تفرقات الكرطة وبدا اللعب وحما الطرح مزيان ، كل واحد شاد وراقو عندو مركز فيهم وكيخنز من تحت لتحت فلاخر .. اللعب طوال والتوتر بدا كيبان عليهم بزوج .. فجأة ابتاسم زياد ابتسامة جانبية فباه وحط الكرطة اللي فيدو ستفها ليه فوق الطبلة بنضرات انتصار خلا باه غير كيشوف وبأسى ونضرات فشل فرش الكرطة طيالو قدام زياد وتنهد كيشوف فيه والابتسامة كترسم على وجهه في حين تلاشات الضحكة من وجهه زياد وخرج عينيه فاوراق باه وبدا يزير على سنانو ويكرز بقوة .. جمع قبضة يدو وضربها مع الطبلة وقال
- غشاش ...دوك القوالب ماديرهمش عليا انا .
ضحك باه بسخرية وقال : خسرتي .. ودابا وفي بالوعد ديالك
جمع زياد يدو بقوة وقال : غنعاودو لعبو ... مزال ماسالينا ... وغنربح وغنحدف الشرط ديالك
قاطعو زياد : كتحلم ... غنكملو اللعب ... واخا نعرف نبات هنا معاك تا للصباح
كوبار : نخاف غير ندي ليك كولشي وتبقا بلاش خخه
زياد : هاحنا غنشوفو .. سير كمل ... حيد عليا هاد الكارطة جيب وحدة جديدة فميكتها
جابو ليه كارطة فميكتها فرقوها وبدا اللعب مرة اخرى ناض زياد كيسوط ويبح بغضب ويتعصر تا حمار وجهه من الخسارة الثالتة وبدا يسب ويلعن وزاد توثر وارتابك اكثر في حين باه مبرد و كيزيد يتحمس ، رجع مرة اخرى كيلعب على امل يحيد الشروط اللي عليه وتالت مرة بشرط يدخل معاه باه فالشركة وقبل زياد ورجع للعب كيتعصر وكيلعب معصب ، لاكن هاد المرة حالفو الحظ وربح ورجعو اللور تكا سخفان كيتنهد ويسوط ويتنفس الصعداء مغمض عينيه ، رجعات فيه الروح وبدا يضحك في حين باه عبس ودفع الكارطة بيدو طالع ليه الدم .. تحمس زياد للعب باش يتحرر من كل الشروط وبدا اللعب مرة اخرى وبتركيز اكثر وتكرر شرط باه في حالة ما ربح مرة اخرى يولي مدير عندو فالشركة ويتحكم فيها حتا هوا وتكون عندو كلمة .. ماتسوقش زياد لشرطو ومابغاش يخليه يأثر عليه وركز على الفوز والتحرر ، لاكن مع الاسف خسر للمرة الرابعة وخبط يديه بجوج مع الطبلة كيصعر في حين باه ساكت على فرحتو وقارم عليها . جر الكرسي بقوة زاعم يلعب لاكن الموزع جمع الكارط وعلن على نهاية السهرة ، وهنا ناض زياد وقف شاد راسو كيصعر ويسب ويلعن حضو المفس اللي جمعو بباه في حين ماض هاد الاخير بشوية عليه كيقاد حوايجو وقال
- السي زياد ... الى سمحتي خلص الدين اللي عليك راني زربان وباغي نرتاح ... وماكرهتش هاد السويعات اللي بقاو ليا قبل ماطلع الشمس نمشي ندوزهم فدارك باش فاش نفيق نمشي للشركة نشوف خدمتي راه تابعني بزاااف ديال الخدمة
ماهضر زياد متكلم مزاد شي كلمة ، خرج نيشان من الكازينو ساد عينيه غينفاجر وكراش تابعو كيحنقز بديك الكرش . حل الطموبيل بغا يركب ووقفو باه ببرود وقال
- ايوا شنو درتي معايا ؟
شاف فيه زياد كيزفر من مناخرو ورجع طلع فالسيارة ماهضرش وزدخ الباب في حين بقا باه واقف عاجبو راسو وقال وهوا كيشوف فالطموبيل غادية معصبة كطير قدامو
- هههه... واخا ماشي مشكل ... خليك حتى تقلب ليها على شي دخلة باش تقنع زوبيدة و سلمى .. حتى انا مازربانش اكبدي هههخخ.
دخل للدار ساخط لقا كولشي ناعس .. مشا لبيتو وزدح الباب عليه وجلس فوق واحد الكرسي حامية فيه البيضة وكيسوط بوحدو .. طار النعاس وطارت الراحة و يا اهلا وسهلا بالمشاكل والهم والغم . حساب عمرو حسبو زياد ولا كانت ليه فالبال .. تخنق وحيد القميجة لاحها بعصبية فالجنب ومشا لواحد الطبلة طويلة حدا الحيط فيها قرعة وكيسان محطوطين وجابها حطها قدامو كيشرب ويخمم ويزفر .. شنو غيدير؟ شنو غيقول لمو وكفاش غيدخلها واش هاد الموصيبة طاح فيها ، عيا يشرب ويخمم والشمس كطلع فاللخر ختمها بكينة دالراس لاحها فالماء وهبط عليها شربها وطاح فوق الناموسية كيفكر مغمض عينيه .
صبح الحال وصبحات زوبيدة جالسة موجدة المسمن و البطبوط ولكريب وجالس فالطبلة كتسناهم يتجمعو .. والخدامة كيمشيو ويجيو ويحطو ويوجدو .. جات سلمى كتعوج وتفشش جلسات كتشرط على لفطور وشوية هبط زياد معبس عينيه منفوخين وطالع ليه الدم .. جاي كيجر فالبانطوفة لابس شوؤط وتيشورط بيضاء والفوطة على كتفو كحلة ... جلس وقال بنفخة
- صباح الخير
زوبيدة : صباح الخير الحبيب .. مالك شفتك ماشي هوا هاداك ؟
زياد : والو ... والو غير فطري (خز حاجبو فسلمى
معبس وقال : مالك نتي كتشوفي ؟؟؟ فطري ونتي حاضياني
زوبيدة : مالك اش كاين مالك صابح خاسر ؟
حيد الفوطة على كتفو بنرفزة وبقا ساكت .. شوية زرب عليها وقال بسرعة
- كوبار : غيجي يعيش معانا .. صافي وميسولني تا واحد ولا يكوليا كفاش
ناض جمع الوقفة ومشا خلاهم كيشوفو فبعصياتهم ويبرقو
بقات زوبيدة حاللة فمها فسلمى وقالت
- واش كيهضر على باك ؟
سلمى بتساؤل : مافهمتش... قالك غيجي كوبار يعيش معانا ... شحال من كوبار كنعرفو !
