صورة مصغرة لـحبيبي الأصم الجزء 266

حبيبي الأصم الجزء 266

habibi 7abibi l2asam
رواية حبيبي الأصم

رقية سلات الهضرة مع مبارك وجبداتليه ودنيه تاولا كيمشي ويعتر قاتليه بلي هادو ماعزيزش عليهم هادشي عرف راسو زبلها ... وزاد قدامهم وكيشير بيديه لشيخات زعما حبسوو حبسووو ...ولامار شدات ففماماها وطلعات كتشوف من موراها بانليها ماشي لطموبيل .... ورتاج واريج تابعينها كيضحكو نص ضحكة ونص خلعة .... كيشوفو لفوق عينيهم كيلمعو حيت اول مرة غايحضرو فهاد الجو ....والعيلات لفوق كيحنززو ويهزو فيهم ويحطو ويبرككو ...
عند دراري ..
مشا سفيان بجيهة عدنان لي متكي على طموبيل مربع يدو كيشوف فين غايخرج هادشي ... و يونس غير كيدوز يدو على شعرو ويسوط ...
سفيان : صااافي هنيييونا تالدار وتفاهمو 
يونس : انا مزال معرفتش منين جابو هاد تاحراميات كاااملة والله معرفت ابلييييس هادو .... فخبااارهم يقولو لينا ...علاش سااااكتين 
عدنان : صافي دابا لي وقع وقع يمكن خافو ماتبغيوش ... زيدو دابا ماشي وقت هاد الهضرة كولشي كيشوف فينا ..
ضارو عند اسد بانليهم كيهز قسم من طموبيل وشد لباب برجلو ... بغيت نقول زدخها تاتخطفات لبنت فيدو ... 
سفيان : ارسوووول الله 
عدنان : واقلة غايطلع 
يونس : على عاد عندك شك مغايطلعش .. السكر لي غايطلع هاد نهار ... زيييد الله يخرج هاد ليلة على خير تحركوو 
زاااد يوونس وعدنان تبعو خاشي يديه فجياب لافيست ولقدام سوييييقة دناااس والهاراج ماحدو كيزيد ماحدو كيسوع فعينيه ماباغيش يبين لسفيان الى ماعجبوش لحال فنفس الوقت ماباغيش يبانو قدام داك ناس بحالا مكبرين عليهم وهوما لقضية ومافيها غير ماولفوش بقوة الباشار مكيعرفوش يتواصلو مع شي حد مكيعرفوهش وحدوديين ... وسفيان بقا تيتسنا تاوصل عليه اسد مخنزر مكينطق بحتا كلمة وتا سفيان جا يهضر فلخر قطع الحس ودار بناقص وطلعو ... 
عيشة غي شافت رقية وصلات جات كتجري كتسلم عليها تشادو بالحناك مابغاوو يطلقو ..كيهضرو ويتباسووو ... وارييج ورتاج حالين فهمهم فشيخااات ودوك لهليلة ها لي حاملة ولدها فظهر هالي لابسة قميص وفوقو طابلية دالشغل ...هالي فاتحيين فمهم كيزغرتو ولبنات منهم غير ميطلعو ويهبطوو .. ونص حاضي رجال لتحت امتى يطلعو ويتكعد تاهوما ميمونهم مع واحد فيهم ...
يونس وعدنان ووقفو كيتسناو فيهم تاوصلو عليهم اسد وسفيان لي كل الانظار عليه وهو كيحاول يبتسم ماحد كيزيد يقرب ويزيد يبان ليه بلي ناس كتااار لداخل مابقا فاهم واااالوووو طلع ليه دم نيشااان وكولشي كيشوف فيه وتروووه ... وطاموو جات كتجري خدات صبنية على خت حياة وبدات كتشربو الحلييب والتمرر وتفرنس وترحب زعما صواب وهو عاطيها غي ضحكة صفرة ... ومشا سلم على عيشة بالقلب صافي حيت من خلال ماعاوداتليه حياة كيعرف دابا شكون لي باغيه وشكون لي غي كينافق ... ولامار ماحسات براسها تالقاتو جرها من يدها زيدها قدامو طلعات شوية معاه راسها ودغيا هبطاتو تخلعات من داك شوفات لي كيدير حيت ممعصبش من هادشي كتر مامعصب من انها سكتات وخبات وهي عارفة اعدى حاجة عندو ... وهي كتحاول تضحك للناااس حيت عارفة نص كيعرفها تما ... تااسمعو مبارك 
مبارك : ( كيشير جيهة الخيمة ) ازييييدو مرحبااا بييييكم زيييدو دخلو .. وطاااامو تي دخلي لعيلات لداخل 
سفيان واقف كيمشح صبعانو من تعسيلة دتمر وطل غير براسو لعاد الخيمة لي كيقولهم دخلو ليها ... بانتليه عااااامرة رجال بقا غير كيشوف واش هادو كاملين عرضو عليهم وضار شاف فخوتو عارفهم مغايقدوش يكلسو فبحال هاد الجو كل واحد فين كيسوط من غير عدنان لي كيبان شوية مهدن وغير مبتسم وكيدوز يدو على لحيتو مععججب كيشوف فيهم ويضحك ... ما اسد غير مطلع حاحبو مكيضحك ماوالو ... ومبااارك كيتسناهم يدخلو زعما 
تاانقزات رقية جراتو بينها وبينو 
رقية : تااااا فين غااااايزيييدو فين ... زيد كووودامي دخل خوي صالة يكلسو فيها نساااابي وعيلاتهم وتفاااهمو وطلقهم فحااالهم عنهم شغالهم ... وعشي ضيافك بوحدهم هادو راه مكيبغيوش هاد خيلوطة هادي توحلها ليهم ...
