااك الضخم الأخضر يقدر يكوون فعلا هو أنير.. لكن كي داار ليها؟ كيفااااش حتى ولى هكااك أويلي؟ شدااكشي لي شاافت؟ وعلاش؟ ووقتاش وماعرت اش؟ تخلطوو عليها لعراارم وبزااف ديااال علامااات الاستفهااام ترسمو فوق راسها.. مافهماات والوو..
وبزااف ديال لحويجاات باقي ماوضحووش ولي مايمكن حتى حد ويضحهم ليها غييرو.. خااصها غير تسمح ليها لفرصة..
قاطع شروودها قدووم منصف هااز فيدوو بواطة صغيرة..
منصف (مبتاسم وبصووت مسمووع): بايبي..
فيوونا (تلفتاات مضهشرة): أاا.. 😯
منصف: تي ماالك؟
فيوونا (كنفاات بأنها تحرك راسها بمعنى واالو)
منصف (ماعجبووش حالها): جاوبي بعدا غا على داك المشقوف لي غيخرج ليه عقلوو..
فيووونا (زاد عصبها): اوا حتى تباان ليا يا لمصنكع ماشي داباا الهضرة 😾 (قطعاات عليه قبل ما يزييد يجااوبها.. خلاتو بلاكة ودارت عند منصف لي گلس حدااها كتشووف فيدييه) شدااكشي؟
منصف (مد ليها لبواطة): لادرووگ هههه
فيوونا (شدااتو من عندوو دغيا طلاات على اينا ماركة دالشكلاط جاب ليها وسدااتو حالة يديها اتجاهوو): هههه 😻😇
مشا وخلاهاا هي بوطتها حلااتها غا بيد وحدة شادة ليوون بلخرى وبداات تحل وتخشي فوجهها مستمتعة باللحظة.. حتى سالاات وهزاات ولدها ومشاات تخشاات هي ويااه فبلاصتهم يكملوو السهرة حتى دااهم النعاااس...
توالااات الدقاايق والساعااات.. من سوااد الليل القااتم لي معتم لمكاان بداات كتبررز أولى علاماات طلووع شميسة نهاار جدييد.. سبقها ضوها عااد بداات تبان شوية بشوية حتى برزاات وسط السما مالياا بحرااارتها كل مكاان..
وعلى غيير صباحاات الصيف العاادية.. برزطات فيوونا الريحة لي واصلة حتال القلب الداار.. حركاات نيفها وعاودااات.. تگلباات شحاال من مرة وهكااك بقاات مديروونجية وممشكلة فنعااسها حتى داارت بنااقص وناضت.. حتى صحصحاات عااد استوعباات ريحة اش كانت كتشم.. مشاات كتجري طلاات من الشرجم كتقلب على منين جااية.. دوراات عينييها حتى استقروو على داار سفياان وبداات كتفركل بالضحك..
(طلع فوقوو عااد گلسات هي حدااه) غنعيدوو فالسعيدية؟
منصف: لا غينزلوو هوما لهنا..
فيوونا: اوكااااي..
گلساات حتى فطراات على خاطرها عااد ناضت.. جمعاات هي وزينب الطبلة مخليين منصف يدخل يوجد أش خااصو باش يبدا فخدمتوو..
من بعد ماوصلات داكشي لي قدات عليه وخوااو فين گالسين ردووه كي كاان.. هزاات ليوون معاهاا وخرجاات جارة تاني صندالت منصف ديال لميكة فرجليها.. بالسروال لكحل لي والتيشورط لي كانت لابسة..
جامعة شعرها مخربق لفووق باش ما يصهدهااش..
وقفاات عند البااب.. كتطل.. لقاات لگرااج ددارهم دسوفياان مطرع.. محبووس بحديداات كباار شوية وواقفيين عليهم وليداات الجيراان كيطلوو عليهم وفرحاانين.. يالله زاتدت خطوة لعندهم تشوف فحال گااااع الناس فاش يالله كبانو ليهم علاماات العيد والگراجاات وكيحسوو بداك الحمااس والاندفااع وهي تتلفت لجيهة لخرة.. شافت ودارت قداامها وعاوداات تلفتاات فنفس الدقيقة..
كان سفياان فالجيهة لخرى مصايب خيمة صغيرة بلخشب وماعرت شنو داك لعجب ودااير فيها فندق الخروف 🐑.. وداير حدااه براسوول كبير وصنادق مقادهم فيهم نيت فين گالس قريب لطروطواار..
دارت الدوميتووور ومشاات ديريكت عندوو كتضحك عليه من على بعد ستة ميطروو باقا حتى ماوصلات عندوو..
أنير: تلگاني حداك كون كنت باقي؟ (گلس فوق واحد من الصنادق لي مقادهم المسخوط فحال الفطوياات وشاف ففيونا) نوضي نتي من ابرودة.. (مد ليها ساروت ديال الدار) روحي جيبي كرسي من لداخل..
(عاود دور وجهوو عند سفيان) كتشوف فيها گاعدة فالأرض ومخليها 😒..
سفيان: خلينا نّعقلو عالنعمة 🙄
أنير: زريعة القنب 😒
سفياان (كيدوو وماحابسش الماكلة): طريكة لافواار 😒 غير نتا لي راك تبغي 😠
يالله غيجاوبوو أنير تمات راجعة فيوونا جارة الكرسي.. حطااتو.. مدات ليه السوارت ورجعاات گلساات.. ما طولاات گلستهم تما غا شي نص ساعة هكااك وداارت فيووناا عند أنير لقااتو كيشووف فيها..
هبط هو عينييه لعندها.. كيشووف فيها كي لمينيكة قداامو بدااك السريوييل والتقيشرات من موور ما لاحت الصندالة فاش طلعوو وبقاات حفيانة فوق لباركي لي داير فالأرض.. ومع البرد ديال الثلاجة ضارب فيهم.. كيرد معااه ريحتها لعندوو.. بلا ماندكروو حركاتها..