زوبيدة : كفاش يعيش معانا ؟ واش باغي تسكنو هنا معانا !! ، واش من نيتك كتهضر
زياد : كنهضر من نيتي وهادشي اللي غيكون وبزز مني ماعندي ماندير السلام وعليكم
جراتو وقالت : اجي هنا اشمن السلام وعليكم.. كفاش بزز منك ؟ شرح ليا شنو كاين... ومزياان نيت اللي رجع باش يعطيني براتي مايبقاش لاسقني ومخليني معلقة .. شدو يعطيني براتي
زياد : وصافي غيعطيك براتك صافي خليني عليك دابا
زوبيدة : بلاتي.. كفاش غيجي ؟ واش غيجي هنا للدار ؟ كول ليا شنو كاين بلا مطلع ليا السكر
زياد : وا صاافي امي الله يحفضك .. صافي وقع شي تنوغيش وصافي .. كنت مع واحد صاحبي فواحد الكازينو و تلاقيتو تما كيقمر .. راكي عارفاه... دابزنا وبدا كيستافزني ولعبت معاه ساعا خسرت وحكم عليا يجي يعيش هنا معانا هاشنو وقع
بقاو كيشوفو فيها ويدورو فعينيهم بجوج وهي نايضة كتهضر على الحمام بطريقة وحركات باش تبتهم ومشات خرجات لابسة البينوار فوق الكسوة و الخدامة موراها مخبية الصباط والصاك وخارجة تحت عينيهم وهما ساكتين
وصلات للشركة ولقات ترحيب كبير من الموضفين وهي غادية بالزربة على عجلة وكتبتاسم ليهم ووتشكرهم وتزيد مباشرة لقاعة الاجتماع . داز حداها موضف وحنا راسو احتراما وقال
- نهار كبير انسة نجمة الشركة منورة بحضوك .. على سلامة لاللة نجمة .
- السي زياد ... عندي ليك واحد الخبر مهم ... الانسة نجمة رجعات للشركة .. وعلى ما كيبان ليا رجوعها المفاجأ من بعد هاد الغيبة كاملة على الشركة فيه أن ... حيت دايرين اجتماع مغلق و مشات ليه مباشرة ... شي حاجة واقعة السي زياد .... ماعرفتش السي زياد علاش هاد الاجتماع ... المهم فيه اعضاء مجلس الادارة كاملين ورأساء الاقسام وشي واحد اخر ما عمرنا شفناه . قلت نعلمك بشنو كيوقع كما وصيتني ... كون هاني السي زياد ... لكبيرة والصغيرة كتوصلك .
قطع المكاملة وناض من فوق الكرسي هاز لافيست كيلبس فيها و خارج بسرعة من المكتب .. تلاقا السكريتيرة جايا ليه بواحد الملف وداز فيها وقال
- من بعد ... مامساليش دابا خليه ليا تما حتى نترجع
مشا بخطوة سريعة دخل للاسانسور وهبط لتحت خرج ميقاد كمام لافيست وخرج مباشرة من باب الشركة .. يالاه بغا يطلع فالسيارة وهي توقف عليه جويس جامعة شعرها ولابسة لباس انيق ودارت يدها فوق الباب بكل ثقة فالتفس . تلفت شاف يد من وهوا يهز راسو كيسوط وقال
- شكاين؟ ... مامساليش والى عندك شي حاجة خليها حتى لمن بعد ... دابا زربان ومعنديش الوقت
هزات راسها فيه ببرودة وقالت : عايش حياتك ... ومرتاح ... و مفكرتيش فيا انا كفاش عايشة من بعدك ؟
تلفت كيدبل فعينيه سائم من شوفتها وقال
- ماعييتيش؟ سيري ضربيها ليك بشي سفرة لشي قارة ... سيري عطيني تيساع راه ماشي ديال الحب وانا مكنعرف منين بداه .. سيري الله يجيب ليك شي حب تحابي نتي وياه تا تفكرعو وكَلبي عليا انا خليني نشوف شغلي راع ماعنديش ليك الوقت هاد الساعة بلا متخليني نتعصب
جويس: اااه ... ماعندكش الوقت هه .. من هنا لقدام غيولي عندم الوقت بزز منك .. ماشي بهاد السهولة ضحك عليا ... انا ماعمرني فكرت نغدرك ازياد واخا فعلا غدرت صاحبتي .. وندمت ... وياريت كن كان عندي العقل ديال دابا مكنتش نغدرها ..
طلع ليه الدم وخرج عينيه فيها وقال : وا غدريها ولا كاع لا تغدريها اش غندير انا بالسيرة الداتية ديالك .. وا طلعتو ليا فك *** نتي وياها .. واش انا مغنساليش منكم ولا شنو ؟ حيدي يدك ولا نسد بيك على صبعانك وخوي الطريق راه ماعنديش ليك الوقت .
طلع فالسيارة بغا يسد الباب مخيخ وهي تقول بسرعة
- انا حاملة ازياد
شاف فيها بالزربة مخرج عينيه مصدوم ... نزل من الطموبيل كيشوف فيها وتكا بيدو على الباب عاطيها ودنو وقال
جويس : نتا هوا وباه ازياد .. ولا غتنكر ولدك حتى هوا ؟
ضحك فالسماء وقال : اش هاد النهار يا سيدي ياربي ... واش كنبان ليك انا عندي لكرون الشريفة ؟ سيري شوفي معامن درتيه وحيدي من طريقي
جويس : انا مدرت حتى حاجة مع شي واحد ... نتا الوحيد اللي كنعرف . وحتى دابا الى متيقتينيش يالاه نديرو تحليلة لا دي ان ونشوفو ولد من .
