جرها خشها فيه محاوطها بدراعو كيف ولف معاها وكيف ديما ....شحال وهما منخشيين حتى حيد ايديه وناض لبس البوكسر ووقف حداها ...
فؤاد "مد ليها ايدو ": نوضي اجي دوشي ...
يامنة "هزت فيه راسها كان فيها نعاس " : اا غير دوش فيا نعاااس ...
فؤاد : لاا غير نوضي ندوش ليك انا ورجعي نعسي ...
يامنة : ولكن "تفكرات معندها حوايج من غير دوك الي جات لابسة " ..تت ولكن مجبتش حوايج ؟
فؤاد "مجاوبهاش ديك ساعة تحنى هزها بين دراعو لوات ايدها على عنقو بزربة وتم غادي بيها لدوش وكيهضر " : كاينين غير دوشي وبراكة من الهضرة … فيك البكا بزاف ...
يامنة : لااا والله مفيا ...
فؤاد : مزياان مزيان ...مخصش يكون فيك غاتعذبي غير راسك وتعذبي عينيك ...
ابتاسمت ليه حيث عرفاتو عندو صح غير كتهرنن شي مرات ...دخلها لدوش حطها وقفها ومشا طلق رشاشة حتى بدات تسخن خرج مشا جاب بلاستيك فيها شامبو نسائي نوع elvive وباندوش نيفيا وكاع الي غايخصها لدوش حيث صهيب دوش ديالو فيه غير لوازم رجالية فقط وقليلة لان اغلب اوقاتو فالفيلا ...بقات واقفة حتى خوا عليها الما غسل ليها شعرها برفق وخا مكيعرفش مهم مقاتل كان شعرها طويل شوي كرفصاتو وكرفصها اكثر شبع فيها نتيف بالمشيط حتى كتبغي تنقز الدمعة من عينيها ...عاد كمل ليها تدواش جمع ليها شعرها بالخف وكمل ليها الباقي شاد معاها الخاطر وخا شي وقيتات كيتنرفز مع شعرها حيث كتبقى تقول ليه اي وتنقز بشوي ...عجباتو طايتها وعجبو لحمها رطب وداتها نقية مهلية فراسها مفيهاش حس الزغب نقية من كلشي ....جاب ليها بينوار حتى هو خذاه ليها جديد لبسو ليها ولوا ليها فوطة على شعرها وتحنى هزها تاني بين دراعو حتى داها ناموسية حطها ومشا جاب ليها حوايج بيجامة جديدة بسروال ديال كولونغير فالابيض ومكتوبة بالاسوذ وسروالها اسود ودوبييس جداد تاهما لبسهم ليها...غير كمل وهي تسولو ...
فؤاد " كانت هي جالسة فوق ناموسية من بعد ما لبسها وقاد ليها باندة ايدها ...تحنى على ركابيه ...حط ايديه بزوج على حناكها بقجهم ليها حتى خرج فمها باسها فيه ..." : ماشي مشكيل تلبسيه حدايا فدار فيها غير انا وياك قدام راجلك ومع راجلك ...متلبسيهش البراني ولا خوتي يشوفوك مزيرة بيه مغايعجبنيش الحال وعارفاني ايدي سابقاني على فمي فهمتي ؟
يامنة : فهمت ...فين غادي ؟
فؤاد : غادي ندوش انا جاي ...
ابتاسمات ليه وتكحازت تلاحت فبلاصتها تغطات هزات الفون ديالها لقاتو غايطرطق بميساجات من عند البنات ومنهم اوديو ديال نجود كتسول فيها وتاكد عليها واش غايجيو الغد ليه ...حتى صونات ليها لقاتها فااايقة ...
يامنة : قاليا غانجيو غذا فصباح ...
نجود : مزيان ابنتي حاولو تجيو بكري قوليها ليه حيث عندنا ميدار هنا ...
يامنة : اشنو كاين اماما ...
نجود : الحاج داير صدقة جايب الطلبة غايكونو شي عيالات من العائلة مغديين على حساب فطورك وعرسك وبما انه كاين باك وجداك استغلينا الوضع حيث مدرنا والو هنا فاش يلاه دار العرس وعشية من ورا العشا كاينين طلبة ...قوليها لفؤاد ...