كان قربها كفيل بأنو يخربقوو ويخلييه ساهي فيها وفتركيبتها العجيبة..
فيوونا: p🍏ms.. (طلقااتها ودوراات وجهها عندو)
أنير: همم؟ (عاد وصلاتو الهضرة) اووك..
مد يدييه هز شنو بغاات وجووج كوكات خرين مدهم ليها فيدييها ورجعوو عند سفياان.. لقااه مزال كيقلب وسط لي كلي USB بكثر ماجامعين ديال لي جووه تماا حتى لقى فاللخر لي بغى وبرونشااه..
حطوو من يدهم اش كانوو هازيين.. هبط سفياان الريدوو شوية على الشعى لي دااخل.. وگلس فبلاصتوو دديمة فاش كيبغي يلعب..
شد الأرض أما فيووناا قلباات مخدة كبيرة حداها جنب وگلساات مكالية بيديها عليها.. جا حداها أنير لي مشى جااب الطيليكومووند دلكليمة وجا تلااح حدااها مقابلين مع لبلازماا..
لااح ليها المانيطة باش غتلعب.. خدم الزمر وداار عندهاا..
سفيان: هانتي شوفي.. (كيشير ليها بيديه للكل بطونة) هادي تزيدي بيها وترّجعي.. وهادي تحركي بيها كل واحد وهادي..
فيوونا (كتحرك ليه فراسها باه)
سفياان: مهم صافي.. صعيب غير لبدية من بعد راك تولفي.. (داار كيدوز فلفراقي) بيمن تبغي تلّعبي؟
فيوونا (بالزربة): مادريد 😻
سفيان (دار عندها بالزربة كيشوف فيهم شوفة اليَع مشمأز منهم يجووج): سلعة وحدة الله يحضر السلامة 😒
فيوونا (شافت فأنير كتضحك وعاوداات دارت عند سفياان): هي برصااوي ههههه مقصح من جيهتنا ياخويا 😹
سفيان (بكل ثقة فالنفس): لعبي نشوفو شكون راه يتقسح.. هههه
ضحكاات ضحكة جانبية.. ريگلااه وورك على بلااي..
بدااو كيلعبو.. هاهي عندي هاهي عندك.. وماحد الدقاايق كيدووزو وهو كيتصدم حيت فعلا لعبها ماشي ديال شي وحدة عمرها شافتوو وخاا فنفس الوقت ماشي طياار ولكن مهم مسلكة رااسها ماشي زرگة..
موقفة ظهرها من على لمخااد ومتحكمة فرااسها وفاللعابة لي كتحرك.. وأنير متكي فگلستوو راجع اللور راسم على فموو ابتسامة وكيتفرج..
سفياان (دار شاف فيها بصدمة وكيتأكد واش هي نيت لي كتلعب): 😳
فيوونا (بطنز.. مركزة وبلاما تتلفت عندو): لعب لعب الى باغي تلعب.. 😹
يالله عاود شاف قداامو وهي تتهز من بلاصتها.. استغلاات الفرصة والوقت لي هو باقي كيستوعب فيه أنها قولباتوو وماركااات..
تگعد شوية فالگلسة من بعد ماكاان وااخد راحتوو مستهون ومستخفف بيها.. صبر حتى كمل التعاويد ديال البيت لي ماركاتت وگفض ليها.. هي تماركي واحد وهو جووج وهكااك ومقااتلة معااه ولاااعبة.. حتى حساات بيد أنير لي كانت فووق لمخااد قرباات جيهة جنببها وجراتها بشوية لعندوو لوور.. حتى ولى معنقها.. مااد يدوو بجووج شد بيهم المانيطة من فووق يديها.. ضاام كفووفها وصبيعااتها وسط يدييه..
دهشرها وللحظة طوالو الثوااني على مولفيين وولاو كيستغرقوو كثر المعتااد.. دورات وجهها شوية لجيهتو مافاهمة واالوو.. حتى نطق خافي بتسامتوو لي كتوحي برضاه على الوضعية..
أنير (بهمس): شوفي گبالتك باش مايردش لبال..
فيوونا (سرطاات لسانها): هههمم..
بزز باش صدراات صوت رد عليه ودورات وجهها.. أصلا الوضع مامستحملش تزييد كثر.. براكة غا بحة صوتوو وسخونية نفسوو لي ضربوو فعنقها فاش دوا وفشلووها..
تخلطاات عليها السخفة والصهدة ودقات قلبها لي تسارعوو.. كون ماكاان صوت لعجب لي كلعبوو فيه كون راه تسمع صووت دقااتو فحال دااك لفريخ لي ف طوم وجيري فاش كيحصل 😹
بقى مقصر معااه.. وفنفس الوقت كيضرب وكيزگل باش مايشكش.. مرة مرة يطلق ليه اللعب ويركز مع فيوونا مستغل الوضع لصالحوو كااعاادة..
بشوية بشوية حتى تعاادل معااه.. ومع سفياان تجمع عليه الحمااس والتركييز وماراضييش تربحوو ماتفنفنش ومادورش وجهوو لا تغفلوو.. حتى ولات فايتااه بجووج گواال تلفت عندهم عاقد حجبانوو..
يالله غينطق ومع هي متكية باللور جيهة أنير وهو گالس فالأرض والمخدة لي حدااهم وااقفة كاانت مدرگاها علييه..
حااطة مرفقها على الشرجم لي حداها المحللول على اخروو ومكاالية بيدها وجهها.. كتتبرد ومستمتعة بالموسيقى لمطلووقة.. بضوااو لمدينة فالليل ولبلايص لي كيدوزو منهم.. حتى فيقهاا صووتوو..