مبارك : ااء ولاكن انسيبتي راه ( قاطعاتو ) 
رقية : مكاين ماااا ولاكن .. زيد خوي صالة يدخلو نسابي... فين غادخلهم فين؟ مع حميييدة كالس يننفح ويعطس تاكيطير ميكات طوابل هااا ؟ مع كريمو خاضو غي مايسرق كالس كيطير فبزاطم عباد الله ؟ والكلاب داخلين خارجين والقطوط تحت الطبلة ... باااغيهم يمشيو بلا رجعة ؟؟؟؟؟ 
مبارك : لاااااا لا انسييييبتي للاا ماحنا على فالك
رقية : اوا زيد خوي صالة ودخلهم فضيو شغل وتفاهمو على الدرية وكلا يقصد ديوانو ونتا مشطب دوار كامل وكبيتيه هنا

مبارك لقا عنها لحححق وبدا يشوف معاهم لقاهم بصح مخنزريين عرف راسو قفرها خاف غايهليو ليه الخطبة ... وزاد دخل كيوشوش لطامو ودخلات كتجري خوات صالة لداخل من العيلات لي كالسين كيرضعو ولادهم وها لي كتصايب زيفها وبدات تقااااد تما الحالة ...عاد دخلوهم كيحاولو يبتسمووو للي كيشوفو فيهم ومكيان غير نمييمة فلامار واريح ورتاج ما ابنات عنييهم طااااااحو ملي شافو ولاد ابتهال قلبهم كيفرفر حاطين على اسد كتررر حيت كوميم لخرين كيبسمو شوية هو لي غي عاقدهم وكيشوف قدامو مكيشوف فحد وكاريزما عندو خطيييييرة .. وشي حاط على سفيان وكيتخيلو حياة معاه كيبغيو يموتو بالغيرة 
- واش هادو مغاربا منعندنا ؟ 
- لا منعند الميركان وراه قاتلك لبعلوكة دكلثوم راهم بيضاوا 
- واش لعرييس داك لعينيه خضرين ياك ؟ 
- يااودي انا لي خضرة شوفي سعد حايحاي كيداير ياختي كييييهبل شوفي شوووفي
- عينيا عواجو ماعرفت فيمن نشوف راه كل واحد كيقول لاخور انا حسن منك انا حمقني لي فيدووو لبنت اختي خطيير قالهم مكتعرفوش 
- واااايه انا بقوة ماعوجني مابغيتش نشوف فيه غي كنتعدددب 
- انااا هبلني لعرييييس هاداك كيبان كبييير عليا ... سطاااااااني مكرهت نقتل حياة ليوم ونديه 
- مااشفتووووش داك لي وراهم رااه طاااالع شوفو شحال مسرااااار حممممقني مقبيلة وعيني عليه جاني حسن منهم كاملين ضحيييكة عندو زويييينة 
- تاهاداك عندو لخااااتم فيدو يمكن تاهوا مزووج كاع طارو بيهم راهااا راها واقلة مراتو شدات فيه شتيها
- شفتهااا شفتها يعطني لعما ولا نشوف فهاد الحلاوي وماندوقش ...دابا هادوك باش حسن منا ؟؟ تلقاي غير عمليات تجميل وقوة لفلوس لي زيناتهم ( شوية سكتات وشهقااات بجهد شادة على قلبها ) اويييلي اويلي شكوون هاداك عاوتااااااني
- شكووون ؟؟؟ فيييين فيين 
- موور لعرييييس راااه داير يديه فجياااابو واااااااقلبي واقلبي 
- وااااهيا نااااااري عاد بان هدا ويلي كيداااير ...شوفي لفووورمة ابنت لحرام يهزك بصبعو ... ماشي كيشبه للي هاز لبنيتة فيدو ؟ 
- واااايه كيتشاااابهو هاد زممررر كاملين 
..دخلو لداااخل وسط لهضرة وتقطاع فيهم ... اما رتاج واريج عينيهم غير على برا فشيخات ولامار تبعاتهم جات وسطهم ملور عنقاتهم بجوج 
لامار : زيددو زيدو ونتوما عينيكم فالتييين الله يستر .... شوفو قدامكم عرفتو على شوفات كيديو فيناااا زيدو نهدنو سوق بعدا
اريج : خلعوووني ابنت اللذينة 
رتاج : دابا واش ماغانشطحووووش ؟ انا معندي لي يحكمني بعدو مني 
لامار : زيدي زيدي نتي حكامك بووووحدو غا زيدي خليونا لاسقين فماما وخالتي عيشة ماعندهم مايديرو لينا حداهم .. 