سخن فيه دم ومص شفاهه السفلية وقال بغضب مزير على سنانو
- شوفي نكَوليك جوج كلمات .. لعب البرهاش هادا ماعندي ماندير بيه ... غتمشي وتغبري عليا وجهك فخطرة ولا غنغير ليك الاثار ... وغنديرها الى ضطريت سمعتي ... وهاد التخربيق ديالك كوليه وسيري كَلبي عليا
جويس : شوف ازياد ... عندك جوج اختيارات .. يا أما تعتارف بهادشي اللي فكرشي ... وتحيد الشك ديالك بالتحاليل .. يا اما غنفضحك ثدام الصحافة و الاعلام ونضرب ليك الطر من شمال الارض لجنوبها ونخيك ضحكة لعديانك يتشفاو فيك ويدوزو بيك الويسكي وترجع سيرتك على كل لسان فالعالم كامل وشوهتك شوهة .. يالاه شنو رأيك دابا ؟
خارجة من قاعات الاجتماعات بابتسامة مع اوجين وجوزيف وباقي الاعضاء اللي نتاشرو كل واحد فين مشا
اوجين : كيبان ليا عندك مهارات فإدارات الاعمال واخا اول تجربة ليك
ابتاسمات نجمة وقالت: شحال من واحد عندو مايقول غير مكتعطاش ليه فرصة
جوزيف: كنتمنى نكون عند حسن الضن ديالكم ... وشكرا ليك مدام نجمة على هاد التقة اللي وضعتي فيا .. وغادي ندير كل مافجهدي باش نكون عند حسن ضنك
نجمة : هادشي ماغريبش عليك .. اللي كيضحي بحياتو باش ينقد روح يستاحق فرصة بحال هادي . . . اجي معايا جوزيف نوريك المكتب ديالك اللي غتبدا فيه الخدمة ... عندك 6 شهور ديال التدريب .. تعرف على طريقة العمل ديالنا وتكتاسب خبرة وديك الساعة مرحبا بيك بين مدراء شركة تيكنو صونغ .. ولاكن قبل ... خاصك تبرهن ليا ههه اوك
فتحات الباب ديال المكتب دخلات ودخل موراها قال
- طبعا مدام نجمة ... كما قلت ليك غندير مجهود باش منخيبش ضنك فيا
خرج معاها كيدورو فالشركة وفين ما دخلات كتلقى التحية من الموضفين ، داتو لقسم المبيعات ، المخازن ، الانتاج ، المالية ، الموارد البشرية ، التسويق ، المؤشرات البيانية ، التشغيل ، خطط العمل والمشتريات ووصلات هي وياه لمركز الشركة فالاسف وقالت
- هنا غنخليك تبدا الانطلاقة ديالك اجوزيق .. انا معنديش الوقت باش نجي فيه للشركة .. هادشي علاش اي حاجة بغيتيها ولا بغيتي تعرفها يمكن ليك تستاعن بالمساعدين ديالك ولا تتاصل بيا ... حنا راه رجعنا اصدقاء دابا
مدات ليه يدها وسلم عليها بابتسامة وقال : ليا الشرف نكون صديق من الاصدقاء ديالك امدام ...
قاطعاتو وقالت : لا ماتمشيش بعيد اجوزيف .. انا انسانة ماعندهاش اصدقاء .. والكل عندي سطحي .. يعني حاليا نتا اللي عندي صديق .. وكنتمنى ماتخيبش املي
قال جوزيف بسعادة : ماتصوريش شحال انا فرحان .. وماعارفش كفاش نشكرك ... بالمناسبة .. زين وزينة لاباس عليهم
دارت يدها على فمها : احمم ... جوزيف ... عندي شي حاجة مهمة خاصني نقولها ليك
طلع فالسيارة سايق راسو ومشا كيطير خلاها واقفة كتسوط وتنفخ ، وصل للشركة وقبل مايدور دارت قدامو سيارة سوداء كبيرة لامعة زجاجها الورائي اسود لامع ، مشات السيارة ودار زياد دخل للشركة ونزل دخل والكل كيحني راسو وجامع الضحكة كيلقي التحية وخايف ، طلع مباشرة للأدارة لقا الموضف اللي بلغ ليه بحضور نجمة ووقف داير يديه فجيابو هاز راسو وكيهضر
زياد : فين هادو؟ مزالين فقاعة الاجتماعات؟
الموضف : لا السي زياد خرجو
هز حاجبو وقال : فين خرجو ؟
الموضف : ماعرفتش ... انا شفتهم خرجو من القاعة ومن تما ماعرفتش فين مشاو ... كاين غير السي اوجين فالمكتب ديال الانسة نجمة
- زياد : بتشكيك ) معامن خرجات ؟
الموضف : مع واحد السيد .. كنضن سميتو جوزيف .. والانسة نجمة جابتو وعيناتو مدير فقسم الحسابات السي زياد
حك لحيتو وقال: اممم .. مدير ... مزيان ... وفين هي دابا ؟
الموضف : ماعرفتش السي زياد
خزر فيه زياد وقال تحت سنانو : وشنو حاضي ؟ كَولت ليك ماتهزش عينك عليها الى جات واش مكتفهمش؟
الموضف : خفت نعيق الشي زياد ويعيقو بشي حاجة
قال بنرفزة : سير شوف شغلك ..سير
جمع القبضة ديدو بغضب كيسوط ويضرب فالخوى بعصبية ومشا كيهضر بوحدو مباشرة للمكتب ديالها وحل الباب بلا أذن دفعو بالجهد حتى ردو الحيط ودخل بخطوات بطيئة وابتسامة وقال
- وليتو تخططو بلا بيا وكفاش السي اوجين ؟
وقف اوجين معبس ومتفاجأ من حضور زياد وقال
- اش هادشي واش ماعلموكش الاحترام فبلادك ولا كفاش؟
ضحك زياد بسخرية وقال ببرود : مع الاسف علموه ليا بلغة مكنفهمهاش ... ونتا معلموكش تعلم اعضاء مجلس الادارة كاملين بالاجتماعات اللي كنوقع هنا ولاشنو؟ ... ولا انا زايد ناقص فهاد الشركة ؟
زياد: ببرودة : اممم ... مزيان ... ومدام نجمة جات ... على سلامتها ... سمعت باللي ... جابت معاها شي مدير فاشل بحال جميع المدراء اللي عندها .
اوجين : هادشي كيخصها هي ... نتا شنو الدور ديالك فهاد الشركة تقدر تقول ليا؟ باش نافعنا ؟ شنو هي خدمتكم؟ وشنو اللي كتقدم لهاد الشركة .
زياد : ماتنساش انا عندي 30% فهاد الشركة ... انا هنا شريك الشؤيف ماشي واحد خدام عندكم ... كن ما أنا كن خسرتو الشركة ... انا شاري اسهم هنا و شريك فهمتي ... الشركة مابقاتش غير ديالكم .