داازت لدووش.. غسلاات وجهها وعنقها.. عاد مشاات لبيتها.. لقات ليوون گالس فووق الناموسية على يديه ورجليه.. حل عينيه لي كان سااد على اثر صووتها..
بدلاات داكشي لي لابسة بشورط وديباردوور باش ترتااح كثر وتخشاات حدااه..
ساهية.. كتفكر اش غدير فحريرتها كي غتعرف.. خاصها شي طريقة تواجهو بيها.. ولكن أكييد ماشي بالسؤاال حيث كيما دريبلاها قبل وقدر يتسل منها بأجوبة منطقية متهرب غيدير نفس الحااجة حتى داباا.. يعني بقى ليها حل وااحد هو أنها تحصلوو متلبس وعلى ما لاحظات فالسعيدية فاش كانوو فلبحر وتبعاتو مني نااض كانت قرباات الطنااش دلييل يعني احتماال كبير داك الوقت ليه علاقة بالأمر.. شكوون عرف..
صبح الصباااح.. وتسللات أشعة الشمس قصراا من شقاات الريدواات الهابطيين متخطية گااع الحدوود مبرهنة وفارضة وجوودها رغم كل الحوااجز والمكرهاات..
بداا كيحل عينييه لي كتتلصق بصعووبة.. على لمساات أنثوية فوجهوو.. نفس اليديين الناعميين لي كانو كيتفحصوو وجهوو نهار كانت فيه السخاانة.. نفس الحناان والرقة.. نفس الريحة.. لا وكثر نفس الاحساس لي كينتاابو فاش كتكوون حدااه كيحس بييه داباا..
صبااعها كيدوزوو على لحيتوو.. كتتفحص وجهوو برقة واهتماام.. شد يدييها وبااس كفها بدفىء ورغم محاولااتو الشدييدة أنو يحل عينييه استصعب علييه لشدة تعبوو والنعااس لي فيه.. اضطر يجرها عندوو.. ضامها وكيبعد خصلاات شعرها الطويل من على وجهها وعنقهاا..
أنير (رد راسو لور من بعد ماكان مگعدو باش يشوف فيها): هههه راتي نموت على مك.. ون..
خسر وجهوو مع الشعا لي زااد حدتوو وبغض الصووت الصاادر..
يوسف (بفقصة): نووض أصاحبي وخا تكون ميت.. عيت نلغا ليك فالتيليفوون..
أنير (حط يدوو على وجهوو حاقد): صبحنا عالله منين خْرْجتْ؟
سفيان (حرك السواارت لي فيديه)
أنير (شير عليه بمخدة): ديل مك 😡
يوسف: نوض البعر تطريني 😠
أنير (نايض بعين محلولة وعين مسدوودة): تموتو الى ما نگرتووش 😪
دخل لدووش يدوش وخوااو ليه الساحة هابطيين يتسناوه برى..
لوقييتة لي كانت نايضة لحريگة غادة جااية كتاكل فصبااع يدييه وتعصر فرااسها باش تلقى شي حل ولا شي طريقة ولا شي سبة لي تخلييها تمشي عندوو فنصاصاات ليل وتطول بلا احرااج..
تدي الخطواات وتجييبهم.. حولاات ليوون لي عياا وهو تابعها حتى شد الأرض وولى كيحرك معاهاا غا راسوو معاها..
مرة تخشي يدها فشعرها تشد بيها راسها لي غيتفرگع ومرة تتكواانسة على شحاال عاد تحرك راسها نااطقة بلا لااا كي الحمقة عااد ترجع لأش كاانت كديير..
حاارت بيها لياام ودااخت بيها الحلووفة.. نتاصف النهاار وهي على دااك الحاال.. على شحاال عااد نعلاات الشيطاان بدلات دووك جووج شريويطاات لي كانت حاطة عليها وهبطاات لتحت..
دااز نهاارها هكااك.. كتفكر وتعااود.. گااع أفكاارها الشيطاانية تحدوو وماقدرووش ينفعوها.. وحتى حاجة من لي طاح فبالها مامنطقي.. ماجااتش تمشي عندو فنص الليل أصلا شكون ضمن ليها غيحل يقدر يخصر عليها أنو كان ناعس وماسمعهاش كتدق ولا كتصوني.. ومايمكن ليها حتى تغوت باش توصل ليه لاتصدق مفيقة عباد الله ومع المغاربة خاصهم غا علاش يدويو غتولي فلاش غادا عندوو فنص ليل وأش كيديرو والقيل والقاال وأكيد حتى قمقووم ماغينويها زوينة..
وشنوو؟ يسهرو على شي حاجة؟ رجعاات بداكرتها شوية لوور.. للأياام لي كانوو كيتعطلوو فجمعتهم.. عمرهم طوولو لديك الدرجة ديمة حدهم لحدااش لحدااش ونص وكيفرتكوو الجقلة.. بفف يعني حتى هادي ماخدامااش.. زااد اصراارها والمشكل لكبر عندها فرصة وحدة الى ضيعاتها عمرها تعرف وخا يكون فعلا لي فبالها صحيح غيولي ياخد حدرو واحتياطو كثر يعني لامجاال للخطأ..
بكثرة انشغاالها بالموضووع ماسولات عليهم ماصداات جيهتهم النهاار كامل وهي مقنزعة فووق كرسي.. يدها تحت حنكها متكية على الكونطواار.. مامدياهاا لا فلي داخل ولا لي خارج.. وحتى هوما تشنطنوو بشحاال من حاجة خرجاات ليهم فالطرييق وبقااو من هادي لهادي حتال اخر الليل..
لاحظاات تركيزوو معاها.. ومابغاتش تعيق.. زاادت لقداام عند الطبلة.. كانت زينوبة واقفة كتقطع.. ومع شافتها تقاداات مداات ليها يدييها تعطيها طبسيلها باش تسبقها هي اللولة..