مشاو كلهم دخلو فرقية ودخلو لصالة كلسو مجموعين وتاطامو دخلاتهم كتزغرت وترش عليهم بالمريييشة الزهر وترححححب وهوما عاد رتاحو شوية لي دخلو بوحدهم ... رقية نقداتهم ... وحياة كتمشي وتجي وفلبيت وتغزز فشفايفهااا كاع كلات داك العكر خايفا لايكونو تقلقوووو .. تادخل عنهم مبارك تاهو وخواتات حيااة ولوخريين برااا كيتسنطو وينمنمو ...
مبارك : اعااا قبلوووو علينا الجو دالعروبية هو هدااا عزيز علينا النشاط والزهو ومولاها ربي ولا لا انسسيييبي ( ضرب على كتف عدنان تاعوجو ) 
عدنان : ( شد على كتفو كيبرد الضربة ) لااا لا خود راحتك ..
مبارك : اتبااااااركالله على فاطمة زهراااا كبراااات وزيااااانت اولدتي ارقية وعرفتي اش ولدتي ...
رقية : خمسة والخماااامس والحرمل فالكمامس شافها ربي بملوكو ماشفها عبد مشرط حنكو 
لامار : ( قرصاتها ) سكتي ... شكرااا اعمي تانتا بيناتك الله يحفظهم ليك
بدات طامو كتكب اتاي وترحب ودير راسها ضريفة وسفيان مشغول مع تيل كيكتب ليها مسج 
يونس : علاش ماقلتيلي والو مغاتحيديش منك هاد تشيطين نتي
اريج : صافي دابا سكت تانمشيو لداررر ونهضرو سككت مالكم مغووبيشيين تقول جايين بزز ضحكو شوية راه كيشوفو فيكم 
يونس : منبببعد وننتفاهمو بشوية عليك ... تزعزعي من قدااامي نرد مك لدار 
اريج : وغاااسكتناااا هانا حداك فين غانمشي 
عند حياة 
وصلها مسج منو وكلسات كتقراه كترعد مقداتش تاتحلو... لقاتو كاتب ليها 
سفيان : شنو هادشي احياة ؟ 
حياة : ( كتكب ليه مسج عاضة على شفتها ) سفيااان عفاك غير صصبر راه مكانتش فخباري حتى جييت وخفت نقولهاليك قلتها لامار وهي لي قاتبي سكتي 
سفيان : فينك نتي بعدا اجي ونهضرو فهادشي ...خرجي عندي 
حياو : مابغاوش راه شادين عليا لباب قالك عيييب نتلاقاكم 
سفيان : خرجي باركا من الهضرة الخاةية قبل مانجي نخرجك
قسم غي كتبرقق بعينيييها وتشوف معاهم كولشي لابس سقلي كيبرقق..غير كضور فعينيها وتشوف معاهم غي تزغرت شي وحدة كتخطف.. تابدات تجبد عند لامار شداتها عندها وكتشوف مع اسد ورجعات لور كتهضر معاه غير بشفايفها ودايرة راسها ضاحكة مكترضاش حدا داك طامو 
لامار : اسد طلق داك الغوباشة مالك اش واقع كاع 
اسد : دابا غي شدي فمك..وشربي اتاي..شررربي 
لامار بالخلعة شرباتو كاااامل فدقة وبقات ترمش بعيوانتها شادة لكاس

برا لعيلات مكاين غير شطيح ودوك ليكاارد عاد طالعين بالطيااافررر وناس كيبركككو مبهوضين لليكادو لي تما وحالين فمهم ... وعمامات حياة بداة يدخلوهم كيطلو واخت حياة واقفة عند راسهم حاضية لايهزو شي حاجة سلعيفانة .. وعاااد وصل واحد عم حياة كيحسبوه معرفت شنو حيت ساكن ففرانسا كل مرة يجي يشري طرف مت شي عرض ويبان بيها على ناس ددوار ناااول من الكولف كحلة ديال ولدو لابس حلابة ولايح عليه سلهام وكيشوف غير لفوووق ولدو معاه تاهوا بحالو بواحد صويك معلق فعنقو دزماكريا وضارب تشويكة لجنب وسلسلة والحلاقة كان ديما كيقولو حضي لايوكلوك شي سحور باش تجوج بنات عيشة سعا حياة عنرها تاشافت فيه ومكتحملوووش غير هوما ليوحاسبينهم كرهم ماعرفت شنو كيف اي عائلة كتكون عايشة فعروبية وكتخرج لخاريج ....و عدنان واسد ويونس فين متيبغيو يهضرو مع بابات البنت يبداو يزغررتووو ولا يرحبو وكيسكتو حيت هوما طبعيتهم مايقدروش يهضرو وشي واحد كيهضر ماشي بحالهم كيهضرو فدقة ... وتسناوهم تاسكتو شوية وزاد عدنان لقدام سداري كان متكي لور .. وطلق يديه لي كانو مربعين و تنحنح وسفيان كيغمز ليه يهضرو دغيا يمشيو فحالهم .... وعدنان شاف بجدية فمبارك 
عدنان : مهم الحاج .. كيف عاررف حنا جيينا على قبل حياة ... لخويا الصغير سفيان يكملو حياتهم ان شاءالله نع بعض ونكملو ليهم حنا بالخير 