بقا زياد كيشوف فيه هاز حاجبو وقال : كفاش ؟ عرفتي كيكَول واحد المثل عندنا فالمغرب .. دخول الحمام ماشي بحال خروجو .. نتوما قبل مادخلو معايا هاد التخلويضة كنتو تقدو بيها ... كنتو تقدو بتنوعير والتلوعيب ديالكم .. ماشي فالاول عجباتكم اللعبة ودابا وليتو طالبين سلة بلا عنب هه .... ههههه ... قدو بفعايلكم يالاه . واش كنبان ليك انا هبيل لدرجة نبيع ليكم الاسهم ديالي فهاد الشركة ونتوما درتو فيا مابغيتو .
اوجين : خديتي حقك وخدينا حقنا ونساحبنا .. ولاكن نتا متبغيتيش تعيا من هادشي وتمشي تشوف حياتك بعيد علينا .. وراك غادي وكضيع راسك وصافي .. اما حنا مضايعينش دير هادي فراسك . والشركة مامسامحينش فيها وماشي اول مرة طيح ... هادشي كيوقع لجميع الشركات .. كيطيحو وينوضو وعادي . نتا اللي فين غتوصل بهاد اللعب الخاااوي ديالك
فرك زياد يديه بابتسامة وقال : فالصراحة منقدرش نجلس بلا تنوعير ... (بأسى ) كنقنط ... كنمرض ... كيجيني الملل .. وعاااد حسابي مع نجيمة مزال ماكمل .. وماتنساش راه حاولات تقتلتي ... وخاصني نرجع حقي بالثاني والمثني منها ... واخا عارفها ماسويهلاش .. وفاش كتبغي تلعب راه كتلعب ... كما لعبات بيا النهار الاول ، وهادشي اللي عاجبني ... ودابا جايبا معاها مدير ماعرفت فين لقاتو ... ناوية على شي لعبة جديدة ولا شنو ؟
تنهد اوجين بيأس كيشوف فيه وقال : واسير قابل شغلك ونتا منوي غير بوحدك ... بغيت غير نسولك .. واش ماعندك مايدار؟ واش ماعندك خدمااا (صغر عينو ) ماعندك بيييع .. ما عندك شرااا ... ماعندك تصدير ... ماعندك استثمارات ...ماتوحشتيش المغرب؟ ماتوحشتيش البرازيل؟ ... غييير هني بالك حنا فهاد الشركة مكنلعبوش معاك ... اي حاجة درناها راه كنديروها لمصلحة الشركة ماشي ضدك .. بلا متبقا تفكر بهاد الطريقة .
عاود هز زياد حاجبو كيشوف فيه وقال
- انا مساااالي قبي ... عندي غير هاد الشركة ونجمة (هز صبعو ) نجيمة هي اللي عندي وهي الهدف ديالي الوحيد ونتا عااارف هادشي ... و خلييييها .. خليها تهرب حتى تعيا . اخرتها غترجع .. وانا هنا .. بت نبت ... تااا تجي على خاطرها مازربانش
اوجين : نتا راك مريض .. خاصك طبيب نفساني يعالجك ... هادشي اللي فيك راه مرض
- جوزيف ... انا مضطرة نخفي ولادي فالوقت الحالي ... عندي مشاكل شخصية وتغدرت من اقرب الناس ليا .. هادشي علاش بعدت واحد الفترة ومشيت جلست فتشيلي ... حتى واحد ماعارف عندي الولاد .. من غيرك نتا .. وأوجين
قاطعاتو: غنفسر ليك ... باهم ماماتش .. واضطريت نخفيهم عليه حيت عندي معاه عداوة .. وعداوة كبيرة ... ويالاه كنقلب على شي طريقة باش نبينهم ونرتاح من هاد الحمل اللي على ضهري ... طال الزمن ولا قصار غادي يبانو ... وانا بغيت نبينهم وفنفس الوقت ماندمش ونعيش حياتي مرتاحة ... هادشي علاش كنفكر نبين بنتي زينة ونخفي زين ...
جوزيف : وعلاش تخفي زين ؟
نجمة : حيت عندي ضروف مكتسمحش ليا باش نبينو فالوقت الحالي ... كنفكر من بعد نبينو بلا منذكر انه ولدي ولا ماشي ولدي ونخلي الاشاعات عليا تجاوب بلاصتي ... خفت نقول متبنياه وفاش يكبر يتعرض لمضايقات الصحافة والناس ويحساب ليه بصح متبنياه .. خفت يقلب ويلقى دليل كنقول فيه انه ولدي بالتبني و يصدق الدليل .. هادشي علاش فكرت نخفيه واحد المدة قصيرة عاد نبينو للناس ونخليهم يقولو اللي بغاو . . . باش منلقاش مشكل مع زين مللي يكبر . اما زينة فغادي نبينها بطريقة اخرى و مغنقولش معامن ولدتها حيت ماشي فمصلاحتي .. الحاجة الوحيدة اللي غنكدب فيها هي عمرها .. غنقص ليها عام ... واللي بغا يقول شي حاجة يقولها
بقا جوزيف ساكت كيسمع وقال : متعرفتش سبب هادشي هادا كامل .. ولاكن اللي فهمت .. هوا خاصني نحافض على السر ومنقولو لحتى واحد .. هادشي اللي كاين ياك
نجمة : تمااما ... اللي حاصك تعرفو انا قلتو ليك .. وبغيتك تحافض على السر .. وخليني انا نتصرف كأنك معارف حتى حاجة
* شاف فالساعة وقال كيسوط : مكَالتش ليك واش راجعة ليوم ولا لا ؟
خبط اوجين الملفات اللي قدامو وقال كيسوط
- لا ... وبلا متبقا كل شوية تسولني ونتا عارف ماغنعطيك باش تنقي سنك
وقف زياد وقال كيتنهد : واخا سيدي .(خرج)
ابتاسم جوزيف وقال : كوني هانية ... الى حتاجيتي اي حاجة انا موجود... ولاكن فكرة ديال تنكري زين مسكين جاتني ...
هز حاجبو وقال : اييه .. هاكواااك !!!! (جلس ونشر رجليه ) وانا اسيدي هنا جالس ليكم .. بغيتو ولا كرهتو
شافت فيه زوبيدة باشمازاز وقالت : يخخخ الله ينعلو كنس ناقص .