هزاات فيها عينييها لقاتها هكااك وزادت حركات ليها راسها باش تعطيه ليها.. استاجباات لطلبها بكل هدووء شي لي خلى زينب يعجبها الحال.. حطاات ليها طرف كبير وحطاات لمنصف عاد ليها وگلساات..
بدااو ماكلتهم فصمت.. كل واحد فيهم و اش شاغلوو.. وكل واحد فيهم محتافظ بيه لنفسوو وخداام كيحرق دماغوو عليه فصمت..
كلشي كاان فرعااية الله وحفضه.. حتى سالى لليوون لحووت السوطي لي قداامو وتمشى فووق الطبيلة لي هو عليها لجيهة زينب.. تمخشش فيها وكيتحك علييها باش تزيدوو مزاال..
غا هزاات فيوونا عينييها من التليفوون لي كل شوية كتطل فيه على السااعة تعقدوو حجباانها من حفااوة المنظر ممصدقااش اش كاتشووف.. بانوو ملامح الغضب على وجهها.. وفجأة بدون سابق انذار طااار الهدووء وحلت محلوو العااصفة..
ناضت من بلاصتها بنفاخة كتزطم ونطرااتو من تحت يديها لي كانت كدوز علييه.. خلاتها مصدوومة..
فيوونا (بحدة): بقاليك غا هو حتى هو تاخديه 😾
منصف (تعصب من ردة الفعل لي صدرات منها): فيونا 😠
فيونا: الزمر أنا ماشي فيوونا.. بزااف هادشي..
منصف (ناض وقف): جمعي راسك الحمارة 😡
فيونا (بضحكة استهزااء): 😯 وليت حمارة يااك.. واخاا.. ها لحمارة غتخلي ليكم الجو.. (يالله دارت غاادية وهي توقف طالقة ليوون ينزل من بين يدييها) ههه حتى هدا نتا لي جبتيه ليها.. ها هو بصحتكم 💔
تدردباات فدووك الدرووج بسروال دياال التووب فحال لي كتلبس ديما مجموعيين من لتحت سبوورتيڤ وتقيشرااتها بالحق هاد المرة لابسة كلاكيطتها هي.. هبطاات حتى وصلات للباب وحلاتوو بنتارة وخرجاات.. تبعها منصف دغياا باقي الحد تلان مافاهمش اش طرى.. كانت صحة سلاام غا حتى تفرگعاات..
مع الخرجة ويالله غتبدا دير فالدرااما المسمووعة.. من الزهر بانت ليها طمووبلت أنير يالله وقفاات وغينزلو منها.. ومع البعلووكة طايح عليها الضيم وأصلا موضووع باها حسااس شوية دارت راسها ماشافتووش ودارت عند منصف لي كيعيط علييها.. دغياا طيحاات دمووعها كتبكي..
منصف: وااش ضربك الله؟ فين غادا فهاد السااعة؟
فيوونا (دمووعها خيط من السما): أول طاكسي غيوصلني عند باباا.. رجع عند مرتك لي ضربااتك النفس عليها.. أنا أصلا غا الزيدة غا مابغيتش نفهم راسي.. حماارة كيما گلتي.. 😭
منصف: وا الله يهدييك ابنتي ماتزيدييش تصعري أصل مي فحال هكاا..
شاف فأنير لي وقف موراهاا وكيسولوو بالاشارة.. يالله غيجابوو رداات لباال لأش دااير بيها وداارت دايزة من حداه بلا ماتهز فيه راسها.. مع غادية مع شدها من دراعها..
شااف فمنصف وغمزوو زعماا هاهي معاياا وداار جرها قداام نظراات منصف لي تغلب على أمروو وكون كان شي شيب غير هاد لبيض كون راه نوضااتو ليه حتى هو.. وسفياان لي ما ان تضاارب أنير مع البااب حلوو تبعهم لداار لدااخل..
كلشي ممشكل الا الجنية لي حبساات ضحكتها الشرييرة من تحت لخنااين غاا بزز..
أكييد مَانِجحِت خِطِتْهَا وكان هدا كامل غافيلم وستغلال لفرصة لي جاات حتال بين يدييها..
أكيد غارت على ليوون حتى هو وهداا بدافع حب التملك لي هو بالاساس غريزة فينا لكن كانت ردت فعلها مبالغة ولا نگولوو مقصودة حسن حيت كان بامكانها وكانت غتكون حركة طبيعية منها أنها تهزوو وتطلع فحاالها دايرة بناقص من الجمعة معاهم فحال لي ولفاات دير ولكن حراام تضيع فرصة جاتها فوق طبق من ذهب.. دغيا طاحت فبالها ونفدااتها على عجل.. عارفة ردة فعل منصف كي غتكوون اتجااه قلة ادبها قدامو مع لي كبر منها كيما عارفة أنها فوضع سامح ليها تقلب الموقف لصاحها واخدة دوور الضحية.. وهدشي كامل على قبل هااد الخطواات لي كتخطيهم اتجااه داارو فهااد السااعة..
طلع منصف فحاالو مكشكش.. مولف كيقدر يسيطر عليها رغم قباحتها ودصارتها كيقدر يهدي نوباات جنوونها وخا تكوون كيما كانت لكن سرعة وقووع هادشي خلاتو يفوور ويغلي مافهم فلخرى واااالو.. ياختي وكانو گالسيين هههه
ماقدراات لاتسولوو ولا تدوي معااه وهو فدييك الحالة.. اكتفت بأنها تبقى ترمش فعينيها وتجمع ديك الطبلة فسكاات..
حتى برد شوية عاد نااض لكوزينة حدااها كيصايب فقهوة تبرد عليه صدااع راسوو..