رتاج غير كتشوف مصدومة طاح ليها العجب ... مكانتش كضن ان عدنان كيعرف يهههضضرر بصواب بحال هاكا صدددمها ... بحلا هزيتي واحد وحطيتي ووواحد غي حالة فمها فيه تاضربتها اريج وجمعات راسها وربعات يديها شافت لجنب مخنزرة محملاتش راسها خصوصا ملي شافتو حابس ضحكة حيت عاق بديكور لي دارنت ليها اريج تجمع فمها مرضااااتش
مبارك : ايييه ايييه اولديي مرحباااا مرحبااااا عاراس والعين ويلا بغيتو تلجوج ولا تلاااتة هااااهوما هههههه
عيشة : سفان بحال والدي وعزيز علياااا ومالقاش ماحسن منو لبنتي ونهار لكبير هاداك .. لاكانو باغيين بعضياتهم حنا مانكملو ليه الا بالخييير 
مبارك : على هو كاين حسن منو اااعويييشة امرحباااا وابف مرحباااا لامبغااتش بزز علييييها 
عدنان : لا لا لااا .. مابغيناش الحاجة ديال بزز حشوما ... بالعكس على خااطرها 
طامو : تي سيري جييبي لعروووسة اعويييشة ( باغا غير تصدرها وكتنغزز فمابرك ينطق بداكشي لي بغات خصها تااتخرج عيشة ) 
ناضت عيشة وسفيان عاد سكد الكككلسة ملي غايجيبوها ... وطامو كتننغززز فمباااارك قتلاااتو ...
مبارك : على خااااطركم بغيتو تالسيمانة جاية بغيتو ليوووم نيييت العادل ديال دوار راه هنا مععرووووض يغيز الشغل دغيااا اش قلتو ؟ 
اسد بقا غير كيدوز يدو على وجهو وكيشوف اش هاد نوع دالابااااء .... وسفيان تنهد ونطق ..

سفيان : كون جات عليا اسي مبارك مانخليها ليك دقيقة ... ولاكن البنت مزال ماسخات بمماماها ونا مزال ماوجدت نهار يليق بيها ... ماتستاهلش نديها فجو مزروب بحال هاكا .... اولا ؟ 
يونس : ( بانليه شششعل معاه خافو يرونها دغيا كيتعصب وبغا يهدن شوية سوق ويهضر مكالمي ويحاول يوصلليه لفكرة ) ااحم .. سفيان اسي مبارك خوونا الصغيير و حياة بنتك دغيا دارت بلاصة بيناتنا وحسبانها ختنا الصغيرة تاهي ... ماجاتش ندوزو لاكط ديالهم بهاد السرعة حنا باااغين نفرحو بخونا ...نتمنى ماتفهمناش غلاط حنا مكرهناش نديوها دابا معانا مي كيف قتليك بغينا نوجدو نهارهم لي يليق بيهم ..
عدنان : ( تاهو شاف لقضية سخنات بغا يطوي دغيا الشغل وكان قاليه سفيان امتى باغي يدير لاكط ) اذن الاحد الجاي ان شاء الله غايكون لاكط ديالهم ... نتمناو ليهم الخير واكيد خودو بالرأي ديال حياة حتى هي امتى بغات ... الى مزال مامستعداش على خاطرها 
مبارك : حيااااة بينتي مواااافقة غااااتهبل ... ماتهزوش ليها الهم ....
اسد : كنضن كولشي واضح .. الله يكمل عليهم بالخير ...( خصو غير يتفك دغيا ) 
مبارك : ( كلاااتو طامو عيا يحيد ليها يدها وهي كتنغز ...وكيشوف عند اسد حيت عارفو هو لي لاباس عليه فيهم ) اااه و وصدااق شحال غاااتعطيوها؟؟؟؟ حيت خواتاتها كلهم عطيتهم لراجلهم فوق المليووون منااااقص ريااااال .. ( رتاج واريج طرطقو عينيهم هدا كيبيع ولا شنو ) 
طامو : هاومنحق باها وماها تاهوما شي دويرة حدها كيشتوو حياة مسيكنة عندهم عزييزة مايقدوش يتفرقو عليها .. احم زعما بغيت نقول يجيو عندها مرة مرة ب بلااا مايتقلو عليها يمشيو لدويرة ديالهم حداها.. عويشة من صباح تبكي وتعطي لكلبها ماصاااابراااش ...
اسد بقا غي كيشوف ماحملش هاد الموووقف حسهم مادييين كيبعيو فالبنت ....ورقية كتغزز فيديها بالحشمة وتحلف عليه ولاماارر خنزرات كتحمد الله لي عيشة وحياة مكينينش كون سخفو لو هنا ....اما سفيان ربع يدو كيشوف فيه مكرهش ينوض يخلطو كون ماتاقا الله وجاه راجل كبير ..ما حتتا لوخرا ماداهش فيها مكيحسبهاش ... بقا فيه الحال من الاب وعندنان هنا رجع بحالو لور صدموه مالقا مايقول رجع لور ربع يديه بقا كيتفرج ويونس كيسول سفيان بعينيه اش كيقول هدا ... جاهم هادشي غريب ماموالفينش ....تانطق اسد ينهي الموضوع ...