مشات وخلاتو جالس هوا وزياد كيشوف فالدار عاجبو الحال .. هز زياد حاجبو وقال
- جمع راسك ولا نبيع مها هاد الدار ونجلسو كاملين فالشانطي ... راه عندي نص عقل والله تانديرها
قال كوبار ببرودة : عارفك امسخوط الوليدين ... ولاكن انا راه شرطت عليك نعيش معاكم
زياد : اييه المعلم ولاكن ماشي الى الابد ههه... واجمع راسك قبل منولي مسخوط حقيقي
كوبار : مابقيتيش تحتارمني!
زياد : حتارم راسك بعدا عاد تسنى الاحترام .
مشا زياد كيقلب فعينيه خلاه بوحدو جالس كيتنفس بارتياح عاجبو الحال ومرتاح .. جبد تيليفون كيلعب فيه شوية وهوا يجمع الضحكة وبدا يتفرج فالفيدو اللي داير بوم فمواقع التواصل في جويس كتهضر بابتسامة مع الصحافة وكتحي قصة حملها وقصة الحب والغرام اللي جامعاها بزياد
خرج عينيه وبدا يدخل من صفحة لصفحة كيلقى مقالات مكتوبة عليه و الصحافة ناشرة خبر الحمل والممثلين والنجوم كيعلقو ويباركو ليه فحسابو وفحسابها .. هز حاجبو وقال بينو بين راسو
كوبار : انا غير نوصيك .. عنداك تخرج على راسك وصافي
زياد : هه.! انا عارف راسي شكاندير ... وكما كَلت ليك .. تا واحد مكيتسالني شي حاجة وحياتي عايشها وبفضايحي داير لبوز بزز من ديلمو بنادم واكيجتك فهادي .. وفضايحي اللي مربحيني ومخلييني ديييما فالطوندونس هههه ... نكبروها تصغار مالنا شخاسرين
كوبار : وهوا الصراحة مخاسر والو .. غير هوا غتفرق معاها الورث امسخوط الواليدين لا لسقات فيك
قال بنرفزة كيتفتف : غنرفق قث. ز .نن فف غنكَول شي فضيحة ... يصبح ويفتح دابا خليها تفرح انا الصباح نوريها شكنسوا
تكات على ضهرها مع ولادها معنقاهم واحد من هنا واحد من لهيه كل واحد معنق دبدوب عندو وهي كنقرا ليهم القصة بصوت طفولي حتى داهم النعاس وحطات القصة فالجنب كتنهد ... هزات تيلي كالعادة وبدات دور فيه قبل متنعس حتى تصادفات مع الخبر وحلات عينيها وناضت جلسات مخرجاهم مصدومة .. قصة حب .. غرام .. حمل ! تحجرو الدموع فعينيها وبقات مصمرة شحال كتشوف وتعاود الفيديو مامصدقاش .. تلفتات وراه شافت الاملائكة ديالها ناعسين واحد حدا واحد وبدا فمها يترعد والدموع نازلين بغزارة . عايش حياتو .. عايش السعادة ... كيدير ولادو مع صاحبتها اللي غدراتها وبدم بارد فرحانين .. ماندمو على شنو دراز فيها ما أنبهم ضميرهم .. ااه شحال كانت هبيلة وكتيق .. شحال كانت معمية وكيحساب ليها كاع الناس مزيانين بحالها ولا يمكن تلقى طعمة من اقرب الناس ليها .. اه شحال تاقت وخلصات ثمن التقة ديالها .
نزلو الدموع بغزارة وبكات تا شبعات بحرقة بوحدها وفاللخر تاصلات بأوجين كتشهق واقفة كترعد حدا الباب ديال الشرفة
كوبار : وفين غادين ؟ واش مكاين رجال هنا ولا ؟ السيبة ؟
زوبيدة : اياااه صباح الخير عاد باغي ترجل ؟ واسييير عاود لمخك ... الى نيت قدرتي تحبسني حبسني
ضحك بسخرية وقال : واجلسي بعدا غير حتا نمشيو عند مرت ولدك نبررركو ليها ههه
زوبيدة : حيد من طريقي الله يبرركو فيك نيت .. ماتخليو حد يحشم تريكة ناقصة
خرجات كتسوط مافاهماه علاش كيهضر لا هي لاسملى ومشاو طلعو مع الشيفور خلاوه واقف كيضحك وعلى بالو باللي حتى هما عارفين شنو واقع . سرح يديه كيتجبد بارتياح ومشا جلس على الطبلة دالفطور بعدما ضربات 12 وتوسط النهار وبدا يفطر ويدور فالتيليفون ويتسارا .. ونفس الخبر ديال الليلة الماضية كيدوز قدامو بالتكرار حتى شوية بانت ليه جريدة ماشرة خبر وكاتبة عليه " عااااااااااجل : طبيب ... " دخل يكمل المقال وهوا يخرج عينيه وتصمر وبدا يهضر بوحدو
- ويلي ويلي ويلي على ابليس اش دار ... ويلي ويلي على مسخوط الواليدين اشنو ناشر !! طبيب كيأكد بالرهان والدليل باللي زياد سبايدر سبق ليه دار فحص وتبين انه مكيولدش ولهدا السبب تم انفصاله على خطيبته قبل عقد القران بسبب العقم اللذي لم تتقبله خطيبته النجمة جويس ! اييييه اكبدي عبرتي ! وخرجتي من باب واسع .. نيت باش ماتجي تاوحدة تكَوليك حاملة هنيتي راسك .. سيري فؤخك كي بغيتي دابا ... ولايني مسخوط !
دخل للصفحة ديال زياد كيقلب على الجديد لقا الصفحة نقية محاط فيها حتى حاجة عندو .فقط الجرائد الالكترونية والصفحات اللي بدات تنشر الخبر الحديث بسرعة البرق حتى تقلبات الهضرة ورجع كولشي كيهضر كيهضر عليه وعلى الانفصال والحمل ديال جويس والتعاليق الساخرة من جويس فجميع المنشورات .