وقفاات عاطية بضهرها لبوطااجي كتشووف فيه وفحركاتوو لي كتدل على مدى تعبوو.. تسنااتو حتى وقف كيتسنا المرض يتعصر عاد قرباات عندوو..
هز فيها راسوو فاش قرباات منوو..
تبسماات فوجوو وحطاات يدها على حنكوو بحناان..
زينب (بصدق): عادي والله.. حتى أنا دزت من عمرها وحتى أنا كنت قبح من هكدا.. (سكتات شوية وزادت ضاحكة) كون كونت بلاصتها كنت ندير كثر ههه.. مانيش نتقلق منها.. (باس ليها يدييها برضى وزادت) فين راها المجنونة؟
منصف (قدرات تضحكوو): والله ماكذبتي.. داها أنير لعندوو..
ولأول مرة تزعم وتجي المبادرة من عندها.. تعلاات على صبااع رجلييها حتى وصلات لمستوااه ويدييها باقة على وجهوو بشوية بشوية حتى تخلطوو أنفاسهم وباستوو فشفاايفوو.. مخليااه مرخي معاهاا.. حاسة بيه عاطيها نفسوو.. مستسلم ليها ومخلي ليها الحرية دير فيه لي بغاات وهو جارها عندوو ومتجاوب معااها..
حتى باستوو على خاطرهاا وبعداات.. ضمها لعندوو.. محسسها أنها فعلا قدرات تهديه بقربها.. عنقها بيد واليد لخرى خشاهاا فجيبوو جبد بيها التليفووه ودوز نمرة أنيير..
أنير (بتردد): كون تخليها حتى تتكالما.. حسن ماتركب راسها وتبغي تزيد لشي قرينة خرى عاود.. أهيا هنا فأمان الله.. غتسد عليها فبيت وتنعس.. (سكتت تواني معدودة وزاد) باش تطمن كثر مانباش هنا..
{ في كل القصص هناك صوت يدعونا الى الغابات المظلمة والهمسات والمخاطر.. يدعونا الملوك الأشرار بكل جادبيتهم الى تلك المغامرة الخطيرة
تذهب الأميرات الى أولئك الملوك رغم أنهن يعرفن أنهم سيحطمون قلوبهن لحظة ادخالهن الى غاباتهم..
أين أنا في هذه القصة؟ هل سأغرم بالملك الشرير وأقبل كل مايأتي في حظي أم سألوود بالفراار عاجلا بأقل الأضراار.. }
خطواات تابتة ومحسووبة وكانو لدااخل.. جرها گلسها وگلس حدااها تاني رجلوو فوق اللحاف ورجل لي بقاات فالأرض.. دااير جييهتها كولوو كيبعد شعرها لمطلووق من على وجهها.. مضاارب معااه وكيحااول يرددو لوور باش يقدر يشووفها ملامحها..
طلع سفياان جاب ليها قرعة الما صغيرة ورجع عندهم.. لقاه قدر يدور وجهها عندوو.. شادوو وسط كفووفو.. كيمرر مرة مرة صبااعوو على حنيكااتها يمسح الدمووع الكاسيينهم.. وكيحزر فيها بهدووء..
فهم الجيسط لي طرى ورغم لحريرة لي هو فيها عجبوو لحاال.. ماداام ماكتبغيش اي واحد يحضر اسوء حالاتها أكييد غيكوون سبيسياال بنسبة ليها وولى مهم فحياتها على الأقل من ناحية الخصووصية والرااحة..
ترسماات نص ا بتساامة على فموو وجرها عندوو من حنكحهاا لي باقي فيدييه خااشيهاا فصدروو وكيبووس راسها من فووق كيحااول يسكت فيها حتى قااطعوو التليفوون..
نااض مرغم مني شااف السمية أما هو ماكانش عواال يجااوب..
بقى حدااها غا سفيان كيدور فعينييه.. ماعارف شنوو يديير.. شااف حتى عيا ومد ليها كلينيكس.. شدااتو من عندوو مسحاات بيه كماارتها.. تبعوو قرعة الما لي حدها جغماات منها شي جغيماات وبقات شادااها كتتنخصص حتى كمل أنير ودار راجع..
غمزو سفياان لايكون ساهي..
أنير (قرب عند فيونا ووقف حاني عندها راسو): يالله تنعسي..
ناضت فيوونا بلا ماتنطق حتى كلمة.. حط يدوو من مور ظهرهاا وزيدها مطلعها لطااج التاني.. دخلها لطواليط هو اللول.. وقف قداامها كيخشي فصبااعو وسط شعرها كيردوو باللور ويشدو بكفوو لاخر حتى جمعوو فقبضة يدو ولوااه.. مداات ليه معصمها جر منو بانضة كانت موحلاها فيه تبث بيها زغيبااتها المتناثريين وهي مستسلمة ليه مخلياه يدير لي بغا.. قربها كثر للاڤاپو لي كانو واقفين حدااه.. فزگ يدوو وبدا كيدوزها شوية بشوية على وجهها.. تحناات شوية وخلاتو يغسلوو فراحتوو حتى كمل عاد وقفاات ينشف ليها بالفوطة لي هز من فين كانت معلقة.. هادشي كامل وهي مهبطة عينيها راسمة علاماات الحزن على ملامحها باتقاان..
سالاا وجرها من يدييها داها لبيت حدا بيتوو..
حلوو.. دخل.. كان واحد من لبيووتة النقية رغم قلة وصوولو ليها.. قرب لناموسية.. هز لملاية الصيفية لمطلووقة فووقها بيد وحدة.. زيدها باليد لي باقي شاد فيها بيها حتى تكاات وشداات بلاصتها.. رد عليها لغطى وگلس جنبها كيتأمل ملامحها المنفوخيين.. عويناتها لحمرين ورمووشها لي تجمعو وتدااخلو فبعضياتهم من أثاار لبكى ماشي من بالو الوقت والساعة عكس سفياان لي متبعهم وكيتحرگ.. غادي جااي فحالا شادااه صريصرة لاهو قادر يجرو ولا قادر يزيد يدير شي حركة ينغزو بيها تاني..