اسد : حياة حاشا واش يوفي صداقها فلوس و لا ديور ... شحال ماعطاها غاتستاهل كتر ومغايوفيش حقها وحق غير تسع شهور دالعداب فكرش ماماها باش ولداتها ووكبراتها ووجداتها ليه يعني واخا تاتبغي دير ليها نتا ثمن راه ميمكنش.. حيت ثمنها لحقيقي لانتا غاتقد تقولو ولا مال الكون يقدر يخلصو .. وحنايا بنتك اسي( بقا كيشوف فيها ) 
مبارك : ( تفتفو ) مبااارك.. سميتي مبارك 
اسد : سي مبارك قيمتها عندنا كبر من اننا نديرو ليها ثمن بهاد طريقة .. ولاكن فالشرع والسنة اكيد مغاتاخد صداقها لي كيبقى غيييير شكلي ماااتخفاااش... الاهم هو خصك تفكر فالحياة ديالها مستقبلا وكيفاش غاتعيش ...( رجع لور نها كلامو) اما كولشي كيتقاضا اسي مبارك .. 
مبارك : ( حيد طربوشو حك فراسو وردوو نشف ليه فمو) ايييه اولدي صح عندك الحق 
سفيان غير كيسوط مكرهش يسالي دغيا ماحملش هاد المووقف حيت حياة عندو غلا من مال دنيا كامل ..وهو باغي يبيعها بالرخيص بغا غير امتى يهزها دغيا وماتبقاش مع هاد الاب بصح عجبوو اسد فيه دغيا سكتو خلاه غير كيتفتف ويكب اتاي فالكيسان وخا كولشي كاس عامر ....

سمعو الزغاريت وكلهم شافو للباب بانتليهم عيشة داخلة وشادة فيد بنتهااا .... لي داخلة وراسها فالارض وعماتها وبنات عماماها وللاقرباء تاهوما موراها داخلين .... كانت كتبان كي شي اميرة صغيييورة .. حروفها مسراااارين وطفولين رغن المكياج البارز... وحشمانة طلع عنييهيا ومبتسمة فرحانة فنهارها وسفيان ضهرات على فمو تبسيمة خفيفة ضهشراتو جات زوينة بزااااااف ... وهي هازة تكشيطتهاااا وكلها متووووترة كترعد ولات حممممرة وتزكااااات وقسم تخبات فصدر ماماها من قوة زغااااريت ...وسفيان وقف وعيشة جايبها ليه ... كيطلع معاها ويهبط مبتسم واخا ماراشقاش ليه مي شوفة فيها بالتاج نساااتو هاد الموقف .. ووقفات لامار قربات عنها كتسلم عليها واريج ورتاج تاهاوما ...وزادت لعندو وسلم عليها تاهو بلابيزز طامو بقات غاكتبرقق و كلسات حداه جامعة يديها عنها كارزة على صبعانها ...مقادراش ططططلع فيه العين بحالا عمرها عرفاتووو نزل عليهاا التوتر والحشمة كلسات كتعصر ..والبنات لوخرين كلسو كيشوفو فيها حااااسدينها على داك الشوفات لي كيدر فيها ماحيدش عينو ... وعماتها غايموتو بالسم ...بلا حشمة بلا حيا هز يديها عندو شدها مشبك صبعانهم وحطها على رجليه يدو فيدها وهي كتغززز فشفايفهاااا وتحاول تبتسم ليهم مهبطة راسها وطاااموو جات تاني بداك المرييييشة والعيلات كيزغرتو وعيشة دخلات بواااحد صينية فيهاا الخواااتم والحليب والتمر والورد منثوررر ولي بواط دليكادو لي جااوها من ليبيجو ... بواط دسفيان لي جايب ليها اونسومبل ودعدنان لي فيها لي بوووكل وبروش ديالهم... وديووونس لي جايبليها ساااعة فضضية كلها بلاتين ودرتاج لي سلسلة زوينة وساعة لسفيان ... ودلامار واسد تاهو محطوط ...