يامنة : عندو خدمة مبرزطاه تما ميقدرش ياجل تاني ...
نجود : هذا هو حالى مبرزطاه خدمة مبرزطاه ديما عمرو جلس يومين مقادين ...حنا لاش زو..."كانت غاتكمل حنا لاش زوجناه وحبست " ...تت استغفر الله العلي العضيم مع هاد الولد ...غير تجيو غادي نهضرو انا وياك معاه وتحركي تانتي ديري تلحليح العيالات ابنتي باش تربحي المراة لحلاحة غالبا المراة سحارة ابنتي ...تحلوني عليه ضربيه بسلاحو نقطة ضعف ديالو من جيهتك ...وهو مغايرفضش ليك مهم تتجيو ونهضرو معاه ...
يامنة : تت وااخا صافي ...
بقات تهضر معاها حتى سمعات الباب تحل ديال دوش وهي تقطع معاها حطاتو حتى دخل لابس شورط قصير فالاسود وعينيه باقين حمرين بتدواش ...بقشش فالفون وطفاه وتخشا حداها جرها نخششها فيه واستسلمو لنعاس ...كاي زوجين
أنت قهوتي الصباحية..اشتهيك في صباح كل يوم وأحتسيك رشفة رشفة وأشعر مع رائحتك برائحة البُن تترسب على جسدي وأنا أتكوّر في كف يدك كحبوب القهوة..تسكن فنجاني وما أجملها رائحة وما أجمله صباح..آه كم أدمنتك.…في صباح كل يوم ومع نسمات الهواء العليل وأشعة الشمس المشرقة، تجتاحُنا مشاعر تملؤنا حيوية ونشاط، تفيض بنا مشاعر الخير فنجد أنفسنا نخُط خواطر تعبر عن كُلِ هذا بكلمات بسيطة ولكنها معبرة
ضربتها الفيقة في الصباااح الباكر لقات راسها مخشية وسط احضانه العريضة محاوطها بدراعو ولايذ لاخرا تحت راسها ...هزت عويناتها لقاتو باقي ناااعس ...ناعس حتى فنومه مغوبش ههه عينيه مجبديين ...هزت عينيها لشرجم كانت سما بدات كتزين بخيوط الشمس الدافية ...رجعت كتشوف فيه فتفاصيل وجهو حجبانو عينيه المجبدين فمو لحيتو الي ولات كثيفة ...بغات تقيصو ومتقيصو بغات تلعب ليه فوجهو ومبغات تردد من ناحيته وشيء طبيعي حيث مزالها مضاصراش عليه ...ومزالها كتكتاشف فيه ومزالها كتعود عليه وتزيد تضصر عليه كيف مقاليها هو بنفسو نتي الي ليك الحق فيا وانا الي ليا الحق فيك كلك ملكي وكلي ملكك ...بقات تشوف فيه وفضولها قادها حتى خلاها تمد صبيعاتها لبين حجبانو الي معقودين حتى فنعاااس يا اخي ...سرحتهم ليه ورجع عقدهم ورجعات سرحتهم ورجع عقدهم حتى جاها ضحك وضحكت بشويي ...
يامنة : اننن هههه ...
فؤاد "نطق وهو مزال فنفس الوضعية ونفس تغوبيشة بصوت مبحوح بنعاس " : ماالك ...
يامنة "دلات شنيفاتها" : اوااالو هههه
فؤاد : غير خليهم عليك هكاك دايرين
يامنة "بخجل عفوي حدرت عينيها وزمات فمها مبتاسمة ...حتى هز ايدو شابكها مع ايدها وحطها فوق صدرو ونطق ...": هذا الي تبدل اغزالي ...
يامنة : هههه وكيفاش كاااان ..."بعفوية "
فؤاد : كان غير الناس فيه ضلام وفيه الي مكعجبش ناس ...هاز مية مطرقة ومطرقة كتر من راس ابنت ناااس ...
يامنة : ههه هضرتك زوينة ...