شدااتو تلافة.. ولى فحال دااك لي كيطلق البولة فسرواالو.. بوحدوو حاس بصخونيتها وخايف لي دايرين بيه يردو ليها الباال..
بداا العد العكسي.. وتشلاات معااه الحركة فرجلين سفياان.. حبس الخيطي بيطي وتفيكسا فبلاصة وحدة.. مرة يشوف فالتليفون لي قابط ومرة يشوف فأنير لي كياسنى يتحول ويدخلوو فالسين والجيم والكيف والكم مع الجلاخة لي غتتفضح القضية قداامها..
حماضت خلاوها ماليها.. بكثرة التوتر ومع وصوول الدقائق الأخير لماقبل الكارثة غمض عينييه كيتسنى شي غوتة ولا شي ردة فعل مناسبة للموقف..
⏰ 23:58
⏰ 23:59
⏰ 00:00 💪🤢
لحظات صمت.. كيقاطعها غير نفس فيونا الناتج عن التنخصييص.. بدا كيحااول يحل عين وحدة ببطء شديد كارز على لخرى من أعماقوو.. حتى وضاحت ليه الصوورة وحلهم دقا وحدة على مصارعهم كيتأكد من سلامة عينييه وسلامة راسوو.. لدرجة طار جيهة أنير خطف ليه التيليفوون من جيبوو كيتحقق من الوقت.. كانت السااعة كتشيير لطنااش وربعة الدقايق وأنير باقي فشكلوو الأدمي كيشووف فيه مخنزر مافاهمش مالو كيتزريط فووق راسوو..
أنير: وشتا؟
سفياان (بارتباك): أاا.. يوسف.. واه يوسف.. راه يصيفط ليا مساج كان يلغالك وماشدش.. روااح.. (تمشى خطوات جيهة الباب)
أنير (واخد راحتو): دروك نتبعك غير روح.. (عاود دار عند فيوونا كيدوز يدوو على حنكها يالله غينطق وعاود قاطعو)
سفياان (بصوت جدي): ماطولش..
عاود دار عندوو أنير لافتة انتباهو نبرة صوتوو ومن دكاء سفيان كان واقف ليه حدا ساعة معلقة.. وما ان مرت عليها انظاروو تبلوونطا.. نزل عينية غير بريط ليدييه شاف شكلها وعاود هز راسو فيه حركو بالايجااب وتلفت عندها.. راد يدوو لنفس لوضع لي كان عليه.. ومثبت راسوو..
زااد كالا بيدوو لي حاط حداها فوق الناموسية باش ماينزلش عليها بتقلوو.. نزل راسوو بشوية جهة عنقها خاشي راسوو تما ومستمتع بحضنها.. حتى نطقاات بهمس وتردد باين..
فيوونا (غالب على صوتها الحزن): بقى حدايا ☹️
أنير (ضحك بجهد وجاوب بنفس نبرة الصوت غير هو برجولة وجادبية): الى بقيت ماراكيش فخير.. ههه
فيونا (رخفات عليه شوية باش قدر يهز راسوو.. أصلا لحيتوو لي كانت ديريكت على عنقها دارت ليها القشعريرة وحركات ليها جميع الاحاسيس اللهم يبعد.. على الأقل شوية.. تهز حتى جات عينيها فعنيه): ماكنخافش منك..
أنير (عااجبو لحاال): ههههه راه تالتنا الشيطاان..
فيونا (هازه كتافها لفووق ويدها باقيين من مور عنقوو): الشيطان هو بنادم ههه
أنير (ميت بالضحك): الله يصبرني.. (قرب كثر عندها طابع بوسة خفيفة على نيفها) راني نايض گبل ماناكلك..
تهز وجمع الوقفة.. ناض ديك السااعة من حداها هرباان من سحر تأثيرها عليه ومن داكشي لي يقدر يوقع فأي لحظة.. سد البااب كيضحك مزاال على حمااقها ودار حتى كيلقى سفياان مصمر على راسو كي عزراايل..
سفيان (بصوت هابط وظاهر عليه الانفعال): واش هبلت؟
أنير (شار بيديه باش يسكت): اوووش..
سفياان: وشتا راه يطرى؟
أنير (كيوريه رجليه لي تضخموو هادي مدة غير مع سروال السرڤيط مابانش): ماعرفتش غير تعطل.. يمكن..
سفيان (متوتر): وشتا المعمول؟
أنير (بدم بارد): والو.. نروح نرگد.. يصبح ويفتح..
سفيان: نهبط أنا نشوف اسلام خليتو واحل وحدوو.. رد بالك..
ضرب أنير على كتفوو برجوولة.. تفرق هو ويااه وتم غادي للبيت مخليه غادي هو بدوروو فحاالو..
دخل مدور السارووت من موراه فالبااب..
لاح التليفوون من يدوو ونصل تيشورطوو متبعوو ليه..
قرب لطابل دونوي بتتاقل كأنوو حامل على كتافو جبال الدنيا والدين.. تحدر لمجر لتحتاني هز بريكة وباكية الگاروو واتاجه لجيهة الشرجم فين گاين كرسي كبير شوية وعاالي حدا طبيلة صغيروة بنفس الديكوور.. تلاح فوق منوو بتعب گالس گلستو المعتاادة.. لايح رجليه على الشرجم يديه باقيين مشغولين بالگاروو لي جبد حطوو ففمو وشعلوو ناتر منوو نترة دلغداايد وهو كشووف بحقد فكرشو لي خداات لونها الليلي بالكامل..