واسد غير كالس وكيشوف لسعتو امتى يساليو .. ويونس كتر منو بحالا كالس على شوك ...منغير التخنزيرة لي تطلقات شوية مابقاوش كيما لول ملي شافو خوهم باين من عينيه فرحان وكيبغيها فرحو ليه تاهوما .... ما عدنان غيير مهدن مربع يديه ومرة مرة كيلوح عينيه على رتاج ويطلع فيها ويهبط كيلقاها كالسة مبتسمة بعنين كيلمعو فلعرسان فرحانة ليهم وفرحانة لي غاتحضر لخطابة تقليدية ... غير كتشوف فيه كيقلب عينيه ...جات عيشة هضرات لسفيان فودنو و وقف داير ليها خاطرها وشدليها فيدها وووقفهاااا تاهي وناضت لامار مدات ليه لامار طبسيل ديال تمررر هز تمرة وهو ضاااحك عاد رشقاااتليه جاتو فششكل يجرب هاد الطقووووس وعطاها تمرة وهي طلعات عينيها شاااافت فييييه عااااد شافتو هي ... وعينيها غرغرو بدمووووع وهو ماد ليها ديك تمرة مقاداتش تحل فمها تاكلها غير كتشوف فيه بغاااات تببببكي وتاهو دار فيها واحد نظرة فشكل ديال مااالكي ؟ وكولشي كيشوف فيها
عيشة : حياااة ؟؟ احياااة شدي على لولد
حياة بلا ماحسات طاح راسها على كتفووو وبدات تبببببككي وهو حط داك تمرة وعنقها عندو وهي كتتتبكي وتنخصص تواحد مافهم مالها وتاواحد مايقدر يفهم احساس بنت صغييييرة طول حياتها كانت كضن غاتزوج بالغصب عليها لشي واحد كبيييير وشارف ومابغاهش وغايتكرفص عليها ... حتا كتلقا ربي حنييين كريم قلب الاقداررر وحطها قدااام واحد هو حب حيااااتها وواقف معاها فقرايتها وباغي ليها مستقبل زوين ومأنق فابهى حلة على قبلها وجايب عائلتو وقاااااصد الباب الكبيرة ومكبر بيهااا ...مقداتش تصبر وهي كتشوف شحال كانت كتعدب على قبلو ملي كان كيقووليها عمو فجأة تفكرااات كولشي شحالل لمحات ليه وكان كيدير راسو مكيفهمش تفكرات شحال مرة شافتو مع لبناات وبكااات بوووحدها على مخدتها ..تفكرات اول مرة زلع عليها الشرااااب ... تفكرات نهار سلخها بسمطة ولغيرة لي كانت فعينيه ... تفكراات كولشي وانهارت بالبكاااا ديااال الفررررحة وعدم التصديق ... وتاهو عنقها عندو وخلاها على راحححتها ومبارك غير كيغزز فيديه كيخاااف تمشي تقول لا تاني ماعرفها مالها ... وعيشة بدات كتبكي تاهي مع بتتها عارفها باش كتحس وعلااااش كتبكي ومايفهم لبنت غير ماماها ..

اريج : لاااا حشوووماا مابغيناش البكا ليوووم .. حيااااة 
رتاج وقفاات وجبداتها عنها عنقاتها كتسكتها وبنات عماتها كيوشوشو ويموتو بلغيرة على لمعاملة لي كيعاملوها ... 
رتاج : صافي اصاحبتي حماقتي شوفي هانتي خسررتي مكيااااجك
جابتها قدامها كتسمح ليها دموعها بشوية من الكحول لي ضاااع اما لامار غير كالسة ودايرة يدها على حنكها وعينيها غرغرو معاها ونيفها ولا حمررر ... حيت هي لي عارفة كيفاش تربااو وسط القمييع دباهم ومرت باهم وعارفة باش كتحححس حيت تاللمار دازت من نفس الاحساس ... كالسة وكتشوف فييها بقااات فيهااا وشافت راسها فيها وفنفس الوقت فرحانة ليها حيت عارفة سفيان غايعشها كيف شي اميرة .... واريج طلقات ابيل فيدو لاسبرو كيموت عليها بضضضحك كيقول شحال كانت تااااابعاااه ودابا كالسة تبببكي وتغبن وعطاتو يهضر معاها هو لي ضحكها تاولات تضحك وتمسح دموع ... وشيماء حداه تاهي كتبكي مع ختهااا.. وسفيان جررها عندو كيمسح ليها دموعها و رتاج جات بلور تكلس تااالقات راسها كلسات على شي حد وهي تنوض دغياااا وعدنان دااار راسو متسووقش وضربات ليه رجليه برجلها و دااازت كلسات حداه حيت بلاصتها كلسات فيها عيشة .. 
سفيان : شششش حمقة نتي ولا مالك .. ملي ناوية تبكي ( كيمسح ليها ) علاش درتي هادشي فعييينيك 
حياة : ( مقادراش تخرج الهضرة ) م مكااانش يحساابتني غااانبكي 
سفيان : هههه ياكما كنتي باغا تشوفي المقدم بلاصتي هههه داكشي علاش كتبكي 
حياة : سفيااااان 
رجع عنقهاا وكلشي حل فمووو وكيهضر فودينها ويعنكش فيها معنقها ومبارك مقاد يقول والو وطامو ضورات راسها زعما ماتقدرش تشوف قلة لحيا ههه مزال مشافو والو 
سفيان : جمعي خناااينك الموصيبة يحسابتهم غير جاي نديك بززز ... يلاه شووفي فيييااا احبيبة ( طلعات عويناتها فيه ) واااضحححكي بغيت نشوف ضحيكة يلاااه ..( بدات كتبتاسم حشمانة وتعض شفايفها وهو هز داك تمرة ) يلاااه كولشي دغيا نساليو هادشي .... 