فؤاد "باسها فايدها بوسات متقطعة وقرب ليها شد وجهها دخل معاها فقبلة طويييلة حتى خنق انفاسها عاد طلقها باسها فجبهتها وناض جلس بجنب ناموسية حتى ضور راسو يمين شمال وطرطق عنقو مزيااان ...هز ايديه دار بيهم حركات رياضية ...وهي وراه كتشوف فيه خاشية صبعهت في فمها مبتاسمة ...حتى ناض ...غادي لدوش داز من حداها شاف فيها غمزها وخرج من البيت دخل لدوش اما هي ناضت بشوي عليها حتى وقفات قادت لفراش معافرة بايد وحدة طبعا الي كيخدم باليمنى صعيب عليه يلقا راحتو وصعيب عليه يخدم غير بايد وحدة ...حتى قاداتو عاد تم داخل كان قضا حاجتو وغسل وجهو وحك سنانو ...
فؤاد : حتى نفطرو برا ونرجعو لفيلا ..."كان كيجبد فسروال من ساشيات بدا كيلبس فيه ..."
يامنة : واخا انا نمشي نغسل وجهي ولبس حوايج ...
جاوبها براسو وهي تخرج غسلات وجهها مزيان وحكات سنيناتها كان جايب ليها بوشيط فيها لوازم خاصة بيها ...مشات لصالون لقاتو حاط ليها ساشيات فيهم جلابة فالموف بارد فيها طريزات خفاف بالصم فنفس اللون ...ومعاها بودي وكولون وكاين لبسة اخرا فيها عباية طويلةفالگرونة بدونتيل فالاسود وسروال سليم دجين فالاسود عجبتها العباية يلاه غاتبدا تلبس حتى شمات ريحتو ديال ديودرنت كان جاي لابس غير سروال كحل كلاس بسمطة وعريان من الفوق حتى شدها من عندها لقاها اختارت العباية عاونها كيف العادة حتى لبسها ليها ولبسها بالغين فلون العباية وسروال شاملة لنفس الالوان ...مشط ليها شعرها وجمعو ليها اسفنجة مخربقة ...اصلا شعرها رطب كيف ما دارت ليه كيجيها زوين ...عاد ضرب ضورة دخل كمل لباسو وخرج لعندها ... خرج عندها هاز فايديه صاك جمع فيه كاع الحوايج القدام وقادت هي دنيا معاونة وخا هكاك باش ميخليوش لصهيب دار مرونة ...حاوطها بدراعو ودارها فجنبو كيف العادة خرجو من دار عطا ساروت لعساس وصاه باش يجيب شي حد لي يدير تنضيف لبارطما ...ركبها فبلاصتها وقاد ليها سانتيغ سد الباب ورجع لبلاصتو ديمارا طوموبيل وزادو لمطعم او ريسطو فين غايفطرو في داك الصباح ....
مسافة ديال طريق روهما غادين حتى دخل على طريق افران وخذا طريق لواحد المطعم خارج شوي هو مطعم بالخشب ديكور ديال الغابة منضر ديالو كيفتح نفس (المطعم الي مشا ليه اليزيد وليالي غايفهمو غير متابعين ليالي الغيث ههه ) ...داخل شوي فالبيست ركب سيستيم البيست باش تحول سيارة لرباعية دفع خاصة بالبيست والمناطق الوعرة ...عاد دخل مسافة حتى كانو قدامو ...سكت سيارة وخرج ضار جيهتها وهو يحل ليها الباب خرجات كتشوف فالمناضر الخلابة الي تما والي كتفتح نفس لاي مهموم او ناشط يزيد ينشط ..خذا ايدها شد فيها وتم غادي حتى دخلو واستقرو على طاولة كطل على برا ...
استقرو على طاولة كطل على برا ...كانت جليسة زوييينة طبيعية مناضر تاع سيدي ربي مكاين ما حسن منها لا تصنع لا زواق لا نفاق ...شوي حتى جا واحد الولد كيسربي تما ...
كان فؤاد داير ايدو على دقنو تيحك فليحتو وشاد الفون ديالو كيشوف فيه مدهي معاه حتى هز راسو شاف فالولد لقاه بغا يسول يامنة حيث هو مكانش مسالي ...