حلات عينيها بتعب فالصباح على صوت زين وزينة وحركاتهم ولعبهم ونتيف الشعر .. جرات شعرها بزز منتوفة وناضت تعبانة كتسوط وعيطات للخادمة جات عندها
- اوجين مشا؟
- مشا الصباح وقال غادي يرجع
ن: امم .. عطيني تيليفوني والحليب للدراري يفطرو
عطاتها الخادمة التيليفون وتكات على جنبها ولاحت نونوسات وراها لولاظها يلعبو باش ميبثاوش ينقزو عليها باغيين ينزلو من فوق الناموسية . اول حاجة دارتها دخلات تبركك وتشوف واش كاينة شي صورة ليهم تزيد تفقص بيها راسها ، لاكن كانت المفاجاة مللي لقات مواقع التواصل الاجتماعي سواء العرب او الغرب مطرطق بآخر الاخبار اللي صدرات من عند الطبيب اللي كتب كتابيا ان زياد عقيم . خرجو عينيها ودخلات كتشوف وتقلب لقات الكل مصدوم وكيهضر على الحمل ويعلقو على جويس ويضحو عليها بصور معبرة وبكلمات ونكت . ناضت تقادات فالجلسة كتأكد ودارت يديها على فمها فدهشة وقالت
- اويلي ؟ .... كفاش عقيم ؟ ميمكنش ؟ ولاكن كاين دكتور كيأكد هادشي يعني جويس ماحملاش منو؟ وكفاش تفارقو وماتزوجوش؟ يعني مامزوجينش وانا كان كيحساب ليا تزوجو ؟ مافهمتش؟ ميمكنش يكون عقيم ؟ وانا معامن حملت على هاد الحساب؟
اوجين : هوا كيقول عن طريق الصحافة والطبيب ومازال ماتبتاتش عليه شي هضرة بشي فيديو ولا قالها فالحساب ديالو .. حاليا الطبيب الل كيهضر بلسانو .. ماتنسايش ان هوا شخصية مشهورة مغاديش يبقا كل مرة يجبد حياتو الشخصية فالعلن .. كيهضر على الخدمة وصافي اما الشي لاخر كيقولو بلسان الطبيب هاد الساعة حتى نشوفو اخرت هاد الحريرة . ماتغصبيش راسك وانا دابا لقيتني كنقلب ونشوف شنو واقع وكنسول ونبحث . المهم تأكد ليا باللي هوا وياها مابقا بينهم والو من خلال الصورة اللي حط لبارح ليه وكاتب تحتها " تحيا العزوبية "
نجمة : بلهفة ) فييين حطها فين؟ وريني فين؟
اوجين : حطها فتويتر غير لبارح بحال الى كيرد على جويس ويقول ليها نتي كدابة وانا مابيني وبينك والو ... راه كولشي كيضحك عليها
نجمة : مزيااان فيها ... خليهم انا بغيت ليهم جهنم بجوج .. غندخل نشوف الصورة بسلامة (قطعات)
دخل للشركة ديالو هاز راسو بخال الى مافراسو ميتعاود .. الموضفين كيشوفو فيه من تحت لتحت خايفين يهزو الراس ويقمعهم شي قمعة امام الملىء ، بدم بارد وهدوء نام دخل للمكتب ديالو جلس وتنهد كيسوط وهز تيليفون دارو فودونو وبدا يضحك
- كي بقيتي شوية ؟ ههه
جويس : شوهتي غير راسك الهبيل ، شنو معناها دابا ها؟ .. انا نيت لقيتني غادية دابا ندير تحاليل لا دي ان ونوريك .. حساب ليك راسك طفرتيه .. غير بلاتي عليك
ضحك بسخرية وقال : اري معاندك لا نتي ولا صاحبتك يادعاوي الشر ... عارفك علاش كتحومي وعارفكم نتزما البنات كتافقو و تاحدو ... و عرفتي شغانكَول ليك ... واسيري ت**** لانتي لا التحاليل لا القاضي اللي غيحكم ههه ... سيري شوفي لمن عطيتيه وجايا تلسقي فيا
جويس : انا مامشيت مع حتى واحد .. نتا بوحدك اللي كنت كنعرف
زياد : شوفي مايجيك مليح .. انا كنت عارف راسي شكاندير .. وماكنتش كنقرب ليك بزااف اصلا ... ودوك المرات راه درت فيهم احتياطي وعاقل مزيان على راسي وفوق هادشي كنت كندير ليك الكينة فالعصير تشربيها الصبااااح فاش كتفيقي وتمشي تفطري ههههاااااهاهاهاهاههههه عرفتي ديك الكينة اللي فيها حبة وحدة ههههههه يااااما شربتيها فيها تا شبعتي هههههه ... كيفاش جيتي وحملتي مني هههه ... نوضي شوفي راسك معامن حملتي ولا سكرتي ولا شوف شنو درتي ... التحاليل مكتنفعش معايا الكدابة والنصابة . يالاه جري طوالك
قطع عليها كيضحك وحط تيلي كيموت بالضحك .. شوية وصلو مسج من عندها ودخل ليه قراه وهوا يجمع الضحكة
- هضرتك كاملة سجلتها ... وانا نوريك دابا الشوهة على حقها وطريقها
هز تيلي فالبلاصة حمر وبدا كيتاصل ويعاود وهي مكتردش .. تعصب وبدا بسب فراسو وكتب مسج فيه
- صافي وقفي .. انا غنعتارف بيه "
بعت المسج وبدا يصوني وخرج من الشركة طلع فالسيارة حتى جاوبات
قطعات عليه ومع القطعة وقف بعيد بالسيارة فين تبع مكانها من خلال التيليفون اللي كان كيبين ليه المسافة اللي بيناتهم شحال فيها وبدا يدور تابع الارقام اللي كتنقص حتى قربات المسافة بزاف وهي تبان ليه خارجة من واحد لابوراطوار ديال التحاليل .. صغر عينيه وعس عليها وبدا كيتفرج فيها وهي فرحانة كضحك وركابت فالسياارتها وزادت . هي مشات وهوا تبعها كيترقب خطواتها وطريقها حتى وقفات قرب مقهى كبيرة على شاطئ البحر ووقف السيارة بعيد وجبد تيليفون كيتاصل ويتسنى الرد ويقول مع راسو
- هادي هي الفرصة الوحيدة .. ومستحيل نضيعها .