خشا ليها داك تمرة ففمها كاااملة بدات غي كتكح وهوما كييضحكو ورتاج كتصووورهم وعطاتو تاهي تمر وحليب ومدات ليه يدها يركب ليها الخاااتم وبدا كيشووف فيدها شادها عندو... وقربها بشوووية لفمو باسها وهي حشماااانة حدا باها وخوتو وقرب لراسها باسها فجبهتها وداز لودنيها غير بالهمس وهي زيرات عينيها لايبكيها تاني 
سفيان : كنبغييييك بزاف .. كل ماتشوفي هاد الخاتم فصبعك ..تفكري هاد الهضرة ... فين مغانكون وفين مغانمشي وشنو مغايطرا بيناتنا بقاي عااقلة على هاد الكلااام احياة 
بعد عليها وهي حلات عينيها لي عمرو تاني بدموع وهو ابتسم و عاد ركب ليها الخاااتم وركباتو ليه تاااهو تحت الزغاريت درقية و عيشة وطامو ... اسد وبنتو ودنيهم تقبووو ... ما حتى عدنان مولف حيت جداه كانت كتزغرت على اي حاجة ... وكلسووو كيهضروو وعيشة كتفرق عليهم الحليب وتمر .... لامار فيها دودة باغا تخرج تششششطح حيت سمعات شيخات حماو طرح تاني غابيناااتهم وعدنان كالس وطالق يدو ورا ررتاااج مرة مرة كيلوي ليها شعرهااا مع صبعانو وكيهضر معاهم وهي صااابرة ماباغاش دير شي ردة فعل دايرة راسها مبتسمة بزز ... واريج ويونس كيشوفو لتصاوررر... رتاج عيات تصبر ورجعات بلور كتهضر تحت سناانها 
رتاج : طلللق راااك كضضضرني 
عدنان : انا ؟ فين 
رناج : باركا من الطنز ضريتني فشعري 
عدنان : اوووه سووري ( زاااد جبدووو تاتقسحاات ) 
رتاج : ااااح .. عدنااان 
عدنان : ممممم ؟ 
قلبات راااسها غضباانة وقرب لودنيها بطريقة مفرزشة ولبنات لي تما حاكين عليه صافي قطعو الياااس ...
عدنان : علاش عزيز علييك توسخي ليا الضواسا .. شنو درتليك انا باش تخرجي كتبكي قدامهم مافهمتش ؟ 
رتاج : معاارفش اش درتي زعما 
عدنان : ماضربتك مازعرفت عليك ماااغوت وخارجة كتبكي يحساابتهم عير معرفت اش درتليك ... 
رتاج : كدوي ببراءة لي سمعك يقول هذا غير محكور 
عدنان : مالي اش درتليك ؟ انا مفهمتش ... قلتي ليا غاتمشي تجيبي دواء بقيت كتسنا ... راه انا لي خصني نتقلق كدبتي علياا 
رتاج : بانتلي راشقة ليك تطنز
عدنان : مرة اخرى متتعاوديش داك التصرف .. مدرناش علاش تبكي ماتبكيش .. ويلا كنتي اي حاجة غاتبكي عليها خلي ندير علاش نيت ...

رتاج : ( ضارت عندو نيشان فقصهاا ولامار حاطة عليهم ) ياااك ؟ على فين غاتزيد عاااد ؟ وعلاش مانبكيش قالولك مشاعيري حجرة .! واش نتا لعبتي بيا كيف بغيتي وكل مرة كتلعب بيا وتستغل فيا تااكنحس براسي هبيييلة وبغيتني مااانبكيش !!!!!
عدنان : شششش ونتي خصك غير منين تشعلي من بعد ونهضرو فهادشي 
رتاج : لا ليوم لا منبعد ... بعد غير مني ( قلبات راسها وبدات تقلب بعينها تابانت ليها كلثوم اخت حياة ) اححم .. اا ... حبيييبة.. نتي خت حياة ياك ..
كلتوم : اااه اخااالتي 
رتاج : فين احبيبة نقدر لقا لي طواليط ؟... ممكن تيديني 
كلثوم : ااه اجي معايا ..
ناضت داتها ولامار كتشوف فحيااااة وكيموتو بضحك الاخت حسابتها راسها فشي اوووطيييل معارفاشالى طواليط هنا ديكابوطابل ههههه... وداك كلثوم مخرجة رتاج تالقات راسها خرجاتها على دااارر دخلات وسط داك العيلات وجوقة برا كيشششطحو والرجال كايشووفووو فيهااا 
رتاج :ا فيين داياني ؟ ر راه بغيت طواااليط ... زعما يعني ... فييين كديييرو داااك للل .. هاديك 
كلصوم : اااه عرفت علاش كدوي راه عنددنا براااا
رتاج : ااااه مكاينش شي واحد فدار .. فييين كدوشو 
كلثوم : اااه دوش .. واه راه كاين ...بصح كاع مافيهم فسم كااااييي.... فهمتي ؟ 
رتاج : لا انا راه متبغيتش نننن ... بغيت غانغسسل ييدي من التمر ( كتشوف بعينيها كيف كيشوفو فيها وتروها ماواحد ولد عم حياة زماكري كان غايطيح على لكرسي ) 
كلثوم : اااه واخا ااااختي اجي نديك ليه 
رجعات تابعااها كتعكل بداك طالون عينيها عليه خايفة تجيب الررربحة والعنين عليهااا تاجات واحد الرباااعة دالبناات خصهم يديرو المعررفة بززز 
- اااجي اخخختي تشطططحي معانا اجي تفوووجي على كككلبك 
جرووهااا من يديها وهي قربات طيح بداك طالون والارض محفرة 
رتاج : و واخا صبببري نمشي نغععسل يدي بعدا 
- وااااي اجي مااال يدديك نقيييين كيشعلووووو اجججي تشطحي وتعراااكي ... 