فؤاد "خبط طابلة بجهد تا قفز الولد ويامنة "
الولد : اا ن سي فؤاد ( كيعرفوه ) شنو تبغي نفس الطلب ديال كيف موالف ؟
فؤاد "خنزر فيه تخنزيرة تاع القتيلة وغير جاب الله الولد صغير وكان فؤاد كيلعب معاه فاش كانن لولد صغيييور فاللفة حسبو بحال خوتو اما كانو عينيه يلعب بيهم " : فطور بلدي نفس طلب "شاف فيامنة " شنو تبغي تفطري ؟
يامنة : فحالك ولكن بغيت اتاي مبغيتش قهوة ...
فؤاد "هز عينو فالولد بنضرة ديال سمعتي وتحرك "...
الولد : وخاا هي اللولة ...تم غادي حتى ...
فؤاد / معاد عيط لحاج ...
معاد : وخا ...مشا كيجري ...
ضور راسو جيهة يامنة لقاها معافرة مع تيليفون باغا تسجل اوديو هو باش كتواصل اما الكتبة كتقدرش عليها ...
فؤاد : شنو تما ؟
يامنة "هزت فيه. راسها " : هاا غير بغيت نهضر مع ماما قالت ليا من نكونو جايين نقولها ليها ...
يلاه بغات تقوليه حتى وقف عليهم رجل كبييير فالسن شوي شعرو شايب ولحيتو شايبة وطويلة داير طاقية فوق راسو ولابس فوقية فالبيض ...ولدي فؤاااد الله اولدي وعاش من شافك ...
فؤاد "هز راسو شافو وهو ينوض وقف باس ليه راسو وايديه ...شوفاتو عاديين " : الحاج البشير لباس عليك ...
يامنة "تفكرت فين حبسو الهضرة " : ااا غ احم غير قالت ليا ماااما نجود بالي جايين شي عيالات لغذا وجايين شي رجال لعشا عارض عليهم عمي ...
فؤاد : هادشي الي كاين ؟
يامنة : امم اه ..
بقا شحااال كيشوف فيها متاكد انه ماشي غير هادشي الي كاين وكاينة حاجة اخرا ومتمني انه ميكونش الي ميعجبوش حيث لا حس براسو غافلينو غايقلب على سلسفيلهم دنيا ومافيها...هذا فؤاد هادي شخصيتو صبرو قليييل اعصابو على نقشة ...وخاصة لا تغفل او حس براسو ضحكة يا وييييل شيطان منو ...جا الفطور حطو ليهم والي كان بلدي بامتياز ...مستقر على زيت زيتون وجبن وعسل حر وزيتون مشكل اسود ومرقد ومشرمل وكلشي طبيعي بالايد ...خبز ديال دار باقي سخون يترتر ...زبدة وداكشي الي تعجب الخاطر وتفتح ليه وزيت منسم باليازير وزعتر ...وزيت ارگان واملو ...حليوات دواز اتاي غير اضافة ...قهوة كحلة معطرة (معطرة بالهيل سكينجبير قرفة خودنجال ...) كانت ليه هو وصينية اتاي بنعناع ليها هي ...
يامنة "شهاها الفطور فتح ليها نفسها وشحااال مذاقت فحالو فكرها فدارهم" : اممم فكرني في فطور ديال دارنا ...
فؤاد "كب ليها كاس اتاي من البراد " : شنو كنتي كتفطري ؟
يامنة : فحال هذا غير هو انا كان كيعجبني زيت مع كوفيتير يا كنشربهم مع قهوة مخلطة يا كحلة يا اتاي ...ولكن ديما كنديرو قهوة ...
فؤاد : بغيتي نوصي ليك عليها ..
يامنة : اهء لا بغيت غير اتاي توحشتو ...
مد ليها كاس وقطع ليها لخبز قطع صغيرة على قد دغمة ديال فمها ...كتهز وتغمس هنا وهنا وتشرب ...
فؤاد : قادرة تاكلي وحدك ؟
يامنة "جاوباتو بالايجاب " : اه نقدر ...
فؤاد : مزياان بصحتك ...ضار هو تاهو كال ليه وفطر شرب قهوته ...شحال وهما حتى كملو فطورهم ...ناض معاها حتى غسلات ايديها لداخل وغسل تاهو ...مشا عند الحاج سلم عليه ودعو وفطريقو خرج مد اييديه لجيبو جبد منهم فلوس معرفش شحال كمشهم وعطاهم لمعاد ووصاه على قرايته والي خصاتو غايجيبها ليه يوسف وهو غايتكلف بمنحة جامعة ديالو كان ولد كيقرا فالباك وواعدو الى خداه بنقطة مزيانة غايتهلى فيه فحالو فحال خوت فؤاد ...