جلسات فطاولة كطل على الشاطئ براتياح باغا تاكل وجبدات تيليفون كتهضر فيه وتجمع .. عاجبها الحال حتى تم النادل جاي هاز بلاطو فيه العصير ..قرب منها لاكن كان موراه راجل بكوستيم اسود كيهضر فتيلي وتصادم مع النادل حتى تخوا الكاس على جويس وناضت كتغوت معصبة وتسوط وتنفض والنادل والراجل كيعتادرو ، لاحت تيليفون فالصاك بنرفزة ومشات طالع ليها الدم جيهة الحمام في حين مشا النادل بسرعة يجيب منديل يمسح السائل ، استاغل الراجل الفرصة وشاف يمين يسار بنصف عين وهز الصاك بطريقة محترفة غبرو كانه فنان فألعاب الخفة وزاد مع الطريق خرج من القوى وقطع الشانطي بسرعة فيه جالس زياد لايح يدو على المقود وهاز حاحبو كيتسنى ، تحل الباب ديال سيارتو وتحط فيه الصاك ورجع تسد بلا كلام وزاد مع الطريق كانه عمرو كان واقف تما ، فطريقو وهوا سايق حل الصاك حداه بواحد اليد وبدا يقلب عاض على سنانو بتركيز وجبد تيليفون شدو فيدو ودار ابتسامة ساخرة وقال
- مرة جايا بقا تسكت ابا زياد وماتبقاش طير وتكلخ . هادي سلكات .. وماشي كاملين كيسلكو ... ولاكن من هادي مانعاود . . . ارا نشوف هاد تسجيل ولد ***
وقف السيارة فجنب طريق خاوية ودخل مباشرة للتسجيل سمع المقطع الاول عرفو ديالو ومسحو فالبلاصة ودخل كيشوف باقي المقاطع ويتسنط ويسمع حتى طاح فمقطع خلاه يحل عينيه ويقطع النفس وهوا كيسمع الحوار ديالها مع الطبيب كيتافقو على تزوير التحاليل .. وشنو الحل من بعد ؟ والى ربحات القضية شنو خاصها دير باش تبان حاملة ومتكشفش ؟ واش دير الحقن ؟ ولا شنو المعمول . جمع النفس وطلقها وقال مخرج عينو معبس كيشوف قدامو
* بقات كتشوف فالصورة وتكبرها وتصغرها وغادية جايا .. واحد العقل كيقول ليها فرحي راه متزوجوش و واحد العقل كيقول ليها راه خاصك تبكي حيت ضحك عليك للمرة الثالتة . سهات فالتيليفون كتشوف فيه .. داخلة كتشوف وخارجة كتشوف و ولادها برا فالجردة كيلعبو وينقزو ويطيح واحد على الاخر . شوية جاها اتصال من عند جوزيف وردات بابتسامة
قطع وحط السماعة كيبتاسم بوحدو راشقة ليه ... كمل الخدمة اللي عندو وخرج من المكتب كيضحك بوحدو حتى تصادم مع زياد فالدورة تقاسو بالكتف ووقف زياد عاقد حجبانو وبدا كيشوف فيه ويطلع ويهبط وجوزيق نفس الشيء دار مللي شاف فيه زياد بديك الطريقة . وفنفس الوقت تحل باب الاسانسور وخرج منو اوجين شافهم واقفين واحد كيشوف فلاخر وجمع النفس بدا يسوط و وقف عليهم هاز راسو وقال بطريقة ساخرة
- السي زيااااد ... الحمد لله على سلامتك .. شرفتينا
مد يدو سلم ومد زياد بدو كيشوف فيه بنص عين سلم عليه .
جوزيف : سمحو ليا .. خاصني نمشي عندي موعد مهم
اوجين : تفضل . . . حتى انا غنمشي معاك .. شي مرات كنتخنق فهاد الشركة
مشاو بجوج وبقا زياد واقف بلاصتو بحال شي تصويرة مكيتحركش من غير عينيه اللي دارو لاجنب تبعهم بتشكيك وتلفت وراه بشوية ساهي كيخمم وبدا يصغر فواحد العين .
مشا جوزيف مباشرة لنادي الكولف ، بدل حوايجو ولبس مبالس رياضية وبدا يتلف الوقت ويلعب بوحدو .. تلفت كيتنهد جاه الملل وهي تبات ليه نجمة جايا لابسة تيشورط غوز وكولون وكاسكيطة شادة واحد من هنا و واحد من هنا ملبساهم حتى هما سورفيتات اديداس وسبرديلات وجايباهم كضحك وهما كيتجاراو ويشوفو فالارض ويتعكلو ليها فيديها فرحانين معارفين راسهم فين هما . . . حتى قربات وطلقاتهم بداو كيجريو قدامها وهي كضحك .. تعرض ليهم جوزيف شدهم بجوج وتحنا عندهم القرفصاء باسهم وبدا يهضر معاهم وهما كل واحد فين كيشوف فجهة . ناض وقف مد يدو صافح نجمة وقال
- نورتي الكلوب
ابتاسمات وقالت : ههه شكرا ... اول مرة يجيو لكلوب ... داخو ههه
مشاو ليها نيشان جيهة الكرات وبداو يهزو ويوريها زعما راهم هازينهم ويضحكو فرحانين ويجاراو واحد من هنا واحد من لهيه وهي غادية وتبعهم كضحك وقالت
- شفتي علاش مكنبغيش نخرج معاهم ميخليوكش تجلس
جوزيف : ماشي مشكل بلعكس كينشطو الجو هه... انا نتبعهم غير خليهم يجريو
- الو .. مزال فالدار؟ .. انا مغتعرفش فين انا .. المهم وجد راسك وحيد عليا دوك السناسل اللي معلق كي الشوافات غيجيبك الشيفور عندي.... ااانا غتكول فيه فين يجيبك غير وجد راسك يالاه... بسلامة .
قطع وبقا جالس حاط يدو على فكو في حين واقف كوبار قدام المرايا كيتعطر ويعلق فسناسل الذهب والخواتم ... لبس كوستيم وبدا يتقاد ودهن الزيت للصلوعية دراسو تا بدات كتبري وخرج كيتعنكر مشا للطموبيل في واقف الشيفور وقال
- بلاه طلق راسك حل ليا الباب ... راه وليت رجل اعمال دابا ... ااه فراسك بعدا شكون انا ؟
شاف فيه الشيفور مستغرب وحرك راسو بالنفي
كوبار : هااهااا هااها .. ماعرفتيش شكون انا ؟ !!! لالا ميمكنش ماتعرفش ... انا ااا ... شنو سميتك بعدا ؟ بلاش ماعندي مندير بيك ... انا راه كوبار سبااايدر ومن لا يعرفه ... بات زياد. عقل عليا مزيان .. اه احمم .. ومافيها باس تقولها حتى لصحابك باش يعرفو شكون انا .. وقريب انا اللي غنتكلف بجميع الاموال.... اا الاعمال اللي كيقوم بيها كبدي بغيت نقول ولدي ... يالاه يالاه حل لباب سربي عطلتيني على الاجتماع ديالي
حل الشيفور الباب ساكت وكيشوف باستغراب .. طلع اللور ودار رجل على رجل وقال
- دوز خود ليا شي سيكار ... عاد ديني ... اجي فين غتديني بعدا ؟
الشيفور : قال ليا السي زياد نديك عندو للشركة
كوبار : مزيااان ... راه تما عندي اجتماع مهم ... يالاه دوز خود ليا واحد سيكار تا ندير ونن ... (خرج عينيه فالشيفور اللي كيشوف فيه فالمرايا) يالاه تاندير ونننن ... دخلو ليك ففلخلاص . طلق راسك .