بصح هو ماشي من الناس لي مبليين وماكيحيدش الگارو من جيبهم بالحق فاش كتتلف أعصابوو وكتوصل بيه لجدر كيلجىء ليه.. يعني فاش كيكمي كتكوون واصلة بييه لطووب.. من جيهة مشاعروو لي مخليياه كيتقطع وماكرهش كون نيت قدر يبقى حداهاا وجنبها ومن جيهة شكلوو لمزمر لي مامخلي ليه فين يزييد.. حتى الى بغا غير يطل عليها فالليل ولا يطمن مايقدرش لتصدق ضارباها الفيقة وشايفااه..
صعااب عليه تكون معااه تحت صقف واحد ومايقدرش حتى يطوف بساحتها.. كتفصلو عليها متراات وماقادش يمد يدوو جيهتها..
شحاال وهو منشور.. كيتحصر وكيكل فراسوو من لداخل عااد ناض دوش دوش خفيف ولوى على راسوو فوطة ساتر بيها نصوو.. وقف عند لاڤابوو كينشف فشعروو ووجهو بفووطة صغييرة قداام لمراية لي كساها الضبااب وملاها على طولتها.. قرب كفوو بتردد ودوزها عليها سامح لجزء منها يعكس صورتو.. كيحقق فشكل حجبانو لمتضخمين.. عينييه ووجهوو لمتغول.. كون ماتعطلش تحولو.. كون ماحالفوش الحظ وبان بهاد الهيئة قدامها.. اش كان غيطرى؟ أكييد غيخلعها.. أكيد غيخصرها حتى هي وغتشمأز من هاد المنظر لي قداامو..
ناضت من بلاصتها كتتسلت ما ان حساات بصوتهم تقطع.. قربات عند البااب كتتأكد عاد رجعاات الداخل حاطة يد تحت دقنها ولخرى من موور ظهرها وكتدورها فراسهاا..
دارت كثر من الطوااف لي داار سفياان حتى عياات ورجعاات لبلاصتها رادة عليها لغطى.. متكية على الشووك..
صعييب تقتانع خصوصا ان شكووكها مؤكدة بدلائل.. يعني وخا قدرات تستدرجو وتبقيه حداها لأطول فترة ممكنة.. ووخا بقاات تتمحلس عليه وتتبوحط وبقى قدام عينيها حتى فات الوقت لي شاكة فيه ورغم أنها مارداات لبال حتى حاجة غير عادية ولا خارجة على المألوف وخا كاانت مركزة معااه الا انها راسها يبس من الصخر.. مامفاكاش.. احسااسها كيگوليها ان شكوكها فمحلهم وعمر شعورها ماخااب..
⏰ 03:00
تگلباات حتى عياات وناضت گلساات مربعة رجليها كتتحرگ.. زعما يتضرب ليها هادشي كامل فلخوى؟ مستحييل.. حتى ماتكونش فيوونا..
تجرأت ودورات لبوانية جوج مراات حتى كتتفاجأ أنها مسدوودة.. هاااا وعلاش؟ ساد خايفها تغتاصبوو مثلا.. زاد اصرارها وزادت دقاات بلا ماتعيق..
فيونا (بهمس): اوكاااي.. الحيلة حسن من العاار 😈
بعداات من تم كدوور وتقلب على شي لعبة تنفعهاا.. توقفوو خطواتها عند لحاف على شكل فوطووي فگليسة حدى الدرووج.. دايرين معااه بوفاات (فحال لمخاد وهوما عاليين.. مهم كيتگلس عليهم فحال لحيفات منفاصلين على السداري) على طويبلة صغيرة.. گلساات فالقنت.. كتلعب بصبااع يديها وكتحرك فرجليها جيهة وحدة من لعجب لي محطوطين حداها.. ساااهية حتى بداات كترمش بالزربة.. وبلا ماتفكر فيها جووج دالمرااات ناضت داافع بوفة حتال وصلاتها جيهة الدرووج ودفعاتها برجليها حتى تكركباات معااهم مخلية صوت اصطداام قوي ومتبعاها هي بغوتة من الأعمااق..
كانوو الدروج مقسومين على جووج.. النص كيدي حتال واحد الحيط قداامو كولواار والنص لاخر كينزل لطاج التحتاني..
كان متكي ماعلييه مابيه.. حاط رجل على رجل.. مربع يديه وساارح فهموو وغموو حتى سمع الدقاان.. دور وجهوو جيهة البااب ببرود كيتسنط لتعياطها ولشنوو كدير حتى حبسااات ورد وجههو لاتجاه لي كان مقابل معااه كيسد ويحل فعينييه بثقاالة.. طالع ليه الزفت وكااره.. ماكملااات حتى ربع ساعة مگاادة حتى تهز مخلووع من الردخة لي تسمعاات وصوت صرختها لي زعزعاات ليه اعماقو.. ناض طاااير بلا عقل حل الباب دغيا نترو وطاار لعندها.. ماوقف حتى كانت بين يدييه كيقلب فيها ويتفحصها لاتكون تهرساات ولا كلات شي دقة فعظامها..
فيوووونا (بصدمة): هييييييه 😮
شهقااات وحلااات عينييها على وسعهم فييه من شكلوو لي ظهر قداامها فجأة.. خصوصااا أنها عاد شافتوو بوضووح وفالضوو.. أخر مرة فالجردة كان مظلم الحال وأصلا ماكانتش فوضع لي تبرگگ فيه وفشكلوو كانت كتبكي ولي ضارها أهم وأجدر بالتفكير على داكشي لي حداها.. عااد بانت الصورة وعااد ظهروو الملامييح..
ووخا كان عندها شك قطعي غير أن مهما تخايلتي الحاجة وكان عندك عليها فكرة مسبقة الا ان فاش كتواجها فالحقيقة كيكوون الوضع مغاير.. لا يَمُت لخيالك بصلة.. وكيكون ليه شكل تااااااني..