ركبو سيارة كسيرا نيشان الفيلا ...عند الدخلة بلاصا سيارة حتى بانت ليهم نجود واقفة عند الباب ...
مشا حل الباب ليامنة خرجها حتى عاونها حاوطها ودارها بجنبو كيف ديما وهي معنقاه من جنبو حتى وصلو لعند نجود سلمو عليها ودخلو غادين طالعين حتى وقفاتو نجود بصوتها ...
حتى وقفاتو بصوتها ...ضار جيهتها كيشوف فيها بمعنى شنو كاين ...
فؤاد "شاف فساعتو " : اجلي من بعد الوليدة راجع لفاس دابا عندي شي حاجة ناكد عليها ...
نجود : دغيا اولدي منتعطلوش ...
فؤاد "بقا شحال كيشوفو فالاخير حدر راسو وزاد لصالون وتبعاتو هي ويامنة ...جلس فالفوطوي مفرق رجليه وحاط ايديه كيتسنا فيها تهضر " : شنو كاين ؟
نجود "شافت في يامنة الي حدرت راسها " : احم ولدي اليوم كاينين شي عيالات من عائلة من عرفو ب زواجك كل مرك باك ياجل راك عارف المعارف وصحاب اجل حتى تجي وراك عارف لاش اجل من الاصل نهار قلتي معمرك غادي تعتب المغريب وداكشي الي وقع ...فاش جاو عائلة يامنة استغل الفرصة وعرضنا على عيالات رجال الي جايين فليل مع طلبة ...
فؤاد "رفع حاجبو " : مزياان ولكن شنو بغيتي مني انا ؟؟
نجود : غير خبرتك باش توجد راسك تجلس مع طلبة ...
فؤاد "شاف فساعتو تاني وراها ليها" : لا ...عندي دابا تاكيد على طيارة وشي خدمة اليوم باليل راجعين فحالنا ...
نجود "خرجت عينيها " : كي كيفااش كيفاش اولدي راجعين اليوم الله يا ولدي خليها غير تشبع من شوفة ذارهم ...
فؤاد : المراة كتزوج الوليييدة كتعيش مع راجلها مبقا ليها غراض بيه ...شنو تزوجتها تبقا توحش فدارهم ؟؟
نجود : وايهديك الله اولدي مقلتي عيب وكلامك هو الكبير ...صبر غير اليوم الله يرضي عليك ...علاه لاش نقشنا ليها ...
فؤاد"مكالمي راسو اصلا مخربقاه الخدمة مضغوط من جيمع النواحي غايرةع لضغط ولضغط ايلاف عليه بالجديد وبالصفقات الي جايين وبداني الي دخل فالخط تاني مرة اخرا غايرجع لتوتر والعصاب معاه ...لو فتحو راس فؤاد غايلقاو لا حول ولا قوة فداك راس وهذا هو حال الي داخل لديك الطريق ديما راسو مكاينش ومضغوط " : حيث جاي انا وجدتيها باش نديها او لا ؟
نجود : ايييه اولدي نتا لول على ودك هادشي كامل على ود زواجكم غايباركو ليكم يديرو العادة ديال فطور العروسة وصافي والله يديكم على خير ...
فؤاد : شنو هي العادة ؟
نجود : ااا ا العاة اولدي هي فطور العروسة كيجيو دارهم يباركو ليها صباح ديالها بدق وزغاريت
فؤاد : اشمن صباح ديالاش هاد صباح ؟؟
نجود : احم غا صباح دخلة اولدي " هنا يامنة تزنگت فمها نشف مسكينة موووحااال تقدر تلحلح ليها لااا عرفت المطنگة .."
فؤاد "خبط طابلة الس قدامو بجهد حتى كان زاج غايتهرس وبواحد صوت على شوي يزعزع الحيوط " : شنو شنو الدخلة ؟؟ ندخل ناس فدخلة فالخصوصيات ديال المراة وراجلها ؟؟؟ "هز عينيه منير " الوليييييدة عارفاني نفسي قلليل هضرتي قليييلة عارفاني كيداير عارفاني مكنبغيش نكتر الهضرة فشي حاجة مباغيهاش بلا منعاود لمرة تانية ...عارفاني نهار قلت مرتي شغلي بيها شغليييي بيها ...