وصل للشركة وفتح ليه الشيفور الباب ولاح رجلو كيتجبد وخرج وقف هز راسو فالشركة والسيكار فيدو والخاتم مدهب فصبعو الصغير والسنسلة ديال الذهب فوق الكرافاطة والساعة كتببري . تقدم بخطوات تابتة هاز راسو ويالاه وصل للباب وقفوه الامن منعوه من الدخول .. دفع صدرو وقال معبس
- معرفتونيش شكون انا ؟
الامن : عندك شي موعد ؟ عطينا السبب وعمر الورقة و ...
قاطعهم وقال بسخرية : لالا ميمكنش ماتعرفونيش شكون انا .. انا هوا كوبار سبااااايدر (طلقها بحال شي قنبولة ) يعني مول هاد الخير ..بغيت نقول الشركة كاملة ... يالاه خوي الطريق وسير قول لصحابك شكون انا
الامن : مولات الشركة مرى اسيدي .. الله يخليك طبق معانا القانون
ضحك كوبار وقال: بلاتي ... انا غير غندخل مع هاد الباب .. غنخرجكم نتوما مع داك الباب .. راكم مطرودين من دابا .
خرجات وحدة لابسة كلاص كتجري للباب شادة ستيلو وبدات تفتف وتعتادر ليه ودخلاتو .. دخل كيشوف فيهم منفخ وتلفت عندها قال
- الجوالق ! تعرف ليهم بعدا ... وشاااركة عندك اكبدي .. فين هوا المكتب ديالي هوا هادا ؟ اححح شحال متشوق باش نبدا الخدمة
كمش زياد فمو تحت نيفو وقال : عارف بعدا تسير شركة ؟ زربان ترونها ياك (ناض وقف) سمع ... ها البيرو ديالك هوا هادا .. من ليوم .. نتا هوا مول الشي .. ديير اللي بغيتي فهاد الشركة ... خود الفلوس اللي بغيتي ... وجيب ليها اللي بغيتي .. واللي كَال ليك شي كلمة هنا ... عطيه علاش يدور مانخافش عليك
حل كوبار عينيه مزياان وبدا يضحك من ودنيه وقال
- كنت عااااارفك .... كنت عااارفك ماتنياش باك
هز زياد راسو كيتنهد وقال : واخا طلعتي دري صغير .. هانا طلعت معاك راجل ... خليتك تنوب عليا فهاد الشركة ... غير هوا كاينة واحد اللعيبة ماشي تالهيه
كوبار : اشنو هي؟
زياد : هاد الشركة ماشي ديالي انا بوووحدي ... يعني حنا هنا شركة ... انا و واحد السيدة ... وهاد خيتي عندها يدها ليمنى سميتو اوجين ... هاد اوجين عاجبو راسو بزاف ... المهم اللي نوصيك عليه هما هاد الجوج .
عقد كوبار حجبانو وقال : شركة !!! وعلاااش دخلتي معاك الشركة فالشركة ديالك ... كنتي تجيبني انا نوقف ليك على اموالك... اعمالك زعما
زياد : عااارفك قدها وقدود ... ولاكن باش نشرح ليك مزيان ... هاد الشركة راه ديال تيليفونات .. ماشي الطموبيلات ... وانا للي دخلت معاهم شريك هنا فهمني
كوبار : ايييه !!! لالالا انا باغي نكون مدير فالشركة ديال الطموبيلات .. شركة سبايدر ... ولا ماخدامش
ضرب زياد يديه مع البيرو وخرج فيه عينيه وقال
- لهلا فين تخدم نتا كاع ... ها البار رجع ليه شكون شد ... بغيتي تكون مدير ها الشركة .. ماعجبكش الحال ها الكازينو رجع ليه قبل ماينساو عليك صحابك .
رجع كوبار جلس بلاصتو كيسوط وقال
- ايوا ونتا فين غتمشي ؟
زياد : غنمشي نبيع الطموبيلات فسوق لاربعا ... ونتا مالك فين نمشي ولا مانمشيش .. ديها فخدمتك ... ياك خليت ليك الحرية كول فيها بيديك ورجليك علاش كتسول مزال؟
صغر كوبار عينيه ودار رجل على رجل وقال
- غااا كَول ليا اش عندك مع هاد الشركة ... وبنتي ليا بحال الى باغيهم سيزي
هزاتو عنقاتو وبدات زينة تعلق تاهيا بغات تهز ... ابتاسم جوزيف وقال
- اجي نهزك ... اجي عند عمو اجي
خزها وخرجو بجوج جيهة السيارات وركبات مع الشيفور اللور وودعات جوزيف ورجعات بحالها .
خرج كوبار من الشركة بنفس الطريقة باش دخل .. لقا اغلب الموضفين مشاو وبقاو غير شي وحدين .. ونزل من الاسانسور طلع فالسيارة مع الشيفور ومشا نيشان للكازينو عند صحابو وبدا عليهم بالفوحان والسيكار وجلس يلعب ويشرب تا عيا ورجع بحالو فنصاص الليل .. يالاه دخلاتو السيارة للكومباوند تلاقا مع سيارة زيادة شاعلة الاضواء باين يالاه وصل حتى هوا . نزلو بجوج دقة وحدة وتلفت زياد شافو جاي كيشهق مقلوب بالشراب وقال
- ياودي يا ود على اللي غيسير شركة... طررررر ... بقيتي تشرب تا ثملتي
العنكبوت الجزء التاسع
محتوى القصة
التنقل بين الأجزاء