دهشة ودعقة وصدمة و و و.. صعااب التعليق فعااد اللحظاات..
صمت رهييب مرفووق بنظرااات فيوونا لي مامصدقاش اش قداامها ونظراات أنير لي عاد فااق براسوو أش داار..
فيوونا (نطقاات بصعووبة وبصوت منخافض): أنير.. 😰
حدر راسو باستيااء واستعارة من ماهو عليه.. بدا كيسحب يدو لي كانت من موور ظهرها بعد ماتأكد بلي مابيها والوو باش ينساحب من حداها..
اللهم يجمع شتاات نفسوو ويهرب من قداامها قبل مايتعرض لخيبة خرى.. أكثر حدة وأكثر قسوة من لي قبلها.. أهون عليه يتفادى شي لقطة غتحز فنفسو كثر..
حساات بيدوو كتتجر من تحتها بشوية بشوية.. حسات بيه كيتسل منها غيبعد وهي باقية حالة فيه فمها ومابتگمعش.. حتال اخر لحظة وحتى دور وجهوو عليها كيحاول يخبي بشاعتو على مرآهااا حس بيديها لي كانت جيهة دراعو لي باقي كيسخبها من وراها تحطاات على ديك المنطقة لغليضة لي حدا الكووع مزيرة عليه بجهدها لي ماميعادلش ربع قوتوو حابسااه من لأنو يمشي ويحيد من جنبها..
دور راسوو مهبطو متفادي الشوووفة فيها.. عينو غير على صبااعها لمغرووزين فيه من خووفها يزييد.. ستجمعاات نفسها شوية ونطقااات..
سبقها هي اللولة حطها فووق الفطووي عاد گلس حدااها كيشووف قداامو.. حاط يدوو على ركابييه وكيحااول يكون جملة ويجمع الكلمات مع بعضيااتهم خصوصا انو لخر حااجة كانت يطيح على بالوو انها توقع هي هادي.. مامهيأش تفسوو ليها ومستبعدها كل البعد فهااد الفترة.. شاف حتى عيا ونطق بصوتوو الرجوولي المعتااد..
أنير (على نفس الوضعية): كونت عاد بز ملي بدّيت نلاحظ شي صوالح انورمال وماشي حتال لهييه..
مارانيش عاقل مليح.. راهم يفوتوو غير لقطاات على بالي.. ماواضحينش.. بصح لي ماننساهش هي لمرة للولة سراتلي وتحولت كلي لوشتا راك تشوفي دركا.. ووخا كان الوليد علمني من قبل وكل ماوصلت لشي سن يعاود يفهمني على حسب قدرة الاستعاب لي كان يكون عندي فيها ماتحملتش.. گلبت دنيا.. زگيت وهرست وهدمت گاع لي راه داير بيا.. كان صعيب نحس راسي وسط جسم غير جسمي ولا جسمي نيت فشكل أخر.. فسيفة خرى..
أنيير (سكت شوية كيشووف فظهر يدييه المُخْضَرَة لي كيسرح قدااموو حتى بسطها كاملة وعاود دورها كارز قبضتوو ومزيرها بخَزِي): ماكونتش نقد حتى نشوف روحي فلمراية.. داكشي علاش كنت ديما نگعد روحي (بوحدي) بعيد على النااس.. أنا وماستحملتش شكلي عاد واحد خور..
قاطعاتو يدييها لي حس بيها تحطاات على كتفو وتمررات كتلامسوو.. تلفت عندها ببطء وهو باقي على وضعوو وقبل ما يسمع سؤالها جااوب..
أنير: السحر الأسود الى سبقلك سمعت بيه.. شي أرض من لي گبالت الدار فين ساكن الوليد والوليدة.. فالخرجة ديال وجدة فيها الكنز.. هادي شحاال على ما كيعاودوو گبل حتى مانتزاد جات شي وحدة باغياهاا وتما فين عرفوو بالقضية وبوشتا تحت ديك الأرض وبلي جوادها ماباغينش يدخلها لغريب.. السيدة منين ماباعولهاش ركبت جلد الغول.. وكون غي جات فاص.. مشات ودارت لي دارتو.. ماعاقو حتى قضى داك السحور مفعولوو ووخا ماخلاو وشتا دارو باش يتبطل مابان مفعول وبان بلي ماقضى فيه والو حتى زدت وبدِّت نكبر.. كان ديك لوقيتة فات لفوت وراكي تشوفي گباتك..
هضر وهو تابت.. هو لي مولف حركاتو الرجولية ويديه كيسبقوه فالتعبير خانو جسدوو رغم ثقالتو وتقتو فنفسو توتروو بان على شكل قلة حركة حتى كمل كلاموو وسكت.. مابغا يزييد حتى كلمة خرى قدام نظراتها لبريئة لمتأثرة من قساوة اش كتسمع.. هادئة على غير عادتها كتحاول تستوعب دقة دقة هاد خرجاان لعقل لي كيدوور بيها..
كتفى بالتركيز على ملامحها ووخا ضطر يشرح ليها على حالتو حاول يختاصر ما أمكن ويوصل ليها غا المفييد متفادي ينطق ولا يعاود ليها أي حاجة تقدر تخليها تتعاطف معااه ولا يبقى فيها وخا هو فأمس الحاجة يشكي ويخرج گاع لي ضاروو..
هبطااات عينيها الأرض شحاال سااهية كتفكر عاد عاوداات هزاتهم فييه بنوع من الأمل المتضائل وهو حاضي حركاتها كيستنتج ردة فعلها من خلااالهم كيتسناهاا اش غدير ونطقاات..
شريك القرن 21 الجزء التاسع
محتوى القصة
التنقل بين الأجزاء