نجود : الله يا ولدي شكوون قاليك شغلنا بيها راها مرتك ما ديالت حد من غيرك ...واش غاتشك فيا معارفاكش ومعارفاش طبعك ...هادي عاداتنا افؤاد ونتا بنفسك عزازين عليك العادات ديالنا ...عزاز عليك تقاليد القديمة وعزيز عليك تقاليد ايام زمان ...نسيتي كنتي تقوليا فاش كنتي صغير كيعجبوني حيث فيهم صدق ديال بنادم كان باغي غير ينشط...عقل زمان كان خاوي مفيه لا هم لا ضغط تابع غا الفرح تابع غير جماعة ...مالك تبدلتي اولدي ...غاتخسر ليا خاطري دابا ميبقاش فيك الحال ؟ "دارت راسها تقلقت " ...
فؤاد "بقا داير ايديه على نصو طالق تخنزيرتو كيشوووف فيها ضار شاف فيامنة الي كانت حاضياه بعينيها شاف فيها نضرة عاااافاك ...رجع شاف فنجود ...ساط بعصبية ...مجاوبهمش مشا خرج من صالون داز من حدا نجود ضرب فيها البرد سخون " ...
يامنة: ااه بغيت نبقا وخا غير ليوم ومبغيتش ميمة تقلق عليا تمشي تقطع هضرتي والله تنموت اهى اهى ....
نجود : اذن تحررركي وبذاي تخدمي سلاحك كا مراة وعندها راااجل ...سيييري ...جداك راها فالبيت كتصلي الضحى وباك خرج مع الحاج تالعشية ويجيو مع طلبة ...راوية وسارة شوي وينزلو ...
حركت ليها راسها بالايجاب ومشات طلعات...حلات الباب ودخلات عليه لقاتو واقف عاطي بضهرو لجيهة لاخرا ...ترددات ترددات وفالاخير تشجعات بحركة الي هو اول مرة تديرها ليه ...ضورات ايدها على كرشو وحطت راسها على ضهرو ...
يامنة : عااااافاك خلينا نبقاو غير اليوم صافي عاااافاك ...ا احم ا اراجلي الحبيييب ...
فؤاد "خرج عينيه من الكلمة ورفع حاجبو مدهشر من الي سمع حتى ضار بجهد لعندها ...
ضورات ايدها على كرشو وحطت راسها على ضهرو وزغبية قلبها كيضرب لا من الحركة الي اقدمت عليها ولا من رد فعلو الي معرفاتوش شنو غايدير ولكن كلشي فسبيل الميمة تبغي ومنها نيت تزيد بحركة اخرا انها تزعم عليه واشنو كيبغي راجل غير ان مرتو تشاركو فكلشي حياتو مرضه صحتو وجسمو وقلبو وكل مافيه ...حتى اسراره ...خرج عينيه بهاد الحركة مكانش متوقعها منها عارفها حشومية كانت عاجباه محمقاه وزادت صطات ليه المخ بهاد الحركة الي دارت زادت فرحاتو اكثر انها كتحاول تشاركو فكلشي ...
يامنة : عااافاك غير اليوم عاافاك اراجلي الحبيب ...
ضار بجهد لعندها شدها من ايدها مخرج عينيه ماشي مخنزر وانما متيقش انها قالت هاد الهضرة وخاصة راجلي الحبيب وااااه من هاد الكلمة الي زعزعت فيه الي ميتزعزع ...صحيح ان حاجات او كلمات بسييطة كتقدر انها تحرك فينا احاسيس تخلينا يا غارقين يا هايمين يا فرحانين يا ممكن جدا تقلقنا ...كلمة بسيطة لا كانت زوينة كافية انها تخلينا نبتاسمو مرتاحين ...