خشااوها فالوسط وهي جاتها الحشمة مكتعرف حد تماا غير كتحرك والبنات كيقولو هاادي من ناس دالهاااي مفاتعرفش تشششطح ... وهوما مكاين غير تلواااز 
- قوليلي شنووو سماك الله 
رتاج : رتااااج 
- يااااااختي سبحان الله العظييييم كيفكم كيف سميااااتكم كيف لبسكم كولشي فشششكل ..اناا سميتي رييييماس ( طرطقات وحدة بضحك ) 
- لوااه ناااانسي هههه لاعساااك اختي سمتها عواااطيف 
رتاج : ههه متشرفين اعواطيف سمية زويييينة 
عواطيف : يزيييين يااااااامك ويييححححلي كلااامك .. ( كتشطح وتهضضضر ) قووليلي نتي خت العريييييس 
رتاج :لا ولاكن بحااال خوويااا 
- ايييهااااب ههه
رتاج : نعام ؟؟ 
- يااااااويلي حنا لي فعروبية ومتبعين خبار النوجوم ونتوما لي حداهم معارفينهم 
- يااااااويلي ملي ماشي ختووو كيفاش خلاااااك نتي وتزوووووج بحياة بنت الدوااررر هههه 
رتاج : علاش ماااالها حياااة ... وزايدون انا قدو وبحال ختو ... 
عواطيف : ماتديش عليها سليمة هضرتها ملااااوطة على مال حياة زيييين ولاطاي والعنييين كبار يلقا بحالها ... قوليلي كيكتجي لفاطمزهرا 
رتاج : ( قتلوها بالاسئلة ضوروها بيناتهم بدات كتفكر كيفاش تشرح ليها وتقول خت مرات خو راجلها جاتها طويلة وهي تختصر ) صااااحبتها ... 
سليمة : ومزووووووجة ( قالتها بجهد باش يسمعو لوخرين ) ؟؟؟؟؟
رتاج : هههه لاا مزااااال ... 
عواطيف : اااا يعني تانتي بحالنا عززززززبة ودابا عزازتي عليا ودخلتي لخاطري كتباااانو مكبرين ساعة بااااااينة فيكم ضرريفات .. قوليلي كتقراي ولا غا دار والشقا بحالنا 
رتاج : ههه لا انا طبيبة ( حلووو فمهم ) 
عواطيف : حلللفي بالله 
رتاج : هههه علاش ؟؟؟ 
عواطيف : حلفي بالله تا طبيييبة ؟؟ وناااااري .... مايبناش عليك كتباني صغييييرة ياختي وضريييييفة 
- هانتي اشوفي اعواطيف شوفي كتقكر بزين وطبيبة ومتواضعة وهادو دالفيلاج دايرين كي ستاتي ودافعين كبير 
رتاج : ههه علاش مالها طبيبة ضروري تكون كبيرة ههه
عواطيف : لا عا موالفين نشوفو غي شوااارف .. والله تاااادخلتيلي لخاطري يديروك طبيبة هنا فدوار نص ددوار يمرض غاباش يجي يشوفك هههه غايبقا ياكلو دوا لفار 
بقات رتااج كضضضحك عجبوووها وبقات تقشششب معاهم دغيا طلقات ونساااات هادوك لداخل ودخلوها وسسطهم كيعيطو ليها غير طبيبة وزماكري حاضيها دخلوها وسط الشيييخاااات لي مكاين غاتشقلييب وتحيار بالششعر ورتاج غير واقفة وكتصفق بشووية وبلبااقة وضحكة على وجهها وعواطيف شدات فيديها كيشطحو هي وياهاا والعينين عليها كولشي بغااا يااكلهاا
لداخل 
اريج : رتاج تعطلات؟ غانوض احبيبي نشوفها 
يونس : ككطلسي لارض 
اريج : عنداك لاتكون ماعرفاتش منين ترجع خليني نمشي نشوف اختي مالك ... 
ناضت ولامار شافتها 
لامار : فين غادة 
اريج : رتاااج تعطلاااات راه كلثوم فين كضور 
عدنان طل على لباب بانليه بصح كلتوم برا كاع مامعاها رتاج .. 
لامار : انا جاية معاك 
جات تنوش وشدها اسد 
اسد : غاتعطلي كتر من دقيقة غانخرج لديلمك .. هاد البلانات ديالكم مورقين دابا مغاديريهاش بيااا

يتبع ...