فؤاد "هز صبعو بتهديد" : لاخر مرة ايامنة اخر مرة هاني نعاودها نعرف شي حاجة دارت من ورايا غادي نخياب معاك ...مديرينيييش ضحكة ايامنة راني نعرف نعرف متخلينيش نستعمل معاك تانتي وجهي الخايب ...داكشي الي بغات جداك مغاتشوفوش ...وخا معندها فين تشوفو حيث بقا لهيه ...ولكن نعرف خصوصياتنا وصلوها بطريقة خرا مغاااديش يعجبكم الحال ...انا مغاديش نكون فوقيتة الغذا حتى ليل عاد نجي ...وصيتك دابا ولا لا ؟؟
يامنة "بخوف كتر" : و واخا ..."ملقات متقول من غييير واخا " ...
فؤاد "شحال كيشوف ليها فعينيها شحاال قبل ميتحنى كامل لعندها واخدها لعندو فقبلة عمييييقة كيجر فشفايفها بحب ونهم كيمص فيهم بواحد الوتيييرة بطييييييئة حتى صافي حس براسو غايسخن تاني وهو يعنقها ..." : راك كتمحنيني ايامنة كتمحنيني ...
خلاها فرحاانا ولكن عطاها هضرة تخليها تهز الهم ...عقلها تيقول ليها را نجود غاتفك جرة بلا ميعرف وفعقل اخور تيقوليها غاتجيبيها فراسك شنو هاصك خاطر خاطرك دايرو ليك ...تيلعب عليها تانيب الضمير فهاد اللحضة...كمل هو اشنو كان كيدير هز الفون دارو فودنو كيعيط خشا لكونطاكت فجيبو ...داير لفون فودنو وتحنى باس ليها راسها وغمزها وخرج من البيت ...خلاها واقفة حايرة بين البينات خافت جداها تقلق منها وتقطع كلامها عارفاها مراة كبييييرة مبقاتش تعزف لصواب معارفاش بهاد جيل ...هذا هو عقل عيالات زماتن وخاصة هي كانت قابلة قديمة ...يعني معندها مدير وخا تفهمهاانه خلاتو فروسيا غادي تقلق منها وهي معارفاش شنو وقع خافت تقوليها مبغيتينيش نشوف صباحك مراضياش بيا خافتها تقول اقاويييبل عدة ...مالقات غير انها تستلم لفكرة نجود ...ضارت بدلات حوايجها وهي تهبط عند نجود جاو دريات حتى هما هبطو يفطرو ...
واحد شوي وهما يطلعو وطلعو مع يامنة يعانوها باش توجد راسها بينما يجيو العيالات ....
راوية :لبسي قفطان خفيف واسع شوي ميتسدش باش ترتاحي فيه واحسن ...
يامنة "وراتها فين كاينين قفاطنها": راا هو لهيه بلاصتهم ...
خرجو من عندها وهي مشات هبطات لتحت كانو مزال مبداو يجيو العيالات ...هبطات لصالون لقات جداها كاينة ومعاها نجود ...كانت تاهي مبدلة لابسة قفطان فحال شكل جلالة غير هي بلا قب فالاخضر بارد ومي زينة لابسة دفينة بتحتي ديالها فيها الورد وشال لاوياه على الزيف ديال حياتي كان شال مورد وزيف حياتي بيض مكحلة عينيها الي عاد كملتهم وغير كتضهصص كتجيب تكحيلة ناضية ههه ...
نجود : بنتي يامنة جيتي ...
يامنة : هاني ...مشات سلمت على جداها نخشتها فيها تبوس وتقول ما بست ...كانت دنيا معطرة بريحة البخور مخلطة بريحة الطياب ...ذراري كانو فالخدمة حتى يوصل وقت طلبة ويجيو جميع ...الياس كان خارج داهي الوقت باش ميتلقاش بخوه فهاد الفترة ...
زينة "مدت ليامنة كحل ومرود ديالو " : شدي كحلي عينيك وهما هكاك حمرين حتى ولاو دابلات مالك كتخليهم هوك شدي كحلي ...
يامنة : ميبغييش فؤاد نكحل اميمة مكيبغيش نديرو من غير فدار ...
يامنة : وخا "قبطات من عندها الكحل والمرود شدات مرياة وهي تكحل حتى تجخلطو ليها عينيها عطاتها تمسح ب كريم وكلينيكس حتى نضفات جناب ...جاها لكحل خطييير مع عينيها خضرين عاد مازاد برزهم ...
يامنة الجزء 25
محتوى القصة
التنقل بين الأجزاء